الثلاثاء، ٦ أكتوبر ٢٠٠٩

ايام زهونا وفخرنا وعزنا

احبائى المدونين والمدونات






الحلوين والشاطرين والحلوات






يا اللى منورين النت وخليتو له كلمه وله معنى



كنت وعدت العزيزه آهـ وكفى بانى حاكتب بوست خفيف وفكاهى المره دى ..لكن ما علهش .. مش متعود ارجع فى كلامى لكن المره دى حتنزل الارض بس اعملوا حسابكم المره الجايه لأ يا ام حنفى



اصل ما كانش ينفع ان النهارده يفوت من غير ما اكتب بوست عن المناسبه بتاعته .. واحب اقول لكم ان المناسبه دى لن تتكرر كثيرا فى التاريخ . طبعا هى مناسبة حرب اكتوبر العظيمه .. انا مش ح احكى لكم دمرنا كام دبابه ووقعنا كام طياره واستردينا ازاى القناه وكام عسكرى وكام ضابط .. والحاجات الرقميه .. انا ح اتكلم من وجهة نظر تانيه خالص..



وجهة النظر دى هى قيمة الانسان المصرى بين قوسين ( اللى انا زعلان منه خالص) شوفوا الانسان المصرى دا بيجمع المتناقضات كلها الوحشه كله والمر كله فى الانسان المصرى ... زى ما هو حاصل اليومين دول .. والحلو كله والعظمه كلها فى الانسان المصرى .. زى زمان ...





شوفوا عظمته ازاى



قبل اكتوبر بايام قليله الانسان المصرى عمل ايه عشان يضحك على اليهود ويخليهم نايمين فى العسل وفى الخط كمان وان المصريين دول خلاص نيام نيام يا ولدى وبيشخروا كمان .. شوفوا ضحك عليهم ازاى.



والله العظيم , وحياة النبى , ورحمة جدى الكبير , والرغيف السخن والبارد كمان هو اللى عمل زمان حرب اكتوبر اللى انتم بتسمعوا عنها تاريخ واحنا عاصرناها حياتا وحبا وعشقا ودما .. دا كان ظماااااان .. ايام الشباب .. ايام فحت البحر.



الانسان دا هو اللى عمل الخطه وكانت كذا خطه فى بعض .. اولا خطة اعداد الدوله للحرب .. وخطة اعداد الحكومه للحرب, وانتم عارفين ان فيه فرق بين الدوله والحكومه .. يعنى ما شاء الله كلكم مثقفين , وهو اللى عمل الخطه العسكريه وهو اللى واجه دبابات العدو واسلحته الثقيله والخفيفه ما يعرفه عنها ومالم يعرفه.



شوفوا خطة اعداد الدوله للحرب من غير العدو ما ياخد باله ولا يحس كانت ازاى وخطة الخداع الاستراتيجى



كان انور السادات فى كل خطاب من خطاباته يقول السنه دى هى عام الحسم .. ولا يحسمش .. وبعد يومين يقول لنا ح نحسم لكن ما علهش المره دى اصل الضباب.









كان اعلن انه ح يروح الجمعيه العامه للام المتحده فى اكتوبر عشان يقول خطاب هناك امام اعضاء الجمعيه العامه.



كمان خلى الخبراء الروس كلهم يمشوا ويسيبوا مصر ويروحوا على روسيا . وطبعا من وجهة نظر العدو ان المصريين ليسوا على كفاءة لادارة واستخدام المعدات العسكريه من غير الروس .. نيام .. نيام . وشد اللحاف يا جدع انت وهو بالاضافه لقبول جميع المبادرات الدوليه لحل ازمة الشرق الاوسط .. طبعا .. مش احنا بقى ضعاف وما نقدرش نحارب ولا نتعارك حتى لو مع قطه .. برضه دا من وجهة نظر العدو




شوفوا بقة اعداد الدوله والشعب عملوا له ازااااااى؟؟؟؟



كان لازم السلع التموينيه والغذائيه تبقىموجوده وتكفى البلد اكتر من 6 شهور - يعنى الرز والزيت والسكر والدقيق والذى منه



لازم كل اقسام البوليس او وزارة الداخليه تكون على اهبة الاستعداد لتأمين الجبهة الداخليه .. الجميل بقى ان خطة وزارة الداخليه جات على فاشوش .. قولوا ليى ليه يا فشكول .. اقول لكم هو انا يعنى ح اخاف منكم ولا من غيركم .. اصل الشعب عمل فى الححكومه فصل حلو خالص وطلع شعب متحضر وراقى .. ما فيش ولا قسم شرطه استقبل اى شكاوى او اى جنح او اى جنايات وكان الشعب على مستوى عالى من المسئوليه وكان ملتزم جدا وكان خير عون للحكومه والدوله فى حربها مع العدو.. ولا محضر شرطه ولا اى شكوى خلال ايام الحرب .. شفتم العظمه. والشعب خيب الظنون كلها فيه .. لانه كان منتظر حاجات وحشه ومشاكل من الشعب لكن والله الشعب كان فى منتهى العظمه.



اللى فات كان الاعداد الاستراتيجى للحرب .. من ناحية الدوله كلها حكومه وجيشا وشعبا طبعا فيه ناس حتقول يعنى ايه استراتيجيه .. اقول لكم من غير تقعير .. يعنى خطه طويلة المدى فيها كل حاجه اما التاكتيك فهو خطه على المدى الآنى ..




من الناحيه العسكريه بقـــــــــى





من يوم معركة راس العش اللى كانت بعد حرب يونيو 67 بحوالى شهر واللى عملتها شوية عساكر وظباط مصريين ضد جيش خارج منتصرا من الحرب وكله غطرسه وكامل العتاد والمعدات والمضرعات .. وشوفوا كمية النيرات التى هبطت على الاعداء من الاسلحه الخفيفه اللى كانت مع المصريين وما استطاعتش قوات الاعداء احتلال راس العش وعادوا مدحورين امام قوة مصريه صغيره من قوات المشاه والصاعقه





واللى عملته زوارق الطوربيد المصريه الصغنونه خالص وبصواريخها واللى قسمت المدمره الاسرائيليه ايلات نصفين واغرقتها فى مياه المتوسط وفقد العدو فى المعركه دى حوالى 40 قتيل غير الجرحى اللى قدروا بحوالى 100 جريح اسرائيلى .









كمان اللى عملته قوات الضفادع البشريه المصريه واغرقت سفينتين عسكريتين اسرائيليتين فى عقر دارهم فى ميناء ايلات اللى هما مات يم ومات شيفع وكمان دمرت الرصيف الحربى الاسرائيلى .. شوفوا عظمة العمليه دى وعظمة التخطيط ازاى القوات تتنقل بين 4 دول اللى هما مصر والاردن والسعوديه وتهاجم فى ميناء اسرائيلى (ايلات) ودى عظمة تخطيط الجيش المصرى مع المخابرات الحربيه المصريه.


تعالوا نشوف حرب الاستنزاف والتى لا تقل عظمه عن حرب اكتوبر .. ممكن كمان تسألوا عن قوات الصاعقه المصرين بتعمل ايه بالهليوكبرات فى داخل عمق الجيش الاسرائيلى فى سيناء. وياسلام لو عرفتم حكايات المجموعه 39 من قوات الصاعقه بقيادة البطل الشهييد ابراهيم الرفاعى وهذه المجموعه تنقلت فى سيناء طولا وعرضا وعمقا فى عمليات فدائيه بطوليه لم يفرج عنها حتى الآن وكانت كل مره يا تجيب اسرى يا تجيب جرحى اسرائيليين يا تجيب معدات قتال اسرائيليه واسلحه .. يعنى ما كانتش بترجع وايديها فاضيه .. كان لازم تجيب لنا هديه معاها.


هذه العمليات اكسبت الجندى المصرى ثقته فى نفسه وكشفت معدنه الحقيقى وبأسه الشديد فى الشدائد واعطته ثقه فى بلده وكانت مقدمه قويه لحرب اكتوبر المجيده.



شوفوا ترعة الخطاطبه والعمليات التى كانت شبه يوميه للعبور حتى ان الجنود حفظوا العبور وادونه كأن يكون اداءا ميكانيكيا من كثرى ما تدربوا عليه.


زهقناكم عشان البوست طويل .. نلتقى بعد الفاصل











تعالوا نشوف خطة الخداع الاستراتيجى عسكريا.. الله يرحمه السادات كان رجلا ولا كل الرجال شهما ولا كل الـ شهماء .. قويا .. جسورا .. سياسيا من الدرجة الأولى .. هذه شهادة حق تقال فى الرجل رحمه الله .. وذلك حتى نهاية الحرب أما ما بعدها فكان سفلنجع ولا كل الـ ....



عشان نضحك عليهم وفعلا ضحكنا عليها شوفوا عملنا ايه؟؟؟؟



طبعا بما ان ما فيش حرب - ايه لزوم القوات الكبيره والكتيره دى والمصاريف اللى الجيش بيصرفها كل يوم لزوم اللبس والتعيين وخلافه .. ما بلاها نوفرها وخلاص ... قمنا بتسريح 20 الف جندى .. وايه كمان .. فتحنا باب العمره للى عايز يروح يعتمر واللى عايز يروح يحج ودا كان للضباط وضباط الصف . .. وايه كمان تم اعطاء الاوامر بعمل احتفالات يوميه على طول الجبهه والعساكر والظباط يقعدوا يغنوا ويلعبوا وينكتوا .. ودا كله الاسرائيليين من الضفه الاخرى شايفينه.



طبعا برضه كان لازم نوريهم العين الحمرا .. نقوم نعمل ايييه؟؟ نعمل حالات طوارئ بالقوات المسلحه



نقوم نرفع درجة الاستعداد للحاله القصوى .. وبرضه العساكر والظباط عاملين حفلات سمر وبيغنوا .. بالذمه دول ناس حيحاربوا .. وبعدين ننزل حالة الاستعداد للوضع الطبيعى .. يقوم الاسرائيليين يعملوا زينا يرفعوا ولما احنا ننزل ينزلوا وعملنا الحكايه دى مره واتنين وتلاته واربعه احنا نرفع .. هما يرفعوا احنا ننزل .. هما ينزلوا .. وبقت لعبه حلوه بينا وبين الاسرائيليين نبعت المعدات والسلاح لحد شاطئ القناه وبعدين لما ننزل نسحبها ونسيب كدا شويه فى الخباسه متغطيين فى الرمل . (يعنى حاجه زى كدا)



الاسرائيليين زهقوا ارفع يا جدع .. يرفعوا .. اخفض يا جدع يخفضوا .. ايه الموال بتاع المصريين ده .. هى حكايه .. هما الجماعه المصريين دول اصلهم ما وراهمش حاجه.. سيبكوا منهم بقى دول ناس فاضيين بلا هم ومصاريف وبلاوى لحد ما مره رفعنا درجة الاستعداد للحاله حــ وهما كالعاده كانوا واخدين الموضوع هزار.



وكــــا نـــــــــت



- الساعه 1000 من يوم 6 اكتوبر قام القاده بفتح المظاريف السريه التى وزعت عليهم.



- من الساعه 1000 وحتى الساعه 1400 (اى الثانيه بعد الظهر) تتابعت وتسلسلت الاوامر وعبرت 220 طائره مقاتله وقاذفه مقاتله وقاذفه قناة السويس فى اسراب وجماعات وفرادى وفعلت افاعيلها فى العدو .. وعادت الطائرات بخسائر طفيفه منها طائرة الشهيد عاطف السادات .



- من الساعه 1400 حتى الساعه 1800 عبر حوالى 40000 جندى قناة السويس وتم الاستيلاء على معظم النقط القويه فى خط بارليف وماادراكم ما خط بارليف.



- فى الساعه 2000 تم تركيب جميع الكبارى الجاهزه على قناة السويس وعبرت معظم المدرعات الثقيله والخفيفه الى الضفه الشرقيه بعد تجريف الساتر الترابى بواسطة مدافع المياه وما ادراكم ما مدافع المياه وفكرتها .



تمر البيانات العسكريه من نصر الى نصر ومن فوز الى فوز.. هذه للشعب والخارج وتمر الاوامر العسكريه خلال اجهزة الاتصالات العسكريه من نصر الى نصر.



كل فى موقعه يؤدى واجبه المقدس منفردا وجماعات ثم تتجمع هذه الواجبات فى منظومة وسيمفونيه رائعه وتصب فى فوهة بندقيه او مدفع او طائره فى جبهة القتال.




لا تصدقوا كل ما يقال فليس كل ما يقال صحيحا



فحرب اكتوبر عرفت العالم بالعقل المصرى والفكر المصرى واسرائيل لا تخاف من الجيوش ولا الاسلحه الحديثه والفتاكه لان عندها ما هو اعظم ولكنها تخاف من ارادة الانسان المصرى الذى لو اراد.



فبكل المقاييس العالميه والعسكريه لم يكن من الممكن عبور خط بارليف او تدمير الساتر الترابى ولا حتى بالقنبله الذريه .. ولكن فعلها المصريين بمدفع مياه ودمر اعظم وامنع خط دفاعى فى التاريخ (خط بارليف) ولكنه الانسان المصرى اذا اراد.




كان ليس بمقدور اى قوة عسكريه ايقاف سلاح المدرعات الاسرائيلى . . ولكنه الانسان المصرى اذا اراد وبآربجى محمول على الكتف.


الانسان المصرى اذا اراد .. هذا ما تعمل له اسرائيل الف حساب وحساب وحساب .. ولكن ؟؟؟؟؟









البوست طويل ... بس هى حكمت بكدا ... اعتذر









هناك ٩٤ تعليقًا:

طـائر الليــل الحـزين يقول...

اول تعليق

طـائر الليــل الحـزين يقول...

بتقول البوست طويل
على الاقل طوله له معنى كبير قوى
كل كلامه فخر لينا وللأجيال بتعتنا والى بعدينا
وياريت المصريين يعرفوا انهم يملكوا الكتير
وبلاش دور الضعف وقلة الحيلة اللى بقوا عيشين فيه
احنا خير اجناد الارض
بس مش عارفة ايه اللى حصل
على العموم بجد الف شكر ان البوست كان على مناسبة عظيمة زى حرب اكتوبر العظيمة
كل سنة واحنا دايما بنفتخر بيها قدام العالم كله

الازهرى يقول...

احجز تانى وارجع

مواطن شووجااع يقول...

الله يعودها أياااام

الازهرى يقول...

ولكن ؟؟؟؟؟؟؟

ولا كلام أكثر

ن يقول...

السلام عليكم
استاذى الغالى فشكول
بحيك وبحى كل جيل حرب اكتوبر وان هذه الاحداث تركت فى نفسى منذ طفولتى ذكرى عظيمة اعتقد ان سبب الانتصار فى هذه الحرب هى همة الجنود البسطاء الذين خرجوا بحماس وعلم اهاليهم الفطرى ودعوات خرجت من قلوب الامهات والاباء .. وخطط الحكماء فى هذه الحرب وكل من قدم نفسه فداء لوطنه وانا مما رأيت فى طفولتى جثامين مئات الشباب خرجت من بلدتى بدسوق لكل منهم ذكرى مازالت تتردد حتى الان .
مع خالص تحياتى

فاتيما يقول...

يا استاذنا طول ف البوست زى منت عاوز
دا احلى كلام يتقال و يتقرى
و لازم تفضل تقوله و تقوله
عشان كلنا نتاكد من روحنا
لو حصل موقف اتنين تلاتة
خلونا نتراخى او نفقد الامل حكاياتك دى تفوقنا و تقولنا
لأ
محناش هفأ
و وقت الجد بنكون قد المسئولية
و يا ريت كل ايامنا تكون فيها جد كدا
كل سنة و حضرتك طيب
و بخير
و مصدر فخر لينا كمدونين إن حضرتك بطل من ابطال النصر الأسطورى دا اللى هيفضل مصدر للامل و الفخر العمر و الزمن كله

شوكولاتة يقول...

بوست رائع يا أستاذنا ومن قلب الحدث لأني أعرف إنك من أبطال أكتوبر ونماذج حرب أكتوبر دي هي اللي إحنا محتاجينها دلوقتي علشان نغير البلد دي

تحياتي

ريمان يقول...

البوست مش طويل


البوست جميل



فكرتنا بايام العز

ايام العزه والكرامه


فعلا يا فشكولنا يا قمر لو عملنا مقارنه ما بين ايام العزه دى والايام اللى احنا فيه من جميع الجوانب والزوايا هنلاقى فرق شاسع

الصور حلوه اوى

اول مره تشوف صوره الرئيس السادات عن قرب كده

انا بجد بحب اوى الرئيس ده لانه كان قائد عظيم

وكان حاكم كويس جدا

مكنش مهتم انه يجمع فلوس قد ايه ويحطها فى بنوك الدول الاجنبيه


لاء

ده حتى اما كان فى ايامه اما اللحمه زاد سعرها امرالشعب انه يعمل اضراب عن اللحمه عشان سعرها ينزل


يعنى شوفت حضرتك كان مهتم بايه


بس مش عارفه ليه اغتالوه وعشان ايه

سمكه واحده يقول...

عارف يا عم فشكول
حتي حرب اكتوبر الواحد بقي يشك فيها
ايه الكلام اللي ملوش معني ده
سيبك انت
البوست مش طويل ولا حاجه
اي نعم حجات جميله ومشرفه وفخر وكل حاجه
بس وبعدييييييييين
احنا فين من ده كله دلوقت
لنا الله
اخبراتك ايه
معلش بقالي كتير مش باجي عندك
قلت اطمن عليك واقول كل سنه وانت طيب بقي بمناسبه
حرب اكتوبر
كل حرب اكتوبر وانت طيب ياراجل ياطيب
تحياتي

اسماء واحلام فى وجدانى يقول...

طب نسلم الاول ونرجع نشوف البوست انا هتاخر شوية لانه كبير جدا واكيد اكيد هيكون فيه جديد

سلام مؤقت

Sweet Violet يقول...

بوست مفيد مش طويل ياعمو
بس فى نفس الوقت بيوجع لما يشوف الانسان المصرى زمان و دلوقتى
لما نفضل عايشين فى الماضى ومش عايزين نعمل للحاضر اى حاجة
v_v

اسماء واحلام فى وجدانى يقول...

البوست فعلا جميل اوى وكنت فاكر انى مش هاقدر استوعبه لكن بجد زعلت اوى لامة خلص

ايامكم كانت صعبة بس كان فيها معانى جميلة اوى مفتقدنها دلوقتى

وطبعا لاتعليق على اى كلمة فى البوست

مشخبطاتي يقول...

يارب ملى عيونا بنصر تانى يفرحنا..آمين.

أمل حمدي يقول...

فشكووول باشا

كل عيد نصر وأنت طيب وبخير ومن نصر لنصر ان شاء الله وعقبال ما نحتفل بتحرير الاقصى

اللهم امين

تقديري لفشكول باشا على البوست الهايل

مواطن مصري يقول...

كل سنة و انت طيب و المجرمين الي قتلو السادات البطل ربنا مش هيرحامهم انشاء الله

آه وكفى يقول...

عمو فشكول مسمحاك ياغالي وهستنى البوست الفوكااااااهي

هى حرب اكتوبر دي ورايا ورايا ,, بس على فكرة الانسان المصري كده لازم يتلب عشان يفوق حاجة غريبة صحيح

انا بحب السادات اوي وبعشق عبقريتو مش عارفة في ناس كتير بتكرهو ليه كده .. مش عارفة

adel يقول...

البوست طويل بس براحتك :):)
الحب حربك و مين هيحكلنا عليها غير اللي شفها ؟
اصلهم ضحكوا علينا و ربونا علي كام فيلم و اغنية ميحسوناش بحاجة اشاسا :):)

كل سنة و حضرتك طيب

Unknown يقول...

بوست جميل
بس طويل
كل عام و حضرتك بخير
و تعيش و تفتكر النصر و الكرامة
و كتاب حياتى يا عين مشوفتش زى كتاب
اصلى لقيت ماسورة بوستات عن اكتوبر
ضربت جبتلى خنقة

عمالين نغنى على نفسنا
هو فين النصر ده دلوقتى
؟!!!

مع كامل احترامى لكل التضحيات
بس الصراحة النصر قرب يخش متحف التاريخ ان مكنش دخل اساساً

ربنا يرحمنا برحمته

همس الارواح !! يقول...

استاذ فشكول


بوست طويل بس بجد كله امجاد
وللاسف من رايى الشخصى بحس ان الايام ده مش هترجع تانى


بس بجد الانجاز ده كنا بنفخر بيه

شكرا ليك على البوست التحفه ده
تحياتى

رحلتنا في الحياة يقول...

استاذ فشكول اولا احبك احييك على جمال البوست ده بجد حسيت انى عايشة الجو الفترة دى بس انا بقى عايزة اسال شوية اسئلة محيرانى يمطن حضرتك لما تجاوبنى عليها ارتاح
اةولا هى الحرب دى كانت تخطيط مصرى بس ولا كان للدول العربية دور كبير فى انتصارنا بردو وكمان لما بنحارب فى نفس الوقت اللى بتحارب فيه سوريا يعنى اسرائيل بقيت مشتتة على جبهتين ده غير البلاد اللى ساعدت فى الحرب بردو مش ده ليه دور بردو اننا نتصرف فى الحرب
طيب وبعد ماانتصارنا وبتقول السادات كان راجل عظيم الله يرحمه قبل ليه معاهدة السلام اللى افتكر انها سبب مصايب كتير دلوقتى
ازاى نكون منتصرين ونروح نعمل سلام ازاى
السؤال الاخير كنتم متخيلين ان الحال بعد الحرب وبعد 36 سنة هتوصل البلد للسوء ده :(
اتمنى حضرتك تجاوبنى على الاسئلة لانى بجد حزينة وحاسه ان ارواح الشهداء راحت هدر

ليس فقيرا من يحب يقول...

السلام عليكم

ايه الجمال ده يا عمى

بجد بوست جميل وممتع كمان

من بطل من ابطال اكتوبر

ربنا يحفظ ويكرمك يارب

ستيتة يقول...

الله الله الله
الا يا استاذنا البوست طويل اه بس ميزهقش ابداااااااااااااااااا

اي نعم انت بتحكي عن ظمااااااااااااان
بس نفسي اقول للظمان ارجع يا ظمان

انا متأكدة ان الجيل الجديد ده تعبان ومكتئب علشان مشفش عزة زمان وأمل زمان
علشان معندناش شيء اسمه هدف قومي
ولا عندنا شيء اسمه قدوة حقيقية على أرض الواقع

انبسطت انا واستكنيصت بالبوست ده
كل سنة وانت طيب ياراجل يا طيب

SHAPE YOUR LIFE (ABOALI) يقول...

حتى النصر الذى كان
يحاول البعض الا يصدقه
من هول ما يراه بصفة يومية

كلمة المتناقضات التى وردت فى البوست
هى الرد القاطع
اننا شعب مزاجى
العاطفة عنوان

ويعمل فى حياته بالمثل القائل
رب صدفه خير من الف خطة


فعلا هو يوم للزهو والعزة ولتلك الجنود
والقادة التى كانت دمائهم حرة
غارت على تراب ذلك الوطن

احييك على التذكير لعله ياءتى يوم
نرى فيه من جديد العز والتيه

تحياتى الراقيه

قيس بن الملووووح يقول...

يارب يعودلنا جيل اكتوبر من جديد ونخلص من المطبعين ودعاة الهزيمه واللي هايبيعوا البلد

أحمد عاطف يقول...

عمن فشكول

رغم ان كل الكلام اللي انت قولته كل المصريين عرفينه لكن انت سردته بشكل قصة

واللي انت قلت عليه طويل لاقيت من كتر ما بتلتهمه عيني بيخلص في ثواني

ليس تدقيقا فيما كتبت ولكن تنويها

العرب كان لهم فضل فلا ننسى الفضل بيننا

تحياتي يا عم المدونين

نهر الحب يقول...

السلام عليكمورحمة الله وبركاته
كل عام وانت ونحن ومصر بخير
رائع ما كتبت تسلم أفكارك ويسلم قبل كل ده احساسك الرائع وحبك الوطنى الشديد.



خالص تحياتى

نهر الحب

رئيس التحرير يقول...

بسم الله الرحمن الرحيم
السلام عليكم ورحمه الله وبركاته.
يطول البوست ...زي ما انت عايز ولا تبطلش كلام عن حرب اكتوبر بس ما كنش ليك حق تنسي انها حرب العاشر من رمضان .
حرب كان شعارها ( الله اكبر ).
كل شيئ كان بيحارب الفلاح والعامل والتلميذ في المدرسه و المهندس ...حتي الأعلام كان له دور بالأغاني الوطنيه الجميه ...بسم الله الله ُأكبر بسم الله ...
وخلي السلاح صاحي ...و يا جوامع كبري للنصر من فوق الموادين
و يا كنايس دقي اجراس
الانتصار...تَاتَا
و معاك حق ...حتي الحراميه بطلوا يسرقوا.
كل أكتوبر و أنت و الشعب المصري بطل .

شاب مفقوع يقول...

عمي فشكول

كان نفسي تحط صورة الشاذلي والجمسي كمان

الرجالة دول ليهم دور ميتنسيش

وقول يارب النصرة تكمل

تحياتي يا عمنا

أبــــو ضـــيــاء يقول...

كل سنه وانت طيب يا استاذ فشكول وعقبال ما نحرر القدس

Unknown يقول...

كل عام وشعب مصر بألف خير
ومبارك عليكم تاريخكم المشرف
فهنيئاً لكم
وهنيئاً للامة
استاذي فشكول
دائماً مبدع

Unknown يقول...

ان شاءا لله يارب بييجي العام القادم وبنحتفل معكم بعيد تحرير فلسطين

جارة القمر يقول...

التعليق الخمسين

انا جييييييييت وسعووووووووووووووولي

جارة القمر يقول...

والدي الطيب

يا احن قلب بالعالم


الزمن اللي بتتكلم عنه مليان ناس عظيمة

وشرفاء وهذه وصمة نفتقدها اليوم

ضحوا بانفسهم لنعيش نحن بسلام

ولكن هم وانت عارف مين هما ضحو بايه

بولا حاجة

حلوة معاني الحب والوفاء وقتها

لكن دلوقتي نتكلم عن ايه عن خحيانة الزعما وتواطؤهم ولا عن الجبن اللي مالي نفوسهم


والدي كن بخير هذا ما احتاجه

مودتي

جارة القمر يقول...

نسيت اقولك اني بحبك جدا

ويارب تفضل بخير دايما يا اطيب قلب

فشكووول يقول...

الاخ العزيز بدراوى

رحت المدونه عندك لقيتك قافلها الا للى انت عايزهم يدخلوا عندك.. عشان كدا ارد على تعليقك فى مدونتى عساك انك تقرأها.

طبعا يا بدراوى انت بتتريق على اكتوبر وحرب اكتوبر .. طبعا عشان انت ما شفتش اللى احنا شفناه وما عايشتك اللى احنا عايشناه ومش زنبنا ان الحياه بقت هباب وزفت .. احنا عملنا اللى علينا (اقصد جيلنا)

يا بدراوى كنا مصدات للوطن وومات فينامن مات واسر منا من اسر وجرح منا من جرح وكنا ندخل الجيش من باب واحد وهو باب الدخول وما كانش فيه باب للخروج وكانت حياتنا مرهونه حوالى 7 سنين فى الجبال وفى الصحراء ومستقبلنا مؤجل وماكانش فيه اى حياه لنا.

عشنا سنوات بمرها وما كانش لها اى حلاوه ولا طعم حتى واللى داست عليه جنازير الدبابات ما لوش ذنب فى العيشه المهببه اللى احنا عايشينها

يا بدراوى يا كتاب حياتى ياعين .. لك حق تتريق لانك ما عشتش الايام دى وما عايشتهاش لكن احنا عشناها وعايشناها واخذت مننا ايام وشهور وسنوات ندفع ولا نأخذ حتى الدم دفعناه واحنا ما لناش ذنب فى اللى حاصل احنا كمان بالرغم من الايام الصعبه اللى عشناها ايام الحرب كمان ما زلنا ندفع زيك بالضبط

اما كتاب حياتك يا عين فانت حر فيه. اكتب فيه اللى انت عايزه.

م/ الحسيني لزومي يقول...

طبعا حرب اكتوبر كانت معجزه عسكريه بكل المقاييس ومش لازم الاداء السئ في مفلوضات السلام اللي جرت بعد الحرب يخلينا نقلل من قدر من كانوا وراء هذ الاعجاو.
تحيه الي روح كل شهيد اوراحل والي كل من شارك في صناعة هذه الملحمة العسكرية.

هــو..مش ..نـو يقول...

عمنا
بدراوي مهاه حق...
وجه نظره كده ...
اروح انا ...الخدمه بتاعتي ..
هوهواتي.

مي يقول...

حضرتك ماشاء الله صورتها لنا كانها دلوقتى بتحصل بث مباشر يعنى
كل سنة وحضرتك طيب يا استاذنا
تحياتى ليك ولابداعك

Unknown يقول...

يا عم فشكول
انا قافل المدونة خالص
مفيش حد يشوفها غيرى انا
قافلها عشان مبطل تدوين
لفترة
يعنى مش قافلها على ناس و ناس تانية لأ

اما بخصوص نصر اكتوبر انا مش بتريق عليه خالص بالعكس انا مقدر كل التضحيات ديه بس طووول ما حنا عمالين نتغنى بالنصر يبقى ده نوع من الغنا على نفسنا

تقدر حضرتك تقولى ماذا بقى من نصر اكتوبر سوى شوية نفاق رخيص و اغانى وطنية و افلام و بس

انا مقدر النصر و حاسس بيه
و متريقتش عليه

ريمان يقول...

فشكولى الجميل



متخافش عليا من الصدمات


انا بتلقى الصدمات بصدر رحب


فعلا اللى كنا بندرسه فى كتب التاريخ ده كان كله تزييف


ربنا يسترها معانا

بس مادام السادات كان السبب فى الفساد اللى احنا فيه الوقتى بسبب انه انشا الحزب الوطنى المفروض الريس مبارك يصلح الفساد ده


ولا ايه؟

لكن مادام هو مستفيد لا هيصلح ولا هيعمل

سنابل يقول...

والله يا عمو فشكول الكلام ده يطول على قد ما نقدر
هو احنا حيلتنا غيره نتباهى بيه ونعلمه لولادنا ؟
يا رب ينعاد علينا ونرجع طيبين تانى
بس الإنسان المصرى ما يتزعلش منه
ده يتزعل عليه
تعب وشقي وضحى
ولما لقي تعبه اتسرسب من بين ايديه وتضحيته بقت ذكرى وكلمة ف اغنية وحبر على ورق ودم على رمل صابه الاحباط وعزمه انهزم

مسدس صغير يقول...

والله يا عم صلاح انا كنت مستمتع جدا وانا بقرأ البوست
فعلا حاجات جميلة اوى
نصر من عند ربنا فعلا
بيعبر عن ارادة المصريين القدماااااااااااء
حرب اكتوبر دى كانت نصر عظيم
اعتقد لم ولن تنجب مصر مثل السادات رحمه الله
عقلية سياسية من الطراز الاول
احييك على البوست

اقصوصه يقول...

غعموا فشكول

طيب المصريين اللي عملوا كل ده

اللي انته بتتكلم عنهم

وينهم الحين؟

عمرو جويلى يقول...

أستاذى الكريم
السلام عليكم
رحم الله السادات وأدخله فسيح
جناته هو وشهدائنا الأبرار
فقد كان رجلاً جسوراً بكل معنى
الكلمة حمل لأهل الخبرة المسؤولية
كل فيما يخصه وليس لأهل الثقة
كما فعلها الزعيم خالد الذكر
تقبل مرورى

أحــوال الهـوي يقول...

كل سنه و انت

ملخص بديع لحرب العزة
و هذا ما ينقص الجيل الجديد هو ان يعرف عظمة القيادة المصريه و قدرة التخطيط التي تمتع بها اباءه مما يعطيه الرغبة باخذهم قدوة له

و حشتني يا عم صلاح و كل سنه و انت بخير يا حبيب الكل

تحياتي

كلمات من نور يقول...

أهلا أهلا يا رئيس جمهورية شقلوبستان وفشكولستان كمان

والله حرب أكتوبر دي حرب عزة خاصة إني من جيل النكسة ودي وصمة عار على دفعة 67 رغم إني كنت دايما أقولهم يا جماعة انا جيت بعد الحرب أبشر بالنصر ولكن هيهات وصمنا بنكسة فعلا ما بعدها نكسة ولكن بعد النصر توالت علينا وكسات ونكسات يا ترى ليه؟؟؟؟؟؟؟؟ محتاجين بوستات نتكلم فيها بصراحة عن الأجيال بتاعتنا علشان نعرف فين الورم أو الداء ونستأصله بقى والا إيه رأيك يا كبير؟

Unknown يقول...

كفايه التلفزيون
مقرر...مكرر
كل سنه فيلم الرصاصه لا تزال في جيبي
الاستاذ بدراوي معاه حق ...
ودلوقت ما بقتش حرب اكتوبر
من يوم ما السادات مات وأسمها
الضربه الجويه
تعرف حاجه عن السده الشتويه
احنا مسدود عننا النفس ...
كفايه.

المعتصم يقول...

السلام عليكم ورحمة الله وبركاته
استاذنا العزيز فشكوووول
تحياتى لشخصك الجميل
كل سنه ومصرناالغاليه بكل خير
معاك انه كان انتصار رائع وكبير وماحدش يقدر ينفذه بالروعه دى الا المصريين
لأن المصرى اذا اراد فعل
وفعله ليس كأى فعل
ده حفيد الفراعنه
لكن واسمح لى انى انكد شويه
لكن المصيبه انهم دلوقتى بيحاولوا يقتلوا روح الاراده دى عند اهم عنصر فى الامه وهم الشباب
الشباب اللى لما اتسألنا سؤال وهو
اذا فعلا مصر دخلت حرب بجد انت مستعد انك تدافع عنها وتفديها بروحك؟؟؟
الطبيعى انه كله هيقول طبعا دى مصر دى امى
الا انى فوجئت ببعض الشباب (ومش هقول كتير منهم)بيقولوا وادافع عنها ليه وهى كانت ادتنا ايه يعنى
ماهو احنا نعتبر محتلين من ناس تانيه
ومش فارقه كتير
معنى الكلام ده انهم فعلا ابتدوا ينجحوا فى مسعاهم وهو الاراده المصريه
بدأو يضربوها بجد
ولنا الله
مش عاوز اطول فى التعليقلانى عارف ان كلامى مش جديد
تقبل مرورى يااستاذنا وتحياتى
والسلام عليكم ورحمة الله وبركاته

♥نبع الغرام♥♪≈ يقول...

اهلا بالناس اللى مطنشانى ومش بتسئل عنى
برحتك يا جميل

خلاص معتش نوسة النوسة كونوسه

ربنا يسمحك بقا
عااااااااااااااااااااااا

♥نبع الغرام♥♪≈ يقول...

انا حاسة انى فى بانورما حرب اكتوبر مش فى مدونة فشكول يا جدعااااااااااااااااااااااااااان

ههههههههههههههههههههه

♥نبع الغرام♥♪≈ يقول...

بجد الله عليك وتسلم ايديك بوست جميل قوووووووووى

انا عن نفسى استفدت منه كتير
ربنا يطمنا عليك
وكل سنه وحضرتك طيب
مودتى

حـــــــــــب الملائكه يقول...

السلام عليكم
انا بس احب تعليقي يكون خفيف لان دى اول مرة ادخل عندك فى مدونتك
لو سمحت
انا عندى اعتراض صغير
بص
احنا حقيقي انتصرنا فى حرب اكتوبر
لكن صدقنى احنا انتصرنا عشان هما كانو عايزينا ننتصر
تعرف تأجبنى على سؤالى اللى جاى لو سمحت
1- كم هو عدد خسائر الاسرائيلين فى حرب اكتوبر ؟
2- ليه احنا رضينا بالهدنه ؟
3- كم عدد خسائر القوات المصريه
4- احسب عدد الخسائر عند المصريين وكمان عند الاسرائيليين
بص اسرائيل اترجعت بسبب انهم مش شايفين اى فايده من الصحراء
هما احلامهم اكبر بكتير من كده
وطبعا انت وانا والناس والعالم كله عارفين هما عاوزين ايه
اسرائيل تراجعت بامر من امريكا
وطبعا انت عارف امريكا تقدر تعمل ايه
امريكا مش هاتعمل امريكا هاتتكلم بس
اما بالنسبه للانتصار وخط برليف فصدقنى بصاروخ امريكي واحد كان الحرب فشلت
صدقنى اللى يقراعن حرب 73 هايعرف انها وراها كلام واسرار كتير الى الان ماحدش عارفها الا اللى حضرها
يلا سلام بقي
اتمنى زيارتك فى المدونه البسيطه بتاعتى

محمد المصرى يقول...

مهما قلت مش هقدر اوفى الجنود دول حجقهم اللى هما خير اجناد الارض

شهادة الرسول ومن قبله الله سبحانه وتعالى بتتكلم عن الارادة الغريبة

بس دلوقتى مر اكتوبر واصبح شهر الهزيمة والخيبة التقيلة بسبب مانعانيه من وطاة النظام المباركى

اعذرنى مستر فشكول واجب علينا الاعتذار لكل الشهداء الذين ضحوا بارواحهم من اجل الحرية التى فقدت منذ 29 سنة


يلا سلالم ويسلم موضوعك

النسر المهاجر يقول...

فشكول

وحشنى جدا

والبوست رائع وجميل جداجدا

بس أنا إللى عجبنى هو تفكير الإنسان المصرى والقائد العظيم أنور السادات ‘للى دخل الفران فى المصيدة وسابهم يصرخوا
شكرا على البوست مرة أخرى

mahasen saber يقول...

ايام نصر مباركه عليك وعلى الامه يا عمنا الغالى

البوست جميل مش طويل
وممتع و بيدينا احساس بالفخر والعزه وبيعمل انشراحه فى القلب ان ربنا كرمنا بالنصر الغالى ده

mahasen saber يقول...

بس منظر الطيارات الحربيه فوق الهرم مبهر وفيه قوه جميله كدا

آه وكفى يقول...

عمو فشكووووووول
ازيك النهارده الخميس معاد البوست
بص انا هروح الكورس وآجي على الساعة 10 متنزلش بئى البوست غير لما أجي عشان مرجعش يقولي منذ4 ساعات وربنا هتقهر ماشي نزلو لما اجي بأذن الله بس لو مجتش اتصل بالبوليس عشان انا سايقة منغير نضارة
D:

mimi يقول...

البوست طويل فعلا ... وتتاقل حروفه بالذهب

تسلم ايديك وذاكرتك يا أونكل فشكولي الجميل

ربنا يخليك لينا وكل سنة وأنت طيب وبخير يارب

mohamed ghalia يقول...

طويل ايه بس يا استاذنا
بجد استمتعت بيه جداااااا وكان فيه معلومات كتير غايبة عنى
دمت فى سعادة

وحي القلم يقول...

السلام عليكم
الحقيقة نصر أكتوبر شيء عظيم وطبعا يحق لنا الفخر بيه
وكلام حضرتك في منتهى التميز
لكن خسارتنا في حرب اكتوبر
حصلت بعد المعاهدة واللي اعترفنا فيها باسرائيل كدولة
ودلوقتي بعد مرور كذا وتلاتين سنة
مصر مبلطة ف الخط
لك الله يا مصر

جارة القمر يقول...

والدي الطيب

وحشتني جيت اسلم عليك

آه وكفى يقول...

فشكوووووووول
--------------
هيييييييييييه عمو فشكول معملش بوست ياولااااااد انا مستنياك متخليك حلو وتمشيها الجمعة عشان انا كل خميس بيكون عندي كورس في الزمالك لحد الساعة10 بليل او نزلو الاربع بعد الساعة12 او الخميس الصبح قبل منا انزل اصرف يعني المهم اقراه بدري:)

على فكرة انا اول مرة في حياتي كلها اجرب ارسم بقلم فحم اه والله قولت كده اجرب وتخيلت اني هعك لئيتو 100فل وعشرة وبيدي بعد رائع للصورة جرب كده مش هتندم

بس ازاي فرشة دي ضربة الفرشة عالورق اوي ياعمو فشكول انا بحس انها من كتر ما هى صعبة خايفة اجرب :))

وايه ياعم مخك مفيهوش كلام والكلام اللي مش معقول ده .. دانته هنا على بلوجر لو كحيت نرد نقول الله ياعمو فشكول ماشاء الله انته عارف الكل بيعزك اد ايه والله

احكلنا عن ذكرياتك طيب ايام الدراسة ايام الشقاوة ايام العيد اي حاجة من الحبشتكنات دي هتلائينا كلنا راشقين عندك بنرغي

مستنياك بئى في البوست الجديد :))

كلمة صدق يقول...

اللة ينور عليك فكرتنا بأيام زمان الحلوة اللى اولادنا مش عارفنها ومن كثرة العذاب اللى بيشوفوة بدأوا يفقدوا انتةائهم لهذا كلة والناس بدأت تنسى كل شئ وعلى فكرة طريقة سردك للموضوع شيق وجميل وشكرا

مهرة سالم يقول...

السلام عليكم ...
بجد جميييل قوي شرحك يا عم فشكوول ...
....
مش عارفه ليه حسستني إنها حكايه من ألف ليله وليله...
تتوقع ممكن تتكرر....
...
في امان الله

توتة الشقية يقول...

ياااااااه رجعتنا بجد الى احله ايام ايام كان المصرى فيها محارب شجاع
غير الايام دى اللى كل واحد بيقعد فى بتهم وخايف يطلع تحصله حاجة واكبر دليل على كدا لمااى ولد بيسمع انه خلاص رايح الجيش بيكون زعلان جدا
ياريت ينفع الواحد يقول (قول للزمان ارجع يا زمان ويرجع تانى )
اسعدنى مرورى فى مدونتك واتمنى انى ازور مدونتك من حين الى الاخر بعد اذنك طبعا
ويشرفنى انك تاتى الى مدونتى
http://www.ahla-donia88.blogspot.com/

تحياتى توتة

هــو..مش ..نـو يقول...

أهـوهـو ...تاني ؟
دماغـي وجـعاني ...

Unknown يقول...

حبيبي
والله وحشتني ووحشني كلامك اللي بيخدني ويشدني

تحياتي على ذلك البوست الذي وصف حقيقة المصري من غير تعميم ولا تنظير بحت بدون حلول


الأمل لسه موجود في الشعب ده

ويبقى التواصل

akeed يقول...

حضرتك بصراحة عيشتنا كأننا فى يوم الانتصار .

يالها من ايام لم اعاصرها و لاكنها فى قلبى

تحياتى و تقديرى

طهر فؤادك يقول...

السلام عليكم ورحمة الله وبركاتة ,,,
موضوع جميل ومعبرا جدااااا
وياريت تشارك معانا فى حملة نصرة الاقصى والموضوع بسيط جدا وياريت تشوف موضوعى على مدونتى وتقولى رأيك ..رأيك يهمنى اكيدددد ..

السيد لبيب يقول...
أزال المؤلف هذا التعليق.
قلم رصاص يقول...

انا حافظ وقارئ حاجات كتيرة جدا عن حرب اكتوبر المجيدة لكن من سيادتك ياعمو فشكول الطعم تاني خالص والنصر ليه مذاق بيتحس والله


دمت في خير ياعمنا

قلم رصاص يقول...

انا حافظ وقارئ حاجات كتيرة جدا عن حرب اكتوبر المجيدة لكن من سيادتك ياعمو فشكول الطعم تاني خالص والنصر ليه مذاق بيتحس والله


دمت في خير ياعمنا

نبراس العتمة يقول...

العزيز فشكول
والله لك وحشة، لكن كنت في سجن بما أني كنت محروم من البلوغسبوت. فطوال هذه المدة والموقع محجوب عن البوست عندي.

عدت ووجدتك كما عادتك بتنقل مواد كبيرة في البوست بطريقة ترفيهية سهلة وجميلة.
وحتى الموضوع المستهلك حرب اكتوبر عملت منه حكاية.
تعرف رأي المغاربة في التغني بالانتصارات، دائما نعتبر ذلك ضعف وانتفاخ، لأن الحقائق لا تخفى على أي أحد.
موازين القوى معروفة في العالم.
لكن فكرة عندك جوهرية اليهود يخافون من الانسان ليس المصري فحسب، بل الانسان في كل مكان.

مودتي

صدى الصمت - عاشقة الورد - يقول...

ياااااه
أخيراً وصلت لآخر البوست !!!!
أنا كنت فاكرة إنى هأكملة بكرة
هههههه
لأ بجد بوست عظيم جداً جداً بأحييك عليه وعلى كل كلمة فيه

تامر علي يقول...

للأسف يا استاذنا .... النصر العسكري الرائع الملون بدم الشهداء تحول الى هزيمة سياسية منكرة لازلنا ندفع ثمنها حتى الآن لدرجة أنني كنت اتمنى لو لم نكسب الحرب ولم يحدث لنا ماجرى

تحياتي :)

احلام جوليا يقول...

بابا فشكول اسفة على تاخر التعليق ولكني لم انسى نصر اكتوبر فيوم اكتوبر من كل عام اهني ابي بالنصر وعندما كنت بمصر كنت اشتري تورته صغيرة ونحتفل انا واخوتي بابينا لانه احد ابطال اكتوبر الذين عبروا فقد كان ابي ضابط بالقوات المسلحة المصرية وعبر مع العابرين وكذلك لي عم في نفس الوقت كان مع البحرية واقرباء كانوا بسلاح الطيران وعندما ياتي اكتوبر كنت اسمع الحكاوي من ابي ومن امي عن الحرب وعن المصريين اذكر ان امي اخبرتني انه عند مجئ العيد بعد انتهاء رمضان كانت مازالت الجيوش بالجبهة وكان الناس يعدون كعك العيد وعندما يجدوا سيارة من سيارات الجيش يوقفونها ويجمعوا كل الكحك من الافران القريبة ويضعونه بالسيارات ويقولوا ولادنا الي بيحاربوا اولى بهم وسمعت من ابي حكاوي رائعة عن ما بعد واثناء الحرب سمعت اشياء تبكيني من شدة الفرحة وتشعرني دائما اننا كمصريين شعب الازمات صحيح معدننا الاصيل يلمع عند الازمات وكان كل الاتربة والهموم التي غطته تنفض ليظهر المعدن اللامع الاصيل

احلام جوليا يقول...

وكل سنة وانت طيب يا بطل اكتوبر

Dr. Ibrahim يقول...

نصر عظيم من جنود عظماء قدموا للوطن أرواحهم فداءاً ..فهم خير أجناد الارض..

تحياتى لك ولكل بطل من ابطال اكتوبر

جارة القمر يقول...

والدي الطيب

اشتت لك فجئت

اتمنى ان تكون دوما بخير

خواطر شابة يقول...

جميل ان تقرأ عن انتصار اكتوبر من وجهة نظر انسانية لها طعم مختلف عن لغة الارقام الجامدة
مع تحياتي

محمد الجرايحى يقول...

السلام عليكم ورحمة الله وبركاته
ذكرتنا بالذى مضى وانقضى
أيام العزة والفخار وروح أكتوبر العظيم
وصيحات الله أكبر التى خرجت من قلوب مؤمنة

والله زمان

Unknown يقول...

انا مش اتكلم فى اللى فات لانى موليد 88 بس اتكلم فى الجاى اتنت تتوقع ممكن نعمل اكتوبر اكبر امتى

إشراقة أون لاين يقول...

ياريت اللى فات يرجع تانى يا عم صلاح
معلش بقالى كتير مدخلتش على مدونتك المحترمة

♥نبع الغرام♥♪≈ يقول...

ازيك يا راجل ياطيب

اخبارك ايه

معلهش حظى انا وحش لانى مش معايا تليفون اليومين دول يلا مافيش نصيب تتعوض مرة تانيه
والمنصورة كانت منورة بيك ياغالى
ربنا يطمنى عليك يارب

طهر فؤادك يقول...

السلام عليكم ورحمة الله وبركاتة ..
الله يكرمكوا يارب شاركونى يوم مقاطعة الفيس بوك يوم 24 /10 وياريت تشوفوا موضوع المقاطعة على مدونتى ومعاية بأذن الله

احمد عبد السلام يقول...

السلام عليكم
استاذنا العزيز تحية طيبة

سعدت وتشرفت بزيارتك الكريمة

واحب ان اقول آآآآآآآآآآآآه من القلب
عن ذكرى حرب اكتوبر وايام ما كانت بلدنا مليئه بالشرفاء
بمن ضحوا بحياتهم لكى نحيا نحن بكرامة



تقبل تحياتى

micheal يقول...

يا عمو فشكول طويل طزويل بس أنا تملي مقتنع أن حرب أكتوبر دي بالذات الكلام مش حيخلص فيها ولازم ميخلصشي بس مش حرام بعد اكتر من 30 سنة مش قادرين ننتصر حتى على مشكلة الزبالة في شوارعنا
:(
تحياتي

Soul.o0o.Whisper يقول...

صباح الخير عليك يا عمو فشكول


و نقول آآآآآآآآآآآآآآآآخر تعلييييييييييييييييييييق


:))

Soul.o0o.Whisper يقول...

طبعا حضرتك عارف انى لازم أكون مميزة

و دورى لازم أحجزه


و لا حضرتك رأيك ايه؟؟؟

Soul.o0o.Whisper يقول...

عارف يا عمو فشكول


ناس كتير جدا سمهت منهم و قرأت ليهم عن دورهم فى الحرب

و أد ايه فعلا كانت حرب عظيمة

............

فعلا الانسان المصرى دا فيه كل المتناقضات

لكن لما بيصمم على حاجة بيعملها
و لما بيشغل دماغه
ماحدش يقدر يقف قدامها


لكن للاسف هو الوقتى مشغلها فى ....
ايه أحسن فيلم؟؟؟
ازاى اغلس على الناس؟؟؟
ماهو أسهل الطرق للاكتئاب؟؟؟
و كل الحاجات اللى جيبانا لورا


عارف هو لو يصمم فعلا انه يتغير للاحسن؟؟ والله هيعملها
بس هو مكسل

خلاص خد على النوم


.....................

ياللا كفاية بئا كلام ... عشان أنا مش عاوزة يجيلى اكتئاب ...


و يومك سعيد ان شاء الله :)

م/ الحسيني لزومي يقول...

موضوع جميل وارجوا زيارة مدونتى لانة تم نشر مواضيع جديدة

طهر فؤادك يقول...

السلام عليكم ورحمة الله وبركاتة

اذيك ياعم فشكول
بسلم بس وربنا يكرمك والمسلمين

نوادر يقول...

السلام عليكم ورحمة الله وبركاتة
اول زيارة عندك يافشكوووول وان شاء الله مش الاخيرة
انا قريت اللى انت كاتبة عن ايام زهونا وفخرنا وعزنا خلاص دى راحت وراح عليها الزمان لكن متخافش انا عندى احساس ان قريبا اوى هاترجع تانى الايام دى ازاى وعرفش لكن عندى الاحساس دة قوى جدا وايمان ان بلدى مش هاتقع ابدا مكنش زكرها فى كتابة الكريم(القرأن) وشكرا ليك جدا