الأحد، ٢٨ نوفمبر ٢٠١٠

مش عايز اقول حاجه .. اقول بطاطا أقول بطاطس ولاقلت حاجه

سمك ... لبن ... تمر هندى

انا من ضيع فى الاوهام... عمممرررررره

عينى يا سيدى ... وكمان

احنا احنا احنا .. اللى امنا للزمان .. احنااا

عمر ديل الكلب ما يتعدل

وضاع منا الأمااااان ... وجرررحححنننا

تررم تررم تررم

ان تابت ....................

واحنا احنا احنا ... اللى آمنااا ....

احنا احنا احنا .... اللى آمناا


مافيش اى حاجه ...

حد يقدر يقول للغوله عينك حمرا

...........

يا غوله .. عينك حمرا


السبت، ١٦ أكتوبر ٢٠١٠


انا الاديب الادباتى .. لبست شوال وشيلت خرج بجيوب ... اتهبل الاديب يا ولاد ... صواميل عقله اتفككت ... ماشى فى كل ميدان يهبل ويطبل ويلت ويعجم ... ويطجن.
من ضمن ما بيطجن الاديب الادباتى ... قال ايه بيهبل ويقول ايه ... حمرا يا طماطم ... خضره يا ملوخيه ... يا مقمعه يا باميه

طب ايه العلاقه بين الطماطم والباميا واللى حصل ولا يتوصل ... ولا فيه اى علاقه ولا فيه اى مناسبه ... مش بقول لكم أديب واتفككت صواميل عقله. وعلى رأى البت العسل ريم ماجد أنا كمان ممكن اقول لكم كلمه فى سركم ... مش هى بس اللى بتعرف تقول ... انا كمان اعرف ... طب مش مصدقين ... خدوا بقى دى :

ضرب زيد عمرو ... طب وايه الجديد ... ما هو زيد من يوم ما صحينا على الدنيا وهو بلطجى وبيضرب عمرو على مسمع ومرآى من الدنيا كلها ولا حد عمل له ولا بيعمل له حاجه والكلام دى من اكتر من 50 سنه ... طب ايه الجديد يا ادباتى يا اهبل ... الجديد ان الواد عمر نبيه ... واديب... بس لسانه زالف وطويل حبتين...

يا صهبجيه .... واه يا لالالى

فى مولد السيد البدوى ... واخدين بالكم... السنه دى السيد البدوى طلع من المقام بتاعه وقعد يقرأ قرآن مع المصلين ... ويقف ورا الامام ويصلى ... وعامل فيها صاحب المطرح ويقعد يلف ويدور فى الجامع ويتفقد احوال خلق الله ... قوم اييييه... لقى جماعه قاعدين فى ركن من الجامع وبيتكلموا كلام فى العلم ... واليوتوبيا ...المدينه الفاضله .... دا جامع ... امسك ... كفره ... حيدخلوا النار ... وراسه والف سيف لازمن يطلعوا بره الجامع ويفكونا من غلاستهم ورزالتهم ... كانوا محمود وابراهيم وحسنين وعيسى ... مجموعه قليلة الادب كدا ... اصل ايه ... خليكوا معايا امال:

شيخ الجامع وامامه ... وعد سيدنا الشيخ السيد البدوى رضى الله عنه وارضاه انه حيسمح له بعمل حلقة ذكر فى الركن الشعبى اللى قدام الجامع ... ومالكش دعوه بالركن اللى بيقعدوا فيه الناس الكبره يتحاكوا ويتشاورا ... ما لكش فى الركن ده ... قوم ايه ... وعده كمان بـ 20 ويمكن 30 واحد يقعدوا يزكروا معاه ... بشرط .. لازمن وحتما وهلبت وربما تساعدنى فى طرد الجماعه بتوع اليوتوبيا دول بره ... وسيدنا الشيخ ما كدبش خبر .

والاديب الادباتى ماشى فى الشارع ويهبل ويقول
يا صهبجيه ... واه يا لالالى ... حاجه م اللى هيه ... واه يا لالالى
حبة آهات على عينى على لالى ... على ترللى
الحلو قال رايح ولا جاشى ... الحلو قاااال راااييييححح ووولا جاشششى

حمرا ياطماااطم ... خضررررا يا ملوخيييه ... يا مقمعه يا بااااميه


الأربعاء، ١٥ سبتمبر ٢٠١٠

الرجاله ... العشره بقرش

فرحان بايه .. جاتك خيبه



السلام عليكم

عيد سعيد وعمر مديد وكل عام وانت جميعا بخيرويعيده الله عليكم بالخير واليمن

والبركات

اليومين دول انا عندى فى البيت مرستان .. عربخانه .. مولد وصاحبه غايب


بنتى جات من السعوديه فى اول رمضان ومعاها حبيبة قلب جدها ملك وحبيب قلب جده محمود اللى وديته المطار من حوالى سنه ونصف وعمره 30 يوم .. ورجع بسم الله ما شاء الله. ربنا يخليهم ويبارك فيهم عندى بقى فى البيت احمد ابن اسامه .. ربنا يحرصهم ويخليهم ويبارك فيه هو كمان .. بس هو موجود عندى تقريبا طول ايام الاسبوع وقاعد يلعب مع جده لوحده وواد مؤدب خالص والله .. قوم ايـــــــه .. لما جاء له ملك ومحمود ولاد عمته واتحدوا الثلاث عيال مع بعض .. عينكم ما تشوف الا النور .. لا كرسى مطرحه .. ولا كبايه ولا شلت الانتريه مطرحها والبيت من اوله لآخره زباله .. اكياس شبسى .. واكياس مش عارف اسمها ايه .. ومكعبات .. وبقيايا اكل فى كل حته .. والبيت يضرب يقلب .. بس حلو ربنا يديمها ضربان قلبان ..

قوم ايـــــــه .. الواد محمود الكبير بقى عامل فيها راجل وكل يوم يشخت فى العيال ويمكن اديه تطول عليهم .. اقوم انا ارد له الصاع صاعين .. انت يا خويا عامل فيها راجل وما حدش قادر عليك .. انت يا بنى ما قريتش فى العلوم شويه وعرفت ان حكاية انك راجل دى ما بقتش عجبه ولا بقت لها لزوم خالص .. يا بنى دول حيخلصوا على جنس الرجاله قريب .. ازاى يا بابا .. قلت له .. اقول لك ازاى .


يا ابنى ربنا خلق آدم من تراب .. وعشان استمرار النوع خلق له حواء من ضلعه واستمر الخلق من يومها لحد النهارده بالطريقه دى وربنا وازن الكون ووازن البشر بالطريقه دى كل راجل يلاقى له من خلق الله حواء وكل حواء تلاقى لها راجل .. قوم ايه .. الخلق بقى الظالمين لانفسهم ومن يوم خلق آدم لحد النهارده الرجاله عامله فيها قمع ومنفوخ وعاوج رقبته كأنه الزناتى خليفه ولا ابوزيد الهلالى .. ويا ارض انهدى ما عليكى قدى ..

قوم ايييييه .. العلماء جابوا دبوس وفرقعوا بيها البلونه دى وقالو للراجل .. يا عم مش عايزين رجاله خلاص ما لكوش لزوم ولا لكم اى قيمه فى الدنيا دى .. ونانوييين يسلموا الرجاله كلها اللى فى العالم للستات ويجمعوهم فى ميدان عام وبالرشاش .. تك تك تك تك بوم ..لحد ما يخلصوا عليهم ويخلصوا بقى من النفخه الكدابه دى واللى عايزه راجل بعد كدا لأغراض البحث .. خدتوا بالكم لاغراض البحث .. دى الحجه اللى حيجيبوا بيها رجاله .. لاغراض البحث .. هما اللى بيقولوا .. اللى عايز يروح يجيب من الجبانه اى حتة عضم ولا شعرة راس لاى راجل ويجيب بويضه من اى واحده ويعملوا استنساخ وطبعا حيكون فيه علماء يحللوا ويحرموا ازاى .. ما تقلقوش موضوع التحريم والتحليل ده حيكون له حل .. المهم حيلقحوها فى بويضه ويجيبوا راجل لاغراض البحث برضه وكفى الله المؤمنين القتال .. ويجيبوا رجاله على قد ما هما عايزين ولا الحوجه لكل الرجاله الكتار اللى فى العالم دول ..
اما يا ابنى النساء فمفيش غنى عنهم لانهم هما اللى عندهم البويضه وممكن نستغنى عن الراجل بس البويضه ما لهاش حل الا من النساء عشان كدا ح يبيدوا الرجال بالكامل الا لأغراض البحث يعنى ممكن نجيب حتة الـ DNA من اى عضمه من الجبانه وخلاص ما فيش مشكله ويزرعوا البويضه فى رحم الام وما فيش بربلوم خالص والتفاصيل بقى ابقوا اسألوا عليها الدكتوره ستيته الحمش ..

ومش عايزينكم يا رجاله يا مغرورين . وفى الآخر مش حنلاقى رجاله الا فى اقفاص جنينه الحيوانات والاطفال البنات بقى بيتفرجوا عليهم وبيقولوا لهم خد الموزه دى واعمل عجين الفلاحه والراجل جوه القفص يفرح بالموز ويعمل عجين الفلاحه والبندريه وعجين اهل الصحراء وكل العجائن من اجل صباع موز وياخد صباع الموز ببلاهه ويفشخ بقه ويضحك ضحكه هبله زيه وياكل صباع الموز.. حيوان .. وتختل الموازين وتتغير فطرة الحياه وتبوظ التعادليه اللى ربنا حافظ لنا عليها واحنا من هبلنا وغرورنا حنبوظها.


طب ما فيش رجاله .. والبنات يا عينى عايزين يتجوزا .. فطرة الحياه .. ودى سلعه ناقصه خالص ونادره بالمره ولا يوجد رجال الا لاغراض البحث وفى جنينه الحيوان .. تعالوا بنا نشوف ايه اللى ممكن يحصل؟ قوم ايييه ... زعيمة النساء فى العالم ورئيسة العالم حتعمل ايه ؟ حتروح بقى حديقة الحيوان .. قصدى حديقة النسانيس وتاخد نسناس .. قصدى راجل .. وتاخده القصر معاها .. لاغراض البحث.. وقبل الفجر يكون رجع للقفص بتاعه تانى ..

ومره واتنين وتلاته والعمليه تشيع بين الناس وياخد بيها خبر كل النساء فى العالم والثوار من النساء يروجوا بان موازين العداله اختلت فى العالم ولا توجد عدالة توزيع للثروه وان الزعماء والقواد الصغيرين يستأثرون لنفسهم بالنسانيس وبانه لا يوجد عداله وعشان الواحد ياخد حقه لابد ان يكون من الزعماء او الكبار للنسوان وتقوم ثوره عالميه ضد زعماء النساء .. وتتجه جموع النساء الى حديقة النسانيس .. قصدى الرجاله .. اللى هما تلاته ولا اربع رجاله او يمكن خمسه فى خمسة اقفاص ومن كتر الزحمه اللى تاخد شوية شعر واللى تاخد دراع واللى تاخد ركبه وكل واحده ونصيبها بقى ..

باختصار حيقطعوا الرجاله اللى فى الاقفاص حته حته وتقوم حروب لحد ما ينتهى صنف البشر على الارض عشان احنا اخلينا بفطرة الله على الارض .. ربنا عمل تعادليه فى الحياه .. ربنا بيخلق لكل راجل ست ولكل ست راجل والدنيا تمشى

.. نداء لكل الرجاله

خدوا بالكم من نفسكم واحرصوا على نفسكم قوى .. اصل ما عادش لكم لزوم ولا فايده .. ممكن يعملوا رجاله زى ما هم عايزين وبراحتهم .. حتى حفظ النوع اللى انتم بتتفشخروا بيه .. مابقاش له لازمه ..


مين هناااااااااااااااااااااااااااااك ... البندق يا جدعان ..

الحقوووووووووووووووووووووووونى



السبت، ٢٨ أغسطس ٢٠١٠

خواطر ... هبله


السلام عليكم

أحبائى ... كل التحيه لكم .. وحشتونى .. ولكن المدونه مش وحشانى .. لكن انا جيت عشانكم انتم .. عشان انتم احسن ناس فى الدنيا .. اما فشكول بقى فما زلت مش طايق وشها.

شكرى وامتنانى وعرفانى لكل من سأل عنى وكنت اتمنى ان اذكرهم بالاسم .. لكن عشان هما كلهم حبايبى حاكتفى بشكر من سأل عنى ولو مره وشكرين لمن سأل عنى مرتين وخصوصا اما نعيمه لانها قالت نعمين .. خلى عليوه يكلمنى.

اليومين دول انا مقيم فى البلكونه .. افطر واقعد وانام واصحى واتسحر برضه وانا فى البلكونه وهجرت الشقه تمام .. الحر .. الحر هذا القيظ الحارق فى هذه الايام.. من ساعة ما الفنيين جم خلعوا جهاز التكييف واخدوه علشان يعملوا له صيانه اصله كان ايام الحر اللى فاتت شغال اربعه وعشرين ساعه بعدين الراجل من كتر الحمل عليه قال مش لاعب واخد نفسه وراح مع بتوع الصيانه.. قوم ايه ؟؟

انا قاعد بقى فى البلكونه منى للسما بحاول اشم هواء ..لكن ما فيش هواء لا اكسجين ولا حتى ثانى اكسيد الكربون وعرقى مرقى لكن ما فيش حل .. الامر لله قوم ايــــه ؟؟ قاعد بقى ابص للسما واعد فى النجوم وافكر فى الفضاء اللا نهائى اللى قدامى .. ساعات الاقى نجمه منوره قوى فى السماء .. اقوم اقول آه دى النجمه الفا كنتور .. كمان ساعات اشوف واحده كمان جنبها اقول .. بيتا كنتور وساعات الاقى بعيد عنهم بييجى كدا 10 او 15 متر .. طبعا دى الشعرى اليمانيه .. واخوكم عامل فيها جاليليوا .. اصل قاعد فى البلكونه فاضى والفاضى يعمل قاضى .. عندى نظاره معظمه .. اقوم اجيبها وابص بيها على السماء .. تقولش الدكتور مصطفى محمود ولا تقولش فاروق الباز.. واقعد افكر .. طب فين السماء؟ .. هى الخيمه الزرقاء دى يا ترى ولا دى ابعد نقطه يوصل لها نظرى؟ .. يا خبــــــــــــر.. دى خيمه كبيره قوى قوى .. قول لحد الصبح قوى .. طب السبع سماوات شكلهم ايه؟ .. وسبحان الله لا قوة الا بالله .. سبع سماوات .. سبع اراضين .. سبع ايام .. السبع المثانى .. سبحان الله لغة الارقام فى القرأن منزلق خطيرلا استطيعه ولا اقدر عليه .
جات على بالى سورة الطارق وتأملت الآيه

(والسماء والطارق وما ادراك ما الطاق النجم الثاقب .... الآيه)

اشهد ان لا آله الا الله وانا سيدنا محمدا رسول الله

مين اللى قالك يا محمد من اكثر من 1400 سنه عن حكاية الطارق ومن اخبرك انه النجم الثاقب .. لا اله الا الله

يقول العلماء ان هذا النجم ينبض.. بيدق زى قلبك ما بيدق .. بس مش من الحب ولا الغرام .. بيطرق وسموه (النجم الثاقب او الثقب الاسود) ويا دوب لسه عارفين الكلام ده فى القرن العشرين يعنى من حوالى 60 سنه بس .. طب مين اخبر محمدا عليه السلام .. طبعا مافيش كلام .. الله العلى القدير.

برضه ساعات وانا ابص فى السماء الاقى حاجات بتطير كدا وتختفى مره واحده اللى هيا النيازك .. وعندنا فى الفلاحين بيسموها النجمه ام ديل ..وكنا بنقول عليها واحنا صغيرين لما نشوفها (سهم الله فى عدو الدين .. تنزل على القوم الكافرين)

السماء الواسعه دى ازاى نعرفها ونعرف الى فيها وصحيح حنقدر نسافر فيها ولا لأ .. والله عشم ابليس فى الجنه مع انه عارف انه مش حيشوفها بعنيه خالص.. دى السفينه اللى اطلقوها عشان تزور المجموعه الشمسيه من آخرها وتسيبها وتطلع بره المجموعه الشمسيه اللى اسمها فويوجير واحد وفويوجير 2 من يوم ما سابت عطارد وهى تايهه فى الدنيا ولا حد سامع عنها حاجه خالص والسفينه دى اطلقوها سنة 1977 ومن يومها وهى عماله تصيع فى الفضاء وقالوا لنا انها حتقول على حاجات كتيره ولا قالت ولا عادت

بيقولوا انهم حيحولواالانسان لطاقه ويبعتوه للكواكب والنجوم البعيده ويصيع فى الفضاء ويهيس ويزور الدنيا كلها ويطلع من درب التبانه اللى هى المجره بتاعتنا ويزور الدب اللبنى اللى هى المجره اللى جنبنا .. فى المشمش بقى لما يعملوا كدا

طب يا جماعه احنا عارفين ان الانسان جسد ونفس وروح .. الجسد معروف والنفس هى مجموعة تصرفات الانسان وخيره وشره وما الى ذلك ..اما الروح بقى ماحدش يدركها ولا يعرفها الا الله سبحانه وتعالى .. واما الانسان تطلع روحه واصلا هى طلعت من زمان ولما ربنا وهو بياخد الروح بيقول ورفعنا عنك غطائك فبصرك اليوم حديد .. يعنى يا جماعه الانسان بينكشف عنه الحجاب وبيشوف اللى عمرنا ما شفناه ولا حنشوفه وبيفهم اللى طول عمره بيحاول يفهمه .. دا ساعة طلوع الروح اللى الجماعه بتوع الحزب الوطنى طلعوها من زمان ..بس يا خساره .. ما حدش طلعت روحه ورجع قال لنا ايه الحكايه .. ولا حد حيرجع يقول لنا ايه الموضوع ..يعنى نقدر نقول عليها طاقه .. الله اعلم لكن احنا بنقرب المواضيع ونستغفر الله ان كنا اخطأنا .. عايزين يحولوا الانسان لطاقه .. طب ما هو فعلا كدا وربنا بيعمل فينا كدا وبنروح لربنا كدا .. احلق شنبى اللى عمرى ما ربيته لو قدروا يعملوا كدا

الجن .. كل يوم يقولوا لنا حكايات كتير عنه واساطير كتيره ونشأت فى الجامعات اقسام لدراسته .. العفاريت يعنى .. يبقوا يقابلونى مره تانيه فى المشمش .. دا حتى ابن كثير لما كتب عنهم فى البدايه والنهايه .. ما فهمتش منه حاجه .. واللى غطى واللى وطى جاب سيرة حاجه اسمها الحن .. هذا الحن سكن الارض قبل الجن وكمان سكن الارض قبل الحن .. البن .. طب يا ابا الحاج ابن كثير مين هما الحن ومين هما البن .. ولا حاجه ولا سيره ولا كلمه واحده .

احنا بقى من غرورنا بنحاول نتدخل فى اللى ما لناش فيه .. اصل ربنا عمل لنا عقولنا بتفكر بشكل مادى وتدرس الاشياء بشكل مادى .. يعنى عقلنا يشوف الطوبه يقول عليها طوبه عشان هو اصلا طوبه .. مادى .. يدرك فقط المحسوس والملموس ..اما ما غير ذلك فلا والف لا وما لناش دعوه بالغيبيات عشان مخنا يا دوب شوية جيجات صغيره ما تقدرش تعرف ولا تشوف اللى غير محسوس او ملموس احنا بس نؤمن بما قاله لنا الله وخلاص .

المره الجايه بقى عندى لكم موضوع يهلك من الضحك وخصوصا حيحبوه الستات خالص والرجاله كلهم حيحدفونى بالطوب .. وعلى رأى جابر القرموطى ... سلامن عليكم .

اللى القاء

الأربعاء، ٢٣ يونيو ٢٠١٠

زمان مصطفى كامل كان بيقول (لو لم اكن مصريا لوددت ان اكون مصريا) اشمعنى يعنى .. عشان ايه يعنى .. يعنى ماينفعش اكون اوربيا او هنديا او يابانيا او حتى لبنانيا ... ويا سلام لو اكون امريكيا .. اشمعنى يعنى مصريا .. بأمارة ايه يعنى انا عايز اكون مصريا..ومن فضلكم ما حدش يعمل الشويه بتوعه ويقعد يقول الوطنيه والكلام ده .. اصل الحكايه مش ناقصه

واليومين دول طالعين فى مقوله بتقول ( مصر وطن يعيش فينا لا وطن نعيش فيه ) وبيعيش فينا ازاى يعنى .. يعنى هو انا جواى كل الدنيا دى .. طب حتى الواحد ينفجر من كتر اللى جواه .. هو مش انتم برضه عايزين تنفجروا .. الواحد خلاص حيطق من جنابه .. دا الواحد طق وخلاص .. وانفجر وانتهى الموضوع.

عشان انا مش طايق نفسى .. بعد اذنكم يعنى انا حـ اغيب شويه عن التدوين عشان مش طايق نفسى ومش طايق المدونه .. يعنى اجازه شويه شهرين ولا تلاته ولا يمكن ستة شهور عشان انا ما عنديش كلام اقوله .. مخى بقى فاضى ومحتاج شحن جديد .. ومخى بيحتاج وقت عشان يشحن .. حـ احط الشاحن فى الكبس واسيبه لحد ما اقدر اشحن مخى تانى .

سلام مؤقت حتى اعود

تحياتى للجميع

الثلاثاء، ١ يونيو ٢٠١٠

بعض من الخجل والحزن

السلام عليكم

انا ... انا ... أنا لست رجلا ...فقد فقدت كل ملامح الرجوله ... أنا لست امرأه ... فلا املك من ملامح النساء شيئ ... ابحث عن نفسى فلا اجد الا اشلاء بدون معالم ... اذا فمن انا ... يا للهول ... انا مسخ من اربع اطراف ورأس ... انا مسخ يقف على قدميه ... يشبه الانسان ولكنه ليس انسان ... انا حقل التجارب الذى لا ينضب تجارب حكامى وتجارب اعدائى ... فى البر والبحر والجو وتحت الارض وفى الانفاق ...أنـــا ... يرتكب فى انا افظع الجرائم دوله بعمر 65 سنه تفعل فى انا كل هذا ... وانا ... عاجز ... مشلول ... مكبوت ... مبعثرة اشلائى ... انـــا ... اسباب ضعفى انــا ... ولاة امورنا ... كراسيهم تهتز تحتهم وليس من هم لهم الا تحصينها ... اما أنــا .. بالظراطه فى أنـا ... طز فى انـا ... أطلب السلاح لادافع عن أنا ... فلا اجد السلاح لانه ليس له عمل الا دعم كراسى الحكم الوثيره ... وتفعل بنا اسرائيل ما تفعل ... أمريكا تحتطن الطغاه وتحافظ لهم على كراسيهم الوثيره ... اما أنـا فلا يعبر أحـد أنا ... كمان مره ... بالظراطه فى أنـا ..
أنا اللى طول عمرى بصدق كلام الصبر فى المواويل

فى المواويل فقط وأنـا ليس لى الا الصبر ... آآآآآآآآه يا أنـا ... يا غلبى يا أنـا

بالظراطه فيكم يا عرب

الأربعاء، ١٢ مايو ٢٠١٠

الطوارق - لأ - الطوااااااارئ - محتاج اروح الكتاب تانى

يا دهوتىىىىىىى .. مبروك
الطوارئ - ظرف طارئ - ظرف قاهر

مش ظرف دائم ولا ظرف ساهر
قلنا الف مره - مش عايزين طوارئ

قالوا ................
انتم ما تستاهلوش غير الطوارئ


مصر يا امه يا بهيه


الطوارئ من اسمها - حاله

مش حاله جالسه
ولا قاعده ومشرفه الى ابد الآبدين
بلد الحضاره وبلد الحمير والجمال

انا راجل مهبلاتى مطجناتى
اهبل والف ... زى الالف ...
وكل يوم حالة طوارئ وحته من بلدى
حته من كبدى بتضيع
حته من بلدى بتموت
حته من بلدى بيتهد حيلها
وحيل اللى خلفوها .

اصحى يا نايم ... يا نايم اصح اااااااااى
وحد الرزاااااق
ايييييصحـــــــ ا يا نااااايم
وحد الرزاااااااق

الثلاثاء، ٢٠ أبريل ٢٠١٠

المره اللى فاتت طلبت منكم تسقفوا ...
بسسسس .. كفااااااااايه .. مش عايزين هيصه ولا تسقيف
المره دى صوتوا يا بنات ... الطموا يا ولاد
لييييييه ؟

عندنا نواب محترمين - بيمثلوا الشعب وبيلبوا كل احتياجات المجتمع .. وبيلعبوا على السلك فشر ولاد الحلو

كان عندنا نواب سميحه ... نواب قروض تلاقى .. نواب تزوير موجود .. نواب الحشيش .. يا سلام انت جيت فى جمل .. آخر موضه بقى جبنا لكم نواب القمار - مش حنخلى فى نفسكم اى حاجه .. واول امبارح بقى عملنا لكم نواب آخر جنان .. ما حدش يقدر يعمل النواب دول خالص الا احنا .. كله عشان سواد عنيكم .. اصلنا بنحبكم قوى يا ولاد الـ .. ربنا ياخدكم ويريحنا منكم .. هو ربنا سايبكم تقرفونا فى عيشتنا ليه ؟ .. احنا جايبين لكم آخر موضه فى النواب .. جايبين لكم نواب ضرب الشعب بالنار .. يا ولاد الحلال .. فتح عنيك تاكل ملبن .. الفقره دى ما حدش عملها خالص .. دى حاجه جديده ما اتعملتش اللى فى ميدان البيكاديلى وهايد بارك .. بحلق يا جدع .. فين الجدعان اللى يكتفونى .. عايز تلاته رجاله يكتفونى وشوفوا حاعمل ايه .. بس قبل ما يكتفونى كل واحد ياخد باله من جيبه .. اللى حيتسرق انا مش مسئول عنه .. انا حاوى .. والله العظيم .. حاوى ما حدش زيه .. اتفرج يا سلام .. اتفرج يا جدع
يا عدددددددووى ..عايز صوات حاد .. عايز لطم جامد .. كله يشجع .. كله يقول ربنا معاك.. يا عدوى
كل ابن حلال يحط قرش فى الصحن .. اللى ما معاهوش ما يلزموش .. واللى معاه وما يحطش يبقى ابن حرام

النائب نشأت القصاص طالب وزير الداخليه حين مناقشة مظاهرات العيال التلفانه اللى اهاليهم ما ربوهمش .. اللى هما عيال 6 ابريل وطالب بضربهم بالنار..يا سلام .. يا سلام .. مش عارف انت اتحدفت علينا من اى مصيبه يا شيخ .. لأ ومن استهباله بيقول لمنى الشاذلى ( انا مصمم على اللى قلته وقلت بالضبط الخارجين على القانون.. يا سلام .. يا سلام يا راجل السياق كله كان عن المظاهرات والاعتصامات .. يعنى انت بتعتبر دول خارجين على القانون .. روح يا شيخ منك للى كلت دراع جوزها .. اشوف فيك يوم

حتى الخارجين على القانون ما بينضربوش بالنار كدا خبط لزق .. فيه جنح اقصى حاجه فيها حبس او سجن شوية ايام كدا يعنى .. وفيه جنايات الاحكام فيها بتوصل للاعدام .. بس لازم يتحاكموا .. مش عايز تضربهم بالنار خبط لزق كده

يا خويا اذا انت مستغنى عن ولادك انت حر .. حتى ولادك مش من حقلك تتكلم عنهم هما اللى يتكلموا عن نفسهم .. حتى مش من حقهم يتكلموا عن نفسهم .. يا راجل الروح ما بياخدهاش اللى ربنا اصل عيال 6 ابريل دول ولاد هرمه وشوية صيع ما اتربوش وضرب النار حلال فيهم

رجب هلال حميده بقى .. عارفينه .. كلكم طبعا عارفينه .. بيقول ايه لا فض فوه .. بس قبل ما اقول عن اذنكم انزل اشترى سندوتش كبده من العربيه اللى تحت البيت ................
انا جييييييييت .... بيقول اخينا بقى .. سعادته .. معاليه .. جناب حضرته .. يا لهوووى .. يا حوستىىىى .. النائب بتاع الشعب .. بتاعنا .. اللى هو موجود عشانا بيقووووول لا فض فووووه ( اعيب على الداخليه انها لا تعمل القانون ولا تستعمل الرصاص ) .. الطموا يا ولاد .. مع ان رجب مش وطنى .. دا حزب غد .. بس الغد التانى اللى بالى بالكم .. اللى تبع الحزب الوطنى

بعض نواب الحزب الوطنى بيقولوا ان هناك ايادى خفيه تعبث فى البلد وهى ايادى نجسه .. ما شاء الله ..

اشجونا .. الله الله الله .. يا سلام يا ست .. يا سلام يا حليم .. هى الكراسى بتاعتكم قطيفه ولا جوبلان .. تلاقيها دهب عيار 44 لو كان فيه دهب عيار 44

والله عرفتم تحللوا الموضوع .. بقى يا رجاله ما انتوش عارفين اللى مبوظ البلد مين ؟..
نسيت احكى عن احمد ابو عقرب .. ولا بلاش هو كان تبع نفس الموجه .. اضربوا العيال ولاد الهرمه دول بالنار واسحلوهم
بالذمه يا جماعه لو كان الاستعمار الانجليزى كان يقدر يقول الكلام ده ......؟

اقول لكم على حقائق تاريخيه
- اول مجلس شورى فى الشرق الاوسط كله وفى اسيا وقبل كثير من دول اوروبا ويعتبر من اول 10 برلمانات فى العالم ... كان فى مصر عام 1866 وانشأه الخديوى اسماعيل اللى ظلمه التاريخ كتير
- اول برلمان فى الشرق الاوسط كله وفى آسيا وقبل كثير من دول اوروبا ويعتبر من اول 10 برلمانات فى العالم سنة 1881 كان فى مصر وكان الرجال من امثال شريف باشا ومحمود سامى البارودى واحمد عرابى






- آخر برلمان يا ترى دا برلمان ولا بولمان كوتار يا للى ونوابه نشأت القصاص - ورجب هلال حميده - واحمد ابو عقرب اللى عايزين يضربوا المصريين بالنار
اختم على نمط البوست اللى فات
صوتوا يا بنات
الطموا يا ولاد


السبت، ٢٧ مارس ٢٠١٠

هيصوا يا ولاد ... تررم تررم ... سقفوا يا ولاد ... تررم تررم

يجتمع القاده العرب - قصدى الحكام العرب لان ما فيهمش ولا واحد قائد الا يمكن قائد طابيا ولا حاجه على رأى شويكار - بيجتمعوا فى مدينة سرت الليبيه عند اخوكم الزعيم والقائد التاريخى والجماهيرى والمختار من الله للشعب الليبى وكل الالقاب العربيه الهبله اللى بنقولها على اى حد يجوز امنا - تانى بيجتمعوا لبحث المواضيع على الساحه العربيه ... طب هما يفكوا بس والمواضيع ان شاء الله حتنحل ... انا مش سامع سقف ليه .. ورايا سقفوا يا ولاد ..... تررم ... تررم
قوم ايه بقــــــــــى ... فيه 13 قائد عربى - طبعا انا حاكلم بلغتهم _ قائد- تخلفوا عن حضور هذه القمه ... هيصوا ياولاد ... تررم ... تررم
انا عايز طاقيه ونضاره

ابوكم الحاج عمرو موسى بقى قام يعرض اخفاقات ونجاحات الجامعه العربيه اثناء توليه ( ايه رأيكم فى توليه دى ) اصل اللى عايز حاجه يروح يجرى ويتولاها ... واللى يصحى الصبح بدرى عن الناس يلحق يتولى ... اصلهم من اولياء الله الصالحين... القصد ان عمرو موسى قال بالحرف الواحد (هناك اخفاقات ونجاحات للجامعه العربيه فى الفتره التى توليتها والتى اعتقد انا كافيه ... خدوا بالكم من كافيه دى ... فكروا يا ولاد ... تررم ... تررم
نفسى بدل ما حد يقول خلال فتره ولايتى ... يقول خلال فترة انتخابى وكدا تبقى الامور موزونه ومظبوطه
يا ترى بيعتقد انها كافيه لييييييه ؟ ... طب وناوى على اييييييه ؟


ياريت اللى فى دماغى عشان خبطتين فى الراس توجعهم
قلت لكم سقفوا يا ولاد ... تررم ... تررم
قلت لكم هيصوا يا ولاد ... تررم ...تررم
قلت لكم ارقصوا يا ولاد ... تررم ... تررم

الاثنين، ٨ مارس ٢٠١٠

لخابيط

تعليقا صغير على البوست الماضى بتاع البرادعى .... أن معظم المعلقين ابدوا تعليقاتهم حول ان البرادعى لديه اجنده خارجيه ... واللى قال انه ما يعرفش ظروف البلد ... واللى قال كان طول عمره خارج البلد وجاى عايز ينفذ تعليمات امريكا يعنى اجنده خارجيه برضه ...واللى قال ما نعرفوش ... اصل الحزب الوطنى مطلع نغمة اللى نعرفه احسن من اللى ما نعرفوش ... والحقيقه ان الاعلام الرسمى الجبار نجح فى تكوين فكره سلبيه عن البرادعى قبل ان يبدأ فى طرح فكرته على مؤيديه من الشعب ... لسه بدرى علينا قوى ... اى حد من السهل انه يلعب فى دماغنا ......


بمناسبة الاعلام خدوا بالكم فيه محطه فضائيه طالعه زى الصاروخ واسمها قناة ON TV وفيها برامج قويه جدا وفيه بنت مذيعه زى العسل اسمها ريم ماجد قاربت ان تطول قامة منى الشاذلى وقامات المذيعات العظام بس هى عايزه شوية شهره اعلاميه وبتقدم برنامج رائع اسمه بالمصرى الفصيح من الساعه 9 من الاحد للخميس ... المحطه دى قربت تسبق قناة الجزيره بس هى عايزه شوية امكانيات.





برضه بمناسبة الكلام عن الاعلام ما فيش فى الدنيا كلها وظيفه اسمها الاعلامى الا عندنا فى مصر - كل شويه يطلع واحد ويقدم التانى ويقول الاعلامى فلان الفلانى - وهيصه وزمبليطه فى الصالون ... جابوها منين دى ... يعنى مثلا لارى كنج ما اسموش الاعلامى لارى كنج واوبرا وينفرى ما اسمهاش الاعلاميه اوبرا وينفرى ... اسمه المذيع لارى كنج احسن مذيع فى العالم ومقدمة البرامج اوبرا وينفرى احسن مقدمة برامج فى العالم ... طبعا مش فى تصنيفنا نحن العرب ولكن فى التصنيف العالمى ... ما حدش قال الاعلامى لارى كنج ولا حد قال الاعلاميه اوبرا وينفرى ... احنا احسن ناس تخترع وظائف ... تصدقوا احنا عجبه بين الامم على رأى ريم ماجد.

ما حدش يصدق ان الموظف المصرى بيشتغل 27 دقيقه فى اليوم ... دى سمعه سيئه اطلقت عشان تحقق اغراض معينه

ما حدش يصدق ان عندنا فى مصر 6 مليون موظف وموظفه ... ولا حتى نصف العدد دهـ وبيعايرونا ان امريكا بجلالة قدرها وعظمتها فيها اقل من مليون موظف وموظفه ... فاهمين ان احنا مختومين على قفانا يعنى ... صحيح الموظفين الفيدراليين اللى على مستوى الدوله (الاستيت) اقل من مليون لكن كل ولايه فيها موظفين حكوميين ... يعنى دول + دكهمه تلاقيهم يزيدوا عن 15 مليون موظف وموظفه حكوميين

حبيت اعمل بوست هايف عشان انا بقيت فاضى ما عنديش حاجه اقولها وبقيت اطجن فى المطجن واعجن فى الكلام .. آهوا على الاقل اشوفكم وتشوفونى



الاثنين، ٢٢ فبراير ٢٠١٠


ايه رأيكم دام فضلكم؟

الاثنين، ٨ فبراير ٢٠١٠

أى كلام فاضى معقول

الاهلى اتغلب النهارده 2 صفر من غزل المحله .. بالشفاء .. انا اهلاوى


بمناسبة الكلام فى الكوره .. بعد الامور ما هديت وبعد ما اخدنا كاس افريقيا .. بدعاء الوالدين ولا بدعاء الملايين .. المهم اخدنا الكاس .. قوووووم ايه ... بيقولوا ان كان فيه لاعب اسمه جدو فى المنتخب .. ما تصدقوش .. دا ما كانش فيه لاعب اسمه جدوا .. عارفين اللى كان موجود ايه ... دا كان عفريب حسن شحاته حاطه فى القمقم .. كا ما يحتاجه يطلعه من القمقم .. وبعد الماتش يقول له خش فى القمقم يا خلنجان.


بيقولوا كل لاعب فى المنتخب اخد مكافأه مليون جنيه ... يا ريتهم ما اخدوا الكاس ووفروا لنا الكام مليون دول حتى عشان السيول ومعد السرطان والبلاوى الكتيره اللى عندنا ودايما يقولوا يحننها ربنا .. لكن لو عشان الكوره .. ربنا بيحننها على طول ويديهم كل اللى هما عايزينه.





المتروا بقى اليومين .. كل المحطات عماله تذيع اى مخالفه تعرضك للغرامه .. اى عبث تعرضه للماده كذا وكذا .. عى عبث .. مش عارف يطلعوا روح اللى خلفوكم .. الماده كذا وكذا بتقول الغرامه والسجن المشدد.. حرام عليكم بقى يا ناس .. سيبونا فى حالنا شويه الحكايه مش ناقصه تخوفونا .. احنا خايفين طبيعى وما بنقدرش ننطق ريحوا بس انتم نفسكم واحنا حنخاف لوحدنا.. بس الله يخليكى مش كل شويه تطلعوا لنا العفريت .. واحنا عفاريت الدنيا كلها راكبه فوق دماغنا.



موضوع صعب قوى يا جماعه .. اهلنا يا جماعه المرضى العيانين التعبانين بتوع معهد الاورام .. اصلهم قفوا معهد الاورام بالضبه والمفتاح عشان حيقع على دماغ العيانين اللى الدنيا كلها اصلا واقعه على دماغهم ومش ناقصين حد يقع على دماغهم .. ربنا يشفيهم ويريحهم من الالام الرهيبه ويزيح عنهم .. يا اخوانا المرض دا غول زى ما يكون كل عمال ينهش فى حتة لحمه ومريض الاورام يا عينى بيعانى من آلام رهيبه وما لهمش صدر حنين غير المعهد دا اللى راح فى الباى باى .. شفاهم الله وعفانا واياكم


ابوكم بقى الحاج يوسف بطرس غالى نازل علينا بالكرباج والشوم والخرزانات كمان .. اى واحد يكسب اى فلوس يقول .. اقف عندك .. انا شريكك فى الفلوس دى .. هات والا .. هه .. انت عارف ايه اللى ممكن يحصل لك .. الموظفين الغلابه اليومين دول يا عينى نازلين لطم على الخدود وشحاته من اللى يسوى واللى يسوى برضه عشان يسددوا الضرائب اللى عليهم من عام 2009 .. طب هما خصموا من بتوع الكوره الضرائب ولا ايه الحكايه .. هى ما تجيش الا على الغلابه .



الاثنين، ٢٥ يناير ٢٠١٠

محاوله لرأب الصدع

صح كدا برضه كلمة رأب الصدع دى




اخوانى




اعرف انى اضع قدمى فى الاشواك .. اعرف انى ادخل فى حقل الالغام .. اعرف انى ايضا قد اتعرض لهجوم ضار من هنا وهناك




تعرفون جميعا انى تأخرت فى نشر التدوينه الجديده .. كنت لايام اراقب الاحداث .. احداث نجع حمادى .. عنصرى الامه فى حالة احتقان حاد .. هل وصلنا الى حد الصدام ..هل زلت قدمنا الى حد الاقتتال .. هل التجربة اللبنانيه قابله للتجديد




من فضلكم افسحوا صدركم وافتحوا عقولكم ..ماذا يجرى .. ماذا يحصل .. ماذا يدبر لنا .. او بمعنى اصح .. ماذا ندبر نحن لنحن .. ايه اللى احنا بنهببه ده




هناك احتقان .. لا شك .. هناك عداء .. لا شك .. هناك كثير فى الصدور .. لاشك .. لابد ان نعترف بالمرض حتى يمكن تشخيص الداء ووصف الدواء




المصريين .. مسلمين ومسيحيين فى حالة احتقان شديد ماذا يؤدى اليه هذا .. هل يمكن ان نكون لبنان اخرى .. من فضلكم .. من فضلكم .. كلكم .. لا تأخذكم العزه بالاثم .. حاكم انا عارف المصرى لما دماغه توون وينفخ رقبته ويعنجص وتطلع فى دماغه يعمل عمايل مهببه من غير ما يحسبها فى دماغه .. لا تأخذكم العزه بالاثم .. نروح الاول نشوف ايه هى الاسباب ومنها:




القص زكريا بطرس وآخرين يهاجمون الاسلام من كل حدب وصوب وعلى صفحات الانترنت .. وسواء كان على باطل او على حق ..ماذا يريد القس زكريا بطرس ومن هم على نهجه؟ .. يا قس زكريا .. الاسلام فى القلوب وفى العروق وفى الدم وفى العقل ايضا.




خطباء المساجد .. لا تتوقف حناجرهم بالدعاء ضد المشركين ومن ضمنهم جميع من يقولون باسم الاب والابن والروح القدس اله واحد .. أمين . ومن وجهة نظرهم هذا شرك بالله .. وسواء كانوا على صواب ام كانوا على خطأ .. يا ساده كل له عقيدته وهو يعتقد بالصواب ولن يتحرك قيد انمله عن عقيدته سواء كان مسلما او كان مسيحيا.




صبى مصرى اعتدى على صبيه مصريه وتصادف ان الصبى مسيحى وتصادف ان الصبيه مسلمه.. فى الحقيقه جريمة نكراء يندى لها الجبين ويرفضها اى دين او عرف .. يهرب الصبى الى الكنيسه .. الخطأ كل الخطأ ان تحميه الكنيسه للهروب من القانون .. والمجالس العرفيه .. وبوس الروس .. لن تحل هذه المشاكل .. والحل معروف ... القانووووووووون .. القانوووووون يا عالم يا هوووووه القانوووون .. من يخطأ عليه بتحمل خطأه امام القانون.




تعالوا بقى نشوف العقل المصرى المبدع حيعمل ايه ..؟ حييجى بلطجى عشان ياخد بالثأر وسواء كان هذا البلطجيا مكتريا (اى مستأجرا) وسواء تطوع حضرته من تلقاء نفسه وفى الحالتين مصيبه كبيره وخيبه مدويه ويقتل سبع مصريين جريمه منيله بنيله ونكراء بنت نكراء ويندى لها 733.5 جبين مش جبين واحد دا كلام يا جماعه .. بيقولوا ان فيه بعض النواب متورطين فى الموضوع .. ولو انى مش مصدق عشان ما فيش بيان رسمى صدر بيقول كدا ولو فيه 100 نائب متورط مش حيطلع بيان رسمى .. لأ صدق يا جدع بيقولوا ان حصل .. يا نواب الشعب .. انتم فضيتم خلاص عشان يعنى ما وراكوش حاجه تعملوها وبتروحوا البرلمان تناموا عشان ما عندكوش فى البيت سراير ولا مراتب فـ بتصدقوا تلاقوا كرسى مجلس الشعب تروحوا تناموا هناك بلا تشريع بلا وجع قلب.. كمان هو دا نوع من شراء الاصوات بدم الابرياء .. يعنى لا منكم فايده ولا لكم عايده ..نصيبنا كدا فيكم.. لا حول ولا قوة الا بالله




سبع مصريين قتلوا بجريمة لم يرتكبوها .. بلطجيا يقبض ثمن دم الابرياء ولا يبالى بفعلته .. البلطجيه يروحوا فى ستين الف داهيه .. والمغتصب برضه يروح فى ستين الف داهيه .. بالقانوووووون.. كل واحد يدفع تمن غلطته .. مش ملاحظين ان سوق البلطجيه اليومين دول بقى رايج اوى .. يا اخوانا .. يا عالم .. يا هوه القانون .. القانون .. القانون وما فيش غير القانون.


عارفين الموضوع ممكن يروح لحد فين؟




الجريمه فى الصعيد الجوانى .. فى بلاد بتؤمن وتعتمد الثأر شرفا لها وللعائله وللمجتمع ماذا يحدث اذا كان لبعض المثلمين ثأر عند بعض المسيحيين والعكس .. ثأر هنا وثأر هناك .. وقتيل هنا وقتيل هناك وضحايا هنا وهنا ويتطور الامر من الشكل الفردى الى الشكل الجمعى وتحمل الامه السلاح ضد نفسها .




على المستوى الفردى هناك علاقات قويه بين كثير من عنصرى الامه .. لى اصدقاء لا يمكننى الاستغناء عنهم ولا يمكنهم الاستغناء عنى .. فى عام 73 كان الى جانبى اعز اصدقائى فى تلك الفتره واخذت كل منا الايام ولكنى دائما اتذكرهم ولا ولن انساهم وعلى يقين انهم كذلك .. هل يمكن ان انسى صديقى ورفيق السلاح - نادى القمص اسحق- هل يمكن ان انسى -رامى برسوم- هل يمكن ان اوجه سلاحى الى رامى برسوم او نادى القمص او هل يمكن ان يوجهوا سلاحهم الى صدرى .




زملائنا فى التدوين - الواد عادل صليب السكره او مايكل بتاع الانترفيوهات - هل يمكن ان اوجه سلاحى الى صدرهم او هل يمكنهم توجيه سلاحهم الى صدرى.




يا مصريين .. فوقوووووا ... فوقوووووا .. لن نستغنى عن البعض .. لن نستطيع ان نكره اخواننا المصريين المسيحيين .. الاسلام بدأ بـ اللى يغلط غلطه .. تحرير رقبه .. حتى تحررت كل الرقاب وزى الرقاب كلها ما تحررت حكاية الجزيه خلاص خلصت من زمان كلنا بقينا اصحاب الارض .. كلنا بقينا نخاف على الارض وامتزجت الحضارات ولكل دين خصوصيته .. يا اخوانا كبروا عقولكم .. كبروا دماغكم .. كل واحد يعمل ما يعتقد انه حلال ولا يفعل ما يعتقد انه حرام ..




يا جماعه .. فوقوا بلاش سب الاديان على الانترنت بلاش زكريا بطرس يشيع الفتيه بين عنصرى الامه يا جماعه مصر اصبحت منذ اكثر من الف سنه على ما هى عليه ولن يغير الزى الرسمى الكهنوتى الاسود من التركيبه المصريه الحاليه ولن يغير دعوات خطباء المساجد بان يهلك الله الشرك والمشكين شيئا .




يا حكومتنا .. المسحيين عايزين كنائس جديده .. ايه المانع ؟ المسلمين برضوا بيصلوا الجمعه فى الشوارع عشان الجوامع ضيقه ومش مكفيه .. ايه المانع .. بس بلاش تحطوا الكنيسه جنب الجامع .. يعنى الدنيا ما ضاقتش .. هى حكمت يعنى ولا حكمت .. الدنيا واسعه للاثنين .




لو حطيتى على راسى مليون مبشر مسيحى عشان يقنعونى بالمسيحيح ... معلهش يعنى مش حاقتنع ولا حتحرك شعره من راسى




لو حطينا على راس واحد مسيحى مليون شيخ اسلامى يوعظوا فيه .. معلهش يعنى مش حيقتنع ولا حتحرك شعره فى راسه .




انا مستنى الهجوم .. بشرط ما حدش يتجاوز حدوده وما حدش يتكلم بطائفيه .. اما اذا كان الهجوم على شخصى .. ما فيش مانع عشان انا بحاول اتعلم ازاى اسمع الآخر .. يا ريت كلنا نتعلم الحكايه دى.


الأربعاء، ٦ يناير ٢٠١٠

حلمت .. اللهم اجعله خير




قالوا لى ان فيه جمهوريه كبيره شوية عن فشكولستان واسمها خرابه ستان وان فشكولستان بقت صغيره على مقاسى ولازم وهلبت وربما وحتما تروح ترشح نفسك للانتخابات رئاسة الجمهوريه فى خرابه ستان .. يا اخوانا دا حلم .. والله العظيم حلم .. مش مصدقين .. طب والرغيف السخن بتاع الفرن اللى ما حدش لاقيه حلم .. هه يا الله هه.


وانا بقى نايم بالليل ويمكن تلاقوا عملتى معلمه على السرير ومعلمه فى الملايه دى الوقت.. العمله اللى عملتها عليه .. حتعرفوا ليه من اللى جاى

فى الحلم بقى قلت اروح ارشح نفسى وانا طبعا عندى ارضيه كويسه .. انا رئيس جمهورية فشكولستان النوويه والذريه ... قوم ايـــــه ؟؟ انا برضه باجمع بين خبرة رئيس الجمهوريه الذريه وبين خبرة سكرتير عام لكل الدول البريه والصحراويه وصيتى كبير وشهرتى كبيره حتى اسألوا جورج بوش لما قال لى روح شوف العيال اللى على يمين وعلى شمال الخليج الفارسى شوفهم بيعملوا بمب اطفال ولا بيعملوا بمب كبار وانت عارفين ايه اللى جرى للى على الشمال من سنة 2003 بالرغم من انه ما قدرش يخلينى اغير ضميرى ولسه مش عارف حيعملوا ايه فى اللى على اليمين


كمان ساعات ساعات بحب قلبى وبعشق الحاجات وكتير بعمل مصالحات بين الناس اللى بيزعلوا مع بعض .. يعنى عملت مصالحه بين الراجل بتاع الجاز والى بلده ربنا مبارك فيها عشان كان فيها الخاتم الامين .. وبين الراجل اللى قاعد يهبل ويشتم فى الناس كلها واكتر واحد بيتكلم عن الديمقراطيه وهو حاططها تحت جزمته. . كل دا فى المنام بس لسه ما كنتش عملت العمله.. قوم ايه!!

رحت باوراقى قالوا لى الدستور بيقول .. قلت وماله .. دستور يا اسيادى .. بصوا لى شزرا وعنيهم بتطق شرار وقالوا لى قدامك 3 سكك وابتدت اعراض العمله بتاعة السرير.

الاولى : شوف لك جماعه يتبنوك ويعملوا امك وابوك وتترشح عن طريقهم.

التانى : عايزينك تلف البلد كعب داير وتجيب لنا 250 سلامات زى التعلب اللى فات فات وفى ديله سبع لفات.

التالت يا حبيبى : مره كان فيه اسد وديب وتعلب فى الغابه اصطادوا 3 صيدات .. بطه .. ونعجه .. وبقره .. وقال لهم الاسد ... ازاى نفرق الصيدات دى بينا وبين بعضنا .. قال الديب ..

طبعا انت الكبير .. والتعلب الصغير وانا الوسطانى.

التعلب ياخد البطه على قده .. والنعجه لى انا الديب وانت بقى الكبير تاخد البقره .. وعينك ما تشوف الا النور .. الاسد جه ماسك الديب من رقبته لحد ما خنقه وقام رماه فى دوامة المياه وسأل التعلب .. بقينا اتنين يا تعلب حنعمل ايه؟؟؟ ... التعلب فكر .. ثم فكر .. ثم فكر وقال:

البطه الملك يفطر بيها الصبح .. والنعجه الملك يتغدى بيها .. والبقره بقى عشان الملك يكون جاع بالليل يقوم يتعشى بيها.

جه الاسد وقال للتعلب : يا تعلب ايه اللى علمك العليمه

رد التعلب : اللى بيدوم فى الدويمه ..

صاحبنا بقى يمين النور لسه بيدوم لحد دا الوقت فى الدويمه

فشكول بقى كمل العمله على نفسه وخد نفسه ورجع جمهورية فشكولستان ...

حد فهم حاجه ...والله سنينكم مطينه بطين وانا وراكم والزمن طويل .. وصحيت من النوم والحاجه بتقول انت صغير تعمل العمله دى على السرير