الخميس، 29 يناير، 2009

ارض كنعان - فلسطين وجبال الصبر 3

قبل ما ندخل فى الموضوع ونقول على قصة اليهود ودخولهم فى فلسطين لازم نشوف مين هما الجنس اليهودى ( اللى هو الاسرائيلى)


والجنس اليهودى اللى هما من ابناء يعقوب عليه السلام ويعتبرون هم اصل الاسرائيليين عشان سيدنا يعقوب كان اسمه (اسرائيل) زى ما الواحد يبقى اسمه محمود مثلا والناس تناديه بحسن مثلا وسيدنا يعقوب او (اسرائيل) جاب اثنى عشر ولدا اللى بيقولوا عليهم الاسباط .. يعنى كل ولد فيهم كان سبط والاسباط دول آباء واجداد بنى اسرائيل الذين تكاثروا بمصر ابان اقامتهم فيها .. طبعا كلكم عارفين قصة سيدنا يوسف وازاى أخد اخوته كلهم الى مصر ... وازاى حافظ الاسرائيليين على نسلهم نقيا فى مصر حتى كان خروجهم منها مع سيدنا موسى عليه السلام .. خرج مع الجماعه دول بقى جموع من المصريين الساخطين والاسارى والعبيد .. وكان هذا اول اختلاظ للدم اليهودى .. برضه حصل اختلاط آخر فى الموطن الشمالى لنهر الراين اللى وفد اليه جماعه من الاسباط على اثر احدى هزائمهم واختلطوا فى الطريق بأوربا بعناصر سوريه واناضوليه .. وبمرور الزمن دخل عدد كبير من سكان هذه المناطق فى الديانه اليهوديه وكمان دخلوا فيهم وتزاودوا منهم وحصل هجرات كتيره بعضهم استوطن بولندا وبعضهم استوطن روسيا وتفرق بعضهم فى اوربا .


شوفوا بقى رامبروزو بيقول ايه ( ان اليهود المحدثين هم ادنى الى الجنس الآرى منه الى الجنس السامى نتيجة لاختلاط اليهود وتزاوجهم من الجنس الآرى وانضم اليهم فى جميع العصور صنوفا شتى من مختلف الاجناس .. فمنهم الفلاشا ذو البشره السوداء .. ومنهم الالمان ذو السحنه الالمانيه .. ومنهم الثامل اليهود السود فى الهند وغيرهم .. ولا يتصور ان اليهودى ذو الوجه الحسن البديع والشعر الاشقر او الكستنائى والعيون الزرقاء الصافية اللون او الخضراء ممن تلقاهم اليوم فى اسرائيل او اوربا او امريكا يمتون بصلة الدم للاسرائيليين الساميين). خلوا بقى دا على جنب وخلينا نخش فى صلب الموضوع.


طبعا الكل عارف قصة خروج سيدنا موسى من مصر وايه الاسباب اللى ادت الى ذلك وقصة مع فرعون وكذلك قصته مع سحرة فرعون وايمان السحره به وتطور الموضوع حتى خرج سيدنا موسى مع قومه الى سيناء بعد مطاردة فرعون له هو وقومه وقصة انشقاق البحر واطباقه على فرعون وجنوه .. كلكم عارفين الحكايه دى .. المهم دخل سيدنا موسى الى سيناء مع قومه.


تعالوا بقى نشوف قوم سيدنا موسى عملوا ايه معاه فى سيناء:

كان سيدنا موسى بالنسبه للشعب الاسرائيلى فى مصر قائدا وليس رسولا ولما خرج بيهم من مصر وحصلوا على بغيتهم انقلبوا عليه ...ازاى .. عند صعود سيدنا موسى الى جبل الطور وقصة سيدنا موسى كليم الله على جبل الطور .. رجع بقى لهم شوفوا لقاهم بيعملوا ايه ؟


فيه واحد اسمه السامرى ..كان من قوم يعبدون البقر جيران لبنى اسرائيل وكان خرج مع من خرج من قوم موسى .. السامرى ده عمل لهم عجل عشان يعبدوه فى غيبة سيدنا موسى بالرغم من وجود سيدنا هارون النبى فى وسط القوم .. لكن السامرى اغوى القوم وضرب عرض الحائط بكلام هارون النبى وعمل العجل وكان للعجل خوار (فتح فتحه فى مؤخرة العجل لحد راسه زى الزماره كدا عشان الهوا لما يفوت فيها تعمل خوار) المهم اليهود عبدوا العجل ده وكمان عبدوا حاجات كتيره زى عشتروت وبعل ومولك وعبدوا الحيه المقدسه والبلعيم والمشتارت وآلهة حيدوم وألهة مؤاب والهة بنى عمون وغيرها .. كل ده فى اربعين يوم.


تعالوا بقى نخش على الموضوع الاصلانى:

سيدنا موسى رد قومه الى دينهم الاصلى ليعبدوا الله (يهوه) الله فى اللغة العبريه (يهوه) ويمكن كلمة يهوه حرفت الى يهود .. وفيه بعضهم بيقول نسبه الى يهوذا احد ابناء يعقوب .. المهم سيدنا موسى اخد بنى اسرائيل وبدأ يسير بهم تجاه فلسطين التى وقف اهلها فى وجه الاسرائيليين فخاف منهم الاسرائيليين وقالو لموسى ان فيها قوما جبارين ولن ندخلها حتى يخرجوا منها (اذهب انت وربك فقاتلا انا هاهنا قاعدون) فحكم الله عليهم بالتيه اربعين سنه شوفوا بقى حكمة ربنا بالحكم ده ايه .. عشان كل الجبناء من بنى اسرائيل يموتوا ويولد جيل جديد تربى على الشجاعه وعدم الخنوع ويقدروا يدخلوا ارض فلسطين اللى ربنا وعدهم بيها وكان هذا اول تقاطع بين الاسرائيليين وارض فلسطين .. خدوا بالكم اليهود بيعتمدوا على الوعد ده .. ربنا قال فى كتابه الكريم (يا قوم ادخلوا الارض المقدسة التى كتب الله لكم ولا ترتدوا على ادباركم فتنقلبوا خاسرين .. قَالُوا يَا مُوسَىٰ إِنَّ فِيهَا قَوْمًا جَبَّارِينَ وَإِنَّا لَنْ نَدْخُلَهَا حَتَّىٰ يَخْرُجُوا مِنْهَا فَإِنْ يَخْرُجُوا مِنْهَا فَإِنَّا دَاخِلُونَ (22)) .. يعنى هما خدوا بالهم من الوعد دا ومتمسكين بيها وبينكروا كل اللى بيقول انهم خرجوا عن الشرع وعن الشريعه لما انكروا سيدنا عيسى وبعدين سيدنا محمد ..


المهم مات سيدنا هارون اثناء فترة التيه ودفن فى جبل (هور)

وكمان مات سيدنا موسى برضه اثناء فترى التيه ودفن فى كثيب احمر بالقرب من فلسطين ولم يدخلها ابدا

وتولى يوشع بن نون قيادة بنى اسرائيل .. مين هو يوشع بن نون بقى .. اقول لكم

فى مدونة الاستاذ (عمرو جويلى) قصة سيدنا يوشع بن نون ممكن تقروها لكن ملخصها الأتى (قصة يوشع بن نون عليه السلام سيرته: لم يخرج أحد من التيه ممن كان مع موسى. سوى اثنين. هما الرجلان اللذان أشارا على ملأ بني إسرائيل بدخول قرية الجبارين. ويقول المفسرون: إن أحدهما يوشع بن نون. وهذا هو فتى موسى في قصته مع الخضر. صار الآن نبيا من أنبياء بني إسرائيل، وقائدا لجيش يتجه نحو الأرض التي أمرهم الله بدخولها. خرج يوشع بن نون ببني إسرائيل من التيه، بعد أربعين سنة، وقصد بهم الأرض المقدسة. ,كانت هذه الأربعين سنة -كما يقول العلماء- كفيلة بأن يموت فيها جميع من خرج مع موسى عليه السلام من مصر، ويبقى جيل جديد تربى على أيادي موسى وهارون ويوشع بن نون، جيل يقيم الصلا ويؤتي الزكاة ويؤمن بالله ورسله) تولى يوشع بن نون قيادة بنى اسرائيل فارسل رسولين للتجسس فدخلا بيت امرأه زانيه تسمى (راحاب) وبعد بضعة ايام دخل بنوا اسرائيل مدينة اريحا وقتلوا كل من فيها من انسان وحيوان وحرقوا المدينه كلها وهكذا استولى بنوا اسرائيل على ارض الكنعانيين بالقتل والتشريد( خدوا بالكم هما الحين برضه ما بيهمهمش بيقتلوا ويشردوا وما عندهمش رحمه لا فى القتل ولا فى التشريد وحتى اطفال غزه بيموتوا من قلة الاكل واللبن وحتى العيانين فى المستشفيات) هى دى عقيدتهم ودينهم اللى بيؤمنوا بيه)
لحد هنا عرفنا ايه قصة اليهود مع ارض الميعاد اللى بيقولوا عليها وازاى جم فلسطين وكيف نشأت العداوه بين الشعب الكنعانى (الجبارين) والشعب اليهودى والاصول التاريخيه لذلك.
بعد كدا ان شاء الله حنشوف هما قعدوا قد ايه وحصل لهم ايه وبعدين ازاى هما خرجوا من ارض فلسطين اكتر من مره وعلوا فى الارض اكتر من مره ووعد الله لهم ان عدتم عدنا .. فى الحلقه القادمه ان شاء الله.
والى اللقاء فى الحلقه القادمه

السبت، 24 يناير، 2009

أرض كنعان .. فلسطين وجبال الصبر 2

الحلقه الثانيه
فى الحلقه دى حنشوف قصة اسرائيل .. او قصة اليهود .. وحناخد الموضوع من اوله .. من الاول خالص .. من ايام سيدنا ابراهيم عليه السلام وقصة اليهود او اسرائيل مرتبطه ارتباط وثيق بقصة سيدنا ابراهيم .. طبعا مش حناخد الموضوع كأنه قصص من قصص الانبياء .. لا .. حناخد الموضوع من الجانب اللى يعرفنا بحكاية اليهود واسرائيل .. انا طبعا باكتب لكم باللغه العاميه ... مش بالفصحى .. قولوا لى اذا كنتم عايزين الفصحى .. اكتب لكم بيها .. بس العاميه عشان احكيها لكم حكايه او حدوته وعشان تبقى سهله عليكم .. واللى مش بيحب التاريخ وصعب عليه يقدر يفهم ايه الحدوته.. وعشان نبتدى الموضوع لازم نعرف من هو سيدنا ابراهيم عليه السلام.
نسب سيدنا ابراهيم:
هو ابراهيم ابن تارح اللى عاش 250 سنه بن ناحور عاش148 سنه بن ساروغ 230سنه بن راغز 239 سنه بن فارغ 439 بن عابر 464 بن شالح 433 سنه بن ارفخشد 438 سنه بن سام 600 سنه بن نوح (طبعا التواريخ دى مش من عندى دى من عند بن كثير) دا من ناحية نسب سيدنا ابراهيم من ابوه
طب من ناحية امه: الكتابات جابت اسامى بس ما جابتش تواريخ ولا سنين واذا كانت على الاسامى اقول لكم هى ايه:
عن ابن اسحق صاحب كتاب المبتدا أن امه اسمها اميله وسكت وخلاص.
أما الكلبى فقال ان اسمها بوتا بنت كربتا بنت كرثى من بنى ارفخشذ بن سام بن نوح .
يعنى سيدنا ابراهيم اصله سامى من سام بن نوح ابا واما . وقومه من قديم زى غيرهم هاجروا م الجزيره العربيه الى بلاد الكلدانيين بارض بابل .. لحد هنا عرفنا ان سيدنا ابراهيم من بابل ارض الكلدانيين ... وصحيح هو اصله سامى.. طب ما انا اصلى سامى وانت وانتى وكلنا اصلنا سامى والفلسطينين كمان اصلهم سامى وزى ما عرفنا قبل كدا غلب عليهم الاصل الكنعانى وسموا باسم القبائل اللى جاين من اقريطش .. خلينا بقى نركن دا على جنب وتعالى نشوف جنب تانى من الموضوع .. سكه تانيه خالص وحنشوف ازاى تتقاطع السكك مع بعضها.
نبتدى بقى الحكايه من الجنب الآخر وهو جانب سيدنا ابراهيم ابو العبرانيين واللى هما ايه ؟ .. اقول لكم:
لم يتفق علماء التاريخ على اصل واحد لكلمة عبرانى وان اتفقوا جميعا على ان العبرانيين انحدروا من ذرية ابراهيم عليه السلام .. على كدا يبقى سيدنا اسماعيل عبرانى ونسله كمال اللى هما فى جبال فاران اللى هى مكه الآن وكمان المسيحيين اللى فى فلسطين وسوريا والبلاد دى عبرانيين.
البعض شايف ان كلمة عبرانيى لانه عبر النهر ويحتمل ان يكون النهر هو نهر الفارت .
تعالوا بقى نشوف ايه قصة بنى اسرائيل :
تمت هجرة ابراهيم عليه السلام ما بين 2000 الى 1750 سنه قبل الميلاد وتبدأ فصول هذه القصه بهجرة سيدنا ابراهيم عليه السلام من بلده ببابل التى كانت ارض الكلدانيين هو وابن اخيه لوط عليه السلام هربا من قومهم بعد ان توعدوهم وكان معهم بعض الاقارب والخدم واخذوا يضربون فى الارض فى شكل دائرى واتجهوا الى الشمال حتىمناطق الآراميين ثم الى الجنوب حتى ارض كنعان الذى حط فيها هو ورجاله فتره من الزمن - ثم اصاب القحط ارض كنعان فاستأنف العبرانين طريقهم الى مصر - وهذا يدل على ان ارض كنعان لم تكن هدفا لهم وانما كانت احدى محطات العبرانيين وطلوا بمصر فتره كبيره وتضاعفت ثرواتهم . ولكن طمع فرعون فى ساره زوجة ابراهيم عليه السلام جعلته يقفل عائدا الى ارض كنعان ومعه ثرائه وثروته اللذين جمعهما من مصر ومعه ايضا زوجته ساره وايضا هاجر التى تزوجها فى مصر - وهاجر هى التى انجبت اسماعيل الذى هاجر الى ارض فاران او جبال فاران (مكه الآن) وصاهر اسماعيل جرهم ومن نسله جاء العرب المستعربه وهم الذين حملوا لواء الاسلام بعد ذلك.
بعد مولد هاجر لاسماعيل انجبت لابراهيم زوجته الاولى ساره الابن الثانى لابراهيم وهواسحق بأرض كنعان والذى ولد له يعقوب عليه السلام ويعقوب هذا اسمه ايضا (اسرائيل) وكان يعقوب يقيم فى ارض مدين .. ومن هنا نبتدى الحكايه:
تزوج يعقوب من بنتى خالته الآولى واسمها ليئه وكان لها جاريه اسمها زلفه وتزوجها ايضا يعقوب
ثم تزوج من بنت خالته الثانيه بلهة وكانت لها جاريه اسمها راحيل فتزوجها ايضا .. اى ان يعقوب عليه السلام تزوج باربع .. ليئه وجاريتها زلفه وبلهة وجاريتها راحيل.
وانجب منهن اثنى عشر ابنا (سبطا)
@ من ليئه : روبين وشمعون و لاوى (والذى من نسله موسى عليه السلام) ويهوذا (يقال من اسمه اخذت كلمة يهود) ةيساكر و زوبولون.
@ من راحيل : يوسف وبنيامين .
@ من زلفه : جاد و أشير.
@ من بلهه : دان ونفتالى.
وكانت راحيل احبهم الى يعقوب عليه السلام وابناها يوسف وبنيامين.
بنى اسرائيل (يعقوب ) الىمصر
القصه المعروفه ( قصة سيدنا يوسف ) واخوته وكيف نزحوا الى مصر وكلكم تعرفونها ولا داعى لتكرارها وقصته مع امرأة العزيز والتى كان اسمها راعيل بنت رافاييل وقيل فكا بنت بنوس والمشهور انها زليخه قال به الثعلبى . والقصه بمصر تنتهى بحضور سيدنا يعقوب (اسرائيل ) الى مصربعد المكيده التى دبرها سيدنا يوسف لاخيه الشقيق بنيامين وتكاثر بنى اسرائيل فىمصر فى ارض حاسان (منطقة صفط الحن بالشرقيه حاليا) وكان تعداد بيب يعقوب حينذاك سبعين نسمه على رآى سفر التكوين الاصحاح 42. القصه المعروفه للجميع.
وحتى نختم هذا الجزء ولا نطيل عليكم وننتظر الى اجزاء قادمه لا بد لنا ان نتكلم عن طبيعة شعب بنو اسرائيل بمصر والتى كانت الانعزاليه طابع العبرانيين (الاسرائيليين) منذ هجرة ابراهيم عليه السلام فقد امتزج الكنعانيون بالفلستينيين والساميون باهل الشمال اما العبرانيون فقد عاشوا وحدهم وقد يكو السبب هو رفضهم لعبادة الاصنام فاعتزل ابراهيم القوم لانه كان موحد يؤمن بالله على دين الحنيفيه ولكن عندما عاد العبرانيون لعبادة الاصنام كانت الانعزاليه ايضا طابعهم فى ارض كنعان وكانت طابعهم فى مصر - هذا فى قديم الزمان وحتى الآن ما زال طابع العبرانيين(اليهود) هو الانعزاليه وقد كانوا ينظرون الى سواهم نظرة خوف وحذر يتحول رويدا رويدا الى عداء وبالتاليى لم يدينوا بولاء الى الوطن الذى يجمعهم بالآخرين وانما كان ولائهم لجماعتهم التى اصبحت فى اى وطن ووطنهم كان ولا يزال هو دينهم وجماعتهم .. كانت ولا زالت تلك طبيعتهم وتكاسر بنوا اسرائيل بمصر بطابعهم الانعزالى حتى بلغوا نحو 603.500 الف على ما يقولون .
واللى اللقاء فى الحلقه القادمه

الثلاثاء، 20 يناير، 2009

ارض كنعان - فلسطين - وجبال الصبر

الحلقه الاولى

اخوانى الاعزاء

سأطرح لكم هنا وعلى اكثر من حلقه - قصة الوطن الفلسطينى وما تحمله على مدى التاريخ .. فدون ذلك كل شيئ ممكن تأجيله وحتى يمكن لابنائنا الاطلاع ومعرفه بعض الجوانب التى غابت عنه - وسأطرح لكم الموضوع للنقاش ليدلو كل بدلوه . فالتاريخ ذو اجه كثيره ولا ادعى ولا يدعى احد احتكار الحكمه والمعرفه وادعوكم جميعا للتناقش والجدل على المدونه ليس بينى وبينكم فقط ولكن بيننا جميعا وما لديه اى حقائق فليطرحها ..


وحتى تعم الفائده اطرح لكم الموضوع للنقاش بينكم وبين بعض ومن اراد عمل موضوع مستقل على مدونته فليفعل - فالمهم هو وجبه كبيره يدلو فيها كل بدلوه.

سوف نتناول حقائق تاريخيه ولن نعلق على شيئ وسوف نترك كل يستنتج ما يستنتج ويعرف ما يعرف - ما أطرحه هو مزيج من ابحاث كثيره مثل ابحاث مقارنة الاديان لعلماء أجلاء من الازهر وعلى رأسهم الدكتور / عبد الله .. مش فاكر كمالة اسمه .. استاذ مقارنة الاديان بجامعة الازهر وكذا نقلا عن الامام ابو الفداء اسماعيل بن كثير ونخبه من العلماء وعلى رأسهم ترجمه لـ جوستاف لوبين ( اليهود فى تاريخ الحضارات ) مترجم بواسطة عبيد وكذا ترجمات لـ شارلز فوستر ولسليمان مظهر وغيرهم.
ونبدأ
بسم الله الرحمن الرحيم
اولا - فلسطين ... التاريخ
المكان والموقع : هى عباره عن مثلث - رأسه فى الجنوب عند خليج العقبه وقاعدته من شرق نهر الاردن حتى البحر المتوسط .. كلنا يعرف خريطة فلسطين.
اصل سكان فلسطين: قبل الميلاد تقريبا بحوالى ثلاثة آلاف سنه وتحت ضغط القحط وقسوة الصحراء هاجرت افواج من القبائل العربيه فى شبه الجزيرة العربيه الى الشمال وكان الفينيقين اسبق هذه الجماعات المهاجره واتخذوا موقعهم على شريط من البحر وكونوا حضارة الفينيقين ( وهى ما تعرف بلبنان حاليا)
الى الجنوب نزلت قبائل عربيه اخرى اشهرها قبائل كنعان فى حوالى 2500 سنه قبل الميلاد واستقرت هذه الجماعات على ضفة الاردن الغربيه منسابه نحو البحر وسميت هذه المنطقه باسمهم فاصبحت تدعى ارض كنعان .. طبعا خريطة فلسطين امامكم وكلنا يحفظها عن ظهر قلب واللى مش حافضها يجيب الاطلس ويبص فيه .. طب ايه بقى علاقة الفلسطينين بهذه الارض .. شوفوا يا اسيادنا:
احنا عرفنا ان فيه قبائل كنعانيه جاءت الى المنطقه وسميت باسمهم ارض كنعان بعد كدا بحوالى 1200 سنه (لا احد يستطيع تحديد التواريخ على وجه الدقه) نزلت على شواطئ البحر جماعات كثيره من جزيرة (اقريطش) اللى هى حاليا (كريت) وكانت الجماعات دى اسمها فلستين أو من القبائل الفلستينيه فى اقريطش (كريت) وهذه الجماعات نزلت بين حيفا وغزه ولو رحتم للبوست الاسبق ممكن نعرف المكان على الخريطه (الكروكى)
شوفوا بقى الجماعات الكنعانيه اللى جايه من الجزيره العربيه زى ما قلنا وكمان الجماعات الفلستينيه اللى جايين من جزيرة (اقريطش - كريت حاليا) اختلطوا ببعض ودخلوا الخلاط ونشأ بينهم مزيج وكانت نتيجة المزيج ده ان غلب عليه الدم العربى (الكنعانى) واللغه الساميه من ناحيه اما الاسم فأخذوه من اسم الجماعات الوافده من جزيرة (اقريطش - كريت حاليا) واصبحت هذه البلاد تسمى فلستين .. ولو قلتم لى جبت الكلام ده منين .. اقول لكم جبته من عند شارلز فوستر كتاب باسم (تاريخ اليهود ص 29) عشان كدا مش عايز اشغلكم بحكاية المراجع دى وخلافه .. حتى هنا اصبحت هناك بلد حدودها تقريبا معروفه اسمها (فلستين) ثم اصبحت التاء بعد ذلك طاء فاصبحت فلسطين .. هذا ونود ان نلفت نظركم الى ان الخرائط والحدود فى تلك الازمان ليست بالدقه التى هى عليها الآن وانماهى تقريبيه.
فى الشمال الشرقى بقى من فلسطين كانت قبائل الآراميين اللى هما السوريين وكانت دمشق عاصمه لهم والى الشرق من نهر الاردن تلاقى ثلاث ممالك هم ايه ؟ .. اقول لكم هما ايه ..
مملكه اسمها عمون - ومملكه اسمها مؤاب - ومملكه اسمها أدوم ... وسكان هذه الممالك التلاته دول ينحدرون كالآرامييين ( السوريين ) من سهل الفرات وكانت تربطهم بالفلسطينين روابط نسب واللغه والدين والعادات والافكار والمناطق دى كانت ذات صله وثيقه بالفلسطينين.
نيجى بقى نشوف ايه المناطق المحيطه بالفلسطينيين:
1 - مصر طبعا فى الجنوب الغربى .
2 - مدين فى الجنوب الشرقى - ناحية الاردن حاليا وخدوا بالكم من مدين دى عشان قصتها كبيره.
3 - بابل وآشور فى الشمال والشمال الشرقى.
حتى هنا عرفنا وفهمنا كيف ظهرت فلسطين الى التاريخ والاصل التاريخى للسكان وتركيبته وكمان الاصل التاريخى للتسميه بفلسطين ... وازاى اتكون الشعب الفلسطينى وكمان مين اللى جنبهم وبيتأثر وبيأثر فيهم.
فى الحلقه القادمه بقى حنشوف ايه موضوع اليهود وقصتهم مع فلسطين .. ان شاء الله قريب
بس انا مستنى نقاش وجدال واللى عنده معلومه ما يبخلش بيها
تحياتى واللى اللقاء فى الحلقه القادمه

السبت، 17 يناير، 2009

القاهره

تحديث
كنت قلت فى البوست ان قطر الندى بنت احمد بن طولون وهذا خطأ لم اتداركه الا عندما قرأت البوست بعد ذلك .. والحقيقه ان قطر الندى بنت خمارويه وان احمد بن طولون هو جدها الاكبر
================================
احبائى الغاليين
كنت عايز اكتب النهارده عن الأهرامات وقعدت طول النهار اكتب والخص واجيب معلومات تاريخيه .. لكن لقيت الموضوع كبير قوى ومش حيكفيه النهارده ولا بكره ولا حتى الاسبوع ده .. قمت ايه قلت اعمل موضوع خفيف عن مدينه القاهره والحقائق التاريخيه عنها واضحك عليكم بيه وعلى رأى حديث رسول الله صلى الله عليه وسلم (علم لا ينفع وجهل لا يضر ) وما دام لا يضر ولا ينفع .. يمكن حد يكون عايز يعرف المعلومه دى وما عندوش فكره وينتفع بيه .
ايه بقى حكاية القاهره دى .. حاقول لكم الحكايه:
اصل التسميه كانت زمان زمان وقبل سالف العصر والاوان كان فيه حته بعد ميدان النعام الحالى اسمها (اون) فى اللغة المصريه القديمه . الكلمه دى اتحرفت بقى برضه من زمان الى كلمة (عين شمس) وسماها الرومان (هليوبولس) وكان جنوب المدينه دى مدينه صغيره اسمها (حون وان) اللى هى الآن (حلوان)
صوره بانوراميه لكورنيش النيل بالقاهره وحوله بعض المعالم والكبارى

نيجى بقى نشوف .. هى دى القاهره وخلاص؟ .. لأ يا جماعه .. القاهره بتتكون من عدة بلاد .. تعالوا بقى نشوف بتتكون من كام بلد:-

طبعا من عين شمس اللى هى اون .. كمان فيه بلد كان اسمها ممفيس اللى هى البدرشين النهارده ودى غرب الجيزه واصلها طبعا زى ما انتم عارفين فرعونى زى عين شمس بالضبط والبدرشين دى زى ما احنا عارفين من قبل الاسر وعشان نعرف القاهره بتتكون من ايه أو النواه بتاعتها تعالى نشوف :

فم الخليج : وهى خليج أمير المؤمنين ودا فى شرق القاهره .. اظن كلكم عارفينه

الفسطاط : وهى اول موقع للقاهره واللى بناه عمر بن العاص .. وكلمة فسطاط .. معناها خيمه وكمان ..

القطائع : اللى هى عاصمة الدوله الطولونيه واللى فيها الآن جامع احمد بن طولون اللى هو ابو قطر الندى حبيبتى . وهناك حى طولون .. طبعا كلكم عارفينه وجنبها السيده زينب والقلعه وشارع طولون ودرب الحصر


مسجد احمد بن طولون بحى طولون

فيه بقى حته تانيه اسمها الزاهره : واللى انشأها جوهر الصقلى وابتداها بالجامع الكبير وبعدين قصر الأمير الفاطمى ودواوين الحكومه وخزائن بيت المال .. الجامع الكبير بعد كدا بقى سموه الجامع الازهر ... لييييه ... بيقولوا ... نسبه الى فاطمه الزهراء ... وبعضهم بيقول : كأن كل ما حوله زاهرا وكان هو ازهرهم (الازهر) والبعض ارجع التسميه الى كوكب الزهره.

كل البلاد والحتت دى اجتمعت وانضربت فى الخلاط والزحف العمرانى بينهم وبين بعض خلاهم لاضمين فى بعض وسموها القاهره .... ليييييييه ... اقول لكم .. بعضهم قال نسبه الى نجم يسمى القاهر .. وأخرون شافوا ان الخليفه الفاطمى هو اللى سماها القاهره لانها تقهر كل شيئ .

يبقى القاهره الأن بتتكون من الفسطاط اللى هى مصر القديمه ... وكمان القطائع اللى هى عاصمة الدوله الطولونيه والقاهره الحديثه اللى بناها جوهر الصقلى ..

آدى حكاية اسم القاهره فيه حد ضرته المعلومه دى ... ولا فيه حد نفعته المعلومه دى

والسلام عليكم ورحمة الله وبركاته

الجمعة، 9 يناير، 2009

غزه ... السيناريو ... والاسباب

تحديث
اخوانى واخواتى المدونين والمدونات
تحياتى
اعتذر جدا عن التأخير فى الرد على تعليقاتكم فقد كنت فى رحلة عمل من يوم السبت الى الخميس فى مدينة بنى سويف والفيوم ولم انته من هذه الرحله الا اليوم وقد وصلت منزلى اليوم الخميس الساعه الرابعه وحتى لا تغضبوا منى قمت بتحديث هذا البوست .. وسأقوم بالرد على كل التعليقات من الان وحتى انتهى من واكرر الاعتزار
تقريبا يا جماعه موضوع غزه قارب على نهايته واللى توقعته كل السيناريوهات تؤدى اليه .. سوف اتكلم بعقلانيه اقول ما لى او ما لنا وكذلك ما على وما علينا.. اعترف انه كغيره من البوستات التى تتكلم عن القوميه سوف يثير جدلا كبيرا بينى وبين كثير من المدونين وبعد ان افقت مما لازمنى طوال الاسبوع الماضى من ازمه عائليه انتهت على خير والحمد لله .. وعشان العيال الحلوين الكويسين اللى شمتانين فى وفاكرين ان ام اسامه هى السبب .. اقول لهم نقبكم جه على شونه .. مش ام اسامه يا حلوين .. نرجع للموضوع
ربنا سبحانه وتعالى قال ( وقل اعملوا فسيرى الله عملكم ورسوله والمؤمنون) واكد على العمل والاخلاص فى العمل - عن رسول الله صلى الله عليه وسلم ( من عملا منكم عملا فليتقنه) ومتهيأ لى ان دا مش من سماتنا .. لاننا لا نتقن عملا رغم اننا نؤمن بالله وبأن محمدا رسول الله صلى الله عليه وسلم.. لكن ربنا عايزنا ناخد بالاسباب .. ازاااااى .. اقول لكم ازاى؟
ربنا سبحانه وتعالى كان قادر ينجى سيدنا نوح عليه السلام من الطوفان .. وكان قادر يخلى الطوفان يغرق الارض كلها الا موضع سيدنا نوح عليه السلام واهله ومن شاء الله سبحانه وتعالى .. لكن ربنا قال له اصنع الفلك باعيننا .. وقام سيدنا نوح وصنع الفلك فى ارض جافه وبعيده عن المياه والناس بتسخر منه .. يعنى ما كان يصنع الفلك فى البحر .. حيعمل بيها ايه .... دا من وجهة نظر الناس حتى اغرق الله الارض بالطوفان ونجا نوح واهله بهذه السفينه .. صح لا لأ .. سيدنا نوح عليه السلام اخذ بالاسباب .. وربنا سبحانه وتعالى نجا نوح بالاسباب.... طيب.
صوره تخيليه لسفينة نوح عليه السلام
سيدنا موسى عليه السلام عندما ادركه فرعون وقال قومه ( انا لمدركون) كان الله قادر ان يخسف بفرعون وقومه الارض .. اويرسل عليهم ملائكة يقتلونهم .. او يحرقهم ... صح والا لأ ؟ ... صح... لكن ربنا قال لموسى (ان اضرب بعصاك البحر) ونجا موسى وقومه من فرعون وملأه ... اخذا بالاسباب.
ستنا مريم عليها رضوان الله ... عندما ولدت سيدنا عيسى عليه السلام ... كانت جائعه .. وكان الله سبحانه وتعالى قادر على ان ينزل لها غذائها .. وما ذلك بغريب فقد كان ينزل على قوم موسى المن والسلوى فى سيناء ... ولكن الله سبحانه وتعالى قال لها ( وهزى اليك بجزع النخلة تساقط عليك رطبا جنيا) .. مع ان الله قادر على انزال الرطب لمريم بقدرته او بفعل الكينونه (كن فيكون).. لكن الله يعلمنا ان نأخذ بالاسباب .. وهكذا فى غزوة احد عندما ترك الجند الرماة قمة الجبل ونزلوا لجمع الغنائم ولم يأخذوا بالاسباب على الرغم من تعليمات رسول الله صلى الله عليه وسلم فانهزموا... وفى غزوة حنين .. لم تغن عنكم كثرتكم .. لانهم لم يأخذوا بالاسباب بالرغم من كثرة المسلمين .. وقس على ذلك حاجات كتيره.
نيجى بقه لموضوعنا الاصلى عن غزه
انظروا الى الخريطه اللى انا راسمها كروكى بصرف النظر عن مقاييس الرسم يعنى رسم توضيحى كده
شوفوا موقع غزه شكله ايه ... غزه حوالى 400 كيلوا مترا مربعا وبتبتدى من رفح بعرض حوالى 14 كيلوا .. يعنى نقول كدا حوالى 15 كيلوا وينتهى عند غزه بحوالى 10 كيلوا او 7 كيلوا وبعدها على طول المجدل ويافا وتل ابيب وحيفا .. ودى خطورة غزه وصواريخ حماس .. يعنى اسرائيل بتعمل حساب للصواريخ انها ما توصلش لا للمجدل ولا ليافا ولا لتل ابيب اصل لو وصلت لهم ... يبقى الموضوع بالنسبه لهم خلاص ... وجماعتنا فى حماس بيعملوا ايه ؟ ... بيبعتوا صواريخ عسكر بسكر دوريه .. يعنى بمب . ولما زادت الحكايه عن حدها .. دا من وجهة نظر اسرائيل ... اسرائيل قالت لأ .. ما نقدرش نسكت على كده .. ما نقدرش نسكت لما حماس ممكن تبعت صواريخ تطول البلاد اللى قلت لكم عليها .. مش عسقلان واسدود .. لأ .. الخوف على المجدل ويافا وتل ابيب.. يقوموا يعملوا ايييييه ؟ .... لازم نخلص على حماس ... ازاااااى وحماس لها عمق فيه كثافه سكانيه .. واسرائيل بتخاف من الكثافه السكانيه ... فكروا .. يعملوا اييييه.. ازاى يدمروا حماس واسلحة حماس وكتائب القسام وسرايا القدس ... ازاااااى ؟
شوفوا بقى خطتهم كانت ايييه ؟.. انا فشكول الغلبان فهمت هما يعملوا ايه ... امال بتوع التكتيك والعسكريين وبتوع الاستراتيجيات وقادة القسام والسرايا وحماس ... معقول يعنى ما فهموش .. دا انا طور الله فى برسيمه وفاهم .. اش حالهم هما .. نشوف بقى اسرائيل حتعمل ايه؟ .. دا كلام فشكول الاهبل والعبيط واللى ما بيفهم الالف من كوزالدره ..
اولا : قوات جويه طائره .. هوا فيه قوات جويه مش طائره .. فشكول الاهبل ده ..
ثانيا : قوات بريه من الشرق
ثالثا : قوات بحريه من الغرب .. يعنى من البحر .. كل دا عشان يعملوا ايه ؟؟؟ اقول لكم انا عشان يعملوا ايه :
1 - القوات الجويه (الطيارات يعنى ) تمسك اولا الطريق البرى اللى بيربط غزه من رفح لحد غزه مرورا بالعريش اللى هو مرسوم بالخط المتقطع بالكروكى (على قدى يعنى)وتضرب الطريق البرى ده وبكده تبقى قطعت المواصلات وطرق الامداد بين غزه وبعضها لانه الطريق الرئيسى والوحيد الذى يربط القطاع ببعضه... طب ليييه ... عشان قطع الامدادات عن القطاع سواء اللى حتيجى تهريب من مصر او متخزنه فى اى جزء من القطاع تحت الارض ولا فى الرمل ولا فى اى حته .. المهم السكك حتتخرب وما حدش حيعرف يروح ولا ييجى وده حصل. بالاضافه لضرب المواقع اللى فيها الشوية البنادق ومراكز البوليس وكمان مخازن الصواريخ والذى منه ويدمروا كل الاسلحه واللى يقدروا عليه .. يعنى البنيه التحتيه للمقاومه وكانت النتيجه ان كل حاجه وقفت فى القطاع.
2 - بالاضافه لضرب المواقع اللى فيها الشوية البنادق والشوية الكلاشينكوف والرشاشات اللى عند حماس تيجى بقى القوات البحريه من الغرب عشان تضرب اى بطاريات على البحر وتكمل مع الطيران وتقف خفير بحرى ببحر غزه من اى حد يفكر يبعت لهم اى امدادات عن طريق البحر.
3- بعد كل دا ما يستنزف اغراضه تيجى بقى القوات البريه عشان تدخل غزه فى شكل غارات بريه سريعه .. يعنى تعمل الغاره وتطلع تجرى بره وبعدين تعمل غيرها وهكذا ودا ليه عشان ما تشتبكش مع العمق البشرى والكثافه البشريه والسكانيه لحد ما يطمنوا انهم خلصوا على كل حاجه والباقى بقى مش مشكله شوية خسائر بشريه طفيفه ممكن يستحملوها 10 ولا 15 قتيل وشوية جرحى مقابل 1000 عربى مسلم غزاوى ... شوفوا بقى الواحد اليهودى بـ 100 عربى .. امال ايه ... ونتيجه ده حيكون اييييه .. اقول لكم:
حيبقى القوات الجويه من فوق والبحرين من الغرب والبريه من الشرق حيخلصوا على غزه وسلاح غزه ومقاومة غزه وتدخل بقى القوات البريه فى الآخر ( شوفوا الاسهم فى الكروكى ) لاحتلال الارض ... طب وبعدييييييين .. اقول لكم وبعديييييين ... الجيش اليهودى خلق وضع جديد على الارض ازاى ؟
الوضع الاول : كانتون فى خان يونس .. يعنى حاجه كدا زى وحده محليه.
الوضع الثانى : كانتون فى دير البلح برضه زى وحده محليه
الوضع الثالث: كانتون فى غزه زى اللى
وكمان يكونوا امنوا على نفسهم من حماس وغزه والقسام والسرايا وغيرهم ... فى الاخر بقى يسلموا الوضع دا على ما هو عليه لقوات الامم المتحده وحلنا على بال ما تتوحد حماس مع الضفه الغربيه والعاصمه رام الله وكمان خلافات الفلسطينين مع بعضهم وخلافاتهم مع باقى الدول العربيه ... وحيبقى الموضوع معجنه فى معجنه وطبيخ فى طبيخ .. حاولوا بقى تبصوا للكروكى وتتخيلوا الوضع حيبقى ازاى .. وادى الكروكى.



شوفوا بقى الغم المحوش اللى احنا فيه .. والفلسطينيين فيه .. هما واقعين فى اربع ابتلاءات :

الابتلاء الاول : الاحتلال الاسرائيلى .

الابتلاء الثانى : خلافات الفلسطينيين مع بعضهم وما بينهم وبين باقى العرب.

الابتلاء الثالث : ان العالم لا يرى ويا يسمع ولا يتكلم.

الابتلاء الرابع : الدم الفلسطينى الرخيص والمراق يوميا.

طب يا جماعه يعنى فشكول بيقول وفشكول زى ما انتم عارفين ما بيفهمش حاجه وطور الله فى برسيمه وكلامه على قده .. وعلى قد ما فهم الموضوع ما هو مش بتاع عسكريه ولا يحزنون بس شويه فهم على قده يعنى والباقى يعرفوه العسكريين ويفهموه اكتر من ملايين المرات .. يا ساده .. يا كبار .. يا متنورين .. يا فاهمين ... انا يادوب ما ليش غير انى حضرت حرب اكتوبر يا دوب وخلاص وعلى قدى قولوا انتم :

فيه طيارات - والطيارات بتضرب وهى وقافه فى الجو .. نسيت الاصطلاح ده .. لكن طياره هليكوبتر واقفه على ارتفاع ييجى كدا 300 متر وعماله تضرب هنا وهناك وتعربد هنا وهناك ولا حد بيقول لها ليلتك سوده .. طب من أ ب المقاومه والعسكريه ان يكون فيه صاروح مضاد للطائرات زى صاروخ (ستريلا ) لى بيتشال على الكتف وبيسميه العامه اللى زى حالاتى(الحيه ) دا يجيب اجدع طياره هليوكبتر وبعدين سهل يعنى تهريبه دا واحد يقدر يعوم بيه فى البحر على ضهره ويدخل غزه يعنى .. والسؤال اللى حيفقع مرارتى .. فين الصاروخ السهل الرخيص اللى بيتشال على الكتف واللى ممكن يتهرب بالف طريقه ؟؟؟؟؟؟؟؟ وشواطئ غزه طولها 40 كيلوا متر .... سؤووووال ؟

طيب فيه ضفادع بشريه بتسليح خفيف ممكن تعوم لها فى البحر 2 ولا 3 كيلوا وتفجر اجدع مركب فى البحر... طب فيييييييين ... برضه سؤوووووال؟

بلاش الكلام الاهطل ده كله .. طب فيه قذائف مضاده للدروع (يعنى الدبابات والمجنزرات ) ما فيش ليييييييه .... برضه سؤووووال؟ ... دى ببساطه الاسلحه اللى ممكن تقاوم الجيوش النظاميه ... طبعا فيه تفصيلات كتيره ليس هذا مجالها ولست انا من يعرفها ... حماس ولية امر غزه يظهر والله اعلم ما كانتش عامله حساب للى حيحصل فى غزه ودا يبقى تهريج وكارثه واحنا سمعنا زعمائهم بيقولوا اللى حيدخل غزه حيبقى يومه اسود .. ويا دوب عشره قتلى وحوالى 170 جريح .. يا سلام..فى مقابل 1000 قتيل وحوالى اكتر من 3000 جريح .. يا بلاش والله .

ما علهش يا جماعه .. الكلام تاه منى .. اقعد اشرب سيجاره واجمع شويه ... آه .. الحمد لله ربنا سهل وجمعت شوية كلام بس الموضوع راح من دماغى .. لكن عشان انا قلت معظم اللى انا عاوزه ..

حد يقول لى يا فشكول يا منيل على عينك يا اللى عاملى فيها فيلسوف وحكيم والاخر عامل فيها بتاع جيش وتكتيك وبتعرف وبتفهم فى الحرب .. والله ما بفهم ولا حاجه .. دا الموضوع باين زى الشمس .. ما علينا .. لو يا فشكول اللى قلت عليه دا اتعمل .. يا ترى يا هل ترى كانوا الغزاويين حيكسبوا الاسرائيليين .. اقول لكم لأ طبعا .. بس ما كانش الموضوع حيبقى كده ... المجزره دى .. والدم اللى بالعوم ده .. والجرحى اللى زى الرز دول .. وكان الاسرائيليين برضه حينوبهم من الهم جانب .. وكانوا برضه حيخسروا كتير مش 10 عساكر وضابط وكان الطيار اللى واقف فى السما وعمال يتغندر ويضرب يمين وشمال كان القذائف بتاعته نصها ولا تلتينها راحت بعيد عشان ماهوش قادر يضرب بامان مش ما حدش بيقول له ليلة اهلك هباب .. كان القطع البحريه كانت حتبعد عن الشاطئ شويه .. يعنى كل ما المعده بعدة عن الهدف يبقى النشان مش صح بنسبه كبيره .. وكان العساكر اللى راكبين الدبابات والمجنزرات عملوا حساب للقذائف المضاده للدروع وكانوا خافوا شويه .. مش زى دا الوقت ما حدش بيقولهم ليلتكم سوده والخسائر البشريه كانت حتكون اقل من الربع .. وكانت حتتغير حاجات كتيره قوى .

يا اخوانا ... جماعتنا من المحيط للخليج بيهرجوا ... واحنا كمان مش احسن منهم .. بس هما عايزين مصر تحارب وتقاتل لآخر نفس مصرى وآخر راجل فيكى يا مصر .. واحنا ما عندناش مانع ... دا واجب قومى ومقدس ... بس مش لوحدنا .. حد ييجى معانا وحد يجوع شويه عشان الحرب زينا .. ولو اننا بحرب جعانين ومن غير حرب برضه جعانين .. المفروض ان كلنا نحارب .. كل العرب امجاد يا عرب امجاد فى بلادنا ماحناش كرام وعبيد ومضروبين بالكرباج.

يا جماعه انا لسه عايز اقول كلام كتير بس البوست ما يستحملش اكتر من كده عشان قلت لكم قبل كده لازم نروح الجم ونربى مجانص (صواريخ الحيه) وعضلات ( المضاده للدروع ) وسواعد مفتوله ( الضفادع البشريه) ويا دوب ما فاتش شهر وحصل اللى حصل .. لكن بندن فى مالطه .. ولا حد سامع .. ولا حد فاهم ولا حد فكر ولا حد شاف .. كله عمال يقول شعر .. وخطب عنتريه .. المصيبه ان مجلس الامن اصدر قرار بوقف القتال بس اسرائيل مش ملزمه قانونيا بقرار مجلس الامن الا من لحظة ابلاغها به رسميا .. وبان كى مون السكرتير العام للامم المتحلله حيروح اسرائيل يوم الاتنين .. يعنى بعد ما يتنفذ المخطط بالكامل وبعد ما تخرب مالطه

شفتم حجم المؤامره على الفلسطينيين قد ايه ؟؟؟؟؟؟؟؟؟؟؟؟؟؟؟؟؟؟؟

امجاد يا عرب امجاد


الجمعة، 2 يناير، 2009



تاج من ابناء كثيرون مدونون اهدوه لى واشكرهم على ثقتهم فى وكل حب وتقدير لهم .. وانا على الرغم من انى لا احب التيجان .. لكن حاحاول اكتب التاج ده .. وبرضه اخليه على مزاجى انا ولأنى هذه الايام امر بظروف عائليه صعبه وربنا يعديها على خير وما عنديش وقت للنت وعشان اصحابى واحبابى المدونين ما اغيبش عليهم وعشان كمان التاج سهل ومش عايز تحضير وممكن اضرب تاجين تلاته بسهوله قمت بكتابته


1- لو كان ينفع تختار عصر تعيش فيه هيبقى انهى؟ ومين الحاكم؟


فى ظروف تانيه كنت حاختار العصر الفاطمى . عشان اشوف بنت خمارويه (قطر الندى ..وكنت حاطلب ايدها من ابوها .. صحيح هو مش كان حيرضى .. لكن كنت حاعمل اللى على خصوصا وان (قطر الندى) بيقولوا كانت حلوه قوى .. لكن للظروف الحاليه وظروف غزه انا موافق على العصر الحالى .. بس يا ريت اكون انا الحاكم وافتح المعابر .. حتى لو كانت حماس غير شرعيه وانها لا تمثل الشعب الغزاوى كنت انا امثل الشعب الغزاوى .. وكنت ابقى ولى امرهم واغيثهم واجيرهم من الهم اللى هما فيه ده وكنت وانا الحاكم برضه .. البس حزام ناسف وافرقع فى الصهاينه.على الرغم من انى عقلانى ومبحبش العاطفه لكن اليوم جلست امام قناة الجزيره والبى بى سى كتير وامبارح قناة الساعه وسمعت مصطفى بكرى وكمان سعت مواطنه بتصرخ باعلى ما فى صوتها وكانها بتولول وعماله تدى الحكام على قلبهم بالكلام ومن ساعتها وانا مكتئب .


2- ايه اكثر حاه بتحبها فى رمضان؟


اكتر حاجه بحبها فى رمضان .. اللحمه .. ثم اللحمه .. ثم اللحمه .. بس هى فين .. اصلها بتتغندر علينا وبقت غاليه قوى .. لكن انا بقول هى اكتر حاجه بحبها .. مش مهم بقى هى تيجى ولا ما تجيش .. تتغندر على ولا ما تتغندرش هو يعنى كل حاجه انا عايزها بتيجى .. يعنى مثلا لو عايز امد الغزاويين بالسلاح .. دا ممكن .. آهو انا اقول على اللى نفسى فيه وخلاص ورزقى على الله


3- اوصف أجمل فطار ممكن تفطره؟


اجمل فطار ممكن افطره .. اولا .. كوب من عصير المانجو .. ثم حتة لحمه .. هو يعنى الكلام بفلوس .. اللحمه هى اللى بفلوس .. بعدين .. برضه حتة لحمه .. ان شالله ما عن حد حوش .. اصل اللحمه بقت المنى والطلب .. وبعدين خلاص . مش عايز حاجه.


4- لو انت حاكم هتكون عادل ؟ وهتعرف ازاى؟


لو انا حاكم .. ما اعرفش حاكون عادل والا ايه .. لكن اهم حاجه ان اوصى وزير الفلوس يجيب لى شيك بـ 100 مليون دولار واقوم على طول حاططهم فى بنوك سويسرا .. هو يعنى انا ما ليش نفس .. بعدين حاخلى الواد اسامه ابنى وليا للعهد .. ومحمود الولى التانى للعهد وبعدين الواد احمد ابن ابنى الولى الثالث للعهد واوصيهم ان يخلوا الحكم فى ايديهم طول عمرهم وان كل واحد لما يمسك الحكم يقوم يوصى وزير الفلوس بشيك برضه بـ 100 مليون دولار .. يعنى زى ابوهم .. اما ل يطلعوا من المولد بلا حمص .. كمان حاخلى طياره فى المطار عشان لو قامت ثوره على ولا حاجه اقوم اركب الطياره وجرى على بره .. وطبعا الفلوس مستنيانى هناك .. وبعدين لا حاحكم بالعدل ولا حاجه .. عدل ايه فى الحوش دول .. دى الشعوب كلها حوش وعايزه واحد يشكمهم وبعدين ما بيعرفوش حاجه .. هما يعنى حيعرفوا اكتر منى .. دا انا الفيلسوف وانا الحكيم .. وكلامى كله حكم وحكمتى اكتر من الناس الحوش دول كلهم


5- مين أكتر اعلامى بتحبه؟


اكتر اعلامى بحبه .. عمرو اديب ..وكمان حمدى قنديل .. وكمان منى الشاذلى ... قمر .. والله قمر 14 ولو ممكن يعنى ازود من عندى مين الفنانه اللى بتحبها .. يعنى البت الحلوه الاموره دى اللى اسمها نانسى عجرم وهيفاء ويا سلام لو استوردوا لى البت اللى احلى من القمر اللى اسمها كاترين زيتا جونز .. مش انا الحاكم بقى .. يعملوا لى اللى انا عايزه


6- لو ممكن شغلانه تانيه تختار ايه؟


شغلانه تانيه .. كان نفسى اكون نجار .. اصل النجاره دى فن وفشكول فنان وبيحب الفن .. اصل قطعة الخشب دى يا سلام لو فى ايد فنان يعمل سرير ولا مكتب ولا باب فى منتهى الجمال .. ولو ما فيش نجاره .. ممكن اكون ترزى .. برضه تشكيل حتة القماش كلها فن وحرفه عاليه .


7- تانى بلد تحب تعيش فيه بعد مصر ؟


وتانى بلد ليه .. ممكن نخليها اول بلد .. شوفوا .. اى بلد من بلاد اوربا الغربيه .. بس بلاش اى بلد عربى بيسحلوا فيها الناس بتاعتها وبيطلعوا عينهم وبيعاملوهم على انهم حيوانات مش بنى آدمين .. لكن اوربا الغربيه .. ناس عايشه .. كفايه ان كل سنه حاروح اصيف او اشتى فى بلد زى مصر ولا زى سويسرا ولا زى الاردن ولا زى ... اللى يعجبنى .. اوعى حد يقول الاسلام .. الاسلام فى كل حته .


8- اوصف ترتيبات أجمل فرح ممكن تحضره؟


اجمل فرح ممكن احضره .. طبعا بما انى الحاكم .. فرحى انا .. هو فيه احسن منى .. طبعا انا الحاكم .. فى يوم الحنه .. اقعد على كرسى والحنه فى ايدى ورجلى محطوطه على كرسى الحمام عشان الحنه ما تبوظش .. ويوم الدخله ..اركب حصان والف البلد والناس تزف العريس .. واروح على دار العروسه .. اللى هى مثلا يعنى كاترين زيتا جونز واقوم واخدها من ايديها وشاددها وبحركه فروسيه تلاقيها راكبه ورايا .. وهاتك يا جرى بالحصان والجدع يلحقنى ونخلف بقى صبيان غير الواد اسامه والواد محمود .. حيبقى شعرهم اصفر وناعم وعينيهم خضرا مش زى عين اسامه السوده وعين محمود البنى .. لا حيبقوا ولاد ملك بقى وحيبقوا اولياء للعهد . ولو رجع بينا الزمان شويه كنت اعمل فرح لزواجى من اللى كانت بت حلوه سنيوره جين فوندا او كارول وولش .. او جريتا جاربو .. او الوليه الاموره جينا لولوا بريجيدا .. مش انا ملك .. حد يقد ريقول لى لأ ولا حد يطول يتجوزنى.


9- بتراعى كلام الناس والقيل والقال؟ وليه؟


طبعا براعى كلام الناس والقيل والقال ... ليه ؟ .. عشان احنا مش عايشين لوحدنا .. لازم الواحد يعمل حساب لكلام الناس .. لكن فى حدود .. المهم انه يعمل حساب .. والانسان السوى .. فى بيته وفى الشارع وفى مكتبه وفى كل حته .. وكلام الناس لو مش حلو يبقى الانسان مش سوى.


10-صحيت من النوم لا موبايل ولا كمبيوتر ولا كاميرا ديجيتال ورجعنا لعصر الأحصنه والحمام الزاجل؟


يا ريت عشان يبقى ما فيش ثمن كروت كل عيل يخلص يقول يا بابا عايز كارت والحاجه بقى ام اسامه عايزه كل اسبوع كارت وانا كمان عايز كارت والعمليه بقت مهببه كروت ولا كمان حادفع نت .. يا دوب حصان ومربوط فى الزريبه وشوية تبن وشوية كسب وخلاص.


11-لما بتحب تهرب من كل حاجه بتروح فين ؟


يا سلاااااااااام .. بروح ارضى واجيب الغبيط بتاع الحماره اللى بنشيل فيه الرتش والسباخ .. وافرشه تحت شجرة التوت وانام فى عز الحر والهواء بيبقى جاى من بحرى ويخبط فى نافوخى وعلى طول الواحد ما يوعاش لنفسه الا المغرب .. وساعات بقى العصر اخلى الواد يجيب لى كوزين دره من الدره النحت .. اصل بقى بعيد عن السامعين الاسنان مش فى حاله جيده .. قال عايز اتجوز كاترين زيتا جونز قال .. ده انا ما انفعش فى حاجه خالص ومن تانى يوم الوليه حتصوت وتولول وتقول يا بختك المهبب يا كاترين .. يا بختك المنيل يا كاترين .. يا نصيبتك السوده يا كاترين .. الغراب يا وقعه سوده .. وبعدين اخليه يعمل كباية شاى من الشاى الهباب على الراكيه بتاعة الدره والكبايات القزاز الصغيره اللى بيبقى فيها يا دوب بقين شاى .. بس شاى اكسييييييير


12-امتى أول مره أخدت فيها نفس وقلت ياااااااه أنا كبرت؟


أما البت ملك حفيدتى من بنتى الهام جت ما حسيتش قوى يعنى .. بس اما الواد احمد ابن الكلب ابن ابنى اسامه جه .. وامه بتقول روح لجدك يا احمد .. وقع المحظور وحسيت انى كبرت .. وانا كنت فاكر نفسى شباب وبفكر قال اتجوز كاترين زيتا جونز .. جاتنا نيله .. يا اخى روح شوف لك قبر ارقد فيه .. على رأى اخوانا الصعايده .. قبر يلمك.


13-بتشرب سجاير ولا لا؟ وايه رأيك فى الرجاله والستات اللى بتشرب؟


للاسف آااااه بشرب سجاير .. وبعدين عايزين رأى فى ايه .. يعنى حاقول ايه عن اللى بيشرب سجاير وانا بشرب سجاير .. لم نفسك يا واد منه لها له.


14- بتعرف ايدك الشمال ازاى؟


كتير بألبس جلابيه واكويها واعمل فيها عمده .. ولما احط ايدى فى سيالة الجلابيه اعرف ان التانيه الشمال عشان سيالة الجلابيه بتبقى على اليمين

15- اكتر اله موسيقيه بتحبها؟


يااااااااااه .. حتفكرونى باللى مضى ... اكتر أله بحبها هى آلة الجيتار ... لانى كنت زمان عازف جيتار ممتاز ... كنت العب مولدى .. وكنت العب كمان رتمست ... وكنت كمان لما يغيب البيز مان .. كنت العب بيز جيتار .. وكنت زمان وانا صغير فى السبعينات عضو فى فرقة اسمها دريمرز وكنا بنعزف فى شارع الهرم وكنت بآخد فى الليله 15 جنيه وآخر النهار اروح مديون بـ 5 جنيه .. كانت ايام .. الحمد لله ان ربنا ابعدنا عنها .. لكن عندى جيتار اسبانيولى .. ولما يوحشنى الكيف اجيبه وادندن عليه شويه


16- ليه قله الذوق والنخوه اتعدموا؟


شوف يا اخوانا .. من يوم ما قامت الثوره وشوية العسكر مسكوا البلد علمونا ان ارفع رأسك يا أخى .. قمنا كلنا رفعنا رأسنا على بعض وقلينا ادبنا على بعض باسم الحريه .. لكن ما قدرناش نرفع رأسنا ونطالب بحقوقنا من الحكومه .. وعشان كدا .. عشان نثبت اننا احرار نقوم نرفع راسنا على بعض ونقل ادبنا على بعض وكل واحد همه مكفيه ويقول ما ليش دعوه وانا مالى .. وهكذا انعدمت كل القيم وكل الشهامه وكل حاجه.


17- ايه الحاجه اللى لو حصلت هبقى سعيد ؟


مش عارف .. اصل السعاده عندى مش باسباب .. ساعات من غير سبب تلاقينى سعيد .. وساعات من غير سبب برضو تلاقينى مكتئب .. لكن عموما اما يتجمع ملك واحمد ومحمود الحفيد الثالث من الهام وابهاتهم وامهاتهم ويبقى البيت يضرب يقلب والبطاطين على الارض والفازات متكسره وما اعرفش اشوف ولا اسمع قناة الجزيره .. ولا حتى تلاقى مكان تقعد فيه والشقه كلها مليانه مخدات مرميه على الارض والاقى ام اسامه صوتها عالى وعماله تصرخ من العيال .. اكون يومها فى منتهى السعاده.


18- تحب أرض زراعيه ولا اجنس عربيات ولا كام عماره ولا فلوس فى البنك؟


والله اللى يجيبه ربنا كويس .. الحمد لله انا عندى ارض زراعيه .. وعندى عربيه كحيانه .. وياريت تجيب فلوس وما لكش دعوه انا حاعمل بيها كل حاجه .. بس المهم الصحة والستر .. ما هو احنا المصريين عشان ندارى غلبنا وخيبتنا ووكستنا نقول الستر .. هو احنا حيلتنا غيره


19- تحب؟ البحر ولا النيل؟


بحب الاثنين .. النيل عشان له ذكريات جميله ظمااااااااان ... قوى من ايام فحت البحر ... والبحر .... ما اقدرش اغيب عنه سنه واحده ولحد الوقت وانا بحب العوم والبلبطه وولادى يجروا ورايا فى البحر عوم ولا يلحقونيش.


خلص التاج .. وخلصته بسرعه من غير ما اعد له ولا اعمل له مسوده .. بس عشان خاطر رئيس التحرير ربنا يعلى مراتبه ويبقى رئيس مجلس ادار التدوين اللى كل شويه ييجى يعلق ويقول لو ما عملتش بوست حارفدك .. وعشان الغالى فركشاوى هو كمان اللى بيستعجلنى .. اصله صاحب رئيس التحرير وعشان كدا بخاف يفتن على لرئيس التحرير وبحاول اراضيه عشان ما يشتكينيش لرئيس التحرير اللى ممكن يرفدنى .. مش كل الريسه عندنا بيقدروا يرفدوا وكمان يسحلوا ويضربوا اجدع واحد على بطنه .