يوم ميلاد المدونه

بعد الفاصل

فاصل اليوم من سلسلة موضوع قوم لوط واحكى لكم حكاية فشكول

النهارده يوم 27 ابريل يوم ميلاد مدونة فشكول اصل من سنه كنت قاعد انا والبت سومه المجنونه صاحبة مدونة مجنونه فى بلد عاقل طبعا انتم عارفين ان سومه بنت اختى ... هى كدا بنت هبله ومجنونه ولما بتقعد فى البيت بتبقى ناكشه شعرها زى الجنيه ومبهدله هدومها وهى كمان رسامه وطالبه فى كلية الفنون الجميله والجماعه الرسامين والفنانين دول بيبقى مخهم لاحس شويه ومهابيل وقعدت تفرجنى على مدونتها وبعدين قلت لها يا بت يا سومه اعملى لى واحده وقعدنا بقى نعمل فيها وطبعا انا مش فاهم حاجه خالص والبت يا خويا عماله تكتب فى حاجات وتسألنى عن حاجات وانا ولا انا هنا .. واتفقنا على اننا نسميها فشكول وبعدين كتبت لى العنوان بتاعى وكلمة السر وقعدت تحفظهم لى وانا احفظ ولما جيت البيت وحاولت افتح مش راضيه ولا عارف حاجه وقعدت اعمل تباديل وتوافيق لحد ما فتحتها وكنا طبعا عملنا افتتاح المدونه بكلمتين خايبين كدا , المهم سبت المدونه وما اشتغلتش فيها خالص الا فى شهر اغسطس واول بوست كتبته كان حوار مع الزعيم مصطفى كامل وحاجيبه ليكم فى ميعاده ان شاء الله بس بعد ما اعرفكم ايه حكاية فشكول دى.

زمان زمان ايام ما كنت باشتغل فى السعوديه كنت دائما اشترى جريدة الوفد وكانت العصفوره ايامها عماله تصوصو على اخرها وكان الله يرحمه مصطفى شردى رئيس التحرير. وكان السعوديين ياخدوا منى الوفد عشان يقروها .. طبعا كانت بتبقى فاكهه وعجبه عندهم عشان فيها هجوم على الحكومه ونقد للوزراء وهما ما عندهمش حاجه زى كده وآخر النهار يجيبوا لى الجرنال بتاع الوفد متفشكل خااااااالص وانا احاول اظبطه ما يظبطش ويفضل متفشكل .. ويوم بعد يوم سميته فشكول.

وانا فى السعوديه عملت لنفسى خطه وما رضيتش اقعد هناك اكتر من 3 سنين عشان الغربه ما تاخدنيش زى كل الناس اللى بتقعد كتير وظبطت الخطه وعلى اساس ظروفنا هنا وكان بقى من ضمن الخطه ان احط فلوسى فى شركة السعد للاستثمار والتنميه عند عمنا ابو دقن كبيره قوى اشرف السعد.. (من فضلكوا ما حدش يقول على عبيط) كان التليفزيون والجرايد وكل الدنيا بتقول ( الريان) و (السعد) وانا طبعا صدقت الجرايد لانها قوميه يعنى بتاعة الحكومه يعنى مش ممكن تكذب ولا تقول كلام فاضى يعنى او تتكلم عن نصابين.

قوم ايه ؟ اتفشكلت الشكركات دى واتفشكلت فلوسى واتفشكلت معاها الخطه اللى انا كنت حاططها لنفسى وكمان اتفشكلت السفريه بتاعتى ماهو انا كنت بقى جيت وخلاص واكتشفت ان بلدنا ما ينفعش الواحد يخطط فيها لآى حاجه خالص وان احسن خطه تتعمل هو ان الواحد يسيبها على الله لآن ما فيش ثوابت ولا اصول لآى حاجه .

قوم ايه ؟؟ ظبطت نفسى على مشروع تجارى بالقرشين اللى كانوا حيلتى وفشل المشروع اصل دى مش بلد تعمل فيها مشاريع بفلوس صغيره ... اى مشروع مش ينفع الا لو كان بملايين مش بالآلاف وانا بقى طالعه فى دماغى والناس بيقولوا لى يا حاج ولابس الجلبيه البيضه والطاقيه المخططه بتاعة اخويا شلبى وخدت البمبه التالته واتفشكل المشروع والقرشانات الباقيين ورجعت يا مولاى ما خلقتنى ما حيلتيش ولا مليم الا الدخل الشهرى بقى بتاع الوظيفه اللى ييجوا كدا 200 جنيه ... جيت مسمى نفسى فشكول .. من الفشكله ... اصل كل حاجه بعملها بتتفشكل وكأنى انا اللى بفشكل اى حاجه ومن يومها وانا بين زمايلى واصحابى يقولوا لى يا فشكول من الفشكله اللى حصلت لى فى حياتى.

ولما لقيت نفسى مش فاعل فى المجتمع وما ليش اى لازمه ... ولما لقيت انى بلدى مش عايزانى ومش محتاجانى ولا بتعمل لى حساب ... ولما لقيت صوتى فى الانتخابات زى قلته ... ولما لقيت مش عارف ادخل اولادى اى كليه عسكريه بالرغم من انى احد جنود اكتوبر ... ولما لقيت ناس تانيه غير بتوع اكتوبر هما اللى قاعدين على كرسى الفرح واحنا حتى مش بنتفرج ... يعنى من الأخر انا بقيت صعلوك ما ليش لازمه .. يعنى انا وانت والمعازيم ... يعنى الفرح وصحاب الفرح ... يعنى العريس ... يعنى ابو العريس ... يعنى انا وانت ...يعنى من الآخر انا اونطه وطز ولا كأنى موجود قمت عملت مدونة صعلوك اللى الواد محمود ابنى خطفها منى واشتغل فيها وحتى ما بقيتش طايل صعلوك هو يا دوب فشكول وخلاص.

نفسى بقى حد يسألنى يقول لى يا واد يا فشكول ... نفسك فى ايه وما عملتوووووش

مين اللى سأل؟

انت ؟ طب ياسيدى

نفسى ابقى رئيس جمهوريه ... أى جمهوريه وخلاص ... آهم يقولوا على فخامة الرئيس وخلاص وامشى قدام حرس شرف كدا والناس كلها تخاف منى زى ما تخاف من امنا الغوله وحاعمل فى شعبى عمايل مهببه بهباب.

اولها : مش خاخليه يشوف النوم,,,, وثانيها : مش حاخليه يدوقوا اللحمه خالص عشان انا حاكل اللحمه لوحدى ,,, وثالثا : حادخلهم كله السجون ,,, يعنى حاخلى عيشة شعبى منيله بستين نيله ... اشمعنى أنى يعنى هو انا كخه ... مش كل الريسه بيعملوا كده وانا كمان زيهم.

وعلى فكره ... بما انى رئيس بقى ورئيس مهبب بهباب ما فيش لا تورته ولا جاتوه ولا كاكولا وحتيجوا تعيدوا على وتقولوا لى كل سنه وانت طيب يا فشكول وعقبال 163.5 من عمر مدونة فشكول وتمشوا على طول وحتى مش تشربوا كاكولا ولا حاجه ولا حتى كباية شاى ... مش انا بقى الرئيس ... انا بقى الزعيم ...

اظن بوست خفيف وجميل ومريح