الاثنين، 1 ديسمبر، 2008



الحلقه الثانيه


قال الفيلسوف ..... فشكول




اخوانى : فشكول عامل فيها ابو العريف .. بيعرف فى كل حاجه .. وبيفهم فى كل حاجه .. فى الرايضيات بيعرف 5+ 5 = 10 فيى الفيزياء اللى هى الطبيعه بيعرف .. الهواء فيه اكسجين .. فى الطب بيعرف .. الاسبرين بينزل الحراره ومسكن كمان هى يعنى حكايه ولا كيميا ولا لغرتمات فى الكمبيوتر برضه بيعرف .. آهه .. عامل مدونه وبيكتب فيها وبيروح عند الناس يزور ويكتب تعليقات ولما واجه مشكله انه عايز يحط ناس عنده حلها .. هى حكايه .. ويا دوب صفاء بتاعة المنيا غششته وقالت له تعمل ازاى ومحاسن صابر برضه غششته وقالوا له كلمتين وبالتفصيل وغششوه كما ينبغى لكن فشكول المعى ومبدع ولما يعمل حاجه ما حدش يعرف يفشكلها زيه وممكن يبهدل ويبوظ الدنيا وما حدش يعرف يعمل زيه.. طب بصوا شوفوا فشكول عمل ايه على جنب المدونه من الناحيه الشمال عمل عمايل مهببه وأخر جمال احسن من مفيش.. اتفرجى يا صفاء وانت يا محاسن يا بتاعة التليفزيون شوفوا فشكول عمل ايه .. فشكول ده ما فيش زيه .. بذمتكم حد يعرف يهبب الهباب ده زى فشكول .. فشكول واد ما فيش زيه بيفهم حلو قوى وبيبوظ كل حاجه وبيفن فى المتفنن .. ويهبب هباب .. يا سلااااام لو فشكول يريحنا منه ومن عمايله المنيله دى ويعيش بقى ويكبر دماغه .. بس ايه .. فشكول دا عالمى متجول .. فاكرين عبد المنعم دى صبرى هو وصباح فى فيلم شارع الحب اما كان عبد الحفيظ حالم عامل فيها مدرس موسيقى ومركب دقن وشنب .. كان عالمى .. برضه فشكول عالمى وبيعرف يرد على اى سؤال ويتساءل كيفما شاء (فشكول مبسوط من ماما اموله اللى حطة له الهمزه على الارض)


فشكول مستنى الاذاعه ومجهز العده (الجلابيه البيضاء بتاعة الصين والعباءه والقلنسوه برضه بتوع الصين) ومستنى المذيعه بس خلاص اللى هى خلص الكلام .. فشكول سمع جرس الباب ودخلت المذيعه ومعاها واحده كمان .. واسمها .. سمكه واحده .. طب يا بنتىخليهم كيلو سمك .. طب البحر من العريش لحد ليبيا وكمان عندنا البحر الاحمر من السويس لحد السودان وما فيش سمك برضه .. يا خيبيتكم .. سمكه واحد كان مفروض ينوبنى 10 كلوا ولا 15 كيلو سمك.. ايه الخيبه التقيله دى اللى احنا فيها .. ما علينا


بس خلاص وسمكه واحد قاعدون يحطوا فيش فى الحيطه وتسجيلات ومايكات وابتدا التسجيل....


لى صديق فيلسوف باقوال الحكماء شغوف سألته .. قل لى يا صديقى الفيلسوف قوله جديده عن الحكمه؟

قال الفيلسوف وقد انبعج وانجعص على اريكته وظبط قلنسوته التى تبدأ من على رأسه ثم ترتفع لاعلى حتى تصبح زرا فى اخرها زى اريال التليفزيون وقال :

الحكمه يا بنيتى هى كيف نعبئ الشمس فى قزايز الحكمه يا بنيتى هى فن الضحك على العقول واستعباط الناس .. الحكمه يا بنيتى هو تسويق الاستهبال والاستعباط بين الناس وقبل ان يسترسل الفيلسوف سألها :

هل احضرت اجرى يا بنيتى عن الحلقه .. نعم يا سيدى هاتان صرتان من الجنيهات فىكل صره 20 قطعه حديد كل قطعه تمثل نصف الجنيه .. فيقول لها الفيلسوف ... طبعا طبعا ما هو الفلوس كلها اليومين دول حديد لكن هل شاعت الصرر بهذه السرعه .. منها لله سول ويزبر هى التى روجت لصرر الدنانير .. لكن لا عليك يا بنيتى .. هاتها .

تتدخل سمكه واحده ترقع الفيلسوف هذا السؤال : قل لى يا فيلسوف هل سمعت عن الملكيه العامه والمال العام ؟ .. فيرد فشكول .. اقصد الفيلسوف .. وماذا يا بنيتى عن هذا .. فتقول سمكه واحده يقولون يا فيلسوف انهم سيملكون الشعب المال العام عن طريق البورصه.

الفيلسوف .. آه يا بنيتى .. نعم .. نعم .. تقصدين الصكوك ؟ فترد نعم يا فيلسوف .. يقول الفيلسوف .. يا بنيتى الملكيه العامه هى ملكية الدوله والدوله ببساطه هى الارض .. وهى ارض مصر اللى مطلعه روح اللى خلفونا والشعب اللى هو شعب مصر اللى عمره ما شاف يوم يحلف بيه وحكومه اللى بيختارها الشعب وكل الشعب ما يختارش حكومه لكن برضه تركب على قلبه وتديله مطرح ما يوجعه والملكيه العامه يا بنيتى هى ملكية الشعب فعلا من غير ما يصكونا بيها على قفانا .. تتدخل بس خلاص فى الحديث اللى ما لهاش فى الاقتصاد والمال والحاجات المكلكعه دى وتقول:

قل لى يا سيدى الفيلسوف ( والله البنت دى مؤدبه قوى بتقول لى يا سيدى الفيلسوف ) يقول لها الفيلسوف فى انجعاص .. نعم يا بنيتى فتقول ما هو الجمال؟

يقول الفيلسوف : يا بنيتى .. الاحساس بالجمال من رؤية زهره .. من النطر الى اولادك .. من ضحكة حفيد زى احمد فى لفته .. من ملك اما تركب على ضهرى وتقول .. شى يا حمار .. من نظره لامرأه جميله .. من ابتسامة رجل لآمرأته .. من قبض صرر الدنانير .. اى شيئ يخليكى مبسوطه يبقى الجمال .

تقول : وما هو اجمل الجمال يا سيدى الفيلسوف ؟ يقول الفيلسوف .. يا بنيتى فى قول واحد .. اجمل الجمال فى المرأه .. تغمغم بس خلاص فى سرها ( الراجل ده عينه زايغه) فتتدخل سمكه واحده .. لم تكمل يا فيلسوف ( البنت دى جريئه قوى بتقول يا فيلسوف من غير يا سيدى الفيلسوف) لم تكمل لى عن الصكوك؟

الفيلسوف : يا بنيتى ايراد الملكيه العامه يدخل لوزارة الخزانه .. اللى هى وزارة الماليه .. والحكومه بتصرف منه على الدفاع اللى هو الجيش وكمان الامن - طبعا انت عارفه ما اقدرش اتكلم - والتعليم الخيبان - والصحه اللى راحت من الشعب كله - والعداله أهو يا دوب واللى فاضله لنا .. هما خمس حاجات اللى مسئولية الدوله والباقى مش مشكله الدوله لكن ممكن تتدخل وتصرف على حاجات زى الطرق اللى كلها مطبات والكبارى اللى بتقع بعد سنه ولا اثنين والكهرباء اللى واخده فلوسنا كلها وخلافه وملكية الدوله حيقدروها بكام وطبعا بيقدروها زى ما قدروا عمر افندى وبنك الاسكندريه وبعدين يشوفوا كام واحد سنه واحد وعشرين سنه ويوزعوا القيمه دى عليهم فى شكل صكوك وكل صك قيمته من 400 الى 600 جنيه يعنى انتى اللى حينوبك دول وخلاص والاجيال الجايه يروحوا يضورا لهم على بلد تانيه يكون لهم فيها نصيب .. ما هى كل الانصبه اتوزعت وبح مفيش حنجيب منين.

الكلام ياخد بس خلاص ويعجبها وتندمج معاهم وتقول : طب وايه العيب فى هذا يا سيدى الفيلسوف .. آهم 600 جنيه احسن من مافيش وجم من باب السما:

يقول الفيلسوف : يا بنيتى هذا شئ شرحه يطول فتقاطعه بس خلاص وتقول وانت الليلة مشغول .. فيقول لها الفيلسوف اذا كان هناك صره اخرى من انصاف الجنيهات سيكمل الفيلسوف .. كله بثمنه .. فتناوله الصره .. فينشكح الفيلسوف ويكمل:

يا بنيتى : الصك اللى حنتلطع بيه على قفانا العريضه ثمنه قولى 600 جنيه طب يا ترى حنروح البورصه ناخ عائد عليه ولا لأ .. ولو حناخد عائد عليه يبقى كام .. الفائده السائده 8% يعنى قولى 6×8 = 48 جنيه قولى 50 جنيه ان شا الله ما حد حوش .. يعنى اللى حينوبنى من ثروة بلدى 50 جنيه كل سنه .. وبح .. ما فيش تانى وبعدين يا بنيتى كلنا مش لاقيين ناكل والطبليه بتاعتنا فقرانه وعدمانه .. ما هو الفقر والغنى من غير يعنى فلفسه هو المقياس بتاعه الطلبيه اللى بناكل عليها .. تندمج بس خلاص فى الحديث وترد على الفيلسوف .. ونعمل ايه ؟ يكمل الفيلسوف اللى حياخد صك على قفاه حيطلع جرى يبيع الصك وحيتباع بكام .. قول انت بقىىى .. اقول .. طبعا مش بـ 600 جنيه .. دا حيبقى فيه سماسره ووسطاء .. والسمسار عايز حقه .. والوسيط عايز حقه .. يبقى الصك مش حيتباع باكتر من 200 او 300 جنيه والباقى سمسره ووساطه وكل الصكوك اللى حتنزل للناس حتلف تلف وتروح لـ 3 ولا 4 ولا 5 من الحيتان الكبار وحيتان ايه ياكلوا سمكه واحده فى بطنهم بق واحد .. يعنى تحويل الملكيه العامله لصكوك للشعب فى الحقيقه هى بيع للحيتان دول ويعنى انتم اللى هبل وعبط وفرطتم فى الصكوك وخساره بقى فيكم الاكل واى حاجه يا هبل يا عبط .. مش قلنا لكم حددوا النسل وقللوا من عيالكم وياريت تقللوا منكم انتم كمان .. مش قلت لكم احنا عبينا الشمس فى قزايز.

سمكه واحده : وما ذا بعد يا فيلسوف (خدوا بالكم .. يا فيلسوف بس) ماشى

الفيلسوف : لاشئ يا بنيتى .. انت مش خدتى حقك .. خلى بقى هانى رمزى ينفعك ويعمل لكم فيلم عشان تقولوا عايزين حقنا : آهو انتم خدتم حقكم أهه .. روحى يا مسكوكه اجرى وكله على حسابك والدوله ما لهاش دعوه .. انتى مش خدتى حقك .. عايزه مننا ايه يا مسكوكه ويا مسكوك منك له.

بس خلاص : هل تم تطبيق هذه الطريقه فى بلاد اخرى يا سيدى الفيلسوف ؟

طبعا طبقت فى دول كتيره ومن ضمنها روسيا الاتحاديه وما نفعتش وفشلت فشل زريع .. تقول ولماذا نطبقها نحن اذن .. يقول .. لأننا معجبين بالفشل وهو احنا بنعمل حاجه غير فشل فى فشل.

ولكن قل لى يا سيدى الفيلسوف .. فيقاطعها الفيلسوف .. يا بنيتى العداد بيعد .. صرة اخرى من الدنانير حتى اقول كل شيئ ونصل فى الكلام الى .. هذا شيئ شرحه يطول وانا الليله مشغول :

تهمس سمكه واحده فى اذن بس خلاص (الراجل ده فيلسوف الغبره بتاعك ده الراجل ده لا هو فيلسوف ولا حاجه .. دا راجل اونطه وما بيعرفش حاجه وخساره فيه الـ 3 صرر اللى خدهم )

الفيلسوف متعجلا : هات الصره يا بنيتى .. فترد سمكه واحده يا فيلسوف الى حلقه قادمه .. وتغمغم فى نفسها - خساره فيك جنيه واحد.. انت راجل مخرف وبتخطرف ومسكوك وتنسحب ومعها بس خلاص الى الخارج.

فشكول يقول والله انتم اللى خسرانين .. انا كنت حاقول لكم على دورة رأس المال وحاكمل لكم الموضوع اللى شرحه يطول وانا الليله مش مشغول وكنت حاقول لكم ايه اللى حيحصل لكم فى ايامكن الهباب دى . اصل انتم مسكوكين خساره فيكم تعيشوا زى الشعوب الحلوه .. انتم ناس اى كلام واى حد يديكم على قفاكم يا
ما فيش حد يقول الى حلقه قادمه يا فيلسوف

الارزاق على الله ان شاء الله حد تانى ييجى ونضحك عليه وناخد منه صرة دنانير


هناك 59 تعليقًا:

فركشاوي ..ناوي يقول...

تاخد 10صرر وتقولي ايه الي احنا فيه ده؟...طبعا تاخد الصرر وتفضل تقول وتقول..وتفشول في الكلام وبعد كده تلاقي الصرر مفركشه ...مش عايز تقولي ما هو بينا؟

فركشاوي ..ناوي يقول...

هييييه ...وضحكت ع الواد مجنون وخدت منه اول تعليق ...والتاني والتالت والرابع..ولويس التاسع عشر..ونابليون التلاتشر ...

M.K يقول...

عمي فشكول...
الفيلسوف الحكيم...
كل الكلام إلي قلته بكفه وكلامك عن الجمال بكفه..
الاحساس بالجمال من رؤية زهره .. من النطر الى اولادك .. من ضحكة حفيد زى احمد فى لفته .. من ملك اما تركب على ضهرى وتقول .. شى يا حمار .. من نظره لامرأه جميله .. من ابتسامة رجل لآمرأته .. من قبض صرر الدنانير .. اى شيئ يخليكى مبسوطه يبقى الجمال .
الله عليك يا فيلسوفنا..
إلى لقاء جديد ..
...........
دمت في أمان الله ..
تحياتي لأحمد وملك..

ماما أمولة يقول...

ههههههههههههههههههه

ايه يا استاذي فشكول

الكلام كبيييير وربنا يكفينا شر الصكوك

بس انا عايزة اعرف الارقام اللي تحت

اللينك دي اللي على الجنب الرقم

القومي ولا ايه؟

والله يا استاذي

انا بستمتع لما تكتب وتقعد تفشكل كدا على رواقة

ربنا يخليك لينا والصرر بالنص

قلم رصاص يقول...

ايه الجمال ده كله ياعمو فشكول

والله انت راجل زي العسل
ربنا يخليك للمدونين الشباب

ما احنا محتاجين فيلسوف خبره زي حضرتك عشان منضلش الطريق برضه

تقبل مروري وتحياتي

enjy يقول...

اييييييييييييييييه الحلاوة دى لا بجد استمتعت يا سيدى الفيلسوف

Dr Ibrahim samaha يقول...

استاذنا

اللى حضرتك عامله فى الجنب دى روابط البروفيالات

المفروض حضرتك تحط مكانها روابط المدونات

زى دا مثلا

http://mar7om.blogspot.com

وبس والبرنامج بتاع المدونة هيقوم بالشغل

بس

-------------------------

ثانيا الموضوع جميل وحوار ممتع

بالنسبة للملكية العامة فعلا مش محتاجين يدوهالنا لانها ملكنا بالفعل

وهما كده بيضحكوا على الدقون زى مثلا

واحد مالك بيت جت قلتله هبيعلك بيتك وهاخد فلوس طبعا مينفعش
والملكية العامة المفروض إيرادتها المفروض بتخدمنا
وطبعا روسيا فشلت
واحنا كمان فاشلين:)
ثانيا الجمال زى ما حضرتك قلت

انا كنت كاتب موشوع قبل كده اسمه الحاجة الى الجمال

وان الجمال ممكن يكون موجود فى كل حاجة

تحياتى لك
د إبراهيم

mohamed ghalia يقول...

إيه الفلسفة الهايلة دى
حقيقى بوست هايل
ربنا يزيدك حبيب قلبى
دمت بكل الود
تحياتى

mr_raafat يقول...

" الحكيم فشكول "

كل عام وأنتم بألف صحة وعافية

وللأسرة الكريمة

بمناسبة حلول عيد الأضحي المبارك ،

وكويس إن الحلقة دي جت في وقتها أهو

تعمل حاجة في الزنقة دي و-أحمد وملك -

ننوسة عين جده يشتروا بيهم بلونة في

العيد والعيال تفرح .

الحكيم فشكول أنت بحق تستحق لقب

شيخ المدونين وفيلسوفهم .

- بيقولوا أما تاخد الصكوك مافيش بيع

قبل 10 سنين ،

لكن ياتري ها يكون فيه بيع ماالباطن

؟
وكمان هيكون فيه شفافية جامدة جدا

لأنه جاي من بلاد بره شفاف نضيف قوي

- أما بالنسبة للجمال فأزيد علي ما

قلت هو هذه المدونة الرائعة

وفيلسوفنا المبدع الذي يدخل دائما

السرور علينا ويفهمنا أصول الصك

والسك...

دمت في أمان الله...

حاجــ عيال ــات يقول...

السلام عليكم
ياسيدي الفيلسوف (شفت أنا مؤدبة ..وبقول ياسيدي)..الجمال هو بعض ماذكرت سابقا
ولكن ياسيدي الفشكول قصدي الفيلسوف
هل النظر إلى امرأة جميلة من حق أي شخص يمتع به كمظهر من مظاهر الجمال
أم انك تقصد ... تقصد إيه تقصد إيه ها ها ؟
اصل انا حنبلية شوية وكل واحد ياخد حقه بقه هه
يعني انا مثلا واحدة جميلة زي..احم احم.. كل ما امشي في الشارع يشاورو عليا ويقولوا البنت الجميلة ماشية اهيه ..والناس كلها تقعد تبص عليا وتبحلق لي ..طبعا دي حاجة بتضايقني جدا ..اعمل ايه بس إذا كنت انا مصدر من مصدر الجمال في الكون

موضوع السكوك بقى ياسيدى الفيلسوف
أنا مش فاهمة فيه حاجة أو يمكن مش عاوزة افهم لأني فاهمة كويس إني كل البروباجاندا دي على الفاضي والحال سيء فأسوأ

ودمت فيلسوفا
جهاد مشالي

أحــوال الهـوي يقول...

انا خايف اعلق اغوص في الممنوع و اعك و تزعل و تقول بلاش الكلام المفتوح ده

وواضح ايضا الثقافات المتعددة للسيد فشكول الفيلسوف

اعجبني تعبيرك عن الجمال ابو سنمين

تحياتي

Soul.o0o.Whisper يقول...

fashkool


سلوى؟؟؟
سلوى دى بنت عمى
و فى نفس الوقت بردوا بنت خالى
ههههههههههههههههههه


امممممممممممممممم
شوف يا سيدى الفاضل
(مش سيدى الفيلسوف واخد بالك)
أولا : البوست أكتر من رائع
رغم إنى مش عارفة ليه إن الموضوع مش هيكون كدا خالص
يعنى ماهو بدل ما ال3 أو 4 حيتان يلفوا على خلق الله ياخدوا منهم الصكوك ماهو كانوا اشتروا الشركات من الاول و ريحوا دماغهم
و لا فعلا عشان يكون : بيدى لا بيد عمرو؟؟؟

ثانيا : مفهوم الجمال رائع صراحة ...
ربنا ما يحرمنا من فلسفتك أبدا يارب

ثالثا :بالنسبة لرد حضرتك بئا
اللى قصدته باللى قلته عن الامريكى
إنهم برغم إنهم معترضين على الرئيس ( زينا تمام )
و الحكومة مش ماشية على هواهم ( زينا تمام )
لكن لأنهم قادرين يقفوا فى وش حكومتهم و يقولولها إذا عملت غلط ...دا غلط
و إذا عملت صح يصقفولها
عندهم عدل و نظام
لكن إحنا للأسف معترضين و كمان مش بنتكلم ، و بيعملوا فينا اللى عاوزينه
و نقولهم يااااااه عسل والله دا أنتوا مافيش منكم اتنين
هو انتوا هنا كل يوم ؟؟؟

لما يا سيدى نفقه ما لنا و ما علينا
و نطالب بحقوقنا
ساعتها بس نقدر نفتح بُئنا و نعاتب


دول الخليج اللى حضرتك بتعيب عليها استهلاكها
اكتر حاجة بتهتم بيها إن شعبها يكون طموح
ليا صديقة لسه راجعة من دولة خليجية
بتقولى باصات المدرسة مش للطلبة بس
لا كمان للمدرسين
و باصات خاصة للمدرسات
و فى نهاية الأسبوع الباص ياخدهم للسوق يتسوقوا و يرجعوا
لييييييييييه؟؟
عشان مش كل المدرسات عندهم عربيات

البنت لما تحب تنزل تشترى حاجة تروح بعربيتها لحد المحل
تضرب كلكس
البائع يجيلها لحد عندها يشوفها عاوزة ايه و يجيبهولها


عقبالنا ياااااااااااااااااااااارب


و ربنا ما يحرمك منى و لا من تسويقاتى و دعاياتى
أنت بس عاوز توصل أى حاجة للشعب قولى و أعمل دعاية و إعلان ... بس كله بتمنه بردوا ...ههههههههه




خالص تحياتى

~*§¦§ Appy §¦§*~ يقول...

هو انا عاوزة افهم ازاى اشترى عربيتى منى طيب مين يمضى على العقد هو ده بالظبط اللى عاوزين يعملوه

عموم عمو والنبى كبر الخط شويه عااااااااا

ن يقول...

السلام عليكم
سيدى الفيلسوف
كنت سمعت نكتة من زمان حبيت أقولها بس على الطريقة الحديثة بسبب المال والجمال .
أول ما اخترعوا الكمبيوتر جاءت لجنة من بتوع الاقتصاد على مستوى العالم والتفوا حوالين أكبر كمبيوتر يا سلام كان فى الوقت ده الكمبيوتر يتقدر بالحجم..أوم ايه حبوا يحسبوا ميزانيةكل دولة علشان يعرفوا فين الدول (العالية والدول الواطية )آسفة يافيلسوف أخطأت التعبير (الدول المتقدمة والدول النامية )أوم ايه الكمبيوتر حسب ميزانية اليابان فى دقائق وميزانية الصين فى نصف ساعة وميزانيةأمريكا فى ساعة أصل الاجرآت فيها حويطة شوية وميزانية إسرائيل ياخبر أسود مرضاش يقول أصل الخيط ممتد بالعرض وبالطول .. وحسب كل الميزانيات من الشرق للغرب ولكن ما جه على مصر قعد يحسب ويحسب والناس مستنية ساعة ورا التانية وأخيراً طلعت النتيجة إيه الجمال ده (مصر مقدرش أحسب ميزانياتها يا جدعان لأنها ماشية بالبركة )ههههههههههههه .
ده مش انا اللى بضحك دا الكمبيوتر هو اللى بيضحك علينا
مع خالص تحياتى

fashkool يقول...

من الاول
العزيز الغالى المفركش ومفرق الجماعات
هو يعنى الفشكول ما صدق انه ضحك على المذيعات وخد منهم الصرر (اصل يا فركش الجنيهات الفضه انتشرت اليومين دول والواحد كل يوم يلاقى بييجى له 10 ولا 15 جنيه وبيبقوا تقال على الجيب والجيب زى ما انت عارف صغير وما يستحملش الحمل دا كله - الموضوع عايز خرج الواحد يحط فيه الفلوس)وبعدين عايز تقاسمنى .. ماشى 25% لك والباقى ليه .. بس المهم القبض يا فركش والواد مجنون لسه ما عرفش الموضوع ولسه ماجاش حيجنن اكتر لو لقاك حاجز الاول والتانى ولويس التاسع عشر .. تحياتى

العزيزه M.K والله يا عزيزتى ما تعرفى السعاده والجمال والحب اللى الواحد بيبقى بيهم لما يلاعب ملك واحمد .. اصلهم قاعدين ملك وابوها وامها واحمد وابوه وامه والبيت آخر دهوله .. بس الواحد اخر انشكاح وانبساط.. تحياتى

الغاليه ماما اموله: ماهى اما الاستاذه محاسن والاستاذه صفاء غششونى عملت زى ما قالو .. طلعت الحاجات دى .. بس انا مش عارف اشيلها ولو شلتها يتشال اللينك كله فسبتهم وخلاص احسن من مافيش .. وبعدين انا مش عارف جبتهم منين .. تحياتى يا ماما اموله

الحبيب القلم الرصاص :اشكرك يا قلم على مديحك لى والله يا بنى انت اللى زى العسل واهو الواحد مش عارف يقول آه فبيقول فى المدونات آآآآآه على اخره .. اهى حاجه نفش غلنا فيها.. تحياتى

العزيزه انجى :أول مرور لك عندى شرفتينى ونورتينى وجميلك على راسى ويارب ما تنقطع الزيارات .. تحيات فشكول.

يا دكتور ابراهيم أنت فاكر يعنى ان انا فاهم يعنى ايه روابط البروفايلات من روابط المدونات .. انا كنت بروح عند المدونه واقعد ابحث عن الرابط اللى زي اللى انت كاتبه ده ما بلاقيهش وبعدين عملت اللى اقدر عليه .. بس مش بذمتك مش احسن من مفيش.. على فكره حارجع للموضوع بتاعك الحاجه للجمال .. بعد ما اخلص الردود .. تحياتى

العزيز محمد غالى : اشكرك جدا على مديحك للموضوع وان شاء الله يعجبك كل المواضيع الجايه .. اصل هو الموضوع دا اقتصادى وعشان يتشرح كان حيبقى فيه ارقام وحاجات حسابيه والناس ما بتحبش الحاجات دى .. فقلت اعمله بصوره مبسطه عشان الناس تفهم يعنى ايه الموضوع .. وطلع كدا .. بس يا رب يكون الموضوع اتفهم .. وتحياتى

يا استاذ رأفت .. هو يعنى لو مافيش بيع الا بعد 10 سنين حنعجز نبيع يعنى .. مش انا قلت احنا اللى بنعبى الشمس فى قزايز .. نبيع فى سوق سودا والورق يبقى موجود وما يطلعش الا بعد 10 سنين والمحامين حيشوفوا شغلهم وحتبقى سبوبه هايله لناس كتير الا الشعب صاحب الصكوك .. يا عم قول يا باسط .. انت مش مصرى والاايه .. وتعرف فى الكفت زى ما بيقولوا .. شوف الامثله المصريه .. كارثه .. امثله بتقول اننا شعب بيستهبل وبيستعبط وشعب يعرف يجيب الديب من ديله .. اسكت يا استاذ رأفت اصل الواحد مفقوع .. يا ريت حد يلغى لنا الامثله اللى بتدى صوره سيئه عننا وانا ان شاء الله حاجمعهم واحطهم فى موضوع قريب .. تحياتى

يا جهاد : من غير حاجه انت آخر ادب وكل اللى بييجوا عندى اخر ادب واخر حلاوه كمان وانت يا جهاد من كلامك وانا اقرأ عرفت انه صادر من بنت زى القمر وربنا يحرسها .. بس لما اشوفك حاقعد ابحلق لك كدا ومفتح ومفنجل عنيا .. بس دا لعموا فشكول بس مش لاى حد .. وانا يابنيتى لما بتكلم على الجمال بالنسبة الى اى امرأه جميله والنظر اليها اقصد لصاحب الحق وليس لاى انسان وصاحب الحق انسان ويشعر بالجمال .. ولا اقصد فى غير ما شرع الله وبذمتك بتبقى زهقانه اما الناس تبص عليكى .. يا شييييييخه .. حتقولى لعمك فشكول .. والامام ابن حنبل يا بنيتى من اهون الائمه وانما ما يشاع عنه انه متشدد ليس بحقيقى وهو متشدد فى حاجتين اثنين او ثلاث حاجات ودا مش موضوعنا .. لكن الامام احمد بن حنبل من المجددين وما يقال عنه اشاعه .. تحيات عمو صلاح يا جهاد .. انت فين يا جهاد

حبيب قلبى احوال الهوى .. ازيك يا دكتور .. والله وحشتنى يا عم انا مش عايزك تعلق على حاجه خليها كدا هى معكوكه اخر عكه كفايه .. واشكرك على مديحك لى .. ياعم قول يا باسط .. آهو فشكول عمال يفشكل وخلاص .. امال انا بشوف تعليقاتك فى كل حته وانت على قدر عالى من الثقافه والموضوعيه ..وكمان اسلوبك رشيق جدا .. ولا انت بتبعد العين عن نفسك .. تحياتى يا دكتور

الحبيبه سول : آهو انت قلتيها .. بيدى لا بيد عمرو وانا قلت فى البوست (انتو اللى بيعتم وفرطتم ولا ملامه علينا بقى)نانا لا اعيب على دول الخليج لانهم فعلا مستهلكين للحضاره وهما احسن ممنا لاننا لا عندنا حضاره ولا بنستهلك حضاره .. الحضاره هى اللى بتستهلكنا .. وياريت نبقى زيهم
ويابنتى البركه فى الشباب .. اما احنا ربى انا يكون لى غلام وقل بلغت من الكبر عتيا .. وفشكول مبسوط عشان انت بتقولى له سيدى الفاضل ولا بتقوليش سيدى الفيلسوف .. اصل فشكول بيرضى باى حاجه تؤدى الغرض آهو برضه سيدى احسن من مفيش .. مشكلتنا يا سول هى اننا بنعمل الحاجه اللى بتأدى الغرض مع انه المفروض اننا نعمل الحاجه كما ينبغى مش اللى بتأدى الغرض وخلاص يا سول انت اللى ملخبطانى ما بين سلوى وسول .. لكن من النهارده بعد قرصة الودن دى خلاص بقيت حافض سول .. سول .. سول قولى ورايا .. سول .. سول .. ايه رأيك حفضتى ولا لسه .. تحياتى يا سول

mr_raafat يقول...

" الحكيم فشكول "
شيخ المدونين تقبل تحياتي
سعيد برؤية سطورك وكلاماتك العذبة ووالله يعلم أني أتمني رؤياك والاستماع إليك وعمل حوار معاك عن العلم والمعلمين
وأنا متأكد أنه هايكسر الدنيا
ياريت تفكر في الموضوع وتقولي رأي حضرتك أيه .
سنة سعيدة وعيد مبارك

صفـــــــاء يقول...

.
ياااا عم فشكول
وجعت قلبى والنبى
قولتلك تحط لينكات المدونات نفسها مش لينكات ملفات التعريف
والنبى ربنا يخليك انت كدة كويس اوى وماشى صح
بس كمل طريقك صح بقى
وحط الروابط بتاعه المدونات نفسها مش الملفات عشان شكلها كدة عجبه
.
وبعدين مالها صرة الدنانير
دى حتى تخلى للفلوس قيمه كدة وتعمل ونس للواحد وهو شايلها وهى بتشخلل كدة
.

احمد بدر الدين يقول...

عم فشكوووووووووووول

بجد بوست جامد

انا ذهلت اما لقيت الشغل الى على الشمال

الشمال بقى يميمن

والروابط دخلت فى الاسماء

والحكاية هاست

ربنا يستر

بالنسبة للصكوك

مين قال ان احنا حنتصك على قفانا

الموضوع وما فية

ان الحكومه حتملكنا البلد رسمى

اية الى فى الموضوع يعنى

وبعدين اية المشكلة اما نتصك صك كمان على قفانا

ماهو احنا بقالنا 28 سنى بتصك

ولااية

اما بالنسبة للجمال

فيبدو ان حركة المراهقة العامة السائده اصابت كل شرائح المجتمع

ربنا يسترها

اقصوصه يقول...

LOOOOOOOOOOOOL

بابا فشكول عداد الحكمه في ارتفاع مستمر :)

ان الله جميل يحب الجمال بابا فشكول:)

ع فكره فركشاوي لازم يطلع بره!

لانه علق تعليقين!

كان المفروض تعليقي يكون رقم 18 مش19

بس فركشاوي طماع لا تحطه فالفيفرت!

هــو..مش ..نـو يقول...

يا عم الحكيم الفيلسوف..شوف .
والله انا بحبك .والناس كلها باين بتحبك .ومرشحينك لمشيخه مشايخ المدونين ..اعرف الحكايه ايه واحكم عليا ...حتي ابطل تدوين .
انصفني ...ولا العدل كمان عندكم مات من سنين؟

fashkool يقول...

الجميله آبى .. تحياتى .. ان شاء الله المره الجايه اكبر الخط عشان خاطرك
لأ .. هما مش عايزين يبيعوا ويدوكى الثمن دول حيدوكى الثمن فى شكل صك مجانى وانت حره بقى فيه تبيعى الصك تسكى بيه اي حد تانى .. اهو تبقى اخدت حقك وخلاص وما لكيش عندنا حاجه .. والباقى انا شرحته فى البوست بمناسبة العيد كل عام وانت بخير

الاستاذه آمال
وفيه ناس تانيين بتقول ان الكمبيوتى قعد يقول .. يا دهوتيييييييى .. وقعد يخرف ويميل يمين وشمال لحد ما طق وولع وطلع دخان كل عام وانت بخير ونتقابل بعد العيد

الاستاذ رأفت .. انا تحت امرك بس انت قول لى ازاى ولو انى زعلان من بتوع رابطة المنوفيه .. لكن لازم نشوف حل لحكاية مدونة الرابطه دى كل عام وانت بخير ونتقابل بعد العيد

يا صفاء يا بنتى .. انت مش شايفه انى عملت افتكاس وما حدش يعرف يعمله غيرى .. والله بالرغم من انك شايفه ده كلام فاضى لكن انا حاسس انى عملت حاجه كبيره قوى .. فوتى بقى يا صفاء وقولى لى كويس يا فشكول وارفعى من معنوياتى دا انا قعدت اعمل فى الافتكاسات دى يومين تقومى انتى تطلعى شغلى على فاشوش .. بس استريح لحد بعد العيد وبعدين ابتدى افتكس من جديد كل عام وانت بخير ونتقابل بعد العيد

ايه رأيك يا احمد فى الافتكاسات بتاعة عمك فشكول دى اصل اما لقيت فى التحرير الكتابه باللغة الانجليزيه قمت قلت انا بكتب بالعربيه يبقى ليه مكتوب بالانجليزيه قمت غيرت للعربيه قوم ايه الكمبيوتر جه جايب الشمال يمين واليمين شمال .. بس طلعت حلوه وانا مبسوط بيها .. ياخى شجع وصفق لفشكول بقى كل عام وانت بخير ونتقابل بعد العيد

الحبيبه اقصوصه .. تحياتى
فركشاوى اصله بياخد بتاره من مجنوون واول ما لقى الشغل لسه صفر حجز تعليقين .. وانا اللى بدفع الثمن .. ما علهش فوتى له المره دى وانت لو جيتى اخر تعليق ابقى مبسوط عشان بنتى حبيبتى اقصوصه جات .. كل عام وانت بخير يا اقصوصه وابارك لك بعيدكم الوطنى والعيد الكبير وان شاء الله نتقابل بعد العيد

ايه بس الحكايه يا هو .. والله ما انا فاهم حاجه انصفك فى ايه اللى مزعلك وانا اعمله لك انا ما يرضينيش زعلك قول ايه الموضوع .. كل عام وانت بخير ونتقابل بعد العيد

عـــفـــراء يقول...

السلام عليكم
استاذنا الجليل والمبجل
ايام مباركه ديما عليك وعلى الاسره الكريمه
وكل عام وانت بكل الخير
ويارب عيد سعيد عليك

بطلب رجاء من حضرتك
ياريت يافندم تكبر الخط شويه لانى بعانى لما
اقرا وبحس انى محتاجة عدسة او مكبره
هههههههه
شكلنا اتفشكلنا احنا كمان
ولوانها مش هتفرق كتير
كل سنة وحضرتك طيب
خالص تقديرى .........

رئـــــيسـة حزب الأحلام يقول...

حلو اوى ياستاذ فشكول
بس عارف بحترم اوى الناس اللى بتصرف بسرعة
وربنا المعين
تحياتى

طـــائر الليــــل الحـــــزين يقول...

يالههههههههههوى يا عم فشكول هناخد اكتر من كده على قفانا
طب ما يمشونا بالمرة من البلد دى خالص
مهى مش بتعتنا وعلى رأيك مشفناش فيها يوم حلو نحلف بيه
الناس مش بتتعب من اللى بتملوا فى الشعب
والشعب يا ولداه ساكت وراضى مش عارفة ليه ولا لحد امتى
ربنا يستر على ولادنا يا عم فشكول اصل على ايامهم ممكن متكونشى اسمها مصر اصلا
او ميبقوش مصريين خالص
او يمنعوهم يعيشوا فيها
بجد بوست اجمل من رائع يسلم ايديك وعقلك
وكمان وجهة نظرك على مواضيع صكوك المال العام
او احسن نقول صكوك الخيبه
والنيبة
بحيييييييييييييييك يا جميل على الكلام الجميل
وكل سنة وانت طيب اضحى سعيد عليك وعلى الامة الاسلامية كلها
وربنا يستر
ياترى يا عم فشكول العيد اللى جاى هنكون لسه فى مصر والا هيكونا طردونا منها

بس خلاص ... يقول...

تعقيب
احم احم احم (هاتى يابنى الكاميرا عليا شويه )... وهكذا اصدقائى البلوجرية ..قضينا هذه الامسيه ..بحديث اللا معقول مع الفيلسوف فشكول ... وراينا واستمتعنا بالفشكلة الاقتصادية ..وشوفنا ازاى الفيلسوف توصل لحل المسأله الغير عاديه بأن 5+5=10قطع حديديه ..
وكيف فشكل الدنيا على شمال مدونته بالروابط الاستثنائيه .... وانه صال وجال بحديثه عن العبط والاستهبال ..واوضح نظرية الاستغلال ..
وكانت صديقتى سمكه واحده تحاوره بكل تركيز واستيعاب وهو يذكرنا بأيامنا المنيله وظروفنا المهببه بهباب ..
ولما شافها قالى جايبه سمكه واحده ..طب كنتى هاتى كمان علبة تونه ..ده انا كده نأبى طلع على شوته ...
وانجعص وانبعج واوضح نظرية الصك على القفا ( لامؤاخذه يعنى ) وراينا براعته فى تعبأة الهوا فى أزايز وقاعد يلم فى انصاص وبرايز وادينا له كل اللى معانا زى ماهو عايز ...ومفهومه عن الجمال وعظمته فى حب الاطفال ...وفجأة انقطع الارسال وتوقفنا عن السؤال ..وقال الفيلسوف هاتى كيس من المال وانا اديكى زر القلنسوه تعمليها اريال وتكملى القيل والقال..ولكننا اعتذرنا فى الحال ورجعنا فى كلامنا وعملنا فيها عيال ... اجرى ياسمكك يادوب فضل معانا حق التاكسى

محمد الجرايحى يقول...

استاذنا الفاضل
السلام عليكم ورحمة الله وبركاته
مع هذه السخرية اللاذعة..لاأملك إلا أن أحييك على هذا الأسلوب الرائع وعلى هذه البلورة متمكنة وباقتدار من جعلنا نضحك على بلاوينا....
وخاصة أخى حكاية الملكية ( العامية) ربنا يستر على العباد والبلاد من هؤلاء أعمياء البصر والبصيرة.

ن يقول...

السلام عليكم
كل عام وحضرتك بخير
وكل عام والاخوة المدونين بخير ..بمناسبة عيدالاضحى أعاده الله على الجميع بالخير والبركات .
لاحول ولا قوة الا بالله الكمبيوتر إنهار أومال إحنا نعمل ايه .
أنا عندى ملحوظة على أضحية العيد ..أوم ايه على رأى الاستاذ فشكول هما عاملين يعلنوا عن صك الاضحية اللى هيوزعوه على الفقراء والمساكين أوم ايه مرة تانية ونسوا الموظفين أنهم أولى الناس حالياً بصكوك الاضحية ولا إيه ياأستاذ فشكول حضرتك شايف ايه.
مع خالص تحياتى

أحــوال الهـوي يقول...

fashkool
حبيبي جميل الروح
بدون مبالغه لو انتخبنا الاكثر شعبيه و لا يختلف عليه اثنين
يبقي عمنا فشكووول .. دمت لنا صديقا دائما و قلب يجتذب ايه كل القلوب

تحياتي

Soul.o0o.Whisper يقول...

fashkool


سيدى الفاضل ...:)

أولا : منورنى بالتعليقين

ثانيا : و كل سنة و أنت بصحة و سعادة يارب
و كل المسلمين

ثالثا :مشكلتنا يا سول هى اننا بنعمل الحاجه اللى بتأدى الغرض مع انه المفروض اننا نعمل الحاجه كما ينبغى مش اللى بتأدى الغرض وخلاص *

حقيقى حضرتك ما تعرفش أد ايه وقفت ادام كلامك دا
حكمة و فلسفة أكثر من رائعة
من سيدى الفيلسوف الفاضل
ههههههههههههههه


رابعا بئا : سول مبسوطة من فيلسوفها الفاضل فشكول عشان حفظها اسمها
حتى كدا
سووووووووول .. سووووووول

هههههههههههههههههههه






خالص تحياتى

من غير عنـــوان يقول...

كلام ممتع
ذكريات جميله
رصد هام لواقع من يفهم في كل الأشياء

أمنياتي

حاجــ عيال ــات يقول...

السلام عليكم
العزيز الغالي فيلوسفنا كمان عمو صلاح

ريحتني يا عمو وهو ده اللي المفروض يكون
وعن أدبي ..متشكرة رأي حضرتك

وعن حنبليتي أعلم جيدا أن أبو حنبل هو من أكثر الأئمة تيسسير على المسلمين ومايقال عنه تلفيقات لا اساس لها من الصحة
لكني كنت استخدم قول دارج ليصل معنى معين
ومش هعمل كده تاني

سلام ياحمو بقى عسان ماتأخلس

مصعب صلاح يقول...

ايه الجمال ده كله ياعمو فشكول
ربنا يخليك للمدونين الشباب

ما احنا محتاجين فيلسوف خبره زي حضرتك عشان منضلش الطريق برضه
وبما انك فليسوف المدونين اقترح حل لمساعدة مصر في الخروج من الضنك اللي هيا فيه
----------------------------
ما تزعلش استاذنا علشان خذفت البوست بتاع المريخ
احنا عندنا قوانين موجودة في الجنب وحضرتك خالفتها
ياريت ما تزعلش وتنور المدونة ببوست جديد
عن المنوفية

maha zein يقول...

جيت متاخرة انا للأسف
اعذرني مكنتش هنا اصلا كنت هناك
ونتي كان فاصل وبلاوي
الاهم
دي كلها صرر خدتها فى غيابي
النظرية بقه يا فيلسوف ان موضوع الصكوك ده فعلا اتطبق في روسيا فعلا وفشل بالثولوث
بس النظرية بردو انهم بيقولوا انهم بيدرسوا كل اذرع الفشل اللى حدثت في الدول اللى طبقته عشان يتجنبوها
لكن هقول ايه واعيد ايه
حتي لو تجنبوا نقاط الضعف في التجارب الاخري
هتلاقيهم بردو عندنا سيادتك هيضربوا الرقم القياسي في الفشل الذريع اللى ملوش مثيل ولا ليه حلول
عموما حتي شعبنا التعبان الهلكان الغلبان بمجرد ما يلمح بس ان ليه اي فلوس حتي لو ربع صرة من الشلنات عند الحكومة هيروح يبيع
لا ويبيع لمين ده هيبيع للحيتان ذي ما انت قلت
النظرية انهم قبل ما يقسموا التركة كده كان المفروض عملوا للشعب ثقافة مالية
مفيش ثقافة مالية اصلا ففى النهاية الخصخصة اللى هما عوزين يعملوها هيعملوها بردو ولكن بطريقة شرعية في اعين الشعب
تحياتي يا فيلسوف
وبقولك عديتي مش هسيبها سيادتك
ومتقول معييش انت لسة واخد صرتين امام عيني

mahasen saber يقول...

استاذى فشكول افهم بس الاول ده ايه ده اليى على الشمال
افهم ده انا معملتهاش
هو ده نتاج شرحى

mahasen saber يقول...

اما الاحساس بالجمال فيكفى اننا نحسه ونشوفه فى شكل مدونة حضرتك الجديده
لا بجد طبعا يا استاذنا ومن غير مجامله فى روح كتابات حضرتك الجذابه والمفيده

وكل سنه وحضرتك بالف الف خير وسلام

همس الاحباب يقول...

ههههههههه
ههههههههه
مش ممكن انت مشكلة يا عمنا
وبقيت فيلسوف يا فشكول
يا بركة دعاء الوالدين
وبركة سيدى المحظوظ
ههههههه
بجد اخر فشكلة فى الدنيا
يا عمنا ايه الكلام الجامد ده
جمال وصكوك ايه الجمال ده
بقولك ايه مفيش صرة من الدنانير
وانا اقولك على سر مغارة على بابا
مش مصر طلعت مغارة يا جدع
واللصوص واقفين على باب المغارة
ولا اقولك اسيبك انا وارجع فى وقت تانى
لانى الليلة مشغول
تحياتى استاذى العزيز

احمد بدر الدين يقول...

عمى العزيز فشكوووووووول

كل سنة وانت طيب

اية اخبار الدبح السنادى

ربنا يستر يبدو ان الحكومة قررت تضحى بينا

بيقولوا منعوا دبح الخرفان

نبض الروح يقول...

فعلا كلام جميل جدا بأسلوب ممتع وطريف اممممممممم أعجبني البوست كثيرا
وكل سنة وإنت طيب :)

أحــوال الهـوي يقول...

السلام عليكم

كل عام وانتم , والاسرة بخير ..بمناسبة عيد الاضحى المبارك ..أعاده الله عليكم و علي المسلمين بالخير والبركات .


تحياتى

محمد يقول...

السيد المحترم
فشكول
أنت رائع
أكتب
أحكى
أطربنا
بروحك الطيبه
وكلماتك
تحياتى لأبنه أختك التى أكتشفتك كمدون

حنين القلب يقول...

السلام عليكم
دى اول مرة ازورك فيها وان شاء الله مش اخر مرة
بجد اسلوبك رائع وطريقه سردك جميله جدا
ودمك عسسسسسسسسسل

يسلم ايدك يا عم فشكول
تقبل مرورى

انت تسال والكمبيوتر يجيب يقول...

دعوه

تحيه طيبه
ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
المدونه
http://netonradio.blogspot.com
الموقع
http://dear.to/cairo
وموقعنا باللغه الأنجليزيه
http://wakeup.to/computer

محمد الجرايحى يقول...

عمنا وأستاذنا الكبير : فشكووول
أين أنت ؟؟؟؟
أدعو الله تعالى أن تكون بخير
لاتطل الغيبة..نحن فى انتظارك

أخوك
محمد

daktara يقول...

ازيك يا عم الفشكوووووووووووووول
يارب تكون بخير
حلو الشغل الجديد اللي في المدونة
عقبال السقف والمصيص
بس انا عندي سؤال
هو انا اسمي مكتوب؟؟؟؟؟؟؟؟؟؟؟

علي العموم اي حاجة احسن من مفيش
اه
علي فكره
اما تيجي تبيع نصيبك في الدولة ابقي قولي ممكن ابيع معاك لو عندك مشتري حلو بخطين زرق
او اشتري انا حتي هو يعني مليش نفس يبقي عندي دولة

انظر حولك
د. خالد عزب

daktara يقول...

http://unbrainwasher.blogspirit.com:80/list/dictionary/atlas_explanatory_di.html

جمهور الاهلي العظيم

daktara يقول...

اخلاق جمهور الاهلي
http://www.youtube.com/watch?v=KOR30b-GuEk

واحد من العمال يقول...

تحياتى يافيلسوف المدونين
كل عام وأنتم بخير وبصحه بمناسبه حلول عيد الأضحى المبارك أعاده الله علينا بالخير وبالعلم وبالأبداعات
---------
بعد أذنك طبعا
تمت أضافتكم الى قائمتنا للمدونات الصديقه مبروك ياعمنا
ودمت بصحه وعافيه

الازهرى يقول...

حبيبى الاستاذ فشكول

دون الدخول الى متاهات الفلسفة اللولبية وخاصة مع الميزانية الغير العفية
اتفق معك فى ماقلته وللاسف الكثير من الناس غافلين عن ما يدبر وفرحين بهذا الموضوع وخاصة مع تجميله اعلاميا


تحياتى
وكل سنة وانت بالف خير وسلام
وتحتكم على الكثير من صرر الدنانير

nour shahen يقول...

المره دا للتهنئه بالعيد
كل عام وانتم بخير... نظرا للظروف الأقتصاديه وارتفاع الأسعار هذه التهنئه صالحه لمدة سنه وتشمل: عيد أضحى _ تعيين _ ترقيه _ نجاح _ سنه جديده _ مولود _ نقل _ زواج ... الخ

Beram ElMasry يقول...

اخى . fashkool
السلام عليكم ورحمة الله وبركاته
اجمل التهانى بمناسبة عيد الاضحى المبارك اعاده الله عليكم وجميع الاهل بالخير والبركة ، وجعلنا واياكم من الملبين فى العام القادم
والسلام عليكم ورحمة الله

حـــــ الــجــنــة ـــــور يقول...

السلام عليكم
أنا جيت على سيرت الدنانير والعيد داخل يعني يا أستاذي الفاضل العيدية موجوده وحور بتقول كل سنة وإنت طيب يا أبو الإحساس بقك بيطلع حكم ونظرتك للجمال حلوووة جدااا ربنا يبارك فيك ويحفظك لاهلك بجد بوست جميل وكلمات ليه معنى بكل حرف تسلم يا أستاذي لك من شعب المليون ونصف مليون شهيد مليون ونصف مليون تحية شيل منهم تحيتي أكيد لما تجيب العيدية هههه
بجد سعيده بتواصلي معاك ويشرفني جدااا إن مدونتي المتواضعة تكون ضمن المدونات المفضلة لديك يا أستاذ الفيلسوف
كل لحضة ونحن من الله أقرب وكل المسلمين بصحة وخير وطاعة وسعااادة يارب
تقبل مروري وخالص إحترامي لشخصك الكريم

حنان سعيد يقول...

استاذ فشكول
اولا انا مبسوطه بجد
اني موجوده في قاءمه الناس الي حضرتك بتابعهم
بجد دي حاجه اسعدتني جداا

ثاني حاجه بقى
كل سنه وحضرتك بالف صحه وسلامه
وعيد سعيد ان شاء الله

ثالت حاجه بقى
ان بس خلاص وست سمكه واحده هانم دي
خساره فيهم الكلام
احنا بقى عايزين نعرف
ومستعدين نقعد ايام
ممكن حضرتك تقولنا بقى ايه الي هيحصلنا فيالايام الي احنا فيها دي
ربنا يسترها علينا كلنا

تحياتي لحضرتك دائما

همس الاحباب يقول...

كل سنة وانت بخير
وعيد سعيد عليك يا عمنا
تحياتى

سمكه وحده يقول...

هههههههههههه بتجيب سرتي وكمان بقولك فيلسوف حاف وبتغرغر بيا ماشي يا استاذا فيلسوف مكنش العشم ده حتي انت عمنا كلنا

وشكرا علي سؤالك عليا ربنا ميحرمناش من السوؤال الجميل ده يارب من شخصيه جميله ذيك
بالنسبه لصرر الدناننير تصدق بالله وانا صغيره زمان حلمت ان السما بتنزل عصايان عصايه يعني والناس بتجري تحوش علشان هنشتري بيهم الحجات بدل الفلوس وانا اجري والم الا قولي يا سيدي الفيلسوف انا بقول سيدي اهو منزله العصيان في الحلم ايه؟

كان حلم غريب جدا حكم احلامي وانا طفله كانت كلها غريبه سعات اطير وسعات يجري ورايا ثور وبلاوي بعيد عنك

عشان مطولش عليك صرر الدنانير اللي ادنهالك دي كلها مسكوكه يعني مزيفه
وبعدين مالها سمكه واحده مش انت قلت بلسانك بسمك البحر كله هنرجع في كلمنا تاني والله اخد البت بس خلاص ومنجيش نديك صرر من الدنانير تاني ولا نسيبلك تضحك علينا



الجد بقي
كلامك جميل واسلوبك تحفه بجد وربنا يخليك لينا كلنا وتفضل تمتعنا باحلي الكلام وعيد سعيد عليك وعلي اسرتك الكريمه يارب والبت سومه لما تروح عندكوا اتوصا بيها بحته لحمه كبيره ماشي
تحياتي
سمكمك

Ahmed Al-Sabbagh يقول...

كل سنة وانتم والاسرة بخير

م/ الحسيني لزومي يقول...

تقبل الله منا ومنكم
وكل عام وانتم بخير

طـــائر الليــــل الحـــــزين يقول...

انا جيييييييييييت اقولك كل سنة وانت طيب
واسرتك وكل احبائك بأحسن صحة وفى افضل حال
واضحى سعيد عليك وعلى امة الاسلام جميعا
تحياااااااتى

ahmed_k يقول...

رفع الحجيج أكفهم
يرجون رحمة ربهم
ورفعت كفي أدعوه
يجعل ثوابك مثلهم
وكل عام وأنتم بخير

وفاء بركات يقول...

السلام عليكم
كل سنه وحضرتك والأسره الكريمه بخير
أطال الله في عمرك وفرحك بأولادك
وأحفادك..
ودايما مائدتك عامره بخيرك وعزك
تحياتي