الثلاثاء، 23 يونيو، 2009

تنمزج فى المتنمزج ... تصبح انموزج



ساقنى حظى اليوم للمرور على معظم مكاتب البريد فى شبين الكوم واللى طول عمرى عارف طريقهم ودائما اقف فى طوابيرهم .. لييييييييه ... عشان الحاجه ام اسامه عايزه تحج السنه دى ... هى عايزه تحج وانا عايز اهج ... يا وليه انت مش حجيتى قبل كده ... كنت صغيره يا خويا ومش حاسه انا بأعمل ايه ... لكن انا الوقت عايزه اتمتع مره تانيه واحج من جديد ... انا بقى جيبى مفلس ونفسه فى مليم احمر آهو يحس بالفلوس بدل ما هو على الحديده.


برضه يا جماعه عندها حق ... تفسها تحج وتزور النبى كمان مره ... ماشى يا حاجه اعمل لك جواز سفر جديد وربنا المعين ورزقنا عليك يا رب وح ابتدى اعمل للموضوع جمعيه بـ 10 جنيه كل شهر مع 4000 تلاف واحد ونقبضها الاول وربنا بقى هو اللى بيعين.


كنا من فتره بنشترى استمارات الجوازات من البوسته وعشان كدا اخدتها كعب داير على جميع بوستاتك يا شبين الاقى كلها مقفوله بالضبه والمفتاح وعلى ابوابها كومين تلاته تراب وهباب كمان .. ولما وصلت البوسته العموميه وسألتهم هى مكاتبكم مقفوله ليه قالوا لى عشان (النمزجه) ... ايه يا جماعه النمزجه دى؟ ... قالوا بنعمل كل المكاتب نموزج واحد... مثلا الخزينه على اليمين وفى الوش الموظف بتاع الطوابع والكاونتر على الشمال مثلا مثلا يعنى والارضيات سيراميك ... يعنى المكاتب كلها تبقى شكل بعضها والمكتب اللى تدخله فى شبين هو نفس المكتب فى اسيوط وهكذا دواليك.


آه لو اعرف مين اللى فكر فى الفكره الجهنميه دى كنت دبيت صوابعى العشره فى عنيه ... هى فلوسه كتيره كدا ليه ... سعادته يهد كل المكاتب فى البلد من السلوم لحد اسوان عشان ينمزجها ... وهو يبقى آخر مزاج ... المفروض لو عايز يطور ياخد العمليه واحده واحده ... المكتب اللى عايز يترمم يعمل له نمزجه وبرضه هو يعمل مزاج كبير من ورا المكتب المتنمزج ده وهكذا لحد ما يخلص على مكاتب البلد كلها نمزجه ... مش يهد مكاتب البلد كلها عشان سعادته ياخد مزاجه على اخره وميت فل واربعتاشر. ...لأ نهد كله ونبنى كله ... يانمازجك يا بوسته مصر.


ما هو احنا عندنا فلوس كتيره متلتله حنوديها فين ... فى النمزجه ... امال يا جماعه ليه دايما بتقولوا مواردنا محدوده واحنا دوله فقيره وبنشحت على الابواب .... لاااااااااا ... احنا دوله غنيه ... بدليل النمزجه مره واحده وانتم اللى شعب فقير دقه ... والفقير يجوز فقيره يخلفوا شحات صغير.


والله يا جماعه احنا ما احنا دوله فقيره ولا حاجه ... احنا دوله غنيه ... بس يا خساره فلوسها للبهرجه والقنعره والفشخره ... مش لاولادها.


عارفين لو لى الحق فى التصرف مع اللى فكر الفكره المخيخى دى كنت عملت له قرار وطلعته معاش فورا ومن غير مكافأه كمان... هى المواضيع كلام تخين وخلاص ولا ايه؟


مين بقى ح يدخل الجمعيه ام 10 جنيه ويقبضها فى الاخر .. اللى موافق منكم يبعت لى 10 جنيه بحواله على مكتب متنمزج واللى يبعت على مكتب مش متنمزج حيترفض طلبه . نسيت اقول لكم انهم قالو لى استمارات الجوازات من ادارة الجوازات وما عدناش بنبيع الاستمارات عندنا... آه يا رجلى.


رحت بقى على ادارة الجوازات ... حاجه غريبه يا جماعه ما كنتش متخيلها .. قال بتاع الاستعلامات عشان تاخد استماره لازم يكون معاك اربع صور لزوجتك ... اديته الـ 4 صور ... ادانى الاستماره ببلاش وقال لى اقعد بقى املأ البيانات ... حاضر ... تمام يا افندم مليت الاستماره ... ادانى طابع دمغه بجنيه واحد .. وروح شباك 4 ... حاضر ... اخدوا الاستماره والصور وبطاقتى وبطاقة زوجتى وقالوا لى روح على الخزينه ... حاضر ... هات 68 جنيه ... حاضر وادانى ايصال وقال فوت بعد ساعه.


وبعد ساعه رجعت افوت لقيتهم بيندهوا اسم الحاجه ام اسامه ... انا رديت نعم ... لقيتهم بيدونى الجواز الجديد بتاع مراتى ... ايه ده يا جماعه ... دا جواز الحاجه ... كدا من غير طوابير... آى نعم ... كدا من غير 100 ختم نسر واشى صقر ... اى نعم ... كدا من غير الحاجه ما تيجى وتختم وتبصم وتمضى ويطلع روح اللى خلفونا ... آى نعم ... طب يا جماعه عايز اقول لكم عشان بس يعنى الامانه ان الحاجه ما دخلتش الجيش وما عندهاش بطاقه معامله عسكريه ومتهربه من التجنيد ... قالوا مش مهم ... انا فين يا جماعه ؟


انا رحت الجوازات لوحدى من غير الحاجه ... هم اخدوا على اقرار اننى انا جوزها وصوره من بطاقتى الشخصيه وصورى من بطاقة الحاجه الشخصيه وخلص الجواز ... طلع يا هووووه لوحده


دائما نشجب ونندد ونهدد ونتوعد.......................

هذه المره ... تحيه خاصه الى ادارة جوازات شبين الكوم وتحيه لكل ضابط وصف وأمين وموظف يعمل فى هذه الاداره ... لم ارى فى حياتى اسهل من التعامل مع ادارة جوازات شبين الكوم


انا داخل بقى آكل حتة بطيخ ... بس ح اعطى قشرها لبتاع البريد بتاع النمزجه.



هناك 120 تعليقًا:

*البت المشمشية *حلوة بس شقية * يقول...

اول تعليق عند حمايا فشكول

*البت المشمشية *حلوة بس شقية * يقول...

تانى تعليق كمان للحاجة حماتى

*البت المشمشية *حلوة بس شقية * يقول...

تالت تعليق للنمزجة

*البت المشمشية *حلوة بس شقية * يقول...

رابع تعليق لاهل المنوفيه كلهم

*البت المشمشية *حلوة بس شقية * يقول...

ورقصنى يا جدع

*البت المشمشية *حلوة بس شقية * يقول...

بقلك ايه ياعم الحج
متستخسرش فى الحاجة حاجة
اة
خليها تحج
ولما تخلص حج
احجزلها فى الساحل الشمالى كمان تغير جو
وهو احنا عندنا اعز من الحجة(حماتى بقه ولازم اعمل الشويتين دول)
ههههههههههههههههههههههه
وده الطبيعى يعنى فى بلدنا
بنصرف فلوسنا فى اننا نبنى نافورة
نحط مش عارفه رخام فين
وبس على كدة
وبخصوص الجمعيه
انا كنت داخلة واحدة بجنيه فى اليوم
وحلفت منا داخلة تانى
لو عايزنى ادخل
يبقا انا اقبض الاؤل
والحاجة تستنا بقه

وبعدين انا عايزة بطيخة حلوة كدة على حسابك

اسماء واحلام فى وجدانى يقول...

يعنى الواحد عمره ما هينول شرف اول تعليق ايه ده يا ربى

على العموم التعليق ده مؤقتا وراجع كمان شوية

اسماء واحلام فى وجدانى يقول...

البنت المشمشية راجعة بقوة جامدة اوى

وعلى مين على الراس الكبيرة نفسها

ايه الثقة والشجاعة دى كلها

mohamed ghalia يقول...

والله يا جماعه احنا ما احنا دوله فقيره ولا حاجه ... احنا دوله غنيه ... بس يا خساره فلوسها للبهرجه والقنعره والفشخره ... مش لاولادها.
عندك حق يا أستاذى

اسماء واحلام فى وجدانى يقول...

مش قادر امشى احتل كمان تعليق

عند حبيبى فشكولى الواحد مش ضامن ظروفه كمان شوية وبعدين ده انا تانى واحد اجىء هنا وده فى حد ذاته انجاز

Ramy Wasel يقول...

اهم حاجه
تخليى قشر البطيخه زى ما هى
علشان القلنسوه

يمكن الحكيم يتزنق فيها ولا حاجه

وبعدين موضوع البريد ده مش جديد
حصل قبل كده فى وزاره سليمان والكبارى

جدد الوزاره كلها
مع انها كانت لسه جديده
والكماليات كلها من بره
واوكر الابواب من برا
زى فيلم
عريس من جهه امنيه
وبلاطه من ايطاليا
وبلاطه من اندونيسيا
غلشان احنا اهم حاجه عندنا المظاهر
وهو الانسان ايه غير المظاهر
وشويه حاجات صغيره

Ramy Wasel يقول...

وعلى فكره
مش حينفع ادخل الجمعيه
لان البريد عندنا لسه بيتمنزج

عايش... ولكن !!!! يقول...

فشكول بيه الفلوس هتتصرف هتتصرف وجيبه لازم يبقى ع الحديده يبقى تتصرف فى الحج احسن من حاجه تانيه والحاجه اولى ولا ايه
اما بقا عن مصرنا الغاليه فهيا بجد غنيه والا مكنش عندنا فى المنصوره كل سنه يشيلوا الرصيف اللى اتعمل السنه اللى فاتت ويعملوا غيره برغم انه زى الفل ويعملوا تل توار متظبط بدل بتاع السنه اللى فاتت ولا لما يتغير المحافظ يشيل كل اللى قبله عمله ويعمله نفسه بالظبط من جديد
ربنا يرحمنا

THE illusionist يقول...

يا مساء الفل
معاك واحد شبينى اصيل
عايش فى البر الشرقى
وتحديدا
عن بيت ناجى شتله
مساء الفل والانوار
اهلا يا استاذ فشكول
لا
نقول يا بابا فشكول
على فكره
نفس موضوعك حصل مع والدى اول امبارح
لانه هو اللى عايز يحج
وتلت تربع اللى حصل مع حضرتك حصل معاه
فلو تكون عرفت حد اثناء الرحله دى
يبقى اكيد ابويا



هذه المره ... تحيه خاصه الى ادارة جوازات شبين الكوم وتحيه لكل ضابط وصف وأمين وموظف يعمل فى هذه الاداره ... لم ارى فى حياتى اسهل من التعامل مع ادارة جوازات شبين الكوم

ههههههههههههههه
بلاش بلاش بلاش
هيتغروا فى نفسهم
ثانيا
شبين عندها اداره جوازات
مش فاتحه جنب الاستاذ كشك
ولا انا بيتهيالى
سلامو عليكم

محمد عبدالرحمن شحاته يقول...

طولت الغيبه علينا يافشكول
عوده حميده ان شاء الله
والله انا لما قرأت الموضوع حسيت بالمشاورير والكعب الدائر والمعاناه اللي انت عانتها
لكن كله فدا النمزجه
ويمكن بعد النمزجه اداء البوسته يبقى كويس
جزاك الله خير على الموضوع

اللؤلؤة يقول...

فشكوووولى العزيز
السلام عليكم
واللهِ أناكنت ناوِى أدخل عندك قبل أن أرى موضوع النمزجة لكى أطمئن عليك لطول غيابك ولعلك تكون بخير بعد النمزجة
ولكن اللى سبأ أكل النبأ ومبروك عليك النبأ والنمزجة
دمت بكل الخير

اللؤلؤة يقول...

فشكوووولى الغالى
السلام عليكم
أنا رفعت صبعى لكى أشترك معك فى الجمعية ولكن لى شرطان
الأول عاوز حتة بطيخ
الثانى أكون الأول وبعد كدة أهرب من مصر
ههههههههههههههه
دمت فى حفظ الله

شموع يقول...

الأستاذالفاضل
السلام عليكم
فى ناس تعبت فى القرش وعارفة قيمته وخاصة عندما يكون مسئولاً فمن المفترض أن يتقى الله فيما تحت يده أما هؤلاء الناس لا يعرفوا للمسئولية حقها ولكن هؤلاء الناس قد ولدوا وفى فمهم بيضة ذهب
تقبل مرورى

عمرو يقول...

الله يا أستاذنا .. الله ينور على حضرتك ..
بيعجبنى أوى أننا نبرز الاٍيجابيات زى ما بنفضح السلبيات ..
البعض حيقولوا الاٍيجابيات لا تستحق التعليق لأن الأصل فى الأشياء أن تكون صحيحه و سليمه و لكن الحقيقه انا باخالف الراى ده لأسباب كتيره مش مجال شرحها هنا ..
بطاقة الرقم القومى الحقيقه سهلت كل حاجه لأن كل البيانات المطلوبه اللى كانت بتدوخنا و بتحتاج لموظفين و أختام بقت كلها متسجله على شبكة الكومبيوتر و متصله ببعضها و ده شىء حقيقة يحسب للحكومه ربنا يبارك لها ( عين بتغمز يعنى كده و كده )
أما بقى موضوع النمزجه فلا أجدس وى الدعاء على صاحب هذه الفكره الجهنميه بأن يكون نموذج لمن هم على شاكلته يوم الموقف العظيم يوم لا ينفع مال و لا بنون .. و الله هو الحكم العدل ..
تقبل تحياتى و تقديرى و ألف مبروك للحاجه أم أسامه ربنا يكتبها لنا يا رب و الدعاء أمانه يا أستاذنا ..

aidy يقول...

هو النمزجة دى تبع خطة الاصلاح اللى قايمة فى البلد

:D

يعنى مينفعش يصلحوا الاول الحاجات المهمة وبعدين يمنزجوا البوستات

بس بصراحة الجوازات بدام بقت فعلا كده يبقى فعلا الكلام اللى بيتقال عن انتهاء الروتين اللى كان بيخنق الواحد فى اى مكان

ربنا يهديهم كمان وكمان

الكحيان يقول...

وأنا أقول الفيلسوف غطس وما حدش سامع له حس أتاريه خد له لفة. حمد لله على السلامة أنا كان بودي أشارك في الجمعية لكن أنا حرمت أتعامل مع البريد لأن مرة بعت كتيب صغير مهم للضرورة مسجل لزميل في الإسكندرية العربية حصل عليه سطو مسلح واتسرقت والموظف اعتذر لي وطلب إني أسامحه والمرةالتانية فضلت أبعت لصديقي في الكويت جوابات مسجلة مع علم الوصول بريد سريع لم يصل أي جواب منها وبعد اليأس أرسلت جواب عادي جدا بلا سرعة ولا تسجيل ووصل بعد ثلاثة أيام فقط . بالهنا والشفا وبالراحة ع البطيخ ياترى هل ثمة علاقة بين البطيخ والفلسفة والفشكلة والعبقرية التي تشر من عم فشكول؟ ياريت الحاجة أم سلامة تلغي الحج السنة دي عشان أنفلونزا طايحة في الخلق. وحشتنا ياعم فشكول وشكرا على بوستك الجميل

Ahmed Talk يقول...

هو بصراحة في حاجات كثير تغيرت في الحكومة بس لسة برضه في حاجات محتاجة تتغير

ومن الأمانة أن تقول الحلو والحوش

رؤية يقول...

لسة واكلة بطيخ مالوش طعم
المهم
ايوة ياعمو
لازم ننمزج مكاتب البريد كلها علشان نبقى اخر مزاج
وفكرك فكرة النمزجة دى من اموال الدولة
تؤتؤ
تؤتؤ
تؤتؤ
دى خدمات هاتتدفع بعد كدا تمنها
ويمكن ادفع تمنها مقدما
وربنا يجعله عامر
وبعدين اعملك حوالة ب10 جنيه وادفع عليها مصاريف 5 جنيه فى البوستة المنمزجة
لا ياعمو
معلش مش داخلة معاكم الجمعية

وسلام بقى

*البت المشمشية *حلوة بس شقية * يقول...

اسماء واحلام فى وجدانى
ايه يا اسماء الار ده
اه ياستى
راجعه بقوة ع الراس الكبيرة
امال ايه
حمايا بقه

*البت المشمشية *حلوة بس شقية * يقول...

وبعدين يا حمايا انا هقولك حاجة
هين قرشك
ولا تهين نفسك
احنا مش عايزين نزع لالحكومة مننا
اللى هيا الحاجة يعنى
افهمها انتا بقه

حلم بيعافر يقول...

ربنا يكفيك شر الحوجة للحكومة يا خويا
ههههههههههههههههههه
ياراجل حد يروح للحكومة برجليه؟
اعوذ بالله من الناس دى
الموظف لو فى ايديه مصلحتك اللى ممكن يخلصهالك فى دقيقة هيقولك بكره

أحــوال الهـوي يقول...

ياه من زمان ما اتنمذجتش ولا اتمزجتش من حاجه زي اللي بتكتبها
نحي الشرطه اللي في خدمة الشعب و خصوصا قسم الجوازات و يجعل جواز السعد و يرزقك الذريه الصلحه و بنبارك للحاجه الحج مقدما و زي ما طفت و سعيت علي مكاتب الانموذجي ربنا يشكر سعيك و يكتب لك اجرها ياعم صلاح ياجميل

تحياتي

كلمات من نور يقول...

أنا عندي علاج للحالة دي

انت بس قول للحاجة يا حاجة وانفلونزا الخنازير؟؟؟؟ يا حاجة السعودية سايبه المعتمرين والحجيج من كل لون وشكل وصنف

هي حتسمع كده حترقع بالحياني لا انا حجيت وكنت عارفه وواعيه لكل داه

قولها تمام ايه رأيك بقى بما إننا حجاج وكنا حندفع مبالغ في الحج نتبرع للعرايس والعرسان الأيتام ولو بحاجه يسيرة تساعدهم في جوازاتهم؟؟؟

اسماء واحلام فى وجدانى يقول...

ايه الدماغ العالية اوى دى جوازات وبطيخ وجمعية والحاجة ام اسامة وشبين الكوم انا فصلت منك كتير اوى وكنت بافوق لامة حد ينادى الاسم
اولا انا معاك فى الجمعية بس موضوع انى اقبض الاخير ده صعب اوى وحتى موضوع انى اقبض التانى ده بقى اصعب لان اللؤلؤة رسم على الاول وقال انه ناوى يهرب
فانا عايز ضامن ومعاه ورقة وعليها ختم وامضاء من اتنين موظفين ويكونا على الدرجة التانية
اما بالنسبة للبطيخ فانا مش باحبه خالص ولا باحب اكله بس ممكن تدينى اللب احمره واقشره واكله للعصافير
اصل انا عند كذا عشة عصافير
طبعا انت فاهمنى
بينى وبينك

ستيته حسب الله الحمش يقول...

انا داخلة الجمعية بس اقبض التانية لو سمحت علشان احج بعد الحاجة ام اسامة على طول

احنا عايشين ليه؟
ممكن تجاوبني

علشان المكاتب تتنمزج
وعلشان عميد كليتنا يعمل لوحة اعلانات الكترونية كبييييييييييييييرة واحنا مش لاقين فلوس بحث علمي وبنصرف عليه من جيوبنا
وعلشان المقاولين ياكلوا
ونرصف الشوارع المرصوفة ونسيب اللي عمرها ما اترصفت
ونمزج اللي مش متنمزج
ونمزج اللي نفسه يتمزج

وسلام شحط محط لمكتب جوازات شبين الكوم واهل شبين الكوم وسمعني سلام عظيمة يا مصر يا ارض قويسنا

enjy يقول...

آل نمذجة أل

لالالا يا عمو صلاح خللى الواحد ساكت بقى بلاش كلام فارغغغغغغغغ


واحشنى كتير

ممكن نعمل رحلة للجوازات عندكوا؟؟؟

ماما أمولة يقول...

بسم الله ماشاء الله ربنا يتقبل منها اللهم امين

ويتقبل منك ما هو انت لك نصيب من اللي بتعمله مافيش حاجة بتروح هدر

ولا ايه يا فشكوووول باشا يا متمنزج

marmar يقول...

عمي فيشو الطيب
ازي حضرتك وحشتني جدا ولله ووحشني كلام حضرتك وتعليقاتك وقلبك الطيب الجميل ده
الحمدلله الموضوع خلص على خير والحاجه هتحج السنه دي ربنا يتقبل منها ياااااارب ويتقبل من حضرتك على اعمالك الطيبه دي يا عمي
بس خليها تدعيلي كده من قلبها الطيب
وسلام كبير لعم النمزجه كلها في محافظه شبين واولهم عمي فيشو الطيب

hager za3bal يقول...

انت اللي عملت في نفسك كده
هو في موظف بيشتغل دلوقتي؟؟؟؟؟؟؟

:))))

من أجل التمكين يقول...

احنا الافعال دي بتأكد الحقيقة اللي احنا مصرين منصدقهاش :

اننا دولة غنية جدا جدا

و عاوز أسألك سؤال :

هو ايه حكاية البطيخ معاك يا استاذ فشكول ؟؟؟؟

أصل التدوينة اللي فاتت برضه كان فيها بطيخ

ايه الحكاية ؟؟؟

-

الكحيان يقول...

خلي بالك ياعم فشكول حالات التسمم بسبب البطيخ بدأت في العودة مرة أخرى أنا خايف عليك قوي من أنفلونزا البطيخ يبقى البس الكمامة وانت بتاكل واحترس من البطيخ الأقرع والبطيخ اللي لونه مخطوف وربنا معاك .

محمد فوزي يقول...

بجد أنا سعيد جداً من الجزء الخاص بإدارة الجوازات , شيء جميل والله حضرتك إنك زي ما إنتقدت قدرت تشوف الصوره الحلوه حلوه , على فكره دي نعمه كتير بقوا بيفتقدوها دلوأت

إنما حكاية النمزجه دي في البدايه ضحكتني بجد قولت ليه يعني ؟ عشان الناس متتوهش في المكاتب مثلاً ولا إيه ؟
بس بعد كده فكرت في سؤال هل البوسته إتخصخصت ؟
متهيألي الإجابه على السؤال ده ممكن تفرق

كل التحيه استاذ فشكول

kochia يقول...

والله ضحكتني
بس انا فاكرة انهم خلصوا قصة النمزجة دي من زمان
هم لسة شغالين فيها ؟؟
ربنا يهون
وتروح الحاجة وتيجي بالسلامة ان شاء الله
واحجز لي تاني دور في الجمعية بتاعة ال 4000 نفر دي
سلام

أحمد عمر يقول...

السلام عليكم و رحمة الله


اعتقد بدايه الموضوع عاديه يعنى اعتدنا عليها لكن الخاتمه جداا (مفجعه) ال عندنا حاجه بتخلص بسرعه <.>^^<.>

و بالمناسبه دى انا هعزم نفسى عندكم كام يوم كده علشان الحق الحاجه ام اسامه واوصيها تدعيلى ربنا يفرجها عينا :)

MaNoOoSh يقول...

والله كويس انك بتحكيلنا عن حاجة كويسة فى المصالح الحكومية


ربنا يوفق الحجة ان شاء الله ويتقبل منها
ويوعدنا احنا كمان برؤية بيته الحرام

احلام جوليا يقول...

مليون مبروك للحجة ام اسامة على الحج وعقبالنا جميعا يارب
وتعرف يا استاذ فشكول فكرتني بالسنة الي فاتت لما غلطت غلطةعمري وقررت اروح اجدد جواز سفري وبعد ما رحت المكتب المعتاد بمحطة الرمل لقيته اتنقل المنتزة علشان التنسيق زي ما قال الموظف ولما رحت المنتزة لقيته اتنقل برضه علشان التنظيم حسب المناطق لمنطقة اسمها العوايد وما ادراك يا سيدي ما هي العوايد ورحت وربنا لا يعيدها ايام الطوابير لحد السلم والزحمة لحد ما روحي طلعت ونظرا لقلة الاكسجين فالي حصل اني وقعت من طولي نتيجة الاختناق والزحام وكان معي زوجي والحمد لله وراح وجه لمدة ثلاث ايام لحد ما جددت الباسبور اما السهولة الي حضرتك لقيتها في مكتب شبين الكوم فكانت زمان قبل التنسيق والتنظيم في مكتب محطة الرمل بس يظهر كانوا مستكترين علينا السهولة دي فحبوا ينظموا الحكاية علشان يزحموا المكان واختاروا مكان رائع ومزدحم باكثر من معاملة حتى يفرحوا بينا وبتجمعنا وعجبي على التنسيق والتنظيم والنمزجة وياريت تبعت لي حتة بطيخة لحسن نفسي فيها

احلام جوليا يقول...

فالله يخليك يا حج فشكول داري على شمعتك ولا على مكتب جوازاتك لحسن يتحسد ومتقرش الله يخليك لحسن ينسقوا لك الجوازات ولا ينظموها تندم زي ندم عمرك

gogo!sf يقول...

صباحو جميل وزى الورد يا فشكول


طبعا احنا اغنى دولى وافقر شعب
بسبب اللى فيها مش احنا السبب
حسبى الله ونعم الوكيل

وبعدين انت ممكن تخلى الحاجه تأجل الحج السنه دى بس عشان الانفلونزة اللى ظهرت دى وربنا يستر

وربنا يديها العمر والصحه ان شاء الله السنه اللى جايه تروح تحج

فكرو بجد فى الموضوع ده

هو اه كله على ربنا واللى ليه نصيب فى حاجه هيشوفها بس بلاش احنا اللى نسعى

او ممكن بقى لو هى مصرة تحط كمامه من اول ما تخرج من البيت وربنا يستر

تروح وترجع بألف سلامه ان شاء الله

بس والنبى خليها تدعى لى من قلبها
جوجو ده اسمى الدلع هبقى اقولكم على اسمى الحقيقى عشان دعوتها تستجيب وتكون موجهه ليا انا

يارب يا طنط يقبل منك وتستمتعى بالحج وترجعى بألف سلامه يارب

جوجو

فارس عبدالفتاح يقول...

حضرتك وصلتلك المعلومة مغلوطة \\


هما مش عمليين ولغوا الروتين وتعذيب المواطنين

لكن الموضوع انهم بيسهلوا الاجراءات لكل من ينوي ان يخرج من مصر ويريحهم

وهذه تعليمات عليا يا استاذنا فشكول خانك تحليلك في هذا الامر ولو عايز تعرف كلامي صح خش وزارة الخارجية وحاول ان تخلص معاملة تتعلق بانك راجع مصر او تطلب اي خدمات من الدولة المصرية عبر مؤسساتها او اجهزتها جمعاء

سواء من الخارجية او من اي سفارة او قنصلية خارج مصر

مع الاشارة والعلم انك بتتعامل مع اعلى جهاز في الدولة .. الخارجية هتلقى اقذر معاملة واحقر بني ادمين

د/خالد يقول...

أكبر دليل على اننا دولة غنية
ان بقالنا كتييير اوي بنتسرق
ولسه الحمد لله لاقيين ناكل ونشرب

والدليل ...البطيخة

اسماء واحلام فى وجدانى يقول...

الكل عارف انى مساعدك الامين يعنى سيتك لو هربت هتلاقى الكل فوق دماغى قولى بقى اعمل ايه ساعتها اغنى ظلموه
يعنى انا ابنك حبيبك والنائب بتاعك وستر وغطا عليك تدينى البمبة دى وتخلع لا يا عم رجلى على رجلك انت ممكن تاخدنى معاك ومع الحاجة للعمرة او الحج وتكون محضر لى من هناك جملين واحد اركبه واشرخ فى الصحرا والتانى تحطلى عليه اد خمسين كليو موز طبعا لانك عارف ان القرود ولاد اللذينا ملين الجبال هناك وانا مش ادهم كل متر هلاقى كمين وطبعا مش هاوصيك على المية الساقعة والايس كريم والكفيار والمايونيز وكام كليو جمبرى لازم المشوار وطبعا الاهم من كل ده دفتر الشيكات والمحمول علشان لو توهت
كده كفاية ولو افتكرت حاجة تانية اكيد اكيد هارجع اقولك عليه
انا ليا مين غيرك
وهاعيش لمين غيرك
ابنك احمد

!!! عارفة ... مش عارف ليه يقول...

اهو موضوع النمزجة ده عمل زي اللي هدم واجهة محطة السكة الحديد في رمسيس وبعد ما خلص تكسير بهمة ونشاط

طلع باشا تاني وقال أيه ده من اللي عمل كده ده تخريب إزاي يعملوا كده في مبنى أثري في تاني دولة دخلت فيها القطرات بعد انجلترا

وقف يا جدع وكما كنت

وبالنسبة للجوزات اللي حصل ده بيقول أنه ممكن نبقى حاجة كويسة

اللهم أمين

-----------

وحج مبرور وذنب مغفور إن شاء الله :)


وليد

وردة يقول...

استاذي الفاضل
اكيد الخبر موصلش حضرتك
هما بيعملو كده علشان عرفو ان حضرتك ناوي تشرف مكاتب البريد ديه
واقل واجب يعني ان حضرتك تدخل مكتب محترم مش اي كلام
امال ايه
احنا عندنا كام فشكووول في البلد
بس بصراحة النظام ده اتعمل عندنا في اسكندرية والمكاتب بقت اخر دلع والله
حاجة تشرف بجد
اما عن الجميعة ياريت كنت حضرتك قولت بدري شوية انا اساسا عملت واحدة من فترة وقبضت كمان انا ممكن اسلفك
مفيش مشكلة طبعا بس حضرتك تقبل وانول الشرف
ومن غير ضامن كمان
بس هو طلب واحد
عاوزين الحاجة تدعيلنا دعوتين حلوين كده
وتروح وترجع بألف سلامة
سلام

ghorBty يقول...

استاذ فشكول

ما شاء الله والله اكيد التساهيل ديه ببركة دعاء الحاجه ام اسامه ونيتها الصادقه للحج ربنا سهلها من غير عقد ولا روتين ممل .. ربنا ييسر لها الاحوال يارب وتروح وترجع بالسلامه ..

فعلا والله بلدنا فيه خير كتير بس النمزجه برضوه شئ كويس اننا نشوف للمكاتب شكل جميل ومريح وبدل ما يتنهب الفلوس كلها تتنهب نصفها وتستمع احنا ونمتع عيننا بالنظافه والسيراميك الجديد شويه :)

صبرني يارب يقول...

يا استاذنا ربنا يكفيك شر الافتكاسات

حسبنا الله ونعم الوكيل

كل واحد عبيط ضارب حشيش امبارح يقعد على كرسي ويانتخ كده ويقول هانعمل وهانسوي وهانبهدل الدنيا

والله يقرفهم ولاة امر

هانعمل ايييييييييييييييييييه قولوووووووولي نعمل فيهم ايه ؟؟؟؟؟؟

مصعب صلاح يقول...

السلام عليكم

الف مبروك

للحاجة ويارب كل سنة

ههههههههههه

طبعا تلاقيك بتكرهني دلوقتي

بس انا هافول كلمة واحدة

" هي دي مصر يا عبلة "

تقبل مروري

احمد بدر الدين يقول...

ازيك يا فشكوول يا استاذ يا كبير اوى
والله ليك وحشة يا استاذى
خلى الحاة تحج يا حاج
عن ما عن حد حوش
احنا فعلا دولة غنية
بس فى خمسة ستة سبعة ... عشرين
واكلينها
انا رجعت تانى

أحــوال الهـوي يقول...

فشكووول

في الحفظ و الصون و العفاف تعليقاتك محفورة علي مسلات الفراعنه

و علي جدران المعابد وفي محاضر البوليس

تحياتي

المهاجر يقول...

يا عمنا زى مكل واحد له برستيج الدولة ليها هى كمان برستج

ومبروك الحج للحاجه

حج مبرور وزنب مغفور

تقبل تحياتى ومرورى

جارة القمر يقول...

أوووووووووووووووووووووف

من الاجراءات الخانقة والمملة
الواحد بدون روتيني مايعرفش يعيش
انا مش عارفة هو تعجيز ولا مجرد استبداد

مني منك ياوالدي بديلو قشر البطيخة بوجهه

بجد حاجة فظيعة الله يصبركم عليهمانا مش متخيلة ليه يعني كل هالاجراءات المملة هي شطارة يعني ولا فرد عضلات ورقية خخخخخخخخخ
الموضوع حلو وبيستفز الواحد
يسلمو والدنا

مودتي

طـــائر الليــــل الحـــــزين يقول...

نفسى البلد دى يتصلح حالها بقى
بس اهوه فى امل
زى ما فى موظفين تحرق الدم
فى ناس فيهم كويسين جداااااااااا
تحياااااااات يا عم المدونيين
بس يارييت معاك لية حتة بطيخ

ادم المصرى يقول...

ياه يا استاذ فشكول

بجد كل مفكر فى كنوز مصر اتعجب لما فيها من خير من عند الله

وبجد حسنى مبارك هوا خلاص عمتا هوا شبع الحمد لله

مثلا يا اخى الخط الثالث لمترو الانفاق الى هوا من امبابه لمدينه نصر تخيلى دا جدا ممكن يكلف كام

وفيه كوبرى مشاه باين كدا فى صفت البن وفى واحد تانى فى كوبرى الخشب لحد كوبرى ثروت

تعرفى يباشا العمود الواحد لكوبرى مشاه بيكلف كام انا سقلت صديق ليا مهندس كبارى ومساحه قالى العود بيكلفنا مليون جنيه

العمود الواحد

تخيل كوبرى كامل يقف بكام على الدوله

مثلا شيئ تانى مشروع تشكه الى اباع كلو لمستسمرين خليجين تخيل ده مدخل كام لدوله لحد الان يعادل رقم خيالى مش قادر انطقو

يعنى بمعنى اننا فى خير دايم

elsha3er يقول...

السلام عليكم

والله عندك حق يا عمى فشكول مش بلدنا كلها وحشة فى حاجات حلوة ولازم نعمل زيك ونوضحها لان الناس دلوقتى واخدة فكرة وحشة اوى عن البلد والله فى الوحش وفى الحلو

بارك الله فيك


تحياتى



احمد الشاعر

ahmed_k يقول...

ههههه بالهنا والشفا يا أستاذ فشكول
وحكاية النمزجه دي أنا أول مره بصراحه أسمع بيها فمكاتب البريد في الغردقه زي ما هي متغيرتش هي فعلا متطوره ونضيفه بس متمنزجتش ولا حاجه
وكذلك في المقطم بالقاهره لما رحت مكتبها قريبا كان زي ما بشوفه منذ 15سنه متغيرش ومتنيل ضيق وحالته بالبلى زي ما هو يمكن بيمنزجوهم حبه حبه جايز

أما بخصوص الجوازات فياااااه يا أستاذ فشكول أنت الظاهر من زمان أوي مطلعتش جواز سفر
ده من زمان أوي إستمارات الجواز من مكتب الجوازات وعلى فكره أنا بجدد جوازي كل 7 سنين وجواز والدي كمان مبستغرقش أكتر من ساعه وبدون طوابير وأي حاجه
فعلا في تطور ملحوظ في البلد ربنا يديمه
ويمتد ليشمل كل المجالات مش أماكن آه وأماكن تانيه غايه في السوء والروتين
كمجالس المدن مثلا وإدارات المرور و...إلخ

دمت بكل خير أستاذ فشكول

قلم رصاص يقول...

السلام عليكم

ازيك عمي الغالي واستاذي الجليل فشكول باشا

والله واحشني بوستاتك بس خلاص الحمدلله انا خلصت الامتحانات بتاعة الدبلوم وهتلاقيني بجيلك هنا كتير

المهم ادعيلنا بالنجاح كده يمكن ربنا يتقبلها منك


وبخصوص البوست

اوعى تزعل الحاجة واعملها كل اللي نفسها فيه انت عندك اغلى منها يعني

وسيبك من دول وطلع الجرشينات من تحت البلاطة بقى وجه وقتهم ههههههههههههههههههههههههههه

اما بخصوص المستوظفين الجمال بتوعنا
فااحب اطمنك انك بتدن في مالطة صحيح

بس فيه تغيير بسيط جدا لصالح المواطن اللي حضرتك

بدل ما الموظف كان بيقولك زمان فوت علينا بكره ياسيد

هيقولك _على رأي مسدس صغير صاحبي الغالي_ فوت علينا بكره يا أستاذ سيد
هههههههههههههههه

في حفظ الله

م/ الحسيني لزومي يقول...

حبيبي فشكول يقول المثل الشعبي:- فوت علي عدوك مفنش ولا تفوتش علي عدوك مكرش.

قيس بن الملووووح يقول...

اخي وحبيب قلبي فشكول اقولك كلمه في ودنك انت ما صدقت ان ام اسامة قالتلك عايز احج والظاهر انك سمعتها عايز اهج وما صدقت...ده كلام في سرك

حنان الشافعي يقول...

ازيك يا استاذي العظيم الكريم

طبعا الحاجه تحج ان شاالله مليون مره
والنمزجه دي اخت البهرجه والفشخره الكدابه ياكلوا الشعب بعدين يبقوا ينمزجوا

وتحيه كمان لادارة الجوازات

yoyo يقول...

صباحك سكر يا حتة السكر

وحشتنى جدا جدا جدا
يارب تكون بالف خير يارب

yoyo يقول...

طبعها الحاجة تحج و ان شاء الله حج مقبول و ذنب مغفور يارب
ربنا يارب يتقبل منها و يجازى حضرتك خير على تعبك دا بس يعنى لو مش هتتعب شوية للحاجة هتتعب لمين يعنى

yoyo يقول...

عجبنى اوى اشادة حضرتك بالجوازت عشان زى مافى الحلو فى الوحش ومش لازم بس نتقد الوحش بس و مش نذكر الحلو

سيدى يا سيدى على النمزجة دى
هههههههه

yoyo يقول...

مش فى حتة بطيخ ليا كدا على الماشى
ههههههه
انا مش بحتل مدونات ولا حاجة
سلام حضرتك عند احمد وصل
انا بس بعمل احتلال على ادى كدا
دا انا غلبااااااااانة
ههههههههههههه

دمت لنا بالف خير و صحة
تحياتى
يويو

أم مالك يقول...

دايما كده اجى متاخرة معلش
بالنسبة للحاجة ام اسامة ربنا يكتبها لها مين يشبع من هناك ومن تكرار هذه الرحلة مرات ومرات ربنا يتقبل ويرزقنا الذهاب اللهم امين
بالنسبة لجوازات شبين الكوم اجمل تحية واحسن سلام على الناس الكويسة
بالنسبة للنمزجة ده عادى كنت تعالا
شوف محافظ اسكندرية من سنتين كان جايب
عاليها وطيها بشكل مستفز ولانملك
قدام اللى بيحصل ده غير نقول
آأأأأأأأأأأأأأأأأأأه يابلد
تحياتى

EMMY BABY يقول...

عموووووووووو فشكول

وحشتنى فشكلاتك

بجد والله ما لاقيين حاجة يعملوها فعلا فلوسنا كتير بس مع ناس متستحقش

ربنا يخليلك الحاجة ويخليلك اسامة

وحج مبروور وذنب مغفور ان شاء الله

تحياتى

ايمى

من أجل التمكين يقول...

استاذ فشكول

ياريت حضرتك تراجع مدونة كلمة حق تاني بعد تعليقك


و تشوف الرابط دة بخصوص نفس الموضوع

http://www.youtube.com/watch?v=IqiH2l-hnJs

-

نور الدين صلاح يقول...

تمام الله ينور عليك

عجبتني كلمة حضرتك أوي لما قلت إن البلد فيها فلوس كتير بس مش لولادها للأسف

قنعرة وفشخره ومناظر

بوست جميل أوي وربنا يصلح الحال

بالتوفيق :)

هانى سعيد يقول...

انا معاك ان فى تقدم كبير بيحصل فى البلد لكن للاسف الحاجات الغلط الكتير بتغطى على اى حاجة تانية
اكيد انت فاهمنى
سلام
نسيت اقولك انا عايز ادخل معاك فى الجمعية بس اقبضها الاول وتكون بربع جنيه فى الاسبوع ايه رايك؟ وكل 999 شهر واحد يقبضها ايه رايك

nona يقول...

السلام عليكم
ازي حضرتك

انا بردو لاحظت ان حكاية استخراج جواز سفر دى سهلة اوى من سنة تقريبا ماما كانت رايحة تعمل عمره وراحت تعمل جواز سفر الموضوع مخدش منها كام ساعة

كان فى طوابير بس مش مزعجة خالص

الدنيا بتتقدم

و يارب حج مبرور لحضرتك وللحاجة

تحياتى

ن يقول...

السلام عليكم
استاذى الغالى .. فشكول
اييييييه فين ايام زمان لما كان طابور استخراج جواز سفر أسخم وأذل من طوابير العيش دلوقتى .
ههههههه.. انا لسة بضحك من قلبى يا جماعةمع انى راح منى ولاعة .
تعرف ليه لأنى مريت بتجربة تموت من الضحك لما جيت من خارج مصر بعد ما كبرت والمفروض انى اعمل بطاقة واعمل جواز سفر لوحدى ولقيت أدراج الموظفين مفتوحة تقذف فيها الرشاوى لتخليص الاجراءات واللى ميدفعش يتهان ويقف فى الشمس لحد مخه ما يتبخر ,,
وقتها قربت من والدى وقلت له .. ايه ده يا بابا .. قاللى .. دى مصر يا هبلة
ساعتها انتبذت مكانا قصيا قلت فى نفسى دى مش ممكن تكون مصر دول ناس أساءوا لمصر وكرهت جواز السفر لأنه أجاز سفرى ومن هنا بدأ ارتباطى بمصر رغم رحلاتى الكثيرة وتنقلى الى ان حلم العودة الى مصر كان من أعظم أحلامى وأجملها على الاطلاق وكان هذا لفلسفة أعمق بكثير مما يدور حولنا وكنت اتعجب من نفسى لماذا كلما نطقت اسم مصر كان قلبى يرتجف ودموعى تخرج سريعا يوجد سر فى نطق هذا الاسم لم أدركه الا بعد عودتى
وصدقنى لو قلت لك بأننى عانيت بعد عودتى مثل ما يعانيه اى مواطن مصرى محبط اقتصاديا مستاء اجتماعيا وقتها تخيرت ما بين الهجرةوالاقامة فى الخارج فعلقت جواز السفر على الحائط وعملت لنفسى مصلحة خاصة بى اسمها لا يجوز أن اترك مصر ..
أرجو ان تبلغ سيدة بيتك الفاضلة أن تدعوا لنا عند ذهابها للحج تقبل الله منها ان شاء الله .
مع خالص تحياتى

جارة القمر يقول...

أردت فقط ان اكون هنا

جارة القمر

أحــوال الهـوي يقول...

فشكووول

يا عمنا مش هتفرق ان كان حقيقي و بجد و ماهوش تمثيل المهم حركت احساسك و غيرتك
و حب تاني يا جدو و جدد حبك مع تيتا

و احفادك و نحن اللاحقون

اللي انا متاكد منه قلبك الرهيف اللي بيحب علي روحه و بيتمني الكل يبقي زيه

تحياتي

غير معرف يقول...

حبيب قلبى
انت الكل فى الكل
معقول انا اعمل كده
بس الكلام ده ان شاء الله مؤقت

”*°•.˜”*°•..سونه..•°*”˜.•°*”˜ يقول...

السلام عليكم
الف مبروك ممقدمن
وربنا يتقبل صالح الاعمال يارب
معلش الغياب انا مشغوله فى الامتحانات والمذاكره
قول للحاجه ام اسامه ادعى لسونه بنجاح
تحياتى ليك وربنا يكتب الحج لكل مسلم يارب .
سلام سونه

محمد الجرايحى يقول...

أخى الفاضل الكريم: فشكووول
السلام عليكم ورحمة الله وبركاته
كيف حالك ؟
أدعو الله تعالى أن تكون بخير
أخوك
محمد

اوراق قديمة يقول...

استاذى الكبير فشكول
اسفة ع التاخير
كل شيء كان ماشى عااادى لغاية لما قلت ان الجوازات خلصت الورق بسرعة
انا مذهولة
يمكن عشان حضرتك فشكول باشا
اكيد
انا لو حبيت اسافر على طول حاقول انا عارفة فشكول باشا
الاقى اوراقى خلصت
سلامى للحاجة ام اسامة ودعواتها
وربنا يجيبها بالسلامة
وطبعا ياريت ماتنساش تخليها تلبس الكمامة
ام محمد

اسماء واحلام فى وجدانى يقول...

فشكولى حبيبى

ممكن تقولى ازاى هنخلع احنا الاتنين بالجمعية يعنى ينفع ....... على الناس دى ونطلع على السعودية نعمل عمرة بفلوس ملوثة انا الحمد لله ضامنك برقبتى وضامن كمان الخطة الجهنمية اللى انت رسمتها بس فى حاجة واحدة انا مش ضامنها وهى يا حبيبى الجملين ،،،افرض الجملين دول طلعوا اصحاب مزاج اكيد اكيد انا وانتى هنروح ورا الشمس يبقى من الافضل اننا نشترى الجملين دول من مصر على الاقل هنكون ولاد منطقة واحدة ومش هنهون عليهم ولا انت رايك ايه
وخد بالك ان اللؤلؤة مراقب كل تحركاتنا ادينى نبهتك
اما بالنسبة للمدونة فهى دلوقتى فى انتظار تشريفك لها بالخطة الجديدة
ابنك احمد

ضحكات الحياة يقول...

السلام عليكم

ايييييييييييه دنيا يا باشا

النمزجة علشان المسئول يتمزج و مزاجه يبقى ممزوج بالنمزجة

و سمعنى احلى تحية للنمزجة الكدابة

موضوع جميل و حلو و تقبل تحياتى

جحا المصرى يقول...

حضرتك عارف إنى بلدنا بلد الطوابير
ربنا يعينك
أتمنى التواصل

على عبدالله يقول...

السلام عليكم

كيف حال استاذ فشكول ؟

انا والله ما اكرهش فى حياتى قد الزحمة والطوابير ..

بلدنا حلوة يا استاذ فشكول !
مليانة بالخيرات ... بس احنا مش واخدين بالنا ! اصلنا باصين للنص الفاضى
:)
:)

تحياتى

أنــا يقول...

اول مرة ازور المدونة السكر دي :)
حظي حلو اوي النهارده بجد ..
الحمد لله ..
بجد مدونة حضرتك لزيزة جدا .. واسلوبها شيق ودمة خفيف ..
اما بالنسبة للبوست ..فمسألة النمزجة دي شكلها لزيزة .. هي تنفيذها تم بطريقه غلط فعلا .. بس نتيجتها ممكن تكون كويسه ..

اما موضوع الجوزات .. فانا كمان بصراحة مصدقتش !!! معقول احنا في مصر وبيعملو كدا .؟؟
لالا .. مصر بتتقدم فعلا ..
الف مبروك ع الجواز ويارب ربنا يهدي كل المصالح الحكومية في مصر ..
زي ما قلت لحضرتك دي اول زيارة .. بس اكيد مش الاخيره ان شاء الله ..
تقبل مروري ..
خالص تحياتي ..

جارة القمر يقول...

دوما ستبقى ملجا لاحزاني

وحتى ضحكاتي وصخب طفولتي

مودتي

doctor mohamad يقول...

أولا: العنوان ده حلو جدا _ اسمح لى هاستعيره لكل مشاكلنا اللطيفة الظريفة ال بتدك حياتنا "تنمزج ف المتنمزج لتصبح أنموذج" >إبتسامة أعرض من نهر النيل< بجد بسيط و معبر .._.. ثانيا: انت ذكرت ادارة جوازات شبين الكوم_طبعا منوفية_لكن _ ماذكرتش التعامل بالرقى و البساطة دى كان ف دولة إيه يا أستاذ فشكول؟!!!!!

ن يقول...

السلام عليكم
استاذى الفاضل فشكول
عفوا اقوم بتجربة يبدوا ان هناك مشكلة لدى فى تسجيل التعليقات
مع خالص تحياتى

نبراس العتمة يقول...

عزيزي فشكول

هذا البوست حقيقي تاريخي ويسجل
سأقرِه بتأني لما أعود

لكن الآن عجت عليك فقط من أجل آن آخذ رأيك في بوست مصيري بالنسبة لي تجده على مدونتي

مدونة الفوانيس في خطر

مودتي

اسماء واحلام فى وجدانى يقول...

فشكولى حبيبى

انا على اتم الاستعداد انى اكونلك مخدة قصاد اى خيارة كده ولا كده بس حضرتك تآمرنى ويا سلام بقى لو يجىء موسم الفراولة ولا موسم البرقوق والحاجات الحلوة دى ما انت لازم تغذينى كويس قبل موسم البصل والبنجر

yoyo يقول...

صباحك سكر

طيب انااقول ايه بس
بعد كلام حضرتك السكر دا
مش الناس اللى بتقولى عليا شريرة فين هما بقى يشوف كلام عمو فشكول السكر

موضوع انى بكون الحكومة ماشى مش هاختلف مش المفروض الحكومة بتخاف على شعبها وبتعمل مصلحته و تراعيه يبقى اكيد هيكون هو الشعب و الدنيا كلها

يارب يبارك ليا فى حضرتك وفى الحاجة يارب ومش يحرمنى من دعواتها الجميلة
وبعدين حضرتك فى عنيا

ياسلام يا سلام
ربع بطيخة مرة واحدة ليا انا
هيييييييييه

سلامى لماما الحاجة
دمت لنا بالف خير وصحة
تحياتى
يويو

yoyo يقول...

مممممم
يعنى ناوينى تاخدوا فلوس الجمعية وتخلعوا
خلى بالك بقى ياعمو احمد ( اسماء واحلام فى وجدانى )
ناوى على كدا مش بيقولك هاركب الجمل و الصحرا ومش عارف ايه
هههههههه
تخصص بقى يا بنى
ماشى يااحمد انت هتدبس عمو فشكووول وانا هادبسك فى المشروع الاستثمارى واهاقول الاتفاق معاك وانا بس اقبض وسلم ليا على الصحرا بقى
هههههههه
مش تخاف انا برده طيبة ومش هانسى العيش و الحلاوة ومش اى حلاوة لا دى كمان حلاوة بالفستق

شفت بقى الحنية ياعمو
اظن عملت اللى عليا اهوا

واحد من العمال يقول...

السلام عليكم

إحنا شعب إنموزج صحيح

وطبعاً بعد ما كل مكاتب البريد ما تبقى نموزجيه
حييجى واحد يقولك لازم كل مكتب يبقى متفرد ومميز ويعكس روح وتراث المنطقه
وعظمه الإنسان المستهدف بالخدمه
وييجى هادد كل الأنموزجات وهاتك يا تفرد
ونرجع نقول إحنا ليه محلك سر
ومجيلكش فى إنموزج

ودمت ياعمنا متفرداً ومش انموزج

ابو صهيب ( الجمعاوي الاصيل)سابقاً يقول...

يبقى انت اكيد اكيد في مصر

دمت بخير فشكول

assafo anaroze يقول...

فشكول حبيبي
اسف على التاخير و التقصير لكن قلبك كبير و حتسامحني
هو لنا بركة الا الست الحاجة اعمل اللي في جهدك عشان تحج مرة ثانية و تزور المقام و امانة تقول لها تدعيلي بالرغم انها متعرفنيش
مودتي

assafo anaroze يقول...

فشكول حبيبي
اسف على التاخير و التقصير لكن قلبك كبير و حتسامحني
هو لنا بركة الا الست الحاجة اعمل اللي في جهدك عشان تحج مرة ثانية و تزور المقام و امانة تقول لها تدعيلي بالرغم انها متعرفنيش
مودتي

جحا المصرى يقول...

أستاذنا العزيز فشكول
ليس من المعقول أن اتى الى العالم الجديد ولا اسلم على الأستاذ فشكول
أتمنى دوام التواصل
واعرف رأى حضرتك فى المدونة الجديدة

واحدة مجنونة يقول...

دولة فقيرة ايه بس
ده احنا بنتسرق من سبع تلاف سنة و لسه بننسرق
يبقى العيب في مين؟
بس حلوة حكاية الننمزجة
احنا عندنا غير كان في رصيف كل شهرين الاقيه متسفلت و اخر تمام و الشهر الي بعده مكسر
الا ملقوش حاجة يعملوها كسروا الرصيف و صلحوه
اول زيارة للفشكول
بس بصراحة مدونة روعة
تحياتي و اتقبل مروري

rovy يقول...

السلام عليكم استاذنا فشكول
اولا الف مبروك للحاجه و ربنا يتقبل ان شاء الله و تروح و ترجع بالف سلامه
اما عن النمزجه فحسبنا الله و نعم الوكيل فى كل من يتمنزج نمزجه و شعبنا يعانى الفلسنه ..
اما عن ادارة الجوازات فهى فعلا مشكوره لما اصبحت عليه و الحقيقه اننا برضه فى اسكندريه وجدت سهوله و تعاون كبير منهم فى الجوازات لما كنت بأجدد باسبورى حقيقى ربنا يكرمهم و يكثر من امثالهم و ياريت كل الادارات مثلهم
احنا يا استاذى لما بنحب نعمل حاجه بنقدر و ممكن نكون احسن و ارقى دوله بس لو عندنا استعداد نكون كده ..
ربنا يعينا ..

دمت بكل الخير فى حفظ الرحمن

خالص تقديرى و تحياتى

قوس قزح يقول...

ان شاء الله حج مبرور

هى مكاتب البريد دى لسه عايشة ؟؟
و بعدين يعملوها شكل واحد ازاى ؟؟ هم يعنى واخدين المكاتب كلها نفس مساحة الارض و نفس تقسمها و لا هيوسعوا الحيطان كمان و يضيقوها !!! 

اما بالنسبة للجوزات انا كمان حصل معايا نفس الموقف
و مش بس فى الجوزات .. فى المرور لما رخصة العربية ضاعت كل اللى عملته محضر فى القسم و فى خلال ساعة فى المرور طلعت لى بدل فاقد
يظهر فعلا الرقم القومى ده له لازمة و دخلنا عالم الديجيتال

تحياتى

فشكووول يقول...

لا اله الا انت سبحانك انى كنت من الظالمين

صدى الصمت - عاشقة الورد - يقول...

ايه يا أستاذ فشكول عنان البوست الصعب دة ؟
بس عموماً لما قرأت فهمت
وكويس والله إن الجوازات تطورت كدة
ربنا يرجع الحاجة بالسلامة
تحياتى

Soul.o0o.Whisper يقول...

السلام عليكم و رحمة الله و بركاته

عمو العزيز / فشكوووووووووول

أنا جيييييييييييييييت
طبعا متأخرة كالعادة
بس طبعا عشمى فيك كبير :)

المهم ، عارف حضرتك و انت بتحكى على ادارة الجوازات عندكم..
والله حسيت انك جاى من كوكب آخر

ياعينى مش مصدق ان فى اجراءات تمت بسرعة كدا
ههههههههههه

عارف يا عمو فشكول
فكرتنى بواحدة زميلتى بس هى فى سوهاج
استلمت التكليف خلاص (( عقبالى ياااااااااارب

تخيل استلموه فى سوهاج و المنصورة لسه
حكمتك يارب

المهم بتحكى عن المدير المشرف على التدريب بتاعهم هناك
ما شاء الله بيقولهم كل حاجةبالتفصيل و يسيبهم يجربوا و يقولهم لو وقعتوا فى مشكلة كذا تعملوا ايه و كدا

فبتقول راحت تشكره على تعبه معاهم
فقالها من كتم علما علمه الله اياه الجمه الله لجاما من النار

بجد لسه فى ناس كويسة
بس للاسف الزبد هودايما اللى طافى على الوش

المهم يا عمو ماتكونش زعلان منى و من تقصيرى
و تكون بخير دايما


دعواتك

حاجــ عيال ــات يقول...

يا ترى ليا لسة مكان هنا عند عمو فشكول الحكيم

فشكووول يقول...

يا جهاد .. انتى قافله المدونه بتاعتك ومش عارف ادخل عندك يا ريت تبعتى لى اللينك بتاعك

وفاء بركات يقول...

مساااااااااااء النمزجه
شوف يوجد هناك بصيص أمل أهو فيه نصف كوب ملأن ..... أخيرا أقر وإعترف أحمدك يارب
وبعدين خلي الناس تقلب رزقها حضرتك عارف الحياه صعبه الأرانب ناقصه ودن
حيجاب منين والعربيه عايزه تتغير حيعملو آيه والمدام والعيال عايزين
يصيفوا شوف ده في الريفيرا بكام متبقاش خنقه وتحبكها خليهم يعيشوا
وهي سبوبه يطلعو منها بقرشين قبل ميتزحلقو من علي الكراسي
مصر بقي ذنبها آيه في اللي بيحصول ده
آبه ياأبو خالو انت إكده دايما ع تفشكل الفشاكيل المفشكله خلجه ولا جمايلك توصبح علي خير وطبق هوبر وشجة بطيخ سقعانه ومكونش جرعه

سما أحمد يقول...

طريقة السرد جداااااا ممتعه وجميله بتخلي القاريء يكمل للاخر بدون ملل
لك تحية تليق بروعة شخصك
المقال بينتقد وبنفس الوقت كان محايد ومنصف
يعني شكرت التصرف الايجابي وانتقدت السلبي وهذا هو التميز
وان شاء الله تنتهي -- النمزجه -- على خير
وطبعا اقتراحك هو الصح مفروض مكتب مكتب مش كلهم مع بعض
وتقبل الله طاعاتكم
وحجاً مبروراً وسعياً مشكوراً ان شاء الله

قيس بن الملووووح يقول...

صديقي اللدود/ فشكول
وحشني جدا وايه اخبار الامتحنات عندك ...اصعب شئ علي الرجل ان يري انه اصبح ممول وفقط لنزوات الزوجة والابناء لا لاحتياجاتهم الضرورية والطامة الكبري حين يدرك ان دوره ينتهي بوضع البذرة ...قد تكون العلاقة بين الرجل والمرأة ورقة رسمية كما يقولون ولكن الأعجب ان المرأة تجعل علاقة الدم بين الاب والأولاد ورقة مالية.
ارجو ان تدلي بدلوك في هذا الامر علي مدونتك وطبعا انا هاكون مقدر انك لا تكتب باسم مستعار مثلي
تحياتي

maxbeta3zaman يقول...

أخى الفشكول
والله مامنعنى الا الشديد القوى ...فقد جاء الحفيد ومعه نقص خلقى أخذنا جميعا فى دوامة البحث عن حل وفحوصات ومراكز طبية ومشورات لأطباء فى الخارج ...وعلى عاتقى وحدى تهدئة وبث الأمل فى نفوس العائلة بالكامل سيما الوالدين فهو طفلهما الأول والأمر جد صعب عليهما ...هذا هو سبب الاحتجاب ونرجوكم الدعاء لآدم الطفل الوليد ووالديه ...وشكرا لك أخى على السؤال وقاكم الله كل ضر

ريمان يقول...

ازى حضرتك يا استاذنا




يا رب تكون بخير


والله مع حضرتك حق

فعلا الفلوس ضايعه ع الفشخره وضايعه ع الفاضى

سبحان الله


هيفضل كده حال البلد دى كده نايم


حلوه اوى انها عايزه تحج وانت عايز تهج


ههههههههههههههههههههه


خدنى بقه اهج مع حضرتك

تحياتى ليك

ن يقول...

السلام عليكم
استاذى الغالى .. فشكول
آنا متغاظة جدا من يومين كتبت لحضرتك تعليق طويل عن بعض ما خرجت به من شريط القادمين ولما جيت انشر التعليق عندك تعذر الامر جدا ورفض النشر وبعدين اكتشفت ان التعليق كان اكبر من مساحة النشر .. اوم ايه جيت اعدل التعليق وانشره على مرتين آم النور قطع وراح التعليق كله .. ومعرفش ليه افتكرت ساعتها اغنية فيروز .. ضاع شادى .
بس ربنا عوضنى بتعليق الدكتورة سول وتعليقات الاخ فارس عبد الفتاح .
يا ترى اخبار حضرتك ايه.
مع خالص تحياتى

micheal يقول...

هههههههههههههههههههههههههههه...يا عم كانوا يعملوا بالمرة هايكستب في شبين الكوم كنت أروحه بدل ما اللي هنا قاللولي اسمك مايكل محمد وقعدت أسبوعين عشان أثبت العكس ولما حصل قالولي رقمك مشترك مع مواطن مصري تاني
:)
وبعدين مين اللي قال مصر دولة فقيرة..يا عم احنا الشعب كله من كبيره لصغيره شايل موبايل بقامرا ومركبين دوش
:))
حنفتري يعني
واحشني يا عم فشكول
تحياتي

الكحيان يقول...

أين جديدك أيها الفيلسوف اللذيذ غبت طويلا ونحن نتحرق شوقا إلى فشكلاتك فهى بمثابة الشمة للمدمن والبنزين للسيارة لعل المانع خير .

جنّي يقول...

السلام عليكم

ازيك يا عمنا انت اللي واحشنا والله .. بس انا لي عذري فقد انقطعت عن التدوين لمدة شهر للمرض ولظروف اخرى وانت ولا بتسأل ..

وان شاء الله ربنا يكتب لكم وللحاجة ام اسامة الحج مرات عديدة ..

انا عملت الجواز الجديد المميكن في الصيف الماضي ابو 110 جنيه ومكتب الجوازات مبني على احدث طراز ومكيف الهواء .. ومن شنبو وافتله.. وبدون تعقيدات والبطاقة الجديدة عليها كل بياناتنا ..

شوف يا سيدي انا في جدة سكنت في عدة احياء ما بين الرويس ( ش السيد )والبغدادية الغربية( ش حائل وش المدارس بجوار آخر ساعة لو فاكره ) ومداين الفهد وبني مالك بالقرب من ش فلسطين ..

وانت بقى فين في شبين الكوم والدي كان يعمل هناك وكان لنا شقة في البر الشرقي على البحر بالقرب من جلهوم بتاع الجبنة .. تعرفه ؟ بس تركنا شبين من زمان وكان لي اصدقاء اتخرجوا من المساعي منهم طبيب الآن بس الدنيا تلاهي .. وكنا نذهب سويا لصيد اليمام والعصافير من كفر المصيلحة ببندقيتي الرش .. فكرتني بشبين وذكرياتها الجميلة ..

سلام

نبراس العتمة يقول...

العزيز فشكول

دهاليز الادارات في الاوطان العربية كلها بنفس المقاييس..

من شدة قرفي أصبحت لدي فوبيا منها

الله يعينك على النمزجة

الواحد يأخذ رصاصة في مخه أو في مخ المشرفين على هذه الزبالات أفضل.

مودتي

سمسم يقول...

السلام عليكم
اسمع يا عمو انا كل الي
يهمني البطيخ
انا بحبو اوي
خليلي حته وانا ادخل معاكو الجمعية
بس طبعا لازم اسافر وياكو
ولا هي نهيبة وبس

Haytham Alsayes يقول...

السلام عليكم
شكرا علي زيارتك لي في مدونتى المتواضعة جدا وان شاء الله عاكبر الخط بعد كدة في الموضوع الجاي
يهمني زيارتك دايما ومعرفة رايك
تشرفني زيارة مدونتك والموضوع هام جدا
تحياتي
هيثم

صدفة جميلة يقول...

السلام عليكم
يارب تحج وهادعلها بشرط
تدعيلى هناك ممكن
متشكر لزيارتك

غير معرف يقول...

I tend not to comment, however after reading a few of the remarks on this page "تنمزج فى المتنمزج ... تصبح انموزج".

I actually do have a couple of questions for you if
it's okay. Is it just me or does it seem like a few of the comments appear like they are coming from brain dead folks? :-P And, if you are posting on additional sites, I'd like to follow you.
Would you list of the complete urls of your social
sites like your Facebook page, twitter feed, or linkedin profile?


My page - shearers ()

غير معرف يقول...

I'm really impressed with your writing skills as well as with the layout on your weblog. Is this a paid theme or did you customize it yourself? Anyway keep up the excellent quality writing, it's rare
to see a nice blog like this one nowadays.

My weblog ... get targeted twitter followers