فشكوليات

لله يا محسنين .. حسنه قليله تمنع بلاوى كتيره

فى الطبعه الاولى يوم الاحد 26/7/2009 احمد المسلمانى بيقول ان الدكتور عاطف عبيد فاكرينه؟ للى كان رئيس وزراء مصر السابق المهم انهم مسكوه بنك وبياخد مرتب شهرى 000 500 الف جنيه قولوا كدا حسبة نصف مليون جنيه .... خدوا بالكم الكلام دا شهريا مش كل عشر سنين.

وبيقول كمان ان الدكتور محمد على سليمان هو كمان اللى كان وزير الاسكان السابق برضه - والله كانت وزاره كلها هبر فى هبر- واللى بعد ما خلص على ارض مصر بالبيع لاصحابه وحبايبه وباع لهم المتر بجنيه هو كمان مسكوه شركة بترول وبياخد كل شهر 12500000 يعنى مليون وربع المليون جنيه .... فى الشهر يا جدعان فتحوا مخكوا معايا شويه وصحصحوا ... وبطلوا الهباب اللى بتشربوه ده.

الاتنين بقى كانوا دكاتره فى الجامعه وخلصوا على فلوس اولياء امور الطلاب اللى كانوا بيدرسوا لهم فى الجامعه وهروهم من كتر الكتب اللى بيبيعوها لهم ولا كان لها لازمه ولا حتى كان فيها علم ... ما هو ما حدش اخترع عندنا علم جديد ... العلم موجود فى كل الكتب المتخصصه ... نقول وخلاص زى بعضه ... بعد كدا ربنا فتح عليهم وبقوا وزراء ... وما ادراك ما الوزراء ... عارفين انا رئيس جمهورية فشكولستان اللى فوق دى بس مش لاقى حد بيعبرنى ويدينى حتى ربع جنيه مرتب ... رئيس جمهوريه اونطه انا ... جاتنا نيله فى حظنا الهباب... المهم .. هى ناقصه كمان بعد اللى هبروه زمان فى الكليات وفى الوزاره يدوهم كمان فلوس ... آه يا غلبك يا فشكول ... مش عارف ايه الحظ المهبب ده ... والواد مايكل عمال ياعينى يعمل انتر فيوهات وما حدش راضى يشغله عنده خالص ... ح تفرج يا مايكل.

شوفوا بقى لو وزعوا الاثنين مليون الا ربع دول وادوا كل واحد مرتب الف جنيه بحالهم بالتمام والكمال كانوا حلوا مشكلة كام خريج 1750 خريج كانوا اشتغلوا وبايه .. مرتب الف جنيه مش 200 جنيه زى الناس الغلبانه... مش مهم الحزب الوطنى حيشوف لها حل ؟؟؟؟؟

عمرو زكى فى الدورى المصرى

بصراحه يا جماعه باكون مكسوف اخر كسوف وغيران آخر غيره لما بشوف الواد دروجبا ولا الواد ايتوا ولا الواد اديبايور ولا غيرهم وغيرهم واللى اقل من عمرو زكى ولا ميدوا ولا حتى محمد شوقى والانديه الاوربيه بتجرى وراهم وبتدفع فيهم ملايين اليوريهات (من اليوروا يعنى)

يا عمرو يا زكى ... احسن عقاب لك انك تلعب فى الحوارى ... قصدى فى الدورى المصرى .

لله يا محسنين

الاعلانات فى التليفزيون المصرى والفضائيات بالتبرع لمستشفى 57357 بصراحه العيال الله يشفيهم محتاجين تبرعات مادامت حكومتنا اللى بتدى عاطف عبيد ومحمد على سليمان 1750000 جنيه شهريا الله يطول عمرها ويخليها لنا ويقصف عمرنا احنا عشان خاطر هى ما تزعلش ... حكومتنا خلعت من دورها فى الرعايه الصحيه ... واللى يقدر يتبرع ... اجره على الله .

بس اما بشوف الاعلانات دى بحس بايه :

ان واحده غلبانه وعدمانه وشحاته وشايله ابنها على كتفها قدام السيده ومعريه مكان العاهه بتاعته وبتقول لله يا محسنين ... لله يا محسنين

توبة موسى عليه السلام

تـحــــديــــــــــــــث

====

نبهنى صاحب مدونة عابد - يقظان - وكذلك المشاكس الكحيان افندى الذى عاد الى التدوين فقط عشان يشاغب فى فشكول وكذلك غير معروف والعزيز صاحب مدونة عالم حبيب الى بعض الاخطاء التى لا يجب ان يقع فيها مسلك فى هذا البوست فعدت الى البوست وقرأته بعنايه وقمت بحذف بعض الجمل التى قد تسيئ لسيدنا موسى عليه السلام بالرغم من عدم تعمدى لذلك وانه فات على هذا الامر لاننا عندما نتحدث عن الرسل يجب علينا التأدب وقد كتبت كلاما غير متأدب ولكن عذرى انه من بعض المصادر والعناد فى هذه الاحوال ليس من الفطنه فى شيئ وارجاع الحق لاصحابه كتبت هذا التحديث ولكنى تركت بعض النقط الخلافيه ونفذت ما اتفقت معهم فيه واعترافا بحقهم فى التصحيح وجب هذا التنويه ولهم الثواب من الله سبحانه وتعالى وارجو ان يثيبنى الله مثلهم

=============================

شوفوا ياجماعه المثل بيقول قليل البخت يلاقى العضم فى الكرشه وفشكول بقى لقى الكرشه كلها عضم مع ان فشكول بيحب الكرشه والمنبار والحاجات بتاعة اللحمه اكتر من اللحمه بس دا ما يمنعش انى باموووووووت فى اللحمه.

البوست اللى فات انا قلت بدل ما احذفه انزل عليه بوست حيخليه فى عالم النسيان لكن الجهاز الله يسامحه باظ ويمكن ما رديتش الزياره لكل اللى زارونى وعلقوا على البوست الفضيحه اللى فات لكن النهارده وبعد عودة الجهاز من الصيانه اقدر بقى احط بوست جديد يخبى البوست اللى فات وسوف يكون من النقيض للنقيض .. حنتكلم فى توبة سيدنا موسى عليه السلام وسوف احزف العنعنات والاحاديث التى وردت فى هذا الموضوع لانها مشهوره واللى عايز يعرف اصل الموضوع يروح الى الشبكه الاسلاميه فى كتاب التوابين للمقدسى عشان يشوف الاصل بتاع الموضوع. وسوف نتباسط فى الحديث عن الموضوع ولكن بتأدب لمنزلة سيدنا موسى لدينا ومنزلته عند الله سبحانه وتعالى.

سيدنا موسى عليه السلام كان راجل سكر وكان دمه خفيف بالاضافه الى ورعه وتقواه ونبوته ورسالته التى شرفه بها الله سبحانه وتعالى وشرف البشريه بها .. قوم ايه ... سيدنا موسى عليه السلام لما سمع كلام ربه فى طور سيناء طمع فى انه يرى الله سبحانه وتعالى ... قوم ايه .... قال ربى ارنى انظر اليك قال لن ترانى ولكن انظر الى الجبل فان استقر مكانه فسوف ترانى (الاعراف 143) بمعنى ان الله قال له يا ابن عمران انه لا يرانى احد فيحيا .. فقال موسى ... رب لا شريك لك انى اراك واموت احب من ان لا اراك واحيا .. رب اتمم على نعمتك وفضلك واحسانك بهذا الذى اسألك واموت على اثر ذلك .. ولما رأى الله الرحيم من حرص سيدنا موسى على ان يعطيه سؤاله قال انطلق فانظر الحجر الذى فى رأس الجبل فاجلس عليه فانى مهبط عليك جنودى ... ففعل موسى .. فلما استوى عليه عرض الله تعالى عليه جنود سبع سماوات ... ازااااى

أمر الله ملائكة السماء الدنيا ان يعرضوا عليه فمروا بموسى عليه السلام ولهم اصوات مرتفعه بالتسبيح والتهليل كصوت الرعد الشديد ...شوفوا بقى اما احن ابنقول عشان واحد كبير ولا حاجه بالروح بالدم فما بالك بالملائكه ...ثم امر ملائكة السماء الثانيه ان يعرضوا عليه ففعلوا فمروا به على الوان شتى ذوو وجوه واجنحه منهم الوان الاسد رافعى اصواتهم بالتسبيح .. ففزع موسى منهم وقال ربى انى ندمت على مسألتى .. رب هل انت منجى من مكانى الذى انا فيه .. قال له رأس الملائكه ياموسى اصبر على ما سألت فقليل من كثير ما رأيت ثم امر الله ملائكة السماء الثالثه ان اهبطوا فعرضوا على موسى فاقبل ما لا يحصى عددهم على الوان شتى الوانهم كلهب النار وكانوا يهللون بالتسبيح بازجال سبحانك اللههم سبحانك اللهم .. ففزع موسى عليه السلام وساء ظنه ويأس من الحياه فقال له رأس الملائكه يا ابن عمران اصبر حتى ترى مالا تصبر عليه ... ثم اوحى الله تعالى الى ملائكة السماء الرابعه ان اهبطوا الى موسى بالتسبيح فهبطوا الوانهم كلهب النار وسائر خلفهم كالثلج لهم اصوات عاليه بالتسبيح والتقديس لا تشبه اصوات الذين مروا به لا اله الا انت .. لا اله الا انت ... فقال له رأس الملائكه يا موسى اصبر على ما سألت فكذلك أهل كل سماء إلى السماء السابعة ينزلون إليه بألوان مختلفة وأبدان مختلفة وأقبلت ملائكة يخطف نورهم الأبصار ومعهم حراب الحربة كالنخلة الطويلة العظيمة كأنها نار أشد ضوءا من الشمس وموسى عليه السلام يبكي رافعا صوته يقول يا رب اذكرني ولا تنسني أنا عبدك ما أظن أن أنجو مما أنا فيه إن خرجت احترقت وإن مكثت مت قال له رأس الملائكة قد أوشكت أن تمتلئ خوفا وينخلع قلبك هذا الذي جلست لتنظر إليه قال ونزل جبريل وميكائيل وإسرافيل ومن في سبع سماوات وحملة العرش والكرسي وأقبلوا عليه يعاتبونه فلما رأى الله عز وجل ذلك من عبده أراه قائمة عرشه فتعلق بها فاطمأن قلبه فقال له إسرافيل يا موسى والله إنا لنحن رؤساء الملائكة لم نرفع أبصارنا نحو العرش منذ خلقنا خوفا وفرقا فما حملك أيها العبد الضعيف على هذا فقال موسى يا إسرافيل وقد اطمأن أحببت أن اعرف من عظمة ربي ما عرفت ثم أوحى الله عز وجل للسماوات إني متجل للجبل فارتعدت السماوات والأرض والجبال والشمس والقمر والنجوم والسحاب والجنة والنار والملائكة والبحار وخروا كلهم سجدا وموسى ينظر إلى الجبل فلما تجلى ربه للجبل جعله دكا وخر موسى صعقا الأعراف ميتا من نور رب العزة جل وعلا فوقع عن الحجر وانقلب عليه فصار عليه مثل القبة لئلا يحترق قال الحسن فبعث الله تعالى جبريل عليه السلام فقلب الحجر عن موسى وأقامه فقام موسى عليه السلام فقال سبحانك تبت إليك الأعراف مما سألت وأنا أول المؤمنين الأعراف أي أنا أول من آمن أنه لا ينظر إليك أحد إلا مات وقيل أنا أول من آمن أنه لا يراك أحد في الدنيا

يا سلام .. اذا كان البشر عشان الكبير لما يروح يزور بلد ما بيعلموا له ايه .... فرق من الامن المركزى تصطف على الجانبين... بطول كيلوا مترات وعمالين يضربوا الارض باقدامهم ... هوب هوب ... هوب هوب ... هوب هوب .. والارض تطلع بطيخ من تحت رجليهم وساعات بتطلع ميه... واسطح المنازل بطول الشارع والمكان اللى حيروح فيه تحتل بواسطة المخابرات ويطرد سكان تلك العمارات او يحبسون فى شققهم ... وقبلها باسبوع تنزل المخابرات والحرس الجمهورى عشان يمسحوا البلد وكمان الاعتقالات اللى بتحصل لاهل البلد دى قبل الزياره واسراب الطائرات اللى بتحوم فوق فى السماء ... كل دا عشان واحد من البشر ... فما بالك بالله سبحانه وتعالى .

لا اله الا انت سبحانك انى كنت من الظالمين

عن العشق والهوى ..من نفسى ومتهيأ لى انى حاحذف البوست دا قريب

تحديــــــــث

كنت ناوى انزل ببوست جديد النهارده لكن المشكله ان الجهاز بيفتح عندى لكن عندما اذهب لزيارة أى مدونه اخرى لا تفتح التعليقات مما يخبرنى بأن هناك عطل ما فى الجهاز وعشان كدا قلت ياواد يا فشكول انتظر حتى يتم اصلاح ما بالجهاز من عطل وبعدين انزل بالبوست الجديد

بس احب اطمن كل من علق عندى بانى سوف ارد على زيارته حتى لو كانت متأخره بعض الشيئ لانى من اربع ايام وانا عطلان ومش عارف ارد أى زياره لأئ زائر لى .... اعذرونى لبعض الوقت ومش ح اتأخر فى زياراتكم

=====================================================

لم اتعود كتابة بوستات كهذا لكن مره من نفسى .. لانها لحظة مرت بحياتى لم تكن عابره ولكنها من عمر المراهقه والشباب.. لحظة خرجت من خزانة الحياه فأثارت الوجدان وحركت اوتار قلب الشيخ .. انا ... وهل للشيوخ وجدان ... انا ... انا

تحرك الوجدان للحظات واجتر معه ذكريات كانت مصابيح الشوارع شاهدا لها والقمر يراقبها ويغزل خيوط الضوء حولها والشمس عندما تشرق كل صباح تروى حكايتها .. حكاية طالب الثانوى مع زميلته.

فجأتن ......... قابلتها ... بعد نيف وثلاثين سنه

تلاقت النظرات ... عرفتها وعرفتنى ... كانت النظرات تعانق النظرات فليس لنا الا هذا.. وانهمر شريط الذكريات سريعا امام عينى ... انتظرها فى الشرفه حتى تخرج فأخرج وراءها ... ثم اعود من المدرسة احرسها ... ويوما فيوما ... التقينا

كانت ليلى ... اسمها راقص ... لي ... لا ... يقولونها فى الغرب ليلى بكسر اللام

هى كما هى ... طولها طول الخيزران

جسدها يتثنى كالشمعدان ... مياسة القد ... ملوحة الوجه ... غجرية الشعر ... مرحة القسمات ... خجولة المحيا

عدت فى السابعة عشر ... مزاهر قلبى تدق ... وعقلى يتقلب بين خواطره ... فوضعت يدى على قلبى الذى فط من مكانه واخذ يجرى يمينا وشمالا فقلت له حنانيك يا قلب ... فقال مالك انت بى .. اتركنى فأنا لست بقلبك ... وما ذنبى فيما حرمتنى منه ... فقلت له ... وماذا كنت افعل يا قلب ... فقال لماذا افترقتما وقد كان اول حب احس به ... فقلت ما كان اليها سبيلا ... قال كيف ... هل كنا نستطيع غير ما فعلنا ... وكيف ... هل كنت اذهب انا اليها ام تأتى هى الى ... هل تجيئنى يوم جمعه ام اذهب اليها فى يوم أحد وأولادنا يا قلب هل هم معها ... ام معى ؟ أفق يا قلب ... استحى يا قلب فقد كان الحب المستحيل

وافقت وافاق القلب وعاد الى مكانه وقال الواقع احلى

ربما تجمعنا اقدارنا ... ذات يوم بينما عز اللقاء

ومضى كل الى غايتــــــــــــــــــــــــــــــــــــــــــــه

تنمزج فى المتنمزج ... تصبح انموزج

ساقنى حظى اليوم للمرور على معظم مكاتب البريد فى شبين الكوم واللى طول عمرى عارف طريقهم ودائما اقف فى طوابيرهم .. لييييييييه ... عشان الحاجه ام اسامه عايزه تحج السنه دى ... هى عايزه تحج وانا عايز اهج ... يا وليه انت مش حجيتى قبل كده ... كنت صغيره يا خويا ومش حاسه انا بأعمل ايه ... لكن انا الوقت عايزه اتمتع مره تانيه واحج من جديد ... انا بقى جيبى مفلس ونفسه فى مليم احمر آهو يحس بالفلوس بدل ما هو على الحديده.

برضه يا جماعه عندها حق ... تفسها تحج وتزور النبى كمان مره ... ماشى يا حاجه اعمل لك جواز سفر جديد وربنا المعين ورزقنا عليك يا رب وح ابتدى اعمل للموضوع جمعيه بـ 10 جنيه كل شهر مع 4000 تلاف واحد ونقبضها الاول وربنا بقى هو اللى بيعين.

كنا من فتره بنشترى استمارات الجوازات من البوسته وعشان كدا اخدتها كعب داير على جميع بوستاتك يا شبين الاقى كلها مقفوله بالضبه والمفتاح وعلى ابوابها كومين تلاته تراب وهباب كمان .. ولما وصلت البوسته العموميه وسألتهم هى مكاتبكم مقفوله ليه قالوا لى عشان (النمزجه) ... ايه يا جماعه النمزجه دى؟ ... قالوا بنعمل كل المكاتب نموزج واحد... مثلا الخزينه على اليمين وفى الوش الموظف بتاع الطوابع والكاونتر على الشمال مثلا مثلا يعنى والارضيات سيراميك ... يعنى المكاتب كلها تبقى شكل بعضها والمكتب اللى تدخله فى شبين هو نفس المكتب فى اسيوط وهكذا دواليك.

آه لو اعرف مين اللى فكر فى الفكره الجهنميه دى كنت دبيت صوابعى العشره فى عنيه ... هى فلوسه كتيره كدا ليه ... سعادته يهد كل المكاتب فى البلد من السلوم لحد اسوان عشان ينمزجها ... وهو يبقى آخر مزاج ... المفروض لو عايز يطور ياخد العمليه واحده واحده ... المكتب اللى عايز يترمم يعمل له نمزجه وبرضه هو يعمل مزاج كبير من ورا المكتب المتنمزج ده وهكذا لحد ما يخلص على مكاتب البلد كلها نمزجه ... مش يهد مكاتب البلد كلها عشان سعادته ياخد مزاجه على اخره وميت فل واربعتاشر. ...لأ نهد كله ونبنى كله ... يانمازجك يا بوسته مصر.

ما هو احنا عندنا فلوس كتيره متلتله حنوديها فين ... فى النمزجه ... امال يا جماعه ليه دايما بتقولوا مواردنا محدوده واحنا دوله فقيره وبنشحت على الابواب .... لاااااااااا ... احنا دوله غنيه ... بدليل النمزجه مره واحده وانتم اللى شعب فقير دقه ... والفقير يجوز فقيره يخلفوا شحات صغير.

والله يا جماعه احنا ما احنا دوله فقيره ولا حاجه ... احنا دوله غنيه ... بس يا خساره فلوسها للبهرجه والقنعره والفشخره ... مش لاولادها.

عارفين لو لى الحق فى التصرف مع اللى فكر الفكره المخيخى دى كنت عملت له قرار وطلعته معاش فورا ومن غير مكافأه كمان... هى المواضيع كلام تخين وخلاص ولا ايه؟

مين بقى ح يدخل الجمعيه ام 10 جنيه ويقبضها فى الاخر .. اللى موافق منكم يبعت لى 10 جنيه بحواله على مكتب متنمزج واللى يبعت على مكتب مش متنمزج حيترفض طلبه . نسيت اقول لكم انهم قالو لى استمارات الجوازات من ادارة الجوازات وما عدناش بنبيع الاستمارات عندنا... آه يا رجلى.

رحت بقى على ادارة الجوازات ... حاجه غريبه يا جماعه ما كنتش متخيلها .. قال بتاع الاستعلامات عشان تاخد استماره لازم يكون معاك اربع صور لزوجتك ... اديته الـ 4 صور ... ادانى الاستماره ببلاش وقال لى اقعد بقى املأ البيانات ... حاضر ... تمام يا افندم مليت الاستماره ... ادانى طابع دمغه بجنيه واحد .. وروح شباك 4 ... حاضر ... اخدوا الاستماره والصور وبطاقتى وبطاقة زوجتى وقالوا لى روح على الخزينه ... حاضر ... هات 68 جنيه ... حاضر وادانى ايصال وقال فوت بعد ساعه.

وبعد ساعه رجعت افوت لقيتهم بيندهوا اسم الحاجه ام اسامه ... انا رديت نعم ... لقيتهم بيدونى الجواز الجديد بتاع مراتى ... ايه ده يا جماعه ... دا جواز الحاجه ... كدا من غير طوابير... آى نعم ... كدا من غير 100 ختم نسر واشى صقر ... اى نعم ... كدا من غير الحاجه ما تيجى وتختم وتبصم وتمضى ويطلع روح اللى خلفونا ... آى نعم ... طب يا جماعه عايز اقول لكم عشان بس يعنى الامانه ان الحاجه ما دخلتش الجيش وما عندهاش بطاقه معامله عسكريه ومتهربه من التجنيد ... قالوا مش مهم ... انا فين يا جماعه ؟

انا رحت الجوازات لوحدى من غير الحاجه ... هم اخدوا على اقرار اننى انا جوزها وصوره من بطاقتى الشخصيه وصورى من بطاقة الحاجه الشخصيه وخلص الجواز ... طلع يا هووووه لوحده

دائما نشجب ونندد ونهدد ونتوعد.......................

هذه المره ... تحيه خاصه الى ادارة جوازات شبين الكوم وتحيه لكل ضابط وصف وأمين وموظف يعمل فى هذه الاداره ... لم ارى فى حياتى اسهل من التعامل مع ادارة جوازات شبين الكوم

انا داخل بقى آكل حتة بطيخ ... بس ح اعطى قشرها لبتاع البريد بتاع النمزجه.

قال الفيلسوف ... كلام من وجهة نظر تانيه خالص

معظمكم يعرف الفيلسوف فشكول من بوستاته القديمه

قررت الاذاعه وبمناسبة زيارة اوباما للقاهره ان تتحاور مع الفيلسوف الاهبل وفيلسوف الغبره فشكول ... قوم ايه ... فشكول كان نسى خلاص انه فيلسوف فقام باع العبايه والقلنسوه بتوع الفيلسوف مقابل ثروه 1500 مليم شوفى بقى الرقم كبير ازاى؟

قوم ايه ؟؟؟ فشكول خبط على الجيران وشحت منهم عبايه بس مش لاقى حد عنده قلنسوه بدل القلنسوه القديمه اللى باعها ... تعمل ايه يا كبير .. تعمل ايه يا كبير الرحيميه ... بس .. لقى حل للقلنسوه ... راح جاب بطيخه وشقها نصفين ومسك نصها وفرغه من البطيخ وطبعا اكل اللحمه بتاعة البطيخ .. هو فيه حد اهبل اليومين دول يرمى لحم بطيخه بـ 10 جنيه انتم عدوكم اهبل. ومسك القشره وقام لافف عليها شال ابيض وبقت زى القلنسوه بالضبط وشوية اكسسوار بقى ... شوية سبح كبيره وعلقهم فى رقبته ونضاره كعب كوبايه وشوية ريش فراخ ورشقهم فى البطيخه ... قصدى القلنسوه وقام نده للواد صعلوك ابنه يساعده فى اللبس... آه لو شفتم فشكول ...

قوم ايه ؟؟ دق جرس الباب ودخل الجماعه بتوع الاذاعه وكالعاده مذيعتين راتعتى الحسن والجمال ... شوفو فشكول الهجاص .. قال يعنى شافهم قبل كدا وعارف انهم رائعتى الجمال ويبادر الفيلسوف بالسؤال؟

ما انت يا بنيتى ... فى خجل واستحياء ... انا عاشقة الاحزان - هل اسمك يا بنيتى عاشقة الاحزان ... لا يا سيدى الفيلسوف انا اسمى ايناس ... نعم نعم يا بنيتى ايناس النوسه كونوسه وما انت ايضا ... انا سووول ويزبر ... بس ايه متحفزه ومستنفره وداخل عقلها مدافع وبنادق وسكاكين لتفتك بفكر الفيلسوف وبادرت ايناس النوسه كونوسه بالتسجيل :

لى صديق فيلسوف ... بآقوال الحكماء شغوف .. حاورته وسألته .. قل لى يا سيدى الفيلسوف ( الله عليك انت يا بت يا عسل - سيدى الفيلسوف - ويرد الفيلسوف بانشكاح ... آووو ... نعم يا بنيتى

هل رآيت زيارة اوباما للقاهره؟

- بنيتى هل لاحظتم ان رئيس الدوله لم يستقبله فى المطار - هل لاحظتم يا بنيتى ان الرجل الثانى ايضا رئيس الوزراء لم يكن فى انتظاره فى المطار وانما وزير الخارجيه ؟

البنت بقى الدكتوره المذيعه سوول ويزبر تسآل ... وهل لهذا دلاله يا فيلسوف ؟

- أاااااااه - جالك الموت يا تارك الصلاة ... البت المذيعه الدكتوره دى اسئلتها فى العض بحكم عملها ... وعضل فشكول بيوجعه - فيرد الفيلسوف بامتعاض ... قولى انت بقى ... ما هو لو حسن شحاته نزل الواد احمد عيد عبد الملك من بدرى يمكن كانت اتغيرت ظروف المباراه ونتيجتها

سؤال آخر ... هل لاحظت تصريحات الرئيس مبارك بعد جلسه المباحثات المغلقه ... فيرد الفيلسوف.

شوفى بقى ... اللحوم المصنعه اليومين دول ما لهاش امان ... ما حدش يضمن ان اللحوم دى يدخل فيها لحم خنزير ... تستدركه ... فيقول هو قال كلمتين وبس ... بس قالهم ازاى ... بتؤؤؤؤؤده ... تيجى ايناس تسأل .. يعنى ايه بتؤده يا سيدى الفيلسوف ... يعنى بالرااااحه .. انتم مش فاهمين ؟ ... فتسأل ثانيه وماذا لاحظتم فى تصريحات اوباما بعد الجلسه

الفيلسوف - هل لاحظتم يا بنيتى تدفق الكلمات من فم اوباما ورشاقتها ؟ هل لاحظتم يا بنيتى رشاقته فى الصعود الى السلم لمقابلة الرئيس مبارك فى قصر القبه ؟

البنت بقى الدكتوره المذيعه سوول ويزبر ... مش عايزه تنسى انها بتاعة حقن وبتاعة عضل وبرشام.. وماذا زار اوباما فى مصر وما دلالات الزيارات التى قام بها ... البت دى عايزه تودينى فى داهيه

شوفى يا بنيتى هو زار مسجد السلطان حسن فى القلعه اللى قصاده مسجد الرفاعى وزار الاهرامات ... فاكرين يا حلوين زيارة نابليون للازهر وخطابه فيه وبعدين زار الاهرامات بس احسن حاجه فى زيارته ليها ان ما كانش هناك جمال ولا حمير ولا حصنه .. وبعدين قبل الاهرامات قال خطاب فى جامعة القاهره وهو خطاب متوازن جدا ... بس علينا احنا بقى نفهم الموضوع وما نضيعش وقت .. واظنه سيضيع .

اصل لو حسن شحاته كان احسن الاستعداد للمباراه بمعسكر جيد كانت ستكون افضل من كده

وما علاقة ذلك بحديثنا يا فيلسوف .... بصراحه مذيعه لمضه ... فيرد الفيلسوف ... لا علاقه يا بنيتى ومع ذلك يا بنيتى ما قاله اوباما فى خطابه تأسيس جديد فى العلاقات الدوليه عموما وعلاقة امريكا بالمسلمين والعرب خصوصا

وما قرائتك للمستقبل يا فيلسوف (شايفين يا جماعه ... ما فيش يا سيدى الفيلسوف ... بتقول يا فيلسوف كدا خبط لزق ... مع ان الفيلسوف كان قاعد منشكح ومنبعج ومستنى يا سيدى ... ومع ذلك يا بنيتى علماء الطاقه الذريه عاملين مظاهرات اجتجاجا على تفصيل الرؤساء للوظائف لاولادهم ... منك لله يا حسن شحاته انت وعمرو زكى فضحتونا عند بتوع الجزائر ... يا عم مجلس الشعب كان فيه خناقه للركب امبارح وكانوا حيضربوا بعض .. واغلب الظن اللى حصل لكنيدى زمان حيحصل لاوباما اليومين دول

وما سر عدم استقبال مبارك لأوباما فى المطار؟؟

يا بنيتى ... اين الدراهم .. ارينى ما معك من دراهم حتى اجيب .... فترد لقد اخذت حقك من الدراهم مسبقا.

انا لن اجيب يا بنيتى الا اذا اخذت دفعه جديده من الدراهم والا ساقول ........

- هاك ما معى من دراهم ... واستبقت معها بعض الدراهم اجرة المواصلات ... وهنا هب فشكول من جلسته وهم بخطف الباقى منها من الدراهم واذا هى تمسك بيد المذيعه ايناس وتسحبها خارج المنزل لتنفذ بجلدها بما معها من دراهم وتنقذ نفسها من طمع الفيلسوف

عندئذ اخذ الفيلسول يكلم نفسه ويقول

يا بنيتى هذا شيئ شرحه يطول وانا الليله مشغول

فشكول يا ابو مخ ضايع انت ... قوم اقلع البطيخه اللى على دماغك

الامتحانات وسنينها

ما علهش يا جماعه الواد محمود ابنى عنده امتحانات ومانعنى من دخول غرفة الكمبيوتر وعامل لها احتلال وكل ما ادخل يقعد يزعق لى وانا مضطر اخاف منه عشان الامتحانات ... تقولش الواد هو اللى بيصرف على وان هو اللى ابويا

عشان كدا انا متأخر فى البوستات وما علهش لحد الواد ما يخلص وانا كمان اخلص من قرفه

فشكول بيهبل .... هبل فى الجبل

تحديث

عملت التحديث ده بالعافيه

اعتذر لكل المدونين اللى زارونى ولم ارد لهم تعليقاتهم حتى الان

النت عندى زفت خالص ومش بيفتح عند اى حد ولو فتح مش بيفتح التعليقات وانا عارف ان ده عيب فى النت عندى ويمكن فى الكمبيوتر وانا علقت لحد الحاجه شمس النهار وكل ما اروح عندها ما تفتحش التعليقات لكن انا حاحاول اصلح النت او الكمبيوتر وما تقلقوش حاروح عندكم واحد واحد وارد الزياره بس ما علهش لو اتأخرت عليكم شويه لحد ما اصلح يا اما النت يا اما الكمبيوتر

====================================
احبائى اعزائى اخوانى اخواتى فلذات اكبادى .... ونيس ومايسه
رجعت .... بقى لى 8 ايام وانا بعيد عن البيت فى جولة عمل من جولات عملى المكوكيه وكنت ساعات اروح لجهاز الكمبيوتر فى الشغل واعمل زيارات خاطفه من هناك لكن من يوم السبت ما كانش عندى وقت خالص وانقطعت تماما عن النت . كمان ولا كنت عارف الدنيا فيها ايه ولا اى اخبار خالص. وطبعا باعتذر لكل الناس اللى اتاخرت عليهم فى التعليق ومش انساهم لازم اروح لهم واعلق عندهم

بعد ما رجعت البيت يوم الخميس اخر النهار من حوالى ساعتين تلاته لقيت انفلونزا الخنازير وصلت للمستوى الخامس ... يعنى فاضل زلطه ونطلع بره لان اخر مستوى هو المستوى السادس وبعدين كل بلد تقفل المداخل والمخارج ولا حد يطلع ولا حد يخش ... وكل واحد ياخد باله من نفسه وخصوصا اللى عاملين عملية اللوز يزودوا بالهم شويه عشان لو واحد بس فلت من المطار انتم عارفين ان احنا مضيافين وبنحب نكرم الضيف قوى ولو الضيف اللى هى جرثومة الخنازير جت عندنا ح نسوى لها الهوايل وح نكرمها قوى.

اقول لكم موضوع صغير برضه عشان الامتحانات

عمكم النائب مصطفى بكرى عمل بلاغ للنائب العام ان فيه 65000 طن قمح روسى دخلوا مصر وان القمح دا غير مطابق للمواصفات... دا طبعا غير القمح الاوكرانى اللى اكلناه بالسم الهارى فى معدتنا
المهم القمح الروسى ده طلغ غير مطابق للمواصفات عشان كل كيلو فيه 56 بذره غريبه غير الحشرات والصراصير والذى منه.... قوم ايه ؟؟ ميناء بور سعيد رفض دخول الصفقه الا بعد التحاليل والذى منه عشان القمح شكله بنى واغبر ومنيل بنيله

المستوردين الكبار اللى انتم عارفينهم بقى وقوتهم وبطشهم عملوا اييييييه؟؟؟؟؟

سابوا بور سعيد وخدوا المراكب وودوها ميناء سفاجه وطلعت الغلال من الميناء طبعا بحجج مختلفه وقوانين برضه مختلفه ودخلت الغلال البلد عشان ناكلها بالسم وطرش الدم وخزنوها فى صوامع فى اسيوط وقنا وقوص وقال ايه ممكن تدخل الغربله والغسيل ومش يبقى فيه مشكله وميت فل و14 ... طب ليه نغسل وننضف ونغربل .. طب من الاول نجيب الحاجه حلوه ..

خدوا بالكم الغلال المصريه متلقحه ومرميه فى الغيطان ومش لاقيه اللى ياخدها من الفلاحين والفلاحين عمالين يصرخوا ويصوتوا ويقولوا يا خلق هووووى عندنا قمح حلو وجميل حد ييجى يشتريه بنص ولا بربع تمن المستورد ويا عينى حيتخرب بيتهم (اصل انا عندى 30 اردب ومش لاقى حد يشتريهم) حد عرف حاجه اعملوا مش واخدين بالكم ... والفلاحين ولاد ستين فى سبعين دول يروحوا فى ستين داهيه ... المهم المستوردين الغلابه دول لازم نعطف عليهم برضه نشوف السبوبه بتاعتهم.

عارفين يا عيال يا حلوين يا ولاد ستين فى سبعين ايه الموضووووع

الموضوع ان استيراد القمح والغلال من اختصاص هيئة السلع التموينيه .... يقوموا يعملوا ايه ؟؟؟؟ يشوفوا حد كدا حبيبهم وقريبهم ولا نسيبهم ولا صاحبهم ويدوه حق الاستيراد ... وأهى برضه السبوبه كبيره والخير كتير ويعم على الكل

والسؤااااااااااااااال :

هل عجزت الدوله المصريه بشنتها ورنتها عن استيراد قمح بجوده عاليه ؟؟؟؟؟؟؟؟؟ علامات استفهام للصبح

الاستفسارات كتيره والاسئله كتيره وكبروا مخكم شويه ... وسلام مربع للجدعان ... ورقصنى يا جدع

من ناحيتى بقى انا ح اعمل اييييييه ؟

ح اروح جامع السيده زينب واقلع راسى زى النسوان وادعى على اللى عايزين يأكلونا سم هارى واغذيه حيوانات يا رب دعوة وليه ساعة مغربيه واقول يا رب هات لهم انفلونزا طيور وخنازير كمان وكل الانفلونزات اللى فى الدنيا كلها وكمان بالمره وانا محروق كدا ادعى لاولادنا وبناتنا اللى بيمتحنوا ان ربنا ياخد بيدهم كلهم ويخلى مخهم يشعشع ويلقط اى معلومه ومخهم يبقى مغناطيس ...... وربنا ينجحهم يا رب

هل هلك قوم لوط بأول تفجير نووى فى التاريخ / الحلقه الاخيره

الاخيره

خدوا بالكم احنا انتهيا عند سادسا وبعدين ناخد:

سابعًا: قال تعالى: (فَلَمَّا جَاءَ أَمْرُنَا جَعَلْنَا عَالِيَهَا سَافِلَهَا وَأَمْطَرْنَا عَلَيْهَا حِجَارَةً مِنْ سِجِّيلٍ مَنْضُودٍ(82) مُسَوَّمَةً عِنْدَ رَبِّكَ وَمَا هِيَ مِنْ الظَّالِمِينَ بِبَعِيدٍ (83) هود، وقوله تعالى: (فَجَعَلْنَا عَالِيَهَا سَافِلَهَا وَأَمْطَرْنَا عَلَيْهِمْ حِجَارَةً مِنْ سِجِّيلٍ(74) الحجر.ففي هاتين الآيتن يبين تعالى أن عاليها أصبح سافلها وفي مكانه زرع بصل قبل أن يمطروا بالحجارة وأصبحت هذه الحجارة من طين؛ (لِنُرْسِلَ عَلَيْهِمْ حِجَارَةً مِنْ طِينٍ(33) الذاريات، هي عاليها بعد أن كانت سافلها... وهكذا انتهى أمر قوم لوط عليه السلام. وما حدث لهم لا يدل على أنه بركان ، ولو كان بركانًا لنسف القرية وذراها بعيدًا عن مكانها يعنى الحمم المنصهره من البركان تسيل وتجرى فى انهار بعيدا عن مكان البركان ولا تقع تحتها والبركان لا يحدث فراغًا في الأرض لتنهار فيه القريه ، وإذا وقع بجانبها غطاها بالطفح الصخري المنصهر، أو بالرماد البركاني وليس بالحجارة ... واللى حصل لهم في وصف القرآن ما يدلش على أنه بركان ، وفي كلام الله تعالى خير وصف لما حدث، وهو الشاهد على اللى حصل وكان بأمره سبحانه وتعالى ؛ (فَلَمَّا ذَهَبَ عَنْ إِبْرَاهِيمَ الرَّوْعُ وَجَاءَتْهُ الْبُشْرَى يُجَادِلُنَا فِي قَوْمِ لُوطٍ (74) يطلب لهم الرحمه والهدايه جم قالوا له دول الملائكه يعنى ( يَا إِبْرَاهِيمُ أَعْرِضْ عَنْ هَذَا إِنَّهُ قَدْ جَاءَ أَمْرُ رَبِّكَ وَإِنَّهُمْ آَتِيهِمْ عَذَابٌ غَيْرُ مَرْدُودٍ (76) هود , خلاص يا ابراهيم قضى الامر وحكم ربك ولا راد لحكمه ، (إِنَّا مُنْزِلُونَ عَلَى أَهْلِ هَذِهِ الْقَرْيَةِ رِجْزًا مِنَ السَّمَاءِ بِمَا كَانُوا يَفْسُقُونَ (34) العنكبوت. فالرجز من السماء هو نفسه العذاب بالحجارة من طين اللى بفعل الحراره حتبقى حجاره صلبه وصلده ، دا بفعل بشدة الحرارة .. فإذا لم يكن ما حدث لهم هو بركان بأمر من الله ... طب ايه اللى أحدث هذا الأمر؟ !! نرجع تانى للإرشادات التي أعطيت للوط عليه السلام وأهله ليسلك وأهله طريق السلامة: قال تعالى: (قَالُوا يَا لُوطُ إِنَّا رُسُلُ رَبِّكَ لَنْ يَصِلُوا إِلَيْكَ فَأَسْرِ بِأَهْلِكَ بِقِطْعٍ مِنَ اللَّيْلِ وَلَا يَلْتَفِتْ مِنْكُمْ أَحَدٌ إِلَّا امْرَأَتَكَ إِنَّهُ مُصِيبُهَا مَا أَصَابَهُمْ إِنَّ مَوْعِدَهُمُ الصُّبْحُ أَلَيْسَ الصُّبْحُ بِقَرِيبٍ (81) هود, وقال تعالى: (فَأَسْرِ بِأَهْلِكَ بِقِطْعٍ مِنَ اللَّيْلِ وَاتَّبِعْ أَدْبَارَهُمْ وَلَا يَلْتَفِتْ مِنْكُمْ أَحَدٌ وَامْضُوا حَيْثُ تُؤْمَرُونَ (65) وَقَضَيْنَا إِلَيْهِ ذَلِكَ الْأَمْرَ أَنَّ دَابِرَ هَؤُلَاءِ مَقْطُوعٌ مُصْبِحِينَ (66) الحجر.

من الآيتين نقدر نرتب خطة السلامة اللى ربنا دل لوط عليها وهى:

1-ربنا أمر لوط أنه يخرج من القرية آخر الليل: (فَأَسْرِ بِأَهْلِكَ بِقِطْعٍ مِنْ اللَّيْلِ..) حتى يكون عند الشروق في مأمن بعيدًا من العذاب فكان هذا الأمر الأول.

2 – وأما الأمر الثاني فكان: (...وَاتَّبِعْ أَدْبَارَهُمْ ...) ودبر القرية هو الجبال الواقعة خلفها وهي باتجاه جبال الكرك (حيث يغلب الظن بمكان وجودها) لأن مواقع القرى في وادي الأردن يكون أسفل السلاسل الجبلية ، فكان في هذا تحديد اتجاه السير.

3- وأما الأمر الثالث فكان: (...وَلَا يَلْتَفِتْ مِنْكُمْ أَحَدٌ...) لأن الالتفات مهلك لأي واحد يقوم به ، وفي هذا التحذير حماية لهم .. لذلك حذرهم من الالتفات لرؤية العذاب عندما يسمعون لمعرفة مصدرها، وماذا فعلت بمن وقعت عليه.

4- وأما الأمر الرابع فكان: (...وَامْضُوا حَيْثُ تُؤْمَرُونَ ..) ففي هذا الأمر منع التوقف؛ لأن التوقف فيه ضرر وهلاك لهم إن بقوا في نفس المكان الذي وصلوا إليه، ولم يتجاوزه إلى ما بعده يعنى اجروا على اخركوا عشان تبعدو عن اماكن الانفجار عشان زى ما انتم عارفين الاشعاع بيروح بعيد عن مكان الانفجار الذرى.

5- إخبار لوط عليه السلام بهلاك امرأته: (...إِلَّا امْرَأَتَكَ إِنَّهُ مُصِيبُهَا مَا أَصَابَهُمْ ..) هود، وأنه سيصيبها ما أصابهم حتى لا ينشغل بنجاتها، ويستمر ماضيًا في طريقه مع ابنتيه، وإلا سيصيبهم من العذاب ما يصيبها عندما تلتفت لتنظر إلى وقعة العذاب على قومها، لأنه لو عرفت امرأت لوط أن الضيوف هم ملائكة ، ورأت طمسهم لأعين قومها ، فستخرج مع لوط طلبًا للنجاة معهم .... فكان هذا التوقيت لخروجهم حتى يصلوا إلى مكان محدد عندما يقع العقاب ، فتهلك هي وحدها من دونهم.

6- إخبار لوط عليه السلام بوعد الهلاك: (إِنَّ مَوْعِدَهُمُ الصُّبْحُ أَلَيْسَ الصُّبْحُ بِقَرِيبٍ)، (وَقَضَيْنَا إِلَيْهِ ذَلِكَ الْأَمْرَ أَنَّ دَابِرَ هَؤُلَاءِ مَقْطُوعٌ مُصْبِحِينَ)، فمعرفته بالموعد سيجعله يجد في الخروج من غير تهاون أو انشغال عنه فيصيبه بعض ما أصابهم يعنى ما فيش هزار يعنى بكره الصبح يا لوط يقوم سيدنا لوط يتوكل على الله ويروح بعيدا عن المكان . هذه الأوامر والتوصيات تثير التساؤلات فيما وراءها ... فكيف تهلك امرأت لوط بحجرلمجرد النظر إلى الخلف؟! لماذا لا يكون شيئًا آخرغير الحجر ؟! .. وما العذاب الذي يهلك الإنسان بمجر النظر إليه؟! ممكن يكون الإشعاع النووي هو بس الذي يخشى من النظر إليه ، والتعرض له ... لقد أصبح معروفًا في عصرنا الحاضر؛ أن النظر إلى التفجيرات النووية مباشرة بالعين المجردة ، يعمي الإنسان، ويحرق له شبكية العين .... فالذي حدث لقوم لوط والله اعلم هل هو تفجير نووي تحت الأرض ومن شدته وحرارته حرق وبخر وصهر قسم من الارض ودور على شق او فتحه فوق الارض وطلع لعنان السماء وشال معاه اللى شاله من باطن الارض والحكايه دى سابت فراغ كبير هوت فيه القريه وبعدين اللى اتشال من باطن الارض وقع تانى على القريه من حصباء وحجاره والطين بعد ما بقى حجاره من الحراره بعد ما وقعت فى الحفره الكبيره دى وردمتها . فأصبح عاليها سافلها قلنا زرع بصل... ودل المطر بحجارة من طين على وجود الماء بكميات في مكان الانفجار طبعا هو الطين بييجى منين ، وتبخيرواحد سنتيمتر مكعب واحد يحوله إلى 800سم3 من البخار عند درجة الغليان،(دى من عندى سمعتها من بعض اساتذة الكهرباء) فكيف إذا كانت الحرارة تقدر بآلاف أو عشرات الآلاف من الدرجات، في مكان محصور تحت الأرض! .. دا حيولد ضغط هائل وتفجير مرعب.

والحاصل فى امرأة لوط عندما يكون لوط عليه السلام وأهله قد وصلوا منعطفًا لإحدى هذه الشعب وتكون هذه الشعب حاجزا عن النظر وايضا حاجزا من الاشعاع ، ويحدث الانفجار، فمن يلتفت إليه منهم سيعرض عينيه للإشعاع النووي، وستحترق شبكية عينية، ومش يقدر بعدها أن يتم السير لو أراد ذلك ، وحيفضل معرض للإشعاع حتى يهلك به، واللى مش حيبص ويمضي في سيره بلا توقف ، سيغيب عن مصدر الإشعاع ويبعد عنه ، وجسم الإنسان يتحمل الإشعاع لوقت قصير غير طويل وبرضه لكميه بسيطه ، وسيحميه الحاجز الجبلي منه بعد ذلك ، وبذلك ينجو ... وهذا الذي لم تفعله امرأت لوط ؛ (إِلَّا آَلَ لُوطٍ إِنَّا لَمُنَجُّوهُمْ أَجْمَعِينَ (59) إِلَّا امْرَأَتَهُ قَدَّرْنَا إِنَّهَا لَمِنَ الْغَابِرِينَ (60) الحجر، وقد يلحقها من غبار الانفجار ما ينزعها من مكانها أو يدفنها فيه.ولو عرف مكان مركز الانفجار الذي أحدث الصيحة ... لسهل تقدير احتمالات المكان الذي هلكت فيه امرأت لوط عليه السلام ... ولأمكن الوصول إلى مكان موتها إن قدر الله تعالى للبشر ذلك. إن كان الذي حدث هو انفجار نووي تحت القرية بفعل الملائكة، وبأمر من الله تعالى ؛ فهل هو تفجير نووي انشطاري لعنصر اليورانيوم أو البلوتونيوم؟؟!!، الله اعلم أو هو بسبب دمج نووي هيدروجيني ؟؟!! برضه الله اعلم وما تأثير هذا الانفجار على البحر الميت؟! نسيت اقول لكم ان البعض بيقول انه البحيره مش بحيرة طبريه دا البحر الميت , وهذا رأى له وجاهته وهذا ايضا رأى له وجاهته , هل جفف قسمًا من مياهه فزادت ملوحته ، وانخفض مستواه!!إن كان الانفجار انشطاري فسيبقى له آثار في المنطقة تدل عليه من المواد المشعة ...وقد يكون سببه من العناصر المشعة التي لا تخلو منها كل منطقة، وما يصب في البحر الميت يحمل معه آثار الصخور التي ذابت فيه،إما إذا كان الانفجار هيدروجينيًا فالكشف عنه يكون أصعب .... وقد يكون الانفجار أعظم من ذلك فيكون تفجيرًا كربونيًا ، برضه الله اعلم أو أعظم منه مما لم يستطع البشر القدرة على فعله ولن يستطيعوه ... لأن فعل الله تعالى فوق كل أفعال العباد . أما أكبر دليل عليه فهو عند الكشف عن حجارة طينية تعرضت لإشعاع ودرجة حرارة أضعاف ما تتعرض له من انفجار بركاني؛ لقوله تعالى عن الحجارة: (قَالُوا إِنَّا أُرْسِلْنَا إِلَى قَوْمٍ مُجْرِمِينَ(32) لِنُرْسِلَ عَلَيْهِمْ حِجَارَةً مِنْ طِينٍ(33) مُسَوَّمَةً عِنْدَ رَبِّكَ لِلْمُسْرِفِينَ(34) الذاريات، ومسومة أي معلمة على أنها للعذاب يعنى حجاره تنزل مولعه من السما، فهي متضمنة لما أشرنا إليه. ويساعدنا على ذلك الكشف عن الفاصل بين الأرض التي هوت وطبقات الصخور التي بقيت ثابتة في مكانها، لنصل بعد ذلك إلى مكان القرية، والآثار التي بقيت منها... وبعثات من الدول ذات التجارب النووية التي لديها من الخبرة، والمعلومات التي لا يعرفها غيرها ، عن التغييرات التي تحدثها تجاربهم، ولها القدرة على دراسة ذلك ، والحكم عليه بعيدًا عن الصخب الإعلامي ، أو التسويق السياحي إن وجد.

وفى النهايه هذه السلسله لا تؤكد انه تفجير ذرى ولكن نقدر نتخيل, يعنى هى عمليه تخيليه وممكن حد يطلع بموضوع اخر ويقول انه اى حاجه غير اللى بنقوله ... كله الله اعلم بيه ... لكن شوفوا عذاب ربنا شكله ايه ... القنبله الذريه ( اللى بيسموها الطفله بتاعة هيروشيما ) شوفوا عملت ايه فى الناس هناك ... اما فعل الله ... سبحان الله ... لم يبقى لنا احد من قوم لوط عشان يقول لنا ايه اللى حصل ... فى هيروشيما فيه ناس نفدوا بجلدهم من التفجير وقالوا لنا ايه اللى حصل ... لكن فعل ربنا سبحانه وتعالى اباد القوم بالكامل ولم يبقى منهم احد عشان ما يتكررش نسلهم ولا عمايلهم وسبحان الله ولا آله الا الله.

خلصت يا جماعه الموضوع وبعدين من هنا ورايح ولحد الامتحانات ما تخلص شوية كسل ... لا مش يعنى كسل كامل بس يعنى كل اسبوعين بوست عشان خاطر حبايبنا ولادنا والامتحانات وبرضه متضامنين معاهم ضد الامتحانات والمذاكره وعشان فيه عيال حريته طحن ما بيبطلوش مذاكره برضه نتضامن معاهم .

تمت بحمد الله