فشكول فى العيد

كل عام وانتم بخير ... الواد فشكول كل عيد لازم يروح ويعيد فى بلده هو وكل اخواته الصبيان والبنات .. ابوه الله يرحمه عود فشكول واخواته على الحكايه دى .. العيد يبقى فى دار العيله .. فشكول ابوه مات عام 2002 الله يرحمه رحمه واسعه .. كان راجل ريفى وفلاح اصيل .. كان احسن واحد يزرع القطن .. واحسن واحد يراعى شجر الموالح ( البرتقال واليوسفى والليمون) واحسن واحد بيفهم فى زراعة البطاطس وتجارتها كمان وعشان كدا سنة 69 خزن 2000 طن بطاطس وكان ثمن الطن وقتها 22 جنيه يعنى الكيلوا ب2.5 قرش صاغ .. والدى كان حظه ممتاز- جه الطن نازل من 22 جنيه الى 14 جنيه يعنى الطن يغرم 8 جنيه .. مش بقول لكم ابويا كان حظه حلو قوى ومن ساعتها بطل يتاجر فى البطاطس او يزرعها .. الله يرحمه .

امى بقى كانت ست بيت ممتازه بتقعد طول النهار فى المطبخ وما كنش يحلى لها الطبيخ الا فى الكانون والفرن البلدى اللى ورا الدوار .. آه لو كلتم المحشى الكرنب ولا الباميه اللى مطبوخه على الكانون .. تاكلوا صوابعكم وراها .. كان عندنا حله كبيره قوى يعنى يتحط فيها خروف وكانت امى ايام العيد تطلع الحله دى وتحط فيها لحمة العيد وتسويها على الكانون اللى ورا الدوار .. اخوكم فشكول بقى كان بيحب يجهز الحطب والخشب واقراص الجله - اقراص الجله - ويتولى هو خدمة الكانون والمحافظه على النار فيه ...ماهو اصل السر ايه .. اقول لكم السر ايه:

امى كانت تقول والله يا صلاح انت كلك بركه .. وصلاح اقصد فشكول هو الوحيد اللى يعرف السر .. ولا امى ولا حد خالص يعرف السر .. كان فشكول يقعد قدام الكانون ومستمتع بحكاية الولعه دى .. وطبعا الكانون ورا الدوار ولا حدش شايف حاجه .. يقوم فشكول يشم ريحة اللحمه اما تطيب .. بيبقى لها ريحه كدا .. اللى بيفهم فى الطبيخ يعرف اللحمه طابت من ريحتها .. ييجى فشكول يجيب طبق غويط من المطبخ .. امى حتعمل ايه يا واد .. الواد يقول.. حأخد شوية شوربه يا امى هديه على شغلى قدام الكانون.. امى تقول اوعى تاخد حاجه تانيه .. فشكول .. دا كلام يا امه هو انا برضه آخد حاجه من وراكى .. الحله الانجر دى كان بيتعمل فيها حوالى 15 كيلو لحمه .. شوف بقى شربتهم بتبقى عامله ايه ؟ ... اكسير .. فشكول يا خد الكرنيب (المغرفه) ويغرف له شوية شوربه صغنونه وعليه 3 ولا اربع حتت لحمه وياخد صحن الشوربه وينزل بيه الغيط فى الدره عشان ما حدش يشوف هو بيعمل ايه اصل دارنا كانت جنب الغيطان ... كان فشكول يروح زريبة الطيور ويشوف اكبر دكر بط ولا دكر وز ويروح ناشه بالطوبه فى رأسه .. الحقى يا امه دكر البط حيموت تيجى امى جرى بالسكينه .. طبعا .. امال كنا نتعشى بط ازاى .. فشكول كان بيعمل فى امه فصول منيله بنيله .. والله لحد قريب .. الله يرحمك يا امى .. توفيت فى النصف من رمضان الماضى .. طولت عليكم المقدمه عن مغامرات فشكول فى بيت العيله.

احنا وعقبال عند الجميع وربنا يبارك ويزيد 7 اخوه 5 رجاله و2 بنات المهندس على اخويا الكبير بالمعاش والمهندس محمود اخويا التانى برضه بالمعاش وانا ان شاء الله برضه بعد 4 سنين معاش والمهندس محمد وعبد المنعم اخويا الصغيرفى الرجاله وحاصل على بكالوريوس لا اله الا الله وهو اللى فاتح دار العيله فى البلد وهو اللى بيزرع وبيقلع مطرح ابويا وهو اللى بيديه لنا بناخده من غير ما نفتح بقنا وفيه كمان صباح اخصائيه نفسيه وماجده مدرسة ثانوى ... ولازم كلنا واولادنا نعيد فى دار العيله فى البلد واتعودنا على كده حتى بعد وفات والدى ووالدتى الله يرحمهم .. ولسه بنعمل كانون خلف الدوار ولسه الحله الانجر موجوده ( امال اللحمه دى كلها آنى بوتجاز يقدر يطيبها ) ما فيش غير الكانون

كنا فى العيد الكبير جايبين دبيحه .. العيال ولادنا الكبير من كل عيله اجتمعوا وقالوا اشمعنا ابهاتنا يجيبوا اضحيه واحنا لأ .. وقاموا جابوا دبيحه .. عمهم عبد المنعم هو اللى اشترى الأضحيتين .. فشكول واخواته كانوا مش قادرين يحلقوا دقنهم قبل الذبح ودقننا طويله ما اتحلقتش من 10 ايام ودقنهم عماله تاكلهم وعمالين يهرشوا فيها والحكايه اوفر خالص فى الدقون .. وكنا حاجزين الحلاق عندنا يوم العيد الصبح عشان بعد الدبح ياخدنا بالدور.. قوم ايه .. عبد المنعم اخد العيال ولادنا وخيرهم .. الدبيحه اللى تعجبكم خدوها .. قام العيال وكلوا اسامه ابنى وشريف ابن اخويا على يختاروا .. قام الفالحين اختاروا .. قوم ايه .. تم دبح الدبيحه بتاعة الابهات عشان يحلقوا دقونهم.. وتم عمايل الاتلاث من غير مشاكل (تلت لله .. وتلت للاصدقاء... وتلت للبيت ).. طبعا العيال مش ملتزمين بالسنه زينا وحالقين دقونهم وعايشين حياتهم واخر هيصه .. خلوا بقى دبيحتكم للأخر.. قوم ايه قعد شريف واسامه مع الجزار وييفرقوا الاتلات .. قوم ايه عمتهم صباح وعمتهم ماجده ما كانوش مشتركين فى الاضحيه لا بتاعة الكبار ولا بتاعة الصغار .. مش البنات على حساب اخواتهم .. عندنا كدا فى الفلاحين.. الواد شريف لعمته صباح .. اصل العيال والعمات سنهم قريب من بعض وعيال زى بعض .. يا عمتى صباح .. تعالى ياحلوه اشتغلى معانا وساعدينى فى الشغل .. انتى شاطره انت وعمتى ماجده تلهفوا منابكم على الجاهز يعنى حتاخدى لحمه ببلاش ولا حتى تساعدينى .. يا عمتى ماجده .. ترد عمته ماجده والله يا شريف بعد ما آخد منابى من اللحمه لأركبك جميلى والف بيك فى الغيطان .. عمته صباح .. حاضر يا شريف .. اصلها دى اميره وبنت ناس .. اما عمته ماجده .. برم .. وصايعه زى شريف .. العمات اخدوا منابهم وكل واحده حطت منابها فى شنطة عربيتها وقاموا نازلين فى شريف ضرب .. وهاتك .. الواد يجرى وعماته تجرى وراه .. وصريخ وهرجله .. قوم ايه .. بعد الجزار ما خلص دبح وتوزيع الاتلات قعد العيال يعدوا الكيلوات - اتارى دبيحة العيال نقصت عن دبيحة الكبار بـ 35 كيلو .. وهاتك يا خناقات بين العيال وبعض .. بس مش قادرين ييجوا ناحية ابهاتهم .. وجه الواد أمير ابن محمد والواد محمد ابن محود والواد احمد ابن على ماسكين اسامه ابنى وهاتك يا ضرب فيه .. انت يا دكتور يا جاهل لما تختار مش تختار الدبيحه الكبيره .. امال احنا ذقناك ليه .. والله انت لا تنفع دكتور ولا حتى تمرجى .. اسامه ابنى اصله دكتور بهايم ومعيز وفراخ .. الواد خد ضرب ولا حرامى فى مولد .. البت آيات مرات اسامه اصلها دكتوره صيدليه قعدت تطبطب على اسامه وتقول له أنا مش قلت لك ما تنحشرش فى الغجر دول .. الواد شريف كان مشترك مع اسامه فى جريمة الاختيار.. خد نفسه وقعد بعيد وكان كاشش ومش قادر يتكلم .. راح الواد اسامه على الواد شريف وهاتك يا خناقات معاه .. مش انت ياد اللى قلت لى على الدبيحه دى .. الواد شريف بهدوء .. مش انت يا اسامه بتاع بهايم ومعيز وتعرف احسن منى يا اخى انت متخصص وانا جاهل اعمل لك ايه .. البت بقى رانيا مرات شريف معاها ليسانس تربيه ومن ضمن العاطلين .. يا أسامه رأى شريف استشارى .. جم العيال هايجين تانى ونازلين فى اسامه ضرب واسامه يجرى ويقول يا ارض اتشقى وابلعينى يا ارض يا ارض .. الواد محمد بقى ابن محمود اخويا كان نازل اجازته من وحدته على البلد مباشره وكان لسه لابس اللبس الميرى وكان اللبس الميرى مكتفه وعايز يضرب اسامه وشريف بستين برطوشه لكن رتبته اللى على كتفه قهرته وخلاته واقف محترم بس كان متغاظ وحيطق من اسامه ومن شريف . البت بقى مرات امير اصلها معاها ليسانس خدمة اجتماعيه وبرضه عطلانه .. بس سوسه .. قالت ايه .. يا أمير المفروض اسامه اللى يدفع الفرق ده هو وشريف من جيبهم .. الواد اسامه شاف الدنيا مولعه والعمليه مهببه بهباب قام غامز مراته واتفقوا على انهم يغادروا البلد فى اسرع وقت وجهزت مراته نفسها وركبوا عربيتهم وطلعوا يجروا وسابوا لهم البلد واللى فيها .. والله كان عيد جميل ولذيذ .. وتانى يوم العيد ما كانش فى البلد غير الكبار فشكول واخواته الصبيان والبنات .. اما العيال كل واحد راح لحاله الله يسهل لهم ويوفقهم ويفتح لهم ابواب رحمته .. امين يا رب العالمين.. .. اما تالت يوم العيد يوم الاربع كان ختامه مسك والحمد لله .. الواد محمد ابن محمود اخويا اتصل بينا من مصر ... تعالوا استنونى فى الزقازيق .. اصله ساكن فى الزقازيق .. استنونى عشان تحضروا جنازه حماتى .. انا لله وانا اليه راجعون ورحنا وحضرنا وعزينا البت ريهام مرات محمد اصلها معيده فى جامعة الازهر بالقاهره .. ورجعت من الزقازيق مباشره لبيتى فى شبين الكوم .

كل عام وحضراتكم جميعا بخير ويعيد الله عليكم وعلينا هذه الايام بالخير واليمن والبركات