الجمعة، ١٤ نوفمبر ٢٠٠٨



فشكله فى القطار

وحطوا فى عين فشكول مسمار


يوم الاثنين الماضى كان عندى شغل فى اسكندريه - ما هو انا رحاله فى شغلى - كل اسبوع فى بلد .. قوم ايه


صحيت الصبح الساعه 6 عشان اركب القطر اللى رايح اسكندريه مباشره عشان يوصلنى الساعه 9.5 وكمان . نصف ساعه ميكروباص اللى بيروح بحرى اقوم اوصل للفرع بتاع اسكندريه تبقى الساعه عشره ومن عشره للساعه اثنين يكون عندى وقت اقدر اعمل فيه حاجه .. قوم ايه


صحيت محمود ابنى عشان يوصلنى المحطه .. محمود قايم بوزه شبرين وعمال يبرطم على آخره .. انا بقى مش واخد بالى من حاجه .. محمود عايز يخلينى آخد بالى .. انا بقى متنح .. قوم ايه محمود وصلنى المحطه على مضض .. محمود من غيظه داس على البنزين جامد راحت العربيه طالعه امريكانى .. اعديهاش انا بقى وافوت .. ما هو الواد متغاظ وموش طايقنى .. قمت مبرطم بشوية كلام فى العضم - قام الواد خدهم فى عضمه وراح باصص لى من الشباك شزرا وماشى على طول


دخلت المحطه عشان اقطع التذكره - قام صاحب التذاكر قال القطر فيه تأخير نصف ساعه .. يا محموووود .. محمود مين .. محمود زمانه وصل البيت .. حطيت همى فى بطنى وقلت هو انا ما قداميش حل تانى .. اقعد يا واد .. القطر اتأخر ساعه وعشر دقائق .. يا ريتها كانت نصف ساعه .. ركبت القطر وامرى لله .. لقيت كرسى حلو كدا وقدامى عيلين وزاويز .. قلت اقعد مع العيلين دول أهم تسليه طريق ... وبعدين لقيت البت .. البت زى القمر والواد زى الهباب .. عامل شعره كدا .. بقى .. اصل .. مش فاهم عامل فى شعره ايه .. شعره فى الشرق وشعره فى الغرب وكل يعنى كدا عشرين او ثلاثين شعره لازقين فى بعض والشعر عامل زى السله (نباث شائك ينمو فى المستنقعات ) الشعر اسود والوش اسود والعمليه سواد فى سواد .. مش مشكله ولا عيب .. خد عندك كمان .. الواد لابس تى شيرت اسود بنص كم ودراعه طالعه من النص كم مسلوعه وطويله ولونها اسود .. طب يا ابنى اختار الالوان ولابس حظاظه فى دراعه.. طب ممكن تلبس ساعه تظبط المواضيع وكان لابس سلسله على رقبته .. بصيت للسلسله يمكن دهب ولا فضه ولا حاجه حلوه لقيتها مش لا دهب ولا فضه ولا حاجه حلوه .. امال ايه .. ما علينا


البنت بقى زى القمر .. والله زى القمر .. الوش ابيض .. جميله .. والعيون عسلى .. مش قلت لكم فشكول حطوا فى عنيه مسمار .. اصل كنت لابس النضاره الشمس وما حدش شايف انا شايف ايه .. البت تلتين بقى مش متوسطة الطول .. اكتر شويه .. القد .. ما شاء الله .. اللبس .. سبحان الله


الواد كل شويه يقرب بوزه من بوز البت ويتوشوشوا ... الله طب يا بنى مش كده .. فشكول مستغرب وكل شويه بيبص اكتر .. البت هيمانه عالآخر .. فشكول عجبته الحكايه وقعد يتفرج تقولش سعاد حسنى وحسين فهمى فى خلى بالك من زوزو ولا أميره حبى انا .. يقوموا كل الناس اللى فى القطر يعملوا زى فشكول ويتفرجوا .. الواد من قلة ادبه مد ايده على البت .. زى ما بيعملوا الحبيبه وهما ماشيين وحط ايده على كتفها .. وما فيش حد قال لهم حاجه .. فشكول قعد يفكر .. البنت الهبله دى زى السكر ..لو عايزه تحب يعنى .. مش تدور على واحد عليه القيمه شويه .. لأ وأيه الواد آخر قنعره فى قعدته وحاطط رجل على رجل ... فشكول يعنى اللى وضعه يسمح له بكده ويحط رجل على رجل ويتقنعر شويه مش قادر يعمل كدا احتراما للناس اللى فى القطر اللى راكبين معاه قوم ايه .. الواد راح يوشوش البنت فى ودانها .. يا نهار اسود .. فشكول قلع النضاره وقعد يبرق للعيال عشان ينكسفوا شويه .. العيال ما عندهمش دم ولا عبروا فشكول ولا حتى ادوا له اى اهتمام .. فشكول كان فاكر نفسه له قيمه يعنى وان العيال حتنكسف .. اتارى فشكول اونطه ولا حد معبره .. قوم ايه فشكول عند محطة طنطا القطر فضى شويه راح فشكول قايم من الكرسى وخد شنطته ونضارته وجه رايح على كرسى تانى .. الله .. كرسى فاضى ولا حد يدايقنى ولا حد

يقل ادبه قدامى .. ايه اللى كان مخلينى قاعد جنب المسخره دى.. فشكول قعد اخر انشكاح وآخر ابنعاج اربع كراسى وانا لوحدى شفت الهنا اللى انا فيه .. جه القطر عند

كفر الزيات ووقف وطلع القطر ركاب كتير .. فشكول اللى كان قاعد متشكح لم نفسه عشان الزحمه .. قوم ايه .. قعد جنب فشكول ولد وقدامه بنتين .. يا دى النهار الاسود .. المره دى بقى الواد قاعد مؤدب وشكله معقول يعنى .. وش وحش .. مش حلو .. معقول اصل الواد دكهه كان وحش خالص ومناخيره لها زلومه وبقه واسع وشعره سلك المونيوم خشن .. لكن الواد ده معقول يعنى .. البت بقى اللى قدامه كل شويه توطى لقدام عشان تكلم الواد اللى جنبى وبتعمل هى اللى الواد الاولانى كان بيعمله .. يعنى فشكول شاف الموضوع من وجهتى النظر .. كل شويه البت تقوم عامله مع الواد (شيك هاند) وايديهم كدا تفرقع وهما بيشيكوا هاند .. فشكول زهق .. طق .. بس مش قادر يتكلم - اصل القطر كله عيال وعمالين يصفقوا ويغنوا .. حلو الغنى يعنى مافيهاش مشاكل .. واد من وسط عربية القطر ينده واد صاحبه .. انت ياد يا سعيد يا ابن الـ ... فشكول طلع الجرنان وحط عينه فيه من كسوفه .. العربيه مليانه ستات وحريم وبنات والعيال ما عندهمش كسوف ولا خشيه .. فجأه لقيت البت بتضحك وبتحط راسها فى عب الواد اللى جنبى .. نهار اسود .. فيه ايه .. فشكول اتلكك ان الواد ميل عليه .. قام فشكول باخخ فى الواد .. والله الواد طلع مؤدب .. آسف يا عمو.. وكنا قربنا من دمنهور وغاروا العيال دول .. فشكول قعد يفكرفى زمان وايام زمان .. ايام ما كان بياخد الجو بتاعه - بيسموها اليومين دول المزه - ما شى ياخد المزه بتاعته ويمشى هو وهى من ميدان روكسى لحد الهرم الاكبر .. دا ايام ما كنا فى مصرزمان كنا نبتدى من الصبح ولا حاسين بحر ولا برد ولا حاسين بشارع ولا ناس ولا حاجه خالص لحد ما نوصل لمطلع الهرم نقوم نفوق ونرجع تانى المشوار كله .. فشكول كان بيقول احلى كلام وبيسمع احلى كلام وبس .. ما فيش لمس ..كل واحد يتكلم من بعيد لبعيد - كنا بنحب بودننا .. البت محترمه .. وفشكول برضه محترم .. وكانت كل الفشاكيل الحبيبه والمزز الحبيبه اللى فى الشارع كده محترمين بيحبوا بودانهم وخلاص .. ممنوع اللمس وكانوا بيخافوا على الجووه -المزز- اصل كنا بنحب عشان نتجوز مش حكاية مزز وخلاص


كنا بنلبس تى شيرتات برضه وقمصان .. كان التى شيرت او القميص مكوى وعلى سنجة عشره .. فشكول كان بيحب سيف البنطلون ما فيهوش كسره واحده والجزمه بتلمع على أخرها .. فشكول وكل الفشاكيل كانوا بيحبوا الصوت الهادى وبيحب يحافظ على الجو بتاعه - المزه يعنى - متهيأ لى ان الفشاكيل كانوا غلطانين وكانوا هبل والمزز كمان كانت هبله ..الحاجه بقى بتاعتى كل يوم بتقول لفشكول يا خى روح انت ما لكش لازمه .. ليه يا وليه تقول يا خى روح شوف لنا قرشين للعيال اللى عايزين يشتروا شقق دول وما معناش ثمن الشقق دى .. فشكول يبص للأرض وهو مخزى وقفاه يقمر عيش .. ما علينا فشكول يفتكر ايام زمان ويقول لها يا وليه انت ناسيه الجزم اللى اتقطعت فى شوارع القاهره من المشى .. يا وليه انت كنت لو فات يوم من غير ما أهريك مشى ومن غير ما الففك الشوارع كلها تعملى مناحه وتخاصمى اخواتك وامك وابوك وتقعدى تعيطى وتنوحى والتليفونات ما تبطلش زن.. الوليه بكل برود تقول .. يا خويا .. انا كنت هبله وعبيطه .. فشكول يفتكر ايام الهبل والعبط والجزم اللى كان ابويا يقول لى انت رجلك فيها فواريك .. اصل ما كانش بيشوف المشاوير اللى كنا بنعملها من روكسى للهرم ومن القلعه لحديقة الاندلس ومن العتبه لحد المؤسسه فى شبرا للزمالك .. للدقى .. كنا صايعين بقى ومبسوطين من المشى.. ما هو ما كانش فيه كل اللى المشى .. ويا سلام لو كنا نروح لونابارك اللى كانت فى جنينة الحريه اللى بعد كوبرى قصر النيل بتاعة ضحك ولعب وجد وحب بتاع عبد الحليم حافظ .. تقولش كنت فاكر نفسى عبد الحليم حافظ.. وبحبك يا فشكول .. وبحبك يا ست الدار .. والاخر تقول لى ما لكش لازمه .. ما شى يا حاجه


وااااااااع .. وااااااااع .. واااااااع .. ايه ده القطر عمال يقول يا خلق هوى ليه ؟؟ آآآه .. اصل القطر وصل سيدى جابر .. اصحى يا فشكول .. ابص من الشباك الاقى الواد اللى شكله ما يسرش عدو ولا حبيب والبت اللى زى القمر نازلين سيدى جابر وانا مكمل لمحطة مصر .. فشكول كمل ووصل المنشيه


الساعه كام .. يا نهار مش فايت .. اجرى يا واد عشان تخلص شغلك ..

فشكول رجع فى نفس اليوم بس فى اتوبيس الجونه .. حاجه كدا سياحه .. فشكول حيحرم تانى يركب القطر


هناك ٤٠ تعليقًا:

أمل حمدي يقول...

يا ابو محمود

ربنا يباركلك فيه

انت عايز ايام الزمن الجميل زي الايام دي

تيجي ازاي بس

لاعاد فيه خشى ولا حيا

ربنا يصبرنا على دي ايام

واوعاك تركب قطر وخليك في الاتوبيس احسن

وحمد الله على السلامة

أمل حمدي يقول...

شفت التعليق يا ابو محمود ولو حتى الالف

ربنا يعينك على البوست الجديد وان شاء الله ها ارجع لمينا موحد القطرين
يوم تاني ان شاء الله

ربنا يصلح حالك اللهم امين

مهرة سالم يقول...

رائع أسلوبك يا بومحمود...
بجد عيشتني بجو تاني..
حسيت إني راكبه معاك القطر...
...........
هو جيلك كان حب الكلام
والمشي من أساسياته و
بالطبع لهدف سامي إلي هو الجواز...
أنا بعشق جيلك...
بالرغم من إني من جيل والعياذبالله
من أبو شعر ألمونيوم للأسف
........
مدونتك جميله مثل روحك
وتحياتي لأم محمود
والله لو تدور ماتلاقي وحده تصبر على المشي إلي مشيته..
.......
دمتم بخير

مفكر يقول...

السلام عليكم::

كل دة من قطر واحد!!

تحياتي

ن يقول...

السلام عليكم
عرض خفيف الدم لثقافات دخيلة على مجتمعاتنا وعاداتنا وتقاليدنا ... والفرق بين زمان واليوم هو سيطرة الثقافات ووسائل الاعلام التى تحكمت فى الفكر والهوية .. وجميل أن يكون القطار مشهد يجمع المشاهد الكثيرة التى تزاحمت بها الشوارع . روحك الراقية المرحة تظهر بوضوح فى كلماتك
تحياتى لشخصك الكريم
أمل فتحى عزت

بس خلاص ... يقول...

بص بقا ياعم فشكول
واضح كده انك بتحقد على الواد ابو شعر زى السله ده بدليل النظارة السوده اللى قعدت تبحلق من وراها يابو الفشاكيل خليها فى سرك بقا ... وبعدين انت كنت فى القطر ولا فى سينما راديو كل دى افلام اتفرجت عليها يابختك يافشكول ياخويا وبعدين ايه حكايه الحب عن طريق الودان ده ..... وبعدين بصراحة بقا كتر خيرها ست الدار لحد كده ... ياراجل بتفكرها بالمشاوير اللى انت هريتها مشى فيها دى ....ليه ماكانش فيه نيل ولاترمس ...ولاذرةمشوى ... طيب لما نشوف هتعمل ايه فى قطر الصعيد

الكحيان يقول...

إيه الجمال ده ياعم فشكول ... أسلوب رشيق وحكي جميل الله الله عليك ، واضح ياعم الفشكول إنك كنت دون جوان على الآخر رحم الله أيامك ، لكن والله ياعم فشكول لو أنك دخلت الجامعة عصرا أوليلا هذه الأيام لرأيت العجب العجاب خاصة في الممرات والأماكن المتوارية عن الأنظار فالحب هناك ليس بالآذان ولا باللمس فقط ... ومن هنا لا تستغرب عندما تسمع عن إحصاءات تشير إلى وجود آلاف من حالات الزواج العرفي في الجامعة ..فضلا عن حالات الإنجاب، ولله الأمر من قبل ومن بعد .

Miss. Sosa يقول...

يا عم فاش كول خليك كووول :))

بصراحة الجيل الحالي يعاني من مشكلة خطيرة جدااا هي انعدام الحياء

والادهي والامر ان اللي بيتصف بالحياء بيهاجم وبيتعتبر حياءه نقيصة وعادة رذيلة ومذمومة منه

ثانيا في مرض اخري مستشري بين البشر عو الحول الاختياري (من الاحولال
البصري)

سبحان الله سامحني يارب تلاقي واحدة زي الفل وواخدة واحد زي النسناس مش نسناسي الشكل لا سمح الله ولكن نسناسي الاخلاق متسلق الاكتاف وطباعه واخلاقياته تنتسب الي البهائم والمواشي

ولا واحد زي الفل وواخد حية رقطاء ولسانها مبرد شغال برد ونحت في كرامته المصون

ياتري ده ليه يا عم فاش كوول ؟!
هو جيلنا احول ام اعور ام كفيف البصر والبصيرة ؟!

اقصوصه يقول...

ههههههههههههههه

فشكول قصته قصه:)

بس الرحله كانت ممتعه

فرق كبير اكيد بين جيل الامس

حضرتكم

وجيل اليوم

حضرتنا

وجيل الغد

حضرتهم!!

اكيد في وايد فروق

التدوينه ممتعه

استمتعت بقرائتها

وانا نزلت تدوينتي اليديده :)

سمكه واحده يقول...

اممممممم اخ انان تش يالهوي

ليه كده بس ياعم فشكول ضروري تفضحني وكشفتني وشي منك في الارض ياخاله امونه انا البت دي هههههههه والواد شحاته حبيب العمر اللي كان معايا

ياعم ده اليومين دول والله بلاوي وعدم كسوف بجد ده سواد امال اللي بيحصلنا من شويه
صحيح ياعم فشكول اهو انت قلت بنفسك العيال بتبقي شكلها لاتسر عدو ولا حبيب وبيبقي شعرهم متكهرب او من الخضه بيقي شكله كده بيبقي مخضوضين
متلقلناش واد جنتل كده وحليوه وزي القمر بدل من الهم اللي بنشوفهم في الشوارع ههههههههه

حاجه تسد النفس

لا والله بجد في بلاوي في الدنيا والمشكله ان كان الاول نقول الواد بجح وكده دلوقت البت بقت تدب في عنها رصاصه تصدق بالله لما بشوف منظر زي كده ببقي عايزه استهبل اقوم ارجع عليهم
انا ببص سعات للبت واقعد اعمل حركات اني هبله البت تتخض متبقاش واخده بالها من الهلف اللي جمبها من خوفها وتقول هي البت دي هبله ولا ايه بس خالي بالك ببقي نصحه لما الواد يجي يبص اعمل نفسي وديعه اي والله سعات انا وصحابي لما نلاقي ناس كده منسكتش لما نهبلهم او يقوموا من المكان بكل ادب اصلي جبانه معرفش ازعق واعلي صوتي والكلام ده لاء من تحت لتحت ههههههه
هعمل ايه بس ببقي قرفانه وبتبقي حاله من التقزز والله فعلا بتبقي بنات زي القمر بس مخها فاضي وجهله وغبيه ربنا يرحمنا
ربنا يهدي شباب وبنات المسلمين
معلش طولت يا عمو
سمكمك

Unknown يقول...

ايه يا فاشكول يا اخوي ؟ مش قادر تقول للعيل ده كخ عيب ..وتفشكل عليه قعدته المهببه .
ابقي لما تركب القوطورات تاني قلي وانا افركشهم لك فركشه
فركشاوي قناوي غاوي
...
فشكول يا خوي
شمس النهار حرقتني وعيزاني اشيل القرد
ايه رأيك؟

ahmed_k يقول...

السلام عليكم
إزيك يا أستاذ فشكول
الحب زمان كان راقي وكلله عاطفه
لكنا الآن بجد أصبحنا في زمن العجايب
وصدقني الظواهر دي مكانتش باينه فبل عام 2000
وكأن رقم 2 اللي في بداية العام كان وبالا عليها في كل مناحي الحياه
بجد ما أجمل دنيانا وبلدنا قبل عام ألفين
أنا كنت طالب في معهد لحد سنة 94ومكانتش الأمور وصلت لهذا الحد
ولغاية دلوقتي أنا بسمع كلام عن علاقات الطلبه والطالبات مش بكون مصدق ان الحياء رفع لهذه الدرجه
وكثيرا ما أحمد الله أني من جيل لو قيل عنه وقتها انه صايع فهو يعتبر من ذوو الأخلاق الرفيعه بالنسبه للى بنسمع عنه دلوقتي
وفعلا ربنا يستر على الأجيال القادمه

نسأل الله العفو والعافيه
وأن لا يأمر مترفينا فيفسقوا في بلادنا
فيحق علينا قول ربنا فيدمرنا تدميرا

أحــوال الهـوي يقول...

استاذنا الكريم
مش مسألة تقفيل انا اريد المنفعة العامة و بما انك من عشاق التاريخ فالابداع هنا ان نبحث و ندقق لنضع بصماتنا و فكرناعلي موضوع موجود بين رحي الكتب
و كيارا عجبتها الفكرة و بالتنسيق معك تأحذ هي الوجهه المقابله لنفس الحقبة لما تكتب

أحــوال الهـوي يقول...

عمنا الغيرة حيرة
و المشاوير اللي كنت بتلفها كانوا الكبار برضه شايفنها تسيب
بصراحة اذا كانت البنت حلوة بالشكل ده و الواد وحش لك حق حاجه تحرق الدم يعني لو كانوا الاتنين حلوين كانت فرقت

ربنا يستر يا عمنا علي الجيل اللي جاي الموضوع مش هيقف عند الوشوشه
اوشوشك ؟؟؟؟؟؟انت اسلوبك ممتع

تحياتي

Empress appy يقول...

متسافرش تانى
اقولك ايه يعنى
عموما انت بتنقد سلوك مش كويس وانا معاك انما على الشكل والله الحب عمرة ما كان بالشكل وممكن البنت بتحبه
بس فعلا سلوك بيضايق انا لو منك كنت قلعت الحزام وجريت وراهم ههههههههههههههه

Hanan Said يقول...

انا سعيده جداا باني عرفت مدونه حضرتك
بجد اسلوب حضرتك حلو اوووي في سرد الاحداث وانتقاد السلوكيات
اسلوب مايخليش اي حد يمل خالص
...
والموضوع الي حضرتك اتكلمت فيه بجد مهم جدا
لانه بقى السلوكيات دي منتشره بشكل كبير جداا
ومبقاش في حد بيتكلم ولا بيقول حاجه
بقى زي مايكونو مش شايفين ولا سامعين
ولا بقى صاحب السلوكيات دي عنده اي نوع من الحياء
انا متهألي يعني
لو واحد بيحب واحده لازم يحترمها جداا ويخاف عليها من اي نظره حد ليها مش كويسه
اما بقى البنت الي كدا اساسا مع نفسها
فربنا بقى يهديها

وحلو اووي وصفك للحب زمان

عجبني اوووي الجزء ده

اصل ما كانش بيشوف المشاوير اللى كنا بنعملها من روكسى للهرم ومن القلعه لحديقة الاندلس ومن العتبه لحد المؤسسه فى شبرا للزمالك .. للدقى .. كنا صايعين بقى ومبسوطين من المشى.. ما هو ما كانش فيه كل اللى المشى .. ويا سلام لو كنا نروح لونابارك اللى كانت فى جنينة الحريه اللى بعد كوبرى قصر النيل بتاعة ضحك ولعب وجد وحب بتاع عبد الحليم حافظ .. تقولش كنت فاكر نفسى عبد الحليم حافظ.. وبحبك يا فشكول .. وبحبك يا ست الدار

تحياتي لحضرتك جداا

فشكووول يقول...

ماما اموله :
حرمت اركب القطر تانى .. بس اما اروح مأموريه الصعيد بيبقى فيه حجز اولى مكيفه وحاجه بتبقى جميله وكله على حساب الشغل .. الله يسلمك .. تحياتى


Mk تحياتى
اصلى جيلى ما كانت حيلته غير انه يتكلم ببقه والودن تسمع وخلاص .. تصدقى اما نروح القاهره دالوقت بنركن العربيه فى المؤسسه ونقضيها متروا ومتورجل ايضا.. يموت الزمات وصوابعه بتلعب .. تحياتى

يا مفكر .. ازيك .. وحشتنى .. انت فين من زمان .. انا كنت عندك امبارك
انت باين عليك القطارات عامله معاك عمايل مهببه .. تحياتى


استاذه أمل
شايفه يا أستاذه العسكر عملوا فينا ايه وكمان الجماعه بتوع المهرجانات للكل وعايزين يطبقوا حاجات ما فيش دوله ولاشعب فى العالم طبقها .. هما بقى ملكيين اكثر من الملك ومتأمركين اكثر من الامريكان .. ربنا يسترها معانا ومعاكى.

بص يا عم بس خلاص
طبعااااا انا كنت بحقد عليه .. يعنى اضحك عليك هو يعنى قاعد يغازل فى مزه زى القمر وانا الحاجه بتاعتى تقول لى مالكش لازمه .. اما الحب عن طريق الودان ما تفهمش غلط عشان كان واحد بيتكلم والتانى يسمع .. آدى يعنى الحكايه .. ماشى يا عم .. هو انا اقدر اقول على ام اسامه كتر خيرها .. وطبعا كان فيه كورنيش وترمس وضره مشوى وكان فيه الاورمان وحديقة الاندلس وكازينوا النيل وكنا بنشرب الشاى بـ 35 قرش دى الوقت يقول لك فول يا بيه ويجيب لك الشاى وحته .
جاتوه زى الزفت وتدفع 35 جنيه.. يا بلاش.. تحياتى

أهلا اهلا كحيان المعيد .. انا بقيت اشك فيه .. انت لازم قر دحله ومتخفى فى صورة الكحيان
انا يا كحيان كنت جوان نفسه مش دون لأ فوق جوان.. يا سلام يا كحيان لو الواحد يلاقى مزه زى القمر زى دى ويتجوزها ... هس .. ولا كلمه ما تمسكليش ع الوحده

بنتى حبيبتى سوسه النوسه كواالنوسه الجميله
متهيأ لى يا بنتى البت اللى لاقاته قدامها .. يعنى البت تعمل ايه .. جميله وزى القمر وما فيش حد بيقول لها ليلتك سوده .. البنت ما كدبتش خبر وبعدين والله يا سوسه بنظره موضوعيه جيلكم الله يكون فى عونه يعنى لا بيت يربى ولا تعليم يعلم ولا وظايف تشغل ولا امل .. برضه الواحد لازم يلاقى عذر لجيل اليومين دول .. والله جيل معذور وانا عندى ولاد وحاسس بمشاكل الجيل المهبب ده .. الله يكون فى عونه وعونك يا بنتى ايضا .. تحياتى

اقصوصه الجميله
اشكرك يا اقصوصه على الزياره والحكايه مش كلها كدا .. انا كنت بزورك امبارح وقريت وقلت كمان .. تحياتى

سمكه العزيزه
انا ما قلتش لحدحاجه ولا جبت سيرة شحاته وبعدين ما تشيليش الهم عندى لك عيال زى القمر بس انت شورى .. ينفع جده فشكول .. حاركب السنان .. والزق الشعر وحاجيب لوحين خشب اسند بيهم رجلى ..اخص يا بنتى لا أنا رجعت فى كلامى .. يعنى تصومى تصومى وتفطرى على بصله.. تحياتى

العيال يا فركشاوى ما بيتفركشوش ابدا وتنحا وما عندهمش دم فكرتنى بشمس النهار اللى عمال اعمل لها زيارات كتيره وهى مش راضيه تسأل عنى .. خلاص بقى يا فركشاوى .. فركش

العزيز احمد k
الله يبارك فيك .. ما علهش يا أحمد والله يا بنى جيل اليومين دول مظلوم برضه لا تعليم يعلم ولا بيت يربى ولا شغل موجول ولا أمل .. الله يكون فى عونهم وربنا يحميك ويحمى اللى زيك

ازيك يا دكتور احوال الهوا
ماشى يا عم .. لس لو كيارا تقدر تلاحق على اصل انا عندى مواضيع كتيره تاريخيه عايز اقولها .. مش انا بقيت الجبرتى والمازنى وابن سيرين وكل المؤرخين والله يا دكتور الواد كان فعلا يسد النفس وبعدين انا قاعد زى القمر واقول للقمر قوم وانا اقعد مطرحك ولا معبرانى وبرضه الموضوع فيه شوية حقد يعنى.. تحياتى

العزيزه ابى الجميله
ما تاخديش كلامى بجد يعنى قوى .. هى الحكايه دى حصلت فعلا وانا باكتبها زى ما حصلت .. لكن انا احاول ان المس السولك المجتمعى الحاصل اليومين دولوالمعيب .. ويمكن دا تأريخ غير مباشر عن فترة الانحلال التى نعيشها الأن .. لكن برضه يا أبى الواد يسد النفس فعلا.. عديها بقى يا آبى.. تحياتى

حاجــ عيال ــات يقول...

بصراحة يا عمو ماكنتش عاوزاك تنزل من القطر خالص وياريت كمان تركب دايما قطر عشان اركب معاك واعيش معاك
بس قولي بجد البنت اللي بتعاكس الواد المؤدب أحلى ولا البنت الي بيعاكسها الواد دكهة
أصلك معجب اوي بالبنت اللي بتتعاكس

Mahmoud farag يقول...

أستاذ فشكوول

من الملك مينا لنقد السلوكيات ايه الثقافة دي كلها

هههههه

انا قريت الموضوع و كأني كنت راكب معاك القطر سردك للموضوع حلو جدا و خصوصا الواد الاسود ابو شعر سلك ههههه

ربنا يرحمنا جميعا و بجد الواحد بيشوف البنات مع الاولاد بيتصرفوا بطريقة غريبة جدا ... ده انا اتكسف اعمل اللي بيعملوه البنات

و متهيقلي الغلط الاكبر على البنت ... و كمان عدم رقابة الاهل لأولادهم سواء بنات او ولاد

و اوعى تركب القطر تاني

مـجـنـووون يقول...

بجد حاجه تحزن ، الشباب الأيام دي بيحسبوا أن المرجله أنه يعاكس بنت أو يفلفل شعره يعني من الأخر يبقي روش

بس علي فكرة دي فترة مراهقة بس لما يخلص كلية ويبتدي في الحياة العملية

حينصدم قوي من إلي حيحصله

تقبل مروري استاذي الغالي
مجنووون

جلال كمال الجربانى يقول...

الفاضل فشكول دوت كوم

طبعا ياعمنا الزمن غير الزمن والدنيا

أتقلبت فعلا فى الثلاثين سنه الماضيه فقط

صراحه أستمتعت بقراءه

هذه التدوينه الرائعه

وعلى فكره أنت حكاء عظيم

وتقبل تحياتى

Mahdi Mahdi يقول...

اناجديد ومن يؤمن بهدفى فليساعدنى على الانتشاربين الاصدقاء فى المدونات

فشكووول يقول...

العزيزه حنان سعيد.. اهلا اهلا بيك.. نورتى عندى وانا بكون سعيد جدا لما حد ييجى عندى اول مره .. ارجو الا تكون آخر مره.
من الطبيعى ان يكون الحب يسموا بالنفس والروح لان الحب من اجمل الاشياء فى حياى الانسان .. شوفى الاب بيعمل لابنه ايه ؟؟ وكمان بيعمل لبنته ايه .. عشان بيحبهم وكشان كدا اما الواحد يحب واحده لازم يحترمها ويقدرها عشان الناس يبصوا لها باحترام.. تحياتى

اهلا اهلا يا حاجات عيال شرفتينى ونورتينى
البنت الاولى احلى من التانيه والواد التانى يعنى شكله معقول عن الواد المهبب الاولانى يعنى الموضوع التانى عكس الاول تمام البنت التانيه لابسه بدى ولازق فى جسمها وحاطه حوالين عنيها حاجه خضراء مش عارف اسمها ايه .. والله شكل الراجل بالضبظ بس فيها تقاسيم المرأه أما الاولى زى القمر .. والله زى القمر .. امال انا كنت عايز حد يخزق عنين فشكول ليه

ن يقول...

السلام عليكم
أستاذى الكريم /فشكول
الموقع التاريخى هو للدكتور أسامة السعداوى وليس مصطفى السعداوى
وهذا هو الرابط الخاص به
http://www.ossama-alsaadawi.com/_private/main.htm
إعمل كوبى لهذا الرابط واذهب به للبحث أعلى الصفحة
وعلى اية حال الموقع موجود على مدوناتى فى بداية العمود الجانبى
مع خالص تحياتى
أمل فتحى عزت

mr_raafat يقول...

ياعم فشكول المثل بيقول اذا لم تستحي فاصنع ما شئت الولاد اليومين دول معدومين من الاحساس وفاضين من جوه ولا فيه رابط ولا ضابط لأن الأب داير في الساقية والأم بترجع الساعة اتنين الضهر ولا حد بيعلم ولا حد بيعرف ايه الأصول لأن احنا في مولد سيدي المحظوظ الله يحظه ويجعله عامر دمت لنا بألف خير والله نفسي اتعرف عليك

الازهرى يقول...

العزيز فشكول

للاسف مشكلة الكثيرين فى هذا الجيل هو انعدام القدوة والفراغ الثقافى العام الذى ادى الى خلق ثقافة بديلة
والتغنى بمفرداتها التى لا تتفق مع اى من قيمنا

ملاحظتك للاحداث جيدة وتشى بروح فنية عالية

تحياتى

محمد فاروق الشاذلى يقول...

أستاذنا العزيز فشكول
زى ما كان حبكم زمان اللى بالودن بس فى نظر أهاليكم والجيل اللى سابق عليكم كان ده من وجهة نظرهم قلة أدب.
لكن ما بمنعش إن اللى بيحصل دلوقتى أكتر من قلة الأدب بكتير.
مرة خدت رقية ومامتها نتمشى شوية على الكورنيش زى زمان وبعد ربع ساعة خدتهم وروحت من اللى كان بيحصل حوالينا.
ربنا يستر علينا

Mahdi Mahdi يقول...

اخى . fashkool
السلام عليكم ورحمة الله وبركاته
لست من علماء الدين ، ولا ادافع عن الاسلام ، والدين لا يحتاج لمدافع ، والدين الاسلامى ارفع من طرحه فى المدونات ، ولكن اعرض التناقض في عقيدتهم وانا على حق ، واعلم ان السفيه لا يرتدع الا بتعريته ، ساعتها سيندم انه لم يغتنم عفة لسان المسلم ، وجنت على نفسها براكش
والسلام عليكم ورحمة الله

mr_raafat يقول...

مشكور يا عمنا علي الاهتمام
ونتقابل في الاستاد العصر

Unknown يقول...

استاذى انا ما قدرش انسى حضرتك ابداً
بس الناس يوم الاربع بيبقوا مشغولين جدا
يا ريت نخليها الجمعة
ان شاء الله تبقى الجمعة الى بعد الجاية ان شاء اللة يكون الناس عملوا حسابهم ونكون خبرناهم
الساعة 3 عصرا باذن الله
لو فى تعليق على المعاد
ياريت حضرتك تبلغنا

Unknown يقول...

استاذى اسف
ان شاء الله الاجتماع يوم الجمعه القادمة القادمة مش بعد القادمة
الساعة 3 عصرا بالاستاد ان شاء اللة وسيتم اعلام المدونين وفقا لهذا الميعاد
تحياتى
الجمعة القادمة 21/11/2008
انشاء الله
القاكم هناك

"أم أدهم المصرية" يقول...

السلام عليكم ورحمهالله وبركاته
----------------------------
ايييييييييييه
ياعمو فشكول انا لحد مخلصت البوست وانا عايشه انى معاك فى القطر

صراحه اسلوب جميل جدا وسرد للاحداث اكتر من رائع بس للاسف الاحداث نفسها متسرش لاعدو ولا حبيب

بنات عبيطه وشبان اعبط والمحترم لازم يلقط منهم اى حاجه بحكم من عاشر القوم
وفى النهايه كله بيلعب على كله ولا حد بيحب حد ولا اصلا عارفين يعنى ايه حب
البت ترسم على الشاب عشان عاوزه تتجوز

وهو يرسم عليها ويثبتها لانه عارف انها عاوزه تتجوز والمعلم بيلعب لمصلحته عايش ومقضى وساعه الجد

اصل الظروف صعبه
وربنا انا بحبك وعاوزك بس اعمل ايه ظروفى صعبه وتعيط البنت وممكن هو كمان

عشان يمثل الدور بتاعه
وتنتهى الليله

وتدور على اهبل يصدقها وهو يدور على عبيطه ترسم عليه

عمو فشكوول ياريت تركب القطر تانى بس المره الجايه زعق للكل اكيد هيحترموا نفسهم

اصل صراحه وبينى وبينك كده فى السر على الرغم من انه احنا جيل اغلبنا ضايع ومكبر ويبان فاقد

الا من رحم ربى
بسلسه فينا حته احترام الكبير

جرب تانى واحكيلنا

تحياتى /لؤلؤه الرحمن

بس خلاص ... يقول...

أ. فشكول ... الرحلة الجايه انا مستنياك فى قطر الصعيد
هتعرفنى... هتلاقى حاجة كده ادامك ..... ولا اقولك خليها مفاجأةاحسن

مذكرات كشكول المورق يقول...

تحية طيبة ياعمو فشكول :)
أتمنى انك تكون بخير.
ـــــــــــــ
ياعم فشكول من كان بالأمس مراهق اليوم هو أب أى أنه سيربى ولده ليس على ماتربى عليه تحديدا ولكن لابد للماضى من تأثير على الشخصية.
وبشأن مايحدث فى القطارات ااااه مما يحدث انها قصص وحكايات وروايات وحركات عديدة كنت أراها كل يوم لمدة سنوات ،وليس القطار فحسب بل الجامعات والمدارس وفى كل مكان.
لعلك طرحت عدة نقاط إجتماعية داخل عرضك هذا.
أولا عدم إنضباط ميعاد القطار وأيضا من سيستقلونه هم أيضا غير مهتمين بمبدأ الإنضباط وقد ظهر جليا حين ذكرت إرتداء الشاب للحظاظة بدلا من الساعة.
ثانيا:سوء الإختيار
سؤال لكل شخص مسئول هل علمت ذويك معنى فلسفة الإختيار وكيف تختار؟؟
بالطبع ستكون الغلبة لكلمة "لا".
ثالثا:إثقال كاهل الحب والمشاعر بأشياء لم تكن يوما عنوانا للحب،وربما هذان الشبان (الفتاة والولد)غير مرتبطان عاطفيا ومابينهم مجرد زمالة فى الجامعة وأيديهم واخدة على بعض شوية :(
نكتفى بهذا القدر حتى لاتتفشكل الفشكلة ويطردنا عم فشكول :)
خالص تحياتى؛

شمس النهار يقول...

ماهو ده زمن التيك اواي
وكل زمن وله مظاهره
بس انت اكيد كنت في قطر رحلة جامعيه العيال دي كانت رايحه فين علي الصبح

عُمر يقول...

أنا دايماً فاكرك

مع السلامة

:)

Unknown يقول...

أخى الفاضل
تقبل مرورى وتقديرى واحترامى

بس خلاص ... يقول...

استاذ فشكول يسعدنى ويشرفنى ان اكون مذيعه واستضيف شخصيه عظيمه زى حضرتك.. انا كده دخلت التاريخ من اوسع ابوابه...
بس انا مذيعه رغايه مش هديك فرصه تقول وووولاكلمه هفضل اتكلم وبغبغ لحدماتقولى
بس خلاااااص
اوافق على الفكرة
بس ياريت تدخل كحيان افندى فى الموضوع
ربنا يخليك للكحيانيين امثالنا(ده مجرد اقتراح )

mahasen saber يقول...

مكان يا استاذ فشكول محود وصلك اسكندريه احسن بالعربيه
يعنى ديتها كلمتين كمان فى العضم وكان الامريكانى اخدكوا جرى على اسكندريه عدل

بس كويس اهه النتيجه اننا استمتعنا بالبوست الجميل ده

وحي القلم يقول...

هي دي مصر يا عم فشكوول ولا عزاء للمغفلين