الأربعاء، 1 يونيو، 2011

السلام عليكم
اهلا مدونتى حبيبتى

مش عارف ايه اللى حصل .. المدونه ضاعت منى وكلمة السر اتغيرت ومين اللى غيرها وازاى وانا مش عارف حاجه خالص .. بذلت مجهود جبار وشغلت مخى وعرفت اوصل للمدونه من غير كلمة السر .. تقولوا ازاى اقول بالفكاكه والفهلوه .. مش احنا مشهورين بالفهلوه مره تصح ومره تخيب والمره دى صحت مع انى ولا بفهم حاجه فى الكمبيوتر بس الحاجه ام الاختراع ولا الحوجه لكلمة السر ولا الحوجه حتى للايميل .. بس مش عارف اعرف اعملها تانى ولا لأ .. الايام بيننا

من اكتر من اسبوع وانا كان عندى كلام كتير عايز اقوله .. بس .. لما ضاعت المدونه طار كل الكلام .. يا دوب انا كنت راجع من الفيس بوك للمدونه وضاااااعت .. وانا بقى لى اسبوع معكنن وكل الكلام راح منى .. لكن ح اجيب اللى انا عايزه وافتكر اللى انا عايزه

عايز اقول ان العيشه بقت ترللى والموضوع بقى سمك لبن تمر هندى واللى بيفهم بيتكلم واللى ما بيفهمش بيتكلم .. كان زمان قبل المخلوع بيقولوا على اللى بيقول كلام معقول ( قله مندسه ) انا بقى اليومين دول مندس .. بيقولوا اليومين دول على كل اللى يقول كلمه تخالفهم (فلول النظام ) انا بقى فلووول .. الموضوع بقى ارهاب .. بقى يااما معايا يا أما على واللى على مش معايا واللى معايا مش على اللى افهمه لما نتفق على موضوع يبقى ننفذه مش ننقض اتفاقنا ونقول اصل كذا واصل كذا .. فيه ناس بيقولوا عايزين نجهز نفسنا ونأجل الانتخابات .. والله يا اخويا لو اجلت الانتخابات سنتين برضه ما حتعرف تجهز نفسك ..

يا اخوانا .. فوقوا .. انفدوا بجلدكم .. اللى حصل سنة 1952 ممكن يحصل دالوقت .. مصدق بتاع ايران واللى اسس للثوره الايرانيه راح فين .. صحيح ثورته قمعت لكن الغضب كان مكتوم فى الصدور والستاره خلاص ما بقتش مداريه حد وكل واحد كان بان على حقيقته .. الشعب الايرانى انتفض وعمل ثوره عظيمه .. وبعدين جه الخومينى على الجاهز وخدها لنفسه .. هتلر نفسه جه بعد ثوره المانيه رائعه .. وخد الثوره لنفسه وانتوا عارفين عمل ايه فى العالم وعمل ايه فى المانيا .. حتى الثوره الفرنسيه .. كانت للحريه وقعدت سبع سنوات تأكل فى قادتها وتأكل فى نفسها وروبسبير المحامى اللطيف والدمس والخجول كان مولعها نار ومشانق ومدابح

فوقوا .. فوقوا .. انفدوا بجلدكم .. واللى عايز يقول على مندس .. مافيش مانع
واللى عايز يقول على فلول .. مافيش مانع
طب اقول لكم .. قولوا رجعى .. او حتى قولوا ضد الثوره
أنا رئيس القله المندسه زمان وفلول النظام حاليا .. انا فشكووول


الثلاثاء، 17 مايو، 2011

اللى يطلع من داره يتقل مقداره


شوفوا بقى يا جماعه بصريح العباره انا ما لقيتش نفسى فى الفيس بوك .. انا قلت يا واد خليك اسبور واعمل زى الكل ما بيعمل وروح على الفيس بوك عشان تبقى ماشى مع آخر صيحات النشر وتبقى فيس بوكى لكن فى الحقيقه لقيت الفيس بوك ورشه وغلبه وضوضاء ومش تعرف تقول اللى انت عايزه ولا تعرف تبعت رسائل ذات محتوى علمى او اجتماعى .. لكن مجال الفيس بوك مجال تجميع لآراء واتفاقات يتفق عليها مجموعه من الناس وبعدين يبتدوا يعملوا اللى هما اتفقوا عليه .. مش معنى كدا انها مش مهمه .. لأ مهمه جدا زى ما عملت الثوره .. بس مش مجالى ولا التيب بتاعى .. احم احم ولقيتنى زى الاطرش فى الزفه مش عارف اعمل حاجه ولا عارف اتواصل مع حد وبصراحه لقيتنى جاهل جدا فى الفيس بوك وما انفعش اكون فيس بوكى خالص عشان كدا رجعت تانى لفشكول دوت كوم واكتب الرسائل اللى انا عايزها واللى اقدر اوصلها لكل الناس وكل اللى بيحبوا فشكول وفشكول بيحبهم .. اما فى الفيس بوك ما عرفتش اعمل حاجه خالص واكيد ناس كتير زعلت منى عشان يمكن بعتوا لى رسائل وانا ما عرفتش اتواصل معاهم .. جاهل بقى .. اعذرونى .. ومن النهارده اعود الى فشكووول دوت كوم بيتى الاصلى ودارى وعشان ما يتقلش مقدارى .. والى اللقاء قريبا ونبتدى نكتب ونقول ونصول ونجول . ومش معنى كدا انا حاسيب الفيس بوك خالص لكن مش حيكون مجهودى الرئيسى وسيعود المجهود الرئيسى الى فشكووول دوت كوم.

تحياتى واللى اللقاء

الأحد، 27 مارس، 2011

الملحمه .. والشعب .. والثمار

عبر التاريخ كان المصريون يشكلون ملاحم متتاليه ثم لا يجنون منها شيئ ويستأثر بالثمار من ليس لهم حق فيه

عبر التاريخ ومنذ قام المصريون القدماء بالتضامن مع مينا نارمر وانخرطوا معه فى الحروب لتوحيد البلاد جنوبا وشمالا فجنى المصريون العلقم وجنى مينا الملك

فى تحرير مصر من قبضة الهكسوس وانخرط المصريون مع اول من قام بالدعوه لتحرير البلاد من حكم الهكسوس (كاموس) وانخرط معه المصريون فى القتال واكملوا مع احمس حتى تم طرد الهكسوس جنى احمس الملك وجنى المصريون العلقم

قام المصريون ببناء الاهرامات ودفن فيها خوفوا وخفرع ومنكورع ومات المصريون البناؤون ودفنوا فى رمال الصحراء بلا طقوس جنائزيه أو اقنعه ذهبيه او خبايا .. او .. او

منذ ان قام المصريون بالحرب مع (محمود بن ممدود) (سيف الدين قطز) وانتصر على التتار ثم جنى بيبرس الثمار وأسس لدولة المماليك فى مصر حتى وقتنا الحالى ولم يجنى المصريون شيئ

مثله ما فعل المصريون مع صلاح الدين ولم يجنى المصريون شئ

مات كثير من المصريين فى حفر قناة السويس وتمتعت بثمار القناة انجلترا وفرنسا حتى حسنى مبارك ولم يجنى المصريون اى ثمار من قناة السويس واكتشفنا ان ايراد القناة بالكامل يذهب لمؤسسة الرئاسه ستة او سبعة او خمسة مليار دولار سنويا ... يا خرابى ... والمصريون يمصمصون اسنانهم على لا شئ

احمد عرابى ورفاقه هتفوا باعلى صوتهم امام خديوى مصر (والله لن نورث او نورث بعد اليوم) وحسنى مبارك يمهد الطريق لتوريث ابنه جمال مبارك السلطه فى مصر وتوقفت مصر عن كل شيئ الا عن الاعداد للتوريث .. ولكن الله سلم

قام العسكر بانقلاب 1952 ضد الملك (رحمه الله) ووقف الشعب المصرى مع الانقلاب وقالوا ثوره (نمشيها ثوره) واسس انقلاب 1952 لدوله دكتاتوريه بعد ازاحة محمد نجيب .. ومازال نظام حكم عبد الناصر يحكمنا حتى هذه الساعه الى ان قامت ثورى 25 يناير 2011 فهل سوف نجنى ثمارها

بقية الملحمه فى المقاله القادمة تفاصيل 25 يناير2011



الأحد، 13 فبراير، 2011



المشهد ليس فى القاهره والاسكندريه وعواصم المحافظات المصريه


المشهد فى عواصم الدول العربيه كلها... المشهد فى العالم كله ... كل العالم اهتم بالهم المصرى ... كل محطات العالم الاخباريه قاعده لينا وفاضيه بتذيع اخبارنا 24 ساعه وليس لهم هم الا نحن ... العالم كله قلق مننا وقلق علينا... على مدى اكثر من سبعة عشر يوما وعندما وصل الحدث الى ذروته يوم الجمعه 11/2/2011 حبست مصر انفاسها ... وحبس العالم انفاسه خوفامن مصر وخوفا على مصر ... حتى جائت اللحظة الفارقه والحاسمة لحظة الانتصار ... انفجر المصريون فرحا بعد ان حبست عنه الفرحه لمدة ثلاثون عاما انفجرت معه كل العواصم العربيه فرحا واحتفالا بنصر المصريين .

الملحمه .. مصر فعلت الملحمه

قريبا نكتب سلسلة مقالات عن الملحمه ... ملحمة شعب وملحمة وطن وملحمة دوله

كلما ظهرت صور الشهداء على الشاشه ... ابكى ... انتحب بحرقه ... لا استطيع حبس دموعى ... لا نامت اعين الجبناء فقد اردوهم وقتلوهم قبل ان يروا ثمرة افعالهم ... لا نامت اعين الجبناء ... رحمهم الله والهم امهاتهم وآبائهم واهلهم الصبر والسلوان... دمهم فى عنق الطاغيه ... لا نامت اعين الجبناء

السبت، 29 يناير، 2011

من فضلكم .. اللى عنده دم .. من فضلكم عايزين شوية دم


الاحداث متسارعه .. النظام بينهار .. الشباب والشعب رجاله .. بس التمن غالى
مش وقته عشان نحلل ونشرح الاحداث .. يمكن البوست الجاى
الواد الازهرى الجدع .. شغال على آخره ميدانيا فى قلب القاهره
رايح دوار على المستشفيات بيتبرع بدمه .. وبيطالب بالنيابه عننا ولو اننا كلنا مفروض نكون معاه نساعده .. لأ .. نساعد نفسنا .. نقف جنب نفسنا .. جنب اخواننا .. جنب آهالينا .. جيرانا .. ولادنا .. شعبنا
الحال فى مستشفيات القاهره صعب .. الحال مش ولا بد .. الجرحى كتير .. عايزين دم .. الدم ناقص فى المستشفيات .. من فضلكم .. كل واحد قادر على التبرع بالدم يروح الفرنساوى ولا ابو الريش أو اى مستشفى بالقاهره يتبرع بما يفيض به الله عليه من الدم .. زكاة عن صحته ويا لها من زكاة عند الله ورسوله
من فضلكم الموضوع جد .. من فضلكم مستشفيات القاهره محتاجه دم .. الجرحى كتير واللى محتاجين الدم كتير
الازهرى اتصل بى عشان نتقابل بكره واتبرع بالدم .. لكن اتفقنا على ان اللى عايز يتبرع بدمه .. ممكن يتبرع بيه فى مكانه .. فى بلده .. وكله ان شاء الله يوصل للمرضى .. تقريبا كل المحافظات فيها جرحى واللى يقدر ياخد حد معاه يبقى اكثر الله من خيره
بعدين نبقى نتكلم ونحلل ونقول وناخد العظه والدرس مما حدث وايه اللى كسبناه وايه اللى خسرناه ولو ان مهما كان حيكون مكسب


تحياتى لكم جميعا

الأربعاء، 26 يناير، 2011

تحديث


يا دوب ما لحقتش اكتب البوست واذا بخبر سريع يصلنى ان هناك فى مدنة شبين الكوم مظاهره حاشده امام كوبرى شبين امام محلات عمر افندى بدأت الساعه الثالثه

رجاله وطول عمر ولادك يا بلدنا رجاله

الله الله يا بلادى

الله الله


الله الله يا بلادى

الله الله

قالوا عليكى انت جثه بلا حراك

وانت امبارح قلتى كلمتك لا انا جثه ولا انا بلا حراك

الآلاف نزلت الشارع ومش خايفه

الالاف هتفت زعقت صيحت مش عايزينك

مش عايزينك

وانت يا راجل برضه قاعد على نفس البلد

مش ناوى تفارقنا
الله يخليك

يا راجل كفايه عليك

يا راجل خلى عندك شويه من الاحمر


رجاله وطول عمر ولادك يا توانسه رجاله

كنت غيران .. ليه مش احنا كمان


واتارى احنا رجاله وطول عمر ولادك يا بلدنا رجاله

الاثنين، 10 يناير، 2011

آه لو كنت عزيزه .. تخاريف فشكوليه







الواد الكبير يصحى من النوم ...

يا بابا ... عايز 100 مليون جنيه عشان الموضوع الفلانى

الواد الصغير يصحى من النوم .. يا بابا عايز 10 مليون جنيه عشان الموضوع العلانى


البنت الوسطانيه ... يا بابا الموضوع بتاعى فى النقابه لسه ما خلصش

لطفك يا ربى

واللى زاد واللى غطى بقى ... الحاجه تصحى من بدرى وبالقبقاب دب على دماغى ... طبعا من كتر ما انا متعود على كده ... ولا يهمنى .. يا ما دقت على الراس طبول ... لحد ما يطلع لى كالوا كبير اقوم احسس على دماغى ولما احس بالكالوا اقوم يا دوب آخد بالى ... فيه ايه يا وليه ...تروح تجيب الشيئ الفلانى على راسك من فوق ... حاضر يا ستى ... تروح تجيب الشيئ العلانى على كتفك ... من عينى يا ستى ... تروح تجيب الشيئ الترتانى على ضهرك... انت تأمرى ياستى

وفى الشغل كله يركب على ضهرى جميلى سواء الريس او المريوس ... ولا يهمنى حاجه ... برضه ياما فى الجراب يا حاوى

كمان الحكومه ... ضرائب الدخل ... ادفع ... يا سلام ّّ!!! حد يقول للواجب الوطنى لأ ... الملفات الفلانيه لازم تخلص النهارده ... دا شغل حد يزهق من الشغل ... لازم تخلص شغل المصلحه النهارده ... طبعا ... مصالح ناس وماله وافضل طول النهار عامل زى الحمار ... الكل راكب الحمار جميلى ... والحمار يشيل ولا يهمه... حمار بقى والحمار صبوروكل هم الدنيا متشال على دماغى ... ما يشيل الا الشاطر... وحضرتى ... قصدى الحمار فرحان قوى بنفسه والبيه رايح والبيه جاى ... وما حدش واخد باله ان البيه دا عباره عن حمار شايل الدنيا كلها فوق دماغه وطول ما هو ماشى عمال يردد ... انا راجل ... انا راجل ... انا راجل ... طب يا راجل ... شيل يا راجل ... اشتغل ياراجل ... ادفع يا راجل ... هأ ... هأ ... هأ ... طز فيك يا راجل .

وفى لحظه اخدت تعسيله من غير ما احس ولقيتنى والله اعلم طفله جميله واسمها
عزيزه والطفله تكبر وتكبر لحد ما بقت جميله... هيفاء القد ... ممشوقة القوام ... بيضاء البشرة ... نواعم ... شلولح على رأى عادل امام وكل ما تروح او تغدوا امام الرجاله تلاقى عنيهم حتبظ من مطرحها... ويعدين اكتشفت الحكايه دى ...

دا أنا ...عزيزه ... يا سلااااااااام وخدت بالى من نفسى ... اقوم بقى اديها دلع ودلال واتمخطر قدام الرجاله والاقى الرجاله هطله وبرياله ... اقوم ازود فى الدلال وازود فى المرقعه ... وشويه شوية ومع ندرة الشغل والعمل واقوم اسمع كلام ولاد الحلال ... هو فيه منك ... يا دلالى ... والله لو تطاوعينى كنت تاكلى الشهد ... دا أنا ...دا الفلوس حتترمى تحت رجليكى ... يا حلولى ...ولا كاترين زيتا جونز فى جمالها ... يا وله ... طب اقفى جنب انجلينا جولى كدا وانت تفشريها ... بذمييـيـيـيـتك ... طب خلى نيكول كيدمان تمشى معاك فى الشارع وشوفى مين فيكم اللى حيتعاكس ... ما تقولش .

لحد ما اخد شوية غرور فى نفسى ... تشتغلى رقاصه ... يا عيب الشوم ... يا راجل اتلم شويه ... عيب ... ما اقدرش ... انا بنت ناس ... طب ازاى ى ى ى ى ؟... طب فيـيـيـيـيـن؟ وتبتدى الحكايه ... رقاصه فشرت ولا تحيه كاريوكا ... ولا ساميه جمال ... هو فيه رقاصه فى مصر زيك ...دا أنا ...
عزيزه اللذيذه ام من غير جيبه وبلوزه ...وحياتكم ... ما فكرتش ... على طول ... هو فيه حد لاقى شغل

والحظ يضرب بقى معايا والاقى واحد اهطل وبرياله برضه عايز يخطبنى ... واشترطت عليه ان العصمه تكون فى ايدى انا ... وعشرين مليون جنيه مهر مقبوضه وحياتكم و3 شهور وطلقته ... واعيد الكره بعد 3 شهور عده... وغيره ... وغيره ... وغيره... والاقى العمليه احلوت معايا ... امال ايه ... هى السنه فيها جوازتين وكل سنه بـ 40 مليون جنيه لحد ما اعملهم واصرهم على قلبى كده .. امال ايه ... اصل المهابيل كتير ... واللى برياله اكتر ...
عزيزه اللذيذه بقى وبعدين عند الاربعين اعتزلت الجواز واعتزلت الرقص كمان ... وانا عايزه ايه بقى ... الفلوس اكوام اكوام ... والشهره جابت العالم من شرقه لغربه ... مش قلت لكم عزيزه اللذيذه اللى من غير جيبه وبلوزه ... وفى لحظـــــــــــه

هب ... دب ... آآآآآآه يا راسى ... قبقاب تانى على دماغى يا حاجه ...

فرحانين انكم رجاله ... طب خدوا على دماغكم بقى ... شيلوا يا غجر


السبت، 1 يناير، 2011






لأ ... لأ ... لأ ... لأ

لا هو مصرى .. ولا هو مسلم

لأ ... لأ ... لأ ... لأ

انا مسلم ومسلم جدا

انا مش موافق ... رافض ازهاق الارواح

مين اللى فاكر تهديدات القاعده من حوالى شهر او شهرين

لاهم منا .. ولاهم مسلمين اذا كان الفاعل مسلم

انا عندى شك انه يكون اصلا مسلم او مصرى

لازم مواجهه فكريه

لازم القانون يشتغل

ابعدوا المؤسسات الدعويه عن السياسه

لازم كل واحد ياخد حقه

كفايه ندفن راسنا فى الرمل

احنا مش نعام

تعالوا نشوف المشكله الحقيقه