السبت، 4 أبريل، 2009

فشكله فى الاسكندريه


السلام عليكم اعزائى زملائى وابنائى وبناتى مجتمع التدوين الجميل
طبعا انا آسف جدا للغيبه الطويله عليكم فى البوست ده وبأعتزر لاحبائى وبناتى - محاسن هانم صابر - وعاشقه الاحزان - والحاجه شمس النهار- وحسين بك سباق - والدكتوره سوووول - والعزيزه لايف - عشان كنت بألعب فى مدونة العزيز حسين سباق وبعدين لقيت كلمة اتصالات اخرى جيت نازل كتابه ... اتاريها بتنشرها عندى فى المدونه وانا مش واخد بالى ... قمت رجعت جرى وشيلتها .. والجماعه بقى فكروه بوست عايزين ينزلوا تعليقات .. وانا عملت فيهم فصل بارد وانا مش واخد بالى عشان كدا باعتزر لهم ولكل من زار الكلمتين اللى كنت باكتبهم عند حسين حامد سباق صاحب العزبه. وندخل بقى فى الموضوع
يا سلام على شتاء اسكندريه (مافيش حد على الشاطئ خالص )




بس عشان انا كنت فى اسكندريه طوال الاسبوع الماضى ولم اعود الا يوم الخميس وان شاء الله اروح فى شم النسيم والشاطر يبقى يقابلنى , ويوم الاربع قعدت على نت كافيه عشان اتواصل معاكم وفعلا رديت على كذا تعليق لكن القعده فى الكافيه نت مش حلوه والعيال بيبصوا لى كدا من تحت لتحت وفاكرين انى راجل عجوز قاعد عمال يعاكس ويشيت مع البناتات الحلوات الجميلات العسولات السكاكير اللى زى بناتى المدونين .. فقمت اتكسفت من روحى وقلت قوم يا فشكووول واحترم نفسك و روح الاستراحه واديها نوم ... هو فيه حد اليومين دول يطول شوية نوم وانت من الساعه الثالثه يوميا فاضى وما وراكش حاجه ولو مش عايز تنام ممكن تتمشى على الشط وعندك الشط من اول المعموره لحد السلسله فاضى ما فيهش ولا صريخ ابن يومين والقعده بتبقى جميله جدا . وخصوصا ان ما فيش زحمة الصيف. وانا بقى عاشق اسكندريه فى الصيف واكتر فى الشتاء .



وبما انى كنت فى اسكندريه ومش اضيع الفرصه دى فى انى امخخ بوست كويس برضه يليق بمقامكم ومقام اسكندريه تعالوا بينا نتفسح سوا فى الاسكندريه ونتكلم عنها صيفا اوشتاءأ:



الاسكندريه .. أه يا لاللالى .. ياعينى يا لالالى .. سيدى يا لالالى .. . يا سيدى ... مريه فيها الهوى بحرى .. ما بقاتش ... حيث دائما اذهب للاسكندريه للعمل احيانا والفسحه احيانا اخرى- فى الصباح اذهب الى العمل الاقى فيه ما الاقى من مشاكل العمل - تحل بعضها وبعضها يبقى بلا حل - وفى اخر النهار ابتغى فضلا من ربى ورحمه ... هذا الفضل هو الفسحه والتنزه على البحر والتسوق بقدر ما يسمح بيه الربع جنيه اللى حيلتى.. عملى فى المنشيه .. مأموريات مؤقته .. .أحيانا اخذ معى اولادى سواء فى الصيف او الشتاء فعندى ان اسكندريه فى الشتاء اجمل منها فى الصيف - الفسحه فى الاسكندريه بحر ثم بحر ثم بحر ثم محطة الرمل عشان الجيلاتى الحلو اللى فيها وشارع صفيه زغلول وسعد زغلول وربنا ما يوريكم الشارعين دول خصوصا لو فيه اولاد معاكم .. نصيحه اوعى حد يبص لبتارينه او يعرف عياله ان معاه فلوس والا حتروح البيت مفلس وما معاكش ولا مليم وتلموا الشنط وترجعوا من حيث اتيتم ولا اتفسحتم ولا عملتم حاجه - ثم العوده الى البحر - كان عهدى بالبحر طوال عمرى شارع الكورنيش حيث استمتع برؤيته والمياه .. والموجه بتجرى ورا الموجه عايزه تطولها - هذه الايام لا بحر ولا موجه . كل عام يذهب البحر بعيدا .. يذهب الى بلد اخر بحر اسكندريه ليس بحر اسكندريه كتل من الخرسانه المسلحة تحجب البحر عن الكورنيش ( لماذا اسمه كورنيش اذن؟ )رافعات وجرافات عملاقه - نقابة الاطباء - القوات المسلحة - نادي السيارات - نادى القضاة - نوادى ونوادى وشواطئ خاصه - شاطئ مش عارف ايه - المسافه بين المنشيه الى خالد بن الوليد الى المعموره كلها محتله بالانديه والنقابات - البحر اختفى خلف هذه النوادى كأنه عوره - هذا البحر ( المرأة العاريه ) يجب حجبها عن اعين الفضوليين السائرين على الكورنيش اللى زى حالاتى .. يجب الباس البحر الحجاب او النقاب عشان عيب يا واد يا بحر يا قليل الادب تنكشف على الاغراب العيب ان تراه اعين الرجال الفضوليين او النساء على السواء واذا اردت البغاء مع البحر فهناك اماكن مرخصه لممارسه هذا البغاء - فهذا الشاطئ الفلانى برسم دخول وثمن للكرسى وثمن للشمسيه مرخص فيه البغاء مع البحر والامواج ويمكنك مشاهدة مفاتن البحر المحرمه وممارسه البغاء مع امواجه - حجب الشاطء وحجبت المياه عن المصريين - حجب بحر مصر عن مصرلابد ان تدفع ثمن للاستمتاع ببحر بلدك مع انه ملك لك .. ملك لكل المصريين نحن نبيع لكم عيونكم لترى البحر - كم اصبح تعجيزيا - كم اصبح البحر مكلفا .. كم اصبح البحر غال .. غال .. غالى على جيوبنا - وبعد انتهاء الايام التى تظن انها مصيف ولكن تكتشفت انها مسحوق غسيل لغسل الجيوب .. نبيع لكم البحر .. نبيع لكم الهواء .. الا أونا الا دونا نبيع ... نحن تخصص فى البيع .. لو اردتم نبيع لكم عيونكم بثمن.. نظركم للبحر بثمن ... نحن نبيع .. من اجل تطوير الشاطئ .. من اجل توسيع الكورنيش ..من اجل ومن اجل ومن اجل .. لن نعدم سببا نبيع بسببه ... اين الضرائب؟ هل اصبح الهواء وهل اصبحت المياه المالحه تخضع لقانون الندره النسبيه ... بتقولوا ايه ؟ يعنى ايه قانون الندره النسبيه .... ما علهش ما علهش... هو القانون الاقتصادى البغيض الذى يصدمنا كل لحظه .. اصبح البحريخضع لهذا القانون .. كلها شواطئ مبيعه ؟؟ كلها شواطئ مميزه على عكس التصريحات .. الشواطئ المجانيه لم اقابلها . يقال ان هناك الشاطئ الفلانى مجان .. كلام كما تسمع الاساطير .. عليك ان تبحث واذا وجدت الشاطئ المجانى اخبرنى .. وفى العوده على كوبرى كفر الزيات لابد من دفع ثمن استخدام الطريق - بوابات للتحصيل ومحصلين قاعدين يحصلوا امال قاعدين عشان سواد عيونكم - لماذا ؟ للتطوير والصيانه .. كل تطوير لابد ان تدفع عنه - كل ترميم لابد ان تدفع .. كل شئ عليك .. فمن اين نطور . لا توجد ميزانيات .
لا ميزانيات للمدارس .. والمدارس الان رمز للعمليه التعليميه ولكنها مؤسسات لغير التعليم ( للرمز) والمستشفيات ( رمزتذكارى لدور العلاج ) الشارع اصبح سداح مداح... كل شئ يخضع للماليه العامه .. لا توجد له ميزانيات .. كل شئ لابد ان تدفع ثمنه الشارع خال الا من ضباط وجنود المرور - يحملون ايصالا ت الغرامات المروريه يتسللون لتغريمك مخالفه .. اذا اوقفك ضابط او جندى فانت مخالف .. مخالف .. مخالف ياولدى حتى لو كانت عربيتك على سنجة عشره هنا لا رمز عند الدفع لا رمز.. هنا فعل امرعندما يتعلق الامر بتحصيل النقود منك فهو فعل امر ومفعول به وكل قواعد النحو .. اما عندما يتعلق الامر بالواجبات تجاه الناس تعطل كل قواعد اللغة العربيه .. يمكن ان تكسر المرفوع وتجر المنصوب وغصب عن ماما اموله ما دمت تريد حقوقا او واجبات .. اما اذا كان عليك !!! يا غلبنا ... فلابد ان تدفع هناك ضرائب تبلغ حوالى 100 مليار جنيه لماذا لا يتم التصليح والترميم وخلافه وبناء 20 كورنيش اسكندريه منها ويتركوا لنا البحر كما تركه اجدادنا .. لماذا لا اصلاح الا من جيوبنا الفارغه ولا كورنيش الا من جيوبنا الفارغه ولا كوبرى كفر الزيات الا من الجيوب الفارغه.. اين الماليه العامه .. اين دورها .. اين الضرائب .. لماذا ندفعها ؟


هناك 84 تعليقًا:

عاشقة الأحزان يقول...

واو اخيرآ ظهرت
وقعت قلبى ياعم فشكول

عاشقة الأحزان يقول...

المهم انى أقبلت أعتذارك وبجد كان نفسى قووى انك تعلق عندى على موضوعى اللى فات بس يلا مافيش نصيب المره دى
ههههههههههههههههههه
أولا عجبنى إسلوبك قووى فى كتابة الموضوع ده
وانت بتسئل فين الماليه وليه بندفع الضرائب
فى الحاله دى مش هرد
وهقول
لالالالا تعليق
وانت فاهم الباقى
أحسن نكون متراقبين
ماشى أفهم كلمة السر
لا تعليق ماشى ياعم فشكووول
ههههههههههههه
وانا زعلانه منك عشان ماجتش تاخد التاج اللى بعته ليك ياعمو
ومستنيه ردك على الاسئله فى البوست القادم ان شاء الله بقولك أهوووووو
أحسن اجيب العصابه وأجى اخطفك
وحدش هيعرف ليك اى مكان
ههههههههههههههههه
تقبلى تقديرى واحترامى ليك
الكبيرياعمو فشكول
أبنتك إيناس

ريمان يقول...

أه يا لاللالى .. ياعينى يا لالالى .. سيدى يا لالالى


ااااااه يانى منك

طب انت عارف انا عماله كل شويه ادخل مدونتك عشان فى الريدر عندى مكتوب انك نزلت بوست جديد ودخلت طبعا لقيت مقلب يعنى

هههههههههههههههههه


على العموم حمد الله ع السلامه يا جمييييييييل

شط اسكندريه

ايووووووه على بحرها

احلى حاجه بقى اما يبقى فى الشتا ومفيش حد ع البحر

انا بحب اروح راس البر فى الشتا بس بحس انها بتاعتى انا بس

ايه ده؟

هى عاشقه الاحزان هتعطيلك تاج

يالا يا جمييييييل

منتظرين اجابتك عليه

انا لسه برضه مدبسه فيه

هههههههههههههههههه

ريمان يقول...

تحياتى ليك يا احلى فشكول فى مصر والشرق الاوسط كمان

همس الاحباب يقول...

اسكندرية يا اسكندرية
اسكندرية ده غرام وعشق لوحدها
اجازة سعيدة يا عمنا
ولازمن ندفع لتطوير بلدنا وتنظيف جيوبنا
يلا خلى الحكومة تعيش والشعب يروح فى ستين داهية
تحياتى وتقديرى

فليسيتى يقول...

حمدا لله على سلامتك يا عم فشكول ويبختك بقى بجد لان انا بموت فى اسكندريه وبحبها فى الشتاء ذيك بالظبط .بس يعنى انا شايفه ان ده دليل على الرومانسيه......
ولا انت شايف ايه؟؟؟؟؟؟؟؟؟؟؟؟؟؟

عاشقه وغلبانه يقول...

اسكندريه
ياااااااااااااااااااه
بعشقها
بس خلاص

وحشتنا ياكبير

assafo anaroze يقول...

عمي صلاح
حمد الله على سلامتك من السفر
بس و الله فرحت لك على الفسحة الجميلة
اكيد يا عم ان كل شيء لازم تدفع ثمنه من تعليم و صحة لان البنك الدولي في تقاريره يعتبر ان القطاعات الاجتماعية غير منتجة و عشان تجيب فلوس و تكون منجة بحق لازم الدولة تشيل ايدها من هذه القطاعات و يكون الشعب هو اللي يدفع مصاريفها بالشراكة مع القطاع الخاص و انت بتعرف ان بلداننا كلاب وفية للنظام الراسمالي و اكيد حتسارع لتنفيذ توصياتهم
و عليه العوض و منه العوض
مودتي

enjy يقول...

زعلااااااااااااااااااانة بجد بجد بجد
بقى تبقى حدانا فى بلدنا اسكندرية الجميلة الحلوة التحفة ومتقوليش عشان اعزمك على واحد ايس كريم من عند الصعيدى وواحد رز بلبن من عند صابر لاااااااااااااا انا ماليش دعوة
زعلانة صحيح

محمد فارس يقول...

الاستاذ العزيز صلاح الخير
وحشتنا ووحشنا اسلوبك الساخر الرائع
وانا اسف جدا علي تأخيري في الزياره
يلا انا اللي كنت حارم نفسي من
رائعتك الجميله
يااااااااه هي اسكندريه لسه موجوده
هو يعني ايه بحر
اصل انا كل ما اسمع عن بحر اروح ما لاقيش حاجه كل البحار اللي في بلدنا
بقت تبع السياحه اللي مالناش فيهاحاجه كله بح خلاص
كفايه علينا نعوم في الاوهام والمشاكل
دول مش محتاحين ندور عليهم
انا خايف نيجي ندخل بيوتنا
نلاقي حد قاعد علي باب البيت
يحصل ضرائب للدخول والخروج
اَه ياخوفيييييييييييي
من بكره ربنا يرحمنا
مع تمنياتي لك بلاستمتاع في الحياه
وكمان تمتعنا بتدوينك

Dr.Ahmed يقول...

حمدلله علي سلامتك ورجوعك بالسلامة من عروس البحر المتوسط يا استاذي العزيز فشكول
طبعاً انا راح اغبطك وبرضه ماسك الخشب ههه بختك باسكندرية المرية وهنيئاً لك علي الفسحة الحلوة
اما بالنسبة لخدمات بلدي علينا فحدث ولاحرج ..فأنت في مصر يا استاذ فشكول يعني لازم تدفع غصباً عنك ..دلوقتي عندنا ترزية قوانين زي الفل بيفصلوا علي مزاج الحكومة اللي هم عايزينه وده طبعاً لان مافيش مجلس شعب عندنا ..احنا عندنا بس "مجلس حكومة "وبيحاولوا بشتي الطرق انهم ينفضوا علي جيبك اول بأول ..وماشاءالله القوانين نازلة علي ودنه يا استاذي العزيز ..والمحصلة في الاخر مئات المليارات بس السؤال اللي عايز اعرف له اجابة كويس "الفلوس دي كلها بتروح فين اذا لم تُصرف علي تصليح طرق وبنية تحتية والخ !!علي كل حال لازم تتفاءل يا عزيزي فأنت في مصرالمحروسة يووووه قصدي المنهوبة "ابتسامة كبيرة اوي "
عوداً حميداً يا استاذي

Soul.o0o.Whisper يقول...

عارف يا عمو فشكوووول


انا كنت خلاص طرت و رحت هناك بئا
و قعدت أتخيل معاك البحر و الكورنيش

و كنت لسه هأبدء بئا أحسدك

لقيتك دخلت فى الخوض فى عرض البحر
طب دا كلام؟؟؟

لا و الكراسى و الشمسيات كمان...
دا كلام؟؟

الفلوس و المسحوق الغسيل
دا كلام؟؟؟

و المدارس و ما تبع ذلك


ليييييييييييييييييه بس كدا؟؟؟

عااااااااااااااااا
طب خلاص ماعندتس هأحسد والله
ماكنتش عارفة إنى وحشة اوى كدا
:(


سلام بئا

حياة يقول...

حمد لله على السلامة ورحلة سعيدة واسكندرية رائعة فى الشتاء وخصوصا البحر

تحياتى

”*°•.˜”*°•..سونه..•°*”˜.•°*”˜ يقول...

السلام عليكم .
عوده حميده بموضوع ممتع وجميل بجد
حمد الله على السلامه يا استاذ فشكول
المهم انك استمتعة بهواء الاسكندريه الجميل
تحياتى ليك بوست جميل ومعلومات مفيده
سلام ((سونه)) .

اللؤلؤة يقول...

حمدلله علي سلامتك ورجوعك بالسلامة من عروس البحر المتوسط يا استاذي العزيز فشكول
المهم انك استمتعت بهواء الاسكندريه الجميل
ورجعت تفشكل من تانى
دمت مفشكلاً

mohamed ghalia يقول...

اين الضرائب .. لماذا ندفعها ؟
إيه يا جدعااااااان هى الضرايب ورايا ورايا
أنا المادة دى جابتلى عقده
ربنا يستر
أما بقى لماذا ندفعها فدى لحاجات كتير
أهمها يجيلك الضغط والسكر وتلاقى حد يفرسك ويقلبك ههههههههههههه

*** حور- نور*** يقول...

ايوووووووووة يا سيدى المرسى ابو العباس
يا بختك يا عم رحت اسكندرية انا نفسى اروح اوى اصلى مش بروح غير فى الشتا بتبقى مية مية
اكيد روقت نفسك هناك
يلا بقى استعد علشان مشروعنا الجديد محتاجين نشاطاتك المتعددة يا عمو فشكول

hasona يقول...

السلام عليكم

لأن معظم من في النت كافيه ( السيبر) يكون هدفهم معاكسة أو تشات
فينظرون للجميع بنفس الشكل

،،،،،

اسكندرية
عروس البحر
عروسة لكل منا
نعشق بحرها ونهوي نسمة هواها

لكل منا ذكرياته بها

صوت من مصر يقول...

يا عمو والله دخلت ملقتش حاجه قولت عادى جدا ممكن تكون غلطه مطبعيه
عوما للاسكندريه جوها الجميلفى الشتاء دوما لكن جمال وسطج البلد عندنا فى القاهره الساعه 3 بالليل فى عز الشتا

عاشقة حبيبتى يقول...

عزيزى الاستاذ فشكول

عارف انا مروحتش اسكندرية فى الشتا من يوم ما اتولدت الا السنة الا فاتت وكم عشقت الشتاء فى اسكندرية بجنون

نجى للفلوس الا بندفعها مش انت لما شئ بيعطل فى بيتك بتصلحة على حسابك ودى مصر بيتنا كلنا لازم اى شئ يتصلح من جيبنا بس نظام هتدفع هتدفع


تحياتى دمت بخير

طـــائر الليــــل الحـــــزين يقول...

حمد لله على السلامة
عم فشكول بجد اسكندرية ملهاش حل فى الشتاء
تحسها بجمال مضاعف عن الصيف
وكفاية الهدوء اللى بتحسه على الشواطىء
والروقان اللى بتحسه وانت بتستمتع بمنظر البحر وموجه وريحته

وطبعا باقى موضوع البوست
انا كمان بسأل زيك فلوس الضرائب بتروح فين
وفلوس الشركات اللى بتخصص برده بتروح فين
البلد ليه هتفضل منهوبة وخيرها لغيرها
تحيااااااااااتى
وتسلم ايدك يا عمنا

رئيس التحرير يقول...

بسم الله الرحمن الرحيم
العزيز ...فشكووول
السلام عليكم ورحمه الله وبركاته
بقي بتلعب في المدونه ؟
والله ما كنت اعرف انك انت اللي بيلعب فيها . أمشي ..أمشي العب بعيد يالا يالاللي..ياليلي ياليليلي علي ليل اسكندريه بالليل ...
وانت قاعد تغني حبيتك بالصيييييف حبيتك ف الشيتيه ..
ياعم ملعلعه معاك شغل وفسح وسفريات و مأموريات وبدلات انتقالات ...وادفع تكاليف اللي بوظته في المدونه..أدفع.

zainab يقول...

أستاذى العزيز فشكول

جزاك الله خيرا لسؤالك عليا حضرتك شايف انى تايهه مع فارس أحلامى هههههههههه

حضرتك عارف انا النهارده دماغى بجد هتنفجرمن التفكير ممكن تساعدنى شويه أصل بفكر فى الأجهزة الكهربائيه اللى هشتريها ان شاء الله و مش عارفه أعمل ايه ؟؟؟؟؟؟؟؟؟؟؟؟

أشترى تلاجه توشيبا3 باب و لا 2 باب (أصل أنا سمعت ان قوة التوزيع على 3 حتقلل من كفائة التجميد حيث ان كمية التبريد في الفريزر حتقل حبة وحتبان قوي كل ما التلاجة تقدم ) و لا أشترى كريازى أحسن ؟؟؟؟؟؟؟؟؟؟؟؟؟؟؟

لو ساعدتنى فى اتخاذ القرار ربنا يسهل و تساعدنى فى باقى الحاجه اللى بفكر فيها هههههههههههه ان قلت أسألك فى عينه بما انك خبرة

تحياتى

ايوشة يقول...

عودة احمد يااستاذ فشكول والله االبوست اللى فات جيت اشوفه كنت حذفته :(
بصراحة نفسى ازور اسكندرية تقريبا حلم بعيد المنال خلينا احنا كده فى الصعيد لما نتفحم فى الحر والشمس
وبما ان حضرتك بتقول البحر تشوفه بفلوس الظاهر هزورها لما يكون البحر بيتعبئ ويتباع فى ازايز :)

أحمد عمر يقول...

الف الحمد لله ع سلامتك يا فشكول

و اتمنى يا رب تكون بالف خير و سلامه و بجد قلقتنا عليك

المهم انك وصلت و بخير


بالنسبه للاسكنكريه فتصور ما رحتها قبل :((


رغم انى بصيف برضه زى الناس ساعات مش دايما لكن ما رحت اسكنكريه خالص خالص



وحشتنى و الله جداا

يارب ما تغيب علينا خالص بعد كده


دمتم بكامل الصحه

الجواز و سنينه يقول...

انا كمان بحب اسكندريه اوى جدا خالص
و لو كان ينفع انى اكون هناك على كول هاعملها
بس مين يسيبنى اعمل كده
الصوه كمان رائعه
و اكتر من رائعه
حسيت انى لو اتنفست هاشوف بخار الميه
أه يا لاللالى .. ياعينى يا لالالى .. سيدى يا لالالى
انت هاتخلينى اقوم اجهز الشنطه
ولسه بدرى على المصيف

رؤية يقول...

فى الاول كنت عايشة مع البوست ومستمتعة وكانى فى اسكندرية
وفجاة...
ظهرت المالية العامة
والضرائب
والرسوم
وافتكرت...
ويارتنى ما افتكرت...
بلدنا بلد التزمات مش بلد حقوق
ولو مارسنا الحقوق نهيص فيها لدرجة ان الاموات بينتخبوا...!
وعجبى....!

وحمدا لله على سلامتك ياعمو
ومنورنا دايما

تحياتى لك

عاشقه الرومانسيه يقول...

شفت العنوان قلت يامحاسن الصدف
اصلى لسه منزله بوست سخن عن اسكندريه
بس انت بقى بصيت فى جيبك وكتبت ياعمو
انا بصيت للبحر وكتب
تعالى بقى شوف البوست بتاعى
اه نسيت اقولك
نورت اسكندريه الاسبوع اللى فات يافشكولى العزيز

د.توكل مسعود يقول...

فشكول

السلام عليكم ورحمة الله... وبعد

فلا أدرى كيف أشكركم ... ولا أستطيع ذلك... ولكنى أكل إلى الله شكركم.... ولعل عمق الأخوة.. وصدق الحب.... وإخلاص الدعاء... كانوا جميعا وراء هذه الانفراجة السريعة التى لم أتوقعها ولم تحدث معى من قبل......جزاكم الله خيرا وأحسن الله إليكم.

عمرو يقول...

أسعد الله صباحك يا أستاذنا الفاضل ..
اٍسمحى لى أحسدك بعد اٍذنك لو سمحت على زيارتك للاٍسكندريه الجميله فى الشتاء :)
و لو تسمح لى كمان بعد اٍذنك آخد الصوره الجميله للكورنيش اللى فى البوست ده و أنشرها عندى فى المدونه ..
سؤال حضرتك عن الضرايب ده الحقيقه أنا بأعتبره سؤال فلسفى عميق لا يمكن لأصحاب العقول البسيطه اللى زى حالاتنا أنهم يجاوبوا عليه .. و ربما يكون هذا السؤال فى حاجه لمتخصصين فى تحضير العفاريت و الجن الأزرق لربما يساعدونا فى اٍيجاد اٍجابه مناسبه و لا حول و لا قوة اٍلا بالله :)

احساس نفس هادئه يقول...

عم فشكووول
مكانة الاسكندريه في قلبي كبير جداا
وحبي لها ليس كاي حب لاي بلد رغم اني ما رايتها في حياتي
اشكرك انك خلتني احس اني شفتها

ماما أمولة يقول...

ههههههههههههههههههه

يعني أنا عمالة اقرأ ومندمجة في الموضوع ومتأثرة

تقوم تقول غصب عن ماما أمولة

والله عندك حق كل حاجة اتلخبطت

في ايه وليه ؟

بقينا في دوامة

طب انا عندي بحر والاولاد بيحبوه

تصدق ان يوم نروح فيه البحر عايز اكتر من 100 جنيه

الواحد هايقول ايه ولا ايه

حسبنا الله ونعم الوكيل

سلام يا استاذي

micheal يقول...

للأسف عندنا حاجات كتير حلوة بنضيعها وبننسفها بسوء التخطيط والفساد...بالنسبة للضرائب فزي ما قلت من جيوبنا والمحصلة صفر
للأسف ده بقي العادي..المهم مين في مصر بيدفع ضرائب بجد..ده حدوتة تانية لوحدها
:)
تحياتي

zainab يقول...

أستاذى العزيز فشكول

بجد مش عارفه أقول لك ايه و أشكرك ازاى على مساعدتك ليا

و بما ان حضرتك أبديت استعدادك فى المساعده

ممكن تقوللى أيهما أفضل البوتاجاز يونيفرسال و لا كريازى ؟؟؟؟؟؟؟؟

و بالنسبه للغساله أيهما أفضل ايديال أكواتك فل أوتوماتيك المصريه ولا العبد المستورده الإيطالى ؟؟؟؟؟؟؟

وجزاك الله خيرا يا أحسن أستاذ فشكول

تحياتى

zainab يقول...

معلش بأه هتعبك معايا يا أستاذى بس غصب عنى و الله

فارس عبدالفتاح يقول...

حمدلله على السلامة يا سعادة البيه

امال بتشتمو في الاشتراكية وبتشتمو في حق القوى العاملة وحق الشعب وحق الفلاحين وحق الناس الغلابة

هو مش حضرتك ليبرالي وحضرتك يا بيه مش ملكي اكثر من الملك طيب ده لو الملك بلاش الملك اصله واسعه اوي اوي اوي

واحد بيه من باهوات الملك مش باشا .. بيه بس شافك وانت ماشي على الكرنيش كان اطلق عليك النار وقال فلاح خرسيس وهو تدلوقتي برضوا لم سعادتك تحاول تدخل شاطئ المنتزة او تدخل شاطئ المعمورة او اي شاطئ خاص هيكون حسابك عسير لانك تعديت على حرية الاخر بما ان الاخر يملك فلوس وحضرتك لا تملك .. وهذه هي الليبرالية التحررية يعني تقلع عرينان ولمؤخذة تجيب نسوان وتدخن حشيش وتقعد على الشواطئ الخاصة دي هه حقه الليبرالي التحرري واللى زيي وزي حضرتك لا حضرت بيه انا مواطن عادي يجلس يبص بس من فوق الكرنيش وهو جالس تحت على الشط

طبعا اكيد رحت في الصيف وشفت المهازل الاخلافية والحضارية والاجتماعية ..

الحشيش بيتباع على البلاج ببلاش والبيرة والوسكي والنسوان وانا اسف على هذا الكلام بس ده حقيقة وانا عارف .. عاااارف

يعني مبتكلمش في الهواء بل عن واقع وتجربة ومعايشة يومية لهذا الامر في الصيف وفي الشتاء انا صعيدي وعارف ايه في المحافظة دي عشان انا اتربيت فيها واقصد اتربيت عرفت الدنيا ماشي ازاي في البلد دي واخدت دورس لن انساها ما حيي المهم

اللبيرالية والراسمالية لا تسمح لمثل حضرتك ان يجلس او ينظر الى هذه الامكان الا وحضرتك تملك من المال ما يغطي جلوس فيها

سواء كازينوها دي جي ها مفتوحه ومغلقة شقق مفروشة مفروشه ..أه

مخدرات كيمياوية حشيش بانجوا خمور بجميع انواعها بلطجة صيع نصابين حرمية

مدينة اهلها في منتهى القذارة بس العقارات والموقع الجغرافي منتهي الروعة

على فكرة بخصوص ملكي اكثر من الملك عفواً اسمحلي بعد اذن حضرتك ولا تسيء الظن بي والله العظيم ما سوف اقوله يشهد عليه التاريخ وتشهد عليه السينما

انت سمعت الافلام القديم اللى كانت قبل الثورة بلاش احسن تقوم مكنت ثورة وكانت انقلاب .. اللى قبل الانقلاب

شفت العالم اللي كان بيعملو حفالات وهما في سرايات وشرب خمرة ونسوان وقمار وبيسمعوا مزيكا اوروبية وكانهم عيشين في اوروبا والمصيبة انهم عيشين في مصر اللى كان الفلاح ماشي ياعني حافي مش لاقي شبشب بصابع يلبه

ودلوه في كوكب اخر السيارات الكدلك والاوتومبيل والفورد والمش عارف ايه يعني حاجة في منتها البجاحة شعب جعان عريان بينام في الطل وناس عايش كانها في اوروبا

ولا .. حضرتك سمعت فيلم انور وجدي وليلي مراد انا قلبي دليل


اههههههههاا

كانوا عملين حفلة خيرية .. خلي باك .. بالك .. عملين حفله خيرية عشان يجمع تبرعات للايتام والمحتاجين

وهم بيسكرو ويرقصو ويغنوا وكل واحد واخد مره او وحده ست على جنب وشغال

وفي الاخر يقلك الفيلم من ضمن الحوار التصرفات النبيلة

طبعاً مكنش يقصدو بالاخلاق النبيلة اللى احنا نعرفة دلوقت كانت مصطلحاتهم ناتج عن ثقافتهم وليست عن مصدر الكلمة اللغوي وهي الثقافة الغربية الليبرالية الانجليزية

يعني تتصرف كجنتل مان في اوروبا وكد تكون تصرفاتك نبيله يعني تنام معها وتعاملها بلطف وبحنية كده انت جنتل مان وتصرفاتك نبيلة

وده لازم يكون ابن باشا او ابن بينه ومينفعش افندي طبع لا ولا يصح ولا يجوز


طبعاً انا طلبت معاي لكلك على الاخر وبقيت رغاي

بس حضرتك نكأت جروح كثيرة

اقصوصه يقول...

تدفعونها عشان تغطون المصاريف الشخصيه

وتكون كمصدر دخل للجهات العليا :)

مجداوية يقول...

السلام عليكم

استاذنا فشكول

مع بعض التحفظ على بعض المفردات ,ولكن نورت وشرفت الاسكندرية
وضحكت على دخولك السايبر ,أضحك الله سنك


الضرائب بتدفع عشان ناكل أومال الحكومة حتأكلنا من جيبها يعني ولا ايه !!!

وبعدين الناس لبعضيها يعني مفيهاش حاجة لما نصرف احنا ونعمل جمعية والحكومة تقبضها على طول

هو ده التكافل

:)
:)

zainab يقول...

أستاذى العزيز فشكول

ربنا يخليك يارب و ما نتحرم منك

وربنا يخلى الدكتورة الهام ليك و بعدين أنا بنتك هنا برده أحل محلها و و لا ايه ؟؟؟؟؟؟؟؟؟؟؟؟؟

مانتحرمش منك يارب

فوبيا - سايكولاند يقول...

معلش يا استاذ فشكول انا معترض هو حضرتك مش عارف بندفع ضرايب ليه وبتروح فين
اسمحلى بقه وادينى فرصتى
بندفع ضرايب عشان ما نتسجنش زى ما بيقول الاعلان يعنى بندفع اتاوه زى الاتاوه بتاعه سليمان الناجى فى فيلم الفتوات واحنا الحرافيش لازم ندفع
عشان الفتوة يشرب بوظه بالليل اقصد يقعد يشرب بوظه فى شرم الشيخ
بتروح فين الضرايب
بتروح لنار
اقولك عادل امام قال لو حرام ادينا بنحرقوه لو حلال ادينا بنشربوه ده على الحشيش
بالنسبه للضريبه لو هى جاى من فلوس حلال هتدخل جيب ناس ولاد حلال ولو هى جاى من فلوس حرام اديها بتتصرف فى شرم الشيخ
ويجعله عامر

محمد الجرايحى يقول...

عما الجميل وأستاذنا الكريم
السلام عليكم ورحمة الله وبركاته
على مايبدو إن هواء الاسكندرية الشتوى عمل معك العمايل......
ميزانية عامة إيه اللى بتسأل عليها؟؟؟
الميزانية العامة لم تعد عامة أصبحت خاصة
توزع على السادة الكبار والمحاسيب....
أماالصيانة للمرفقات العامة وماشابه ذلك المواطن الغلبان ملزم بدفع الجزية أقصد التكلفة...مش هو اللى بيستخدمها هو فيه واحد من الكبار الأسياد بيمشى فى الشوارع أو بيدخل هذه المستشفيات أو بيتعلم فى هذه المدارس ..طبعاً لآلآلآلآ
يبقى احنا اللى ندفع
صح ...............

حنان الشافعي يقول...

استاااااااااذي العزيز في اسكندريه
يااااااا مرحبا يا مرحبا
صحيح شفت البحر استخبي ازاي
بس في حتت حلوه جدا
عندنا في العصافره وناحية المنتزه وبحري
ايووووه
بس تيجي اسكندريه ومش نشوفوك
طب حتي نعملو الواجب معاك ولا ايه
ملحوقه المره الجايه ان شااااء الله
لن اسمح بان يتكرر مثل هذا الموقف ابدا ابدا ابدا
والمرسي ابو العباس ما هتحصل
استغر الله العظيم
ما علينا
نورتنا واسكندريه نورت
واكيد اسكندريه احلي في الشت واحلي اكتر لانك كنت فيها :)
تحياتي

مصعب صلاح يقول...

ممتاز كعادتك يا عم فشكوول
وياريت تقبل تاج عاشقة الاحزان
وخد التاج وجاوب ع الاسئلة دي

اعشق فى الليل ضوء القمر يقول...

يا خساره
شوفت إللى جرى اليوم فى كرموس
مشكله حقيقيه
حسبنا الله ونعم الوكيل

انا قعدت فى الأسكندريه شهر ونصف أجمل فتره فى حياتى عشتها فى الوقت ده مع العلم بأنى كنت فى مهمه عمل أكثر من 12 ساعه بس الوقفه على كبرى ستانلى و المشى فى ميامى بعد صلاه الفجر وتشرب شاى فى المغربيه عند بير مسعود بالدنيا

تامر علي يقول...

مش البحر بس اللي اتباع يا استاذنا ... البلد كلها اتباعت بالبني آدمين ...بالحيوانات .... بالبيوت ...بالمصانع .... خلاص بعد شوية هانبقى أغراب في قلب الوطن .... حاول تستمتع بما تبقى من حطام جمال الوطن قبل ان يباع في سوق النخاسة

قلبت عليا المواجع يا عمي :)

هــو..مش ..نـو يقول...

مالي انا والضرايب و الميزانيه
الكلام دا كبير عليا
عليا النعمه انت جدع
اضربها صرمه ان شالله تولع
يالا يا جدع ...

الازهرى يقول...

لالالالا
تصدق بالله انى كنت فى اسكندرية برضه لحد يوم الخميس
وكمان كنت قاعد فى المنشية بعنى خطوتين من عندك
لا دا نحس لازمنى بقى كل ما تيجى فرصة انى اشوفك تضيع منى

الحمد لله فى الاول وفى الاخر
حلو فعلا موضوعك عن عاصمة الجمال فى مصر ومعشوقتى القديمة اسكندرية

د.توكل مسعود يقول...

والله أكلنا جمبرى وسبيط.... ورومى وحمام... خلى العيش والحلاوة... لأى حد يكون مفششششششششششكل..... هههههههههههههههههههههههههههههه

فارس عبدالفتاح يقول...

الاستاذ الفاضل المحترم / فشكول الموقر

تحية فائقة ،

اشكرك على سعة صدرك وعلى اهتمام الخاص بي وهذا اعتبره امر يستحق العناية والتقدير .

واريد ان اعلمك شيء ولكن قبل ان اقوله فانا لا اتهرب من العزومة بل انشاء الله ستكون في الواقع وانه من الضروري والحيوي ان نتقابل ،، ولكن للاسف انا خارج البلاد اكثر من اربع سنوات ونصف .

اعمل خارج الوطن الحبيب ولكن احمد الله اني في وطن اخر عربي مسلم ،، هناك صعاب وهناك مشاق وهناك ارهاق عقلي وجسدي لكن هذا هو الامر الواقع ولا مفر من المرور فيه .

وكل الصعاب والمشاق والارهاق بسبب اهمال الوطن لنا في الخارج او بمعنى ادقع اهمال النظام والخارجية وهي احدى ادارات النظام في الخارج ،، وهي في منتهى القذارة والدونية في تعاملها مع رعاياها في الخارج فهي تسلمهم كعبيد او خدم او سلعة لاي واحد في صورة بني ادم يريد ان يدفع فلوس فنحن نباع في الداخل وفي الخارج

استاذي الفاضل .

ما اعاني من تجاهل وطني لي ما اعانيه ان تبذل كل ما في وجدانك وكل ما في كلامك وكل ما في ذهنك وتجعله درعاً يحمي سمعت الوطن وسيفاً ورمحاً لمن تسول له نفسه ان يتطاول على الوطن وعلى رموز الوطن وتدافع بالحق والحقيقة وليس عاطفة عمياء .

انشاء الله تعالي جلة قدرته وتقدست اسماءه سوف اكون في مصر اخر شهر 8 باذن الله سبحانه وسوف ارجع الى ارض الوطن لكي ابحث عن زوجة بنت ناس طيبين .

وان شاء الله سوف يكون اللقاء ان شاء الله وسوف اوفي بوعدي باذن الله

ومن الان يا استاذي الفاضل اذا كان عندك عروسة بنت ناس طيبين من عائلة محافظة شكلاً وموضوعاً ،، فانا على استعداد ان اتعرف وان اتقدم بطلب الزواج وانا لا امزح او اهرج في هذا الامر .

انا شاب صعيدي من محافظة اسيوط اقيم منذ 1994م، بمحافظة الاسكندرية اقامة كاملة ولكن لدي بيتي وارضي في اسيوط فاذا ارادت ان تعيش في الاسكندرية مع اهلي فليس لدي ادني مانع واذا كانت تريد ان تعيش في اسيوط مع العائلة فاهلاً ومرحباً .

انا انسان عادي ولكن حاد الطباع تربيت على العادات الصارمة والكلام الفاصل والمواقف الحاسمة فانا نبت في عائلة في صعيد مصر وقعت في الدم ( في الطار ) ولكن الحمد لله انتهى هذا الامر منذ اكثر من 8 سنين ،، فكانت نشأتي تحتم علي هذه الامور فانا وغيري من ابناء العائلة معرضين للقتل في اي وقت وايضا معرضين ان نقتل في اي وقت دفعاً عن الحياة وعن سمعة العائلة القتالية وجاهها وستطوتها .

هذا امر لم نخترعه انما امر جبلنا عليه ووجدنا انفسنا نعيش في هذا الامر ولكن لست انسان همجي

تعليمي متوسط الحالة المادية مستورة بفضل الله ومنته لدي اخين وفتاة وهي الصغيرة وانا الاكبر وعلى فكره انا اكبر اخوتي وانا اخر واحد سوف يتزوج فلدي اخ اصغر تزوج واخي الثاني سوف يكون زفافه في هذا الصيف انشاء الله .

العائلة محافظة شكلاً وموضوعاً لا احد من السيدات لدينا يعمل ولا اريد الارتباط بامراة تعمل او امها تعمل او كانت تعمل تلتزم باللبس المحترم الفضفاض ولا تخالط الرجال في اي مكان تكون على قسط معقول من التعليم اهلها اناس طيبين ومحترمين وسمعتهم طيبة الفقر والغنا بيد الله سبحانه فهو القابض الباسط وهو الخافض الرافع .

اذا وجدت هذه المواصفات فارجو اخباري ولكم مني خالص التقدير والاحترام .

اخيك الاصغر

فارس عبدالفتاح ... قومي عربي

فركشاوي ..ناوي يقول...

بسم الله الرحمن الرحيم
عمي العزيز ...
انت زعلان مني ولا حاجه؟
اوعي تقول مشغول...
وحشتني والله العظيم..

صفـــــاء يقول...

الأسكندريه

يااااة يا عمنا جيت على الوجع
دى متعه
معنديش أى شئ أقوله يوصف محبتى للمدينه دى لكن شتاءً اكثر منها صيفاً

بعدها على طول
الأسماعيليه
مين جاب سيرة الاسماعيليه ؟
يالا مش مهم

تعليقك الأخير عندى كان اكتر من رائع وبديع يا عمنا وقدرت تقرب أوى منه وتتفهمه بمنتهى العمق
شكرا عليه
تحياتى لك ومودتى
.

عصفور مهاجر يقول...

انا كنت في اسكندريه ...
شفتك هناك
جيت جري علي هنا اشوف بتقول ايه..
سمعت هناك شقشقه عصفور...

جنّي يقول...

السلام عليكم

كيف حالك استاذنا الكريم لعلك بخير ..

جزاكم الله خيرا على زيارتك ودعواتك لي بالشفاء ..

عندك حق واحنا في موسم جباية الضرايب علشان يبشبشوا المسؤلين مش علشان تطوير ولا تنمية ولا تعليم ..

وربنا يكون في عون الفقير ..

تحيتي

صبرني يارب يقول...

بقى كده يا استاذنا

تبيعنا عشان اسكندريه

يلا انا برضه لو منك ابيع يعنى
ههههههههههههههه

سؤال بقى

هو فين الاصلاح الى من جيوبنا ؟؟؟

الاعتراض هنامش على كلمة جيوبنا

لا على كلمة الاصلاح

هو فين الاصلاح اصلا

احنا جيوبنا بتتقلب من غير ما يكون فى اصلاح

عندنا المحافظ بيرمي جتته على اي واحد من التجار الكبار ولا رجال الاعمال ويقوله صلحلي المكان الفلاني ده

وضبلي الميدان ده وطبعا ده قصاد حاجتين
ان رجل الاعمال ده المحافظ يمضيله امضتين تلاته يمشولوا المواضيع العطلانه

او على الاقل رتجل الاعمال ده يترسم كده فى كل اجتماع يروحه ويقول ازااااااااااي ده يحصل انا هاكلم المحافظ حااااااااااالا
الو يا باشا ...............

ولله الحمد الشوارع عندنا تبقى ماشي فى العربيه كأنك راكب مراجيح العيد شيل وحط

فيييييييييين الاصلاح ؟؟؟

فيييييييييين رسوم النضافه الى قلبوها مننا السنه الى فاتت ؟؟؟ وخدوا من كل شقه خمسين جنيه ومن كل محل 120 جنيه

بس احنا لا ما اتقلبناش احنا اعلنا العصيان وقولنالهم اعلى ما فى خيلكم اركبوه القانون ده مش دستوري وانا هارفع قضيه عليكم يا ولاد اللالي


فيييييييين فييييييييييييين فييييييييييين

فييييين فلوسنا

سيما اوانطه هاتووووواااا فلوسنا

والله حتى ما محصله الاوانطه

ده الاوانطه حتى طعمها حلو مش مرررررر


والكورنيش عندنا فى المنصوره كورنيش النيل حاله نفس الحال
مباني وكتل كتل كتل
ونوادي ونقابات

وضاع قانون مافيش ابراج على الكورنيش ومساحة كذا من الحدئق قبل ما تبني

كلته القطه امال البهوات يبنوا ابراج ويقلبوا رزقهم ازاااااااااااي


تحياتي لحضرتك واستحمل رغيي ماهو انت قلبت علينا

م/ الحسيني لزومي يقول...

شوف يا عمي صلاح
انت بتقول بالراحه علي الشعب ...طيب شوف عندنا في الصعيد الواحد ممكن يقتل جاره في الزراعه لان حماره مد بوزه اخد شوية برسيم من زرعته وهو عارف انه هايروح السجن وهايترك تار لاهله وممكن يتقتل اغلي ولده غير الخسائر الماديه وبرضه لما يطلع من السجن ممكن يتقتل هو وحياة ليس بها أمن....طيب لما يروح القسم ويفضل ياخد علي قفاه ويتبهدل من امين شرطه ولا ضابط وتتبعزق كرامته...ولا كأن اي حاجه حصلت ويمكن يحكي وهو بيحاول يثبت قد أيه كان صامد...وراح نبعد ليه الخالق قال ايه " استخف قومه فأطاعوه" صدق الله العظيم

doctor mohamad يقول...

"نبيع لكم عيونكم لترى البحر" .. كلمة بليغة و وجيزة وضحت بيها نفس احساسى لما نزلت اسكندرية .. بل و فسرت سياسة الدولة عامة تجاهنا .. "نبيع لكم أرواحكم كى تاكلو عيش" .

MEDUS يقول...

اول زيارة
اسجل اعجابي بمدونتك ووالله اسكندرية وحشاني قوى قوى لاني اعيش خارج مصر ونفسي ارجع لو لحظات لساحرتي اسكندرية اجمل بلاد الدنيا مهما كان حالها
تحياتي لك وستتجدد الزيارة انشاء الله
والى الامام

life يقول...

السلام عليكم
معوداً أحمد ياعم فشكول البلوجر نور
بصراحة فى أول كلامك فرحت قلت هييه حد هياخدنا فسحة بكلامه لأسكندرية
بس رحت أقلب شوية رز للغدا رحعت لقية فى تقليب جيوب
وأن الاسطورة اللى بيحكولى عنها واللى هموت ازورها
مبقتش للعالم اللى ماشية فى الحياة بالزق وبالعافية ومعدومى الدخل
انا مش فاهمة هى الحكومة بتعمل كده ليه معانا وبتقلب عيشها على قفانا
هى البلد دى مش احنا شعبها
ليه بس غيرنا اللى يستمتع بيها ده العالم كله بيستمتع وبييجى من اخر الدنيا عشان يزورها
واحنا اللى قاعدين فيها مش عارفين حتى نتنفس من غير ما جيوبنا تتغسل
ويظهر ان الحكومة بقت غسالة
الله يرحمنا بقى من اعلانات الضرايب وادفع بالتى هى احسن
هو ايه النظام هنا فى اجهزة تنصت ولا نتكلم براحتنا
حكم احنا مش قد البهدلة ياعم فشكول بيقولو انهم بيمسكو المدونين
والحكاية بقت خطيرة
الواحد يكون قاعد فى بيتهم وعشان بس فضفض بكلمتين
يسحبوه من قفاه أصل احنا فى بلد ديموقراطى
ربنا يحرس الحكومة ويجحم الشعب اللى بيتبتر على النعمة وكمان
فاكر نفسه ليه حق يشكى

لك تحياتى ياعمو فشكول ومودتى
صحيح شكرا على مقلب البوست هههههههههه

Beram ElMasry يقول...

الاخ العزيز . fashkool
السلام عليكم ورحمة الله وبركاته
اهلا بالاستاذ والاخ الكريم
كلنا عارفين وهو الوحيد اللى عارف انحنا مش عارفين
خد بالك اسكندرية فيها دكتور توكل وصديقى ماكس بتاع زمان والناقد القلم السكنرى والفنانة مجداوية وارجومن الله ان لاتصير مساجدنا مجرد رمز لعبادة ممنوعة
لك تحياتىوالسلام ، ولا سلام مع اليهود

رئيس التحرير يقول...

من زمان لم اراك ...
أتاريك في اسكندريه ...
اوعي يكون البحر جعلك في حاله استرخاء.
مستنيك...
وهاتيجي ....
وما تلاقيش حد!!!

masry يقول...

يا مراحب بالاستاذ فشكول
ابقى سيب اى خبر تعرف انى تانى مره ادون عند حضرتك بس انا كنت بادخل على طول و فى الاخر فقدت الامل قلت ده اكيد اتاخد علشان هو مش بيقعد ساكت خالص
و بعدين انا مرحتش اسكندريه انا بحب اصيف و اشتى هنا فى بلدى الحبيب اسوان اتمنى انك تيجى تشتى عندنا و انت هاتغير رايك خااااااااااااااالص

الحمد لله على سلامتك

قيس بن الملووووح يقول...

لماذا الهجر واحنا ناس عواجيز ملناش اللا بعض

نهــــــــــار يقول...

السلام عليكم يا عمي ..
رجعتني لأيام جمييييله وذكريات أجمل ...
أنا ما زرتش إسكندريه إلا بالشتا ...
فعلا رائعه ساحره بس بررررررررد...
....
طبعا موضوعك اليوم لا يعبر بس عن الإسكندريه ..
ونحن كذلك الواجهات البحريه لدينا ..
تماما كما ذكرت ..
...
دمت بخير

نهــــــــــار يقول...

السلام عليكم ..
سبحان الله يا عمي ..
بس الحمدلله أن تواصلنا على خير ..
...
والآن تصبح على خير ..

رئيس التحرير يقول...

نفسي اكلمك..
yahya_sabak@yahoo.com
دا ايميلي علي الياهو ...لو ممكن انا معاك..حتي الساعه .....
زي ما انت عايز...

قيس بن الملووووح يقول...

شوف ياخ فشكول
احنا شربنا المقلب وراحت علينا سواء كانوا رحمه او زحمه لكننا نحاول ان نضع علامات علي الطريق لمن يريد ان يعبد طريقه
مع خالص تحياتي

aidy يقول...

جميل الموضوع ده بجد

اسلوب حضرتك في السرد اكتر من رائع

بس للأسف جيوبنا ليست فارغة دى مش موجودة أصلا

تحياتى لحضرتك

Mohamed Nagah يقول...

مدونه رائعه

بالتوفيق دائما

_ دعوه خاصه الى زيارة منتدى البيت العربى للتصميم

منتدى اكثر من رائع
http://mohamed-nagah.com/vb/

Mohamed Nagah يقول...

مدونه رائعه

بالتوفيق دائما

_ دعوه خاصه الى زيارة منتدى البيت العربى للتصميم

منتدى اكثر من رائع
http://mohamed-nagah.com/vb/

سومه...مجنونه فى بلد عاقل يقول...

انت بتصيف من ورايا يا خال خنت ميثاق الصداقه اللى بينا ماشى ماشى

عـــفـــراء يقول...

السلام عليكم استاذنا الجميل
كل العذر والاسف والعفو منك لتاخرى عنك
بس الظروف بقى واحوال النت الجميلة اللى عندنا
سعيدة جدا ان حضرتك تكون فاكرنا دايما كدة ويارب على طول
اممممممم اليكس
وفى الوقت دة بتكون تحفة طبيعى تنسى الدنيا وانت هناك يابختك ياعمنا
ويارب كانت فسحة سعيدة وموفقة ودايما مبتهج على طول كدة
خالص تقديرى.......

مذكرات مشاغب يقول...

ياااااااااااااااااااااااااااااه
وحشتني جدا جدا
اكيد هزورها قريب جدا
لسه برده قاري موضوع عنها من شويه
شكلي هقوم البس واروحلها دلوقتي

تحياتي

مواطن مصرى نايم يقول...

يا عم فشكول ناقل انت من بوست قديم ليك عن اسكندرية
بس بما ان الكلام عن اسكندرية عشفى و حياتى كلها
يبقى مهما كتبنا عنها مش حنديها حقها
(اسكندرانى متعصب)

عجبتنى اوى الحته دى و عندك حق فيها فعلا

وشارع صفيه زغلول وسعد زغلول وربنا ما يوريكم الشارعين دول خصوصا لو فيه اولاد معاكم .. نصيحه اوعى حد يبص لبتارينه او يعرف عياله ان معاه فلوس والا حتروح البيت مفلس وما معاكش ولا مليم

لا بجد رهيب وصفك
و فعلا البحر بقى كله نوادى
بس مش من اول خالد ابن الوليد
لأن بعد خالد ابن الوليد فى شواطئ كتير
زى شاطئ سيدى بشر بعد نادى السيارات و بتاع استخراج الرخص الدولية

حسن ارابيسك يقول...

سيدي الفاضل
فشكوووول
حمدالله على سلامتك
الحقيقة انت تشاركني حبي للاسكندرية في الشتاء عن الصيف وذلك يسعدني
كما أنني ايضا من عشاق مطروح في الشتاء وخصوصاُ أواخر الشتاء وأيضا اسوان في الشتاء تلك المدن الثلاث لابد لي كل شتاء من زيارتهم والاستجمام بهم
أما بخصوص قضيتك التي تطرحها أليس هذا أيضا حال النيل اللي خنقوه بايديهم وحرموه على الغلابة
بخصو النيل او بحر اسكندرية وما جرى لهما
أتذكر استاذي العزيز رحمه الله شيخ المعماريين المهندس العظيم حسن شحاته حينما كان له تصور جميل جداً للبحر مثر وترك مسافة شاسعه بينه وبين طريق السيارات كذلك البنايات المعمارية تكون بالتدرج اي تبتدي بالبنايات القصيرة ثم الأعلى يعني ده بايجاز عن التصور العلمي والانساني في آن واحد
ولكن حال بلادنا دائماً لاتستمع لعلمائها بل تستمع دائماً لصوت المادة
تحياتي
شيشت على مقاهي اسكندرية التي على البحر ولا لا
تحياتي
حسن أارابيسك

الشاعر محمد عبدالرحمن يقول...

الأسكندريه
أجمل مصيف في مصر بحبها جداً يا فشكول
رغم اني ما رحتش هناك الا قليل جداً
وموضوعك أثار عندي شوق لرؤيتها

قلم رصاص يقول...

السلام عليكم

ازيك عمي العزيز صلاح فشكووووور بيه

واحشني جدا والله

انا من زمان مدخلتش نت ومفتقد مدونة حضرتك جدا

ادعيلي ياعمو فشكول
فأنت في مقام الأب بالنسبة لنا

تقبل مروري

الازهرى يقول...

صباح الفل
يا عم الكل

خالتى ايه بس
ما هو لو بتسأل ؟
الحالة بقت صعبة جدا والدليل فى ذكريات

Soul.o0o.Whisper يقول...

يا عمو فشكول

اللون الاصفر صعب اوى
هديه شوية

عاشقه الرومانسيه يقول...

عمو فشكول
او زى ما بقولك دايما
فشكولى العزيز
انا جيت دلوقتى هنا علشان اعترف لك بشئ مهم وهو ان
محدش فهمنى غيرك فى بوست انا اللى كنت

تحياتى يا عبقرى

من غير عنـــوان يقول...

إيه يا عم
وبعدين كمان تيجي بلدنا وحتى مافيش تليفون ( قال يعني بعد الموبيل بتفرق.. الكلام ده زمان)
المهم المره الجايه تديني خبر
وإلا مش حتدخل
(:

كلامك صح عن إسكندرية

تلك الحبيبه التي أصبحت مشاعا لكل من ..... ولا بلاش


مفهوم طبعا

أمنياتي

غير معرف يقول...

Wow! In the end I got a web site from where I
be able to in fact obtain helpful data concerning my study and knowledge.


Here is my web page fighting - -

غير معرف يقول...

I read this article fully concerning the resemblance of
latest and earlier technologies, it's awesome article.

Feel free to visit my web blog ... systems

غير معرف يقول...

Write more, thats all I have to say. Literally, it seems as though you relied
on the video to make your point. You clearly know what youre talking about, why throw away your
intelligence on just posting videos to your site when you could be
giving us something enlightening to read?

My webpage ... get targeted twitter followers

غير معرف يقول...

Hi there are using Wordpress for your blog platform?

I'm new to the blog world but I'm trying to get started and create my own.
Do you require any coding expertise to make your own blog? Any help would be greatly appreciated!



Feel free to surf to my webpage - pay for twitter followers