الاثنين، ١٥ ديسمبر ٢٠٠٨

بذمتكم حد يقدر يشترى الجزنه دى




فشكول بيتكلم بجد من غير فشكله

اعرف ان هذا البوست سوف يثير على المشاكل وسوف يثير ايضا الانتقادات من احبائى المدونين .. ولكن ايمانا منى بالمثل القائل .. يا بخت من بكانى وبكى الناس على .. ولا يضحكنى ويضحك الناس على وتعليقا على موضوع الصحفى العراقى منتظر الزيدى الذى قذف الرئيس الامريكى جورج دبليو بوش بالحذاء وفق ما اذيع بالفضائيات وما نشر فى صحيفة المصرى اليوم نقلا عن وكالة الانباء الفرنسيه وهذا هو الخبر بالنص

تعرض الرئيس الأمريكى جورج بوش إلى موقف لا يحسد عليه أثناء زيارته الوداعية والمفاجأة إلى العراق أمس، حيث قام صحفى عراقى برشق حذائيه باتجاه بوش ورئيس الوزراء العراقى نورى المالكى أثناء مصافحتهما وهتف الصحفى قائلاً «كلب» موجها حديثه لبوش، بحسب وكالة الأنباء الفرنسية.
وبعد المصافحة بين بوش والمالكى فى آخر لقائهما، قام مراسل قناة «البغدادية» الصحفى منتظر الجيدى الذى كان واقفاً بين المراسلين برشق حذائه باتجاههما قائلاً «هذه قبلة الوداع يا كلب»،
لكن بوش ابتسم قائلاً «لقد قام بذلك من أجل لفت الانتباه إليه، هذا الأمر لم يقلقنى ولا يزعجنى، أعتقد أن هذا الشخص أراد أن يقوم بعمل يسألنى الصحفيون عنه، لم أشعر بأى تهديد» وقال ضاحكاً بعد أن تفادى الحذاءين: «كل ما أعرفه أن مقاسهما ١٠»،
وقام رجال الأمن العراقيون بتطويق بوش وطرد الصحفى من القاعة، ونهض صحفى عراقى آخر قائلا: «إننى أعتذر باسم الصحفيين العراقيين».
من غير ما حد يزعل منى .. تعالوا بقى نتكلم بجد شويه
ايه اللى عمله الصحفى العراقى منتظر الزيدى ... هل تحررت العراق ... لا ... أمال ايه البطوله والفداء اللى عملهم ... لا شيئ ... ايه اللى الصحفى العراقى ضحى بيه ... نعم اكيد هو ضحى بحاجات كتير .. اكيد حريته على المحك .. اكيد حياته على المحك .. اكيد هو حيواجه متاعب كتيره .. لكن فى الأخر .. ايه اللى اتحقق ؟ ... لا شيئ .. شو اعلامى ... صبركم على ... ما تهيجوش وتطلعوا بمظاهرات ضدى وتطالبوا باسقاط واعدام فشكول .. احنا قلنا حنتكلم بجد شويه .. ايه بقى الكلام الجد؟
الكلام الجد ان امريكا مفتريه ... صح .. ان امريكا حاربت ودمرت العراق .. برضه صح .. ان امريكا بنت ستين فى سبعين ... ما اختلفناش .. ان امريكا عايزه الحرق ... والله فعلا دا كلام معقول ..
طب فيه ايه يا فشكول ... اقول لكم .. اصل فشكول مبقوق من اللى احنا بنعمله وكمان من اللى احنا ما بنعملهوش ومفروس وتعالوا نبتدى الموضوع من الاول :
فى 11 سبتمبر هدينا ادنيا على دماغ امريكا .. طبعا تستاهل ما اختلفناش .... لكن ايه اللى كان عندنا ... كان عندنا جون كويس .. قولوا انتم.. طب كان عندنا استوبر كويس ... قولوا انتم .. طب كان عندنا ليبروا ... برضه ردوا انتم .. حتى خد وسط كان فيه ... ما تردوا يا جماعه ... ما كانش عندنا حاجه خالص .. طب كانت ايه استعداداتنا ....ولا حاجه ... حتقولوا ان اللى عمل كدا جماعات بيقولوا عليهم ارهابيون ... طب ما هم مننا ... طب بزمتكم مش كنا فرحانين ومزقططين وشمتانين كمان ؟ ما علينا ... ممكن تقولا دول اليهود اللى دبروا ... صح هو كدا فعلا ... بس يا حلويين يا طعمين يا ولاد يا سكر انتم مين اللى نفييييذ ...... سؤؤؤؤؤال ؟
لفت الايام ودارت الايام والغم كله جه على دماغنا وبقينا نسقط كأوراق التوت الذابله ... شوفوا اللى حصل فى افغانستان ... فى العراق .. فى فلسطين وفى غزه .. فى الصومال ... فى جنوب السودان وغربه فى دارفور ... فى لبنان .. شوفوا عايزين يعملوا ايه فى سوريا اللى شاربه من الهم زينا بالضبط خدووووا بالكم كل دول محاوطين مصر من كل الاتجاهات ... الغم المسييح انهم حيدوا ليبيا ... خدوووا بالكم .. يعنى بقينا بين فكوك الكماشه ... مش فكيها بس ... فكوووووك .. حرجتونا عن الموضوع .
شوفوا يا جماعه ... احنا خيبتنا ثقيله ومرطرطه ...عايزكن تفكروا معايا فى حاجه صغيره خالص بتحصل قدامنا جميعا ... ايه رأيكم فى خطباء المساجد لما الواحد فيهم يلعلع وصوته يشخلع ويفنجل بقه ... مش عينيه ..ويقول .. اللهم عليك باليهود قاتلى الانبياء ... واحنا فاتحين حنجرتنا وفرحانين ونقول ...آمين ...ولا بنفكر ولاغييين دماغنا خالص ... اللهم عليك بالأمريكان ... احنا بقى ... آمين ... اقتلهم شرقتله .. امين .. مزقهم شر ممزق .. امين ...شتت شملهم .. امين ... فرق جمعهم .. امين وحوالى ربع ساعه والخطيب عمال يشتم فى الدنيا كلها ويدعى على كل البلاد واحنا نقول امين وخلاص ... ادى كل اللى بنعمله ... ندعى ونقول امين وخلاص .. هيجنا الدنيا كلها علينا وخلاص .. اظن العالم كله حيقف يتفرج علينا وهو عارف نيتنا فى اننا عايزين نمزقهم شر ممزق ونيتم اطفالهم ونرمل نسائهم ...والحاجات دى وحيسكت .. لو ما كانش عندنا اعداء ...يا سلام !!! نقدر نعمل اعداء كتير وبسهوله ... احنا حنغلب يعنى ... طب فكروا بقى فى الدعاء ده ..أنا ما بقولش وحش لا قدر الله ...لأ ... الوحاشه مش فى الدعاء .. الوحاشه فى الامخاخ اللى ورا الدعاء وتعالوا نشوف ...
ماذا اعددنا لليهود والامريكان اللى احنا عايزين نمزقهم شر ممزق وعايزين نشتت شملهم.. كان مفروض من زمان يكون عندنا نووى .. كان مفروض نقدر نعمل طياره نحارب بيها زى كافيرالاسرائيليه حتى يعنى .. كان مفروض نقدر نعمل برضه دبابه .. كان مفروض عمرنا بلدنا بالصناعه والزراعه والمال .. كان مفروض عندنا بحث علمى .. كان مفروض دول النفط اللى بتصرف فلوسها فى تايلاند وبانجوك ومانيلا ولندن وباريس وشارع الهرم ... كان مفروض الاموال دى وجهوها للتنميه المستدامه (ايه التنميه المستدامه دى .. بلاش الكلام المكعبر ده يا فشكول) ... باختصار مع كل الفلوس اللى معانا دى سواء فى بلاد النفط او عندنا ...ما تفكروش ان احنا ما عندناش .. والله عندنا .. احلف ليكم بالرغيف السخن يبرد ان عندنا كتير ويفيض ويزيد .. بس يسيبوه لنا - برضه خرجنا عن الموضوع - كان المفروض الفلوس دى خلتنا من الدول المتقمه والمتحضره والمتمدينه ...مش من الدول الصعلوكه اللى بيدلعوها ويقولوا عليها الناميه ولا هى بتنمو ولا بتتقدم دى بتتشل يوم ورا يوم حبيبى ما جانى نوم .. حبيبى ما جانى نوم .. حبيبى وادينى جيت .. وسميره سعيد وهيفاء واليسا ونانسى عجرم .. والله زى السكر وما فيش منها ... لأ .. والبت اللى اسمها رولا .. يا سلاااااام .. ولا البت اللى ما لهاش اخت فى الدنيا اللى اسمها جمانه ..مش عارف ايه دى .. عظمه على عظمه - ركز يا فشكول انت حتهجص ولا ايه .. ما علهش يا جماعه - اصل انا منكم عربى وما بفكرش غير فى الحاجات الجميله دى ... لأ يا فشكول انت بتتكلم فى الجد .. هو فشكول بيعرف يتكلم الا فى الجد والله ما قلت ولا كلمه غير فى الجد بس ساعات بقول جد مخطرف ومهبل شويه يعنى لزوم الهبل والعبط بتاعنا .. طب شوية تركيز يا فشكول .. آه نسيت اقول لكم قوم ايه ... قوم ايه .. ما هو الحكايات هى اللى احنا شاطرين فيها والشاطر حسن وام سحلول ..هو احنا شاطرين غير فى كده قوم ايه .. نرجع مرجوعنا :
احنا يا جماعه قعدنا على مقعدتنا (اصل الكلمه الاصلانيه ما تتقالش) وقاعدين ندعى على خلق الله كلهم ونشحت اعداء من كل حته من غير ما نعمل حاجه غير اننا نقعد على مقعدتنا (اللى الكلمه الاصلانيه ما تتقالش) وعملنا زى اليهود لما قالوا لطالوط (اذهب انت وربك فقاتلا انا هاهنا قاعدون) واحنا من يومها واحنا بنحب قاعدون دى ومبسوطين قوى بيها وما نعرفش نعمل حاجه غير قاعدون - مسرفون - مبذرون - محششون .
احنا فرحانين قوى ومنشكحين قوى ان الراجل حدف بوش بالجزمه ... الله .. ما فيش احلى من كده .. كفايه علينا ....يعنى شفينا غلنا وخلاص ..ما احناش عايزين حاجه تانيه بس ........... تفتكروا ان:
احنا بالجزمه حررنا العراق؟
ولا كرشنا اليهود من فلسطين ؟
ولا رجعت افغانستان افغانستان ؟
ولا الصومال استقرت وبقت دوله زى خلق الله ؟
ولا خلصت مشكلة السودان ولا عملنا ايه فى دارفور؟
ولا استقرت سوريا وبعدت عن التهديد والضرب والخراب؟
شوفوا فيه ناس تانيه قريب مننا عملت ايه .. وبتعمل ايه ؟
ديمقراطيه ...حد ينكر ...بناء ...حد يقول لأ .. تصنيع ... فيه ...صواريخ...فيه ..تنميه ... أه ... حتى النووى فى الطريق .. ولا حد يقدر ينكر ده .
يا جماعه بدل ما نقعد ندعى على خلق الله كدا تعالوا نقول (اذهب انت وربك فقاتلا انا معكما مقاتلون) مش يبقى احسن : والحكومات بالدرجه الاولى هى المعنيه والشعوب هى الوقود .
يا اخوانا : ان تطهير بلادنا من الداخل يقتضى تحريرها من اعدائها من الداخل والخارج ان اعدائنا فى الداخل هم مصدر كل ما تعانيه بلادنا .. ان اقامة المجتمع الحق على اصول وقواعد ثابته ترضى الجميع يقتضى تطهيره من المفسدين الذين يقتاتون على دم المجتمع .
يا ربت تكونوا فهمتم فشكول .. وتقدروا هو عايز ايه .. ويارب ما تطلعوش فى مظاهرات تطالبوا باسقاط واعدام فشكول .. ولو ان دا وارد من ناس تانيه ... كل الموضوع فشكول عايزنا نبص للداخل ونقويه ونأكله ونشربه وننميه ونصنعه ونزرعه ونوقفه على رجليه .. وبعد كدا نقفل ونقول للعالم كله اللى احنا عايزينه ... مش يقف لنا واحد فى الشارع واللى يفوت عليه يقوم يديله على قفاه وما فيش حد يقدر يرد عليه .. طب وايه الحل بقى .. الحل نروح للجم ونربى عضلاتنا ونكبر المجانس شويه وبعدين نروح بقى للبلطجى واحنا ساعتها حنقدر نضربه على قفاه وما يقدرش هو يضربنا على قفانا .. ومش حيقدر يتكلم ...
طولت عليكم ..ما علهش

هناك ٥٣ تعليقًا:

Soul.o0o.Whisper يقول...

ايه دا؟؟؟؟


لسه محدش علق ؟؟؟


هما الناس نايمين ولا أنا اللى جاية بدرى؟؟؟




طب الحق احجز طيب!!!

Soul.o0o.Whisper يقول...

اممممممممم ....


أستاذى العزيز / فشكول ...

لماذا اعتقدت ان هذا الموضوع سيسبب لك مشاكل ،
و قد يثير الانتقادات ؟؟!!..

لن أقول إلا كما قلت عند خالو الصباغ ،


الحمد لله إن فى حد لسه عنده دم ...
لكن....

هل دا من العقلانية ؟؟
كان يعلم انه سيذهب الى غير رجعة بفعله ، بدليل قوله " قبلة الوداع "
و رغم ذلك فعلها ليستغفر لذنب و ذلة أمة بأكملها ..

و لكن من رأيى أن ما فعله لم يكن صوابا ابدا ...

هذه البلاد عندما أرادت رشقنا بالأحذية ، دخلت بيوتنا بارادتنا ،
و أقتحمت بلادنا بالرغم عنا ..
هتكت الاستار ، و مثلت بكتاب الله ،
و رغم ذلك قام زعماؤنا يصافحون زعماؤهم فى ود واضح ..


ترى هل سنقف بجانب هذا الصحفى ،
و سنسأل عنه و نحييه ، كما فعلنا أول ما رأينا صورته و هو يوجه حذائيه لبوش؟؟؟

أم سنبتلع ألسنتنا مرة أخرى ،
و نطأطأ رأسنا مرة أخرى ،
و نستغفر نحن عما فعله هذا المجرم فى حق من يعلونه شأنا ؟؟؟




أتمنى فعلا فعلا أن نعالج الامور بشكل أفضل ، و أن نعرف كيف نوجه أحذيتنا ...




آسفة بجد ، بس هو دا رأيى





خالص تحياتى

mohamed ghalia يقول...

يلا ياعمى فشكول اهى محاولة
الراجل اتخنق فضربه بالجزمة
صحيح موصلناش لحاجة بس كفاية منظرة قدام العالم
دمت بكل الود

اقصوصه يقول...

انا من رايي يستاهل

مالت عليه

على بوش طبعا :)

وتسلم ايد الصحفي العراقي

بصراحه برد نارنا :)

بابا فشكول

اول مره اكون من اوائل المعلقين :)

فشكووول يقول...

العزيزه سول ويزبر
العزيز محمد غالى
الجميله اقصوصه
انا ما كنتش منتظر التعليق بتاعكم الحلو ده ومنتظر غير كدا لان انا ما كنتش كملت البوس كتبت يا دوب المقدمه ورحت عشان اتغدى وبعدين كملت البوست تعالوا بقى شوفوع بالكامل ومتهيألى ان حتقوم مظاهرات باسقاط واعدام فشكول وربنا يستر بس تعليقكم ريحنى شويه وطمنى شويه بس اما تكملوا بقى ربنا يسترها علينا .. تحياتى واشكركم على التعليق

رئيس التحرير يقول...

الحمد لله ...بس خلاص لسه ما جتش..
رأيك يا باشا فشكول ...فشكله والله هـوهـو...وسبقك ...شوف بقي ...هوهو...أتكلم احسن من الكل ..
كلامك في الصميم يا عم الكل انت ...بس مين يوعي ...
راجع لك تاني....

صفــــاء يقول...

.
عمنا الغالى
بالعقل اهو وبالمنطق وبالهدوء وبكل صفات الحكمه اللى فى الدنيا

انت بتعتب عليه؟
احنا بشر ... بنى أدم
تحت الضغوط اللى هو أكيد عايش فيها والألم اللى بيعانى منه
أعتقد وبشدة انه عمل كدة من غير ما يفكر
دة مش تهليل ولا سعادة باللى عمله
بس كمان ميصحش نلومه او نعتب عليه
هو أدرى بوجيعته ووجع شعبه
هو أدرى بالمرار والغلب اللى بيعانو منه
.. اعصابه فلتت اتصرف بدافع انفعالى
وكفايه عليه انه هيخسر حريته زى ما انت قولت
لكن ان كان على تحرير دولنا وحل مشكلاتها فدى بالتأكيد مش وظيفه منتظر لكن وظيفه اللى أكبر منه منصب وأقل من حذاءة مقام

تحياتى لك يا حكيم
.

حـــــ الــجــنــة ـــــور يقول...

السلام عليكم
كيف حال عمي الفشكول ؟ تصدق بالله جيت على الجرح بكل حرف من كلماتك أنا دلوقتي كنت بتفرج على الأخبار وشفت الحدث الجميل ده يسلم إيد الصحفي العراقي وربنا يكون معاه
بس أنا لو كنت في مكانه مكنتش عملت كده علشان حذائي أنضف من وش الكلب ده(بوش) الله على الظالم
أنا عارفه إنك بتقول في قلبك البنت حور قاعده تدعي وخلاص وأهو محصل أدعية أخوانه السابقين أمييين
بجد إحنا لا زم نعمل لي ماعملوش السابقون يعني لازم تطور تطنولوجي ولازم نووي ولا إستعداد لأعداءنا وأعداء الله لعنوا إلى يوم الدين
تعقيبا على موضوع الصحفي أكيد رمي الحذاء مش يرجعلنا العراق ولا حرر فلسطين ولو كان كده كانت الناس لي فجرت نفسها وسط الحشد الملعون جابت نتيجه...
بجد لازم نتوكل على الله ونحاول نخلي الإسلام يفخر بينا زي ما إحنا مفتخرين بيه
وخلينا نصحي العروبة لي نايمة من سنين

العرب فالحين يتخنقو على الصحراء الغربية وتقسيم المساحات الجغرافيه كأنهم حيخلدو

وماباقي إلا وجه الله الكريم

نسأل الله الهداية والصبر والتفاني في العمل من أجل وطن عربي مسلم واحد

وربنا يهد أمريكا وإسرئيل وكل ظالم معتد

سلمت من كل شر يا أستاذي الفاضل وبارك الله فيك

وإحنا كده مش حنقوم بمظاهرات تندد بإسقاطك وأعدامك لا طبعااا بس حنعمل لفته وندعي ربنا يكون في ناس بتفكر زيك حفظك الرحمن

وبقول للكلب بوش مع إن الكلب أوفى منه تعيش وتاكل غرها..

دمت بكل ود

معذرة على الإطاله بس إعذر حرقت دمي

تقبل مروري وخالص تحياتي

رئيس التحرير يقول...

السلام عليكم ورحمه الله وبركاته..
نحن ياسيدي الفاضل نحب اللمه ...وفي اللمه قول زي ما تحب لكن عند الفعل لن تجد الفاعل ..ونقعد علي الي ماتتسماش ..ونولول زي الحريم علي المفعول به ..وندور علي الفاعل بعد ما يصبح ظرف زمان ..ممن شويه كان في المكان سبنا القلب ورحنا لحرف الجر يجرجر جتتنا للي احنا فيه !!!نضحك شويه ونبكي اكتر ونروح ندور علي كلام في كلام علي هموم وهموم ونلوم علي غيرنا ...
من وجه نظر الصحفي ...الولد بطل
من وجه نظرنا ماعندناش نظر...بس خلاص هس ...احسن جوانتناموا ...تصحي ..سلام

mr_raafat يقول...

الأستاذ الفاضل / صلاح
بعد التحية قرأت المقال بتأني لأنك رجل ذو خبرة في الحياة وفي السياسة . ولكن مع احترامي لرأي حضرتك واتفاقي في معظم ما جاء فيه إلا أنني اختلف في شيء واحد وهو أن هذا الفعل وبحق أثبت أن في العراق رجال لهم شجاعة الرجال وكرامة الرجال . رجل رأي شعبه يذبح رأي فتياته تنتهك أعراضهن نسائه رملت أطفاله يتيموا ثراته نهبت كل هذا باسم : مرة بسبب السلاح النووي وأخري للسلام وثالثة لحماية الأمن الأمريكي ولم يجد " هذا البوش الصغير " من يقول له أي كلمة بل وبكل تبجح يذهب ليغظ العراقيين في دارهم ويشعرهم بالعار الذي لحق بهم . عندها ظهرت النخوة العربية لدي هذا العربي وأثبت للعالم أن مقام هذا البوش هو " الجزمة " فلا أدل علي أن يمرغ أنف أريكا في التراب ويثبت للعالم أن العراقيين يرفضون هذا الاحتلال ويكون بمثابة إثارة لرأي الأمة بعد أن اعتقد الناس أن العراق ماتت فيها النخوة والشهامة والرجولة .
ويكون عبرة لمن يعتبر . فأنا أري أنها رسالة ضمنية لما يرفضه العراقيون من الاحتلال وعليهم أن يجلوا عن أرض العراق
يكفي أنه أيقظ الناس وأحيا فيهم الهم وأثار قضية شعبه حتي ولو كان ذلك ثمنه حياته ومستقبل فلا مستقبل لشعب محتل أرضه مستباحة حرماته.
له مني كل التقدير والاحترام
فهو باعث الأمل " المنتظر الزيدي "
كل احترامي لأستاذي العزيز

بس خلاص ... يقول...

عمنا رئيس التحرير انا جيت بسرعةاهوه اشوف ايه اللى بيحصل ده ....
فشكول بك .... حضرتك بتتكلم كلام منطقى جدا جدا ... وكلامك ده رساله صادقة ياريت يفهمها ويعيها كل من يدعى الغيره على عروبته واسلامه ...فعلا ابدأ بنفسك ...الاصلاح لابد ان يبدأ من داخلنا .... لافائده اذا لم نعمل على اصلاح انفسنا ولكننا كعادتنا ..لما كان الخبراء الروس زمان بيساعدونا وبيبنوا السد عالى ....ايه اللى عملناه ..كنا بنغنى (كنا هنبنى وادى احنا بنينا السد العالى )...كلام فى كلام
ولكن نسينا ( واعدوا لهم ماستطعتم من قوة ) ..
موقف هذا الصحفى انا اعتبره رد فعل انفعالى زى ماحضرتك بتقول ...وممكن الراجل بل اكيد هيتدمر على كل المستويات ... ولكن (اغضب ) هذا مافعله الرجل عبر عن غضبه ...ممكن يكون رمز للغضب ... يمكن يخلى الناس التانيه تنكسف على دمها وتفك الايادى المكتوفه وتفوق وتغضب هى الاخرى .....
الرد على حضرتك فى الموضوع ده عايز بوست لوحده ...
وبعدين انا اعرف سميره سعيد وهيفاء واليسا ونانسى عجرم لكن مين جومانه دى ..ماشى ماشى ياعم الكل ووووووووولايهمك

فشكووول يقول...

رئيس التحرير .. انا رحت عند هوهو وقريت الموضوع وفى الحقيقه اول مره اعرف الموضوع من ههوهو وبعدين قعدت ادور عليه فى الجزيره والعربيه والعالميه والحره وتليفزيونا الميمون وقريت المصرى اليوم .. على العموم مستنيك اما ترجع تانى عشان اشوف انت حتعمل فى ايه .. اصل البوست اللى انت قريته كان المقدمه بس .. والتخين كان فى القعر .. ربنا يستر

صفاء العزيزه : والله يا صفاء عارف انه بيعانى انفعالات كتيره وضغوط كتيره وحاله وحال شعبه يغم وهو عمل كدا من الكبت اللى جواه وقتلى بلده وكل حاجه وحشه حصلت للعراق .. لكن انا ما بتكلمش عن تصرف شخصى .. مش ملاحظه ان التصرف الجمعى العربى كله انفعالى .. انا اتكلم عن انفعالات شعوب لا اشخاص وانا اول واحد منفعل وحاسس بالقهر من عمايل الامريكان فينا ولو على عايز احدفهم بالقباقيب .. ولو دا حصل كمان هل يكفى وخلاص .. لازن تتغير طريقة تفكيرنا وتصرفنا الى العمليه .. ومش كفايه نقول احنا الفراعنه اللى علمنا الدنيا ولا كانت الخلافه الاسلاميه ولا الاندلس .. الحاجات دى بقى لها اكثر من الف سنه واحنا تهنا بعدها ولا لقيناش الطريق تانى .. احدث حاجه كانت الاندلس من 650 سنه ودا فى عمر الزمن كتير .. ومن يومها ايه اللى عملناه؟ سؤؤؤؤال يا صفاء .. تحياتى

حور الجنه بنتى حبيبتى .. آهو انتى قلتيها .. احنا شاطرين نتخانق فى الصحراء الغربيه ومشاكل بين الجزائر والمغرب عشان الصحراء الغربيه ومشاكل بين ليبيا ومصر عشان النهر العظيم ومشاكل بين البحرين والسعوديه عشان الحدود .. احنا لما ما نلاقيش حد نتخانق معاه يمكن نحط مرايه قدامنا ونتخانق مع نفسنا .. انا اقصد يا حور التصرف الجمعى للعرب وليس تصرف الصحفى الشخصى وكلنا معرضون لان نفقد عقلنا للحظه زى الصحفى العراقى .. لكن ما انتش شايفه ان العقل الجمعى العربي فاقد عقله على الفاضى وعلى المليان .. تحياتى حور

maha zein يقول...

معاك في حكمة كلامك
بس صدقني يا عمو فشكول
يكفي انه عبر عن اللى جواه
يكفي انه تحدي اي حاجة وتحمل وهيتحمل البلاوي عشان يقول اللى جواه
عشان يعمل حاجة في مية مليون عربي نفسه يعملها

حقق لناس كتير حلمها
النظرية في الرمز
في الموقف
في دلالة اللى حصل
بجد يكفي انه حس ان نار وحرقة قلبه اطفت
صدقني يكفي انه تحدي خوفه وجبنه ونفسه


ليك عندي تاج بايت من زمان
علي فكرة

وهستناك ترد عليه

Dr. Ibrahim يقول...

هو غضب وحماسة الصحفى جعلته يعمل كده

ولكن رأيى من رأيك

وكلام حضرتك تمام وزى الفل

احنا بس فالحين نهيص فى المولد

بس كان من رأييى ان الصحفى ميعملش كده

كان فى ايده يعمل اكتر بحكمة ودهاء من كثير الاعمال التى تعمل على تقدم الامة

واحنا قاعدين ندعى وندعى

ومفيش حد اصلا عمل شرط واحد من شروط إستجابة الدعاء ..

والسماء لاتمطر ذهبا ولا فضة..

تحياتى لك

د إبراهيم

mr_raafat يقول...

العزيز الغالي / عمي صلاح
كل التحية والسلام ولا عاش ولا كان اللي يعمل قصادك مظاهرة دا أحنا نتعلم مننا .
عمنا لقد أرحت قلبي وعقلي بعد هذا الرد .
وقلي رحت بنها النهاردة ولا طنشت ، حاولت أشوف حضرتك في محطة القطر ولكن دون فائدة أنا بكون في قطر الساعة 7 الصبح ربنا معاك ويديلك الصحة
تقبل تحياتي

نبض الروح يقول...

بصراحة أعجبني اللي سواه الصحفي منتظر العراقي وبوش يستحق ماجاه وبعيد عن المثالية وماتحتمه مهنته وإلا المكان اللي هو فيه فبوش يستحق ماجاه وعساه أكثر وهذي حرية شخصية أليس بوش ينادي بالحرية إذن فليتقبلها من صحفي أراد أن يجرب تلك الحرية :)
ولانتكلم عن الخيال ونقول المفروض نكون أرقى ونحارب ونواجه ونقاطع لأننا لا نستطيع أن نفعل شيئا ولربما ما فعله من أضعف الإيمان :)

فشكووول يقول...

نبض الروح .. يعنى احنا حنفضل دايما فى اضعف الايمان ما فيش بيده ابدا .. على العموم اهو رد فعل برضه واحسن من مفيش

نبض الروح يقول...

الوضع اللي إحنا فيه يحتم علينا إننا نكون في أضعف الإيمان , ومتى ما استردينا قوتنا اللي ماراح نستردها إلا بقوة إيماننا بالله يمكن وقتهانقدر نسوي شي
امممممممممم وأكيد الاختلاف في الراي لا يفسد للود قضية :)

رئيس التحرير يقول...

السلام عليكم ورحمه الله وبركاته
عمي العزيز...فشكول انا معاك من اول حرف لآآآخر الطرف .لا اختلف معك في كلمه ولا حتي في حرف ...لكن انا من الأول مع ..هـوهـو..هو البطل قال برضه زي الي قلته ...واخد بالك من كلمته ( مش هو دا الكلام )هو هو دا يا عم فشكول بيسخر مننا كلنا ...وهيطلعنا من الموضوع ...
انت عارف انا نفسي في ايه ...أطلع الم المدونين كلهم بدون ذكر اسماء واحد واحد
ونجيبك في ميدان عام ونحطك قدامنا ونقف
ونقول بصوت واحــد....*****
**************************
+++++++++++++++++++++++++
&&&&&&&&&&&&&&&&&&&&&&&&&&&






أخترناك ...أخترناك.

رئيس التحرير يقول...

يا عم انت ...مالكش دعوه ...وافق والجزم ناخدها احنا ...حد لاقي!!!

Soul.o0o.Whisper يقول...

أستاذى العزيز / فشكول


أنا بردوا قعدت أقول يا رب فى حاجة ناقصة
أستاذى فشكول قال تعليقا على ما فعله الصحفى ...
و قام سارد الواقعة ، لم يعلق بشئ ؟؟
يا ترى دا من ضمن الفشكلة ؟؟
بس هو قال هيتكلم جد مش فشكلة ....



اممممممممممممممممم
تسلممممممممممم إيدك

بجد بجد قلت كل اللى نفسى أقوله ،
فتحياتى لفكرك العالى ...


لى استدراك صغير فقط يا سيدى ..

*زى اليهود لما قالوا لطالوط (اذهب انت وربك فقاتلا انا هاهنا قاعدون)*

اليهود قالوا كدا لموسى مش لطالوت ..


و مستنية كلامك عن جيفارا و كاسترو باعتبارك كنت من معاصريهم ...ماليش دعوة ...


بس لا السفير الكوبى و لا الايدا قالوا حاجة وحشة عن فيدل ...
تفتكر كانوا بيداروا عليه ؟؟؟
ههههههههههههه

بجد نفسى أعرف الناس هنا كانت بصه له ازاى ، و كان تفكيرهم وقتها ايه .؟؟؟



مستنية و مش تفشكلنى ، اه باقولك اهو







خالص تحياتى

وفاء بركات يقول...

المفروض ان كل الصحفين بل كل الحاضرين
ضربو أبن فردة النعل ده بأقدم برتوشه
عمال يصول ويجول في المنطقه أ{ض وجو وبحر
ولاحد همه..
بس ايه الواد الصحفي ده راجل ربنا يسترها عليه...
لوكل واحد فينا أحتفظ بالجزم القديمه
وخصوصا لو أف يعني كنا عملنا أسلحة دمار شامل وسلم لي علي البرادعي..
هما خلو حليتنا حاجه غير الجزم ندافع بيها عن نفسنا...آآآآآآآآآآآآآآيه
ياأ.فشكول خلي الواحد شايل همه في قلبه وساكت

Empress appy يقول...

هو نفس عن غضب جواه باى شكل وبس

حروف يقول...

يا فشكول باشا انت مكتبتش حاجة غير الوقاع احنا كلنا عارفين بس نفسنا نفرح بنحاول نفرح متستخسرش الفرحة فينا كل كلامك احنا عارفينة حتيمنتظر عارفة بس عشان احنا مش عارفين نعمل حاجة بسبب القمع ...... وانت فاهم ومش قصد منتظر ان يقتل بوش لا قصدة يسيب علامة ي تاريخة كدة افضلة لانة حيكون اشرف لبوش انة يغتال وينال هذا اللقب وتضرب وراءة رصاصات الوداع العسكري ومسيرة عسكرية انما هذا افضل له حركة الزايدي ماهي الا عملت صحوة زي ميكون حد ضربك بلالم وقاللك فوق بئا خليك شجاع يا فشكول هو كدة خلي ناس تفكر انها تبئا شجاعة وحتي لو لمرة واحدة منتظر عملها ومفكرش انة يتقتل فكر انة يغير بايدة واقع شايفة وميسكتش اينعم دة مغيرش حاجة من وجهة نظرك انما غير فكر عراقيين ساكتين تعرف ان ولا محامي عراقي اتطوع لمنتظر في حين ان المشات عرب اتطوعوا خوف مالي العراقين بسبب اللي حصلهم ستاتهم وبناتهم اتفتك عرضهم ودام محارمهم ومقدروش يعملوا حاجة تعرف ان المنتظر كتب في موضوع فتك اعراض نساء عراقيات برغم ان دة ممكن يسببلة مخاطر كتيرة وكتب احنا مش بنتكلم عن انجاز او حاجة كبيرة وشامتانين ياراجل احنا فارحانين لكل شيء علامة في اية قرانية مش فكراها نصا ولكن بتقول انك لا ترمي ولكن الله يرمي والجزمة اللي جت في العلم ان شاء الله تكون امل بان امريكا تكون تحت رجل العرب ان الله يرضي بلظلم وينظر الي دعوة المظلوم المعلقة بين السماء والارض ويقول لانصرنكي حتي لو بعد حين االدعاء في حد ذاتة من اركان الايمان والاسلام لان كلمة الصلاة من معانيها الدعاء وان الله عند حسن ظن عبادة بية اينعم هناك اركان لدعاء بان نتقي الله في كل شيء وان غير ما بانفسنا ولكن مابنفسنا احنا مش قادرين نعملة عارف المسجون عارف المقيد بسلاسل حيجي يوم يثور يتمرد عشان ياخد حقة وانا في انتظار هذا اليوم الموعود لانك لو قاريء لتاريخ حتلاقي ان التاريخ بيعيد نفسة دوما من ايام الهكسوس والفينيقين الي عصرنا هذا في ل عصر يسود فية الظلم يخلفة عصر ثورة وناس تطلع وتقول لا للاستعباد ولا للظلم اخي تفائل خير
اسفة للاطالة وتقبل مروري وهو لاول مرة

فشكووول يقول...

العزيزه نبض الروح:
ماشى يا نبض زى بعضه آهو الراجل فش غلنا كلنا وصدقينى الكلام اللى انا كاتبه كاتبه بالعقل لكن اللى فى القل فى القلب .. ولو كان على قلبى ..انا فر حان ومبسوط زى الكل وبصفق له بكلتا يدى .. وعارف ان الراجل انسان وبيعبر عن انفعال ملأ كل وجدانه وكما قلت لك سابقا .. الكلام عن العقل الجمعى العربى .. أما آن الأوان ليتغير..ما ما حدث فهو انفعال ونقدر نسميه زى ما نسميه .. بس اللى معترض عليه الانفعال العربى والفرح العربى وكأننا فتحنا عكا.. والراجل ربنا يستر عليه .. تحياتى

حبيب قلبى ريسنا كلنا ورئيس التحرير
انا جيت عنجك وقلت لك ايه الموضوع .. بس حكاية اخترناك دى .. بخاف منها .. ايمن نور بيكتب فى الدستور وهو فى السجن .. وعلى العموم لما انا وانتم نشوف حلمة ودننا .. تحياتى

سوووووووول العزيزه
يا سول فى التاريخ الاسلامى والتاريخ المكتوب ..سيدنا موسى ما حاربش لكن اللى استلم الرايه بعده سيدنا يوشع بن نون اللى كان حامل الحوت فى المقله لما قابلوا على اكثر الاقوال الخضر .. وسيدنا يوشع ده هو اللى حارب بعد الـ40 سنه فى التيه وهو اللى دخل ارض الجبارين وعلى العموم ارجع تانى واشوف واتأكد واذا كنت غلطان اصحح غلطتى .. تحياتى يا سووووووول العزيزه
آه .. اما عن جيفارا وكاستروا .. يا سسسسوووووول ياااااا ويزززززززبر انت حتحملينى كدا اكتر من طاقتى لكن اوعدك ان اما الاقى حاجه عن جيفارا حاكتب اما كاستروا فكلنا عارفينه وهى الليدى جيفارا يعنى حتقول عليه ايه وهو صاحب ابوها.. على العموم هو ورث حكم البلاد لاخوه .. كلنا فى الهم شرق .. شعوب ناميه .. نايمه

ستنا وفاء بركات
والله انا معاكى فى كل اللى بتقوليه وانا الكلام خدنى ونسيت اقول فى البوست ان المحامى ده بطل تحت اى ظرف .. اصل الكلام بياخد الواحد وفيه حاجات كتيره بتعدى عليه .. لكن انا اتكلم عن العقل الجمعى العربى .. وهمك هو همى وانا كمان شايله فى بطنى

الجميله آبى :
انت كمان زعلانه منى .. وما دام انتى مبسوطه .. انا كمان مبسوط ..فيه حد يبقى زعلان عشان بنته مبسوطه؟

ستنا حروف وسابقا جرح تانى
والله يا ستنا انا فرحان معاكى وحاسيبك تفرحى زى ما انت عايزه .. هو فشكول المره دى زعل الناس منه .. بس عشان فشكول عايز شويه نبقى عمليين .. ونفكر صح .. ماهو ما فيش مانع نبقى عاطفيين وفى نفس الوقت عمليين لا تعارض عارفه يا ستنا الواد المحامى العراقى ده ما فيش خوف عليه من الامريكان عشان دى حاجات بتحصل عندهم وبيض وطماطم وبرتقال .. وما فيش مشكله عندهم .. الخوف عليه مننا من اهله .. اصل احنا ما بنعتقش .. أهلا بيك وتحياتى وان شاء الله اتابع مدونتك دائما .. تحياتى

Empress appy يقول...

لاااااااااا انا مش زعلانه منك ابدا
بص يا عمى العزيز بما انك مش هتدينى فرصه كده ارزعكم الوبست التمام فى الموضوع ده بس هقولك واتحمل الصداع
يا عمى العزيز انا عارفه كويس جدا اننا شعب عاطفى وليه سؤال خبيث لو بوش قاعد ومش هيسيب الحكم تفتكر الصحفى ده كان هيعمل كده اعتقد نونونونو
بس عارف لما ببقى غضبانه اوى وجت ليه الجرا اعبر عنها بقوم رميه بلكونه الجيران بالزرع اه اقولك ليه عندهم ابنهم غلس وبيضايقنى وبعملها لما يكونوا مش موجودين
طبعا ده مبيحصلش بس حبيت اقرب ليك المثل والحدق يفهم يا عمي الا انت مش طالع ليه ليه بقى ههههههههههه
انا اختلف مع اى حد فى الدنيا فى الراى عادى انما ازعل نونونونو
الا فى حاجه واحده الدين بس ده اللى يزعلنى
ربنا يخليك ليه وتفرح فيه

على عبدالله يقول...

بص يا استاذ فشكول اسمع منى كلمتين
بالنسبة للصحفى فهو عمل اللى يقدر عليه فى الوقت اللى اتيحت ليه الفرصة ،يعنى عبر عما بداخله
واحلفلك بالله لو حكامنا سبونا وادونا الفرصة طبعا مش راح نضرب بالجزم لا طبعا هايبقى معانا السلاح ان شاء الله وهانضرب فيهم لما نموت احنا ونبقى شهداء او يموتو همه وننتصر احنا باذن الله ،، وانا واثق اننا لو قاتلناهم هاننتصر باذن الله بس نعمل ايه فى الجبن اللى مالى حكامنا !!!
ما تساش ربنا قال : واعدوا لهم ما استطعتم من قوة ومن رباط الخيل : خلى بالك ماستطعتم !!

بس انا اللى فهمته من كلامك انك عاوز تقول ان كل اللى بتعملو امريكا فى العرب هم السبب فيه (العرب يعنى) ؟؟!! صح ؟
يعنى مثلا لولا احداث 11 سبتمبر ماكانتش امريكا ضربت افغانستان ولا العراق ولا لا
لو كان دا قصدك فانا باختلف معاك بالمرة
ولو كل واحد فكر فى مصيره بعد ما يدافع عن كرامته ويخاف من الموت يبقى ساعتها قول على الكرامة والنخوة والرجولة ياللا السلامة !!!!

واحلفلك بالله لو كنت جمب الصحفى ده مش بعيد كنت هاديلو جزمتى علشان يكمل بيها ،او حتى اكمل انا معاه

احنا مازعلناش منك ولا حاجة ولا هانطالب باعدام فشكول ،،لان دا رأيك ويجب ان يحترم ،،وهو رأى يستحق التقدير طبعا


مع خالص تحياتى

فشكووول يقول...

يا عم على والله انا سمعت وقريت كلامك كويس ومش مختلف معاك وانا لو كنت جنبه كنت عملت زى انت ما كنت عايز تعمل .. بس انا اكلم العقل الجمعى العربى وبعدين انت ما قريتش الكلمتين الصغيرين اللى يمكن يفوتوا وما حدش ياخد باله منهم وهم (يا اخوانا : ان تطهير بلادنا من الداخل يقتضى تحريرها من اعدائها من الداخل والخارج ان اعدائنا فى الداخل هم مصدر كل ما تعانيه بلادنا .. ان اقامة المجتمع الحق على اصول وقواعد ثابته ترضى الجميع يقتضى تطهيره من المفسدين الذين يقتاتون على دم المجتمع) دول الكلمتين اللى انا بلف وادور حواليهم وعايز اوصلهم لينا كلنا عشان نصلح نفسنا وبعدين نقدر نصلح اللى احنا عايزينه.. ومتهيأ لى ان الكلمتين دول بيتفقوا مع اللى حضرتك بتقوله .. تحياتى

"أم أدهم المصرية" يقول...

السلام عليكم ورحمه الله وبركاته
--------------------------------
ياعم فشكول خضتنى انا افتكرتك كاتب حاجه لا سمح الله ولا حاجه

شوف اللى انت كاتبه كله وبالحرف ويمكن اكتر كلناعاوزين نقوله وحاسين بيه اوى

وصراحه انا مع الصحفى يمكن هو مش تصرف صح لو هنفكر فيه بالعقل

بس اهو تصرف اعتراض
على اللى هو حاسه وشايفه

الناس تعبت ياعمو والشعوب اتبهدلت
ويمكن عندك حق اننا بندعى وخلاص ومبنعملش حاجه غير الدعا

بس دى مش مشكله الدعاه والعلماء
لانهم بيعملوا اللى عليهم بيحاولوا يحثونا لانه احنا اللى لازم نتحرك

الناس هى اللى عليها العمل دلوقتى
لا حكومات ولا غيره لانه واضح ومن زمان انه نظام حكوماتنا فاشل ولو فضلنا نعتمد عليهم ونايمين فى الخط هنخسر اكتر
مع انى معرفش فاضل ايه مخسرناهوش لسه
المهم
انه احنا اللى لازم نفوق لو كل واحد فينا عمل ذى الصحفى بس بدل الجزمه مسك فى ايده مدفع او مسدس هيتعملنا الف حساب
احنا للاسف شعوب جبانه ومعرفش هنضل خايفين لحد امتى

الله المستعان

بوست رائع ياعمو نفسى يترجم للواقع ونعمل اى حاجه يتعملنا بيها كرامه
-------------------------------

Soul.o0o.Whisper يقول...

fashkool

أستاذى العزيز / فشكول

أنا لم أقصد الحرب ذاتها
بل قصدت أن الآية قيلت فيمن كان مع سيدنا موسى
و أنهم وجههوا كلامهم هذا لسيدنا موسى


و بعدين يا حضرة الفيلسوف العزيز
أنا عاوزة تصورك الشخصى
مش عاوزة كلام منقول

مانا جمعت حاجات آآآآآآآآآآآآآد كدهوا عن جيفارا
بس أنا عاوزة احساسك بالواقع ساعتها كان ازاى


مانا بردوا والدى حكالى عنه

أنا عاوزه الشباب ساعتها كانت توجهاته ايه
و احساسه بالقضية كان عامل ازاى






خالص تحياتى

جلال كمال الجربانى يقول...

عمنا الغالى فشكول دوت كوم

حييجى منين الزعل بس
أنت عندك حق
أهم حاجه المجانص حلوه المجانص دى
بس من حق الفرخه أنها تفرفر بعد الذبح تعبيراً عن رفضها للذبح
وذلك بعد الذبح

وتقبل تحياتى

Unknown يقول...

عمنا الحبيب
السلام عليكم ورحمة الله وبركاته
لابد أن نضع هذه الحادثة فى إطارها وموضعها ولانحاول أن نعطى الأمور أبعاداً لاتحتملها...
أخى: ماذا تنتظر من شاب ممتلئ حباً لوطنه
ومازل قلبه ينبض ، ومازال يحمل بين جنبيه بعضاً من كرامة .. ماذا يفعل وهو يرى رجلاً يقف أمامه مزهواً يختال غروراً وكبراً وتتساقط من بين أنامله وأشفاره دماء أخوة له...؟؟؟؟
لم يتمالك نفسه لأنه دمه حر .. ولم تسعفه الحيلة إلا بأقرب مايمتلكه من سلاح فتاك للكرامة ..فرجم هذا الإبليس اللعين ..
موقف تحكمه اللحظة والانفعال والغضب.
تخيل نفسك أنت مكانه ..أظنك لم تكن تتراجع عن رجمه بكل أحذية العالم.

تقبل أخى تقديرى واحترامى
أخوك
محمد

حاجــ عيال ــات يقول...

السلام عليكم

هو انا جيت متأخرة ولا ايه
لكن عموما ما تسيبه يضربه باالجذمة ولا حتى بالقبقاب ياسلام
ماهم بيضربوا كل يوم وبيقتلوا ويدبحوا ويدفنوا الناس احياء

وبعدين دي جزمة عيار خفيف (مقاس 10)
يعني مش جزمة أرض جو ولا حاجة
ولا حتى جزمة نووية
دي زغزغة
ثم ان الراجل أخد الموضوع ببساطة واباح الديمقراطية وراضي ياسسيدي الشعب يزغزغه قبل مايمشي
واهي تبقى حاجة من ريحة الرياسة
واوباما ان شاء الله نبقى نجامله في قبقاب دا كل واحد على حسب غلاوتة بقى

جهاد مشالي

Soul.o0o.Whisper يقول...

fashkool

أستاذى العزيز

رائع ما خطته يداك
كنت أنتظر شيئا كهذا

بجد رائع جدا
لكن لى بعض الوقفات
أو لنقل استفسارات


كنا بنقول الاتحاد الاشتراكى ومنظمة الشاب والكلام البكش دا كله .. *

كان جيفارا وجمال عبد الناصر هما الاثنين متوازيان ثوريا وفى ضمائرنا وكنا بنحب الاثنين (جاتنا نيله على خيبتنا )*

ومدوخ كل قوى الامبرياليه زى ما كانوا بيقولوا لنا وماسحين عقلنا بالكلام الاهبل ده *

ممكن يا فيلسوفى العزيز توضح لى الكلام دا
و إيه اللى غير تفكيرك؟؟؟


كنا عايزين نشمت فى اسرائيل وامريكا والامبرياليه العالميه بأى ثمن *

تفتكر الأمر أتغير كتير
أعتقد مازلنا الى الان فى انتظار الانتقام !!...

حسينا ايامها ان جيفارا ما ماتش ازاى يموت وهو وهم .. شبح .. ومدوخ كل قوى الامبرياليه *

هل الحق يُمثل فى شخص ؟؟
أم أننا نرسم لأنفسنا الأحلام؟؟؟


المهم ايامها كنا حاسين شويه باليتم او زى اللى ماتت امه يعنى نصف يتم .. واليتم الكامل بقى حسينا بيه بعد وفاة عبد الناصر *

هل تعتقد يا سيدى أن الأمل بأشخاص ؟؟
أم بمعتقد هؤلاء الأشخاص؟؟؟

انه مفتاح اللغز ..

مبسوطه يا سووووول .. امشى بقى ولا عايزه كمان *

آه مبسوطة خالث خالث
مش باين عليا؟؟؟
:)


بس بس رد على الكومنت دا

معلش تعباك معايا








معلش

على عبدالله يقول...

استاذ فشكول

ربنا يسلمك من كل اذى
واسال الله ان يزقك وكل المسلمين حج بيته الحرام

بالنسبة لمقال ابراهيم عيسى فهو مش محتاج لتخصص ولا حاجة!! يكفى انك تقرا او تسمع انه يشكك فى عدالة صحابى او انه يشكك فى عالم وامام جليل مثل البخارى اللى هو ابراهيم عيسى لم يصل الى ذرة تراب مشى عليها الامام البخارى بقدمه

بالنسبة لموضوعك
اكيد طبعا ان الله لا يغير ما بقوم حتى يغيروا ما بانفسهم
ولكن ما اريد ان اقوله ان السبب الرأيسى فى الطغيان الامريكى واليهودى هو الضعف العربى بصرف النظر عن اى اشياء اخرى
واسمع الكلمة دى منى
سبب الضعف العربى وانتشار الفساد الداخلى وكثرة المفسدين فى الارض هو البعد عن الدين والمنهج الربانى
خلينى اقولهالك بطريفه اخرى
فى ناس بتحارب من اجل القومية العربية وناس بتحارب من اجل الديمقراطية ،وناس بتحارب من اجل الحضارة الفرعونية وغيرها !!
الحل يا سيدى الفاضل هو ان يكون الهدف الاول والاخير هو نصرة الاسلام والمسلمين فى كل مكان بصرف النظر عن العرق او الجنس او اللغة

شرفت والله بزيارتك وارجو دوام التواصل

دمت بكل خير

أمل فتحى عزت يقول...

السلام عليكم
آسفة جداً للتأخير يا أستاذ /فشكول
بكل أسف يوجد مشكلة فى صفحة التعليقات بمدونتك لا تفتح الصفحة بسهولة لابد من المرور على عدة إجرآت ولست أدرى ما السبب ولكنى قمت بتجربة المدونات الاخرى فوجدتها عادية هل المشكلة عندى أم عند حضرتك فى المدونة أرجو إفادتى .
سأعود للتعليق مرة أخرى عندما تحل هذه المشكلةفى حالة تعثر الامر مرة أخرى سأرد على أى ملاحظات فى مدونة (ن) مؤقتاً
مع خالص تحياتى

kochia يقول...

ما فعله الرجل هو مجرد رمز
لا يقدم ولن يؤخر اطلاقا
وهذا رايي بالفعل
ولكن ما فعله هو رمز للرفض والكراهية
رمز مثل رشق اول حجر علي الاسرائيلين في فلسطين .. فقط اول حجر
قد ياتي هذا الحذاء بتوابع كثيرة بعد ذلك مثلما تحولت الحجارة الي انتفاضة
وقد لا ياتي ..

تحياتي

Soul.o0o.Whisper يقول...

السلام عليكم و رحمة الله و بركاته

والله يا فيلسوفى العزيز أنت فشكلتنى آخر فشكلة

لدرجة ان دى المرة التالتة اللى ادخل فيها مدونتك جرى و أنسى أعلق على تعليقاتك عندى ...


التعليقات عندك بتفتح معايا عادى
بس هيا بتحتاج شوية وقت بس


على العموم ميلى أهو
و ياريت بردوا توضح لى اللى انت عاوزه عشان مش فهمت اوى قصدك

soulo0owhisper@yahoo.com

و مستنية الرد على اسألتى
و أى حاجة تحتاجها أنا تحت أمرك

Soul.o0o.Whisper يقول...

إما أروح بئا ارد عليك عندى

ههههههههههههههههههه





سلام

رؤية يقول...

من الواضح ان مش احنا اللى هانعدم فشكول
ناس تانيين

وجهة نظر حضرتك
موضوعية وشاملة


بس برده ما حدش ينكر
فرحانين


لكن مش هانرتاح غير بالاستقلا

تحياتى

حمادة زيدان يقول...

عمنا فشكول

أولاً يا جميل اسمحلي أهني حضرتك على المقالة الجميلة دي

ثانياً : أختلف معاك في موقف الصحفي أعتقد أنه موقف الصحفي "البطل" يختلف كتيرررر هن موقف ضرب برجين أمريكا لسببين

1/ 11 سبتمبر كانت موجهه للشعب الامريكي مش للنظام الامريكي والشعب الامريكي كمان اللي مسالم وفي عمله مش الجنود عالجبهة ... لذلك أنا أعتبر يوم 11 سبتمبر كان سقطة في حقنا وإرهاب بكل ما تحمله الكلمة

2/ تحية الصحفي العراقي كانت لبوش وجزمته لولا تحرك بوش كانت هتبقي بوجهه
وفرحي وفرح كل الناس للإهانة الكبيرة اللي حصلت لبوش ومش للتأثير النهائي للموضوع

انا اعتبر الصحفي العراقي بطل لأنه جعل أكثر من 200 مليوون عربي يناموا سعداء

تقبل تحياتي يا أستاذنا

ن يقول...

السلام عليكم
الحمدلله وصلت يا أستاذ / فشكول
على فكرة وجدت طريقة مختلفة خالص عندك فى فتح صفحة التعليقات وهى أن إشارة الماوس تكون فى الوسط مابين كلمة التعليقات وتاريخ الصفحة وسوف أجرب مرة أخرى وأعود .. أعذرنى سوف أعلق على البوست بعدما أستقر أنا كدة عاملة كأنى بلف حوالين الصفحة من أول إمبارح.
مع خالص تحياتى

Soul.o0o.Whisper يقول...

لا ... لا ... لاااااااااااااااااااااا

مش موافقة

مش موافقة

مش موافقة

يا أستاذى العزيز ... ما ينفعش

مش كل واحد فينا يعاكسه الموج يستسلم له ...

يا استاذى العزيز حضرتك الوقتى عاركت الحياة و فهمتها صح ما شاء الله عليك ..

ما ينفعش كل واحد فهم الدنيا يقفل على نفسه ،
فين الجهاد طيب؟؟؟

احنا الجيل بتاعنا ..مين ياخد بإيدنا و يفهمنا عشان نبنى رأسى
ما ينفعش الامتداد الافقى اللى احنا ماشيين بيه دا ...


و لهذا قررت إنى مش هأطلع من نافوخ حضرتك سعادتك جنابك ...


هأفضل كدهوا لحد ما تقول خلااااااااااص

مش هأسيبكم
:)



خالص تحياتى

ghorBty يقول...

السلام عليكم

اول زياره

فتقبل مروري

ايوا بجد يسلم ايده والله وربنا يعينه علي اللي هيجراله



الجملة ديه

لفت الايام ودارت الايام والغم كله جه على دماغنا وبقينا نسقط كأوراق التوت الذابله ... شوفوا اللى حصل فى افغانستان ... فى العراق .. فى فلسطين وفى غزه .. فى الصومال ... فى جنوب السودان وغربه فى دارفور ... فى لبنان .. شوفوا عايزين يعملوا ايه فى سوريا اللى شاربه من الهم زينا بالضبط خدووووا بالكم كل دول محاوطين مصر من كل الاتجاهات ..


اقول بقا ليه حصل لنا كدا انا مش هلوم فلان ولا علان انا هقول قول الله تعالي

ولا تهنوا ولا تحزنوا وانتم الاعلون ان كنتم مؤمنين

دا قول ربنا لينا لكن لما بعدنا عن الدين وتهوانا بما فيه الفايه كان لازم تكون النتيجه

من اعمالكم سلط عليكم

ونسال الله السلامه

اللهم ردنا الي الاسلام مردا جميلا واكيد لو احنا اتغيرنا هنكون الاعلون في كل شئ

دمت بخير


غربتي

ن يقول...

السلام عليكم
أستاذ / فشكول
عاوز تقول إننا السبب فى اللى حصل واللى هيحصل .. أقولها لك .. نعم
بس الجزمة كانت شجاعة أشجع من الكل بمصالحهم وإختباء إعتراضهم وراء الابتسامات الزائفة وهم يقبلون كوندوليزا رايس وزيرة الخارجية الأمريكية فى الرايحة والجاية وكلهم نفسهم يضربوها بألف جزمة وهى جاية ومعاها جزم بالقرارات نتلقاها نحن بالابتسامات ونوافق مضطرين بزمتك يا أستاذ فشكول فيه راجل عاقل يقبل كوندوليزارايس فى الرايحةوالجاية تحت شعار السلام فى المجتمعات المتحضرة .
ما علينا الجزمة كانت أشجع من المعاهدات والاتفاقيات الفاشلة التى تضع العالم العربى كل يوم فى أزمة .
الجزمة كانت رداً على قبلة بوش الذى كان يهديها للعرب والتى قذفت فى وجهنا بمليون جزمة وكأننا ملناش لازمة .. وبوش بيهدينا قبلة المحبة بعد هتك العرض وإغتصاب الارض والتنكيل بنا سواء بالحروب والاحتلال أو بالازمات الاقتصادية والخلل السياسى ..
الجزمة لأول مرة تعبر عن نبض جزء حر الشارع العربى الحقيقى وليس نبض الحكام ولا بقية الشعوب العربية التى ساعدت على تردى الاوضاع بكل ما ذكرته يا أستاذ فشكول .. لقد حدنا عن طريق الحق فأعرض عنا الله بهذا التيه وهذه الفرقة والعداوة والبغضاء الداخلية قبل الخارجية ولن يجمع شملنا الا العودة الى الله من جديد وتطبيق تعاليمه بذلك ستطمئن قلوبنا وأن يد الله ستكون فوق أيدنا هكذا وعدنا (وأعتصموا بحبل الله جميعاً ولا تفرقوا )ولن يكون لنا مخرج الا بذلك مهما تقدمت علومنا وخططنا وأهدافنا .
أما بالنسبة لجزمة منتظر فهى الان تتحدى أمريكا كلها التى طالبتنا بالحرية أن تطبقها بالجزمة وتتنازل عن إهانة منتظر لجورج بوش هذه الحرية التى نادت بها أمريكا طويلاً فهل ستكون أد الجزمة .. سنرى
ملحوظة .. لو طلع منتظر برأةولم يأخذ حكماً وأثبت أن الجزمة تعبيراً عن الحرية التى نادت بها أمريكا سأسميه .. منتصر .
مع خالص تحياتى

قلم رصاص يقول...

عمي الغالي / فشكول

انا باتفق معاك تمام الاتفاق في رأيك
لكن ياسيدي الفاضل الراجل الصحفي ده مجرد واحد من الشعب العراقي المظلوم باحتلال دولة أجنبية كأمريكا لأرضه غصبا وبمباركة ومساعدة كبرى الدول العربية..
ومن حقه يعبر عن رأيه بطريقته أو بمعنى أدق شوية .. ينفس عن غضبه اللي اكيد ماليه وخانق حياته كلها ..لأنه انسان عراقي وعايش في العراق وشاف بنفسه وعايش كل ماحدث من خراب ودمار في بلاده اللي كانت لولا دخول الأيادي الغادرة اليها لكانت من اهم الدول المتقدمة علميا واقتصاديا وطبعا اضافة الى عراقة حضارتها الضاربة جذورها في التاريخ


انا بتفق مع رأيك جدا من زاوية انه المفروض اللي يترجم ما تقوله حضرتك وتنادي به هو الحكومات وليس الشعوب
.. صحيح الشعوب ليها دور واحد وهو التخطيط السليم في اختيار الحكومات حسب الشكل السياسي للدول ، لكن لايتعدى دورها هذا الخط..والا ما الداعي من وجود الحكومات

منور الدنيا ياعمو صلاح

تقبل مروري مع التحية

أمل فتحى عزت يقول...

الشعوب العربية شعوب ذكية كان من المفروض الا يفلت منها زمام الامور ليصلوا الى هذا الحد فهم شعوب لها تاريخ وحضارة وهم شعوب مُبشرة بالثورات وسجلهم حافل بالعلماء والعباقرة وبمن سطروا تاريخهم علماً وأدباً ...
الشعوب أصبحت تأخذ علمها من الفضائيات والاستماع وترك البحث والعلم والاجتهاد لقلة قليلة تنحت فى الصخر وقديأتى عليها يوماً تصنع فُلكاً كما فعل نوح عليه السلام وتنجوا وتترك النائم للطوفان ..
وأحب أن أهدى لهذاه الشعوب كلمات قالها الشاعر لعلها تبقى فى الذاكرة وتنعشنا من هذه الازمات التى تثاقلت علينا.
إرادة الحياة
إذا الشعب يوما أراد الحياة فلا بد أن يستجيب القدر
ولا بد لليل أن ينجلي ولابد للقيد أن ينكسر
ومن لم يعانقه شوق الحياة تبخر في جوها واندثر
كذلك قالت لي الكائنات وحدثني روحها المستتر
ودمدمت الريح بين الفجاج وفوق الجبال وتحت الشجر
إذا ما طمحت إلى غاية ركبت المنى ونسيت الحذر
ومن لا يحب صعود الجبال يعش ابد الدهر بين الحفر
فعجت بقلبي دماء الشباب وضجت بصدري رياح أخر
وأطرقت أصغى لقصف الرعود وعزف الرياح ووقع المطر
وقالت لي الأرض لما سالت يا أم هل تكرهين البشر
أبارك في الناس أهل الطموح ومن يستلذ ركوب الخطر
وألعن من لا يماشي الزمان ويقنع بالعيش ، عيش الحجر
هو الكون حي يحب الحياة ويحتقر الميت مهما كبر
وقال لي الغاب في رقة محببة مثل خفق الوتر
يجيء الشتاء شتاء الضباب شتاء الثلوج شتاء المطر
فينطفئ السحر سحر الغصون وسحر الزهور وسحر الثمر
وسحر السماء الشجي الوديع وسحر المروج الشهي العطر
وتهوي الغصون وأوراقها وأزهار عهد حبيب نضر
ويفنى الجميع كحلم بديع تألق في مهجة واندثر
وتبقى الغصون التي حملت ذخيرة عمر جميل عبر
معانقة وهي تحت الضباب وتحت الثلوج وتحت المدر
لطيف الحياة الذي لا يمل وقلب الربيع الشذي النضر
وحالمة بأغاني الطيور وعطر الزهور وطعم المطر

شفـقــة و إحســــان يقول...

والله موضوع تمام فى الجون بجد
والراجل ده يستاهل اكتر من كده اما اللى ضربه فده عايز جايزة
تحياتى

فاروق عادل يقول...

متفق معاك تماما يا استاذنا فى البوست دة

قول صحيح انت اية رايك فى مقال ابراهيم عيسى
احنا طبعا كلنا فرحنا لكن دة معملش حاجة زيادة

الازهرى يقول...

الحبيب فشكول

فوجئت مثلك بالحيز الغريب الذى أخذه الخبر وهو ما يدل فى رأيي على اشتياق الناس لأى شىء يفرغون فيه انفعاهم ولو كان بسيطا

أؤيدك فى كلماتك وأرجوا منك زيارة مدونة الفارس الأخي فقد تصادف أن فيها موضوعا مماثلا ويهمنى رأيك

بالمناسبة انت ثانى تعليق لى بعد رجوعى مباشرة فاعذرنى على التأخير

تحياتى دوما
تحياتى دوما

من غير عنـــوان يقول...

في العموم
أنا موافق جدا على اللي عمله منتظر
ومؤيد جدا لكلام فشكول

الإختلاف في الرأي لا يفسد للود قضية


تحياتي

DoNyA يقول...

مين قال ان في الكلام ده اي حاجه تزعل
الحاجه الوحيده اللي تزعلنا تزعلنا علي حالنا
والحاجه الوحيده اللي تخلينا نطلع مظاهرات علي

فشكول انك جيت علي الوجيعه اووووي واتكيييت
وبطبعتنا اما حد يجي علي الوجيعه بنعمل حاجتين اما

نقعد نفتكر ونحط ايدنا علي خدنا ونعيط واما
نطلع مظاهرات ونخرج كل الكلام اللي جوانا الكلام

وبس
انا طبعا مش هقول ا حاجه علي الصحفي ممكن يكون خرج عن شعوره لانه عربي وزي معظم العرب العاطفه بتغلب علي اغلب تصرفاتنا
بس هو فعلا وعلي الواقع اللي احنا عايشينه معملش غير انه ضر نفسه واسمه ومهنته انا معاه 100 % لو كان ضرهم بحاجه مفيده او اننا استفدنا ولو 1 % من اللي اتعمل بس برده بالعكس مفيش اي وجه افاده كله ضرر ليه ولكل صحفي عربي تاني اللي بعد كده شغل الاضطهاد والعنصريه هيشتغل

AhMeD RaDy يقول...

بسم الله

علق بعد 52 تعليق (الله اكبر ) اعتقد صعب جدا الائى شئ جديد اقوله

بس من باب اثبات الذات .. بقة وطرح الافكار المختلفة والمتخلل فى العقلي المقعرة فى اللاواعى المنفسن باسود

نقول

هو احنا بناقش ايه ؟؟؟ اه ضرب الصحفى للرئيس الامريكى بالجذمة ؟؟

ولا

اللى بعد كدا .؟؟

اعتقد ان ممكن نقول ببساطة شديدة اننا كلنا كلنا جزء من اللى حصل
احنا مبسوطيين متهنيين فرحانيين بضعفنا

محدش مصدق ... طب اقر التعليقات تانى

وهتعرف ... اننا كلنا جزء من الكارثة ....!