الامتحانات وسنينها

ما علهش يا جماعه الواد محمود ابنى عنده امتحانات ومانعنى من دخول غرفة الكمبيوتر وعامل لها احتلال وكل ما ادخل يقعد يزعق لى وانا مضطر اخاف منه عشان الامتحانات ... تقولش الواد هو اللى بيصرف على وان هو اللى ابويا

عشان كدا انا متأخر فى البوستات وما علهش لحد الواد ما يخلص وانا كمان اخلص من قرفه

فشكول بيهبل .... هبل فى الجبل

تحديث

عملت التحديث ده بالعافيه

اعتذر لكل المدونين اللى زارونى ولم ارد لهم تعليقاتهم حتى الان

النت عندى زفت خالص ومش بيفتح عند اى حد ولو فتح مش بيفتح التعليقات وانا عارف ان ده عيب فى النت عندى ويمكن فى الكمبيوتر وانا علقت لحد الحاجه شمس النهار وكل ما اروح عندها ما تفتحش التعليقات لكن انا حاحاول اصلح النت او الكمبيوتر وما تقلقوش حاروح عندكم واحد واحد وارد الزياره بس ما علهش لو اتأخرت عليكم شويه لحد ما اصلح يا اما النت يا اما الكمبيوتر

====================================
احبائى اعزائى اخوانى اخواتى فلذات اكبادى .... ونيس ومايسه
رجعت .... بقى لى 8 ايام وانا بعيد عن البيت فى جولة عمل من جولات عملى المكوكيه وكنت ساعات اروح لجهاز الكمبيوتر فى الشغل واعمل زيارات خاطفه من هناك لكن من يوم السبت ما كانش عندى وقت خالص وانقطعت تماما عن النت . كمان ولا كنت عارف الدنيا فيها ايه ولا اى اخبار خالص. وطبعا باعتذر لكل الناس اللى اتاخرت عليهم فى التعليق ومش انساهم لازم اروح لهم واعلق عندهم

بعد ما رجعت البيت يوم الخميس اخر النهار من حوالى ساعتين تلاته لقيت انفلونزا الخنازير وصلت للمستوى الخامس ... يعنى فاضل زلطه ونطلع بره لان اخر مستوى هو المستوى السادس وبعدين كل بلد تقفل المداخل والمخارج ولا حد يطلع ولا حد يخش ... وكل واحد ياخد باله من نفسه وخصوصا اللى عاملين عملية اللوز يزودوا بالهم شويه عشان لو واحد بس فلت من المطار انتم عارفين ان احنا مضيافين وبنحب نكرم الضيف قوى ولو الضيف اللى هى جرثومة الخنازير جت عندنا ح نسوى لها الهوايل وح نكرمها قوى.

اقول لكم موضوع صغير برضه عشان الامتحانات

عمكم النائب مصطفى بكرى عمل بلاغ للنائب العام ان فيه 65000 طن قمح روسى دخلوا مصر وان القمح دا غير مطابق للمواصفات... دا طبعا غير القمح الاوكرانى اللى اكلناه بالسم الهارى فى معدتنا
المهم القمح الروسى ده طلغ غير مطابق للمواصفات عشان كل كيلو فيه 56 بذره غريبه غير الحشرات والصراصير والذى منه.... قوم ايه ؟؟ ميناء بور سعيد رفض دخول الصفقه الا بعد التحاليل والذى منه عشان القمح شكله بنى واغبر ومنيل بنيله

المستوردين الكبار اللى انتم عارفينهم بقى وقوتهم وبطشهم عملوا اييييييه؟؟؟؟؟

سابوا بور سعيد وخدوا المراكب وودوها ميناء سفاجه وطلعت الغلال من الميناء طبعا بحجج مختلفه وقوانين برضه مختلفه ودخلت الغلال البلد عشان ناكلها بالسم وطرش الدم وخزنوها فى صوامع فى اسيوط وقنا وقوص وقال ايه ممكن تدخل الغربله والغسيل ومش يبقى فيه مشكله وميت فل و14 ... طب ليه نغسل وننضف ونغربل .. طب من الاول نجيب الحاجه حلوه ..

خدوا بالكم الغلال المصريه متلقحه ومرميه فى الغيطان ومش لاقيه اللى ياخدها من الفلاحين والفلاحين عمالين يصرخوا ويصوتوا ويقولوا يا خلق هووووى عندنا قمح حلو وجميل حد ييجى يشتريه بنص ولا بربع تمن المستورد ويا عينى حيتخرب بيتهم (اصل انا عندى 30 اردب ومش لاقى حد يشتريهم) حد عرف حاجه اعملوا مش واخدين بالكم ... والفلاحين ولاد ستين فى سبعين دول يروحوا فى ستين داهيه ... المهم المستوردين الغلابه دول لازم نعطف عليهم برضه نشوف السبوبه بتاعتهم.

عارفين يا عيال يا حلوين يا ولاد ستين فى سبعين ايه الموضووووع

الموضوع ان استيراد القمح والغلال من اختصاص هيئة السلع التموينيه .... يقوموا يعملوا ايه ؟؟؟؟ يشوفوا حد كدا حبيبهم وقريبهم ولا نسيبهم ولا صاحبهم ويدوه حق الاستيراد ... وأهى برضه السبوبه كبيره والخير كتير ويعم على الكل

والسؤااااااااااااااال :

هل عجزت الدوله المصريه بشنتها ورنتها عن استيراد قمح بجوده عاليه ؟؟؟؟؟؟؟؟؟ علامات استفهام للصبح

الاستفسارات كتيره والاسئله كتيره وكبروا مخكم شويه ... وسلام مربع للجدعان ... ورقصنى يا جدع

من ناحيتى بقى انا ح اعمل اييييييه ؟

ح اروح جامع السيده زينب واقلع راسى زى النسوان وادعى على اللى عايزين يأكلونا سم هارى واغذيه حيوانات يا رب دعوة وليه ساعة مغربيه واقول يا رب هات لهم انفلونزا طيور وخنازير كمان وكل الانفلونزات اللى فى الدنيا كلها وكمان بالمره وانا محروق كدا ادعى لاولادنا وبناتنا اللى بيمتحنوا ان ربنا ياخد بيدهم كلهم ويخلى مخهم يشعشع ويلقط اى معلومه ومخهم يبقى مغناطيس ...... وربنا ينجحهم يا رب

هل هلك قوم لوط بأول تفجير نووى فى التاريخ / الحلقه الاخيره

الاخيره

خدوا بالكم احنا انتهيا عند سادسا وبعدين ناخد:

سابعًا: قال تعالى: (فَلَمَّا جَاءَ أَمْرُنَا جَعَلْنَا عَالِيَهَا سَافِلَهَا وَأَمْطَرْنَا عَلَيْهَا حِجَارَةً مِنْ سِجِّيلٍ مَنْضُودٍ(82) مُسَوَّمَةً عِنْدَ رَبِّكَ وَمَا هِيَ مِنْ الظَّالِمِينَ بِبَعِيدٍ (83) هود، وقوله تعالى: (فَجَعَلْنَا عَالِيَهَا سَافِلَهَا وَأَمْطَرْنَا عَلَيْهِمْ حِجَارَةً مِنْ سِجِّيلٍ(74) الحجر.ففي هاتين الآيتن يبين تعالى أن عاليها أصبح سافلها وفي مكانه زرع بصل قبل أن يمطروا بالحجارة وأصبحت هذه الحجارة من طين؛ (لِنُرْسِلَ عَلَيْهِمْ حِجَارَةً مِنْ طِينٍ(33) الذاريات، هي عاليها بعد أن كانت سافلها... وهكذا انتهى أمر قوم لوط عليه السلام. وما حدث لهم لا يدل على أنه بركان ، ولو كان بركانًا لنسف القرية وذراها بعيدًا عن مكانها يعنى الحمم المنصهره من البركان تسيل وتجرى فى انهار بعيدا عن مكان البركان ولا تقع تحتها والبركان لا يحدث فراغًا في الأرض لتنهار فيه القريه ، وإذا وقع بجانبها غطاها بالطفح الصخري المنصهر، أو بالرماد البركاني وليس بالحجارة ... واللى حصل لهم في وصف القرآن ما يدلش على أنه بركان ، وفي كلام الله تعالى خير وصف لما حدث، وهو الشاهد على اللى حصل وكان بأمره سبحانه وتعالى ؛ (فَلَمَّا ذَهَبَ عَنْ إِبْرَاهِيمَ الرَّوْعُ وَجَاءَتْهُ الْبُشْرَى يُجَادِلُنَا فِي قَوْمِ لُوطٍ (74) يطلب لهم الرحمه والهدايه جم قالوا له دول الملائكه يعنى ( يَا إِبْرَاهِيمُ أَعْرِضْ عَنْ هَذَا إِنَّهُ قَدْ جَاءَ أَمْرُ رَبِّكَ وَإِنَّهُمْ آَتِيهِمْ عَذَابٌ غَيْرُ مَرْدُودٍ (76) هود , خلاص يا ابراهيم قضى الامر وحكم ربك ولا راد لحكمه ، (إِنَّا مُنْزِلُونَ عَلَى أَهْلِ هَذِهِ الْقَرْيَةِ رِجْزًا مِنَ السَّمَاءِ بِمَا كَانُوا يَفْسُقُونَ (34) العنكبوت. فالرجز من السماء هو نفسه العذاب بالحجارة من طين اللى بفعل الحراره حتبقى حجاره صلبه وصلده ، دا بفعل بشدة الحرارة .. فإذا لم يكن ما حدث لهم هو بركان بأمر من الله ... طب ايه اللى أحدث هذا الأمر؟ !! نرجع تانى للإرشادات التي أعطيت للوط عليه السلام وأهله ليسلك وأهله طريق السلامة: قال تعالى: (قَالُوا يَا لُوطُ إِنَّا رُسُلُ رَبِّكَ لَنْ يَصِلُوا إِلَيْكَ فَأَسْرِ بِأَهْلِكَ بِقِطْعٍ مِنَ اللَّيْلِ وَلَا يَلْتَفِتْ مِنْكُمْ أَحَدٌ إِلَّا امْرَأَتَكَ إِنَّهُ مُصِيبُهَا مَا أَصَابَهُمْ إِنَّ مَوْعِدَهُمُ الصُّبْحُ أَلَيْسَ الصُّبْحُ بِقَرِيبٍ (81) هود, وقال تعالى: (فَأَسْرِ بِأَهْلِكَ بِقِطْعٍ مِنَ اللَّيْلِ وَاتَّبِعْ أَدْبَارَهُمْ وَلَا يَلْتَفِتْ مِنْكُمْ أَحَدٌ وَامْضُوا حَيْثُ تُؤْمَرُونَ (65) وَقَضَيْنَا إِلَيْهِ ذَلِكَ الْأَمْرَ أَنَّ دَابِرَ هَؤُلَاءِ مَقْطُوعٌ مُصْبِحِينَ (66) الحجر.

من الآيتين نقدر نرتب خطة السلامة اللى ربنا دل لوط عليها وهى:

1-ربنا أمر لوط أنه يخرج من القرية آخر الليل: (فَأَسْرِ بِأَهْلِكَ بِقِطْعٍ مِنْ اللَّيْلِ..) حتى يكون عند الشروق في مأمن بعيدًا من العذاب فكان هذا الأمر الأول.

2 – وأما الأمر الثاني فكان: (...وَاتَّبِعْ أَدْبَارَهُمْ ...) ودبر القرية هو الجبال الواقعة خلفها وهي باتجاه جبال الكرك (حيث يغلب الظن بمكان وجودها) لأن مواقع القرى في وادي الأردن يكون أسفل السلاسل الجبلية ، فكان في هذا تحديد اتجاه السير.

3- وأما الأمر الثالث فكان: (...وَلَا يَلْتَفِتْ مِنْكُمْ أَحَدٌ...) لأن الالتفات مهلك لأي واحد يقوم به ، وفي هذا التحذير حماية لهم .. لذلك حذرهم من الالتفات لرؤية العذاب عندما يسمعون لمعرفة مصدرها، وماذا فعلت بمن وقعت عليه.

4- وأما الأمر الرابع فكان: (...وَامْضُوا حَيْثُ تُؤْمَرُونَ ..) ففي هذا الأمر منع التوقف؛ لأن التوقف فيه ضرر وهلاك لهم إن بقوا في نفس المكان الذي وصلوا إليه، ولم يتجاوزه إلى ما بعده يعنى اجروا على اخركوا عشان تبعدو عن اماكن الانفجار عشان زى ما انتم عارفين الاشعاع بيروح بعيد عن مكان الانفجار الذرى.

5- إخبار لوط عليه السلام بهلاك امرأته: (...إِلَّا امْرَأَتَكَ إِنَّهُ مُصِيبُهَا مَا أَصَابَهُمْ ..) هود، وأنه سيصيبها ما أصابهم حتى لا ينشغل بنجاتها، ويستمر ماضيًا في طريقه مع ابنتيه، وإلا سيصيبهم من العذاب ما يصيبها عندما تلتفت لتنظر إلى وقعة العذاب على قومها، لأنه لو عرفت امرأت لوط أن الضيوف هم ملائكة ، ورأت طمسهم لأعين قومها ، فستخرج مع لوط طلبًا للنجاة معهم .... فكان هذا التوقيت لخروجهم حتى يصلوا إلى مكان محدد عندما يقع العقاب ، فتهلك هي وحدها من دونهم.

6- إخبار لوط عليه السلام بوعد الهلاك: (إِنَّ مَوْعِدَهُمُ الصُّبْحُ أَلَيْسَ الصُّبْحُ بِقَرِيبٍ)، (وَقَضَيْنَا إِلَيْهِ ذَلِكَ الْأَمْرَ أَنَّ دَابِرَ هَؤُلَاءِ مَقْطُوعٌ مُصْبِحِينَ)، فمعرفته بالموعد سيجعله يجد في الخروج من غير تهاون أو انشغال عنه فيصيبه بعض ما أصابهم يعنى ما فيش هزار يعنى بكره الصبح يا لوط يقوم سيدنا لوط يتوكل على الله ويروح بعيدا عن المكان . هذه الأوامر والتوصيات تثير التساؤلات فيما وراءها ... فكيف تهلك امرأت لوط بحجرلمجرد النظر إلى الخلف؟! لماذا لا يكون شيئًا آخرغير الحجر ؟! .. وما العذاب الذي يهلك الإنسان بمجر النظر إليه؟! ممكن يكون الإشعاع النووي هو بس الذي يخشى من النظر إليه ، والتعرض له ... لقد أصبح معروفًا في عصرنا الحاضر؛ أن النظر إلى التفجيرات النووية مباشرة بالعين المجردة ، يعمي الإنسان، ويحرق له شبكية العين .... فالذي حدث لقوم لوط والله اعلم هل هو تفجير نووي تحت الأرض ومن شدته وحرارته حرق وبخر وصهر قسم من الارض ودور على شق او فتحه فوق الارض وطلع لعنان السماء وشال معاه اللى شاله من باطن الارض والحكايه دى سابت فراغ كبير هوت فيه القريه وبعدين اللى اتشال من باطن الارض وقع تانى على القريه من حصباء وحجاره والطين بعد ما بقى حجاره من الحراره بعد ما وقعت فى الحفره الكبيره دى وردمتها . فأصبح عاليها سافلها قلنا زرع بصل... ودل المطر بحجارة من طين على وجود الماء بكميات في مكان الانفجار طبعا هو الطين بييجى منين ، وتبخيرواحد سنتيمتر مكعب واحد يحوله إلى 800سم3 من البخار عند درجة الغليان،(دى من عندى سمعتها من بعض اساتذة الكهرباء) فكيف إذا كانت الحرارة تقدر بآلاف أو عشرات الآلاف من الدرجات، في مكان محصور تحت الأرض! .. دا حيولد ضغط هائل وتفجير مرعب.

والحاصل فى امرأة لوط عندما يكون لوط عليه السلام وأهله قد وصلوا منعطفًا لإحدى هذه الشعب وتكون هذه الشعب حاجزا عن النظر وايضا حاجزا من الاشعاع ، ويحدث الانفجار، فمن يلتفت إليه منهم سيعرض عينيه للإشعاع النووي، وستحترق شبكية عينية، ومش يقدر بعدها أن يتم السير لو أراد ذلك ، وحيفضل معرض للإشعاع حتى يهلك به، واللى مش حيبص ويمضي في سيره بلا توقف ، سيغيب عن مصدر الإشعاع ويبعد عنه ، وجسم الإنسان يتحمل الإشعاع لوقت قصير غير طويل وبرضه لكميه بسيطه ، وسيحميه الحاجز الجبلي منه بعد ذلك ، وبذلك ينجو ... وهذا الذي لم تفعله امرأت لوط ؛ (إِلَّا آَلَ لُوطٍ إِنَّا لَمُنَجُّوهُمْ أَجْمَعِينَ (59) إِلَّا امْرَأَتَهُ قَدَّرْنَا إِنَّهَا لَمِنَ الْغَابِرِينَ (60) الحجر، وقد يلحقها من غبار الانفجار ما ينزعها من مكانها أو يدفنها فيه.ولو عرف مكان مركز الانفجار الذي أحدث الصيحة ... لسهل تقدير احتمالات المكان الذي هلكت فيه امرأت لوط عليه السلام ... ولأمكن الوصول إلى مكان موتها إن قدر الله تعالى للبشر ذلك. إن كان الذي حدث هو انفجار نووي تحت القرية بفعل الملائكة، وبأمر من الله تعالى ؛ فهل هو تفجير نووي انشطاري لعنصر اليورانيوم أو البلوتونيوم؟؟!!، الله اعلم أو هو بسبب دمج نووي هيدروجيني ؟؟!! برضه الله اعلم وما تأثير هذا الانفجار على البحر الميت؟! نسيت اقول لكم ان البعض بيقول انه البحيره مش بحيرة طبريه دا البحر الميت , وهذا رأى له وجاهته وهذا ايضا رأى له وجاهته , هل جفف قسمًا من مياهه فزادت ملوحته ، وانخفض مستواه!!إن كان الانفجار انشطاري فسيبقى له آثار في المنطقة تدل عليه من المواد المشعة ...وقد يكون سببه من العناصر المشعة التي لا تخلو منها كل منطقة، وما يصب في البحر الميت يحمل معه آثار الصخور التي ذابت فيه،إما إذا كان الانفجار هيدروجينيًا فالكشف عنه يكون أصعب .... وقد يكون الانفجار أعظم من ذلك فيكون تفجيرًا كربونيًا ، برضه الله اعلم أو أعظم منه مما لم يستطع البشر القدرة على فعله ولن يستطيعوه ... لأن فعل الله تعالى فوق كل أفعال العباد . أما أكبر دليل عليه فهو عند الكشف عن حجارة طينية تعرضت لإشعاع ودرجة حرارة أضعاف ما تتعرض له من انفجار بركاني؛ لقوله تعالى عن الحجارة: (قَالُوا إِنَّا أُرْسِلْنَا إِلَى قَوْمٍ مُجْرِمِينَ(32) لِنُرْسِلَ عَلَيْهِمْ حِجَارَةً مِنْ طِينٍ(33) مُسَوَّمَةً عِنْدَ رَبِّكَ لِلْمُسْرِفِينَ(34) الذاريات، ومسومة أي معلمة على أنها للعذاب يعنى حجاره تنزل مولعه من السما، فهي متضمنة لما أشرنا إليه. ويساعدنا على ذلك الكشف عن الفاصل بين الأرض التي هوت وطبقات الصخور التي بقيت ثابتة في مكانها، لنصل بعد ذلك إلى مكان القرية، والآثار التي بقيت منها... وبعثات من الدول ذات التجارب النووية التي لديها من الخبرة، والمعلومات التي لا يعرفها غيرها ، عن التغييرات التي تحدثها تجاربهم، ولها القدرة على دراسة ذلك ، والحكم عليه بعيدًا عن الصخب الإعلامي ، أو التسويق السياحي إن وجد.

وفى النهايه هذه السلسله لا تؤكد انه تفجير ذرى ولكن نقدر نتخيل, يعنى هى عمليه تخيليه وممكن حد يطلع بموضوع اخر ويقول انه اى حاجه غير اللى بنقوله ... كله الله اعلم بيه ... لكن شوفوا عذاب ربنا شكله ايه ... القنبله الذريه ( اللى بيسموها الطفله بتاعة هيروشيما ) شوفوا عملت ايه فى الناس هناك ... اما فعل الله ... سبحان الله ... لم يبقى لنا احد من قوم لوط عشان يقول لنا ايه اللى حصل ... فى هيروشيما فيه ناس نفدوا بجلدهم من التفجير وقالوا لنا ايه اللى حصل ... لكن فعل ربنا سبحانه وتعالى اباد القوم بالكامل ولم يبقى منهم احد عشان ما يتكررش نسلهم ولا عمايلهم وسبحان الله ولا آله الا الله.

خلصت يا جماعه الموضوع وبعدين من هنا ورايح ولحد الامتحانات ما تخلص شوية كسل ... لا مش يعنى كسل كامل بس يعنى كل اسبوعين بوست عشان خاطر حبايبنا ولادنا والامتحانات وبرضه متضامنين معاهم ضد الامتحانات والمذاكره وعشان فيه عيال حريته طحن ما بيبطلوش مذاكره برضه نتضامن معاهم .

تمت بحمد الله

يوم ميلاد المدونه

بعد الفاصل

فاصل اليوم من سلسلة موضوع قوم لوط واحكى لكم حكاية فشكول

النهارده يوم 27 ابريل يوم ميلاد مدونة فشكول اصل من سنه كنت قاعد انا والبت سومه المجنونه صاحبة مدونة مجنونه فى بلد عاقل طبعا انتم عارفين ان سومه بنت اختى ... هى كدا بنت هبله ومجنونه ولما بتقعد فى البيت بتبقى ناكشه شعرها زى الجنيه ومبهدله هدومها وهى كمان رسامه وطالبه فى كلية الفنون الجميله والجماعه الرسامين والفنانين دول بيبقى مخهم لاحس شويه ومهابيل وقعدت تفرجنى على مدونتها وبعدين قلت لها يا بت يا سومه اعملى لى واحده وقعدنا بقى نعمل فيها وطبعا انا مش فاهم حاجه خالص والبت يا خويا عماله تكتب فى حاجات وتسألنى عن حاجات وانا ولا انا هنا .. واتفقنا على اننا نسميها فشكول وبعدين كتبت لى العنوان بتاعى وكلمة السر وقعدت تحفظهم لى وانا احفظ ولما جيت البيت وحاولت افتح مش راضيه ولا عارف حاجه وقعدت اعمل تباديل وتوافيق لحد ما فتحتها وكنا طبعا عملنا افتتاح المدونه بكلمتين خايبين كدا , المهم سبت المدونه وما اشتغلتش فيها خالص الا فى شهر اغسطس واول بوست كتبته كان حوار مع الزعيم مصطفى كامل وحاجيبه ليكم فى ميعاده ان شاء الله بس بعد ما اعرفكم ايه حكاية فشكول دى.

زمان زمان ايام ما كنت باشتغل فى السعوديه كنت دائما اشترى جريدة الوفد وكانت العصفوره ايامها عماله تصوصو على اخرها وكان الله يرحمه مصطفى شردى رئيس التحرير. وكان السعوديين ياخدوا منى الوفد عشان يقروها .. طبعا كانت بتبقى فاكهه وعجبه عندهم عشان فيها هجوم على الحكومه ونقد للوزراء وهما ما عندهمش حاجه زى كده وآخر النهار يجيبوا لى الجرنال بتاع الوفد متفشكل خااااااالص وانا احاول اظبطه ما يظبطش ويفضل متفشكل .. ويوم بعد يوم سميته فشكول.

وانا فى السعوديه عملت لنفسى خطه وما رضيتش اقعد هناك اكتر من 3 سنين عشان الغربه ما تاخدنيش زى كل الناس اللى بتقعد كتير وظبطت الخطه وعلى اساس ظروفنا هنا وكان بقى من ضمن الخطه ان احط فلوسى فى شركة السعد للاستثمار والتنميه عند عمنا ابو دقن كبيره قوى اشرف السعد.. (من فضلكوا ما حدش يقول على عبيط) كان التليفزيون والجرايد وكل الدنيا بتقول ( الريان) و (السعد) وانا طبعا صدقت الجرايد لانها قوميه يعنى بتاعة الحكومه يعنى مش ممكن تكذب ولا تقول كلام فاضى يعنى او تتكلم عن نصابين.

قوم ايه ؟ اتفشكلت الشكركات دى واتفشكلت فلوسى واتفشكلت معاها الخطه اللى انا كنت حاططها لنفسى وكمان اتفشكلت السفريه بتاعتى ماهو انا كنت بقى جيت وخلاص واكتشفت ان بلدنا ما ينفعش الواحد يخطط فيها لآى حاجه خالص وان احسن خطه تتعمل هو ان الواحد يسيبها على الله لآن ما فيش ثوابت ولا اصول لآى حاجه .

قوم ايه ؟؟ ظبطت نفسى على مشروع تجارى بالقرشين اللى كانوا حيلتى وفشل المشروع اصل دى مش بلد تعمل فيها مشاريع بفلوس صغيره ... اى مشروع مش ينفع الا لو كان بملايين مش بالآلاف وانا بقى طالعه فى دماغى والناس بيقولوا لى يا حاج ولابس الجلبيه البيضه والطاقيه المخططه بتاعة اخويا شلبى وخدت البمبه التالته واتفشكل المشروع والقرشانات الباقيين ورجعت يا مولاى ما خلقتنى ما حيلتيش ولا مليم الا الدخل الشهرى بقى بتاع الوظيفه اللى ييجوا كدا 200 جنيه ... جيت مسمى نفسى فشكول .. من الفشكله ... اصل كل حاجه بعملها بتتفشكل وكأنى انا اللى بفشكل اى حاجه ومن يومها وانا بين زمايلى واصحابى يقولوا لى يا فشكول من الفشكله اللى حصلت لى فى حياتى.

ولما لقيت نفسى مش فاعل فى المجتمع وما ليش اى لازمه ... ولما لقيت انى بلدى مش عايزانى ومش محتاجانى ولا بتعمل لى حساب ... ولما لقيت صوتى فى الانتخابات زى قلته ... ولما لقيت مش عارف ادخل اولادى اى كليه عسكريه بالرغم من انى احد جنود اكتوبر ... ولما لقيت ناس تانيه غير بتوع اكتوبر هما اللى قاعدين على كرسى الفرح واحنا حتى مش بنتفرج ... يعنى من الأخر انا بقيت صعلوك ما ليش لازمه .. يعنى انا وانت والمعازيم ... يعنى الفرح وصحاب الفرح ... يعنى العريس ... يعنى ابو العريس ... يعنى انا وانت ...يعنى من الآخر انا اونطه وطز ولا كأنى موجود قمت عملت مدونة صعلوك اللى الواد محمود ابنى خطفها منى واشتغل فيها وحتى ما بقيتش طايل صعلوك هو يا دوب فشكول وخلاص.

نفسى بقى حد يسألنى يقول لى يا واد يا فشكول ... نفسك فى ايه وما عملتوووووش

مين اللى سأل؟

انت ؟ طب ياسيدى

نفسى ابقى رئيس جمهوريه ... أى جمهوريه وخلاص ... آهم يقولوا على فخامة الرئيس وخلاص وامشى قدام حرس شرف كدا والناس كلها تخاف منى زى ما تخاف من امنا الغوله وحاعمل فى شعبى عمايل مهببه بهباب.

اولها : مش خاخليه يشوف النوم,,,, وثانيها : مش حاخليه يدوقوا اللحمه خالص عشان انا حاكل اللحمه لوحدى ,,, وثالثا : حادخلهم كله السجون ,,, يعنى حاخلى عيشة شعبى منيله بستين نيله ... اشمعنى أنى يعنى هو انا كخه ... مش كل الريسه بيعملوا كده وانا كمان زيهم.

وعلى فكره ... بما انى رئيس بقى ورئيس مهبب بهباب ما فيش لا تورته ولا جاتوه ولا كاكولا وحتيجوا تعيدوا على وتقولوا لى كل سنه وانت طيب يا فشكول وعقبال 163.5 من عمر مدونة فشكول وتمشوا على طول وحتى مش تشربوا كاكولا ولا حاجه ولا حتى كباية شاى ... مش انا بقى الرئيس ... انا بقى الزعيم ...

اظن بوست خفيف وجميل ومريح

قال فرحان بكرشه قوى وهو حيفرقع

الحلقه الثالثه وعقبال الاخيره

ايه اللى حصل لقوم لوط عليه السلام وكيف هلك قوم لوط عليه السلام؟
ح نرتب ما وقع لقوم لوط في نقاط حتى نقف بوضوح على ايه اللى حصل لهم ؛ وياجماعه الموضوع ده حياخد بوستين يعنى حانشره على مرتين برضه عشان طويل وما ازهقكوش اصل بصراحه انا زهقت واتخنقت والله يكون فى عونكم انتم كمان زمانكم زهقتم واتخنقتم من فشكول اللى عمال يصدع فى دماغكم

أولاً: انتفاخ وارتفاع أرض القرية وما حولها ارتفاعًا يسيرًا لقوله تعالى :
(وَجَاءَ فِرْعَوْنُ وَمَنْ قَبْلَهُ وَالْمُؤْتَفِكَاتُ بِالْخَاطِئَةِ (9) فَعَصَوْا رَسُولَ رَبِّهِمْ فَأَخَذَهُمْ أَخْذَةً رَابِيَةً (10) الحاقة
والربوة يا جماعه في لسان العرب من مادة "ربو"؛ [ربا الشيء: زاد ونما، والربا زيادة تؤخذ على المال، ورَبا السويقُ ونـحوه رُبُوًّا: صُبَّ علـيه الـماءُ فانْتَفَخ . وقوله عز وجل فـي صفةِ الأَرضِ (اهْتَزَّتْ و رَبَتْ)؛ قـيل: معناه عَظُمَتْ وانْتَفَخَتْ، وبالهمز فمعناه ارْتَفَعَتْ يعنى ورمت .. يعنى بالبلدى اتنفخت كدا وبقى لها كرش والكرش دا زاد عن حده وعايز يفرقع.

وقوله عز وجل: (فأَخَذَهم أَخْذَةً رابِـيَة) أَي أَخْذَةً تَزِيدُ علـى الأَخَذات يعنى زياده شويه ؛ قال الـجوهري: أي زائِدَةً. و الرَّبْوُ و الرَّبْوَةُ: البُهْرُ وانْتِفاخُ الـجَوْفِ؛ والربوة والرابية المكان المرتفع ، والتلال: الروابي]... انتهى.

وزيادة ارتفاع أرض القرية وانتفاخها، وما حولها سيحدبها ، وسيشقق ذلك سطحها ويضعفه عارفين الارض عند الفلاحين فى الصيف لما تعطش قوى وما تلاقيش ميه تلاقى فيه شقوق كبيره كدا والفلاحين بيقولوا عليها الارض شراقى خالص وحيصل الانفجار من اضعف مكان فيها ، ... والآية التالية هي التي تبين ذلك، ثانيًا: قال تعالى: (فَأَخَذَتْهُمُ الصَّيْحَةُ مُشْرِقِينَ (73) الحجر، فبعد الانتفاخ والرفع جاءت الصيحة، وهو صوت خروج ما تحت القرية من أحد أماكن ضعف الأرض بقوة انفجار عالية رفعت ما تحت القرية إلى عنان السماء ... والقرية ما زالت متماسكة بعد على حالها..فماذا نتج عن هذه الخطوة؟ لقد نتج عنها تفريغ ما تحت القرية ....

يعنى بالبلدى كدا ان القريه انتفخت وورمت وبقى تحتها والله اعلم هواء زى الهواء اللى فى الكوره واما امر ربنا جه الهوا ده قذف بالقريه والمبانى لفوق وبعدين مكان القريه بقى حفره كبيره لان القريه طارت فى السماء وسابت مكانها ومن شدة ضغط الهواء حصل صوت فرقعه كبيره قد تكون تلك هى الصيحه.

صعب والله ياجماعه الواحد يوضح اكتر من كدا ... انا قاعد عمال آخد الكلام وابسطه بس مش عارف ابسطه اكتر من كده

وماذا حل بالقرية؟
تأتي الآية الثالثة لتوضح ذلك ....ثالثًا: قال تعالى: (وَالْمُؤْتَفِكَةَ أَهْوَى (53) النجم، فسمى القرية بالمؤتفكة، واسمها من مادة "أفك" والإفك هو قول الكذب بلا سند يعتمد عليه ويثبته يعنى كدب من غير رجلين مش المثل بيقول الكدب ما لوش رجلين .. زى القريه كدا كلها افك والافك برضه ما لوش رجلين.
وكذلك أصبح حال القرية بلا قاعدة تستند عليها، فلم يكن إلا أن تهوي إلى قعر هذا الفراغ الذي حدث تحتها ح تروح فين يعنى طبعا مش ح تفضل طايره فى السما ... والقرية ما زالت متماسكة على الرغم من شدة ما أصابها ... يعنى القريه انقطعت من الارض وسابت مطرحها وطارت لفوق فى عنان السماء وعشان كدا القريه انقلبت فى الهواء وبقى عاليها واطيها ونزلت على الارض فى وضع زرع بصل وبقت الراس تحت والرجل فوق والسطوح بتاعة المبانى تحت والدور الارضى فوق

وأما جمع المؤتفكة في قوله تعالى: (وَجَاءَ فِرْعَوْنُ وَمَنْ قَبْلَهُ وَالْمُؤْتَفِكَاتُ بِالْخَاطِئَةِ (9) الحاقة فتفسير المؤتفكة والمؤتفكات على وجهين: إما لحملهم الإفك ؛ ورأسه الشرك بالله ، والمؤتفكات تشمل بذلك قوم لوط وأمثالهم ، وإما المراد به حال القرية المعلقة بلا سند تستند إليه بعد الصيحة ، وفراغ ما تحتها، وقبل أن تهوي على الأسفل، والجمع هنا ليدل على أن قرية قوم لوط عليه السلام كانت متشعبة لعدة أحياء متباعدة؛ كأن كل حي فيها قرية .. وأظن هذا هو السبب في قول أهل الكتاب أن قرى قوم لوط كانت خمسة، ويدل ذلك على سعة الخسف الذي حل بأرضهم. ثم تأتي آية لتبين أمرًا رابعًا ...

رابعا: قال تعالى: (إِنَّا أَرْسَلْنَا عَلَيْهِمْ حَاصِبًا الا آَلَ لُوطٍ نَجَّيْنَاهُمْ بِسَحَرٍ (34) القمر، عندما تهوي القرية سيسبب ذلك اندفاع الهواء إليها بشدة لملء الفراغ الذي تركته القرية مكانها زيادة على الصيحة ؛ فالهواء الحار الشديد الحرارة المندفع إلى أعلى سيخلفه بقوة هواء بارد مما حوله .. فحصبوا بشدة اندفاعه عليهم ... وهذا مما يثير الغبار عليهم ويحدث الظلمة ؛ فحسن ذكر الحاصب والسحر في هذه الآية لأن في كليهما ظلمة اللى عايز يتخيل الحكايه دى يفتكر دوامة هوا مره حدثت امامه اللى فيها بيكون الهوا بيلف حوالين نفسه وعامل شبوره بتلف وبيطير اى حاجه فى المنطقه اللى بيلف فيها الهواء ده وعامل تراب واللى العيال بيقولوا عليها (فاسية العفريت) .... ثم يتبعهم الله بما ذكر ...تعالو بقى نشوف وجهة نظر تانيه بتقول ان القريه ما بقاش عاليها واطيها لأ دى كانت زى ما هى وان الحجاره نزلت عليهم من السماء فدفنتهم تحتها زى الأيه القادمه:

خامسًا: قال تعالى: (وَأَمْطَرْنَا عَلَيْهِمْ حِجَارَةً مِنْ سِجِّيلٍ(74) الحجر، (وَأَمْطَرْنَا عَلَيْهَا حِجَارَةً مِنْ سِجِّيلٍ مَنْضُودٍ(82) هود؛ ... الناس ما زالوا في قريتهم فوق أرضها وليس تحتها ... وهذا المطر المكون من هذه الحجارة يقع عليهم، وكانوا هم مستقبلين لسقطته عليهم ، ولو رفعوا، وقلبت القرية كما قيل، [ولفظ القلب لم يأت به القرآن، ونسب لابن عثيمين رحمه الله إنكار ذلك أيضًا] لكانوا هم والحجارة مطرًا معًا، ولهلكوا قبل أن يصلوا الأرض يعنى القريه طارت فى الهواء وحتقع .. وطبعا الناس حيقعوا معاها والحجاره كمان بتاعة سجيل واكيد قبل ما يوصلوا الارض كانت حتنقطم رقبتهم وما يوصلوش الارض بسلام ابدا ،... ثم يأتي بيانًا آخر يبين ما حدث ...

سادسًا: قال تعالى: (فَغَشَّاهَا مَا غَشَّى (54) النجم، أي أصابها من الأمور العظيمة ما أصابها ، فبعد الرفع للقرية كانت الصيحة، ثم حصبوا، ثم أمطروا بالحجارة ، فغشيتهم وغطت القرية ودفنتها ... ثم جاء ذكر ما استقر عليه حال القرية ...

ما علهش ياجماعه آهى توريطه وورطتكم معايا فيها وموضوع مرهق للمخ ومتعب .. بس الغاوى بقى ينقط بطاقيته واستحملوا فاضل كمان بوست واحد .. مش عارف مين اللى شار على بالسلسله دى .. الله يسامحه بقى

فى الحلقه القادمه سنتكلم عن كيف انه تم تفجير القريه تفجيرا ذريا

الحلقه التانيه

ما علاقة تسمية قوم سيدنا لوط عليه السلام باسمه

وتميزه بسيرته الذاتية؟ طب بذمتكم الاشكال الواطيه دى ممكن يكون ليها اسم

قبل ان ابدأ البوست لابد ان ننبه الى الملاحظة التى ابداها الاستاذ صاحب مدونة فوبياليزم وهو خطأ اطلاق كلمة لوطيين على الشواذ لانهم ينسبونهم الى النبى لوط عليه السلام والصحيح هو ان نطلق عليهم الفاعلين الخنزره كقوم لوط وليسوا لوطيين.

قوم لوط عليه السلام ليس لهم اسم يعرفوا به، فهم أقل من أن يسموا باسم يميزهم عن غيرهم، عشان هما ناس واطيين فقد وصلوا إلى درجة من الانحطاط لا سابقة لها، لييييه عشان ما لهمش آباء ينتسبون اليهم .. اصل ما حدش عارف مين ابن مين وكمان ماعندهمش حاجه تميزهم , مش بقول لكم ناس واطيين ؛ لذلك لم يرسل لهم نبيٌّ من أنفسهم , هى دى اشكال يبقى منهم نبى ؛ لأن النبي يرسل من أوسط قومه وأفضلهم، وقد كان كل الجماعه دول في الرذيلة ما يتخيروش عن بعض ، والدليل على ذلك قول لوط عليه السلام: (أليس منكم رجل رشيد) يعنى ما عندكوش راجل بيفهم يا غجر وبعدين سيدنا لوط ما لقاش ولقاهم كلهم ما عندهمش دم ولا عرض فعرفوا فقط باسم النبي الذي أرسل إليهم من غيرهم .

وقد جاء تسمية لوط عليه السلام ليدل على أمرين اثنين؛ إذ اسمه مشتق من فعل (إلتاط بالقلب) و(إلتاط بالقوم) وهو يدل على معنيين متعلقين بسيرته عليه السلام ؛ أولاهما: تعلق قلبه بإبراهيم عليه السلام؛ فآمن به، وهاجر معه إلى الله: (فآمن له لوط وقال إني مهاجر إلى ربي)، وقوله تعالى: (ونجيناه ولوطًا إلى الأرض التي باركنا فيها للعالمين)، وهذا الارتباط القلبي بينهما ما يبين سر مرور الملائكة على إبراهيم عليه السلام قبل إهلاك قوم لوط وطمأنتهم له على نجاته: (قَالَ إِنَّ فِيهَا لُوطًا قَالُوا نَحْنُ أَعْلَمُ بِمَنْ فِيهَا لَنُنَجِّيَنَّهُ وَأَهْلَهُ إِلَّا امْرَأَتَهُ كَانَتْ مِنَ الْغَابِرِينَ (32) العنكبوت0 وثانيهما: أنه التاط بالقوم؛ أي التحق بهم وهو ليس منهم؛ والله يا جماعه مش عارف اسهلها لكم اكتر من كده.

احنا طبعا عارفين أن قد جاء (لوط بن هاران بن آزر) عليه السلام من العراق، وأرسل إلى هؤلاء القوم وأصبح هو الرسول إليهم، ويظهر والله اعلم أنه تزوج منهم امرأته قبل تمكن الفاحشة فيهم، وعلى العموم آهى راحت لحالها معاهم ... وجعل تعالى اسمه المشهور به هو (لوط) عشان يدل اسمه على أنه غريب عنهم ليه؟

لأن الجماعه دول لا يشرفون أي إنسان أن ينتسب إليهم أو حتى يبقى منهم ، فكيف من يختاره الله ويصطفيه ليكون نبيًا ورسولاً، وما إرساله إليهم حتى لا يكون لهم حجة يعنى قد اعذر من انذر وربنا انذرهم بلوط وما حدش يتحجج بعدم تبليغهم رسالة ربهم، ولم يصرَّح من دعوة لوط عليه السلام فيهم غير إنكاره عليهم خنزرتهم ,يعنى تفاصيل دعوة سيدنا لوط لهم صعب التوصل اليها , اللى نعرفه من الدعوه انه كان عايز يبطلهم الخنزره وقلة الادب بتاعتهم دى ، والتى فقدوا بها رجولتهم، وانعدم لديهم الطموح إلى المعالى.

فكيف يؤمن بالله ويحمل الرسالة من كان على هذا الحال من السوء والمسخ المغير للفطرة يعنى الفطره راجل وامرأه مش راجل وراجل ولا امرأه وامرأه هو حد يطول كدا مزه زى القمر كده وتكون له بشرع الله لكن تقول ايه بقى للنفسى الواطيه اللى تدور على واحد مخنشر زيها ولا واحده كدا مزه وحلوه تدور برضه على واحده مزه وحلوه زيها ، دى حاجات بتهدم الاسره والمجتمع عشان مين اللى حيخلف لو راجل وراجل طب ومين اللى حتحبل لو امرأه وامرأه , ناس بقى ما بيفهموش.

ولما كانت رابطة القرابة بين لوط وإبراهيم عليهما السلام متينة ، وهجرته معه من أرض بابل، واجتماعهما قبل هذا على التوحيد، واعتبار لوط من أتباعه، وقرب مسكن إبراهيم من مسكن قوم لوط، لقول الملائكة لإبراهيم عليه السلام: (قَالُوا إِنَّا مُهْلِكُو أَهْلِ هَذِهِ الْقَرْيَةِ إِنَّ أَهْلَهَا كَانُوا ظَالِمِينَ (31) العنكبوت وفيها الإشارة إلى القرية بـ(هذه) وهو اسم إشارة للقريب؛ فقد كانوا على مرأى من عينيه، وما أصابهم سيصل إليه إن بقي في بيته ، فمرت عليه الملائكة أولاً لإبلاغه بأمر إهلاك قوم لوط ليحتاط لأمره قبل وقوع الهلاك ، وتحذير من يسكن معه أو حوله ، وكان اتجاه خروجه باتجاه مسكنه الجديد في الخليل.

عايز اكتب لكم كمان بس عشان البوست ما يطولش وتزهقوا منه وعشان الموضوع الجاى عايز تركيز منى ومنكم عشان فيه شرح لآيات فى القرأن وفيه لغه عربيه صعبه قوى انا بحاول اخفف لكم حدتها وفيه كلام علمى كبير وكتير وذره ونووى وتحليل وغيره.

والى اللقاء فى الحلقه القادمه

هل هلك قوم لوط بأول تفجير نووى فى التاريخ

تحديث

الواد صعلوك ابتدى يشتغل وبدأ فى صعلكته

وكل حاجه اتصلحت من فضلكم زوروه وشجعوه

منظر لبحيرة طبريه

بسم الله الرحمن الرحيم

لما لم اجد افكارا فى رأسى كى اكتبها وكنت اتعجب زمان من بعض الكتاب الذين يذكرون فى مقدمة اعمدتهم انهم لم يجدوا افكارا للكتابه وكأن رأسهم محيت منها الافكار . ولذلك اكتب سلسلة من البوستات عن :

هل هلك قوم لوط بأول تفجير زرى فى التاريخ

وانا اتعرض لمثل هذه الحاله الآن فقد اعتمدت على الله لاكتب لكم بوستا قد لا يجد اهميه عند القراء وقد يحجم كثيرا منهم فى قراءته ولكننى اردت ان اكسب اجرا من الله واكتب فى شيئ مفيد وابدأ سلسلة من الكتابات نقلا عن معلومات استقيتها من بعض الكتب ومن النت عن قوم لوط عليه السلام.

هل هلك قوم لوط بأول تفجير نووي في التاريخ في وادي الاردن

عند دراسة الحدث الذي كان فيه هلاك قوم لوط عليه السلام تتداعى تساؤلات كثيرة؛ لماذا مرت الملائكة على إبراهيم قبل الذهاب إلى لوط عليهما السلام؟ ولماذا ارتبطت البشرى بإسحاق عليه السلام بعد عقم طويل بهلاك قوم لوط؟ ولماذا جاءت الملائكة إلى بيت لوط عليه السلام على مسمع ومرأى من قومه؟ وما الحكمة من طمس أعينهم قبل أن يتم هلاكهم؟ ولماذا أمر لوط عليه السلام بالخروج آخر الليل وأُمر باتباع أدبار القرية؟ ولماذا أمروا بعدم الالتفات؟ والمضي حيث أمروا بلا توقف؟ولماذا تعلم الملائكة لوط عليه السلام بهلاك امرأته قبل وقوع الهلاك؟وكيف تهلك امرأة لوط عليه السلام وهي معهم ويسلمون هم؟ وكيف جعلت الملائكة عالي القرية أسفلها؟ ومتى كان هذا الحدث؟ وفي أي فصل كان؟ وأين وقع هذا الحدث ؟ وتساؤلات أخرى تطرح نفسها عند الدخول في التفاصيل ...سنقتصر في هذه الدراسة على ما ورد في القرآن الكريم فقط ...

أين كانت قرية قوم لوط ؟

يخبرنا تعالى أن إبراهيم ولوط عليهما السلام هاجرا إلى الأرض المباركة؛ قال تعالى: (فَآَمَنَ لَهُ لُوطٌ وَقَالَ إِنِّي مُهَاجِرٌ إِلَى رَبِّي إِنَّهُ هُوَ الْعَزِيزُ الْحَكِيمُ (26) العنكبوت، وقوله تعالى (وَنَجَّيْنَاهُ وَلُوطًا إِلَى الْأَرْضِ الَّتِي بَارَكْنَا فِيهَا لِلْعَالَمِينَ (71) الأنبياء، والأرض المباركة هي التي يستقر فيها أهلها لكثرة خيراتها فلا يحتاجون للرحيل عنها طلبًا للرزق في غيرها، والمقصود بالأرض المباركة (المُعرَّفة): هي المنطقة التي هاجر إليها إبراهيم عليه السلام، وفيها أقدم بروك واستقرار بشري معروف (في منطقة أريحا)، وقد جاء في التفسير؛ أن أبا جهل قال لأهل مكة:[أيعدكم محمد أن تكون لكم جنات كجنات الأردن]، ما يدل على اشتهار المنطقة منذ القدم بكثرة الخيرات، وتوفر المياه الدائمة الجريان، ففيها نهر الأردن، والروافد التي تصب فيه، وكذلك الينابيع وعيون الماء، والله تعالى بارك في الشام كلها على العموم .... فمكان سكناهم الجديد هو في مكان ما من غور الأردن من أعلاه إلى ما بعد البحر الميت. - ومكان قرية قوم لوط معروفة لدى العرب لقوله تعالى: (وَإِنَّكُمْلَتَمُرُّونَ عَلَيْهِمْ مُصْبِحِينَ (137) وَبِاللَّيْلِ أَفَلَا تَعْقِلُونَ (138) الصافات، وقوله تعالى: (وَإِنَّهَا لَبِسَبِيلٍ مُقِيمٍ(76) الحجر، وقوله تعالى: (وَلَقَدْ أَتَوْا عَلَى الْقَرْيَةِ الَّتِي أُمْطِرَتْ مَطَرَ السَّوْءِ أَفَلَمْ يَكُونُوا يَرَوْنَهَا (40) الفرقان، فهي إذن تقع على طريق تجارتهم إلى الشام؛ وهي لا تصلح بعد الحدث للنزول فيها، فإما ينـزلوا قبلها ليمروا عليها في الصباح، وإما يكملوا مسيرهم في الليل ليتعدوها لينزلوا فيما بعدها؛ فهي حول البحر الميت في شماله أو جنوبه، الذي اشتهر باسم بحيرة لوط.لقوله تعالى: (وَلَقَد تَرَكْنَا مِنْهَا آيَةً بَيِّنَةً لِقَوْمٍ يَعْقِلُونَ(35) العنكبوت. - وجاءت الإشارة أن مكانهم ليس ببعيد عن مدين؛ لقول نبيهم شعيب عليه السلام لهم: (وَمَا قَوْمُ لُوطٍ مِنْكُمْ بِبَعِيدٍ(89) هود.- وأن القرية مقامة في منطقة مكونة من طبقات رسوبية وطينية ؛ لقوله تعالى في آيات عديدة: (قَالُوا إِنَّا أُرْسِلْنَا إِلَى قَوْمٍ مُجْرِمِينَ(32)لِنُرْسِلَ عَلَيْهِمْ حِجَارَةً مِنْ طِينٍ(33) الذاريات، (وَأَمْطَرْنَا عَلَيْهِمْ حِجَارَةً مِنْ سِجِّيلٍ(74) الحجر، (وَأَمْطَرْنَا عَلَيْهَا حِجَارَةً مِنْ سِجِّيلٍ مَنْضُودٍ(82) هود؛ فالحجارة الطينية أو الرسوبية هي سجل لتاريخ الأرض، والأحداث والتغيرات التي حدثت عليها، فكانت هذه الحجارة من الطين أسفل القرية قبل الحدث، لتكون أعلاها بعد الحدث والقرية أصبحت أسفلها بعد ذلك. - كثرت وجود الحصى الذي يدل على وجود الأودية، ومجاري المياه المكونة لها؛ لقوله تعالى: (إِنَّا أَرْسَلْنَا عَلَيْهِمْ حَاصِبًا إِلَّا آلَ لُوطٍ نَجَّيْنَاهُمْ بِسَحَرٍ(34) القمر، وأسلوب القرآن الكريم هو أنه يكرر القصة الواحدة ليأتي بكل التفاصيل المراد ذكرها. - وأرجح أن سكنى قوم لوط عليه السلام كانت جنوب البحر الميت؛ لأن مدينة الخليل التي انسحب إليها إبراهيم عليه السلام، وسكنها بعد ذلك تُطل فقط على الجزء الجنوبي من البحر الميت، وتحجب الجبال عنها معظم البحر الميت .... وأن موقع القرية لم يغمر بمياه البحر أثناء الحدث ولا بعده إلا جزءًا منها لقوله تعالى: (وَلَقَد تَرَكْنَا [مِنْهَا] آيَةً بَيِّنَةً لِقَوْمٍ يَعْقِلُونَ(35) العنكبوت.

ما الوقت الذي حدث فيه هلاك قوم لوط عليه السلام؟

كان وقت هلاك قوم لوط عليه السلام بين نهاية الشتاء وبداية الربيع لقوله تعالى: (فَمَا لَبِثَ أَنْ جَاءَ بِعِجْلٍ حَنِيذٍ (69) هود، وقوله تعالى: (فَرَاغَ إِلَى أَهْلِهِ فَجَاءَ بِعِجْلٍ سَمِينٍ (26) الذاريات، والعجل لا يسمى في اللغة بهذا الاسم إلا في الشهر الأول من عمره، والقرآن الكريم لا يستعمل الأسماء إلا بدلالاتها، ويراعي سبب تسميتها، وولادة البقر تكون في العادة آخر الشتاء لتوفر العشب وعلف الأنعام في الربيع بعده، فتتمكن من إرضاع وإشباع مواليدها، وهذا الوقت مقصود لذاته لأنه لا تكون فيه تجارة، ولا يوجد في المنطقة إلا أهلها، فلا يقع العقاب إلا عليهم فقط. أما الحدث نفسه فقد وقع في الصباح لقوله تعالى: (إِنَّ مَوْعِدَهُمُ الصُّبْحُ أَلَيْسَ الصُّبْحُ بِقَرِيبٍ (81) هود، (فَأَخَذَتْهُمُ الصَّيْحَةُ مُشْرِقِينَ (73) الحجر، (وَلَقَدْ صَبَّحَهُمْ بُكْرَةً عَذَابٌ مُسْتَقِرٌّ(38) القمر، أما واختيار الهلاك في الصباح مع الشروق فيه حكمة من الله عظيمة، وفيه سلامة لغير أهل القرية؛

فأولاً: من كان نزل القرية أو أطرافها، يكون قد خرج منها وابتعد عنها، لأن من عادة السفر في المناطق الحارة التحرك آخر الليل مبكرًا مع الفجر، وقبل الشروق؛ ليقطع مسافة أطول قبل اشتداد الحر وقبل أن يصيبه الإرهاق والدواب التي معه.

وثانيًا: من أرادها لا يكون قد وصل إليها في هذا الوقت في الغالب. وكان تحديد الملائكة الهلاك لأهل القرية فقط دون من يأتيها..فكيف تم حشر أهلها فيها حتى لا يفارقوها؟ جاءت الملائكة متوجهين إلى بيت لوط عليه السلام في وضح النهار، على مرأى ومسمع من أهل القرية، وفي ريعان الشباب وصورة جميلة؛ ليزداد أهل القرية فتنة فيهم فيجتمعوا عليهم، فما أن انتشر خبرهم حتى توجه أهل القرية إلى بيت لوط عليه السلام؛ (وَلَمَّا جَاءَتْ رُسُلُنَا لُوطًا سِيءَ بِهِمْ وَضَاقَ بِهِمْ ذَرْعًا وَقَالَ هَذَا يَوْمٌ عَصِيبٌ (77) وَجَاءَهُ قَوْمُهُ يُهْرَعُونَ إِلَيْهِ وَمِنْ قَبْلُ كَانُوا يَعْمَلُونَ السَّيِّئَاتِ(78) هود، (وَجَاءَ أَهْلُ الْمَدِينَةِ يَسْتَبْشِرُونَ(67) الحجر، (قَالَ إِنَّ هَؤُلَاءِ ضَيْفِي فَلَا تَفْضَحُونِ (68) وَاتَّقُوا اللَّهَ وَلَا تُخْزُونِ (69) قَالُوا أَوَلَمْ نَنْهَكَ عَنِ الْعَالَمِينَ (70) الحجر، (قَالَ لَوْ أَنَّ لِي بِكُمْ قُوَّةً أَوْ آَوِي إِلَى رُكْنٍ شَدِيدٍ (80) قَالُوا يَا لُوطُ إِنَّا رُسُلُ رَبِّكَ لَنْ يَصِلُوا إِلَيْكَ ...(81) هود، فما كان من الملائكة إلا أن طمست أعين من حضر منهم بعد تجمعهم؛ (وَلَقَدْ رَاوَدُوهُ عَنْ ضَيْفِهِ فَطَمَسْنَا أَعْيُنَهُمْ فَذُوقُوا عَذَابِي وَنُذُرِ(37) القمر، وظني أن هذه الليلة كانت آخر أيام شهر قمري ليعم عليه الظلام ويشتد، فبهذا الطمس ضمان بقائهم في داخل القرية ولا يرحل أحد بعيدًا عنها إلى العمل في حدائقها أو مزارعها أو لرعي أنعامهم، وليبقوا في طرقاتهم خارج بيوتهم لا يهتدون إليها سبيلاً، ولا يجدون مبصرًا يقودهم إليها، أو إلى أسفار لهم بعيدًا عنها، وهم يتهددون لوط ويتوعدونه في الصباح، وما يدرون أن الصباح عليهم لا لهم .... وقد سمي الصباح صباحًا لأن فيه أعظم تغير يحس به الإنسان في حياته، وهو التغير من ظلمة الليل إلى نور النهار؛ فكان عليهم أعظم تغير من الحياة إلى الهلاك ثم عذاب الخلد، وكان الصبح موعدهم.. وليس عنهم ببعيد.فهذا هو تدبير الله في إطباق الهلاك عليهم من دون الناس حتى لا يغادر منهم أحد... فكان تدبيرًا محكمًا ...ولم يكن في القرية من يخاف هلاكه معهم إلا لوط عليه السلام وأهله؛ (فَأَخْرَجْنَا مَنْ كَانَ فِيهَا مِنْ الْمُؤْمِنِينَ(35) فَمَا وَجَدْنَا فِيهَا غَيْرَ بَيْتٍ مِنْ الْمُسْلِمِينَ(36) لماذا أهلك الله قوم لوط؟ لقد اشتهر هؤلاء القوم برذيلة لم يسبقهم إليها أحد من قبلهم إلا الخنازير، قال تعالى: (قَالُوا إِنَّا أُرْسِلْنَا إِلَى قَوْمٍ مُجْرِمِينَ(32) الذاريات، (وَمِنْ قَبْلُ كَانُوا يَعْمَلُونَ السَّيِّئَاتِ) هود، (وَلُوطًا إِذْ قَالَ لِقَوْمِهِ أَتَأْتُونَ الْفَاحِشَةَ مَا سَبَقَكُمْ بِهَا مِنْ أَحَدٍ مِنَ الْعَالَمِينَ (80) إِنَّكُمْ لَتَأْتُونَ الرِّجَالَ شَهْوَةً مِنْ دُونِ النِّسَاءِ بَلْ أَنْتُمْ قَوْمٌ مُسْرِفُونَ (81) الأعراف، لقد انتشرت الخنزرة (فعل ذكور الخنازير بعضها مع بعض) فيهم انتشارًا عمهم جميعهم، حتى أنهم عزفوا عن الزواج من النساء؛ (وَلُوطًا إِذْ قَالَ لِقَوْمِهِ أَتَأْتُونَ الْفَاحِشَةَ وَأَنْتُمْ تُبْصِرُونَ(54)أَئِنَّكُمْ لَتَأْتُونَ الرِّجَالَ شَهْوَةً مِنْ دُونِ النِّسَاءِ بَلْ أَنْتُمْ قَوْمٌ تَجْهَلُونَ (55) النمل، وقال لهم: (أَتَأْتُونَ الذُّكْرَانَ مِنْ الْعَالَمِينَ(165) وَتَذَرُونَ مَا خَلَقَ لَكُمْ رَبُّكُمْ مِنْ أَزْوَاجِكُمْ بَلْ أَنْتُمْ قَوْمٌ عَادُونَ(166) الشعراء، وقال لهم: (قَالَ يَاقَوْمِ هَؤُلَاءِ بَنَاتِي هُنَّ أَطْهَرُ لَكُمْ فَاتَّقُوا اللَّهَ وَلَا تُخْزُونِ فِي ضَيْفِي أَلَيْسَ مِنْكُمْ رَجُلٌ رَشِيدٌ (78) قَالُوا لَقَدْ عَلِمْتَ مَا لَنَا فِي بَنَاتِكَ مِنْ حَقٍّ وَإِنَّكَ لَتَعْلَمُ مَا نُرِيدُ(79) هود، وقطعوا على المارة الطريق فلا يمر في أرضهم غريب إلا اعتدوا عليه، وحتى أنهم يتخنزرون في مجالسهم وناديهم: (أَئِنَّكُمْ لَتَأْتُونَ الرِّجَالَ وَتَقْطَعُونَ السَّبِيلَ وَتَأْتُونَ فِي نَادِيكُمْ الْمُنكَرَ...(29) العنكبوت، وضاقوا ذرعًا بتشنيع لوط عليه السلام عليهم فعلتهم القبيحة: (فَمَا كَانَ جَوَابَ قَوْمِهِ إِلَّا أَنْ قَالُوا أَخْرِجُوا آلَ لُوطٍ مِنْ قَرْيَتِكُمْ إِنَّهُمْ أُنَاسٌ يَتَطَهَّرُونَ(56) النمل، واستخفوا بعذاب الله بسبب إمهال الله لهم ليتوبوا، (قَالُوا ائْتِنَا بِعَذَابِ اللَّهِ إِنْ كُنتَ مِنْ الصَّادِقِينَ(29) العنكبوت،

فى الحلقه القادمه نتكلم عن علاقة تسمية لوط عليه السلام باسمه وتميزه بسيرته الذاتية.

والى اللقاء فى الحلقه القادمه

فشكله فى الاسكندريه

السلام عليكم اعزائى زملائى وابنائى وبناتى مجتمع التدوين الجميل
طبعا انا آسف جدا للغيبه الطويله عليكم فى البوست ده وبأعتزر لاحبائى وبناتى - محاسن هانم صابر - وعاشقه الاحزان - والحاجه شمس النهار- وحسين بك سباق - والدكتوره سوووول - والعزيزه لايف - عشان كنت بألعب فى مدونة العزيز حسين سباق وبعدين لقيت كلمة اتصالات اخرى جيت نازل كتابه ... اتاريها بتنشرها عندى فى المدونه وانا مش واخد بالى ... قمت رجعت جرى وشيلتها .. والجماعه بقى فكروه بوست عايزين ينزلوا تعليقات .. وانا عملت فيهم فصل بارد وانا مش واخد بالى عشان كدا باعتزر لهم ولكل من زار الكلمتين اللى كنت باكتبهم عند حسين حامد سباق صاحب العزبه. وندخل بقى فى الموضوع

يا سلام على شتاء اسكندريه (مافيش حد على الشاطئ خالص )

بس عشان انا كنت فى اسكندريه طوال الاسبوع الماضى ولم اعود الا يوم الخميس وان شاء الله اروح فى شم النسيم والشاطر يبقى يقابلنى , ويوم الاربع قعدت على نت كافيه عشان اتواصل معاكم وفعلا رديت على كذا تعليق لكن القعده فى الكافيه نت مش حلوه والعيال بيبصوا لى كدا من تحت لتحت وفاكرين انى راجل عجوز قاعد عمال يعاكس ويشيت مع البناتات الحلوات الجميلات العسولات السكاكير اللى زى بناتى المدونين .. فقمت اتكسفت من روحى وقلت قوم يا فشكووول واحترم نفسك و روح الاستراحه واديها نوم ... هو فيه حد اليومين دول يطول شوية نوم وانت من الساعه الثالثه يوميا فاضى وما وراكش حاجه ولو مش عايز تنام ممكن تتمشى على الشط وعندك الشط من اول المعموره لحد السلسله فاضى ما فيهش ولا صريخ ابن يومين والقعده بتبقى جميله جدا . وخصوصا ان ما فيش زحمة الصيف. وانا بقى عاشق اسكندريه فى الصيف واكتر فى الشتاء .

وبما انى كنت فى اسكندريه ومش اضيع الفرصه دى فى انى امخخ بوست كويس برضه يليق بمقامكم ومقام اسكندريه تعالوا بينا نتفسح سوا فى الاسكندريه ونتكلم عنها صيفا اوشتاءأ:

الاسكندريه .. أه يا لاللالى .. ياعينى يا لالالى .. سيدى يا لالالى .. . يا سيدى ... مريه فيها الهوى بحرى .. ما بقاتش ... حيث دائما اذهب للاسكندريه للعمل احيانا والفسحه احيانا اخرى- فى الصباح اذهب الى العمل الاقى فيه ما الاقى من مشاكل العمل - تحل بعضها وبعضها يبقى بلا حل - وفى اخر النهار ابتغى فضلا من ربى ورحمه ... هذا الفضل هو الفسحه والتنزه على البحر والتسوق بقدر ما يسمح بيه الربع جنيه اللى حيلتى.. عملى فى المنشيه .. مأموريات مؤقته .. .أحيانا اخذ معى اولادى سواء فى الصيف او الشتاء فعندى ان اسكندريه فى الشتاء اجمل منها فى الصيف - الفسحه فى الاسكندريه بحر ثم بحر ثم بحر ثم محطة الرمل عشان الجيلاتى الحلو اللى فيها وشارع صفيه زغلول وسعد زغلول وربنا ما يوريكم الشارعين دول خصوصا لو فيه اولاد معاكم .. نصيحه اوعى حد يبص لبتارينه او يعرف عياله ان معاه فلوس والا حتروح البيت مفلس وما معاكش ولا مليم وتلموا الشنط وترجعوا من حيث اتيتم ولا اتفسحتم ولا عملتم حاجه - ثم العوده الى البحر - كان عهدى بالبحر طوال عمرى شارع الكورنيش حيث استمتع برؤيته والمياه .. والموجه بتجرى ورا الموجه عايزه تطولها - هذه الايام لا بحر ولا موجه . كل عام يذهب البحر بعيدا .. يذهب الى بلد اخر بحر اسكندريه ليس بحر اسكندريه كتل من الخرسانه المسلحة تحجب البحر عن الكورنيش ( لماذا اسمه كورنيش اذن؟ )رافعات وجرافات عملاقه - نقابة الاطباء - القوات المسلحة - نادي السيارات - نادى القضاة - نوادى ونوادى وشواطئ خاصه - شاطئ مش عارف ايه - المسافه بين المنشيه الى خالد بن الوليد الى المعموره كلها محتله بالانديه والنقابات - البحر اختفى خلف هذه النوادى كأنه عوره - هذا البحر ( المرأة العاريه ) يجب حجبها عن اعين الفضوليين السائرين على الكورنيش اللى زى حالاتى .. يجب الباس البحر الحجاب او النقاب عشان عيب يا واد يا بحر يا قليل الادب تنكشف على الاغراب العيب ان تراه اعين الرجال الفضوليين او النساء على السواء واذا اردت البغاء مع البحر فهناك اماكن مرخصه لممارسه هذا البغاء - فهذا الشاطئ الفلانى برسم دخول وثمن للكرسى وثمن للشمسيه مرخص فيه البغاء مع البحر والامواج ويمكنك مشاهدة مفاتن البحر المحرمه وممارسه البغاء مع امواجه - حجب الشاطء وحجبت المياه عن المصريين - حجب بحر مصر عن مصرلابد ان تدفع ثمن للاستمتاع ببحر بلدك مع انه ملك لك .. ملك لكل المصريين نحن نبيع لكم عيونكم لترى البحر - كم اصبح تعجيزيا - كم اصبح البحر مكلفا .. كم اصبح البحر غال .. غال .. غالى على جيوبنا - وبعد انتهاء الايام التى تظن انها مصيف ولكن تكتشفت انها مسحوق غسيل لغسل الجيوب .. نبيع لكم البحر .. نبيع لكم الهواء .. الا أونا الا دونا نبيع ... نحن تخصص فى البيع .. لو اردتم نبيع لكم عيونكم بثمن.. نظركم للبحر بثمن ... نحن نبيع .. من اجل تطوير الشاطئ .. من اجل توسيع الكورنيش ..من اجل ومن اجل ومن اجل .. لن نعدم سببا نبيع بسببه ... اين الضرائب؟ هل اصبح الهواء وهل اصبحت المياه المالحه تخضع لقانون الندره النسبيه ... بتقولوا ايه ؟ يعنى ايه قانون الندره النسبيه .... ما علهش ما علهش... هو القانون الاقتصادى البغيض الذى يصدمنا كل لحظه .. اصبح البحريخضع لهذا القانون .. كلها شواطئ مبيعه ؟؟ كلها شواطئ مميزه على عكس التصريحات .. الشواطئ المجانيه لم اقابلها . يقال ان هناك الشاطئ الفلانى مجان .. كلام كما تسمع الاساطير .. عليك ان تبحث واذا وجدت الشاطئ المجانى اخبرنى .. وفى العوده على كوبرى كفر الزيات لابد من دفع ثمن استخدام الطريق - بوابات للتحصيل ومحصلين قاعدين يحصلوا امال قاعدين عشان سواد عيونكم - لماذا ؟ للتطوير والصيانه .. كل تطوير لابد ان تدفع عنه - كل ترميم لابد ان تدفع .. كل شئ عليك .. فمن اين نطور . لا توجد ميزانيات .
لا ميزانيات للمدارس .. والمدارس الان رمز للعمليه التعليميه ولكنها مؤسسات لغير التعليم ( للرمز) والمستشفيات ( رمزتذكارى لدور العلاج ) الشارع اصبح سداح مداح... كل شئ يخضع للماليه العامه .. لا توجد له ميزانيات .. كل شئ لابد ان تدفع ثمنه الشارع خال الا من ضباط وجنود المرور - يحملون ايصالا ت الغرامات المروريه يتسللون لتغريمك مخالفه .. اذا اوقفك ضابط او جندى فانت مخالف .. مخالف .. مخالف ياولدى حتى لو كانت عربيتك على سنجة عشره هنا لا رمز عند الدفع لا رمز.. هنا فعل امرعندما يتعلق الامر بتحصيل النقود منك فهو فعل امر ومفعول به وكل قواعد النحو .. اما عندما يتعلق الامر بالواجبات تجاه الناس تعطل كل قواعد اللغة العربيه .. يمكن ان تكسر المرفوع وتجر المنصوب وغصب عن ماما اموله ما دمت تريد حقوقا او واجبات .. اما اذا كان عليك !!! يا غلبنا ... فلابد ان تدفع هناك ضرائب تبلغ حوالى 100 مليار جنيه لماذا لا يتم التصليح والترميم وخلافه وبناء 20 كورنيش اسكندريه منها ويتركوا لنا البحر كما تركه اجدادنا .. لماذا لا اصلاح الا من جيوبنا الفارغه ولا كورنيش الا من جيوبنا الفارغه ولا كوبرى كفر الزيات الا من الجيوب الفارغه.. اين الماليه العامه .. اين دورها .. اين الضرائب .. لماذا ندفعها ؟