الخميس، ٢٦ فبراير ٢٠٠٩

فشكله مع فركشاوى .. قال ناوى قال ...

تحديث اول
بيان عسكرى رقم (صفر)
حيث اننى قاعد وباتلكك عشان اى حد يتدخل يفض الاشتباك وما حدش راضى يتدخل وكلهم بيهدوا النفوس وخلاص ولانى اعددت العده مسبقا لآخد ديلى فى اسنانى والجرى باقصى سرعه وحفاظا على ماء الوجه فقد اصدرت للقياده العليا لقوات المدونين البيان التالى
حيث حققت قواتنا الاهداف التى خطط لها على المستوى التعبوى والتكتيكى فقد وافقت قواتنا على وقف اطلاق النار من جانب واحد وعلى المجتمع التدوينى التدخل لمنع الطرف الاخر من اطلاق النار
ياترى مين فينا توم ومين فينا جيرى




العزيز فركشاوى كتب تدوينه يفشكل فيها فشكول وانا قاعد فى امان الله وقلت اما اروح ازور فركش لقيته مفشكلنى

اخر فكشله وقمت انا كمان واستوردت كل اسلحة الدمار الشامل والكيماوى ولبست لبس الميدان وافتكرت

نفسى ايام حرب اكتوبر وقعدت اخطط وادبر واستعنت بقوات الصاعقه والقوات البريه والجويه

وقوات الطوارئ الدوليه وقمت لبست قناع الكيماوى ورحت على طول ارد عليه وقلت له

فى شجاعه واسبهلال وكمان عشان اخوانا المدونين نتعارف مع بعض و يعرفوا

فشكول اللى ما يسواش تعريفه مخروم عشان احنا اللى خرمنا التعريفه

برضه وليعلم الجميع انى اخذت ديلى فى سنانى استعدادا للجرى

باقصى سرعه اذا ما احتدم الصراع وانى

مش قد المعارك ولا الحروب


السلام عليكم ورحمة الله .. العزيز فركشاوى ناوى .. تحياتى تعالى انت تفركش .. وانا افشكل لحد ما حنخربها ونقعد على تلها..

اولا يا عزيزى فركش .. اشكرك جدا وكلى امتنان لك لاعطائى هذه المساحة التى انا دونها....واليك شخصيتى الحقيقيه التى تعرفها ولكن اغلب المدونين لا يعرفونها .. انا اسمى الحقيقى احمد ابوزيد من شبين الكوم منوفيه .. وكونى منوفى بيزعل ناس كتير عشان المنايفه مش محبوبين قوى ولو ان هذه فكره خاطئه عن المنايفه وربما يكون هناك وقت آخر لنتحدث فيه عن هذا الموضوع ولكن ما يهمنا فيه ان المنايفه وانا منهم فى اغلب الاحيان صرحاء مع النفس ومع الغير (بيسموهم بتوع مقالب)اما اسم صلاح فهو اسم الشهره .. ولهذا موضوع (اصل يا سيدى انا مولود قبل 16/1/1952 وكانت زوجة الملك فاروق حامل فى احمد فؤاد فعملوا اعلان عشان اللى يتولد فى يوم مولد ولى العهد حيدوه عشره جنيه .. وبعدين ابويا وامى اخرونى شوية ايام عشان يكتبونى يوم ميلاد ولى العهد وياخدوا العشره جنيه .. والاخر خدوا بمبه.. وطبعا ابويا وامى كانوا معشمين نفسهم فى العشره جنيه عشان يشتروا بيهم قيراط ارض ويبقوا من الملاك . وكان اسمى قبل الاعلان عن الجايزه صلاح .. عشان كدا لزق صلاح .. اما احمد فهو اسم المعاملات الرسميه وشهاده الميلاد والجيش والكليه والمدرسه وخلافه ومن جوانب الاتفاق فانت بارك الله فيك قلت فى شعرا ونثرا .. الامر الذى احمله جميلا يثقل كاهلى ويجعلنى مدينا .

ثانيا : والله يا فركش انا مصرى مسلم عربى .. احب كل شبر فى ارض مصر واحب كل فرد واحب كل شجره وكل حيوان وكل عصفور وطائر يطير على ارض مصر واعشق هذه الارض واعشق طينها وترابها واعشق هوائها وكل تفصيلاتها .. وفى نفس الوقت لا اطيقها ولا اطيق كرهها لابنائها وايضا لا اطيق ظلمها ولا تسلط ابناؤها على ابناؤها .. ومن خبرات التاريخ وتجاربه اجدنى يا ئسا ومحبطا وقانطا منها .. فهل كتب الله عليها ان تكون البلد الظالم لاهله .. البلد التى تلفظ شعبها ... التى تغرقهم فى البحر فرارا من ظلمها وجبروتها عليهم.. وفى نفس الوقت رقتها وحنانها مع الاغراب .. لن ندخل فى تفصيلات ليس هنا مجالها ولكن اقسو فى نقدها من كثرة حبى لها ولاهلها الذين ايضا اكرههم فى نفس الوقت من اعمالهم .. والحمد لله انا متيسر ولكن لا اضمن لابنائى الغد فالغد مبهم وباللون الرمادى.

ثالثا: يا فركش يا عجوز .. عرفتها دى بقى من كتاباتك ومن تعليقاتك على الاحداث .. اصل فشكول ساعات اما ربنا يتجلى عليه يلقطها وهى طايره اما فى الاغلب الاعم .. فشكول غبى وما بيفهمش ... هه هه هه شوية ضحك.

رابعا : كان نفسى نعطى هذا البلد العظيم .. الكبير .. الفطحل (حلوه دى؟) الضاربه حضارته فى اعماق اعماق التاريخ .. الذى علم العالم الحضاره كان نفسى نعطيه قدرا من اهتمامنا ومن محبتنا فيشب ويقوى ويقف بين الامم شامخا .. ناهضا وليس هكذا .. بلد يتسول كل شيئ.. شفت آخر تمخيخه .. مضاعفة رسوم القضايا فى المحاكم..هذه التماخيخ يا اخى لا تعجبنى .. ناس تسهر بليل تشرب هباب بتاع الدخان الازرق ده وتقعد تمخخ لنا عشان تقرفنا فى حياتنا .. والصبح تلاقى قوانين بتدق على دماغنا .. ليس هكذا تسير الامم..وليس هكذا تسير الامور .. نريد ان نسير بهذا البلد بالاسلوب العلمى والمنهجى والمؤسسى .. لا باسلوب التماخيخ وبرقبتى ياريس .. ولا يهمك انت معاك ناس زى الفل.. والكلام الاهطل ده عايزين بالعلم وليس باسلوب العربيه الكاروا التى يجرها حمار او حصان وعندما تثقل الحموله ترجع العربه القهقرى .. حلوه القهقرى دى .. فاكر ايام النكسه .. وفاكر النكته اللى كانت بتقول للعسكرى فى الاتوبيس او القطر .. انسحب يا عسكرى.. عشان عملنا حرب باسلوب (برقبتى يا ريس).

خامسا: حزنت كثيرا على انسحاب الكحيان من التدوين وكذا حزنت على انسحاب سوسه النوسه كونوسه واعتقد ان انسحابهما الاثنين فى وقت متزامن له علاقه ببعضهم.. والله اعلم .. ولو ان الله لم يتركنى وحيدا فبعث لى بفركشاوى ناوى ليؤنسنى فى عالم المدونين.

سادسا : انا حايش لك وظيفه حلوه .. وزير دولة المدونين ان شاء الله بعد ما انجح وابقى ظاظا بس لازم تدفع لى رشوه كبيره عشان تقدر تاخد الوظيفه دى .. منوفى بقى يا عزيزى يا فركشاوى ناوى.
اعجز عن شكرك واعجز عن تقديرك وكلى امتنان وتقدير لك .. وبارك الله فيك .. وربا يستر فى الاختلافات اللى اعتقد ان لها بوست قادم ..ربنا يستر .. لكن قلبى مفتوح لك .. متهيأ لى التعليق كأنه بوست كامل .



وتحياتى........


الجمعة، ٢٠ فبراير ٢٠٠٩

خبر ما يساويش نكله..

كنت زمان من قراء الاهرام .. ايام هيكل وسلامه ... والفطاحل اللى كانوا فى الاهرام .. وكانت الاهرام فعلا هرم خوفو وخفرع ومنكاروع كمان .. دالوقت الاهرام رزمة ورق بتتفرش على طرابيزه السفره احيانا للقراءه .. واحيانا اخرى للقراءه برضه .. احسن يرفعوا على قضيه وتبقى حوسه.
اولا ما بقيتش اقرأ الاهرام بالمره .. وحتى لو قريت اقرأ الرياضه وخلاص واتفرج على الصور وما بقيتش اقرأ المقالات الاسبوعيه اللى بتتصدر الجرنال .. اصل بقى الواحد زهق وطق خلاص من المقالات دى .. كمان جميع المقالات اللى بتتصدر الجرائد اللى بيقولوا عليها قوميه ما بقيتش اقراهم .. بلا هم ووجع دماغ .. زى الواحد عمال يسمع طبل وزمر وتصفيق حاد وحاجه كدا زى ما يكونوا بيقولوا لنا ياهبل يا عبط احنا بنعرف احسن منكم .. هو انتم بتفهموا حاجه زينا .. احنا اللى بنفهم بس .. ويقوموا يدونا ضهرهم ويطلعوا لنا لسانهم .. اقروا بقى معايا الخبر ده :


وطبعا مش حتعرفوا تقروه من الكمبيوتر .. لكن هو منشور فى زيل الصفحه الاولى يوم الجمعه 20 فبراير 2009 العدد 44636 وبيقول ايه باختصار:
( فى بحث للباحث علاء عوض الله يقول فيه ان المصريين بيصرفوا كل طلعة صبح 62 مليون جنيه فى ايه بقىىىىى: .. شوفوا 12 مليون جنيه تدخين .. هو عنده حق فى دى وكمان 40 مليون جنيه تليفونات ارضى و محمول .. كمان قال المصريين بيحرقوا كل سنه 19 مليار سيجاره .. وبتقول الاهرام - فى سباق هذا الانفاق المجنون حذر الباحث ان ذلك سيكون خطر علىمصر مستقبلا فى ظل الازمه العالميه القادمه - والاهرام عايزه تقول اننا شعب سفيه وما بيعرف يصرف فلوسه كويس وياريت اولياء الامور يحجروا علينا ويدونا مصروفنا يوم بيوم على قد شقه وطعميايه .. وخساره فينا الفول والعدس )
طب يا اهرام .. ماشى يا اهرام .. قال يعنى احنا الشعب الوحيد اللى فى العالم سفيه وكل الشعوب دى كلها هى اللى حلوه وما بتشربش سجاير ولا بتتكلم فى التليفونات ارضى ومحمول .. هم بس المصريين اللى سفهاء.. ماشى يا اهرام - ما احنا السبب فى الغم اللى احنا فيه وان احنا السبب فى الاعاصير اللى بتهاجم امريكا والحرائق اللى شغاله فى استراليا وناقص كمان تقول لينا مش احنا قولنا لكم حسانين ومحمدين وانظر حولك والحاجه اللى زى القمر كريمه مختار.
يعنى يا اهرام سايبه كل البلاوى وجايه تحاسبينا احنا ... طبعا يا اهرام ما هو احنا الحيطه المايله .. يعنى يا اهرام سايبه اللى بيجرى ورا مغنيه فى لندن ودبى وصرف عليها كذا مليون والاخر ما اما نفضت ليه يروح مخلص عليها وقادرى علينا احنا يعنى....
يعنى يا اهرام سايبه تقارير الجهاز المركزى اللى فضحت الدنيا وجه عمنا وتاج راسنا صاحب القرشانات واللى بيصرف علينا كلنا ومعيشنا فى نغنغه بامارة انه عايز يمد ايديه فى جيبنا عشان ياخد اللى فيها ضرايب ومكوس ورسوم - يعنى حاجه كدا فاضل ياخد مننا ضريبة ان احنا مصريين - جاتنا نيله فى حظنا الهباب قوم ايه ؟ ... هو عمنا دهـ بهدل الراجل المحترم رئيس الجهاز المركزى ... واليومين دول خدوا بالكم فيه جوله تانيه من الكر والفر بين عمنا وبين الجهاز المركزى وما تنسوش تبقوا تشوفوها فى الموقر.
طب يا اهرام .. فى تقرير الجهاز المركزى من فتره بيقول ان فيه عجز 12 مليار جنيه .. خدوا بالكم 12 مليار مش 12 مليون .. مالهم بقى؟
الـ 12 مليار دول ضاعوا تحت بند السهو والخطأ ... يا لهوىىىىىى .. عايز اصوت وعايز اعيط وعايز برضه اضحك.
اقول كمان يا اهرام .. كام واحد هرب ومعاه مليارات بعلم وسمع وهس ناس كتيره قوى .. يا دى الغلب اللى احنا فيه شاطره علينا يا اهرام وعماله تبكتينا وتلومينا احنا اللى ما فيش فى ايدنا غير نطلع الهم فى التليفونات والسجاير.كنت باسبك يا اهرام حتقولى احنا شعب بيصرف 5 او 6 مليار فى السياحه فى الخارج.
ولا تقولى احنا بنصرف على اللحمه اكتر من ما بنصرف على الفول المدمس.
ولا تقولى بناكل تفاح وشيكولاته بـ كذا مليار.
ولا بنستورد عربيات لكل 3 افراد من الشعب عربيه زى خلق الله فى السعوديه ودول الخليج ولاحتى فى ليبيا.
دا احنا بنقف فى طوابير العيش ونطفح الكوته عشان نجيب عيش مدعوم بشلن.
الاهرام مش شايفه اللى احنا شايفينه .. هما فى برج العرب واحنا فى برج الحمام.
بحق ... ايمن نور طلع من السجن؟ واللــــــــــــــــــــــــــــــــه !!!!!!!!!!!!!!

يا شيخ ...يا رااااااجل ....ما كنتش اعرف .. اصل ما بقيتش اقرى جرايد وخصوصا القوميه

الجمعة، ١٣ فبراير ٢٠٠٩

امسك الكادر احسن تقع .. اضبط الجادون




تحديث


مدونة البنت المشمشيه حلوه وشقيه ....ضاااااااااااااعت ... ضااااااااااااااااعت


وهى عملت مدونه جديده بنفس الاسم

ودا اللينك بتاعها آهـــــــــــــــــــــــــه

يا سلام........ .. فشكول بقى يفهم فى اللينكات


===========================================


احبائى .. ازيكم .. اظن وحشتكم الفشكله .. وحشتنى انا كمان .. اصل من مده واحنا فاتحين كتاب التاريخ وعمالين نذاكر .. تقولش يا خويا حنمتحن فيه .. طب افرض برضه حنمتحن .. هو فيه مشكله .. ما نمتحن يعنى ايه المشكله.. طب ما احنا ممكن نمخخ شوية تماخيخ ونكتب كلمتين حلوين فى ورقة الاجابه وبرضه حننجح .. ايه يعنى ما دام الموضوع تماخيخ فى تماخيخ .. ناس تقعد طول الليل تشرب هباب .. وتقعد تمخخ لنا تماخيخ وتيجى تانى يوم الصبح وتقوم تصب التماخيخ دى على دماغنا واحنا دماغنا ما بقاتش ناقصه تماخيخ .. اصل فيه تمخيخه عمال افكر فيها ومش لاقى لها تخريجه يعنى .. واسألوا الجماعه بتوع الكادر.. عارفين يعنى ايه الكادر .. .. يعنى كادر العجله اللى هى الدراجه .. يعنى ايه الدراجه .. والله مش عارف .. هما الجماعه بتوع المجمع العلمى سموها كده .. ويعنى ايه المجمع العلمى .. برضه مش عارف .. هما الجماعه اللى عربوا كلمة الكمبيوتر وسموه حاسبوب .. برضه يعنى ايه حاسوب .. يعنى حسابه بيحسب.. يخرب بيت العيشه .. طب يعنى ايه حاسبوب تانى .. مش حارف .. طب بيحسب ايه .. اصله يمكن بيحسبنى فشكول .. ولا يمكن بيحسبك الشاويش عطيه .. ولا يمكن بيحسبك ابى هانم بتنجانى .. ولا عزيزه .. ايه يعنى المشكله .. الراجل عمال يحسب على نفسه .. يا عم فشكول مش كده .. امال ايه .. اصل الكمبيوتر بيعمل حاجات كتير غير انه يحسب .. طب بيعمل ايه ؟ .. فشكول المتفشكل بيحسب نفسه لبيب وكل لبيب بالاشارة يفهم.. يا عم روح العب لك لعبه ولا فشكل لك فشكله.. انت عايز تقول يا فشكول ... لأ .. فشكول مش عايز يقول حاجه .. طب تقصد ايه يا فشكول .. برضه ولا حاجه .. يا شيخ ركز .. اركز فى ايه .. ركز فى اللى انت عايزه .. انا مش عايز حاجه .. طب يا فشكول الله يرضى عليك احنا مخنا مش فاضى .. ماشى يا عم حاحل عنك .. هو يعنى انا اللى واقف فى ظوركم .. يا عم انت كنت بتقول الكادر ... أااااااه صح قصدك الكادر بتاع العجله ... لأ انت حتطير برج من دماغنا ... لأ ياسيدى .. خلى البرج فى دمخاغك .. ركز يا فشكول .. الكادر .. تقصد كادر المعلمين ... فشكول .. يخرب مطنك انت جبتها منين دى..تصدق فشكول ما كانش عارف كادر ايه .. اصل يا سيدى ماما اموله كانت بتمتحن الكادر ده من يومين .. طب وايه المشكله يا فشكول .. لأ ما فيش مشكله .. بس هى ماما اموله بتشتغل ايه ؟ .. يا سيدى ماما اموله معلمه جليله .. مين جليله دى يا جدع .. يا فشكول بيقولواكدا على المعلمين .. يعنى من الجلال يعنى من العظمه.. فشكول عظمه على عظمه يا ست .. يا فشكول احنا مش ناقصينك .. ايه اللى مزعلك بس؟




الكراسى خلصت ..عشان ما فيش فلوس نشترى كراسى


يقول فشكول .. اصل انا كنت عايزهم يرفدوا ماما اموله وكمان المستر رأفت وكمان عمرو جويلى وكل المدونين اللى بيشتغلوا فى التدريس ازهر ووزاره ... يخرب بيت عقلك يا فشكول انت اتهبلت .. فشكول ثائرا .. احترم نفسك يا جدع ايه اتهبلت دى .. يا فشكول بالراحه .. ماشى .. بالراحه يا سيدى .. عايز ترفدهم ليه يا سيدى ؟

اصل يا سيدى هما بيمتحنوهم .. طب وماله وايه المشكله .. فشكول اصل هما ما بيعرفوش يدرسوا ولا يعلموا العيال .. هما ما يقصدوش كدا يا فشكول ... امال يقصدوا ايه .. لأ عشان يدوهم الكادر .. كادر العجله .. لأ كادر المعلمين .. فشكول بيسأل يعنى .. طب واللى يصقااااااط اللى يصقط ما ياخدش الكادر.. فشكول .. وبس ؟ امال عايز ايه يا فشكول؟.. يقول فشكول .. مش اللى يصقط بيبقى فاشل .. صح يبقى فاشل .. الله !!! امال يخلوهم يعلموا العيال الفشل.. لا يا سيدى اللى يصقط ما ياخدش الكادر.. يقول فشكول .. طب واللى ينجاااااااااااح.. يا سيدى اللى ينجح ياخد الكادر.


يا عم روح العب انت منك له


فشكول .. يعنى اللى ينجح ياخد كادر وجلابيه وجزمه اجلاسيه واللى يصقط يا دوب ياخد الاندر وير ... ايه الاندر وير ده يا فشكول .. فشكول .. ولا حاجه .

اسمع يا فشكول انت حتجننى انا حسيبك وامشى احسن مخك لحس خالص.. فشكول .. والله العظيم احنا ناس بتستعبط كل حاجه نعمل منها حبه والحبه نعملها قبه .


الاصل فى الموضوع رفع مستوى المعلمين عشان ما يدوش دروس خصوصيه وعشان يبقوا بنى آدمين .. قال يعنى قال الـ 100 ولا الـ 200 جنيه دول حيخلوا المعلم يبطل دروس .. يا خى انه.


شوفوا يا ولاد .. لما المدرس ياخد الف جنيه برضه فقران واتجوز فقرانه خلفوا ولد عريان ومتنيل على عين اهله .


انتوا بقى بتضحكوا على وبتستخفوا بعقلى .. يعنى المدرس اللى يصقط ما ياخدش الكادر ويفضل مرتبه ييجى كدا 300 جنيه عشان يروح يشحت بيهم .. وبرضه قاعد فى الفصل يعلم العيال الفشل .. ماهو لو كنتم حتحرموه من انه يعلم عشان هو فاشل .. يعنى يبقى ماشى .. لكن ما دام سايبينه يجهل العيال زى ما هو .. يبقى ما كانش فيه لازمه للامتحان ولا وجع الدماغ .. امال عينتوه ليه يا رخمه . وبعدين هو فيه منهج هيمتحن فيه .. كل دى اسئله مخيخى .


السبت، ٧ فبراير ٢٠٠٩

ارض كنعان - فلسطين وجبال الصبر .. الحلقه الاخيره

حتى هنا عرفنا اصل وجود اليهود فى فلسطين حتى قيام عهد الملوك وكان اول الملوك شاؤول ثم داوود ثم سليمان عليهم السلام وبعد موت سليمان عليه السلام بدأت مملكة اليهود فى الانقسام مما سنوضحه فى البوست التالى:

عهد الانقسام


بعد موت سليمان عليه السلام تنازع ابناه رحبعام وايضا بربعام الملك واعلن رحبعام نفسه ملكا على اليهود وبايعه سبط يهوذا وبنيامين فى اورشليم ورفض باقى الاسباط العشره مبايعته لانه هددهم وتوعدهم بان صابعه الخنصر اغلظ من متن ابيه وانه حيؤدبهم بالعقارب بدلا من كرابيج ابيه .. عشان كدا باقى الاسباط العشره مش رضى يبايعو رحبعام وراحوا وبايعو بربعام ملكا .. كدا انقسمت مملكة داوود وسليمان الى مملكتين:


مملكة يهوذا فى الجنوب وعاصمتها اورشليم (القدس حاليا)


ومملكة اسرائيل فى الشمال وعاصمتها شكيم (نابلس حاليا)

وهكذا تظهر مملكة اسرائيل لاول مره فى التاريخ

وكانت فيه معارك داميه وشبه متصله بين المملكتين دول من جانب ومن جانب اخر مع الجيران طب الجيران بقى مين؟

من جهة الشمال (اشور -بابل )

وايضا من جهة الجنوب (مصر) واللى نجح ملك مصر شيشنق فاكرينه اللى كان صهر سليمان عليه السلام وبسط يده على او رشليم ونهبها وبسط سلطانه على دولة يهوذا ثم دولة اسرائيل .. طبعا بحاول الخص لكم على قد ما اقدر اصل اتخنقت من الموضوع ده وعايز اخلصه .


وبعد ما ضعفت المملكتين دول واصبحوا شيع واحزاب وما عندهمش ملك قوى يقدر يوحدهم ويمسكهم ويمسك مملكتهم بيد من حديد كدا بقت المملكتين مهيأين للزوال وما عدش ينفع معاهم حاجه ...(زينا احنا الوقت غثاء سيل) ودا من كثره حروبهم مع بعض وعداواتهم لبعض ومن كثره حروبهم مع الجيران وحنبتدى بقى نشوف كيف زالت الدولتين اليهوديتين (يهوذا واسرائيل)


عهد الزوال


كان تاريخ ملوك اسرائيل وملوك يهوذا تاريخ ولايتين صغيرتين تحت شقى الرحى تعركهما على التوالى سوريا وبعدين بابل من الشمال وكمان مصر من الجنوب .. كل المعارك دى اضعفت الدولتين دول لحد ما جت سنة 721 ق.م ومحت يد الاسر الاشورى فى عهد سرجون التانى مملكة اسرائيل من الوجود وزال شعبها تماما وفضلت مملكة يهوذا تكافح حتى اسقضها البابليون سنة 581 ق . م هذا من جهه

من جهه تانيه من ناحية الجنوب كان فرعون مصر يزحف على مملكة يهوذا واحتلها واسقطها سنة 608 ق.م واستمر فى زحفه لحد ما هزم الاشوريين واستولى على اسرائيل كمان .. يعنى مصر خدت مملكة يهوذا من اليهود وكمان خدت مملكة اسرائيل من الاشوريين وبقت فلسطين كلها تحت ايد مصر.


فى الوقت دا بقى كانت بتدور فى بابل احداث هزت المنطقه .. ازاى .. فاكرين اسم بختنصر .. (نبوخذ نصر) الراجل ده بقى احتل اشور .. وبعدين زحف على فلسطين وهزم فرعون مصر واستعاد مملكة اسرائيل من مصر وبعدين احتل مملكة يهوذا فى الجنوب وقتل صدقيا بن بواقين أخر ملوك يهوذا ونهب اورشليم ودمر هيكل سليمان ونفى الشعب الاسرائيلى خارج فلسطين .. واصبحت فلسطين خاليه تماما من اليهود . المؤرخين بيعتبروا دا بقى التدمير الاول لأورشليم.

حبيت انسخ ايه من القرأن ما عرفتش وعشان كدا حاكتبها بايدى وامرى لله وربنا بقى يسامحنى والايه بتقول ايه

(بسم الله الرحمن الرحيم)

(وقضينا الى بنى اسرائيل فى الكتاب لتفسدن فى الارض مرتين ولتعلن علوا كبيرا 0 فاذا جاء وعد اولاهما بعثنا عليكم عبادا لنا اولى بأس شديد فجاسوا خلال الديار وكان وعدا مفعولا 0 ثم رددنا لكم الكره عليهم وامددناكم باموال وبنين وجعلناكم اكثر نفيرا 0 ان احسنتم احسنتم لانفسكم وان اسأتم فلها فاذا جاء وعد الاخرة ليسوؤوا وجوهكم وليدخلوا المسجد كما دخلوه اول مره وليتبروا ما علوا تتبيرا 0 عسى ربكم ان يرحمكم وان عدتم عدنا وجعلنا جهنم للكافرين حصيرا) الاسراء الايه 3 الى 8.

يعنى كان تدمير اورشليم على يد نبوخذ نصر (بختنصر) التدمير الاول على قول معظم المؤرخين.

اصل التسميه باليهود

بعد كدا جه قورش اللى هو ملك الفرس وعمل ايه قورش احتل بابل ومن ثم اصبح له السياده على ارض يهوذا اللى كانت تحت الحكم البابلى - مش بختنصر كان احتل فلسطين .. طبعا. اطلق الفرس بقى على شعب يهوذا اسم اليهود وعلى عقيدتهم اسم اليهوديه ومن التاريخ ده اصبحت كلمة اليهود تعنى من اعتنق اليهوديه حتى لو ما كانش من بنى اسرائيل ودا يا جماعه الفرق بين اليهودى والاسرائيلى

طبعا احنا عارفين ان الاسرائيلى هو من انحدر من نسل يعقوب .. اما من انحدر من غير نسل يعقوب من اليهود فهو طبعا ليس اسرائيلى وان الفرس هما اللى اطلقوا عليهم كدا .. نرجع مرجوعنا بقى للفرس عملوا ايه مع اليهود .. بعد كدا لما جه قورش ملك الفرس جه سمح لليهود بالعوده الى فلسطين .. فعاد من عاد ولكن اكثرهم لم يعودوا واعادوا بناء المدينه المقدسه (اورشليم) واقاموا تانى معبد صغير مكان الهيكل اللى كان بناه سيدنا سليمان وهدمه بختنصر.

مع الاسكندر الاكبر

كانت عودة اليهود الى فلسطين عودة افراد زى ما قلنا وليست عودة دوله وفى سنة 320 ق.م زحف الاسكندر الاكبر على فلسطين ورحب به اليهود وبعد الاسكندر آل حكم فلسطين الى البطالسه..

مع الكابيون

تنتسب اسرة المكابيون الى ساتياس وابنه مكابياس اللذين قاما بثورات ضد الحكم البطلسى دون جدوى حتى استطاع احد قادتهم واسمه ارتبولس ان يستقل ويأخذ لقب ملك ولكن عهده ما قعدش كتير

مع الرومان

كان الرومان يرقبون الصراعات بين المكابيين واليهود وبين البطالسه وبين امراء اليهود وبعضهم البعض هتى هب صراح كبير بين قائدين متنافسين من اليهود فاكتسح الرومان اليهود (فلسطين) واستولى على القدس بقيادة القائد الرومانى (يامبيوس) وبعدين حلت اسرة هيردوت محل المكابيين وحاول هيرودوت ارضاء اليهود فبنى لهم هيكلا على نسق هيكل سليمان حتى جاء (تبطنس) الامبراطور ودمر الهيكل واحرق اورشليم على اثر ثوره قام بها اليهود فى المدينه .. ويعد هذا فى رأى البعض التدمير الثانى للمدينه (اما من نظن ان تدمير اليهود حاليا هو التدمير الثانى فهو من قبيل ان عدتم عدنا) بعد كدا جاء اوريانوس وازال معالم المدينه من الوجود وسواها بالارض وزرعها وتخلص تماما من اليهود بين قتل وتشريد ونفى واستطاع اليهود الهرب الى مصر وشمال افريقيه واسبانيا واروبا واقام دربانوس هيكلا وثنيا باسم جوبيتر رب الآلهه عند الرومان وبقى هذا الهيكل الى ان قامت المسيحيه فى اورشليم فدمر المسيحيون هيكل جوبيتر فى عهد الامبراطور قسطنطين.

مع المسلمين

فى سنة 636م فتح المسلمون فلسطين من الرومان ومنذ ذلك التاريخ عادت لفلسطين عروبتها الكاملة وكانت آنذاك خاليه من اليهود تماما واصبحت فلسطين منذ ذلك التاريخ عربيه اسلاميه.

لم تنتهى معاناة ارض كنعان فلسطين مع جبال الصبر ولكن مرورا بالحملات الصليبيه وحتى يومنا هذا ... كل هذا ذاقه شعب الكنعانيين الفلسطينين وتجرعوا الصبر على مدى التاريخ وحتى يومنا هذا وللقصه بقايا كثيره ولكن اعرف ان صبركم نفذ وانا ايضا صبرى نفذ من هذا الموضوع .. ونكتفى بهذا .. باقى موضوع واحد مش عارف اقدر اتكلم فيه ولا ما اقدرش .. الموضوع هو اشكاليه التاريخ والدين وحنخليه فى البوست القادم لو حبيتم بس هو بوست شائك وحساس لانه يتكلم عن علاقة المسيحين باليهود وعلاقة المسلمين بالمسيحيين واليهود ولذلك مش عارف حاقدر اكتبه ولا لأ......

انتهى بحمد الله

الأربعاء، ٤ فبراير ٢٠٠٩

ارض كنعان - فلسطين وجبال الصبر 4


فى الحلقه دى يا جماعة الخير حنشوف ازاى عاش بنو اسرائيل فى فلسطين وايه اللى جرى لهم .. ما علهش حيكون البوست طويل شويه عشان انا مش عارف اعمل الموضوع كله فى بوست او اتنين عشان كدا هو محتاج 3 بوست .. وحيكون البوست ده طويل شويه عشان نعرف ايه حكايتهم فى فلسطين وعملوا ايه وآخرتهم كانت ايه وعلى ايد مين .. اذا مش موافقين على طول البوست ابعتوا عشان اجزء البوست القادم واخليه قصير .. لكن امركم لله البوست ده حيكون طويل.

وعشان ما حدش يشتح بيه التفكير ويقول طب هو يوشع بن نون عمل كدا وقتل الناس دى كلها وحرق الارض ليه : دى من عندى مش من مراجع ويصح اكون غلط (كان دخول اليهود الى فلسطين ضروره تاريخيه .. اولا لأن الفرعون طردهم من مصر .. ثانيا حيروحوا فين؟ .. ثالثا ارض فلسطين كان فيها قوما جبارين لا يعبدوا الله .. وكان اليهود فى ذلك الوقت بيعبدوا الله .. يا جماعه يصح اكون غلطان .. دا تحليل من عندى واللى عنده حاجه موثقه يكتبها وانا انزلها فى تحديث.


بنو اسرائيل فى فلسطين


بعد ما سيدنا يوشع بن نون عليه السلام قدر يدخل باليهود فلسطين والموضوع اللى انتم كلكم عارفيه لما ربنا قال لهم ادخولو سجدا وهما ما طاوعوش ربنا ودخلوا رافعى الرؤوس (على الواو ولا على الارض ماما اموله) واللى ربنا عمله فيهم.. فيه حاجات مش حاقول عليها عشان ما ابعدش عن الخط الرئيسى ..المهم سيدنا يوشع قسم المؤمنين بين الاسباط .. انتم عارفين هما كام سبط ولو عايزين تعرفوهم اقول لكم عليهم بالضبط .. وكان فيهم سبط لاوى اللى كان مهمته فى الغزو انه يشيل قبة الزمان وينصبها مطرح ما يستقر اليهود .. وكمان يفكوها ويشيلوها لما يبتدوا فى الرحيل.. وحكاية قبة الزمان دى نسيت اقول لكم عليها لكن فى بوست مستقل ان شاء الله لانها مش حتغير من سياق الموضوع .. وكان لكل سبط شغلانه يعملها او مأموريه او متخصصين فى حاجه .


ويمكن تقسيم حياة اليهود فى فلسطين الى ثلاثة اقسام او ثلاثة عهود .. هما ايه .. اقول لكم :


1- عهد القضاة : كان الحاكم فيها قاضى هما ينصبوه عليهم.


2 - عهد الملوك : ويبدأ هذا العهد بشاؤول او طالوت .


3 - عهد الانقسام وزوال ملك بنى اسرائيل من فلسطين .. حاحاول اختصر بقدر الامكان.


عصر القضاة
كان يحكم اليهود فى هذه الفتره قضاة من الكهنه ينتخبهم كبراء الشعب وكان كل قاض مستقل بسبطه وكان النظام قبليا .. يعنى تقريبا كل سبط كان دوله لوحده .. وبعدين القضاة او زعماء القبائل كانوا بيتعاونوا مع بعض فى الامور الهامه لبنى اسرائيل وبدء اليهود ينتقلون من حياة البدو الى حياة الاستقرار كما بدءوا يعرفون الزراعه ثم تعلموا الصناعه والحداده والفخار .. كويس لحد كده . شوفوا بقى هما دايما متقلبين ما بيثبتوش على حال.. ازاى؟


بعد ما شاع فسق القضاة واخفاقهم وتفشى الرشوه والمحسوبيه جيل بعد جيل ولما شاخ صموئيل زعيم القضاة فى اخر عصور القضاة جعل ابنيه قضاة لبنى اسرائيل اصل صموئيل كان عنده ولدين وبحثت عن اساميهم ما لقيتهمش المهم خلى كل واحد قاضى وزعيم.ولم يسيرا على درب ابيهما فاجتمع الشيوخ لدى صموئيل وقالوا له اجعل لنا ملكا كسائر الشعوب فصلى صموئيل الى الرب واختار لهم (شاؤول) والذى يسميه القرآن الكريم بطالوت . من هنا بدأ عصر الملوك .


عصر الملوك


شاؤول قاد اليهود بشجاعه وكان من جنوده داوود عليه السلام وقتل حلبات قائد الفلسطينين والذى يسميه القرآن بجالوت واخذ داوود منذ ذلك الحين يملأ اعين الناس وافئدتهم حتى خاف منه شاؤول (طالوت) وحاول القضاء عليه فهرب داوود واحتمى بالفلسطينين ومنذ ذلك الحين اخذت الهزائم ببنى اسرائيل حتى تم قتل شاؤول واخذت دروعه الى معبد فينوس الفلسطينى ودق جسده بالمسامير على اسوار بيت شان بعد كدا قام صراع بين اشبوشس ابن شاؤول وقائد الجيوش وانتصر عليهما داول وقتلهما واصبح بذلك الملك الثانى لبنى اسرائيل واستولى على اهم مدن فلسطين (اورشليم) او اور سالم واللى كان معناها محلة السلام .


اورشليم تاريخيا


اصل المدينه اور سالم ومعناها بالكنعانيه محلة السلام وقد كانت تحت سلطان اليبوسين وهم بطن من بطون كنعان وقد سميت على عهدهم يبوس ولما استولى عليها داود سميت باسمها اورشليم واعاد اليها داوود التابوت وشيد بها الهيكل المقدس وفى عهد الرومان سنة 63 قبل الميلاد سميت ايليا وكابيتولينا وفى العهد المسيحى سميت الاسمان اورشليم واليا وفى العهد الاسلامى سميت القدس او بيت المقدس . وكما قلنا اصل الاسم اور سالم. وزى ما انتم عارفين اللغة العبريه دايما تخلى السين شين اورسالم .. اورشالم .. اورشليم.


داوود ملكا


طبعا كلكم عارفين قصة سيدنا داوود عليه السلام صاحب المزامير واللى النا له الحديد فى عهده عمت البلاد بالرخاء وعمل حلف بينه وبين الفينيقيين اللى كان عاصمة ملكهم حيرام وكانوا فى لبنان حاليا ومن بعده سيدنا سليمان عليه السلام وقد كانت مملكة داوود من الحدود الفينيقيه فى الشمال الغربى والحدود السوريه فى الشرق الى حدود عمون (عمان الآن) ومؤاب وحتى بيت المقدس وبير سبع فى الجنوب.والخريطه معايا بس مش عارف انزلها ازاى طبعا فيه كلام كتير عن سيدنا داوود والسبب اللى خلاه يوسع دولته وفى اختصار بيقول ويلز ان ما وطد مملكة داوود ان امور مصر فى عهده كانت مرتبكه فخفت هيمنتها على فلسطين وكذلك الدوله الآشوريه مما منح داوود قدرا من حرية الحركه وقعد 40 سنه فى الحكم ومما هو جدير بالذكر انه حتى تلك اللحظه كانت للفلسطينين ارضا مستقله بمحازاة الشاطئ ولم تكن كل الارض للاسرائيليين وكانت هذه الارض تقريبا هى غزه الأن,


بعد كدا مسك سيدنا سليمان الملك وبدأ حكمه بقتل اخيه الاكبر ادوينا وقتل يؤاب رئيس جيش ابيه وعزل اينبار الكاهن واستطاع سليمان عليه السلام ان يصاهر شيشنق فرعون مصر فى ذلك الوقت وقسم مملكته الى اثنى عشر قسما اداريا لكل سبط قسم خدوا بالكم ما تنسوش ان دائما دولة الاسرائيلين يلعب فيها الاسباط دورا كبيرا وحتى الآن . وبنى سليمان الهيكل (اللى بيقولوا عليه هيكل سليمان وتحت بيت المقدس وواجعين دماغنا بيه لحد الآن) واقام سليمان حضاره تكلم عنها التاريخ والكتب المقدسه . ولكن مصر بدأت تنهض وتنتعش فى اواخل ايام سليمان عليه السلام وسيطرت مصر اسميا على الاقل على فلسطين ونشط اعداء سليمان فاستعادوا بعض البقاع التى كانت خاضعه لأبيه داوود ولسليمان وانكمش ملك سليمان فى أخر عهده حتى اصبح مملكه فى غرب الاردن فقط.


كبر البوست ..ما علهش .. الحلقه القادمه حنشوف ازاى انتهى الموضوع دا كله وايه اللى حصل بعد سليمان وكيف تفككت دولته بين ابنيه رحبعام وبربعام وازاى كل واحد عمل دوله له واول اسم لدولة اسرائيل فى التاريخ .. بعد الفاصل الحلقه القادمه .