السبت، ٢٠ ديسمبر ٢٠٠٨

فشكله عن جيفارا .. واشياء اخرى


(تحديث)
وصلنى تعليق من الآنسه صفاء بتاعة المنيا اللى ما بتبطلش مناكفه فى وانا اعترافا بالخطأ انشر تصحيحها الاتى(طبعا بما انى مناكفه ومعارضه عمال على بطال فيسعدنى انى اقولك ان جيفار تولى وزارة الصناعه فى حكومه ما بعد الثورة فى كوبا وانه دمر الصناعه تماما لأنه راجل ثورى ملوش فى الحكم ونظمه ولما فشل كــ وزير هو من نفسه استقال وترك الوزاره)وهذا كلام صحيح كنت قد نسيت ان اذكره


سألتنى الزميله العزيزه سوووول ويزبر عن ايام عبد الناصر وجيفارا وايام الثوره وانا مش قادر ما اقولهاش حاجه وعشان خاطر ماما اموله العسوله مش عارفه تدخل عندى قلت اغير الموضوع واعمل موضوع جديد يمكن تقدر تدخل عندى منه .

انا كتبت لسووول عن الموضوع بصفه خاصه وهاأنذا انشره اليوم بصفه عامه لكل القراء وقد كان نص ردى بعد ان قمت بتعديله تعديلا لم يخل بالموضوع كالتالى:

أااااه يا غلبى .. اصل البنت دى طالعه لى فى البخت اليومين دول .. هى كده عايزه بوست كامل عشان الكلام دا ما يتلخصش وانا مش ناقص وجع قلب .. لكن الامر لله .. كل الناس عمالين يقطعوا فى هدومى عشان البوست المنحوس بتاع الجزمه اللى عندى .. انا بعد كدا حكتب اللى يرضى الناس ويريحهم .. ما حدش عايز يفكر بعقله .. ما حدش عايز يشوف اللى ورا الكلام ما حدش عايز يقرا اللى بين السطور.. كل الناس بتفكر بغرائزها .. اروح لبعض المدونات الاقيهم كاتبين عكس اللى انا كاتبه وتلاقيهم بيوافقونى عندى .. انا زعلان جدا .. ياريت نتحاور ونتناقش .. ما علينا غريزة الانتقام والثأراحدى غرائز الانسان ولو بحدفة جزمه هذا كلام ما فيهوش فصال .. والصحفى العراقى بطل وكل حاجه وربنا معاه واحنا كلنا معاه .. بس الموضوع اخد اكتر من حجمه وبعدين جات الزميله وكمان بتسألنى اسئله لو حد قرأ الرد عليها حينقم على اكتر وحيزعل منى اكتر .. اصل ثقافتنا اللى بيغذوها لنا من سنة 1952 هى هى نفس الثقافه بتاعة اليومين دول والناس معذوره ما همش شايفين غير اللى هما عايزينهم يشوفوه ثقافة 0 5 سنه وما فيش قدامهم وجهة نظر أخرى والا يبقى عميل وخاين ومرمى فى حضن الغرب وبيستعين بالاجنبى .. وصعب ثقافة 50 او 60 سنه تتغير كدا فى يوم وليله مش كدا والا ايه مش هى دى ثقافتنا اللى مش قادرين نغيرها ,, وبعدين ارد على اسئلتها : هى كانت بتسأل عن عبد الناصر وعن جيفارا وعن ايام المد الثورى والاتحاد الاشتراكى ومنظمة الشباب ..

استعنت على الشقا بيك يا رب .. يا منجى الجحش من الوحش يا رب:

أولا.. بتسأل عن حاجات استوعبناها فى سنين كثيره وعايزانى ارد عليها والحقيقه هى جرعه كبيره .. وانا خايف عليها تاخد صدمه ثقافيه .. ومش عارف اعمل لها ايه .. هى مصره وانا مش قادر ارد لها طلبها وفى اختصار ولو ان دا برضه كلام مش حيعجب ناس كتير .. لكن دى وجهة نظرى

الاتحاد الاشتراكى : الحزب الوطنى : هو الرأى الواحد : اللى الرئيس يقوله - يبقى صح - حتى لو غلط - مش مهم يمشى على راس البلاد والعباد ... ايه رأيكم الاتحاد الاشتراكى مش طوروه الآن وبقى الحزب الوطنى .. سيبكوا انت من الاحزاب الديكوريه اللى انتوا شايفاها ثم نوصل بالكلام لمنظمة الشباب : دى كانت منظمه تضم تقريبا كل شباب مصروعيال مصر من سن 12 او 15 سنه وكل اللى كانوا بيعلموه لنا فيها: ما تخليش حد يقول على الثوره حاجه وحشه .. جمال عبد الناصر صلى الله عليه وسلم ... رجال الثوره رضوان الله عليهم واشياء كتيره من هذا القبيل واللى يقول غير كده يبقى مرتد ومش مسلم وعدو لله وعدوللوطن وعدو ليك شخصيا .. وطبعا كان الواحد يخرج من التدريب ومستعد يقول ويفتن على ابوه واخوه وأمه كمان وماكانش حد يعرف له جره .. ودا كلام حصل كتير واسألوا شعراوى جمعه وزير الداخليه فى ذلك الوقت ... حلو كده .. واضح .. مفهوم ... وصل الكلام .. يا رب أخلص اما عن جيفارا وعبد الناصر بقى : اصل كان صيتهم مسمع فى العالم كله .. وكانوا اما اى شعب ينوى يقوم بثوره يبقى لازم صورة جيفارا وعبد الناصر فى خيالهم .. اقول لكم حاجه .. عبد الناصر كان فكره تحررى .. كان فعلا راجل بيحب بلده .. بس كان فكره اكبر من امكانيات بلده ودا اللى ودانا فى داهيه واما اتنحى عن الحكم فى 67 عملنا مظاهرات وعملنا اضرابات وبهدلنا الدنيا عشان نرجعه تانى .. احنا كده تيجى لنا مقشره لحد عندنا وما نستغلش الفرصه شفتم احنا بنضيع الفرص ازاى .. تفتكروا حرب 67 انتهت اثارها .. لأ ..لأ .. لأ ..احنا عايشين فى الامر ده لحد الوقتي بصوا حواليكم كل اسباب الانهيار اللى احنا فيه نتيجة للحرب دى واللى كان السبب فيها عبد الناصرحتى عندما انتصرنا عسكريا فى 73 وكان انتصار خرافى ما كانش حد يقدر يعمل الانتصار ده غير مصر والمصريين ..ولا حتى امريكا لو كانت فى مكانا بس ما استغليناش النصر ده بالداخل كويس .. عشان كدا لما قلت فى البوست بتاعى كان لازم نروح الجيم ونربى مجانص وعضلات .. ودخلنا حرب 67 من غير مجانص وعضلات ولا حتى دراع مفتوله واما جيفارا مات حسينا ان امنا ماتت .. بالرغم من انه ما كانش مصرى .. بالرغم من انه مش مسلم .. مش عربى خالص .. لكن بيمثل قوه من قوى التحرر فى العالم ورمز من رموز الثوره .. وعلى فكره كان رافض انه يكون وزير او رئيس او اى منصب سياسى هو كان واهب نفسه للثوره العالميه وكنا اما بنسمع اللى بيعمله جيفارا .. كنا بنبقى فرحانين وشمتانين فى قوى الامبرياليه العالميه ..اصل ايامها كنا لسه طالعين من حرب 67 .. بس كان ابونا عبد الناصر لسه عايش ...دى كلها كانت ثقافتنا فى الايام دى وكانو دول حلمنا .. جيفارا وعبد الناصر .. هما ابونا وهما امنا وهما انور وجدى ومديحه يسرى وكل حاجه كنا نعلق كل امالنا واحلامنا على شخص .. جيفارا وعبد الناصر واحمد بن بيلا بتاع الجزائر .. بعدين القذافى .. ولما كبرنا وشفنا حال بلدنا وحال امتنا وحال البلاد بتاعة الزعماء دول وازاى انقلبوا على شعوبهم ولما طلعنا بره وشفنا الدنيا شكلها ايه واحنا شكلنا ايه ولما الفضائيات انتشرب وجابت العالم كله لحد عندنا وكشفت المستور وكشفتنا وورتنا حالنا اللى يغم وحال العالم اللى يبسط بدأ بعض الناس يفوقوا ويفكروا.. لكن للأسف معظم الناس بنفس الفكر الثورى الانفعالى .. عبد الناصر هو اللى حط الاصول والقواعد لنظام الحكم .. حتى الان نعيش على نفس القواعد .. ما يغركوش حكاية الاحزاب الورقيه اللى موجوده الان ما زال عبد الناصر حيا الى الآن .. شوفوا الكرسى اتغير امتى ما اتغيرش الا بعد وفاة عبد الناصر .. كذلك السادات ...كذلك ... احنا عايشين بنفس الطريقه .. ما زال الاتحاد الاشتراكى .. اقصد الحزب الوطنى .. ما زلنا نحكم بالميثاق اللى قعدنا ندرس فيه طول عمرنا وما فهمناش حاجه منه مازالت كلمة الفرد الواحد هى العليا وكلمة الشعب هى السفلى .. كان زمان ايام عبد الناصر يقولوا زوار الفجر .. يقصدوا الاعتقالات اللى بتحصل للناس بالليل ... طب ايه اللى اتغير ..يا جماعه انا دماغى حتطق خلاص ..واتقلبت على المواجع يااخوانا نفسى ناكل (كاجو) عارفينه .. نفسى آكل بندق ولوز وتفاح حتقولوا فشكول دا مخه طق .... لأ .. انا ارمز لأشياء .. رحت السعوديه .. وكانت الحاجات دى مرطرطه وفى متناول الجميع .. برضه فى سوريا .. فى لبنان يا عينى على لبنان اشمعنى احنا .. اقصد القدره الشرائيه للناس .. تتطور شويه .. ما فيش فايده .. مش فول وطعميه وفجل .. و خس .. وبالعافيه عدس بـ 14 جنيه ولمانجيب لحمه يبقى عيد وطول عمرنا على هذا الحال وكل يوم نقول بكره ربنا يفرجها ولا يفرجهاش .. هذه كل طموحاتنا .. وما فيش فايده من سنة 52 واحنانقول انشاء الله حتفرج لكن ما فيش فرج زمان كانوا بيقولوا لا صوت يعلوا فوق صوت المعركة .. طب المعركه خلصت وانتصرنا من 35 سنه ايه اللى حصل ايه اللى اتغير علينا .. يعنى لا حريه ولا لقمه كويسه .. هاتوا لنا حاجه من الاثنين طب هاتوا لنا لقمه كويسه زى دول الخليج ومش عايزين حريه ولا ديمقراطيه .. يعنى لا ده ولا ده .. لا حول ولا قوه الا بالله .. فشكول عايز يزوركم فى بيتكم تقدموا له تفاحه - اصول الضيافه يعنى - لكن مش كباية شاى ولو كمان جبتم برتقاله .. ياااااه .. تبقوا انتم كدا من الاقطاعيين .. كنت مره فى مطار القاهره بجيب بنتى اللى جايه من السعوديه ولقيت المطار فيه افواج سياحيه من كل دول العالم وسألت بعضهم انتم وظيفتكم ايه ولقيتها وظائف عاديه من اللى بيقولوا عليها الوظائف الدنيا .. اتارى العالم كله متمتع بحياته وعايش ومهيص واحنا يا عينى علينا امتى المصريين يبقى فى جدولهم السفر للخارج عشان يقضوا الويك اند او الويك يير مش اما الواحد يحوش له مائه ولا مائتين ولا حتى الف جنيه ويروح يصيف فى اسكندريه يبقى عامل فيها الزناتى خليفه .. عارفين انا قلت لنفسى ايه فى المطار .. يا بختكم ببلادكم .. اما احنا فيـا ........ ببلادنا ايه رأيكم .. مخكم سخن .. أنا كمان مخى طق وحاقوم اكسر الكمبيوتر واقطع سلك النت والبس شوال وانزل الشارع واصوت زى النسوان والناس يقولوا على الوليه اتجننت .. اقصد فشكول اتجنن ..ممكن بقى تطلعوا من نافوخى.

هناك ٥٠ تعليقًا:

Unknown يقول...

التعليق الاول
.
.
.

Unknown يقول...

مع ان معارض للكثير من ما حدث ايام ناصر
..
الا ان الناس ايام عبد الناصر على الاقل كانوا يملكون رؤية
..
بغض النظر هن ماهية تلك الرؤية
..
صحيح عبد الناصر كان مستبد لكنة كان رئيسا
ايوة
من يحكمنا تلك الايام ليس رئيسا
انما هو ع....

Unknown يقول...

فشكول
موضوع مبكى على حال الامة على حال مصر اتفق معك فى اغلب ما قلته عن حال الاحزاب ومفهوم الحرية وعن مصر والمصريين وتبعيات الحرب خاصة 73
جايز تتيح لى فرصة اتكلم عنها
تحياتى لك

Unknown يقول...

بس عارف
زى ما قلت جمال كان رجل بيحب مصر واحلامة اكبر من امكانياتة وامكانيتنا عارف كمان شخصيته كان من الممكن ان تلعب دور اكبر لولا اصحاب وبطانة السوء والانتفاعيين

الازهرى يقول...

الحبيب فشكول

بداية كلنا يعاى من النسيان والسبب الرئيسى ربما الطعام فقد نقصت اكلتى الى ما يقل عن ثمانية عشر رغيفا فى اليوم

وعن النت فهذه امور عليا وشغل على تقيل قوى ( يا جماعة بطلوا نق بقى)

نيجى لموضوع أين نحن

انا لا اعنى السؤال حرفيا ويبدو ان الكلمات خانتنى فللاسف المعلومات فتحليلى المتواضع للاحداث يوضح اننا بالفعل مقبلون على كارثة شديدة جدا جدا
والسبب انه حتى فى العهود السابقة عندما كانت الحكومة فاسدة كان الشعب متماسكا مما يعيد السيطرة على الامور بعد وقت يطول او يقصر
اما الان فالشعب فى ازمة عظيمة
وعقل ممسوخ بطريقة لم اكن اتصورها

وانا هنا اسأل عن الجهود الفردية لكل منا فى مساحته من الحرية فى سبيل مصر
فالمجتمع هو مجموع الافراد واذا كان مجموعنا جيدا فهناك امل حتى وان كانت القيادة فاسدة

سانهى بض الامور واعود لاقرا عن التشى جيفارا بعد قليل
تحياتى

فشكووول يقول...

اهلا يا احمد : انا اوافقك الرأى فعبد الناصر كان رئيسا ديكتاتوريا مستبدا .. وحتى الان نحكم بعبد الناصر

اهلا يا ريحانه .. انا مستنى الموضوع اللى حتعمليه .. وياريت يكون قريب .. وتحياتى ليكى ونورت النت كله

يا أزهرى الله يكون فى عون الحكومه عليك 18 رعيف ؟؟ ياراجل خليهم 12 كفايه عليك.. والله يا اخى هناك فعلا مسحد فطريه للحريه واحنا بنعمل السوء فى كل حاجه .. اصل دا انحدار عام والعام بيبهت على الخاص كما الخاص بيبهت على العام .. هههههه.

صفــــاء يقول...

.
مساء الخير يا عمنا
عامل ايه فى أزمه الانترنت اللى عمت البلد اليومين دول
طبعا بما انى مناكفه ومعارضه عمال على بطال
فيسعدنى انى اقولك ان جيفار تولى وزارة الصناعه فى حكومه ما بعد الثورة فى كوبا وانه دمر الصناعه تماما لأنه راجل ثورى ملوش فى الحكم ونظمه ولما فشل كــ وزير هو من نفسه استقال

عبد الناصر مكنش شخصيه حكيمه ولا حاجه
هو كان راجل بيحب البلد دى اوى بس مكنش عندة فكر

كل اللى كان عندة شويه مبادئ لا تصلح لأدارة دوله

وكان مؤمن بشويه أفكار حالمه لا تصلح للتطبيق

لأنه ببساطه كان راجل عسكرى مش سياسى ولا يفقه فى السياسه شئ هو وشويه العساكر اللى كانو وراة

للعم يا عمنا
انا أعشق جمال عبد الناصر الشخصيه الكارزميا التى حازت على محبه الجميع رغم أخطائه الفادحه

هو كان رجل مصرى يمتلك أحلام ونوايا طيبه

غير عالم ان الطريق الى الجحيم مفروش بالنوايا الحسنه
.

م/ الحسيني لزومي يقول...

يا عمي /فشكول تيجي اسيوط من غير ما تقول علي الاقل كنا اتعرفنا علي الطبيعه بعيد عن المدونات...عمومما سوف التمس لك العذر هذه المره.

الازهرى يقول...

فشكولنا الغالى

كان هذا المثلث الجميل رمز للكثيرين من شباب هذه الحقبة من الزمن وخاصة مع كلمات جيفارا عن المواطن العالمى وحتمية الدفاع عن الحريات حول العالم وتوافق هذا مع ثورة الشباب حول العالم فكان له ذاك الصدى

اما عن الحزب الواحد منذ ذلك الوقت فاتفق معك تماما وابصم بالعشرين صابعا على ذلك وهذا قلته فى الكثير من الاماكن وخاصة مقر بعض الاحزاب مما عرضنى إلى انتقادات لا نهائية
واصبحت انسان غير مرغوب فيه بلغة السياسة لدى الجميع سواء من احزاي او قوى وطنية كما يقولون

اما بخصوص الحذاء فاتفق ايضا معك
وارجوا ان لا تغضب للهجوم او تغير الكلام لدى البعض
واكتب كما تحب
فان لم نكتب ما نحب هنا ايضا
فالى اين نذهب

تحياتى دوما

صفــــاء يقول...

.
أخجلتنى والله يا جناب الحكيم

بس ملوش لازمه ومكنش قصدى يعنى انا بس كنت بناكف
مجرد مشاكسه
بس لو هتخلى التحديث
يبقى بنتنا صفاء زى ما قولتلى
ولن اتخلى عن هذا المسمى
شرف كبير ليا انك تذكرنى بالشكل دة

كل سلام ومودة
.

Empress appy يقول...

لكل رئيس دوله اخطائه وانا واثقه ن كده بس الخطا الاكبر للسادات عارف ليه علشان اللى جاب لنا اموت واعرفكان بيفكر ازاي ازاااااااي وشايفه ازاي برضه

صبرني يارب يقول...

انا كمان شايفه ان كلهم زي بعض

بس فى حاجه يا عمو فشكول

عبد الناصر والسادات كان ايامهم حروب وغلب ومشاكل جامده اوي فى استقرار الحكم من الداخل ومن الخارج يعنى ممكن حد يعذرهم بس مش انا الى اعذرهم طبعا

انما الى احنا فيه ده سببه ايه ؟؟؟
عذره ايه ؟؟؟

عموما شايفه ان الثوره زيها زي اي نظام حكم عدى على مصر له عيوب فظيعه ماحدش بيتكلم عنها
وحاليا حالنا مش احسن مما كنا قبل ا لثوره

بالعكس طبعا

وعموما هى كانت زي ما قلت حضرتك حاله وفكر وتوجه عالمي جيفارا وعبد الناصر
تحياتي لحضرتك

اقصوصه يقول...

بابا فشكوول

كتبت رد من ساعتين

وصدمت الحين ان الرد مش موجود!

ع العموم انا مااحب السياسه

جيفارا هذا سمعت عنه

بس ما كنت اعرف عنه الكثير

التدوينه دسمه نوعا ما

وانا مسويه ريجيم!!

بابا فشكول

بانتظار التدوينه القادمه :)

Soul.o0o.Whisper يقول...

أنا جيييييييييييييييت


أااااه يا غلبى منك .. يا بنتى انت طالعه لى فى البخت اليومين دول*

كدا يا فيلسوفى العزيز؟؟؟
طب خلاص مش عندت هأسأل ..


اروح لبعض المدونات الاقيهم كاتبين عكس اللى انا كاتبه وتلاقيهم بيوافقونى عندى *
أستاذى العزيز
كل واحد بيعبر عن اللى هو شايفه أو تصوره ...
و كون أنهم عبروا عن دا بشئ لكن بردوا وافقوك فى اللى أنت بتقوله ،
فدا كويس و يدل على سعة فى تقبل الرأى الآخر ...

مش شرط يا سيدى إنى عشان بأقول رأيك صح إنى موافقك
لكن ممكن يكون معناها أنا بأحترم وجهة نظرك ....
صح؟؟؟
فماتزعلش
الحمد لله مازال عندنا بعض من تقبل الرأى الآخر .... :)


اصل يا سوول ثقافتنا اللى بيغذوهالنا من سنة 1952 هى هى نفس الثقافه بتاعة اليومين دول *

ممكن توضيح أكتر
(( معلش أصلى عندى زهايمر و نسيت إنى قلت لحضرتك إنى ماعدتش هأسألك ههههههههه


يا منجى الوحش من الطفل يا رب *
ماشى مقبولة منك
مع إنك غيرتها فى البوست بتاعك
هههههههههههه


يا رب اخلص منك يا سول*

أنا زعلان
عاااااااااااااااااا


تفتكرى يا سول احرب 67 انتهت اثارها .. لأ ..لأ .. لأ ..احنا عايشين فى الامر ده لحد الوقتي بصى حواليك كل اسباب الانهيار اللى احنا فيه *

كان هذا موجزا لأهم العناوين و إليكم الأخبار بالتفصيل؟؟؟؟؟؟؟
التفصيل لو سمحت يا حضرة الفيلسوف


اما جيفارا مات حسينا ان امنا ماتت .. بالرغم من انه ما كانش مصرى .. بالرغم من انه مش مسلم .. مش عربى خالص .. لكن بيمثل قوه من قوى التحرر فى العالم ورمز من رموز الثوره *
سيدى
اماالسعى فى سبيل الحق فدا يأتى من غير مسلم
فالحق فطرة مع الانسان
لكنها تكون أقوى بالعقيدة
و جيفارا ..كان مثالا للحق دون عقيدة
و ها نحن بلا عقيدة ..بلا حق
فقط مجرد مسمى
و يدخل علينا من يعيب فينا أن رفعنا له رأس ؟؟!!!.
قد يكون كلامى غريبا ..لكن له تكملة فى بوست قادم


كنا نعلق كل امالنا واحلامنا على شخص *
و دا اللى لازم نغيره فى نفسنا
و لا بردوا هنستنى لحد ما شخص ييجى يعمل لنا غسيل مخ للقديم
و يحط فكر و ثقافة جديدة؟؟؟


.. يا سول انا دماغى حتطق .. وانت قلبتى على المواجه يا بنتى نفسى ناكل (كاجو) عارفاه*

لا مش عارفاه
و آسفة خالص يا حضرة الفيلسوف
لكن هنجيب منين فيلسوف تانى يحكيلنا و يعرفنا؟؟؟


فشكول عايز يزورك فى بيتك تقدمى له تفاحه - اصول الضيافه يعنى - لكن مش كباية شاى ولو كمان برتقاله .. ياااااه .. تبقى انت كدا من الاقطاعيين *

نعممممممممممممممممم
ماعرفووووووووش
و لا دخلت له مدونة قبل كدا
(( أجدع ناس تجرى
أى خدمة هههههههههههههه


أنا كمان مخى طق وحاقوم اكسر الكمبيوتر واقطع سلك النت *

عملتها يا استاذى العزيز؟؟!!
عجبك كدا؟؟؟
أديك قطعت النت من مصر كلها
مش من عندك بس

عجبك؟؟


ممكن بقى تطلعى من نافوخى*

طب يرضيك؟؟
يرضيك أطلع من نافوخك؟؟
طب مين يقعد يفحر و ينخر جوا غيرى؟؟؟

لالالالا ... ما يرضنيش يا أستاذى العزيز
:)




بالحق
عجبتنى خالص خالص
الزميلة العزيزة
هههههههههههههههههههه

مش عارفة ليه حسيت إنى واقفة فى الصيدلية







خالص تحياتى

طـائر الليــل الحـزين يقول...

عم فشكول ......
واحشتنا جدااااااااا
اولا : واللهى العظيم انا مش علقت على البوست اللى فات عشان مكان التعليقات مش كان بيفتح زى ماما امولة ما قالت . وكل يوم كنت بحاول تلت او اربع مرات برجع لنفس النتيجة
يارب متكونشى فاكر انى اهملت مدوناتك . لانها من اهم المدونات اللى بحب اقرى فيها كل جديد اول بأول
ثانيا : انا معاك فى اللى قولته فى البوست ده والبوست اللى قبله عن موضوع اننا ادينا لموضوع الصحفى العراقى اللى ضرب بوش بالجزمة اكتر من حجمه . انا مش بقول كده عشان ارضيك او اكون معاك فى الراى
لكن عن فعلا شايفة ان مجتمعنا بيدى اى حاجة فى الموضوعات دى او غيرها اكتر من حقها بمراحل . مش عارفة ليه
لما احنا بنعرف ننصر ونشكر حد من وجهة نظرنا عمل حاجة كويسة
ليه سيبين اللى بيكلوا لحمنا عايشين بيستمتعوا وزيادة
ولما احنا ثورجيه ليه سيبين حقنا بيضيع من غير تمن
ربنا يهديكم يا عرب او يا مصريين
وتفوقوا وتعملوا الصالح ليكم
بجد انا اسفة انى طولت لكن حبة اشكرك على البوستين الاخار اللى احلى من بعض
وتحياااااااااتى ليك
ودايما فى العالى مسمع

رئيس التحرير يقول...

السلام عليكم ورحمه الله وبركاته
استاذنا العزيز..
يادوب بكتب التعليق ...وتلقيت اشاره بوجود تعليق لحضرتك بعد اذنك اشوفك بتقول ايه ؟ معاك الليل كله لغايه الفجر...العيال سابوني وطفشو ...وقاعدلك ع النت...سلام مؤقت...

رئيس التحرير يقول...

عوده
===== سيدي العزيز والله انت الي حيرتني معاك...ولا اكذب عليك ...حيرتني خالص .
وطلعت عنيه ...أتلم عليك ازاي مش عارف ...الأول :قولي انت رحت اسيوط صح؟
وبعدين ...ازاي تروح وماتقوليش؟
ما هي كل حاجه بقت فوضي يا عمي ...
1- هو يعني اما اتكلم انا وأقول شويه جد يا اهل الله ...ما ألاقيش ..انا بصراحه مش عارف ابدأ معاك منين ؟
2- انا نفسي اتخانق دلوقت مع اي حد ولو انت مستعد للخناق ماشي؟
3- مالك وما جيفارا...فاكر جيفارا أما مات ...جييفارااا ماااات جيفارا مات ...وفضلنا نغني جيفارا مات ..
لغايه ما متنا احنا بالحيا ...هو مافيش غير جيفارا الي مات ...ما كلها بتموت ...امال ياربي الغراب ...ساكن علي النخله لدلوقت ليه ؟
4- معاك للصبح!!!!

عمرو يقول...

بخصوص عبد الناصر
أنا عشت و كبرت فى عصر عبد الناصر و تعلمت بالمجان فى عصر عبد الناصر الرجل النزيه الشهم النظيف اللى مات و سايب لعياله 120 جنيه لا غير
عبد الناصر كان رجل حالم و رومانسى و كانت أحلامه أكبر من قدراته و الحالمون بطبعهم لا يصلحون لحكم الشعوب و لكن يصلحون لكتابة الشعر
يكفيه ناصر أنه أورث جيلنا الحلم اللى يبدو أنه لن يتحقق أبدا

Unknown يقول...

سلام الله عليكم استاذنا...
أخي الحبيب ...
لا أظنك تقصد مقارنه بين ناصر وغيره ...كا لا اظنك تدعونا للحياه في عصر جيفارا ...أو تدعونا للثوره مثله ...لكن لي ملاحظه صغيره ألا تتأملها معي ...هل كان جيفارا او ناصر او احمد بن بيلا ...او كاسترو ...او مانديلا...او تيتو...علي خطأ لأنهم حملوا احلاما كبيره؟
ام انهم مخطئين لأنهم ثوريون ؟
شكرا لك ....كن جادا معنا ..وبلاش شغل الفركشه و الفشوله و الكحينه الموضوع جد خطير وكبير ...والكلام أمانه!!

Beram ElMasry يقول...

استاذنا . fashkool
صاحب القلم الجميل والموضوعات المتنوعة ، فشكلتك لجيفارا اكيد جميلة ولكن الموضوع فيه اسهاب ومكتوب باللون الاحمر لسخونته ، ونسيت ياحبيبى ان هناك ضعاف البصر ومن حقهم الاستمتاع بما تكتب ، وراعى حالة النت المتدهورة ، وهى وسائل تعذيب جماعى عشان نتعلم الادب وشغل عيال ، والمعنى فى بطن الشاعر
يلا باى

مجداوية يقول...

السلام عليكم

حضرتك متناول الأمر بكثير من السخرية لكن سخرية موجعة بتخليك تبتسم لكن فى نفس الوقت تفكر وتتألم
لكن يعنى الكاجو أمام الحرية !!!!
طيب ما هي الحرية هى اللى حتجيب الكاجو وعلى العموم هو موجود ومرطرط بحوالى 80 جنيه أو أكثر وكمان التفاح مرطرط واللوز والبندق وعين الجمل
بس بقى اللى ممعهوش ميلزموش
بص من بعيد واقف فى طابور البحلقة
أما الأكل فلما نكون أهل للأكل حناكل
لأن من أعمالنا سلطت علينا والحالة اللى احنا فيها نستحقها
عبد الناصر وجيفارا حلم الخلاص لكن الخلاص فى دين الله بس محتاجين حد يفوق ويفوقنا لأننا دايما يا يجمعنا فرد يا يفرقنا فرد

وبعدين احنا لازم نبص اللى تحتينا عشان نستريح
سفر ويك اند ايه بس
بص على مجاعات الصومال

دى سياسة الحكومة
يعنى احمد ربنا

وفاء بركات يقول...

السلام عليكم
أ.فشكول
علي فكره بوست الجزمه مزعلش حد منك
واللي قلته حضرتك عن العضلات والمجانس
مطلوب وقبل منه نفهم يعني وطن الإنتما ء الأن أصبح لحظي وقت زلزال وقت ممصر تحصل علي بطوله ...وهوب خلصة الليله
أيامنا كان هناك إنتماء فعلي لليلد
عبد الناصر جاء بعد فتره من الإحتلال إطلق علي مصر قبل الثوره مجتمع النصف بالمائه وجاء جمال وقضي علي النصف بالمائه وأمم ووزع الفدادين علي المعدمين من فلاحي مصر فلما لايكون الأب الروحي للمصريين ..كان ثوريا مندفعا لاأعارض دخل حربا لم يكن أهلا لها وجاءت
النكسه وحسينا بالوكسه لكن أبدا لم تتهتز الجبهه الداخليه وأفتكر إننا كنا
بحلي الشاى بالعسل الأسود أيام الحرب
لنقص بعض السلع الغذائيه في ذلك الوقت
لتوفيرها للقوات المسلحه وللحد من الإستهلاك
ولم نشتكي أبدا وجاء السادات وعاني معاني من كراهية الشعب له لعدم إقتناعهم بغير ناصر رئيسا وأعدت الجيوش العدةليوم النصروقد كان بعون من الله عز وجل.
وكان يخصم من مرتبتنانسبه للمجهود الحربي لفتره طويله أيام عصيبه عشناها
ولم تهتز الجبهه الداخليه ..
ماذا حدث إذن؟
إن كل واحد عايز سيب بصمه ليه فيحاول انه يبين عيوب اللي قبله ويجمل الكلام بأنه بيحترم اللي قبله
الناس ثقتها أهتزت في الرموز ..
في ناس بتعرف تستغل المواقف وتدهن وتمسح جوخ..وصلت لأدى كمان عدت وطبعا
علشان المناصب كراسيها لها وميض معروف
جيرى عليها صاحب الألوف وفجاءة بقت شئ
عادى تملك مال أو واسطه يبقي الكرسي بتاعك من غير كلام وبقي في ناس تاكل الفول وناس تاكل لحمه وبسطه وناس علي سراير تتغطي بالحرير وناس نايمه عرايه علي البسطه وناس تصيف في مارينا وناس يتحرق بيها القطر بين العياط والواسطى
دلوقت في سوق دائم لبيع البانجو والماكس والبودره وزباينه من ولاد البشوات حتي بليه والأسطى ...
واللي مفروض العادله بين إيديهم بيرتشو
ويفتروا ودى أكبر خيبه ووكسه
كله تمام وبنخطي لقدام ومصريتنا وعروبتنا بقت بكام معانا الله معانا الله ياترى فهمنا ولا لسه
والله عارفين انك وإحنا عاتلين هم اللي جاى بس الهم كتر وزاد محتاجين لنظره لقدام نطل عليها من عدسه
نشوف البعيد ونحضر له لاتبقي خيبه ونكسه
وديك شوفت أخر الكبت إضرب المفترى بالجزمه خلص الكلام وإنتهي ياسدينا
تقولي ثقافه إحنا لعندنا ثقافه سياسيه ولاثقافه إجتماعيه ولا ثقافه
ثقافيه إحنا بنستورد من الصين السبحه والمصليه يالالالالالالالالالالالالالالالاهوتي

Unknown يقول...

أستاذنا الفاضل: فشكووول
السلام عليكم ورحمة الله وبركاته
جيفارا كان ثورى حقيقى ..لم يطمح لمكسب شخصى ..وضحى فى سبيل مبادئ وقيم أمان بها وأخلص لها حتى قضى نحبه فى سبيلها فكان دوره ايجابياً....

أمل حمدي يقول...

أنا جيت

منورة صح

ازيك يا استاذي

الحمدلله العطل اتصلح وقدرت أعلق

البوست كله انفعالات !!!!

ليه زعلان ؟

انت عارف احنا ليه معترضين على طول ومش عاجبنا اي حاجة

لان مافيش حاكم عادل كان همه اقامة حدود الله

كان كل همهم الدنيا

الرسول صلى الله عليه وسلم كان امي

ليس سياسيا ولا عسكريا ولكنه قاد وانتصر

لو أعدوا مثل ما قلت من رباط الخيل

لواجهوا وانتصروا واعزوا الاسلام

لكن المصالح الشخصية والرؤى الفردية

أطاحت بالشعوب الى الهاوية

مش عارفة احنا ليه بنحاكم أموات

ليه مش بنحاكم اللي عايشين

ولا مستنيين اما يموتوا وبعدين نحاكمهم

متزعلش هي دي الدنيا بقرفها وناسها اللي مبيرحموش

معرفش الصراحة انا كل حاجة عندي غلط

برجعها للدين وتقصيرنا فيه

ولو رضينا الله لارضانا

ولكننا لانستحق

دلوقت ها تقول يا استاذي ياريت

التعليقات مافتحت لماما امولة

صح لا مش ها تقول

تقديري

حاجــ عيال ــات يقول...

السلام عليكم

عمو صلاح ازي حضرتك
أنا قلت أصبح بما إني الصبح
المهم ادعيلي لأني عندي امتحانات ومتبهدلة جدا في مشروع التخرج

يالا اسيبك أنا بقى
ومعلش هبقى اقرى البوست تاني
سلام

من غير عنـــوان يقول...

العزيز فشكول المفشكل اللي بيفشكل

أنا قمت عملت واحد نعناع على ينسون

عشان أعصابي تهدى...

وتهدى

وتهدى

وماتكلمش في حاجه وحشه

استغفر الله العظيم

أصل أنا ( اعتزلت الغرام)
على رأي ماجده الرومي

تحياتي وأمنياتي

الازهرى يقول...

فشكول الحبيب

بص يا سيدى بخصوص النت
علشان انا مكدر من ساعة الؤال وان انا ماجاوبتش

الموضوع وما فيه ان رب مدى لعبده شوية علم فى وضوع الشبكات ورزفه باصحاب زى العسل زيك كده تمام

واحد منهم كان فى كندا ورجع ومعاه شوية برامج ليها العجب وطبعا كان ليا نصيب فى الهدايا الاجبارية

منها برنامج يرصد اشارات الشبكات الضعيفة وكمان برنامج لجدولة المطلوب من الكمبيوتر وتنفيذه بترتيب آلى حسب المزاج
قوم ايه
العطل فى الاساس كان جزئى وليس كلى وانا رصدت عدة مرات الاشارة
وقبل ما انام شغلت البرنامج بحيث اول ما يرصد اشارة يبلغ الاخ التانى ويصحيه
يقوم التانى منفذ اللى انا قلت عليه
اللى هو ايه
طبعا انت عرفت
الدخول على المدونتين وتسجيل الموضوعين ونشرهم الى جانب بعض الامور الاخرى حسب زمن بقاء الاشارة

خلاص يا عمنا
سماح بقى

غير معرف يقول...

يا سيدي
الحال من بعضوا
كل الشعوب العربية بتعاني من التفقير و التجويع و كمان من اللاديمقراطية اللي بتعيش فيها
الاستبداد سيد الموقف لكن يا سيدي اكيد انو بوادر الانفراج واضحة من خلال الحتجاجات و المظاهرات
اكيد التغيير حييجي و من الشعب
مودتي
مدونة احزانم لا تنهتهي

فشكووول يقول...

الحسينى بك لزومى :
تحياتى واسف انى لم استطيع وضع البنى والله حاولت واشكرك على شعورك وبمناسبة مشوار اسيوط تأجل وما رحتش لسه وانشاء الله ابلغك عندما اذهب الى هناك .. تحياتى لحضرتك

الازهرى الحبيب
ما رام احنا متفقين ما فيش مشكله وانا قريت التعليق بتاعك بتاع البرامج اللى صاحبك جايبها من امريكا .. شوف يا عم امريكا بتعمل ايه واحنا بنعمل ايه .. اشكرك لانك قلت لى اكتب ما تحب فان لم تكتب ما نحب هنا ايضا فاين نذهب .. تحياتى يا ازهرى .. الا حتطلع على المنبر امتى؟

بنتنا صفاء :
التحديث هو احقاق لحقيقة هامه كنت غفلت سهوا عن ذكرا وارجع الحق لأهله .. وانت دائما بنتنا .. مس حاحدث تانى واجيب مهندسين يحدثوا معايا .. ما انت عارفه مشكلة الكمبيوتر معايا .. بلاش فضايح وخلى عمك فشكول باين قدام الناس كأنه خبير وبيعرف يفشكل فى كل حاجه.. تحياتى

يا أبــــــى يا مكره .. انت عايزه تاكلى عيش وحلاوه .. انا بحبهم بس كدا بمزاج على العشاء ... مش زى ما انت عارفه ... .. اموت واعرف السؤال ده جه فى دماغك ازال ؟ .. اقول لك .. المنايفه بيدوروا على بعض .. هس .. ولا كلمه

العزيزه صبرنى يا رب
والله يا بنتى انا لقيت البت الدكتوره الشقيه سـوووولو ويزبر هى اللى جابت رجلى وحفرة لى الحفره دى .. انا قلت اليومين دول اسهم جيفارا مرتفعه قلت اقول فكره صغيره للشاب عنه .. وطبعا انا ما قلتش فى حقه حاجه لانه مات وهو ثورى قبل ان ينعم بالحياه المدنيه .. يعنى زى ما بيقولوا العسكريين .. مات دفاعا عن الواجب .. وعموما حالنا ايام الثوره وحالنا قريب وحالنا الان .. ماتفرقش كتير .. طول عمرك يا رضا وانت كدا.. تحياتى

اقصوصه الجميله ..
آيوه يا ستى .. الرجيم عامل معاك شغل .. وبقيتى رشيقه .. مبروك يا اقصوصه .. على فكره .. انا زودتها حبتين .. حانقل بعدين للمواضيع الخفيفه.

سووول ويزبر : البنت الدكتوره الشقيه
نورتى البيت .. ولا حاقول لك ولا كلمه واحد ..ولا حفتح بقى معاكى .. كل يوم تطلعينى من نقره توقعينى فى دحديره .. حارد عليكى وعلى تساؤلاتك فى مدونتك بس اما افضى من الرد على الزملاء
بس عارفه يا سووول احسن حاجه فى الموضوعين بتوع الجزمه ده ان التعليقات عندى فيها وجهات نظر كتير جدا والكل بيقول وجهة نطره باحترام .. انا احترمت المدونين وانا بقول .. وهما اختلفوا معايا .. بعضهم بشده وبعضهم بالهوينا .. لكن الجميع وانا منهم بنختلف بادب .. برضه كويس .. آهى بدايه ازاى نعرف ونتقبل ثقافة الاختلاف...سلام

يا طااائر
الله يخليك يا طائر .. يا مشجعانى .. ويا رافعه معنوياتى .. تصدقى انت اللى معايا على طول الخط .. كلا الزملاء بعضهم يشجعنى قليلا بس يقول بس اصل الموضوع كذا وكذا .. دى وجهة نظرهم وانا باحترمها وانا برضه لى وجهة نظر وهما احترموها .. ايه رأيك يا طائر تغيرى الاسم دا الى دعاء الكروان واهو برضه صوت الكروان فيه شجن .. تحياتى يا طائر

يا رئيس التحرير .. يا صاحب العزبه .. يا حسين بك سباق يـــ .. ايه كمان
معقول انت كنت قاعد طول الليل على المدونه .. انا قفلت بعد زيارتك الاولى ولسه راجع الوقت .. والله يا ريتنى شفت العليق بتاعك وانا كنت قعدت احكى معاك للصبح .. لكن ما علهش .. ايه رأيك نخليها يوم الاربع بالليل عشان انا عندى الخميس راحه ونقعد ندردش ونختلف ونتفق للصبح .. قةلت ايه .. هى فين النخله دى اللى عليا الغراب

يا عم عمر
انت باين عليك عجوز زينا .. يا اخى انا لم اتهم عبد الناصر لا سمح الله بأى اتهام وقلت بالنص انه وطنى وكان بيحب بلده .. كل ما هنالك انى اذكر تجاربه اللى انهكتنا وسنته اللى موديانا فى داهيه .. بس يا عم عمر .. وانت قلتها بلسانك الحالمون يصلحون لكتابة الشعر .. بس يا عم عمر .. تحياتى

بافركش .. تسألنى هل كانو على خطا لانهم حملوا احلاما كبير.. ام لانهم ثوريين .. هما كانوا الاثنين بس ايه ذنب الشعوب انها تشيل اثفال واحمال لا طاقة لها بها .. كمان يا فركش والله انا جاد جدا ودى وجهة نظرى .. يمكن تخالف وجهة نظرك .. مافيش مشكله وبما انى مؤمن بما اقول ومصصم عليه فانا اقول الكلمه بأمانه الابضافه الى انى اعلم ان الموضوع اكثر من جد واكثر من خطير .. انت كنت فين بقالك حوالى اسبوعين .. تحياتى

أهلا اهلا عمنا الشاعر بيرم
من هنا ورايح حاكبر الخط واخليه باللون اللى يعجبك بس قول لى ايه اللون الى تقدر تشوف بيه كويس .. بس والله يا عمنا الشاعى انا عارف بطن الشاعر فيها ايه .. كل يوم تتحفنا بفنك .. لا صرحت لنا مره ولا قلت لنا ماذا تخبئ بطن الشاعر .. يا عم قول .. على فكره يا شاعى .. متهيأ لى انها زادت شويه .. حاضر يا عم الشاعر والله يا شيخ حاسمع كلامك واخف المواضيع شويه .. يلا باى

ستنا مجداويه
الف حمد وشكر ليك يا رب .. وليه الف بس .. الحمد كله والشكر كله ليك يا رب .. اما اصحاب السياسه فلا حمد لهم ولا شكر .. يا ستنا انت بتتكلمى جد .. يعنى نبص للى تحتنا عشان نستريح .. يعنى ما فيش امل نبقى كويسين ..ويعنى ما فيش امل ابنى يعيش فى مجتمع متحضى .. يعنى احفادى يطفشوا من البلد لبلد تانيه .. يعنى هل اصبحنا عدم .. متهيألى انك ما تقصديش كده .. طبعا انا ما قصدتش الكاجو ولا حاجه .. اصل ابنى لسه جاى من لبنان كان مسافر لمدى اسبوع وجاب لى شويه منه من هناك .. وقال يا بابا الحاجات دى عادى خالص هناك وموجوده للى عايز يشترى يشترى ولا فيه حد بيبحلق ولا حد واقف فى طوابير البحلقه
ستنا المجداويه : والله يا ستنا .. ساعات الواحد اما بيفكر فعلا بيبقى عايز يصوت زى النسوان .. تحياتى يا ستنا

الغاليه وفاء بركات
يا ريف يا وفاء هانم احنا حالنا كدا بسبب حرب او ازمه عابره او كارثه المت بنا .. كنا دفعنا من قوتنا ومن جهدنا ومن دمنا ومن حياتنا كما كنا نفعل للمجهود الحربى وشرحك لى فى التعليق يؤكد المقوله الشهيره ان شهوات الدنيا ثلاث :
1 - شهوة المال
2 - شهوة الجنس
3 - شهود الحكم واقواهم وشهوة الحكم اذا غلبت صاحبها حكمته
وكلامك سيدتى من ناحية الثقافه صحيح .. صحصح .. صحيح .. والله انت عندك حق .. انا كمان حاعمل زيك واقول يا لالالالالالالالاهوتى بس حاقفل الاوضه كويس عشان ما حدش يسمعنى

استاذنا محمد يا جرايحى :
والله انا ما جبت سيرته بحاجه وحشه .. دا الوحيد من الثوريين اللى مات قبل ما يعرف كان حيبقى حلو ولا وحش .. عشان كدا سايب ذكرى حلوه قدام الناس ووراهم

ماما اموله
الحمد لله وصلتى بالسلامه .. انا كنت خايف عشان كتبت فى بداية البوست (عشان خاطر ماما اموله العسوله ) اصل كل ما اروح مدونه الاقيهم كاتبين (ماما اموله العسوله) قل اشمعنى آنى يعنى .. هيييه ماما اموله العسوله .. بس خلاص
حضرتك بتقولى بنحاكم اموات .. هو احنا ممكن نحاكم احياء؟ طبعا احنا مستنيينهم لما يموتوا عشان ما يبقاش معاه لا سيف ولا سلاك ولا سكينه يقطع بيها رقبتنا ولا حتى يريطه ولا دبوره ويبقى من غير هدوم خالص ومن غير سلاح .. كدا نقدر نتكلم .. هذه طبيعة الاشياء ازاى احاكم واحد حاطط السيف على رقبتى .. احنا بشر برضه وبنخاف .. وبعدين محاكمة الميتين فى التاريخ تستخلص العبر للاحياء والدهن كمان ويمكن العسل الابيض ولو ما كانش العسل الاسود المهبب بهباب
براحتك ياماما اموله اختلفى معايا زى ما انتى عايزه وانا حاحترم رأيك .. هو احنا نقدر نزعل من اللغة العربيه .. يا سلام !!!!! تحياتى يا ماما اموله

يا جهـــــاد .. انتى فين يا جهاد
الله ينجحك يا بنتى .. الله يوقف لك ولاد الحلال الله يرزقك كل ثانيه معلومه ويهديلك الحال .. قادر يا كريم - كدا عايز ربع جنيه - وابقى بلغينى عملتى ايه فى الامتحان

العزيز من غير عنوان:
يظهر والله اعلم انا السبب فى ارتفاع الضغط عندك وخليت اعصابك تشد ودماغك تفور .. علىالعموم انا مش هنا - انا هربت ورحت حته تانيه .. احسن تعرف طريقى وانا ما اضمنش تعمل فى ايه .. يا فكيك ..

هى فين الاحتجاجات دى والمظاهرات دى وفى ايى بلد .. دا يا دوب عشره ولا خمستاشر شخص وخلاص .. والتغيير ... مش باين .. اشكرك على الزياره واتمنى دوام التواصل

هــو..مش ..نـو يقول...

استاذ الناس ...وحـكيمهم
عندك فكره عن الفكر الثوري..
دا كان زمان ...اليومين دول طلع
فكر الجزمه ..و القبقاب..وبلاش عذاب.

غير معرف يقول...

السلام عليكم

لا يا أخي الكريم
طبعا بأتريق

أنا بأقول لحضرتك ان سياسة الحكومة انك متبصش الا للي تحتيك وجبتلك مثال مجاعة الصومال زيادة فى السخرية من سياستها

من حق أى انسان فى العالم انه يعيش مث أحسن مواطن فى أى دولة
ومن حق المواطن اللى فى الصومال اللى بتصيبه المجاعة وأمريكا ترمي القمح فى المحيط عشان تحافظ على سياستها المهيمنة انه ياكل كاجو هو كمان وأهم من الطعام أن يجد الانسان مكانا يحترم فيه انسانيته ويراعي كرامته
فهل هذا محقق ؟؟؟
بالطبع لا

لكن لو العدل ساد الدنيا مكناش طلبنا نخرج منها للجنة
الدنيا بناسها وحكامها وحروبها ومجاعاتها وظلم الانسان لأخيه الانسان مفيهاش عدل بفعل الانسان

أما عدل الله فستجده فى الآخرة
ففيها كل ما تشتهي الأنفس
ولو تقدر تسعي للحياة الأفضل فى مكان آخر فافعل لأنها كلها أرض الله ومال الله
لكن هى مسألة قناعات وظروف تسمح أو لا تسمح بتغير الحال الى الأفضل

أما بالنسبة لي مثلا ففي الجنة ونعيمها بقى

ازاي افتكرت حضرتك اني باتكلم جد !!!!!!!!!!!!!!

Dr. Ibrahim يقول...

ليه بس الكلام اللى يوجع الدماغ دا يا عمنا

بس فيه نكتة على جيفارا بيقولك

ده الشيخ جيفارا

وارحمنا يارب

تحياتى

عمرو يقول...

أيوه أنا فاهم قصدك يا عم فشكول ده أنا بأؤيدك فى كلامك
أيوه يا سيدنا عجوز من أيام ما كان كيلو الكباب عند أبو شقره ب 3 جنيه بالسلاطات و العيش

Beram ElMasry يقول...

اخى . fashkool
شيخ الظرفاء اسعد الله صباحك
( والله يا شيخ حاسمع كلامك واخف )
والله انت صادق ان شاء الله
المعاناة فى القراءة تصرف الذهن والهمة عن الاستمرار ، كذلك التطويل ، المعلومات القيمة تبسط وتحدد لتسهل على الجميع
لك شكرى وامتنانى
ويلا باى

Unknown يقول...

هههههههههه
أستاذنا وعمنا الحبيب: فشكووول
انا عارف إنك ماجبت سيرته فى حاجة وحشة
أنا فقط عبرت عن رأيى .
أهم شئ إنك زرتنى لأن أنا بسعد بزياراتك

Desert cat يقول...

استمتعت جدا بقراءة بوست حضرتك واللى شعرت من خلاله مدى معاصرتك وتفهمك من التجارب التى مررت بها خلال حياتك لذلك تكونت لديك تلك الخبرات الطائله ربنا يديلك طول العمر ويزيدك من الخبرات الوفير .. اما بالنسبة لناصر فانا اعتبر الحروب التى خاضها طوال فترة حكمه نزوات ففى 48 يا استاذى كان لا وجه للمقارنة بين جيش سوريا ومصر والجيش الاسرائيلى والامريكى وبالرغم من ذلك غامر وخاض الحرب فكان رد الفعل الطبيعى الهزيمة الساحقة بالاضافة للخيانة التى حدثت فى ذلك الوقت من بعض العرب .. كذلك الحال فى 67 ناصر كان لا يغامر بالارواح فقط بل ايضا بالاموال وظلت فترة حكمه حرب تلو الاخرى واتسنزاف ثروات مصر وارواح ابنائها حتى وصلنا الى ما نحن عليه .. اما بالنسبة للدول الاخرى وما يحيون فيه من ترف فعلى لسان صديقة امارتية ان الشاب الذى لا يعمل فى بلادهم توفر له الحكومة دخل شهرى يكفيه سكن واكل ولبس فما بالنا بالعامل وكم يتقاضى

تحياتى لحضرتك

رئيس التحرير يقول...

السلام عليكم ورحمه الله وبركاته...
بقي تقرأ موضوع عند صفاء ولا تلاحط انها نسبت قول سيدنا عمر الي سيدنا رسول الله صلي الله عليه وسلم ولا تنهها الي الخطأ...يارب اكون انا الغلطان !!!

Mahmoud farag يقول...

ازيك استاذ فشكوول

واحشني كتير و الله

واعذرني ع التأخير
بس فعلا انا مشغوول جدا في شغلي اليومين دووول

و متشكرين يا سيدي على المعلومات القيمة قوي دي

و منتظرين جديدك دائما

Unknown يقول...

ممكن لو سمحت يا عمو فشكول تجيبلى شوال معاك؟؟؟
يا بختهم ببلادهم وعقولهم ونفسياتهم واحنا لنا الله

قلم رصاص يقول...

عمي الكريم/فشكول

عاوز أقول لحضرتك ان البوست ده من أحسن ماقرأ على المدونات الى الان

لما فيه من رأي واضح محدد..ولما فيه من جرأة أكيد محسوبه ..ولما فيه من عرض سلس لفكرك ولأرائك أياكانت هي ايه

وانا معاك في جزئية انك بتلاقي ناس كاتبين في مدوناتهم حاجات بتختلف عما تكتبه..ثم تفاجأ بأنهم يتفقون معك في أرائك هنا في مدونتك

لأن ده فعلا بيحصل..وبحس انه بيحصل كسد خانة او لتأكيد وجود بالرد..دون النظر لفكرة الرأي والرأي الاخر

وانا مش هتناقش مع حضرتك في جوهر البوست حتى لاتتسع دائرة الحوار..عشان انا منور جدا وده هيزود فاتورة الكهرباء على حضرتك وانا مرضاش ليك الأذية ههههههههههههه

تقبل مروري ياأستاذنا جميعا

فاروق عادل يقول...

فى تاج القراءة عندى اتمنى انك تشوفة وتقوم بحلة

ن يقول...

السلام عليكم
أستاذى العزيز .. فشكول
شفت منام خير اللهم اجعله خير
ان فى مصر كانت من أيام قدمائنا ادارة ناصحة وناجحة ومرت عليها ظروف كتير قلبت الاحوال من حال الى حال اتهزمنا وغلبنا وانتصرنا واتوكسنا فى 1967وانتصرنا تانى فى 1973.
وشفت خير اللهم اجعله خير الناس أيامها كانوا فرحانين بالنصر وحزنين لأن من أغلب البيوت خرج إما أب أو زوج أو أخ أو ابن أو حبيب ولم يعود .
ونحتسبهم عند الله شهداء .دفعوا بدمهم وكسة 73 .وبعدين شفت اللهم اجعله خير ان الشعب اتنفخ فيه بودرة عفريت وفى سنين ماج فى بعضه وغابت الحقائق واتكتفت الايادى والعفاريت يامى رايحة وجاية ومحدش عنده علم حرقهم ولا الخلاص منهم وسمعت يافشكول فى المنام منادى بينادى داشعب خلاص استسلم للعفاريت إظاهر أدمن بودرتهم والهرش منها بقى شىء ضرورى يلا نقوم ونبنى مصر جديدة ونستفيد من تاريخ ذو القرنين ونبنى بينا وبينهم سد منيع عاوزين نعمل مصر جديدة لانج يعيش فيها العلمانين والفلاسفة وكل المثقفين بالعولمة اللى تأثروا ولم ولن يؤثروا وبكدة هتقوم حضارة جديدة من حقها اللقمة النظيفة والمستشفيات الصحيحة والعلاج الشافى وكله جديد فى جديد .. وصرخت فى المنام بأعلى صوتى وقلت للناس قوموا فوقوا احنا أصحاب أقدم حضارة فى التاريخ إحنا اللى علمنا العالم بلاش نكون حقل تجارب فوقوا قبل ما تتحصروا وتجوعوا انتم لسة بتتخنقوا على تاريخ السياسات وسيبين الحاضر للعفاريت أصحوا قبل ما يحكمكم غول المغارة بالكرباج مش هتلاقى وقتها زرع تأكلوه ولاقطن تغزلوه ولاعلم تتعلموه احنا لسة الدليل الوحيد إن مصر باقية فيها روح وجينات متوارثة من الاف السنين .
تفتكر دا حلم ولا كابوس عندك علم وتفسير يافشكول دبرنى يا حكيم.
مع خالص تحياتى

Soul.o0o.Whisper يقول...

fashkool

انت قصدايه يا سول يا مكاره *

و لا أى حاجة خالص يا أستاذى
دا أنا حتى مؤدبة و مربعة إيدى أهو

يابنت يادكتوره ياشقيه *

أحرجتنى يا استاذى العزيز

ولا حاقول لك ولا كلمه واحد ..ولا حفتح بقى معاكى *

ليييييييييه بس كدااااااااااا ؟؟؟

حارد عليكى وعلى تساؤلاتك فى مدونتك بس اما افضى من الرد على الزملاء *

آه ... أنا اتخضيت
ههههههههههههههه


حضرة الفيلسوف العزيز ...

دائما عندما ننظر للأمور من زاويتنا فقط
نجد أنها زاوية حادة ..

لكن عندما ننظر إليها بوجهة نظر الآخرين
نجد أنها تحولت إلى زاوية منفرجة

(( حلوة الرياضة دى ؟؟؟


:)
دمت بود استاذى الفاضل

و فى انتظار الرد







خالص تحياتى

أحــوال الهـوي يقول...

عمنا و حبينا
اولا و حشتني و الغياب عنكم صعب بس ارجع القيك مفشكل تاريخ مصر و مطلع معاميعه بالشكل ده

نسيت تضيف من مآثر عهد عبد الناصر قوله نحن بلد صناعي لا زراعي
فصرنا لا صناعي و لا زراعي

انا لا اعفي اي رئيس دولة من سقطات عصره و لا من تجاوزات وزراءه و مهما قيل بان عهده له سلبيات و ايضا ايجابيات فلابد ان يتحملها جميعا و ينطبق الامر علي توابع الزلزال

فلا نعفي اي منهم من فساد عصره و ذل مواطنيه
فقط يتباهون بما حققه البعض من انجازات و تضخيمها و اخفاء الغث من الفساد و السقوط

احاول ان اقول الكثير و لكن ماقل و لم يدل علي ما اقصد افضل

تحياتي

الازهرى يقول...

حبيبنا فشكول

ما علينا نقول برضه الزهايمر
وفى الاخر كلهم قارة واحدة

اما بخصوص المنبر فعن قريب ان شاء الله


تحياتى وخالص مودتى

mr_raafat يقول...

عمي وتاج راسي
السلام عليكم ورحمة الله وبركاته
مش قادر أعبر عن أسفي لدخول المدونة وغصب عني منهم لله بتوع التدريب .
عملوا التدريب عشان دي سبوبة مش عشان نتعلم حاجة أو نفهم حاجة واحنا السبب لأن مفيش تخطيط والمخرج عايز كده .
ودا بالظبط اللي أنا فهمتوا من حضرتك كلنا بنضحك علي بعض وبنأدي أوامر لكن ليه وايه النتيجة دي مش بتعتنا . المهم ننفذ وخلاص .
حقيقي أنا سعيد بآراء حضرتك ووجهة نظرك طيب مفيش ديمقراطية ولا حرية ولا نزيهة ...طيب مفيش رغيف عيش حلو مفيش عيشة محترمة أمال فيه أيه
فيه عدس تيجي تاكل وفول وبصل وبعين مش هايكون فيه حاجة .
علي فكرة أنت جددت الرخص ولا لأ أقصدي البطاقة ولا ها يسحبوها منك
وحشتني جدااااااااااااا
مع السلامة

سمكه واحده يقول...

ايه ده انا علقت من زمان هو فين التعليق الله الله ده انا كنت كاتبه كلام كبير اوي

بالنسبه للمدونه بتعتي حبيت العب فيها شويه خليتها سمك لبن تمر هني


بالنسبه لصوره الزحمه والعيال اه بحبها




بالنسبه للصوره اللي فوقيها اه يا عمو فشكول يا خبيث انا كمان عجباني اوي لاو ايه بتشيل طرف الفستان عشان تعرف تعدي اصل الارض فيها مايه لسه مرويه عشان الزرع


معلش بقي شويه كده الحال في المدونه ملخبطه
تحياتي
سمكمك بس ايه قرش

دعاء مواجهات يقول...

هههههههههههههههههه

حضرتك دمك زى العسل

جيفارا انكتب ومازال يكتب عنه كتب والكلام عنو يطوول اصلا

تحياتى ومودتى

Soul.o0o.Whisper يقول...

fashkool


التفكير وتقليب العمله على وجهها الاخر وترك القوالب الجامده اللى اتعلمناها من يوم قيام الثوره حتى الآن *

:)
حقيقى أنا سعيدة بكلام حضرتك دا


وكل اللى جاى من الغرب مرفوض .. مع اننا نعيش حضارة الغرب وثقافته وروحه ايضا .. كما يكون عندنا انفصام فى الشخصيه *

تصدق النقطة دى بالذات عاوزة وقفة جامدة جدا
لأننا فعلا زى اللى بيضحك على نفسه
أو مش فاهم
أو عنده انفصام فى الشخصية زى ما حضرتك بتقول


وكان جيفارا رمز وقيمة من قيم الحق التى (نفتقدها الان فى اوطاننا)*

فعلاااااااااااا
و النقطة دى بالذات فيها كلام كتير
بس شوية كدا



خريج الصيدله وعلى اعتبار ان خريج الصيدله وكليه الصيدله من احسن الكليات وخريج الصيدله من احسن الخريجين وله مقام رفيع فى مجتمعنا*

خدعوك فقالوا
أمال لو مش كانت العيلة عندك كلها صيادلة كنت قلت ايه؟؟؟
لالالالالالالالا
ماكنتش فاكرة ان حضرتك هتطلع علينا إشاعات مغرضة كدا
ههههههههههههههههههه



وباعتبار انك صيدليه حتقفى فى صيدليه بعد الضهر *
مين داااااااااا
أنا أروح شغل الحكومة و بعدين أرجع أقف فى صيدلية
و بعدين إذا ربنا أكرمنى و عرفت أرجع بيتنا أقوم بشغل البيت؟؟؟

دا افترى والله
دا أنا أروح فيها
هههههههههههههههه


هأكتفى بالـ400 أو 500
بس هما ييجوا
:)



الحكومه اللى هى قاطرة المجتمع فى كل شيئ تعطى اجور رمزيه ويتأسى بها الجميع ..قطاع خاص وقطاع عام .. يقوللك شوف مرتبك فى الحكومه حيبقى كام ويقوم رابط لك مرتب على قد مرتب الحكومه اللى هو رمزى وليس مقابل العمل *

للأسف يا أستاذى العزيز
هو دا الواقع
بس إذا فضلنا بنفس فكرنا
و فضلنا نقول لما تبئا الحكومة تقدرنا نبئا نشتغل و ننتج
يبئا إن شاء الله هتخرب أكتر مما هى خربانة
و خللى بالك
أنا قدمت المشيئة أهو
ههههههههههههههههههههههه


يا سوول يا اللى حتبقى دكتوره صيدليه قد الدنيا بصرف النظر عن امكاناتك الشخصيه وامكانات عائلتك متيسره او غير ذلك *

ياااااااااااااارب
يارب يارب يارب
ايوا كدا ادعيلى



خلاص يا سوووووول .. مش اقول تانى عليكى الزميله .. خلاص يا بنتى .. كويس كده .*

اه كويس خالص خالص خالص
أهو حتى عشان الواحد مش يحس باليتم

أصلى كنت فاكرة هأفضل طول عمرى يتيمة
بأب واحد و أم واحدة
لكن كدا الحمد لله
بئا عندى 3 بابا و 3 ماما
ياما أنت كريم ياااااااااارب
هههههههههههههه



اصل انا عندى بنتى صيدليه وكوزها صيدلى ومرات ابنى صيدليه ... هو احتلال ولا ايه .. الاستقلال التام او الموت الزؤام *

أى نعم
و إنه لكذلك
إلى الجهااااااااااااااااااد
معتدل مااااااااااارش
:)



كمان يا سول ما تطلعيش من نافوخى .. هو انا ورايا ايه ؟؟؟؟*

متشكرة خالص خالص
مش باقولك لحضرتك بتحرجنى بذوقك
:)





خالص تحياتى

كاميليا بهاء الدين يقول...

السلام عليكم

ههههههههههههههه

عايز تاكل كاجو؟؟

أظن بعد التعديل الجديد للدستور اللى تم من سنة على ما أظن او يمكن أكتر ..

مش بقى فيها كاجو .. خاااالص

أقول لحضرتك حاجة؟

فيه ناس اتولدت .. وكبرت .. واصبحوا شباب .. وفى طريقهم إلى الشيخوخة فى نفس عصر شاغل الكرسى الحالى .. مش غريبة دى؟

رغم مرارة ما فى البوست .. إلا أنك كعادتك .. تستطيع انتزاع الضحكات ببراعة

أسعد الله قلبك ..

تحياتى واحترامى