الجمعة، 28 نوفمبر، 2008



محتاس

فشكول بيعتزر .. والنبى تقبلوا اعتزاره

الى زملائى المدونين وزوار مدونة فشكول

يتقدم فشكول باعتزاره الكامل للاخوه زوار مدونة فشكول لعدم ادراج اسماء مدوناتهم على فهرس المدونات التى يفضلها فشكول .. اصل فكرة فشكول عن الكمبيوتر صفر .. هو يدوب الزائر عنده يعمل على ايكونته كلك ويروح عنده ويلاقى زوار اخرين يقوم يعمل كلك ويزور وهكذا دواليك والنبى ما تزعلوا من فشكول
اصل ايه الحكايه .......

فشكول كل ما يروح يزور مدونه يلاقى اسم مدونته موضوعه فى يمين او يسار المدونه .. يقوم فشكول ينكسف من نفسه .. بس عامل انه مش عارف حاجه .. اصل الحكايه ان البت سومه المجنونه صاحبة مدونة مجنونه فى بلد عاقل .. اصلها بنت اختى .. هى عملت لى مدونه .. فشكول ما بيفهمش فى الكمبيوتر قام قال لها اعملى لى زى عندك .. وكان فاكر انه كله عند العرب صابون.. قوم ايه .. البت سومه المجنونه بنت اختى عملت لى مدونه زى بتاعتها وحطت لى مفضلين زى عندها .. قوم ايه .. التفضيلات بتفرق بين ثقافات وثقافات وثقافات الشيوخ غير ثقافات الشباب وكذلك اهتمام الشيوخ غير اهتمام الشباب وامزجة الشيوخ غير امزجة الشباب .. قوم ايه .. ما لفقوش معايا .. وكنت بروح ازورهم واعلق عندهم والحيت فى الزياره .. ولا واحد فيهم عبر فشكول ولا حتى اهتم بيه غير مره واحده الاستاذ احمد الصباغ والاستاذ احمد كمال (بتاع رحايا العمر) فشكول بقى لما دخل الموضوع ابتدى يعتمد على نفسه وعمل لنفسه زملاء آخرين .. والحمد لله .. يجعله عامر بحسكم.. والزملاء اللى اعتمدت على نفسى فيهم طلعوا ناس آخر أماره واخر حلاوه .. شجعوا فشكول وساعدوه وخلوه يعرف يعيش معاهم وبيهم وسط المدونين

قوم ايه .. فشكول عايز يحط المفضلين بتوعه على الشاشه .. والابن احمد بدر الدين عرف عمه فشكول ازاى يعمل الحكايه دى .. فشكول ما كدبش خبروقام راح وحاول لكن زود الطين بله وبدل ما يحط ناس على اللى عنده قام مسح اللى عنده وما عرفش يحط حد تانى وقعد يقمر عيش ولا هو طايل القديم ولا عارف يعمل الجديد وفضلت مدونة فشكول من غير (مفضلين).. ما علهش .. اعتزر كمان وكمان وعشان جهل فشكول بالكمبيوتر اما البت سومه المجنونه بنت اختى تيجى عندى حأخليها تعلمنى اعمل ازاى واخص بالذك المدونات اللى انا حاكتبها واللى حانساه يسامحنى عشان الزهايمر عامل عمايله اليومين دول وان شاء الله حأحط المدونات التاليه

الكحيان- اللى مش عارف ايه حكايته

رئيس التحرير - صاحب العزبه

احوال الهوى - الدكتوربتاع السعوديه

الاستاذه محاسن صابر - عايزه تطلق وفشكول ما حدش معبره

الاستاذه ماما اموله العظيمه بتاعة العربى

الشاعر العظيم بيرم المصرى

بس خلاص اللى هى هس فنش - خلص الكلام - اووفر

الاستاذه آمال بتاعة مدونة - ن

اقصوصه الشقيه بتاعة الامارات - عساها بخير
السيده m,k

فركشاوى العزيز - بس مش عارف ناوى على ايه

الاستاذه كامليا الجرمانيه

حاجات عيال - يا رب تكبر ونحضر فرحها

الاستاذ محمد غالى


الاستاذ الازهرى يارب يقول لنا خطبه


العزيزه من غير عنوان - ان شاء الله تلاقى شقه قريب وتبقى بعنوان


الاستاذ رأفت بتاع الجغرافيا

المفكر الغالى

احمد بدر الدين المنوفى بتاع اشمون

د. ابراهيم سماحه


الاستاذ محمد الجرايحى

واحد من العمال - بتاع كفر الزيات اللى بيموت فيها

شمس الشموس - شمس النهار

النائمه فى الارياف - يا رب تصحى بقى

العزيزه سلوى ويزبر - يا رب اكون بانطقها صح

المكسوفه الجميله

طائر الليل الحزين - يا رب فرحه بقى

القلم السكندرى - يا بخته بيكتب من على البحر

شفقه هانم واحسان بك - يا رب ترزقهم بشغل

العزيز محمود فرج

ستنا حنان سعيد


يا خبر كنت حانسى العزيزه آبى الجميله

ستنا رئيسة حزب الاحلام - يا رب تدخل مجلس الشورى - رئيسة حزب بقى

دنيا الجميله


المجنون - يا رب يعقل بقى


ستنا العزيزه مها زين

قلب مصرى اللى ما بشوفوش اللى كل سنه مره

الاستاذه صفاء اللى زارتنى مره واحده

الراجيه عفو الله وكلنا معاها

روفى وجنه وموناليزا اللى متوهينى عندهم والاخر بحط تعليق مطرح ما تفتح الصفحه وخلاص


الدكترا اللى زارنى مره واحده برضه

الدكتوره العزيزه (ام البنين ) ربنا يخلى لها ولادها

سمكه واحده - بس بسمك البحر كله - سمكة قرش


احمد kبرضه زارنى مره واحده


ما حدش يعرف طريق المس سوسه


وكمان كل اللى بيزورونى ونسيت اكتبهم أرجو ان يغفروا لى سهوى ونسيانى لكن ان شاء الله اما البت سومه المجنونه اللى عندها امتحانات دالوقت تيجى عندى حيلاقوا كلهم اسمائهم ( مش عارف يا ماما اموله اسمائهم ولا اسماؤهم) فوتى دى بقى حيلاقوها فى المفضله عندى وححطهم على المدونه .. وحقكم على بس هو العجز الكمبيوترى

على فكره الفيلسوف طلع فيها وعمال يتمنظر على وقاعد متنك ولا حد مالى عينه - اصله راجع ان شاء الله فى البوست القادم .. انتظروه

يا رب تعزرونى وتسامحونى


تحياتى لكل الزملاء المدونين والى البوست القادم

هناك 54 تعليقًا:

مـجـنـووون يقول...

أول تعليق

مـجـنـووون يقول...

تاني تعليق

مـجـنـووون يقول...

تالت تعليق هههههههههههههه

مـجـنـووون يقول...

بس خلاص كفاية كده

معلش اصلي مجنووون

مـجـنـووون يقول...

المهم

استاذي العزيز ولا يهمك أحنا عرفين إلي عندك ومتشغلش بالك

والله إلي يزعل علشان مش حاطط اسمه عندك يبقي راجل مش تمام

وبتعيب علي وتقولي يا رب تعلق

وانت عندك واحده مجنونة ( مجنونة في بلد عاقل ) ههههههههههههههههه


تقبل مروري استا1ي العزيز

فركشاوي ..ناوي يقول...

الواد ده مجنون صح..
انا مشتري بربع جنيه قصب وكامش فيه عشان آخد اول تعليق ..طيب سيبلي التاني ولا التالت ولا الرابع..ايه الجنون ده ..بس دمه خفيف خالص ..وشاعر علي فكره يا فشكول يا خويا ..بس شاعر بأيه والله ما أنا شاعر..
بعد اذنك اقري بقي ..
الا من حق..انت غايب ليه
والكحيان فين ؟؟؟اتخطب يارجاله...

محمد الجرايحى يقول...

أستاذنا الفاضل
ولايهمك أهم شئ إن الله يديم علينا نعمة التواصل والأخوة الصادقة والمودة الطيبة
تقبل جل تقديرى واحترامى
أخوك
محمد

فركشاوي ..ناوي يقول...

كان نفسي اقولك كلااااام ...بس العين بقي فيها قشايه لما لقيت الأساذ محمد الجرايحي ...علشان خاطره راح اسامح ..زور اخوك فشكول واقعد عنده شويه يا فركشاوي.. اقعد عند اخوك افهمه مين يفهمه لو ما فهمتوش انت ؟؟
فشكول بيقولك ...شكرا يا فركشاوي ..ومشناوي بقي آآآجي تاني.

mr_raafat يقول...

" الحكيم فشكول "

السلام عليكم ورحمة الله وبركاته

أتأخرت عليك بالزيارة بس لأن الكمبيوتر

كان فيه مشاكل أصل أنا زيك بالظبط

مبتدأ، وحشتنا حكمتك وننتظر علي أحر

من الجمر زيارة الشرق الأوسط للحكيم

وياتري ها يدور الحوار عن أيه

ياريت يحكنا عن حالنا ويقلنا طريقة

كويسه نقدر بيها نصرف في أملاكنا اللي

ها نستلمها قريب في الملكية العامة

ونضارب بقا في البورصة ونعيش

والله مشتاقين لرؤياك وسماع صوتك

مع السلامة نشوفك في الحلقة الجاية مع

.. بس خلاص ... ولا هس أسكت ..

الازهرى يقول...

العزيز فشكول

جئت اعتذر عن غيابى فوجدت ان لى اعتذار
يبقى خالصين

ويفضل لك المودة والحب الجميل

سأراجع ما فاتنى واعود مرة اخرى

تحياتى دوما

ن يقول...

السلام عليكم
المفروض الكمبيوتر يضربلك تعظيم سلام على نبل أخلاقك وكفاية انه بيلتقى كل يوم بالاستاذ فشكول الفيلسوف والمفروض يعمل كليك لحاله وينظملك كل الامور مش كفاية أنك بتشرفه بأفكارك على فكرة يا فيلسوف أنا كنت كاتبةموضوع نفسى تقرأه على مدونتى التانية أسمه
واحد بيفكر يكون رئيس جمهورية.. وعاوزة أعرف رأيك .وهذا هو رابط الصفحة
http://amlonline.blogspot.com/2008/04/blog-post_24.html
وعلى فكرة سوف أرسل لحضرتك دعوة من هذه المدونة وأرجوأن تشرفنى بزيارتك
مع خالص تحياتى

mohamed ghalia يقول...

حبيب قلبى
ولا يهمك
إحنا عارفين انك عارفنا كويس
ربنا يكرمك ويسعدك
تحياتى

Mahmoud farag يقول...

استاذ فشكووول

... وحشتنا كتير يا راجل بقالك زمن كده مش باين على المدونة

المهم انك بخير

و بعدين ده احنا نبقى طماعين اوى لو نزعل كمان انك مش حاطط اسامينا في المدونات المفضلة لديك

كفاية انك بتخش و تعلق عندنا و تزورنا و ده شرف كبير قوي

تحياتي و بلاش تتقل علينا ههههه

maha zein يقول...

ده سومة المجنونة اتبهدلت علي الاخر
كله طلع بسبب سومة المجنونة
وطلعت هي اساسا سر اللى بيحصل في العراق دلوقت واللى بيحصل في الاقتصاد العالمى

عمما اكيد الناس بتقدر
ومش معني ان حد محطش حد في الريدر يبقه مش بيزوره ولا بيتابعه
كلها شكليات وربنا

بالله عليك متحلفش بونبي
قول لا اله الا الله
انا بردو كتير بنسي وبقولها وبلاقي اللى يفكرني

ربنا يبارك فيك وفي صحتك وفي مجنونة

قلم رصاص يقول...

ههههههههههههههههههه

مليش دعوا انا عاوز الحق مكان هنا في المدونة الجميلة دي ياعمو فشكول

دي اول زيارة لي وانا طماع اساسا ولازم تخادني معاكم

انا حجزت مكاني خلاص..ومش متعتع من هنا
ههههههههههههههه

اوعي تزهق مني لأني مش ناوي امشي من هنا
احتلاااااااااااال

وابقى خلي البت سومة بقى تعرف تعملي حاجة

سلام يا أستاذنا

وتقبل مروري الأول

جايلك تاني

Dr Ibrahim samaha يقول...

انا اسمى مكتوب.......؟

طيب هههههههههههههه

تحياتى لك

د إبراهيم

Soul.o0o.Whisper يقول...

fashkool

ياااااااااااااااااااااااى
أنا مبسوطة خالص
لقيت اسمىىىىىىىىىىىىىىىى

هههههههههههههههههه
اسمى سول ويسبر
مش سلوى
اللى فى النص دا شوية اكسسوار ..<< لزوم بنات يعنى هههههههههه


والله حضرتك اللى ضحكتنى جدا
تعرف إن موقف الفضية دا حصل فعلا

بس مش فى المترو
فى الأتوبيس العام

و اعطوه تسعه جنيه و نص فضة
الراجل قام و اتشال و اتحط

التباع قاله امال لما ينزل الخمسة و العشرة جنيه هتعمل ايه ؟؟؟
ياللا يا جماعة كله يجهز صرة الدنانيير
ههههههههههههههههههههههههههه

فكويس إنك جهزتها
عقبال الباقيين



بأعتذر جدا عن التأخير
بس قريب جدا جاية..

عندكوا قهوة؟؟




خالص تحياتى

احمد بدر الدين يقول...

اولا كدة انا ما كنش قصدى تزيد الطينة بلة على العموم ملحوقة

اما تيجى سومة تعمل لحضرتك قائمة جديدة

قلنا شات حضرتك شردتنى وقلت لى شات اية ياد يا احمد انا بفتح المدونات بالعفية

عرفتو بقى ان فى فقر فى التواصل بين الاجيال

وربنا يخليك لينا يا كبير المدونين

ولى الشرف انك تضعنى فى قائمتك

هــو..مش ..نـو يقول...

الاقي عندك الزفه دي كلها...ولا تلاقيني ولا تغديني ...يا سيدي افتكر اني هوهوت عندك كام هوهوه ...طيب اسمحلي حتي بالزياره بس ...ومن غير هوهوه ...هاوووو.هوو

رئيس التحرير يقول...

بسم الله الرحمن الرحيم
فشكل ..عزيزي ..غبت كتير المره دي.قلت لك بلاش غياب يا فشكل ..وماشي اعدي لك التدوينه دي علشان البت سومه بنت اختك ...وهو انا مش خالها ولا ايه؟
قلها تعدي علي خاله رئيس التحرير تغير لنا الديكورات القديمه دي ..شكلنا يكسف قدام الناس.
اطيب امنياتي...

رئيس التحرير يقول...

عوده ...معلهش يا فشكول يا خويا...
هو الهوهو ده في بوزي علي طول ..جاي منين ده ...وايه الحلاوه دي ..همين ..هم يضحك ...وهم يضحك ..اضحك

أمل فتحى عزت يقول...

السلام عليكم
صباح الخير يا أستاذ / فشكول
آسفة جداً إنى تعبتك أنا جيت من مدونتى القديمة هى مدونة أقدم من نون بكتير شوية إسمها (عالمك والهجرة).
إنها فلسفتى الخاصة هى ناتج أعمال سنوات طويلة هذه المدونة بها خمس مدونات كلها حصيلة سنواتى ستجد فيها قلمى فى كل اتجاه فى الفلسفةوالقصة والحكاية والصحافة وتدوين الاحداث والفن ولا تسألنى أنا اشتغلت كام شغلة ولا أخذت كام شهادة متعدش أهم شىء عندى إنى أشارك معكم فى التدوين وأتعرف على مبدعين جدد .. ربما أكون ركزت مجهوداتى الايام الماضية فى مدونة (ن) لكنى سأعدل بين المدونتين قدر المستطاع ولكنى أحببت أن أفصل مدونة (ن) لأسباب كثيرة هى التركيز فى صلب الموضوعات التى تتضمنها.
شكرا للزيارة
مع خالص تحياتى

سمكه وحده يقول...

عارف يا عم فشكول وانا عماله اقري اللي كتبتهم كنت عماله ابص ها ها وعارف لو مكنتش لقيتك كتبتني كنت هسلط عليك سمك القرش كله ولا وكمان البسريه وسحاليل البحر ينتقموا ليا
بس سماح النوبه دي هههههههه
بجد ربنا يكرمك ويبارك في عمرك اسلوبك في الكتابه رئع ومشوق جدا وبحب اجي اشوف الكلام اللي زي العسل ومتشكره جدا جدا علي الاهتمام والله ده كتير عليا ربنا يخليك لينا وتبدع اكتر واكتر
ياله كلمتين حلوين عشان كتبتني شوفت بقي
تحياتي لشخصك الجميل

~*§¦§ Appy §¦§*~ يقول...

معلش معلش مش كبيره اوى كده يعنى براحه كلنا بيحصل لنا كده ولا يهمك

حاجــ عيال ــات يقول...

السلام عليكم
عارف لو كنت نسيت اسمي يا عمو
كنت هعتصم في مدونتك هنا واقلبها ثورة بقى هه بس
بس الحمدلله عمو الفشكول ما ينساش ابدا عياله

يارب ديما تدوم المحبة ولتواصل
سلالالالالالام يا عمو

أحــوال الهـوي يقول...

انا اسمي مكتوب
طيب

دائما العظماء يتذكرهم الناس و لكن العظماء لا يتذكرون الا العظماء فقط

نفس المقوله تنطبق علي عظمة جناب معالي سمو سعادة سيادتكم الموقرة

كل عام وانت بخير

تحياتي

mahasen saber يقول...

استاذى الغالى حضرتك تحطنى فى القايمه تشيلنى من القايمه
انا غلسه برضه هزورك يعنى هزورك


بس انا بعرف اعمل الريدر لوحدى انا فيه ناس شرحولى وانا نفذت من غير اى كلام دى سهله خالص
اعرض المساعده ولا معرضتش يا ربى
انا بفكر بصوت عالى اهه
...
شوف حضرتك ادخل على على اه اضافة اداه
اعتقد اه وهتلاقى طلعتك قايمه طويله فيها الخدمات بتاعة بلوجر حضرتك هتختاراضافة قائمه باسماء المدونات الالكترونيه
وعليه حضرتك هتحط اللينك وخلاص
ويا رب يكون اليى قلته صح اصلا لانى بنسى بسرعه بس بيتهيألى هو كده

طـــائر الليــــل الحـــــزين يقول...

صديقى الكبير والعزيز
فشكـــــول ........
منور يا قمر كالعادة
ومتشغلش بالك خالص بالموضوع ده
ومش شرط خالص انى القى اسمى عندك عشان اعرف انت متابعنى والا لاء
المهم حضورك عندى ودايما كلامى يكون عند حسن ظن حضرتك
بجد انا فخورة انى بدخل مدونتك واعلق فيها يا أستاذى العزيز
وبشكرك كمان على وجود اسم طائر فى البوست
وده طبعا احسن تقدير منك ليه
بحييييييييييييك يا سيدى الفيلسوف
وكل سنة وانت طيب
واضحى سعيد عليك وعلى الامة الاسلامية كلها

صفـــــــاء يقول...

.
والله انت ظالم الاستاذة صفاء
انا قريت تقريبا كل البوستات اللى عندك بس معلقتش غير على اخر بوست وكنت خايفه تقول بهاجم وخلاص تقوم تطردنى من عندك بس طلعت كريم يا عم الحاج
وعليه
انت تدخل على لوحه التحكم ثم تخطيط
ومنه الى أضافه عنصر
عندك نوعين من القوائم
اما قوائم ثابته
او تعمل زيى وتختار قائمه المدونات الالكترونيه ودى خدمه جديدة وأفضل من القديمه وهتلاقيها اول واحدة فى أضافه عنصر ... وقبلها تخلى صفحه التعلقيات قدامك وكل ما تحب تضيف مدونه تضغط على رابط أصفر أضافه مدونه جديدة
تقوم تعمل ايه يا ابا الحاج
تفتح المدونه اللى انت عاوزها تعمل كوبى للرابط
وتلطعه بيست فى الاضافه ثم ok وهكذا دواليك .... ولا الحوجه لحد
ولا تستنى اما تخلص امتحانات وكمان لازم تتعلم فى المدونه مدام مش هتحذف حاجه أساسيه او رئيسيه وانا والله كنت اتمنى اساعدك فى الحكايه دى
أدينى سيبتلك تعليق طويل عريض واخد بتاع نص الصحفه بس مجرد محاوله انى اكون مفيدة
سلامى وتحياتى وأمتنانى الشديد لوجودى فى قائمتك

M.K يقول...

السلام عليكم..
عمي فشكول ..
ولا يهمك ..
وأن شاء الله يدوم التوال بيننا...
في إنتظار جديدك..
في أمان الله.....

مفكر يقول...

السلام عليكم::

فشكول العزيز،،

كنت متأكد انك فاكرني،،وانا على طول فاكرك،،

دمت في رعاية الله

صفـــــــاء يقول...

والله مش تعب ولا حاجه
بجد نفسى اخدم يعنى
انت بعد ما دخلت على التخطيط واخترت أضافه عنصر
بتختار اول واحد قولنا اللى هو قائمه مدونات الكترونيه
متكتبش العنوانURL انسخه كوبى وبيست
معلش هى هتاخد منك وقت شويه بس بتخليك على أطلاع بالمستجدات بدل ما تفضل تدخل المدونات كلها كل يوم
وبعدين دة انت تنور كل المنيا وكل الصعيد وكل وجه قبلى
وجمال بلدنا فى جوامعها وكنايسها وناسها كمان والكورنيش عندنا احلى كورنيش فى مصر كلها . شوفت التعصب؟
المفروض لما تحط الرابط وتعمل حفظ تظهر عندك القايمه وتفتح اى مدونه عليها وتعملها كمان تحديث دائم
جرب تانى.
.

احمد على نصار يقول...

الاستاذ الجميل : فشكول
سررت بزيارتك لى الاولى وعندما جئت لك اكتشفت انك صاحب مدونه ذو حس ساخر ولازع ولوزعيه وكده..
بالنسبة لإدراج المدونات فى المفضلة .. لو لقيت حد يعلمك الطريقة يلريت تقولى اصل نفس الحكاية برضه معايا
تحياتى

مها يقول...

ههههههههههه

هيا سومة العاقلة ف بلد مجنونة تبقى بنت أختك؟؟؟!!
وكمان عندك "مجنووووون" تاني دخل حجز خمس تعليقات مرة واحدة!!
في الحالة دى مجبرين نعذرك على الصفر بتاع الكمبيوتر!! كفاية عليك سومة والمجنون بقا.. ههههههههههه


تحياتي لك يا فشكووووول
ولجميلة الروح خفيفة الظل سومة
ولكل المجانين بمدونتك وعذرهم معهم :)

عاوز عروسه بالمقاس يقول...

هههههه والله كلنا فى الكمبيوتر مش قد كدا انا برضوا لسه عامله مدونه ومش عارفه احط فيها حاجه لسه عادى بكرا تقدر تحط اللى عاوزه
على فكره تصفحت ما كتبت سابقا مدونتك جميله ما شاء الله تسلم ايد حضرتك

اقصوصه يقول...

مجنون اكل كل التعليقات

بابا فشكول مجنون طماع

الله بيوديه النار!

لولا الخمس مراكز الاولى

اللي سرقها

كان تعليقي بيكون رقم 30

مش رقم 35

مجنون خرب برستيجي بابا فشكول!

وانا اطالب بتعديل برستيجي المهدور!

واطالب بإيقاع اقصى العقوبه

على المتهم اعلاه

اللي اكل في بطنه 5 تعليقات

والمثل المصري يقول

اللي ياكل لوحده...يزور

ومجنون شكله بيزور اكيد!

المهم بابا فشكول الساعه الحين 2 ليلا

وانا قريت تدوينتك

وبإنتظار سومه المجنونه

تخلص امتحانات

وتحطلك الفيفرت من اول وجديد

بس لو سمحت وعقابا لمجنون

لا تحطه بالفيفرت لانه طماح!

يلا سي يو سووون

إيما ( أم البنين) يقول...

أستاذي الفاضل
سبب الزياره الأول هو إني جايه أعتذر لتقصيري في الزياره مع حضرتك ومع كثير من المدونين والمدونات ..بس عذري إني كنت بمتحن الماجستير ولسه مخلصه من قريب
ولكني كنت بتابع من آن لآخر ما تكتبه حضرتك حتى لو ماكنتش بسيب تعليق
وهذا لا يعني إن حضرتك ما تزورش مدونتي ..المدونه تتشرف بحضرتك في أي وقت وبدون حاجه لإذن مني
وعندما حضرت اليوم خجلت من نفسي لما وجدت إسمي موجود في كشف المدونات إللي حضرتك بتحب تزورها ..وهذا شرف كبير لي..أشكرك عليه
وتحياتي

ماما أمولة يقول...
أزال المؤلف هذا التعليق.
ماما أمولة يقول...

يا استاذي فشكوووول

انت انسان لا يسعك غير القلب

لا مفضلة ولا غيره

ربنا يبارك فيك

انت تبعث السعادة غي نفسي بمجرد ان ارى اسمك

وعلى فكرة اسماؤهم واسمائهم

هم الاتنين غلط

ههههههههههه

والاصح اسماءههم

ولا يهمك ماما امولة بتاعة العربي

ها تعديها المرة دي بس

وسلام

أحــوال الهـوي يقول...

fashkool
عمنا و تاج راسنا
انا باحبك من كتاباتك و نفسك السمحه الجميلة..
و ده مش تفخيم دي حقيقة
القلب الذي تحدي المستحيل و انتصر انهزم امام ضياء محبوبته
و المحب يري الهنا و الجنه في محبوبه حتي لو كانت صحراء قاحلة
هكذا يري المحب كل المتناقضات و المفردات كما لا يراها احد سواه
بيحب بقي
تحياتي

صفـــــــاء يقول...

.
يا عم فشكول خد بالك معايا والنبى

اللينك او الرابط اللى انت هتحطه فى قائمه المدونات الالكترونيه يكون رابط المدونه مش البروفايل
يعنى انا مثلا مش تحط رابط بروفيلى لكن تحط دة

http://safagalal.blogspot.com


http://safaagalal.blogspot.com

تاخد كل واحد منهم كوبى زى ما هو كدة وتلطعه بيست عندك وكدة يظهر عندك مدونتين ليا
فهمتنى يا عم الحكيم فشكول؟
.

صفـــــــاء يقول...

برافووو يا عم الحكيم

تعمل ايه بقى فى الباقى؟
تعمل ازاله لكل الروابط الغلط اللى عندك لان كلها غلط كمان شكلها مش مظبوط
تسيب الرابط بتاعى وتزيل الباقيين وتدخل تجيب اللينكات من المدونات نفسها وتعملها اضافه
برافو يا حكيم برافو بجد أسعدتنى لما نجحت وبعد ما تعمل كل المدونات اللى انت عاوزها ابقى اقولك على الباقى يالا ورنا همتك

رؤية يقول...

دا شىء عادى لما يكون الموضوع جديد مش اكتر
بس لما تتعلم هاتبقى اشطر منهم

^_^

تحياتى لك

MAKSOFA يقول...

والله أنت جميل

وعندك روح حلوه

بس تصدق مدونتك هي اللي بتغلبني علشان أفتح الصفحه



ياعم المشكله عندك

DoNyA يقول...

دنيا الجميله

لن استطع وصف فخري
وحمرة وجنتاي حين لمحت اسمي بين كلماتك
اشعلتني فخرا وزهوا سيدي الغالي

مودتي وتحياتي العطره لك

kochia يقول...

والله البوست دمه خفيف اوي رغم انه بيتكلم عن مشكلة اعتقد ناس كتير جدا كانوا فيها .. وانا منهم طبعا في بداية الامر
والمسالة مسالة وقت وبس وعمو فشكول هيعرف يفشكل لوحده كل حاجة بعد كدة

تحياتي

صبرني يارب يقول...

يا استاذ فشكول الموضوع سهل خالص

عنيه لك من غير البت سومه دي انا هاقطعها

ولو انا اسمي مش مكتوب عاااااااااااااا

بس لو عايز اقولك ازاي عنيه لك


واحنا مش زعلانين هانيجى نزورك من غير ماتيجى تزورنا بقالي شهر عايزه احطك فى القايمه عندي عشان الى مش فى القايمه فين على ما باعرف اروحله بصراحه

وانت النهارده نورت فى القايمه بتاعتي

وبرضه اناا سمي مش مكتوب عااااااااااااااااااا

أمل فتحى عزت يقول...

رسالة من زائر لفلسطين
هى رسالة مازالت تتجدد من عام 1948م
وحتى الان.

أماه
أكتب إليك وكأنني معك أحكي لك قصة هذه الرحلة بعد طول تأمل وأنا أتجول في هذه الأرض المباركةأرض أولي القبلتين وثانى المسجدين وثالث الحرمين الشريفين . وأنا في هذه الأجواء رُسمت في قلبي معالم لوحة تعبر عن ملحمة طويلة الأمد..جعلتنى وللوهلة الاولى .. أقتل ويهدر دمى وأشعر بالخجل لهويتى العربية.. أحسست أننى أريد أن أتكوم فى أحشائك من جديد لتعيدى تكوينى ولا تلدينى الا بعدما أقسم لك اننى لن أولد الا عربيا بدم حر وغيرة وطنى يعشق معنى الجهاد ويؤثر الكرامة على الحياة و يقدس تراب الارض ويرفع اسم الله فوق كل شىء... أحسست بضألة موقفى وأنا أرى تخريمات الرصاص على المساجد والكنائس ومنازل الابرياء ودماء الشهداءعلى الجدران مكتوب بها على صور الشهداء .. هذا دم فلان
وأمهات تجلس أمام الصور بعيون بها إعصار من غضب وأنفاس لا تحمل الا الأنات تجمع الجمرات لقذف ابليس فى الوقت المقدر والمحسوب من رب العالمين .. قد تكون حجارة من سجيل الا ان الله يجعلها بردا وسلاما فى أياديهم سجيلا على أعاديهم .. وروعنى طفل فى الثانية من عمره يكاد يتعلم الجري وأول ما يتعلمه هو كيف يرمى الحجارة يتعب فى حملها ذهابا وإيابا بيداه الرقيقتين وسط الاطفال وقتها أحسست بالخجل وتضألت وكأننى تحولت الى شخصية شهيرة اسمها عقلة الأصبع هذا الولد صغير الحجم كان بطلا واستغل حجمه فى انقاذ بنت البلد من يد الاعداء .. اذن انا اقل من عقلة الأصبع عندما لم اتعلم جيدا كيف احمل بندقية وأن اسمع نداء هؤلاء الضعفاء فتمنيت ان اكون بخارا حتى لا يسخر منى عقلة الاصبع ولكنى تذكرت ان للبخار دورا فى انه يصعد ويتجمع وما تجمعنا يا أماه فحتى الطبيعة تعلمنا الدرس وما تعلمناه
اماه .
انى الان اتعذب بهذه العيون التى لازمها الحزن وآلفتها الدموع وصغار لا يرون الغد الا فى لغة الثأر وحلم الاستشهاد ..و انا اسمع نغماتهم ..
منتصب القامة أمشى..مرفوع الهامة أمشى ..فى كفى قطفة زيتون..وعلى كتفى نعشى ..واناأمشى وانا أمشى ..قمرى بستان أحمر ..قمرى بستان ..فيه عيدان السودج فيه الريحان ..شفتاى سماء تمطر غضبا حينا حبا أحيان .. فى كفى قطفة زيتون وعلى كتفى نعشـى ..وأنا أمشى.. وأنا أمشى

وتمر أيام يا أماه وأنا أتجول فى حكايات هؤلاء المعذبون المنتظرون و يتسألون متى سنعود الى ديارنا .. وانتابتنى قشعريرة وانا أرى بيت المقدس كأن له عينان تبكيان و هو يحاكينا بشجن ويقول...
آرأيت حالى وقد نشأت على يد الانبياء و الصالحين لترعانى مريم ابنة عمران وليؤنسنى صدى صوت عيسى وأكرمنى الانبياءبضيافتهم لى وصلاة محمدصلى الله عليه وسلم بى ومعراجه من عندى .. ثم أهاننى العدوان مرات ومرات ثم طهرنى صلاح الدين ثم عادت المكائد وسقطت فى يد المعتدين أخذونى بالخديعة انهم يقطعون من بنيانى بحثا عن هيكلهم المزعوم ..عذبوننى اطلقوا دموعى لأرثى نفسى ما دامت العروبة لاتورثينى .. انتحب كل يوم وأنا البيت من سيرعانى من سيكرمنى بعد.
أمــاه
انها دموع بيت المقدس .. انها المناجاة التى أحسست بها أحسست بالغليان وانا أسمع قصص التعدى والعدوان وصيحات النساء فى كل مكان على كل فقيد وبيوت تهدم على الآمنين ورسالة بنو صهيون الى كل فلسطينى تقول
ارحل عن ارضك.. وعبارة مستفذة تجعل الدم يغلى فى العروق وتشعل نار الغيرة فى القلوب..وكنت اسمع واحترق صرخات (وجدان) وهى فتاة فلسطينية تزلزل الارض تحت قدمى وترجف قلبى وهى تقول ..واعروبتاه .. كما قالت المرأة وامعتصماه .. ولكنى اتعجب يا أمى أن فى عهد المعتصم لم يكن هناك اذاعات و لا أقمار صناعية تنقل لنا الأنات و الصرخات الا ان صوت المرأة وصل المعتصم بعد سفر بالخيول عن طريق رسول ومع ذلك نفر المعتصم غاضبا لبيك يا أختاه
يا امـاه: اليوم الصرخات تُرصد كل دقيقة ونشاهد سقوط الاطفال وضرب النساء و قتل الشيوخ .. نشاهد الاحداث ونحن نأكل ونرقص و نلهوا والموت أمام أعيننا .. لماذا كل هذا الصدأ فى القلوب ألم تعد تتحرك فينا نخوة ولا تأخذنا شفقة فى هؤلاء ولماذا ننسى سريعا والاعداء لاينسون ان لهم حق اغتصاب الارض..
أمــاه .
اكتب لك من الارض المقدسة التى شهدت تاريخ النبلاء من الارض التى شهدت اشراف الناس على مر الزمان يفوح عطرهم فى كل شبر من الارض المباركة
أماه: الناس هنا ينامون ولا ينامون عيونهم قلقة وابدانهم مللك للأرض فى كل لحظة ولكنى أرى نساء صامدات صابرات شديدات ينتظرن يوما نكون فيه أغنياء بفيض من كرامة والحاح ..بانتصار..

بس خلاص ... يقول...

السلام عليكم
طيب اكتب انا فين بقا اغيب يومين اجى الاقى المدونه كومبليت كده .. انا عارفه ان حبايبك كتير ... ربنا يخليك ليهم ولينا يافيلسوف ياكبير تعرف ان قمة العظمة عندك من طيبة القلب اللى واضحة جدا والبسطاة لان كل واحد فينا حاسس انك عمه او اخوه الكبير او عمدة بلدهم الطيب اللى لامم العيله كلها فى صحبته الدافيه ..كل سنه وانت بخير وجميع الاهل والاحباب ... وانشاء الله يعيدها علينا وعليكم ولى الامة الاسلاميه باليمن والبركات
هى البت سومه جات زارتك ولا ايه انا شايفه تطور جامد قوى بره فى المدونه
سلام ياعم التكنولجيا

البحث عن أنا شىء جنونى يقول...

اسف انى هكتب خارج نص الموضوع

يله ضيف / ضيفى مدونتك حسب القسم بتاعك وخلى العالم يتعرف عليك

وادى لغيرك فرصة يقرا خطوط قلمك

خلى البحث عنك اسهل

اتبع اللينك ده

مدونه كل العرب

http://arabwriters.blogspot.com/

نبض الروح يقول...

طيب الحمدلله شكل المشكلة انحلت هههههههههه امممممممممم الله يعطيك الصحة والعافية ويفهمك ويفهمني معاك في الكمبيوتر :)

gana magde يقول...

هههههههههههههههه
طب والنبي لما سومه تيجي ابق ابعتهالي
لاني محتجاها اوي
وبعدين انا معنديش مفضله لان انا في فدماغي مفضله احسن بكتييرررررررررررررررررر
اعمل واحده في دماغك وخلاص بقه
تحياتي

غير معرف يقول...

Very quickly this web page will be famous amid all blogging and site-building users, due to it's good articles or reviews

Check out my homepage :: latiba

غير معرف يقول...

What's Going down i'm new to this, I stumbled upon this I've found It positively useful and it has helped me out loads. I'm hoping to give a contribution & aid other customers like its aided me.
Good job.

Here is my web-site: locastro