الخميس، 26 فبراير، 2009

فشكله مع فركشاوى .. قال ناوى قال ...

تحديث اول
بيان عسكرى رقم (صفر)
حيث اننى قاعد وباتلكك عشان اى حد يتدخل يفض الاشتباك وما حدش راضى يتدخل وكلهم بيهدوا النفوس وخلاص ولانى اعددت العده مسبقا لآخد ديلى فى اسنانى والجرى باقصى سرعه وحفاظا على ماء الوجه فقد اصدرت للقياده العليا لقوات المدونين البيان التالى
حيث حققت قواتنا الاهداف التى خطط لها على المستوى التعبوى والتكتيكى فقد وافقت قواتنا على وقف اطلاق النار من جانب واحد وعلى المجتمع التدوينى التدخل لمنع الطرف الاخر من اطلاق النار
ياترى مين فينا توم ومين فينا جيرى




العزيز فركشاوى كتب تدوينه يفشكل فيها فشكول وانا قاعد فى امان الله وقلت اما اروح ازور فركش لقيته مفشكلنى

اخر فكشله وقمت انا كمان واستوردت كل اسلحة الدمار الشامل والكيماوى ولبست لبس الميدان وافتكرت

نفسى ايام حرب اكتوبر وقعدت اخطط وادبر واستعنت بقوات الصاعقه والقوات البريه والجويه

وقوات الطوارئ الدوليه وقمت لبست قناع الكيماوى ورحت على طول ارد عليه وقلت له

فى شجاعه واسبهلال وكمان عشان اخوانا المدونين نتعارف مع بعض و يعرفوا

فشكول اللى ما يسواش تعريفه مخروم عشان احنا اللى خرمنا التعريفه

برضه وليعلم الجميع انى اخذت ديلى فى سنانى استعدادا للجرى

باقصى سرعه اذا ما احتدم الصراع وانى

مش قد المعارك ولا الحروب


السلام عليكم ورحمة الله .. العزيز فركشاوى ناوى .. تحياتى تعالى انت تفركش .. وانا افشكل لحد ما حنخربها ونقعد على تلها..

اولا يا عزيزى فركش .. اشكرك جدا وكلى امتنان لك لاعطائى هذه المساحة التى انا دونها....واليك شخصيتى الحقيقيه التى تعرفها ولكن اغلب المدونين لا يعرفونها .. انا اسمى الحقيقى احمد ابوزيد من شبين الكوم منوفيه .. وكونى منوفى بيزعل ناس كتير عشان المنايفه مش محبوبين قوى ولو ان هذه فكره خاطئه عن المنايفه وربما يكون هناك وقت آخر لنتحدث فيه عن هذا الموضوع ولكن ما يهمنا فيه ان المنايفه وانا منهم فى اغلب الاحيان صرحاء مع النفس ومع الغير (بيسموهم بتوع مقالب)اما اسم صلاح فهو اسم الشهره .. ولهذا موضوع (اصل يا سيدى انا مولود قبل 16/1/1952 وكانت زوجة الملك فاروق حامل فى احمد فؤاد فعملوا اعلان عشان اللى يتولد فى يوم مولد ولى العهد حيدوه عشره جنيه .. وبعدين ابويا وامى اخرونى شوية ايام عشان يكتبونى يوم ميلاد ولى العهد وياخدوا العشره جنيه .. والاخر خدوا بمبه.. وطبعا ابويا وامى كانوا معشمين نفسهم فى العشره جنيه عشان يشتروا بيهم قيراط ارض ويبقوا من الملاك . وكان اسمى قبل الاعلان عن الجايزه صلاح .. عشان كدا لزق صلاح .. اما احمد فهو اسم المعاملات الرسميه وشهاده الميلاد والجيش والكليه والمدرسه وخلافه ومن جوانب الاتفاق فانت بارك الله فيك قلت فى شعرا ونثرا .. الامر الذى احمله جميلا يثقل كاهلى ويجعلنى مدينا .

ثانيا : والله يا فركش انا مصرى مسلم عربى .. احب كل شبر فى ارض مصر واحب كل فرد واحب كل شجره وكل حيوان وكل عصفور وطائر يطير على ارض مصر واعشق هذه الارض واعشق طينها وترابها واعشق هوائها وكل تفصيلاتها .. وفى نفس الوقت لا اطيقها ولا اطيق كرهها لابنائها وايضا لا اطيق ظلمها ولا تسلط ابناؤها على ابناؤها .. ومن خبرات التاريخ وتجاربه اجدنى يا ئسا ومحبطا وقانطا منها .. فهل كتب الله عليها ان تكون البلد الظالم لاهله .. البلد التى تلفظ شعبها ... التى تغرقهم فى البحر فرارا من ظلمها وجبروتها عليهم.. وفى نفس الوقت رقتها وحنانها مع الاغراب .. لن ندخل فى تفصيلات ليس هنا مجالها ولكن اقسو فى نقدها من كثرة حبى لها ولاهلها الذين ايضا اكرههم فى نفس الوقت من اعمالهم .. والحمد لله انا متيسر ولكن لا اضمن لابنائى الغد فالغد مبهم وباللون الرمادى.

ثالثا: يا فركش يا عجوز .. عرفتها دى بقى من كتاباتك ومن تعليقاتك على الاحداث .. اصل فشكول ساعات اما ربنا يتجلى عليه يلقطها وهى طايره اما فى الاغلب الاعم .. فشكول غبى وما بيفهمش ... هه هه هه شوية ضحك.

رابعا : كان نفسى نعطى هذا البلد العظيم .. الكبير .. الفطحل (حلوه دى؟) الضاربه حضارته فى اعماق اعماق التاريخ .. الذى علم العالم الحضاره كان نفسى نعطيه قدرا من اهتمامنا ومن محبتنا فيشب ويقوى ويقف بين الامم شامخا .. ناهضا وليس هكذا .. بلد يتسول كل شيئ.. شفت آخر تمخيخه .. مضاعفة رسوم القضايا فى المحاكم..هذه التماخيخ يا اخى لا تعجبنى .. ناس تسهر بليل تشرب هباب بتاع الدخان الازرق ده وتقعد تمخخ لنا عشان تقرفنا فى حياتنا .. والصبح تلاقى قوانين بتدق على دماغنا .. ليس هكذا تسير الامم..وليس هكذا تسير الامور .. نريد ان نسير بهذا البلد بالاسلوب العلمى والمنهجى والمؤسسى .. لا باسلوب التماخيخ وبرقبتى ياريس .. ولا يهمك انت معاك ناس زى الفل.. والكلام الاهطل ده عايزين بالعلم وليس باسلوب العربيه الكاروا التى يجرها حمار او حصان وعندما تثقل الحموله ترجع العربه القهقرى .. حلوه القهقرى دى .. فاكر ايام النكسه .. وفاكر النكته اللى كانت بتقول للعسكرى فى الاتوبيس او القطر .. انسحب يا عسكرى.. عشان عملنا حرب باسلوب (برقبتى يا ريس).

خامسا: حزنت كثيرا على انسحاب الكحيان من التدوين وكذا حزنت على انسحاب سوسه النوسه كونوسه واعتقد ان انسحابهما الاثنين فى وقت متزامن له علاقه ببعضهم.. والله اعلم .. ولو ان الله لم يتركنى وحيدا فبعث لى بفركشاوى ناوى ليؤنسنى فى عالم المدونين.

سادسا : انا حايش لك وظيفه حلوه .. وزير دولة المدونين ان شاء الله بعد ما انجح وابقى ظاظا بس لازم تدفع لى رشوه كبيره عشان تقدر تاخد الوظيفه دى .. منوفى بقى يا عزيزى يا فركشاوى ناوى.
اعجز عن شكرك واعجز عن تقديرك وكلى امتنان وتقدير لك .. وبارك الله فيك .. وربا يستر فى الاختلافات اللى اعتقد ان لها بوست قادم ..ربنا يستر .. لكن قلبى مفتوح لك .. متهيأ لى التعليق كأنه بوست كامل .



وتحياتى........


هناك 108 تعليقات:

صفـــــاء يقول...

.
هو انا معرفش أيه الموضوع
لكن وطبعا لأنى لازم أعاكس وأبقى فيها لأخفيها
فقولت أستخبى فى النص يمكن اعرف فيه ايه
وبص يا عمنا فشكول انا مش هكدب عليك بس انا فعلا مكنتش بستلطف المنايفه لسبب أبعد ما يكونو عنه بس عشان مقلب قديم غلطو وعملوة فينا من حوالى 80 سنه وأحنا لسه بنشرب فى المقلب دة لحد دلوقتى وشكلنا هنورثه كمان

هروح بقى اعرف ايه الحكايه دى وأيه النظام وأرجع تانى
.

أحمد عمر يقول...

السلام عليكم و رحمة الله و بركاته


بصراحه و ان كنت عجزت قليلاً عن فهم من يرسل لمن او كيف كان الارسال او لما؟

لكن كل ما فهمته ان كاتب الرساله صلاح اللى هو نفسه أحمد قبل و بعد البومبه اللى اخدها والديه ^_^

استاذ أحمد عرج -حلوه صح^-^ - لمسائل عدديه مردها الى حالة الفوضى اللى ضربت بجذرها نخاع اوطنا الغالية ..

فان كانت الكوسه هى اساس مثلا تعيينك كقاضى وهى وظيفه تعبتر من ارقى الوظائف فلا عزاء اذا لاى شئ آخر

و هذا ما يدفع شباب كثير جداا لفقد روح الانتماء لاحساسه بالغربه و الاهم الظلم الذى يقع ع عاتقه


الظلم الذى نجحت فيه الحكومات ع زرعه و باقتدار ف نفوس كل انسان يعيش ع هذه الارض ..
فان تحدث محمد عبده يوماً عن مسلمين بلا اسلام ف الغرب فحدثنى بربك لما على كشاب ان ابقى ف بلاد اسلام بلا مسلمين؟!!


ان تناولت الرساله اشياء كتير ف مجموعها الا انى ف الحقيقه احببت ان اركز ع هذه النقطه لانها اتصور اهم ما يعطيه الشباب اهتمامه اليوم

اشكرك كثيرا

دمتم كما تودون ^_^

حروف (دلو مرة ثانية وجرح ثاني سابقا) يقول...

اية دة وانا الي فكرة حكون اول تعليق
ماشي حقرا وارجع اعلق

فركشاوي ..ناوي يقول...

بسم الله الرحمن الرحيم
فشششش....كووول....بس خلاص...كفايه كده الناس مش فاهمه حاجه...ولا أنا كمان...باين كده والله أعلم ولعت واللي كان كان ...أنا عملت خندق وأتخندقت فيه ...تيجي رافع الرايه البيضاء أهلا وسهلا بك ...
وقول للكل كل واحد ياخد باله من خندقه ...
الخندقه مسئوليه كل متخندق...اسرائيل تحذرك من اضرار التخندق!!!!

فركشاوي ..ناوي يقول...

نفسي أقول لصفاء ...كلام بس مش قادر لأنه مش من حقي لكن انا عارفك سمحت لي
(...صفاء يا بنت عروس الصعيد أوعي تبقي مع المنايفه الصعايده ....وصلوووا
واحمد عمر كمان ...انت زي السكر وعقلك كبير ...باين عليك راح تشاغب معانا انا وعمك فشكول..
حروف ..
أول تعليق آخر تعليق ...أنت اللي منوره.

dodda يقول...

ااااممممم
ماشى

الحرب للرجاله بس
الحق اطبخ انا بقى...
اصل
حرب فشكول وقركشاوى ممكن يكون فيها هدنه لكن حرب المطبخ لاااااا

صفـــــاء يقول...

.
مالهم الصعايدة ؟؟؟؟ مالنا بقى
دة حتى احنا فعلا اجدع ناس
بنولع فى القطارات ولسه عايشين
ونغرق فى العبارات ولسه عايشين
وبنندبح واحنا نايمين ولا بنقول بم
عاوزين مننا ايه اكتر من كدة ؟
لا يا عم فشكول انا اعلنت الحرب عليا عندك وانا عاوزة حقى
وحقى ان مجاش
معلش بقى مش عشان انتو منايفه هتستقوو علينا
عليا النعمه عندى اللى يجيب البلوج اسبوت دة كله عاليه واطيه
.

رئيس التحرير يقول...

بسم الله الرحمن الرحيم
السلام عليكم ورحمه الله وبركاته
هاهاهاهااااااااااي
ضحكتوني وانا ماليش نفس ...أضحك الله سنكما..
أعلنت الحرب علي الرجل ...
فاكر معركه ( حاجات عيال ) و (هوهو)وحضرتك حمامه سلام ...دور لك علي حمامه سلام بينك وبين فركشاوي.

هــو..مش ..نـو يقول...

انا شميت خبر كده ....وحسيت ان جتتي بتتقطع...عم فشكول ...فركشاوي بيتكلم ليه عني؟
والله انا كمان راح اعلن الحرب عليه معاك...وقول للراجل ده يجيبها البر أحسن له ...والله اهوهوله ...وألم عليه كلاب الليل والنهار .
ايه يعني حتي هوهو؟؟...هو..هوهو..دا شويه؟؟ ولا هوهو يعني شويه؟؟ ...ربما يكون هوهو شويه.
عم فشكول اجيب لك سم فران للراجل ده؟
===هوهو===

هــو..مش ..نـو يقول...

والأرهابي دا كمان مالوا..؟؟؟
هو ...هوهو بقي الحماره الواطيه للمدونين ولا ايه؟

عاشقه وغلبانه يقول...

اما بعد
ههههههههههههههههه
انا مافهمتش حاجه من بره ياعمو
وداخله بقي علي اساس اني لوحدي لاقيت الناس كده
بس لاقيت مدون اسمه فركشاوي
ففهمت
بس خلاص

تعالوا زورونا
اهئ اهئ

اللؤلؤة يقول...

السلام عليكم
مازلت مصمم على فشكولى العزيز
إده ....إدة إنت سلمت بالسرعة دى أول مرة أشوف واحد منوفى يسلم أنا هافصلك من حزب المنايفة . بس برضه هاقولك ربنا يديم عليك الصحة أيوة كدة إظهر وبان عليك الأمان يا عم فشكوووول ناقص حاجة واحة وهى إنى طلبت من حضرتك إيميلك على الياهو لأنى لا أملك إيميل على الهوتميل أنا مازلت فى إنظاره
تحياتى

اللؤلؤة يقول...

السلام عليكم
فشكولى العزيز
والله كلنا بنحبها بس مش عارف العيب فيها والا فينا إحنا يهيألى أن العيب من عندنا إحنا إللى دهوسنا على كرامتها ومرمغناها فى الطين
تحياتى

هانى زينهم يقول...

يا استاذى مين قال ان المنايفة مكروهين . نا صاحب عمرى منوفى من سملاى لو تعرفها وما قابلتش حد فى حياتى باخلاقه وبعدين بجد انا سعيد بالتعرف على حضرتك بشكل حقيقى بعيد عن الفشكلة . تحياتى

اللؤلؤة يقول...

السلام عليكم
فشكوووولى العزيز
شرفتنى وأحيطك علماً بأن الجمعية العمومية لجمهورية المنايفة العظمى قد قررت الآتى:
1- عودة حضرتك مرة أخرى كعضو عامل
2- تعيين حضرتك رئيساً لجمهورية المنايفة العظمى
تصفيق حاد
وننتظر من حضرتك تأدية اليمين الدستورية
تحياتى

mohamed ghalia يقول...

دا أحنا طلعنا بلديات وأنا من قويسنا
كده نقدر نحتل عالم التدوين هههههههه
دمت بكل الود

الازهرى يقول...

عمنا الفركشاوى
انا كنت عارف انك منوفى من زمان
قريتها تقريبا عند سمكة مش فاكر المهم

انا شخصيا ما تفرقش
انا معايا فى الكلية من كل المحاظات وكلها فيها وفيها
المهم تانى
بلدنا انا شخصيا بحبها جدا ومش ذنب البلد ان الظالم فيها اتجبر انما مشطلة ان المظلومين سكتوا ووقفوا وووشهم للحيط وقالوا كمان
بلدنا مش ها ينصلح حالها الا بايدينا احنا مش اى حد تانى لازم نقف فى وش الظلم

وعلى كرة الجديد فى زكريات عن الظم وانا كنت ناوى ارفع قضية لكن وبعد التسعيرة الجديدة يفتح الله

وبخصوص فركشاوى فانا رايح له اسعى فى الصلح تحيب اجيبلك حاجة من هناك وانا جاى ؟

ماما أمولة يقول...

فشكول وفركشاوي الاتنين أغلى الغالين

أنا داخلة أسلم وسلام

نفرتارى يقول...

مؤرخنا القدير ،،

مع احترامى لسيادتكم .. بس انا اتعاملت مع منايفة كتير بس للاسفة فعلاً البخل صفة اساسية فيهم وهم معترفين بيهاومعاملتهم دايماً سيئة .. بس ولكل قاعدة شواذ واكيد المجموعة اللى اتعاملت معها هم شواذ القاعدة .. لان اللى يعرف حضرتك يعرف ان المنايفة احسن ناس تحياتى لك ولكل اسرتك وكل المنايفة .

دمت بألف خير وصحة وسعادة ،،

نفرتارى

رئيس التحرير يقول...

سيدي...
السلام عليكم ورحمه الله وبركاته
انا اول ما عرفت الخبر عملت زيك ورحت لفركشاوي وقلت له الكلام الي انت عارفه.
وهو كمان نفسه يصالحك ...بس انا لوحدي ما ينفعش الحرب كبيره انت فاكرني رئيس تحرير صح ولا ايه ...انت بتفهما وهي طايره ...
لو نجت في الانتخابات تعملي ايه ؟
وانا ها ابقي اجيب لك حاجه علي مقسم كده كلام في سرك.

enjy يقول...

هو ايه الموضوع يا عمو صلاح ؟؟؟
عموما البوست دة مفيد والله عرفنا عنك معلومات كتير

ريمان يقول...

ههههههههههههههه


ههههههههههههههه

ههههههههههههههههههههه

استاذ فشكول

اعتقد ان كل اللى يدخل عند حضرتك لازم يتفشكل

ههههههههههههه

انا اعترف انى اتفشكلت

على فكره

جميل البوست


عارف حضرتك ليه

عشان عرفنا عنك معلومات كتير

ربنا يكرمك يا رب

والله انا بحتارم شخصيه حضرتك جدا بالرغم من انى ماليش كلام مع حضرتك الا على المدونه

ربنا يبارك فى حضرتك يا رب

سعيده بمرورى هنا

مع تحياتى

اقصوصه يقول...

اوييييييييه

طلعت منوفي؟

من خلال زيارتي القصيره لمصر

سمعت..والعتبى على الراوي

ان المنوفين بخلا اوي

فشو تعقيبك ع الموضوع؟

حنان الشافعي يقول...

الاستاذ العزيز


التمسلي العذر لغيابي قهرا وليس قصدا


قرأت ما فاتني

اعتذر مره اخري

مذكرات مشاغب يقول...

هههههههههههههههههه
استاذي العزيز
انا كمان من شبين الكوم
والدي ووالدتي من شبين الكوم عند مسجد ابو بكر في البر الشرقي
لكن لظروف عمل والدي تربيت ونشات في كفرالشيخ(الحامول)
واظن ان حضرتك بالصدفه عارف المكانين

والمنايفه اجدع ناس
مش كده ولا ايه

تحياتي

الازهرى يقول...

فشكولنا الغالى
ادينا بنتدرب يمكن تقوم حرب حقيقية

لكن انا كان نفسى تجاوب السؤال اللى فى الاخر
عن الظلم والمظلومين
تحياتى دوما

د. ياسر عمر عبد الفتاح يقول...

شوف يا عمنا
أنا فى المونات من حوالى شهر ونص .. قول شهرين

بس بجد اسلوبك وثقافتك وطيبتك لفتوا نظرى من أول يوم

بحس إنك قريب من الناس كلها
كلامك جميل
ربنا يكرمك وتحقق كل أمانيك

على عبدالله يقول...

منوفى يا استاذ فشكول !!!
وا أسفااااا
:)ههههههه
استنى بس ما تزعلش
اصلى انا دخلت الجيش وعاشرت المنايفة والاسايطة !!!!
استنى بس ماتزعلش مش قصدى حاجة
ضيف على دا كله ان البج بوس "منوفى "
::)))
ههههههههههه

طبعا دا كله مناغشه "هزار يعنى "
وبعدين خلى بالك منوفى وصعيدى بيعملوا قفلة "اكيد انت مجرب "

هههههههه

يا استاذنا
كلنا مسلمين وكفى

تحياتى

مسدس صغير يقول...

شخصية جميلة لا ينقصها الصدق

اشكرك على البوست الرائع

عظيم التحية وكامل الامتنان يا

منوووووووووفى..

أحمد عمر يقول...

السلام عليكم

أخد بنصيحه حضرتك و متاااااااااااااااااابع

و اطمنك مش فاهم برضه ^_^

لكن متااااااااابع

صبرني يارب يقول...

هو انا اتشرفتش بفركشاوي ومااعرفش قال عنك ايه

بس حضرتك تستاهل يتقال عنك كل خير

وبعدين المنايفه ايه بيتقال عنهم كل خير هههههههههههههه

بس برضه انا ضد اخد اى مجتمع او مجموعه بحكم واحد طبعا كل مجتمع فيه الصالح وفيه الطالح

وتحياتي لحضرتك واحنا اتشرفنا بك
وانشاء الله اروح اتعرف بفركشاوي ونشوف ايه الموضوع

Soul.o0o.Whisper يقول...

fashkool


فيلسوفى العزيز
معلش آسفة
لا طبعا مش يرضينى انك تزعل وتعيط

معلش معلش
حقك عليا

شيلهالى ؟؟؟؟
هو احنا فينا من كدا ؟؟؟
لالالالالالا
خلاص سماح بئا
ماشى ماشى
طيب شكرا خاااااااااالص
كنت عارفة ان قلب حضرتك ابيض و مش هيزعل منى
:)



و جميل خالص يا عمو فشكول
فعلا جيلكم كان جيل جميل

بس ايه اللى يخليك تدخن بئا؟؟؟؟
مش قلنا مقتنعين؟؟
كدا ينفع؟؟؟


لالالالالالا
ماكنتش أتوقع منك كدا ابدا
شيلهالك يا عمو فشكول
ههههههههههههههههههههه



البوست دا رااااااااااائع
عشان عرفنا حاجات كتير يا عمو أحمد
بس أنا قرأت نصه بس

هأرجع تانى عشان اكمله


خالص ودى

عاشقه الرومانسيه يقول...

احمد ايه وصلاح مين
فشكول ولا شئ سوى فشكول
منوفى منوفى امرى لله
(حقيقه مره)
اصلى مش بحب المنايفه لان الراجل الكبير منهم
بس بحبك انت يافشكولى العزيز
وحشتنى على فكره
واضح ان فى وصله تماااااااااام هنا بس انا مش فاهمه الموضوع من الاول
سامحنى

mahasen saber يقول...

ياه عرفتك وانا كنت اعرفك شويه جامد يا عمنا الكبير


بس معرفتك دايما تشرف

بس المنايفه مش وحشين بالمره مفيش بلد وناسها فى المجمل والمطلق وحشين

وبعدين اعز صحابنا المدونيين منايفه وفى قمة الذوق والخلق الدمث
ومش بتوع مقالب خالص
جديده دى يا عمنا على المنايفه

mahasen saber يقول...

يا عمنا كلنا مصاروه وعرب

والاهم كلنا بشر نخطئ ونصيب

منور البلوجر كله

وربنا يرجع اخوانا اليى انسحبوا من التدوين انا معرفهمش بس طالما عزاز عليك كده يا عمنا الغالى

تامر علي يقول...

يا خوفي يطلع فشكول وفشكلاوي ناوي ما هما إلا وجهان لعملة واحدة .... أنا قلبي حاسس كده ..الأسلوب ... الكلمات ... انتوا يا اما واحد يا اما اتنين :)

قوس قزح يقول...

مين فركشاوى اللى ناوى ده
و بعدين ليه يعنى تبرر انك صلاح و لا احمد ليه و انك من بلد ريسها و شارب من نيلها
هو فركشاوى ده منهم و لا ايه ؟؟

(أم البنين) يقول...

السلام عليكم ورحمة الله وبركاته
منوفي...صعيدي...غسكندراني...مصري
كلها وجوه لشخصية واحدة مصرية
وبلد لا نشعر بقيمته إلا عندما نغترب
اللهم ردنا إلى مصرنا سالمين يا رب

اعشق فى الليل ضوء القمر يقول...

يعنى أنا لما أبتدى أفهم فشكول يطلعلى فركشاوى
على فكره أنا بحب معامله المنايفه فى الشغ فقط
الواحد فيهم مبيعرفش أبوه و لا حتى جده إللى جاب أبوه إللى هو سببب من أسباب حياته
لكن فى معاملاتهم الخاصه ألتزم الصمت علشانك فقط
أما عن الحرب بينكم أنا جيبت شويت رمل زى ما جدى بيحكيلى وحطتهم فى إشوله من الخيش ورصتهم اما البيت زى الحيطه وجبت شويت أكل ما أنا مش عارف الإحتلال حيوصل غايت فين
خوف على الأبناء فتذكر
وَلْيَخْشَ الَّذِينَ لَوْ تَرَكُواْ مِنْ خَلْفِهِمْ ذُرِّيَّةً ضِعَافًا خَافُواْ عَلَيْهِمْ فَلْيَتَّقُوا اللّهَ وَلْيَقُولُواْ قَوْلاً سَدِيدًا
أما عن الحب و الكره تلك مشاعر و لا يستطيع أحد أن يحكم على أحد

ستيته حسب الله الحمش يقول...

استاذ فشكول باشا تمام يافندم عظمتك سيادتك حضرتك

بما ان سعادتك من منوفيا التعسفية العظمى فأنا ادعوك لقراءة بوستي المتواضع
فلاح فلاح يعني ايه ياحسبو؟ ها اعرفك يا عيون حسبو

ولما تقراءه ها تعرف ليه انا قلت لحضرتك باشا ويا فندم والكلام ده كله

موضوعك رائع وحضرتك تحمل كم خيالي من خفة دم المصريين اللي هم احنا بالصلى ع النبي

مرورك لمدونتي شرفني ونورني

تحياتي

EMMY BABY يقول...

ههههههههههههههههههههه فشكووول وفركش فعلا الاسمين قريبين من بعض

دانت طلعت فى عز شبابك يا استاذ فشكوول يادوبك اكبر منى ب 38 سنة بس بسيطة يعنى

عجبنى جداااااااااااااااا الجزء اللى اكلمت فيه عن مصر

نيجى بقى لحكاية المنوفية انا حاسة ان تلاتة ارباع المدونين من المنوفية خيييييييييييير يعنى ايه الاحتلال ده

الصعايدة راحوا فين ؟؟؟؟؟؟؟؟؟؟

تحياتى يا فشكوووول

ايمى

شمس النهار يقول...

صحيح انا مش فهمانه حاجه خالص
بس
اعتقد ان الصلح خير
بس بصراحه اختلافكم عملنا بوستات حلوه

بس خلاص ... يقول...

فشكول ازيك يا استاذ احمد... حلوة ههههههه
اقولك بقا اناقفشة
كان فى ثلاثة بلدياتى ماشيين ورا بعض شوف خلى بالك ماشيين ورا بعض ووقعوا فى حفرة واحدة ...اقولك ايه اصلهم بلدياتى

بس خلاص ... يقول...

حلوة حكاية توم وجيرى
والله فكرة حلوة انك تعمل بوستات ويرد عليها فركش والعكس بالعكس
والحرب بقا تشتعل واحنا نقعد نتفرج ...انا باحب الحاجات دىقوى وربنا يقدرنا ونهدى النفوس بينكم

marmar يقول...

اللي فهمتوا من الكلام انك حد وطني جدا وبتحب بلدك وبتخاف عليها زي ما انا بحبها
تقدر تشاركني برأيك في مدونتي في موضوع عن عبد الناصر الزعيم الجبار بيتجاب اسمه بطريقه مش تمام
رأي حضرتك ايه يا عمي ؟

*البت المشمشية *حلوة بس شقية * يقول...

منايفه مين بس
انا كنت بسمع الموضوع دة
بس مصدفتش حد عمل معايا حاجة وحشة يعنى
وبعدين ان ااعرف واحد اسمو عم فشكول
راجل كدة زى العسل
وكلنا هنا بنحبو واللى يقول غير كدة نقطعو

طـــائر الليــــل الحـــــزين يقول...

عم فشكول
مالهم بس المنايفة
انا من الشرقية بس اعرف ناس كتير منايفة بس كويسيين جداااا
وفى منتهى الكرم
اصل كمان مؤمنة ان كل بلد فيها الحلو والوحش
وكمان باقى البوست حلو خصوصا انه عرفنا اللى مش عرفينه عنك وعن شخصيتك واسمك
وكل اللى حضرتك ذكرته فى البوست
تحياااااااااااااااتى ليك
بس اوعى تنسانى انا كمان فى وظيفة
يا عم فشكول

محمد الجرايحى يقول...

أستاذنا الجميل : أحمد أبو زيد ( فشكوووول)
السلام عليكم ورحمة الله وبركاته
المنايفة حبايبنا وتاج راسنا بس أعمل معروف بلاش حكاية الثالث والرابع كفاية حرام ....

رابطة مدونون من أجل فلسطين يقول...

الدور الفعلى لكلا من اعضاء الرابطة

ان كنت جاد وتريد مساعدة اخوانك فى فلسطين

واشتركت معنا من كل قلبك

ادخل وخبرنا فيما انت ستعمل معنا

http://bloggersforpalestine.blogspot.com/

ستيته حسب الله الحمش يقول...

يافندم
سعادتك
الرابط ده فيه الأجابة
http://mosh3arfa7aga.blogspot.com/2009/01/blog-post_1617.html

بتنورني في المدونة المتواضعة تبع ستيتة

كراكيب يقول...

انا عملت مجهود كبير اوي علشان افهم اللي بيحصل هناهوه وعلشان اعرف ارد
قريت البوست حسيت ان حد بيرج دماغي وحسيت اني هبولي ومش فاهمة حاجة
وبقى منظري وحش وانا غبية قدام نفسي
روحت جري على بلوج "فركشاوي" وقريت اللي كاتبه
ورجعتلك تاني علشان اقرا وانا فاهمة
ويااااااااه الحمد لله فهمت
حمد لله على سلامتي

**وبعديييين مش كدة ياولاد مش عايزين خناق
انتوا كبرتوا على كدة... الله
هنفضل نزعق لبعض من بلاكونات البلوج كدة ونفرج علينا الناس؟؟
وبالنسبة لموضوع الانتخابات ماتخافوش وماتقلقوش حانجيب مراقبين من بتوع الحزب الوطني وحانزورها واللي يدفع اكتر حايكسب
هاااا خلاص مرتاحين كدة؟؟
يللا ادخلوا ناموا بقى علشان في مدارس الصبح
تصبحوا على خير

miro el niro kwaniro

أحمد عمر يقول...

السلام عليكم و رحمة الله

أيه دا كله أيه دا كله؟!!

هى الجزيرة ذاعت خبر الحرب بنكم ولا أيه ^_* ؟



لاحظت وجود (ستيته حسب الله الحمش) و الظاهر و الله اعلم انها ضمن الفوج اللى بعته العمدة بتاع البلد بتعتنا لتهدئه النفوس - سلو بلدنا كده ^_^-



ال ستيته ال



و بما ان الناس كتير و ما عارف صراحه يعنى هتصولى و لا لأ


فانا دخلت احييك فيك الصدق اللى بتتمتع به و ع رأي المثل -من خاف سلم ×_*-

و بما انك رفعت الرايه البيضه فانا ف قمة الضيق لانى تصورت ان الحرب راح تستمر أكتر و أكتر و نشوف رفعات هنا و هناك اقصد ضرب بالبيض OoO

ع كلا هروح اشوف الضفة التانيه اخبرها ايه

حنان سعيد يقول...

ازي حضرتك يا استاذ فشكول
انا بجد سعيده اني عرفت عن حرضتك اكتر
وخصوصا ان كنت فاكره حضرتك اسمك أ/صلاح
ودي اول معلومه
زكمان ان حضرتك منوفي
وانا عن نفسي اقرب اقرب اصدقائي ليه منفوين ابا عن جد عن كل حاجه
ولا هما بخله ولا وحشين ولا اي حاجه
بالعكس بحبهم اوووووي
تحياتي لحضرتك

فركشاوي ..ناوي يقول...

شوفت يا فشكول يا حبيبي...الاشكال الي بتصلح بتقول ايه؟
عايز يتفرج المصلح بسلامته...
نفسه يشوف فينا يوم ...
لا انت توم ولا انا جري ...
بس صراحه ...انا جري للحق
تبقي أنت توم ...ما انت استخدمت الكيماوي بقي...
( كح كح ...هههااااتسي)الحمد لله رب العالمين...
ايه ...لسه زعلان مني
قولي يرحمكم الله....

gogo!sf يقول...

بجد حاولت اعرف القصة من عند الاستاذ فركشاوى وبالفعل روحت ازورة عشان اعرف ارد صح وانا فهمة لكن مع كل الاسف مرديتش تفتح ابدا ابدا مش عارفة لية

المهم انا بنوتة مش ولد ده حتى الصورة تدل

اما بالنسبة للمنايفة
هما فى ناس كتير اوى قالو انهم مش كويسين
لكن بجد ودى حقيقة هما ناس محترمين جدا واخر كرم وانا شخصيا بتعامل معاهم

بس معتقدش انها هى دى القضية الموضوع مش كده خالص ولما اتاكد هقولك

بس مدونة الاستاذ فركشاوى تفتح معاية

تحياتى لكل الاهلاوية

gogo!sf يقول...

بجد حاولت اعرف القصة من عند الاستاذ فركشاوى وبالفعل روحت ازورة عشان اعرف ارد صح وانا فهمة لكن مع كل الاسف مرديتش تفتح ابدا ابدا مش عارفة لية

المهم انا بنوتة مش ولد ده حتى الصورة تدل

اما بالنسبة للمنايفة
هما فى ناس كتير اوى قالو انهم مش كويسين
لكن بجد ودى حقيقة هما ناس محترمين جدا واخر كرم وانا شخصيا بتعامل معاهم

بس معتقدش انها هى دى القضية الموضوع مش كده خالص ولما اتاكد هقولك

بس مدونة الاستاذ فركشاوى تفتح معاية

تحياتى لكل الاهلاوية

أحــوال الهـوي يقول...

انا مش عارف القصه و كنت لازم تكتب ملخص عنها قبل البيانات العسكريه
المهم انا من هواياتي المهببه احب اولع المسائل و اصطاد في الميه العكرة خصله مش عارف اتخلص منها و مش ه سيبكم الا لما اشوف دم مترطش كل المدونات و خليها حرب شامله و \ 100

بلاش كلام الاستسلام الانهزامي و ديل في السنان و الانسحاب
خليك عتل و ناشف انتم اهل بطل الحرب و السلام و احلي سلام رقصني يا جدع
ماشي ياعم احمد صلاح

تحياتي

bastokka طهقانة يقول...

توم و جيري
رغم انهم خصمين الا اني كمتلقية لا املك اني اكره واحد فيهم

انا حبيت الاثنين
بس هم ليه مخدوش العشرة جنية الملك رجع في كلامه و لا اية اللي حصل؟


اوروفوار

من غير عنـــوان يقول...

صلاح باشا بتاع اللحمه

انت راجل جميل وزي الفل..
والمنايفه شطار... جدا...
وأنا باحب الصعايده...
والفلاحين هما أصل البلد..

المهم ... أنا باحبك في الله... وعشان خاطر التاريخ كمان


أمنياتي

الفقيرة إلى الله أم البنات يقول...

استاذ فشكول على كل حال التعميم مش علمى وان كان المنايفه فى جيناتهم شئ بيورث..ألا وهو انهم شخصيات لا يسهل التعامل معهم..وبصراحه عن تجارب كثيرة لانماط كثيرة الامايفه شخصيات لديها من الدهاء ما يقف عمرو بن العاص عاجز أمامه...
وانا عن نفسى تبت وأنبت من التعامل معاهم....ولكن خلينى لا أعمم لان التعميم بيكون ظلم

أما بخصوص اسم صلاح وأحمد فهذه عادة كانت على أيامنا وأيام حضرتك يعنى الاولاد بتوع اليومين دول عندهم إسم الدلع
ايامنا كان الاسمين لتراضى الطرفين
مش قضيه تضايق صلاح أو أحمد اسماء طيبه
سؤال محيرنى يا استاذ فشكول دائما اتعب والله علشان اجيب المقصود من البوست..ولا أقدر على كل حال

نيجى لموضوع مصر
يا استاذ فشكول والله مصر مظلومه
مش هى اللى بتعمل كده لاء اولادها هما اللى بيعملوا فيها كده
وبنحبها وبنموت فى اهلها الطيبين
ام الخبثاء فمصيرة مزبلة التاريخ..ومصيرة مقبرة لا عبر عليها سوى الدواب



ممكن نطلب طلب من حضرتك..ياريت تكتب لنا تدوينه عن الفاشاكيل الصغيرين أحفاد حضرتك وتأملاتك فى ما يفعلوا
ورأيك فى تصرفات اولادك مع ابناءك

دمت بخير أخى الفاضل

MR.PRESIDENT يقول...

عزيزي فشكول .. الفشكلة مية مية .. بس أهم حاجة هل أنت مطمن علي نفسك .. ولا اعدائك موترينك .. وهل انت مبسوط سعادتك في الخناقة .. ولا مزاجك تحت خط الصفر

بس خلاص ... يقول...

العزيز فشكول
طبعا الصلح خير وطبعايسعدنى جدا انكم توقفوا الحرب طيب لما تتصالحوا بقا هناكل عيش منين
اقصد يعنى فكر شويه قبل الصلح وشاور عقلك يمكن فركش مش هيقبل المفاوضات بعد ما قعد يكح ويعطس من اثر الكيماوى والاسحة المدمرة
طبعا انا باحب اهدى النفوس وخلاص
هه
ربنا يقدرنا ونشعللها قصدى نيعنى نشعلل المحبه بينكم
اروح بقا اشوف فركش لايوافق على الصلح

marmar يقول...

عمي فشكول الغالي
موضوع عبد الناصر في التعليقات انا وواحد من اعدائه هتلاقي نص التعليقات في البوست اولاد الشوارع ما بيني انا وهو لاني بحب عبد الناصر اوي وبحب كل حاجة عملها كويسه لينا والحد التاني ده يبكرهوا كره العمى وبيحب موشيه ديان عنه !!!!!!
تصدق يا عمي

سكوت هنصوت يقول...

من فضلك اتفضل هنا

http://www.tahyyes.org/2009/02/blog-post_27.html

المسألة مسألة حياة او موت....من فضلك ما تستهترش

تحياتي

assafo anaroze يقول...

عمي صلاح
مهما كنت منوفي ولا بورسعيدي ولا اسواني ولا اسكندراني فانت مصر و مصر للمصريين
مهما كنت مسلم و لا مسيحي و لا يهودي و لا ملحد فانت مصري و مصر للمصريين
التقسيمات دي مش مهمة اللي مهم ان الكل مصري وبيحب مصر و بيخدموا علشانها
عم صلاح اتعرفت عليك منذ مدة عبر الايميل و المعلومات ديه قلتها لي لكن اللي عايز يعرفك لازم يتحدث معاك و يكتشف شخصيتك الحبوبة اوي
ويشرفني يا عم اني اكون اول صديق مغربي لك
مودتي

اصحى يا مصر : اسلام ديو يقول...

مع انى بصراحة

ههههه والصراحة كويسة
مش فاهم فى ايه
بس شكل المشكلة بينك وبين الاستاذ فركشاوى

وبعد كدة الامر يتحول لحرب تدوين
ونعمل عائلات ونحارب بعض
هههههههههههههههه

elsha3er يقول...

السلام عليكم

ابى العزيز اولا اسعدنى زيارة مدونتك جدا ثانيا انا لم اصدم فكل ما ذكرته الحقيقة

انا بشكرك جدا لتوضيح وجهة نظرى كما اردت بالنسبة لعبد الناصر انا والله ما بكرهه انا بحبه بس مش زى الناس اللى لحد دلوقتى فاكراه بطل ما جاش زيه يعنى ببساطة اعطيناه اكثر من حقه

تحياتى لك ايها الاب العزيز


احمد الشاعر

نفرتارى يقول...

بابا فشكول العزيز ،،

قلت اعدى اسلم علشان وحشتنى جداً انت واسرتك الجميلة .. ويارب تكونوا دايما بخير وصحة وسعادة .

تحياتى ،،


نفرتارى

آه وكفى يقول...

وانا مفيش شغلانة ليا ياعمو صلاح
ولا مش هتعيني عشان انا ساعة اروح وساعة أجي
عموماً اهي ظروف

بس والله انا كنت على فكرة بكره المنوفيين وبقول عليهم يهود مصر (لامؤخذه فالكلمة) بس بيني وبينك اتعاملت مع ناس منهم زي حضرتك غيرولي الفكرة .. واولهم المدرس بتاعي وانا في ثانوي ومنهم حضرتك

تحياتي لكـ .. واسفه للغياب .. بس الظروف

اصحى يا مصر : اسلام ديو يقول...

نو نو نو
انا محدش زاققنى ...انا لوحدى بزق نفسى :d
ومع احترامى للأستاذ / خالد عزب اللى انا معرفهوش ، فأنا على طول بسمع اغنية للعزبى اسمهااصحا فتح عينيك
اصل انا قريب هحطها فى المدونة

اما اللى حضرتك شوفته فى البروفايل فدا كان زمان...هههه فكرتنى ...هروح اغيره

انا دعوتى للسلم وليست للحرب ، مع انى بصراحة مش عارف الموضوع على ايه
قريته الفين مرة ومش فاهم برضة

يمكن علشان انا نايم مع النايمين؟؟ :d

دمت بود استاذى الفاضل
إسلام ديو

Soul.o0o.Whisper يقول...

ااااااااااااااااااااااه ياااااااااااااااااااااااانى


الحمد لله
خلصت البوست
و خلصت التعليقات

اه .. شفت
قرأت التعليقات كلها

إنى أفهم حاجة؟؟؟
أبداااااااااااااا

المهم
ابئا قولى يا عمو فشكول بتجيبها ازاى وهى طايرة
عشان بس انت عارف بئينا فى عصر السرعة و كدا



المهم
هأروح عند استاذنا فركشاوى
اللى ناوى إن شاء الله
و مش عارفة ناوى على ايه


بس أكيد يسعدنى و يشرفنى
إن أول زيارة تكون فى حرب ضروس
مع إنى سمعت كدا والله اعلم إنها وقفت من جانب واحد


هههههههههههههههههههه




لما أروح بئا





سلام مؤقت

بسنت يقول...

زياره اولى
وحاجه ظريفه اوى الاشتباك دا
بس انا شيفاه ظريف ومناسب علشان ادخل مدونه حضرتك ونتعرف عليك رسمى
وكمان حضرتك منوفى ان شاء الله تغير نظرتنا فى المنايفه كلهم

حاجه اخيره
هو موضوع الاشتباك الاساسى فى بوست سابق
ولا انا اللى مش فاهمه

وفاء بركات يقول...

السلام عليكم
آيه الحوارات دى وقيراط آيه ده ابو عشره جنيه ...
كده بقي السيد الوالد رحمة الله عليه
مداين الأسره المالكه بعشره جنيه لأن كلام الملوك لايرد ..
أ.فشكول صلاح أحمد المفشكل فشكلاوى المفشكلات فشكلها فشكل فشكلها
حيوظف الأستاذ فركشاوى ناوى نظير رشوه
أرجح إنها هبرة لحم كبيره سيتم سرقتها من بيت اللوح لأن اللوح حيكون مسافر
لقضاء عطلة نهاية الأسبوع في مارينا
وبعدها سيقوم فركشاوى ناوى بتقديم حته من الموزه علي سبيل التحليه للسيد فشكول كنوع من التقرب لعضمته
قصدى عظمته..
مين مزعلك هو فيه آيه أمشي ياعسكرى
بعيد سوا سوا ياجماحه ميصحش كده
أرجو من أى حد عرف الموضوع الإتصال فورا بي ويفهمني ايه اللي حوصل دى مصاريين البطن بتتعارك وربنا يجعله
عامر وتكرم المنوفيه علشان الناس
المدونين المنوفيين الجدعان

mahasen saber يقول...

يعنى يا عمنا الرجاله متدخلتش تفض الاشتباك يبقى هتنتظر الستات يفضوه

وبعدين حضرتك عارف اننا اصحاب حس مرهف ومش بتوع الخناق والمشاكل

من فضلك بلاش انكار
احنا الرقه تستحى منا معشر النساء يعنى

ربنا يعدى الحرب دى على خير

حقودي يقول...

أنا بقول
لو هيبقي عندنا جرير والفرزدق
انا معنديش مانع أني أسخن المواضيع بينكم
لكن لو غير كده
يبقي الصلح خير قوم نتصالح
الصلح خيييييييير

يوميات نائمة في الأرياف يقول...

عزيزي عمو صلاح
بجد وحشتني جدا جدا
بقالي حبه كنت مشغولة وبعدين موت محمد خلاني مش عارفة افتح مدونة
بس الحمد لله طلعت من الحالة دي وحضرتك شفت البوست بتاعي
انا عارفة اني مقصرة في حقك بس معلش سامحني
بالنسبة للمدونة انا كنت ناوية اني اغير الاسم بس واسيب اللينك بس عشان اللخيطة اللي هتحصل
بس انا قررت اني اغير اللينك كمان عشان مينعش يبقى الاسم حاجة واللينك حاجة تانية خالص
بس منعا للاشكال انا هدخل كل المدونات اصدقائي واقولهم على اللينك الجديد
وبكدة يبقى عملنا كل اللي احنا عايزينه
عموما بجد حضرتك منورني وربنا يكرمك ويوفقك ويخليك لينا يارب
رنا

واحد من العمال يقول...

السلام عليكم ورحمته وبركاته

أعتذر للغياب وحشتنى والله

وبعدين أغيب شويه الاقى العلاقات متفشكله وومتفركشه والمشكله أن الدولتين حبايبى والعلاقات معهم عال العال ومضطر أبقى تبع مدونات عدم الأنحياز
ومهما كانت الأسباب الصلح خير والسلام بينكم لازم يبفى خيار أستراتيجى

ولا عايزين تقضوها مفاوضات وتخرمونا
من بوستاتكم الرائعه التى ننتظرها وبنطخ لها المشاوير .. السلام ياقوم

******وإليكم البيان التالى******
الصادر من الهيئه العليا لعدم الأنحياز التدوينى وننتظر أعلان فورى من كلا الطرفين بتهدئه الأجواء إعلامياً وسحب القوات من على الحدود وسحب جمبع أسلحه الدمار الشامل والجزئى والترللى توطئهً حلوه توطئهً دى لتطبيع العلاقات كمرحله أولى سريعاًوفوراً
توطئهً تانى لعوده العلاقات الكامله بين مدونتى الغالى فشكول دوت كوم والحبيب فركشاوى ناوى
وينشر هذا القرار على الصفحه الأولى بكلا المدونتين لأثبات النوايا الحسنه من كلا الطرفين ولقد أعذر من أنذر
وجارى البحث فى العقوبات التى ستوقع على مخالف هذا القرار
ودمتم جميعاً بخير

والسلام عليكم ورحمه الله وبركاته

م/ الحسيني لزومي يقول...

المنوفي لا يلوف ولو اكلته لحم الكتوف.
قرد واسيوطي خربوا مدينة.
ميت نوري ولا دمنهوري
الاسكندرانية مياه مالحه ووجوه كالحه....الخ
- جميعها مقولات استعمارية لغرس روح الفرقه بين ابناء الوطن الواحد وباين ان احنا بتخيل علينا هذه الالاعيب.

واحد من العمال يقول...

السلام عليكم
عمنا الغالى فشكول

قام السيد فركشاوى اللى مش ناوى بقبول القرارالصادر من الهيئه العليا لعدم الأنحياز التدوينى
وأعلن إنحيازه للسلام وقام بتنفيذ القرار بحزافيره حفاظاً على العلاقات التدوينيه المتينه وأقام الأفراح ..
واليالى الملاح إنشاء الله بعد تنفيذكم لبنود القرار فور الأطلاع عليه

والأختلاف لا يجب أن يفسد للود قضيه

وشكراً وعاش السلام

doctor mohamad يقول...

أستاذ أحمد: كنا نحب نعرف القصة م الأول _ و لكن _ طالما وضعت الحرب أوزارها و برد الوطيس ، و وضع الرايات أصحابها و هدمت المتاريس .. فما بقى لنا إلا أن نقول: "الصلح خير" و "خيركم من يبدأ بالسلام" .. اه بصيحيح : انت اعترفت إنك منوفى يا أستاذ أحمد و الإعتراف سيد الأدلة >إبتسامة< .. و رأيى طالما أنه لا يوجد علاقة بينك و بين ولى العهد فإنك من الطلقاء ،إذهب فأنت حر ، أما إذا وجدت علاقه فأرجوك لا تجهر بها .."كل أمتى معافى إلا المجاهرون".. ملحوظة: هذا فاصل كوميدى >إبتسامة< .. أراك بخير.

محمد فارس يقول...

اخي العزيز فشكووووووول
هو فركش ناوي يوديك علي فين بالظبط
ارجوك احنا مش فاضيين نجري وراك شمال ويمين ده لو عرفنالك طريق من اساسه
اوعي تصدق كلامه **
وبعدين انا هااوضحلك وجهة نظر الحكومه
في رفع رسوم القضاء
هما لامؤاخذه مش منتظرين من ورانا الكام مليم اللي بيعطفوا علينا بيهم كل اول شهر*لكن يقصدوا ان الناس ما تعملش مشاكل لكن الحكومه مش هاتقدر تقول للناس كده ده حريه شخصيه وزي ما انت عارف بلدنا ديمقراطيه
وبعدين كلنا بنحب المنايفه
احنا عايشين في خيرهم بقالنا 30000000سنه(دمك زي العسل بس ده مش هايغفر ليك )هههههههه خلي بالك
مع خالص تحياتي

iBRAHiM sAllAm يقول...

يعين م هاجي أنا و أقول فاهم لأن كل اللي قبلي مش فاهمين :)

بس لعله خير إن شاء الله :)

رئيس التحرير يقول...

السلام عليكم ورحمه الله وبركاته
استاذنا العزيز ...انت لسه في البيان رقم 0 فركشاوي.. وراك..وراك ضحك عليه واحد من العمال...او هما الاتنين بيضحكوا عليك وعاملين انهم قبلوا الصلح ...برضه الصلح خير..
--------أستاذنا العزيز ---------
أرخ بقي للحرب دي...أسبابها و نتائجها و مواقع اطلاق النار والخطط العسكريه المفشكله و كيفيه فركشه فركشاوي لفشكول و اظن من التاريخ ممكن نفهم المشكله ايه؟
دمت عزيزي ...والي اللقاء

marmar يقول...

عمي الطيب فيشوووو الجميل
انا بعتز برأيك عن عبد الناصر جدا لانك راجل وطني بس اغلبيه اللي حاربوا كانوا بيموتوا ف التراب اللي بيمشي عليه ناصر وغير اللي حاربوا كمان .. يكفي الملايين اللي خرجت في جنازتو من كل البلاد ..
عموما يا عمي
رأيك على عيني وعلى راسي
دمت بكل خير

اعشق فى الليل ضوء القمر يقول...

عايز أعرف رأيك

ملتقى الصحبه

مجداوية يقول...

السلام عليكم
أذا اختلف المدونان ظهرت الأسرار

على العموم الاسمين كويسين جدا أحمد على اسم رسول الله وصلاح من الصلاح والتقوى وصلاح الدين وووو

أهلا بك يا أستاذنا أحمد وصلاح وفشكول

أما عن مصر فكل الأرض أرض الله لكننا محتجزون هنا إما برضانا وإما رغما عنا

DoNyA يقول...

كده لازم تدي اكبر تحيه لفركشاوي ناوي

علي انه اتاح لينا الفرصه ان فشكول يفشكلنا شويه عن حياته

احمد هو صلاح وصلاح هو احمد وام احمد هي ام صلاح وام صلاح هي ام احمد
طب ليه يا جدعان اللخبطه دي

فكرتني بالانتخابات كل صوت له 50 جنيه والعاقبه عندكم في الانتخابات

والحكايه طالما دخلت في الرشاوي
والكوسه اللي طبعا الدمعه اللي عند كل بيت مصري متكفيهاش
انا ممكن بقي اجيبلكم واسطه من طباخ الريس نفسه
واقول انا عاوزه ادخل في الحزب الحاكم
ولا فيها لا هخثمكم كلكم
هه بث بقي مليث دعوه

rovy يقول...

السلام عليكم
الحقيقه كان نفسى اهدى النفوس على الطريقه الاسكندرانى لكن انا مش فاهمه حاجه و كمان مش عارفه مين و امتى و فين ؟؟1
على كل حال الطييب احسن ..
و السماح لأهل السماح ..

ربما ما يحرمنا منكم انتم الاثنين ابدا

تحياتى

ادم المصرى يقول...

مصر هيه امه واحده بجميع محافظتها ومن

شوه سمعت ذه المحفظات فهوا مغرض على اهل وطنه مثل الاسكندرنيه ميه ملحه ووشوش كلحه .....وألخ والمنوفى لحم خروفى...

والفويمى كتكيت والخ والخ والخ كلهم عباد الله وفيهم وفيهم مثلنا ومثلهم

وربنا يرحمنا برحمته

ايوشة يقول...

من حرب اللى مش فاهمين الخلاف بصراحة بس لما قريت التعليق لقيت فيه كلام على الصعايدة ليييييييه كده بئا ازعل انا فيها الموضوع ده
اما موضوع المنايفة والله مش عارفة ليه عندنا فى مصر مشكلة عويصة كده كل محافظة تتضرب فى المحافظة اللى جنبها :)
عندنا عصبية محافظية جدا على فكرةاللى هى عصبية قبلية زمان

أحــوال الهـوي يقول...

بعد النظر في المعروض المقدم من سعادتكم تعلن فيه الرغبة الملحة للصلح و رأب الصدع بينكما قررنا التكرم بالتدخل السريع المريع و حشد قوات الامن الدوليه لاحتلال المدونتين موضوع النزاع و التحكم في البينات الصادرة من كلاهما حتي يتم بعون الله تعميق الخلاف و الفتنه بينهما و لن نتخلي عنهم حتي نكسر انيابهم ومخالبهم و يصبحوا مدجنيني

تحياتي

إشراقة أون لاين يقول...

ازيك ياعم فشكول
والله بعد ما قريت فركشتنى وفشكلتنى
ومعدتش عارف راسى من رجليا
سلام
آه ممكن اضع رابط مدونتك عندى

dr.lecter يقول...

مالهم المنايفه

انا والدي اصلا من المنوفيه من قويسنا تحديدا بس انا مقيم مابين الزقازيق والقاهره علشان اهلي هناك وعلشان شغلي في القاهره

هو من دور حضرتك كمان يااستاذي العزيز

المنايفه اكتر ناس مثقفه شفتهم في حياتي يمكن بعتز بنصي المنوفي اكتر من الشرقاوي بكتيير

وناس محترمه بجد

طبعا فيه شويه مبالغات لكن ماقدرش انكر انها مش صحيحه

منها النكته البايخه ان بنو اسيرائيل لما جم يطلعوا من مصر شويه منهم قعدوا في المنوفيه واسسوا المنوفيه

بايخه مش كده

بس خلاص ... يقول...

انا جيت ربنا يقدرنا على الخير ....

من بس خلاص المخلصة جدا لمملكة التدوين وعايزه الامور تبقى هاديه وعال العال ومن غير مشاكل بتشكر واحد من العمال على المساعىالحميده اللى بتتقال ولكن ...هناك شروط للصلح قد طلبها منى فركش الغالى :
اولا :
الطرف الاول :فركشاوى بما انه ناوى ولسه ماقالش ناوى على ايه
الطرف الثانى فشكولنا العزيز جدا صاحب اكبر فشكله تنويرية
ان يلتزم الطرفين بكتابه تدوينه شهريه يشاكس فيها كل منهما الاخر بطريقته الناقده اللوذعية من خلال موضوع يتم الاتفاق عليه بينهما
ثانيا:
ان يستدعى كل منهما احدى المدونين سواء من اصحاب مبدأ الحيادالتدوينى الايجابى او مبدأ شعللها علشان تحلو ... لمساندته
ثالثا :
تقترح البريئة جدا بس خلاص الى كل من تسول له نفسه فى المشاركه لعمل فرق منظمة للتدوين السلمى لحماية بنود المعاهده ومراقبة تنفيذها حرفيا والعمل بمبدئ تهدئة النفوس لضمان الاستمرار فى هذه الحرب السرمديه الابدية المفيده تدوينيا لانعاش الحركة التدوينية وحمايتها من الكساد

هه عملنا اللى علينا شدوا حيلكم بقا وقولوالى رايكم فى الفركشة والفشكلة دى

فارس عبدالفتاح يقول...

استأذنا الفاضل المحترم / فشكول

تحية فائقة وبعد ،

بالإشارة إلى الحوار الذي كان بينك life is still smiling on uوبمشاركة مواطن مصري نايم ، بخصوص الكلام عن عبد الناصر وعن انجازاته وعن ما قد فعله بتأميم القناة وغيرها .

فانا لن ادخل في جدال أو حوار طويل لكي اثبت أن عبد الناصر كان على صواب أو كان على خطأ ولديه الدلائل على صوابه ودلائل قاطعة لا شك فيها وبالوثائق المفرج عنه من الأرشيف الانجليزي والأمريكي والفرنسي وهذا ليس موضوعنا ، فانا دخلت في مثل هذا الجدال تكرارا ومرارا ولا أريد أن ادخل فيه مره ثانية .

ما قد استفزني فعلا هو اتهامك لعبد الناصر وهناك أيضا الكثير يعتقد بأنه كان يخاطب عاطفة الشعب المصري والشعوب العربية جمعاء وهذا من واقع القراءات السطحية التحليلية لخطابات وبيانات واستعراضات الرئيس عبد الناصر أمام الجماهير المصرية والعربية .

وقارنت بينه وبين القذافي وكنت أتوقع أن تقارن بينه وبين صدام حسين أيضا وهذا أمر غير مقبول إنصافاً لهذا الرجل وتاريخية .

المهم فلا أطيل إذا أردت أن تراجع نفسك في مقولة أن عبد الناصر كان يخاطب عاطفة الجماهير المصرية والعربية وهذا من واقع إحقاق الحق لأهلة واحترام النفس والعقل والنظر في التاريخ بجدية وحيادية بدون أحكام مسبقة أو قراءات لا تخلو من السطحية والسذاجة وأحيانا المأجورة وأحيانا الضالة وبعض الذين ينادونا بالليبرالية .

فأرجو وبكل أدب أن تقرأ بتعقل وبتفحيص وتمحيص وإحاطة بخطابات الزعيم الراحل .

وبالأخص الخطابات التي كانت بعد النكسة وبيان مارس وخطاب إعادة بناء الجبة الداخلية .

واستعراض نتائج النكسة .

وخطاب طلبة جامعة القاهرة والمثقفون لشرح لهم بيان مارس .

وتوجد هذه الخطابات بالصوت والصورة على موقع الزعيم بموقع مكتبة الإسكندرية .

فانك سوف ترى بعقلك وكونك وكينونتك انه يعبر أن آمال كل العرب وكل المصريين وكل إنسان في العالم يريد آن يكون لدية دولة محترمة ومجتمع مستنير ولدية ثقافة ووعي بما يدور حول لأنه كما كان زعيم مصري وعربي كان زعيم عالمي أيضا ومن رواد التحرر الوطني في إفريقيا وفي جنوب أميركا وجنوب شرق آسيا أيضا والتاريخ يخبرنا بذلك أخي الفاضل .

وارجوا أن تمحص بعقلك الأسلوب والديباجة والمفردات والمعاني والدلالات التي كانت في خطابات السيد الرئيس جمال عبد الناصر في جميع خطاباته وخصوصا بعد النكسة التي تظهر بشكل منقطع النظير عظمة وعبقرية وشموخ ومجد هذا الرجل .

وأيضا تمثل صمود وإيباء هذا الشعب المصري والأمة العربية ككل .

ولكم مني كل الاحترام والتقدير

فارس عبد الفتاح ... قومي عربي

صيدلانيه طالعه نازله يقول...

يعنى انا اول مره اجى الاقى خناقه

مالهم المنايفه زى الفل و ابيض من

الفل كمان صحيح هما فيهم سواسه شويه

بس زى الفل و كله تمام

يا جماعه لو مسكتوش و بطلتوا خناق

انا حاضطر استعين بصديق

و قوات دوليه لحفظ السلام و مش بعيد

تقبض عليكم بتهمه ارتكاب جرائم حرب

ههههههههههههههههههههههه

صيدلانيه طالعه نازله يقول...

و على فكره الصعايده كلهم وصلوا و اختارونى عشان امثلهم فى قوات حفظ السلام

اعشق فى الليل ضوء القمر يقول...

كنت عايز أعرف رأيك

http://agabnee.blogspot.com/

رؤية يقول...

تؤتؤ
اغيبلى كام يوم كدا من عالم التدوين ارجع الاقى انقلاب وخلاف وكمان اذيال فى السنان....وكمان اعتراض على الصعايدة...
لااااااااااااااااااااااااااااا
الموضوع خرج عن السيطرة
وشكلى مش هاغفل عنكم تانى
^_^

استاذى
افتقدت تدويناتك الجميلة
تحياتى لك

سومه...مجنونه فى بلد عاقل يقول...

انت بتعاكس نفسك يا خالو؟؟
ايه الصور الحلوه اللى فى المدونه دى دا حضرتك خلاص شكلك بقيت كمبيوتراوى درجه اولى.:))

بس خلاص ... يقول...

فشكول بك ..وبعدين بقاانت فين مستخبى
لالالالا خليك جامد ..الصمود ثم الصمود
ووووووووولايهمك اوعى تخاف انت قدها وقدود يابطل

daktara يقول...

هو ايه موضوع حب الوطن اللي ظهر فجأة علي كل المدونين ده
حش شوف اخر موضوع ليا كده!!!!!!!!!!

واحد من العمال يقول...

عمنا الغالى فشكول
السلام عليكم ورحمته وبركاته
أنت فين
فركشاوى أختار السلام وأنت لم توضح موقفك النهائى من السلام

وأرجو أن تطمئننا عليك أنا بدأت أقلق عليك

أنا خايف رئيس التحرير يكون أثر عليك
ونصحك بقتل سفراء السلام وتعليقهم على أسوار مدونتك ..
بعد أن أقنعك بانى وفركش عاملين لك كمبن
والله ما حصل
المهم طمنا عليك

maryooom يقول...

بصراحه انا مفهمتش حاجه من الموضوع كله
بس لو سمحت متتكلمش عن المنايفه حكم بقي يا عمو فشكول نينه مامت ماما الله يرحمها كان من المنوفية
بس كانت عايشه مع جدو في المنيا بس هما من بني سويف وانا من الماظه هههههههههه حلوة دي
المهم كانوا اهل البلد لحد دلوقتي بيتكلموا عن كرمها وانا كانت امنية حياتي اني اشوفها بس الحمد لله
تحياتي دعواتك تاني عشان النتيجة اقولك انت علي طول تدعي تقول ربنا يوفقك يا مريم يا بنتي في حياتك

د.توكل مسعود يقول...

السلام عليكم ورحمة الله وبركاته...وبعد

فبرجاء التنبيه... والتنويه....على الزائرين الكرام الذين يكتبون التعليقات القيمة..أنهم عند مخاطبة الإناث يكتبون:
شكرا "لكى"
"دمتى" بخير
"جزاكى" الله خيرا

والصحيح أنها تكتب بغير"ياء".
ويفرق بين خطاب الإناث وخطاب الذكور بالحركات،

فتوضع الفتحة على نهاية الكلمة عند مخاطبة الذكور فنقول: "لكَ"، "دمتَ"، "جزاكَ"
اضغط }ض{SHIFT+
وتوضع الكسرة على نهاية الكلمة عند مخاطبة الإناث فنقول: "لكِ"، "دمتِ"، "جزاكِ"
اضغط } ش{SHIFT+

هذا من باب حب اللغة العربية والغيرة عليها...
"واللى مش بيغير.. يبقى مش بيحب"
مع الاعتذار للفصحى

وتقبلوا شكرى وتحياتى

غير معرف يقول...

I'm gone to say to my little brother, that he should also go to see this web site on regular basis to obtain updated from latest news update.

Here is my blog post; lorscheid

غير معرف يقول...

Its like you read my mind! You seem to know a lot about this, like you wrote the book in it or
something. I think that you could do with some pics to drive the message home a bit, but other than that, this is
great blog. A fantastic read. I will definitely be back.


Here is my web blog ... prophet ()

غير معرف يقول...

This design is steller! You definitely know how to
keep a reader amused. Between your wit and your videos, I was almost
moved to start my own blog (well, almost...HaHa!) Fantastic job.
I really enjoyed what you had to say, and more than that,
how you presented it. Too cool!

Here is my website: methods to buy followers on social media service twitter