الجمعة، 2 يناير، 2009



تاج من ابناء كثيرون مدونون اهدوه لى واشكرهم على ثقتهم فى وكل حب وتقدير لهم .. وانا على الرغم من انى لا احب التيجان .. لكن حاحاول اكتب التاج ده .. وبرضه اخليه على مزاجى انا ولأنى هذه الايام امر بظروف عائليه صعبه وربنا يعديها على خير وما عنديش وقت للنت وعشان اصحابى واحبابى المدونين ما اغيبش عليهم وعشان كمان التاج سهل ومش عايز تحضير وممكن اضرب تاجين تلاته بسهوله قمت بكتابته


1- لو كان ينفع تختار عصر تعيش فيه هيبقى انهى؟ ومين الحاكم؟


فى ظروف تانيه كنت حاختار العصر الفاطمى . عشان اشوف بنت خمارويه (قطر الندى ..وكنت حاطلب ايدها من ابوها .. صحيح هو مش كان حيرضى .. لكن كنت حاعمل اللى على خصوصا وان (قطر الندى) بيقولوا كانت حلوه قوى .. لكن للظروف الحاليه وظروف غزه انا موافق على العصر الحالى .. بس يا ريت اكون انا الحاكم وافتح المعابر .. حتى لو كانت حماس غير شرعيه وانها لا تمثل الشعب الغزاوى كنت انا امثل الشعب الغزاوى .. وكنت ابقى ولى امرهم واغيثهم واجيرهم من الهم اللى هما فيه ده وكنت وانا الحاكم برضه .. البس حزام ناسف وافرقع فى الصهاينه.على الرغم من انى عقلانى ومبحبش العاطفه لكن اليوم جلست امام قناة الجزيره والبى بى سى كتير وامبارح قناة الساعه وسمعت مصطفى بكرى وكمان سعت مواطنه بتصرخ باعلى ما فى صوتها وكانها بتولول وعماله تدى الحكام على قلبهم بالكلام ومن ساعتها وانا مكتئب .


2- ايه اكثر حاه بتحبها فى رمضان؟


اكتر حاجه بحبها فى رمضان .. اللحمه .. ثم اللحمه .. ثم اللحمه .. بس هى فين .. اصلها بتتغندر علينا وبقت غاليه قوى .. لكن انا بقول هى اكتر حاجه بحبها .. مش مهم بقى هى تيجى ولا ما تجيش .. تتغندر على ولا ما تتغندرش هو يعنى كل حاجه انا عايزها بتيجى .. يعنى مثلا لو عايز امد الغزاويين بالسلاح .. دا ممكن .. آهو انا اقول على اللى نفسى فيه وخلاص ورزقى على الله


3- اوصف أجمل فطار ممكن تفطره؟


اجمل فطار ممكن افطره .. اولا .. كوب من عصير المانجو .. ثم حتة لحمه .. هو يعنى الكلام بفلوس .. اللحمه هى اللى بفلوس .. بعدين .. برضه حتة لحمه .. ان شالله ما عن حد حوش .. اصل اللحمه بقت المنى والطلب .. وبعدين خلاص . مش عايز حاجه.


4- لو انت حاكم هتكون عادل ؟ وهتعرف ازاى؟


لو انا حاكم .. ما اعرفش حاكون عادل والا ايه .. لكن اهم حاجه ان اوصى وزير الفلوس يجيب لى شيك بـ 100 مليون دولار واقوم على طول حاططهم فى بنوك سويسرا .. هو يعنى انا ما ليش نفس .. بعدين حاخلى الواد اسامه ابنى وليا للعهد .. ومحمود الولى التانى للعهد وبعدين الواد احمد ابن ابنى الولى الثالث للعهد واوصيهم ان يخلوا الحكم فى ايديهم طول عمرهم وان كل واحد لما يمسك الحكم يقوم يوصى وزير الفلوس بشيك برضه بـ 100 مليون دولار .. يعنى زى ابوهم .. اما ل يطلعوا من المولد بلا حمص .. كمان حاخلى طياره فى المطار عشان لو قامت ثوره على ولا حاجه اقوم اركب الطياره وجرى على بره .. وطبعا الفلوس مستنيانى هناك .. وبعدين لا حاحكم بالعدل ولا حاجه .. عدل ايه فى الحوش دول .. دى الشعوب كلها حوش وعايزه واحد يشكمهم وبعدين ما بيعرفوش حاجه .. هما يعنى حيعرفوا اكتر منى .. دا انا الفيلسوف وانا الحكيم .. وكلامى كله حكم وحكمتى اكتر من الناس الحوش دول كلهم


5- مين أكتر اعلامى بتحبه؟


اكتر اعلامى بحبه .. عمرو اديب ..وكمان حمدى قنديل .. وكمان منى الشاذلى ... قمر .. والله قمر 14 ولو ممكن يعنى ازود من عندى مين الفنانه اللى بتحبها .. يعنى البت الحلوه الاموره دى اللى اسمها نانسى عجرم وهيفاء ويا سلام لو استوردوا لى البت اللى احلى من القمر اللى اسمها كاترين زيتا جونز .. مش انا الحاكم بقى .. يعملوا لى اللى انا عايزه


6- لو ممكن شغلانه تانيه تختار ايه؟


شغلانه تانيه .. كان نفسى اكون نجار .. اصل النجاره دى فن وفشكول فنان وبيحب الفن .. اصل قطعة الخشب دى يا سلام لو فى ايد فنان يعمل سرير ولا مكتب ولا باب فى منتهى الجمال .. ولو ما فيش نجاره .. ممكن اكون ترزى .. برضه تشكيل حتة القماش كلها فن وحرفه عاليه .


7- تانى بلد تحب تعيش فيه بعد مصر ؟


وتانى بلد ليه .. ممكن نخليها اول بلد .. شوفوا .. اى بلد من بلاد اوربا الغربيه .. بس بلاش اى بلد عربى بيسحلوا فيها الناس بتاعتها وبيطلعوا عينهم وبيعاملوهم على انهم حيوانات مش بنى آدمين .. لكن اوربا الغربيه .. ناس عايشه .. كفايه ان كل سنه حاروح اصيف او اشتى فى بلد زى مصر ولا زى سويسرا ولا زى الاردن ولا زى ... اللى يعجبنى .. اوعى حد يقول الاسلام .. الاسلام فى كل حته .


8- اوصف ترتيبات أجمل فرح ممكن تحضره؟


اجمل فرح ممكن احضره .. طبعا بما انى الحاكم .. فرحى انا .. هو فيه احسن منى .. طبعا انا الحاكم .. فى يوم الحنه .. اقعد على كرسى والحنه فى ايدى ورجلى محطوطه على كرسى الحمام عشان الحنه ما تبوظش .. ويوم الدخله ..اركب حصان والف البلد والناس تزف العريس .. واروح على دار العروسه .. اللى هى مثلا يعنى كاترين زيتا جونز واقوم واخدها من ايديها وشاددها وبحركه فروسيه تلاقيها راكبه ورايا .. وهاتك يا جرى بالحصان والجدع يلحقنى ونخلف بقى صبيان غير الواد اسامه والواد محمود .. حيبقى شعرهم اصفر وناعم وعينيهم خضرا مش زى عين اسامه السوده وعين محمود البنى .. لا حيبقوا ولاد ملك بقى وحيبقوا اولياء للعهد . ولو رجع بينا الزمان شويه كنت اعمل فرح لزواجى من اللى كانت بت حلوه سنيوره جين فوندا او كارول وولش .. او جريتا جاربو .. او الوليه الاموره جينا لولوا بريجيدا .. مش انا ملك .. حد يقد ريقول لى لأ ولا حد يطول يتجوزنى.


9- بتراعى كلام الناس والقيل والقال؟ وليه؟


طبعا براعى كلام الناس والقيل والقال ... ليه ؟ .. عشان احنا مش عايشين لوحدنا .. لازم الواحد يعمل حساب لكلام الناس .. لكن فى حدود .. المهم انه يعمل حساب .. والانسان السوى .. فى بيته وفى الشارع وفى مكتبه وفى كل حته .. وكلام الناس لو مش حلو يبقى الانسان مش سوى.


10-صحيت من النوم لا موبايل ولا كمبيوتر ولا كاميرا ديجيتال ورجعنا لعصر الأحصنه والحمام الزاجل؟


يا ريت عشان يبقى ما فيش ثمن كروت كل عيل يخلص يقول يا بابا عايز كارت والحاجه بقى ام اسامه عايزه كل اسبوع كارت وانا كمان عايز كارت والعمليه بقت مهببه كروت ولا كمان حادفع نت .. يا دوب حصان ومربوط فى الزريبه وشوية تبن وشوية كسب وخلاص.


11-لما بتحب تهرب من كل حاجه بتروح فين ؟


يا سلاااااااااام .. بروح ارضى واجيب الغبيط بتاع الحماره اللى بنشيل فيه الرتش والسباخ .. وافرشه تحت شجرة التوت وانام فى عز الحر والهواء بيبقى جاى من بحرى ويخبط فى نافوخى وعلى طول الواحد ما يوعاش لنفسه الا المغرب .. وساعات بقى العصر اخلى الواد يجيب لى كوزين دره من الدره النحت .. اصل بقى بعيد عن السامعين الاسنان مش فى حاله جيده .. قال عايز اتجوز كاترين زيتا جونز قال .. ده انا ما انفعش فى حاجه خالص ومن تانى يوم الوليه حتصوت وتولول وتقول يا بختك المهبب يا كاترين .. يا بختك المنيل يا كاترين .. يا نصيبتك السوده يا كاترين .. الغراب يا وقعه سوده .. وبعدين اخليه يعمل كباية شاى من الشاى الهباب على الراكيه بتاعة الدره والكبايات القزاز الصغيره اللى بيبقى فيها يا دوب بقين شاى .. بس شاى اكسييييييير


12-امتى أول مره أخدت فيها نفس وقلت ياااااااه أنا كبرت؟


أما البت ملك حفيدتى من بنتى الهام جت ما حسيتش قوى يعنى .. بس اما الواد احمد ابن الكلب ابن ابنى اسامه جه .. وامه بتقول روح لجدك يا احمد .. وقع المحظور وحسيت انى كبرت .. وانا كنت فاكر نفسى شباب وبفكر قال اتجوز كاترين زيتا جونز .. جاتنا نيله .. يا اخى روح شوف لك قبر ارقد فيه .. على رأى اخوانا الصعايده .. قبر يلمك.


13-بتشرب سجاير ولا لا؟ وايه رأيك فى الرجاله والستات اللى بتشرب؟


للاسف آااااه بشرب سجاير .. وبعدين عايزين رأى فى ايه .. يعنى حاقول ايه عن اللى بيشرب سجاير وانا بشرب سجاير .. لم نفسك يا واد منه لها له.


14- بتعرف ايدك الشمال ازاى؟


كتير بألبس جلابيه واكويها واعمل فيها عمده .. ولما احط ايدى فى سيالة الجلابيه اعرف ان التانيه الشمال عشان سيالة الجلابيه بتبقى على اليمين

15- اكتر اله موسيقيه بتحبها؟


يااااااااااه .. حتفكرونى باللى مضى ... اكتر أله بحبها هى آلة الجيتار ... لانى كنت زمان عازف جيتار ممتاز ... كنت العب مولدى .. وكنت العب كمان رتمست ... وكنت كمان لما يغيب البيز مان .. كنت العب بيز جيتار .. وكنت زمان وانا صغير فى السبعينات عضو فى فرقة اسمها دريمرز وكنا بنعزف فى شارع الهرم وكنت بآخد فى الليله 15 جنيه وآخر النهار اروح مديون بـ 5 جنيه .. كانت ايام .. الحمد لله ان ربنا ابعدنا عنها .. لكن عندى جيتار اسبانيولى .. ولما يوحشنى الكيف اجيبه وادندن عليه شويه


16- ليه قله الذوق والنخوه اتعدموا؟


شوف يا اخوانا .. من يوم ما قامت الثوره وشوية العسكر مسكوا البلد علمونا ان ارفع رأسك يا أخى .. قمنا كلنا رفعنا رأسنا على بعض وقلينا ادبنا على بعض باسم الحريه .. لكن ما قدرناش نرفع رأسنا ونطالب بحقوقنا من الحكومه .. وعشان كدا .. عشان نثبت اننا احرار نقوم نرفع راسنا على بعض ونقل ادبنا على بعض وكل واحد همه مكفيه ويقول ما ليش دعوه وانا مالى .. وهكذا انعدمت كل القيم وكل الشهامه وكل حاجه.


17- ايه الحاجه اللى لو حصلت هبقى سعيد ؟


مش عارف .. اصل السعاده عندى مش باسباب .. ساعات من غير سبب تلاقينى سعيد .. وساعات من غير سبب برضو تلاقينى مكتئب .. لكن عموما اما يتجمع ملك واحمد ومحمود الحفيد الثالث من الهام وابهاتهم وامهاتهم ويبقى البيت يضرب يقلب والبطاطين على الارض والفازات متكسره وما اعرفش اشوف ولا اسمع قناة الجزيره .. ولا حتى تلاقى مكان تقعد فيه والشقه كلها مليانه مخدات مرميه على الارض والاقى ام اسامه صوتها عالى وعماله تصرخ من العيال .. اكون يومها فى منتهى السعاده.


18- تحب أرض زراعيه ولا اجنس عربيات ولا كام عماره ولا فلوس فى البنك؟


والله اللى يجيبه ربنا كويس .. الحمد لله انا عندى ارض زراعيه .. وعندى عربيه كحيانه .. وياريت تجيب فلوس وما لكش دعوه انا حاعمل بيها كل حاجه .. بس المهم الصحة والستر .. ما هو احنا المصريين عشان ندارى غلبنا وخيبتنا ووكستنا نقول الستر .. هو احنا حيلتنا غيره


19- تحب؟ البحر ولا النيل؟


بحب الاثنين .. النيل عشان له ذكريات جميله ظمااااااااان ... قوى من ايام فحت البحر ... والبحر .... ما اقدرش اغيب عنه سنه واحده ولحد الوقت وانا بحب العوم والبلبطه وولادى يجروا ورايا فى البحر عوم ولا يلحقونيش.


خلص التاج .. وخلصته بسرعه من غير ما اعد له ولا اعمل له مسوده .. بس عشان خاطر رئيس التحرير ربنا يعلى مراتبه ويبقى رئيس مجلس ادار التدوين اللى كل شويه ييجى يعلق ويقول لو ما عملتش بوست حارفدك .. وعشان الغالى فركشاوى هو كمان اللى بيستعجلنى .. اصله صاحب رئيس التحرير وعشان كدا بخاف يفتن على لرئيس التحرير وبحاول اراضيه عشان ما يشتكينيش لرئيس التحرير اللى ممكن يرفدنى .. مش كل الريسه عندنا بيقدروا يرفدوا وكمان يسحلوا ويضربوا اجدع واحد على بطنه .

هناك 58 تعليقًا:

من غير عنـــوان يقول...

الإجابات جميله ومسليه كمان

بس كفاية لحمة بأه يا راجل يا عجوز

ربنا يديك الصحة وتاكل لحمة كتيييييير

أمنياتي

كيــــــــــــارا يقول...

انا كمان بحب العصر ده
وفرح قطر الندي سيظل اسطوره

enjy يقول...

ظروف عائلية يارب تكون خير وتعدى على خير وييجى وراها خير.......اجابات التاج ظريفة....غزة اجتياحها البرى بدأ.....سلام

zainab يقول...

لحمه عندك حق تحب اللحمه
أنا كمان بحبها
يا سلام على القعده الجميله اللى بتاكل فيها درة وتشرب كوباية شاى مافيش شويه و كوز درة

تحياتى

rovy يقول...

اجابات جميله و دمها خفيف
انا كمان بأحب الجيتار جدا لأنه بيفكرنى ببابا الله يرحمه كان بيحبه جدا و كنت اتعلمت شويه عليه
ربنا يبارك لك فى اولادك يارب و يخليك لهم و كمان احفادك و تشوف اولادهم

كل عام وانت بخير

خالص التحيه

محمد الجرايحى يقول...

السلام عليكم ورحمة الله وبركاته
غزة الآن تعانى من قصف بحري وبري وجوي
يصاحبه هجوم برى...
هى الآن فى احتياج لكل قلب مخلص

طـــائر الليــــل الحـــــزين يقول...

عم فشكول
فى الاول حبة انى اقولك كل سنة وانت طيب بمناسبة العام الهجرى والميلادى
وبقولك يارب يكونوا السنتين حلويين عليك وعلينا كلنا مسلمين ومسحيين
نيجى بقى للتاج
اقولك ايه بجد اجابات كلها جميلة وكمان دمها خفيف
اصل فشكول على قد مهو فيلسوف وفنان
كمان طلع دمه شربات
وخصوصا عجبنى احسن مذيع بتحبه
وكمان لما قولت ان احسن تانى بلد تحب تعيش فيها
ورديت قولت اى دولة من الدول الاروبيه
على فكرة انا زيك
اصل العرب بصراحة بيعملونا وحش قوى سواء فى بلدنا او فى بلدهم
وعموما بجد عشان مطولش عليك
اجاباتك جميلة قوى يا عم فشكول
وزى العادة عكست طيبة القلب
اللى جواه ابيض زى الفل
وكمان ثقافته عاليه وبسيطة فى نفس الوقت
واحلامه قد ايه حلوة فى غاية البساطة
وزوقه فى اللى حاجات اللى بيحبها عالى جدااا
خصوصا انك لما بتكون مدايق بتحب تروح الغيط
اصل مفيش احسن من الخضرة وحنيه الارض اللى كل حاجة فيها بتفكرنا بعظمة الخالق وجماله وحنيته
عارف مجرد انك تاخد نفس عميق من جواك قوى
بتنسى اى حزن كان مدايقك او خانقك
معلشى انى طولت عليك
بس على فكرة
مش كنا محتاجين التاج
اصل شخصيتك واضحة زى الشمس
وسلام بقى يا عم الشباب
يا عم فشكول
تحيااااااااتى

صبرني يارب يقول...

هههههههههههههههههههههه

ممكن تليفون الحاجه ام اسامه عشان افتن

اصل انا باحب اهدي النفوس

على فكره ضحكت من قلبي ربنا يفرح قلبك يا استاذنا
ويخليلك عيلتك الجميله

مذكرات مشاغب يقول...

الحمد لله ان حضرتك مبقتش رئيسنا
وانا اللي كنت ناوي انتخبك بعد ما قريت المدونه

ثانيا هتبقى صايم وهتاكل حتتين لحمه بس ويا ترى هتشبع
معلش اصلي طفس شويتين

ثالثا العيال هتطلع عينيهم خضره ازاي وشعرهم اصفر
ده كاترين زيتا جونز مفيهاش المواصفات دي خالص

رابعا باه اجابات دمها خفيف جدا ويارب الظروف العائليه تنتهي على خير

تحياتي

fashkool يقول...

من غير عنوان .. تحياتى
هو فيه حد بيشبع من اللحمه .. انا ما قرتيش فى الوضع الكامل بتاعى ان بحب اقرأ التاريخ وبحب كمان اللحمه .. ربنا يخليك ويسمع دعوتك ويدينى ويديك الصحه وناكل انا وانت لحمه كتيييييير
تحياتى


العزيزه كيارا:
مش انا عندى حق لما كنت عايز اخطب قطر الندى .. اصلها حلوه وبنت ناس وكمان ابوها كان غنى وحيشيل عنى مصاريف الفرح ..
تحياتى


العزيزه انجى.. تحياتى
ادعى لى يا انجى ان الظروف تعدى على خير.. اما عن غزه ان شاء الله حانزل بوست بيتكلم حول الموضوع وكل حاجه عنه
تحياتى


الغاليه زينب
مش بذمتك اللحمه فيه حد بيكرها .. هو فيه احسن من اللحمه .. ان شاء الله فى الصيف ممكن اعزمك على شوية دره وكباية شاى .. ولو حبيت تتغدى .. امرى لله .. ممكن .. شالله ما عن حد حوش
تحياتى


روفى الجميله .. تحياتى
ساعات ادخل اوضه واقفل على نفسى عشان العيال ما يضحكوش على واحاول اعمل النغمه الزنانه على وتر المى جواب وساعات بتيجى معايا وساعات مش عارف اعملها .. اصل صعب تتعمل على الاسبانيولى .. وسهل على الجيتار الكهربائي .. عشان الامبلفاير بيخليها تكمل والاوكتافات تلضم فى بعضها
تحياتى


محمد بك الجرايحى .. تحياتى
انا حاعمل بوست عن غزه اتناول فيه الموضوع من مختلف جوانبه .. ان شاء الله بس لما مخ الواحد يفوق شويه .. تحياتى لحضرتك وكل عام وانت بخير


طائر الليل الجميل
اشكلك على اطرائك .. والله انت ظريفه وجميله .. ربنا يخليك
بس انا حسيت انك ريفيه زى تمام عشان انت بتقولى حاجات ما يحسش بيها اللى قعد فى الريف ..
بعدين يا طائر ياجميل انا لا ثقافتى عاليه ولا حاجه - دى حاجات بتطلع من القلب وخلاص .. آهم كلمتين الواحد حافظهم وبيقول لكم عليهم وانتم بقى مخمومين فى فشكول وفاكرينه مثقف وهو لا مثقف ولا حاجه .. خلى الطابق مستور
تحياتى


يا سلااااام يا صبرنى يا رب
انا عملت لك ايه؟ دا احنا حبايب خالص يعنى
الله يخليك سيبك من ام اسامه ولا تاخد تليفونا ولا حاجه اصل ايديها تقيله شويه وانا مش حملها .. اديك ربع جنيه وتكفى على الخبر ماجور
تحياتى


اهلا يا مشاغب اهلا بيك .. نورتنى
متهيأ لى اول زيارك لحضرتك عندى .. شرفتنى ونورتنى
هما مش حتتين لحمه بس .. هما يعنى حتتين لحمه وكارع .. وساعات شوية ممبار .. وبعدين يا أخى انا راجل فشار .. بحب افشر عليكم .. ما تصدقنيش .. راجل فشار بقى كل كلامه فشر
وبعدين انت بس هات لى كاترين زيتا جونز وجوزها لى .. ومش مهم العيال يطلع عينيهم خضراء او زرقاء .. حاخليهم يركبوا لنس .. بس اعمل اللى عليك وهات كاترين زيتا جونز وجوزها لى
تحياتى واهلا بيك مره ثانيه وارجو الا تنقطع الزياره

ن يقول...

السلام عليكم
عذراً أستاذنا الفاضل فشكول
ربما تأخرت الايام الماضية من متابعة المدونات التى أحبها ولكن ما تعانيه غزة أصابنى بالالم عانيت من إرتفاع حاد فى ضغط الدم وأنا أتابع الاحداث منذ أيام بشكل متواصل .
تعتب على لأنى عرضت صورة الفتى الذى يرمى الدبابة بالحجارة ثق يا سيدى أننى بعد المتابعة الجيدة لم أجد فى أيدى الفلسطني غير الحجارة فهو شعب أعزل لا يملك السلاح ولاحتى الدواء ولا الطعام ولأننا أصبحنا نتسول النخوة والكرامة فأنا ممن يؤمنون إما العيش بكرامة أو الموت أيضاً بكرامة ولولم أملك غير رمى الاعداء الا بالحجارة .. لم يعد لنااليوم الا الثقة فى كلمات الله وكتاب الله .
إقرؤا سورة الحشر وتدبروا الايات فهى الرد الرادع على مانحن فيه وهى الخطة المحكمة وهى الاحداث البينة وهى البشرى بالنصر إن شاء الله .
عفواً سيدى سامحنى فليست لى طاقة للرد على هذا البوست الان سأعود لك ثانية .
مع خالص تحياتى

الازهرى يقول...

حبيبى الغالى

طبعا لم اتوقع منك اقل من هذا
وربنا يعينك على السفر والعمل
كما ادعوا لك بان يعينك على مشاكلك فى العائلة والتى انتبهت لها عند رئيس التحرير بعد كلام فركشاوى

بكل المودة والحب والتحية

الازهرى يقول...

على فكرة انا حبيت احذرك
فى رسالة من مجهول راحت للست ام اسامةتقول لها على البصبصة دى كلها
بقى يا شيخ
منى الشاذلى
وقطر الندى
وجين فوندا
وجريتا جاربوا
وكمان لولو بريجيدا
لا
دا ولا فالنتينوا يا جدعان
احم احم
طبعا دا مش حقد ولا حاجة انت عارفنى
وكمان انا برىء من الرسالة تماما
دا حتى انا جت احذرك قبل ما توصل
علشان تعرف انى بحبك ومش ممكن اعمل كده

تحياتى على الاجابات المفشكلة الرائعة

saheda.com يقول...

إصابة أربعة جنود صهاينة في الساعة الأخيرة من القتال في غزة... استشهاد 70 فلسطينيًّا بينهم 21 طفلاً و11 سيدةً وإصابة 371 آخرين منذ بدء التوغل الصهيوني في قطاع غزة... مستشفيات القطاع تعاني من أزمة كبيرة بسبب الحرب الصهيونيه وصعوبة وصول الطواقم الطبية... كتائب القسام تقصف تجمع مغتصبات أشكول بصاروخ جراد... الجيش الصهيوني يعترف بسقوط قتلى في صفوفه... القسام تؤكد مصرع وجرح 25 جنديًّا صهيونيًّا... سرايا القدس: المجاهدون في غزة بالآلاف جاهزون لسحق العدوان... القسام تقنص 3 جنود صهاينة ببيت لاهيا... قصف مغتصبة "جوليت" الصهيونية بصاروخ قسام رغم التحليق المكثف للطيران الصهيوني... سقوط صاروخ على بلدية مغتصبة أشكول بشكل مباشر... القسام تفجر عبوتي أفراد بقوة صهيونية خلف جبل الكاشف... القسام تقصف قاعدة بتسليم الصهيونية أكبر قاعدة برية في المنطقة الجنوبية بصاروخي جراد.

zainab يقول...

فعلا و الله أحس بالخزى و العار تجاه أمى فلسطين

أنا لما أكون قاعده أاكل قدام التليفزيون والمناظر اللى بنشوفها بحس انه حرام عليا و ان الأكل خساره فيا و أقول لنفسى يابت قومى

انامش هاكل دره و شاى بس أنا هتغدى
هههههههههههه

فى انتظار بوستك الجديد

تحياتى

أحمد حشمت يقول...

تاجك لذيذ
يا جدو
يا رب يديم عليك الصحة
ويطول عمرك
وتشوف أحفادك وأولادك
وكل اللي بتحبهم
في أحسن حال

سمكه واحده يقول...

ايه الجمال ده ايه الجمال ده
ياخرابي ياخرابي والله اجابات عثل يا عمنا كلنا بس نسيت الست جوليا اه كده هزعل منك انت نفسك تعيش عصر الفاطمي انا بقي نفسي اعيش 3 عصور مش عصر واحدبس
ربنا ياركلك يارب ويكرمك ويديك الصحه
ويارب الظروف العائليه تعدي علي خير ان شاء الله
اجابات جميله وطبعا مفيش نقاش شخصيه اجمل بس بلاش اللحمه الله يكرمك

سمكه واحده يقول...

وشكرا علي السوال يا استاذ فشكول ربنا ميحرمناش من سوالك علينا
حجات جميله بتجيبوا منين الكلام الحلو ده
بس ادعي بقي لغزه ربنا يصبرهم ونحاول نساعدهم لحسن والله الواحد مهو عارف يفرح ولا مبسوط ومكتئب

واحد من العمال يقول...

عمنا الغالى فشكول دوت كوم

أشكرك لأن معظم أجاباتك ضحكتنا
وأحنا فى قلب الغم
مكتوب لنا نضحك على أيدك
شكراً ياعم

بس حنرجع تانى لغزه
واللى بيحصل لينا فيها

على العموم ألف شكر

ودمت بخير

حـــــ الــجــنــة ـــــور يقول...

السلام عليكم ورحمة الله تعالى وبركاته

أبي وأستاذي الغالي فشكول بجد متأسفة ومعذرة من شخصك الكريم إنت عارف المشوار من الجزائر لمصر بعيد والشغل لشوشتي دول حتى مش راضيين يدفعولي المرتب علشان اشوف حالي وازور ناسي إهئ إهئ

بجد مكسوفة منك ومن احساسك الجميل وطبعك النبيل اهو جيت علشاانك وربنا يعلم بس الشغل مش مديني فرصه ياريت تدعيلي محتاجة للدعااء جدااا

تاج جميل واجابات بسيطة وحلوة تدل على شخص بسيط وعفوي دمت بكل ود وخير

تقبل خالص احترامي تحياتي

بس خلاص ... يقول...

فشكول ... جئت الى مدونتكم يملئنى الاسى والحزن لما نمر به من ظروف لاقيتك بنفشكل كل الزعل اللى فى القلب بالاجابات الجميله ودى واستطعت بكل مهارة ان تنتزع الضحكات وتبعث فى القلب البهجة
ربنا يخليك يا اجمل فشكول
بينى وبينك كان نفسى اكون قطر الندى
ولا شهرزاد ولاحتى شجرة الدر
ربنا انشاء الله يديم عليك كل السعاده ويفرج همك وهمنا وهم الامه الاسلاميه
امين امين امين

Dr Ibrahim samaha يقول...

ربنا يهنيك يا عم فشكول باللحمة وقطر الندى :)

واحد من البلد دى يقول...

السلام عليكم

أعتبر زيارتى تعارفية..

لك منى التقدير و الإحترام لدماثة ردود حضرتك و أعتبرنى صديقا من الأن..

تشرفت بزيارتى لمدونة حضرتك

أحــوال الهـوي يقول...

fashkool

كنت مسافر
ثم انا مكتئب و منعزل و حاسس اني اصبحت غير مدرك او قادر علي فهم الاحداث او ردود الافعال من الحكومات المختلفه
اثرت الصمت حتي تتضح الرؤيه

شكرا لسؤالك و هذا حق الصديق علي الصديق

تحياتي

أحــوال الهـوي يقول...

حبيبي فشكووول

لو الوقت غير الوقت كنت قلت انت فشكلت الحياة كلها بردودك الجميلة و حسيت انك انسان حالم و تامن بحرية الحلم و تتعايش معاه و تصدقه
بيني و بينك
احلي كلام يعني كمان الاحلام عايزين تحرمونا منها

قبلاتي

ماما أمولة يقول...

استاذي عايزاك في الزمن الجميل تشوف رأيي على تعليقك عندي

اجاباتك جميلة يا استاذي

ربنا يبارك فيك يارب

ماهرالشيال يقول...

عمي العزيز فشكول ألتمس الصفح عن الانقطاع الطويل عن التواصل وذلك لأسباب أهمها انقطاع خدمة الانترنت عن منزلي لمدة قاربت الشهر ولظروف أخرى يطول شرحها ولذلك ألتمس من سيادتكم الصفح ...... تحياتي يا عم المدونين . ماهر الشيال

Wish I were a Butterfly ... يقول...

واضح إن حضرتك هتكون حاكم ديمقراطي جدااااا :)، لأ و بيهمه رأي الشعب بطريقة واضحة حقيقي
بس ليه طيارة في المطار؟؟ ما هليكوبتر في جنينة القصر أحسن عشان لو الشعب كله قام بثورة ضدك وحاصر القصر

أنا كمان بحب الجيتار أوي بس مش بعرف فيه كويس. البيانو هو حبيبي لكن الجيتار أخويا هو اللي رائع فيه..وبرده كان في فرقة

ربنا يخليلك كل اللي بتحبهم و يبارك لك فيهم :)
تحياتي

بنت الغربة يقول...

اجاباتك كلها زى العسل
انت فعلا شخصيه ظريفه جدا...انا سعيده بالتعرف عليك
وعلى فكرة الباشا عندى هو كمان بيعزف على الجيتار والاورج كمان
اصله كان بياخد دروس فى المزيكا(تقليد عندهم فى العيله الكريمه )
وعندى فى بيت مصر جيتار واورج وياما الجيران سمعوا واشتكوا....
تحياتى ليك

Beram ElMasry يقول...

اخى وحبيبى . الاستاذ فشكول
الاول شكرا للزيارة
ثانيا : المهم انت فى خاطرى منذ ايام بسبب انى اعتقد انك تستطيع تحقيق شئ انا اريدة ، والحكاية تقريبا عام 69 كنت اعمل بمتحف العلوم ، واعطانى زميل كتاب ملك لضابط فى الجيش تقريبا من انتاج التعبئة لا اذكر ، هو ما قرات فيه حكاية الطبيب المبشر اللبنانى اللذي ذبحه اليهود ، وقبض محمد على باشا عليهم ، ولا اعرف لماذا اعتقد انه فى مقدورك العثور على هذا الكتاب ، او اسمة اورقم ايداعه
ولك شكرى فى الحالتين
خماراويه ابن احمد بن طولون يعنى فترة ولاة ثم الدولة الاخشبدية قبل الفاطميين

smilyrose يقول...

اول زيارة

استاذى الجليل

اجابات رائعة

بس ياريت تبطل السجاير

وتخف من اكل اللحمه

ههههههههههههههههه

انا بحب المانجوا كتير جدا

هههههههههههههههه

فكتر منها بس خلى بالك من الاملاح

وعلى فكرة العصر الفاطمى جميل

وخصوصا فرح قطر الندى

زى الحلم الجميل

تقبل مرورى



smilyrose


روح الحب الصادق

Ahmed Salah يقول...

استاذنا العزيز..بلوج انتري اكتر من رائع..بس انا رائي عن عصر عمر بن عبد العزيز هو اجمل عصر ممكن تعيش فيه ..وتمنياتنا بمزيد من الصحه و التوفيق

حـــــ الــجــنــة ـــــور يقول...

السلام عليكم

ابي الغالي اخبارك ايه ان شااء الله تكون بصحة وخير يااارب

اهو انا جيت اطمن فين السلفيه بقى خفت لا تضيعلك في الطريق قلت اخدها بنفسي هههه

تقبل الله دعاءك وربنا يسعد ايامك ويسرلك طريقك ويجعل مثواك الجنة

سلامي لابوحميد وملك وكل العيله الكريمة
دكت بكل خير بنتك حوووور...

رئـــــيسـة حزب الأحلام يقول...

اجابات جادة وتاج جامد اوى
وربنا يحقق لنا احلامنا
تحياتى لحضرتك
وسلملى على احفاد حضرتك

شفقة هانم واحسان بك يقول...

مبروك على التاج بس انا ماليش دعوة انا عايزاه لفة
هههههههه

فركشاوي ..ناوي يقول...

السلام عليكم ورحمه الله وبركاته
_______________________
عمنا العزيز...متعك الله باللحمه وقطر الندي ...انت ليه ساكت كل دا؟
نريد ان نطمأن عليك وعلي صحتك ...
كفايه غياب بقي...

فركشاوي ..ناوي يقول...

علي فكره ورئيس التحرير التاني زعلان منك وبيقول .....لا ياعم انا ماليش دعوه ...الفتنه حرام.

آه وكفى يقول...

هههههههههههههههههههه

موتني من الضحك
عايز تفطر لحمة ومش عايزها تتغندر
:0))
اجاباتك جميلة اوي

ن يقول...

السلام عليكم
أستاذى الفاضل فشكول
والله أنا تعبتك معايا يا رجل يا طيب
بس والله أنا مش غول معرفة ولا حاجة أنا فقط قارئة مستوعبة للأحداث الماضى والتاريخ وفى المقدمة لكتاب الله وأتعلم منكم الحاضر ومن الاحداث الجارية .
من غير منخاف من النحل والدبابير لأنهم أكيد بيألموا مثلنا مكتئبون زى ماإحنا مكتئبين بس بعد إذنهم أقولك إن ما يحدث فى غزة الان له منهج آخر غير خارطة الطريق التى تسعى أن تغيرها إسرائيل .
إبنى جابلى تليفزيون صغير لعبة يعنى عامل زى صندوق الدنيا كانوا زمان بيجبوه من الحج علشان تشوف مناسك الحج ولكن المرة دى قالى دى لعبة جديدة ياماما .. قلت أتفرج ياسلام ويدوب بعمل أول تك وأنا بقرب المنظار على عينى سمعت صوت وبهلوان بيقول .
قاللك أيه قالك واقع دى لعبة جديدة ناس بتأدب ناس على حساب الغلابة وناس بتصارع ناس على كراسى زايلة وبحور من دماء شامم رايحتها جاية وقوة ملعونة فى شتات على بلادى جاية وساعة الصفر قربت فى سنين جاية وعمرنا ماهنشوف نصر غير لما نعرف حق الله ونتعلم أننا لا مفر من قضاء الله وأن لا إله الا الله و لا أمريكا ولا أسلحتها ولا حلفاؤها .. قالك ايه قالك لعبة جديدة من نوع جديد على الماشى مصيدة لكن الواقع فيها أكثر البادى وبحور الدم هترجع تفور عند صخرة بيت المقدس هتغلى زى البركان تأكل ا لاخضر واليابس وياويله اللى هيعوص أيده فى دم الغلابة والاطفال الابرياء ..
إتفرج يا سلام على الدنيا يا سلام.
مع خالص تحياتى

ن يقول...

السلام عليكم
أستاذ فشكول
تستحق أحسن تاج
وإجاباتك كلها ملامسة للواقع
سألوك فقالوا
لو كان ينفع تختار عصر تعيش فيه هيبقى انهى؟ ومين الحاكم؟
إجابتك هى بمثابة بوست كامل عن الاحداث الجارية .
مع خالص تحياتى

آه وكفى يقول...

معلش تعليق تاني عشان سؤال محشور في زوري بالعرض مش قادرة لازم اسأله

انا قريت تعليق حضرتك عند قصاقيص وده اللي خلاني دخلت هنا بصراحة

ولئيت حضرتك شارحلها تاريخ وماشاء الله فاهم يعني فبسأل بس حضرتك دارس حاجة ولا هاوي
اصل انا بعيد عنك اداب القاهره قسم تاريخ وما ادراك ما قسم تاريخ بتاع جامعة القاهره وعتاولة جامعة القاهره يهد قواهم قادر ياكريم
هو انا دخلاها عن حب يعني مش دخول صالونات ولا حاجة بس اتعقدت في عيشتي فمبصدق الائي حد بيفهم فالتاريخ

هــو..مش ..نـو يقول...

نهوهو ولا هوهوه غير هوهوتنا
______________________
بقي فيه من يحب اللحمه هذه الايام غيري؟
اي نوع من اللحمه يا عمي ؟
آه انها ...اللحمه البيضاء
واللحمه النيه ...
واللحمه المشويه...
واللحمه الملفوفه ...ومش مكسوفه...
لحوم تدوم...واللحمه كتير في غزه!
واحنا هنا ...الله ياست ..أديها هزه
هزه هزه ...لا أنتاش هازز
هزه وهزه ...وعصر خمارويه!!
أمال الي بيحصل دا من ايـــــه؟
بعد اذنكا عمي ...همزل بوست عن ..
هزه هزه ...ونسينا غزه!!!

Soul.o0o.Whisper يقول...

fashkool


عارف يا فيلسوفى لو مش كنت جيت ؟؟

كنت أخدت منك موقف جامد خالص
خالص خالص يعنى

بئا كدا و لا تسأل عليا؟؟
مااااااااااااااشى
ماكنش العشم


بس بجد إجاباتك كلها تحفة
مش قادرة أبطل ضحك
أنا كمان جايلى التاج دا
هأحاول أرد عليه قريب


خالص ودى

حروف (دلو مرة ثانية وجرح ثاني سابقا) يقول...

نورتني يا عمو لية بس مالها الحجةام اسامة
اهم حاجةالنيةانا ححمل الشعار من بعدك واكمل المسيرة دعواتكوربنا يقويني علي احلامي
دمت بالف خير

حروف (دلو مرة ثانية وجرح ثاني سابقا) يقول...

بونسبة للبوست جميل اوي وحسيت بريحة الارض وانت بتتكلم والطبيعة الجميلة

ghorBty يقول...

السلام عليكم

ما شاء الله ايه التاج دا جميل بالفعل

والاجابه ديه بجد عجبتني جدا

6- ليه قله الذوق والنخوه اتعدموا؟


شوف يا اخوانا .. من يوم ما قامت الثوره وشوية العسكر مسكوا البلد علمونا ان ارفع رأسك يا أخى .. قمنا كلنا رفعنا رأسنا على بعض وقلينا ادبنا على بعض باسم الحريه .. لكن ما قدرناش نرفع رأسنا ونطالب بحقوقنا من الحكومه .. وعشان كدا .. عشان نثبت اننا احرار نقوم نرفع راسنا على بعض ونقل ادبنا على بعض وكل واحد همه مكفيه ويقول ما ليش دعوه وانا مالى .. وهكذا انعدمت كل القيم وكل الشهامه وكل حاجه.


جزاك الله خيرا وربنا يبارك لك في اولادك واحفادك ويجعلهم من الصالحين يارب ويقر عينك بيهم اللهم امين

غربتي

آه وكفى يقول...

انا جيت تاني..
عشان اقول لحضرتك اني سعدت جدا بالزيارة واتمنى تكررها وميرسي اوي عالكلام الجميل ده

بخصوص اول تعليق عندي ده من اعز وحدة ليا فالدنيا .. دي صديقتي واكتر صاقتنا عمرها اكتر من 6 سنين برغم اننا عمرنا 19 سنة فقط يعني تقريبا تلت عمرنا فتخيل علاقتنا ممكن تكون عالمة ازاي .. وبالنسبة لخفة الدم فهى كده مكنتش بتقول حاجة احنا ايام ثانوي لما المدرسين كانوا يجوا يقعدوا معانا كان بؤهم بيوجعهم من الضحك .. كنا شلة مصايب عموماً اتفرقنا بعد المدرسة وكل واحد راح في حتة وفي مننا اللي وقعوا فبعض لكن الوحيدين اللي فضلوا صحاب انا وهى بس .. برغم ان ميولنا مش متشابهه اوي لكن قريبين حتى هى مش معايا فالكلية .. دي حتى كانت فاكرة ان محمد على بك اسمه محمد علي بك الكبير وبذلت مجهود خرافي عشان اقنعها انه ده شخص وده شخص تاني خالص .. وصلاح الدين الايوبي كانت برضو مقتنعة انه اسمه صلاح الدين القليوبي .. أتصدمت الحقيقة لكن هى معذورة كانت جايبة في التاريخ واحنا في ثانوي 27 من 50 وبلا فخر .. ده بخصوص فراشة(طبعاً مسمهاش كده احنا بنقولها يافراشة لأنها بتمشي تجري ورا اي فراشة طايرة فالشارع ووسط العربيات وهى جاية بسرعة معندهاش مانع تدوسها بس تمسك الفراشة) .. عادي

ــــــــــــــــــــــ

أما بخصوص التاريخ أنا بحب التاريخ الفرعوني والاسلامي والحديث جدا .. لكن اللي دمه سم على قلبي العصور الوسطى والقبطي والهلينستي .. ولو حاب تعرف عن الثورة الفرنسية ممكن تقرأ لحامد زيان كتب فيها حلو برغم انه راجل مش حلو :0))
انا قريت كتب تاريخية كتير بس مش مقررة عليا فالدراسة .. معرفش ليه كتب الدراسة بتبئى دمها تقيل لكن الكتب التانية ممكن اقرأها اكتر من مرة
بس في مجال غريب شوية ومريب 10 شويات بحب اوي اقرأ فيه .. الجاسوسية .. بالذات كتب فريد الفالوجي كمان بحب اقرأ التشريح النفسي وبالذات كتب محمد حسن الألفي .. مجال فظيع

ــــــــــــــــــــــ

انا اسفة طولت على حضرتك اوي .. كرهتني أكيد .. بس انت السبب فكرتني بحاجتين لازم يطول الكلام عنهم دينا والتاريخ

دمت بود

آه وكفى يقول...

معلش كلمتين كمان

مش شرط تكون هاوي المجال اللي بتدرسه
انا صحيح هبئى خريجة تاريخ ومعايا تويفل من المعهد البريطاني وبدرس في المركز الثقافي الايطالي وانشاء الله هبئى ارشاد سياحي .. برغم كده بعشق الرسم تحديداً البورتريهات .. وعمري مادرست ولا ناوية ادرسها ولا اشتغل فيها

اسفة مرة تانية للاطاله

maha zein يقول...

ايه ده
ايه ده
بقه كل ده يطلع منك
اه يا عمو فشكول اه
ده انت طلعت نمس
نمس
نمس
المهم عجبني اوي اوي وصفك للمكان اللى بتهرب فيه لما تكزن مضايق
انت اصلا وصفك في الحجات دي وهمي
بجد وهمي
وبقتلو اللى جوايا
لدرجة اني والله ببقه عوزة اسافر معاك وتفرجني علي الغيطان اللى عندكوا وتعيشني الجو ده
جامد اوي
بس للاسف في ناس بتقولي ان خلاص جو الريف ده مبقاش موجود
بس انا والله واثقة انه موجود

اجاباتك بجد اكثر من رائعة
وعلي فكرة يا عمو فشكول
انت لما رحت وزرت مدونة مشاغب
علقت عنده علي انه بنت
وهو اصلا ولد واسمه احمد
فيا ريت تروح تلحق تقوله اذيك يا احمد
يا خوفي لا تدخل عندي تقولي يا عباس
استرها يا رب


وعلي فكرة نسيت تباركلي
لما تيجي هتعرف

بس خلاص ... يقول...

فرج الله عنك كل كرب وهون عليك كل صعب
الجمال الحقيقى فى شخصيتك وقدرتك العجيبه انك تلمنا حواليك وتحسسنا انك كبير العيله وحبيب الملايين
وبقولك ووولايهمك انشاء الله ربنا هيجعل كل الخير من نصيبك لانك اهل لكل خير
دعواتى الصادقة
ياريت اقدر اعمل اى شئ .. ولكن كل ما املكه هو الدعاء لكم بكل الخير اللهم تقبل دعواتى

رؤية يقول...

البوست لذيذ جدا

اجمل مافيه بساطة كاتبه

لم يكن مجرد تاج نقراه
امتعتنا استاذى العزيز

ملحوظة( مع احترامى الوافر: الحمد لله انك مش الحاكم كدا اجمل بكتييير وحضرتك فشكووول وبس)

تحياتى

نهــــــــــار يقول...

السلام عليكم...
إزيك يا عمي فشكووول...
عاوز تاخذ بنت زيتا جونز ...
الحمدلله الحجه أم أسامه راضيه بيك ياعم...
وتقولي عاوز فلوس و وراثة عرش...
واحد راحته يقعد تحت شجرة التوت
وياكل ذره...
مستحيل يطيق عيشت الرئيس...
.....
ربنا يخليلك أحفدائك يارب..
....
تحياتي للحجه..والواد محمود..
إكمنهم عندك بالبيت مش بحب أتعبك السن له حرمته برضك...ولا كنت حكمل وأقولك سلم على أسامه ومراته..وإلهام جوزها
ههههههههههههه
....
دمت بخير

Khaled يقول...

ضحكتنى ياعم فشكول فى الظروف الصعبة
ربنا يديك الصحة
تقبل مرورى

مذكرات مشاغب يقول...

استاذي العزيز فشكول:
انت مستنصدني ليه بس
ده انا غلبان
في الاول رديت عليه على اني واحده
وبعد كده ذكرت مسقط راسي على مدونة انها الحياه
وذكرت الصندوق اللي هناك
ليه بس كده
ده انا بحبك واللهي
ثانيا تبقى عندنا وانا معرفش
ياريت توضح بتيجي عندنا ليه
انا عموما من مصنع السكر لو كنت تعرفه

تحياتي ليك وانا طبعا بهزر مع حضرتك

دعاء مواجهات يقول...

دا انت طلعت حكاية حضرتك

بس بجد دمك خفيف اوى

وتلقائى كل حاجة طالعه كدة زى ماهى بدوزن تلوين ولا تزييف

تحياتى لكل العيال الاشقية اللى عندك

بيس

Soul.o0o.Whisper يقول...

fashkool



فيلسوفى العزيز ...

يااااااااارب يكون الموضوع العائلى ربنا يسرهولك يارب

و تكون الوقتى بأفضل حال ..


و بعدين حصل كل خير يا أستاذى
أنا قلت حاجة؟؟؟؟
:)


ربنا ما يحرمنى منك و لا من زيارتك يارب
و إن شاء الله مش أغيب عنكم تانى




بالنسبة بئا لموضوع العروسات الحلوات
فأنا شاكة إنهم سبب الأزمة العائلية

و تقريبا بردوا هما السبب الى خلوك تتنازل عن الحكم
و تصير إلى هذا الحال!!!

و إنا لله و إنا إليه راجعون



كان لازم يعنى ؟؟
مالها الحاجة أم أسامة؟؟؟

دى آخرة اللى يجحد النعمة اللى بين ايديه
هههههههههههه




خالص ودى

مذكرات مشاغب يقول...

استاذي العزيز جدا فشكوول:
انا اللي اسف انك فهمت كلامي غلط
ده انا كنت بهزر معاك خالص
وبصراحه باه انا كنت بتحجج عشان ارد عليك تاني
ده غير ان اللبس ده بيحصلنا كلنا طبعا
انا زعلت جدا لما لقيتك افتكرتني بتتكلم جد
تصدق باه انا بجد زعلت
ومخاصمك كمان لحد لما تنزل موضوعك الجاي
وكنت عايز اسالك ليه مواضيعك بتتاخر كده
عايزين كل يوم موضوع كده ولا حاجه

ايوه انا من الحته اللي عند مزارع السمك دي
ده انت حافظ المنطقه اكتر مني باه
اما بالنسبه لموضوع الماذنه فانه بشوفها بس للاسف مش عارف حكايتها

اما باه لموضوع البوست
فانا بصراحه اتخضيت في الاول لما لقيتك كتبت لومان طره
قلت يبقى الموضوع معجبكش
لكن لما قريت تعليقك كله
قلبي استريح
خاصة اني فعلا كنت قريت موضوع الجزمه
وكنت متفق معاك بشكل كامل في كل كلمه انت قولتها
لدرجة ان بتهيالي ان حضرتك خدت الكلام من دماغي
عشان كده توقعت انك هتتفق معايا على الاقل في معظم الكلام
والحمد لله كسبت الرهان

نورتني طبعا طبعا وشرفتني طبعا طبعا

تحياتي

وفاء بركات يقول...

معقولة خفة الدم دي والسخريه
من الحياه ربنا يديك الصحه
بأتمني من الله أن تنتهي المشاكل التي تعكر صفو حياتك . ويخليلك الحاجه أم أسامه والأولاد والأحفاد وتبقي الحاكم
ونبقي من محاسيبك أهو نتنغنغ علي حسك
مش كده ولا أيه.... وياسلام لو عزفت علي الجيتار وغنيت علي شعبك فات الميعاد ..
تحياتي يافليسووووووووووووف