الثلاثاء، ١٨ نوفمبر ٢٠٠٨



فشكول .. فيلسوفا
جائت اذاعة الشرق الاوسط عشان تسجل مع فشكول حديث اذاعى باعتباره حكيما وفيلسوفا واخبروا فشكول بذلك مقدما بمكالمه تليفونيه .. قوم ايه ... فشكول عنده جلابيه بيضه حلوه من اللى بيجيبوها من السعوديه .. قوم ايه فشكول لبس الجلابيه وبص فى المرايه .. يا ترى شكلك كده حكيم يا فشكول ... فشكول لقى الموضوع مش متظبط ... يعمل ايه ... فشكول ... قصدى الحكيم فشكول عنده برضه عبايه شتوى برضه جايه من السعوديه .. فشكول لبس العبايه ووقف قدام المرايه ... برضه الموضوع مش مظبط ... يعمل ايه فشكول ... فيه حاجه ناقصه ... جه فشكول نط بلانص فى الكمبيوتر ولقى غواصه فى البحر بتاع الكمبيوتر ... جه داخل جوه الغواصه سرقه ... اتاريها النت وهو مش عارف .. بعدين الحكيم .. قصدى فشكول .. لا قصدى الفيلسوف قال للنت يانت ضور لى على امحوتب المصرى ... الى هو الأتى فى سلام ... قوم النت جاب له امحوتب ... فشكول اتفرج على امحوتب ولقى شكله باين عليه الحكمه والفلسفه والطب .. طب ماهو فشكول كان لابس زيه بالضبط ... ايه بقى اللى ناقص ... وايه اللى فيك زياده يا أمحوتب .... أأأأه .. فشكول اكتشف ان امحوتب لابس قلنسوه على رأسه .... فعلا هى دى اللى ناقصه .. قوم ايه فشكول جه خاطف القلنسوه من على راس امحوتب وطلع يجرى وقام عامل بلانص وطلع من البحر وجه لابس القلنسوه وباصص فى المرايه ... اه كده مظبوط .. بعدين فشكول بقى فعلا حكيم .. هما الحكماء احسن منى فى ايه وايه يعنى الفلاسفه دول ما أنا كمان اعرف اتفلفس وبعدين قعد منبعج وعجبته الفكره وجلس على الكنبه وعاش الدور
دخلت مذيعة وقالت السلام عليكم ايها الفيلسوف .. عليكم من السلام .. انت مين يا شابه ؟ قاله انا ( بس خلاص ) ايه يا اختى بس خلاص هو احنا لسه ابتدينا عشان نبس خلاص يا بنتى انت اسمك ايه .. انا بس خلاص .. ماشى روحى بقى مش عايزين النهارده .. يا فيلسوف انا اسمى بس خلاص .. فشكول يعنى انت اسمك بس وابوك اسمه خلاص ... أى نعم .. يابنتى كنت بحسبك (هس فنش) حكيم بقى .. وسمح لها فشكول بالعمل وبدأت فى التقديم للبرنامج
كان لى صديق فيلسوف . باقوال الحكماء شغوف فقلت له يافيلسوف هل لى فى بيان منبع الحكمه واصل الفلسفه ؟
فشكول يرد فى تؤده متصنعا صوت الحكمه : يا بنيتى أصل الحكمه من أفواه المجانين ومنبع الفلسفه فى حديث الجوعانين
بس خلاص : احسنت يا سيدى الفيلسوف : وهل لى ان اسألك اسئلة اخرى
سلى ما شئت يا بنيتى فانا الليه عندى كثير من الحكمه ولكن يابنيتى اوجزى فى سؤالك فانا وقتى للحكمه ومن الحكمه وهنا تدخل زميلها فى البرنامج الكحيان وسأل : قل لى يا فيلسوف ما سر لباسك هذا وهل له شأن فى الحكمه والفلسفه؟
فشكول الحكيم : يا بنى .. يا بنيتى الجلباب الابيض لونه نقى ويعطى النقاء وهو صينى .. والصينيون قديما اخترعوا الحكمه وحديثا صعدوا للفضاء .. اما العباءه يا كحيان فعندما تمتلأ الرأس بالحكمه ويكون هناك فائض يمكن ان نفرش للفائض الملايه .. اقصد العباءه وهى صينى ايضا.. وأما القلنسوه يا بنيتى يا
هس ولا كلمه فعندما يمتلأ الرأس بالحكمه تكون وسعه وحتى لا تتفرفط الفلسفه من الرأس وهى ايضا صينى .. والسجاده التى امامكم اذا فرغت الحكمه وضاعت العقول انوى الصلاة عليها .. وهى ايضا صينى .. واما السجاده التى نجلس عليها وهى بالشيئ الفلانى عشان تحوش التراب عننا هى ايضا صينى وكل ما يقع ناظركم عليه صينى
أترون يا بنيتى ويا بنى الكحيان كم عند الصينيين من الحكمه والفلسفه والبلاغه .. وكم عندنا من البلاده والبلاهه
قالت بس خلاص : ولكن قل لى يا فيلسوف ما هو البدنجان ؟
اطرق الفيلسوف قليلا يفكر ويحاول الاجابه على السؤال ويقلب فى عقله السؤال وخصوصا ان قاعد قدامه واحد رخم خبير بالتحليل واكيد عمال يحلل فى الفيلسوف وناوى يهريك تعليقات وتحليلات وقال
:
للبدنجان يابنيتى اكتر من نوع واوله : البدنجان المحشى وهو لونه ابيض ونحشى فيه همومنا مع الرز المسوس بتاع التموين وفيه فوائد كثيره - هو يحشى البطن ويملأ الحله عن أخرها وبنضحك بيه على العيال ونعمل معاه تنتوفة لحمه وله لونان اسود زى ايامكم ولون ابيض عشان يحسسوكم بالايام البيضاء القادمه التى لن تقبل ابدا
ثانيا البدنجان الاسود .. ويسمونه .. الطبخه السوده والمهببه.. ومنه المسقعه ومنه الطبيخ بالتقليه ومنه تفريعات كثيره وهو اسود زى ايامكم ومهبب بهباب برضه زى ايامكم المهببه بهباب واللى مش حتشوفوا فيها حاجه حلوه خالص زى اللى سبقوكم
ثالثا : البرنجان : ويشتق منه البرنجان المشوى والبرنجان المقلى والبرنجان المخلل
رابعا : الباجنجان : وهو يا بنيتى الثمره السوده الكبيره الحجم وفيها من الداخل بذر وحاجات كتيره منيله بنيله برضه زى الايام دى
قال الكحيان : افادك الله يا فشكول : ولكن قل لى عن مصر قديما وحديثا ( انا مش بحب الواد المذيع اللى معاكى دا يا اسكت هس الواد الكحيان دا عامل لى زى العقله فى الزور) قالت اسكت هس اقصد بس خلاص : خليك معايا يا سيدى الفيلسوف : قلت لا هو انا مش حاعرف ارد عليه ولا ايه تعالى يا بنى
خد عندك يا بنى - هناك مصر الجديده - وهناك مصر القديمه - وهناك مصر العليا - وهناك مصر السفلى وهناك مصر الفرعونيه .. كم من حديث عن مصر يا بنى ويا بنيتى وكم من مجد كان
قال : ولكن لم تقل لى عن مصر الحديثه
فشكول فى زهول منتفضا وانزعر من السؤال : اين مصر الحديث دى يا استاذ : هل هى بعد الاتوستراد ام قبل الدائرى فقال المذيع يا سيدى اقصد مصر التاريخ الحديث : فزاد فشكول اقصد الفيلسوف من حيرته وقال يا بنى : اخر عهدى عن مصر التتار ايام قطز ودولة المماليك الشرقيه .. انا خايف الواد ده يقول لا مش المماليك الشرقيه .. دول المماليك الغربيه والا الجراكسه .. يا عم كحيان فوت كانت مصر يا بنى تتلالأ على ضفاف التاريخ وايضا على ضفاف النيل أما بعد ذلك فلا وكل ما نعرفه نحن كل الفلاسفه والحكماء والنبهاء ما ذكر ولا زياده وبدأ الفيلسوف يحتد فى كلامه .. اى بنيتى .. اى ابنى ..من منا الحكيم انا ام انتم؟ انا الفيلسوف واعرف اكثر منكم .. بنيتى ان اسئلتك الليله ليس لها جواب
فادركت هس فنش - اقصد بس خلاص المأزق التى وقعت فيه وقالت ملطفه
لا عليك يا فيلسوف ولكن اذكرك بامجاد الحاضر ... هل سمعت عن نجيب محفوظ...؟
الفيلسوف ... أه ... بتاع الثلاثيه .... بين القصرين ... وقصر الشوق ... والسكريه ... واحمد عبد الجواد ... وايضا بتاع رواية ولاد حارتنا .. انه يا بنيتى زميل لنا حكيم وفيلسوف ولا يعرف هو ايضا اكثر مما نعرف
يا سيدى الفيلسوف : هناك ايضا أحمد زويل
الفيلسوف : أه ... اعرف احمد زويل ... الامريكانى .. نعم هو مصرى .. ولكنه اخذ نوبل بعلم امريكانى وبجنيسه امريكانى والنبى هو لو كان هنا كان زمانه بيحاول يعمل كتاب ويبيعه عشان ياكل عيش هو وعياله
بس خلاص : اصبت يا سيدى الفيلسوف : وماذا عن الكوسه
هدأ الفيلسوف قليلا وجلس منبعجا على اريكته وقال
فشكول ... اقصد الفيلسوف فشكول:
بنيتى : اعرف عن الكوسه الكثير : وهل يعرف عن الكوسه الا انا : انها نبات مصرى يزرع فى جميع انحاء مصر واذا لم توجد ارض يزرع فيها فانه ينبت حتى فى صالونات البيوت او فى غرف النوم او فى اى مكان او فى الهواء وتجديه دائما فى الدواوين والمجالس وتلاقى الناس الكويسين هما اللى بياكلوا منه بس هناك ايضا القرع ... وهو نبات الكوسه عندما يكبرونحن يا بنيتى لا نترك من الكوسه شئ لا نأكله فنأكله مطبوخا ومحشيا ونأكله قرعا واذا كبر جدا وشاخ نأكل لبه .. فنحن قرعجيه بطبيعتنا ونوزع منه اريجه على الناس الكويسين اما الوحشين لأ وانا وانت والمعازيم ونقرع به على بعضنا ومنا القرعجى ومنا المكوس وهناك ايضا قرع العسل وممكن نحط السم فيه للى ما بنحبوش وما ياخدش باله وهو يأكله لحلاوته وطلاوته ونصدر منه للخارج ... كوسة وقرعا .. ولكن قل من يعمل به بالخارج ولذلك هو وكسه علينا وعلى اللى خلفونا
المذيع الكحيان يفقع فشكول السؤال التالى : يا بنى ابعد عنى .. يا بنى سيبنى فى حالى : ؟
قل لى يا سيدى .. ما العرب
مش قلت لك يا بنى سيبنى فى حالى لكن استعنا على الشقى بيك يا رب ... وهرش الحكيم فشكول رأسه متعجبا من السؤال : اننى الفيلسوف يا بنى .. فما العرب الذى تتكلم عنهم يقول .. اقصد بلاد العرب يا سيدى .. مش قلت لكم أهو دا اللى بيحط السم فى قرع العسل .. ومع ذلك يا كحيان لن ادعك تهزأ بى وقال الفيلسوف
تقصد بلاد العرب من الخليج الى المحيط .. بلاد العرب اوطانى ...اليس كذلك ؟ الكحيان نعم يا سيدى
الحكيم الفشكول : يا بنى هؤلاء يا بنى شعوب ماتت وذهبت ادراج الرياح واصبحت تاريخا ... يا بنيتى .. يا بنى لقد ذهبوا كالهنود الحمر .. وقبائلها الكومانش والآباش يا بنى لقد اندحروا وذهب ريحهم
الكحيان : وما السبب يا سيدى : برضه انت !!!!!؟ سؤالك ليس له رد
بس خلاص ..وما العدس وما الفول يا سيدى؟ فشكول منشكحا يقول فى سره . آى كدا البناتات الحلوين يتكلموا احسن
يا بنيتى .. يا بنيتى ... يا بنيتى .. كانوا فى الماضى طعام الحمير والفقراء .. اما الان، فكيلو العدس بـ 12 جنيه وكيلو الفول بـ 8 جنيه .. ما ذا أقول لكم .. اقول لكم يا خلق هووووووى لم نعد نجد ما نأكله سواء من العدس او الفول والحمير اسعد منا حظا
بس خلاص : سيدى الفيلسوف ما معنى باراك اوباما :
بنيتى .. باراك تعنى فى العبريه المبارك أو المبروك .. شوفى هى قريبه من كلمه مبروك واوباما من البومه اللى هى اخت الحدأه اللى ما بترميش كتاكيت
وهل هناك علاقه بين باراك اوباما و... باراك ... اقصد ايهود باراك
بنيتى .. هذا امر شرحه يطول وانا الليله مشغول .. قوموا بقى روحوا كفايه عليكو كدا حتودونا فى ستين داهيه
بس خلاص : اذن الى الغد يا فيلسوف لأحاورك واناورك واسألك
وهنا هاج فشكول وماج واخذ يقول بأعلى صوته ... يا بنيتى لا تذكرى اى مرادف لكلمه احاور او محاور او مناوره او مراوغه لأننى انزعج من هذه الكلمه وخصوصا كلمة المحاور .. مش كفايه على يا اختى عمال اسمعها فى كل مناسبه ولا تذكرى ايضا المحور ولا الدائرى وخلافه .. كمان بطلى تكونى محاوره رخمه انت كمان انا بقى بييجى لى ارتكاريا من المحاور والمحاورين الرخمين اللى بيسألوا : وقام الرجل وخلع القلنسوه وقذف بها فى الارض وخلع ايضا العباءه واخذ يتحرك فى أرجاء الغرفه ويهذى بكلمات غير مفهومه ... الراجل اتجنن
وقامت هى والكحيان خلسه وخرجوا من الباب دون ان يحس بهم فشكول

هناك ٥٥ تعليقًا:

اقصوصه يقول...

looooool

فشكول شكله كان في ورطه

يا ترى فشكول هو بس في ورطه

والا كل الناس المتفشكلين؟

مدام الفول والعدس هذا سعرهم

يا ترى شو ممكن عامة الشعب ياكلون؟

ممكن نفكر باشيا جديده

مثلا ورق الشجر

الريجان..الرويد..الجرجير

والافضل نتحول من نباتيين

الى هوائيين!

تدوينة بابا فشكول جميله

على فكره بابا فشكول

ما انزل تدوينه جديده

الا ببداية كل اسبووع:)

دمت بحفظ الله

يا رب اول تعليق :)

حاجــ عيال ــات يقول...

السلام عليكم
وكما يقول الجماعه المدونين
هييييييييه لحقت تاني تعليق مش عارفة ليه هم بيقلوا هييييييه
المهم ياعمو الفشكول
مبروك القلنسوة بتاعت امنحوتب
ومبروك الاذاعه طبعا تلاقيها انشهرت بسبب اللقاء اللي عملته معاك
والعدس والبتنجان ذكرتهم في كلامك كمان
طيب كنت جيب سيرتي بأي حاجة ..ان شاالله حتى تقول ان الكيلو مني بخمسة يورو
يالا ملحوقة المرة اللي جاية
بس على فكرة تدوينتك لها طعم تاني
ماتغبش عننا
جهاد مشالي

رئيس التحرير يقول...

صباح الخير
انت تحمد ربنا ان رئيس التحرير في اجازه وباين عليه مش راجع تاني.
وهيييه تالت تعليق (حاجات عيال ) عملت كده.
هو الكحيان اشتغل في التلفزيون؟
وبس خلاص وووولا يهمك
بيشتغلوا مع بعض.

mohamed ghalia يقول...

ماشى ياعمى الحكيم
يا بنيتى أصل الحكمه من أفواه المجانين ومنبع الفلسفه فى حديث الجوعانين
قلى يا حكيم الزمان هل فعلا زى ما ورد فى بعض الروايات إنى سيدنا يوسف تزوج إمرأة العزيز بعد كده
تحياتى

مهرة سالم يقول...

أيها الحكيم فشكول.....
لقد تفلسفت حتى فلس رأسي من ما فيه...
طيب ليه كده ...
كله صيني بصيني...
جرب الكوري ..
أرخص برضو..
ههههههه
.....................
أسلوبك بالكتابه يحملني على البكاء والضحك معا...
هو إنته كده زي
قرع العسل....
.................
أشاطرك ذات الرأي أستاذي ..
لما نفخر بمن ينجزون إنجازات مهمه
مسجله بإسم بلد غير بلدنا
........
هل سنظل دوما نتوقف عند
كنا ...
هنا أختلف معك..
قد لا تكون إنجازاتنا الحاضره ذا شأن مهم كما كانت بالسابق ..
ولاكن تظل تبعث الأمل دوما في قلوب الجيل القادم...الذي ربما يفاخر بماضيه وحاضره...
.............
دمت بخير

من غير عنـــوان يقول...

فشكول ده باين عليه مش حايجيبها البر

رائع


تحياتي

mr_raafat يقول...

" فشكول الحكيم "
غبت علينا ووحشتنا ووحشنا كلامك الجميل وتعبيراتك الرائعة .
- كل حاجة بقت صيني في صيني ودا صحيح بس احنا مسؤلين عن دا كمان بشكل أو بآخر
..........
- أما الشعوب العربية فاسمح لي هي لم تمت فالشعوب لا تموت بل قد تتحمل ولكن عند الوقت المناسب تتحرك .
..............
- أصبحت أكره كنا وكانوا وأريد أن أسمع أصبحنا وفعلنا وتمكنا وارتقينا ، عندي أمل كبير جداً بأن هذا اليوم بات قريبا " ضاقت ولما استحكمت حلقاتها فرجت وكنت أظنها لا تفرج "
................
وأخيرا أمة لها تاريخ مثلنا بلإذن الله المستقبل لها .
" الحكيم فشكول "
ابعث فينا الأمل فأنت رمز للصمود والحكمة
تقبل تحياتي ودمت بألف صحة

أحــوال الهـوي يقول...

انا مش قلت لك ان بكون حذر مع اصحاب الاقلام الساخرة
مقال مبدع له رد مقنع عن تسالات قد تبدو سطحيه و لكنها في منتهي الخطورة
بدا من الصين الي امريكا مرورا بالعرب


فما الفرق بين بارك اوباما و ايهود بارك و حسني مبارك
انا عارف الشئ المشترك بينهم كلمة
مبارك
تعرف تقوللي الفرق

تحياتي

مفكر يقول...

هههههههههههههه

فشكول دة عجب

احنا لازم نعمل كتاب اسمه مغامرات فشكول

تحياتي يا فيلسوف الكوسة البتنجان

طيب ليه ساندوتش الفول لما بيحطو عليه طماطم مقطعة بيسموه فول بالأوطة مش فول بالطماطم،،،عايزين نعرف "محور" نظرك في الحكاية دي يا فيلسوفنا؟

سلامات

ن يقول...

السلام عليكم
واضح إنك أتصدمت زي ما أنا أتصدمت أصل الحقائق فى الزمان ده صدمة لأننا عايشين بنحاول نصدق ال مش ممكن يتصدق ومع كدة بنصدق
أنا أصلى قابلت حكيم يعنى ال بيقولوا عليهم فلاسفة قعد يقول حكمته للناس سنين وسنين .. قامت الناس حدفتوا بالطوب والزجاج المكسور عاوزين يعوروه واستخسروا يحدفوه بالطماطم والبيض علشانه غلوا فى الاسعارومحدش لاقى يأكل فى هذا الزمان .. لكن الحكيم قالهم خذوا حكمتى هطلعوا بيها كنوز هتغتنوا وتعرفوا إزاى تزرعوا وتحصدوا أصل العلم بدايته هنا مش فى مكان تانى .. لكن الناس برضه مفهمتش بتحتاج سنين وسنين علشان تفهم وال بيفهم يعتبروه لئيم وعميل وبردوا يحدفوه بس المرة دى حدفوا الحكيم بالطين أصلهم لا لاقوا طوب ولا زجاج آم الحكيم بص على الطين وقال بيحدفونى بالخير وهما مش عارفين ومش فاهمين
قلت له .. يا سيدنا الحكيم أنا شايفة إن كتير من البلاد بتعرض عليك ملايين وبتقولك تعالى هنديقلك قصر وسرير حرير فحرير يعنى انت غاوى تقعد هنا تتحدف بالطين
ابتسم الحكيم وقال ..البلاددى علينا بتنادى لأنها عاوزة الاولاد والطين وما دام ولادى لسة بيحدفونى بطين يبقى لسة مش حاسين .. وهفضل أنادى تعالوا ياولادى نحافظ على الطين ونرجع ونجرب مع بعض نزرع حكايات الماضى الجليلل .
الله يكون فى عونك يا حكيم.

فشكووول يقول...
أزال المؤلف هذا التعليق.
فشكووول يقول...

اقصوصه : ابنتى الحبيبه
والله يا بنيتى اليومين دول كل الناس فى ورطه ولا حد حاسس بيهم

حاجات عيال العزيزه
مبروك ثانى تعليق وطبعا احنا اتفقنا ان حنعمل عمل مع بعض بس فكرته لسه ما جاتش وان شاء الله اما تيجى نعمل على طول

أهلا حبيبى صاحب العزبه
اصل انا قلت انت مش حتوافق على النشر وحترفضه قمت منزله .. على فكره الكحيان وبس خلاص لسه ما جوش وما يعرفوش حاجه

العزيز محمد غال
انت دايما مشرفنى ورافع راسى بزياراتك المتكرره .. اشكرك على تعليقك وفى اكثر الاقوال ان امرأة العزيز تزوجت يوسف عليه السلام بعد موت اطفير بن روحيب زوجها والعزيز السابق ليوسف

الجميله mk
زياراتك لى تاج على رأسى .. اشكرك جدا
يا بنيتى تصورى الجلباب والسجاده والتى لا يرتديها ولا يصلى عليها الا العرب والمسلمين فشلنا نحن فى صنعهما صناعة جيده ونجحوا هم .. شفت الخيبه بالويبه وكمان السبح
اما الصناعه الكوريه هى فعلا احسن من الصناعه الصينيه ... بس هى فين مش موجوده كتير فى مصر
وسنظل نقول كنا طوال ما احنا بنتحكم بالحديد والنار ولا أمل يا بنيتى .. لا أمل الا بزوال حكام الحديد والنار

العزيز من غير عنوان
والله انت عندك حق .. بس تعمل ايه يموت الزمار وصوابعه بتلعب

يا عزيزى يا مستر رأفت
نحن يا عزيزى لسنا مسئولين عن اى شيئ ولا تصدق تصدير المسئوليه علينا لاننا احنا بنخلف كتير وما بنشتغلش واحنا شعب كسول .. لا تصدق هذا .. هذا يا عزيزى تصدير للمسئوليه لتبرير الفشل
اما بالنسبه للشعوب العربيه والحضارات العربيه القديمه واللى وجعوا دماغنا بيها .. يا عالم كل العالم عنده حضارات تساوى ان لم تزيد عن الحضارات العربيه .. وانا عندى الكثير لاذكره ولكن ليس هذا مجاله .. كل الشعوب لها ماضى جميل .. مش لازم العرب يكونوا سادة الحضارات .. لماذا .. حتى لو كانوا .. اين هم الآن .. ولا اطيق سماع نظريات المؤامره وان العالم لا يريدنا متحضرين ولا .. ولا .. لا يا ساده من لا يريد هو نحن
ويا اخى يا عرب يا مسلمين والله انا عايز العرب اعظم شعوب الارض .. ايش خاطرك يا اعمى .. يقول الاعمى .. عايز قفة عيون اشوف بيها

يا عم احوال يا دكتور
الله يسترك .. بلاش الكلام اللى على مفتوح .. ما فيش فرق بين حد وحد .. كل الناس الحلويين زى بعض .. وكل الناس الوحشين زى بعض .. يا عم الله يسترك عديها على خير .. تحياتى

الواد المفكر واد فكهى قوى
اول ما قريت التعليق بتاعه ما قدرتش امسك نفسى من الضحك - حتى العيال طلعوا يشوفوا ابوهم ميت من الضحك
ليه .. اشكرك يا مفكر .

العزيزه ن
يا بنيتى يقول المثل : مغناوى البلد ما يحظهاش وحكيم البلد ما حدش يسمع كلامه .. قول مشهور والله يمكن يكون بجد

Unknown يقول...

عم فشكوووول
فين حضرتك
معانا ان شاء اللة يوم الجمعة
انا اتصلت بحضرتك لكن لم تكن موجود

mr_raafat يقول...

" الحكيم فشكول "

أستاذي الغالي : الذي كلما رأيت صورته علي مدونتي أفرح وعندما أري تعليقاته أسعد وعندما أقرأها تثبت وجهة نظري بأننا نسير في الطريق الصحيح
- لا يوجد خلاف في وجهة النظر ، وقد قصدت بأننا مسئولين أي أننا جزء من هذا ويجب أن يكون لنا دور في التغيير تربيتنا لأولادنا جزء من المسئولية اهتمامنا بعملنا والإبداع فيه جزء من مسئوليتنا زرع حب بلدنا في نفوس أبنائنا جزء من المسئولية ...
أما عن الحضارات فأنا مع سيادتك ولكني أنظر علي أنها نبراس ينير لنا الطريق ومن ليس له ماض ليس له حاضر ولا مستقبل ..
- كل ما سبق هو شعور بالمسئولية لأنني جزء من كل ليس إلا .
مع خالص ودي وتحياتي لعمنا " الحكيم فشكول "

Dr. Ibrahim يقول...

قرعجية بالوراثة

ونصدر منه للخارج..

شكرا لك على هذا الحوار الساخن

د إبراهيم

أحــوال الهـوي يقول...

fashkool
عمنا و سيدنا
من بركاتك ازيدنا و لا تفشكلنا
تفلسفت بجلباب صيني من السعوديه و ياريت صيني من مصر فين الانتماء

هو انا ناصح علشان انصح ده نوع من التدعيم المعنوي لروحين تلاقوا قبل ان يتلاقوا و قلبين اختاروا اصعب الطرق للحب وكمان انا عندي فرصتين احضر فرحهم و غيري ما عندوش الافرصه واحده

تحياتي

أحــوال الهـوي يقول...
أزال المؤلف هذا التعليق.
Unknown يقول...

انزعجت أول الأمر من طول المقال
ولكن تشجعت وبدأت فى القراءة
وتدريجياً وجدت نفسى أغوص مع الكلمات
وأتعايش مع الأحداث وأخذتنى معها فى بانوراما تتشكل داخلها جراح أمة
ووجدت نفسى فجأة عند آخر كلمة
ولكن أصابنى شئ .. ماهو لاأعرف
ولكن شعرت أنه من الحكمة ألا تكون حكيماً
ولاتخاطب الحكماء .. فما أحلى أن تعيش فى جنة الجهل ولا تكتوى بنار الحكمة خاصة فى هذا الزمان ..زمن البتنجان والكوسة التى تزرع فى كل مكان

شمس النهار يقول...

لاتمام كده
نسيب التاريخ وننقل علي الفلسفه
ماشي

الكحيان يقول...
أزال المؤلف هذا التعليق.
الكحيان يقول...

تاريخ مصرالحديثة..كوسة..صيني..عرب..حمير.. باذنجان..باراك..فول.. عدس إيه الحكاية ياعم فشكول؟ خير كفى الله الشر ؟أي نعم الباذنجان عديم القيمة الغذائية يسبب البلاهةوالعته والجنون لكنه يشفى من أمراض خطيرة، لذا يحرص الكحيانون عليه،فأرجو ألا تتعرض له مرة أخرى بسوء، والعرب قديما أطلقوا عليه اسم الوغد مش عارف ليه. وعلى فكرة ياعم فشكول الباذنجان كان ابن ناس في يوم من الأيام لأنه سليل الأسرة التفاحية فهو من نسل تفاح باشا لكن الأيام دول وسياسيات الخصخصة والتعويم والفشكلة جابته الأرض،فارحموا عزيز قوم ذل.أما عن الكوسة فهي فاكهة مصرية أصيلة حتى إن المؤرخ عبد اللطيف البغدادي ذكرها في رحلته إلى مصر من 800سنة تقريبا وكل الكلمات المشتقة من كلمة ( ك.و.س) في المعاجم معناها مش كويس خالص وياريتك تبعد عن سيرة الكوسة خالص ولله در القائل:
مصر يابلد العجايب فيك حاجة محيراني
نزرع القمح في سنين تطلع الكوسة في ثواني .
وأما الفول والعدس فهو من بركات اليهود الله يلعنهم فقد كان الله يطعمهم المن والسلوى يعني لحمة وحاجات حلوة من غير كد ولا تعب فلما زهق هؤلاء الأنجاس المناكيد طلبوا من ربنا فول وعدس مزاج عكر ( وإذ قلتم ياموسى لن نصبر على طعام واحد فادع لنا ربك يخرج لنا مما تنبت الأرض من بقلها وقثائها وفومها وعدسها وبصلها ) وطبعا اخترعنا نحن المصريين من البصل والفوم (الثوم) والبقل مانسميه الآن بالطعمية... الله يلعنهم .سؤال أخير ياعم فشكول ... ما العلاقة بين الكباري والمجاري، وما صلة الخطة الخمسية بخطة نابليون أفيدونا أفادكم الله ... وطبعا أنا أشكر الأخت بس خلاص على تكريمها لي واختيارها لي مذيعا ؛ لكن قولي ياعم فشكول مين مذيع التلفزيون الرخم اللي أنا بفكرك بيه ؟ فشكلة رائعة ياعم فشكول . مع تحياتي

كاميليا بهاء الدين يقول...

ياله من حكيم
تخرج الحكمة منه مترنحة فى ثوب الفكاهة
يذكرنى بالحكيم حجا
وفكاهاته المليئة بالحكم المزونة

احييك بشدة
تحية مصرى
مش صينى


كل الاحترام

فشكووول يقول...

الابن احمد بدر الدين
ان شاء الله معاكم وانا رحت عندك وقلت لك كده .. وما علهش عشان انا الاسبوع ده كثير السفر ومش عارف افضى للكمبيوتر لكن معاكم .. تحياتى

استاذنا رأفت بتاع الجغرافيا
تصدق ان الجغرافيا دى علم لذيذ وانا بحبه .. وعلى فكره أنا قارئ للخرائط ممتاز واعرف اى بلد من اول مره ابص فى الخريطه لان الخريطه بتقول كل حاجه بالرغم من انى محاسب وبتاع ارقام

دكتور ابراهيم :
اشكرك على زيارتك وارجو ان لا تنقطع بيننا الزيارات .. تحياتى

يا أحوال يا دكتور
نفسى اعرف يعنى ايه عندك فرصتين طب الفرصه الاولى وهى الفرح عارفينه .. طب والفرصه التانيه اييييييييه.. متهيأ لى لمه وناس كتير وهدوم سوده ومقرئين .. برضه فرح .. مش كدا ولا ايه؟

استاذنا محمد الجرايحى
عندى مقالات سابقه مضحكه ولذيذه يا ريت تيجى وتقرأها اصل احنا ورانا ايه غير الفكاهه

سيدتى شمس النهار
راجع للتاريخ ان شاء الله وبجهز للمهندس \ امحوتب \ اول مصمم للاهرامات واول مهندس نقل العالم من المبانى الطينيه للمبانى الحجريه - بس بحضر به كويس عشان ما اعملش فشكله فى الدنيا

الكحيان العظيم
يا بنى خف عنى .. يا بنى انا مش مطامن لك .. يا بنى الله يخليك سيبنى فى حالى .. انت وانا عارفين مين الرخم اللى فى التليفزيون وبصراحه انا جبان وخواف ومش اقول اسمه احسن تانى يوم يرفع على قضية سب وقذف .. هو انا اهبل

سيدتى العزيزه كاميليا من جرمانيا
تحياتى لك ولزوجك الكريم وقد باركت له ولك قبلا .. لك الف تحيه

mr_raafat يقول...

الحكيم فشكول ....

لك خالص تحياتي شيء يشرفني إن

أستاذنا فشكول بيحب الجغرافيا لأنه

علم دراسة الأرض والإنسان وفعلا

الخريطة من صورتها تقدر تعرف أيه اللي

مخبياه وصريحة جدا ذي أستاذنا فشكول

واضح وصريح وكمان فيلسوف ....

رئيس التحرير يقول...

كده برضه يا عم فشكول ليه دا انا بحبك
تقول ان صورتي زي صوره الكحيان ..طيب والنبي بص القمر ده الي فوق منور ...زي الكحيان الي راقد في التراب يدور علي ربع جنيه.

Mahdi Mahdi يقول...

لخى . fashkool
السلام عليكم ورحمة الله وبركاتة
بارك الله قيك ، عيسى وامه عليهما السلام مقدسان عندنا نحن المسلمون ولست كافرا فاتعدى حدود الادب فى الحديث عنهما ، و ما تمنيت ان اناقش معتقد المسيحيين فهذا شانهم وعليهم وذره ، لكن السفهاء منهم يذدادون تماديا وبطرق خبيثة منها دعوى الدفاع عن الاسلام ووقعت على جماعة تطلق على نفسها اسم انثى " امل "، وعرضت فى مقال لها باسم محمد وعيسى واوردت الفاظا نابية على لسان قمص مريض اسمه " زكريا " وادعت انها لم تجد ردا مقنعا على هذا القمص ولم تورد هى دفاعا ، ووجدت لها تفسيرا للقران عن قصة النبى سليمان عليه السلام ودعته بالملك ، تجاوزت فيه كل حدود الادب مع القران وتحدثت باسلوب ساخر ، اي دفاعا هذا ؟
حديثى عن يسوع المعبود كما سمعتهم يقولون " نعبد الاه الواحد واسمه الوحيد يسوع المسيح "
والسلام عليكم ورحمة الله

ن يقول...

السلام عليكم
الاستاذ /فشكول
شكراً على مرورك الكريم وأعتز برأيك سيدى وأكن لك كل الاحترام
كما أدعوك لمتابعة البوست الجديد
وهو حملة العلماء فى الرد على المشككين
وهذا للأهمية
مع خالص تحياتى

أحــوال الهـوي يقول...

fashkool
الفرصتين اللي اقصدهم
اني مصري و عايش في السعوديه يعني ممكن احضر فرحهم في مصر و السعوديه

تحياتي

Mahdi Mahdi يقول...

لخى . fashkool
السلام عليكم ورحمة الله وبركاتة
الحمدلله على نعمةالاسلام ، وعلى الرجولة
كنت انت ثانى تعليق فارسلت لك ردا ، غير انك حذفت التعليق من عندى ، فقلت في نفسى انا لله وانا اليه رجعون
وحمدت الله انك ارسلت ردا وبسرعة افهمنى ان الحذف كان بسبب معلومة دكرتها انت فى التعليق الاول تعرفها ولكن لم تجدها الان
الحمد لله فليتعلموا هذه هى اخلاق المسلم ، نرفض ان نقول معلومة غير موثقة وهم يغالطون ويزيفون ولا حياء
لله الحمد والشكر ولك تحياتى

Asmaa mahaba يقول...

كدا حيقولوا الفلسفه وراثيه يا خالو وحنتقفش قفشه جماعيه كويس كويس حنروح مارينا جمعاء بس مينسوش العيش والحلاوه

بس خلاص ... يقول...

تعقيب
وهكذااعزائى البلوجرية اجرينا حوارا كله ديمقراطيه مع الحكيم والفيلسوف وصاحب القريحة الالمعية اللى مالهاش اى دعوة بالعلمانية امنحتب الالف والعشرين مليون بعد الميه ... الشهير بفشكول البلوجرية .. اللى فشكل افكارهم وصحاهم على القرع والكوسة المحلية ...وجراهم وراه فى التاريخ من مئويه لمئويه ..ورأينا كيف استطاع ان يتعرف على الكحيان افندى رغم تخفيه فى الملابس الهنداويه , وحاوره وداوره وهرب من اسئلته التحليليه ....الامر الذى اثار الراى العام فى الشعوب الكحيانيه ... وجعل هناك ثورةعارمه على الفول والطعميه .. حتى لوكانت مقدمة فى اوانى صينيه ....
الامر الذى جعل رئيس التحرير يهددنا بالفصل نهائيا من الجريده الفوضويه ..
ولكن فشكول بك قال ...وووولايهمك وبكل حكمه قال يابنى انت وهيه .... انتم اتعينتم فى جريدة عدس لصاحبها باذنجان باشا اللى من العيله التفاحية صاحبة شعار ( القرع لما استوى قال للخيار يالوبيا ) ووعدنا بكل يقين وجديه .. انه سوف يحررالشعب الكحيانى من هذه الاكلات الشعبيه ... اللى بلانا بيها يهود موسى زى ماقال
زعيم الكحيانيه ... حتى لانزاحم الحيوانات فى اقواتهم الفوليه ...
ونحن فى انتظار تنفيذ هذا الوعد ... قبل ان يترك موقع المسئوليه
ادام الله بقاءه وقلل شقائه ..ونصره على اعدائه نصير الغلابه والكحيانية

ن يقول...

السلام عليكم
الاستاذ /فشكول
تحياتى الطيبة الى شخصك المحترم جزاك الله خيراً
أما بخصوص سؤالك على حملة الخسة التى يقودها هذا المدون المجهول يجيب عليها أول تعليق للمدوعو بيرم المصرى وردى على هذا التعليق مما لم يعجبه فعمد الى عمل مدونة أخرى تحمل إسم مهدى مهدى يقوم يالسب والقذف كما يحلو له وأى مدون محترف يستطيع أن يميز مدى تشابه الاساليب وأى كان المدعو بيرم المصرى أو مهدى مهدى فكلاهما ايضاً بالنسبة لى مجهولوا الهوية والذى يستطيع أن يفصل فى ذلك الجهات الامنية المسؤلة عن مراقبة الانترنت عموماً ولهم أساليبهم الخاصة وكونى جماعة أو فرد أو غيره تحدده هذه الجهات وليس فرد مستتر تحت مدونة وأنا أعى ما أقول جيداً
أما بالنسبة لى فقد قمت بإلغاء المهاترات داخل مدونة نون حتى لا يتشتت القارىء ما بين الموضوعات الهادفة وهذه المهاترات التى من شأنها التشويش على هذه الحملة التى ترد لنا كمسلمين إعتبارنا . أما عن سيرتى داخل المدونات فهى محددة وواضحة ومن كان عنده شىء فى مدونته مريب بالنسبة لى فاليفصح عنه وكل تعليقاتى تخرج رسمية من مدوناتى سواء القديمة أو نون .
أما أنا فلا ولن أبالى بهذه الاحقاد وأنا واضحة ومحددة وسوف أستمر ولن أتوقف إن شاء الله . أما بالنسبة للمدونين الكرام فمن تفضل مشكوراً بالمشاركة فقد شرفنى ومن قرأ ولم يعلق فله أيضاً الاحترام .
مع خالص تحياتى

ن يقول...

السلام عليكم
الاستاذ /فشكول
آسفة لإزعازجك مرة أخرى أردت أن أعرض لحضرتك أول تعليق للمدعو بيرم المصرى وردى عليه فى مدونتى

6 التعليقات:
Beram ElMasry يقول...
سيدتى او سيدى امل
الاسلام دين سماوى ، وكتابه محفوظ بعناية الله من التحريف عكس ما حدث للكتابين من قبله ، وليس دينا وضعيا كالبوذية والمجوسية والبهائية ، كى تطرح قضاياه للنقاش فى المدونات ، اوالدفاع عنه ضد مرضى عميت قلوبهم ، لسنا اهل تخصص ولا فقهاء وللفقهاء احترامهم ولهم حق الاجتهاد والامر ليس متروكا لكل من هب ودب ، ولماذا نشكك فى فقهاء الاسلام بينما لايجرؤ يهودى او مسيحى فى مجادلة حاخام اوقس رغم ما طرا على الكتابين من تحريف وما حوياه من تضارب واختلاف ، وما حوياه من مجون وسوء ادب مع الانبياء ، كنشيد الانشاد للنبى سليمان عليه السلام
السيد او السيدة امل ، ادرئي عن نفسك الشبهات فهذه دعوة باطلة يراد بها باطل

06 نوفمبر, 2008 05:06 ص
ن يقول...
السلام عليكم
الاستاذ /بيرم المصرى
شكراً على مشاركتك الطيبةوأحترم نصيحتك الطيبة وأقدر بأنها تأتى من دافع غيرتك على الدين ومع خالص إحترامى لكل متخصص وأنا ضد مسمى رجال الدين قال تعالى (واسألوا أهل الذكر )ولأهل الذكر سمات أوضحها الله عز وجل فى مواضع كثيرة من القرآن الكريم أهل الذكر ليست وظائف وهذا ما اختلط علينا أعزك الله .
هل تدرى يا أستاذ /بيرم ما مشكلتنا ؟
مشكلتنا هى الخوف لأننا نظن أن الرأى فى الدين وقوع فى الشبهات .. وحشانا يا أخى الكريم من الشبهات وأصحابها بل إنى أرى من وجهة نظرى أن تجميد الفكر وعدم البحث والاجتهاد الدائم هى أول خطواتنا للوقوع فى الشبهات والانسياق وراء الأراء المتطرفة وأشياء كثيرة نحن فى غنى عنها قال تعالى (أفلا يتدبرون القرآن أم على قلوب أقفالها)
الى متى ستظل هذه الاقفال موصدة تتغلظ كل يوم .. كتاب الله واضح ولا تبديل لكلمات الله ولن يجرؤ أحد على ذلك ومع ذلك أمرنا الله بتدبر المعانى والتأمل فيها للخروج بنتائج من شأنها إصلاح أمورنا القرآن زمن ممتد يوافق كل العصور ولكن بالأجتهاد والفطنة والحكمة والعمل به ولعلك تدرك حجم التناقضات داخل الكتب التى مازالت بحوزتنا والخوض فيها شديد ربما اقتصرت وجهة نظرى على المقبول للعقل .
ومعذرة يا أخى الكريم فكما قلت سابقاً الدين ليس حكراً على أحد فهذه لغة فيها مؤامرة على كتاب الله
تمعن فى قوله تعالى (يا يحى خذ الكتاب بقوة وآتيناه الحكم صبيا* وحناً من لدناوزكاة وكان تقياً)
لا تقلق المدونة ليست للأفتاء أو فرض الرأى نحن فى حملة قرأة ومناقشة الواقع وطرح الانتقضات الموجهة الينا
ورأيك جيد للمناقشة وأعتبرها بداية جيدة .
شكرا لك .. مع خالص تحياتى

...................................
بعد هذا الرد وصلنى من الدعو بيرم المصرى تعليق غير لائق قمت بحذفه وفضلت أن تكون المهاترات خارج المدونة

عالم ماريونت يقول...

عزيزي فشكول:
ازيك الاول عامل اية؟
عارف
لما قريت البوست بتاعك افتكرت حاجة مهمة
الناس زمان كانوا ممكن يتعبوا عشان ياكلو لحمة مثلا
الناس دلوقتي مش لاقيين حتى العيش
وبيقطعوا بعض على العيش
بزمتك مش خيبة؟
رنا

ن يقول...

السلام عليكم
لقد غمرتنى والله بكرمك وسعة صدرك وأنا فى غاية الاسف على هذه الحيرة .
أما عن تعليق بيرم المصرى الذى أرسلته لك فهو مازال بمدونتى ولم أرفض مثل هذا الرد أما ما حذفته فهو بداية السب والقذف بدون سبب .. وبما أن مدونتى يتابعها الكثير من مختلف الاعمار خارج المدونات فلم أحبذ أن تكون لنا واجهة بهذا الشكل كلها مهاترات وردود على الاساءة كما راعيت أن البعض يكبرنا سناً فلم أحبذ الرد بأساليب لا تليق لذلك إكتفيت بالصمت والعمل من أجل من ينتظرون الاجابات على بعض أسئلتهم شباب فى عمر الزهور يريدون معرفة منا المزيد وطلبت المشاركة بالرأى والاجتهادات ولم أقصد من ذلك أى رأى بل قصدت كل من فى يديه إجتهادات تستند الى دلائل من العلماء والباحثين أن يفيدنا فإن كنا نعلم ويسر لنا الله الحال فأولادنا مازالوا يتعلمون ويحتاجون منا المدد باستمرار على قدر إستطاعتنا .. والله أعلم بالنوايا كما قلت سابقا
مع خالص تحياتى

ن يقول...

السلام عليكم
أستاذ / فشكول
كل رأى قلته يظهر حكمتك ورجاحة عقلك وسأنتظر الرد معك فإن تطاول الامر أكثر من ذلك سأطالب الجهات المعنية والمختصة بتكثيف المراقبة الامنية على المدونات وثق بأن هذا ما يرجوه أولو الامر بسبب ما يحدث فى المدونات أما أن تصل الى التشهير وإيذاء الغير فأنا أنبه كل المدونين الى أن سكوتهم على هذا الامر سوف يعرضهم جميعاً فيما بعد الى مثل هذه المشاكل وفى حين تمادى المدعو بيرم المصرى أو مهدى مهدى سآخذ إجرآتى الصحيحة مع عمل تصويت جماعى للمدونات للموافقة على هذا الامر حتى لاأضر حرية الرأى . وأنا فى إنتظار الرد
مع خالص تحياتى

أمل حمدي يقول...

ازيك يا استاذي

الله يسلمك يارب

ادعيلي احسن ماما امولة متفشكلة على الاخر

شكرا على سؤالك

ربنا يخليك يارب

رغم انك بقيت مشهور والاذاعة بتسجل معاك لكن بتسأل على الغلابة اللي زينا
ربنا يصلح حالك

Soul.o0o.Whisper يقول...

fashkool

أستاذى الفاضل
أولا أسعدتنى زيارتك
و أتمنى أن تتكرر

و أشكرك على كلماتك الرقيقة

بالنسبة للسعادة عندك حق فيها
صعب علينا لما نشوف أقرب ناس لينا ضايعين
و مش قادرين نساعدهم بشئ

كمان مصاعب و مشاكل الحياة اليومية
بتخلينا فعلا نقول آآآآآآآآآآه
و آآآآآآآآآآه من حنايا قلوبنا
لكن من يسمع ؟؟
فالكل يصيح ، و الكل ملهى بحاله

لكن يا سيدى ألا تتفق معى أن الرضا شئ مطلوب لتستمر الحياة؟؟
نعم .. الحمد لله الذى لم يجعلنى فى وضع اسوء من ذلك
و لكن ليس معنى ذلك أن أخنع و أقف مكانى و اقول الحمد لله
بالعكس الرضا و الطموح لا يتعارضان
و لكن يجعل أمور الحياة أهون بكثير


فلن يصيبنا إلا ما كتب الله لنا
لكننا نسعى لنُرى لله من أنفسنا قوة
أليس كذلك ؟؟؟

خالص تحياتى

Soul.o0o.Whisper يقول...

البوست أكثر من رااااااااائع

تحدثت عن واقع نعيشه
لكن ليس من الحكمة ابدا أن نستسلم له كما فعل فشكول
و ذهب ليكلم نفسه

مما أدى إلى هروب كل من المدعو كحيان
و المدعوة بس خلاص
و قد امرت السلطات الأمنية بضرورة البحث عنهما و إحضارهما

(ربنا يكون فى عونك يا كحيان
بس هو لسانك اللى جابك لورا )



خالص تحياتى

mahasen saber يقول...

انا جيت اهه يا استاذ فشكول بس ايه لقيت بوستين اروع من بعض
انا علقت على اليى فات
وكنت عايزه ادى محمود كلمتين فى العضم عشان برطم لحضرتك
بس خفت يزغرلى وحضرتك تزعل
برضه انا بصدق مثل ازعق لولدى واكره اليى يشجعنى على كده

mahasen saber يقول...

بس ايه الفلسفه دى وبحر وامنحوتب وفى الاخر حضرتك تخطف القلنسوه بتاعته طب نصيبى فين من الغطسه دى

بس لقاءات وحكمه ده اكيد من تاأثير الغطسه
بس ليه ذكر البتنجان يعنى حضرتك كده بتلعب على اعصاب معدتى
اصلى بعزه اى كان شكله حتى ولو مخطط

وبعدين حضرتكصدقت فيه فعلا علاقه وثيقه بين الاسعار والبتنجان
زى علاقة القوطه والجنون

شكرا للمره المليون سؤال حضرتك الكريم عنى
يعنى انا محرجه خالص من ذوق حضرتك
وليا عوده تانيه ان شاء الله

إيمان قنديل يقول...

حيرتني يافشكول مره تكتب لنا ولا الجبرتي في زمانه، ومرة تانيه ولا محمود السعدني إيه حكايتك بالظبط رسينا على بر

طـائر الليــل الحـزين يقول...

واللهى فشكول ده طلع راجل جاااااااااااااامد
وحكمته وفلسفته ملهاش حل
اكيد ان كنت خسرانة كتير انى مدخلتش عالم فشكول من بدرى
يا بنيتى الجلباب الابيض لونه نقى ويعطى النقاء وهو صينى .. والصينيون قديما اخترعوا الحكمه وحديثا صعدوا للفضاء .. اما العباءه يا كحيان فعندما تمتلأ الرأس بالحكمه ويكون هناك فائض يمكن ان نفرش للفائض الملايه .. اقصد العباءه وهى صينى ايضا.. وأما القلنسوه يا بنيتى ياهس ولا كلمه فعندما يمتلأ الرأس بالحكمه تكون وسعه وحتى لا تتفرفط الفلسفه من الرأس وهى ايضا صينى .. والسجاده التى امامكم اذا فرغت الحكمه وضاعت العقول انوى الصلاة عليها .. وهى ايضا صينى .. واما السجاده التى نجلس عليها وهى بالشيئ الفلانى عشان تحوش التراب عننا هى ايضا صينى وكل ما يقع ناظركم عليه صينى أترون يا بنيتى ويا بنى الكحيان كم عند الصينيين من الحكمه والفلسفه والبلاغه .. وكم عندنا من البلاده والبلاهه قالت بس خلاص : ولكن قل لى يا فيلسوف ما هو البدنجان
بجد اللى ورى الكلام الجميل ده حاجات كتير قوى
سلمت يدك ودمت بكل ود
تحيـــااااتى

القلم السكندري يقول...

السلام عليكم أستاذنا الفيلسوف

بصراحة اصبت أيما اصابة حين قلت : ( الحمير أعظم حظا منا)

ويحضرني قول من قال من الشعراء:

لو قيل للحيوان كن بشراً هنا***لبكي وأعلن رفضة الحيوان

ربنا يصبرك علي التحقيقات والتوريطات دي



وأشكر لك زيارتك .. جزاك الله خيرا

شفـقــة و إحســــان يقول...

ايه ده يعنى حضرتك من الشخصيات المرموقة بقى
انا شايفة كلام كبير فى البوست
فيلسوف وحكيم
ماشى
يعنى احنا كده اتشهرنا

Mahmoud farag يقول...

أستاذ فشكووول
ــــــــــــــــــــــ

أنا قريت الموضوع من يوم ما نشرته بس ساعتها معرفتش أرد

غرقت ساعتها في البتنجان و الكوسة هههههه

بس تصدق كناية فعلا عن الكوسة و البهدله اللي احنا فيها الايام دي

و ربنا يرحمنا من الكوسة اللي في البلد

تحياتي لك

Hanan Said يقول...

استاذ فشكول

على قد ما البوست خفيف جدا في قرئته وفي المرور عليه
الا انه تقيل اوووي في المواضيع الي فيه
بجد لو عايزه العلق على الحجات الي فيه يمكن اقعد يوم بحاله اتكلم مع الفيلسوف واقوله اه والله جيت على الجرح
والجروح ايه بقى ماتدعش ورايا



وبما انك جيبت سيره الكوسه والبتنجان وهي محاصيل زراعيه
ايه رئي الفيلسوف في موسم الرز الي بيخلي الجو صافي والشمس ساطعه

ولا ايه بقى القطن المصري الي بنزرعه ونصحى الصبح نستورده
وهل ده يعتمد على نوع من انواع السحر
ان المحصول يكون من ارضنا وفجئه يجيلنا من بره

ياريت بس تقولنا لاحسن احتار الاطباء في الحركات الغريبه دي

تحياتي لك استاذ فشكول بجد

Empress appy يقول...

ا بنيتى ويا بنى الكحيان كم عند الصينيين من الحكمه والفلسفه والبلاغه .. وكم عندنا من البلاده والبلاهه

جوووووووووووووووووون

بس خلاص هى دى

Unknown يقول...

ليه انور السادات احسن رئيس فى تاريخ مصر القريم والحديث وبتقول عارف ليه .. اقول لك يا سيدى

عارف طبعا يا فركش .. عشان منوفى
لأ...ولأ طبعا.

Unknown يقول...
أزال المؤلف هذا التعليق.
Unknown يقول...

صحيح وانا مالي..
ون برضه وهي مالها
وانت كمان وانت مالك
وهو مكان هو ماله
شوفت الكحيان في الكوسه؟
من حق
وتكفي ع الخبر ماجور ليه؟
دي يا عمي تهمه لا تنكرها
وشرف لا تدعيه

رئـــــيسـة حزب الأحلام يقول...

ايه الفلسفة الجامدة دى
بس بجد الفلسفة بتطلع دايما من اصحاب العقول والقلوب المحملة بالهموم
وربنا مايجيب الفلسفة نواحينا
تحياتى لحضرتك

Beram ElMasry يقول...

يا ابن الايه يافشكول ، ما هذا الجمال انا باعت لك قبله على جبينك ، وانا مع الدكتور الكحيان ومش بحب البت بس خلاص عشان مش عارفه تفضحك واتبين جهلك لانك ماذكرتش احمد عدوية وحكمته المشهورة السح الدح امبو واخفيت مقارنة الفيلسوف شكوكو وحكمته بان الحب زى الرز فى الكوسة ، وانا وراك والزمن طويل حتى لو لابس قميص حديد
تحياتى مع احترامى وتقديرى

طويلة ولو على جزاين كان افضل

عـــفـــراء يقول...

السلام عليكم
امممممم فعلا عندك حق يافندم
الجلابية السعودى ليها شكل ورونق تانى
وبتقيم الشخص تمام حتى لو من غير اللى على الراس دى
ال يعنى هي الراس ولا الدماغ ناقصة كفاية الى عليها
تفتكر حضرتك يااستاذ فشكول دوت كوم انهى مصر اللى اتحدثت عنها فى شرحك للكحيان
هل هى مصر السفلى اللى متقورة بالكوسة والبتنجان ام العليا الى دايما بتعلينا بعلوها ام الفرعونيه اللى فرعنت غيرنا
يلا المعنى المعنى كلة واحد
حلو اوى البوست وممتع ولذيذ
خالص تقديرى .........

DoNyA يقول...

الحكيم فشكول ..
قد اخذ حقه في الفلسفه هذه المره
أعجبني كثيرا انه لم ينكر حق الصين
وفضله عليه كله صيني صيني

اما عن باراك اوباما :
بنيتى .. باراك تعنى فى العبريه المبارك أو المبروك .. شوفى هى قريبه من كلمه مبروك واوباما من البومه اللى هى اخت الحدأه اللى ما بترميش كتاكيت


هههههههههههههههههههه
المبارك الذي لا يرمي الكتاكيت
عله يفوق حم التوقعات ويدحلنا كتكوتين ولا تلاته

ا\ فشكول
استمتعت كثيرا بكلامك المميز