الاثنين، ٨ مارس ٢٠١٠

لخابيط

تعليقا صغير على البوست الماضى بتاع البرادعى .... أن معظم المعلقين ابدوا تعليقاتهم حول ان البرادعى لديه اجنده خارجيه ... واللى قال انه ما يعرفش ظروف البلد ... واللى قال كان طول عمره خارج البلد وجاى عايز ينفذ تعليمات امريكا يعنى اجنده خارجيه برضه ...واللى قال ما نعرفوش ... اصل الحزب الوطنى مطلع نغمة اللى نعرفه احسن من اللى ما نعرفوش ... والحقيقه ان الاعلام الرسمى الجبار نجح فى تكوين فكره سلبيه عن البرادعى قبل ان يبدأ فى طرح فكرته على مؤيديه من الشعب ... لسه بدرى علينا قوى ... اى حد من السهل انه يلعب فى دماغنا ......


بمناسبة الاعلام خدوا بالكم فيه محطه فضائيه طالعه زى الصاروخ واسمها قناة ON TV وفيها برامج قويه جدا وفيه بنت مذيعه زى العسل اسمها ريم ماجد قاربت ان تطول قامة منى الشاذلى وقامات المذيعات العظام بس هى عايزه شوية شهره اعلاميه وبتقدم برنامج رائع اسمه بالمصرى الفصيح من الساعه 9 من الاحد للخميس ... المحطه دى قربت تسبق قناة الجزيره بس هى عايزه شوية امكانيات.





برضه بمناسبة الكلام عن الاعلام ما فيش فى الدنيا كلها وظيفه اسمها الاعلامى الا عندنا فى مصر - كل شويه يطلع واحد ويقدم التانى ويقول الاعلامى فلان الفلانى - وهيصه وزمبليطه فى الصالون ... جابوها منين دى ... يعنى مثلا لارى كنج ما اسموش الاعلامى لارى كنج واوبرا وينفرى ما اسمهاش الاعلاميه اوبرا وينفرى ... اسمه المذيع لارى كنج احسن مذيع فى العالم ومقدمة البرامج اوبرا وينفرى احسن مقدمة برامج فى العالم ... طبعا مش فى تصنيفنا نحن العرب ولكن فى التصنيف العالمى ... ما حدش قال الاعلامى لارى كنج ولا حد قال الاعلاميه اوبرا وينفرى ... احنا احسن ناس تخترع وظائف ... تصدقوا احنا عجبه بين الامم على رأى ريم ماجد.

ما حدش يصدق ان الموظف المصرى بيشتغل 27 دقيقه فى اليوم ... دى سمعه سيئه اطلقت عشان تحقق اغراض معينه

ما حدش يصدق ان عندنا فى مصر 6 مليون موظف وموظفه ... ولا حتى نصف العدد دهـ وبيعايرونا ان امريكا بجلالة قدرها وعظمتها فيها اقل من مليون موظف وموظفه ... فاهمين ان احنا مختومين على قفانا يعنى ... صحيح الموظفين الفيدراليين اللى على مستوى الدوله (الاستيت) اقل من مليون لكن كل ولايه فيها موظفين حكوميين ... يعنى دول + دكهمه تلاقيهم يزيدوا عن 15 مليون موظف وموظفه حكوميين

حبيت اعمل بوست هايف عشان انا بقيت فاضى ما عنديش حاجه اقولها وبقيت اطجن فى المطجن واعجن فى الكلام .. آهوا على الاقل اشوفكم وتشوفونى



هناك ٦٤ تعليقًا:

ريمان يقول...

السلاااااااااام عليكم


ازاى تقول كده يا عمو صلاح؟


انت متعرش احنا بنستنى مواضيعك ازاى

والله المهم اننا نطمن عليك ويا رب تكون بالف خير وسلام


بجد وحشتنا والله اوى اوى يا قمر المدونين


ابقى طمنا عليك ومش تغيب عننا بقى

Unknown يقول...

كان فيه برنامج ظمان بيغنوا فيه غنيوه كده اسمها لخبط لاخبييط هههيا لعبط لعبييط هييا شخبط شخاابييط هيييا...فاكره يا عم فشكول ولا ماسمعتوش انا ما سمعتوش بس فاكره ...ابقي طمنا عليك ومش تغيب عننا بقي...صاحب مدونه الدنيا ريشه وقلم سألني عليك ...عارفه ؟ ولد والله ولا كل الولاد ...اشوفك هناك ...باااااااي

حلمى البعيد يقول...

السلام عليكم

إزيك يا عمو صلاح عامل إيه

ياريت علي طول حضرتك تكتب وتطمنا عليك علشان نشوفك دايمااااا

ربنا يخليك لينا

إنما بالنسبه للبردعى فمن وجهة نظرى إن البلد دى عاوزه عقل يفكر بطريقه علميه علشان تتقدم شويه

بعيد النظر إنه عاش خارج أو داخل مصر

مصر والنيل بيخلي الانسان يحن ويحبه برده ومفيش مشكله ان حد يدخل لينا الاشياء الكويسه من الغرب

ده علي أساس إن مش بقي معظم الحاجات عندنا بيقلدوا الغرب

هتيجى في دى يعنى

ياريت حضرتك تنورنا بموضوعاتك علي طول وزياراتك الجميله

تحياتى عموووفشكول

Ms Venus يقول...

ازيك يا عمو فشكوول ؟


محدش بيشوفك ليه ؟


يارب تكون بخير


انا بقيت فاضى ما عنديش حاجه اقولها وبقيت اطجن فى المطجن واعجن فى الكلام .. آهوا على الاقل


وعلى فكرة مش انت لوحدك اللى عندك الاحساس ده


سلامى ليك انكل فشكوول

هبة النيـــــل يقول...

عمو فشكوول

كتبتلك والله رد طوييييييييل

وبعدين قاللي error

كلمات من نور يقول...

يا سيدي شخبط ولخبط زي ما تحب مدونتك و الشخبطة مباحة حتى يومنا هذا ....شوف يا فشكوول طول ما إحنا ضعاف وماما أمريكا احتلتنا بكل المعايير من بغداد إلى المحيط على رأي اللي قال ...يبقى لا تقولي البرادعي ولا تقولي نور ولا كلام من داه ..أمريكا عايزة أمثال ابن الأسد و ابن عبد الله و الرهيب بتاع تونس ..إحنا بقى لو متغيرناش ربنا حيستبدلنا بناس أعزة ينصر بيهم دينه ..دعواتك ربي يغيرنا ولا يستبدلنا ...قل آمين

Unknown يقول...

ما اهو انا مش معايا حاجه غير اجيب لك لينكات وانا واخد منكوا ايه يا عم ...
الينك اهو( الدنيا ريشه وقلم )
http://rishawalam.blogspot.com/

sal يقول...

فشكول

اولا انت لا بتطن ولا بتعجن
انت بتقول ملاحظات لماحة وحقيقية
البرادعى...مش هو اللى وحش ولا الناس وحشة ...الناس بتخاف من المجهول
ودى طبيعة بشرية ؟ عادى يعنى
وشوية اللغط اللى حصل مع وضد البرادعى احنا محتاجينه...هى خطوة على الطريق
وصعب اوى نزرع شجرة وناكل من ثمرها بكره...برضو طبيعي ...عادى يعنى

والنبى مش عاوز اشوفك زعلان والا متضايق او محبط
ملاحظة " اون تى فى " فى مكانها
وملاحظة الاعلامى معاك كل الحق
فاحنا كلمة اعلامى شايفينها كبيرة
ومذيع حاجة " يعنى" ونظرا للزوم الفشخرة والفنجرة بنستخدم اعلامى

تحياتى وتقديرى

Unknown يقول...

يا عمي انا زقيتك ...
انت عايز تخانق .
لو نفسك تتخانق قول ...

محمد عبدالرحمن شحاته يقول...

يافشكول شخبط براحتك
المهم تنورنا دايماً
وربنا يخليك لينا ويخلي لينا مواضيعك الجميله

ستيتة يقول...

يا مساء الفل

اولا الناس مش خايفة من البرادعي زي ما بتقول
الناس فعلا وحقا خايفة من امل ينتهي بكلمة والله مليكم غيره
القديم ما ليكم غيره
فبيحاولوا من الأول يدوا نفسهم مسكنات ومهدئات علشان عقلهم ما يفوتش ان عاشوا للسنة الجاية عليك وعلينا خير

البنت بتاعة بالمصري الفصيح دي حلوة
وكمان فيه برنامج لايف من التاكسي بكاميرا خفية برضه حلو قوي
بيبين الشعب المصري على حقيقته
ده غير البرامج الوثائقية الأكثر من رائعة
وما صرف الناس عن متابعة اون تي في الا انها ملك لساويرس
ومحدش عاوز يصدق ان ساويرس ها يطلع قناة حيادية
وهي فعلا مش حيادية ولا حاجة فيها كتير تبع المصالح بتاعته

ولكن ده لا يمنع انها برضه فيها برامج حلوة
المشكلة يدخل السم في العسل والناس متعرفش تفرق
وانت عارف نفوخ شعبنا المتربي ع الفول
مسلح اكتر من حديد عز :)

والله بتنور لما بتطجن يا عم الكل فشكول

ايه في اللي انت عرضته ده تطجين بالله عليك
ده كلام زي الفل

تحياتي

Unknown يقول...

علي فكره الليّ بالك باله ...
( الحادث المفصلي ) مش ها يحصل دلوقت ...
دا لسه قدامه كتير ...
الميه زهقت من الزير ...

shimaa elkholy يقول...

يا استاذنا انت تقول كل الى انت عايزه
واحنا نقعد نسمع ونقول ايه الحلاوه دي

ومين قال بس انه كلام فاضي

القناه دي حلوه اه بس يعنى شويه لها اتهجاهات خاصه

اصلها تبع عمونا سويرس

البرنامج الى حضرتك قلت عليه ما شوفتوش بس نشوفه طبعا


والاعلاميين اصل حضرتك مافيش بلد بتدلع الاعلاميين وتبجلهم زيهم
امااااال مش هما اهم مطبلتيه فى المنطقه

وهما الى بلفه واحده منهم يلفوا دماغ الشغل الاهبل

اه بقى اهبل هي دي الحقيقه

واحنا مش لسه بدري علينا بس

ده احنا تقريبا كده والله اعلم مافيش فايده

الراجل اصله قالها من زمان مافييييييييش فايده

الى نعرفه احسن من الى ما نعرفوش؟؟

طب امته نلاقي حد يعرفنا حد يحسنا حد يفكر فينا حد يعبرناااااااااااااااا

البرادعي ما كانش عايش معانا ؟؟

هالبت ما جمال عايش معايا ومعاك ؟؟

بينزل كل يوم طبعا يبوس الشعب من بين عنيه

مين فيهم عاش معانا ؟؟

مين فيهم عايش زينا؟؟؟؟؟؟؟؟؟؟؟؟

انا عن نفسي ما زلت عايزه اسمع البرادعي اكتر

رغم انى حقيقى اصبحت مؤيده له لما سمعته
بس اعتمادا على الحدس الشخصي اصل انا عاطفيه حبه يا جودعان

انما لسه عايزه اسمعه اكتر

بس هما يسبوه يتكلم اصلا

انما حاليا شايفه ان الى ما نعرفوش احسسسسسسسسسن
اصل ما عادش فيه اوحش

ما تغيبش علينا كده يا استاذنا

adel يقول...

لا بس اكتب كده كتير يا استاذنا :):)
البنت المذيعة دي زي العسل و برقبة مني و كلامها اللي مبقاش ليه لازمة

وفي مصر لكل حد ملوش شغلانة بنخترع له شغلانة :)

أمل حمدي يقول...

ربنا يصلح حالك يا فشكول

كلامك مش هايف ولا حاجة هي الدنيا اللي بقت هايفة

تقديري لك يا فشكول باشا

sony2000 يقول...

ياابني بجد كلامك كويس
صدقني
لا هايف ولا حاجه
بجد كلامك عجبني جدا
انت شايفها هايفه ممكن علشان الاسلوب
لكن انا موش شيفاها كدا
وبجد بوست رائع
تقبل مروري وتحياتي

sony2000 يقول...

وبصراحه مدونتك عجبتني فحططها عندي
دا لو بعد اذنك

dr.lecter يقول...

باحب اون تي في وبتابع البرنامج لانه فعلا حلو

رحلتنا في الحياة يقول...

ازيك يااستاذ فشكول والله وحشنى كلامك جدااااااااا
هعلق على حاجة واحدة بتاعت البرادعى هى اننا عايشين فى المر بقالنا كتير والله مش هنخسر حاجة لما نشوف وش جديد يمكن مش هيعرف يصلح بس مش هيضرنا اكتر ماانا طالع عنينا
يلا ربنا يصلح الاحوال ياااااااااارب

أحمد عاطف يقول...

صباحك زي الورد

انا والله البوست اللي فات مكنتش معترض على البرادعي

دا انا حتى من وجهة نظري لو جابوا شارون يحكم مصر ممكن يكون في قلبه شوية رحمة عن اللي ماسكينها دلوقتي

الفكرة كلها ان البرادعي اذ فجأة هبط علينا

طيب مكانش بيتكلم عن مصر ليه زمان

انا مش ضده على العكس انا لما سمعت لقاءه لاقيته انسان قوي جدا في ردوده وبيدل على انه مطلع على وضع مصر كويس جدا

الله اعلم

بالنسبة للوظايف فمصر بتعمل اللي محدش بيعمله

بتشغل 6 مليون عشان يطلعوا يمشوا في مظاهرات التأييد والمبايعة لجلالة الملك

وقد صرح جلالته بأن كل اللي هايهتف أكتر هياخد رغيف زيادة

وكان هذا البيان قد أذيع بواسطة الاعلامي سيد ابو حفيظة كبير اعلامين الحتة اللي حوالينا

كل كلمة بتقولها بتطلع من عقل ناضج فعمرها ما تبقى هايفة يا عمي

تحياتي ليك ونفسي اشوفك قبل ما اغادر البلاد

عصـــــــــــام الــــديــن يقول...

عمنا فشكووول
بوست هايف ايه بس ياريسنا؟
طيب بالله عليك بس كلام فى سرك المذيعه ريم ماجد دى تستاهل السلامه ولا لأ؟
حاسس انها بتقدم اعلام من على مسرح محمد صبحى بجد والله نغمة الكوميديه الشعبيه اللى بتقدمها ريم بتحببك انك تسمع الاخبار الغم والنكد عشان تضحك ماهى دى طبيعتنا يامصريين فى الجد بنضحك وفى الحزن بنضحك
وبعدين ياريس القناه دى محتاجه امكانيات اعلاميه اكبر لكن فلوس؟........ كفايه عليها نجيب ساويرس ياعمنا
ثالثا ياريس ......... انت عايز الله لا يقدر ولا يكون تقارن اعلامنا وطبالينا وراقصاتنا ب لارى كنج واوبرا او حتى تيرى ..... حرام عليك تظلم لارى واوبرا
ياعم فيه حتة مذيعه من فلسطين بتذيع فى ايطاليا اسمها رولا جبريل حكايه صعبه قوى ....... على فكره قدمت برنامج فى مصر ومافى حد خد باله منها
لانها لاتجيد التطبيل والتزمير
على اى حال ياعمنا فشكووول ربنا مايحكم عليك بمذيع رخم وبيسترخم ذى صاحبنا اللى بيزغزغ نفسه وبيضحك الناس ... عادم شو....
تحياتى

أحــوال الهـوي يقول...

مساء الانوار

احنا عشرة سنين دلوقتي
و عارفين اسلوب كتابتك لا عمرك عجنت او كتبت حاجه الا اذا كانت فايده مركبه

و انت واحشنا جدا و مفتقدين فشكلتك

ربنا يبارك لنا فيك

تحياتي

*** حور- نور*** يقول...

كويس انك بتخترع حجج علشان تشوفناأصلك بتوحشنا أوى موت جدا كتير يا عمو فشكول
وبعدين البرادعى يحكم ولا غيرة احنا بنشجع الكورة النظيفة واللعبة الحلوة يعنى اللى يدخل الرياسة لازم يغسل الكورة كويس علشان يعرف يلاعب الشعب الغلبان عالشناكل
وبمناسبة وظيفة الاعلامية يعنى انت جاى تغيرها وتحتج عليها لما خلاص قربت ادخل المجال ده
ادعيلى يا فشكولتى

محمد المصرى يقول...

طيب بس نشوفك على طول

عموما موضوعك دايما لذيذ

البرادعى انا قلت رايى فيه

بالنسبة للقناة فعلا قناة محترمة وشهرتها سبقت بثها وكانت على قدر المسئولية

بالنسبة للستة مليون موظف ياسيدى احنا موافقين بس بيعملوا ايه بص على النص مليون بتاع امريكا بيعمل ايه وبياخد ايه
فرق شاسع
مصرى دائما

م/ الحسيني لزومي يقول...

ليس بالجد وحده يحيا الانسان
عمو فشكول المود ده مش حلو عليك

هبة النيـــــل يقول...

السلام عليكم

عمو فشكووول

أولا ربنا يسعد قلبك زي ما بتسعدني

كل مافتح مدونة حضرتك وأرى صور الأحفاد تبتسم لي

ويااارب يجعل دعايا لهم كل ما اشوفهم من نصيبهم ان شاء الله.


ثانيا : حضرتك عمرك ما بتكتب حاجة هايفة،

بحثنا عن مسميات جذابةوربما تكون غير موجودة عالميا، أعتقد أن سببه "عقدة نقص" يعني المهندس يقول ككبير مهندسي أو خبير هندسي وهو لسه خريج

والمذيع حاسس يمكن انها كلمة قليلة أو عيب ما تفهمش

يقولك الاعلامي

كله في الهوا

بصراحة مش بتفرج على القناة دي ومش عارفة ريم ماجد

بس كان لي واحدة صديقتي اسمها كدا يمكن تكون هيه لإنها كانت بنت مميزة فعلا

هي شكلها ايه يا عمو؟؟

ربنا ما يحرمنا من طلتك البهية دي :)

اللهم آمين

لاسع افندى يقول...

انا شفت البرنامج ده اكتر من مره اسلوبها حلو ومميز

تحياتى

Kat_RN يقول...

I can not read your words, but the photos of the children on your site are beautiful. Thank you for sharing them with us.
Kat

عمرو جويلى يقول...

السلام عليكم
إزيك يا عم فشكوووول
أخبارك إيه
أنا زعلان منك عشان لم تذكر رأيى
فى محمد البرادعى حيث أنى قلت
إن التغيير هو سنة الحياة وهو
الأمل أما الآن انقطع الأمل
بعد مرور ثلاثون عاماً تقريباً
شعارات فقط
خالص تقديرى

فارس عبدالفتاح يقول...

حضرتك تمثل قول المثل العربي


كالذي ينادي في الموتى

amirelhob يقول...

انت يمكن تشوف البوست هايف ودى وجهت نظرك وممكن تشوف البوست مش كبير بردو وجهت نظرك بس انت متفوق فى كلامك حتى لو مقولتش غير كلمه واحده دا مش مدح فيك دا قدرك والحقيقه اللى بيعد عن مدونتك هو اللى بيخسر
انا جايز مش بستخدم كلمه عمو او اى حاجه تكبرك لان المقام هو اللى بيكبر مش السن وانا لو دورت مش هلقى كلمه توصف مقامك الكبير والعالى ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

صدى الصمت - عاشقة الورد - يقول...

معقول برضة كلامك دة يا أستاذنا ؟!!
لما البوست دة هايف أمال البوستات ال إحنا بنشرها تبقى إية
أكيد مالهاش وجود من أساسة
بس بالنسبة للموظف المصرى ف بجد بجد مظلوم لأنى كموظفة بأشتغل أكتر من خمس ساعات متواصلة بجد ومن غير فواصل أو راحات ودة فى يومى العادى ولو فية ضغط شغل بأشتغل أكتر من كدة بكتيير
بأحييك على البوست الأكثر من رائع

♥نبع الغرام♥♪≈ يقول...

وحشتنى يا راجل ياطيب

اخبارك ايه

مش لوحدك اللى عايش فى ملل وتعب والله انا اكتر منك وبحاول اعيش

♥نبع الغرام♥♪≈ يقول...

لخبط انت براحتك

اى حاجه منك على قلوبنا زى العسل
انت الناس كلها بتحبك
ربنا يديك الصحه والعافيه ويكرمك خير يارب

واشوفك منور الدنيا كلها
ولا تغيب عننا لحظه ابدآ يا قلبى

♥نبع الغرام♥♪≈ يقول...

جمعه مباركه عليك وعلى الامة الاسلاميه

وسلامى للاهل
دمت بكل ود

أمل فتحى عزت يقول...

السلام عليكم
استاذى الغالى .. فشكول
صباح الخير
يا حبيبنا الغالى ان شاء الله مفيش توقيع بنا مهومش حتت بوست هيوقعنا فى بعض انا بس بحب اشرككم معى فى دماغى اللى على طول وجعانى وافكارى النكاشة انا عارفة انى متعبة شوية بس استاذى هيتحمل معى يعنى يرضيك افكر لوحدى واطق على فكرة اطق دى كلمة مصرية أصيلة .
بمناسبة الاعلام البوست الجديد الذى كنت اعده من فترة كان يناقش نقطةهامةاو انى اراها هامة وربما لا يراها البعض كذلك .. عموما فى القريب العاجل سوف نلتقى ان شاء الله
مع خالص تحياتى

Prince-Palestine يقول...

سلام عليكم

مدونة راقية وشخصية جميلة أول مرة أفوت مدونتكم الهايلة مش الاخير

في إنتظار الجديد وتواصلكم الطيب دووم



دمتم بخير

محمد الحسيني يقول...

ازيك يا عمو فشكول معلش انا مش بسئل عليك علشان الترم التانى بدا وانا مشغول اليومين دولا واشاء اللة هبدا انشر مواضيع تانية

Unknown يقول...

والله ده بقى مولد وصاحبه غايب

... ياعبيط وعامل نفسه غايب ومكبر دماغه


وبالنسبة للي بيقولوا البرادعي جاي ومعاه أجندة أجنبية

ده حبيبنا اللي قاعد ومتبت صاحب المطبعة بتاعة الأجندات دي

بلاش تهريج

ويبقى التواصل

ruma يقول...

شكرا لكم لزيارة بلدي بلوق.

عطلة نهاية الاسبوع سعيدة.

من الشرق الأقصى.
مع أطيب التحيات.
ruma

ضحكات الحياة يقول...

سلام عليكم يا أستاذ فشكول

و الله منورنا دايما بالبوستات بتعتك
موضوع البردعي ده لساله بدري و ليه أبعاد كتير بتهيألي هتتكشف ان شاء الله قريب و هنعرف ايه اللي هيحصل
و ربنا يستر

دومت بخير

تامر علي يقول...

ازيك يا عم فشكول

اسمح لي اعجن معاك
أولاً بالنسبة للبرادعي فأنا رأيي إنهم لو جابوا (بوبي) من الشارع فهيكون حالنا أحسن كتير من الوضع الراهن
فما بالك بتغيير حقيقي .... البرادعي أو غيره مش مهم المهم ايقاف النزيف الحالي بأي ثمن

- ثانياً
متعرفش عم فركشاوي راح فين ... كان معايا واختفى :))))

هاروح أسأل عليه :)

طلباوي يقول...

السلام عليكم ورحمة الله وبركاته

أنا أول مرة أدخل مدونتك الرائعة

وعلفكرة أنا ضفتك في المدونات التي أتابعها

ويشرفني أن تضيف مدونتي في المدونات التي تتابعها

وشكراً لك

وعلفكرة أنا المتابع diaa_200099

♥ ♥ Amira Samy ♥ ♥ يقول...

فعلاً أحنا بنخترع

بس بنخترع كلام بس للأسف

موضوع شيق للغاية

تقبل مرورى على مدونتك الرائعة

تحياتى

assafo anaroze يقول...

عمي العزيز جدا جدا و اللي دايما على بالي ازيك و ازيك ام محمود
اتمنى تكون بخير
لا تظن اني نسيتك ابدا و لا كل الحبايب ما نسيتهم بس و الله ظروف حتمت اني اغيب عن النت لبعدي ع المدينة
ادعي معايا
اتمنى اننا نتلاقى عن قريب

-_- يقول...

ريم ماجد مذيعة محترمة ..


شارم
www.sharmlifeblog.com

Haytham Alsayes يقول...

عمو فشكول بجد شكلك متفائل بموضوع البرادعي

بجد ربنا يكرمنا بشخص زيه بس الاعلام الحكومي زى ماحضرتك قلت نازل سلخ في الراجل ومؤيدينه
الراجل دة عاوز مساندة مننا

كنت بكلم واحد معايا في الشغل علي البرادعي راح رادد عليا وقالي لازم يابني تفهم حاجة مصر فرعونية وعتفضل كدة يعني مينفعش تتغير عشان حد


بجد استفزني الرد

وبعدها قريت كتاب لجمال حمدان "شخصية مصر" وليقت بيقول ان فعلا مصر النظام فيها فرعوني وعتتغير مصر عندما تدفن اخر فرعون ومتفرعنش حد بعديه
ودة معني كلامه

ايه رايك دلوقتي ياعمو فشكووول

تقبل خالص تحياتي ومروري

محمد عبدالرحمن شحاته يقول...

انت فين يافشكول
طولت الغيبه المره دي ليه؟

mimi يقول...

فشكولي فشكولي

وحشتني جداااااااااااااا

إيه الكلام الجامد ده ؟

كل سنة وأنت طيب ، عيد ربيع سعيد

مهرة سالم يقول...

السلام عليكم...
المهم إنك بينا يا عم فشكوول ...
والحمدلله ....
...
في أمان الله

micheal يقول...

على فكرة لا بوست هايف ولا حاجة..ويمكن برضه يكون عجبني باعتباري هايف
:))
كلمة إعلامي كمان نسيت تقول أنها تطلق على كل لاعب اعتزل كرة القدم بمجرد اعتزاله
:)
27 دقيقة في اليوم..ممممم...لأ بيتعبوا أوي..عموما أنا حتى مش محصل 27 فيمتو ثانية !
تحياتي

RENATA CORDEIRO يقول...

Hi, my friend*
For you!
“Pick the day. Enjoy it — to the hilt. The day as it comes. People as they come. The past, I think, has helped me appreciate the present — and I don’t want to spoil any of it by fretting about the future.”
-audrey hepburn*
Kisses,
Renata

ابو صهيب ( الجمعاوي الاصيل)سابقاً يقول...

وحشني جداً بصراحة ووحشني عالم التدوين جدا
لكن انه القدر

بداية بالنسبة للتغيير عموماً
فانا من اشد المؤيدين للتغير وان كان اسود باسمر بس ميكونش جمال مبارك

اما عن البرادعي ما يجي البرادعي باجندته
بس يبقى عارف انه ان لم يحقق مطالب الشعب المصري سيرحل وياتي غيره

وسلملي على الديموقراطية

Osama Ali Abdelhalim يقول...

مساء الخير
مدونة جميلة ، واسلوبك ممتع
سعدت بالقراءة
انا من السودان

شريهان يقول...

استاذ فشكول
ازى حضرتك الحقيقة ماليش فى السياسة اوى بس ااقدر ااقول ان كل الناس ضد البرداعى يمكن عشان مش عايش فى مصر ومش رجل سياسى انا راى ان بلد زى مصر محتاج رجل سياسى عشان يقدر يعمل حاجة بالنسبة لموضوع الاعلامى هو حضرتك ناسى ولا ايه مصر بلد الاختراعات ولا يهمك ماشيها اعلامى وبالنسبة للقناة ديه حعمل سرش عليها ونتقابل على حب انشالله

Majoli يقول...

Asma Salah, saudações. Amei sua visita no Rabiscos, andar de mãos dadas em plena praça...fiquei feliz de ver que você está entendendo bastante do que escvrevo, Beijos no ♥

shoshta_ joker يقول...

السلام عليكم....

مش اول زيارة ليا بس اول مرة اعلق عند حضرتك

حبيت حضرتك من الكلام عنك فى المدونات الى بزورها ومش تعليقاتك عندهم

شكلك اب حنين وحد جميل اوى

وميتهيئليش ان الكلام الى فى البوست دا كلام حد فاضى ويارب كل الفاضيين يعرفوا يفيدونا كدا
انا عن نفسى استفدت من الى قراءته

اتمنى ان حضرتك تقبل دعوتى وتشرفنى فى المدونة وتقولى رايك
واتمنى دوام التواصل وانى اعرف حضرتك اكتر
وان شاء الله حتشوف تعليقاتى هنا كتير

دومت بخير
فى رعاية الله
shemo

آه وكفى يقول...

يا عم قول اللي تقوله هنسمعك وتلائينا واقفين كلنا عندك نرغي
مانت عارفنا واقعين في دباديبك منغير ايتها حاجة
ازي حضرتك وعامل ايه ؟

انا قليلة الادب ومقصرة والله عارفة بس انا فعلا نادرا لما بدخل اصلا

وعلى فكرة انا مش قادرة افهم شايلين في نفوسهم من البرادعي ليه حاجة زفت اوي صحيح ما يسمعوا الراجل ده حتى واحد اعرفه اردني لئيته بيقولي يا نوره ايه رأيك في البرادعي قولتله و مالو نسمعه عايز يقول ايه ما احنا حالنا واقف واقف يمكن عنده حل الراجل راح قالي يالهوي يا نوره انا مش مصدق معقول انتي تقولي كده زي ما اكون بقوله هشتغل سكرتيرة نتنياهو

شعب غريب عجيب مريب يا عمو فشكول والله

ربنا يستر وبعدين بصراحة الريس عجز اوي و البلوفر اللي لابسه الرمادي ده أرح عليه


دي شغلانة ايه السودة دي

SAM يقول...

Friend,

not get a good translation of the text. I did not understand for comment.

Fraternal greetings

SAM يقول...

Yes, on the poems of Antonio Jose da Silva, who was killed by the Inquisition, I know you understand. But I did not understand your text. The google translation was bad

!fraternal greetings

الازهرى يقول...

وبعدين بقى فى الناس اللى بترمى بالكلام دى

انا عن نفسى لا باسمع الحزب ولا البرادعى ولا حتى فاضى اسمع نفسى
بس المشكلة فعلا ان مهما كان برنامجه كيس يتفضل االتطبيق الواقعى للبرنامج وده صعب بدون معايشة حقيقية للأحداث

اما بخصوص الاعلام فدى مهنة من لا مهنة له وبكده لازم يجيبوا لها مسمى وظيفى ولا انت نسيت البيروقراطية بتاعتنا

اما عن الموظف المصرى فعلا بيشتغل وقت قليل جدا صحيح مش 27 دقيقة انما برضه مش ساعات وخاصة فى المحليات وما شابه

تحياتى وكفاية قاعدة ومعاكسة فى المذيعات شوف حاجة تانية اعملها
إلا أبلغ عنك الحاجة؟

Wanderley Elian Lima يقول...

Olá meu amigo
Gosto muito de receber sua visita, é muito bom conhecer uma pessoa que mora do outro ladodo mundo.
Forte abraço 

Wanderley Elian Lima يقول...

Olá meu amigo
Gosto muito de receber sua visita, é muito bom conhecer uma pessoa que mora do outro ladodo mundo.
Forte abraço 

وفاء بركات يقول...

ياعمنا فشكووووول
ده مبقاش إعلام ده بفي كلنشكان رز بلبن علي باذنجان
اما البرادعي فهو فرقعه في الهوا وكان من قبله من كان احب يحلق بأحلامه فهوى
وذهب في خبر كان
أين عنوان جمهورية فشكولستان ورئيسها النعسان اللي بيحلم انه بيعوم في البحر فقام من النوم غرقان
تتتحياتي وسلاماتي للحاجه وزوج الحاجه
وولاد الحاجه