فشكله فى القطار

وحطوا فى عين فشكول مسمار

يوم الاثنين الماضى كان عندى شغل فى اسكندريه - ما هو انا رحاله فى شغلى - كل اسبوع فى بلد .. قوم ايه

صحيت الصبح الساعه 6 عشان اركب القطر اللى رايح اسكندريه مباشره عشان يوصلنى الساعه 9.5 وكمان . نصف ساعه ميكروباص اللى بيروح بحرى اقوم اوصل للفرع بتاع اسكندريه تبقى الساعه عشره ومن عشره للساعه اثنين يكون عندى وقت اقدر اعمل فيه حاجه .. قوم ايه

صحيت محمود ابنى عشان يوصلنى المحطه .. محمود قايم بوزه شبرين وعمال يبرطم على آخره .. انا بقى مش واخد بالى من حاجه .. محمود عايز يخلينى آخد بالى .. انا بقى متنح .. قوم ايه محمود وصلنى المحطه على مضض .. محمود من غيظه داس على البنزين جامد راحت العربيه طالعه امريكانى .. اعديهاش انا بقى وافوت .. ما هو الواد متغاظ وموش طايقنى .. قمت مبرطم بشوية كلام فى العضم - قام الواد خدهم فى عضمه وراح باصص لى من الشباك شزرا وماشى على طول

دخلت المحطه عشان اقطع التذكره - قام صاحب التذاكر قال القطر فيه تأخير نصف ساعه .. يا محموووود .. محمود مين .. محمود زمانه وصل البيت .. حطيت همى فى بطنى وقلت هو انا ما قداميش حل تانى .. اقعد يا واد .. القطر اتأخر ساعه وعشر دقائق .. يا ريتها كانت نصف ساعه .. ركبت القطر وامرى لله .. لقيت كرسى حلو كدا وقدامى عيلين وزاويز .. قلت اقعد مع العيلين دول أهم تسليه طريق ... وبعدين لقيت البت .. البت زى القمر والواد زى الهباب .. عامل شعره كدا .. بقى .. اصل .. مش فاهم عامل فى شعره ايه .. شعره فى الشرق وشعره فى الغرب وكل يعنى كدا عشرين او ثلاثين شعره لازقين فى بعض والشعر عامل زى السله (نباث شائك ينمو فى المستنقعات ) الشعر اسود والوش اسود والعمليه سواد فى سواد .. مش مشكله ولا عيب .. خد عندك كمان .. الواد لابس تى شيرت اسود بنص كم ودراعه طالعه من النص كم مسلوعه وطويله ولونها اسود .. طب يا ابنى اختار الالوان ولابس حظاظه فى دراعه.. طب ممكن تلبس ساعه تظبط المواضيع وكان لابس سلسله على رقبته .. بصيت للسلسله يمكن دهب ولا فضه ولا حاجه حلوه لقيتها مش لا دهب ولا فضه ولا حاجه حلوه .. امال ايه .. ما علينا

البنت بقى زى القمر .. والله زى القمر .. الوش ابيض .. جميله .. والعيون عسلى .. مش قلت لكم فشكول حطوا فى عنيه مسمار .. اصل كنت لابس النضاره الشمس وما حدش شايف انا شايف ايه .. البت تلتين بقى مش متوسطة الطول .. اكتر شويه .. القد .. ما شاء الله .. اللبس .. سبحان الله

الواد كل شويه يقرب بوزه من بوز البت ويتوشوشوا ... الله طب يا بنى مش كده .. فشكول مستغرب وكل شويه بيبص اكتر .. البت هيمانه عالآخر .. فشكول عجبته الحكايه وقعد يتفرج تقولش سعاد حسنى وحسين فهمى فى خلى بالك من زوزو ولا أميره حبى انا .. يقوموا كل الناس اللى فى القطر يعملوا زى فشكول ويتفرجوا .. الواد من قلة ادبه مد ايده على البت .. زى ما بيعملوا الحبيبه وهما ماشيين وحط ايده على كتفها .. وما فيش حد قال لهم حاجه .. فشكول قعد يفكر .. البنت الهبله دى زى السكر ..لو عايزه تحب يعنى .. مش تدور على واحد عليه القيمه شويه .. لأ وأيه الواد آخر قنعره فى قعدته وحاطط رجل على رجل ... فشكول يعنى اللى وضعه يسمح له بكده ويحط رجل على رجل ويتقنعر شويه مش قادر يعمل كدا احتراما للناس اللى فى القطر اللى راكبين معاه قوم ايه .. الواد راح يوشوش البنت فى ودانها .. يا نهار اسود .. فشكول قلع النضاره وقعد يبرق للعيال عشان ينكسفوا شويه .. العيال ما عندهمش دم ولا عبروا فشكول ولا حتى ادوا له اى اهتمام .. فشكول كان فاكر نفسه له قيمه يعنى وان العيال حتنكسف .. اتارى فشكول اونطه ولا حد معبره .. قوم ايه فشكول عند محطة طنطا القطر فضى شويه راح فشكول قايم من الكرسى وخد شنطته ونضارته وجه رايح على كرسى تانى .. الله .. كرسى فاضى ولا حد يدايقنى ولا حد

يقل ادبه قدامى .. ايه اللى كان مخلينى قاعد جنب المسخره دى.. فشكول قعد اخر انشكاح وآخر ابنعاج اربع كراسى وانا لوحدى شفت الهنا اللى انا فيه .. جه القطر عند

كفر الزيات ووقف وطلع القطر ركاب كتير .. فشكول اللى كان قاعد متشكح لم نفسه عشان الزحمه .. قوم ايه .. قعد جنب فشكول ولد وقدامه بنتين .. يا دى النهار الاسود .. المره دى بقى الواد قاعد مؤدب وشكله معقول يعنى .. وش وحش .. مش حلو .. معقول اصل الواد دكهه كان وحش خالص ومناخيره لها زلومه وبقه واسع وشعره سلك المونيوم خشن .. لكن الواد ده معقول يعنى .. البت بقى اللى قدامه كل شويه توطى لقدام عشان تكلم الواد اللى جنبى وبتعمل هى اللى الواد الاولانى كان بيعمله .. يعنى فشكول شاف الموضوع من وجهتى النظر .. كل شويه البت تقوم عامله مع الواد (شيك هاند) وايديهم كدا تفرقع وهما بيشيكوا هاند .. فشكول زهق .. طق .. بس مش قادر يتكلم - اصل القطر كله عيال وعمالين يصفقوا ويغنوا .. حلو الغنى يعنى مافيهاش مشاكل .. واد من وسط عربية القطر ينده واد صاحبه .. انت ياد يا سعيد يا ابن الـ ... فشكول طلع الجرنان وحط عينه فيه من كسوفه .. العربيه مليانه ستات وحريم وبنات والعيال ما عندهمش كسوف ولا خشيه .. فجأه لقيت البت بتضحك وبتحط راسها فى عب الواد اللى جنبى .. نهار اسود .. فيه ايه .. فشكول اتلكك ان الواد ميل عليه .. قام فشكول باخخ فى الواد .. والله الواد طلع مؤدب .. آسف يا عمو.. وكنا قربنا من دمنهور وغاروا العيال دول .. فشكول قعد يفكرفى زمان وايام زمان .. ايام ما كان بياخد الجو بتاعه - بيسموها اليومين دول المزه - ما شى ياخد المزه بتاعته ويمشى هو وهى من ميدان روكسى لحد الهرم الاكبر .. دا ايام ما كنا فى مصرزمان كنا نبتدى من الصبح ولا حاسين بحر ولا برد ولا حاسين بشارع ولا ناس ولا حاجه خالص لحد ما نوصل لمطلع الهرم نقوم نفوق ونرجع تانى المشوار كله .. فشكول كان بيقول احلى كلام وبيسمع احلى كلام وبس .. ما فيش لمس ..كل واحد يتكلم من بعيد لبعيد - كنا بنحب بودننا .. البت محترمه .. وفشكول برضه محترم .. وكانت كل الفشاكيل الحبيبه والمزز الحبيبه اللى فى الشارع كده محترمين بيحبوا بودانهم وخلاص .. ممنوع اللمس وكانوا بيخافوا على الجووه -المزز- اصل كنا بنحب عشان نتجوز مش حكاية مزز وخلاص

كنا بنلبس تى شيرتات برضه وقمصان .. كان التى شيرت او القميص مكوى وعلى سنجة عشره .. فشكول كان بيحب سيف البنطلون ما فيهوش كسره واحده والجزمه بتلمع على أخرها .. فشكول وكل الفشاكيل كانوا بيحبوا الصوت الهادى وبيحب يحافظ على الجو بتاعه - المزه يعنى - متهيأ لى ان الفشاكيل كانوا غلطانين وكانوا هبل والمزز كمان كانت هبله ..الحاجه بقى بتاعتى كل يوم بتقول لفشكول يا خى روح انت ما لكش لازمه .. ليه يا وليه تقول يا خى روح شوف لنا قرشين للعيال اللى عايزين يشتروا شقق دول وما معناش ثمن الشقق دى .. فشكول يبص للأرض وهو مخزى وقفاه يقمر عيش .. ما علينا فشكول يفتكر ايام زمان ويقول لها يا وليه انت ناسيه الجزم اللى اتقطعت فى شوارع القاهره من المشى .. يا وليه انت كنت لو فات يوم من غير ما أهريك مشى ومن غير ما الففك الشوارع كلها تعملى مناحه وتخاصمى اخواتك وامك وابوك وتقعدى تعيطى وتنوحى والتليفونات ما تبطلش زن.. الوليه بكل برود تقول .. يا خويا .. انا كنت هبله وعبيطه .. فشكول يفتكر ايام الهبل والعبط والجزم اللى كان ابويا يقول لى انت رجلك فيها فواريك .. اصل ما كانش بيشوف المشاوير اللى كنا بنعملها من روكسى للهرم ومن القلعه لحديقة الاندلس ومن العتبه لحد المؤسسه فى شبرا للزمالك .. للدقى .. كنا صايعين بقى ومبسوطين من المشى.. ما هو ما كانش فيه كل اللى المشى .. ويا سلام لو كنا نروح لونابارك اللى كانت فى جنينة الحريه اللى بعد كوبرى قصر النيل بتاعة ضحك ولعب وجد وحب بتاع عبد الحليم حافظ .. تقولش كنت فاكر نفسى عبد الحليم حافظ.. وبحبك يا فشكول .. وبحبك يا ست الدار .. والاخر تقول لى ما لكش لازمه .. ما شى يا حاجه

وااااااااع .. وااااااااع .. واااااااع .. ايه ده القطر عمال يقول يا خلق هوى ليه ؟؟ آآآه .. اصل القطر وصل سيدى جابر .. اصحى يا فشكول .. ابص من الشباك الاقى الواد اللى شكله ما يسرش عدو ولا حبيب والبت اللى زى القمر نازلين سيدى جابر وانا مكمل لمحطة مصر .. فشكول كمل ووصل المنشيه

الساعه كام .. يا نهار مش فايت .. اجرى يا واد عشان تخلص شغلك ..

فشكول رجع فى نفس اليوم بس فى اتوبيس الجونه .. حاجه كدا سياحه .. فشكول حيحرم تانى يركب القطر