الاثنين، 21 ديسمبر، 2009

آآآآآآآآآآآآآآآآآآهـ



انا مش مع حماس


انا مش بحب حماس ومختلف معاها جدا جدا


اسرائيل بنت الجدار العازل بينها وبين الفلسطينين من
الخرسانه المسلحه ... والاسمنت ياترى الاسمنت مصدره من اين؟


يا ترى يا هل ترى احنا كمان حنبنى جدار
عازل من الصلب بينا وبين غزه
يا ترى يا هل ترى الدم بقى ايه
بقى ميه نار ولا ميه معكره ولا مياه مجارى


انا مكسوف من نفسى ومكسوف من الناس


عينى مكسوره ... نفسى مكسوره ... قلبى حزين


الأربعاء، 9 ديسمبر، 2009

اضحك مع فشكول

الا ليت الشباب يعود يوما ... فاخبره بما فعل المشيب



تعالوا نضحك شويه على فشكووول




بس قبل ما نبتدى الحكايه عايز واحد شاطر يقول لفشكول احترم نفسك شويه .. وحتعرفوا ليه .. اصله راجل مبعزق وعايز حد يشكمه

الموضوع ان يوم العيد بعد ما الاضحيات اندبحت واللحمه اتوزعت كان يادوب الكوانين اللى شغاله على الغداء (طبعا الكلام دا كله فى البلد) وكان الاكل طاب وحنبتدى نتغدى لحم ورز معمر وكفته رز وحاجات العيد بقى ... كل سنه وانتم طيبين... قوم ايه !!!

فشكول بقى عمل غداء محترم وقعد على الطبليه ولاحد مالى عنيه واللحمه والكفته وعينك ما تشوف الا النور .. يوم بقى فى السنه ولا حد يهمه من ضغط الدم ولا القلب ولا اى حاجه واى مرض عايز ييجى ناحية الواحد يقوم الواحد يمسك الشومه ويجرى وراه ... روح يا مرض يا ابن الكلب ... انت ورانا ورانا حتى فى العيد ... والله يا ضغط الدم يا بن الفرطوسى ما انا معبرك خالص ولازمن وحتما وربما آكل لحم زى ما انا عايز ومن مرقد الكلوه كمان واللى مش عاجبه يخبط دماغه فى الحيط ... ها ... ها... ها... قوم ايـــــه !!!

العصر كدا ابتدا الواحد يحس بشوية وخم وكسل ... يا واد يا محمد يا عبد المنعم روح هات لنا لبشتين قصب من الغيط عشان الواحد يبلع الغداء ... قوم الواد محمد عبد المنعم ما كدبش خبر وجاب لبشتين قصب ...وهاتك آنا واخواتى كلهم يا مص قصب ... اصل بينى وبينكم الواحد كان عايز يلهى نفسه باى حاجه عشان الحاجه كانت فى اول ايام التشريق وكانت بترمى الجمرات فى اول يوم لوحدها هناك فى منى وآنى بقى مش طايق حد خالص بس باستعبط وعامل انى مبسوط ... قال ... قال ... يعنى .

ما فيش فايده ... لا قصب عامل فايده ... ولا خص عامل فايده ... ولا حتى جعضيد ولا جرجير ولا اى حاجه ... يقوم فشكول اللى كان حاسس بشوية عطس والمناخير ابتدت تتسد والمفاصل ابتدت توجع الواحد يقوم يعمل ايه !!! ... فاكر نفسه فى العشرينات وخد نفسه وراح طالع على ملعب كرة القدم ولم حبة العواجيز اللى من سنه وكانوا زملاء الملاعب وعامل تقسيمه وراح يلعب كوره ... والله لو اتفرجتم على فشكول زمان ولا ابو تريكه ولا متعب ولا حد من الجماعه دول خالص ... وبعدين عمكم احمد اطشه ... دا كان اسم الشهره فى الملاعب زمان وكان شغلته يكسر اجدع واحد قدامه ... قام واخد فشكول شلوت محترم وجابه لمس اكتاف على الارض ... نسيت اقول لكم بقى ان فشكول اصلا عنده مرض فى ضهره اسمه ... اوعوا حد يضحك ... صحيح انا عايزكم تضحكم بس على الحكايه دى لأ ... ما فيش ضحك ... وكل واحد يراعى شعور فشكول ... اسمه عرق النسا ... خدوا بالكم ( النسا ) مش (النساء ) طبعا فيه فرق ... النسا من الالم لما ينس ... مش دكهه ودا اسمه الصحيح ( النسا). قوم ايــــــه !!!

الموضوع كان شوية زكام ورشح من الانف وشوية ركب ومفاصل بتوجع ومن غير سخونيه ... يعنى ما فيش لا خنازير ولا حتى طيور .. والعمليه كانت مطمئنه يوم ولا اتنين والموضوع يضيع وكل واحد يروح لحاله ...جه عمكم احمد اطشه واخدنى كتف قانونى وشلوت ووقعت على الارض وبقى الموضوع اتنين فى واحد ... يعنى برد او انفلونزا وعليه عرق النسا مجانا ... وطبعا لما بييجينى البتاع ده بنام وما اقدرش اقوم الا لما اى حد يشيلنى ويقومنى يعنى لو نايم على ضهرى من غير ما حد يساعدنى افضل نايم وما اعرفش اقوم لحد المواضيع ما تاخد راحتها واسبوعين او تلاته والواحد يقدر يقوم تانى بعد الالتهاب فى عرق النسا ما يروح.

زمايلى بقى فى الشغل ما عجبهمش انى ارقد الاسبوعين دول ... جم جايبين العربيه وحاطينى معاهم فى مأموريه فى دمياط وجم لحد البيت وهيلا بيلا اركب خصب عنك والحمد لله كانت مأموريه خرجتنى من المرض والحمد لله.

باشكر كل اللى سأل على ودعائكم جميعا بالشفاء ويارب ما حد يشوف المرض تانى ولا حتى اولانى وباشكر ولادى حبايبى اللى اتصلوا بالتليفون.

بنتى حبيبتى ايناس النوسه كونوسه


بنتى حبيبتى ريمان (ملائكيه)


بنتى حبيبتى حنان الشافعى


بنتى حبيبتى ورد شان(Smile rouse)


بنتى حبيبتى هبه نهر الحب


ابنى حبيبى احمد (اسماء واحلام فى وجدانى)

وكل اللى سأل وكان قلقان على وما كنتش عارف انى غالى كدا عندكم ... طب ما الواحد له فايده آهــه ... الواحد كان فاهم انه مالوش اى فايده .. اشكركم جميعا احبائى وابنائى واخوانى وربنا ما يوريكم المرض ويشفى كل مريض

نفسى بقى حد يقول لفشكول ... يا راجل احترم نفسك شويه انت ما بقتش تصلح لاى حاجه الا انك تقعد وتحترم نفسك كدا وتحترم سنك ... كوره قال ... فاكر نفسك عندك 20 سنه .. ناس ما بتنكسفش ... ناس ما عندهاش دم.


الثلاثاء، 1 ديسمبر، 2009

اعتزار لظروف مرضيه

تحديث

السلام عليكم

انا محمود

الحمد لله بابا ابتدا يقوم من السرير ويلف فى الشقه ..بس الحمد لله بطل السجاير .. يظهر هى اللى كانت عامله له الازمه دى .. بس لسه مش يقدر يقعد على الكمبيوتر.. وهو يشكركم جميعا

اعزائى المدونين

تحــياتـــــى

اعتذر عن التأخير هذه الايام عنكم وعن عدم تقديم واجب العيد عليكم جميعا وذلك لوعكه

صحيه ارجوا ان تذهب قريبا ان شاء الله ولكم منى كل تقدير .

الثلاثاء، 17 نوفمبر، 2009

جاتكم خيبه راكبه خيبه على خيبه .. ومالهاش خيبه رابعه


ايه اللى بيحصل ده .. ايه اللى انا شايفه ده


البوست ده مكتوب يوم التلات قبل مباراة الحسم فى السودان بيوم


طبعا لو مصر كسبت الماتش واتمنى انها تكسب حتروح جنوب افريقيا وتجيب لنا كاس العالم


وكمان لو الجزائر كسبت الماتش برضه حتروح جنوب افريقيا وتجيب لنا كاس العالم


يعنى لو مصر جابت كاس العالم ورجعت بيه ولا الجزاير جابته ورجعت بيه حيكون كاس عالم عربى وخلاص


وحيغلبوا الوحوش بتوع البرازيل والارجنتين وايطاليا وانجلترا والمانيا وفرنسا وهلم جرا .. هما دول ييجوا جنبنا ايه .. دا احنا العرب بتوع داحس والغبراء .. بتوع عبس وذبيان .. بتوع حرب البسوس .. مش هو ده احنا برضه ولا ايه لو ما لقناش حاجه نقعد نحارب فى نفسنا


جاتكم ستين خيبه راكبه خيبه على خيبه يا عرب.


هما 3 خيبات .. طب اشمعنى 3 خيبات .. مش حاقول لكم المره دى مش عارف .. لا أنا عارف


الخيبه الاولى .. هى الخيبه .. والتانيه فيه خيبه مركوبه وفيه خيبه راكبه .. خلاص .. طب لو حطينا خيبه رابعه مش حنلاقى ومش حيكون لها محل من الاعراب .. لان الخيبات فى الدنيا 3 يبقى الرابعه ما لهاش لازمه زى التكلفه الحديه اما تيجى عند حد معين تنقلب لضدها .. آهو لو جبت خيبه رابعه ذى التكلفه الحديه حتنقلب لضدها .. اقصد خيبه بالويبه وخيبه وويبه حديه


شاطرين احنا قوى نتخانق ونتحارب مع بعض .. اصلنا فاضيين .. مش لاقيين حاجه نعملها .. اصلنا بلغنا الكمال فى كل حاجه وناقص الكوره .. لازم بقى نبلغ الكمال فيها هى كمان .. جاتكم ستين وسبعين وكسه .. نفسر برضه ليه ستين وسبعين وكسه .. مش عارف المره دى بقى


اصل احنا ما عندناش اى حاجه نفتخر بيها غير اننا نفتخر بفوزنا على بعض فى الكوره وياريتنا بنعرف نلعب كوره .. احنا بنعرف نحارب بعض فى الكوره .. ما هو لو كنا بنفهم فى حاجه ونجحنا فى حاجه ما كناش عملنا كده .. لكن الكوره بنسقط عليها كل فشلنا فى كل مناحى الحياه .. احنا شعوب بيدلعونا ويقولوا علينا عالم تالت وفى الحقيقه ان احنا عالم متخلف ومتأخر ..


شوية مانشيتات صحافه فى الجزائر .. يقوم ايه .. جماعتنا يعلقوا عليها ويعبأوا المصريين ضد الجزائريين .. وشوية جزائرين يكذبوا ويختلقوا حاجات ما حصلتش يقوم الشعب الجزائرى يعبأ ضد اليهود المصريين (كعنوان فى صحيفه جزائريه ) يقوم جماعتنا يحطوا المانشيت ده فى التليفزيونات ويولعوها نار..


المصريين فى الجزائر مسجونين فى مساكنهم وحياتهم مهدده .. الشعب الجزائرى يدعوا للجهاد ضد اليهود المصريين .. المشجعون المصريين مشحونين وحاسين بالظلم .. السودان الله يكون فى عونها.


اللى حصل فى فرنسا .. واللى حيحصل فى السودان مبسوطين بيه


يا جماعتنا .. يا مصريين .. خليكوا انتم العاقلين .. وافهموا واعرفوا ان 80 مباراه فى الدورى الجزائرى لعبت بدون جمهور


الموضوع ان بعد ان فازت الجزائر فى زامبيا فعلا كانت ذهبت الى جنوب افريقيا وكان فاضل لنا ماتشين بره ارضنا فى رواندا وفى زامبيا وكان لازم حنخسر حتى لو نقطه فيهم والجزائر كل ماتشاتها على ارضها .. يبقى بالحساب العملى الجزائر كانت فى جنوب افريقا .. قمنا احنا فزنا بكل ماتشاتنا ودى حاجه فعلا كانت مستحيله ورجعنا الموضوع للتعادل وبعد ما الجزائر احتفلت بالذهاب لجنوب افريقيا .. ضيعنا احنا الامل ده او حطيناهم زيهم زينا وما حدش احسن من حد. وجمهور الجزائر لم يتخيل هذه النتيجه ولم يضع لها اى سيناريو.


يا جماعتنا يا عرب .. انتم بتتغلبوا من طوب الارض وما بتعملوش كدا .. هو يعنى الجاريه ما تعملش شريفه الا على سيدها.


تروح مصر جنوب افريقيا .. تقولش حتطلع القمر.. تروج الجزائر جنوب افريقيا .. تقولش حتطلع القمر .. احنا خيبتنا بالويبه فى كل حاجه .. حتكونوا حصالة اهداف فى جنوب افريقيا والعالم كله حيضحك عليكم .


جاتكم خيبه راكبه خيبه على خيبه ومالهاش خيبه رابعه
جاتكم ستين وكسه


الاثنين، 2 نوفمبر، 2009

فشكول فى مولد سيدى المحظوظ

النهارده انتهى المولد وكل واحد لم الخيمه بتاعته وروح على بلده
بس عايزاسأل سؤال : هو اللى اخترع الكبايه اخترعها كامله ليه .. مش كان احسن يخترع نص كبايه وخلاص عشان يبقى كل النص مليان .. مش نص مليان ونص فاضى وواحد حبيبنا ما يقولش اصل الناس بتبص للنص الفاضى من الكبايه. والله خايف لو اخترع نص كبايه برضه يبقى نص النص فاضى ونص النص مليان
طب ليه يا جماعه الكبايه بقى لها آلاف السنين مش راضيه تكون مليانه .. اشمعنا كبايتنا احنا
كنت كتبت السنه اللى فاتت بوست فى نفس الميعاد عن سيدى المحظوظ .. والسنه دى فى نفس الميعاد ما لقيتش جديد .. انزله لكم زى ماهو بدون اى زياده او نقصان
سيدى المحظوظ الله يحظه .. شيخ كبير بيسكن فى بر مصر من شرقها لغربها من شمالها لجنوبها - كان عامل مولد اليومين دول - المولد كبير والمدعوين كتير -
سيدى المحظوظ الله يحظه كان داعى للمولد بتاعه اكثر من 2000 قول اكتر شويه - سيدى المحظوظ الله يحظه كريم .. معطاء .. جواد بيحب المدعوين بتوعه . سيدى المحظوظ الله يحظه كان حداه قصر - قصر كبير - قصر عظيم من ضمن قصور كلها كبيره وعظيمه - لأ وايه عنده قصور فى كل بر مصر اللى يبنى له قصر ويديه له هديه وعلى ارض مش ملكه - يعنى مش ملك اللى بانى ولا ملك سيدى المحظوظ الله يحظه - الارض ملك الناس الغلابه .. حتى اللى بانى ما دفعش حاجه من جيبه

- بر مصر كبير وناسه متنورين وكمان متريشين وفيهم ناس متبهدلين .. وكمان ناس جعانين .. كل ده بالاضافه للناس الفقرانين .. ما علينا خلينا فى سيدى المحظوظ الله يحظه .. قوم ايه .. سيدى المحظوظ الله يحظه راجل كريم ما يرضيهش ان المدعويين عنده ياكلوا ويشربوا ويسكنوا على حسابهم .. قوم.... ايه سيدى المحظوظ الله يحظه هو اللى داعيهم ولازم يأكلهم من عنده .. اصول الضيافه بقى .. سيدى المحظوظ الله يحظه عمل خيمه كبيره - خيمه عريضه وحط فيها كراسى - وعمل فيها بست عشان المداحين يمدحوا عليه عليه وكان عايز البست فى الوست - بس المدعوين قالوا لا يا سيدى المحظوظ .. خلى البست فى الوسط -
سيدى المحظوظ الله يحظه كان داعى مداحين كتير من كل الدوواوير (جمع دوار) سيدى المحظوظ الله يحظه سمح للمداحين يقولوا للسامعين
وقال المداحين
يا سامعين يا متنورين يا متريشين قولوا للخايبين الكحيانين احنا الاصلانيين - عندنا ملايين - واننتم ما عندكم ملاليم - هو انتم زينا مدعوين - دا احنا منورين وانتم مضلمين - تعرفوا تقولوا زينا .. دا احنا مداحين احنا بنقول كلام الحلوين - شغلتنا الكلام - وهمنا الكلام وبرضه هدفنا الكلام احنا المداحين وحنقعد مطرح السامعين وحنخلى السامعين يبقوا مداحين واللى مش عاجبه ياكل طين - اللى مش عاجبه !! ما عندنا ش عجين .. هو طييييين شكلكم طين وعيشتكم طين .. شفتم بقى .. حد يقدر علينا ؟ - دا احنا المداحين وحنمدح وحنقول وحنخلى الكلام محاور ودواوين وحنقول المحور الاول ومن المحور الاول نطلع منه محاور ونطلع من المحور ثلاث محاور تتمحول حول المحور وحنقول عن المحور الثانى والمحور الثالث ونفضل نمحور فى المحور وحنجيب سيرة الدائرى وحنجيب الأوتوستراد .. اصل الهدف من المولد هو هو المحور - هو الهدف وهو الغاية - اللى طلع من المداحين وقال هدف المولد ده - المحور - واللى قال الاكل واللى قال الوكل واللى قال السم الهارى اللى يهرى جتتكم يا غنم يا كتير ..
وواحد طلع وقال بكره حنعمل - بكره حنسوى - بكره يا سيدى المحظوظ يا محظوظ الله يحظك ان شاء الله .. بكره .. بكره .. كله بيقول بكره .. ما حدش بيقول النهارده .. اصل بكره دا على رأى جحا .. يا يموت الحمار .. يا يموت الملك .. يا أكون انا مت ..
آه يا خوفى من بكره يا بدران يا كسلان يا عدمان .. نفسى يا بدران نرجع زى زمان .. زمان زمان من زمان والله يا عين يا يا عينى ..قالوا زمان الزمان ما جاش تررلم .. مع الاعتذار لسمير الاسكندرانى .. نفسى يا بدران حد يقول النهارده - نفسى حد يقول دالوقت يا بدران .. ما فيييييييش كل اللىبيقول بيقول بكره يا بدران بلغت من الكبر عتيا وكله بيقول بكره هو ما فيش فى اللغة النهارده اشمعنا ما فيش فى اللغة النهارده اشمعنى فى اللغة بكره .. وبكره ده مش راضى ييجى يا بدران ..
يا سيدى المحظوظ يا محظوظ الله يحظك يا صاحب المولد .. نفسى فى بكره ييجى - من كتر ما حكوا لنا عن بكره بقيت احبه - بقيت اموت فيه اكله باسنانى وابلعه فى معدتى وبيسرى فى دمى وفى خياشيمى .. يا سيدى المحظوظ يا محظوظ قول لهم يسيبوا بكره ييجى .. هما اللى بيقولوا بكره ... طب احنا مستنيين تصدقوا فى كلامكوا عشان ييجى بكره .. هما المداحين عمرهم بيكدبوا .. المداحين صادقين فى كل حاجه .. يا سيدى المحظوظ يا محظوظ الله يحظك خليهم يسيبوا المحاور والمحور والدائرى والأوتوستراد خليهم بقى فى بكره وخلاص .. مش عايزين منهم غير بكره يمكن بكره ييجى بكره .. يا اخوانا من قديم الازل وانا مستنى بكره خايف اموت وبكره ما يجيش بكره .. اشمعنى الدنيا كلها عندها بكره وانا بكره بيتبغدد على مش راضى .. يا سيدى المحظوظ يا محظوظ الله يحظك يا تنفذ كلام المداحين وتخلى بكره ييجى بكره يا تسكت وتريحنا منك ..
يا شيخ يا سيدى المحظوظ يا محظوظ الله لا يحظك يا شيخ

يا شيخ الله لا يحظك يا شيخ

مافيش حاجه تانيه اقولها

الجمعة، 16 أكتوبر، 2009

فشاكيل ... آخر مسخره

تعالوا بقى نقول بوست خفيف علشان تحبوا فشكول بعد ما كنتم زهقتم منه من البوستات اللى تسد النفس اللى كان بيكتبها .. تعالى بقى نحكى شويه عن الواد فشكول ظمااااان ... ظمااااان وفى سالف العصر والاوان كان فشكول طفل صغير من عشره الى عشرين سنه كان بيعيش مع ابوه وامه .. والد فشكول الله يرحمه كان راجل فلاح على تاجر على سياسى .. وكان عضو بارز فى الاتحاد القومى اللى بعد كدا بقى الاشتراكى واللى بعد كدا بقى الحزن الوطنى والوضع ما اتغيرش كتير مع الحزن الوطنى عن الاتحادات دى كلها ما فيش اى فرق غير شوية ديكورات ... هو انت ما فيش فايده فيك يا فشكول .. يموت يعنى الظمار وصوابعه بتلعب


وانا عيل كان عندنا الدور التانى كله غرف صغيره وكان كمان فيها صفف (جمع صفه) بفتح الصاد وتسكين الفاء اللى بيتخزن فيها اللبن والقشده والزبده - كانت امى الله يرحمها بتربى فى الدور التانى البط والوز والرومى وكان فشكول اما يحب ياكل زفر يعنى يعمل ايه ؟ يقوم ياخد معاه وهو طالع فوق السطح طوبه او زلطه ويقوم ينشن على اجدع بطه او وزه او ديك رومى ... الحقى يا أمه (يا امى يعنى) فيه ايه يا واد يا مقصوف الرقبه .. دكر الوز بيفرفر يا ما .. ليه يا واد ... مش عارف يا مه وجرى على السكين .. وتبقى ليله - نتعشى بط أو وز أو رومى حسب الطوبه ما تصيب .. وياعينى بقى امى ما تعرفش ايه اللى حصل من فشكول.. الله يرحمك يا امى .. اما بقى صفة اللبن كانت امى بتعزها قوى وبتحطها فى عنيها عشان تطلع منها قشطه وزبده ولبن اشى حليب واشى رايب واشى لبن المسمار وحاجات كتيره قوى والله وكان خير كتير . يقوم بقى فشكول يعمل ايه ؟؟؟ يجيب بوصه رفيعه ويخرمها من جوه بسلك ويقوم يحطها بجانب طاجن اللبن وهاتك يا شرب ولا اجدع واحد يعرف ايه اللى حصل ولا حد شاف ولا حد درى




كان ابويا الله يرحمه بيجيب لنا من سوق الخضار فى روض الفرج ظماااان ظماااان وفى سالف العصر والاوان كان بيروح روض الفرج بالخضار بتاعنا من الغيط بالعربيه النقل الكبيره ويحط العربيه فى الوكاله وتانى يوم يروح يحاسب على الثمن وكان يجيب معاه من السوق ما لذ وطاب من الفواكه اشى قفص عنب .. اشى قفص مانجو .. اشى قفص بلح ... لكن كل دا ما كانش يملى عين فشكول يقوم يعمل ايه .. يجمع حبة الصيع اصحابه ويطلعوا بالليل على الزراعيه يسرقوا العنب من الجناين .. والبلح من على النخل .. طب يا فشكول البلح فى البيت اشى بلح زغلول واشى بلح ثمانى واشى بلح رطب .. لاااااااا .. البلح اما الواحد يطلع النخله بالليل والدنيا ضلمه والناس نايمه يبقى طعمه زى السكر.. عشان الواحد بيبذل فيه مجهود يعنى فى السرقه..


مره كنت باسرق نخله وانا ظماااان باطلع النخل زى ما اكون بطلع على درجات السلم حاجه فى منتهى السهوله .. - وكان لزوم سرقة النخل ان الواحد يعبئ سيالة الجلابيه بالتراب وبعدينم كنت باسرق نخلة عبد الهادى فرح .. الله يرحمه .. وكان مخبى نفسه فى الدره .. قوم اييييه ؟


الراجل سابنى اطلع النخله وبعدين لقيته طالع لى من الدره زى العمل الردى .. انزل يا واد يا ابن الــــ ...... وطالع ورايا النخله ... يا آبا عبد الهادى انزل وسيبنى فى حالى .. ما فيش فايده .. يا آبا عبد الهادى والله اجيب لك نصيبه وانط من فوق النخله ورجلى تنكسر ولا رقبتى واوديك فى ستين داهيه .. ما فيش فايده ... قوم اييييييه .... احط ايدى فى سيالة الجلابيه واكبش حفنة تراب وفى وش الراجل وهو على النخله.. والراجل يا عينى ... آه يا عينى ... اه يا عينى يا ابن الــــ .......... وحتة هدر على الارض من فوق النخله .. واخوكم بقى ينزل من على النخله فريره ... الله يرحمك يا عم عبد الهادى ويسامحنى .

ظمااااان برضه كان الناس بتلبس طاقيه واحنا صغيرين وكان لسه اللى بيقلع راسه قليل ومش بيقلع راسه غير الطلبه اللى هما زى حالاتنا كدا يعنى .. قوم اييييه ... ابويا محمود جعجور .. الله يرحمه .. كنا واحنا بنتمشى على الزراعيه .. يقوم يشتم فينا .. اصل العيال الطلبه دول قلألات الادب ومش متربيين .. دول عيال ............. ( مش ح اقول لكم كان بيقول ايه) بالليل بقى نروح الغيط بتاعه وهو قاعد فى العشه يشرب الشاى هو وصحابه اللى كان معاهم وهو بيشتمنا و50 كوز دره اخضر .. وكمان خلعنا له 10 شجرات بدنجان وعلقناهم على باب الدار بتاعته والدره الاخضر قعدنا نشويهم فى الجنينه عندنا ... كل دا ولا حد عارف مين اللى بيروح يسرق الغيطان... دره اخضر وبطيخ وطماطم وخيار وشمام حتى الفجل ما عتقناهوش ... كان من دا كتير.
آخر مره كنا على وش الجيش كنا بنسرق الحاجه ام محمد الله يرحمها ( انتم عارفين الحاجه فاطمه تعلبه بتاعة المسلسل اللى مش فاكر اسمه .. تقريبا كانت التمثيليه دى على واحده زيها بالضبط ) كانت بتزرع جنب بيتها بعض اشجار الفاكهه عنب .. شجرة رمان .. شجرة جوافه .. نقوم احنا عملنا ايه بقىىىى :
كانت بتنام بالليل بين الشجرات دى هى وابنها محمود الخفير النظامى .. يقوم الواد احمد ابن العمده .. الله يرحمك يا احمد.. يجيب معاه مسدس صناعه محليه بيسموه (فرد)ونطلع بالليل وانا بقى كان قلبى ميت .. قمنا عملنا على وشنا لثام .. بمنديل اسود عشان ما حدش يعرفنا ومسكت الفرد فى ايدى وبعدين دخلت على محمود وهو راقد بس كان صاحى وقمت حاطط رجل على يمين الراجل ورجل على شماله وصوبت الفرد الى صدره والراجل يا عينى مذعور على الاخر بس مش قادر يتكلم والعيال بقى يعبثوا فى اشكار الفاكهه اللى جنب الدار وبعدين من فجرنا بقى واحنا ماشيين بعد ما اخدنا ما لذ وطاب ... نقوم ندخل الدره ونطلق رصاصه فى الهواء واخدنا المسروقات ورحنا قعدنا فى الغيط عندنا وقعدنا ناكل بالهنا والشفا .. قصدى ... خلاص تبنا بقى وانبنا .
تانى يوم تسرى اشاعه فى البلد ان السفاحين الهاربين من السجون عايشين فى الدرا بتاع بلدنا ومن المغرب ما حدش يخرج من داره .. ما كانش حد حتى اليوم يعرف مين اللى كانوا فى الدره .. انتم اول ناس تعرف الحكايه دى...

يشاء الله ان تكون هذه المره آخر تجمع للشله البايظه ويذهب بعدها مباشره كل الى حال سبيله .. اللى راح الجيش وكنا قبل اكتوبر 73 وانا منهم واللى اتسلم وظيفته واصبح مسئول ويذهب كل فى طريق .. لطف من الله بنا .

وما زلنا حتى اليوم يتجمع ما بقى من الشله فى الاعياد ليلا باحد الحقول فى القمرايه ولكنه تجمع العاقلين التائبين الى الله كان لعب عيال .

من مغامرات فشكول وهو صغير كتيييييييير كتييييييير

وتحياتى



الثلاثاء، 6 أكتوبر، 2009

ايام زهونا وفخرنا وعزنا

احبائى المدونين والمدونات






الحلوين والشاطرين والحلوات






يا اللى منورين النت وخليتو له كلمه وله معنى



كنت وعدت العزيزه آهـ وكفى بانى حاكتب بوست خفيف وفكاهى المره دى ..لكن ما علهش .. مش متعود ارجع فى كلامى لكن المره دى حتنزل الارض بس اعملوا حسابكم المره الجايه لأ يا ام حنفى



اصل ما كانش ينفع ان النهارده يفوت من غير ما اكتب بوست عن المناسبه بتاعته .. واحب اقول لكم ان المناسبه دى لن تتكرر كثيرا فى التاريخ . طبعا هى مناسبة حرب اكتوبر العظيمه .. انا مش ح احكى لكم دمرنا كام دبابه ووقعنا كام طياره واستردينا ازاى القناه وكام عسكرى وكام ضابط .. والحاجات الرقميه .. انا ح اتكلم من وجهة نظر تانيه خالص..



وجهة النظر دى هى قيمة الانسان المصرى بين قوسين ( اللى انا زعلان منه خالص) شوفوا الانسان المصرى دا بيجمع المتناقضات كلها الوحشه كله والمر كله فى الانسان المصرى ... زى ما هو حاصل اليومين دول .. والحلو كله والعظمه كلها فى الانسان المصرى .. زى زمان ...





شوفوا عظمته ازاى



قبل اكتوبر بايام قليله الانسان المصرى عمل ايه عشان يضحك على اليهود ويخليهم نايمين فى العسل وفى الخط كمان وان المصريين دول خلاص نيام نيام يا ولدى وبيشخروا كمان .. شوفوا ضحك عليهم ازاى.



والله العظيم , وحياة النبى , ورحمة جدى الكبير , والرغيف السخن والبارد كمان هو اللى عمل زمان حرب اكتوبر اللى انتم بتسمعوا عنها تاريخ واحنا عاصرناها حياتا وحبا وعشقا ودما .. دا كان ظماااااان .. ايام الشباب .. ايام فحت البحر.



الانسان دا هو اللى عمل الخطه وكانت كذا خطه فى بعض .. اولا خطة اعداد الدوله للحرب .. وخطة اعداد الحكومه للحرب, وانتم عارفين ان فيه فرق بين الدوله والحكومه .. يعنى ما شاء الله كلكم مثقفين , وهو اللى عمل الخطه العسكريه وهو اللى واجه دبابات العدو واسلحته الثقيله والخفيفه ما يعرفه عنها ومالم يعرفه.



شوفوا خطة اعداد الدوله للحرب من غير العدو ما ياخد باله ولا يحس كانت ازاى وخطة الخداع الاستراتيجى



كان انور السادات فى كل خطاب من خطاباته يقول السنه دى هى عام الحسم .. ولا يحسمش .. وبعد يومين يقول لنا ح نحسم لكن ما علهش المره دى اصل الضباب.









كان اعلن انه ح يروح الجمعيه العامه للام المتحده فى اكتوبر عشان يقول خطاب هناك امام اعضاء الجمعيه العامه.



كمان خلى الخبراء الروس كلهم يمشوا ويسيبوا مصر ويروحوا على روسيا . وطبعا من وجهة نظر العدو ان المصريين ليسوا على كفاءة لادارة واستخدام المعدات العسكريه من غير الروس .. نيام .. نيام . وشد اللحاف يا جدع انت وهو بالاضافه لقبول جميع المبادرات الدوليه لحل ازمة الشرق الاوسط .. طبعا .. مش احنا بقى ضعاف وما نقدرش نحارب ولا نتعارك حتى لو مع قطه .. برضه دا من وجهة نظر العدو




شوفوا بقة اعداد الدوله والشعب عملوا له ازااااااى؟؟؟؟



كان لازم السلع التموينيه والغذائيه تبقىموجوده وتكفى البلد اكتر من 6 شهور - يعنى الرز والزيت والسكر والدقيق والذى منه



لازم كل اقسام البوليس او وزارة الداخليه تكون على اهبة الاستعداد لتأمين الجبهة الداخليه .. الجميل بقى ان خطة وزارة الداخليه جات على فاشوش .. قولوا ليى ليه يا فشكول .. اقول لكم هو انا يعنى ح اخاف منكم ولا من غيركم .. اصل الشعب عمل فى الححكومه فصل حلو خالص وطلع شعب متحضر وراقى .. ما فيش ولا قسم شرطه استقبل اى شكاوى او اى جنح او اى جنايات وكان الشعب على مستوى عالى من المسئوليه وكان ملتزم جدا وكان خير عون للحكومه والدوله فى حربها مع العدو.. ولا محضر شرطه ولا اى شكوى خلال ايام الحرب .. شفتم العظمه. والشعب خيب الظنون كلها فيه .. لانه كان منتظر حاجات وحشه ومشاكل من الشعب لكن والله الشعب كان فى منتهى العظمه.



اللى فات كان الاعداد الاستراتيجى للحرب .. من ناحية الدوله كلها حكومه وجيشا وشعبا طبعا فيه ناس حتقول يعنى ايه استراتيجيه .. اقول لكم من غير تقعير .. يعنى خطه طويلة المدى فيها كل حاجه اما التاكتيك فهو خطه على المدى الآنى ..




من الناحيه العسكريه بقـــــــــى





من يوم معركة راس العش اللى كانت بعد حرب يونيو 67 بحوالى شهر واللى عملتها شوية عساكر وظباط مصريين ضد جيش خارج منتصرا من الحرب وكله غطرسه وكامل العتاد والمعدات والمضرعات .. وشوفوا كمية النيرات التى هبطت على الاعداء من الاسلحه الخفيفه اللى كانت مع المصريين وما استطاعتش قوات الاعداء احتلال راس العش وعادوا مدحورين امام قوة مصريه صغيره من قوات المشاه والصاعقه





واللى عملته زوارق الطوربيد المصريه الصغنونه خالص وبصواريخها واللى قسمت المدمره الاسرائيليه ايلات نصفين واغرقتها فى مياه المتوسط وفقد العدو فى المعركه دى حوالى 40 قتيل غير الجرحى اللى قدروا بحوالى 100 جريح اسرائيلى .









كمان اللى عملته قوات الضفادع البشريه المصريه واغرقت سفينتين عسكريتين اسرائيليتين فى عقر دارهم فى ميناء ايلات اللى هما مات يم ومات شيفع وكمان دمرت الرصيف الحربى الاسرائيلى .. شوفوا عظمة العمليه دى وعظمة التخطيط ازاى القوات تتنقل بين 4 دول اللى هما مصر والاردن والسعوديه وتهاجم فى ميناء اسرائيلى (ايلات) ودى عظمة تخطيط الجيش المصرى مع المخابرات الحربيه المصريه.


تعالوا نشوف حرب الاستنزاف والتى لا تقل عظمه عن حرب اكتوبر .. ممكن كمان تسألوا عن قوات الصاعقه المصرين بتعمل ايه بالهليوكبرات فى داخل عمق الجيش الاسرائيلى فى سيناء. وياسلام لو عرفتم حكايات المجموعه 39 من قوات الصاعقه بقيادة البطل الشهييد ابراهيم الرفاعى وهذه المجموعه تنقلت فى سيناء طولا وعرضا وعمقا فى عمليات فدائيه بطوليه لم يفرج عنها حتى الآن وكانت كل مره يا تجيب اسرى يا تجيب جرحى اسرائيليين يا تجيب معدات قتال اسرائيليه واسلحه .. يعنى ما كانتش بترجع وايديها فاضيه .. كان لازم تجيب لنا هديه معاها.


هذه العمليات اكسبت الجندى المصرى ثقته فى نفسه وكشفت معدنه الحقيقى وبأسه الشديد فى الشدائد واعطته ثقه فى بلده وكانت مقدمه قويه لحرب اكتوبر المجيده.



شوفوا ترعة الخطاطبه والعمليات التى كانت شبه يوميه للعبور حتى ان الجنود حفظوا العبور وادونه كأن يكون اداءا ميكانيكيا من كثرى ما تدربوا عليه.


زهقناكم عشان البوست طويل .. نلتقى بعد الفاصل











تعالوا نشوف خطة الخداع الاستراتيجى عسكريا.. الله يرحمه السادات كان رجلا ولا كل الرجال شهما ولا كل الـ شهماء .. قويا .. جسورا .. سياسيا من الدرجة الأولى .. هذه شهادة حق تقال فى الرجل رحمه الله .. وذلك حتى نهاية الحرب أما ما بعدها فكان سفلنجع ولا كل الـ ....



عشان نضحك عليهم وفعلا ضحكنا عليها شوفوا عملنا ايه؟؟؟؟



طبعا بما ان ما فيش حرب - ايه لزوم القوات الكبيره والكتيره دى والمصاريف اللى الجيش بيصرفها كل يوم لزوم اللبس والتعيين وخلافه .. ما بلاها نوفرها وخلاص ... قمنا بتسريح 20 الف جندى .. وايه كمان .. فتحنا باب العمره للى عايز يروح يعتمر واللى عايز يروح يحج ودا كان للضباط وضباط الصف . .. وايه كمان تم اعطاء الاوامر بعمل احتفالات يوميه على طول الجبهه والعساكر والظباط يقعدوا يغنوا ويلعبوا وينكتوا .. ودا كله الاسرائيليين من الضفه الاخرى شايفينه.



طبعا برضه كان لازم نوريهم العين الحمرا .. نقوم نعمل ايييه؟؟ نعمل حالات طوارئ بالقوات المسلحه



نقوم نرفع درجة الاستعداد للحاله القصوى .. وبرضه العساكر والظباط عاملين حفلات سمر وبيغنوا .. بالذمه دول ناس حيحاربوا .. وبعدين ننزل حالة الاستعداد للوضع الطبيعى .. يقوم الاسرائيليين يعملوا زينا يرفعوا ولما احنا ننزل ينزلوا وعملنا الحكايه دى مره واتنين وتلاته واربعه احنا نرفع .. هما يرفعوا احنا ننزل .. هما ينزلوا .. وبقت لعبه حلوه بينا وبين الاسرائيليين نبعت المعدات والسلاح لحد شاطئ القناه وبعدين لما ننزل نسحبها ونسيب كدا شويه فى الخباسه متغطيين فى الرمل . (يعنى حاجه زى كدا)



الاسرائيليين زهقوا ارفع يا جدع .. يرفعوا .. اخفض يا جدع يخفضوا .. ايه الموال بتاع المصريين ده .. هى حكايه .. هما الجماعه المصريين دول اصلهم ما وراهمش حاجه.. سيبكوا منهم بقى دول ناس فاضيين بلا هم ومصاريف وبلاوى لحد ما مره رفعنا درجة الاستعداد للحاله حــ وهما كالعاده كانوا واخدين الموضوع هزار.



وكــــا نـــــــــت



- الساعه 1000 من يوم 6 اكتوبر قام القاده بفتح المظاريف السريه التى وزعت عليهم.



- من الساعه 1000 وحتى الساعه 1400 (اى الثانيه بعد الظهر) تتابعت وتسلسلت الاوامر وعبرت 220 طائره مقاتله وقاذفه مقاتله وقاذفه قناة السويس فى اسراب وجماعات وفرادى وفعلت افاعيلها فى العدو .. وعادت الطائرات بخسائر طفيفه منها طائرة الشهيد عاطف السادات .



- من الساعه 1400 حتى الساعه 1800 عبر حوالى 40000 جندى قناة السويس وتم الاستيلاء على معظم النقط القويه فى خط بارليف وماادراكم ما خط بارليف.



- فى الساعه 2000 تم تركيب جميع الكبارى الجاهزه على قناة السويس وعبرت معظم المدرعات الثقيله والخفيفه الى الضفه الشرقيه بعد تجريف الساتر الترابى بواسطة مدافع المياه وما ادراكم ما مدافع المياه وفكرتها .



تمر البيانات العسكريه من نصر الى نصر ومن فوز الى فوز.. هذه للشعب والخارج وتمر الاوامر العسكريه خلال اجهزة الاتصالات العسكريه من نصر الى نصر.



كل فى موقعه يؤدى واجبه المقدس منفردا وجماعات ثم تتجمع هذه الواجبات فى منظومة وسيمفونيه رائعه وتصب فى فوهة بندقيه او مدفع او طائره فى جبهة القتال.




لا تصدقوا كل ما يقال فليس كل ما يقال صحيحا



فحرب اكتوبر عرفت العالم بالعقل المصرى والفكر المصرى واسرائيل لا تخاف من الجيوش ولا الاسلحه الحديثه والفتاكه لان عندها ما هو اعظم ولكنها تخاف من ارادة الانسان المصرى الذى لو اراد.



فبكل المقاييس العالميه والعسكريه لم يكن من الممكن عبور خط بارليف او تدمير الساتر الترابى ولا حتى بالقنبله الذريه .. ولكن فعلها المصريين بمدفع مياه ودمر اعظم وامنع خط دفاعى فى التاريخ (خط بارليف) ولكنه الانسان المصرى اذا اراد.




كان ليس بمقدور اى قوة عسكريه ايقاف سلاح المدرعات الاسرائيلى . . ولكنه الانسان المصرى اذا اراد وبآربجى محمول على الكتف.


الانسان المصرى اذا اراد .. هذا ما تعمل له اسرائيل الف حساب وحساب وحساب .. ولكن ؟؟؟؟؟









البوست طويل ... بس هى حكمت بكدا ... اعتذر









الخميس، 24 سبتمبر، 2009

العجز الكبير... اعرج مكسح ...مشلول ياولدى



كله عامل بهلول




نعجز عن مواجهة انفلونزا الطيور ونغرق فى شبر ميه عشان امكانيات الدوله مش قد كده




نعجز عن مواجهة انفلونزا الخنازير ونغرق فى شبر ميه عشان امكانيات الدوله مش قد كده




عاجزين عن اننا نعمل مدارس كويسه عشان امكانيات الدوله مش قد كده بيقولوا يحطوا صابونه فى كل فصل ... طب ليه والمدرسه اصلا ما فيهاش ميه ولا فيها مياه خالص واسألوا قناة الـ O N TV وعايزين يقفلوا المدارس خالص السنه دى عشان برضه امكانيات الدوله مش تستحمل تصرف على حد لو الوباء انتشر ... يا نهار اسود على امكانيات الدوله واللى خلفوا امكانيات الدوله اللى مش عارفين حيبقى لها امكانيات امتى وفى اى حاجه حنلاقى لها امكانيات؟



حجم الخط

كل واحد بيشوف نفسه مانيكان



عاجزين اننا نعمل علاج وصحه كويس والمستشفيات تسد النفس برضه عشان امكانيات الدوله مش قد كده




عاجزين اننا نعمل انضباط وامن فى الشوارع بالرغم من ان امكانيات الدوله فى الحكايه دى قد كدا لكن امكانيات البشر مش قد كدا




مش عارفين نعمل مواصلات كويسه عشان امكانيات الدوله مش قد كدا




الطرق بتاعتنا احسن طرق فى العالم تعمل حوادث والتسفيل للاسفلت زى الزفت ما هو برضه من الزفت عشان امكانيات الدوله مش قد كدا



الانشاءات بتاعتنا يا دوب سنه او اتنين وبعدين تقع تانى عشان امكانيات الدوله مش قد كدا



عاجزين ان يكون عندنا تعليم عالى وان يكون عندنا جامعه من احسن 500 جامعه فى العالم ... برضه عشان امكانيات الدوله مش قد كدا


عاجزين اننا نطهر البلد من اكوام الزباله.... عشان امكانيات الدوله مش قد كدا



الحاجه الوحيده اللى احنا فالحين فيها اننا ناخد ضرائب من الناس لدرجة ان الضرائب وصلت الى 180 او الى ذلك مليار جنيه .... بتروح فين يا اللى امكانيات الدوله مش قد كدا



بصراحه فشلنا فشل زريع فى كل حاجه ودايما نقول امكانيات الدوله مش قد كدا ... هو احنا حنفضل نقول لحد امتى ان امكانيات الدوله مش قد كدا ... طب يا مسئولين يا اللى بتطلعوا فى التليفزيون وتقولوا ان امكانيات الدوله مش قد كدا بقى لكم 50 سنه تقولوها ... عملتم بقى ايه عشان تبقى امكانيات الدوله قد كدا .... والا هى مش قد كدا فى حاجات .... وقد كدا فى حاجات تانيه.



امال بقى لكم 57 سنه بتعملوا ايه ... بتغرفوها وتجرفوها


يا هؤلاء .... من انتم ..... عجز فى كل شيئ ... فشل فى كل شيئ ... اين الشرعيه ؟؟؟



دائما يوم الخميس او خميس بعد خميس .. انتظرونا




الجمعة، 18 سبتمبر، 2009


يا خساره يا ولاد

رمضان خلص وان شاء الله ييجى فى الميعاد
صوما مقبولا وافطارا شهيا ان شاء الله
تقبل الله منا ومنكم صيامنا وقيامنا




عيد الفطر هل علينا ...... وجا ى يعيد علينا ..... وبالفرحه بيهننا ..... ويشوفنا
واحنا فى احلى حال









عيد فطر سعيد عليكم وعلينا وعلى كل المسلمين وعلى كل ابناء مصر

كل عام وانتم بخير .... انا داخل جوه عشان انقش الكعك والبسكويت والغريبه





الخميس، 3 سبتمبر، 2009

الله يخليكم ... وهو حر لو عايز ياخدكم


الجماعه اللى مقررين علينا زى كتاب الاناشيد ولا حتى كتاب الموتى بتاع المصريين القدامى .. ادعى عليكم فى السيده زينب .... ولا اروح الحسين برضه عشان ادعى عليكم


الجماعه اللى ماسكين الحزب الوطنى او اللى الحزب الوطنى ماسكهم

الجماعه اللى بيحكمونا او حيحكمونا خصب عننا او برضانا وسواء انتخبناهم او ما انتخبناهمش

يا جماعه متهيأ لى انكم بتعرفوا تقروا

يا جماعة الخير احنا فى رمضان الله يخليكم اقرأوا عناوين صحفكم القوميه اللى بتقول ......

الشحاتين بقوا اكتر من اللازم اليومين دول طبعا امال ايه هو فيه حد لاقى شغل؟ ... طب الناس تعمل ايه؟ ... برضه آهى وظيفة ... تقوم تشتغل شحاته .

يا جماعة يا حلوين يا مقطقطين يااللى فى العلالى راكبين واحنا زى البردعه بتاعة الحمار وانتم رجليكم مدلدلين .

فيه حد فيكم قرأ الافيش اللى بيقول ان فيه قهوه بلدى ما بتشغلش الا حملة المؤهلات العليا ... طبعا ما احنا نصرف دم قلبنا نعلم عيالنا والدولة تصرف دم قلبها ميزانيات لوزارة التعليم العالى والجامعات عشان العيال الخريجين يعرفوا يقدموا الشيشه للزباين كويس للزباين الكويسين .

يا جماعه قولوا لوزير الصحه مش هو تبعكم برضه ولا تبع حزب ايه ... قولوا له فين الكمامات الواقيه من انفلونزا الخنازير ولوهى موجوده سعرها كام (فى السعوديه بريال)

يا جماعه احنا داخلين على الشتاء وانفلونزا الخنازير اللى اسمها H1 N1 شوفوا انا مثقف ازاى واعرف اسمها العلمى ازاى ... فشكول بشكول بياكل طعميه ودايما بياكل فول

يا ناس انتم المسئولين عن نفسكم ... كل واحد فيكم يعمل احتياطياته من انفلونزا الخنازير بمعرفته وبامكانياته ... يا اخوانا الطوفان قادم ... خدوا بالكم كل يوم عشرات الحالات بيعلنوا عنها واللى ما بيتعلنش عنها الله اعلم

الحكومه لابسه كمامات على عنيها وحاطه قطن فى ودنها وانتم المسئولين عن نفسكم .... اللهم بلغت ... اللهم فاشهد ... بس خلاص

الخميس، 27 أغسطس، 2009

عدنــــــــــــــــــا بعــد الـــــفاصــــل


فاصل طويل اخذته منذ انقطاع النت مساء يوم 8/8/2009 الى اول امس وفى الحقيقه كنت مبسوط بس كنت عامل فيها شهيد وان يا جماعه الحقونى النت مقطوع من عندى يا خلق هوووووى النت مقطوووووع وفى الحقيقه كنت مبسوط عشان كانت راحة اجباريه من النت والبلوجرز كلهم


قوم اييييه : !!!!!!


اول امبارح يعنى كان يوم الاثنين جه النت وفاجأنى وانا كنت قاعد مأنتخ ومبسوط وصايم وانا فى الصيام بقى وخصوصا الساعتين الآخيرتين قبل المغرب ما حدش فيكم يشوف ومش عشان السجاير زى ما كل الناس بتقول ... لا ....لأ ... لا . هى بتبقى حاله مزاجيه مش عارف لها سبب بدليل انى بعد الفطار بحوالى اكتر من ساعه على با ل ما اشرب سيجاره لكن اللى بيهبلنى بقى المشروبات وخصوصا العرق سوس مع انه بيزود الضغط عندى لكن بحبه يا هوووووه


انا بقى عمال الخبط معاكم واجيب كلمه من هنا وكلمه من هنا عشان انا ما عنديش حاجه اقولها وما عنديش اى موضوع اقوله .... ايييييييه ده يعنى انا فلست ولا ايييييه !!!!


شوفوا بقى كل سنه وانتم طيبين وكلكم بخير وصوما مقبولا وافطارا شهيا .... بس كلمتين كدا مسح زور وما اطولش عليكم بقى وقوموا علشان تفطروا بالهنا والشفا .... انا النهارده عندى منبار وكبده وقلب وحاجات حلوه خالص .... اتفضلوا معايا الفطار


صوما مقبولا وافطارا شهيا

الاثنين، 17 أغسطس، 2009

تحديث
عدنـــــــــــــــــــــــــــــــا
عاد النت من جديد ويستأنف فشكول ان شاء الله فشكولياته بعد هذا الفاصل الطويل ويستأنف زياراته لكم لسداد بعض من الجميل والديون المتلتله اللى بقت عليه بعد انقضاع النت لاكثر من 15 يوم
كل عام وانت جميعا بخير بمناسبة شهر رمضان
=======================================================================================
من احد مقاهى النت فشكول يحييكم ويبارك لكم بقدوم شهر رمضان الكريم اعاده الله عليكم باليمن وبالبركات


كنت اتمنى ان اذهب الى كل واحد منكم فى مدونته لابارك له بحلول شهر رمضان ولكن ما باليد حيله


الموضوع ان الوصله اللى عندى وكثير من الوصلات احترقت خطوطها فى شركة النت وشركة الاتصالات وتم ارجاع الخطوط لكن لم يتم


ضخ الDSL وحتى يتم الضخ انا قاعد اقشر بصل واقمر عيش


كل الشكر للبت حبيبتى اللى وقفت جنبى ايناس الاحزان اللى طمنتكم على وطمنتنى عليكم واشكرك جدا يا نوسه النوسه كونوسه


مره ثانيه كل عام وانت جميعا بخير وسعاده


السبت، 15 أغسطس، 2009

وحشتونى قووووى


السلام عليكم ورحمة الله وبركاته
كل سنه وانتم بألف خير بمناسبة قدوم شهر رمضان المبارك
أعاده الله علينا وعلى الأمه الأسلاميه بالخير واليمن والبركات
طبعآ أنا مش عمكم فشكول؟؟؟؟؟؟
أنا نوسه النوسه كونوسه عاشقة الأحزان
بس جايا أطمنكم على عم صلاح هو كويس وبيسلم عليكو كلكم
وبيعتذر ليكو على غيابه لأنه مش عنده نت من أسبوع فات
وإن شاء لما النت يرجع تانى هيقدر يتواصل معاكم
وياريت كلنا نلتمس له العذر
وهو بألف خير وبيقولكو أنتم وحشتوه قووووى قووووى قووووى
مع تحياتى
نوسه النوسه كونوسه

الثلاثاء، 4 أغسطس، 2009


كنت اظن اننى لا احب مصر .. كنت اظن اننى كرهتها من كثرة ظلمها لاولادها


كنت اظن اننى لا احب المصريين ..


كنت اظن اننى لا احب العرب


رأيت العلامه احمد زويل فى دريم فى محاضرته التى القاها فى


مصر وقال كل شيئ وهو يقول بين السطور اننا لسنا اى شيئ


وعندما وصل الى الشعر وهو يقول لحافظ ابراهيم


انا تاج العلاء فى مفرق الشرق ... ودراتــه فرائــــــــــط عقدى


اغرورقت عيناى بالدموع .. ثم لم البث ان اجهشت فى البكاء كالطفل .. ليست مبالغه .. لقد حدث


فعلا



لكى الله يا مصر ...لكم الله يا مصريين ... لكم الله ياعرب


الاثنين، 27 يوليو، 2009

فشكوليات

لله يا محسنين .. حسنه قليله تمنع بلاوى كتيره


فى الطبعه الاولى يوم الاحد 26/7/2009 احمد المسلمانى بيقول ان الدكتور عاطف عبيد فاكرينه؟ للى كان رئيس وزراء مصر السابق المهم انهم مسكوه بنك وبياخد مرتب شهرى 000 500 الف جنيه قولوا كدا حسبة نصف مليون جنيه .... خدوا بالكم الكلام دا شهريا مش كل عشر سنين.


وبيقول كمان ان الدكتور محمد على سليمان هو كمان اللى كان وزير الاسكان السابق برضه - والله كانت وزاره كلها هبر فى هبر- واللى بعد ما خلص على ارض مصر بالبيع لاصحابه وحبايبه وباع لهم المتر بجنيه هو كمان مسكوه شركة بترول وبياخد كل شهر 12500000 يعنى مليون وربع المليون جنيه .... فى الشهر يا جدعان فتحوا مخكوا معايا شويه وصحصحوا ... وبطلوا الهباب اللى بتشربوه ده.


الاتنين بقى كانوا دكاتره فى الجامعه وخلصوا على فلوس اولياء امور الطلاب اللى كانوا بيدرسوا لهم فى الجامعه وهروهم من كتر الكتب اللى بيبيعوها لهم ولا كان لها لازمه ولا حتى كان فيها علم ... ما هو ما حدش اخترع عندنا علم جديد ... العلم موجود فى كل الكتب المتخصصه ... نقول وخلاص زى بعضه ... بعد كدا ربنا فتح عليهم وبقوا وزراء ... وما ادراك ما الوزراء ... عارفين انا رئيس جمهورية فشكولستان اللى فوق دى بس مش لاقى حد بيعبرنى ويدينى حتى ربع جنيه مرتب ... رئيس جمهوريه اونطه انا ... جاتنا نيله فى حظنا الهباب... المهم .. هى ناقصه كمان بعد اللى هبروه زمان فى الكليات وفى الوزاره يدوهم كمان فلوس ... آه يا غلبك يا فشكول ... مش عارف ايه الحظ المهبب ده ... والواد مايكل عمال ياعينى يعمل انتر فيوهات وما حدش راضى يشغله عنده خالص ... ح تفرج يا مايكل.


شوفوا بقى لو وزعوا الاثنين مليون الا ربع دول وادوا كل واحد مرتب الف جنيه بحالهم بالتمام والكمال كانوا حلوا مشكلة كام خريج 1750 خريج كانوا اشتغلوا وبايه .. مرتب الف جنيه مش 200 جنيه زى الناس الغلبانه... مش مهم الحزب الوطنى حيشوف لها حل ؟؟؟؟؟


عمرو زكى فى الدورى المصرى


بصراحه يا جماعه باكون مكسوف اخر كسوف وغيران آخر غيره لما بشوف الواد دروجبا ولا الواد ايتوا ولا الواد اديبايور ولا غيرهم وغيرهم واللى اقل من عمرو زكى ولا ميدوا ولا حتى محمد شوقى والانديه الاوربيه بتجرى وراهم وبتدفع فيهم ملايين اليوريهات (من اليوروا يعنى)


يا عمرو يا زكى ... احسن عقاب لك انك تلعب فى الحوارى ... قصدى فى الدورى المصرى .


لله يا محسنين


الاعلانات فى التليفزيون المصرى والفضائيات بالتبرع لمستشفى 57357 بصراحه العيال الله يشفيهم محتاجين تبرعات مادامت حكومتنا اللى بتدى عاطف عبيد ومحمد على سليمان 1750000 جنيه شهريا الله يطول عمرها ويخليها لنا ويقصف عمرنا احنا عشان خاطر هى ما تزعلش ... حكومتنا خلعت من دورها فى الرعايه الصحيه ... واللى يقدر يتبرع ... اجره على الله .


بس اما بشوف الاعلانات دى بحس بايه :

ان واحده غلبانه وعدمانه وشحاته وشايله ابنها على كتفها قدام السيده ومعريه مكان العاهه بتاعته وبتقول لله يا محسنين ... لله يا محسنين



الأربعاء، 15 يوليو، 2009

توبة موسى عليه السلام

تـحــــديــــــــــــــث
====
نبهنى صاحب مدونة عابد - يقظان - وكذلك المشاكس الكحيان افندى الذى عاد الى التدوين فقط عشان يشاغب فى فشكول وكذلك غير معروف والعزيز صاحب مدونة عالم حبيب الى بعض الاخطاء التى لا يجب ان يقع فيها مسلك فى هذا البوست فعدت الى البوست وقرأته بعنايه وقمت بحذف بعض الجمل التى قد تسيئ لسيدنا موسى عليه السلام بالرغم من عدم تعمدى لذلك وانه فات على هذا الامر لاننا عندما نتحدث عن الرسل يجب علينا التأدب وقد كتبت كلاما غير متأدب ولكن عذرى انه من بعض المصادر والعناد فى هذه الاحوال ليس من الفطنه فى شيئ وارجاع الحق لاصحابه كتبت هذا التحديث ولكنى تركت بعض النقط الخلافيه ونفذت ما اتفقت معهم فيه واعترافا بحقهم فى التصحيح وجب هذا التنويه ولهم الثواب من الله سبحانه وتعالى وارجو ان يثيبنى الله مثلهم
=============================
شوفوا ياجماعه المثل بيقول قليل البخت يلاقى العضم فى الكرشه وفشكول بقى لقى الكرشه كلها عضم مع ان فشكول بيحب الكرشه والمنبار والحاجات بتاعة اللحمه اكتر من اللحمه بس دا ما يمنعش انى باموووووووت فى اللحمه.
البوست اللى فات انا قلت بدل ما احذفه انزل عليه بوست حيخليه فى عالم النسيان لكن الجهاز الله يسامحه باظ ويمكن ما رديتش الزياره لكل اللى زارونى وعلقوا على البوست الفضيحه اللى فات لكن النهارده وبعد عودة الجهاز من الصيانه اقدر بقى احط بوست جديد يخبى البوست اللى فات وسوف يكون من النقيض للنقيض .. حنتكلم فى توبة سيدنا موسى عليه السلام وسوف احزف العنعنات والاحاديث التى وردت فى هذا الموضوع لانها مشهوره واللى عايز يعرف اصل الموضوع يروح الى الشبكه الاسلاميه فى كتاب التوابين للمقدسى عشان يشوف الاصل بتاع الموضوع. وسوف نتباسط فى الحديث عن الموضوع ولكن بتأدب لمنزلة سيدنا موسى لدينا ومنزلته عند الله سبحانه وتعالى.



سيدنا موسى عليه السلام كان راجل سكر وكان دمه خفيف بالاضافه الى ورعه وتقواه ونبوته ورسالته التى شرفه بها الله سبحانه وتعالى وشرف البشريه بها .. قوم ايه ... سيدنا موسى عليه السلام لما سمع كلام ربه فى طور سيناء طمع فى انه يرى الله سبحانه وتعالى ... قوم ايه .... قال ربى ارنى انظر اليك قال لن ترانى ولكن انظر الى الجبل فان استقر مكانه فسوف ترانى (الاعراف 143) بمعنى ان الله قال له يا ابن عمران انه لا يرانى احد فيحيا .. فقال موسى ... رب لا شريك لك انى اراك واموت احب من ان لا اراك واحيا .. رب اتمم على نعمتك وفضلك واحسانك بهذا الذى اسألك واموت على اثر ذلك .. ولما رأى الله الرحيم من حرص سيدنا موسى على ان يعطيه سؤاله قال انطلق فانظر الحجر الذى فى رأس الجبل فاجلس عليه فانى مهبط عليك جنودى ... ففعل موسى .. فلما استوى عليه عرض الله تعالى عليه جنود سبع سماوات ... ازااااى


أمر الله ملائكة السماء الدنيا ان يعرضوا عليه فمروا بموسى عليه السلام ولهم اصوات مرتفعه بالتسبيح والتهليل كصوت الرعد الشديد ...شوفوا بقى اما احن ابنقول عشان واحد كبير ولا حاجه بالروح بالدم فما بالك بالملائكه ...ثم امر ملائكة السماء الثانيه ان يعرضوا عليه ففعلوا فمروا به على الوان شتى ذوو وجوه واجنحه منهم الوان الاسد رافعى اصواتهم بالتسبيح .. ففزع موسى منهم وقال ربى انى ندمت على مسألتى .. رب هل انت منجى من مكانى الذى انا فيه .. قال له رأس الملائكه ياموسى اصبر على ما سألت فقليل من كثير ما رأيت ثم امر الله ملائكة السماء الثالثه ان اهبطوا فعرضوا على موسى فاقبل ما لا يحصى عددهم على الوان شتى الوانهم كلهب النار وكانوا يهللون بالتسبيح بازجال سبحانك اللههم سبحانك اللهم .. ففزع موسى عليه السلام وساء ظنه ويأس من الحياه فقال له رأس الملائكه يا ابن عمران اصبر حتى ترى مالا تصبر عليه ... ثم اوحى الله تعالى الى ملائكة السماء الرابعه ان اهبطوا الى موسى بالتسبيح فهبطوا الوانهم كلهب النار وسائر خلفهم كالثلج لهم اصوات عاليه بالتسبيح والتقديس لا تشبه اصوات الذين مروا به لا اله الا انت .. لا اله الا انت ... فقال له رأس الملائكه يا موسى اصبر على ما سألت فكذلك أهل كل سماء إلى السماء السابعة ينزلون إليه بألوان مختلفة وأبدان مختلفة وأقبلت ملائكة يخطف نورهم الأبصار ومعهم حراب الحربة كالنخلة الطويلة العظيمة كأنها نار أشد ضوءا من الشمس وموسى عليه السلام يبكي رافعا صوته يقول يا رب اذكرني ولا تنسني أنا عبدك ما أظن أن أنجو مما أنا فيه إن خرجت احترقت وإن مكثت مت قال له رأس الملائكة قد أوشكت أن تمتلئ خوفا وينخلع قلبك هذا الذي جلست لتنظر إليه قال ونزل جبريل وميكائيل وإسرافيل ومن في سبع سماوات وحملة العرش والكرسي وأقبلوا عليه يعاتبونه فلما رأى الله عز وجل ذلك من عبده أراه قائمة عرشه فتعلق بها فاطمأن قلبه فقال له إسرافيل يا موسى والله إنا لنحن رؤساء الملائكة لم نرفع أبصارنا نحو العرش منذ خلقنا خوفا وفرقا فما حملك أيها العبد الضعيف على هذا فقال موسى يا إسرافيل وقد اطمأن أحببت أن اعرف من عظمة ربي ما عرفت ثم أوحى الله عز وجل للسماوات إني متجل للجبل فارتعدت السماوات والأرض والجبال والشمس والقمر والنجوم والسحاب والجنة والنار والملائكة والبحار وخروا كلهم سجدا وموسى ينظر إلى الجبل فلما تجلى ربه للجبل جعله دكا وخر موسى صعقا الأعراف ميتا من نور رب العزة جل وعلا فوقع عن الحجر وانقلب عليه فصار عليه مثل القبة لئلا يحترق قال الحسن فبعث الله تعالى جبريل عليه السلام فقلب الحجر عن موسى وأقامه فقام موسى عليه السلام فقال سبحانك تبت إليك الأعراف مما سألت وأنا أول المؤمنين الأعراف أي أنا أول من آمن أنه لا ينظر إليك أحد إلا مات وقيل أنا أول من آمن أنه لا يراك أحد في الدنيا



يا سلام .. اذا كان البشر عشان الكبير لما يروح يزور بلد ما بيعلموا له ايه .... فرق من الامن المركزى تصطف على الجانبين... بطول كيلوا مترات وعمالين يضربوا الارض باقدامهم ... هوب هوب ... هوب هوب ... هوب هوب .. والارض تطلع بطيخ من تحت رجليهم وساعات بتطلع ميه... واسطح المنازل بطول الشارع والمكان اللى حيروح فيه تحتل بواسطة المخابرات ويطرد سكان تلك العمارات او يحبسون فى شققهم ... وقبلها باسبوع تنزل المخابرات والحرس الجمهورى عشان يمسحوا البلد وكمان الاعتقالات اللى بتحصل لاهل البلد دى قبل الزياره واسراب الطائرات اللى بتحوم فوق فى السماء ... كل دا عشان واحد من البشر ... فما بالك بالله سبحانه وتعالى .






لا اله الا انت سبحانك انى كنت من الظالمين




الأحد، 5 يوليو، 2009

عن العشق والهوى ..من نفسى ومتهيأ لى انى حاحذف البوست دا قريب

تحديــــــــث
كنت ناوى انزل ببوست جديد النهارده لكن المشكله ان الجهاز بيفتح عندى لكن عندما اذهب لزيارة أى مدونه اخرى لا تفتح التعليقات مما يخبرنى بأن هناك عطل ما فى الجهاز وعشان كدا قلت ياواد يا فشكول انتظر حتى يتم اصلاح ما بالجهاز من عطل وبعدين انزل بالبوست الجديد
بس احب اطمن كل من علق عندى بانى سوف ارد على زيارته حتى لو كانت متأخره بعض الشيئ لانى من اربع ايام وانا عطلان ومش عارف ارد أى زياره لأئ زائر لى .... اعذرونى لبعض الوقت ومش ح اتأخر فى زياراتكم

=====================================================

لم اتعود كتابة بوستات كهذا لكن مره من نفسى .. لانها لحظة مرت بحياتى لم تكن عابره ولكنها من عمر المراهقه والشباب.. لحظة خرجت من خزانة الحياه فأثارت الوجدان وحركت اوتار قلب الشيخ .. انا ... وهل للشيوخ وجدان ... انا ... انا







تحرك الوجدان للحظات واجتر معه ذكريات كانت مصابيح الشوارع شاهدا لها والقمر يراقبها ويغزل خيوط الضوء حولها والشمس عندما تشرق كل صباح تروى حكايتها .. حكاية طالب الثانوى مع زميلته.




فجأتن ......... قابلتها ... بعد نيف وثلاثين سنه








تلاقت النظرات ... عرفتها وعرفتنى ... كانت النظرات تعانق النظرات فليس لنا الا هذا.. وانهمر شريط الذكريات سريعا امام عينى ... انتظرها فى الشرفه حتى تخرج فأخرج وراءها ... ثم اعود من المدرسة احرسها ... ويوما فيوما ... التقينا




كانت ليلى ... اسمها راقص ... لي ... لا ... يقولونها فى الغرب ليلى بكسر اللام




هى كما هى ... طولها طول الخيزران




جسدها يتثنى كالشمعدان ... مياسة القد ... ملوحة الوجه ... غجرية الشعر ... مرحة القسمات ... خجولة المحيا




عدت فى السابعة عشر ... مزاهر قلبى تدق ... وعقلى يتقلب بين خواطره ... فوضعت يدى على قلبى الذى فط من مكانه واخذ يجرى يمينا وشمالا فقلت له حنانيك يا قلب ... فقال مالك انت بى .. اتركنى فأنا لست بقلبك ... وما ذنبى فيما حرمتنى منه ... فقلت له ... وماذا كنت افعل يا قلب ... فقال لماذا افترقتما وقد كان اول حب احس به ... فقلت ما كان اليها سبيلا ... قال كيف ... هل كنا نستطيع غير ما فعلنا ... وكيف ... هل كنت اذهب انا اليها ام تأتى هى الى ... هل تجيئنى يوم جمعه ام اذهب اليها فى يوم أحد وأولادنا يا قلب هل هم معها ... ام معى ؟ أفق يا قلب ... استحى يا قلب فقد كان الحب المستحيل




وافقت وافاق القلب وعاد الى مكانه وقال الواقع احلى




ربما تجمعنا اقدارنا ... ذات يوم بينما عز اللقاء





ومضى كل الى غايتــــــــــــــــــــــــــــــــــــــــــــه








الثلاثاء، 23 يونيو، 2009

تنمزج فى المتنمزج ... تصبح انموزج



ساقنى حظى اليوم للمرور على معظم مكاتب البريد فى شبين الكوم واللى طول عمرى عارف طريقهم ودائما اقف فى طوابيرهم .. لييييييييه ... عشان الحاجه ام اسامه عايزه تحج السنه دى ... هى عايزه تحج وانا عايز اهج ... يا وليه انت مش حجيتى قبل كده ... كنت صغيره يا خويا ومش حاسه انا بأعمل ايه ... لكن انا الوقت عايزه اتمتع مره تانيه واحج من جديد ... انا بقى جيبى مفلس ونفسه فى مليم احمر آهو يحس بالفلوس بدل ما هو على الحديده.


برضه يا جماعه عندها حق ... تفسها تحج وتزور النبى كمان مره ... ماشى يا حاجه اعمل لك جواز سفر جديد وربنا المعين ورزقنا عليك يا رب وح ابتدى اعمل للموضوع جمعيه بـ 10 جنيه كل شهر مع 4000 تلاف واحد ونقبضها الاول وربنا بقى هو اللى بيعين.


كنا من فتره بنشترى استمارات الجوازات من البوسته وعشان كدا اخدتها كعب داير على جميع بوستاتك يا شبين الاقى كلها مقفوله بالضبه والمفتاح وعلى ابوابها كومين تلاته تراب وهباب كمان .. ولما وصلت البوسته العموميه وسألتهم هى مكاتبكم مقفوله ليه قالوا لى عشان (النمزجه) ... ايه يا جماعه النمزجه دى؟ ... قالوا بنعمل كل المكاتب نموزج واحد... مثلا الخزينه على اليمين وفى الوش الموظف بتاع الطوابع والكاونتر على الشمال مثلا مثلا يعنى والارضيات سيراميك ... يعنى المكاتب كلها تبقى شكل بعضها والمكتب اللى تدخله فى شبين هو نفس المكتب فى اسيوط وهكذا دواليك.


آه لو اعرف مين اللى فكر فى الفكره الجهنميه دى كنت دبيت صوابعى العشره فى عنيه ... هى فلوسه كتيره كدا ليه ... سعادته يهد كل المكاتب فى البلد من السلوم لحد اسوان عشان ينمزجها ... وهو يبقى آخر مزاج ... المفروض لو عايز يطور ياخد العمليه واحده واحده ... المكتب اللى عايز يترمم يعمل له نمزجه وبرضه هو يعمل مزاج كبير من ورا المكتب المتنمزج ده وهكذا لحد ما يخلص على مكاتب البلد كلها نمزجه ... مش يهد مكاتب البلد كلها عشان سعادته ياخد مزاجه على اخره وميت فل واربعتاشر. ...لأ نهد كله ونبنى كله ... يانمازجك يا بوسته مصر.


ما هو احنا عندنا فلوس كتيره متلتله حنوديها فين ... فى النمزجه ... امال يا جماعه ليه دايما بتقولوا مواردنا محدوده واحنا دوله فقيره وبنشحت على الابواب .... لاااااااااا ... احنا دوله غنيه ... بدليل النمزجه مره واحده وانتم اللى شعب فقير دقه ... والفقير يجوز فقيره يخلفوا شحات صغير.


والله يا جماعه احنا ما احنا دوله فقيره ولا حاجه ... احنا دوله غنيه ... بس يا خساره فلوسها للبهرجه والقنعره والفشخره ... مش لاولادها.


عارفين لو لى الحق فى التصرف مع اللى فكر الفكره المخيخى دى كنت عملت له قرار وطلعته معاش فورا ومن غير مكافأه كمان... هى المواضيع كلام تخين وخلاص ولا ايه؟


مين بقى ح يدخل الجمعيه ام 10 جنيه ويقبضها فى الاخر .. اللى موافق منكم يبعت لى 10 جنيه بحواله على مكتب متنمزج واللى يبعت على مكتب مش متنمزج حيترفض طلبه . نسيت اقول لكم انهم قالو لى استمارات الجوازات من ادارة الجوازات وما عدناش بنبيع الاستمارات عندنا... آه يا رجلى.


رحت بقى على ادارة الجوازات ... حاجه غريبه يا جماعه ما كنتش متخيلها .. قال بتاع الاستعلامات عشان تاخد استماره لازم يكون معاك اربع صور لزوجتك ... اديته الـ 4 صور ... ادانى الاستماره ببلاش وقال لى اقعد بقى املأ البيانات ... حاضر ... تمام يا افندم مليت الاستماره ... ادانى طابع دمغه بجنيه واحد .. وروح شباك 4 ... حاضر ... اخدوا الاستماره والصور وبطاقتى وبطاقة زوجتى وقالوا لى روح على الخزينه ... حاضر ... هات 68 جنيه ... حاضر وادانى ايصال وقال فوت بعد ساعه.


وبعد ساعه رجعت افوت لقيتهم بيندهوا اسم الحاجه ام اسامه ... انا رديت نعم ... لقيتهم بيدونى الجواز الجديد بتاع مراتى ... ايه ده يا جماعه ... دا جواز الحاجه ... كدا من غير طوابير... آى نعم ... كدا من غير 100 ختم نسر واشى صقر ... اى نعم ... كدا من غير الحاجه ما تيجى وتختم وتبصم وتمضى ويطلع روح اللى خلفونا ... آى نعم ... طب يا جماعه عايز اقول لكم عشان بس يعنى الامانه ان الحاجه ما دخلتش الجيش وما عندهاش بطاقه معامله عسكريه ومتهربه من التجنيد ... قالوا مش مهم ... انا فين يا جماعه ؟


انا رحت الجوازات لوحدى من غير الحاجه ... هم اخدوا على اقرار اننى انا جوزها وصوره من بطاقتى الشخصيه وصورى من بطاقة الحاجه الشخصيه وخلص الجواز ... طلع يا هووووه لوحده


دائما نشجب ونندد ونهدد ونتوعد.......................

هذه المره ... تحيه خاصه الى ادارة جوازات شبين الكوم وتحيه لكل ضابط وصف وأمين وموظف يعمل فى هذه الاداره ... لم ارى فى حياتى اسهل من التعامل مع ادارة جوازات شبين الكوم


انا داخل بقى آكل حتة بطيخ ... بس ح اعطى قشرها لبتاع البريد بتاع النمزجه.