السبت، ١٧ يناير ٢٠٠٩

القاهره

تحديث
كنت قلت فى البوست ان قطر الندى بنت احمد بن طولون وهذا خطأ لم اتداركه الا عندما قرأت البوست بعد ذلك .. والحقيقه ان قطر الندى بنت خمارويه وان احمد بن طولون هو جدها الاكبر
================================
احبائى الغاليين
كنت عايز اكتب النهارده عن الأهرامات وقعدت طول النهار اكتب والخص واجيب معلومات تاريخيه .. لكن لقيت الموضوع كبير قوى ومش حيكفيه النهارده ولا بكره ولا حتى الاسبوع ده .. قمت ايه قلت اعمل موضوع خفيف عن مدينه القاهره والحقائق التاريخيه عنها واضحك عليكم بيه وعلى رأى حديث رسول الله صلى الله عليه وسلم (علم لا ينفع وجهل لا يضر ) وما دام لا يضر ولا ينفع .. يمكن حد يكون عايز يعرف المعلومه دى وما عندوش فكره وينتفع بيه .
ايه بقى حكاية القاهره دى .. حاقول لكم الحكايه:
اصل التسميه كانت زمان زمان وقبل سالف العصر والاوان كان فيه حته بعد ميدان النعام الحالى اسمها (اون) فى اللغة المصريه القديمه . الكلمه دى اتحرفت بقى برضه من زمان الى كلمة (عين شمس) وسماها الرومان (هليوبولس) وكان جنوب المدينه دى مدينه صغيره اسمها (حون وان) اللى هى الآن (حلوان)
صوره بانوراميه لكورنيش النيل بالقاهره وحوله بعض المعالم والكبارى

نيجى بقى نشوف .. هى دى القاهره وخلاص؟ .. لأ يا جماعه .. القاهره بتتكون من عدة بلاد .. تعالوا بقى نشوف بتتكون من كام بلد:-

طبعا من عين شمس اللى هى اون .. كمان فيه بلد كان اسمها ممفيس اللى هى البدرشين النهارده ودى غرب الجيزه واصلها طبعا زى ما انتم عارفين فرعونى زى عين شمس بالضبط والبدرشين دى زى ما احنا عارفين من قبل الاسر وعشان نعرف القاهره بتتكون من ايه أو النواه بتاعتها تعالى نشوف :

فم الخليج : وهى خليج أمير المؤمنين ودا فى شرق القاهره .. اظن كلكم عارفينه

الفسطاط : وهى اول موقع للقاهره واللى بناه عمر بن العاص .. وكلمة فسطاط .. معناها خيمه وكمان ..

القطائع : اللى هى عاصمة الدوله الطولونيه واللى فيها الآن جامع احمد بن طولون اللى هو ابو قطر الندى حبيبتى . وهناك حى طولون .. طبعا كلكم عارفينه وجنبها السيده زينب والقلعه وشارع طولون ودرب الحصر


مسجد احمد بن طولون بحى طولون

فيه بقى حته تانيه اسمها الزاهره : واللى انشأها جوهر الصقلى وابتداها بالجامع الكبير وبعدين قصر الأمير الفاطمى ودواوين الحكومه وخزائن بيت المال .. الجامع الكبير بعد كدا بقى سموه الجامع الازهر ... لييييه ... بيقولوا ... نسبه الى فاطمه الزهراء ... وبعضهم بيقول : كأن كل ما حوله زاهرا وكان هو ازهرهم (الازهر) والبعض ارجع التسميه الى كوكب الزهره.

كل البلاد والحتت دى اجتمعت وانضربت فى الخلاط والزحف العمرانى بينهم وبين بعض خلاهم لاضمين فى بعض وسموها القاهره .... ليييييييه ... اقول لكم .. بعضهم قال نسبه الى نجم يسمى القاهر .. وأخرون شافوا ان الخليفه الفاطمى هو اللى سماها القاهره لانها تقهر كل شيئ .

يبقى القاهره الأن بتتكون من الفسطاط اللى هى مصر القديمه ... وكمان القطائع اللى هى عاصمة الدوله الطولونيه والقاهره الحديثه اللى بناها جوهر الصقلى ..

آدى حكاية اسم القاهره فيه حد ضرته المعلومه دى ... ولا فيه حد نفعته المعلومه دى

والسلام عليكم ورحمة الله وبركاته

هناك ٤٣ تعليقًا:

AHMED SAMIR يقول...

معلومات قيمة فعلا والله
ان شاء الله يطلع علم ينفع بأذن الله
جزاك الله خيرا
تحياااتي

mr_raafat يقول...

استاذي الغالي
شكر الله لك علي هذه المعلومات القيمة.
ورحم الله قاهرة المعز رمز العزة والصمود. العاصمة التي كانت دائما قبلة العرب والمدافع الأول عن القضايا العربية باعتبارها القاهرة التي قهرت الغزاة علي مر التاريخ. والتي لجأ إليها دائما المستجيرين ودائما كانت تجيرهم
سلام علي القاهرة رمز العزة رمز الإباء رمز الحرية
دمت عزيزا يا أستاذي

mr_raafat يقول...

مساءك خير ورحمة
استاذي الغالي كما قلت لك دائما أنت عزيزا حكيما
وكل لبيب بالإشارة يفهم
ولا عشت إذا قلت شيئا عن تأريخك لأنك بحق تعد مؤرخا لك باع في ذلك وتكفي معرفتك ومفاهيمك
سعدت بألف خير

Unknown يقول...

السلام عليكم
بحيك على المدونه المفيده دى و مش اخر مره
و بشكرك على مرورك الجميل

تحياتى

بس خلاص ... يقول...

السلام عليكم
حمد الله على السلامه من رحلاتك وجولاتك
وربنا مايحرمنا من نفع كلماتك...بس لينا عتوبه ليه انقطعت زياراتك

حكاياتك ليها طعم تانى بيخلينا نعيش فى عبق التاريخ

وبعدين قطر الندى حبيبتك مش خايف من ابن طولون لايقول لام اسامه وتبقى حكايه ...

mahasen saber يقول...

الموضوع رائع رائع رائع

انا استمتعت وما اتضرتش

واجمل ما عجبنى كمان صورة مسجد احمد بن طولون ابو حبيبتك بجد صوره رائعه

وكتاباتك يا عمنا الكبير اجمل واجمل

بس احمد ربنا يحمى يا رب قمر
عبال ما اشوف احفادى من عبدالرحمن

أمل حمدي يقول...

استاذي فشكول

مين اللي قال ان كلامك كلام والسلام

ماشاء الله على المعلومات القيمة

ربنا يبارك في قلمك يارب

حمد الله على سلامتك

وكل عام وانت طيب وعقبال مائة سنة

بالخير والطاعة يارب

dodda يقول...

حاسه ان ودانى طولت وحيطلعلى ديل...
",)<<<< وش مكسووووووف...

معلوماتى عن القاهره تحت الصفر
):

الموضوع جميل بس انابقى كاليش دعوه اناعايزه خريطه زى بتاعة فلسطين
وجوله ميدانيه

Hanan Said يقول...

انا انا انا
انا استفد منها جدااا جدااا يا استاذ فشكول
بجد تسلم ايد حضرتك
بحب اوووي مواضيع حضرتك لانها بجد بتفدني جداا واسلوبها مشوق جداا جداا
تحياتي لك
ومستنيه جدااا موضوع الاهرامات خالص
تحياتي لحضرتك

وفاء بركات يقول...

هو حضرتك بتكتب حاجه مش مهمة
أو ملهاش فايده..
احنا كنا نعرف من أول منفيس وحتي
المعز لدين الله الفاطمي من كتب التاريخ
لكن اللي قبل كده إضافه تشكر عليها
حضرتك..
نشكرك علي هذه المعلومات القيمة
تمنياتي بالتوفيق

ghorBty يقول...

السلام عليكم ورحمة الله وبركاته

معلومات جميله جدا

بارك الله فيك يا استاذ فشكول

استمتعت جدا بيها وخاصة صورة المسجد سار فكري الي هناك حيث الهدوء المنظر بجد مريح للاعصاب

هل ممكن يجي يوم ويعود الهدوء من تاني لشوارع القاهره ام انه حلم لم نشاهده ولم يتحقق ؟

اسفه اصلي متعقده من الزحمه جدا

غربتي

Abd-Allah ibn Aadam يقول...

السلا عليكم أستاذ فشكول ..

للأسف أنا أيضا معلوماتي عن القاهرة تحت الصفر ..

بصراحة ما أعرفش في القاهرة غير التجنيد اللي في حلمية الزيتون :) ..

للأسف أنا و الكثيرين من أقراني لا نعرف الكثير عن مصر , و لا حتى عن جغرافيتها ,

منذ أن هجرنا التاريخ و الجغرافيا في الإعدادي !!

بصراحة هي حاجة تكسف إن الواحد يكون مش عارف بلده ..

بس ما باليد حيلة !!

عموما شكرا جزيلا على الموضوع , أهو بيزودنا شوية معلومات على الماشي بدل ما احنا ميح خالص :) ..

و شكرا جزيلا طبعا لزيارتك الكرمة لنا ..

في أمان الله

على عبدالله يقول...

مين قال انها علم لا ينفع
والله معلومات اول مرة اعرفها
لانى بعشق القاهرة زى ماهىة كدة
وخاصة منطقة الازهر والحسين
يعنى م الاخر كل ما هو قديم

تحياتى

اقصوصه يقول...

بابا فشكول

معلومات رائعه

وتقرير جدا جميل

ووصل بوقته اكيد :)

بعده العرض ساري بابا فشكول

لا تنسى الموع اللي خبرتك عليه :)

وان شا الله اشوفك على خير

أميرة الجنة يقول...

السلام عليكم
انا الحمد لله المعلومة فادتنى جدااااااااااا شكرا لك على مجهودك
تقبل مرورى الاول على مدونتك الرائعة

حاجــ عيال ــات يقول...

السلام عليكم
عمو الفشكول الجميل
وحشتني جدا
وكمان زعلانة من حضرتك
ازاي يكون عيد ميلادك بعدي بيوم وماتقوليش كنا عملنا بوست مشترك وحفلة واحدة في يوم واحد وكمان نوفر تكاليف الحفلة
عامة كل سنة وحضرتك بألف خير وسعادة وصحة وهنا وراحة بال ودايما معانا منورنا ومفشكلنا لو لزم الأمر

مذكرات مشاغب يقول...

استاذي العزيز فشكول
طبعا معلومات قيمه جدا
ولو ان حضرتك مذكرتش دوري في تسمية القاهره بالاسم ده
واديت الدور ده للخليفه الفاطمي
احب اقول لحضرتك انهم سموها الاسم ده لاني كنت لا اقهر
فسموها على اسمي(وش بيغمز)


تحياتي

هانى زينهم يقول...

جميل اوى يا استاذنا التاريخ المبسط ده . بجد اسلوبك رائع ومش ناقص الا انك تشاركنا بقى فى اكل عيشنا !!
تسلم ايدك .

شمس النهار يقول...

شكرا علي مجهودك
الحقيقه كتير من الشباب مايعرفوش المعلومات دي والا ربعها
حضرتك عارف ان الي الان لما يحفروا في عين شمس
عشان يبنوا بيت يلاقوا اثار فرعونيه
وبعد اذنك عايزه اضيف
ان الجامع الازهر
بني لنشر المذهب الشيعي في مصر وبالتالي لشمال افريقيا

Soul.o0o.Whisper يقول...

كان معكم من خلف المايك
الفيلسوف العزيييييييييييييييييز

فشكووووووووووووووووووول


متربعا على (فسطاطه) (المزهر) ،
منتظرا (قطرا) من (ندى) ليندى به التاريخ (قديمه) و (حديثه) ... :)


دام حديثك (حلواااااااااااااااان)
ممتعااااااااااااااااااان
فى أمسيات
يكون فيها ظهور (البدر...شين)


و فعلا أستفدت كتييييييييييير





دمت بود

همس الاحباب يقول...

هههههههه
لا معلومات قيمة يا ابو اسامه
جزاك الله خيرا
بس كان نفسى القاهرة تظل قاهرة لكل الاعداء
وترجع لزمن العزة والكرامة
وتطرد الخونة
تحياتى

صبرني يارب يقول...

هو انت كده بتضحك علينا ؟؟

طيب ماشي مش هاقولك بقى انى ما اعرفش اغلب الكلام ده

احسن تقولوا عليا جاهله ههههههههههههههههه

شكرا على الموضوع ياا ستاذنا

rovy يقول...

السلام عليكم
استاذى الفاضل اشكرك جدا على المعلومات اللى هى اكيد افادتنا جزاك الرحمن كل الخير يارب ..
بارك الله فيك و دمت سالما و دام قلمك يفيدنا و يمتعنا ..

خالص تقديرى و تحياتى

Unknown يقول...

السلام عليكم ورحمه الله وبركاته
________________عمنا العزيز...تسلم لنا يا غالي وتجيب الغالي ..في كتاب للدكتور /جمال حمدان ...بيتكلم عن القاهره ولماذا هي العاصمه؟ والكتاب برضه أسمه القاهره ...وعلي فكره هو فصل من فصول كتاب شخصيه مصر دراسه في عبقريه المكان ...وطبعا عندما يتكلم جمال حمدان في الجغرافيا اللي هي مرتبطه ارتباط وثيق بالتاريخ ..ولا التاريخ اللي مرتبط بالجغرافيا ...أظن الامر لا يفرق في شيئ ...معلهش ...لما يتكلم جمال حمدان ....كلووولوا يسمع.
رحم الله الدكتور جمال حمدان وبارك لنا فيك ذكرتنا به...سلامات

رئيس التحرير يقول...

السلام عليكم
أخيرا كلمتني ...الحمد لله رب العالمين.
عارف يا عم صلاح ...لما بتقول في آخرتعليقك ( أنت عايز ايه يا حسين )والله العظيم سمعته بصوت ابوبيا الله يرحمه. واذا كان عاجبك او هج ...ان كان فيهبلد تقبلك ...انا هدومي مش حملاني عايزه تطردني منها مش انا الي عايز يطلع منها لا هي عايزه تطردني ..اهو..ياعم صلاح الهم يطلع لبره شويه ..بدل ما يحرقنا من جوه..
الله يكرمك ...بلاش تتقل علينا.
تصبح علي خير وسعاده ...

daktara يقول...

والله كلام جميل
وعلم نافع ان شاء الله
احب انا المواضيع البحثية وامعلوماتيه دي
بتحسسني ان الهلس اللي انا بعمله علي النت بيجي بفايده برضه

انظر حولك
د. خالد عزب

Mahmoud farag يقول...

اهلا استاذ فشكووول

و شكرا على تعليقك عندي في المدونه " حنان و حنين "

و أعذرني على التأخير انا مبدخلش كتير على النت عشان ظروف شغلي ...

بالنسبة لسؤالك ... مدونة " حنان و حنين " غير مشتركة بيني و بين حنان

حنان تملك مدونة تحت إسم " حياتي "
و مدونتي فقط اقتبست اسمها من اسم حنان .... و أحسن حاجه في مدونتي اسمها :)

daktara يقول...

مممممممممممم
اشكرك علي وضع اللينك بتاعي عندك
وكمان اشكرك علي كلماتك الرقيقة

yoyo يقول...

أتمنى
ان حضرتك تتقبل اعجابى ومرورى على مدونة حضرتك اللى بجد اكثر من رائعة

مشاء الله معلومات قيمة جدا جدا
واسلوب حضرتك فى الكتابة روعة سهل وبسيط بعيد عن الاساليب المعقدة لكتب التاريخ والجغرافيا

تقبلى اعجابى بمدونة حضرتك فى اولى زياراتى وان شاء اتمنمنى ان يدوم بينا التواصل

تقديرى واحترامى
يويو

على عبدالله يقول...

استاذ فشكول
مبادرة طيبة منك "مش المبادرة المصرية طبعا " ان تكون اول تعليق
وتستحق عليها هدية !!
واليك الهدية
http://www.youtube.com/watch?v=4kwClC354AI

لماذا لا تعليق يا استذنا ؟!
هذه وجهة نظر ولك ان تختلف او تتفق ..
انا لن اعيد ما كتبته مرة اخرى
ولكن ادعوك لقرائته مرة اخرى وسانتظر تعليقك ورأيك بصدر رحب حتى استفيد وغيرى باذن الله

تحياتى

بنت الغربة يقول...

استاذ فشكوول
معلومات حلوه جدا
انا فعلا ماكنتش اعرفها خالص لانى درست بره مصر طول عمرى
وولادى سألونى نفس السؤال
وهو ليه القاهره اسمها كده
طبعا قولت بس انها علشان بتقهر الاعداء بس
وماعرفتش أأولهم حاجه تانيه للأسف
بس انا هانسخ البوست ده عندى على الكمبيوتر وهاخلى الولاد يقروه
وشكرا مرة تانيه
تحياتى ليك

أحــوال الهـوي يقول...

معلومات قيمه يا عمنا كالعاده
و ماكنتش اعرف انك ضرتي و بتحب قطر الندي برضه
علي العموم مش خساره فيك
اعلن تنازلي لحبيبي

تحياتي

وفاء بركات يقول...

أستاذنا فشكول
اشكرك علي كل كلمه طيبه وهذا من كرم اخلاق حضرتك..
وإن كنت علقت بقولي إن بوستات
حضرتك قيمه ونستفيد منها فهي ليست ماجامله بل كلمة حق وإشاده تستحقها وانا علي يقين
أن جميع المدونين من زوارك يتفق معي في هذاالرأى.
ربنا يزيدك علم .
تحياتي

Dr. Ibrahim يقول...

لأا يا عمنا ازاى نفعتنا طبعاً

حتى لو كانت كلمة جديدة لم نعلمها بعد..

تحياتى لك

Unknown يقول...

اه فى حد نفعته المعلومة دى طبعا...يعنى حلوان مش كلمة عربى؟؟؟ يا سبحان الله بس حلو التحريف بتاع الاسامى دة والله المصريين دول حريفة فعلا

Soul.o0o.Whisper يقول...

fashkool


فيلسوفى العزيييييييز

ابتديت أتبنى ؟؟؟
من امتى الكلام دا ؟؟
من ورايا ؟؟

و كمان أمير و غلبان ؟؟؟
لالالالا .. الظاهر أنا عدت بأعمل حاجات كتير من ورايا و أنا مش حاسة
:)



دمت بود

الحرامي يقول...

شكرا علي المعلومات القيمه دي
انا شخصيا كحرامي
استفدت كتير جداااا
مما سيؤثر ان شاء الله علي العمليات الجايه
الثقافه حلوه بردك

مهرة سالم يقول...

السلام عليكم...
إزيك يا عمي فشكول أن شاء الله تكون بخير..
.......
القاهره...
ذكرتني بأيام جميله قضيتها هناك...
والمعلومات فادتني حقيقتا أصلي بحب الحاجات التاريخيه جدا ...
.....
نفسي أزور الفسطاط أن شاء الله المره الجايه...
.........
وبالطبع الشكر كل الشكر ليك على أسلوبك الرائع بالطرح ..
وكذلك بالرد وتقبل النصح...
والله متتخيلش فرحت قد إيه بردك..
ربنا يوفقك وينفع بك..
.....
في أمان الله..

saheda.com يقول...

حَيَّ عَلَى الْجِهَادِ.. لدعم المقاومة بالسلاح فى مواجهة الآلة العسكرية الصهيونية.

حَيَّ عَلَى الْجِهَادِ.. بالوقت والعلم والمال والدم لتتحقق الوحدة بين كافة طوائف الأمة..

حَيَّ عَلَى الْجِهَادِ.. بفتح المعابر والحدود وأبواب التطوع ودعم المجاهدين بكل الوسائل.

حَيَّ عَلَى الْجِهَادِ.. لتبرأ الأمة إلى ربها من تقصيرها في حق ربها ودينها ورسالتها.

حَيَّ عَلَى الْجِهَادِ.. لنصرة المظلوم وإعادة الحق لأصحابه.

حَيَّ عَلَى الْجِهَادِ.. للوقوف في وجه الظلم والاستبداد والاستكبار الصهيوني غير المسبوق على مرأى ومسمع من العالم بأسره.

حَيَّ عَلَى الْجِهَادِ.. جهادًا نرفع به سقف مواجهتنا لهذه المحرقة لأقصى درجاتها الممكنة.

حَيَّ عَلَى الْجِهَادِ.. لنحسن علاقتنا بربنا ونتقرب إليه وندعوه آناء الليل وأطراف النهار، وبخاصة وقت السحر، لنصرة المجاهدين الصابرين الصامدين.

!!! عارفة ... مش عارف ليه يقول...

جذبني تعليق إلى مدونتك

وقد صدق إحساسي
بأن هناك شيئاً ما
في هذه المدونة

سعدت بزيارتي
وفي إنتظار تدوينة الأهرام

تحياتي
وليد

خادم الدعوة يقول...

جزاك الله كل خير على هذه المعلومات القيمة ومن المعروف تاريخيا عن أهل مصر أنهم أناس طيبون مرابطون وهم خير أجناد الأرض كما أخبر عنها الحبيب المصطفى صلى الله عليه وسلم وأسأل الله عز وجل أن يعيننا على تغيير ما بأنفسنا حتى يغير ما بنا ويزيح عنا كل طاغية خائن جبار

عمرو جويلى يقول...

ياأستاذى العزيز هذا شرف كبير لى لمجرد زيارتك لمدونتى وأنا فى إنتظار الجزء الثانى

من غير عنـــوان يقول...

الله عليك يا راجل يا جميل ياللي مليان معلومات تاريخية.... ولحمه


تحياتي