الخميس، ١٤ مايو ٢٠٠٩

فشكول بيهبل .... هبل فى الجبل

تحديث
عملت التحديث ده بالعافيه
اعتذر لكل المدونين اللى زارونى ولم ارد لهم تعليقاتهم حتى الان
النت عندى زفت خالص ومش بيفتح عند اى حد ولو فتح مش بيفتح التعليقات وانا عارف ان ده عيب فى النت عندى ويمكن فى الكمبيوتر وانا علقت لحد الحاجه شمس النهار وكل ما اروح عندها ما تفتحش التعليقات لكن انا حاحاول اصلح النت او الكمبيوتر وما تقلقوش حاروح عندكم واحد واحد وارد الزياره بس ما علهش لو اتأخرت عليكم شويه لحد ما اصلح يا اما النت يا اما الكمبيوتر
====================================
احبائى اعزائى اخوانى اخواتى فلذات اكبادى .... ونيس ومايسه
رجعت .... بقى لى 8 ايام وانا بعيد عن البيت فى جولة عمل من جولات عملى المكوكيه وكنت ساعات اروح لجهاز الكمبيوتر فى الشغل واعمل زيارات خاطفه من هناك لكن من يوم السبت ما كانش عندى وقت خالص وانقطعت تماما عن النت . كمان ولا كنت عارف الدنيا فيها ايه ولا اى اخبار خالص. وطبعا باعتذر لكل الناس اللى اتاخرت عليهم فى التعليق ومش انساهم لازم اروح لهم واعلق عندهم

بعد ما رجعت البيت يوم الخميس اخر النهار من حوالى ساعتين تلاته لقيت انفلونزا الخنازير وصلت للمستوى الخامس ... يعنى فاضل زلطه ونطلع بره لان اخر مستوى هو المستوى السادس وبعدين كل بلد تقفل المداخل والمخارج ولا حد يطلع ولا حد يخش ... وكل واحد ياخد باله من نفسه وخصوصا اللى عاملين عملية اللوز يزودوا بالهم شويه عشان لو واحد بس فلت من المطار انتم عارفين ان احنا مضيافين وبنحب نكرم الضيف قوى ولو الضيف اللى هى جرثومة الخنازير جت عندنا ح نسوى لها الهوايل وح نكرمها قوى.

اقول لكم موضوع صغير برضه عشان الامتحانات

عمكم النائب مصطفى بكرى عمل بلاغ للنائب العام ان فيه 65000 طن قمح روسى دخلوا مصر وان القمح دا غير مطابق للمواصفات... دا طبعا غير القمح الاوكرانى اللى اكلناه بالسم الهارى فى معدتنا
المهم القمح الروسى ده طلغ غير مطابق للمواصفات عشان كل كيلو فيه 56 بذره غريبه غير الحشرات والصراصير والذى منه.... قوم ايه ؟؟ ميناء بور سعيد رفض دخول الصفقه الا بعد التحاليل والذى منه عشان القمح شكله بنى واغبر ومنيل بنيله

المستوردين الكبار اللى انتم عارفينهم بقى وقوتهم وبطشهم عملوا اييييييه؟؟؟؟؟
سابوا بور سعيد وخدوا المراكب وودوها ميناء سفاجه وطلعت الغلال من الميناء طبعا بحجج مختلفه وقوانين برضه مختلفه ودخلت الغلال البلد عشان ناكلها بالسم وطرش الدم وخزنوها فى صوامع فى اسيوط وقنا وقوص وقال ايه ممكن تدخل الغربله والغسيل ومش يبقى فيه مشكله وميت فل و14 ... طب ليه نغسل وننضف ونغربل .. طب من الاول نجيب الحاجه حلوه ..

خدوا بالكم الغلال المصريه متلقحه ومرميه فى الغيطان ومش لاقيه اللى ياخدها من الفلاحين والفلاحين عمالين يصرخوا ويصوتوا ويقولوا يا خلق هووووى عندنا قمح حلو وجميل حد ييجى يشتريه بنص ولا بربع تمن المستورد ويا عينى حيتخرب بيتهم (اصل انا عندى 30 اردب ومش لاقى حد يشتريهم) حد عرف حاجه اعملوا مش واخدين بالكم ... والفلاحين ولاد ستين فى سبعين دول يروحوا فى ستين داهيه ... المهم المستوردين الغلابه دول لازم نعطف عليهم برضه نشوف السبوبه بتاعتهم.

عارفين يا عيال يا حلوين يا ولاد ستين فى سبعين ايه الموضووووع

الموضوع ان استيراد القمح والغلال من اختصاص هيئة السلع التموينيه .... يقوموا يعملوا ايه ؟؟؟؟ يشوفوا حد كدا حبيبهم وقريبهم ولا نسيبهم ولا صاحبهم ويدوه حق الاستيراد ... وأهى برضه السبوبه كبيره والخير كتير ويعم على الكل

والسؤااااااااااااااال :

هل عجزت الدوله المصريه بشنتها ورنتها عن استيراد قمح بجوده عاليه ؟؟؟؟؟؟؟؟؟ علامات استفهام للصبح

الاستفسارات كتيره والاسئله كتيره وكبروا مخكم شويه ... وسلام مربع للجدعان ... ورقصنى يا جدع

من ناحيتى بقى انا ح اعمل اييييييه ؟

ح اروح جامع السيده زينب واقلع راسى زى النسوان وادعى على اللى عايزين يأكلونا سم هارى واغذيه حيوانات يا رب دعوة وليه ساعة مغربيه واقول يا رب هات لهم انفلونزا طيور وخنازير كمان وكل الانفلونزات اللى فى الدنيا كلها وكمان بالمره وانا محروق كدا ادعى لاولادنا وبناتنا اللى بيمتحنوا ان ربنا ياخد بيدهم كلهم ويخلى مخهم يشعشع ويلقط اى معلومه ومخهم يبقى مغناطيس ...... وربنا ينجحهم يا رب

هناك ١١١ تعليقًا:

اوراق قديمة يقول...

استاذى الكبير فشكول
مش مصدقة نفسى
انا اول تعليق هييييية
شفت يا استاذنا اكلنا القمح ابو حشرات وتراب وقرف
وكمان كنا بنقف علية طوابير
ولسة يا ما حانكتشف حاجات كلناها
وانا مايصعبش على حاجة قد الاطفال لما يكلو الحاجات دى
عموما ياللا ربن بيسترها مع الغلابة
ما تتاخرش علينا تانى
ام محمد

محمد الجرايحى يقول...

أخى الفاضل
السلام عليكم ورحمة الله وبركاته
أولاً حمداً لله على سلامتك وعودتك الميمونة

أخى :أعتقد إن انفلونزا الخنازير ستكون أرحم وأرأف بهذا الشعب المسكين من هؤلاء مصاصى الدماء معدومى الضمير......
وحسبنا الله ونعم الوكيل

محمد عبدالرحمن شحاته يقول...

استاذي العزيز فشكول
اولاً حمداً لله على سلامتك الاول ووصولك من رحلة العمل الجامده
لو جيت نتكلم في الموضوع بتاع انفلونزا القرود .. قصدي الخنازير
هنلاقي ان لا بد من قفل مداخل ومخارج كل بلد
يعني لا وجود للمدخلات والمخرجات ولا حتى عمليات تشغيل بينهم
وعلى رأي المثل
من خرج من داره اتقل مقداره
وبعدين انفلونزا الطيور دي كانت يعني كده فاتحة خير وبعدين التقيل جاي ورا الخنازير وبعدين انفلونزا المعيز وبلاوي
ولو جيت بقى للقمح
لا زم نسيب الناس دي تسترزق برضه يا جماعه
غلابه عندهم عيال عاوزين يربوها
ويربوا الناس معاهم
وبعدين يدخلوها من بورسعيد ولا من سفاجه
كل حاجه تحت أمرهم ان شالله يدخلوها من الشباك حتى
بس ماتنساش تدعيلي عند السيده زينب يا فشكول
بس بالحق ( رقصني يا جدع ) دي هتبقى قبل السيده زينب ولا بعدها
علشان هتفرق
ورقصني يا عويس
سلااااااااااااااااااااام

♥نبع الغرام♥♪≈ يقول...

السلام عليكم
حبيبى الغالى
وحشتنى موووووووووووت ياغالى ربنا يبارك لنا فيك
ياعموصلالالالالالالاح
حمدالله عى سلامتك نورت الدنيا كلها ياغالى
طبعآ البوست مش هقول
ربنا يسترها علينا وعلى الغلابه
وحسبى الله ونعمه الوكيل
بس انا زعلالالالالالالالالالانه منك
عشان لاذم الوقتى تعلق على البوست اللى قبل ده وحالا
مش هتنازل يا راجل يا طيب
يلا
سلالالالالالالالالالام
نوسه النوسه كونوسه

Soul.o0o.Whisper يقول...

الحق احجز اى مكاااااااااااااااان


اى حاجة طيب

وسعوا كدا يا جماعة

الله

مش اسلم على رئيس جمهوريتى يا جدعان

Soul.o0o.Whisper يقول...

ازيك يا عمو فشكووووووووووووول

حمدلله ع السلامة

والله كنت ÷انزل اعلان فى ارجاء المملكة
يوووه

قصدى الجمهورية - كنت هأروح فى مصيبة الوقتى - الحمد لله


المهم

أنا قلت اسلم و أروح أقرأ بئا و آجى



سلام مؤقت

أمل حمدي يقول...

حمد الله على السلامة يا عمنا

النت نور

فعلا كل حاجة حوالينا تجيب الهبل

حسبنا الله ونعم الوكيل

سلام يا فشكول

مجداوية يقول...

السلام عليكم

لعن الله المحلل والمحلل له

الحكومة بتستعين بالمحلل من زمان وصفقة الغاز للصهاينة مش بعيدةوكل صفقات الغذاء الفاسد واللي المفروض تكون مسئولية الحكومة مش المستورد
لكن عشان الحكومة واعية فاستعانت بالمحلل

أعانك الله أستاذنا على العمل وربنا يعوض عليك في أراديب القمح
اطحنه
أو وزعه صدقة على روح الضمير اللي مات عندهم

وعندي لك تاج أرجو أن تقبله وتجيب عليه

Soul.o0o.Whisper يقول...

والله يا عمو فشكول عمالة أفكر فى حل

مش لاقية إلا حل واحد بس..

أكيد دا كله عذاب من ربنا حل علينا
"ظهر الفساد في البر والبحر بما كسبت ايدي الناس ليذيقهم بعض الذي عملوا لعلهم يرجعون‏"

يعنى ربنا قال اهو ان كله احنا اللى جبناه لنفسنا ..

طب ليه؟؟؟

لعلهم يرجعون ...

ياترى فكرنا نرجع ؟؟

أعتقد دا الطريق الوحيد اللى محدش فكر فيه

"ما يفعل الله بعذابكم إن شكرتم و آمنتم و كان الله شاكرا عليما "

لكن للاسف مفيش لا شكر و لا ايمان

"فقلت استغفروا ربكم انه كان غفارا * يرسل السماء عليكم مدرارا "
مفيش

و لا اى وعد من ربنا نافع معانا ، لأننا اصلا مش فاهمين


ربنا يعلمنا و يفهمنا يارب

بس أنا اعتقد اننا هنفضل بردوا كدا و للأسوء
لحد ما نفوق


هنفوق امتى بئا؟؟؟

الله اعلم

اعشق فى الليل ضوء القمر يقول...

الواحد خايف موت من أنفلوانزا الخنازير فعلا لو رفع الحظر أو الحجر الطبى يبقى كده خلصنا على الأخر
أصلى المخزون من الأكل فى الطبيعى يدوب أربع شهور هنعمل إيه بقى وقتها لما يحدث الحجر
ولا حاجة داخلة و لا خارجة و الحياة هتبقى ضنك ولا حد هيحس بينا
اما عن الغلة يعنى هى جات عليها مثلها مثل السمك الفلبينى المسمم و الجنبرى المسرطن و لحم الخنازير إللى إتسرب و إتفرم و غيرة بلا هم على من لا يخاف الله فينا

بلاش فضايح يقول...

أستاذ فشكول
فاضل ايه
الفراخ عيانة
الخضار مرشوش
الفاكهة مسمومة
العيش فيه حشرات
والدقيق لا يصلح للاستهلاك الآدمى
اللحمة مضروبة على قلبها وغليت
دة غير انها ممكن تكون لحمة حمير ولا خنازير يعنى هنعرفها منين

المية ملوثة
الهوا ملوث

معدش فاضل حاجة
الحياة بقت تخنق

ادم المصرى يقول...

يارتها جت على كدا دحنا هناكل بعد كدا الزباله وهتعجبنا وبرضانا

ريمان يقول...

السلام عليكم


وانا بقوووووووول فشكولى العسل ده غايب عنى ليه

مخاصمنى ولا ايه


زعلان منى ولا ايه

اتاريه كان مشغول

......................

ازيك يا فشكولنا القمور

ياللى منك بتغير النجوم

وطيبتك بتحكى عنها الطيور

ويغنى لها العصفور


ويدعى لك بالهنا والسرور

ــــــــــــــــــــــــــــ

ايه رايك بقه فى الحته الجامده دى؟

والله والله والله اول مره اكتب فى حد كده

ههههههههههههههههه


وحشتنى والله يا قمرنا

والمهم حمد الله على سلامتك

وبجد مش عارفه هو فين دور الحكومه المصريه فى موضوع القمح ده؟

دول قالوا قال ايه صالح للاستعمال الادمى

ده على اساس اننا فيران تجارب بقه

حسبى الله ونعم الوكيل

المهم يا جميل الحمد لله انى اطمنت عليك
خلى بالك من نفسك وبعد كده اما تكون هتروح فى حته وتتاخر عننا ابقى نزل بوست تعرفنا فيه

عشان بجد احنا كلنا اهل واحد لاء ده كمان احنا كلنا اسره واحده وانا والله بحس بكده بدون مبالغه

Darsh Basha يقول...

حمد لله على سلامتك يا استاذ فشكول
يعنى البلد هتعمل للشعب اية بذمتك قمح وجابتلهم ومش من اى حتة دا من قمح روسى
بدبانة بحشراتة بكل ما فية علشان ميقولوش ضاحكين علينا ولا حاجة والقمح جاى ناقص.
بس بالنسبة للسؤال ..انا عايز اسئل سؤال ..هى مصر برمتها بالاراضى باللى فيها باى حاجة عندها مينفعش تزرع قمح ؟
هى الاستيراد دى بقت عادة عندنا خلاص ..حتى القمح اللى كنا بنصدرة قبل كدة دلوقتى بقينا نستوردة

بصراحة ربنا يستر علينا

تحياتى

mimi يقول...

عمو فشكول....

إزيك عامل إيه؟
وحشتني كتير والله كان نفسي أجيلك من زمان ... بس الظروف بقي أجي علي بوست فيه سم هاري ....

يلا معلش ...طيب مش هنعرف ناكل لحوم ولا فراخ ولا مخبوزات .. طيب نروح ناكل في بعض بقي؟
ولا ناكل زلط؟... احنا نعمل ريجيم قاسي..
عمو ... التعليقات مكتوبة بالحبر السري ... طيب رقم فك الشفرة كام؟؟؟

وفاء بركات يقول...

السلام عليكم
يعني يودو القمح الفاسد فين غير مصر
معدة المصريين المعده الوحيده اللي بتهري الزلط اعرف واحده بتربي كلبه
لولو بتجيب لها الأكل بالطياره قريبي مره أكل الكلبه بسكوت مصرى جالها نزله معويه وكانت حتموت شوف بقي الإنساننات اللي عيشين في البلاد دى تقدر تاكل القمح الفاسد هو احنا مش لازم يكون عندنا رحمه يعني نرمي القمح ده انتم عالم مفترى .وبعدين مين قال لفلاح المصرى يزرع قمح ميزرع مكرونه بالصلصه ننزل الغيط معانا أطباق ومن غير معالق ونزلط .
إسمح لي بقي حضرتك بتكبر المواضيع بدل متكبر دماغك .. وبعدين المستثمرين الغلابه
دول يعني ولادهم يموتو من الجوع توقف حالهم وتخرب بيتهم متعودين علي البتاع ده اللس اسمف سيمون فيليه ومارون ابصر ايه جلاسيه ويصيفو في الريفيرا
عايزهم بعد كده ياكلو فول وطعميه مقليه بزيت العربيه ولما يصيفو يقعدو قدام عتبة بيتهم ياقسي ياظالم خليهم يقبو علي وش الدنيا ويعدو من مليونير لمياردير دول شقيانين واحنا ننزل من مستورين لفقرانين ولازم نضحي بالعيان علشان الدكتور يعيش
هو انت لسه ملقتش حته ارض تعمل عليها الجمهوريه الفشكولانتيه ولاحتي تعمل عليها ملوخيه نهارك ابيض

مسدس صغير يقول...

موضوع مهم جدا
احييك على الطرح المفيد
وعلى رأيك الفلاحين اولاد كل حاجة فى الدنيا عندهم القمح ملقح
بالنوسبة للقمح اللى عندك اشتريه منك الاردب ب150 جنيه
ههههههههه
لو موافق اجى اشتال
هههههههه
سلام

رئيس التحرير يقول...

بسم الله الرحمن الرحيم
استاذنا العزيز...
فشكول باشا اللذيذ..
السلام عليكم ورحمه الله وبركاته .
حمداً لله علي سلامتك ...أوعي تكون رحت هناك ولا قلتليش؟
أزعل منك خالص ...
طب ما تروح بجد انت مزارع روسيا و تجيب لنا القمح ...بس أوعي تفرط في الكام اردب الي عندك ...لازميني..وحسابك علي داير مليم تاخده من جيب نظيف ما فيهوش ولا مليم .
تسلم يا باشا...

صوت من مصر يقول...

تسمحلى اقولك ان كلها ايام ومش هيبقى فى عي خالص بسبب المشكله دى

د. ياسر عمر عبد الفتاح يقول...

والله أنا قرفت من كثر الأخبار اللي تسد النفس
ومليش نفس حتي أعلق ولا أقول حاجة
الكلام مبقاش بيجيب فايدة

المهم حمدالله علي السلامة يا عمنا

yoyo يقول...

صباحك سكر يا حتة السكر

حمد لله على سلامتك يا أحلى فشكول
الحمد لله انك بالف خير
والله وحشتنى اووووووووووووووى اوووووووووووووى

والله موضوع الانفلونزا دا بقى عامل زى الوباء لو حضرتك فاكر زمان وباء الكوليرا الخوف لا الموضوع يتطور ويكون على نفس الوضع دا
ربنا يستر بقى
مش عارفة ايه دا كل حاجة بقيت ملوثة
الناس هتاكل ايه ولا هتشرب ايه
رحمتك بعبيدك يارب

اها اها قولت ليا بقى عشان كدا بتتكلم عن القمح لو كنت اعرف كنا اشترينا منك بقى لسه الجماعة هنا شارين قمح وسعره رخص جدا جدا عن السنة اللى فاتت
يعنى السنة دى قمح هيرخص واكيد الرز هيغلى عشان قرار محافظ الغربية العسل اللى منع زراعة الرز فى المحافظة
ناس ذوق ذوق الصراحة

دمت بالف خير وصحة
تحياتى
يويو

ن يقول...

السلام عليكم
أستاذى الفاضل .. فشكول
حمداً لله على سلامتك ..كنا مفتقدينك يا أستاذى .
على فكرة السائد عندنا فى القول
سموا وكلوا وماشين بالبركة .. أصل شعب مصر انت عارفه ماشى بالبركة .. بس لحد إمتى محدش عارف ؟؟؟؟
بس المعروف عندنا ان معدة المصرى بتهضم الزلط .. خلاص مفيش قدمنا أضمن من الزلط بدل الاكل المسرطن والقمح الفاسد أبو حشرات والى آخره .. ياخبر انا نسيت اننا فعلا بناكل الزلط ما العيش مليان زلط خلاص كدة اتحلت
هههههههههههه
مع خالص تحياتى

تامر علي يقول...

مش غريب ولا جديد يا أستاذنا .... الحكومات الفاسدة منتظر منها ايه ؟؟؟ تعمل لصالح الشعب أم لصالحها الشخصي ولصالح منتفعيها ..... لازلت أؤكد ان احنا السبب مش همه السكوت على الظلم ظلم أكبر منه .... يعني ادينا عرفنا انهم بيسمونا ... هنغير من سلوكنا ؟؟؟؟ هنقاطع الخبز ؟؟؟؟ هانعمل أي رد فعل ؟؟؟؟

العقاب الإلهي للسكوت هو استمرار الظلم وتحمل كل عواقبه على كواهلنا

:(

عمرو جويلى يقول...

العم فشكول
السلام عليكم
أولا حمداً لله على سلامتك ورحلة موفقة بأمر الله أما بالنسبة لإنفلونزا الخنازير فربنا يستر علينا هنلاقيها منين والا منين
خد عندك إنفلونزا الخنازير إنفلونزا الطيور والرطنات والقمح الفاسد الملىء بالبذور السامةالمصنف كعلف للحيوان والقرف الأزرق وربنا يستر وحسبنا الله ونعم الوكيل

اسماء واحلام فى وجدانى يقول...

اسماء واحلام فى وجدانى

م/ الحسيني لزومي يقول...

ولا يقيم علي ضيم يسام به
إلا الأذلان عير الحي والوتد
هذا علي الخسف مربوط برمته
وذا يشج له فلا يرثي له أحد

اقصوصه يقول...

بابا فشكول

هاي الواسطه وما تسوي !!

الله يعيننا بس ع هالزمن

انا عن نفسي امر بازمه اقتصاديه

مشروعي البسيط خلاني عالحديده

يوم تروح السيده ادعيلي معاك :)

هــو..مش ..نـو يقول...

مش فشكول بس اللي بيهبل..
كُله اتهبل ...واتخبل ..
وبدل القمح ناكل عَبل .
(عارف العبل يا عم فشكول؟)
فيه عَبل باللبن وعَبل ساده..
وعَبل قصير وعَبل طويل التيله
عبل...عبله عبلات ...
عجل ..عجله
عجلات.. عدلات
وإن كان معاك حاجه هات ..
التعلب فات فات ..
هوهوات ..
===هوهو==

رؤية يقول...

عادى فى الزبادى
كلللله تهاريج فى النرويج
واهى المصلحة ماشية الغرض تمويت اكبر عدد ممكن من الشعب
بس احنا ما بنوتش الحمد لله
^_^

ادعيلنا كتير يا عمو الامتحانات خلاااص والواحد دماغه هاتنفجر

وحمدا لله على سلامتك

تحياتى

wesoooooooooo يقول...

يأستاذ فشكوووول
حضرتك بتقول انفلونزا الخنازير
ماهى خلاص شرفت مصر 12 حاله ياناس ولسه
منهم 4 حالات عبروا بلدنا الحبيب راجعين من المكسيك
دخلو ازاى الله اعلم
وبيقولو اتعملهم كشف طبى ال كشف ال
وزعلان قوى على شوية القمح دول طيب واللى قبلهم واللى قبلهم
يأستاذنا ده بقى العادى بتاع البلد دى
بس ان شاء الله أكيد فى أمل
وربنا يستر وانفلونز الخنازير متبقاش وباء أصل التميى فلو مش للغلابه لليدفع
اااااااااااااه يابلد
حسبنا الله ونعم الوكيل
تقبل مرورى
تحياتى

هانى زينهم يقول...

زمان يا استاذنا كان الوةاحد بيسمع عن السرطان ده فى الجرنان بس وكل 10 سنين لما واحد يموت بيه وكان بيبقى خبر فى التليفزيون والصحتفة . دلوقتى انا شخصيا اعرف 6 ماتوا بيه وهم فى عز شبابهم وربنا يستر علينا فى البلد السودة دى .

حـــــ الــجــنــة ـــــور يقول...

السلام عليكم

اللهم اميييييين يارب تاخد بدعوة ابونا فشكول وتنجحنا والله يهد كل ظالم محتال

عودا احمدا وحمد لله على سلامتك يا غالي

دمت بكل خير وامل وتحياتي الخالصة ليك

رحلتنا في الحياة يقول...

الف حمدلله على السلامة يااستاذ فشكول

ومعلش لسه يااااااما هنشوف فى البلد دى من هم وغم ربنا يصلح الاحوال وان شاء الله تلاقى حل وتبيع القمح اللى عندك :)

Unknown يقول...

سلامو عليكم

عادي جدا اصل احنا مش بني ادمين ! هي يعني جت علي دول !

ما اكلنا خضار مسرطن ! و اكلنا حاجات ملوثة حتي في المطاعم الشعبية الاكل مش نضيف و بيجيب امراض !

و قبل كده الفراخ الفاسدة و الزيتون اللي بورنيش الجزم !

عادي جدا ..... لما يبقي عندنا رقابة نبقي نكلم ! و قريبا انتظر تسرب لحوم الخنازير عند الجزارين و اختلاطها باللحوم البتلو و الضاني !

ده لو متفرمتش في وسط لحمة السجق و البرجر و الذي منه

تحياتي

قلم رصاص يقول...

حمدلله على السلامة عمي فشكول

موضوع مهم جدااااااااااااااا

بس احب اطمن حضرتك الشعب اتعود على كده والله .. واحب اقولك كمان ان الشعب بتاعنا يتعب لو اكل نضيف

المصري اتعود ياكل ظلط ويشرب ميه ملوثه ويعمل أحلى دمااااااااااااغ

هههههههههههههههههه

ربنا يستر

أسألك الدعاء ياعم صلاح .. فامتحانات دبلوم الدراسات العليا اللي انا انتمي اليها هيبدأ بداية الشهر القادم .. نسألك الدعاء

في حفظ الله

شمس النهار يقول...

حمد الله عي السلامه

Unknown يقول...

زعلاااااااااااااااااااااااااااان منك

Unknown يقول...

علي فكره......................
..............................
..............................
..............................
ومخاصمك كمان و.................
..............................
..............................
..............................
هو دا اللي حصل ...............
..............................
..............................
تحياتي.

assafo anaroze يقول...

حبيبي الغالي عم صلاح
حرام عليك يا عم تغيب كده من غير حتى اشعار او اخبار
المهم انت عامل ايه كويس
**********
مسالة ان الدولة تشوف من حال الفلاحين و تراعيهم وتراعي المنتوج الوطني ده من السبع المستحيلات لانهم لا يستفيدون من العمولات و اللي بيجري تحت الطاولة
السادة المسؤولين لا يهمم تنافسية المنتوج الوطني و لا الاقتصاد القومي و لا حتى المعيش اليومي للفلاح
اللي يهمهم هو كيف يزيدوا ارصدتهم البنكية و لو على حساب الوطن و الشعب
مودتي

gogo!sf يقول...

متقلقش يا باشا احنا عندنا اقوى مجلس شعب فى الدنيا
هو مش كفايه ان لجنه السياسات تجتمع عشان تناقش المقال بتاع سعد ابراهيم اللى اتنشر فى التايمز
اظن ان مش فى اهتمام منهم اكتر من كده دول عالم واخده بالهم من شغلهم كويس جدا
اما بالنسبه للقمح مش تقلق على الخمسه وستين طن خلاص شركه المطاحن وزعت منهم اربعين طن فى قنا وسوهاج يعنى خلاص يا عم زمانهم اتاكلو
وكفايه عليهم مناقشه المقالات

ربنا معانا

وميحكمناش على الغلابه

عاشقه الاحزان
جوجو

شبه إنسانه .....( سهوره ) يقول...

طبعا

هتقول لى منوره يا سهوره كالعادة

وانا كالعادة هقولك ميرسى جدا

الاهم من ده انك بجد يا عمو فشكول وحشتنا جدا
وكنت سايب فراغ كبير والله

والف حمد على السلامة وبلاش تغيب عننا تانى قوى كده

اما بالنسبه للانفلونزا الخنازير دى
انا ما أراها سوء ابتلاء
وعلينا بصبر
وكلها أيام وبنعيشها


بس

مستنياك فى البلوج بتاعى تنوره يا راجل يا طيب

سهوره

طـائر الليــل الحـزين يقول...

عمنا الجميل فشكول
ليه دايما كده بدوس على الجرح
مش عارفة ايه فى البلد دى عدل
بجد بقت حاجة تتعب نفسيا
كل الامراض اللى حوالينا ومش بس كده
عندنا الناس اللى يارب يخدهم ويريحنا منهم
اللى كل اللى عليهم انهم يمصوا دم الغلابة اللى زينا طبعا
ويجيبوا اى حاجة
فيها نمل والا صراصير والا اى حشرات وامراض مش فارقة المهم
الكام مليون اللى هيجلهم من ورى الغلابة اللى زينا اللى للأسف ملهمشى حد يسأل عليهم
مش عارفة وبعدين ايه النهاية
ياترى ممكن فى يوم يكون فيه امل

kochia يقول...

هو الامراض اللي بقت تظهر عندنا من شوية
انعدام الضمير بقي شئ فظيع
ليه فهلا بيستوردوا وفيه قمح في البلد ؟؟
سؤال وجيه جدا والمفروض الناي بتوع القمح يعملوا ثورة وفضيحة لهم عشان الناس تعرف كدة لا المعروف ان القمح مش بيكفي اصلا عشان كدة بنستورد

المهم سيبك انت
حمد الله علي السلامة

على عبدالله يقول...

السلام عليكم

حمدا لله على السلامة يا استاذنا
انا مش مزعلنى غير ال 30 اردب بتوعك ..
انت ممكن تطحنهم وتعمل بيهم عيش بلدى طول السنةوسبيك من بتاع الحكومة "الى اظن انه انقرض " ..بس خلى بالك احسن يسوس
وبعدين يا استاذ فشكول ما احلى رغيف الخبز المحلى ببعض الصوص ..اقصد السوووووووووس

ربنا ياخذهم اخذ عزيز مقتدر ان شاء الله

rovy يقول...

السلام عليكم استاذى العزيز فشكول
مش لاقيه كلام اقوله
بجد احنا ليه راضين ؟؟
ليه ساكتين ؟؟
ليه حقوقنا بتضيع و صحتنا و صحة اولادنا برضه بتضيع و ليه بلدنا بتنباع و كل غالى عندنا بيهدوه و يخصخصوه و احنا برضه راضين و ساكتين

ليه ؟؟

الظاهر مقدمناش غير اننا ندعى عليهم و بس .. بس على فكره دعوتنا دى زى قلتها لان ربنا قال انه لا يغير ما بقوم حتى يغيروا ما بأنفسهم .. صح .

ربنا يلطف بينا و يصلح احوالنا و يخلصنا من كل فاسد يااارب


خالص تحياتى

عبد من عباد الله يقول...

بالرغم اني مش من انصار فكره اننا مظلومين و مغلوبين على امرنا و ما باليد حيله و الكلام ده ...

إلا اني بقولك و حياتك بلاش دعوه انفلونزا الخنازير دي اللي يمرضوا بيها ...... يا عم دول في مصر يعني لو جت لهم حتبقى ليلتنااحنا فله و بدل ما يبقوا سبب في القمح ( المذمع انه فاسد ) حيبقوا كمان سبب في الانفلونزا دي ......

و انت بقى لو راجل مبروك و دعوتك دي استجابت تبقى زي ما بيقولوا جيت تكحلها عمتها .

صدى الصمت - عاشقة الورد - يقول...

حقيقى فعلاً الواحد إتملى هموم ومشاكل وأوبئة وإمتحانات وكله دخل فى بعضة ودماغى أنا كمان هنجت
ربنا معاك ومعانا
تحياتى

ستيتة يقول...

عمنا فشكول
ابقى احجز لي معاك في السيدة زينب علشان ادعي وانا لابسة راسي

وبعدين احنا من زمان بناكل اكل بهايم وحشرات وصراصير بس المرة دي الفرق انه من وقت للتاني الموقف يتفضح
خلي المستوردين تعيش

فيه عشبة اسمها الأمبروزيا دخلت مصر مع القمح ولله الحمد
ودي عشبة ضارة مكنتش عندنا من فصيلة الحريق

يالا بقى على ما تطحن مع القمح وتنتشر في الغيطان خلينا نعيش حياتنا صح
كده كده محروقين

الوضع اصبح مشييييييييييييين
وسلم لي على نكد أوشين

ســـهــــر يقول...

انا اول مرة اجى عن حضرتك وصدقنى مش هتكون الاخيرة
يا أستاذى الجميل احنا مش مهم المهم الناس التانية يكش نموت ولا نتحرق المهم هما

يلا حسبى الله ونعم لاوكيل فيهم كلهم

فارس عبدالفتاح يقول...

الاخ فشكول الموقر

هناك حقيقتان في هذا الموضع وهو دفاع بعض المنتمين الى الفكر القومي العربي لحقوق الجماهير ودفاع عن امن الوطن والامة والمتمثله في مصطفى بكري وغيره من القومين العرب وخصوصاً انه صعيدي

الثانية

هي ان الصعيد مازال وسيظل ان اشاء الله الى ما شاء الله حصن أمين لكل من يريد ان يحتمي به

سواء اكان من الصالحين والانبياء مثل امنا مريم ونبي الله عيسى عليه وعلى نبينا الصلاة والسلام


وسواء كان للمقاومين الشرفاء للاحتلالات الغازية او للحرمية وقطعين الطرق والهاربين



والحقيقة الثالثة وهي متعلقة بالحقيقة الثانية


ان الصعيد اقليم له خصوصيته وله كونه وكينونته الخاصة

ولولا اني من القومين العرب ومن الموطنين لاعلنت العصيان المدني والعسكري على الدولة المركزية وطالبت باستقلال الصعيد عن مصر كما كان قبل الاف السنين عندما وحد مصر الملك الصعيدي مينا نارمر موحد القطرين

فنحن من فتحنا الشمال وضميناه الى دولتنا في الجنوب ونحن لنا الفضل في ذلك ونحن من دافعنا منذ القدم عن مصر الشمالية طوال العصور من اول الهكسوس الى الغزو الفرنسي وهزيمته في محافظة اسيوط قرية بني عدي مركز منفلوط

والى اخر هذه الانتصارات المهم اننا نحن ونحن بلا منازع حماة النيل وحماة الوادي

واعوذ بالله من الغرور

عمرو يقول...

أستاذنا الفاضل ..
صباح الخير ..
بعينيا دول شفت فى رحلة الصعيد غيطان قمح على سنابله عينك ما تجيبش آخرها و العربيه بترمح و القمح على يمينها و شمالها بدون نهايه !!
و عرفت أن السعر المفروض لشراء القمح من الفلاحين لا يتناسب مع حتى أجرة حصاده فالفلاحين اللى بيعرف منهم يبيع للمصدرين بيبيعوا و بيستعوضوا ربنا و اللى مش بيعرف أهو بيسيبه على سنابله تاكله الطيور و البهايم !!
و بقى طبيعى أن الفلاح بيفضل يزرع البرسيم عن القمح ..
و نرجع بعد كده نستورد القمح الفاسد و نغربله و نغسله زى ما حضرتك قلت :))
سيبنى أضحك و النبى يا عم فشكووول لحسن أنا حأطق من جنابى و الله على الخيبه اللى لم أشهد لها مثيلا فى تاريخ الشعوب ..

احلام جوليا يقول...

كعادتك دائما يا استاذ فشكول موضوعك جميل ودمه خفيف فيه سخريه مؤلمة مضحكة ومبكية في ان واحد ومتخلعش راسك وتدعي ولا حاجة حرام عليك راسك كفاية عليك بس تكشفها وتدعي عليهم وانا حدعي معك ولو ان شكلهم من الي الدعوة فيهم اجله غير عاجلة او شكلنا احنا الي مش عارفين ندعي عليهم كويس او ذنوبنا بقت حاجز بينا وبين استجابة الدعاء لان كل الي بنعمله اننا بندعي عليهم ويظهر كله متحوش لهم في الاخرة والدنيا هي جنتهم ونارنا وعجبي على الفشكلة

(حلـم) يقول...

سيدي

هنا احترمت فكركح وطريقتك بمناقشة كافة القضايا

تقبل احترامي

وسنتواصل انشاءالله

MaNoOoSh يقول...

ازيك يا عمووو
حمدلله على السلامة
وموضوع القمح دة حاجة صعبة قوى.. الناس بقت كلها أمراض.. مفيش عيلة الا وتلاقى فيها حالة فشل كلوى وللا المرض الوحش "بعد الشر عننا جميعا".
احكومة دى عايزة الحرق بجاز بس يكون مطابق للمواصفات علشان يولعوا بسرعة
تحياتى

micheal يقول...

زميلي العزيز فشكول
احجزلي في أقرب كنيسة لجامع السيدة زينب عشان أكشف راسي وأدعي معاك علي كل اللي حولونا لفئران تجارب يجربوا فينا زبالة العالم
يمكن دعوة منك علي دعوة مني تجيب أجلهم وتخلصنا منهم
بجد الواحد مش عارف حنشوف ايه تاني لسه
لحم حمير وحرائق وعبارة ومبيدات مسرطنة وقمح أوكراني
تحياتي

aidy يقول...

عم فشكول

اولا حمد الله على السلامة

ربنا يورينا فيهم يوم يارب

على فكرة مصطفى بكرى هو النائب بتاع ديرتنا

بس تفتكر استجوابه هيعمل حاجة ؟؟؟؟؟؟؟؟؟؟؟؟؟؟؟؟

هما الناس دول عايزين مننا ايييه

وليه بيعملوا معانا كده واشمعنى بلدنا هى اللى ولادها مش خايفين عليها

زمان كنا نعرف ان عدو البلد هو الاحتلال بس اللى زود شوكة الاحتلال زمان الخيانة

لأن ابن البلد لما يكون خاين بيكون اخطر من اى احتلال

معلش بقي التاريخ مأثر عليا من كتر ما ذاكرته هههههههه

mimi يقول...

عاوز مش تبقي مقصر؟

خد الموضوع كوبي وبيست بالصورة

ونزله دلوقتي بوست عندك





دي أقل حاجة نعملها



مرة واحدة نتضامن علي حاجة خير

ن يقول...

السلام عليكم
أستاذى الفاضل فشكول
شكراً لسؤالك ولكن تأكد اننى فى أزمة وقت ليس اكثر بسبب الامتحانات أضف على ذلك أدوار الانفلونزا التى بدأت تصيب الاطفال والكبار هذه الايام ونظراً لشدتها طبعاً الناس فى هلع ويساورنا القلق بسبب انفلونزا الطيور والخنازير .. مش عارفة الضفادع والنمل وصلهم الموضوع ولا لسة
ههههههه
على اية حال نطلب من الله الستر والعافية
اليوم يا استاذ فشكول اتصلت بى صديقة لى تخبرنى بأنها رأت فى الصباح على شاطيء البحر كلب ومعه خنزير يبدوا ان الخنزير هارب من القطيع بس جه منين محدش عارف وكانت النتيجة ان الناس على البحر خافوا وكانوا بيجروا .. طبعا مش رياضةولكن خوف من الخنزير وطبعاًالاستاذ خنزير بكل بجاحة بيقول للميعرفش اعرف ان فيه خنازير مازلت حية وانها موجودة فى اسكندرية طيب ازاى وفين محدش عارف واللى يغيظ فى الموضوع ان الخنزير رياضى بيتمشى على البحر
أما كونى علقت تعليق قصيرعلى هذا البوست فهذا لأنى حزينة مما يحدث وقد حدث من قبل ولا زال يتكرر .
انت عاوز تنكشنى صح ؟ وتسألنى قرأتى صفحة التعليقات لأخ فارس عبد الفتاح
أجل اتابعها رغم ضيق وقتى ولكنى مازلت أدرس فكره بعيداً عن تشعب عشرات الموضوعات التى يعرضها فى الموضوع الواحد
بل فى السطر الواحد وهذا اعتبره فن واتقان لعرض المعلومة لا يجيده غير محترف وخبير واعلم جيداً أن مثل هذا العرض يصعب التعامل معه عبر حركة التدوين لأنها بدأت غالباً بتسليط الضوء على موضوعات محدودة وذلك بسبب ثقافة أجيال الكمبيوتر التى اعتمدت غالباً الحصول على معلومات سريعة عبر شبكة الانترنت بدون التحقق من مصدرها ولأن التعامل مع الكتب والبحث تراجع ولكن هذا لا ينطبق على الجميع ولعلنا نتذكر قبل خروج تكنولوجيا المعلومات كنا نرى أناساً عقولهم مخزن للمعلومات يمكنهم عرض المعلومات المختلفة بسهولةويسر وكان ذلك بسبب تنشيط حاسة البحث والتفكير والقرأةوالبحث .
وعلى اية حال أنا ممن يحترمون العقول المفكرة واحترم الابداعات الهادفة التى يسهل على العقول تقبلها .
الفكر والابداع ولمهارة والقدرات من وجهة نظرى تطاع ولا تطوع مادامت هادفةوموجهة توجيهاً صحيحاً وعلينا أن نحترم عقولنا وقدراتنا مادامت تأخذنا من الجمود والروتين الى العلم والتعلم
وأنا ممن يحبون الصبر على دراسة الناس وأحوالهم وأفكارهم والنفس البشرية دائماً لديها فيض من المفاجآت
أظنك فهمتنى يا استاذى
مع خالص تحياتى

ابو صهيب ( الجمعاوي الاصيل)سابقاً يقول...

السلام عليكم ورحمة الله

اخي الكريم فشكول

اولاً عوداً حميداً

ثانياً

ان الشعار الذي ترفعه دولتنا الكريمة

هي مصلحة الفرد مقدمة على مصلحة الجميع

فنا وانت نيجوا ايه علشان نقول قمحنا او نستورد قمح نضيف

انت خلاص مش قادر تستوعب
الناس دي عارفة مصلحتنا اكتر مننا
وبعدين احنا نفهم اكتر من الحكومة

وصباحك مبارك شريف نظيف مفيد وكله جمال وكمال وعز

صفــــاء يقول...

وهى جات على دى
فعلا القمح هنا مرمى فى الغيطان وأصحابه حتى ما راضيين يحصدوة لأن بحصاده هيبقى واقع عليهم بالخسارة وخراب البيوت
هيئه السلع التموينيه دى هيئه ظريفه جدا
كانت مسؤله عن المجمعات أيام العز والكراتين المدعمه
وحتى الأن لسه برضه فاضل فيها اللى يتنهب
يالا .. أرزااااااق

♥نبع الغرام♥♪≈ يقول...

السلام عليكم
حبيبى الغالى
ربنا ما يحرمنيش منك أبدآ
وبجد انت حد جميل قووى بحترمه وعزه جامد يا عمو صلاح
وعمرى ما انسا وقفتك جنبى يا غالى
يارب تكون دايمآ متألق وبألف صحه
وأدعوك لزيارة بوستى الأخير
تحياتى
انوسه النوسه كونوسه

اسماء واحلام فى وجدانى يقول...

والدى الطيب
اسالك قلبك وهو يدلك
وهو كمان هيقولك اشمعناأنا

عاشقة حبيبتى يقول...

مساء الفل

هو بجد دة حصل بخصوص القمح اصل موصلنيش الخبر دة كنت عايزة النسبة بتعتى من الصفقات دى بس يالله منهم لله

انت بتكلم عن القمح المغشوش على الاقل دة هيدخل النار ويزبط امال الادوية الفسدة الا بتتعمل تحت السلم دى اية

بس احنا شعب احفاد الفرعنة كل الكلام دة ميهمناش ربنا كرمنا بالفول مدينا مناعة

تحياتى

mahasen saber يقول...

عمى الغالى والله
وحشتنى قوى قوى قوى

ولما بقول عمى ببئه حاساها جدا وكأنك من دمى وربنا عالم

انا برضه كنت غايبه بس غيبه عن غيبه تفرق طبعا

mahasen saber يقول...

موضوع القمح هايل ان حضرتك اتكلمت عنه

طب عايزين حضرتك تشوفلنا موضوع الرقم 015
واشعته السرطانيه اليى بيقولوا عليها

وبعدين عندى سؤال يا عمنا الغالى كده على جنب

هو احنا بقينا ملطشه ولاا ايه
اى حاجه بتتحدف فينا والسلام

DoNyA يقول...

تفتكر انها جت علي القمح يا استاذنا
ولا اهو حاجه من ضمن الحاجات

ليك وحشه كبيره خاااااالص
طالت الغيبه
وحمدله علي سلامت حضرتك
واتمني انها كانت رحله عمل موفقه

تفتكر بعد الطيور والخنازير
ممكن يجي ايه تاني !!!!!؟؟؟

جارة القمر يقول...

أستاذنا الفاضل

لقد ناقشت قضية مهمة جدا وضحاياها العامة من الناس ...

لك فكر راقي

أشكرك كثيرا لوقوفك بجواري ودعائك لوالدتي

عم فشكول أنت رائع جدا

استمر

السامر يقول...

جميل

جلال كمال الجربانى يقول...

السلام عليكم ورحمه الله وبركاته
فشكولنا الكبير

شحنه القمح المعنيه هى أحد مكونات الحمله الدوليه والحكوميه للقضاء على الشعب المصرى
ولأن تغيير الحكومات فى بلادنا صعب وجد أن تغيير الشعب على مراحل أسهل وأوفر
بالقمح الفاسد وأكياس الدم الغير مطابقه والعبارات الغارقه والقطارات المحترقه بمن فيها وأمراض الكبد والفشل الكلوى
لكن حتى الأن يتعجب الوزراء القائمين على تنفيذ الحمله القوميه الترلليه للقضاء على الشعب المصرى .. من قوه وصمود ومقاومه الشعب المصرى رغم تعدد الضحايا
وقريباً سيتم إعلان الشعب المصرى عجيبه من عجائب الدنيا العجيبه خالص مالص
تهانينا مقدماً

ودمت ياعمنا بخير

♥نبع الغرام♥♪≈ يقول...

السلام عليكم
عمى الغالى فشكول وابويا
وحشتنى كتير قووى
وأشكرك من كل قلبى على مرورك الكريم
معلهش اليومين دول بمر بظروف مش كويسه بسبب الاصدقاء ومحتاجه اقعد شويه مع نفسى وان شاء الله هرجع ليكم تانى
هتوحشنى
وبدعوك لزيارة بوستى الخير
بنتك انوسه

فشكووول يقول...

سبحان الله والحمد لله ولا حول ولا قوة الا بالله
لا اله الا الله
سبحان الله وبحمده سبحان الله العظيم

ريمان يقول...

فشكولنا الجميل


ربنا مايحرمنا منك ياااااااااارب

ولا من زيارتك الغاليه علينا دى

تحياتى ليك

بل ارق تحياتى ليك

mahasen saber يقول...

عمنا فشكول ده رأيى صائب جدا
هههههههههه
نروح كلنا فى داهيه ونريحهم منا ههههههههههه

ماشى اليى حضرتك تقول عليه وتقترحه

مهرة سالم يقول...

السلام عليكم......
ألف سلامه على الكمبيوتر......
....
والحمدلله على السلامه من الرحله المكوكيه...
.....
القمح..
كان الله في العون......
.......
الله يهل أمور جميع الطلبه ...
....
في أمان الله...

اسماء واحلام فى وجدانى يقول...

والدى الطيب
فشكولى الجميل
انا جاى النهاردة علشان اعتب عليك والعتاب بين الاحبة حب كبير انا قراءت كلامك عند جارة القمر
ومن الواضح ان فى حد فينا مش فاهم التانى انا باقول لنفسى يا واد يا احمد انت اكيد اللى مش فاهم قصد عمك فشكول وارجع اقول لنفسى هو اللى مش فاهمنى مشعارف يا ريت تريحنى وتفهمنى بالظبط ايه المقصود

سنابل يقول...

إزيك يا عمو فشكول كان الله ف العون
سلامة النت والكمبيوتر الف سلامة
حكاية انفلوانزا الخنازير دى باين طلعت نصباية وللا حجة عشان هما بيفرحوا لما يشوفوا الناس خايفة ومرعوبة
اما بقي انك تعيب ف القمح كامل الدسم سوا الروسي وللا الأكراني فدا اللي ما يصحش يعني الحق عليهم جايبين لنا حاجة مفتخرة وهايبقي عيش بغموس منه فيه ؟
أنا رأيي تحتفظ بالتلاتين أردب اللي عندك نغسل ونطحن ونخبز زى زمان ولا الحوجة للدقيق كامل الدسم ده

أم أحمد المصرية يقول...

يعني اول مرة ازور مدونتك الاقي ناس مغرضة بقي و غاوية اشاعات قال القمح بايظ قال ما الاوكراني اتهضم و عايشين زي الفل يا شعب ما بيطمرش فيه نجيب قمح و كمان مش عاجب حلال فيكم طوابير العيش و نصيحة لوجه الله بقي الحشرات دي كلها بروتين و اجدع من الفراخ اللي فيها انفلونزا
_______________________________
ان شاء الله بداية تواصل دائم

الفقيرة إلى الله أم البنات يقول...

استاذ فشكول معلهش كلنا عندنا مشاكل مع النت
ولا يهمك
انا عاوزة ااقولك لك عندى تاج
ارجو ان تأتى لتستلمه



عاوزة بس ااقولك حاجه ان الاولاد عندنا فى المسجد نقول لهم يا بنات بلاش الشيكولاته الفولانيه فيها سامونيلا
يقولوا لنا
هنسمى ونقول
بسم الله الذى لا يضر مع اسمه شئ فى الارض ولا فى السماء
اظن ان مصر كلها عايشه عليها

اسيبك بقى واقرأ براحتى
ربنا يكرمك يارب

الازهرى يقول...

بص ياعمنا انت اتأخر ولا يهمك تاامهم تكون انت بالسلامة

عموما شوية الفشاكيل المكتوبة هنا روعة لكن وجعت لى قلبى
لإنى كنت بعيد عن الاخبار وفى الامتحانات ويا دوب ارجع الاقى كل ده

ربنا يعينا

الازهرى يقول...

الا صحيح
انت غرت من الواد صعلوك ووديته فين

الواد اختفى فين ؟
يا خوفى يا بدران

اسماء واحلام فى وجدانى يقول...

العفو يا فشكولى ثم العفو ثم العفو

انا كنت اقصد ان حضرتك كتبت تعليق عند جارة القمر وقلت رايك فيا
انا بقى مش فاهم او مش قادر افهم رايك بالظبط حضرتك قلت انى باياس بسرعة بس انا مش كده بس يا ريت ترجعله تانى معلش هاتعبك معايا ابنك وعشمان فيك

م/ الحسيني لزومي يقول...

شوف يا عمي فشكول
الجهه اللي انا شغال تحريض فيها علي الثورة ضاربه مفيش امل فيها.... علشان كده محدش ها يجي ناحيتي او ناحيتك .وكما قلت واقول وساقول:-
لقد اسمعت اذ ناديت حيا
ولكن لا حياة لمن تنادي

كلمات من نور يقول...

هو حضرتك مسمعتش إن روسيا اتبرأت منا وقالت حسبي الله القمح داه علف بهائم لامؤاخذة


يا ترى البهائم أكلته؟ والا مين؟؟؟؟

Hossam يقول...

اول زيارة ليا وبجد المووضع عجبنى جدا
بجد حسيتك مصرى بحت من اللى بيخاوفوا عل البلد دى بجد
ربنا ينتقم من التموين كلة وكل اللى بيمشوا فى الفساد وميهمكش من النت البايظ
تحياتى
سلام

القمر الساهر يقول...

تعبت من البكى على نفسنا

مش عارفين تزرعلنا قمح ياكلنا وشاطرين نشتري من برى بقرفه

♥نبع الغرام♥♪≈ يقول...

السلام عليكم
بخخخخخخخخخخ
الحمد لله
انا جايا اطمن عليك
واقولك انى رجعت ياقمر
ربنا ما يحرمنيش من سؤالك عنى ياغالى دمت بالف خير
انوسه

امـنــيــتــي يقول...

الوووووووووووووو
ازيك ياعم الحج

اخبارك ايه بجد بقرا تعليقاتك حبيت ادخل المدونه بتعتك بجد دمار شامل

فيك تعمل قنبله

ودمر بيها

العالم كلو المهم كلامك جميل ابقي زورني

ومتعملش قنبله بالمدونه سلام يا عم الحج

امـنــيــتــي يقول...

الوووووووووووووو
ازيك ياعم الحج

اخبارك ايه بجد بقرا تعليقاتك حبيت ادخل المدونه بتعتك بجد دمار شامل

فيك تعمل قنبله

ودمر بيها

العالم كلو المهم كلامك جميل ابقي زورني

ومتعملش قنبله بالمدونه سلام يا عم الحج

اسماء واحلام فى وجدانى يقول...

واحشنى يا طيب

امـنــيــتــي يقول...

هلا والله ازيك ياحج والله انا اكتر اخبارك

والله بجد بتشكرك كتير لمرورك بالمدونه بس متسبهاش

امـنــيــتــي يقول...

حضرتك بعجبك موضوع بتلاقي بتحب ترسله عن طريق الاميل

فلم حضرتك بترسله الاميل كده بيرسل الاميلات الموجوده عندك للي بتبعتلو الموضوع مش فكل الاوقات

انا بنصحك مترسلش بالمره
انشالله دلوقت وصلت المعلومه

اسماء واحلام فى وجدانى يقول...

والله ما اعرف معناه

rovy يقول...

السلام عليكم
انا جايه اطمن عليك يا استاذنا ياارب تكون بخير دايما ..

و متتأخرش علينا

تحياتى

د.توكل مسعود يقول...

السلام عليكم ورحمة الله... وبعد

فأشكركم أولا على زيارتكم الكريمة وأسأله سبحانه أن يديم فى الله مودتنا...

وثانيا أرجو أن تسمح لى بوقفة مع هذه العبارة "ما بحبش الافلام العربى خالص كمان ما بحبش اى حاجه تمت للعربيه - طهقت منهم"

أخى فشكووووووووووووول

النبى عربى
القرآن عربى
وأخيرا...أنا عربى

دمت بخير وعافية.

وحي القلم يقول...

السلام عليكم
استاذ فشكوول / اشتقت اليكم والي تدويناتكم الرائعة
الحقيقة المواطن المصري يحير مفيش حاجة بتأثر فيه !!
لا مبيدات مسرطنة ولا قمح مسوس ولا حاجة
وطبعا الفول هو الرائد ف المجال ده
تقبل مروري

zainab يقول...

أستاذى العزيز فشكول

كيف حالك ؟؟؟؟

معلش مالحقتش أقرأ البوست

أنا بكتب دلوقتى و هروح شغلى كمان شويه بس قلت لنفسى لازم أجى أشوفك وأقولك يعنى بأه بتاعه مصلحتى ؟؟؟؟؟؟؟

اه صحيح انا مش عارفه أعمل ايه فى موضوع الغساله والله عايزة أجيبها فول أوتوماتيك زانوسى العبد المستورده الإيطالى لكن بيقولوا لى ماعادتش بتنزل و اللى موجود دلوقت العبد و فيه اللى قاللى هاتى (ال جى)
و مش عارفه أجيب ايه ؟؟؟؟؟؟؟؟؟

قوللى أعمل ايه ؟؟؟؟؟؟
( ما أنا بتاعه مصلحتى بأه ههههههههه)

والسلام عليكم ورحمة الله وبركاته

Beram ElMasry يقول...

فشكووول
حبيبي فشكول الملاك طار وبقي الحارس............
علي فكرة حكاية القمح الفاسد هي موضوع القصيدة القادمة
سعيد بمرورك ومشاركتك لا تحرمني من تعليقاتك
نفعني الله بدعاءك وتحياتي والسلام عليكم ولا سلام مع اليهود

د.توكل مسعود يقول...

فشكوووووول
هدىء من روعك ياأخى.... ماذا تصنع لو سافرت سفرة طويلة فلما عدت بالسلامة وجدت أولادك فى غيابك قد انحرفوا وساءت أخلاقهم وعقوا أمهم وقطعوا أرحامهم..... أكنت تلعنهم وتتبرأ منهم وتقول ليسوا أولادى فتكون قد ارتكبت جريمة جديدة... أم تحتضنهم وتأخذ بأيديهم حتى يعودوا مرة أخرى إلى الصورة التى تحبها وترضاها وقد يدركك الموت قبل أن تراها ولكنك تكون قد أعذرت وأدين ماعليك

شرح الله صدرى وصدرك لما يحب هو ويرضى

غير معرف يقول...

ايه كل الفشكلة دى
جيت استخف بدمى الاقيك أخف منى
انا غاوى تسالى باكل كل يوم كيلو لب وسودانى يدوب علبال مخلص جولة المدونات
اكون خلصت وبعدين اتسلى بترمس وحمص
انا يا خويا مش محتاج القمح ابودود وسوس ده .

۩ Nour ۩ يقول...

السلام عليكم..

ملف جديد من ملفات الغش والاتجار بارواح الشعب نظراً للكثافة العددية!!

يا أستاذ فشكول نفترض إن قانون حماية المستهلك تم تطبقيه فعلياً هل ستختفى تلك الحالات !!

دمت بخير.

Soul.o0o.Whisper يقول...

عمو العزيز /فشكول

السلام عليكم و رحمة الله و بركاته


معلش مقصرة معاك بئالى فترة
يارب مش تكون زعلان منى

و بعدين فين البوستات الجديدة
؟؟؟؟؟


بالنسبة لانعكاسى فى الوورد برس
دى مدونتى التانية الاحتياطى

نسخة من دى تمام
عشان كدا سمتها انعكاس
:)

بسسسسسسسس
دى كل الحكاية

Unknown يقول...

السلام عليكم يا أستاذنا

رجعت بعد غياب

بمناسبة الغله
أنا كنت قاعد مع وزير الزراعة السابق في قعدة بعد ما ترك الوزارة ( عشان بس تعرفوا أننا تقيل واعرف وزراء )
المهم قال لي أنا كنت مقدم للرئيس مشروع للأكتفاء من القمح في خلال 10 سنوات
الريس قاله جميل ... حلو

وكل سنة وأنت طيب
المشروع في الدرج على رأي اللمبي

ويبقى التواصل

Ramy Wasel يقول...

استاذى الفاضل

احنا جربنا الجكومه فى حاجات كتيير
وكفرنا من اتعامل معها خلاص

ولانى اتعامل مع فلاحين
وعندنا مزرعه واراضى زراعيه
اعرف جيدا كيف تعاملنا الحكومه

يعنى مثلا فى القمح

التقاوى غاليه

والكيماوى غالى جدا جدا

والعماله اغلى واغلى
وفى النهايه
التوريد فى شونه الحكومه فقط
وبالسعر الذى تحدده الحكومه
وتساوى القمح المصرى درجه واحد
بالقمح الفاسد درجه خامسه
وتتحجج بالاسعار العالميه
رغم اختلاف الجوده

واذا رضينا بالاسعار العالميه

تأتى الحكومه وتغلق التصدير فى الارز
وتتحج بالتحكم فى الاسعار
لان السعر العالمى للارز مرتفع
وتسببت الحكومه فى خسائر فادحه للفلاحين
وهوى سعر طن الارز الشعير الى 1000 جنيه واقل من الالف
وسيقل اكثر العام القادم
وتستولى الحكومه على الرز
ثم تعيد تصيره وتحصل على ارباح خياليه لها
ولرجالها الكبار
وليذهب الفلاحين الى الجحيم

تشرفت بزيارتك لى

تحياتى
رامى واصل

جارة القمر يقول...

مرحبا


يارب تكون بخير


جئت لأطمئن عليك


احترامي

غير معرف يقول...

تسالىىىىىىىىىىىى
انا اصلى بحب التسالى ودى مدونتى من غير مدونة هى تعليقات وبس
موضوع مدونتى زى ما انتو شايفين انا عابر سبيل بستمتع جدا بيكم وبأفكركم وبرأيكم
وشعارى كلمات ابونا صلاح جاهين
«غمض عينك وامشي بخفة ودلع..
الدنيا هي الشابة وانت الجدع..
تشوف رشاقة خطوتك تعبدك....
لكن انت لو بصيت لرجليك تقع...عجبي!»
اهتماماتى
الازأزة .. يعنى .. لب وسودانى حمص وترمس وحب العزيز
ولما بكون متريش فستق هاهاها
انا بضحك لأنى دايما على الحديدة بس بردوا بلاقى
تسالىىىىىىىىىىى

hana يقول...

ياربي إحنا هنلاقيها منين ولا منين

حتى القمح كماان هو الحال دة مش هينصلح ابداً

ربنايستر من أنفلونزا الخنازير كماان
وميحصلش ويعدوا كدة ذي ما عمالين يعدو بالغش في كل حاجة

مشكلة انه في إختراع إسمه ضمير الظاهر لسه موصلش

مدونة جميلة جدااااااااااااااااً

كنت هُنا وسأعووووووووووووووووود
هنااااااااااااااااااااااااااا

Soul.o0o.Whisper يقول...

فشكووول

عمو العزيز / فشكول
يا هلا يا هلا

"يا سلام يا حلوه
افادكم الله
مدونه تانيه صوره من مدونتك
افادك الله يا دكتوره
كسبنا صلاة النبى "

احم احم
احرجتنى والله يا عمو

"والله انا عارف انها صوره من المدونه
انا قصدى بتعمليها ازاى عشان انا بواجه ساعات مشاكل فى المدونه وعايز اعمل زيها بس ازاى
تضحكى عليى وتقولى كلمتين وبس "

مش بأقولك أحرجتنى
هههههههههههههه


"انا عايز تفصيلات ازاى تعمليها عشان اعمل زيها وانت تردى على بكلمتين وبس
لا يا حلوه
قولى لى بالتفصيل اعمل زيك ازااااااائ"

حاضر حاضر والله
بس بلاش ضرب
اصلى باخاف
:)



دمت بكل ود يا عمو العزيز

Soul.o0o.Whisper يقول...

قولى حضرتك بتكون موجود امتى و أنا امشى مع حضرتك خطوة خطوة

ريمان يقول...

ازيك يا جميل


قولت اجى اطمن عليك

وادعى لى بجد عندى امتحانات كتير كتير كتير


ومش فاهمه حاجات كتير كتير كتير برضه


هههههههههههههههه


يلا كله بيطلع فى الغسيل

تحياتى ليك

Ehab يقول...

ياعم هى جات على القمح ده احنا لينا الجنة
المصريين فى عهد مبارك هايخشوا الجنة من غير حساب ان شاء الله
ابشروا

(حلـم) يقول...

اجيت احيك ياعم فشكول واقولك دمت ذخرا لطلاب والتعليم واللة يعلي مراتبك لوزارة التعليم