فشكول يا فشكول .. بالاكتوارى حتقول

بوست صغنون ومجنون وبالرز معجون

بوست ما لوش معنى ولا هدف

بوست ما بيقولش حاجه .. حد يبقى يقابلنى لو فهم حاجه .. هو انا اصلا فاهم حاجه

تهجيص وتهييس وتطنيش ولو مش عاجبكم

فين المحشى والمهلبيه.... فى العزبه الزكيه

والاقتصاد الاكتوارى ... وانت انت ولا انتش دارى .. يا دارى يا دارى

سمك لبن تمر هندى .. دول الهنادوه بقوا احسن ناس فى البرمجيات حد يعرف يعد الفلنكات

وتوثيق المطبخ المصرى ... قال يعنى الاكل مرطرط .. مش الاكل ييجى وبعدين يوثقوا ولا يربطوا

والمحشى بالرز والخلطه .. ربنا يستر وما تجيش ليكو جلطه

بعد القريه الزكيه ... جابوا لنا صكوك ومهلبيه ... وجابوا لنا دراسات اكتواريه.. على ايه يا حسره .. هو فيه قرشانات عشان نعمل لهم اكتواريه

مش قلنا زمان حيصكوكوا على قفاكم

شوفوا بقى الهنا .. جايبين لنا سمك الباصا من فيتنام .... يا باصا يا باصا ... مش الالقاب كلها اتلغت وبقينا كلنا افنديه

بحر ابيض ... بحر احمر ... بحيرات ... انهار ... حزب وطنى ومسطحات مائيه اسمعونا يا اللى من اسكندريه

كل دا لزوم المهلبيه ... والبلد ما لهاش صاحب

وزير يروح وزير ييجى .. ولا حد دارى ولا حد عارف وكمان ولا حد فاهم

ونظام الثانويه العامه الجديد .. كل يوم فيه امتحان ... حتمتحن حتمتحن .. ومش تبطل تمتحن ... بس ازاى تذاكر لازم تاخد معاك حزمة فجل وجرجير لزوم الكليات الدنيا .. ولو تاخد معاك حتة لحمه حتدخل كليه احسن ... ولو عايز احسن تاخد معاك قرشين ... يا سلام تدخل احسن كليه .. ولو ما أخدتش حاجه خالص .... حتدخل السجن

شوفوا بقى عمكم مش عمى انا

عمكم انتم ابو الطيب المتنبى قال :

وكم ذا بمصر من المضحكات

ولكنه ضحك كالبكاء

من قتل كندى ... من قتل السادات ... من قتل عنتره بن شداد ... من قتل ابو فصاده

طب لو جدعان تجاوبوا على السؤال الاتى ده

قبل فصاده ما يخلف فصاده ... كان اسمه ايييييييييييه؟

طب ام قويق قبل ما تخلف قويق ... كان اسمها ايييييه؟

سيبكم بقى .. ما حدش عنده فنجان قهوه .. بلاش ... طب ما حدش معاه سيجارة بانجو؟

يا نهار مهبب حد فاهم حاجه؟

فشكله فى الامازيغيه

لى واحد صاحبى مغربى اتعرفت بيه عن طريق النت اسمه اسافو انوروزو وهو ولد جميل ومتفتح وبيحب المصريين وبيتكلم مصرى احسن منى ومنكم كلكم وكل ما اكلمه واقول له يا مغربى يقول لى انا امازيغى مغربى قومى عربى مسلم ... اقول له يا اسافو ايه القوميات دى كلها كفايه انك عربى وخلاص يقول لى لأ انا فى الاصل امازيغى وبلدى المغرب وانا مسلم وعربى ... قلت فى نفسى يا واد يا فشكول ايه يعنى كلمة امازيغى دى وسألت اسافو عن حكاية الامازيغ دى والراجل ما كدبش خبر ودلنى على موقع على النت اعرف منه ايه حكاية الامازيغ دى ولقيته منزل بوست بيتكلم عن الامازيغ وبيشرح فيها يعنى ايه امازيغ ولما رحت النت عن موقع تاريخ الامازيغ والبربر لقيت الكلام اللى حاقول لكم عليه ده وجبت القواميس وابتديت اقرأ عن الموضوع وكان الآتى:

الاسم الشائع للامازيغ عندنا واللى احنا نعرفهم بيه هو البربر فقلت لاسافو يعنى البربر قال لى لأ قلت لازم اعتمد على نفسى ولقي ان فعلا اسم البربر دا مش حقيقى وبعدين بحثت من اين جائت كلمة البربر لقيت ان التسميه دى جات مع الفينيقين والاغريق لانهم كانوا يعتبرون ان من لا يتكلم اللغه الاغريقيه يبقى (بربرى) هذا فى اعتقادهم والاصل فى الاغريقيه (برباروس) ويعتبرونهم متوحشين او همجيين.

الرومان بقى استعاروا مصطلح (البربر) واطلقوه على كل الاجانب ومنهم الامازيغ والاوربيين الخارجين عن سيادة الرومان وشاع الاسم ده (البربر) على السنة الناس ولكن معظم الباحثين لا يوافقوا على هذه التسميه ويطلقون الاسم الصحيح على كل سلاله حسب تصنيفها جينيا.

وكلمة امازيغ كلمه مفرده والجمع (امازيجين) والمؤنث تمازغيت وجمع المؤنث تمازجيين . ومعنى هذا اللفظ فى اللغه الامازيغيه - الانسان الحر - او النبيل - او ابن البلد - او صاحب الارض.

اصل الامازيغ

فى قول انهم من نسل مازوغ بن كنعان بن حام بن نوح - وهم اخوة المصريين وهم عرق ينحدر من السلاله الحاميه ومن فروعها الشرقيه التى ينتسب اليها الامازيغ والمصريين - ويعنى احنا عندنا امازيغ.

طب الامازيغ دول بقى فين

بالبحث فى النت فى موسوعة ويكبيديا لقيت ان الامازيغ دول موجودين فى الصحراء الغربيه فى مصر واحة سيوه والفرافره وكمان فى جنوب ليبيا فى الكفره والجرف والقطرون ومدروسه والدهناء وفى تونس فى بيار زاز وتبارت وفى الجزائر فى والين وبيضون وتماراست والغالب بقى منهم فى المغرب وينتشرون فى كل اجزائها وفىموريتانيا وجزر الكنارى ومنهم فى شمال نيجيريا والنيجر ومالى ومنهم قبائل الطوارق المشهوره تاريخيا .

قديما كان منهم القديس اوجستين وترتليان وابولوس ومنهم كمان طارق بن زياد اللى فتح الاندلس والمخترع عباس بن فرناس.

للامازيغ لغه خاصه بهم ويتحدث بها نصف المغاربه وثلث الجزائريين وخمس الليبيين .

ومن الشخصيات التاريخيه فى التاريخ الرومانى والذين تعود اصولهم التاريخيه للامازيغ سبتيموس وسيفاريوس وكاركلا وماكرينوس.

وعن الامازيغ تاريخ كبير وحافل ولذلك ادعوكم ومن من يطلب المعرفه عن هذا الموضوع زيارى مدونة المغربى اسافوا انوروزا وهذا عنوان مدونته .

http://triste7.maktoobblog.com/

وكمان تلاقى مدونته موجوده فى الفافوريت عندى للى عايز يروح له

دمتم بكل الخير

لا اله الا الله

بسم الله الرحمن الرحيم

اعزائى واحبائى واخوانى وابنائى

ما رأيكم بعد التوترات التى قضيناها

سويا نذهب الى الله تعالى لتطمئن قلوبنا

الا بذكر الله تطمئن القلوب وارجو ان يقرأ هذا

البوست اكبر عدد من الأحباء والابناء والاعزاء

وحتى الاعداء

حتى يرحمنا ويثيبنا المولى جل وعلى

ما رأيك بدعاء اذا دعوتة تمضي سنة ولا تستطيع

الملائكه الانتهاء من كتابة حسناتك؟؟؟

قال رجل من السلف:

لا اله الا الله عدد ما كان, وعدد ما يكون, وعدد

الحركات والسكون

وبعد مرور سنة كاملة قالها مرة اخرى

فقالت الملائكه اننا لم ننتهي من

كتابة حسنات السنة الماضية

اخي : ما اسهل ترديدها وما اعظم اجرها

تخيل لو قمت بنشرها ورددها

العشرات من الناس بسببك

اذا ضاقت بك الدنيا فلا تقل :

يارب عندي هم كبير ......

ولكن قل: يا هم لي رب كبير

قل اللهم صلي على محمد وعلى آل محمد

كماصليت على إبراهيم وعلى آل إبراهيم إنك

حميد مجيد ..وبارك على محمد

وعلى آل محمد كما باركت على إبراهيم

وعلى آل إبراهيم في العالمين انك حميد مجيد

يا رب اقرأ هذه الرسالة لـكل المدونين

حتى استطيع ان اكسب خلال ساعة 10 ملايين صلاة

على الحبيب في صحيفتك بإذن الله

' ملحوظه هامة '

أقول: تخيل إنك واقف يوم القيامة وتحاسب

ولست ضامن دخول الجنة وفجأه تأتيك جبال

من الحسنات لا تدري من أين؟؟؟؟

من الاستمرار بقول:

سبحان الله وبحمده سبحان الله العظيم

وارجو ان يقرأ هذا الدعاء كل

شخص موجود عندى فى القائمه

وكل شخص زارنى وعلق عندى

حتى يمزيدنى الله ويزيده من حسناته

وصلى اللهم على سيدنا محمد

وعلى آله وصحبه وسلم

ملكيون اكثر من الملك

السلام عليكم ورحمة الله وبركاته
اخوانى واحبائى ... تحياتى

ها قد عدت من رحلة عمل بدأت يوم الاحد الماضى وانتهت اليوم وكنت خارج بيتى
واعتذر للتأخير فى الرد على جميع احبائى والذين جاؤونى وعلقوا على موضوع الحرب اللذيذه بينى وبين زميلى وحبيبى فركشاوى .. وبعد انت وضعت الحرب اوزارها بيننا وانتهت بالصلح .اعود اليوم وابدأ فى التعليق والرد على جميع احبائى.

ومن ضمن ما جائنى من تعليقات تعليق الأخ / فارس عبد الفتاح الذى اعتز به كثيرا وبزياراته لى واعتز ايضا بزياراتى له ولكنه بعث لى بتعليق بناء على تعليق لى كنت كتبته عند بنتنا العزيزه مرمر فى سجال بينها وبين المدون الشاعر وقلت رأيى عند بنتنا مرمر بصراحه وجاء العزيز فارس وكتب تعليقه التالى :

فارس عبدالفتاح يقول...
استأذنا الفاضل المحترم / فشكول تحية فائقة وبعد ، بالإشارة إلى الحوار الذي كان بينك life is still smiling on u وبمشاركة مواطن مصري نايم ، بخصوص الكلام عن عبد الناصر وعن انجازاته وعن ما قد فعله بتأميم القناة وغيرها .فانا لن ادخل في جدال أو حوار طويل لكي اثبت أن عبد الناصر كان على صواب أو كان على خطأ ولديه الدلائل على صوابه ودلائل قاطعة لا شك فيها وبالوثائق المفرج عنه من الأرشيف الانجليزي والأمريكي والفرنسي وهذا ليس موضوعنا ، فانا دخلت في مثل هذا الجدال تكرارا ومرارا ولا أريد أن ادخل فيه مره ثانية .ما قد استفزني فعلا هو اتهامك لعبد الناصر وهناك أيضا الكثير يعتقد بأنه كان يخاطب عاطفة الشعب المصري والشعوب العربية جمعاء وهذا من واقع القراءات السطحية التحليلية لخطابات وبيانات واستعراضات الرئيس عبد الناصر أمام الجماهير المصرية والعربية .وقارنت بينه وبين القذافي وكنت أتوقع أن تقارن بينه وبين صدام حسين أيضا وهذا أمر غير مقبول إنصافاً لهذا الرجل وتاريخية .المهم فلا أطيل إذا أردت أن تراجع نفسك في مقولة أن عبد الناصر كان يخاطب عاطفة الجماهير المصرية والعربية وهذا من واقع إحقاق الحق لأهلة واحترام النفس والعقل والنظر في التاريخ بجدية وحيادية بدون أحكام مسبقة أو قراءات لا تخلو من السطحية والسذاجة وأحيانا المأجورة وأحيانا الضالة وبعض الذين ينادونا بالليبرالية .فأرجو وبكل أدب أن تقرأ بتعقل وبتفحيص وتمحيص وإحاطة بخطابات الزعيم الراحل .وبالأخص الخطابات التي كانت بعد النكسة وبيان مارس وخطاب إعادة بناء الجبهة الداخلية .واستعراض نتائج النكسة .وخطاب طلبة جامعة القاهرة والمثقفون لشرح لهم بيان مارس .وتوجد هذه الخطابات بالصوت والصورة على موقع الزعيم بموقع مكتبة الإسكندرية .فانك سوف ترى بعقلك وكونك وكينونتك انه يعبر أن آمال كل العرب وكل المصريين وكل إنسان في العالم يريد آن يكون لدية دولة محترمة ومجتمع مستنير ولدية ثقافة ووعي بما يدور حول لأنه كما كان زعيم مصري وعربي كان زعيم عالمي أيضا ومن رواد التحرر الوطني في إفريقيا وفي جنوب أميركا وجنوب شرق آسيا أيضا والتاريخ يخبرنا بذلك أخي الفاضل .وارجوا أن تمحص بعقلك الأسلوب والديباجة والمفردات والمعاني والدلالات التي كانت في خطابات السيد الرئيس جمال عبد الناصر في جميع خطاباته وخصوصا بعد النكسة التي تظهر بشكل منقطع النظير عظمة وعبقرية وشموخ ومجد هذا الرجل .وأيضا تمثل صمود وإيباء هذا الشعب المصري والأمة العربية ككل .ولكم مني كل الاحترام والتقدير فارس عبد الفتاح ... قومي عربي.

تعليق فشكول:

يا سيدى العزيز ... انا لن اناقشك فى مضمون التعليق كثيرا فهناك الكثير ممن يتفقون مع عبد الناصر ومنهم حضرتك وهناك الكثير ممن يختلفون معه وانا منهم .. ولست هنا فى موقف الهجوم على عبد الناصر أو الدفاع عنه فاللبيت رب يحميه.

ما يهمنى هو دفاعى عن نفسى فقط .. فالاخ فارس يطلب منى احترام النفس والعقل وحكم على بالسطحيه والسذاجه والعماله .. ولا ادرى ما هى هذه العماله فكل من يطلب ان نتقدم ديمقراطيا يقولون عليه عميل .. ويتهمنى ايضا بقلة الادب وانا اعرف عن الاخ فارس الادب وانتقاء كلماته بعنايه ودقه ولا ادرى لماذا افلتت منه هذه التعبيرات.
اما تعليقى البسيط على هذه الرساله

- طلب منى الاخ فارس قراءة خطابات الراحل بعد النكسه وبيان مارس وخطابات اعادة بناء الجبهة الداخليه .. والرد
- اقرأ ماذا .. وهل بعد العيد ينفت الكحك .. حدثت النكسه وكان عبد الناصر هو القائد الاعلى للقوات المسلحه .. اى انه كان المسئول الأول. وهل هذه النكسه كانت شيئ هين وهو المسئول الاول عنها.

- ولماذا اعادة بناء الجبهة الداخليه .. لماذا لم يوضع اساس لكل شيئ من الاول .. لماذا لم تعد البلد للحرب بالطريقة الصحيحة .. لماذا لم يعد الجيش للحرب بالطريقه الصحيحة .. لماذا لم يتسلح الجيش بالاسلحه الحديثه والصحيحة ... لماذا ... لماذا ...لماذا؟ ... لماذا اعاده .. لماذا لم نذاكر للامتحان جيدا فندخل فننجح .. من جد وجد ومن زرع حصد.

- اما كونه كان زعيم عربى .. يا ساده لا نريد زعماء .. يا ساده لا نريد مهيبا .. يا ساده لا نريد مفدى .. نريد فقط رؤساء ينفذون ويعبرون عن شعوبهم .. شبعنا من حكاية الزعماء والرؤساء والمفدى والخالد والمهيب والقائد وابونا وامنا وانور وجدى وفيروز .. وهذا السفه الكلامى الذى نحن فيه.

كان عبد الناص يعبر بالنيات .. اما الافعال ..كفايه علينا النيات .

وارجو من الاخ فارس الا يتهم من يخالفونه فى وجهة نظره بالاتهامات التى اتهمنى بها .. فهو كما قلت ينتقى كلماته بعنايه وعلينا جميعا ان نعى جيدا ان من ليس معنا فهو علينا .. من ليس معى ليس بالضروره على .

والسلام عليكم ورحمة الله وبركاته

فشكله مع فركشاوى .. قال ناوى قال ...

تحديث اول

بيان عسكرى رقم (صفر)

حيث اننى قاعد وباتلكك عشان اى حد يتدخل يفض الاشتباك وما حدش راضى يتدخل وكلهم بيهدوا النفوس وخلاص ولانى اعددت العده مسبقا لآخد ديلى فى اسنانى والجرى باقصى سرعه وحفاظا على ماء الوجه فقد اصدرت للقياده العليا لقوات المدونين البيان التالى

حيث حققت قواتنا الاهداف التى خطط لها على المستوى التعبوى والتكتيكى فقد وافقت قواتنا على وقف اطلاق النار من جانب واحد وعلى المجتمع التدوينى التدخل لمنع الطرف الاخر من اطلاق النار

ياترى مين فينا توم ومين فينا جيرى

العزيز فركشاوى كتب تدوينه يفشكل فيها فشكول وانا قاعد فى امان الله وقلت اما اروح ازور فركش لقيته مفشكلنى

اخر فكشله وقمت انا كمان واستوردت كل اسلحة الدمار الشامل والكيماوى ولبست لبس الميدان وافتكرت

نفسى ايام حرب اكتوبر وقعدت اخطط وادبر واستعنت بقوات الصاعقه والقوات البريه والجويه

وقوات الطوارئ الدوليه وقمت لبست قناع الكيماوى ورحت على طول ارد عليه وقلت له

فى شجاعه واسبهلال وكمان عشان اخوانا المدونين نتعارف مع بعض و يعرفوا

فشكول اللى ما يسواش تعريفه مخروم عشان احنا اللى خرمنا التعريفه

برضه وليعلم الجميع انى اخذت ديلى فى سنانى استعدادا للجرى

باقصى سرعه اذا ما احتدم الصراع وانى

مش قد المعارك ولا الحروب

السلام عليكم ورحمة الله .. العزيز فركشاوى ناوى .. تحياتى تعالى انت تفركش .. وانا افشكل لحد ما حنخربها ونقعد على تلها..

اولا يا عزيزى فركش .. اشكرك جدا وكلى امتنان لك لاعطائى هذه المساحة التى انا دونها....واليك شخصيتى الحقيقيه التى تعرفها ولكن اغلب المدونين لا يعرفونها .. انا اسمى الحقيقى احمد ابوزيد من شبين الكوم منوفيه .. وكونى منوفى بيزعل ناس كتير عشان المنايفه مش محبوبين قوى ولو ان هذه فكره خاطئه عن المنايفه وربما يكون هناك وقت آخر لنتحدث فيه عن هذا الموضوع ولكن ما يهمنا فيه ان المنايفه وانا منهم فى اغلب الاحيان صرحاء مع النفس ومع الغير (بيسموهم بتوع مقالب)اما اسم صلاح فهو اسم الشهره .. ولهذا موضوع (اصل يا سيدى انا مولود قبل 16/1/1952 وكانت زوجة الملك فاروق حامل فى احمد فؤاد فعملوا اعلان عشان اللى يتولد فى يوم مولد ولى العهد حيدوه عشره جنيه .. وبعدين ابويا وامى اخرونى شوية ايام عشان يكتبونى يوم ميلاد ولى العهد وياخدوا العشره جنيه .. والاخر خدوا بمبه.. وطبعا ابويا وامى كانوا معشمين نفسهم فى العشره جنيه عشان يشتروا بيهم قيراط ارض ويبقوا من الملاك . وكان اسمى قبل الاعلان عن الجايزه صلاح .. عشان كدا لزق صلاح .. اما احمد فهو اسم المعاملات الرسميه وشهاده الميلاد والجيش والكليه والمدرسه وخلافه ومن جوانب الاتفاق فانت بارك الله فيك قلت فى شعرا ونثرا .. الامر الذى احمله جميلا يثقل كاهلى ويجعلنى مدينا .

ثانيا : والله يا فركش انا مصرى مسلم عربى .. احب كل شبر فى ارض مصر واحب كل فرد واحب كل شجره وكل حيوان وكل عصفور وطائر يطير على ارض مصر واعشق هذه الارض واعشق طينها وترابها واعشق هوائها وكل تفصيلاتها .. وفى نفس الوقت لا اطيقها ولا اطيق كرهها لابنائها وايضا لا اطيق ظلمها ولا تسلط ابناؤها على ابناؤها .. ومن خبرات التاريخ وتجاربه اجدنى يا ئسا ومحبطا وقانطا منها .. فهل كتب الله عليها ان تكون البلد الظالم لاهله .. البلد التى تلفظ شعبها ... التى تغرقهم فى البحر فرارا من ظلمها وجبروتها عليهم.. وفى نفس الوقت رقتها وحنانها مع الاغراب .. لن ندخل فى تفصيلات ليس هنا مجالها ولكن اقسو فى نقدها من كثرة حبى لها ولاهلها الذين ايضا اكرههم فى نفس الوقت من اعمالهم .. والحمد لله انا متيسر ولكن لا اضمن لابنائى الغد فالغد مبهم وباللون الرمادى.

ثالثا: يا فركش يا عجوز .. عرفتها دى بقى من كتاباتك ومن تعليقاتك على الاحداث .. اصل فشكول ساعات اما ربنا يتجلى عليه يلقطها وهى طايره اما فى الاغلب الاعم .. فشكول غبى وما بيفهمش ... هه هه هه شوية ضحك.

رابعا : كان نفسى نعطى هذا البلد العظيم .. الكبير .. الفطحل (حلوه دى؟) الضاربه حضارته فى اعماق اعماق التاريخ .. الذى علم العالم الحضاره كان نفسى نعطيه قدرا من اهتمامنا ومن محبتنا فيشب ويقوى ويقف بين الامم شامخا .. ناهضا وليس هكذا .. بلد يتسول كل شيئ.. شفت آخر تمخيخه .. مضاعفة رسوم القضايا فى المحاكم..هذه التماخيخ يا اخى لا تعجبنى .. ناس تسهر بليل تشرب هباب بتاع الدخان الازرق ده وتقعد تمخخ لنا عشان تقرفنا فى حياتنا .. والصبح تلاقى قوانين بتدق على دماغنا .. ليس هكذا تسير الامم..وليس هكذا تسير الامور .. نريد ان نسير بهذا البلد بالاسلوب العلمى والمنهجى والمؤسسى .. لا باسلوب التماخيخ وبرقبتى ياريس .. ولا يهمك انت معاك ناس زى الفل.. والكلام الاهطل ده عايزين بالعلم وليس باسلوب العربيه الكاروا التى يجرها حمار او حصان وعندما تثقل الحموله ترجع العربه القهقرى .. حلوه القهقرى دى .. فاكر ايام النكسه .. وفاكر النكته اللى كانت بتقول للعسكرى فى الاتوبيس او القطر .. انسحب يا عسكرى.. عشان عملنا حرب باسلوب (برقبتى يا ريس).

خامسا: حزنت كثيرا على انسحاب الكحيان من التدوين وكذا حزنت على انسحاب سوسه النوسه كونوسه واعتقد ان انسحابهما الاثنين فى وقت متزامن له علاقه ببعضهم.. والله اعلم .. ولو ان الله لم يتركنى وحيدا فبعث لى بفركشاوى ناوى ليؤنسنى فى عالم المدونين.

سادسا : انا حايش لك وظيفه حلوه .. وزير دولة المدونين ان شاء الله بعد ما انجح وابقى ظاظا بس لازم تدفع لى رشوه كبيره عشان تقدر تاخد الوظيفه دى .. منوفى بقى يا عزيزى يا فركشاوى ناوى.

اعجز عن شكرك واعجز عن تقديرك وكلى امتنان وتقدير لك .. وبارك الله فيك .. وربا يستر فى الاختلافات اللى اعتقد ان لها بوست قادم ..ربنا يستر .. لكن قلبى مفتوح لك .. متهيأ لى التعليق كأنه بوست كامل .

وتحياتى........

خبر ما يساويش نكله..

كنت زمان من قراء الاهرام .. ايام هيكل وسلامه ... والفطاحل اللى كانوا فى الاهرام .. وكانت الاهرام فعلا هرم خوفو وخفرع ومنكاروع كمان .. دالوقت الاهرام رزمة ورق بتتفرش على طرابيزه السفره احيانا للقراءه .. واحيانا اخرى للقراءه برضه .. احسن يرفعوا على قضيه وتبقى حوسه.

اولا ما بقيتش اقرأ الاهرام بالمره .. وحتى لو قريت اقرأ الرياضه وخلاص واتفرج على الصور وما بقيتش اقرأ المقالات الاسبوعيه اللى بتتصدر الجرنال .. اصل بقى الواحد زهق وطق خلاص من المقالات دى .. كمان جميع المقالات اللى بتتصدر الجرائد اللى بيقولوا عليها قوميه ما بقيتش اقراهم .. بلا هم ووجع دماغ .. زى الواحد عمال يسمع طبل وزمر وتصفيق حاد وحاجه كدا زى ما يكونوا بيقولوا لنا ياهبل يا عبط احنا بنعرف احسن منكم .. هو انتم بتفهموا حاجه زينا .. احنا اللى بنفهم بس .. ويقوموا يدونا ضهرهم ويطلعوا لنا لسانهم .. اقروا بقى معايا الخبر ده :

وطبعا مش حتعرفوا تقروه من الكمبيوتر .. لكن هو منشور فى زيل الصفحه الاولى يوم الجمعه 20 فبراير 2009 العدد 44636 وبيقول ايه باختصار:

( فى بحث للباحث علاء عوض الله يقول فيه ان المصريين بيصرفوا كل طلعة صبح 62 مليون جنيه فى ايه بقىىىىى: .. شوفوا 12 مليون جنيه تدخين .. هو عنده حق فى دى وكمان 40 مليون جنيه تليفونات ارضى و محمول .. كمان قال المصريين بيحرقوا كل سنه 19 مليار سيجاره .. وبتقول الاهرام - فى سباق هذا الانفاق المجنون حذر الباحث ان ذلك سيكون خطر علىمصر مستقبلا فى ظل الازمه العالميه القادمه - والاهرام عايزه تقول اننا شعب سفيه وما بيعرف يصرف فلوسه كويس وياريت اولياء الامور يحجروا علينا ويدونا مصروفنا يوم بيوم على قد شقه وطعميايه .. وخساره فينا الفول والعدس )

طب يا اهرام .. ماشى يا اهرام .. قال يعنى احنا الشعب الوحيد اللى فى العالم سفيه وكل الشعوب دى كلها هى اللى حلوه وما بتشربش سجاير ولا بتتكلم فى التليفونات ارضى ومحمول .. هم بس المصريين اللى سفهاء.. ماشى يا اهرام - ما احنا السبب فى الغم اللى احنا فيه وان احنا السبب فى الاعاصير اللى بتهاجم امريكا والحرائق اللى شغاله فى استراليا وناقص كمان تقول لينا مش احنا قولنا لكم حسانين ومحمدين وانظر حولك والحاجه اللى زى القمر كريمه مختار.

يعنى يا اهرام سايبه كل البلاوى وجايه تحاسبينا احنا ... طبعا يا اهرام ما هو احنا الحيطه المايله .. يعنى يا اهرام سايبه اللى بيجرى ورا مغنيه فى لندن ودبى وصرف عليها كذا مليون والاخر ما اما نفضت ليه يروح مخلص عليها وقادرى علينا احنا يعنى....

يعنى يا اهرام سايبه تقارير الجهاز المركزى اللى فضحت الدنيا وجه عمنا وتاج راسنا صاحب القرشانات واللى بيصرف علينا كلنا ومعيشنا فى نغنغه بامارة انه عايز يمد ايديه فى جيبنا عشان ياخد اللى فيها ضرايب ومكوس ورسوم - يعنى حاجه كدا فاضل ياخد مننا ضريبة ان احنا مصريين - جاتنا نيله فى حظنا الهباب قوم ايه ؟ ... هو عمنا دهـ بهدل الراجل المحترم رئيس الجهاز المركزى ... واليومين دول خدوا بالكم فيه جوله تانيه من الكر والفر بين عمنا وبين الجهاز المركزى وما تنسوش تبقوا تشوفوها فى الموقر.

طب يا اهرام .. فى تقرير الجهاز المركزى من فتره بيقول ان فيه عجز 12 مليار جنيه .. خدوا بالكم 12 مليار مش 12 مليون .. مالهم بقى؟

الـ 12 مليار دول ضاعوا تحت بند السهو والخطأ ... يا لهوىىىىىى .. عايز اصوت وعايز اعيط وعايز برضه اضحك.

اقول كمان يا اهرام .. كام واحد هرب ومعاه مليارات بعلم وسمع وهس ناس كتيره قوى .. يا دى الغلب اللى احنا فيه شاطره علينا يا اهرام وعماله تبكتينا وتلومينا احنا اللى ما فيش فى ايدنا غير نطلع الهم فى التليفونات والسجاير.كنت باسبك يا اهرام حتقولى احنا شعب بيصرف 5 او 6 مليار فى السياحه فى الخارج.

ولا تقولى احنا بنصرف على اللحمه اكتر من ما بنصرف على الفول المدمس.

ولا تقولى بناكل تفاح وشيكولاته بـ كذا مليار.

ولا بنستورد عربيات لكل 3 افراد من الشعب عربيه زى خلق الله فى السعوديه ودول الخليج ولاحتى فى ليبيا.

دا احنا بنقف فى طوابير العيش ونطفح الكوته عشان نجيب عيش مدعوم بشلن.

الاهرام مش شايفه اللى احنا شايفينه .. هما فى برج العرب واحنا فى برج الحمام.

بحق ... ايمن نور طلع من السجن؟ واللــــــــــــــــــــــــــــــــه !!!!!!!!!!!!!!

يا شيخ ...يا رااااااجل ....ما كنتش اعرف .. اصل ما بقيتش اقرى جرايد وخصوصا القوميه

امسك الكادر احسن تقع .. اضبط الجادون

تحديث

مدونة البنت المشمشيه حلوه وشقيه ....ضاااااااااااااعت ... ضااااااااااااااااعت

وهى عملت مدونه جديده بنفس الاسم

ودا اللينك بتاعها آهـــــــــــــــــــــــــه

http://o0mshmsh0o.blogspot.com/

يا سلام........ .. فشكول بقى يفهم فى اللينكات

===========================================

احبائى .. ازيكم .. اظن وحشتكم الفشكله .. وحشتنى انا كمان .. اصل من مده واحنا فاتحين كتاب التاريخ وعمالين نذاكر .. تقولش يا خويا حنمتحن فيه .. طب افرض برضه حنمتحن .. هو فيه مشكله .. ما نمتحن يعنى ايه المشكله.. طب ما احنا ممكن نمخخ شوية تماخيخ ونكتب كلمتين حلوين فى ورقة الاجابه وبرضه حننجح .. ايه يعنى ما دام الموضوع تماخيخ فى تماخيخ .. ناس تقعد طول الليل تشرب هباب .. وتقعد تمخخ لنا تماخيخ وتيجى تانى يوم الصبح وتقوم تصب التماخيخ دى على دماغنا واحنا دماغنا ما بقاتش ناقصه تماخيخ .. اصل فيه تمخيخه عمال افكر فيها ومش لاقى لها تخريجه يعنى .. واسألوا الجماعه بتوع الكادر.. عارفين يعنى ايه الكادر .. .. يعنى كادر العجله اللى هى الدراجه .. يعنى ايه الدراجه .. والله مش عارف .. هما الجماعه بتوع المجمع العلمى سموها كده .. ويعنى ايه المجمع العلمى .. برضه مش عارف .. هما الجماعه اللى عربوا كلمة الكمبيوتر وسموه حاسبوب .. برضه يعنى ايه حاسوب .. يعنى حسابه بيحسب.. يخرب بيت العيشه .. طب يعنى ايه حاسبوب تانى .. مش حارف .. طب بيحسب ايه .. اصله يمكن بيحسبنى فشكول .. ولا يمكن بيحسبك الشاويش عطيه .. ولا يمكن بيحسبك ابى هانم بتنجانى .. ولا عزيزه .. ايه يعنى المشكله .. الراجل عمال يحسب على نفسه .. يا عم فشكول مش كده .. امال ايه .. اصل الكمبيوتر بيعمل حاجات كتير غير انه يحسب .. طب بيعمل ايه ؟ .. فشكول المتفشكل بيحسب نفسه لبيب وكل لبيب بالاشارة يفهم.. يا عم روح العب لك لعبه ولا فشكل لك فشكله.. انت عايز تقول يا فشكول ... لأ .. فشكول مش عايز يقول حاجه .. طب تقصد ايه يا فشكول .. برضه ولا حاجه .. يا شيخ ركز .. اركز فى ايه .. ركز فى اللى انت عايزه .. انا مش عايز حاجه .. طب يا فشكول الله يرضى عليك احنا مخنا مش فاضى .. ماشى يا عم حاحل عنك .. هو يعنى انا اللى واقف فى ظوركم .. يا عم انت كنت بتقول الكادر ... أااااااه صح قصدك الكادر بتاع العجله ... لأ انت حتطير برج من دماغنا ... لأ ياسيدى .. خلى البرج فى دمخاغك .. ركز يا فشكول .. الكادر .. تقصد كادر المعلمين ... فشكول .. يخرب مطنك انت جبتها منين دى..تصدق فشكول ما كانش عارف كادر ايه .. اصل يا سيدى ماما اموله كانت بتمتحن الكادر ده من يومين .. طب وايه المشكله يا فشكول .. لأ ما فيش مشكله .. بس هى ماما اموله بتشتغل ايه ؟ .. يا سيدى ماما اموله معلمه جليله .. مين جليله دى يا جدع .. يا فشكول بيقولواكدا على المعلمين .. يعنى من الجلال يعنى من العظمه.. فشكول عظمه على عظمه يا ست .. يا فشكول احنا مش ناقصينك .. ايه اللى مزعلك بس؟

الكراسى خلصت ..عشان ما فيش فلوس نشترى كراسى

يقول فشكول .. اصل انا كنت عايزهم يرفدوا ماما اموله وكمان المستر رأفت وكمان عمرو جويلى وكل المدونين اللى بيشتغلوا فى التدريس ازهر ووزاره ... يخرب بيت عقلك يا فشكول انت اتهبلت .. فشكول ثائرا .. احترم نفسك يا جدع ايه اتهبلت دى .. يا فشكول بالراحه .. ماشى .. بالراحه يا سيدى .. عايز ترفدهم ليه يا سيدى ؟

اصل يا سيدى هما بيمتحنوهم .. طب وماله وايه المشكله .. فشكول اصل هما ما بيعرفوش يدرسوا ولا يعلموا العيال .. هما ما يقصدوش كدا يا فشكول ... امال يقصدوا ايه .. لأ عشان يدوهم الكادر .. كادر العجله .. لأ كادر المعلمين .. فشكول بيسأل يعنى .. طب واللى يصقااااااط اللى يصقط ما ياخدش الكادر.. فشكول .. وبس ؟ امال عايز ايه يا فشكول؟.. يقول فشكول .. مش اللى يصقط بيبقى فاشل .. صح يبقى فاشل .. الله !!! امال يخلوهم يعلموا العيال الفشل.. لا يا سيدى اللى يصقط ما ياخدش الكادر.. يقول فشكول .. طب واللى ينجاااااااااااح.. يا سيدى اللى ينجح ياخد الكادر.

يا عم روح العب انت منك له

فشكول .. يعنى اللى ينجح ياخد كادر وجلابيه وجزمه اجلاسيه واللى يصقط يا دوب ياخد الاندر وير ... ايه الاندر وير ده يا فشكول .. فشكول .. ولا حاجه .

اسمع يا فشكول انت حتجننى انا حسيبك وامشى احسن مخك لحس خالص.. فشكول .. والله العظيم احنا ناس بتستعبط كل حاجه نعمل منها حبه والحبه نعملها قبه .

الاصل فى الموضوع رفع مستوى المعلمين عشان ما يدوش دروس خصوصيه وعشان يبقوا بنى آدمين .. قال يعنى قال الـ 100 ولا الـ 200 جنيه دول حيخلوا المعلم يبطل دروس .. يا خى انه.

شوفوا يا ولاد .. لما المدرس ياخد الف جنيه برضه فقران واتجوز فقرانه خلفوا ولد عريان ومتنيل على عين اهله .

انتوا بقى بتضحكوا على وبتستخفوا بعقلى .. يعنى المدرس اللى يصقط ما ياخدش الكادر ويفضل مرتبه ييجى كدا 300 جنيه عشان يروح يشحت بيهم .. وبرضه قاعد فى الفصل يعلم العيال الفشل .. ماهو لو كنتم حتحرموه من انه يعلم عشان هو فاشل .. يعنى يبقى ماشى .. لكن ما دام سايبينه يجهل العيال زى ما هو .. يبقى ما كانش فيه لازمه للامتحان ولا وجع الدماغ .. امال عينتوه ليه يا رخمه . وبعدين هو فيه منهج هيمتحن فيه .. كل دى اسئله مخيخى .

ارض كنعان - فلسطين وجبال الصبر .. الحلقه الاخيره

حتى هنا عرفنا اصل وجود اليهود فى فلسطين حتى قيام عهد الملوك وكان اول الملوك شاؤول ثم داوود ثم سليمان عليهم السلام وبعد موت سليمان عليه السلام بدأت مملكة اليهود فى الانقسام مما سنوضحه فى البوست التالى:

عهد الانقسام

بعد موت سليمان عليه السلام تنازع ابناه رحبعام وايضا بربعام الملك واعلن رحبعام نفسه ملكا على اليهود وبايعه سبط يهوذا وبنيامين فى اورشليم ورفض باقى الاسباط العشره مبايعته لانه هددهم وتوعدهم بان صابعه الخنصر اغلظ من متن ابيه وانه حيؤدبهم بالعقارب بدلا من كرابيج ابيه .. عشان كدا باقى الاسباط العشره مش رضى يبايعو رحبعام وراحوا وبايعو بربعام ملكا .. كدا انقسمت مملكة داوود وسليمان الى مملكتين:

مملكة يهوذا فى الجنوب وعاصمتها اورشليم (القدس حاليا)

ومملكة اسرائيل فى الشمال وعاصمتها شكيم (نابلس حاليا)

وهكذا تظهر مملكة اسرائيل لاول مره فى التاريخ

وكانت فيه معارك داميه وشبه متصله بين المملكتين دول من جانب ومن جانب اخر مع الجيران طب الجيران بقى مين؟

من جهة الشمال (اشور -بابل )

وايضا من جهة الجنوب (مصر) واللى نجح ملك مصر شيشنق فاكرينه اللى كان صهر سليمان عليه السلام وبسط يده على او رشليم ونهبها وبسط سلطانه على دولة يهوذا ثم دولة اسرائيل .. طبعا بحاول الخص لكم على قد ما اقدر اصل اتخنقت من الموضوع ده وعايز اخلصه .

وبعد ما ضعفت المملكتين دول واصبحوا شيع واحزاب وما عندهمش ملك قوى يقدر يوحدهم ويمسكهم ويمسك مملكتهم بيد من حديد كدا بقت المملكتين مهيأين للزوال وما عدش ينفع معاهم حاجه ...(زينا احنا الوقت غثاء سيل) ودا من كثره حروبهم مع بعض وعداواتهم لبعض ومن كثره حروبهم مع الجيران وحنبتدى بقى نشوف كيف زالت الدولتين اليهوديتين (يهوذا واسرائيل)

عهد الزوال

كان تاريخ ملوك اسرائيل وملوك يهوذا تاريخ ولايتين صغيرتين تحت شقى الرحى تعركهما على التوالى سوريا وبعدين بابل من الشمال وكمان مصر من الجنوب .. كل المعارك دى اضعفت الدولتين دول لحد ما جت سنة 721 ق.م ومحت يد الاسر الاشورى فى عهد سرجون التانى مملكة اسرائيل من الوجود وزال شعبها تماما وفضلت مملكة يهوذا تكافح حتى اسقضها البابليون سنة 581 ق . م هذا من جهه

من جهه تانيه من ناحية الجنوب كان فرعون مصر يزحف على مملكة يهوذا واحتلها واسقطها سنة 608 ق.م واستمر فى زحفه لحد ما هزم الاشوريين واستولى على اسرائيل كمان .. يعنى مصر خدت مملكة يهوذا من اليهود وكمان خدت مملكة اسرائيل من الاشوريين وبقت فلسطين كلها تحت ايد مصر.

فى الوقت دا بقى كانت بتدور فى بابل احداث هزت المنطقه .. ازاى .. فاكرين اسم بختنصر .. (نبوخذ نصر) الراجل ده بقى احتل اشور .. وبعدين زحف على فلسطين وهزم فرعون مصر واستعاد مملكة اسرائيل من مصر وبعدين احتل مملكة يهوذا فى الجنوب وقتل صدقيا بن بواقين أخر ملوك يهوذا ونهب اورشليم ودمر هيكل سليمان ونفى الشعب الاسرائيلى خارج فلسطين .. واصبحت فلسطين خاليه تماما من اليهود . المؤرخين بيعتبروا دا بقى التدمير الاول لأورشليم.

حبيت انسخ ايه من القرأن ما عرفتش وعشان كدا حاكتبها بايدى وامرى لله وربنا بقى يسامحنى والايه بتقول ايه

(بسم الله الرحمن الرحيم)

(وقضينا الى بنى اسرائيل فى الكتاب لتفسدن فى الارض مرتين ولتعلن علوا كبيرا 0 فاذا جاء وعد اولاهما بعثنا عليكم عبادا لنا اولى بأس شديد فجاسوا خلال الديار وكان وعدا مفعولا 0 ثم رددنا لكم الكره عليهم وامددناكم باموال وبنين وجعلناكم اكثر نفيرا 0 ان احسنتم احسنتم لانفسكم وان اسأتم فلها فاذا جاء وعد الاخرة ليسوؤوا وجوهكم وليدخلوا المسجد كما دخلوه اول مره وليتبروا ما علوا تتبيرا 0 عسى ربكم ان يرحمكم وان عدتم عدنا وجعلنا جهنم للكافرين حصيرا) الاسراء الايه 3 الى 8.

يعنى كان تدمير اورشليم على يد نبوخذ نصر (بختنصر) التدمير الاول على قول معظم المؤرخين.

اصل التسميه باليهود

بعد كدا جه قورش اللى هو ملك الفرس وعمل ايه قورش احتل بابل ومن ثم اصبح له السياده على ارض يهوذا اللى كانت تحت الحكم البابلى - مش بختنصر كان احتل فلسطين .. طبعا. اطلق الفرس بقى على شعب يهوذا اسم اليهود وعلى عقيدتهم اسم اليهوديه ومن التاريخ ده اصبحت كلمة اليهود تعنى من اعتنق اليهوديه حتى لو ما كانش من بنى اسرائيل ودا يا جماعه الفرق بين اليهودى والاسرائيلى

طبعا احنا عارفين ان الاسرائيلى هو من انحدر من نسل يعقوب .. اما من انحدر من غير نسل يعقوب من اليهود فهو طبعا ليس اسرائيلى وان الفرس هما اللى اطلقوا عليهم كدا .. نرجع مرجوعنا بقى للفرس عملوا ايه مع اليهود .. بعد كدا لما جه قورش ملك الفرس جه سمح لليهود بالعوده الى فلسطين .. فعاد من عاد ولكن اكثرهم لم يعودوا واعادوا بناء المدينه المقدسه (اورشليم) واقاموا تانى معبد صغير مكان الهيكل اللى كان بناه سيدنا سليمان وهدمه بختنصر.

مع الاسكندر الاكبر

كانت عودة اليهود الى فلسطين عودة افراد زى ما قلنا وليست عودة دوله وفى سنة 320 ق.م زحف الاسكندر الاكبر على فلسطين ورحب به اليهود وبعد الاسكندر آل حكم فلسطين الى البطالسه..

مع الكابيون

تنتسب اسرة المكابيون الى ساتياس وابنه مكابياس اللذين قاما بثورات ضد الحكم البطلسى دون جدوى حتى استطاع احد قادتهم واسمه ارتبولس ان يستقل ويأخذ لقب ملك ولكن عهده ما قعدش كتير

مع الرومان

كان الرومان يرقبون الصراعات بين المكابيين واليهود وبين البطالسه وبين امراء اليهود وبعضهم البعض هتى هب صراح كبير بين قائدين متنافسين من اليهود فاكتسح الرومان اليهود (فلسطين) واستولى على القدس بقيادة القائد الرومانى (يامبيوس) وبعدين حلت اسرة هيردوت محل المكابيين وحاول هيرودوت ارضاء اليهود فبنى لهم هيكلا على نسق هيكل سليمان حتى جاء (تبطنس) الامبراطور ودمر الهيكل واحرق اورشليم على اثر ثوره قام بها اليهود فى المدينه .. ويعد هذا فى رأى البعض التدمير الثانى للمدينه (اما من نظن ان تدمير اليهود حاليا هو التدمير الثانى فهو من قبيل ان عدتم عدنا) بعد كدا جاء اوريانوس وازال معالم المدينه من الوجود وسواها بالارض وزرعها وتخلص تماما من اليهود بين قتل وتشريد ونفى واستطاع اليهود الهرب الى مصر وشمال افريقيه واسبانيا واروبا واقام دربانوس هيكلا وثنيا باسم جوبيتر رب الآلهه عند الرومان وبقى هذا الهيكل الى ان قامت المسيحيه فى اورشليم فدمر المسيحيون هيكل جوبيتر فى عهد الامبراطور قسطنطين.

مع المسلمين

فى سنة 636م فتح المسلمون فلسطين من الرومان ومنذ ذلك التاريخ عادت لفلسطين عروبتها الكاملة وكانت آنذاك خاليه من اليهود تماما واصبحت فلسطين منذ ذلك التاريخ عربيه اسلاميه.

لم تنتهى معاناة ارض كنعان فلسطين مع جبال الصبر ولكن مرورا بالحملات الصليبيه وحتى يومنا هذا ... كل هذا ذاقه شعب الكنعانيين الفلسطينين وتجرعوا الصبر على مدى التاريخ وحتى يومنا هذا وللقصه بقايا كثيره ولكن اعرف ان صبركم نفذ وانا ايضا صبرى نفذ من هذا الموضوع .. ونكتفى بهذا .. باقى موضوع واحد مش عارف اقدر اتكلم فيه ولا ما اقدرش .. الموضوع هو اشكاليه التاريخ والدين وحنخليه فى البوست القادم لو حبيتم بس هو بوست شائك وحساس لانه يتكلم عن علاقة المسيحين باليهود وعلاقة المسلمين بالمسيحيين واليهود ولذلك مش عارف حاقدر اكتبه ولا لأ......

انتهى بحمد الله