الجمعة، ٧ نوفمبر ٢٠٠٨



فشكول فى مولد سيدى المحظوظ .. الله يحظه





سيدى المحظوظ - شيخ كبير بيسكن فى بر مصر من شرقها لغربها من شمالها لجنوبها - كان عامل مولد الاسبوع اللى فات - المولد كبير والمرعوين كتير - سيدى المحظوظ الله يحظه كان داعى للمولد بتاعه اكثر من 2000 قول اكتر شويه - سيدى المحظوظ الله يحظه كريم .. معطاء .. جواد بيحب المدعوين بتوعه . سيدى المحظوظ الله يحظه كان حداه قصر - قصر كبير - قصر عظيم من ضمن قصور كلها كبيره وعظيمه - لأ وايه عنده قصور فى كل بر مصر اللى يبنى له قصر ويديه له هديه وعلى ارض مش ملكه - يعنى مش ملك اللى بانى ولا ملك سيدى المحظوظ الله يحظه - الارض ملك الناس الغلابه .. حتى اللى بانى ما دفعش حاجه من جيبه - بر مصر كبير وناسه متنورين وكمان متريشين وفيهم ناس متبهدلين .. وكمان ناس جعانين .. كل ده بالاضافه للناس الفقرانين .. ما علينا خلينا فى سيدى المحظوظ الله يحظه .. قوم ايه .. سيدى المحظوظ الله يحظه راجل كريم ما يرضيهش ان المدعويين عنده ياكلوا ويشربوا ويسكنوا على حسابهم .. قوم.... ايه سيدى المحظوظ الله يحظه هو اللى داعيهم ولازم يأكلهم من عنده .. اصول الضيافه بقى .. سيدى المحظوظ الله يحظه عمل خيمه كبيره - خيمه عريضه وحط فيها كراسى - وعمل فيها بست عشان المداحين يمدحوا عليه عليه وكان عايز البست فى الوست - بس المدعوين قالوا لا يا سيدى المحظوظ .. خلى البست فى الوسط - سيدى المحظوظ الله يحظه كان داعى مداحين كتير من كل الدوواوير (جمع دوار) سيدى المحظوظ الله يحظه سمح للمداحين يقولوا للسامعين وقال المداحين يا سامعين يا متنورين يا متريشين قولوا للخايبين الكحيانين احنا الاصلانيين - عندنا ملايين - واننتم ما عندكم ملاليم - هو انتم زينا مدعوين - دا احنا منورين وانتم مضلمين - تعرفوا تقولوا زينا .. دا احنا مداحين احنا بنقول كلام الحلوين - شغلتنا الكلام - وهمنا الكلام وبرضه هدفنا الكلام احنا المداحين وحنقعد مطرح السامعين وحنخلى السامعين يبقوا مداحين واللى مش عاجبه ياكل طين - اللى مش عاجبه !! ما عندنا ش عجين .. هو طييييين شكلكم طين وعيشتكم طين .. شفتم بقى .. حد يقدر علينا ؟ - دا احنا المداحين وحنمدح وحنقول وحنخلى الكلام محاور ودواوين وحنقول المحور الاول ومن المحور الاول نطلع منه محاور ونطلع من المحور ثلاث محاور تتمحول حول المحور وحنقول عن المحور الثانى والمحول الثالث ونفضل نمحور فى المحور وحنجيب سيرة الدائرى وحنجيب الأوتوستراد .. اصل الهدف من المولد هو هو المحور - هو الهدف وهو الغاية - اللى طلع من المداحين وقال هدف المولد ده - المحور - واللى قال الاكل واللى قال الوكل واللى قال السم الهارى اللى يهرى جتتكم يا غنم يا كتير .. وواحد طلع وقال بكره حنعمل - بكره حنسوى - بكره يا سيدى المحظوظ يا محظوظ الله يحظك ان شاء الله .. بكره .. بكره .. كله بيقول بكره .. ما حدش بيقول النهارده .. اصل بكره دا على رأى جحا .. يا يموت الحمار .. يا يموت الملك .. يا أكون انا مت .. آه يا خوفى من بكره يا بدران يا كسلان يا عدمان .. نفسى يا بدران نرجع زى زمان .. زمان زمان من زمان والله يا عين يا يا عينى ..قالوا زمان الزمان ما جاش تررلم .. مع الاعتذار لسمير الاسكندرانى .. نفسى يا بدران حد يقول النهارده - نفسى حد يقول دالوقت يا بدران .. ما فيييييييش كل اللىبيقول بيقول بكره يا بدران بلغت من الكبر عتيا وكله بيقول بكره هو ما فيش فى اللغة النهارده اشمعنا ما فيش فى اللغة النهارده اشمعنى فى اللغة بكره .. وبكره ده مش راضى ييجى يا بدران .. يا سيدى المحظوظ يا محظوظ الله يحظك يا صاحب المولد .. نفسى فى بكره ييجى - من كتر ما حكوا لنا عن بكره بقيت احبه - بقيت اموت فيه اكله باسنانى وابلعه فى معدتى وبيسرى فى دمى وفى خياشيمى .. يا سيدى المحظوظ يا محظوظ قول لهم يسيبوا بكره ييجى .. هما اللى بيقولوا بكره ... طب احنا مستنيين تصدقوا فى كلامكوا عشان ييجى بكره .. هما المداحين عمرهم بيكدبوا .. المداحين صادقين فى كل حاجه .. يا سيدى المحظوظ يا محظوظ الله يحظك خليهم يسيبوا المحاور والمحور والدائرى والأوتوستراد خليهم بقى فى بكره وخلاص .. مش عايزين منهم غير بكره يمكن بكره ييجى بكره .. يا اخوانا من قديم الازل وانا مستنى بكره خايف اموت وبكره ما يجيش بكره .. اشمعنى الدنيا كلها عندها بكره وانا بكره بيتبغدد على مش راضى .. يا سيدى المحظوظ يا محظوظ الله يحظك يا تنفذ كلام المداحين وتخلى بكره ييجى بكره يا تسكت وتريحنا منك .. يا سيدى المحظوظ يا محظوظ الله لا يحظك

هناك ٢٨ تعليقًا:

همس الاحباب يقول...

رائع جدا جدا
بصراحة اسلوب حضرتك اكثر من رائع
وفعلا بلد صاحبها سيدى المحظوظ
وسكانها اللى عايشين هما المداحين
والمعدومين الكحيانيين
لا عزاء لهم فى بلد سيدى المحظوظ
تحياتى

شمس النهار يقول...

اصبر علي الجار السو
يايرحل
ياتيجي مصيبه تاخده

حاجــ عيال ــات يقول...

سيدي المحظوظ الله يخرب بيته
ربنا يبعده عننا
ويقرب افكار حضرتك مننا
هايل ياأستاذ

مفكر يقول...

أنا اتلخبط شوية مع سيدي المحظوظ بس ربنا وفقني وفهمت المقصود........


تحياتي

الكحيان يقول...

يبدو أن العم فشكول يشكو ولا يعجبه العجب ولا الصيام في رجب ، ماله محظوظ ، ومالهم المداحين ياعم فشكول... منين تجيب ناس لمعناة الكلام ياكلوه، ياعم امش جنب الحيط وإن أمكن امش جواه... لكن قل ياعم فشكوول ليه كل الأسياد والأقطاب والشيوخ إياهم أسماؤهم حلوة وعلى غير مسمى دايما
مبارك باراك محظوظ إلخ شكرا لك ياعم فشكول على روحك الفكاهية الساخرة العالية التي نضحك لها حتى نذرف لها الدموع وتتجع منا البطون وربما أحدثنا وأفسينا لامؤاخذة من كثرة الضحك ...

فشكووول يقول...

همس الاحباب .... يا همـــــــــــــــــــــــس
انا ماليش دعوه بالبلد يا بنتى انا بتكلم فى سيدى المحظوظ الله يحظه تلاقى برضه فى اسيوظ سيدى المجذوب وله جامع كبير وميدان كبير باسمه .....
يا همــــس ... الله يحظك

عزيزتى شمس النهار .. نورتى المدونه
من بقك لباب السما

حاجات عيال .. ازيك .. اول مره تنةر عندى .. تحياتى
يا راااااااجل حرام
الا ان اولياء الله لا خوف عليهم ولاهم يحزنون والشييخ المحظوظ بركه

عزيزى المفكر العظيم
الحمد لله انك وصلت .. وبعدين يا مفكى المشايخ عندنا ماليين الدنيا وفى كل بلد مولد

آه منك يا كحيان يا حبيبى
هو يا اخى احنا شفنا العجب امتى .. نفسنا نشوفه .. احنا مستنيينه من زمان قوى .. نفسنا فى اى حاجه واما العجب ييجى حابقى اوريه لك .. يا اخى بس ابعت لنا العجب وبعدين الصيام فى رجب حنصبر عليه بس احنا نشوف العجب ده
هى الحيطه فين يا كحيان ... الحمد لله لقيتها .. تصدق ان كلامك اوامر.. تحت الحيطه حلو

الكحيان يقول...

هي الحيطة فين ؟ سؤال وجيه من الأسئلة الوجودية والكونية التي دوخت عظماء المفكرين والفلاسفة وأرباب السياسة والمخللاتية وباعة البراطيش والكحكاينة والمدخششين ومن لف لفهم... وهو سؤال قريب من سؤال ( بابا فين ). أما تحت الحيطة فهذه جديدة وهي حل إبداعي واقتراح عظيم لا لم يخطر حتى على بال أعتى الجلاوزة ويستحق أن تسجله في الشهر العقاري باسمك وأن تنال عليه جائزة الدولة التخديرية أو جائزة نوفل للمنظفات الصناعية. عسل ياعم فشكوول زاد الله في خفة دمك ويجعل كلامنا خفيفا على الأسياد والأقطاب والمشايخ وعلى حملة المباخر من المداحين والمساحين ولاحسي البلاط .

عـــفـــراء يقول...

السلام عليكم
فى البداية سعدت جدا يافندم بمرور حضرتك لمدونتى البسيطة
وجزيل الشكر على تعليقك المتميز

هو تفتكر فعلا حضرتك بكرة دة هيجى
اممممم... هما المداحين بجد كلامهم بيكون صدق ..!!
الله يحظك يامحظوظ خلتنا كلنا محاظيظ
عجبنى اوى تعليق الكحيان
بس ليا تعقيب
احنا من كتر مابنمشى جنب الحيط لزقنا
فنوسع شوية عن نفسنا لعلا وعسى يجى بكرة من غير فشكله
وعلى فكرة الحيطة ورانا بس لو رجعنا لورا شوية نفوخنا هيورم من الخبطه
فلازم ناخد بالنا.
ياترى مين بقى لاحسى البلاط دول "ههههههههههههههه"
كل التحية والتقدير .....

Unknown يقول...

فشكول يا اخويا ..خيي المحظوظ الله يعزك ليه كل الدوشنه والروشنه دي كل ده علشان بكره مش عايز يجي؟ يافشكول يا خويا بكراهم ده مش جاي وبلاش تنتظره أحسن لك
.بكراهم مش جااااي لان أمبارح ماخلصشي
بكراااهم مش جااااي لأن فركشااااوي فركشاوووويييي مافركشي
ونصحيه لله خليك في التاريخ أحسن .

المـــفـــــــقــــــــوعـــــة مــرارتـهــا يقول...

بنا يحظك ياعم فشكول

سمكه واحده يقول...

يحظك يا راجل
يحظك يا عم فشكول
ودوخيني يالمونه دوخيني
ايوه بكره اكيد جي وان مجاش هنجيبه من افاه
يارب بقي يجي اهو قاعدين حاطين ادينا علي خدنا ونقول تعالي بقي يابكره
بس لعلمك مش فين ايام زمان وليالي زمان ولا حاجه مهو زمان كان فقر وهم وقحط وسواد بردو ولمبه جاز ومفيش مايه ولا كهربه بس كان (في حاجه) الناس مكنتش كتير والحب والرحمه يعني كان في ضمير يعني نوعا ما والله اعلم

فشكووول يقول...

عفراااااء يا حلم الطفوله ... يا منية النفس العليله .. عبد الحليم حافظ
هو يا بنتى نفوخنا لسه ما ورمش .. ما هو ورمان وعدمان من زمان
اما لاحسى البلاط .. ما انت عارفاهم


فركشاوى .. فيينك يا خوى وحشتنى والله يا خوم بالرغم من انك متأكد ان بكره مش جاى الا انى ما قداميش حل الا انى استناه ييجى بكره .. هو آنى حيلتى الا استناه .. ما عنديش حل تانى .. وحنقول فى التاريخ برضه .. وحسمع كلام الكحيان وامشى جنب الحيط .. بس همتك معانا انت تفركش الفراكيش وحنا نفشكل الفشاكيل

المفقوعه مرارتها .. سلامة مرارتك.. ربنا يحظنا ويحظك ويعزنا ويعزك

سمكه .. انت مش واحده .. انت سمك البحر كله - همتك عشان نجيب بكره من قفاه والا من ودانه .. بس ييجى يا سمكه

Miss. Sosa يقول...

عم فشكول براحة علينا الله يكرمك
العقول بتاعت 1+1=2 ديه تقع معاك في المحاور والدهاليز اللغوية ديه

في بلد نصها مداحين بتوع وعلشان كدا احنا اخترناك هههههههه
ونصها كحيانيين معدمين لو عملوا مظاهرة هيغمن عليهم من الارهاق وفى رقبة كل كحيان مية عيل والكحيان خايف يتكلم ليتسحل وعياله تبيع كلينكس في الاشارات

هيجي بكرة علي امثالنا ازاي يعني

الشمس لا تشرق علي الاموات يا سيدي الفشكول .. ونحن اموات
والقلة الحية مترفة منعمة تتدحر وتتدألج في نعيم سيدي المحظوظ

الكحيان يقول...

ياعم فشكول ياست سوسة فضوها سيرة الله يهديكم ، الباب اللي يجيلك من الريح سده واستريح وبابخت من بات جعان ولا بات شبعان - مثل من اختراعي- وبعدين إحنا عايشين ببركات الناس الحلوة ده وبكراماتهم- ربنا يجعل كلامنا خفيف عليهم، وياجايين يكفيكوا شر النايمين، وخليكوا متفائلين ياجماعة دا مصر والله بتتقدم بينا - بس مش عارف في أي اتجاه- ياعم فشكول ياريت تكلمنا عن تاريخ الكرامات وأمنا الغولة وأبورجل مسلوخة وأنت ياسوسة شوفي لك مشروعين ينفعوك خلونا ناكل عيش ياجماعة ولما يجي بكره- دا إن جه- يبقى يحلها ربنا تصبحوا على خير

أحــوال الهـوي يقول...

لكل عصر مداحيه و مريديه و لكل صاحب مقام اوثانه و عبدته
و سيدنا المحظوظ لا يملك موهبة الامامه و لن يملك القدرة علي الزعامه و لكنه قبل دور الشاخص الذي يرجم من الاحرار و يعبد من عبدة الشيطان
و مولد المحظوظ له طقوس لا تتغير و اوراد لا تتغير نفس الكلام كل عام و الوعود التي لا تتحقق الا لمن يسبح بحمده و يمجده و يلقي بقرابين الاموال و النذور
اللهم لا تجعلنا من اتباعه و تثيبنا بالمشي في مراسيم وداعه
الله يسمحك يا عم فاشكول انا لا احب الخوض في هذه المستنقعات
تحياتي

فشكووول يقول...

العزيزه سوسه
يا بنتى انت مخك راح لبعيد .. الموضوع بسيط .. مولد وفيه مداحين وخلاص زى اى مولد من ضمن الموالد اللى عندنا ما .. ما تخليش مخك يروح لبعيد انا بتكلم عن مولد وخلاص وما بحبش اتكلم عن النقاط الشائكه .. هو انا الدستور والا ايه..


كحيان يا كحيان .. خليها تعدى على خير
الموضوع سيدى المخظوظ الله يحظه ويخلاص .. بالضبط كدا زى سيدى عبد الرحيم القناوى بتاع قنا وسيدى المجذوب بتاع اسيوط وسيدى السيد
البدوى وسيدى المرسى ابو العباس وهكذا دواليك ..


اهلا اهلا احوال الهوى .. والله واحشنى يا راجل .. كل ما افتكر انا كنت مسميك 7 ولا الهوى
اضحك على نفسى .. انت خايف ليه يا احوال .. طب الجدع يلاقى حاجه .. وهوى فعلا ما فيش حاجه مولد وخلاص يا جماعه وفوتوها بقى اصل انا جتتى مش خالصه ... وبخاااااااااااف وقلبى بيقع فى ركبى

أحــوال الهـوي يقول...

fashkool
المشكلة انك دمك خفيف و دائما اصحاب القلم الساخر اكون حريصا منهم لان عمق السخرية مغرق مميت
و الشعب المصري عموما يقلب المأساة الي ملهاه

وكما ذكرت ان القلب هو المحرك للعقل و اظن الخوف و الحسابات هي سبب الفشكلة في الغرام
و بالنسبة لوجع القلب .... ده طبيعي لان كل نشوة لذيذه فيها من الوهن والتعب المرغوب
و ممد يا سيدي المحظوظ

عمرو يقول...

ده محظوظ اٍبن محاظيظ ههههه
ألا المولد ده بيروحوا له منين يا عم ؟ و لا مش حينوبنا منه و لو شوية حمص ؟

أسير الجراح يقول...

السلام عليكم ورحمة الله وبركاتة


بجد انا سعيد جدا ان حضرتك نورت مدونتى


ويارب تكون عجبت حضرتك

اشكرك على التعليق الجميل

اشوف البوست وارجع اعلق علية

كل التقدير والاحترام


اسير الجراح

بس خلاص ... يقول...

والله ياسى فشكول مش عارفة اقولك ايه على المعلومات الجميله دى
باين الواحد هيعرف على ايديك العجب

باقولك ايه شفت شهرزاد... طيب قولى ايه رايك بدون مجاملة وووولايهمك

م/ الحسيني لزومي يقول...

ايه ياعم سوسا مطنشاك ومش راضيه تزورك فين البنر
معلهش اذا كنت لحوح اعذرني ايجابيتك هي التي تدفعني لذالك

أمل حمدي يقول...

ازيك يااستاذ فشكول

بجد تستاهل المدونة ان الواحد يدخلها كل يوم مش كل بوست
كفاية طرحك الممتع لمأساة تجن لها العقول
بأسلوب رائع
ربنا مع الكحيانين على المداحين ومحظوظهم
تقديري

Unknown يقول...

خيي أخوووي
فينك يا ولد أمي و أبووي
برضه ده كلام لا زياره ولا سلام
والله لولا الملام لجول انا زعلان
هييه ...أخبط راسي في الحيط
هي فين الحيط؟

اقصوصه يقول...

تدوينه جميله

اسلوبك ممتع

وطريقتك بالسرد سلسه

دمت بخير :)

Dr. Ibrahim يقول...

سيدهم المحظوظ هو المحظوظ لانه ضحك على الكحيانين والتعبانين والغلبانين اللى بيصدقوا كلام اللى بيقولوا انهم محظوظين :)

د/هيما

Unknown يقول...

الجهل يجيب الكافيه

هيجيلي الضغط منه

بس خلاص ... يقول...

ابويا الحاج فشكول ... فينك ياحاج من يوم مارحت مولد سيدهم المحظوظ ولا حس ولا خبر.. اوعى تكون تهت فى الليلة الكبيرة ولا تكون لعبت غمض عينك تاكل ملبن وخدوا اللى فى جيبك ومعدتش معاك حتى ولا اجرة السكة ... انا عارفاهم بتوع التلات ورقات دول
قلتلك شيل فيزا كارت وبلاش المحفظة انت عارف ولاد الايه النشالين دول فى الموالد مالهمش حل ... اقولك قولى انت فين وانا ابعت لك تلات برايز سلف وامرى لله

soly88 يقول...

انا شفت المولد فيديو
شفت يا فشكول السيرك اللى كان فى المولد
طيب شفت الواد اللى قدم النمره الجامده قوى
ياعم الواد القله السفروت ده
عمل نمره ايه حديييييييد
وعجبى
بيقوللك المره الجايه مش هيجيبوا سيرة بكره خالص
هيكلموا عن (المرحله القادمه) علشان تبطلوا نق