الأربعاء، 4 فبراير، 2009

ارض كنعان - فلسطين وجبال الصبر 4


فى الحلقه دى يا جماعة الخير حنشوف ازاى عاش بنو اسرائيل فى فلسطين وايه اللى جرى لهم .. ما علهش حيكون البوست طويل شويه عشان انا مش عارف اعمل الموضوع كله فى بوست او اتنين عشان كدا هو محتاج 3 بوست .. وحيكون البوست ده طويل شويه عشان نعرف ايه حكايتهم فى فلسطين وعملوا ايه وآخرتهم كانت ايه وعلى ايد مين .. اذا مش موافقين على طول البوست ابعتوا عشان اجزء البوست القادم واخليه قصير .. لكن امركم لله البوست ده حيكون طويل.

وعشان ما حدش يشتح بيه التفكير ويقول طب هو يوشع بن نون عمل كدا وقتل الناس دى كلها وحرق الارض ليه : دى من عندى مش من مراجع ويصح اكون غلط (كان دخول اليهود الى فلسطين ضروره تاريخيه .. اولا لأن الفرعون طردهم من مصر .. ثانيا حيروحوا فين؟ .. ثالثا ارض فلسطين كان فيها قوما جبارين لا يعبدوا الله .. وكان اليهود فى ذلك الوقت بيعبدوا الله .. يا جماعه يصح اكون غلطان .. دا تحليل من عندى واللى عنده حاجه موثقه يكتبها وانا انزلها فى تحديث.


بنو اسرائيل فى فلسطين


بعد ما سيدنا يوشع بن نون عليه السلام قدر يدخل باليهود فلسطين والموضوع اللى انتم كلكم عارفيه لما ربنا قال لهم ادخولو سجدا وهما ما طاوعوش ربنا ودخلوا رافعى الرؤوس (على الواو ولا على الارض ماما اموله) واللى ربنا عمله فيهم.. فيه حاجات مش حاقول عليها عشان ما ابعدش عن الخط الرئيسى ..المهم سيدنا يوشع قسم المؤمنين بين الاسباط .. انتم عارفين هما كام سبط ولو عايزين تعرفوهم اقول لكم عليهم بالضبط .. وكان فيهم سبط لاوى اللى كان مهمته فى الغزو انه يشيل قبة الزمان وينصبها مطرح ما يستقر اليهود .. وكمان يفكوها ويشيلوها لما يبتدوا فى الرحيل.. وحكاية قبة الزمان دى نسيت اقول لكم عليها لكن فى بوست مستقل ان شاء الله لانها مش حتغير من سياق الموضوع .. وكان لكل سبط شغلانه يعملها او مأموريه او متخصصين فى حاجه .


ويمكن تقسيم حياة اليهود فى فلسطين الى ثلاثة اقسام او ثلاثة عهود .. هما ايه .. اقول لكم :


1- عهد القضاة : كان الحاكم فيها قاضى هما ينصبوه عليهم.


2 - عهد الملوك : ويبدأ هذا العهد بشاؤول او طالوت .


3 - عهد الانقسام وزوال ملك بنى اسرائيل من فلسطين .. حاحاول اختصر بقدر الامكان.


عصر القضاة
كان يحكم اليهود فى هذه الفتره قضاة من الكهنه ينتخبهم كبراء الشعب وكان كل قاض مستقل بسبطه وكان النظام قبليا .. يعنى تقريبا كل سبط كان دوله لوحده .. وبعدين القضاة او زعماء القبائل كانوا بيتعاونوا مع بعض فى الامور الهامه لبنى اسرائيل وبدء اليهود ينتقلون من حياة البدو الى حياة الاستقرار كما بدءوا يعرفون الزراعه ثم تعلموا الصناعه والحداده والفخار .. كويس لحد كده . شوفوا بقى هما دايما متقلبين ما بيثبتوش على حال.. ازاى؟


بعد ما شاع فسق القضاة واخفاقهم وتفشى الرشوه والمحسوبيه جيل بعد جيل ولما شاخ صموئيل زعيم القضاة فى اخر عصور القضاة جعل ابنيه قضاة لبنى اسرائيل اصل صموئيل كان عنده ولدين وبحثت عن اساميهم ما لقيتهمش المهم خلى كل واحد قاضى وزعيم.ولم يسيرا على درب ابيهما فاجتمع الشيوخ لدى صموئيل وقالوا له اجعل لنا ملكا كسائر الشعوب فصلى صموئيل الى الرب واختار لهم (شاؤول) والذى يسميه القرآن الكريم بطالوت . من هنا بدأ عصر الملوك .


عصر الملوك


شاؤول قاد اليهود بشجاعه وكان من جنوده داوود عليه السلام وقتل حلبات قائد الفلسطينين والذى يسميه القرآن بجالوت واخذ داوود منذ ذلك الحين يملأ اعين الناس وافئدتهم حتى خاف منه شاؤول (طالوت) وحاول القضاء عليه فهرب داوود واحتمى بالفلسطينين ومنذ ذلك الحين اخذت الهزائم ببنى اسرائيل حتى تم قتل شاؤول واخذت دروعه الى معبد فينوس الفلسطينى ودق جسده بالمسامير على اسوار بيت شان بعد كدا قام صراع بين اشبوشس ابن شاؤول وقائد الجيوش وانتصر عليهما داول وقتلهما واصبح بذلك الملك الثانى لبنى اسرائيل واستولى على اهم مدن فلسطين (اورشليم) او اور سالم واللى كان معناها محلة السلام .


اورشليم تاريخيا


اصل المدينه اور سالم ومعناها بالكنعانيه محلة السلام وقد كانت تحت سلطان اليبوسين وهم بطن من بطون كنعان وقد سميت على عهدهم يبوس ولما استولى عليها داود سميت باسمها اورشليم واعاد اليها داوود التابوت وشيد بها الهيكل المقدس وفى عهد الرومان سنة 63 قبل الميلاد سميت ايليا وكابيتولينا وفى العهد المسيحى سميت الاسمان اورشليم واليا وفى العهد الاسلامى سميت القدس او بيت المقدس . وكما قلنا اصل الاسم اور سالم. وزى ما انتم عارفين اللغة العبريه دايما تخلى السين شين اورسالم .. اورشالم .. اورشليم.


داوود ملكا


طبعا كلكم عارفين قصة سيدنا داوود عليه السلام صاحب المزامير واللى النا له الحديد فى عهده عمت البلاد بالرخاء وعمل حلف بينه وبين الفينيقيين اللى كان عاصمة ملكهم حيرام وكانوا فى لبنان حاليا ومن بعده سيدنا سليمان عليه السلام وقد كانت مملكة داوود من الحدود الفينيقيه فى الشمال الغربى والحدود السوريه فى الشرق الى حدود عمون (عمان الآن) ومؤاب وحتى بيت المقدس وبير سبع فى الجنوب.والخريطه معايا بس مش عارف انزلها ازاى طبعا فيه كلام كتير عن سيدنا داوود والسبب اللى خلاه يوسع دولته وفى اختصار بيقول ويلز ان ما وطد مملكة داوود ان امور مصر فى عهده كانت مرتبكه فخفت هيمنتها على فلسطين وكذلك الدوله الآشوريه مما منح داوود قدرا من حرية الحركه وقعد 40 سنه فى الحكم ومما هو جدير بالذكر انه حتى تلك اللحظه كانت للفلسطينين ارضا مستقله بمحازاة الشاطئ ولم تكن كل الارض للاسرائيليين وكانت هذه الارض تقريبا هى غزه الأن,


بعد كدا مسك سيدنا سليمان الملك وبدأ حكمه بقتل اخيه الاكبر ادوينا وقتل يؤاب رئيس جيش ابيه وعزل اينبار الكاهن واستطاع سليمان عليه السلام ان يصاهر شيشنق فرعون مصر فى ذلك الوقت وقسم مملكته الى اثنى عشر قسما اداريا لكل سبط قسم خدوا بالكم ما تنسوش ان دائما دولة الاسرائيلين يلعب فيها الاسباط دورا كبيرا وحتى الآن . وبنى سليمان الهيكل (اللى بيقولوا عليه هيكل سليمان وتحت بيت المقدس وواجعين دماغنا بيه لحد الآن) واقام سليمان حضاره تكلم عنها التاريخ والكتب المقدسه . ولكن مصر بدأت تنهض وتنتعش فى اواخل ايام سليمان عليه السلام وسيطرت مصر اسميا على الاقل على فلسطين ونشط اعداء سليمان فاستعادوا بعض البقاع التى كانت خاضعه لأبيه داوود ولسليمان وانكمش ملك سليمان فى أخر عهده حتى اصبح مملكه فى غرب الاردن فقط.


كبر البوست ..ما علهش .. الحلقه القادمه حنشوف ازاى انتهى الموضوع دا كله وايه اللى حصل بعد سليمان وكيف تفككت دولته بين ابنيه رحبعام وبربعام وازاى كل واحد عمل دوله له واول اسم لدولة اسرائيل فى التاريخ .. بعد الفاصل الحلقه القادمه .

هناك 52 تعليقًا:

البت المشمشية حلوة بس شقية يقول...

اول تعليق

البت المشمشية حلوة بس شقية يقول...

وتانى تعليق كمان
هههههههههههه

البت المشمشية حلوة بس شقية يقول...

وتالت تعليق تن ترررام تن تن

البت المشمشية حلوة بس شقية يقول...

هروح اتغدا واجى اقرا براحتى انا قولت احجز قبل الزحمة

نفرتارى يقول...

كم من رائعة .. وانا على شوق وفى انتظار البوست القادم .. وبجد تسلم ايدك على هذه الحلقات المبدعة وممتلئة بالمعلومات القيمة .

تحياتى ،،

نفرتارى

ماما أمولة يقول...

ما شاء الله على اسلوبك وسردك السلس للاحداث

دمت بكل خير

وفي انتظار البقية

اللؤلؤة يقول...

السلام عليكم
أستاذى و معلمى و فشكوووولى العزيز:
كم أنت رائعادائما
تعطينا معلومات لو بحثنا عنها كثيرا فلم نجدها الإ عندك
فلك جزيل شكرى

اللؤلؤة يقول...

السلام عليكم
فشكوووولى العزيز
سردك للأحداث شيق
و نحن معك إلى النهاية
تحياتى

بس خلاص ... يقول...

العزيز فشكول بك .....والله انت بن حلال كنت لسه داخله مدونتك اقرا الكلام الجميل ده ...اسفه لانقطاعى الفترة السابقة عن زيارة مدونتك
انا جيت بس اسلم وبعدين هروح اقرا الكلام الجميل وبعدين ساعود مره اخرى للتعليق
الفين سلام وتحية

هــو..مش ..نـو يقول...

كده الفشكله ولا بلاش هوهوه
ايه الحلاوه دي يا معلمه...
والله وبقي فيه نتايج للمعلمه
لوتقبل اكون تلميذك؟
واشمشم لك علي الخبار..
ايه رأيك؟

مسدس صغير يقول...

برده مشمشية اول تعليق يادى الحسرة.هههههه
شكرا على البوست الرائع وكم المعلومات الاروع ..
بيقولو ان اورشليم معناها محل السلام..يمكن..

ادم المصرى يقول...

معلومات جميله جدا وبجد بحب اقرأ عنهم اوى اوى اوى

ادم المصرى يقول...

اهنيك يمان على ذكائك فى اختيار موضيعك بجد انتا هايل

حنان سعيد يقول...

تسلم ايدك يا استاذ فشكول
بجد المعلومات حلوه اوووي
وطريقه سرد حضرتك سلسه جداا
مش حسستني بطول الموضوع
ربنا يبارك في حضرتك

اللؤلؤة يقول...

السلام عليكم
فشكوووولى العزيز:
أولا: الله يسلمك
ثانيا:شرفتنى بزيارتك وخفة ظلك فى تعليقك
ثالثا:شرف كبير لى أن نكمل بعضنا البعض
ولكن إنت الأستاذو ستظل
تحياتى

Soul.o0o.Whisper يقول...

فيلسوفى العزيز فشكوووووووووول

بجد البوست روعة روعة روعة
و طريقة السرد مشوقة جدا


و بجد شكرا على الكلمات اللى حضرتك بعتهالى
والله فطست على نفسى من الضحك
صدقنى أى حد عامل فرح مش هتأخر عليك
هههههههههههههههههههه

و كمان نزلت البوست اللى وعدتك بيه
و كمان هدية أتمنى تحوز إعجابك


و هأغيب كدا شوية
ربنا ييسر الحال



هأستنى البوست الجاى




دمت بود

عاشقه وغلبانه يقول...

نمسك الخشب بجد
اسلوب رائع ومعلومات كنا مفتقدينها
تحياتي لحضرتك

gana magde يقول...

السلام عليكم
ازيك يا استاذ فشكول

اسلوبك حلو اوى وشيق
وفعلا اختيارك لتكملة تلك السلسة من الاحداث اختيار موفق الى ابعد الحدود
فنحن نجهل الكثير من تلك المعلومات
وليس لدينا الكثير من الوقت للبحث عنها
عموما شكرا على المجهود والنقل والتنظيم
دمت بود
تحياتى

mahasen saber يقول...

استاذنا الغالى وعمنا الكبير

انا مستنيه المزيد والمزيد

بس ممكن تفرد لنا كلام باستفاضه عن الهيكل ..

همس الاحباب يقول...

رائع جدا استاذنا العزيز
انا ليا اكتر من ساعة بقرا فى البوست السابق والحالى لكى اربط الخيوط مع بعضها ولا يضيع منى شىء
معلومات قيمة
بارك الله فى حضرتك

هانى زينهم يقول...

استاذى العزيز :
أولا بسم الله ما شاء الله على صورة ملك حفيدتك منورة وعاجبنى الاسم طبعا لانه على اسم ملك بنتى . وان كنت اترجاك بلاش تحطها كدة انت عارف الحسد ربنا يحميها ومن خاف سلم ودارى على شمعتك تنور والحاجات دى ربنا يحميها .
ثانيا :
هو كان فى اسرائيل زمان غير اسم النبى يعقوب ؟؟ انا هاستنى المعلومة دى فى البوست الجاى ان شاء الله وان كنت حابب افكرك بوعدك بخصوص بوست اكتوبر .

marmar يقول...

عمي فيشووو الجميل
مين البنوته الكتكوته الي في البانر
ربنا يخلهالك يارب يا عمي
وحضرتك راجل عظمة على عظمة ولله
كفايه روحك الطيبه وقلبك الطيب
انا غلطت المره الي فاتت وقلت الفيوم
معلششششش
سلام لاهل المنوفيه الطيبين

م/ الحسيني لزومي يقول...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها

Beram ElMasry يقول...

السلام عليكم ورحمة الله وبركاته
انت سيد الرجال فسلامتك من كل مكروه ، وبالمناسبة انا فى احيان كثيرة ادعو الشباب لزيارتك او ماكس بتاع زمان للتعلم من طريقة القص او الكتابة النثرية ، او الدكتور توكل للكتانة الملتزمة دون اسهاب او تطويل ، او ماما امولة لتصحيح الشعر الفصيح ، وقرات تعليق لك تزعم انك لست رجل تاريخ واسمح لى ان اصحح مقولتك ، المدونات ليست فى حاجة لسليم حسن او عاشور بقدر الاحتياج الملح الى قلم فشكول لعرض المناسب من التاريخ بالاسلوب المناسب والمشجع على الاطلاع
اطلت عليك فسامحنى ولكنها رغبتى ان يكون لما نفعل فائدة ولو قليلة
لك تحياتى والسلام عليكم ، ولا سلام مع اليهود

zainab يقول...

أستاذى فشكول

قريت اللى فى دماغى الحلقة اللى فاتت

حتى انا فعلا استغربت ازاى سيدنا يوشع دخل يقتل فى فلسطين

تحياتى

zainab يقول...
أزال المؤلف هذا التعليق.
جنّي يقول...

السلام عليكم

كيف حالكم اخونا واستاذنا الكريم ..

دروس تاريخية جميلة حبذا لو عرفتنا بالمصدر لمن اراد ان يستزيد من المعلومات ..

شكر لكم وتحيتي

yoyo يقول...

أستاذى العزيز
أدعو الله أن تكون بأفضل حال و سعادة ان شاء الله

أرجو ان أن تتقبل اعتذارى برغم من اننى لم اكتب تعليق على الحلقة السابقة الا اننى استمتعت بقراءة الاتنين معا
و اله يا أستاذ بجد بحس فى طريقة حضرتك بألأب اللى بيحكى التاريخ واحداثه بصورة جميلة ومبسطة

حفظاك الله لنا دائما وابدا

ابنتك
يويو

اللؤلؤة يقول...

فشكوووولى العزيز:
شرفتنى بزيارتك و ملاحظاتك
و قد قمت بتعديل الخط
وأنتظر رأيك في التعديل
تحياتى

حقودي يقول...

وتبقي ملاحظه واحده فقط
بخصوص أسف حضرتك المتكرر علي الأطاله
أستاذي العزيز
لسنا من ضمن طلبة المدارس اليومين دول
وعلي فكره أحنا عمرنا ما هنزهق من أطاله فيه أفادة لينا
أرجو الأ تعتذر مرة أخري علي جميلك الكبير
تحياتي

zainab يقول...

أستاذى العزيز فشكول

الحمد لله انى وجودى هنا بيسعدك

قلت أجى أزورك تانى عشان تتبسط هههههه

و بالمرة أدعوك لزيارة مدونتى التانيه (نور على نور )اللى حضرتك مش بتدخلها عشان تقوللى رأيك فيها

تحياتى

alshared يقول...

عرض رائع متميز للغايه ينم عن معرفه راقيه

أستاذي العزيز
لو يتسع صدرك
لي تعليق علي نقطتين

أولهما

(كان دخول اليهود الى فلسطين ضروره تاريخيه

لم تكن الهجره في يوم من الأيام ضروره تاريخيه وهجرتهم الي فلسطين سبقها التغريب والتيه في سيناء المصريه
كما أن حكم فرعون أنتهي بوفاته في مياه البحر الأحمر

أعتقد أن هذا الموضوع له جذور أبعد من هذا

ففلسطين هي موطن سيدنا يعقوب أو إسرائيل كما يطلقون عليه ومن المعرف أنه أبو الأسباط الأثني عشر

كما أن فلسطين دوما كانت أرضا مقدسه ومن البديهي أن يقاتل لأجلها المؤمنون بالله


هذه النقطة الأولي

أما الثانيه
شاؤول قاد اليهود بشجاعه وكان من جنوده داوود عليه السلام وقتل حلبات قائد الفلسطينين والذى يسميه القرآن بجالوت

بل أسمه جالوت كما قال القرآن الكريم ويسمونه شاؤول

كما أؤمن


.......

في العموم
أسلوب متميز مُغرق في بساطته الرائعه

.......
دُمت أستاذي بكل الود

بأنتظار المزيد

قلم رصاص يقول...

كم انت رائع عمو صلاح بيه

ربنا يبارك فيك يارب على هذه المعلومات الرائعه

سلمت لنا دوما

في حفظ الرحمن

kalamfady يقول...

ربنا يكرمك يا باشمهندس فشكول...ويا ريت تبعت الموضوع التانى بسرعة..

مذكرات مشاغب يقول...

ايه ده كله
ده انا فاتني كتير باه
للاسف ظروف السفر والاصابه ببرد من النوع التقيل منعتني خلال الفتره الماضيه من قرائة مواضيع حضرتك
وبقالي اكتر من ساعه بقرا في الواضيع بتاعة حضرت
بس المشكله اني مش هعرف اعلق او اعدل لان معلوماتي في التاريخ مش كبيره اوي
عشان كده انا اكتفيت بالاستفاده من كلام حضرتك
وشكرا على انك بتحاول تفيدنا بمعلومات بتهيالي فيه ناس كتير ميعرفوهاش

تحياتي

الرابطة وبناء الأمة يقول...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

البت المشمشية حلوة بس شقية يقول...

الا قولى ياعمو
هو محمود الروش ده اللى انتا حاطط صورتو
ابنك
لو ابنك اخطبهولى
لو حفيدك
جوزهولى
هههههه
قولو
اصلو روش اوى بشعرو اللى مفلفلو ده
وبعدين ان احلوة وعندى عربيه وشقه وشاليه فى مارينا ومهربة فلوس فى سويسرا وعندى 19 سنة بس
هاة موافقين

أحــوال الهـوي يقول...

زورني عندي حاجه جديدة

تحياتي

ن يقول...

السلام عليكم
أستاذى الفاضل فشكول
ها أنا قد عدت من جديد وأشكرك على سؤالك الدائم وكنت أتابع حلقاتك عن فلسطين .
جميل الا تغلق هذا الملف بالرغم من توقف الغارات المؤقت بل انك حرصت على أن يكون الملف مفتوحاً لأن الله عز وجل فتح لنا هذا الملف من خلال كتاب الله وأخبرنا أنه مستمر وإسرائيل فى حد ذاتها البداية والنهاية فى هذا الملف الزمنى وتعلمنا من خلال القرآن متى وكيف يكون نصرنا ومتى تلحق بنا الهزيمة وعلينا أن نعترف بأن غزو فلسطين يدل على ضعف إيماننا وعودة فلسطين وانتصرنا يدل على قوة إيماننا والصراع المستمر بيننا وبين إسرائيل قائم يحسمه نصر وإيذان بقيام الساعة هكذا أخبرنا المولى عز وجل فى كتابه وعلينا أن نعى بأن القدس عربية والقضية لا تخص الفلسطنين وحدهم ..وأذكرك بهذه الانشودة .
حين هوة مدينة القدس تراجع الحب
وفى قلوب الدنيا استوطنت الحرب
فلسطين هى أرض هجرات منذ فجر التاريخ أرض إرتوت من دماء الشهداء والابرار هى أرض رحل منها اللاجئين من مختلف العصور الى مصر وباقى البلاد المحيطة بها هربا من الخيانة وبطش الاعداء ثم ما لبثوا أن يعودوا فاتحين منتصرين .
*وتلك الايام نداولها بين الناس *
هى إرادة الله وإمتحان للبشر
أشكرك على هذه الاستمرارية وعلينا أن نتذكر أن الهدنة مؤقتة قد تعقيها هجمات شرسة وعلينا الا نغلق هذا الملف
سأستمر معك إن شاء الله عبر الحلقات
مع خالص تحياتى.

dr_samarmar يقول...

بسم الله الرحمن الرحيم

جميل يا أستاذى فشكول كل بوست بيزيد تقديرى و احترامى الشديد لحضرتك عن اللى قبله.. متشوقة للحلقة القادمة

بس عندى سؤال حتة كدا واقعة منى... هما الأسباط اللى أدارو ال12 قسم ادارى دول هما هما أولاد سيدنا يعقوب عليه السلام مش كدا... هما لسة كانو عايشين بعد كل العصور الكتير دى
كدا العصور دى أخدت وقت قليل صح؟

تحيات كبييييرة أوى أوى و أسفة ع التأخير.. نفسى مرة واحدة ألحق مكان فى الأول عند حضرتك :)

صبرني يارب يقول...

ايه ده

على فكره انا كده محتاجه اذاكر الكلام ده يا استاذنا

طب ينفع اجي اخد درس

وربنا انا بجد مستمخخه جدا جدا من الكلام

انا قريت بوستين ورا بعض عشان كان في واحد مستنياه يجي يقرا معايا

بس ذنبه علىجنبه بقى ماليش دعوه انا قريت انا وما عدتش هاستناه


بجد ربنا يكرمك ده الواحد كان بلاطه خالص فى الكلام ده على فكره

شكراااااااااا وبسرعه الجزء الى بعده

الازهرى يقول...

اولا انا مش شايف انه طويل ولا حاجة

ثانيا المعلومات المذكورة جميلة جدا ولكن فى انتظار البقية لاستكمال الصورة

ثالثا ياريت اسماء بعض المراجع المستقى منها الاحداث

رابعا لن اذكرها ولكن حاول ان تتوقعها

نهــــــــــار يقول...

السلام عليكم عمي فشكول ...
أنا أثبت حضوري اهو ...
صحيح متأخره بس أحسن من الغياب ولا إيه ..
معلومات مهمه..ومفيده ..
جزيت خيرا..

رابطة مدونون من أجل فلسطين يقول...

نتشرف بدعوة سيادتكم للانضمام لنا

رابطة مدونون من اجل فلسطين

http://bloggersforpalestine.blogspot.com/

صبرني يارب يقول...

استاذنا الغالي

والله ما شوفت تعليق عندي الا من شويه والا كنت كتفناه وجبناه لحد عندك ههههههههههههههههههه

لكن انا ما لقيتش بد بقى امبارح قعدته جنبي يصلح المكنسه وانا اقوله على الى باقراه هههههههههههههههههههه

وروحنا كمان عند لؤلؤه قرينا اللنكات الى حضرتك حاطتها ربنايكرمكم يارب
وحقيقى متشكرين لك جدا على الاجزاء دي رااااااائعه

تامر علي يقول...

للأسف فإن اليهود يزورون التاريخ بامتلاكهم لوسائل الاعلام حول العالم سواء المشاهدة أو المقروءة أو المسموعة وهم بذلك يسوقون لقضيتهم الدموية حتى في بلادنا ستجد من يتبنى وجة نظر اسرائيل .... شكراً لك على محاولة توضيح الحقائق التاريخية .

نهر الحب يقول...

ثرد جميل جدا لاوقح جرائم بنى صهيون

صبرني يارب يقول...

يا استاذنا بالنسبه للتدوينه السوداء

حضرتك تاخد بانر الوقفه الى هي الصوره الى عندي

تعمل عليها كليك يمين وتحفظها عندك

وبعدين تروح على المدونه عندك تنزلها فى بوست مستقل وتكتب عليها يوم التدوينه السودا

وبس كده

فتافيت يقول...

معلومات قيمة .. وشمعة حاولت انك تنورها في عتمة تضليل اسرائيل وتزير الحقائق

تسلم ايديك .. قريت اسم حضرتك كتير في مدونات مهمة.. وفعلا مدونة رائعة
تقبل مروري الاول .. وبعون الله لن يكون الاخير

سلام عليكم

fashkool يقول...

اتقدم بالشكر لكل من علق على هذا الموضوع وبخاصه من اضاف على الموضوع اضافه مفيده

fashkool يقول...

اتقدم بالشكر لكل من علق على هذا الموضوع وبخاصه من اضاف على الموضوع اضافه مفيده

Lamiss Ibrahim يقول...


افضل موقع متخصص في العقارات في المملكه العربيه السعوديه


http://3kary.com/