السلام عليكم
اهلا مدونتى حبيبتى

مش عارف ايه اللى حصل .. المدونه ضاعت منى وكلمة السر اتغيرت ومين اللى غيرها وازاى وانا مش عارف حاجه خالص .. بذلت مجهود جبار وشغلت مخى وعرفت اوصل للمدونه من غير كلمة السر .. تقولوا ازاى اقول بالفكاكه والفهلوه .. مش احنا مشهورين بالفهلوه مره تصح ومره تخيب والمره دى صحت مع انى ولا بفهم حاجه فى الكمبيوتر بس الحاجه ام الاختراع ولا الحوجه لكلمة السر ولا الحوجه حتى للايميل .. بس مش عارف اعرف اعملها تانى ولا لأ .. الايام بيننا

من اكتر من اسبوع وانا كان عندى كلام كتير عايز اقوله .. بس .. لما ضاعت المدونه طار كل الكلام .. يا دوب انا كنت راجع من الفيس بوك للمدونه وضاااااعت .. وانا بقى لى اسبوع معكنن وكل الكلام راح منى .. لكن ح اجيب اللى انا عايزه وافتكر اللى انا عايزه

عايز اقول ان العيشه بقت ترللى والموضوع بقى سمك لبن تمر هندى واللى بيفهم بيتكلم واللى ما بيفهمش بيتكلم .. كان زمان قبل المخلوع بيقولوا على اللى بيقول كلام معقول ( قله مندسه ) انا بقى اليومين دول مندس .. بيقولوا اليومين دول على كل اللى يقول كلمه تخالفهم (فلول النظام ) انا بقى فلووول .. الموضوع بقى ارهاب .. بقى يااما معايا يا أما على واللى على مش معايا واللى معايا مش على اللى افهمه لما نتفق على موضوع يبقى ننفذه مش ننقض اتفاقنا ونقول اصل كذا واصل كذا .. فيه ناس بيقولوا عايزين نجهز نفسنا ونأجل الانتخابات .. والله يا اخويا لو اجلت الانتخابات سنتين برضه ما حتعرف تجهز نفسك ..

يا اخوانا .. فوقوا .. انفدوا بجلدكم .. اللى حصل سنة 1952 ممكن يحصل دالوقت .. مصدق بتاع ايران واللى اسس للثوره الايرانيه راح فين .. صحيح ثورته قمعت لكن الغضب كان مكتوم فى الصدور والستاره خلاص ما بقتش مداريه حد وكل واحد كان بان على حقيقته .. الشعب الايرانى انتفض وعمل ثوره عظيمه .. وبعدين جه الخومينى على الجاهز وخدها لنفسه .. هتلر نفسه جه بعد ثوره المانيه رائعه .. وخد الثوره لنفسه وانتوا عارفين عمل ايه فى العالم وعمل ايه فى المانيا .. حتى الثوره الفرنسيه .. كانت للحريه وقعدت سبع سنوات تأكل فى قادتها وتأكل فى نفسها وروبسبير المحامى اللطيف والدمس والخجول كان مولعها نار ومشانق ومدابح

فوقوا .. فوقوا .. انفدوا بجلدكم .. واللى عايز يقول على مندس .. مافيش مانع

واللى عايز يقول على فلول .. مافيش مانع
طب اقول لكم .. قولوا رجعى .. او حتى قولوا ضد الثوره
أنا رئيس القله المندسه زمان وفلول النظام حاليا .. انا فشكووول

اللى يطلع من داره يتقل مقداره

شوفوا بقى يا جماعه بصريح العباره انا ما لقيتش نفسى فى الفيس بوك .. انا قلت يا واد خليك اسبور واعمل زى الكل ما بيعمل وروح على الفيس بوك عشان تبقى ماشى مع آخر صيحات النشر وتبقى فيس بوكى لكن فى الحقيقه لقيت الفيس بوك ورشه وغلبه وضوضاء ومش تعرف تقول اللى انت عايزه ولا تعرف تبعت رسائل ذات محتوى علمى او اجتماعى .. لكن مجال الفيس بوك مجال تجميع لآراء واتفاقات يتفق عليها مجموعه من الناس وبعدين يبتدوا يعملوا اللى هما اتفقوا عليه .. مش معنى كدا انها مش مهمه .. لأ مهمه جدا زى ما عملت الثوره .. بس مش مجالى ولا التيب بتاعى .. احم احم ولقيتنى زى الاطرش فى الزفه مش عارف اعمل حاجه ولا عارف اتواصل مع حد وبصراحه لقيتنى جاهل جدا فى الفيس بوك وما انفعش اكون فيس بوكى خالص عشان كدا رجعت تانى لفشكول دوت كوم واكتب الرسائل اللى انا عايزها واللى اقدر اوصلها لكل الناس وكل اللى بيحبوا فشكول وفشكول بيحبهم .. اما فى الفيس بوك ما عرفتش اعمل حاجه خالص واكيد ناس كتير زعلت منى عشان يمكن بعتوا لى رسائل وانا ما عرفتش اتواصل معاهم .. جاهل بقى .. اعذرونى .. ومن النهارده اعود الى فشكووول دوت كوم بيتى الاصلى ودارى وعشان ما يتقلش مقدارى .. والى اللقاء قريبا ونبتدى نكتب ونقول ونصول ونجول . ومش معنى كدا انا حاسيب الفيس بوك خالص لكن مش حيكون مجهودى الرئيسى وسيعود المجهود الرئيسى الى فشكووول دوت كوم.

تحياتى واللى اللقاء

الملحمه .. والشعب .. والثمار

عبر التاريخ كان المصريون يشكلون ملاحم متتاليه ثم لا يجنون منها شيئ ويستأثر بالثمار من ليس لهم حق فيه

عبر التاريخ ومنذ قام المصريون القدماء بالتضامن مع مينا نارمر وانخرطوا معه فى الحروب لتوحيد البلاد جنوبا وشمالا فجنى المصريون العلقم وجنى مينا الملك

فى تحرير مصر من قبضة الهكسوس وانخرط المصريون مع اول من قام بالدعوه لتحرير البلاد من حكم الهكسوس (كاموس) وانخرط معه المصريون فى القتال واكملوا مع احمس حتى تم طرد الهكسوس جنى احمس الملك وجنى المصريون العلقم

قام المصريون ببناء الاهرامات ودفن فيها خوفوا وخفرع ومنكورع ومات المصريون البناؤون ودفنوا فى رمال الصحراء بلا طقوس جنائزيه أو اقنعه ذهبيه او خبايا .. او .. او

منذ ان قام المصريون بالحرب مع (محمود بن ممدود) (سيف الدين قطز) وانتصر على التتار ثم جنى بيبرس الثمار وأسس لدولة المماليك فى مصر حتى وقتنا الحالى ولم يجنى المصريون شيئ

مثله ما فعل المصريون مع صلاح الدين ولم يجنى المصريون شئ

مات كثير من المصريين فى حفر قناة السويس وتمتعت بثمار القناة انجلترا وفرنسا حتى حسنى مبارك ولم يجنى المصريون اى ثمار من قناة السويس واكتشفنا ان ايراد القناة بالكامل يذهب لمؤسسة الرئاسه ستة او سبعة او خمسة مليار دولار سنويا ... يا خرابى ... والمصريون يمصمصون اسنانهم على لا شئ

احمد عرابى ورفاقه هتفوا باعلى صوتهم امام خديوى مصر (والله لن نورث او نورث بعد اليوم) وحسنى مبارك يمهد الطريق لتوريث ابنه جمال مبارك السلطه فى مصر وتوقفت مصر عن كل شيئ الا عن الاعداد للتوريث .. ولكن الله سلم

قام العسكر بانقلاب 1952 ضد الملك (رحمه الله) ووقف الشعب المصرى مع الانقلاب وقالوا ثوره (نمشيها ثوره) واسس انقلاب 1952 لدوله دكتاتوريه بعد ازاحة محمد نجيب .. ومازال نظام حكم عبد الناصر يحكمنا حتى هذه الساعه الى ان قامت ثورى 25 يناير 2011 فهل سوف نجنى ثمارها

بقية الملحمه فى المقاله القادمة تفاصيل 25 يناير2011

المشهد ليس فى القاهره والاسكندريه وعواصم المحافظات المصريه

المشهد فى عواصم الدول العربيه كلها... المشهد فى العالم كله ... كل العالم اهتم بالهم المصرى ... كل محطات العالم الاخباريه قاعده لينا وفاضيه بتذيع اخبارنا 24 ساعه وليس لهم هم الا نحن ... العالم كله قلق مننا وقلق علينا... على مدى اكثر من سبعة عشر يوما وعندما وصل الحدث الى ذروته يوم الجمعه 11/2/2011 حبست مصر انفاسها ... وحبس العالم انفاسه خوفامن مصر وخوفا على مصر ... حتى جائت اللحظة الفارقه والحاسمة لحظة الانتصار ... انفجر المصريون فرحا بعد ان حبست عنه الفرحه لمدة ثلاثون عاما انفجرت معه كل العواصم العربيه فرحا واحتفالا بنصر المصريين .

الملحمه .. مصر فعلت الملحمه

قريبا نكتب سلسلة مقالات عن الملحمه ... ملحمة شعب وملحمة وطن وملحمة دوله

كلما ظهرت صور الشهداء على الشاشه ... ابكى ... انتحب بحرقه ... لا استطيع حبس دموعى ... لا نامت اعين الجبناء فقد اردوهم وقتلوهم قبل ان يروا ثمرة افعالهم ... لا نامت اعين الجبناء ... رحمهم الله والهم امهاتهم وآبائهم واهلهم الصبر والسلوان... دمهم فى عنق الطاغيه ... لا نامت اعين الجبناء

من فضلكم .. اللى عنده دم .. من فضلكم عايزين شوية دم

الاحداث متسارعه .. النظام بينهار .. الشباب والشعب رجاله .. بس التمن غالى
مش وقته عشان نحلل ونشرح الاحداث .. يمكن البوست الجاى
الواد الازهرى الجدع .. شغال على آخره ميدانيا فى قلب القاهره
رايح دوار على المستشفيات بيتبرع بدمه .. وبيطالب بالنيابه عننا ولو اننا كلنا مفروض نكون معاه نساعده .. لأ .. نساعد نفسنا .. نقف جنب نفسنا .. جنب اخواننا .. جنب آهالينا .. جيرانا .. ولادنا .. شعبنا
الحال فى مستشفيات القاهره صعب .. الحال مش ولا بد .. الجرحى كتير .. عايزين دم .. الدم ناقص فى المستشفيات .. من فضلكم .. كل واحد قادر على التبرع بالدم يروح الفرنساوى ولا ابو الريش أو اى مستشفى بالقاهره يتبرع بما يفيض به الله عليه من الدم .. زكاة عن صحته ويا لها من زكاة عند الله ورسوله
من فضلكم الموضوع جد .. من فضلكم مستشفيات القاهره محتاجه دم .. الجرحى كتير واللى محتاجين الدم كتير
الازهرى اتصل بى عشان نتقابل بكره واتبرع بالدم .. لكن اتفقنا على ان اللى عايز يتبرع بدمه .. ممكن يتبرع بيه فى مكانه .. فى بلده .. وكله ان شاء الله يوصل للمرضى .. تقريبا كل المحافظات فيها جرحى واللى يقدر ياخد حد معاه يبقى اكثر الله من خيره
بعدين نبقى نتكلم ونحلل ونقول وناخد العظه والدرس مما حدث وايه اللى كسبناه وايه اللى خسرناه ولو ان مهما كان حيكون مكسب

تحياتى لكم جميعا

تحديث

يا دوب ما لحقتش اكتب البوست واذا بخبر سريع يصلنى ان هناك فى مدنة شبين الكوم مظاهره حاشده امام كوبرى شبين امام محلات عمر افندى بدأت الساعه الثالثه

رجاله وطول عمر ولادك يا بلدنا رجاله

الله الله يا بلادى

الله الله

الله الله يا بلادى

الله الله

قالوا عليكى انت جثه بلا حراك

وانت امبارح قلتى كلمتك لا انا جثه ولا انا بلا حراك

الآلاف نزلت الشارع ومش خايفه

الالاف هتفت زعقت صيحت مش عايزينك

مش عايزينك

وانت يا راجل برضه قاعد على نفس البلد

مش ناوى تفارقنا الله يخليك

يا راجل كفايه عليك

يا راجل خلى عندك شويه من الاحمر

رجاله وطول عمر ولادك يا توانسه رجاله

كنت غيران .. ليه مش احنا كمان


واتارى احنا رجاله وطول عمر ولادك يا بلدنا رجاله

آه لو كنت عزيزه .. تخاريف فشكوليه

الواد الكبير يصحى من النوم ...

يا بابا ... عايز 100 مليون جنيه عشان الموضوع الفلانى

الواد الصغير يصحى من النوم .. يا بابا عايز 10 مليون جنيه عشان الموضوع العلانى

البنت الوسطانيه ... يا بابا الموضوع بتاعى فى النقابه لسه ما خلصش

لطفك يا ربى

واللى زاد واللى غطى بقى ... الحاجه تصحى من بدرى وبالقبقاب دب على دماغى ... طبعا من كتر ما انا متعود على كده ... ولا يهمنى .. يا ما دقت على الراس طبول ... لحد ما يطلع لى كالوا كبير اقوم احسس على دماغى ولما احس بالكالوا اقوم يا دوب آخد بالى ... فيه ايه يا وليه ...تروح تجيب الشيئ الفلانى على راسك من فوق ... حاضر يا ستى ... تروح تجيب الشيئ العلانى على كتفك ... من عينى يا ستى ... تروح تجيب الشيئ الترتانى على ضهرك... انت تأمرى ياستى

وفى الشغل كله يركب على ضهرى جميلى سواء الريس او المريوس ... ولا يهمنى حاجه ... برضه ياما فى الجراب يا حاوى

كمان الحكومه ... ضرائب الدخل ... ادفع ... يا سلام ّّ!!! حد يقول للواجب الوطنى لأ ... الملفات الفلانيه لازم تخلص النهارده ... دا شغل حد يزهق من الشغل ... لازم تخلص شغل المصلحه النهارده ... طبعا ... مصالح ناس وماله وافضل طول النهار عامل زى الحمار ... الكل راكب الحمار جميلى ... والحمار يشيل ولا يهمه... حمار بقى والحمار صبوروكل هم الدنيا متشال على دماغى ... ما يشيل الا الشاطر... وحضرتى ... قصدى الحمار فرحان قوى بنفسه والبيه رايح والبيه جاى ... وما حدش واخد باله ان البيه دا عباره عن حمار شايل الدنيا كلها فوق دماغه وطول ما هو ماشى عمال يردد ... انا راجل ... انا راجل ... انا راجل ... طب يا راجل ... شيل يا راجل ... اشتغل ياراجل ... ادفع يا راجل ... هأ ... هأ ... هأ ... طز فيك يا راجل .

وفى لحظه اخدت تعسيله من غير ما احس ولقيتنى والله اعلم طفله جميله واسمها عزيزه والطفله تكبر وتكبر لحد ما بقت جميله... هيفاء القد ... ممشوقة القوام ... بيضاء البشرة ... نواعم ... شلولح على رأى عادل امام وكل ما تروح او تغدوا امام الرجاله تلاقى عنيهم حتبظ من مطرحها... ويعدين اكتشفت الحكايه دى ...

دا أنا ...عزيزه ... يا سلااااااااام وخدت بالى من نفسى ... اقوم بقى اديها دلع ودلال واتمخطر قدام الرجاله والاقى الرجاله هطله وبرياله ... اقوم ازود فى الدلال وازود فى المرقعه ... وشويه شوية ومع ندرة الشغل والعمل واقوم اسمع كلام ولاد الحلال ... هو فيه منك ... يا دلالى ... والله لو تطاوعينى كنت تاكلى الشهد ... دا أنا ...دا الفلوس حتترمى تحت رجليكى ... يا حلولى ...ولا كاترين زيتا جونز فى جمالها ... يا وله ... طب اقفى جنب انجلينا جولى كدا وانت تفشريها ... بذمييـيـيـيـتك ... طب خلى نيكول كيدمان تمشى معاك فى الشارع وشوفى مين فيكم اللى حيتعاكس ... ما تقولش .

لحد ما اخد شوية غرور فى نفسى ... تشتغلى رقاصه ... يا عيب الشوم ... يا راجل اتلم شويه ... عيب ... ما اقدرش ... انا بنت ناس ... طب ازاى ى ى ى ى ؟... طب فيـيـيـيـيـن؟ وتبتدى الحكايه ... رقاصه فشرت ولا تحيه كاريوكا ... ولا ساميه جمال ... هو فيه رقاصه فى مصر زيك ...دا أنا ... عزيزه اللذيذه ام من غير جيبه وبلوزه ...وحياتكم ... ما فكرتش ... على طول ... هو فيه حد لاقى شغل

والحظ يضرب بقى معايا والاقى واحد اهطل وبرياله برضه عايز يخطبنى ... واشترطت عليه ان العصمه تكون فى ايدى انا ... وعشرين مليون جنيه مهر مقبوضه وحياتكم و3 شهور وطلقته ... واعيد الكره بعد 3 شهور عده... وغيره ... وغيره ... وغيره... والاقى العمليه احلوت معايا ... امال ايه ... هى السنه فيها جوازتين وكل سنه بـ 40 مليون جنيه لحد ما اعملهم واصرهم على قلبى كده .. امال ايه ... اصل المهابيل كتير ... واللى برياله اكتر ... عزيزه اللذيذه بقى وبعدين عند الاربعين اعتزلت الجواز واعتزلت الرقص كمان ... وانا عايزه ايه بقى ... الفلوس اكوام اكوام ... والشهره جابت العالم من شرقه لغربه ... مش قلت لكم عزيزه اللذيذه اللى من غير جيبه وبلوزه ... وفى لحظـــــــــــه

هب ... دب ... آآآآآآه يا راسى ... قبقاب تانى على دماغى يا حاجه ...

فرحانين انكم رجاله ... طب خدوا على دماغكم بقى ... شيلوا يا غجر

لأ ... لأ ... لأ ... لأ

لا هو مصرى .. ولا هو مسلم

لأ ... لأ ... لأ ... لأ

انا مسلم ومسلم جدا

انا مش موافق ... رافض ازهاق الارواح

مين اللى فاكر تهديدات القاعده من حوالى شهر او شهرين

لاهم منا .. ولاهم مسلمين اذا كان الفاعل مسلم

انا عندى شك انه يكون اصلا مسلم او مصرى

لازم مواجهه فكريه

لازم القانون يشتغل

ابعدوا المؤسسات الدعويه عن السياسه

لازم كل واحد ياخد حقه

كفايه ندفن راسنا فى الرمل

احنا مش نعام

تعالوا نشوف المشكله الحقيقه

مش عايز اقول حاجه .. اقول بطاطا أقول بطاطس ولاقلت حاجه

سمك ... لبن ... تمر هندى

انا من ضيع فى الاوهام... عمممرررررره

عينى يا سيدى ... وكمان

احنا احنا احنا .. اللى امنا للزمان .. احنااا

عمر ديل الكلب ما يتعدل

وضاع منا الأمااااان ... وجرررحححنننا

تررم تررم تررم

ان تابت ....................

واحنا احنا احنا ... اللى آمنااا ....

احنا احنا احنا .... اللى آمناا


مافيش اى حاجه ...

حد يقدر يقول للغوله عينك حمرا

...........

يا غوله .. عينك حمرا

انا الاديب الادباتى .. لبست شوال وشيلت خرج بجيوب ... اتهبل الاديب يا ولاد ... صواميل عقله اتفككت ... ماشى فى كل ميدان يهبل ويطبل ويلت ويعجم ... ويطجن.

من ضمن ما بيطجن الاديب الادباتى ... قال ايه بيهبل ويقول ايه ... حمرا يا طماطم ... خضره يا ملوخيه ... يا مقمعه يا باميه

طب ايه العلاقه بين الطماطم والباميا واللى حصل ولا يتوصل ... ولا فيه اى علاقه ولا فيه اى مناسبه ... مش بقول لكم أديب واتفككت صواميل عقله. وعلى رأى البت العسل ريم ماجد أنا كمان ممكن اقول لكم كلمه فى سركم ... مش هى بس اللى بتعرف تقول ... انا كمان اعرف ... طب مش مصدقين ... خدوا بقى دى :

ضرب زيد عمرو ... طب وايه الجديد ... ما هو زيد من يوم ما صحينا على الدنيا وهو بلطجى وبيضرب عمرو على مسمع ومرآى من الدنيا كلها ولا حد عمل له ولا بيعمل له حاجه والكلام دى من اكتر من 50 سنه ... طب ايه الجديد يا ادباتى يا اهبل ... الجديد ان الواد عمر نبيه ... واديب... بس لسانه زالف وطويل حبتين...

يا صهبجيه .... واه يا لالالى

فى مولد السيد البدوى ... واخدين بالكم... السنه دى السيد البدوى طلع من المقام بتاعه وقعد يقرأ قرآن مع المصلين ... ويقف ورا الامام ويصلى ... وعامل فيها صاحب المطرح ويقعد يلف ويدور فى الجامع ويتفقد احوال خلق الله ... قوم اييييه... لقى جماعه قاعدين فى ركن من الجامع وبيتكلموا كلام فى العلم ... واليوتوبيا ...المدينه الفاضله .... دا جامع ... امسك ... كفره ... حيدخلوا النار ... وراسه والف سيف لازمن يطلعوا بره الجامع ويفكونا من غلاستهم ورزالتهم ... كانوا محمود وابراهيم وحسنين وعيسى ... مجموعه قليلة الادب كدا ... اصل ايه ... خليكوا معايا امال:

شيخ الجامع وامامه ... وعد سيدنا الشيخ السيد البدوى رضى الله عنه وارضاه انه حيسمح له بعمل حلقة ذكر فى الركن الشعبى اللى قدام الجامع ... ومالكش دعوه بالركن اللى بيقعدوا فيه الناس الكبره يتحاكوا ويتشاورا ... ما لكش فى الركن ده ... قوم ايه ... وعده كمان بـ 20 ويمكن 30 واحد يقعدوا يزكروا معاه ... بشرط .. لازمن وحتما وهلبت وربما تساعدنى فى طرد الجماعه بتوع اليوتوبيا دول بره ... وسيدنا الشيخ ما كدبش خبر .

والاديب الادباتى ماشى فى الشارع ويهبل ويقول

يا صهبجيه ... واه يا لالالى ... حاجه م اللى هيه ... واه يا لالالى
حبة آهات على عينى على لالى ... على ترللى
الحلو قال رايح ولا جاشى ... الحلو قاااال راااييييححح ووولا جاشششى

حمرا ياطماااطم ... خضررررا يا ملوخيييه ... يا مقمعه يا بااااميه

الرجاله ... العشره بقرش

فرحان بايه .. جاتك خيبه

السلام عليكم

عيد سعيد وعمر مديد وكل عام وانت جميعا بخيرويعيده الله عليكم بالخير واليمن

والبركات

اليومين دول انا عندى فى البيت مرستان .. عربخانه .. مولد وصاحبه غايب

بنتى جات من السعوديه فى اول رمضان ومعاها حبيبة قلب جدها ملك وحبيب قلب جده محمود اللى وديته المطار من حوالى سنه ونصف وعمره 30 يوم .. ورجع بسم الله ما شاء الله. ربنا يخليهم ويبارك فيهم عندى بقى فى البيت احمد ابن اسامه .. ربنا يحرصهم ويخليهم ويبارك فيه هو كمان .. بس هو موجود عندى تقريبا طول ايام الاسبوع وقاعد يلعب مع جده لوحده وواد مؤدب خالص والله .. قوم ايـــــــه .. لما جاء له ملك ومحمود ولاد عمته واتحدوا الثلاث عيال مع بعض .. عينكم ما تشوف الا النور .. لا كرسى مطرحه .. ولا كبايه ولا شلت الانتريه مطرحها والبيت من اوله لآخره زباله .. اكياس شبسى .. واكياس مش عارف اسمها ايه .. ومكعبات .. وبقيايا اكل فى كل حته .. والبيت يضرب يقلب .. بس حلو ربنا يديمها ضربان قلبان ..

قوم ايـــــــه .. الواد محمود الكبير بقى عامل فيها راجل وكل يوم يشخت فى العيال ويمكن اديه تطول عليهم .. اقوم انا ارد له الصاع صاعين .. انت يا خويا عامل فيها راجل وما حدش قادر عليك .. انت يا بنى ما قريتش فى العلوم شويه وعرفت ان حكاية انك راجل دى ما بقتش عجبه ولا بقت لها لزوم خالص .. يا بنى دول حيخلصوا على جنس الرجاله قريب .. ازاى يا بابا .. قلت له .. اقول لك ازاى .

يا ابنى ربنا خلق آدم من تراب .. وعشان استمرار النوع خلق له حواء من ضلعه واستمر الخلق من يومها لحد النهارده بالطريقه دى وربنا وازن الكون ووازن البشر بالطريقه دى كل راجل يلاقى له من خلق الله حواء وكل حواء تلاقى لها راجل .. قوم ايه .. الخلق بقى الظالمين لانفسهم ومن يوم خلق آدم لحد النهارده الرجاله عامله فيها قمع ومنفوخ وعاوج رقبته كأنه الزناتى خليفه ولا ابوزيد الهلالى .. ويا ارض انهدى ما عليكى قدى ..

قوم ايييييه .. العلماء جابوا دبوس وفرقعوا بيها البلونه دى وقالو للراجل .. يا عم مش عايزين رجاله خلاص ما لكوش لزوم ولا لكم اى قيمه فى الدنيا دى .. ونانوييين يسلموا الرجاله كلها اللى فى العالم للستات ويجمعوهم فى ميدان عام وبالرشاش .. تك تك تك تك بوم ..لحد ما يخلصوا عليهم ويخلصوا بقى من النفخه الكدابه دى واللى عايزه راجل بعد كدا لأغراض البحث .. خدتوا بالكم لاغراض البحث .. دى الحجه اللى حيجيبوا بيها رجاله .. لاغراض البحث .. هما اللى بيقولوا .. اللى عايز يروح يجيب من الجبانه اى حتة عضم ولا شعرة راس لاى راجل ويجيب بويضه من اى واحده ويعملوا استنساخ وطبعا حيكون فيه علماء يحللوا ويحرموا ازاى .. ما تقلقوش موضوع التحريم والتحليل ده حيكون له حل .. المهم حيلقحوها فى بويضه ويجيبوا راجل لاغراض البحث برضه وكفى الله المؤمنين القتال .. ويجيبوا رجاله على قد ما هما عايزين ولا الحوجه لكل الرجاله الكتار اللى فى العالم دول .. اما يا ابنى النساء فمفيش غنى عنهم لانهم هما اللى عندهم البويضه وممكن نستغنى عن الراجل بس البويضه ما لهاش حل الا من النساء عشان كدا ح يبيدوا الرجال بالكامل الا لأغراض البحث يعنى ممكن نجيب حتة الـ DNA من اى عضمه من الجبانه وخلاص ما فيش مشكله ويزرعوا البويضه فى رحم الام وما فيش بربلوم خالص والتفاصيل بقى ابقوا اسألوا عليها الدكتوره ستيته الحمش ..

ومش عايزينكم يا رجاله يا مغرورين . وفى الآخر مش حنلاقى رجاله الا فى اقفاص جنينه الحيوانات والاطفال البنات بقى بيتفرجوا عليهم وبيقولوا لهم خد الموزه دى واعمل عجين الفلاحه والراجل جوه القفص يفرح بالموز ويعمل عجين الفلاحه والبندريه وعجين اهل الصحراء وكل العجائن من اجل صباع موز وياخد صباع الموز ببلاهه ويفشخ بقه ويضحك ضحكه هبله زيه وياكل صباع الموز.. حيوان .. وتختل الموازين وتتغير فطرة الحياه وتبوظ التعادليه اللى ربنا حافظ لنا عليها واحنا من هبلنا وغرورنا حنبوظها.

طب ما فيش رجاله .. والبنات يا عينى عايزين يتجوزا .. فطرة الحياه .. ودى سلعه ناقصه خالص ونادره بالمره ولا يوجد رجال الا لاغراض البحث وفى جنينه الحيوان .. تعالوا بنا نشوف ايه اللى ممكن يحصل؟ قوم ايييه ... زعيمة النساء فى العالم ورئيسة العالم حتعمل ايه ؟ حتروح بقى حديقة الحيوان .. قصدى حديقة النسانيس وتاخد نسناس .. قصدى راجل .. وتاخده القصر معاها .. لاغراض البحث.. وقبل الفجر يكون رجع للقفص بتاعه تانى ..

ومره واتنين وتلاته والعمليه تشيع بين الناس وياخد بيها خبر كل النساء فى العالم والثوار من النساء يروجوا بان موازين العداله اختلت فى العالم ولا توجد عدالة توزيع للثروه وان الزعماء والقواد الصغيرين يستأثرون لنفسهم بالنسانيس وبانه لا يوجد عداله وعشان الواحد ياخد حقه لابد ان يكون من الزعماء او الكبار للنسوان وتقوم ثوره عالميه ضد زعماء النساء .. وتتجه جموع النساء الى حديقة النسانيس .. قصدى الرجاله .. اللى هما تلاته ولا اربع رجاله او يمكن خمسه فى خمسة اقفاص ومن كتر الزحمه اللى تاخد شوية شعر واللى تاخد دراع واللى تاخد ركبه وكل واحده ونصيبها بقى ..

باختصار حيقطعوا الرجاله اللى فى الاقفاص حته حته وتقوم حروب لحد ما ينتهى صنف البشر على الارض عشان احنا اخلينا بفطرة الله على الارض .. ربنا عمل تعادليه فى الحياه .. ربنا بيخلق لكل راجل ست ولكل ست راجل والدنيا تمشى

.. نداء لكل الرجاله

خدوا بالكم من نفسكم واحرصوا على نفسكم قوى .. اصل ما عادش لكم لزوم ولا فايده .. ممكن يعملوا رجاله زى ما هم عايزين وبراحتهم .. حتى حفظ النوع اللى انتم بتتفشخروا بيه .. مابقاش له لازمه ..

مين هناااااااااااااااااااااااااااااك ... البندق يا جدعان ..

الحقوووووووووووووووووووووووونى

خواطر ... هبله

السلام عليكم

أحبائى ... كل التحيه لكم .. وحشتونى .. ولكن المدونه مش وحشانى .. لكن انا جيت عشانكم انتم .. عشان انتم احسن ناس فى الدنيا .. اما فشكول بقى فما زلت مش طايق وشها.

شكرى وامتنانى وعرفانى لكل من سأل عنى وكنت اتمنى ان اذكرهم بالاسم .. لكن عشان هما كلهم حبايبى حاكتفى بشكر من سأل عنى ولو مره وشكرين لمن سأل عنى مرتين وخصوصا اما نعيمه لانها قالت نعمين .. خلى عليوه يكلمنى.

اليومين دول انا مقيم فى البلكونه .. افطر واقعد وانام واصحى واتسحر برضه وانا فى البلكونه وهجرت الشقه تمام .. الحر .. الحر هذا القيظ الحارق فى هذه الايام.. من ساعة ما الفنيين جم خلعوا جهاز التكييف واخدوه علشان يعملوا له صيانه اصله كان ايام الحر اللى فاتت شغال اربعه وعشرين ساعه بعدين الراجل من كتر الحمل عليه قال مش لاعب واخد نفسه وراح مع بتوع الصيانه.. قوم ايه ؟؟

انا قاعد بقى فى البلكونه منى للسما بحاول اشم هواء ..لكن ما فيش هواء لا اكسجين ولا حتى ثانى اكسيد الكربون وعرقى مرقى لكن ما فيش حل .. الامر لله قوم ايــــه ؟؟ قاعد بقى ابص للسما واعد فى النجوم وافكر فى الفضاء اللا نهائى اللى قدامى .. ساعات الاقى نجمه منوره قوى فى السماء .. اقوم اقول آه دى النجمه الفا كنتور .. كمان ساعات اشوف واحده كمان جنبها اقول .. بيتا كنتور وساعات الاقى بعيد عنهم بييجى كدا 10 او 15 متر .. طبعا دى الشعرى اليمانيه .. واخوكم عامل فيها جاليليوا .. اصل قاعد فى البلكونه فاضى والفاضى يعمل قاضى .. عندى نظاره معظمه .. اقوم اجيبها وابص بيها على السماء .. تقولش الدكتور مصطفى محمود ولا تقولش فاروق الباز.. واقعد افكر .. طب فين السماء؟ .. هى الخيمه الزرقاء دى يا ترى ولا دى ابعد نقطه يوصل لها نظرى؟ .. يا خبــــــــــــر.. دى خيمه كبيره قوى قوى .. قول لحد الصبح قوى .. طب السبع سماوات شكلهم ايه؟ .. وسبحان الله لا قوة الا بالله .. سبع سماوات .. سبع اراضين .. سبع ايام .. السبع المثانى .. سبحان الله لغة الارقام فى القرأن منزلق خطيرلا استطيعه ولا اقدر عليه .
جات على بالى سورة الطارق وتأملت الآيه

(والسماء والطارق وما ادراك ما الطاق النجم الثاقب .... الآيه)

اشهد ان لا آله الا الله وانا سيدنا محمدا رسول الله

مين اللى قالك يا محمد من اكثر من 1400 سنه عن حكاية الطارق ومن اخبرك انه النجم الثاقب .. لا اله الا الله

يقول العلماء ان هذا النجم ينبض.. بيدق زى قلبك ما بيدق .. بس مش من الحب ولا الغرام .. بيطرق وسموه (النجم الثاقب او الثقب الاسود) ويا دوب لسه عارفين الكلام ده فى القرن العشرين يعنى من حوالى 60 سنه بس .. طب مين اخبر محمدا عليه السلام .. طبعا مافيش كلام .. الله العلى القدير.

برضه ساعات وانا ابص فى السماء الاقى حاجات بتطير كدا وتختفى مره واحده اللى هيا النيازك .. وعندنا فى الفلاحين بيسموها النجمه ام ديل ..وكنا بنقول عليها واحنا صغيرين لما نشوفها (سهم الله فى عدو الدين .. تنزل على القوم الكافرين)

السماء الواسعه دى ازاى نعرفها ونعرف الى فيها وصحيح حنقدر نسافر فيها ولا لأ .. والله عشم ابليس فى الجنه مع انه عارف انه مش حيشوفها بعنيه خالص.. دى السفينه اللى اطلقوها عشان تزور المجموعه الشمسيه من آخرها وتسيبها وتطلع بره المجموعه الشمسيه اللى اسمها فويوجير واحد وفويوجير 2 من يوم ما سابت عطارد وهى تايهه فى الدنيا ولا حد سامع عنها حاجه خالص والسفينه دى اطلقوها سنة 1977 ومن يومها وهى عماله تصيع فى الفضاء وقالوا لنا انها حتقول على حاجات كتيره ولا قالت ولا عادت

بيقولوا انهم حيحولواالانسان لطاقه ويبعتوه للكواكب والنجوم البعيده ويصيع فى الفضاء ويهيس ويزور الدنيا كلها ويطلع من درب التبانه اللى هى المجره بتاعتنا ويزور الدب اللبنى اللى هى المجره اللى جنبنا .. فى المشمش بقى لما يعملوا كدا

طب يا جماعه احنا عارفين ان الانسان جسد ونفس وروح .. الجسد معروف والنفس هى مجموعة تصرفات الانسان وخيره وشره وما الى ذلك ..اما الروح بقى ماحدش يدركها ولا يعرفها الا الله سبحانه وتعالى .. واما الانسان تطلع روحه واصلا هى طلعت من زمان ولما ربنا وهو بياخد الروح بيقول ورفعنا عنك غطائك فبصرك اليوم حديد .. يعنى يا جماعه الانسان بينكشف عنه الحجاب وبيشوف اللى عمرنا ما شفناه ولا حنشوفه وبيفهم اللى طول عمره بيحاول يفهمه .. دا ساعة طلوع الروح اللى الجماعه بتوع الحزب الوطنى طلعوها من زمان ..بس يا خساره .. ما حدش طلعت روحه ورجع قال لنا ايه الحكايه .. ولا حد حيرجع يقول لنا ايه الموضوع ..يعنى نقدر نقول عليها طاقه .. الله اعلم لكن احنا بنقرب المواضيع ونستغفر الله ان كنا اخطأنا .. عايزين يحولوا الانسان لطاقه .. طب ما هو فعلا كدا وربنا بيعمل فينا كدا وبنروح لربنا كدا .. احلق شنبى اللى عمرى ما ربيته لو قدروا يعملوا كدا

الجن .. كل يوم يقولوا لنا حكايات كتير عنه واساطير كتيره ونشأت فى الجامعات اقسام لدراسته .. العفاريت يعنى .. يبقوا يقابلونى مره تانيه فى المشمش .. دا حتى ابن كثير لما كتب عنهم فى البدايه والنهايه .. ما فهمتش منه حاجه .. واللى غطى واللى وطى جاب سيرة حاجه اسمها الحن .. هذا الحن سكن الارض قبل الجن وكمان سكن الارض قبل الحن .. البن .. طب يا ابا الحاج ابن كثير مين هما الحن ومين هما البن .. ولا حاجه ولا سيره ولا كلمه واحده .

احنا بقى من غرورنا بنحاول نتدخل فى اللى ما لناش فيه .. اصل ربنا عمل لنا عقولنا بتفكر بشكل مادى وتدرس الاشياء بشكل مادى .. يعنى عقلنا يشوف الطوبه يقول عليها طوبه عشان هو اصلا طوبه .. مادى .. يدرك فقط المحسوس والملموس ..اما ما غير ذلك فلا والف لا وما لناش دعوه بالغيبيات عشان مخنا يا دوب شوية جيجات صغيره ما تقدرش تعرف ولا تشوف اللى غير محسوس او ملموس احنا بس نؤمن بما قاله لنا الله وخلاص .

المره الجايه بقى عندى لكم موضوع يهلك من الضحك وخصوصا حيحبوه الستات خالص والرجاله كلهم حيحدفونى بالطوب .. وعلى رأى جابر القرموطى ... سلامن عليكم .

اللى القاء

زمان مصطفى كامل كان بيقول (لو لم اكن مصريا لوددت ان اكون مصريا) اشمعنى يعنى .. عشان ايه يعنى .. يعنى ماينفعش اكون اوربيا او هنديا او يابانيا او حتى لبنانيا ... ويا سلام لو اكون امريكيا .. اشمعنى يعنى مصريا .. بأمارة ايه يعنى انا عايز اكون مصريا..ومن فضلكم ما حدش يعمل الشويه بتوعه ويقعد يقول الوطنيه والكلام ده .. اصل الحكايه مش ناقصه

واليومين دول طالعين فى مقوله بتقول ( مصر وطن يعيش فينا لا وطن نعيش فيه ) وبيعيش فينا ازاى يعنى .. يعنى هو انا جواى كل الدنيا دى .. طب حتى الواحد ينفجر من كتر اللى جواه .. هو مش انتم برضه عايزين تنفجروا .. الواحد خلاص حيطق من جنابه .. دا الواحد طق وخلاص .. وانفجر وانتهى الموضوع.

عشان انا مش طايق نفسى .. بعد اذنكم يعنى انا حـ اغيب شويه عن التدوين عشان مش طايق نفسى ومش طايق المدونه .. يعنى اجازه شويه شهرين ولا تلاته ولا يمكن ستة شهور عشان انا ما عنديش كلام اقوله .. مخى بقى فاضى ومحتاج شحن جديد .. ومخى بيحتاج وقت عشان يشحن .. حـ احط الشاحن فى الكبس واسيبه لحد ما اقدر اشحن مخى تانى .

سلام مؤقت حتى اعود

تحياتى للجميع

بعض من الخجل والحزن

السلام عليكم

انا ... انا ... أنا لست رجلا ...فقد فقدت كل ملامح الرجوله ... أنا لست امرأه ... فلا املك من ملامح النساء شيئ ... ابحث عن نفسى فلا اجد الا اشلاء بدون معالم ... اذا فمن انا ... يا للهول ... انا مسخ من اربع اطراف ورأس ... انا مسخ يقف على قدميه ... يشبه الانسان ولكنه ليس انسان ... انا حقل التجارب الذى لا ينضب تجارب حكامى وتجارب اعدائى ... فى البر والبحر والجو وتحت الارض وفى الانفاق ...أنـــا ... يرتكب فى انا افظع الجرائم دوله بعمر 65 سنه تفعل فى انا كل هذا ... وانا ... عاجز ... مشلول ... مكبوت ... مبعثرة اشلائى ... انـــا ... اسباب ضعفى انــا ... ولاة امورنا ... كراسيهم تهتز تحتهم وليس من هم لهم الا تحصينها ... اما أنــا .. بالظراطه فى أنـا ... طز فى انـا ... أطلب السلاح لادافع عن أنا ... فلا اجد السلاح لانه ليس له عمل الا دعم كراسى الحكم الوثيره ... وتفعل بنا اسرائيل ما تفعل ... أمريكا تحتطن الطغاه وتحافظ لهم على كراسيهم الوثيره ... اما أنـا فلا يعبر أحـد أنا ... كمان مره ... بالظراطه فى أنـا ..

أنا اللى طول عمرى بصدق كلام الصبر فى المواويل

فى المواويل فقط وأنـا ليس لى الا الصبر ... آآآآآآآآه يا أنـا ... يا غلبى يا أنـا

بالظراطه فيكم يا عرب

الطوارق - لأ - الطوااااااارئ - محتاج اروح الكتاب تانى

يا دهوتىىىىىىى .. مبروك

الطوارئ - ظرف طارئ - ظرف قاهر

مش ظرف دائم ولا ظرف ساهر

قلنا الف مره - مش عايزين طوارئ

قالوا ................

انتم ما تستاهلوش غير الطوارئ

مصر يا امه يا بهيه

الطوارئ من اسمها - حاله

مش حاله جالسه

ولا قاعده ومشرفه الى ابد الآبدين

بلد الحضاره وبلد الحمير والجمال

انا راجل مهبلاتى مطجناتى
اهبل والف ... زى الالف ...

وكل يوم حالة طوارئ وحته من بلدى
حته من كبدى بتضيع

حته من بلدى بتموت
حته من بلدى بيتهد حيلها

وحيل اللى خلفوها .

اصحى يا نايم ... يا نايم اصح اااااااااى

وحد الرزاااااق

ايييييصحـــــــ ا يا نااااايم

وحد الرزاااااااق

المره اللى فاتت طلبت منكم تسقفوا ...
بسسسس .. كفااااااااايه .. مش عايزين هيصه ولا تسقيف
المره دى صوتوا يا بنات ... الطموا يا ولاد
لييييييه ؟

عندنا نواب محترمين - بيمثلوا الشعب وبيلبوا كل احتياجات المجتمع .. وبيلعبوا على السلك فشر ولاد الحلو

كان عندنا نواب سميحه ... نواب قروض تلاقى .. نواب تزوير موجود .. نواب الحشيش .. يا سلام انت جيت فى جمل .. آخر موضه بقى جبنا لكم نواب القمار - مش حنخلى فى نفسكم اى حاجه .. واول امبارح بقى عملنا لكم نواب آخر جنان .. ما حدش يقدر يعمل النواب دول خالص الا احنا .. كله عشان سواد عنيكم .. اصلنا بنحبكم قوى يا ولاد الـ .. ربنا ياخدكم ويريحنا منكم .. هو ربنا سايبكم تقرفونا فى عيشتنا ليه ؟ .. احنا جايبين لكم آخر موضه فى النواب .. جايبين لكم نواب ضرب الشعب بالنار .. يا ولاد الحلال .. فتح عنيك تاكل ملبن .. الفقره دى ما حدش عملها خالص .. دى حاجه جديده ما اتعملتش اللى فى ميدان البيكاديلى وهايد بارك .. بحلق يا جدع .. فين الجدعان اللى يكتفونى .. عايز تلاته رجاله يكتفونى وشوفوا حاعمل ايه .. بس قبل ما يكتفونى كل واحد ياخد باله من جيبه .. اللى حيتسرق انا مش مسئول عنه .. انا حاوى .. والله العظيم .. حاوى ما حدش زيه .. اتفرج يا سلام .. اتفرج يا جدع
يا عدددددددووى ..عايز صوات حاد .. عايز لطم جامد .. كله يشجع .. كله يقول ربنا معاك.. يا عدوى
كل ابن حلال يحط قرش فى الصحن .. اللى ما معاهوش ما يلزموش .. واللى معاه وما يحطش يبقى ابن حرام

النائب نشأت القصاص طالب وزير الداخليه حين مناقشة مظاهرات العيال التلفانه اللى اهاليهم ما ربوهمش .. اللى هما عيال 6 ابريل وطالب بضربهم بالنار..يا سلام .. يا سلام .. مش عارف انت اتحدفت علينا من اى مصيبه يا شيخ .. لأ ومن استهباله بيقول لمنى الشاذلى ( انا مصمم على اللى قلته وقلت بالضبط الخارجين على القانون.. يا سلام .. يا سلام يا راجل السياق كله كان عن المظاهرات والاعتصامات .. يعنى انت بتعتبر دول خارجين على القانون .. روح يا شيخ منك للى كلت دراع جوزها .. اشوف فيك يوم

حتى الخارجين على القانون ما بينضربوش بالنار كدا خبط لزق .. فيه جنح اقصى حاجه فيها حبس او سجن شوية ايام كدا يعنى .. وفيه جنايات الاحكام فيها بتوصل للاعدام .. بس لازم يتحاكموا .. مش عايز تضربهم بالنار خبط لزق كده

يا خويا اذا انت مستغنى عن ولادك انت حر .. حتى ولادك مش من حقلك تتكلم عنهم هما اللى يتكلموا عن نفسهم .. حتى مش من حقهم يتكلموا عن نفسهم .. يا راجل الروح ما بياخدهاش اللى ربنا اصل عيال 6 ابريل دول ولاد هرمه وشوية صيع ما اتربوش وضرب النار حلال فيهم

رجب هلال حميده بقى .. عارفينه .. كلكم طبعا عارفينه .. بيقول ايه لا فض فوه .. بس قبل ما اقول عن اذنكم انزل اشترى سندوتش كبده من العربيه اللى تحت البيت ................
انا جييييييييت .... بيقول اخينا بقى .. سعادته .. معاليه .. جناب حضرته .. يا لهوووى .. يا حوستىىىى .. النائب بتاع الشعب .. بتاعنا .. اللى هو موجود عشانا بيقووووول لا فض فووووه ( اعيب على الداخليه انها لا تعمل القانون ولا تستعمل الرصاص ) .. الطموا يا ولاد .. مع ان رجب مش وطنى .. دا حزب غد .. بس الغد التانى اللى بالى بالكم .. اللى تبع الحزب الوطنى

بعض نواب الحزب الوطنى بيقولوا ان هناك ايادى خفيه تعبث فى البلد وهى ايادى نجسه .. ما شاء الله ..

اشجونا .. الله الله الله .. يا سلام يا ست .. يا سلام يا حليم .. هى الكراسى بتاعتكم قطيفه ولا جوبلان .. تلاقيها دهب عيار 44 لو كان فيه دهب عيار 44

والله عرفتم تحللوا الموضوع .. بقى يا رجاله ما انتوش عارفين اللى مبوظ البلد مين ؟..
نسيت احكى عن احمد ابو عقرب .. ولا بلاش هو كان تبع نفس الموجه .. اضربوا العيال ولاد الهرمه دول بالنار واسحلوهم
بالذمه يا جماعه لو كان الاستعمار الانجليزى كان يقدر يقول الكلام ده ......؟

اقول لكم على حقائق تاريخيه

- اول مجلس شورى فى الشرق الاوسط كله وفى اسيا وقبل كثير من دول اوروبا ويعتبر من اول 10 برلمانات فى العالم ... كان فى مصر عام 1866 وانشأه الخديوى اسماعيل اللى ظلمه التاريخ كتير

- اول برلمان فى الشرق الاوسط كله وفى آسيا وقبل كثير من دول اوروبا ويعتبر من اول 10 برلمانات فى العالم سنة 1881 كان فى مصر وكان الرجال من امثال شريف باشا ومحمود سامى البارودى واحمد عرابى

- آخر برلمان يا ترى دا برلمان ولا بولمان كوتار يا للى ونوابه نشأت القصاص - ورجب هلال حميده - واحمد ابو عقرب اللى عايزين يضربوا المصريين بالنار
اختم على نمط البوست اللى فات
صوتوا يا بنات
الطموا يا ولاد

هيصوا يا ولاد ... تررم تررم ... سقفوا يا ولاد ... تررم تررم

يجتمع القاده العرب - قصدى الحكام العرب لان ما فيهمش ولا واحد قائد الا يمكن قائد طابيا ولا حاجه على رأى شويكار - بيجتمعوا فى مدينة سرت الليبيه عند اخوكم الزعيم والقائد التاريخى والجماهيرى والمختار من الله للشعب الليبى وكل الالقاب العربيه الهبله اللى بنقولها على اى حد يجوز امنا - تانى بيجتمعوا لبحث المواضيع على الساحه العربيه ... طب هما يفكوا بس والمواضيع ان شاء الله حتنحل ... انا مش سامع سقف ليه .. ورايا سقفوا يا ولاد ..... تررم ... تررم

قوم ايه بقــــــــــى ... فيه 13 قائد عربى - طبعا انا حاكلم بلغتهم _ قائد- تخلفوا عن حضور هذه القمه ... هيصوا ياولاد ... تررم ... تررم

انا عايز طاقيه ونضاره

ابوكم الحاج عمرو موسى بقى قام يعرض اخفاقات ونجاحات الجامعه العربيه اثناء توليه ( ايه رأيكم فى توليه دى ) اصل اللى عايز حاجه يروح يجرى ويتولاها ... واللى يصحى الصبح بدرى عن الناس يلحق يتولى ... اصلهم من اولياء الله الصالحين... القصد ان عمرو موسى قال بالحرف الواحد (هناك اخفاقات ونجاحات للجامعه العربيه فى الفتره التى توليتها والتى اعتقد انا كافيه ... خدوا بالكم من كافيه دى ... فكروا يا ولاد ... تررم ... تررم

نفسى بدل ما حد يقول خلال فتره ولايتى ... يقول خلال فترة انتخابى وكدا تبقى الامور موزونه ومظبوطه

يا ترى بيعتقد انها كافيه لييييييه ؟ ... طب وناوى على اييييييه ؟

ياريت اللى فى دماغى عشان خبطتين فى الراس توجعهم

قلت لكم سقفوا يا ولاد ... تررم ... تررم

قلت لكم هيصوا يا ولاد ... تررم ...تررم

قلت لكم ارقصوا يا ولاد ... تررم ... تررم

لخابيط

تعليقا صغير على البوست الماضى بتاع البرادعى .... أن معظم المعلقين ابدوا تعليقاتهم حول ان البرادعى لديه اجنده خارجيه ... واللى قال انه ما يعرفش ظروف البلد ... واللى قال كان طول عمره خارج البلد وجاى عايز ينفذ تعليمات امريكا يعنى اجنده خارجيه برضه ...واللى قال ما نعرفوش ... اصل الحزب الوطنى مطلع نغمة اللى نعرفه احسن من اللى ما نعرفوش ... والحقيقه ان الاعلام الرسمى الجبار نجح فى تكوين فكره سلبيه عن البرادعى قبل ان يبدأ فى طرح فكرته على مؤيديه من الشعب ... لسه بدرى علينا قوى ... اى حد من السهل انه يلعب فى دماغنا ......

بمناسبة الاعلام خدوا بالكم فيه محطه فضائيه طالعه زى الصاروخ واسمها قناة ON TV وفيها برامج قويه جدا وفيه بنت مذيعه زى العسل اسمها ريم ماجد قاربت ان تطول قامة منى الشاذلى وقامات المذيعات العظام بس هى عايزه شوية شهره اعلاميه وبتقدم برنامج رائع اسمه بالمصرى الفصيح من الساعه 9 من الاحد للخميس ... المحطه دى قربت تسبق قناة الجزيره بس هى عايزه شوية امكانيات.





برضه بمناسبة الكلام عن الاعلام ما فيش فى الدنيا كلها وظيفه اسمها الاعلامى الا عندنا فى مصر - كل شويه يطلع واحد ويقدم التانى ويقول الاعلامى فلان الفلانى - وهيصه وزمبليطه فى الصالون ... جابوها منين دى ... يعنى مثلا لارى كنج ما اسموش الاعلامى لارى كنج واوبرا وينفرى ما اسمهاش الاعلاميه اوبرا وينفرى ... اسمه المذيع لارى كنج احسن مذيع فى العالم ومقدمة البرامج اوبرا وينفرى احسن مقدمة برامج فى العالم ... طبعا مش فى تصنيفنا نحن العرب ولكن فى التصنيف العالمى ... ما حدش قال الاعلامى لارى كنج ولا حد قال الاعلاميه اوبرا وينفرى ... احنا احسن ناس تخترع وظائف ... تصدقوا احنا عجبه بين الامم على رأى ريم ماجد.

ما حدش يصدق ان الموظف المصرى بيشتغل 27 دقيقه فى اليوم ... دى سمعه سيئه اطلقت عشان تحقق اغراض معينه

ما حدش يصدق ان عندنا فى مصر 6 مليون موظف وموظفه ... ولا حتى نصف العدد دهـ وبيعايرونا ان امريكا بجلالة قدرها وعظمتها فيها اقل من مليون موظف وموظفه ... فاهمين ان احنا مختومين على قفانا يعنى ... صحيح الموظفين الفيدراليين اللى على مستوى الدوله (الاستيت) اقل من مليون لكن كل ولايه فيها موظفين حكوميين ... يعنى دول + دكهمه تلاقيهم يزيدوا عن 15 مليون موظف وموظفه حكوميين

حبيت اعمل بوست هايف عشان انا بقيت فاضى ما عنديش حاجه اقولها وبقيت اطجن فى المطجن واعجن فى الكلام .. آهوا على الاقل اشوفكم وتشوفونى

ايه رأيكم دام فضلكم؟

أى كلام فاضى معقول

الاهلى اتغلب النهارده 2 صفر من غزل المحله .. بالشفاء .. انا اهلاوى

بمناسبة الكلام فى الكوره .. بعد الامور ما هديت وبعد ما اخدنا كاس افريقيا .. بدعاء الوالدين ولا بدعاء الملايين .. المهم اخدنا الكاس .. قوووووم ايه ... بيقولوا ان كان فيه لاعب اسمه جدو فى المنتخب .. ما تصدقوش .. دا ما كانش فيه لاعب اسمه جدوا .. عارفين اللى كان موجود ايه ... دا كان عفريب حسن شحاته حاطه فى القمقم .. كا ما يحتاجه يطلعه من القمقم .. وبعد الماتش يقول له خش فى القمقم يا خلنجان.

بيقولوا كل لاعب فى المنتخب اخد مكافأه مليون جنيه ... يا ريتهم ما اخدوا الكاس ووفروا لنا الكام مليون دول حتى عشان السيول ومعد السرطان والبلاوى الكتيره اللى عندنا ودايما يقولوا يحننها ربنا .. لكن لو عشان الكوره .. ربنا بيحننها على طول ويديهم كل اللى هما عايزينه.

المتروا بقى اليومين .. كل المحطات عماله تذيع اى مخالفه تعرضك للغرامه .. اى عبث تعرضه للماده كذا وكذا .. عى عبث .. مش عارف يطلعوا روح اللى خلفوكم .. الماده كذا وكذا بتقول الغرامه والسجن المشدد.. حرام عليكم بقى يا ناس .. سيبونا فى حالنا شويه الحكايه مش ناقصه تخوفونا .. احنا خايفين طبيعى وما بنقدرش ننطق ريحوا بس انتم نفسكم واحنا حنخاف لوحدنا.. بس الله يخليكى مش كل شويه تطلعوا لنا العفريت .. واحنا عفاريت الدنيا كلها راكبه فوق دماغنا.

موضوع صعب قوى يا جماعه .. اهلنا يا جماعه المرضى العيانين التعبانين بتوع معهد الاورام .. اصلهم قفوا معهد الاورام بالضبه والمفتاح عشان حيقع على دماغ العيانين اللى الدنيا كلها اصلا واقعه على دماغهم ومش ناقصين حد يقع على دماغهم .. ربنا يشفيهم ويريحهم من الالام الرهيبه ويزيح عنهم .. يا اخوانا المرض دا غول زى ما يكون كل عمال ينهش فى حتة لحمه ومريض الاورام يا عينى بيعانى من آلام رهيبه وما لهمش صدر حنين غير المعهد دا اللى راح فى الباى باى .. شفاهم الله وعفانا واياكم


ابوكم بقى الحاج يوسف بطرس غالى نازل علينا بالكرباج والشوم والخرزانات كمان .. اى واحد يكسب اى فلوس يقول .. اقف عندك .. انا شريكك فى الفلوس دى .. هات والا .. هه .. انت عارف ايه اللى ممكن يحصل لك .. الموظفين الغلابه اليومين دول يا عينى نازلين لطم على الخدود وشحاته من اللى يسوى واللى يسوى برضه عشان يسددوا الضرائب اللى عليهم من عام 2009 .. طب هما خصموا من بتوع الكوره الضرائب ولا ايه الحكايه .. هى ما تجيش الا على الغلابه .