الثلاثاء، ٢٠ أبريل ٢٠١٠

المره اللى فاتت طلبت منكم تسقفوا ...
بسسسس .. كفااااااااايه .. مش عايزين هيصه ولا تسقيف
المره دى صوتوا يا بنات ... الطموا يا ولاد
لييييييه ؟

عندنا نواب محترمين - بيمثلوا الشعب وبيلبوا كل احتياجات المجتمع .. وبيلعبوا على السلك فشر ولاد الحلو

كان عندنا نواب سميحه ... نواب قروض تلاقى .. نواب تزوير موجود .. نواب الحشيش .. يا سلام انت جيت فى جمل .. آخر موضه بقى جبنا لكم نواب القمار - مش حنخلى فى نفسكم اى حاجه .. واول امبارح بقى عملنا لكم نواب آخر جنان .. ما حدش يقدر يعمل النواب دول خالص الا احنا .. كله عشان سواد عنيكم .. اصلنا بنحبكم قوى يا ولاد الـ .. ربنا ياخدكم ويريحنا منكم .. هو ربنا سايبكم تقرفونا فى عيشتنا ليه ؟ .. احنا جايبين لكم آخر موضه فى النواب .. جايبين لكم نواب ضرب الشعب بالنار .. يا ولاد الحلال .. فتح عنيك تاكل ملبن .. الفقره دى ما حدش عملها خالص .. دى حاجه جديده ما اتعملتش اللى فى ميدان البيكاديلى وهايد بارك .. بحلق يا جدع .. فين الجدعان اللى يكتفونى .. عايز تلاته رجاله يكتفونى وشوفوا حاعمل ايه .. بس قبل ما يكتفونى كل واحد ياخد باله من جيبه .. اللى حيتسرق انا مش مسئول عنه .. انا حاوى .. والله العظيم .. حاوى ما حدش زيه .. اتفرج يا سلام .. اتفرج يا جدع
يا عدددددددووى ..عايز صوات حاد .. عايز لطم جامد .. كله يشجع .. كله يقول ربنا معاك.. يا عدوى
كل ابن حلال يحط قرش فى الصحن .. اللى ما معاهوش ما يلزموش .. واللى معاه وما يحطش يبقى ابن حرام

النائب نشأت القصاص طالب وزير الداخليه حين مناقشة مظاهرات العيال التلفانه اللى اهاليهم ما ربوهمش .. اللى هما عيال 6 ابريل وطالب بضربهم بالنار..يا سلام .. يا سلام .. مش عارف انت اتحدفت علينا من اى مصيبه يا شيخ .. لأ ومن استهباله بيقول لمنى الشاذلى ( انا مصمم على اللى قلته وقلت بالضبط الخارجين على القانون.. يا سلام .. يا سلام يا راجل السياق كله كان عن المظاهرات والاعتصامات .. يعنى انت بتعتبر دول خارجين على القانون .. روح يا شيخ منك للى كلت دراع جوزها .. اشوف فيك يوم

حتى الخارجين على القانون ما بينضربوش بالنار كدا خبط لزق .. فيه جنح اقصى حاجه فيها حبس او سجن شوية ايام كدا يعنى .. وفيه جنايات الاحكام فيها بتوصل للاعدام .. بس لازم يتحاكموا .. مش عايز تضربهم بالنار خبط لزق كده

يا خويا اذا انت مستغنى عن ولادك انت حر .. حتى ولادك مش من حقلك تتكلم عنهم هما اللى يتكلموا عن نفسهم .. حتى مش من حقهم يتكلموا عن نفسهم .. يا راجل الروح ما بياخدهاش اللى ربنا اصل عيال 6 ابريل دول ولاد هرمه وشوية صيع ما اتربوش وضرب النار حلال فيهم

رجب هلال حميده بقى .. عارفينه .. كلكم طبعا عارفينه .. بيقول ايه لا فض فوه .. بس قبل ما اقول عن اذنكم انزل اشترى سندوتش كبده من العربيه اللى تحت البيت ................
انا جييييييييت .... بيقول اخينا بقى .. سعادته .. معاليه .. جناب حضرته .. يا لهوووى .. يا حوستىىىى .. النائب بتاع الشعب .. بتاعنا .. اللى هو موجود عشانا بيقووووول لا فض فووووه ( اعيب على الداخليه انها لا تعمل القانون ولا تستعمل الرصاص ) .. الطموا يا ولاد .. مع ان رجب مش وطنى .. دا حزب غد .. بس الغد التانى اللى بالى بالكم .. اللى تبع الحزب الوطنى

بعض نواب الحزب الوطنى بيقولوا ان هناك ايادى خفيه تعبث فى البلد وهى ايادى نجسه .. ما شاء الله ..

اشجونا .. الله الله الله .. يا سلام يا ست .. يا سلام يا حليم .. هى الكراسى بتاعتكم قطيفه ولا جوبلان .. تلاقيها دهب عيار 44 لو كان فيه دهب عيار 44

والله عرفتم تحللوا الموضوع .. بقى يا رجاله ما انتوش عارفين اللى مبوظ البلد مين ؟..
نسيت احكى عن احمد ابو عقرب .. ولا بلاش هو كان تبع نفس الموجه .. اضربوا العيال ولاد الهرمه دول بالنار واسحلوهم
بالذمه يا جماعه لو كان الاستعمار الانجليزى كان يقدر يقول الكلام ده ......؟

اقول لكم على حقائق تاريخيه
- اول مجلس شورى فى الشرق الاوسط كله وفى اسيا وقبل كثير من دول اوروبا ويعتبر من اول 10 برلمانات فى العالم ... كان فى مصر عام 1866 وانشأه الخديوى اسماعيل اللى ظلمه التاريخ كتير
- اول برلمان فى الشرق الاوسط كله وفى آسيا وقبل كثير من دول اوروبا ويعتبر من اول 10 برلمانات فى العالم سنة 1881 كان فى مصر وكان الرجال من امثال شريف باشا ومحمود سامى البارودى واحمد عرابى






- آخر برلمان يا ترى دا برلمان ولا بولمان كوتار يا للى ونوابه نشأت القصاص - ورجب هلال حميده - واحمد ابو عقرب اللى عايزين يضربوا المصريين بالنار
اختم على نمط البوست اللى فات
صوتوا يا بنات
الطموا يا ولاد


هناك ٦٦ تعليقًا:

فاروق سحير ( فاروق بن النيل ) يقول...

فشكووووووووووووووووووووووووووووووول
عايز تعرف إبن الحمار حسن نشأت القصاص وأنا أعرفه شخصيا لأنه كان رئيس مجلس مدينة سانت كاترين أعتق ذلك والله لو شفته لأضربه بالجزمة الحيوان ده

ستيتة يقول...

نسيت بباوي
اللي بيقول ان الحرية عندنا فاضت وزادت وطفحت م البلاعات
وعاوزنا نتربى شويتين
ونبطل حرية وقلة ادب
ونحترم نفسنا لا نقرأ لا نكتب لا نسمع لا نرى لاااااااااااااااااانتكلم
مش قادرة اصوت
صوتي رايح
ها أروح اتفرج على هيفاااااااااا احسن :)

القدر و انا يقول...

فشكول
والله الدم بيغلى فى عروق الشعب
والثورة اصبحت فى داخل قلب كل مصرى
انا لا احب الكلام فى السياسة ولكن ما يحدث قهر وغباء ليس له نظير
لا لن يصوت الشباب ولن تلطم الفتيات
ستزداد المظاهرات ويتضاعف العنف المضاد لعنف الداخلية ويستيقظ كل نائم ...
واما نواب الخراب فلن يطول اجلهم
ودوام الحال من المحال

Ms Venus يقول...

عمووو فشكوول

فينك وحشتنا

حيرتنا معاك

نصقف ولا نلطم ؟


نهيص ولا نصوت ؟


اقولك احنا نروح نموت احسن ويحيا الريس


يا غلبى يانى

كلمات من نور يقول...

طيب بعد ما انت خلصت مسرحية فشر مسرحية الليلة الكبيرة أعلق أنا بإيه ؟؟؟ حاقولك : انا مهاجرة علشان الحرية زادت قوي قوي حاخد عيالي و اهاجر ...ومحدش يسألني على فين.لما اروح حابعتلكم من هناك ):

دندنة قيثارة الوجد يقول...

تحية لك عزيزي فشكووول على مرورك الكريم لأكثر من مرة على مدونتي المتواضعة .. وقد أعجبتني ردة فعلك ودندنتك ..

وبالنسبة للموضوع إللي بدون عنوان دي في اعتقادي مواضيع كل القمم العربية مش بس نواب الحشيش .. في نواب القات والذي منه!! إنت فاهم قصدي طبعا.

تحياتي لك

صباح الخير يقول...

بعد السلام عليكم
أسمح لى اخى العزيز أن أعلق
بطريقه 1-2-3 علشان ألحق بتاع الكبده قبل مايشطب

1- قول نوايب ولا تقل نواب
2- قول برطمان مخلل ولاتقل برلمان الشعب
3- قل حسبنا الله ونعم الوكيل فى كل وكلنا
4 -أحيك على اختيارك لمهنه الحاوى
لأن البلد ماينفعش يعيش فيها اللى حاوى وقرداتى


تحياتى وخالص تقديرى

أه على فكرة بالهنا والشفا .. الكبده..

أمل حمدي يقول...

باح الفل يا فشكووووول باشا

ربنا يصلح حالك يارب

أوعدك أصوت بس لما صوتي يرجع تاني ان شاء الله

أصل من كتر الحرية صوتي بيدلع عليا هههههههههه

أنت عارف يا فشكول هما جابوا آخرهم النواب ولاد الناس الطيبين

وان شاء الله ربنا يرزقهم بطيارة وتكون ماشية في سحابة سودا والطيار أطرش
هههههههههه



ولا يهمك يمهل ولا يهمل لهم يوم لا مرد فيه


تقديري

من كل بستان زهرة يقول...

أستاذ فشكول

انا صوتي راح خلاص من الصويت

الواحد يروحلهم فين نسيبهلهم علشان يرتاحوا

بس هما لازم يقولوا كده

اذا كان رب البيت للدف ضاربا
فشيمة اهل البيت الرقص...

بس أقول ايه غير ان شويه العيال الي متربوش دول بتوع 6 أبريل
ربولهم الخفيف

تحياتي

أحــوال الهـوي يقول...

عمنا

القصاص هو يتحدث من معني اسمه

و هنا القصاص لمن يتكلم او يسمع او الاعمي

بس الاحول لا
لانه بيشوف الحقائق معكوسه

و رجب حميده من النواب اللي بتلعب في كل الملاعب بس تكون هيصه
فيركب الموجه

يطبل ع الفساد و يدعو اليه
و بيباوي اللواء الجميل الذي يري الاخبار بعيونه هو زي سيد ابو حفيظه

تحياتي

حـــــ الــجــنــة ـــــور يقول...

سلام عليكم
عمووو فشكول وحشتني ان شاء الله تكون بصحة وخير يااارب


بجد قل لي الزمن إرجع يازمن الله المستعان

الله يرحم رجال الامة ويعوضنا خير


دمت بخير وتقبل خالص تقديري

عمرو جويلى يقول...

السلام عليكم
يا أ ستاذ صلاح نسييت تذكر
نواب سب الدين ومنهم النائب
نشأت القصاص
ولسة الثقيل جاى ورا
خالص تقديرى

Haytham Alsayes يقول...

السلام عليكم

ازيك ياعمو فشكوووووووووووول

اقولك حاجة احنا نعمل زى زمااااااان

نموت نموت وتحيا مصر

الاستقلال التام او الموت الزؤوام
يسقط الخونة اتباع الانجل قصدي الرئيس

يلا نشكل جماعة وطنية لاقتناص واغتيال
الخونة وعساكر الانجل ييييه الا من المركزى

طيب امشي بأة بدل التخريف والهبل التاريخي اللي انا فيه

تحياتي

sony2000 يقول...

بجد
لكي الله يامصر
موش هقول غير كدا
ربنا موجود

مجرد بنت يقول...

الواحد بيحس بالاحباط والياس
كل ما يشوف الهبل ده
ياعمو فشكول
احنا دولة لها سناريوهات من نوع خااااااااص جدااااااا
ولينا طقوس غير الغير
ماشيين على مبدا نحن نختلف عن الاخرون
احنا دولة حكومتها بقالها 30 سنة
يعنى خرفت خلااااااااااص
والنواب مجبوش حاجة جديدة
احنا عايشيين فى بلد كل حاجة فيها تغلى
الا البنى ادم هو بس الى بيرخص
هو بس الى بيتهان
ومين يدافع ومين يتكلم
والله لو ناديتوا فى ماااااااالطة
كأنكم بتنفخوا فى اربة مقطوعة
وزيها زى اى حاجة تانية غيرها
شوية مقالات واعتراضات لكن بدون جدوى وناس بطالب بالحكم على النواب بقضية شروق بقتل
وناس برفع الحصانة لكن مين يقدر يجلم الفرسة
دى بقت غاااااااااااااااااااااابة كل بينهش فيها وياخد الى يقدر عليه
خوفى لنرجع تانى لزمن العبيد ويبعوا المصريين
دا اذا كان لسه للمصريين تمن اصلاااا


وبعدين احنا طفحناها حرية والله لو هى دى حريتهم يسيبون ديكاتتوريين احسن
يالهوووى لو بعبعت للصبح بغيظى مش هخلص
واسفة للاطالة

وصف الاحساس يقول...

والنبي ما انا عارفة اقولك ايه

طب السلامو عليكو الاول

وناخد كوبايه شاي وانت اعزمني انا وخليل علي سندوتشين نضربهم نعدل بيهم الدماغ كده

قالي ايه يا سيدي انت مستغرب " حلوة مستغرب دي " من الكلام ال هو عايزين يضربونا بالنار

انا مش عارفة واخد الموضوع علي اعصابك ليه

مش قلتلك مسلسل متفق عليه وكل واحد له دور

حتي اعتراضنا وهمجيتنا ورد فعلنا له دور

حاجة بتشغل عن حاجة

تيك ات ايزي يا عزيزي

الا قولي يا سي فشكول بيه افندي

هما مين القطاقيط ال بره علي الباب دول الواد خليل كان هيشد الفوطة من علي شعر الامورة ال بره بس انا قلتله عييب نكلم الحج الاول يمكن يكون في نصيب ولا حاجة والواد اهبل زي ما تحطه زي ما هتلاقيه

هيييييه يا خويا قلبت عليا المواجع ما انا كنت نسيت السياسة وشكلها

ماهو بيقولك ايه
يا فرعون مين فرعنك
قال مالقيتش حد يلمني

اقعد بالعافيه

عصـــــــــــام الــــديــن يقول...

ياعمنا فشكووول
بس بقى ياسيدى الواحد لو فهم اللى بيدور فى دماغ الناس كان ارتاح وريحنا معاه
هو انت اسمعت قبل كده عن القصاص وابوعقرب ؟ دول بقى كانوا نايمين من اول جلسه ويادوب لسه صاحيين من ساعتين زمن وعايزين بقى يسمعوا ويثبتوا انفسهم
طيب يعملوا ايه يعملوا ايه ؟
حظهم الزفت رماهم فى جلسه مهمه لمصر وطبعا عايزين طبالين ورقاصين ومش لاقين فحزموا الاتنين وهات يارقص
والله انا لا انا مع دول ولا مع شباب 6 ابريل لكن الكلام بيوجع
هو احنا ياشعب مالناش تمن كدا ؟
خيل حكومه وبينضرب بالنار ؟
طيب يبقى ضحايا العباره لهم قيمه ؟ وضحايا السيول والقطارات والحشيش والدويقه وكل شارع فى مصر فيه ضحايا
بالله عليك هما الاعضاء دول صح ولا غلط ؟ الانتخابات جايه وهما عايزين يترشحوا على القوائم الوطنى
العيب على الناس اللى انتخبوا الاشكال دى ونجحوهم ولبسوهم وركبوهم عربيات على نفقه الدوله ومن فلوس الضرايب الللى دافعها الغلابه اللى هينضربوا بالنار
انا نفسى اناشد الناس الغلابه بالتدقيق لاختيار اعضاء ومرشحى الوطنى ويكون لهم شروط علشان يترشحوا من الاخر عايزين اعضاء مجلس شعب بيفهموا هما بيقولوا ايه

assafo anaroze يقول...

مساء السعادة على احلى عم فشكول في الدنيا
ازاي يا ابو محمود
حرام عليك هزقت النواب خالص
يا عم صحتك بالدنيا و اللي ينضرب بالنار ينضرب مش حتخسر مصر غير شويت عيال هايصة مايصة
هو في اصلا برلمنات في الدول العربية كلها دول شوية كراكيز بتعمل بهم السلطة اللي هي عايزاه و بتعمل بهم الشرعية لنفسها و لقوانينها اللي زي الزفت
مودتي
ابقى اسأل علينا ده انت وحشني و ابقا افتح الايميل علشان نشوفك

جلال كمال الجربانى يقول...

السلام عليكم

مايمكن دى طريقه جديده وحديثه لتحديد النسل عمادها خلفوا براحتكم وأحنا نقرف ولادكم ولما يملوا ويتظاهروا نضربهم بالنار ونخلص ..

خواطر شابة يقول...

قرأت عن الموضوع في الدستور تعرف هؤلاء النواب هم من يقال عنهم ملكيون اكثر من الملك لكن صراحة لم اتصور ابدا ان نائبا وصل للبرلمان بأصوات الشعب يطالب بقتل ابناء من اوصلوه بأصواتهم لقبة البرلمان مع انهم لم يفعلوا شيئا الا الخروج في مظاهرات عزل لاسلاح معهم الا حناجرهم ورغبتهم في الاصلاح والتغيير
صراحة انسب ما يقال هو اذا لم تستح فافعل ما شئت

ريمان يقول...

السلام عليكم

عمو صلااااااح ازيك واحشنى جدااااااااا


انا صوت بما فيه الكفايه


هل تسمعنى؟

حوّل

بس يا ترى فى حد من الاولاد لطم ولا ايه؟

والله يا فشكول مش عارفه بس اقول ايه


بس ربنا يمهل ولا يهمل

عليهم ربنا


والنواب دول ان شاء الله مش يطول اجلهم باذن الله

هيتقصف قريب


وبكره هنشوف

اخرتهم سودا


ان شاء الله



المهم انت بس تكون بالف خير وربنا يطمنى عليك دايما


خلى بالك من نفسك انت غالى علينا


وسلامى للحاجه ست الكل

ريمان يقول...

السلام عليكم

عمو صلااااااح ازيك واحشنى جدااااااااا


انا صوت بما فيه الكفايه


هل تسمعنى؟

حوّل

بس يا ترى فى حد من الاولاد لطم ولا ايه؟

والله يا فشكول مش عارفه بس اقول ايه


بس ربنا يمهل ولا يهمل

عليهم ربنا


والنواب دول ان شاء الله مش يطول اجلهم باذن الله

هيتقصف قريب


وبكره هنشوف

اخرتهم سودا


ان شاء الله



المهم انت بس تكون بالف خير وربنا يطمنى عليك دايما


خلى بالك من نفسك انت غالى علينا


وسلامى للحاجه ست الكل

dr.lecter يقول...

لا تعير السفهاء اذنا

ruma يقول...

انها صورة ممتازة للغاية.

أشكر لكم عن الاعجاب دائما الخط بلدي.
وأنا سعيد لأنني تمكنت من تلبية شخص فهم جيد لك.



من الشرق الأقصى.
مع أطيب التحيات.
زابلييه

فارس عبدالفتاح يقول...

10 برلمانات إيه ونيابية إيه وليبرالية إيه حضرتك باين معندكش فكره عن تاريخ ثورة عرابي الله يرحمه


معلش أنا أسف على اللهجة دي لكن الحقيقة غير اللى حضرتك بتقوله لأني قلت لحضرتك قبل كده أنها ليبرالية الطبقة ليبرالية الارستقراطية ليبرالية رأس المال ليبرالية المستعمر وهذا ما ناهضه وكافحه الزعيم عرابي عليه رحمه الله بعد عناء شديد في ترقيه داخل الجيش المصري الذي كان للشراكة والاتراك

وعلى فكرة للعلم والإحاطة

ما فعله الزعيم عرابي عليه رحمة الله كان نفس اللى عمله الزعيم عبد الناصر ( حركة في الجيش يعني انقلاب زي حضرتك وكل الليبراليين وكل المخالفين لمفهوم الثورة المسلحة على حد تعبيرهم ) هذا فقط للعلم والإحاطة ويرجى البحث الصحيح والاستفاضة في هذا الجانب .. وعلى فكرة أيضا انصح حضرتك تقرأ مذكرات الزعيم عرابي رحمة الله عليه



الخديوي توفيق:


كل هذه الطلبات لا حق لكم فيها، وأنا ورثت ملك هذه البلاد عن آبائي وأجدادي، وما انتم إلا عبيد إحسان.


عرابي:


لقد خلقنا الله أحرارًا، ولم يخلقنا تراثًا أو عقارًا؛ فوالله الذي لا إله إلا هو، لا نُورَّث، ولا نُستعبَد بعد اليوم.




وتقول لي نظام ليبرالي وتقول لي نظام برلماني نيابي حر ونزيه بلاش الله يخلي حضرتك تعمل تشويش على الشباب الصغير اللي مقرأش حاجة ومعندوش فكرة عن الكلام ده ،، لأنه هيسمع وهيردد من غير وعي ومن غير ما يتجشم عناء القراءة والبحث عن الحقيقة وسوف يأخذ كلام حضرتك زي ما اخذ كلام كتير قبل حضرتك على أنه حقيقة وحق لا جدال ولا مراء فيه


فحضرتك بتساهم في فقدان الوعي لدى الشباب وأنا اكتب هذه الكلمات اعرف أني أغلظ في القول لكن هذا احتراماً وتقديراً وحباً للحق أولاً قبل أي شيء وأريد أن أكون دال عليه واليه

وكذلك من واقع أني أكن لحضرتك شيء داخلي يستحق أن لا افقده لهذا قلت هذه الكلمات فارجوا المعذرة على ما قلت لان هذا من واقع اعتزازي بمعرفة حضرتك

فارس عبدالفتاح يقول...

أولا : أنا مش هعمل زي العيال الصغيرة وأتقمص أو أخد موقف .

ثانياً : حضرتك شخصنت الموضوع زي كل مرة.. وأنا لا أريد الشخصنة بل اعني المعلومات التاريخية الصحيحة فقط لا غير .

ثالثاً : الأسلوب اعلم انه فيه غلظة وعنف .. ولكن أيضا من الموضوعية والنزاهة والحيادية إني لم أهاجم حضرتك بل انقد وانقض كل المعلومات التاريخية المغلوطة .. والمضللة .


رابعاً : مش هزعل إن حضرتك بتكرشني من المدونة وهعتبر ده أيضا من ضمن التقدير والعشم وأظن انه يوجد الشيء المعقول منه ،،

خامساً : أسف أن كنت أسأت لكن والله العظيم أنا لا اقصد الشخصنة نهائياً بل أريد الحقيقة في طرح المعلومة التاريخية .


أنا فعلا أسف وحقك عليا .. وارجوا من حضرتك رجاء من أخ صغير أو ابن أن تتقبل أسفي وان تعيد النظر في موضوع الثورة العرابية وارتباطها بالحياة النيابية والليبرالية في تلك الحقبة وما تلاها إلى ثورة يوليو بقراءة حقيقية ونقدية في هذا الصدد .

محمد عبدالرحمن شحاته يقول...

والله انت ميه ميه يافشكول

بس انت كنت غايب فين كده

يارب يكون خير

معاك محمد

مشروع محاسب على وشك الفشل

نبراس العتمة يقول...

مؤلم جدا ما وصلت إليه برلماناتنا.. وما يوجد في مصر يوجد في باقي البلدان العربية.
عندنا مثلا نائب برلماني قام بالاستيلاء على عين ماء وعلى أرض، قاموا الفلاحين ادوه بالجزمة كما يقال بالمصري، قام باستغلال مركزه وحصانته البرلمانية فاعتقل أكثر من 18 مواطن وكنت في المحاكمة لأر كيف أن القاضي يعتبر الأمر فوضى،ويحاكم المواطن على أنه متهم حتى تثبت إدانته.
ما وضع البرلمان في الدول المتخلفة إلا ليكون مبررا للسلطة ولا علاقة له بالمقولات الشعبية، هو ليس من الشعب في شيء، هو ضد الشعب.
العزيز فشكول سمعت الخبر البارحة على البي بي سي، واليوم أنت نقلته لي بحرقة وبألم.
ليكن الله في عونناضد من هم منا. وظلم ذوي القربى أشد مضاضة
مودتي

david santos يقول...

شكرا يا صديقي! أحب البرتغالية الخاص. جيد جدا. وقد عطلة نهاية الاسبوع لطيفة. ديفيد سانتوس ، والبرتغال.

sal يقول...

استاذ فشكووووول

لا تحزن

فيه حالة من فقد التوازن
والتوهان بيمر بيها المجتمع
على كافة المستويات
ربنا يصلح الحال

قادر وكريم

حسن ارابيسك يقول...

عمنا الجميل/فشكول
بالطبع الحقيقة قبل قراءة مقالك الرائع أو بعده
تظل الصدمة قائمة من هول ماحدث وما سمعنا
ولكنها بالطبع الشئ المنطقي الناتج عن الهلاوس التي يراها مدمن المخدرات
مدمنين المخدرات يرون أنفسهم في عالم والأخرون في عالم اخر لذلك يستحق في نظرهم من هم من عالم أخر أن يطلق عليهم النار
تحياتي على سردك الرائع لقيمة رائعة في تاريخ مصر الرائع في تاريخ البرلمان
تحياتي
حسن أرابيسك

Sam Sh يقول...

بس دول مش علشان سواد عنينا .. دول علشان سواد عيشيتنا كلها مش عنينا بس ....
و الله أنا قربت خلاص أفقد الأمل بجد .. بجد مفيش فايدة

وفاء بركات يقول...

كل ده علشان صرفت النظر عن جمهورية فشكولستان...
خلص بقه وأعمل الجمهورية دى مش حتاخد وقت طبق عجة كله في السريع والأكل حيبقي علي ودنه ولو عاوز تبر نفسك نبعت نجيب بتاع الكبدة نعرف منه سر الخلطة ونزود في البهارات والشطه ونغطي علي هوهو يعني حيجرى لينا آيه هيقرصنا عقرب وحتي لو قرصنا العقرب هناك فيه القصاص حيكم علينا بأكل كل الكبده الفاسده عرفت بقه أنهم شبكه ملفوفه علي رقبينا ..
ده إحنا حتي مش حنلحق نصوط ولانلطم..
وحلو قوى درس التاريخ البرلماني .
بس للأسف مش حيحوء فيهم ده درس كبير عليهم.
المهم تسلم لي ع الحاجه أم أسامه وياترى مظبطاك في الهبر ولا مقاطعين اللحمة,, وسلم لي ع الأولاد والأحفاد

well يقول...

كل ابن حلال يحط قرش فى الصحن ...هما خلوا حلتى حاجة

..
..
النواب مع الكارت الكسبان الا ما رحم ربى
وللاسف الشعب ديما بيلعب بورق مكشوف ..ورق خسران
..
قبل ما تلعب البس قميص ضد الرصاص
تحياتى

ندا منير يقول...

وهل لو كل الشعب صوت الحكومة هتحس بيهم وهتشوف مشاكلهم
او اللى بينهبوا فى البلد هيصحى ضميرهم ؟

مهموهة أحمد يقول...

فشكول او استاذ صلاح ......
بجد انا صوت بما فيه الكفاية لغاية ما حسيت ان الجيران هتتلم عليا خلاص

و الله بجد الواحد تعب تعب تعب
و بجد حكومتنا مفيش فيها اي حد نقول عليه يا سلام
مفيش حد نقول عليه حتى اخر الرجال المحترمين

ربنا يرحمنا منهم قادر يا كريم


بجد انا سعيدة اوي بزيارة مدونتك بجد رائعة و تستاهل المتابعة

اكيد انا ضيفتها عندي في القايمة المهمة لانها تستاهل بجد
تقبل مروري الاول و ان شاء الله مش الاخير

خالص تحياتي و تقديري

قلم رصاص يقول...

القصاص والعقرب وبباوي وغيرهم وغيرهم من أنياب قصدي نواب الوطني وايضا بعض النواب الذين حادوا عن الطريق امثال رجب هلال حميده الغبي اللي فقد مصداقيته عندالناس اللي كانت بتحبه وتحترمه
كل دوووووول ماهم الا ابواق وسيأتي عليهم الزمان ان شاء الله وسيسقطوا بعون الله

انا مش عارف هو احنا بنتقدم بالزمن ولا بنرجع لورا

حسبنا الله ونعم الوكيل

تقبل مروري وتحيتي ياأستاذنا الجميل فشكول باشا

♥♥ شذا ♥ الروح ♥♥ يقول...

ههههههههههه

إشمعنا البنات تلطم وتصوت
والشباب لاء
هو أحنا الحيطه المايله


بينى وبينك ماليش فى السياسه بس عجبنى أسلوبك الجميل استاذى الفاضل

أحنا شعب مغلوب على أمره
ربنا يكرمك
والفرج قريب

بدعوك لزيارة مدونتى
ويبقا التواصل

Majoli يقول...

Olá meu amigo, vim te desejar uma linda semana. Beijos no coração

هبة النيـــــل يقول...

حتى الخارجين على القانون ما بينضربوش بالنار كدا خبط لزق

اللهم لا حول ولا قوة إلا بالله

رحم الله الخديوي اسماعيل

هما الخارجين عن القانون في البلد دي بيتسابوا مش بيضربوا بالنار

عمو فشكوول ربنا يخرجنا منها على خير

SAM يقول...

Friend thanks for visiting! The best policy is divine. The best policy is God. Men who engage in politics has a commitment to honor not only the people but to God.

Tears يقول...

انا سعدت جدا بنواب الرصاص لانهم قصدوا مجاملة النظام فضروه كما لم يضره المعارضون و انظر للصحف العالمية و اتفرج على فضيحتهم

كده اغلق عليهم طريق الرصاص و العنف و بقوا تحت المجهر و ده ح ينفعنا فى الايام القادمة

خدم السلطان لانهم مجرد خدم اغبياء جدا و دائما يضروه دون قصد تماما كما ساعدوا فى سرعه انتشار مطلب البرادعى و توجوه بطلا شعبيا بالافراط فى مهاجمته

سجود يقول...

السلام عليكم
يا مية هلا ع مية غلا
يلا حبه صويت بقي
صووووووووويته كبيرره
يا مصر يا ضنايا يا حبيبتي يختي نهبوكي قصدي حافظوا عليكي
هههههههههههههههههههههههه
انا بسمع الكلام اهوه
فعلا حسبنا الله ونعم الوكيل
بس بجد فكره كويسه ضرب النار ديه اهوه بالمره نرتاح منهم مدام مفيش طريقه تريحنا منهم

حنين يقول...

ازيك يا عمو فشكول

احنا تحت امرك وجاهزين

نصقف نصوت

بس ان شاء الله

محدش يصوت ولا يلطم

بكره تتعدل وتروق

ربنا معانا

دوام الحال من المحال

م/ الحسيني لزومي يقول...

استاذ فشكول
انت نسيت نواب "باتا" زي ما قال بلدياتنا هو المجلس مش فيه من كل دايره جوز.

فاروق سحير ( فاروق بن النيل ) يقول...

فشكووووووووووووووووووووووووووووول
وحشنى ياعم صلاح اليوم من ساعة تقريبا كتبت قصيدة جديدة عن القدس وسميتها " قدساه لاتنتظرينى" يعنى أنا متكتف ومسجون وموش عارف أعملها حاجة هوه أنا عارف أعمل حاجه لبلدى
على فكرة أصحح خطأ وقعت فيه عند هوه حسن نشأت القصاص عضو مجلس شعب عن شمال سيناء( العريش) موش جنوب سيناء وأهالى العريش مستحلفينله لما يرجعلوهم حايقطعوه السافل

حلمى البعيد يقول...

أستاذى الجميل
يارب تكون بصحه وبخير
الناس دول حيرونا جدااااا
شويه إلطموا وشويه هيصوا
أهى كلها هيصه
ربنا يهديهم ويعرفوا هما عاوزين إيه بالظبط
تحياتى
لحضرتك

مستكه يقول...

حضرتك متستغربش ابدا

اذا كان رب البيت بالدف ضاربا ... فشيمة اهل البيت كلهم الرقص !!

فارس عبدالفتاح يقول...

الاخ الفاضل / فشكول


يرجى الاطلاع

http://www.youtube.com/watch?v=soifn8qeRA4&feature=related

الازهرى يقول...

احم

لا يا عم انا لو جيت هنا تانى لبقى باجنى على نفسى

انت بتتكلم فى السياسة وبتجب سيرة حبايبنا الله يخليهم لنا وينصرهم على أعدائهم

الطيب أحسن يا عم

جارة القمر يقول...

فشكولتي حبيبي

شكلك مفشكل الدنيا بغيابي

وحشتني ياوالدي

ياااااااااااااه

كل دة يهون عليك اغيب كدة


بس تصدق ليك وحشة ناااااااااااااااار

يارب تكون بخير

/
/

باقةورد بس لفشكولتي

جارة القمر يقول...

انا عارفة ان الشعب المصري

شعب قوي بيأبى الانكسار

hana يقول...

ازيك يا أحلى فشكووووول

الظاهر ياما هنشوووف
بقت حاجة لا تطاق بجد
على كافة المستويات

لازم احييك على أسلوبك الروعة بجد
وكلامك اللي يخلينا نقرا من اول سطر لآخر سطر
ومش عاوزين الكلام يخلص حقيقي

ن يقول...

السلام عليكم
استاذنا الفاضل فشكول
والله يا رجل يا طيب عمرك أطول من عمرى كنت عازمة اليوم على زيارة صفحتك لأرى آخر الاخبار عندك وخفت انك تكون مخاصمنى وان البوست الجديد هيخلينا نخسر بعض المرةدى لكن الحمدلله عدت على خير .
شوف يا أستاذى ربنا يستر على مصر فى المرحلة الجاية للأسف الطبقة الحاكمة عندنا عودتنا على مثل غريب منذ زمن ولا أظنه موجود من ايام الفراعنة زى ما بيقلوا ان المصريين من زمان من ايام الفراعنة صفارة تجمعهم وعصاية تفرقهم .
بكل أسف هذه الايام رصاصة تفرقهم .
مش عارفة احنا رايحين على فين ؟.
مع خالص تحياتى

RENATA CORDEIRO يقول...

Hi, my friend, I´m not very well. Your blog is linked in this blog:

http://wwwrenatacordeiro.blogspot.com/

****


Vem sentar-te comigo, Lídia, à beira do rio.

Sossegadamente fitemos o seu curso
e aprendamos que a vida passa,
e não estamos de mãos
enlaçadas.



Ricardo Reis (Fernando Pessoa)

***

Thank you, and, please, give thanks to your/our friend.

Hugs and kisses,

Have a nice week.

Renata

جارة القمر يقول...

يارب تكون بخير

فاروق سحير ( فاروق بن النيل ) يقول...

فشكووووووووووووووووووووووووووووووول
الحمد لله إن هذا النايب رفعت عنه الحصانة ( والله أنا ضد هذه الكلمة)
حصانة إيه هوه فيه إنسان فوق القانون فى أى لحظة ولازم يرفعوا الحصانة عن عضو مجلس شعب أو وزير أو مسئول هوه يفرق إيه عن أى إنسان فى مصر سوى تحمله المسئولية فيجب أولا أن يكون قدوة شرفتنى ياأستاذ وعايزين موضوعات جديدة وبخصوص ماتكلمت عنه للناس البعده خلاص صرفت النظر عنهم كما قلت وشكرا لك

اسماء واحلام فى وجدانى يقول...

فشكوووووووووووووووووووووووولى حبيبى
واحشانى جدا يا راجل يا طيب
باعتذر عن غيابى ده كله
بس حضرتك اكيد هتعذرنى
لما تعرفى ان القلم كان فاضى من الحبر
ابنك ومساعدك الامين
ياترا لسة فاكر

hana يقول...

ازيك يا أحلى فشكوووول

كنت معدية قولت أقولك صباح الورد :)

عمرو جويلى يقول...

أستاذى الكريم
لعلك تكون بخير
خالص تقديرى

اسماء واحلام فى وجدانى يقول...

ايووووووووووووووووووووووووه
دايما كده يا فشكولى فاقسنى وعارف كل حركاتى بس ياترا مين صاحبة الصورة

مش هاقولك انا عارف
بس هاقولك




عروستى

محمد أبووردة يقول...

هههههههههه
الواحد بيضحك من غلبه
هنعمل تاني
والامر من كده مد قانون الطوارئ
هوا احنا عمرنا ما هندوق طعم الحرية بقي
وهيفضل مكتوب علينا الذل ده لحد امتي
مش عارف
يارب
يارب
انت عالم اللي بينا
يارب عليك بالظالمين

جارة القمر يقول...

فشكولتي الجميلة

وحشتني بجد


يارب تكون بخير

جيت اسلم عليك

صدى الصمت - عاشقة الورد - يقول...

الله الله
إية دة كلة يا أستاذنا ؟؟
أسيبك إسبوعين وأرجع ألاقيك دخلت على الإنتخابات والسياسة !!
ربنا يستر
بس حقيقة صور عظماء التاريخ عجبتنى قوى قوى
تحياتى

Soul.o0o.Whisper يقول...

عمو العزيز / فشكول ...

أخبار حضرتك ايه؟؟؟
ياااااااااااارب تكون بخير

عارف يا عمو فشكول
هنفضل كدهو على طول

و هيتعمل فينا اكتر من كدا طول ماحنا ساكتين و بنقول كمان ...

بصراحة يا عمو معنديش تعليق

دمت بخير دائما

جارة القمر يقول...

انت فين ياوالدي

طمنا عليك