خبر ما يساويش نكله..

كنت زمان من قراء الاهرام .. ايام هيكل وسلامه ... والفطاحل اللى كانوا فى الاهرام .. وكانت الاهرام فعلا هرم خوفو وخفرع ومنكاروع كمان .. دالوقت الاهرام رزمة ورق بتتفرش على طرابيزه السفره احيانا للقراءه .. واحيانا اخرى للقراءه برضه .. احسن يرفعوا على قضيه وتبقى حوسه.

اولا ما بقيتش اقرأ الاهرام بالمره .. وحتى لو قريت اقرأ الرياضه وخلاص واتفرج على الصور وما بقيتش اقرأ المقالات الاسبوعيه اللى بتتصدر الجرنال .. اصل بقى الواحد زهق وطق خلاص من المقالات دى .. كمان جميع المقالات اللى بتتصدر الجرائد اللى بيقولوا عليها قوميه ما بقيتش اقراهم .. بلا هم ووجع دماغ .. زى الواحد عمال يسمع طبل وزمر وتصفيق حاد وحاجه كدا زى ما يكونوا بيقولوا لنا ياهبل يا عبط احنا بنعرف احسن منكم .. هو انتم بتفهموا حاجه زينا .. احنا اللى بنفهم بس .. ويقوموا يدونا ضهرهم ويطلعوا لنا لسانهم .. اقروا بقى معايا الخبر ده :

وطبعا مش حتعرفوا تقروه من الكمبيوتر .. لكن هو منشور فى زيل الصفحه الاولى يوم الجمعه 20 فبراير 2009 العدد 44636 وبيقول ايه باختصار:

( فى بحث للباحث علاء عوض الله يقول فيه ان المصريين بيصرفوا كل طلعة صبح 62 مليون جنيه فى ايه بقىىىىى: .. شوفوا 12 مليون جنيه تدخين .. هو عنده حق فى دى وكمان 40 مليون جنيه تليفونات ارضى و محمول .. كمان قال المصريين بيحرقوا كل سنه 19 مليار سيجاره .. وبتقول الاهرام - فى سباق هذا الانفاق المجنون حذر الباحث ان ذلك سيكون خطر علىمصر مستقبلا فى ظل الازمه العالميه القادمه - والاهرام عايزه تقول اننا شعب سفيه وما بيعرف يصرف فلوسه كويس وياريت اولياء الامور يحجروا علينا ويدونا مصروفنا يوم بيوم على قد شقه وطعميايه .. وخساره فينا الفول والعدس )

طب يا اهرام .. ماشى يا اهرام .. قال يعنى احنا الشعب الوحيد اللى فى العالم سفيه وكل الشعوب دى كلها هى اللى حلوه وما بتشربش سجاير ولا بتتكلم فى التليفونات ارضى ومحمول .. هم بس المصريين اللى سفهاء.. ماشى يا اهرام - ما احنا السبب فى الغم اللى احنا فيه وان احنا السبب فى الاعاصير اللى بتهاجم امريكا والحرائق اللى شغاله فى استراليا وناقص كمان تقول لينا مش احنا قولنا لكم حسانين ومحمدين وانظر حولك والحاجه اللى زى القمر كريمه مختار.

يعنى يا اهرام سايبه كل البلاوى وجايه تحاسبينا احنا ... طبعا يا اهرام ما هو احنا الحيطه المايله .. يعنى يا اهرام سايبه اللى بيجرى ورا مغنيه فى لندن ودبى وصرف عليها كذا مليون والاخر ما اما نفضت ليه يروح مخلص عليها وقادرى علينا احنا يعنى....

يعنى يا اهرام سايبه تقارير الجهاز المركزى اللى فضحت الدنيا وجه عمنا وتاج راسنا صاحب القرشانات واللى بيصرف علينا كلنا ومعيشنا فى نغنغه بامارة انه عايز يمد ايديه فى جيبنا عشان ياخد اللى فيها ضرايب ومكوس ورسوم - يعنى حاجه كدا فاضل ياخد مننا ضريبة ان احنا مصريين - جاتنا نيله فى حظنا الهباب قوم ايه ؟ ... هو عمنا دهـ بهدل الراجل المحترم رئيس الجهاز المركزى ... واليومين دول خدوا بالكم فيه جوله تانيه من الكر والفر بين عمنا وبين الجهاز المركزى وما تنسوش تبقوا تشوفوها فى الموقر.

طب يا اهرام .. فى تقرير الجهاز المركزى من فتره بيقول ان فيه عجز 12 مليار جنيه .. خدوا بالكم 12 مليار مش 12 مليون .. مالهم بقى؟

الـ 12 مليار دول ضاعوا تحت بند السهو والخطأ ... يا لهوىىىىىى .. عايز اصوت وعايز اعيط وعايز برضه اضحك.

اقول كمان يا اهرام .. كام واحد هرب ومعاه مليارات بعلم وسمع وهس ناس كتيره قوى .. يا دى الغلب اللى احنا فيه شاطره علينا يا اهرام وعماله تبكتينا وتلومينا احنا اللى ما فيش فى ايدنا غير نطلع الهم فى التليفونات والسجاير.كنت باسبك يا اهرام حتقولى احنا شعب بيصرف 5 او 6 مليار فى السياحه فى الخارج.

ولا تقولى احنا بنصرف على اللحمه اكتر من ما بنصرف على الفول المدمس.

ولا تقولى بناكل تفاح وشيكولاته بـ كذا مليار.

ولا بنستورد عربيات لكل 3 افراد من الشعب عربيه زى خلق الله فى السعوديه ودول الخليج ولاحتى فى ليبيا.

دا احنا بنقف فى طوابير العيش ونطفح الكوته عشان نجيب عيش مدعوم بشلن.

الاهرام مش شايفه اللى احنا شايفينه .. هما فى برج العرب واحنا فى برج الحمام.

بحق ... ايمن نور طلع من السجن؟ واللــــــــــــــــــــــــــــــــه !!!!!!!!!!!!!!

يا شيخ ...يا رااااااجل ....ما كنتش اعرف .. اصل ما بقيتش اقرى جرايد وخصوصا القوميه