الأربعاء، ١٠ ديسمبر ٢٠٠٨

فشكول فى العيد


كل عام وانتم بخير ... الواد فشكول كل عيد لازم يروح ويعيد فى بلده هو وكل اخواته الصبيان والبنات .. ابوه الله يرحمه عود فشكول واخواته على الحكايه دى .. العيد يبقى فى دار العيله .. فشكول ابوه مات عام 2002 الله يرحمه رحمه واسعه .. كان راجل ريفى وفلاح اصيل .. كان احسن واحد يزرع القطن .. واحسن واحد يراعى شجر الموالح ( البرتقال واليوسفى والليمون) واحسن واحد بيفهم فى زراعة البطاطس وتجارتها كمان وعشان كدا سنة 69 خزن 2000 طن بطاطس وكان ثمن الطن وقتها 22 جنيه يعنى الكيلوا ب2.5 قرش صاغ .. والدى كان حظه ممتاز- جه الطن نازل من 22 جنيه الى 14 جنيه يعنى الطن يغرم 8 جنيه .. مش بقول لكم ابويا كان حظه حلو قوى ومن ساعتها بطل يتاجر فى البطاطس او يزرعها .. الله يرحمه .


امى بقى كانت ست بيت ممتازه بتقعد طول النهار فى المطبخ وما كنش يحلى لها الطبيخ الا فى الكانون والفرن البلدى اللى ورا الدوار .. آه لو كلتم المحشى الكرنب ولا الباميه اللى مطبوخه على الكانون .. تاكلوا صوابعكم وراها .. كان عندنا حله كبيره قوى يعنى يتحط فيها خروف وكانت امى ايام العيد تطلع الحله دى وتحط فيها لحمة العيد وتسويها على الكانون اللى ورا الدوار .. اخوكم فشكول بقى كان بيحب يجهز الحطب والخشب واقراص الجله - اقراص الجله - ويتولى هو خدمة الكانون والمحافظه على النار فيه ...ماهو اصل السر ايه .. اقول لكم السر ايه:


امى كانت تقول والله يا صلاح انت كلك بركه .. وصلاح اقصد فشكول هو الوحيد اللى يعرف السر .. ولا امى ولا حد خالص يعرف السر .. كان فشكول يقعد قدام الكانون ومستمتع بحكاية الولعه دى .. وطبعا الكانون ورا الدوار ولا حدش شايف حاجه .. يقوم فشكول يشم ريحة اللحمه اما تطيب .. بيبقى لها ريحه كدا .. اللى بيفهم فى الطبيخ يعرف اللحمه طابت من ريحتها .. ييجى فشكول يجيب طبق غويط من المطبخ .. امى حتعمل ايه يا واد .. الواد يقول.. حأخد شوية شوربه يا امى هديه على شغلى قدام الكانون.. امى تقول اوعى تاخد حاجه تانيه .. فشكول .. دا كلام يا امه هو انا برضه آخد حاجه من وراكى .. الحله الانجر دى كان بيتعمل فيها حوالى 15 كيلو لحمه .. شوف بقى شربتهم بتبقى عامله ايه ؟ ... اكسير .. فشكول يا خد الكرنيب (المغرفه) ويغرف له شوية شوربه صغنونه وعليه 3 ولا اربع حتت لحمه وياخد صحن الشوربه وينزل بيه الغيط فى الدره عشان ما حدش يشوف هو بيعمل ايه اصل دارنا كانت جنب الغيطان ... كان فشكول يروح زريبة الطيور ويشوف اكبر دكر بط ولا دكر وز ويروح ناشه بالطوبه فى رأسه .. الحقى يا امه دكر البط حيموت تيجى امى جرى بالسكينه .. طبعا .. امال كنا نتعشى بط ازاى .. فشكول كان بيعمل فى امه فصول منيله بنيله .. والله لحد قريب .. الله يرحمك يا امى .. توفيت فى النصف من رمضان الماضى .. طولت عليكم المقدمه عن مغامرات فشكول فى بيت العيله.


احنا وعقبال عند الجميع وربنا يبارك ويزيد 7 اخوه 5 رجاله و2 بنات المهندس على اخويا الكبير بالمعاش والمهندس محمود اخويا التانى برضه بالمعاش وانا ان شاء الله برضه بعد 4 سنين معاش والمهندس محمد وعبد المنعم اخويا الصغيرفى الرجاله وحاصل على بكالوريوس لا اله الا الله وهو اللى فاتح دار العيله فى البلد وهو اللى بيزرع وبيقلع مطرح ابويا وهو اللى بيديه لنا بناخده من غير ما نفتح بقنا وفيه كمان صباح اخصائيه نفسيه وماجده مدرسة ثانوى ... ولازم كلنا واولادنا نعيد فى دار العيله فى البلد واتعودنا على كده حتى بعد وفات والدى ووالدتى الله يرحمهم .. ولسه بنعمل كانون خلف الدوار ولسه الحله الانجر موجوده ( امال اللحمه دى كلها آنى بوتجاز يقدر يطيبها ) ما فيش غير الكانون


كنا فى العيد الكبير جايبين دبيحه .. العيال ولادنا الكبير من كل عيله اجتمعوا وقالوا اشمعنا ابهاتنا يجيبوا اضحيه واحنا لأ .. وقاموا جابوا دبيحه .. عمهم عبد المنعم هو اللى اشترى الأضحيتين .. فشكول واخواته كانوا مش قادرين يحلقوا دقنهم قبل الذبح ودقننا طويله ما اتحلقتش من 10 ايام ودقنهم عماله تاكلهم وعمالين يهرشوا فيها والحكايه اوفر خالص فى الدقون .. وكنا حاجزين الحلاق عندنا يوم العيد الصبح عشان بعد الدبح ياخدنا بالدور.. قوم ايه .. عبد المنعم اخد العيال ولادنا وخيرهم .. الدبيحه اللى تعجبكم خدوها .. قام العيال وكلوا اسامه ابنى وشريف ابن اخويا على يختاروا .. قام الفالحين اختاروا .. قوم ايه .. تم دبح الدبيحه بتاعة الابهات عشان يحلقوا دقونهم.. وتم عمايل الاتلاث من غير مشاكل (تلت لله .. وتلت للاصدقاء... وتلت للبيت ).. طبعا العيال مش ملتزمين بالسنه زينا وحالقين دقونهم وعايشين حياتهم واخر هيصه .. خلوا بقى دبيحتكم للأخر.. قوم ايه قعد شريف واسامه مع الجزار وييفرقوا الاتلات .. قوم ايه عمتهم صباح وعمتهم ماجده ما كانوش مشتركين فى الاضحيه لا بتاعة الكبار ولا بتاعة الصغار .. مش البنات على حساب اخواتهم .. عندنا كدا فى الفلاحين.. الواد شريف لعمته صباح .. اصل العيال والعمات سنهم قريب من بعض وعيال زى بعض .. يا عمتى صباح .. تعالى ياحلوه اشتغلى معانا وساعدينى فى الشغل .. انتى شاطره انت وعمتى ماجده تلهفوا منابكم على الجاهز يعنى حتاخدى لحمه ببلاش ولا حتى تساعدينى .. يا عمتى ماجده .. ترد عمته ماجده والله يا شريف بعد ما آخد منابى من اللحمه لأركبك جميلى والف بيك فى الغيطان .. عمته صباح .. حاضر يا شريف .. اصلها دى اميره وبنت ناس .. اما عمته ماجده .. برم .. وصايعه زى شريف .. العمات اخدوا منابهم وكل واحده حطت منابها فى شنطة عربيتها وقاموا نازلين فى شريف ضرب .. وهاتك .. الواد يجرى وعماته تجرى وراه .. وصريخ وهرجله .. قوم ايه .. بعد الجزار ما خلص دبح وتوزيع الاتلات قعد العيال يعدوا الكيلوات - اتارى دبيحة العيال نقصت عن دبيحة الكبار بـ 35 كيلو .. وهاتك يا خناقات بين العيال وبعض .. بس مش قادرين ييجوا ناحية ابهاتهم .. وجه الواد أمير ابن محمد والواد محمد ابن محود والواد احمد ابن على ماسكين اسامه ابنى وهاتك يا ضرب فيه .. انت يا دكتور يا جاهل لما تختار مش تختار الدبيحه الكبيره .. امال احنا ذقناك ليه .. والله انت لا تنفع دكتور ولا حتى تمرجى .. اسامه ابنى اصله دكتور بهايم ومعيز وفراخ .. الواد خد ضرب ولا حرامى فى مولد .. البت آيات مرات اسامه اصلها دكتوره صيدليه قعدت تطبطب على اسامه وتقول له أنا مش قلت لك ما تنحشرش فى الغجر دول .. الواد شريف كان مشترك مع اسامه فى جريمة الاختيار.. خد نفسه وقعد بعيد وكان كاشش ومش قادر يتكلم .. راح الواد اسامه على الواد شريف وهاتك يا خناقات معاه .. مش انت ياد اللى قلت لى على الدبيحه دى .. الواد شريف بهدوء .. مش انت يا اسامه بتاع بهايم ومعيز وتعرف احسن منى يا اخى انت متخصص وانا جاهل اعمل لك ايه .. البت بقى رانيا مرات شريف معاها ليسانس تربيه ومن ضمن العاطلين .. يا أسامه رأى شريف استشارى .. جم العيال هايجين تانى ونازلين فى اسامه ضرب واسامه يجرى ويقول يا ارض اتشقى وابلعينى يا ارض يا ارض .. الواد محمد بقى ابن محمود اخويا كان نازل اجازته من وحدته على البلد مباشره وكان لسه لابس اللبس الميرى وكان اللبس الميرى مكتفه وعايز يضرب اسامه وشريف بستين برطوشه لكن رتبته اللى على كتفه قهرته وخلاته واقف محترم بس كان متغاظ وحيطق من اسامه ومن شريف . البت بقى مرات امير اصلها معاها ليسانس خدمة اجتماعيه وبرضه عطلانه .. بس سوسه .. قالت ايه .. يا أمير المفروض اسامه اللى يدفع الفرق ده هو وشريف من جيبهم .. الواد اسامه شاف الدنيا مولعه والعمليه مهببه بهباب قام غامز مراته واتفقوا على انهم يغادروا البلد فى اسرع وقت وجهزت مراته نفسها وركبوا عربيتهم وطلعوا يجروا وسابوا لهم البلد واللى فيها .. والله كان عيد جميل ولذيذ .. وتانى يوم العيد ما كانش فى البلد غير الكبار فشكول واخواته الصبيان والبنات .. اما العيال كل واحد راح لحاله الله يسهل لهم ويوفقهم ويفتح لهم ابواب رحمته .. امين يا رب العالمين.. .. اما تالت يوم العيد يوم الاربع كان ختامه مسك والحمد لله .. الواد محمد ابن محمود اخويا اتصل بينا من مصر ... تعالوا استنونى فى الزقازيق .. اصله ساكن فى الزقازيق .. استنونى عشان تحضروا جنازه حماتى .. انا لله وانا اليه راجعون ورحنا وحضرنا وعزينا البت ريهام مرات محمد اصلها معيده فى جامعة الازهر بالقاهره .. ورجعت من الزقازيق مباشره لبيتى فى شبين الكوم .

كل عام وحضراتكم جميعا بخير ويعيد الله عليكم وعلينا هذه الايام بالخير واليمن والبركات

هناك ٦٨ تعليقًا:

Kiara يقول...

هحجز اول تعليق وهقرا واررررررجع

Kiara يقول...

ربنا يرحم باباك بس واضح ان كان حظه جميل مووووت

--------

معلش يعني ايه كانون؟؟

--------
ههههههههههههههههه حرام تضرب البطه كدا

--------
ربنا يرحم مامتك

---------
بس انا مش بحب اللحمه خالث

---------
وربنا يخليلك اخواتك ومش يحرمكم من بعض ويجعل الود والحب دايما بينكم موصول

---------

الواد خد ضرب ولا حرامى فى مولد .

ههههههههههههههههههههههههههه يعيش ومش ياخد غيرها

*************
والله العيله واللمه لهم متعه

********

البقاء لله في حماه محمد

الازهرى يقول...

العزيز فشكول

رحم الله اموات المسلمين جميعا

بجد فكرتنى بايام جميلة جدا وغالية على قلبى
ومن الواضح ان العيد جه كويس جدا
رنا يخلى العيد الجاى احسن الف مرة يا رب
وحلوة قوى سياسة الهروب والنفاد بالجلد دى
شكله طالع لابوه والا ايه؟
انما بقى مقولتليش مين اللى لسه بيولع الكانون ويحافظ على ناره انت والا فيه خليفة اتولى المنصب ده

كل عيد وانت اسعد من اللى قبله
تحياتى دوما

mohamed ghalia يقول...

أنا برده بقضى العيد فى بيت العيلة ولما اتجوز وأخلف إن شاء الله عود عيالى على كده
عندنا برده جنينة برتقال
إحنا متشابهين فى حاجات كتير بس انت بقى فيلسوف وانا مش قدك ياعم
كل سنة وانت طيب

mahasen saber يقول...

الله يرحم والد ووالدتك فشكول
ويباركله فى اولاده واسرته

ويفضل العيد يجمعكوا دايما كده ويفكرك بالذكريات الجميله اليى امتعتنا بيها دى

وعلى فكره فيه ناس كتير حظها زى حظ والدك الله يرحمه مع البطاطس

Unknown يقول...

ههههههههههههه
بسم الله ماشاء الله
والله حاجة جميلة .. مافى أحسن من لمة العيلة والترابط الأسرى الجميل ، أدام الله الله تعالى عليكم نعمته وفضله.
وكل عام أخى وأنتم دائماً مجمعين وحياتكم دائماً أفراح وأعياد....

مع كل التقدير والاحترام
لعمنا الكبير أبو صلاح

كاميليا بهاء الدين يقول...

هههههههههههههههههههه

انا كده روحت معاك البلد ..

وعشت معاك كل الاحداث الجميلة دى

كل عام وانت بألف خير ..

واسرتك وعائلتك الكريمة بخير وسعادة

ودايما يارب متجمعين فى المناسبات الحلوة


تحياتى

Empress appy يقول...

الله يرحم جميع الموتى
طيب انت اكلت المحشي على الكانون انا مؤخرا اصريت انى اروح بلد فلاحين تابعه للمدينه بتاعت المنصوره واخليهم يعزومنى على محشي على الكانون يا نهار ايه ده بجد لااااااا الاكل له طعم تاني
كل سنه وانت طيب يا فشكول وبخير

فشكووول يقول...

الجميله أبى .. تحياتى
بدايه كل سنه وانت طيبه.. الكانون يعنى بيرصوا طوب من الجنبين عشان الحله تقعد عليهم وبعدين يولعوا تحتها نار بالحطب واقراص الجله عشان الحلل الكبيره قوى .. اصل البوتجازات ما تنفعش ليهاعشان الحلل دى حلل عيله وكبيره جدا
اصل لو ما ضربتش البطه بالطوبه امى مش تدبح لينا بط خالص عشان كدا كنت باضرب .. كنت صغير بقى .. اصل امى كانت بتحب الطيور زى عيالها وكان لازم اجبرها عشان تدبح .. امال ناكل ازاى وهى مش راضيه تدبح
اشكرك على تعزيتك الجميله

الازهرى حبيبى
انا وكلت الواد محمد الثالث هوا اللى بيتولى الحكايه دى وانا برضه ساعات باتمحك فيه .. اصل عندنا محمد اخويا الكبير ..ومحمد الثانى ابن اخويا محمود .. ضابط فى الجيش وبرضه عندنا محمد الثالث ابن اخويا عبد المنعم وعندنا برضه محمد الرابع ابن اخويا على .. وعقبال ما تشوف احفادك ويارب يعود عليك العيد بالعزه والكرامه ويديم عليك الصحة

محمد غالي : تحياتى وكل سنه وانت طيب.. والله يا محمد لمة العيله والعيله الممتده دى حاجه حلوه خالص وما يحسش بحلاوتها اللا اللى عايشين التجربه .. وبعدين يا عمنا انا فيلسوف الغبره يعنى فيلسوف اونطه .. كل سنه وانت طيب

ستنا محاسن صابر .. هو والدك اتقرص برضه من البطاطس .. ربنا يعوض عليه وعلى العموم ربنا عوضه بمحاسن صابر .. وربنا يخليكى وينولك مرادددددك يا رب .. كل سنه وانت بالف خير وسعاده

عمنا محمد الجرايحى حبيب قلبى .. اشكرك على مجاملتك الرقيقه .. ويا رب تعمل عيله كبيره زى والدى الله يرحمه ويرحم والدين فى الدنيا وفى الاخره .. كل سنه وحضرتك بالف خير وصحه ويعيدها الله عليكم بالخير واليمن والبركات

ستنا الغاليه .. كاميليا .. من مصر لحد جرماني باهديك الف تحيه وعقبال عندك وتعملى عيله كبيره كدا انت والدكتور العظيم اللى وراه امرأه عظيمه .. ان شاء الله لما ترجعى مصر ممكن اعزمك عزومه فلاحى عندنا فى الغيط ومش حتندمى عليها وحتفتكريها طول عمرك .. كل سنه وانت طيبه وزوجك واولادك

حبيبى قلبى ابنتى الغاليه آبى الجميله.. شفتى اكل الكانون حلو ازاى .. ويا سلام لو كباية شاى اسود ومنيله بنيله من الكانون .. مش حتشربى شاى زيه تانى ابدا .. شاى بيبقى معتق .. يخلى الواحد متنح على الاخر .. كل سنه وانت طيبه يا آبى انت ووالديك واخوتك اذا كان فيه وسواء كانوا عايشين او غير ذلك

فشكووول يقول...

الجميله مولان .. تحياتى
بدايه كل سنه وانت طيبه.. الكانون يعنى بيرصوا طوب من الجنبين عشان الحله تقعد عليهم وبعدين يولعوا تحتها نار بالحطب واقراص الجله عشان الحلل الكبيره قوى .. اصل البوتجازات ما تنفعش ليهاعشان الحلل دى حلل عيله وكبيره جدا
اصل لو ما ضربتش البطه بالطوبه امى مش تدبح لينا بط خالص عشان كدا كنت باضرب .. كنت صغير بقى .. اصل امى كانت بتحب الطيور زى عيالها وكان لازم اجبرها عشان تدبح .. امال ناكل ازاى وهى مش راضيه تدبح
اشكرك على تعزيتك الجميله

نبض الروح يقول...

هههههههههههههههههه
اممممممم الله يديم عليكم الفرح واللمة الحلوة والسعادة :)

mr_raafat يقول...

العم صلاح والحكيم الفيلسوف
إنها حقا عائلة محترمة
أخوة متحابين وأسرة رحيمة
اللمة عزوة وربنا يدوم عليكم الفرحة والترابط والتراحم
وعظم الله أجرك في الأم الحنون والأب العظيم
ولكن لم تأتي علي سيرة الأحفاد أحمد وملك عاملين أيه وكان ازيهم في الفرح دا
ربنا يخليك ليهم
نورت ياعمنا
وأضحي مبارك

القلم السكندري يقول...

السلام عليكم


كشف جديد عن جديد في شخصية حضرتك وحيلك


اسعد الله ايامك.. وجعلها كلها عيداً

وجمع شملك بمن تحب

وكل عام وانت بكل خير

صفــــاء يقول...

.
عمنا الكبير والغالى
كل سنه وكل عيد وانت بألف خير

تصدق بالله انت عملت أبدع وأروع وأكمل صورة لعيد جميل ورائع ومتكامل
عيد زى بتوع زمان
عيد فيه أهل وقرايب
واخوات
ربنا يخليهم ليك ويخليك ليهم
والله العظيم لو قصه أستحاله كانت تبقى اشيك واجمل من البوست بتاعك دة

متنسانيش فى اللحمه بقى
سلامى ومودتى
.

إيمان قنديل يقول...

كل سنه وانت طيب


عارف انا برضه اصولي ريفيه

وكنت وانا صغيره أشوفهم في البلد بيطبخوا على الكانون
وفعلا كان الطبيخ بتاعه له مذاق ونكهه خاصه

بس خلاص دلوقتي في البلد بيستخدموا الميكرووف

فشكووول يقول...

العزيزه نبض الروح .. ربنا يخليك ليا ولا يحرمنيش من زياراتك .. وكل سنه وانت بخير

عزيزى رأفت بك .. على فكره انا اسمى الحقيقى احمد واسم الشهره صلاح ودا اللى انا بحبه واسمى التدوينى فشكول .. شوف بقى انا ليا كام اسم وبالنسبه لملك واحمد شوف ملك ما بتتكلمش مع بنى ادمين اصلها فى السعوديه ومحبوسه على طول جوا الشقه هى وامها لكن من كتر العيال كانت تايهه وآخر انبساء أما احمد الغلبان كان نايم 4 شهور وعمال يبص لده ولده ويضحك وكان يوم اخر جمال .. كل عام وانت بخير

القلم السكندرى .. حبيب القلب اشكرك على مجاملتك الرقيقه .. واهوا احنا بنحاول نقول كلام يسعد الناس فى وسط جو الاكتئاب القومى اللى احنا عايشينه ولو يا قلم يا سكندرى لك قرايب فى الريف روح اقعد عندهم يومين بس روح اقعد فى الغيطان وانت ترمم معنوياتك وحتكون بخير .. كل عام وانت بخير

يا صفاء يا بنتى يا حبيبتى ..
انت بتجاملى عمك فشكول قوى .. بس هوا مش قد المجامله دى .. ربنا يخليك يا صفاء ويجعل ايامك كلها سعاده .. ياريت انت قريبه والله مش كلام كنت وديت لك منابك .. كل سنه وانت طيبه

مكسوفه العزيزه والعظيمه بنتى حبيبتى
عارفه يا مكسوفه .. الفلاحين حاليا عندهم كل حاجه الدش والموبايل والفيديو بقى موضه قديمه وعندهم الميكروويف والغسالات الفول اتوماتيك .. عندهم كل حاجه وعندهم اللى مش عند بتوع البنادر.. انا مبسوط انك وضبت المدونه توضيبه جديده عشان كنت بدوخ عندك .. كل سنه وانت طيبه يا ريفيه زىىىىىىى

mr_raafat يقول...

استاذي العزيز / صلاح
لك كل تحياتي ولملك وأحمد وجميع أفراد الأسرة
وعيد سعيد وعقبال أما تشوفهم في الجامعة آمييييييييييين
في أمان الله

kochia يقول...

الله يرحم ابوك وامك وتعيش وتفتكرهم
رغم ان التفاصيل كتير بس اكتر حاجة عاجباني هي المحافظة علي تقليد العيد من بلد الاصل والمنشأ
شء بيحسس الناس بانهم لهم اصل ولهم اهل ولهم عزوة
المدينة اخدت كل ده من الناس واصبحنا غرباء في بلد غريبة

وان شاء الله اولادك يحافظوا علي نفس التقليد للابد
كل سنة وانتم طيبين

حاجــ عيال ــات يقول...

السلام عليكم
لاء ماليش دعوة ياعمو ابقى قولي انك هتنزل بوست جديد نفسي اكون اول تعليق بقى
دايما مولان كده

وكمان بتروح تعيد في بيت العيلة وتسيبنا هنا قلقانين عليك
وتتأخر لغاية مالعيد يخلص ..كنا عاوزين نقضي العيد عندي ياعمو
الله يرحم جدو ..أبو الفشكول ..وصيته لازم تتنفذ وكمان تيتا..أم الفشكول ..شوقتني لأكل الكانون أنا طبعا سمعت عنه حكايات والمحشي بتاع الكانون ياسلام طبعا برده سمعت عنه
وعلى فكرة عدد اسرتكم صغير بالنسبة لزمان
المفروض ان العزوة تكون اكبر من كده
يعني والدي اخواته اكتر وفي اكتر منه كمان
الناس دي كانت صحتها كويسة بسبب الكانون ..ههههههه

كل سنة والعيلة الكريمة بألف خير وسلامة وسعادة وهنا
ويارب مع بعض على جبل عرفات

جهاد مشالي

Soul.o0o.Whisper يقول...

الفيلسوف العزيز / فشكول



ربنا يبارك فى عيلتكم يارب
والله يا استاذى العزيز الذكريات دى هيا اللى بتبئا
و بتكون لذيذة جدا

و الـ د. أسامة إن شاء الله لما ييجى يحكى لاولاده على الموقف دا
هيموت على نفسه من الضحك و يقولهم : هيييييييييييه يا ولاد ...والله كانت أياااااام ...ههههههههههههههه


ربنا يرحمك والدك ، ووالدتك ، و حماة محمد
و موتى المسلمين جميعا



و عيد سعيد ، و عقبال العيد الجاى يارب







خالص تحياتى

رئيس التحرير يقول...
أزال المؤلف هذا التعليق.
بس خلاص ... يقول...

السلام عليكم

حمد الله بالسلامه اسعد الله ايامك
رجعتنى بالزكريات الجميله لبيت العيله وجدتى الحبيبه اللى انا كتبت عنها فى بداية مدونتى ...انت تحكى وانا استرجع الزكريات الجميله المحفورة بذاكرتى واتذكرها مع بدايه كل عيد بدمعة حنين الى هذه الايام الجميله ..ربنايخليكوا لبعض ودايما اللمه والعيله .. وطبعا اكل الكانون لايعلى عليه ابدا ابدا وخصوصا المحشى والاوز المطهى على نار الكانون ...ياه رجعتنا لايامنا الحلوة ايام الطفوله.. ولمة العيله وجدتى الحبيبه
كل سنه وانت بالفالف خير ... نشم فى رائحة مدونتك خير الاهل والاحباب دمت لمحبيك اللى احنا اولهم

رئيس التحرير يقول...

شوف يا سيدى .. الموضوع بسيط قوى العلم .. هو ما علمته وطبقته وطورته واستنبطت منه وحفظته للاجيال
الاول :ارد علي نقطه من تعليق حضرتك..
من حيث تعريفك للعلم فهذا هو الجمال بعينه وان كان التعريف صحيحا 90% يبق100% لو قلنا ويحتمل الخطأ و الصواب ...ليه ؟ لو لم يحتمل الخطأ والصواب لأصبح يقينا...واليقين شيئ و العلم شيئ آخر ...ولا حضرتك شايف غير كده ؟
اشوف الموضوع الجديد بقي ...علشان ارجع وأقولك كل سنه وانت طيب ..وعاملين ايه ناس البلد ؟ مش كويسين كده؟

رئيس التحرير يقول...

عوده ...اخي العزيز ...احمد صلاح فشكول..كده ما ينفعش الاسم لازم يكون رباعي ...يا استاذ!
ابدأ..منين واخلص ازاي معاك ...يا سيدي الحكيم دا انت عايز بوست لوحدك..
علي فكره ...انت ساكن فين في شبين ...اناعمتي (الله يرحمها ) كانت مدير عام في ضرائب شبين الكوم ...أدعي لها بالرحمه .وما دام كده لازم اشوفك ...يا حبيب قلبي..طبعا الكلام الي بتحكيه ده مش غريب علي الي زي حلاتنا...انت ما قلتش لهم ليه الجله دي مصنوعه من أيه؟هي جله صيني برضه ولا من صنع روث أندراوس..
كل سنه وانت طيب ..وما يحرمك ولا اهلك من بعضكم ويديم عليكم نعمه اللمه (الجماعه)يعني .
ليه حكايه الحلاقه بعد الدبح دي؟
ما كندكش اخبار عن الكحيان ؟
ربنا يرجعه بالسلامه..
دمت حبيبي...

مسدس صغير يقول...

اقراص الجله اللى بتتحط فى الكانون دى بتخليه يشعلل اصل بعيد عن السامعين احنا بس اللى عارفين سر الكانون واقلااص الجله لأن احنا برده لينا باع طويل بس مش فيها لأ فى السمع عنها ... كلام فى منتهى منتهى البساطه والروعه اشكرك يا فشكول واتمنى زيارة ولو عابرة لمدونتى المتواضعه

daktara يقول...

حلوة ذكريات زمان دي
اييييييييييييه
كانت ايام
كل سنة وانت طيب

للمرة الثانية
ارجو الاختصار
او عدم تطويل البوست كثيرا رحمة بالقراء
ودمتم

انظر حولك
د. خالد عزب

سمكه واحده يقول...

انا جيت اسلم واقرأ البوست اللي واضح انه زي السكر زي حضرتك بس غلبني النوعاس وبدل ما ماما تضرني بالبرطيش الصبح عشان الصحيان يوم الجمعه بيبقي يوم مقدس وكله اجازه يعني ويوم كده اقول ايه ياله الله يسهل للجميع اهم حاجه ودي حاجه مقدسه كل يوم جمعه كنت عايزه اقراء البوست بس قلت الم نفسي واسلم بس ولنا عوده اخري ان شاء الله
اما اقوم انام بقي قبل ما حد يقفشني ولا اعرف اقري لا بكره ولا بعدهبس حبيت اقول حاجه
ان احلي حاجه في العيد العيله بجد والمه وانك تصبح كده اول يوم علي اعز ناس عندك وهما كل دنيتك ولو حتي الدنيا بتخدنا والشغل والسفر والاشغال العيد بيجمع احلي واقرب الشخصيات واحنهم ليك ربنا ميحرمناش من اللمه والناس الحلوه دي
اقوم بقي لحسن الناس الحلوه التانيه تصحي ونتبهدل خلينا ننام بأحترمنا
سلاااااااااام
ماما لا لالا عيب طب مش قدام عموا فشكول
اي اي
طب استني طب خلاص طب يا ست انتي بلاش شعري

daktara يقول...

علي فكره
الصورة السابقة بتاعة العيد واللحمة
ارجو ازالتها
لأن اللي محطوط ده لحم خنزير
ولا يتفق مع العيد
وشكرا

رئـــــيسـة حزب الأحلام يقول...

كل سنة وحضرتك طيب
وياربدايما بخير
واية الذكريات الجميلة دى
عارف بابا بيشكر اوى فى اكل الكانون
ومرة جدتى رحمها الله طبخت لنا عليه كان تحفة
بجد ذكريات جميلة
اسعدك الله

مسعدة يقول...

كل سنةوانت طيب
ذكريااااااااااااااااااااات
جااااااااااااااااااااااامدة

أمل حمدي يقول...

بسم الله ما شاء الله لا قوة الا بالله

مينفعش يبقى لكم اخت تالتة برضه مدرسة ثانوي

ربنا يبارك فيكم ولكم

اللهم امين

كل عيد وحضرتك بكل خير

أمل حمدي يقول...

البقاء لله في حماة ابنك

رحمها الله واموات المسلمين

طـائر الليــل الحـزين يقول...

عم فشكول
كل سنة وانت طيب واضحى سعيد عليك وعلى امة الاسلام كلها
وبجد ربنا يرحم والديك واموات المسلميين كلهم . امين
بس بجد حضرتك فكرتنى بحاجات جميلة كنا بنعملها
العيد زمان كان له طعم تانى
وكمااااااان ان جربت الاكل على الكانون وخصوصا المحشى
ياخررررررربى
له طعم مختلف وجااااامد جدااا
واى اكل على الكانون بيبقى طعم بشكل
بس يا خسارة حتى الفلحيين بقوا نادرا ما يستعملوا الكانون
بقوا متمدنيين يا سيدى يعرفوا البوتجازات
وتحيااااااااتى يا جميل
وكل خروف وانت طيب

أمل فتحى عزت يقول...

السلام عليكم
حمداً لله على عودتك بالسلامة يا أستاذ فشكول يا طيب .
والله رجعتنا لأيام زمان والعيد مفيش يوم أجمل من أيام العيلة واللمة والذكريات . أنا أكلت من أكل الكانون مفيش أطعم منه وأكلت من طهى الرضم فى الصحراء والبر مفيش أطعم منه وأكلت العيش الفلاحى من الفرن البلدى مفيش أحلى منه وأكلت خبز التنور العربى ولا أجمل من ريحته .
أنا أصلى من دسوق وتربيت فى ليبيا وعشت سنوات فى أوروباوليه فى كل مكان ذكريات وطقوس .
ربنا يرحم أموتنا وأموات المسلمين ويبارك فيك يارجل يا طيب .
مع خالص تحياتى.

Unknown يقول...

كل عام وانت كويس ومفتكر الذكريات الحلوة دى يا عمو صلاح....ربنا يعود عليك العيد بكل خير...

عالم ماريونت يقول...

بابا فشكول:
كل سنة وانت طيب ويارب يعيد عليك الايام بكل خير انت وعيلتك الكريمة
معلش عارفة اني سودتها كتير في المدونة عندي بس متخافش انا هعرف ارجع متفائلة تاني
بنتك رنا

قلم رصاص يقول...

كل سنة وانت طب ياعم فشكول

والله انت راجل طيب ومحترم

ونقلت لنا الصورة كما كانت

عيد سعيد عليكم جميعا

بارك الله فيك

بس فين نصيبنا من اللحمة طيب

هههههههههههههههههههههه

كل سنة وحضرتك طيب

الازهرى يقول...

الحبيب فشكول

يا عينى على التماحيك

ربنا يبارك لكم فيهم كلهم ويزيدهم دينا وادبا وعلما واحتراما

وشكرا على دعائك الجميل

لكن اسمحلى بسؤال تانى
هو محمد السادس يقرب لكم ولا تشابه اسماء ؟

تحياتى دوما

حنين القلب يقول...

كل سنه وانت طيب يا عم فسكول
وعيد سعيد عليك وعلى الاسره الكريمه


ليك عندى تاج تعالى خده

اقصوصه يقول...

كل عام وانته بخير بابا فشكول

عيدك حافل ولله الحمد :)

اناالدكتور عطاني يوم العيد وجبه فري

يعني اقدر اتغدى اي شي احبه :)

طبعا انا ابيت ان اترك الفرصه

وقلت لازم استغلها اسوا استغلال

واصريت اني اتغدى فمطعم

من المطام المحترمه عندنا

عشان احسس نفسي بفرحة العيد لووووول

كل عام وانته بخير بابا فشكول :)

أحــوال الهـوي يقول...

عيد عليكم سعيد جميعا

و الله عائلة جميلة و مترابطة و العيد عندكم بيجمع الكل
حتي الخلاف بظرف و لذاذة

ربنا يجمع ما بينكم في الخير دائما
و الحديث عن الوالدة رحمها الله رجعني لسنوات بعيدة و ذكريات جميلة كنت احسب اني نسيتها

و لاني لست بقاص و لا املك قلمك الجميل اللاذع لا استطيع التعبير عن قصة العيلة الجميلة كما فعلت

اعاد الله عليكم العيد و انتم في صحه و سعادة و متجمعين و زيدين باولادكم و احفادكم

لو اعرف انك نزلت الزقازيق كنت استنيتك و اتبركت بزيارتك

تحياتي

Beram ElMasry يقول...

صديقى . fashkool
صديقى انت جميل فى كل الاحوال وبارك الله فى الاسرة ، ذكرتنا بايام الالفة والمحبة والخير والامان
ب2.5 قرش صاغ ، طب ما تقول خمسة تعريفة وفى الهامس تقول عملة مصرية منقرضة منذ ظهور الاوباش
الحله الانجر ، الانجر هو اناء الفتة فى العزايم واحزر المعلومة الخطا فانت تؤرخ ولا تدري
يا خد الكرنيب (المغرفه) ما هذا الكرنيب من معدن ام من خشب فى الشرقية مغرفة وفى الامثال واللى بتلحس المغرفة يوم فرحها زحاليق
4 سنين ، يعنى عيل يا عمونا ،
لك طولة العمر ولنسلك والسلام

عـــفـــراء يقول...

السلام عليكم
عمى الحبيب واستاذى الجليل
يارب تكون فى احسن حال
ويارب كان عيد سعيد وايام مباركه عليكم وكل سنه والاهل بخير وسعاده
عارف يااستاذنا فكرتنى بوالدي اصلة بيحب اللحمه موووت
وكانت عمتى تحكلنا انه كان بيسرق اللحمه من الحله وهية ع النار وايديه تتلسع
ماكنتش بتتلسع يابو الفشاكيل
ههههههههههه
ربنا يرحم والدك يارب ويجعل مسواه الجنه ونعميها
وتعيش وتفتكر ياعمنا
كل التقدير ........

فشكووول يقول...

بسم الله

عزيزتى بس خلاص .. ازيك
اشكرك على مرورك واتنمى ان تكونى بالف خير وسلاما العام القادم انشاء الله ودايما عليك اللمه انت كمان وربنا يعوضك فى جدتك الله يرحمها اذا كانت عايشه او غير ذلك .. كل سنه وانت طيبه


يا رئيسنا يا رئيس التحرير
طبعا ياعمنا العلم شيئ واليقين شيئ أخر .. علميا هكذا وكل نطريه قابله للخطأ بنسبة انحراف معيارى كذا % ثم انك عرفت كل الاسامى بتاعتى .. خد عندك اسم جديد كانوا اصحابى ينادونى به - توتو - وبعدين لما شعرى ابيض كدا حسوا انه بقى صغير عليا فبطلوا ينادونى بيه .. كل سنه وحضرتك طيب يا استاذ حسين انت واولادك والعائله


عزيزى المسدس الصغير .. وليه صغير .. متهيأ لى انك مدفع وبعدين ليه تكون زيارتى لك عابره .. ان شاء الله اعمل لك زياره كل اسبوع على الاقل واحط مدونتك كمان عندى .. زياره جميله منك وكل عام وانت بخير


يا دكترا
والله يا دكتور انت طلبت الطلب ده قبل كدا ان اصغر البوست .. والله حاولت بقدر الامكان وبرضه الى حد كبير نجحت والبوست برضه مش كبير بس المشكله انا عندى حكايات كتير وازاى الخصها .. مش حيؤدى الغرض .. فبحاول باقصى جهدى .. ويا اخى اتعب معايا شويه.. بعدين يعنى ايه انظر حولك .. هما بتوع تحديد النسل مسلطينك على انت وكريمه مختار .. كل عام وانت بخير


سمكمك
طب انا حاعمل ايه فى مامتك بقى .. انا ايدى مكتوفه .. لكن حادعى لها واقول سيبى شعرها الله يخليكى .. البت ما تستحملش الله يخليكى بلاش القلم ده بالراحة عليها شويه .... بس ما تخافيش انا مش حاقول لحد على حاجه وسرك فى بير .. كل عام وانت بخير يا سمكه انت ومامتك وباباك واخواتك والعائله


يا رئيسة الحزب يا مرشحه لمجلس الشورى
ايه رأيك تيجى تعيدى معايا ونبنى انا وانتى 2 كانون انت واحد وانا واحدوهناك الحطب كتير والخشب كتير والولعه كتير ونطبخ محشى ولحمه وكل حاجه .. هييييه .. قلتى ايييييه .. كل سنه وانت طيبه


عزيزتى مسعده
ربنا يخليك ويبارك فيك انت واللى زيك .. اشكرك على مرورك وكل عام وحضرتك بخير وارجوا ان تدوم الزيارات وتشرفينى برزيارتك ثانيه وثالثه وعاشره والى أخره .


ستنا وتاج راسنا ماما اموله
يا ستنا طبعا ينفع تكونى اختنا التالته .. هوا احنا ديك الساعه لما تبقى اختى صباح وماجده وماما اموله .. ايه رأيك تقضى معانا العيد الجاى انت والاستاذ والاولاد .. ياريت تقبلى الدعوه .. كل عام وانت والاسره بخير


ياستنا امل عزت يا بنت بطوطه
والله نفسى اعمل ابن بطوطه زيك كدا والف الدنيا .. بس العين بصيره والباقى انت عارفاه .. يا سلام على دسوق بلد احمد زويل - على فكره هما كل الناس الكويسين من دسوق ويا ترى انت من على الكورنيش والا من ميدان سيدى ابراهيم هناك شوية دكاكين بتبيع فسيخ ما حصلش .. كل سنه وانت بألف خير وصحه


الغاليه انجى :
اشكرك على زيارتك الغاليه ويا ريت تدوم الزيارات على طول وكل عام وحضرتك بالف خير وسعاده


ابنتى رانيا عاشور .. اصحى بقى يا رانيا حتفضلى نايمه كدا على طول .. انا طبعا واثق فى انك حتعرفى تعدى هذا المنحدر وحتقدرى ترفعى معنوياتك .. ربنا ويفقك وكل عام وانت بخير


عزيزى القلم الرصاص
والله يا قلم انت راجل أمير ومجامل ..وعلى العموم نصيبك محفوظ..انامستنيك .. كل عام وانت بخير


حبيبنا الازهرى .. يا أهلا بيك
اصل يا ازهرى محمد فى العيله عندنا متكرر لخمس مرات فيه محمد الكبير اخويا ومحمد الاصغر ابن اخويا محمود ضابط فى الجيش ومحمد التالت ابن اخويا عبد المنعم وحاصل على تربيه رياضيه وفيه محمد الرابع ابن اخويا على حقوق وفيه محمد الخامس ما كملش سنه ابن احمد ابن اخويا على ..خليها فى سرك وما تضحكش وعشان كدا احنا صعاليك بنتمحك فى الملوك .. وكل عام وانت بخير


حنين القلب:
حبيبى .. بالراحه وفى سرك .. يعنى ايه تاج .. واعمل بيه ايه .. من غير ما حد يحس ابعت لى خطوه خطوه.. عشان فشكول الله ينور طور الله فى برسيمه فى الكمبيوتر .. صحيح انا بقراها كتير فى مدونات كتيره بس مش عارف يعنى ايه تاج .. فى الخباسه كدا واشرح لى وقول لى اعمل ايه .. بلاش فضيايح .. كل عام وانت بخير


جميلتى اقصوصه :
اشكرك على المرور وارجو ان تكونى اخدت تارك من الرجيم وفى المطعم اخدت راحتك على الآخر وضربتى لك شوية لحمه وشوية كفته وشوية حلويات وهيصتى على الاخر والله يا اقصوصه الله يكون فى عون اللى عامل رجيم .. يا رب تكون كل ايامك فرى وكل عام وانت بخير


أهلا أهلا حبيبى احوال الهوا
هو انت هنا فى مصر اليومين دول .. حمدا لله على سلامتك با بتاع الزقازيق ... البلد الحلوه .. على فكره انا بروح الزقازيق كتير بانزل عند الجامعه وبركب لحد مجلس المدينه وبادخل من شارع زحمه تقريبا الشارع التجارى واوصل لعملى واخلص وارجع تانى وتقريبا بروح مأموريه للزقازيق مرتين اوثلاثه فى السنه.. بس المواصلات فى داخل الزقازيق صعبه شويه ويا ريت كنت اعرف انك من الزقازيق كنت اعطيتك خبر وقابلتك واتشرفت بيك .. بس انا رحت فجأه عشان حالة الوفاه ورجعت على طول .. كل عام وانت بخير


شاعرنا العظيم
يا سلام يا شاعرنا على الخمسه تعريفه دول كنت اشترى بيهم زجاجة كاكولا واشترى لب وكرمله وطرطور واعيد طول النهار واحوش تعريفه اخر النهار.. بس اول العسكر ما مسكوا البلد وهما ودونا فى ستين داهيه
بس تعرف انا عارف ان الانجر يبقى بتاع الفته بس من كبر الحله عايز اقرب الفكره كمان عندنا بيقولوا على طاجن اللبن ( البوشه ) والمغرفه بيقولوا عليها( كرنيب وسواء من النحاس او من الالمونيوم) ..اصل بلدنا دى تعتبر قعر الريف المصريى وهى قريبه ومجاوره لقرية دنشوان المشهوره فى محافظة المنوفيه .. تحياتى لك يا شاعر وكل عام وانت بخير

فشكووول يقول...

بنتة الحبيبه عفراء
يظهر الاجيال بتاعة زمان دى كانت حرامية لحمه .. تقريبا كلنا كنابنسرق اللحمه من امهاتنا .. وكنت طبعا بتلسع ايدى من غطا الحله وكمان لسانى وانا بآكل اللحمه المسروقه .. عارفه يا عفراء كان يبقى عندنا فى البيت البلح الزغلول المحترم بتاع زمان اللى كان رفيع وطويل مش بتاع اليومين دول اللى بيسموه زغلول وهو مش زغلول .. المهم ما كانش يحلو البلح الا لما نروح نسرق البلع من على نخل الناس وناكله وكان بلح صيص وما لوش طعم لكن كان زى السكر .. مره كنت باسرق نخله وصاحبها ظبطنى فوقها اعمل ايه .. كنت بآخد معاها حبة تراب ناعم فى حجر الجلابيه .. قمت قلت له لو عملت لى حاجه حارمى نفسى من فوق النخله واجيب لك مصيبه قام الراجل قال .. طب انزل بالراحه ومش اعمل لك حاجه .. انا بقى لما قربت للأرض قمت خدت شوية تراب ناعم من اللى فى حجرى وجيت راميهم على وش الراجل وجرى على أخرى .. والراجل يا عينى قعد يدعك فى عينه ويدعى على وكان اسمه (عبد الهادى فرح الله يرحمه ويسامحنى ) شباب الارياف يا بنتى كان شقى قوى .. وكنا نسيب العنب البناتى المحترم فى البيت ونروح نسرق العنب الحصرم اللى فى الغيطان وتين الجميز وحاجات كتير .. كانت ايام يا بنتى وكان الناس متسامحين وبيخافوا علينا واحنا الحراميه .. الله يرحم الجميع ويسامحنا .. تحياتى يا عفراء يا حلم الطفوله وكل عام وانت بخير

مهرة سالم يقول...

عمي فشكول .......
السلام عليكم ورحمة الله وبركاته...
...........
رحم الله والدك و والدتك وموتانا وموتا المسلمين......
وأدخلهم فسيح جناته...
أنا أيضا توفي والدي رحمه الله بالعشر الأواخر من رمضان إلي فات ...

...........
شكرا لإشراكنا هذه اللحظات الجميله...
بس من دون زعل الواد أسامه إبنك فعلا ما ينفعش يبقى دكتور بهايم...
مش عارف أنهي خروف أحسن وأسمن...
دا إتخرج إزاي...
هههه..
المهم إنه فلسع قبل ما يتورط بدفع الفرق...
نـــاصح على أبوه...هههه
............
الله يدم عليكم هذه الجمعه..
ولا يحرمكم من بعض...
وبارك الله فيكم لصلة الرحم..
........
دمت بكل خير..

فشكووول يقول...

M S K الجميله .. تحياتى
الله يرحم والدك ويدخله فسيح جناته .. تعرفى الواد اسامه ابنى ما اشتغلش فى الطب البيطرى .. خد اتجاه تانى خالص اصله دخل كلية الطب البيطرى بفرق نصف درجة بينه وبين كلية الصيدله فكان قرفان وطهقان من الطب البيطري وعشان كدا اشتغل فى شركة ادويه وهو الآن سوبر فايزر عقبال اولادك باعتبار ما سوف يكون .. او ما هو كائن .. عشان كدا لم يمارس الطب البيطرى لكن بيفهم فى الادويه كويس وكمان انا تناقشت معاه المفروض انك مهما كنت بعيد عن المجال المفروض ان عندك خلفيه ..قال يا بابا اصل اللى ايده فى الشغل ممكن يقدر لكن اللى بعيد لازم ياخد فكره مره واثنين وثلاثه .. وبعدين يا بابا خلينا ناكل عيش وآهى ماشيه وما توجعش قلبى على الـ 6 كيلوا لحمه اللى نقصوا منى .. اصلها كانت دبيحه عجل بقرى مش خروف وصعب عليه انه يعرف وزنها كام وتصفى كام كيلوا لحمه بعد الدبح واللى يفهم فى الموضوع ده كويس الجزارين عشان ايديهم فى الشغله دى دايما .. مره اخرى الله يرحم والدك ويدخله فسيح جناته .. دمتى وكل سنه وانت طيبه

daktara يقول...

اقرأ الحادثة
شوف بنات روسيا كاتبين ايه عن شباب الغردقة في
مهزلة sex tourism in hurghada

اسف علي استخدام مدونتك كأعلان ولكن الامر خطير

يمكنك مسحه اذا شئت

سنابل يقول...

ربنا يرحم والديك رحمة واسعة
;كل سنة وأنت طيب وبخير
ويا رب ينعاد عليك انت وعيلتك بكل خير
الله العيد عندكوا حلو أوى

لسة إمبارح ابويا كان قاعد يقولي شعر ف محشي كرنب بتاع الكانون ابقي اعزمني ده احنا جيران

من غير عنـــوان يقول...

وكأني معاكم في العيد ده..

حكاويك مشوقه وإسلوبك كالعاده...رائع

وقريب من القلب وطالع من جوه


كل سنه وإنت بخير وواكل لحمه كتير...

تحياتي

Unknown يقول...

ههههههه
عمى العزيز فشكووووووول
وحشتنى اوى واللة
رحم اللة والدك وادخلة فسيح جناتة
مش عارف اية موضوع الاكل دة
يعنى البوست الى فات اكل
ودة كمان اكل
اية الموضوع جوعتنا
انا بقضى العيد برضوا فى بيت العيلة
بس ما عنديش دقن الحمد للة
ةمش مطلوب منى اضحية
على العموم كل عام وانت بخير

صبرني يارب يقول...

بسم الله ما شاء الله ربنا يزيد ويبارك والسنه الجايه الصغيرين يجوا بولادهم كمان

ويارب تفضلوا على الود والروح الحلوه دايما وتتجمعوا فى الفرح دايما

وعزيلنا ريهام وربنا يصبرها ويأجرها خير

وتحياتي لحضرتك ولعيلتك الكريمه كلها

Mahmoud farag يقول...

اولا : كل سنة و انت بأفضل حال

ثانيا : بعتذر عن التأخير

و انت واحشني جدا أستاذ فشكوول و يارب يديم المعروف

و كان واحشني كتاباتك الساخرة

و ربنا يرحم والدك و والدتك و البقاء لله

و كل سنة و انت طيب

Dr. Ibrahim يقول...

كل عام حضرتك بخير وصحة وسعادة

الله ايام جميلة

بتفكرنا بالموقدة والمغرفة والقاصعة اللى فيها الولعة والفرن البلدى..

وال 15 كيلو لحمة والعيلة كلها تتغدى..

كانت ايام خير وبركة والله..

يااااااااه أيام..

تحياتى لك

د إبراهيم

maha zein يقول...

يااااااااااااااااااااااااااااااااااااااه
بجد ياااااااااااااااااااااااااااااه
ايه الجمال ده
ايه الحكاوى دي
ايه الروح الحلوة دي

استمتعت جدا بحكاياتك عن الكانون والغيطان واللحمة والجو ده
كنت منتظرة تجيب سيرة الباجور بحاجة اصلي بحبه اوي اوي

بجد اتمنيت والله اكون معاك في الجو ده
واتمنيت اكون مقضية العيد معاك في اول يوم واتفرج علي المهازل
بجد حكايتك وهمية
واسلوبك وهمي
وانت طيب جدا
جدا
ربنا يرحم امك
ويرحم ابوك
ويديك الصحة انت واخواتك

ويرحم حماه .....نسيت هو مين
اصل اساميهم كتير
كل سنة وانت طيب بجد

رئيس التحرير يقول...

السلام عليكم ورحمه الله ويركاته...
كده ...لاأسم بقي رباعي يا عمنا..
لما الواحد يكون مدون يقولك ...فشكول باشا...وأخوك بيحبك ...يقولك يا صلاح..ومعاك ي الشغل ..أحمد بيه ..وصاحبك ..يا توتو ..بس احنا مش ح نبطل لأننا مش شايفين شعر أبيض...احنا شايفين شباب زي الفل الأبيض يا ابيض انت...
*************جهاد ...وهوهو ..ماسكين في بعض الحق خلصهم ..

أمل حمدي يقول...

ربنا يبارك فيك يا اخي الغالي

أدام الله عزك واصلح حالك اللهم امين

mr_raafat يقول...

عمي العزيز / صلاح تحية من القلب كيف حالك وحشتنا إنت فين
أسأل الله لكم الصحة والعافية سلامي للأسرة الكريمة ....

mr_raafat يقول...

عمي الغالي / صلاح
اشتقنا إليك والشوق يسبقني
لم أرمي إلي شيء وكل لبيب بالإشارة يفهم
وأنت سيد العارفين وربنا يخليك لينا وتفهمنا علي طول
لك خالص تحياتي
سعيد بالإطمئنان عليك وربنا يجيبك بالسلامة من أسيوط ومتنسناش في الحلاوةوأعمل حسبنا
وتعال بسرعة
ربنا معاك في أمان وسلام

حـــــ الــجــنــة ـــــور يقول...

السلام عليكم
انااااا جيت بجد المشوار يتعب من الجزائر لمصر ربنا يشفي رجليك يا عمي فشكول تعبتك معايا المهم إنك رجعت بسرعة لأهلك وناسك الحلوين دول بجد للحضة وأنا بقرأ في البوست كنت أتمنى أكون وحدة من عيلتك المحترمة بطبائعه الجميلة وبالقعدة الفلاحي دي
المهم مكونش بمكان أسامة بجد يستاهل الضرب كان لازم يعرف يختار لو كنت من الشباب ما يدلوش ولا فتفوتة من اللحمة لا هو ولا شريف هههههههه
الله يرحم والديك وحماة محمد ويسكنهم فسيح جنانهم
بجد عيشتنا بلحضاتك الجميلة وسط الجو العائلي المبهر الله يحفظك لأهلك ويحفظك لينايا عمو صالح
ينعاد عليك بالخير واليمن والسرور والبركة
تقبل الله منا ومنكم
سلامي لكا العايلة وكل لحضة ونحن من الله أقرب
في امان الله وحفظه

mr_raafat يقول...

الحمد لله علي كل حال ولو أني أسيوط دلوقتي الجو فيها أجمل من بنها لكن قدر الله وما شاء فعل ويمكن نتقابل في القطر لأني عندي تدريب في طنطا لمدة اسبوع .
علي جنب بقول لحضرتك أيه هاتنزل البوست الجديد الساعة كام بالظبط ياريت تديني رنة نفسي أعلق أول مرة في حياتي دايما مجنون ومولان سبقني

وحي القلم يقول...

كل سنة وانت طيب يا ابو الفشاكيل

سمكه واحده يقول...

يدوبك لسه مسلكه شعري من ايد ماما دلوقت وجريت اعلق بعد ما قريت العيد الجميل ده ربنا يبارك فيك ويجمعكوا ديما في الخير
انا بقيفكرت في فكره حلوه اوي كنا مش لاقين حاجه نعملها وقلت امخمخ بقي فضي بعيد عنك بس اتسحلنا فيها ياعم فشكول كان في اجتماع طارئ بعد الغداء في بيت العيله معي كبرات العائله كلهم وانا بقي قلت ارخم يعني بعد الغدا وقبل الاجتماع وكان كلام جد الجد خدت من وراهم كلهم الموبايلات ونقلت كام نغمه سخيفه ورقيعه علي موبايل اكبر شنبات وهما في عز المعمعه اتفقت انا والمخافي العيال ان كل واحد يرن من ارقام مختلفه حكم العيال عندنا عندهم ارقام سريه بس وده يرن وتسمع صوت الرنه من شخص متتوقعش ان الرنه دي علي موبايله وهما بيكلموا في موضوع حيوي وتلاقي رنه تانيه من موبايل صحبه اشد منه بس بعيد عنك اي نعم موتنا من الضحك ولك انت تتخيل الموقف بس اتسحلنا اي والله اتسحلنا واللي اتسحل اللي فكر الفكره نفسها
انا بقي صورت الحيوان وهو بيتجتل طخوه عيارين وكان كام يوم رجعوا من ايام زمان كتير
كل سنه وانت بصحه وسعاده ووسط العائله الكريمه ويبارك في عمرك وصحتك روح يا شيخ
سمكه

حاسوباتيه يقول...

كل سنه وانت طيب يارب

"عبير النجار "نيجار يقول...

عمو فشكول ربنا يرحم أمواتنا جميعا ً
بجد حكايات حضرتك جميله جداً ،
مفيش أحلى من أيام زمان ،
ومفيش أحلى من بلد أمي فاهمني طبعاً
تحياتي لحضرتك

هــو..مش ..نـو يقول...

شـــــــوفت المـــــــــركوب
الــــــــــي أنضرب بالجذمــه
بس الجزمه زعلانه ...

وفاء بركات يقول...

دايما مجمعين في الفرح وربنا يخلي الأولاد والأحفاد...
ويرحم الأباء وموتي المسلمين أجمعين
عشنا معاك أيام العيد لحظه بالحظه وبعوده الأيام
وكل سنه وانت والأسره بخير

المتبهدلون في الأرض يقول...

أحلى فشكلة منك يا جدو فشكوووووووووول




أوحش حاجة في الموضوع ..الفرقة اللي بعد التجميعة دي .


بتبقى موجعة شوية




وأحلى مافيها "الخناقة "...أصلي بحب الشماتة


::::::::::::

إعمل حسابك : العيد الجاي حنقضيه عندك ... وحنشارك في أضحية ثالثة "أضحية المدونين"



كل عام وانت الى الله أقرب

ابنك الصغير:اللى شايل همه