السبت، 27 ديسمبر، 2008



بعد عدد من البوستات الساخته والتى عرضت فيها اختلافات فى وجهات النظر ونقاشات حاميه حول عدد من القضايا الملحة والمعاصره وكانت كل الاختلافات والمناقشات ذات اثر فعال فى نشر ثقافة الاختلاف وبحيث خرج منه جميع المتحاورين والمتناقشين والمختلفين فى وجات النظر بدون اى خسائر بل بالعكس زادت اواصر الحب والاحترام بينهم .. وهذه لبنه بسيطه وبذره صغيره نرجو ان تنمو نحو نشر ثقافة الاختلاف وادبه. وبعد التجديدات الشامله للمدونه والديكورات الجديده والتى كلفتنى غدوه مكلفه للبنت سومه المجنونه بنت اختى صاحبة مدونة مجنونه فى بلد عاقل والتى قمت على اثرها بعمل غدوه مكلفه كلفتنى حتة لحمه زياده ومناب زياده للبت سومه المجنونه وامها .. غرامات باهظه تكلفتها من اجل خاطر هذه التجديدات ..

يعود فشكول فى هذا البوست الى الشخصيات المؤثره فى التاريخ المصرى ونتكلم فى هذا الجزء عن الفرعون المصرى خوفو بانى الهرم الاكبر - نم نفرد بعد ذلك بوست هام وهام جدا عن المبنى الحجرى نفسه والذى هو الهرم الاكبر باعتباره شخصيه اعتباريه اثرت ولا زالت تؤثر فى مصر ومكانتها .



الحلقه الثالثه




خوفو (خنوم خوفو) بانى الهرم الاكبر

هو ابن الملك سنفروا وابن الملكه حتب حرس وتزوج من الملكه مريت ابت اس وكذلك تزوج من الاميره الجميله حنوت سن . اما اولاده فكان اكبرهم الامير كاوعب والذى يعتقد انه مات فى حياة ابيه الملك خوفو وايضا من ابنائه الملك جد اف رع والذى تولى بعد ابيه الحكم مباشره والابن الثانى كان خفرع والذى تولى الحكم بعد وفاة اخيه جد اف رع وكان من ابناء الملك خوفو والذين لم يتولوا الحكم او الملك الامير ددف رع والامير ياوف رع والملك خوفو وهو ثانى ملوك الاسره الرابعه بعد الملك سنفروا وهو بانى الهرم الاكبر فوق هضبة الجيزه . وكان اول من اقام هرما من ملوك مصر هو الملك زوسر وهو الهرم المعروف بالهرم المدرج فى سقاره وقد تكلمنا عنه فى الحلقه السابقه فى معرض حديثنا عن امحوتب (الآتى فى سلام) وقد أقام بعده الملك سنفروا هرمين الاول فى دهشور والثانى فى ميدوم ولكن خوفو ترك هذه الجهات واقام هرمه الضخم فوق هضبة الجيزه وذلك لقربها من عين شمس مقر عباده الاله (رع) وذلك لكونها متسعه ومرتفعه تشرف على كل من حوله - ويعد الهرم الاكبر اضخم الاهرامات الموجوده فى مصر وقد زالت كسوته التى شيدت من الحجر الجيرى وقد كان من بواعث الملك خنوم خوفو لبناء الهرم ان كثيرا من المصريين كانوا عاطلين عن العمل فى مده الفيضان من كل سنه وذلك لخلوهم من اعمال الزراعه - هذا سبب من اسباب بناء الهرم الذى وصل الينا ولكن السبب الاساسى فالله به اعلم ولا زال حتى الان لم يقطع به ومن ضمن اسباب بناء الهرم ان خوفو اقامه ليكون مأواه الابدى . الا انه لم يمكث فيه طويلا اذ وجد تابوته المحفوظ فى حجرة دفنه خاليه خلوا تاما من كل شيئ نتيجة لاقتحامها فى عهد الثوره التى قامت بعد تدهور حكم ملوك الاسره السادسه لما فى الحجره من آثار تخريب .
على اننا فى تتبعنا لاخبار الملك خوفو - لا نجد له الا آثارا باقيه فى مدن مثل - قفط - دندره - وتل بسطه - وترك اسمه منحوتا فى مناجم النحاس والفيروز فى شبه جزيرة سيناء , وتخبرنا الآثار عن نشوب معارك بينه وبين الساميين الرحل الجائلين فى هذه الجهات وذلك ليحمى الحملات التى كان يرسلها الى هذه الجهات للحصول على المعادن والاحجار وكان يطاردهم الى مسافات بعيده شمالا حتى سنحت له الفرصه للاختلاط بالمدنيه الشماليه الشرقيه مثل المدنيه البابليه
هذا ما هو معروف عن الملك خنوم خوفو

غير اننا نعتقد ان بناء الهرم الاكبر وتوجيه نظر العلماء الى الكشف عن اسرار هذا الهرم قد نحاهم بدرجة كبيره عن الكشف عن شخصية الملك خوفوا واعماله .

على اننا نذكره فى هذا الموضوع لانه بانى اعظم اثر تاريخى على وحه الاطلاق مازلت اسراره كلها لم تكتشف بعد ولا يعرف عنه شيئا .. وكلما تبحرت فى علوم الهرم .. كلما ازددت جهلا به وكلما وجدت انك تحلق فى سراب هذا ولا يجب ان نسلم بسذاجة الكثير من الاطروحات التى يضعها الباحثون والاثريون عن هذا الاثر العجيب .
والله اللقاء فى حلقه قادمه عن الهرم الاكبر.

الجمعة، 26 ديسمبر، 2008

سومه وصلت

البت سومه جات وبتصلح المدونه متاخدوش فى بالكم
تحديث
يا سلاااااام البت سومه دى بتعرف حاجات كتير قوى وعملت حاجات كويسه وبرضه علمتنى اعمل ايه بقى لما اتزنق ..
بس هى يعنى ما عملتش اكتر من اللى فشكول كان حيعمله .. هى حكايه والا ايه .. اصل فشكول بيعرف يفشكل فى كل حاجه يعنى حيعجز عن شويه كمبيوتر .. ههههه
أظن شكلها بقى احسن شويه .. مش كدا يا صفاء

الأربعاء، 24 ديسمبر، 2008

السبت، 20 ديسمبر، 2008

فشكله عن جيفارا .. واشياء اخرى


(تحديث)
وصلنى تعليق من الآنسه صفاء بتاعة المنيا اللى ما بتبطلش مناكفه فى وانا اعترافا بالخطأ انشر تصحيحها الاتى(طبعا بما انى مناكفه ومعارضه عمال على بطال فيسعدنى انى اقولك ان جيفار تولى وزارة الصناعه فى حكومه ما بعد الثورة فى كوبا وانه دمر الصناعه تماما لأنه راجل ثورى ملوش فى الحكم ونظمه ولما فشل كــ وزير هو من نفسه استقال وترك الوزاره)وهذا كلام صحيح كنت قد نسيت ان اذكره


سألتنى الزميله العزيزه سوووول ويزبر عن ايام عبد الناصر وجيفارا وايام الثوره وانا مش قادر ما اقولهاش حاجه وعشان خاطر ماما اموله العسوله مش عارفه تدخل عندى قلت اغير الموضوع واعمل موضوع جديد يمكن تقدر تدخل عندى منه .

انا كتبت لسووول عن الموضوع بصفه خاصه وهاأنذا انشره اليوم بصفه عامه لكل القراء وقد كان نص ردى بعد ان قمت بتعديله تعديلا لم يخل بالموضوع كالتالى:

أااااه يا غلبى .. اصل البنت دى طالعه لى فى البخت اليومين دول .. هى كده عايزه بوست كامل عشان الكلام دا ما يتلخصش وانا مش ناقص وجع قلب .. لكن الامر لله .. كل الناس عمالين يقطعوا فى هدومى عشان البوست المنحوس بتاع الجزمه اللى عندى .. انا بعد كدا حكتب اللى يرضى الناس ويريحهم .. ما حدش عايز يفكر بعقله .. ما حدش عايز يشوف اللى ورا الكلام ما حدش عايز يقرا اللى بين السطور.. كل الناس بتفكر بغرائزها .. اروح لبعض المدونات الاقيهم كاتبين عكس اللى انا كاتبه وتلاقيهم بيوافقونى عندى .. انا زعلان جدا .. ياريت نتحاور ونتناقش .. ما علينا غريزة الانتقام والثأراحدى غرائز الانسان ولو بحدفة جزمه هذا كلام ما فيهوش فصال .. والصحفى العراقى بطل وكل حاجه وربنا معاه واحنا كلنا معاه .. بس الموضوع اخد اكتر من حجمه وبعدين جات الزميله وكمان بتسألنى اسئله لو حد قرأ الرد عليها حينقم على اكتر وحيزعل منى اكتر .. اصل ثقافتنا اللى بيغذوها لنا من سنة 1952 هى هى نفس الثقافه بتاعة اليومين دول والناس معذوره ما همش شايفين غير اللى هما عايزينهم يشوفوه ثقافة 0 5 سنه وما فيش قدامهم وجهة نظر أخرى والا يبقى عميل وخاين ومرمى فى حضن الغرب وبيستعين بالاجنبى .. وصعب ثقافة 50 او 60 سنه تتغير كدا فى يوم وليله مش كدا والا ايه مش هى دى ثقافتنا اللى مش قادرين نغيرها ,, وبعدين ارد على اسئلتها : هى كانت بتسأل عن عبد الناصر وعن جيفارا وعن ايام المد الثورى والاتحاد الاشتراكى ومنظمة الشباب ..

استعنت على الشقا بيك يا رب .. يا منجى الجحش من الوحش يا رب:

أولا.. بتسأل عن حاجات استوعبناها فى سنين كثيره وعايزانى ارد عليها والحقيقه هى جرعه كبيره .. وانا خايف عليها تاخد صدمه ثقافيه .. ومش عارف اعمل لها ايه .. هى مصره وانا مش قادر ارد لها طلبها وفى اختصار ولو ان دا برضه كلام مش حيعجب ناس كتير .. لكن دى وجهة نظرى

الاتحاد الاشتراكى : الحزب الوطنى : هو الرأى الواحد : اللى الرئيس يقوله - يبقى صح - حتى لو غلط - مش مهم يمشى على راس البلاد والعباد ... ايه رأيكم الاتحاد الاشتراكى مش طوروه الآن وبقى الحزب الوطنى .. سيبكوا انت من الاحزاب الديكوريه اللى انتوا شايفاها ثم نوصل بالكلام لمنظمة الشباب : دى كانت منظمه تضم تقريبا كل شباب مصروعيال مصر من سن 12 او 15 سنه وكل اللى كانوا بيعلموه لنا فيها: ما تخليش حد يقول على الثوره حاجه وحشه .. جمال عبد الناصر صلى الله عليه وسلم ... رجال الثوره رضوان الله عليهم واشياء كتيره من هذا القبيل واللى يقول غير كده يبقى مرتد ومش مسلم وعدو لله وعدوللوطن وعدو ليك شخصيا .. وطبعا كان الواحد يخرج من التدريب ومستعد يقول ويفتن على ابوه واخوه وأمه كمان وماكانش حد يعرف له جره .. ودا كلام حصل كتير واسألوا شعراوى جمعه وزير الداخليه فى ذلك الوقت ... حلو كده .. واضح .. مفهوم ... وصل الكلام .. يا رب أخلص اما عن جيفارا وعبد الناصر بقى : اصل كان صيتهم مسمع فى العالم كله .. وكانوا اما اى شعب ينوى يقوم بثوره يبقى لازم صورة جيفارا وعبد الناصر فى خيالهم .. اقول لكم حاجه .. عبد الناصر كان فكره تحررى .. كان فعلا راجل بيحب بلده .. بس كان فكره اكبر من امكانيات بلده ودا اللى ودانا فى داهيه واما اتنحى عن الحكم فى 67 عملنا مظاهرات وعملنا اضرابات وبهدلنا الدنيا عشان نرجعه تانى .. احنا كده تيجى لنا مقشره لحد عندنا وما نستغلش الفرصه شفتم احنا بنضيع الفرص ازاى .. تفتكروا حرب 67 انتهت اثارها .. لأ ..لأ .. لأ ..احنا عايشين فى الامر ده لحد الوقتي بصوا حواليكم كل اسباب الانهيار اللى احنا فيه نتيجة للحرب دى واللى كان السبب فيها عبد الناصرحتى عندما انتصرنا عسكريا فى 73 وكان انتصار خرافى ما كانش حد يقدر يعمل الانتصار ده غير مصر والمصريين ..ولا حتى امريكا لو كانت فى مكانا بس ما استغليناش النصر ده بالداخل كويس .. عشان كدا لما قلت فى البوست بتاعى كان لازم نروح الجيم ونربى مجانص وعضلات .. ودخلنا حرب 67 من غير مجانص وعضلات ولا حتى دراع مفتوله واما جيفارا مات حسينا ان امنا ماتت .. بالرغم من انه ما كانش مصرى .. بالرغم من انه مش مسلم .. مش عربى خالص .. لكن بيمثل قوه من قوى التحرر فى العالم ورمز من رموز الثوره .. وعلى فكره كان رافض انه يكون وزير او رئيس او اى منصب سياسى هو كان واهب نفسه للثوره العالميه وكنا اما بنسمع اللى بيعمله جيفارا .. كنا بنبقى فرحانين وشمتانين فى قوى الامبرياليه العالميه ..اصل ايامها كنا لسه طالعين من حرب 67 .. بس كان ابونا عبد الناصر لسه عايش ...دى كلها كانت ثقافتنا فى الايام دى وكانو دول حلمنا .. جيفارا وعبد الناصر .. هما ابونا وهما امنا وهما انور وجدى ومديحه يسرى وكل حاجه كنا نعلق كل امالنا واحلامنا على شخص .. جيفارا وعبد الناصر واحمد بن بيلا بتاع الجزائر .. بعدين القذافى .. ولما كبرنا وشفنا حال بلدنا وحال امتنا وحال البلاد بتاعة الزعماء دول وازاى انقلبوا على شعوبهم ولما طلعنا بره وشفنا الدنيا شكلها ايه واحنا شكلنا ايه ولما الفضائيات انتشرب وجابت العالم كله لحد عندنا وكشفت المستور وكشفتنا وورتنا حالنا اللى يغم وحال العالم اللى يبسط بدأ بعض الناس يفوقوا ويفكروا.. لكن للأسف معظم الناس بنفس الفكر الثورى الانفعالى .. عبد الناصر هو اللى حط الاصول والقواعد لنظام الحكم .. حتى الان نعيش على نفس القواعد .. ما يغركوش حكاية الاحزاب الورقيه اللى موجوده الان ما زال عبد الناصر حيا الى الآن .. شوفوا الكرسى اتغير امتى ما اتغيرش الا بعد وفاة عبد الناصر .. كذلك السادات ...كذلك ... احنا عايشين بنفس الطريقه .. ما زال الاتحاد الاشتراكى .. اقصد الحزب الوطنى .. ما زلنا نحكم بالميثاق اللى قعدنا ندرس فيه طول عمرنا وما فهمناش حاجه منه مازالت كلمة الفرد الواحد هى العليا وكلمة الشعب هى السفلى .. كان زمان ايام عبد الناصر يقولوا زوار الفجر .. يقصدوا الاعتقالات اللى بتحصل للناس بالليل ... طب ايه اللى اتغير ..يا جماعه انا دماغى حتطق خلاص ..واتقلبت على المواجع يااخوانا نفسى ناكل (كاجو) عارفينه .. نفسى آكل بندق ولوز وتفاح حتقولوا فشكول دا مخه طق .... لأ .. انا ارمز لأشياء .. رحت السعوديه .. وكانت الحاجات دى مرطرطه وفى متناول الجميع .. برضه فى سوريا .. فى لبنان يا عينى على لبنان اشمعنى احنا .. اقصد القدره الشرائيه للناس .. تتطور شويه .. ما فيش فايده .. مش فول وطعميه وفجل .. و خس .. وبالعافيه عدس بـ 14 جنيه ولمانجيب لحمه يبقى عيد وطول عمرنا على هذا الحال وكل يوم نقول بكره ربنا يفرجها ولا يفرجهاش .. هذه كل طموحاتنا .. وما فيش فايده من سنة 52 واحنانقول انشاء الله حتفرج لكن ما فيش فرج زمان كانوا بيقولوا لا صوت يعلوا فوق صوت المعركة .. طب المعركه خلصت وانتصرنا من 35 سنه ايه اللى حصل ايه اللى اتغير علينا .. يعنى لا حريه ولا لقمه كويسه .. هاتوا لنا حاجه من الاثنين طب هاتوا لنا لقمه كويسه زى دول الخليج ومش عايزين حريه ولا ديمقراطيه .. يعنى لا ده ولا ده .. لا حول ولا قوه الا بالله .. فشكول عايز يزوركم فى بيتكم تقدموا له تفاحه - اصول الضيافه يعنى - لكن مش كباية شاى ولو كمان جبتم برتقاله .. ياااااه .. تبقوا انتم كدا من الاقطاعيين .. كنت مره فى مطار القاهره بجيب بنتى اللى جايه من السعوديه ولقيت المطار فيه افواج سياحيه من كل دول العالم وسألت بعضهم انتم وظيفتكم ايه ولقيتها وظائف عاديه من اللى بيقولوا عليها الوظائف الدنيا .. اتارى العالم كله متمتع بحياته وعايش ومهيص واحنا يا عينى علينا امتى المصريين يبقى فى جدولهم السفر للخارج عشان يقضوا الويك اند او الويك يير مش اما الواحد يحوش له مائه ولا مائتين ولا حتى الف جنيه ويروح يصيف فى اسكندريه يبقى عامل فيها الزناتى خليفه .. عارفين انا قلت لنفسى ايه فى المطار .. يا بختكم ببلادكم .. اما احنا فيـا ........ ببلادنا ايه رأيكم .. مخكم سخن .. أنا كمان مخى طق وحاقوم اكسر الكمبيوتر واقطع سلك النت والبس شوال وانزل الشارع واصوت زى النسوان والناس يقولوا على الوليه اتجننت .. اقصد فشكول اتجنن ..ممكن بقى تطلعوا من نافوخى.

الاثنين، 15 ديسمبر، 2008

بذمتكم حد يقدر يشترى الجزنه دى




فشكول بيتكلم بجد من غير فشكله

اعرف ان هذا البوست سوف يثير على المشاكل وسوف يثير ايضا الانتقادات من احبائى المدونين .. ولكن ايمانا منى بالمثل القائل .. يا بخت من بكانى وبكى الناس على .. ولا يضحكنى ويضحك الناس على وتعليقا على موضوع الصحفى العراقى منتظر الزيدى الذى قذف الرئيس الامريكى جورج دبليو بوش بالحذاء وفق ما اذيع بالفضائيات وما نشر فى صحيفة المصرى اليوم نقلا عن وكالة الانباء الفرنسيه وهذا هو الخبر بالنص

تعرض الرئيس الأمريكى جورج بوش إلى موقف لا يحسد عليه أثناء زيارته الوداعية والمفاجأة إلى العراق أمس، حيث قام صحفى عراقى برشق حذائيه باتجاه بوش ورئيس الوزراء العراقى نورى المالكى أثناء مصافحتهما وهتف الصحفى قائلاً «كلب» موجها حديثه لبوش، بحسب وكالة الأنباء الفرنسية.
وبعد المصافحة بين بوش والمالكى فى آخر لقائهما، قام مراسل قناة «البغدادية» الصحفى منتظر الجيدى الذى كان واقفاً بين المراسلين برشق حذائه باتجاههما قائلاً «هذه قبلة الوداع يا كلب»،
لكن بوش ابتسم قائلاً «لقد قام بذلك من أجل لفت الانتباه إليه، هذا الأمر لم يقلقنى ولا يزعجنى، أعتقد أن هذا الشخص أراد أن يقوم بعمل يسألنى الصحفيون عنه، لم أشعر بأى تهديد» وقال ضاحكاً بعد أن تفادى الحذاءين: «كل ما أعرفه أن مقاسهما ١٠»،
وقام رجال الأمن العراقيون بتطويق بوش وطرد الصحفى من القاعة، ونهض صحفى عراقى آخر قائلا: «إننى أعتذر باسم الصحفيين العراقيين».
من غير ما حد يزعل منى .. تعالوا بقى نتكلم بجد شويه
ايه اللى عمله الصحفى العراقى منتظر الزيدى ... هل تحررت العراق ... لا ... أمال ايه البطوله والفداء اللى عملهم ... لا شيئ ... ايه اللى الصحفى العراقى ضحى بيه ... نعم اكيد هو ضحى بحاجات كتير .. اكيد حريته على المحك .. اكيد حياته على المحك .. اكيد هو حيواجه متاعب كتيره .. لكن فى الأخر .. ايه اللى اتحقق ؟ ... لا شيئ .. شو اعلامى ... صبركم على ... ما تهيجوش وتطلعوا بمظاهرات ضدى وتطالبوا باسقاط واعدام فشكول .. احنا قلنا حنتكلم بجد شويه .. ايه بقى الكلام الجد؟
الكلام الجد ان امريكا مفتريه ... صح .. ان امريكا حاربت ودمرت العراق .. برضه صح .. ان امريكا بنت ستين فى سبعين ... ما اختلفناش .. ان امريكا عايزه الحرق ... والله فعلا دا كلام معقول ..
طب فيه ايه يا فشكول ... اقول لكم .. اصل فشكول مبقوق من اللى احنا بنعمله وكمان من اللى احنا ما بنعملهوش ومفروس وتعالوا نبتدى الموضوع من الاول :
فى 11 سبتمبر هدينا ادنيا على دماغ امريكا .. طبعا تستاهل ما اختلفناش .... لكن ايه اللى كان عندنا ... كان عندنا جون كويس .. قولوا انتم.. طب كان عندنا استوبر كويس ... قولوا انتم .. طب كان عندنا ليبروا ... برضه ردوا انتم .. حتى خد وسط كان فيه ... ما تردوا يا جماعه ... ما كانش عندنا حاجه خالص .. طب كانت ايه استعداداتنا ....ولا حاجه ... حتقولوا ان اللى عمل كدا جماعات بيقولوا عليهم ارهابيون ... طب ما هم مننا ... طب بزمتكم مش كنا فرحانين ومزقططين وشمتانين كمان ؟ ما علينا ... ممكن تقولا دول اليهود اللى دبروا ... صح هو كدا فعلا ... بس يا حلويين يا طعمين يا ولاد يا سكر انتم مين اللى نفييييذ ...... سؤؤؤؤؤال ؟
لفت الايام ودارت الايام والغم كله جه على دماغنا وبقينا نسقط كأوراق التوت الذابله ... شوفوا اللى حصل فى افغانستان ... فى العراق .. فى فلسطين وفى غزه .. فى الصومال ... فى جنوب السودان وغربه فى دارفور ... فى لبنان .. شوفوا عايزين يعملوا ايه فى سوريا اللى شاربه من الهم زينا بالضبط خدووووا بالكم كل دول محاوطين مصر من كل الاتجاهات ... الغم المسييح انهم حيدوا ليبيا ... خدوووا بالكم .. يعنى بقينا بين فكوك الكماشه ... مش فكيها بس ... فكوووووك .. حرجتونا عن الموضوع .
شوفوا يا جماعه ... احنا خيبتنا ثقيله ومرطرطه ...عايزكن تفكروا معايا فى حاجه صغيره خالص بتحصل قدامنا جميعا ... ايه رأيكم فى خطباء المساجد لما الواحد فيهم يلعلع وصوته يشخلع ويفنجل بقه ... مش عينيه ..ويقول .. اللهم عليك باليهود قاتلى الانبياء ... واحنا فاتحين حنجرتنا وفرحانين ونقول ...آمين ...ولا بنفكر ولاغييين دماغنا خالص ... اللهم عليك بالأمريكان ... احنا بقى ... آمين ... اقتلهم شرقتله .. امين .. مزقهم شر ممزق .. امين ...شتت شملهم .. امين ... فرق جمعهم .. امين وحوالى ربع ساعه والخطيب عمال يشتم فى الدنيا كلها ويدعى على كل البلاد واحنا نقول امين وخلاص ... ادى كل اللى بنعمله ... ندعى ونقول امين وخلاص .. هيجنا الدنيا كلها علينا وخلاص .. اظن العالم كله حيقف يتفرج علينا وهو عارف نيتنا فى اننا عايزين نمزقهم شر ممزق ونيتم اطفالهم ونرمل نسائهم ...والحاجات دى وحيسكت .. لو ما كانش عندنا اعداء ...يا سلام !!! نقدر نعمل اعداء كتير وبسهوله ... احنا حنغلب يعنى ... طب فكروا بقى فى الدعاء ده ..أنا ما بقولش وحش لا قدر الله ...لأ ... الوحاشه مش فى الدعاء .. الوحاشه فى الامخاخ اللى ورا الدعاء وتعالوا نشوف ...
ماذا اعددنا لليهود والامريكان اللى احنا عايزين نمزقهم شر ممزق وعايزين نشتت شملهم.. كان مفروض من زمان يكون عندنا نووى .. كان مفروض نقدر نعمل طياره نحارب بيها زى كافيرالاسرائيليه حتى يعنى .. كان مفروض نقدر نعمل برضه دبابه .. كان مفروض عمرنا بلدنا بالصناعه والزراعه والمال .. كان مفروض عندنا بحث علمى .. كان مفروض دول النفط اللى بتصرف فلوسها فى تايلاند وبانجوك ومانيلا ولندن وباريس وشارع الهرم ... كان مفروض الاموال دى وجهوها للتنميه المستدامه (ايه التنميه المستدامه دى .. بلاش الكلام المكعبر ده يا فشكول) ... باختصار مع كل الفلوس اللى معانا دى سواء فى بلاد النفط او عندنا ...ما تفكروش ان احنا ما عندناش .. والله عندنا .. احلف ليكم بالرغيف السخن يبرد ان عندنا كتير ويفيض ويزيد .. بس يسيبوه لنا - برضه خرجنا عن الموضوع - كان المفروض الفلوس دى خلتنا من الدول المتقمه والمتحضره والمتمدينه ...مش من الدول الصعلوكه اللى بيدلعوها ويقولوا عليها الناميه ولا هى بتنمو ولا بتتقدم دى بتتشل يوم ورا يوم حبيبى ما جانى نوم .. حبيبى ما جانى نوم .. حبيبى وادينى جيت .. وسميره سعيد وهيفاء واليسا ونانسى عجرم .. والله زى السكر وما فيش منها ... لأ .. والبت اللى اسمها رولا .. يا سلاااااام .. ولا البت اللى ما لهاش اخت فى الدنيا اللى اسمها جمانه ..مش عارف ايه دى .. عظمه على عظمه - ركز يا فشكول انت حتهجص ولا ايه .. ما علهش يا جماعه - اصل انا منكم عربى وما بفكرش غير فى الحاجات الجميله دى ... لأ يا فشكول انت بتتكلم فى الجد .. هو فشكول بيعرف يتكلم الا فى الجد والله ما قلت ولا كلمه غير فى الجد بس ساعات بقول جد مخطرف ومهبل شويه يعنى لزوم الهبل والعبط بتاعنا .. طب شوية تركيز يا فشكول .. آه نسيت اقول لكم قوم ايه ... قوم ايه .. ما هو الحكايات هى اللى احنا شاطرين فيها والشاطر حسن وام سحلول ..هو احنا شاطرين غير فى كده قوم ايه .. نرجع مرجوعنا :
احنا يا جماعه قعدنا على مقعدتنا (اصل الكلمه الاصلانيه ما تتقالش) وقاعدين ندعى على خلق الله كلهم ونشحت اعداء من كل حته من غير ما نعمل حاجه غير اننا نقعد على مقعدتنا (اللى الكلمه الاصلانيه ما تتقالش) وعملنا زى اليهود لما قالوا لطالوط (اذهب انت وربك فقاتلا انا هاهنا قاعدون) واحنا من يومها واحنا بنحب قاعدون دى ومبسوطين قوى بيها وما نعرفش نعمل حاجه غير قاعدون - مسرفون - مبذرون - محششون .
احنا فرحانين قوى ومنشكحين قوى ان الراجل حدف بوش بالجزمه ... الله .. ما فيش احلى من كده .. كفايه علينا ....يعنى شفينا غلنا وخلاص ..ما احناش عايزين حاجه تانيه بس ........... تفتكروا ان:
احنا بالجزمه حررنا العراق؟
ولا كرشنا اليهود من فلسطين ؟
ولا رجعت افغانستان افغانستان ؟
ولا الصومال استقرت وبقت دوله زى خلق الله ؟
ولا خلصت مشكلة السودان ولا عملنا ايه فى دارفور؟
ولا استقرت سوريا وبعدت عن التهديد والضرب والخراب؟
شوفوا فيه ناس تانيه قريب مننا عملت ايه .. وبتعمل ايه ؟
ديمقراطيه ...حد ينكر ...بناء ...حد يقول لأ .. تصنيع ... فيه ...صواريخ...فيه ..تنميه ... أه ... حتى النووى فى الطريق .. ولا حد يقدر ينكر ده .
يا جماعه بدل ما نقعد ندعى على خلق الله كدا تعالوا نقول (اذهب انت وربك فقاتلا انا معكما مقاتلون) مش يبقى احسن : والحكومات بالدرجه الاولى هى المعنيه والشعوب هى الوقود .
يا اخوانا : ان تطهير بلادنا من الداخل يقتضى تحريرها من اعدائها من الداخل والخارج ان اعدائنا فى الداخل هم مصدر كل ما تعانيه بلادنا .. ان اقامة المجتمع الحق على اصول وقواعد ثابته ترضى الجميع يقتضى تطهيره من المفسدين الذين يقتاتون على دم المجتمع .
يا ربت تكونوا فهمتم فشكول .. وتقدروا هو عايز ايه .. ويارب ما تطلعوش فى مظاهرات تطالبوا باسقاط واعدام فشكول .. ولو ان دا وارد من ناس تانيه ... كل الموضوع فشكول عايزنا نبص للداخل ونقويه ونأكله ونشربه وننميه ونصنعه ونزرعه ونوقفه على رجليه .. وبعد كدا نقفل ونقول للعالم كله اللى احنا عايزينه ... مش يقف لنا واحد فى الشارع واللى يفوت عليه يقوم يديله على قفاه وما فيش حد يقدر يرد عليه .. طب وايه الحل بقى .. الحل نروح للجم ونربى عضلاتنا ونكبر المجانس شويه وبعدين نروح بقى للبلطجى واحنا ساعتها حنقدر نضربه على قفاه وما يقدرش هو يضربنا على قفانا .. ومش حيقدر يتكلم ...
طولت عليكم ..ما علهش

الأربعاء، 10 ديسمبر، 2008

فشكول فى العيد


كل عام وانتم بخير ... الواد فشكول كل عيد لازم يروح ويعيد فى بلده هو وكل اخواته الصبيان والبنات .. ابوه الله يرحمه عود فشكول واخواته على الحكايه دى .. العيد يبقى فى دار العيله .. فشكول ابوه مات عام 2002 الله يرحمه رحمه واسعه .. كان راجل ريفى وفلاح اصيل .. كان احسن واحد يزرع القطن .. واحسن واحد يراعى شجر الموالح ( البرتقال واليوسفى والليمون) واحسن واحد بيفهم فى زراعة البطاطس وتجارتها كمان وعشان كدا سنة 69 خزن 2000 طن بطاطس وكان ثمن الطن وقتها 22 جنيه يعنى الكيلوا ب2.5 قرش صاغ .. والدى كان حظه ممتاز- جه الطن نازل من 22 جنيه الى 14 جنيه يعنى الطن يغرم 8 جنيه .. مش بقول لكم ابويا كان حظه حلو قوى ومن ساعتها بطل يتاجر فى البطاطس او يزرعها .. الله يرحمه .


امى بقى كانت ست بيت ممتازه بتقعد طول النهار فى المطبخ وما كنش يحلى لها الطبيخ الا فى الكانون والفرن البلدى اللى ورا الدوار .. آه لو كلتم المحشى الكرنب ولا الباميه اللى مطبوخه على الكانون .. تاكلوا صوابعكم وراها .. كان عندنا حله كبيره قوى يعنى يتحط فيها خروف وكانت امى ايام العيد تطلع الحله دى وتحط فيها لحمة العيد وتسويها على الكانون اللى ورا الدوار .. اخوكم فشكول بقى كان بيحب يجهز الحطب والخشب واقراص الجله - اقراص الجله - ويتولى هو خدمة الكانون والمحافظه على النار فيه ...ماهو اصل السر ايه .. اقول لكم السر ايه:


امى كانت تقول والله يا صلاح انت كلك بركه .. وصلاح اقصد فشكول هو الوحيد اللى يعرف السر .. ولا امى ولا حد خالص يعرف السر .. كان فشكول يقعد قدام الكانون ومستمتع بحكاية الولعه دى .. وطبعا الكانون ورا الدوار ولا حدش شايف حاجه .. يقوم فشكول يشم ريحة اللحمه اما تطيب .. بيبقى لها ريحه كدا .. اللى بيفهم فى الطبيخ يعرف اللحمه طابت من ريحتها .. ييجى فشكول يجيب طبق غويط من المطبخ .. امى حتعمل ايه يا واد .. الواد يقول.. حأخد شوية شوربه يا امى هديه على شغلى قدام الكانون.. امى تقول اوعى تاخد حاجه تانيه .. فشكول .. دا كلام يا امه هو انا برضه آخد حاجه من وراكى .. الحله الانجر دى كان بيتعمل فيها حوالى 15 كيلو لحمه .. شوف بقى شربتهم بتبقى عامله ايه ؟ ... اكسير .. فشكول يا خد الكرنيب (المغرفه) ويغرف له شوية شوربه صغنونه وعليه 3 ولا اربع حتت لحمه وياخد صحن الشوربه وينزل بيه الغيط فى الدره عشان ما حدش يشوف هو بيعمل ايه اصل دارنا كانت جنب الغيطان ... كان فشكول يروح زريبة الطيور ويشوف اكبر دكر بط ولا دكر وز ويروح ناشه بالطوبه فى رأسه .. الحقى يا امه دكر البط حيموت تيجى امى جرى بالسكينه .. طبعا .. امال كنا نتعشى بط ازاى .. فشكول كان بيعمل فى امه فصول منيله بنيله .. والله لحد قريب .. الله يرحمك يا امى .. توفيت فى النصف من رمضان الماضى .. طولت عليكم المقدمه عن مغامرات فشكول فى بيت العيله.


احنا وعقبال عند الجميع وربنا يبارك ويزيد 7 اخوه 5 رجاله و2 بنات المهندس على اخويا الكبير بالمعاش والمهندس محمود اخويا التانى برضه بالمعاش وانا ان شاء الله برضه بعد 4 سنين معاش والمهندس محمد وعبد المنعم اخويا الصغيرفى الرجاله وحاصل على بكالوريوس لا اله الا الله وهو اللى فاتح دار العيله فى البلد وهو اللى بيزرع وبيقلع مطرح ابويا وهو اللى بيديه لنا بناخده من غير ما نفتح بقنا وفيه كمان صباح اخصائيه نفسيه وماجده مدرسة ثانوى ... ولازم كلنا واولادنا نعيد فى دار العيله فى البلد واتعودنا على كده حتى بعد وفات والدى ووالدتى الله يرحمهم .. ولسه بنعمل كانون خلف الدوار ولسه الحله الانجر موجوده ( امال اللحمه دى كلها آنى بوتجاز يقدر يطيبها ) ما فيش غير الكانون


كنا فى العيد الكبير جايبين دبيحه .. العيال ولادنا الكبير من كل عيله اجتمعوا وقالوا اشمعنا ابهاتنا يجيبوا اضحيه واحنا لأ .. وقاموا جابوا دبيحه .. عمهم عبد المنعم هو اللى اشترى الأضحيتين .. فشكول واخواته كانوا مش قادرين يحلقوا دقنهم قبل الذبح ودقننا طويله ما اتحلقتش من 10 ايام ودقنهم عماله تاكلهم وعمالين يهرشوا فيها والحكايه اوفر خالص فى الدقون .. وكنا حاجزين الحلاق عندنا يوم العيد الصبح عشان بعد الدبح ياخدنا بالدور.. قوم ايه .. عبد المنعم اخد العيال ولادنا وخيرهم .. الدبيحه اللى تعجبكم خدوها .. قام العيال وكلوا اسامه ابنى وشريف ابن اخويا على يختاروا .. قام الفالحين اختاروا .. قوم ايه .. تم دبح الدبيحه بتاعة الابهات عشان يحلقوا دقونهم.. وتم عمايل الاتلاث من غير مشاكل (تلت لله .. وتلت للاصدقاء... وتلت للبيت ).. طبعا العيال مش ملتزمين بالسنه زينا وحالقين دقونهم وعايشين حياتهم واخر هيصه .. خلوا بقى دبيحتكم للأخر.. قوم ايه قعد شريف واسامه مع الجزار وييفرقوا الاتلات .. قوم ايه عمتهم صباح وعمتهم ماجده ما كانوش مشتركين فى الاضحيه لا بتاعة الكبار ولا بتاعة الصغار .. مش البنات على حساب اخواتهم .. عندنا كدا فى الفلاحين.. الواد شريف لعمته صباح .. اصل العيال والعمات سنهم قريب من بعض وعيال زى بعض .. يا عمتى صباح .. تعالى ياحلوه اشتغلى معانا وساعدينى فى الشغل .. انتى شاطره انت وعمتى ماجده تلهفوا منابكم على الجاهز يعنى حتاخدى لحمه ببلاش ولا حتى تساعدينى .. يا عمتى ماجده .. ترد عمته ماجده والله يا شريف بعد ما آخد منابى من اللحمه لأركبك جميلى والف بيك فى الغيطان .. عمته صباح .. حاضر يا شريف .. اصلها دى اميره وبنت ناس .. اما عمته ماجده .. برم .. وصايعه زى شريف .. العمات اخدوا منابهم وكل واحده حطت منابها فى شنطة عربيتها وقاموا نازلين فى شريف ضرب .. وهاتك .. الواد يجرى وعماته تجرى وراه .. وصريخ وهرجله .. قوم ايه .. بعد الجزار ما خلص دبح وتوزيع الاتلات قعد العيال يعدوا الكيلوات - اتارى دبيحة العيال نقصت عن دبيحة الكبار بـ 35 كيلو .. وهاتك يا خناقات بين العيال وبعض .. بس مش قادرين ييجوا ناحية ابهاتهم .. وجه الواد أمير ابن محمد والواد محمد ابن محود والواد احمد ابن على ماسكين اسامه ابنى وهاتك يا ضرب فيه .. انت يا دكتور يا جاهل لما تختار مش تختار الدبيحه الكبيره .. امال احنا ذقناك ليه .. والله انت لا تنفع دكتور ولا حتى تمرجى .. اسامه ابنى اصله دكتور بهايم ومعيز وفراخ .. الواد خد ضرب ولا حرامى فى مولد .. البت آيات مرات اسامه اصلها دكتوره صيدليه قعدت تطبطب على اسامه وتقول له أنا مش قلت لك ما تنحشرش فى الغجر دول .. الواد شريف كان مشترك مع اسامه فى جريمة الاختيار.. خد نفسه وقعد بعيد وكان كاشش ومش قادر يتكلم .. راح الواد اسامه على الواد شريف وهاتك يا خناقات معاه .. مش انت ياد اللى قلت لى على الدبيحه دى .. الواد شريف بهدوء .. مش انت يا اسامه بتاع بهايم ومعيز وتعرف احسن منى يا اخى انت متخصص وانا جاهل اعمل لك ايه .. البت بقى رانيا مرات شريف معاها ليسانس تربيه ومن ضمن العاطلين .. يا أسامه رأى شريف استشارى .. جم العيال هايجين تانى ونازلين فى اسامه ضرب واسامه يجرى ويقول يا ارض اتشقى وابلعينى يا ارض يا ارض .. الواد محمد بقى ابن محمود اخويا كان نازل اجازته من وحدته على البلد مباشره وكان لسه لابس اللبس الميرى وكان اللبس الميرى مكتفه وعايز يضرب اسامه وشريف بستين برطوشه لكن رتبته اللى على كتفه قهرته وخلاته واقف محترم بس كان متغاظ وحيطق من اسامه ومن شريف . البت بقى مرات امير اصلها معاها ليسانس خدمة اجتماعيه وبرضه عطلانه .. بس سوسه .. قالت ايه .. يا أمير المفروض اسامه اللى يدفع الفرق ده هو وشريف من جيبهم .. الواد اسامه شاف الدنيا مولعه والعمليه مهببه بهباب قام غامز مراته واتفقوا على انهم يغادروا البلد فى اسرع وقت وجهزت مراته نفسها وركبوا عربيتهم وطلعوا يجروا وسابوا لهم البلد واللى فيها .. والله كان عيد جميل ولذيذ .. وتانى يوم العيد ما كانش فى البلد غير الكبار فشكول واخواته الصبيان والبنات .. اما العيال كل واحد راح لحاله الله يسهل لهم ويوفقهم ويفتح لهم ابواب رحمته .. امين يا رب العالمين.. .. اما تالت يوم العيد يوم الاربع كان ختامه مسك والحمد لله .. الواد محمد ابن محمود اخويا اتصل بينا من مصر ... تعالوا استنونى فى الزقازيق .. اصله ساكن فى الزقازيق .. استنونى عشان تحضروا جنازه حماتى .. انا لله وانا اليه راجعون ورحنا وحضرنا وعزينا البت ريهام مرات محمد اصلها معيده فى جامعة الازهر بالقاهره .. ورجعت من الزقازيق مباشره لبيتى فى شبين الكوم .

كل عام وحضراتكم جميعا بخير ويعيد الله عليكم وعلينا هذه الايام بالخير واليمن والبركات

الجمعة، 5 ديسمبر، 2008


عيد الاضحى المبارك
اعاده الله
عليكم بالخير واليمن والبركات




اتففضلوا معانا لقمه فى الغدا
لقمه هنيه تكفى ميه



وآدى مصروف العيد من ايام الجنيه الجلد وكان بيشترى منزل



كمان ممكن تتعشوا معانا

الاثنين، 1 ديسمبر، 2008



الحلقه الثانيه


قال الفيلسوف ..... فشكول




اخوانى : فشكول عامل فيها ابو العريف .. بيعرف فى كل حاجه .. وبيفهم فى كل حاجه .. فى الرايضيات بيعرف 5+ 5 = 10 فيى الفيزياء اللى هى الطبيعه بيعرف .. الهواء فيه اكسجين .. فى الطب بيعرف .. الاسبرين بينزل الحراره ومسكن كمان هى يعنى حكايه ولا كيميا ولا لغرتمات فى الكمبيوتر برضه بيعرف .. آهه .. عامل مدونه وبيكتب فيها وبيروح عند الناس يزور ويكتب تعليقات ولما واجه مشكله انه عايز يحط ناس عنده حلها .. هى حكايه .. ويا دوب صفاء بتاعة المنيا غششته وقالت له تعمل ازاى ومحاسن صابر برضه غششته وقالوا له كلمتين وبالتفصيل وغششوه كما ينبغى لكن فشكول المعى ومبدع ولما يعمل حاجه ما حدش يعرف يفشكلها زيه وممكن يبهدل ويبوظ الدنيا وما حدش يعرف يعمل زيه.. طب بصوا شوفوا فشكول عمل ايه على جنب المدونه من الناحيه الشمال عمل عمايل مهببه وأخر جمال احسن من مفيش.. اتفرجى يا صفاء وانت يا محاسن يا بتاعة التليفزيون شوفوا فشكول عمل ايه .. فشكول ده ما فيش زيه .. بذمتكم حد يعرف يهبب الهباب ده زى فشكول .. فشكول واد ما فيش زيه بيفهم حلو قوى وبيبوظ كل حاجه وبيفن فى المتفنن .. ويهبب هباب .. يا سلااااام لو فشكول يريحنا منه ومن عمايله المنيله دى ويعيش بقى ويكبر دماغه .. بس ايه .. فشكول دا عالمى متجول .. فاكرين عبد المنعم دى صبرى هو وصباح فى فيلم شارع الحب اما كان عبد الحفيظ حالم عامل فيها مدرس موسيقى ومركب دقن وشنب .. كان عالمى .. برضه فشكول عالمى وبيعرف يرد على اى سؤال ويتساءل كيفما شاء (فشكول مبسوط من ماما اموله اللى حطة له الهمزه على الارض)


فشكول مستنى الاذاعه ومجهز العده (الجلابيه البيضاء بتاعة الصين والعباءه والقلنسوه برضه بتوع الصين) ومستنى المذيعه بس خلاص اللى هى خلص الكلام .. فشكول سمع جرس الباب ودخلت المذيعه ومعاها واحده كمان .. واسمها .. سمكه واحده .. طب يا بنتىخليهم كيلو سمك .. طب البحر من العريش لحد ليبيا وكمان عندنا البحر الاحمر من السويس لحد السودان وما فيش سمك برضه .. يا خيبيتكم .. سمكه واحد كان مفروض ينوبنى 10 كلوا ولا 15 كيلو سمك.. ايه الخيبه التقيله دى اللى احنا فيها .. ما علينا


بس خلاص وسمكه واحد قاعدون يحطوا فيش فى الحيطه وتسجيلات ومايكات وابتدا التسجيل....


لى صديق فيلسوف باقوال الحكماء شغوف سألته .. قل لى يا صديقى الفيلسوف قوله جديده عن الحكمه؟

قال الفيلسوف وقد انبعج وانجعص على اريكته وظبط قلنسوته التى تبدأ من على رأسه ثم ترتفع لاعلى حتى تصبح زرا فى اخرها زى اريال التليفزيون وقال :

الحكمه يا بنيتى هى كيف نعبئ الشمس فى قزايز الحكمه يا بنيتى هى فن الضحك على العقول واستعباط الناس .. الحكمه يا بنيتى هو تسويق الاستهبال والاستعباط بين الناس وقبل ان يسترسل الفيلسوف سألها :

هل احضرت اجرى يا بنيتى عن الحلقه .. نعم يا سيدى هاتان صرتان من الجنيهات فىكل صره 20 قطعه حديد كل قطعه تمثل نصف الجنيه .. فيقول لها الفيلسوف ... طبعا طبعا ما هو الفلوس كلها اليومين دول حديد لكن هل شاعت الصرر بهذه السرعه .. منها لله سول ويزبر هى التى روجت لصرر الدنانير .. لكن لا عليك يا بنيتى .. هاتها .

تتدخل سمكه واحده ترقع الفيلسوف هذا السؤال : قل لى يا فيلسوف هل سمعت عن الملكيه العامه والمال العام ؟ .. فيرد فشكول .. اقصد الفيلسوف .. وماذا يا بنيتى عن هذا .. فتقول سمكه واحده يقولون يا فيلسوف انهم سيملكون الشعب المال العام عن طريق البورصه.

الفيلسوف .. آه يا بنيتى .. نعم .. نعم .. تقصدين الصكوك ؟ فترد نعم يا فيلسوف .. يقول الفيلسوف .. يا بنيتى الملكيه العامه هى ملكية الدوله والدوله ببساطه هى الارض .. وهى ارض مصر اللى مطلعه روح اللى خلفونا والشعب اللى هو شعب مصر اللى عمره ما شاف يوم يحلف بيه وحكومه اللى بيختارها الشعب وكل الشعب ما يختارش حكومه لكن برضه تركب على قلبه وتديله مطرح ما يوجعه والملكيه العامه يا بنيتى هى ملكية الشعب فعلا من غير ما يصكونا بيها على قفانا .. تتدخل بس خلاص فى الحديث اللى ما لهاش فى الاقتصاد والمال والحاجات المكلكعه دى وتقول:

قل لى يا سيدى الفيلسوف ( والله البنت دى مؤدبه قوى بتقول لى يا سيدى الفيلسوف ) يقول لها الفيلسوف فى انجعاص .. نعم يا بنيتى فتقول ما هو الجمال؟

يقول الفيلسوف : يا بنيتى .. الاحساس بالجمال من رؤية زهره .. من النطر الى اولادك .. من ضحكة حفيد زى احمد فى لفته .. من ملك اما تركب على ضهرى وتقول .. شى يا حمار .. من نظره لامرأه جميله .. من ابتسامة رجل لآمرأته .. من قبض صرر الدنانير .. اى شيئ يخليكى مبسوطه يبقى الجمال .

تقول : وما هو اجمل الجمال يا سيدى الفيلسوف ؟ يقول الفيلسوف .. يا بنيتى فى قول واحد .. اجمل الجمال فى المرأه .. تغمغم بس خلاص فى سرها ( الراجل ده عينه زايغه) فتتدخل سمكه واحده .. لم تكمل يا فيلسوف ( البنت دى جريئه قوى بتقول يا فيلسوف من غير يا سيدى الفيلسوف) لم تكمل لى عن الصكوك؟

الفيلسوف : يا بنيتى ايراد الملكيه العامه يدخل لوزارة الخزانه .. اللى هى وزارة الماليه .. والحكومه بتصرف منه على الدفاع اللى هو الجيش وكمان الامن - طبعا انت عارفه ما اقدرش اتكلم - والتعليم الخيبان - والصحه اللى راحت من الشعب كله - والعداله أهو يا دوب واللى فاضله لنا .. هما خمس حاجات اللى مسئولية الدوله والباقى مش مشكله الدوله لكن ممكن تتدخل وتصرف على حاجات زى الطرق اللى كلها مطبات والكبارى اللى بتقع بعد سنه ولا اثنين والكهرباء اللى واخده فلوسنا كلها وخلافه وملكية الدوله حيقدروها بكام وطبعا بيقدروها زى ما قدروا عمر افندى وبنك الاسكندريه وبعدين يشوفوا كام واحد سنه واحد وعشرين سنه ويوزعوا القيمه دى عليهم فى شكل صكوك وكل صك قيمته من 400 الى 600 جنيه يعنى انتى اللى حينوبك دول وخلاص والاجيال الجايه يروحوا يضورا لهم على بلد تانيه يكون لهم فيها نصيب .. ما هى كل الانصبه اتوزعت وبح مفيش حنجيب منين.

الكلام ياخد بس خلاص ويعجبها وتندمج معاهم وتقول : طب وايه العيب فى هذا يا سيدى الفيلسوف .. آهم 600 جنيه احسن من مافيش وجم من باب السما:

يقول الفيلسوف : يا بنيتى هذا شئ شرحه يطول فتقاطعه بس خلاص وتقول وانت الليلة مشغول .. فيقول لها الفيلسوف اذا كان هناك صره اخرى من انصاف الجنيهات سيكمل الفيلسوف .. كله بثمنه .. فتناوله الصره .. فينشكح الفيلسوف ويكمل:

يا بنيتى : الصك اللى حنتلطع بيه على قفانا العريضه ثمنه قولى 600 جنيه طب يا ترى حنروح البورصه ناخ عائد عليه ولا لأ .. ولو حناخد عائد عليه يبقى كام .. الفائده السائده 8% يعنى قولى 6×8 = 48 جنيه قولى 50 جنيه ان شا الله ما حد حوش .. يعنى اللى حينوبنى من ثروة بلدى 50 جنيه كل سنه .. وبح .. ما فيش تانى وبعدين يا بنيتى كلنا مش لاقيين ناكل والطبليه بتاعتنا فقرانه وعدمانه .. ما هو الفقر والغنى من غير يعنى فلفسه هو المقياس بتاعه الطلبيه اللى بناكل عليها .. تندمج بس خلاص فى الحديث وترد على الفيلسوف .. ونعمل ايه ؟ يكمل الفيلسوف اللى حياخد صك على قفاه حيطلع جرى يبيع الصك وحيتباع بكام .. قول انت بقىىى .. اقول .. طبعا مش بـ 600 جنيه .. دا حيبقى فيه سماسره ووسطاء .. والسمسار عايز حقه .. والوسيط عايز حقه .. يبقى الصك مش حيتباع باكتر من 200 او 300 جنيه والباقى سمسره ووساطه وكل الصكوك اللى حتنزل للناس حتلف تلف وتروح لـ 3 ولا 4 ولا 5 من الحيتان الكبار وحيتان ايه ياكلوا سمكه واحده فى بطنهم بق واحد .. يعنى تحويل الملكيه العامله لصكوك للشعب فى الحقيقه هى بيع للحيتان دول ويعنى انتم اللى هبل وعبط وفرطتم فى الصكوك وخساره بقى فيكم الاكل واى حاجه يا هبل يا عبط .. مش قلنا لكم حددوا النسل وقللوا من عيالكم وياريت تقللوا منكم انتم كمان .. مش قلت لكم احنا عبينا الشمس فى قزايز.

سمكه واحده : وما ذا بعد يا فيلسوف (خدوا بالكم .. يا فيلسوف بس) ماشى

الفيلسوف : لاشئ يا بنيتى .. انت مش خدتى حقك .. خلى بقى هانى رمزى ينفعك ويعمل لكم فيلم عشان تقولوا عايزين حقنا : آهو انتم خدتم حقكم أهه .. روحى يا مسكوكه اجرى وكله على حسابك والدوله ما لهاش دعوه .. انتى مش خدتى حقك .. عايزه مننا ايه يا مسكوكه ويا مسكوك منك له.

بس خلاص : هل تم تطبيق هذه الطريقه فى بلاد اخرى يا سيدى الفيلسوف ؟

طبعا طبقت فى دول كتيره ومن ضمنها روسيا الاتحاديه وما نفعتش وفشلت فشل زريع .. تقول ولماذا نطبقها نحن اذن .. يقول .. لأننا معجبين بالفشل وهو احنا بنعمل حاجه غير فشل فى فشل.

ولكن قل لى يا سيدى الفيلسوف .. فيقاطعها الفيلسوف .. يا بنيتى العداد بيعد .. صرة اخرى من الدنانير حتى اقول كل شيئ ونصل فى الكلام الى .. هذا شيئ شرحه يطول وانا الليله مشغول :

تهمس سمكه واحده فى اذن بس خلاص (الراجل ده فيلسوف الغبره بتاعك ده الراجل ده لا هو فيلسوف ولا حاجه .. دا راجل اونطه وما بيعرفش حاجه وخساره فيه الـ 3 صرر اللى خدهم )

الفيلسوف متعجلا : هات الصره يا بنيتى .. فترد سمكه واحده يا فيلسوف الى حلقه قادمه .. وتغمغم فى نفسها - خساره فيك جنيه واحد.. انت راجل مخرف وبتخطرف ومسكوك وتنسحب ومعها بس خلاص الى الخارج.

فشكول يقول والله انتم اللى خسرانين .. انا كنت حاقول لكم على دورة رأس المال وحاكمل لكم الموضوع اللى شرحه يطول وانا الليله مش مشغول وكنت حاقول لكم ايه اللى حيحصل لكم فى ايامكن الهباب دى . اصل انتم مسكوكين خساره فيكم تعيشوا زى الشعوب الحلوه .. انتم ناس اى كلام واى حد يديكم على قفاكم يا
ما فيش حد يقول الى حلقه قادمه يا فيلسوف

الارزاق على الله ان شاء الله حد تانى ييجى ونضحك عليه وناخد منه صرة دنانير


الجمعة، 28 نوفمبر، 2008



محتاس

فشكول بيعتزر .. والنبى تقبلوا اعتزاره

الى زملائى المدونين وزوار مدونة فشكول

يتقدم فشكول باعتزاره الكامل للاخوه زوار مدونة فشكول لعدم ادراج اسماء مدوناتهم على فهرس المدونات التى يفضلها فشكول .. اصل فكرة فشكول عن الكمبيوتر صفر .. هو يدوب الزائر عنده يعمل على ايكونته كلك ويروح عنده ويلاقى زوار اخرين يقوم يعمل كلك ويزور وهكذا دواليك والنبى ما تزعلوا من فشكول
اصل ايه الحكايه .......

فشكول كل ما يروح يزور مدونه يلاقى اسم مدونته موضوعه فى يمين او يسار المدونه .. يقوم فشكول ينكسف من نفسه .. بس عامل انه مش عارف حاجه .. اصل الحكايه ان البت سومه المجنونه صاحبة مدونة مجنونه فى بلد عاقل .. اصلها بنت اختى .. هى عملت لى مدونه .. فشكول ما بيفهمش فى الكمبيوتر قام قال لها اعملى لى زى عندك .. وكان فاكر انه كله عند العرب صابون.. قوم ايه .. البت سومه المجنونه بنت اختى عملت لى مدونه زى بتاعتها وحطت لى مفضلين زى عندها .. قوم ايه .. التفضيلات بتفرق بين ثقافات وثقافات وثقافات الشيوخ غير ثقافات الشباب وكذلك اهتمام الشيوخ غير اهتمام الشباب وامزجة الشيوخ غير امزجة الشباب .. قوم ايه .. ما لفقوش معايا .. وكنت بروح ازورهم واعلق عندهم والحيت فى الزياره .. ولا واحد فيهم عبر فشكول ولا حتى اهتم بيه غير مره واحده الاستاذ احمد الصباغ والاستاذ احمد كمال (بتاع رحايا العمر) فشكول بقى لما دخل الموضوع ابتدى يعتمد على نفسه وعمل لنفسه زملاء آخرين .. والحمد لله .. يجعله عامر بحسكم.. والزملاء اللى اعتمدت على نفسى فيهم طلعوا ناس آخر أماره واخر حلاوه .. شجعوا فشكول وساعدوه وخلوه يعرف يعيش معاهم وبيهم وسط المدونين

قوم ايه .. فشكول عايز يحط المفضلين بتوعه على الشاشه .. والابن احمد بدر الدين عرف عمه فشكول ازاى يعمل الحكايه دى .. فشكول ما كدبش خبروقام راح وحاول لكن زود الطين بله وبدل ما يحط ناس على اللى عنده قام مسح اللى عنده وما عرفش يحط حد تانى وقعد يقمر عيش ولا هو طايل القديم ولا عارف يعمل الجديد وفضلت مدونة فشكول من غير (مفضلين).. ما علهش .. اعتزر كمان وكمان وعشان جهل فشكول بالكمبيوتر اما البت سومه المجنونه بنت اختى تيجى عندى حأخليها تعلمنى اعمل ازاى واخص بالذك المدونات اللى انا حاكتبها واللى حانساه يسامحنى عشان الزهايمر عامل عمايله اليومين دول وان شاء الله حأحط المدونات التاليه

الكحيان- اللى مش عارف ايه حكايته

رئيس التحرير - صاحب العزبه

احوال الهوى - الدكتوربتاع السعوديه

الاستاذه محاسن صابر - عايزه تطلق وفشكول ما حدش معبره

الاستاذه ماما اموله العظيمه بتاعة العربى

الشاعر العظيم بيرم المصرى

بس خلاص اللى هى هس فنش - خلص الكلام - اووفر

الاستاذه آمال بتاعة مدونة - ن

اقصوصه الشقيه بتاعة الامارات - عساها بخير
السيده m,k

فركشاوى العزيز - بس مش عارف ناوى على ايه

الاستاذه كامليا الجرمانيه

حاجات عيال - يا رب تكبر ونحضر فرحها

الاستاذ محمد غالى


الاستاذ الازهرى يارب يقول لنا خطبه


العزيزه من غير عنوان - ان شاء الله تلاقى شقه قريب وتبقى بعنوان


الاستاذ رأفت بتاع الجغرافيا

المفكر الغالى

احمد بدر الدين المنوفى بتاع اشمون

د. ابراهيم سماحه


الاستاذ محمد الجرايحى

واحد من العمال - بتاع كفر الزيات اللى بيموت فيها

شمس الشموس - شمس النهار

النائمه فى الارياف - يا رب تصحى بقى

العزيزه سلوى ويزبر - يا رب اكون بانطقها صح

المكسوفه الجميله

طائر الليل الحزين - يا رب فرحه بقى

القلم السكندرى - يا بخته بيكتب من على البحر

شفقه هانم واحسان بك - يا رب ترزقهم بشغل

العزيز محمود فرج

ستنا حنان سعيد


يا خبر كنت حانسى العزيزه آبى الجميله

ستنا رئيسة حزب الاحلام - يا رب تدخل مجلس الشورى - رئيسة حزب بقى

دنيا الجميله


المجنون - يا رب يعقل بقى


ستنا العزيزه مها زين

قلب مصرى اللى ما بشوفوش اللى كل سنه مره

الاستاذه صفاء اللى زارتنى مره واحده

الراجيه عفو الله وكلنا معاها

روفى وجنه وموناليزا اللى متوهينى عندهم والاخر بحط تعليق مطرح ما تفتح الصفحه وخلاص


الدكترا اللى زارنى مره واحده برضه

الدكتوره العزيزه (ام البنين ) ربنا يخلى لها ولادها

سمكه واحده - بس بسمك البحر كله - سمكة قرش


احمد kبرضه زارنى مره واحده


ما حدش يعرف طريق المس سوسه


وكمان كل اللى بيزورونى ونسيت اكتبهم أرجو ان يغفروا لى سهوى ونسيانى لكن ان شاء الله اما البت سومه المجنونه اللى عندها امتحانات دالوقت تيجى عندى حيلاقوا كلهم اسمائهم ( مش عارف يا ماما اموله اسمائهم ولا اسماؤهم) فوتى دى بقى حيلاقوها فى المفضله عندى وححطهم على المدونه .. وحقكم على بس هو العجز الكمبيوترى

على فكره الفيلسوف طلع فيها وعمال يتمنظر على وقاعد متنك ولا حد مالى عينه - اصله راجع ان شاء الله فى البوست القادم .. انتظروه

يا رب تعزرونى وتسامحونى


تحياتى لكل الزملاء المدونين والى البوست القادم

الأحد، 23 نوفمبر، 2008















امحوتب .. الاتى فى سلام

آخر ملوك الاسره الثانيه كان الملك ( خع سمخوى ) ويعنى الاثنان القويات وهما الاله حور والاله ست اللذين كان يعبدا أواخر ايام الاسره الثانيه - ثم خلفه على العرش فى منف على اكبر الاحتمالات اخوه الاصغر ( نتر خت زوسر ) والذى يعد المؤسس للاسره الثالثه والذى كان من اهم ملوك هذا العصر السحيق - ويعد الملك نتر خت زوسر اول ملك بنى لنفسه مقبرتان الاولى بصفته ملكا للوجه القبلى وكانت على شكل مصطبه ضخمه من الطين مجهزه بمنحدر عميق تتبعها عده حجرات تحت الارض وتقع شمال العرابه المدفونه فى بيت خلاف - والمقبره الثانيه شيدت له باعتباره ملكا للوجه البحرى وتقع الآن فى سقاره وتعد قدم هرم عرف فى التاريخ - وتعد هذه المقبره هى الحلقه المتوسطه بين المصطبه والهرم الحقيقى فيما يعرف الآن بهرم سقاره وواضع تصميم هذا الهرم هو امحوتب والذى لم يظهر نبوغه فى الهندسه وانما على علم بعلم الطب وعلى درايه بالاداره وكانت له شهره عظيمه فى عصره حتى انه اعتبر بعد ذلك الها للطب ’ وفى كشف عن المعبد الجنائزى للملك زوسر ومقبرتى ابنتيه تؤكد هذه المبانى ان المهندس الذى وضع تصاميمهم على اعلى مرتبه من العلم والحكمه - ويعتبر هذا البناء اول خطوه فى انتقال تاريخ المعمار وتعميم البناء بالحجاره فى وادى النيل والعالم وترى فيه عمدا مضلعه تشبه العمد الدوركيه فى الفن الاغريقى
وامحوتب كان يشفى الناس ويحقق المعجزات فى زمانه وهو الذى علم المصريين الكتابه وهو الذى اخترع لهم الحبر الاسود من هباب المصابيح ومن اوراق الشجر
وقد نقل مصر من المبانى الطينيه الى المبانى الحجريه وتمكن من بناء اول ناطحة سحاب فى مصر وهو هرم زوسر سرعان ما قلدها غيره ويعتبر الهرم المدرج بسقاره اكبر حدث عمرانى فى تاريخ البشريه لمهندس عبقرى ما زالت اعمال تدرس حتى الان .. انه امحوتب
فقد بنى امحوتب اول قبر للفراعين حوى الفرعون وكنوزه وكان يدفن قبل ذلك تحت ابنيه بسيطه تسمى المصطبه وفكرة امحوتب فى الهرم هى بناء مصطبه فوق مصطبه فوق مصطبه فكان الهرم المدرج اول ابتكار له وذلك من حوالى 2630 قبل الميلاد
ويعتبر امحوتب ايضا اول طبيب معروف بالاسم فى التاريخ المدون وهو قد يكون اول من استعمل الاعمده فى المبانى
وقد عاش امحوتب فى الدوله القديمه اثناء حكم الملك زوسر صاحب هرم سقاره المدرج ولعلمه فى الطب والهندسه والفيزياء والاداره رفعه القدماء الى درجة معبود
وقد ظهر امحوتب فى عام 2800 قبل الميلاد وفى البعض الاخر2600 واعتبر صانع الاعاجيب -
عمل امحوتب فى قصر الفرعون كمهندس الملك زوسر فصمم هرم زوسروقد كان امحوتب بارعا ايضا فى الطب وكان على علم بفن التحنيط وعلم التشريح اخترع الكثير من العقاقير الطبيه وفى برديات ادوين سميث وطولها 15 قدما تقول البرديات ان 48 حالة مرض استطاع الطبيب امحوتب ان يعالجها جميعا من خلال 700 عقار مأخوذ من النباتات والاعشاب والخلاصات النباتيه
واسس امحوتب اول مدرسه لتعليم الطب فى مدينة ممفيس بالاضافه لمعرفته الكبيره فى علم النجوم وقام بتوحيد الآلهة المصريه المنتشره فى ذلك الوقت فى عبادة روح الشمس واصبح فيما بعد الها للطب واصبحت مصر يزورها المرضى من جميع انحاء المعموره آنذاك
وقد حصل امحوتب على كثير من الالقاب مثل
رئيس المهندسين
سيد النحاتين
رئيس الوزراء
ابن بتاح
اسكليبوس
رب الطب
على ان امحوتب لم يفصح عن نفسه كثيرا وتاريخه غامض على الرغم من ابداعاته الكثيره والفنيه فى العماره والطب واختراعاته واكتشافاته ... غاص فى التاريخ الفرعونى واختفى ولم يذكره احد بعد وفاته واختفى قبره وكتبه واصبح اختفاءه لغزا يحير علماء التاريخ والحفريات ومن اسمه امحوتب - وتعنى الذى جاء فى سلام - واخترع وابتكر واحدث تطورا هائلا - هندس وطبب- ورحل فى سلام
المراجع : مصر القديمه
الانترنت
انيس منصور







الثلاثاء، 18 نوفمبر، 2008



فشكول .. فيلسوفا
جائت اذاعة الشرق الاوسط عشان تسجل مع فشكول حديث اذاعى باعتباره حكيما وفيلسوفا واخبروا فشكول بذلك مقدما بمكالمه تليفونيه .. قوم ايه ... فشكول عنده جلابيه بيضه حلوه من اللى بيجيبوها من السعوديه .. قوم ايه فشكول لبس الجلابيه وبص فى المرايه .. يا ترى شكلك كده حكيم يا فشكول ... فشكول لقى الموضوع مش متظبط ... يعمل ايه ... فشكول ... قصدى الحكيم فشكول عنده برضه عبايه شتوى برضه جايه من السعوديه .. فشكول لبس العبايه ووقف قدام المرايه ... برضه الموضوع مش مظبط ... يعمل ايه فشكول ... فيه حاجه ناقصه ... جه فشكول نط بلانص فى الكمبيوتر ولقى غواصه فى البحر بتاع الكمبيوتر ... جه داخل جوه الغواصه سرقه ... اتاريها النت وهو مش عارف .. بعدين الحكيم .. قصدى فشكول .. لا قصدى الفيلسوف قال للنت يانت ضور لى على امحوتب المصرى ... الى هو الأتى فى سلام ... قوم النت جاب له امحوتب ... فشكول اتفرج على امحوتب ولقى شكله باين عليه الحكمه والفلسفه والطب .. طب ماهو فشكول كان لابس زيه بالضبط ... ايه بقى اللى ناقص ... وايه اللى فيك زياده يا أمحوتب .... أأأأه .. فشكول اكتشف ان امحوتب لابس قلنسوه على رأسه .... فعلا هى دى اللى ناقصه .. قوم ايه فشكول جه خاطف القلنسوه من على راس امحوتب وطلع يجرى وقام عامل بلانص وطلع من البحر وجه لابس القلنسوه وباصص فى المرايه ... اه كده مظبوط .. بعدين فشكول بقى فعلا حكيم .. هما الحكماء احسن منى فى ايه وايه يعنى الفلاسفه دول ما أنا كمان اعرف اتفلفس وبعدين قعد منبعج وعجبته الفكره وجلس على الكنبه وعاش الدور
دخلت مذيعة وقالت السلام عليكم ايها الفيلسوف .. عليكم من السلام .. انت مين يا شابه ؟ قاله انا ( بس خلاص ) ايه يا اختى بس خلاص هو احنا لسه ابتدينا عشان نبس خلاص يا بنتى انت اسمك ايه .. انا بس خلاص .. ماشى روحى بقى مش عايزين النهارده .. يا فيلسوف انا اسمى بس خلاص .. فشكول يعنى انت اسمك بس وابوك اسمه خلاص ... أى نعم .. يابنتى كنت بحسبك (هس فنش) حكيم بقى .. وسمح لها فشكول بالعمل وبدأت فى التقديم للبرنامج
كان لى صديق فيلسوف . باقوال الحكماء شغوف فقلت له يافيلسوف هل لى فى بيان منبع الحكمه واصل الفلسفه ؟
فشكول يرد فى تؤده متصنعا صوت الحكمه : يا بنيتى أصل الحكمه من أفواه المجانين ومنبع الفلسفه فى حديث الجوعانين
بس خلاص : احسنت يا سيدى الفيلسوف : وهل لى ان اسألك اسئلة اخرى
سلى ما شئت يا بنيتى فانا الليه عندى كثير من الحكمه ولكن يابنيتى اوجزى فى سؤالك فانا وقتى للحكمه ومن الحكمه وهنا تدخل زميلها فى البرنامج الكحيان وسأل : قل لى يا فيلسوف ما سر لباسك هذا وهل له شأن فى الحكمه والفلسفه؟
فشكول الحكيم : يا بنى .. يا بنيتى الجلباب الابيض لونه نقى ويعطى النقاء وهو صينى .. والصينيون قديما اخترعوا الحكمه وحديثا صعدوا للفضاء .. اما العباءه يا كحيان فعندما تمتلأ الرأس بالحكمه ويكون هناك فائض يمكن ان نفرش للفائض الملايه .. اقصد العباءه وهى صينى ايضا.. وأما القلنسوه يا بنيتى يا
هس ولا كلمه فعندما يمتلأ الرأس بالحكمه تكون وسعه وحتى لا تتفرفط الفلسفه من الرأس وهى ايضا صينى .. والسجاده التى امامكم اذا فرغت الحكمه وضاعت العقول انوى الصلاة عليها .. وهى ايضا صينى .. واما السجاده التى نجلس عليها وهى بالشيئ الفلانى عشان تحوش التراب عننا هى ايضا صينى وكل ما يقع ناظركم عليه صينى
أترون يا بنيتى ويا بنى الكحيان كم عند الصينيين من الحكمه والفلسفه والبلاغه .. وكم عندنا من البلاده والبلاهه
قالت بس خلاص : ولكن قل لى يا فيلسوف ما هو البدنجان ؟
اطرق الفيلسوف قليلا يفكر ويحاول الاجابه على السؤال ويقلب فى عقله السؤال وخصوصا ان قاعد قدامه واحد رخم خبير بالتحليل واكيد عمال يحلل فى الفيلسوف وناوى يهريك تعليقات وتحليلات وقال
:
للبدنجان يابنيتى اكتر من نوع واوله : البدنجان المحشى وهو لونه ابيض ونحشى فيه همومنا مع الرز المسوس بتاع التموين وفيه فوائد كثيره - هو يحشى البطن ويملأ الحله عن أخرها وبنضحك بيه على العيال ونعمل معاه تنتوفة لحمه وله لونان اسود زى ايامكم ولون ابيض عشان يحسسوكم بالايام البيضاء القادمه التى لن تقبل ابدا
ثانيا البدنجان الاسود .. ويسمونه .. الطبخه السوده والمهببه.. ومنه المسقعه ومنه الطبيخ بالتقليه ومنه تفريعات كثيره وهو اسود زى ايامكم ومهبب بهباب برضه زى ايامكم المهببه بهباب واللى مش حتشوفوا فيها حاجه حلوه خالص زى اللى سبقوكم
ثالثا : البرنجان : ويشتق منه البرنجان المشوى والبرنجان المقلى والبرنجان المخلل
رابعا : الباجنجان : وهو يا بنيتى الثمره السوده الكبيره الحجم وفيها من الداخل بذر وحاجات كتيره منيله بنيله برضه زى الايام دى
قال الكحيان : افادك الله يا فشكول : ولكن قل لى عن مصر قديما وحديثا ( انا مش بحب الواد المذيع اللى معاكى دا يا اسكت هس الواد الكحيان دا عامل لى زى العقله فى الزور) قالت اسكت هس اقصد بس خلاص : خليك معايا يا سيدى الفيلسوف : قلت لا هو انا مش حاعرف ارد عليه ولا ايه تعالى يا بنى
خد عندك يا بنى - هناك مصر الجديده - وهناك مصر القديمه - وهناك مصر العليا - وهناك مصر السفلى وهناك مصر الفرعونيه .. كم من حديث عن مصر يا بنى ويا بنيتى وكم من مجد كان
قال : ولكن لم تقل لى عن مصر الحديثه
فشكول فى زهول منتفضا وانزعر من السؤال : اين مصر الحديث دى يا استاذ : هل هى بعد الاتوستراد ام قبل الدائرى فقال المذيع يا سيدى اقصد مصر التاريخ الحديث : فزاد فشكول اقصد الفيلسوف من حيرته وقال يا بنى : اخر عهدى عن مصر التتار ايام قطز ودولة المماليك الشرقيه .. انا خايف الواد ده يقول لا مش المماليك الشرقيه .. دول المماليك الغربيه والا الجراكسه .. يا عم كحيان فوت كانت مصر يا بنى تتلالأ على ضفاف التاريخ وايضا على ضفاف النيل أما بعد ذلك فلا وكل ما نعرفه نحن كل الفلاسفه والحكماء والنبهاء ما ذكر ولا زياده وبدأ الفيلسوف يحتد فى كلامه .. اى بنيتى .. اى ابنى ..من منا الحكيم انا ام انتم؟ انا الفيلسوف واعرف اكثر منكم .. بنيتى ان اسئلتك الليله ليس لها جواب
فادركت هس فنش - اقصد بس خلاص المأزق التى وقعت فيه وقالت ملطفه
لا عليك يا فيلسوف ولكن اذكرك بامجاد الحاضر ... هل سمعت عن نجيب محفوظ...؟
الفيلسوف ... أه ... بتاع الثلاثيه .... بين القصرين ... وقصر الشوق ... والسكريه ... واحمد عبد الجواد ... وايضا بتاع رواية ولاد حارتنا .. انه يا بنيتى زميل لنا حكيم وفيلسوف ولا يعرف هو ايضا اكثر مما نعرف
يا سيدى الفيلسوف : هناك ايضا أحمد زويل
الفيلسوف : أه ... اعرف احمد زويل ... الامريكانى .. نعم هو مصرى .. ولكنه اخذ نوبل بعلم امريكانى وبجنيسه امريكانى والنبى هو لو كان هنا كان زمانه بيحاول يعمل كتاب ويبيعه عشان ياكل عيش هو وعياله
بس خلاص : اصبت يا سيدى الفيلسوف : وماذا عن الكوسه
هدأ الفيلسوف قليلا وجلس منبعجا على اريكته وقال
فشكول ... اقصد الفيلسوف فشكول:
بنيتى : اعرف عن الكوسه الكثير : وهل يعرف عن الكوسه الا انا : انها نبات مصرى يزرع فى جميع انحاء مصر واذا لم توجد ارض يزرع فيها فانه ينبت حتى فى صالونات البيوت او فى غرف النوم او فى اى مكان او فى الهواء وتجديه دائما فى الدواوين والمجالس وتلاقى الناس الكويسين هما اللى بياكلوا منه بس هناك ايضا القرع ... وهو نبات الكوسه عندما يكبرونحن يا بنيتى لا نترك من الكوسه شئ لا نأكله فنأكله مطبوخا ومحشيا ونأكله قرعا واذا كبر جدا وشاخ نأكل لبه .. فنحن قرعجيه بطبيعتنا ونوزع منه اريجه على الناس الكويسين اما الوحشين لأ وانا وانت والمعازيم ونقرع به على بعضنا ومنا القرعجى ومنا المكوس وهناك ايضا قرع العسل وممكن نحط السم فيه للى ما بنحبوش وما ياخدش باله وهو يأكله لحلاوته وطلاوته ونصدر منه للخارج ... كوسة وقرعا .. ولكن قل من يعمل به بالخارج ولذلك هو وكسه علينا وعلى اللى خلفونا
المذيع الكحيان يفقع فشكول السؤال التالى : يا بنى ابعد عنى .. يا بنى سيبنى فى حالى : ؟
قل لى يا سيدى .. ما العرب
مش قلت لك يا بنى سيبنى فى حالى لكن استعنا على الشقى بيك يا رب ... وهرش الحكيم فشكول رأسه متعجبا من السؤال : اننى الفيلسوف يا بنى .. فما العرب الذى تتكلم عنهم يقول .. اقصد بلاد العرب يا سيدى .. مش قلت لكم أهو دا اللى بيحط السم فى قرع العسل .. ومع ذلك يا كحيان لن ادعك تهزأ بى وقال الفيلسوف
تقصد بلاد العرب من الخليج الى المحيط .. بلاد العرب اوطانى ...اليس كذلك ؟ الكحيان نعم يا سيدى
الحكيم الفشكول : يا بنى هؤلاء يا بنى شعوب ماتت وذهبت ادراج الرياح واصبحت تاريخا ... يا بنيتى .. يا بنى لقد ذهبوا كالهنود الحمر .. وقبائلها الكومانش والآباش يا بنى لقد اندحروا وذهب ريحهم
الكحيان : وما السبب يا سيدى : برضه انت !!!!!؟ سؤالك ليس له رد
بس خلاص ..وما العدس وما الفول يا سيدى؟ فشكول منشكحا يقول فى سره . آى كدا البناتات الحلوين يتكلموا احسن
يا بنيتى .. يا بنيتى ... يا بنيتى .. كانوا فى الماضى طعام الحمير والفقراء .. اما الان، فكيلو العدس بـ 12 جنيه وكيلو الفول بـ 8 جنيه .. ما ذا أقول لكم .. اقول لكم يا خلق هووووووى لم نعد نجد ما نأكله سواء من العدس او الفول والحمير اسعد منا حظا
بس خلاص : سيدى الفيلسوف ما معنى باراك اوباما :
بنيتى .. باراك تعنى فى العبريه المبارك أو المبروك .. شوفى هى قريبه من كلمه مبروك واوباما من البومه اللى هى اخت الحدأه اللى ما بترميش كتاكيت
وهل هناك علاقه بين باراك اوباما و... باراك ... اقصد ايهود باراك
بنيتى .. هذا امر شرحه يطول وانا الليله مشغول .. قوموا بقى روحوا كفايه عليكو كدا حتودونا فى ستين داهيه
بس خلاص : اذن الى الغد يا فيلسوف لأحاورك واناورك واسألك
وهنا هاج فشكول وماج واخذ يقول بأعلى صوته ... يا بنيتى لا تذكرى اى مرادف لكلمه احاور او محاور او مناوره او مراوغه لأننى انزعج من هذه الكلمه وخصوصا كلمة المحاور .. مش كفايه على يا اختى عمال اسمعها فى كل مناسبه ولا تذكرى ايضا المحور ولا الدائرى وخلافه .. كمان بطلى تكونى محاوره رخمه انت كمان انا بقى بييجى لى ارتكاريا من المحاور والمحاورين الرخمين اللى بيسألوا : وقام الرجل وخلع القلنسوه وقذف بها فى الارض وخلع ايضا العباءه واخذ يتحرك فى أرجاء الغرفه ويهذى بكلمات غير مفهومه ... الراجل اتجنن
وقامت هى والكحيان خلسه وخرجوا من الباب دون ان يحس بهم فشكول

الجمعة، 14 نوفمبر، 2008



فشكله فى القطار

وحطوا فى عين فشكول مسمار


يوم الاثنين الماضى كان عندى شغل فى اسكندريه - ما هو انا رحاله فى شغلى - كل اسبوع فى بلد .. قوم ايه


صحيت الصبح الساعه 6 عشان اركب القطر اللى رايح اسكندريه مباشره عشان يوصلنى الساعه 9.5 وكمان . نصف ساعه ميكروباص اللى بيروح بحرى اقوم اوصل للفرع بتاع اسكندريه تبقى الساعه عشره ومن عشره للساعه اثنين يكون عندى وقت اقدر اعمل فيه حاجه .. قوم ايه


صحيت محمود ابنى عشان يوصلنى المحطه .. محمود قايم بوزه شبرين وعمال يبرطم على آخره .. انا بقى مش واخد بالى من حاجه .. محمود عايز يخلينى آخد بالى .. انا بقى متنح .. قوم ايه محمود وصلنى المحطه على مضض .. محمود من غيظه داس على البنزين جامد راحت العربيه طالعه امريكانى .. اعديهاش انا بقى وافوت .. ما هو الواد متغاظ وموش طايقنى .. قمت مبرطم بشوية كلام فى العضم - قام الواد خدهم فى عضمه وراح باصص لى من الشباك شزرا وماشى على طول


دخلت المحطه عشان اقطع التذكره - قام صاحب التذاكر قال القطر فيه تأخير نصف ساعه .. يا محموووود .. محمود مين .. محمود زمانه وصل البيت .. حطيت همى فى بطنى وقلت هو انا ما قداميش حل تانى .. اقعد يا واد .. القطر اتأخر ساعه وعشر دقائق .. يا ريتها كانت نصف ساعه .. ركبت القطر وامرى لله .. لقيت كرسى حلو كدا وقدامى عيلين وزاويز .. قلت اقعد مع العيلين دول أهم تسليه طريق ... وبعدين لقيت البت .. البت زى القمر والواد زى الهباب .. عامل شعره كدا .. بقى .. اصل .. مش فاهم عامل فى شعره ايه .. شعره فى الشرق وشعره فى الغرب وكل يعنى كدا عشرين او ثلاثين شعره لازقين فى بعض والشعر عامل زى السله (نباث شائك ينمو فى المستنقعات ) الشعر اسود والوش اسود والعمليه سواد فى سواد .. مش مشكله ولا عيب .. خد عندك كمان .. الواد لابس تى شيرت اسود بنص كم ودراعه طالعه من النص كم مسلوعه وطويله ولونها اسود .. طب يا ابنى اختار الالوان ولابس حظاظه فى دراعه.. طب ممكن تلبس ساعه تظبط المواضيع وكان لابس سلسله على رقبته .. بصيت للسلسله يمكن دهب ولا فضه ولا حاجه حلوه لقيتها مش لا دهب ولا فضه ولا حاجه حلوه .. امال ايه .. ما علينا


البنت بقى زى القمر .. والله زى القمر .. الوش ابيض .. جميله .. والعيون عسلى .. مش قلت لكم فشكول حطوا فى عنيه مسمار .. اصل كنت لابس النضاره الشمس وما حدش شايف انا شايف ايه .. البت تلتين بقى مش متوسطة الطول .. اكتر شويه .. القد .. ما شاء الله .. اللبس .. سبحان الله


الواد كل شويه يقرب بوزه من بوز البت ويتوشوشوا ... الله طب يا بنى مش كده .. فشكول مستغرب وكل شويه بيبص اكتر .. البت هيمانه عالآخر .. فشكول عجبته الحكايه وقعد يتفرج تقولش سعاد حسنى وحسين فهمى فى خلى بالك من زوزو ولا أميره حبى انا .. يقوموا كل الناس اللى فى القطر يعملوا زى فشكول ويتفرجوا .. الواد من قلة ادبه مد ايده على البت .. زى ما بيعملوا الحبيبه وهما ماشيين وحط ايده على كتفها .. وما فيش حد قال لهم حاجه .. فشكول قعد يفكر .. البنت الهبله دى زى السكر ..لو عايزه تحب يعنى .. مش تدور على واحد عليه القيمه شويه .. لأ وأيه الواد آخر قنعره فى قعدته وحاطط رجل على رجل ... فشكول يعنى اللى وضعه يسمح له بكده ويحط رجل على رجل ويتقنعر شويه مش قادر يعمل كدا احتراما للناس اللى فى القطر اللى راكبين معاه قوم ايه .. الواد راح يوشوش البنت فى ودانها .. يا نهار اسود .. فشكول قلع النضاره وقعد يبرق للعيال عشان ينكسفوا شويه .. العيال ما عندهمش دم ولا عبروا فشكول ولا حتى ادوا له اى اهتمام .. فشكول كان فاكر نفسه له قيمه يعنى وان العيال حتنكسف .. اتارى فشكول اونطه ولا حد معبره .. قوم ايه فشكول عند محطة طنطا القطر فضى شويه راح فشكول قايم من الكرسى وخد شنطته ونضارته وجه رايح على كرسى تانى .. الله .. كرسى فاضى ولا حد يدايقنى ولا حد

يقل ادبه قدامى .. ايه اللى كان مخلينى قاعد جنب المسخره دى.. فشكول قعد اخر انشكاح وآخر ابنعاج اربع كراسى وانا لوحدى شفت الهنا اللى انا فيه .. جه القطر عند

كفر الزيات ووقف وطلع القطر ركاب كتير .. فشكول اللى كان قاعد متشكح لم نفسه عشان الزحمه .. قوم ايه .. قعد جنب فشكول ولد وقدامه بنتين .. يا دى النهار الاسود .. المره دى بقى الواد قاعد مؤدب وشكله معقول يعنى .. وش وحش .. مش حلو .. معقول اصل الواد دكهه كان وحش خالص ومناخيره لها زلومه وبقه واسع وشعره سلك المونيوم خشن .. لكن الواد ده معقول يعنى .. البت بقى اللى قدامه كل شويه توطى لقدام عشان تكلم الواد اللى جنبى وبتعمل هى اللى الواد الاولانى كان بيعمله .. يعنى فشكول شاف الموضوع من وجهتى النظر .. كل شويه البت تقوم عامله مع الواد (شيك هاند) وايديهم كدا تفرقع وهما بيشيكوا هاند .. فشكول زهق .. طق .. بس مش قادر يتكلم - اصل القطر كله عيال وعمالين يصفقوا ويغنوا .. حلو الغنى يعنى مافيهاش مشاكل .. واد من وسط عربية القطر ينده واد صاحبه .. انت ياد يا سعيد يا ابن الـ ... فشكول طلع الجرنان وحط عينه فيه من كسوفه .. العربيه مليانه ستات وحريم وبنات والعيال ما عندهمش كسوف ولا خشيه .. فجأه لقيت البت بتضحك وبتحط راسها فى عب الواد اللى جنبى .. نهار اسود .. فيه ايه .. فشكول اتلكك ان الواد ميل عليه .. قام فشكول باخخ فى الواد .. والله الواد طلع مؤدب .. آسف يا عمو.. وكنا قربنا من دمنهور وغاروا العيال دول .. فشكول قعد يفكرفى زمان وايام زمان .. ايام ما كان بياخد الجو بتاعه - بيسموها اليومين دول المزه - ما شى ياخد المزه بتاعته ويمشى هو وهى من ميدان روكسى لحد الهرم الاكبر .. دا ايام ما كنا فى مصرزمان كنا نبتدى من الصبح ولا حاسين بحر ولا برد ولا حاسين بشارع ولا ناس ولا حاجه خالص لحد ما نوصل لمطلع الهرم نقوم نفوق ونرجع تانى المشوار كله .. فشكول كان بيقول احلى كلام وبيسمع احلى كلام وبس .. ما فيش لمس ..كل واحد يتكلم من بعيد لبعيد - كنا بنحب بودننا .. البت محترمه .. وفشكول برضه محترم .. وكانت كل الفشاكيل الحبيبه والمزز الحبيبه اللى فى الشارع كده محترمين بيحبوا بودانهم وخلاص .. ممنوع اللمس وكانوا بيخافوا على الجووه -المزز- اصل كنا بنحب عشان نتجوز مش حكاية مزز وخلاص


كنا بنلبس تى شيرتات برضه وقمصان .. كان التى شيرت او القميص مكوى وعلى سنجة عشره .. فشكول كان بيحب سيف البنطلون ما فيهوش كسره واحده والجزمه بتلمع على أخرها .. فشكول وكل الفشاكيل كانوا بيحبوا الصوت الهادى وبيحب يحافظ على الجو بتاعه - المزه يعنى - متهيأ لى ان الفشاكيل كانوا غلطانين وكانوا هبل والمزز كمان كانت هبله ..الحاجه بقى بتاعتى كل يوم بتقول لفشكول يا خى روح انت ما لكش لازمه .. ليه يا وليه تقول يا خى روح شوف لنا قرشين للعيال اللى عايزين يشتروا شقق دول وما معناش ثمن الشقق دى .. فشكول يبص للأرض وهو مخزى وقفاه يقمر عيش .. ما علينا فشكول يفتكر ايام زمان ويقول لها يا وليه انت ناسيه الجزم اللى اتقطعت فى شوارع القاهره من المشى .. يا وليه انت كنت لو فات يوم من غير ما أهريك مشى ومن غير ما الففك الشوارع كلها تعملى مناحه وتخاصمى اخواتك وامك وابوك وتقعدى تعيطى وتنوحى والتليفونات ما تبطلش زن.. الوليه بكل برود تقول .. يا خويا .. انا كنت هبله وعبيطه .. فشكول يفتكر ايام الهبل والعبط والجزم اللى كان ابويا يقول لى انت رجلك فيها فواريك .. اصل ما كانش بيشوف المشاوير اللى كنا بنعملها من روكسى للهرم ومن القلعه لحديقة الاندلس ومن العتبه لحد المؤسسه فى شبرا للزمالك .. للدقى .. كنا صايعين بقى ومبسوطين من المشى.. ما هو ما كانش فيه كل اللى المشى .. ويا سلام لو كنا نروح لونابارك اللى كانت فى جنينة الحريه اللى بعد كوبرى قصر النيل بتاعة ضحك ولعب وجد وحب بتاع عبد الحليم حافظ .. تقولش كنت فاكر نفسى عبد الحليم حافظ.. وبحبك يا فشكول .. وبحبك يا ست الدار .. والاخر تقول لى ما لكش لازمه .. ما شى يا حاجه


وااااااااع .. وااااااااع .. واااااااع .. ايه ده القطر عمال يقول يا خلق هوى ليه ؟؟ آآآه .. اصل القطر وصل سيدى جابر .. اصحى يا فشكول .. ابص من الشباك الاقى الواد اللى شكله ما يسرش عدو ولا حبيب والبت اللى زى القمر نازلين سيدى جابر وانا مكمل لمحطة مصر .. فشكول كمل ووصل المنشيه


الساعه كام .. يا نهار مش فايت .. اجرى يا واد عشان تخلص شغلك ..

فشكول رجع فى نفس اليوم بس فى اتوبيس الجونه .. حاجه كدا سياحه .. فشكول حيحرم تانى يركب القطر


الثلاثاء، 11 نوفمبر، 2008


الملك مينا موحد القطرين



ان ما توصلنا اليه فى الحلقه الأولى فى تكوين الجنس المصرى ونشوء الجنس الهجينى ما هو الا فكره مبسطه لكيفية بداية حضارة ما - وحيث أن الحضاره المصريه القديمه نشأت على ضفاف النيل نتيجة هجرات كثيره عبر التاريخ بحثا عن المياه والحياة بجانبها شأنها شأن حضارات كثيره نشأت فى فجر التاريخ مثل حضاره المايا فى أمريكا الجنوبيه وحول نهر الأمازون وكذلك الحضاره السومريه القديمه والتى نشأت حول نهر الفرات وكثير من الحضارات والتى لم تصلنا اخبارها وما وصلنا من أخبار هى عن الحضارات المكتوبه والتى ذكرناها آنفا ومن المعروف انه يوجد بالمكسيك اهرامات تشبه الى حد كبير اهرامات الجيزه سواء فى بنيتها أو فى شكلها مع صغر حجم تلك الاهرامات - على أنه لا أحد يعرف على وجه الدقه علاقة تلك الأهرامات بالحضاره المصريه القديمه أو العكس


وحتى لا يستغرقنا البحث فى اصول الحضارات ولكثرة التفصيلات التى لابد أن نستفيض فيها ولصعوبة ذلك على شخصى الضعيف ولأن الموضوع خاص بالشخصيات والحكام الذين اثروا فى التاريخ المصرى وتركوا بصمتهم فيها سوف ندخل مباشره فى الموضوع ونبدأ من العصر العتيق والذى يتضمن الأسرتين الأولى والثانيه وسوف نعطى موجزا تاريخيا للنشأة المدنيه فى مصر القديمه وكيف بدأت الحضاره التى
مهدت بعد ذلك نحو توحيد البلاد


كانت البدايه القبيله


بدأت الجماعات فى وادى النيل على حالتها الفطريه وكانت الجماعه فى حالة ساذجه اذ كانت تتخذ حيوانا أو نباتا لها بمثابة اله أو وثن تعبده ومن ثم اخذت الجماعات تتجمع وكونت قبائل وبتكوين القبائل تكونت مدنا لكل منها حكومتها أو شيوخها أو حكامها - ثم تطور الأمر الى مديريات من هذه المدن وأقاليم وتعرف باسم المقاطعه وقد حدث هذا فى الوجه القبلى وايضا فى الوجه البحرى وبعد مضى الزمن قامت حركة اتحاد فى البلاد وذلك حينما تجمعت مقاطعات الوجه البحرى الى مملكتين - الاولى فى الغرب وعاصمتها بحدت وربما كانت دمنهور الحاليه والثانيه فى الشرق وعاصمتها بوحد بالغرب من سمنود الحاليه وبعد فتره من الزمن اندمجت هاتان المملكتان فى مملكه واحده اطلق عليها الوجه البحرى وكانت العاصمه فى بادى الأمر سانس صالحجر الحاليه ثم عادت العاصمه مره ثانيه الى بحدت وفى الوقت الذى اتحدت فيه الدولتان فى مملكه واحده عاصمتها بحدت تكونت مملكه اخرى فى الوجه القبلى مؤلفه من اتحاد عدة مقاطعات عاصمتها نقاده على مسافه قريبه من الاقصر وقامت عده وحدات بين الوجه البحرى والوجه القبلى لم تتوثق عراها بعد ثم قامت عدة ثورات فى نقاده واميبوس البلاص حاليا احتجاجا على تسلط الدلتا حيث كانت الدلتا اقوى من الصعيد فى ذلك الحين لتنفض عرى الوحده بعد الاخرى حتى قام سلطان عظيم من عظماء اهالى طينه بالقرب من العرابه مركز البلينا وقد جاء فى جدول الملوك باسم مسنا أو مينوس باليونانيه والارجح انه الملك عحا أو الملك نارمر والواقع اننا لا نعلم علم اليقين اذا كان توحيد القطرين قد حدث بطريق السلم او طريق الحرب - اذ من المحتمل ان مينا ملك الجنوب قد ورث عرش الشمال عن امه


وعلى اية حال فان مينا قام ببناء عاصه جديده على مقربه من عين شمس وكانت احدى العواصم القديمه للوجه البحرى وسماها من نفر - الميناء الجميله - والذى اطلق عليها اليونانيين منفيس - البدرشين وميت رهينه منف حوالى 3200 قبل الميلاد منقول بالنص من مصر القديمه لسليم حسن


وقد كان مينا موحد القطرين هو مؤسس الاسره الاولى واول ملوكها

بعد ان انهى الملك مينا معاركه الحربيه أو بعد ان وطد سلطانه على الوجهين البحرى والقبلى قام مينا بزيارة الأقاليم الشماليه اقليما اقليما وعند زيارته لاقليم سايس وبعد ان استراح الملك فى قصر الضيافه وابدل ملابسه دعاه أمير سايس لتناول الغذاء على مائدته التى حوت الذ انواع الطعام والشراب وجعل الامير سايس اولاده بنين وبنات يقومون بأنفسهم على خدمة الملك اثناء تناوله الطعام وكان من بين بنات سايس الاميره نبت حت وكانت على قدر عظيم من الجمال واعجب بها الملك وطلب يدها من ابيها فوافق فى سرور عظيم وتزوجها وقضى شهرا كاملا فى قصر الضيافه ثم اصطحب زوجته الجميله عائدا الى عاصمة مملكته فى الجنوب ثنى واستقبل استقبال الظافرين


وقد ظل مينا يحكم مصر مدة 62 سنه وكان اول ملك يحمل عدة القاب مثل ملك الارضين - صاحب التاجين وكانت الاسره الاولى التى اسسها مينا هى اولى الاسرات الحاكمه فى تاريخ مصر . بل فى تاريخ العالم كله


وقد انتهت حياة الملك مينا نهايه كارثيه حيث قتله احد افراس البحر المفترسه اثناء احدى رحلات الصيد فى احراش مدينة منف وقد تم تحنيط جثته وتكفينها ووضعت الجثه فى تابوت حجرى نقل فى احتفال مهيب الى احدى السفن التى ابحرت الى عاصمد الملك فى الجنوب وتم وضعها فى القبر الذى اعده الملك بنفسه من قبل بين تراتيل الكهنه وعويل النساء وحزن الشعب الذى فقد بموته بطلا مظفرا لا يعوض وحاكما عظيما ونشر بين ارجائها الامن والسلام


الى هنا انتهت رحلتنا مع اول عظماء التاريخ الملك نارمر - او الملك مينا - او الملك نعرمر موحد القطرين ملك الارضين وصاحب تاج نسر الجنوب وثعبان الشمال


على اننا لا بد ان ننوه اننا لم نجد اى مرجع تاريخى يحكى تراجم عن الملك مينا او سيرته الشخصيه او اوصافه . سوى ما ذكر وهو كل ما وجدته عن الملك مينا وحاولنا بقدر الامكان تلخيص تاريخه دون اخلال أو اهمال احداث تاريخيه هامه

والى حلقه قادمه


لمعرفه تفاصيل اكثر ابحث فى الانترنت عن الملك مينا موحد القطرين