الثلاثاء، ٢٠ يناير ٢٠٠٩

ارض كنعان - فلسطين - وجبال الصبر

الحلقه الاولى

اخوانى الاعزاء

سأطرح لكم هنا وعلى اكثر من حلقه - قصة الوطن الفلسطينى وما تحمله على مدى التاريخ .. فدون ذلك كل شيئ ممكن تأجيله وحتى يمكن لابنائنا الاطلاع ومعرفه بعض الجوانب التى غابت عنه - وسأطرح لكم الموضوع للنقاش ليدلو كل بدلوه . فالتاريخ ذو اجه كثيره ولا ادعى ولا يدعى احد احتكار الحكمه والمعرفه وادعوكم جميعا للتناقش والجدل على المدونه ليس بينى وبينكم فقط ولكن بيننا جميعا وما لديه اى حقائق فليطرحها ..


وحتى تعم الفائده اطرح لكم الموضوع للنقاش بينكم وبين بعض ومن اراد عمل موضوع مستقل على مدونته فليفعل - فالمهم هو وجبه كبيره يدلو فيها كل بدلوه.

سوف نتناول حقائق تاريخيه ولن نعلق على شيئ وسوف نترك كل يستنتج ما يستنتج ويعرف ما يعرف - ما أطرحه هو مزيج من ابحاث كثيره مثل ابحاث مقارنة الاديان لعلماء أجلاء من الازهر وعلى رأسهم الدكتور / عبد الله .. مش فاكر كمالة اسمه .. استاذ مقارنة الاديان بجامعة الازهر وكذا نقلا عن الامام ابو الفداء اسماعيل بن كثير ونخبه من العلماء وعلى رأسهم ترجمه لـ جوستاف لوبين ( اليهود فى تاريخ الحضارات ) مترجم بواسطة عبيد وكذا ترجمات لـ شارلز فوستر ولسليمان مظهر وغيرهم.
ونبدأ
بسم الله الرحمن الرحيم
اولا - فلسطين ... التاريخ
المكان والموقع : هى عباره عن مثلث - رأسه فى الجنوب عند خليج العقبه وقاعدته من شرق نهر الاردن حتى البحر المتوسط .. كلنا يعرف خريطة فلسطين.
اصل سكان فلسطين: قبل الميلاد تقريبا بحوالى ثلاثة آلاف سنه وتحت ضغط القحط وقسوة الصحراء هاجرت افواج من القبائل العربيه فى شبه الجزيرة العربيه الى الشمال وكان الفينيقين اسبق هذه الجماعات المهاجره واتخذوا موقعهم على شريط من البحر وكونوا حضارة الفينيقين ( وهى ما تعرف بلبنان حاليا)
الى الجنوب نزلت قبائل عربيه اخرى اشهرها قبائل كنعان فى حوالى 2500 سنه قبل الميلاد واستقرت هذه الجماعات على ضفة الاردن الغربيه منسابه نحو البحر وسميت هذه المنطقه باسمهم فاصبحت تدعى ارض كنعان .. طبعا خريطة فلسطين امامكم وكلنا يحفظها عن ظهر قلب واللى مش حافضها يجيب الاطلس ويبص فيه .. طب ايه بقى علاقة الفلسطينين بهذه الارض .. شوفوا يا اسيادنا:
احنا عرفنا ان فيه قبائل كنعانيه جاءت الى المنطقه وسميت باسمهم ارض كنعان بعد كدا بحوالى 1200 سنه (لا احد يستطيع تحديد التواريخ على وجه الدقه) نزلت على شواطئ البحر جماعات كثيره من جزيرة (اقريطش) اللى هى حاليا (كريت) وكانت الجماعات دى اسمها فلستين أو من القبائل الفلستينيه فى اقريطش (كريت) وهذه الجماعات نزلت بين حيفا وغزه ولو رحتم للبوست الاسبق ممكن نعرف المكان على الخريطه (الكروكى)
شوفوا بقى الجماعات الكنعانيه اللى جايه من الجزيره العربيه زى ما قلنا وكمان الجماعات الفلستينيه اللى جايين من جزيرة (اقريطش - كريت حاليا) اختلطوا ببعض ودخلوا الخلاط ونشأ بينهم مزيج وكانت نتيجة المزيج ده ان غلب عليه الدم العربى (الكنعانى) واللغه الساميه من ناحيه اما الاسم فأخذوه من اسم الجماعات الوافده من جزيرة (اقريطش - كريت حاليا) واصبحت هذه البلاد تسمى فلستين .. ولو قلتم لى جبت الكلام ده منين .. اقول لكم جبته من عند شارلز فوستر كتاب باسم (تاريخ اليهود ص 29) عشان كدا مش عايز اشغلكم بحكاية المراجع دى وخلافه .. حتى هنا اصبحت هناك بلد حدودها تقريبا معروفه اسمها (فلستين) ثم اصبحت التاء بعد ذلك طاء فاصبحت فلسطين .. هذا ونود ان نلفت نظركم الى ان الخرائط والحدود فى تلك الازمان ليست بالدقه التى هى عليها الآن وانماهى تقريبيه.
فى الشمال الشرقى بقى من فلسطين كانت قبائل الآراميين اللى هما السوريين وكانت دمشق عاصمه لهم والى الشرق من نهر الاردن تلاقى ثلاث ممالك هم ايه ؟ .. اقول لكم هما ايه ..
مملكه اسمها عمون - ومملكه اسمها مؤاب - ومملكه اسمها أدوم ... وسكان هذه الممالك التلاته دول ينحدرون كالآرامييين ( السوريين ) من سهل الفرات وكانت تربطهم بالفلسطينين روابط نسب واللغه والدين والعادات والافكار والمناطق دى كانت ذات صله وثيقه بالفلسطينين.
نيجى بقى نشوف ايه المناطق المحيطه بالفلسطينيين:
1 - مصر طبعا فى الجنوب الغربى .
2 - مدين فى الجنوب الشرقى - ناحية الاردن حاليا وخدوا بالكم من مدين دى عشان قصتها كبيره.
3 - بابل وآشور فى الشمال والشمال الشرقى.
حتى هنا عرفنا وفهمنا كيف ظهرت فلسطين الى التاريخ والاصل التاريخى للسكان وتركيبته وكمان الاصل التاريخى للتسميه بفلسطين ... وازاى اتكون الشعب الفلسطينى وكمان مين اللى جنبهم وبيتأثر وبيأثر فيهم.
فى الحلقه القادمه بقى حنشوف ايه موضوع اليهود وقصتهم مع فلسطين .. ان شاء الله قريب
بس انا مستنى نقاش وجدال واللى عنده معلومه ما يبخلش بيها
تحياتى واللى اللقاء فى الحلقه القادمه

هناك ٥٧ تعليقًا:

على عبدالله يقول...

السلام عليكم ورحمة الله وبركاته

الموضوع محتاج شوية تفحيص وقراءة متانية
لكن انا حبيت اكون اول تعليق وبعدين حارجع تانى



فى امان الله

عالم ماريونت يقول...

عزيزي بابا فشكول
فعلا بقالك حبة غايب عني بس انا كمان مكنتش بكتب
ربنا يخليك بسؤالك عني ويارب دايما
.....................
انا معجبة اوي بالسرد التاريخي اللي بتعمله في مدونتك وشايفة اننا محتاجين لكدة جدا
بس انا عايزة منك انك توضح للناس ان صورة المسجد الاقصى اللي بتظهر في الاعلام مش هي دي صورة المسجد الاقصى بس دي صورة جامع قبة الصخرة
تحياتي ليك يا بابا صلاح
وسلامي ليك ولكل اولادك
رنا

أمل حمدي يقول...

ازيك يا ستاذي

احسنت الاختيار ارض فلسطين وجبال الصبر

سأتابعك ولن أجادل لاني اثق بما يقدمه فشكوول الحكيم

في انتظار بقية الموضوع

تقديري

dodda يقول...

جمييييل جدا اختيار موفق
كلنا حنيجى نذاكر هنا

zainab يقول...

أنا جيت أشكرك على انك عديت عليا فى المدونه

بس مش قادرة أقرأ البوست بتاعك النهارده

إن شاء الله هاقرأه بكره و أقول راى

تقبل عذرى

تحياتى

zainab يقول...

الموضوع فغلا محتاج تركيز
وانا النهارده مافيش عندى تركيز خالص
وطبعا مايرضينى انى أقرأ بوست أستاذى وأبى من غير تركيز
دعواتك

ghorBty يقول...

السلام عليكم ورحمة الله وبركاته

معلومات جميله جدا وممتازه

بجد الواحد بيتعلم كتير وياريت كان عندي علم كفايه بالتاريخ كنت اتناقشت او ضفت شئ بس اكتفي اني اتعلمت شئ لم اكن اعلمه ومنتظره باقي الموضوع

هي مدين الي حضرتك قلت عليها هي مدين اللي في القرءان

والي مدين اخاهم شعيبا ....

وكمان اللي هاجر اليها سيدنا موسي

ولما توجه تلقاء مدين ...

والا شئ اخر دا حدود معرفتي ودا اللي اقدر اضيفه ويارب يكون صح

جزيت خيرا استاذ فشكول

غربتي

Dr.Ahmed يقول...

السلام عليكم اخي الكريم
اتمني ان اكون ضيفاً من النوع الخفيف عليك وعلي زائريك ان شاء الله ..الموضوع فعلاً مليء بمعلومات تاريخية قيمة وجميل ان نذهب الي التاريخ لنري حقائق الامور ..فأرض كنعان ارضنا وارض اجدادنا مهما حاولوا تشويه الحقائق ..فلقد ثبت ان الكنعانيون هم اصلاً وفوداً اتت من شبه الجزيرة العربية كموجات مهاجرة كما يرى البعض مثل "ستاربون" أن أصل الكنعانين هي سواحل الخليج العربي..ويقال انهم ابناء سام بن نوح عليه السلام ويرى "ابن تيمية" أنهم سكان حران وأن ملوكهم هم النماردة "جمع نمرود" , وأنهم من أولاد يافث بن نوح , وأنهم الذين بعث إليهم نبي الله إبراهيم عليه السلام , وكانوا فلاسفة يعبدون الكواكب , ويشتغلون بالسحر والله اعلم .

yoyo يقول...

أستاذى العزيز

عرضك للمعلومات اخد شكل بسيط و يجعل القارىء فى شوق و لهفة لمعرفة باقى المعلومات

فلسطين على الساحل الشرقي للبحر الأبيض المتوسط، في جنوب شرق آسيا.
تمتلك المنطقة أرض متنوّعة جدا، تقسم عموما إلى أربعة مناطق وهي من الغرب الي الشرق السهل الساحلي، التلال وجبال الخليل، وادي الأردن، و الهضبة الشرقية. في أقصى الجنوب هناك صحراء النقب. تتراوح الإرتفاعات من 395 قدم تحت مستوى البحر على شواطئ البحر الميت، وهي أخفض نقطة على سطح الأرض، إلى 1020 قدم في أعلى قمم جبال الخليل.

تمتلك المنطقة عدّة مناطق خصبة. إمدادات المياه للمنطقة ليست وفيرة. نهر الأردن هو النهر الوحيد في المنطقة، يتدفق جنوبا خلال بحيرة طبريا (بحيرة الماء العذبة الوحيدة في المنطقة) إلى البحر الميت الشديد الملوحة.

بس تقريبا يا أستاذ ان العرب الكنعانيون كانوا أول السكان المعروفين لفلسطين. خلال الألف الثالثة قبل الميلاد وقد أصبحوا مدنيين يعيشون في دول ومدن منها أريحا. طوّروا أبجدية ومنها إشتقّت أنظمة كتابة آخرى. موقع فلسطين في مركز الطرق التي تربط الثلاث قارات جعل لها موقع للإجتماع الديني و التأثير الثقافي على مصر، سوريا، بلاد ما بين النهرين، وآسيا الصغرى. وكانت أيضا ساحة للحروب بين القوى العظمى في المنطقة و خاضعة لهيمنة الإمبراطوريات المجاورة، بدأ بمصر في ألفية الثالثة قبل الميلاد. الهيمنة المصرية والحكم الذاتي للكنعانيين كانا بشكل دائم في تحدّ خلال ألفية الثانية قبل الميلاد من قبل غزاة متنوّعين عرقيا كالعموريون، هيتيتيس، وهورريانس. وقد هزم الغزاة من قبل المصريين والكنعانيون.

بدأت السلطة المصرية بالضعف بعد القرن الرابع عشر قبل الميلاد، المحتلون الجدّد ومنهم العبرانيين وهم مجموعة من القبائل السامية من بلاد ما بين النهرين، و الفلستينيين (بعد ذلك سميت البلاد باسمهم)، وإيجي وهم شعوب من أصل هندي أوروبي

ولكن بعد خروج القبائل العبرية من مصر (1270 قبل الميلاد) قاموا بغزو مدن الكنعانيين. وتم لهم بقيادة جوشوا السيطرة على أجزاء من فلسطين (1230 قبل الميلاد). أستقر العبرانيون في تلال البلاد، لكنّهم كانوا غير قادرين على السيطرة على كلّ فلسطين. الإسرائيليون، وهم إتحاد القبائل العبرية، أخيرا هزموا الكنعانيون حوالي 1125 قبل الميلاد. لكن تم غزوهم و قوتلوا قتالا شديدا من قبل الفلستينيين. حيث أسّس الفلستينيين دولة مستقلة لهم على الساحل الجنوبي لفلسطين وسيطروا على مدن الكنعانيين بما فيها القدس. وبما كان لهم من قيادة عسكرية منظمة ولإستعمالهم الأسلحة الحديدية، هزموا الإسرائيليين بشدة حوالي 1050 قبل الميلاد

أسفة للاطالة بس دا كان جزء من معلوماتى وأتمنى ان أكون ساهمت ولو بجزء بسيط ولكن للحديث باقى يا أستاذى

تحياتى
يويو

dr_samarmar يقول...

عمو فشكول

أنا واثقة جدا فى الكلام اللى حضرتك قولته من غير لا مراجع و لا أرقام صفحات
و ذاكرته كأنه منهج :)

و للأسف مش هقدر أحقق رغبة حضرتك و أجادل و أناقش لأنى بكل أسف و صراحة معنديش كم المعلومات اللى يدينى الأحقية انى أعمل دا :$

بس جميل اختيار حضرتك للموضوع..و جميل طبعا طرحك ليه...و أنا شغوفة لانى أقرا الحلقة التانية و أذاكرها بردو ان شاء الله:)

مذكرات مشاغب يقول...

معلش يا استاذ فشكول
انا مش هقدر اشاغبك في الحته دي
انا هكتفي بالاستفاده من كلام حضرتك ومن كلام اللي هيضيف معلوملت
وفكره جميله ان حضرتك تبدا بتاريخ فلسطين
وتستعين بمراجع غير عربيه دي برده فكره جميله

تحياتي

هانى زينهم يقول...

افادكم الله يا استاذنا جميل الشرح المبسط ده لفلسطين وهتخلينى اطمع من حضرتك فى شرح زيه كده لتاريخ الغلبانة اللى احنا عايشين على ارضها دى وما بيفتكروهاش الا فى المصايب .
وعلى فكرة يا استاذنا انا مش مدرس تاريخ انا مدرس عربى وقصدت بمنافسة حضرتك يعنى المهنة مش التخصص .

عـــفـــراء يقول...

السلام عليكم
استاذنا المبجل كيف الحال اتمنى ان يكون خيرا ان شاء الله
لقيناك مش بتسأل كالعادة قولنا نسأل احنا
جميل اوى البوست يافندم
واول مرة اقرأبتمعن وتشويق
جايز لانى مرتبطة جدا بالبلد دى وعندى استعداد اعرف كل شئ بيمثلها منذ بدايتها
ومؤكد فى انتظار الحلقات القادمة
وكل الشكر على المعلومات القيمة التى تسعى جاهدا لسردها لنا
على فكرة جميل اوى تاج حضرتك باجابته الممتعه بما يحملة من خفة ظل وجدية
خالص تقديرى ........

Dr. Ibrahim يقول...

والله ربنا يكرمك عشان تعرف الناس حقيقة الأرض العربية الكنعانية الخالصة واصلها وليس كما يدعى اليهود..

تحياتى لك منتظرين الجديد

mr_raafat يقول...

استاذ / صلاح
بارك الله فيك علي هذه المعلومات القيمة وسأتابع الموضوع ففيه الفائدة الكبيرة.

فشكووول يقول...

احبائى
تحياتى
اشكركم على تعليقاتكم وكم انا سعيد لوجود عدد كبير من المدونين يملكون معلومات قيمه عن الموضوع وسعيد ايضا بطرحهم لتلك المعلومات فلعل الفائده تعم الجميع
طبعا انا لازم اروح لكل واحد مدونته عشان اشكره على التعليق وارد له الزياره وما عملتش رد هنا على المدونه بتاعتى عشان انا سايب لكم الموضوع تتكلموا فيه وتتناقشوا واذا لزم الامر ادخل انا كمان واتناقش معاكم
تحياتى لكم جميعا

dr.lecter يقول...

سبقتني بجد

المهم انك تكملها وتشارك بها في المدونه المشتركه وعاوزين نترجمها للانجليش

Wish I were a Butterfly ... يقول...

يااااه
:)
مع قرائتي لأول سطور افتكرت بحث عملته في الكلية. كان دكتور العربي عايزنا نختار أي كتاب نحبه في حقبة زمنية معينة طبعا، و ساعتها عجبني كتاب عن تاريخ اليهود و جذبني جدا القراءة فيه :). هو فعلا مهم نكون عارفين شوية عن تاريخنا و تاريخهم عشان نتكلم ونناقش بالمنطق مش بالعاطفة وبس.
هرجع تاني اقرأ بتركيز أكتر إن شاء الله بس حبيت بس أعبر عن إعجابي باختيار الموضوع

تحياتي :)

بس خلاص ... يقول...

كعادتك دائما تشدنا بمواضيعك القيمة واسلوبك السهل الممتنع ... فى انتظار باقى الحدوته الله ينور عليك
سلمت القريحة الالمعية وسلمت عزيزنا فشكول الجبرتى

غير معرف يقول...

السلام عليكم ورحمه الله وبركاته

عمنا الغالى / فشكول

موضوع ومعلومات قيمه وفى وقتها تمام

ويجب أن يعلمها الجميع

دمت بخير يامؤرخ المدونين

وهل من مزيد

يا مراكبي يقول...

بسم الله ما شاء الله

موضوع قيم للغاية ومشوق جدا

في إنتظار الباقي

marmar يقول...

الله عليك يا استاذ فشكول شرحك جميل ومبسط زي كلام حضرتك
بس انا عندي معلومه صغيره عن فلسطين
انقسمت فلسطين إلى دولتين : مملكة يهودا وعاصمتها أورشليم ، ومملكة إسرائيل وعاصمتها السامرة ، ونشبت الحرب بينهما.
هاجمهم الأشوريون واحتلوا القدس ، فانقرضت مملكة يهودا عام 586 ق.م. ، تبعتها مملكة إسرائيل ..
وفي سنة 332 ق.م. استولى الاسكندر المقدوني على أورشليم ، ثم الرومان
ومنذ عام 1933 زادت هجرة اليهود إلى فلسطين إثر تفاقم الحركة النازية
في أوروبا لتكن بذلك فلسطين المسكينه
اكتر دوله عربيه احتلت في العالم والشرق الاوسط اي بحوالي قرابه الثمانين عاما من الاحتلال والمعاناه
ربنا يفك مشكلتهم قريبا اللي هيا مشكله العرب قبل ما تكون مشكلتهم لكسلنا وكسلهم الغير محتمل
في رعايه الله

Soul.o0o.Whisper يقول...

فيلسوفى العزيييييييييز


بجد المعلومات رائعة جداااااااااااا
و أستفدت كتير

أنا بأحب اقرأ فى التاريخ و الحضارات
بس للأسف كله بيروح مع الزهايمر


و مش هاعرف أشاغب و أتشاقى
:(
بس بجد مستمتعة جدا بكلام حضرتك
و كلام المدونين


فى انتظار الحلقة القادمة




دمت بود

عمرو جويلى يقول...

يبدو من الوهلة الأولى أنك خفيف الظل ومدونتك مليئ بالمعلومات الغزيرة
وأرجو منك زيارة مدونتى وهى على الرابط التالى
http://alooloa.blogspot.com/

doctor mohamad يقول...

فشكول: أولا : بالنسبه لموضوعك التاريخى اللى تناولته و نحوك هذا النحو أيضا ضمن سلسلة من المواضيع .. ده شئ يستحق التحية و التقدير ع مجهودك و وضوح فكرتك .. وكنت قد علمت إن القبائل المهاجرة من شبه الجزيرة _ جزء منها استقر ع شرق المتوسط و الجزء الأخر إتجه شمالا متوغلا ف أوروبا حتى وصل و استقر ف "إيطاليا" .. ده مذكور ف كتاب "موجز تاريخ العالم" ل...؟ أخ نسيت اسمه .. و لعلى أنا شخصيا بالاحظ قرب الشبه بين الإيطاليين و الملامح العربية رغم اختلاطهم و امتزاجهم بحضارات و غزوات أوروبا المختلفة "ده اعتقاد من عندى ليس له أصل أو مرجع" ... ثانيا: حاولت أعرف أكتر عن صاحب المدونة _ عرفت أنه جد عنده أحفاد _ماشاء الله_وذلك من خلال التاج_ ... ثالثا: جو من خفة الروح سايد بكتابتك حتى التاريخية منها .. سؤال: هو سيادتك دارس تاريخ؟_ الظاهر ع كل حال حبك للتاريخ.. تحياتى لك.. و بانتظار الحلقة2.

على عبدالله يقول...

السلام عليكم ورحمة الله وبركاته

استاذنا
يا ريت تشرفنا وتفيدنا بالمعلومات القيمة دى وتشارك معانا

الكيان الإرهابي الصهيوني أعد لنا جيشاً من المدونين فأين جيشنا ؟






وَأَعِدُّوا لَهُمْ مَا اسْتَطَعْتُمْ مِنْ قُوَّةٍ ,,,


كلنا مقاومة

http://kollonamoqawma.blogspot.com/


تحياتى

أحــوال الهـوي يقول...

بقالي يومين ادخل علي البوست اني اعرف ارد
مش عارف
يمكن لان موضوع فلسطين دايما باكون حساس ناحيته لان اليهود برعوا بتسريب معلومات مغلوطه لاثبات الحق التاريخي لهم في فلسطين
و اذا قلت قبل الميلاد هيجيبولك من وقت الخليقه
و اذا قلت كنعان هيقولوا كمل الاسم كنعان كوهين

مراته مريكا وا مها روشيل

طبعا لا ننكر الجهد و الوقت لتجميع معلومات مركزه و مقدمه علي طبق من ذهب لمحبي المعرف

سلام يا صاحبي
تحياتي

عـــفـــراء يقول...

السلام عليكم
استاذى الفاضل
دائما تشرف مدونتى بحضورك اليها
لكن احيانا
تأتى بالانسان فترة لا يستطيع فيها حتى ان يكتب مابداخلة فيعجز عن التعبير
يعنى زى البرد كدة لم يهل علينا
ويارب مايطول
ربنا يحفظك يافندم دايما
خالص تقديرى

عمرو جويلى يقول...

إستفت كثيرا من مدونتك ومن شدة إعجابى بمدونتك سجلت رابط مدونتك على قائمة المدونات بمدونتى والرابط كالتالى
http://alooloa.blogspot .com

م/ الحسيني لزومي يقول...

اخي العزيز
ما كتبته في هذا المقال يصب فيما نحن نعمل من اجلة...واري ان يكون لك من خلال مدونتك وانت مغرم بالتاريخ وبعد سردك في المقالات القادمة دور في كشف الكثير من الاباطيل التي يزرعها الاعلام المصري وغيره في عقول ابناء هذا الشعب الكريم...لقد شاركت في فعاليات كثيرة لمناصرة غزة وقد هالني ذلك الجهل المطبق باهمية القضية الفلسطينية كقضية محورية عربيا واسلاميا وتسمع الكثير ممن يقول مالنا ومال فلسطين احنا عملنا سلام خلينا نعرف نعيش ؟-بالذمه احنا عايشين - .....اذا كان الفلسطينيين مختلفين مع بعض يصطلحوا الاول؟ فهل نحن نتمسك بالقضية من اجل فتح او حماس او من اجل فلسطين اولي القبلتين وثالث الحرمين والبوابة الشرقية لمصر والتي جاء منها الغزاة علي مر التاريخ؟ وهل منعت خيانة والي عكا صلاح الدين من محاربته للصليبيين....
كثير وكثير يمكنك كمحتك بالشارع وعاشق للتاريخ ان تكشف خطأه وتشارك في تصحصح المفاهيم..
سدد الله خطاك ومتعك بالصحة والعافية.

عمرو جويلى يقول...

أشكرك ياأستاذى فشكوووول على زيارتك لمدونتى وأتمنى أن تكون قد أعجبتك ونتمنى أن تتكرر الزيارة

عمرو جويلى يقول...

الموضوع سلس وشيق وننتظ ر منك ان تكمل الجزء الثانى من الموضوع

همس الاحباب يقول...

استاذنا العزيز
الموضوع محتاج منا قراءة وتمحيص
ولكن حضرتك جبت الخلاصة
واحنا معاك لاخر المشوار
تحياتى وتقديرى

كلنا مقاومة يقول...

السلام عليكم

أستاذنا الفاضل
ما نويت فعله وبدأته بالفعل هو جزء هام من هدفنا في مدونة كلنا مقاومة فالفهم الصحيح ومن مصادر موثوقة ليس اعتمادا على وجهة نظر شخصية هو ما نطرحه هناك ولعل ما تكتبه يصب في نفس الهدف وأقصد ألا تكون وجهة نظر شخصية بل محاولة افهام القارىء حقيقة الأمور من خلال الوثائق والأدلة
فهل هي كذلك ؟؟

أما بخصوص اللغة الانجليزية فهذا ليس شرطا وأيضا الفيس بوك ولكن الدخول على الفيس بوك أمر في غاية البساطة فحضرتك حتضغط على لينك الجروب وتنشىء حسابا هناك ثم تنضم للجروب أو الدخول مباشرة على صفحة الفيس بوك الرئسية وانشاء حساب

ودائما هناك أول مرة لأى شىء فلا تحجم عن التجربة وحاول أكثر من مرة حتى تنجح ويشرفنا تواجدك معنا حتى لو بالاعلان عنا

عمرو جويلى يقول...

يا أستاذى ه1 شرف كبير لى لمجرد زيارتك لمدونتى وأنا فى إنتظار الجزء الثانى من أرض كنعان -فلسطين-وجبال الصبر

حسن ارابيسك يقول...

استاذي العزيز
سامحني على التأخير يمكن لأنني مسافر اليومين دول بره لمدة قصيرة تقل عن الشهرين تلبية لدعوة من زملاء لي في دولة عربية ولإعداد تمهيدي لمشروع فني لذلك انشغل كثيراً لكن من الحين للحين ادلف للمدونات حتى ارى مصر من خلالكم
سعدت بالطبع ياسيدي الفاضل لما تفضلت بهوبرغم قراءاتي السابقة لهذا التاريخ في بدايات الشباب الا انه واللهي كما قالت ستي فعلاً في الإعادة إفادة
وحقاً غستمتعت بتلك البساطة في شرحك الوافي وأصابني بعض الإبتسام حينما ذكرت اسم علام ولم تسعفك الذاكرة في اسم العائلة له فكانت جملتك
الدكتور عبدالله ..مش فاكر كمالة اسمه
ما جعلني ابتسم حقاً هي كلمة كمالة ذكرتني بخفة الدم المصرية حينما يأكل المصري منا على عربة فول او داخل مطعم للكشري ويطلب كمالة مش عارف يمكن عشان ضمن ما أقوم به اعمال من الكاريكاتير لفت نظري هذا التوصيف
المهم سيدي الفاضل اكمل بالطبع ما عندك فهو موضوع بلا شك يستحق
لكن أنا أختلف فقط معك في جزئية وهي مهمة جداً ومرجع أهميته أنني واحد من أبنائها وهي مصر الحبيبة
عندما ذكرت سيادتكم في مقدمة تدوينتك القيمة
قصة الوطن الفلسطينى وما تحمله على مدى التاريخ .. فدون ذلك كل شيئ ممكن تأجيله
لاياسيدي العزيز أنا تظل عندي مصر رقم واحد ودون ذلك تأتي بقية الألولويات
هم قوم هانت عليهم أنفسهم
وشعوبهم هناك هانت على حكامهم
سيدي الفاضل انا بحق سعيد بهذا التواصل وبحوارك الجميل في جمال أولاد البلد
تحياتي
حسن أرابيسك

سكة سفر يقول...

اشكرك شكر جزيل على الطرح الرائع و القيم و البسيط

و ارجوك زدنا من المعلومات زادك الله من فضله و خيراته

البت المشمشية حلوة بس شقية يقول...

عجبتنى المدونة جداااااااا
ومستنيا الباقى
واتمنا زيارة مدونتى

مـجـنـووون يقول...

استاذي العزيز
موضوع اكثر من رائع وفكرة كويسه علشان الناس تعرف قيمة فلسطين

وعلي فكرة انا كنت عامل حمله للتعريف علي فلسطين في مدونتي ميثاق شرف المدونين

تقبل مروري استاذي الغالي
مجنووون

رئيس التحرير يقول...

السلام عليكم ورحمه الله وبركاته
------------ اتابع معك ...حبيت اسجل الحضور فقط ...وبلا تعليق الله يعطيك العافيه.ويزيدك من نعيمه.

مهرة سالم يقول...

السلام عليكم...
عمي فشكول الحكيم..
طرح مميز بوقت الكل محتاج لنفض الغبار من ذاكرته..
وأولهم أنا بالطبع...
.....
هنالك معلومات نسيتها من زمــان بس شكرا لتذكيري بها..
.......
أدلو بدلوي ..
لا يوجد ما أقوله سوى بإنتظار الجزء القادم..
......
دمت بخير..

Soul.o0o.Whisper يقول...

fashkool


فيلسوفى العزييييييييييييييييز

حقيقى حقيقى حقيقى
انت مش تتصور اد ايه تعليق حضرتك أسعدنى
بجد سعييييييدة جدا

ماتخيلتش إن ممكن فعلا كلمات تحيى الامل فى حد
ممكن نقول هيتحمس
يحاول
إنما فعلا يدب فيه الامل من جديد؟؟!!..

حقيقى سعيدة جدا

و عاوزة الربع جنيه


مش من فيلسوفى العزيييييييز
يبئا أحلى ربع جنيه


تحياتى
و دمت بود

Asmaa Fathi يقول...

السلام عليكم ورحمة الله وبركاته

اولا سورى على التأخير فى التعليق

ثانيا : نحن فعلا فى حاجه الى الرجوع الى تاريخنا والذى يشكل حياتنا فلم نجد العزة سوى فى ذلك التاريخ ولم نستطع يوما أن نكون كابطاله

هم صنعوا ذلك التاريخ الشاهد عليهم وما زالنا نفتخر به

وما زال هناك الكثير فى حقبة التاريخ نتمنى ان تتبعه

أيا كان فمازلت متميز

تقبل تحياتى

غير معرف يقول...

انا موجودة ياعمو ومتشكرة علي سؤالحضرتك انا بنزلبوستات علي المدونة الرئيسية منزلتش علي كبرت اظاهر فاتني كتير عندك
حقرا
اللي فاتني
وارجع

zainab يقول...

أستاذ فشكول

ايه المعلومات دى كلها

أنا أول مرة أعرف اسم فلستين

ومنكم نستفيد

ربنا يبارك لك

تحياتى

وينكى يقول...

هممممم
الموضوع شكله كبييييير
انا ماعرفش قوى فى تاريخ القبائل والشعوب
بس اعتقد انها فرصه كويسه انى اتعرف على التاريخ ببساطه عندك
شكرا

dr_samarmar يقول...

ايه يا عمو الحلقة التانية فييييييييين؟

Abd-Allah ibn Aadam يقول...

السلام عليكم و رحمة الله و بركاته يا أستاذ فشكول ,

أنا عارف إني جاي الموضوع متأخر ,

بس هو بجد موضوع مهم ,

أولا : ما هي حقيقة الصراع ؟؟
هل هو حقا عربي يهودي ؟؟

بصراحة العبارة دي غلط - من وجهة نظري - ,

لأن العربية : شيء قومي ,
و اليهودية : شيء ديني

يعني بما إن إسرائيل بتقول و بتصرح إنها دولة يهودية - زي ما كانوا بيقولوا في احتفالات الستين عام - ,
يبقى المفروض اسم الصراع يتغير للإسلامي اليهودي ,

علشان يبقى حتى الاسم منطقي ,

----------

نيجي بقى للحته التانية ,

دلوقتي الكنعانيين دول كانوا عرب , ماشي ,
طيب هل كانوا هو الجبارين اللي سيدنا موسى حاربهم ؟؟

و قال لليهود : (( يا قوم ادخلوا الأرض المقدسة التي كتب الله لكم ))

يبقى اليهود دخلوها أول مرة بأمر شرعي و ديني ,

و ما نقدرش نقول إن سيدنا موسى غاصب أو محتل لا سمح الله ,

طيب كده يبقى فعلا الأرض بتاعتهم ,
دخلوها مع سيدنا موسى ,

و جه نبوخذ نصر بعد كده طردهم منها , و هم دلوقتي بيحاولوا يرجعوا تاني للأرض اللي دخلوها بأمر شرعي ديني ,

نيجي احنا بقى لموقفنا كعرب و كمسلمين ..

موقفنا كعرب بيقول : إننا عرب , و الفلسطينيين عرب , و العرب الكنعانيين كانوا هم الأصل , يبقى فلسطين عربية , و بتاعتنا !!

أما موقفنا كمسلمين : بيقول إن سيدنا موسى أمر اليهود بدخول الأرض المقدسة بأمر الله , و قد عصوه , ثم دخلوها بعد كده مع يوشع بن نون بعد ما خرجوا من التيه ,
يعني الأرض بقت بتاعتهم بالشرع !!
و ما نقدرش ننكر اللي حصل , و لا نقول إن ربنا ما أمرش سيدنا موسى و بني إسرائيل بدخولها ..

طيب احنا نعمل إيه دلوقتي ؟؟

قوميا : الأرض بتاعتنا ,

شرعيا : الأرض بتاعتهم , و ربنا أمرهم يدخلوها

طيب إيه الحل ؟؟

.
.
.
.

أنا بصراححة فكرت كتير في الحكاية دي ,
و وصلت لنتيجة أرضتني في النهاية - و إن كنت لا أدري إن كانت صحيحة أم لا , فأرجو التعقيب عليها -

اللي وصلت له علشان أرضي ضميري ,

إن العملية مش عملية قومية و لا بتاع ,

لأننا مش عرب بس , لكننا مسلمين كمان , و بنصدق بسيدنا موسى و بكل الرسل اللي قبلنا ,

يبقى ناخد الموضوع من منظور شرعي ,

و هو إن ربنا أمر بني إسرائيل بدخولها لأن فيها قوما جبارين , و ظلمه ,
و ربنا قال (( إن الأرض لله يورثها من يشاء من عباده , و العاقبة للمتقين ))

يبقى - حسب فهمي - إن ربنا أمرهم يدخلوها حين تجبر أهلها و أفسدوا فيها ,
فجعل الله عز و جل نهاية الجبابرة - مهما كانت قوميتهم , عرب أو غير عرب - على يد (( المتقين )) و اللي كانوا في ذلك الوقت اليهود لأنهم كان معاهم الرسول ,

أما دلوقتي فـ((المتقين)) اللي على الدين الحق هم المسلمون , يبقى هم أحق بيها , بصرف النظر إن كانوا عربا أم لا !!!


------
ده اللي وصل له تفكيري و لا أدري إن كان صوابا أم لا ,

لكن أن افكرت فيه من وجهة نظر " الأندلس" , هو احنا زعلانين ليه إنها وقعت في إيد الأسبان ؟؟
طيب ما هي كانت بتاعتهم من الأول !! و احنا اللي استجدينا عليها , يعني احنا محتلين و مستعمرين !!


بس حسب علمي إننا مأمورين بنشر الدين في جميع الدنيا , سواء في الأندلس أو في فلسطين ,

فالمسألة ليست عروبه و قومية و لا غيرها , و إلا يبقى احنا فعلا مستعمرين و بغاة على الأندلس !!


معلش جدا يا أستاذ فشكول ,

أنا طولت أنا عارف ,
بس الموضوع غير مكتمل في دماغي أو " مش واخد الأوكيه " :) نهائيا , فحبيت أتكلم فيه باستفاضة لما لقيت موضوع حضرتك ,

و متابع معاك إن شاء الله

فشكووول يقول...

عزيزى ابراهيم : انا كنت عايز اسيب الموضوع بدون تعليق زى ما قلت فى البوست وانت بتجرجرنى لان ابدى وجهة نظرى .. وعلى فكره الموضوع وجهات نظر بقى ممكن انا اشوفه كدا وانت تشوفه كذا وغيرنا نشوفه كذلك
اما حقيقة الصراح يا اخى فهو عربى دينى يهودى .. لان العروبه مرتبطه بالاسلام واى مسلك فى اى مكان فى العالم ينسبوه للعروبه .. وعشان يبقى الموضوع واضح فى دماغك وعشان نتكلم صح ونقول ان دخول اليهود فلسطين امر شرعى
ماشى .. بس هم ماكانوش يهود .. هم كانوا مسلمين ..(ان الدين عند الله الاسلام).. طب عندما بعث سيدنا عيسى .. هل كانوا مؤمنين به .. عندما بعث سيدنا محمد .. هل آمنوا به .. يبقى هما كدا خرجوا عن الشرع ووجب عليهم ما على غيرهم من الديانات المخالفه .. اتفقنا انهم كدا خرجوا عن الشرع وعن الشرعيه .. دى واحده
2 - رآيى الحقيقى والقاطع بالنسبه لى ان اليهودى الذى استقر فى ارض فلسطين من ايام يوشع بن نون او من اى زمن قديم واكتسب صفة الاقامه قبل قيام الدوله الصهيونيه من المؤكد انه فلسطينى يهودى او يهودى فلسطينى .. زى بالضبط اللى بيتجنسوا بطول المده .. زى ما قلت قبل قيام الدوله اليهوديه
3- ان اليهود ساميون .. اى ابناء سام بن نوح .. صح .. صح ونحن ايضا العرب من ابناء سام بن نوح .. وطبعا علماء الاجناس يعرفوا يفرقوا بين الجنس السامى والجنس الحامى والجنس التركى (يافث بن نوح)
الجنس السامى : زينا كدا
الجنس الحامى : الزنج
الجنس اليافثى : الترك ( الاوربيين ) كويس .. كويس
والجنس السامى من اليهود .. ايه المانع انهم يكونوا فلسطينيين سواء كانوا مقيمين من ايام يوشع او اكتسبوا الجنسيه الفلسطينيه لاقامتهم فى فلسطين قبل اعلان الدوله الصهيونيه..
والجنس الحامى اللى هما الزنج .. زى اليهود الفلاشا .. بتوع اثيوبيا .. ايه بقى حقهم فى فلسطين؟ .. قد يكونوا يهود او متهودين ما فيش مانع .. بس ليه ييجوا فلسطين ويطردوا اهلها لكونهم يهود .. طب والجماعه اليهود اللى بعيون خضر وشعر اصفر .. دول مش ساميين خالص .. دول يافثيين .. ايه بقى حقهم فى فلسطين ..
اذا كان الموضوع كدا بقى .. يبقى كل المسلمين يروحوا بقى على الحجاز ويقولوا دى ارضنابما اننا مسلمين والكعبه هنا والنبى هنا يبقى احنا من حقنا اننا نطرد الحجازيين ونقعد احنا مكانهم او نقعدهم معانا
ومن نفس المنطلق نجيب مدفعين وطيارتين وشويه اسلحه حلوين كدا ونروح ناخد اسبانيا عشان قعدنا هناك 600 سنه تقريبا نفس المده اللى قعدها اليهود فى فلسطين بعد يوشع بن نون عليه السلام
الخلاصه
ان اليهود اللى كانوا مع يوشع بن نون واللى استمروا فى فلسطين او اللى اكتسبوا صفة الفلسطينيين قبل اعلان الدوله اليهوديه يبقوا فلسطينين ويبقى لهم حق فى فلسطين
اما من ناحية الامر الشرعى من الله ادخلوا الارض التى وعدتموها ... دا كان امر زمانى مرتبط بزمانه .. لاسباب كثيره ساسردها فى البوست فى حينها وكذلك امر مكانى برضه حاقول عليها فى حينها .. زى بالضبط ربنا ماحرمش العبيد .. لكن شويه شويه العبيد تحرروا ,, نيجى النهارده ونقول عايزين عبيد تانى .. ما ينفعش
هذا يا ابراهيم ما انا مقتنع به .. وسوف انشره عندى وعندك
تحياتى وشرفتنى وارجوا ان لا تنقطع الزياره

اقصوصه يقول...

بابا فشكول

انا فمصر حاليا

وعازمتنك ع العرس بكره

في قاعة المعلمين الجديده

في الفيوم

تاريخ 24

في قاعة المعلمين الجديده

واسم العريس احم

وانا صديقة العروس :)

اتمنى حضورك

rovy يقول...

استاذى العزيز
اشكرك لما انتقيت من موضوع ملىء حقابمعلومات مفيده نتمنى ان يحفظها كل فرد فى وطننا ..
سأتابع ما تسرده لنا و لك حقا جزيل الشكر

تحياتى

Soul.o0o.Whisper يقول...

fashkool

فيلسوفى العزيييييييز

انت احسبى الاربع جنيهات اللى على ليك وفى اول مقابله ان شاء الله .. ولا يكتر على الله شيئ تبقى جمعتى كدا ييجى 10 ولا 20 ربع جنيه*

إيه دااااا؟؟
معنى كدا انى هاشوف حضرتك قريب خالص اهو
هههههههههههه

واذا انا التككت واستعبطت وحاولت ما اديكيش حقك .. صوتى وسرخى ولمى على كل المدونين وانا على طول حاخاف واديك اللى انت عايزاه*

لاء يا حضرة الفيلسوف
ما يرضنيش بردوا أعمل فى حضرتك كدا
أنا عارفة إنك هتديهوملى من غير حاجة
و بعدين لو ماعطنيش يبئا نسيت
:)
شفت أنا طيبة ازاى؟؟
و بعدين مش باعرف اصوت
باتصدم و اقعد ساكته
بس



خالص ودى

قلم رصاص يقول...

ايه العمق ده كله يا أستاذنا

بارك الله فيك وفي علمك والله
وحفظك لنا

مزيد من التميز والتوفيق

في حفظ الله

أحــوال الهـوي يقول...

fashkool

حبيبي فشكول بك

انا بتاع كلام بس و لكنك كل الاحساس و الرقه
وواضح الشقاوه من تحت النظارة

و الرومانسيه في الابتسامه الذكيه

و تاريخ اليهود و احقيتهم تم فعلا دسه في التاريخ منذ زمن قريب

تحياتي

Abd-Allah ibn Aadam يقول...

أستاذ فشكول :

أنا متفق جدا مع حضرتك أن اليهود

الذين أمرهم الله بدخول الارض

المقدسة هم " المسلمون " ,

و ليس اليهود خاصة ,
فكما قال تعالى (( إن الأرض لله

يورثها من يشاء من عباده , و العاقبة

للمتقين ))

فالأمر بدخول الأرض المقدسة لمن

على دين الحق حينها كان لتطهيرها

من دنس المدنسين أياً من كانوا,

لذا فالأمر مستمر لوقتنا الحاضر ,
إنما صار موجهأ لنا كـ"مسلمين"

فالأمر ليس عربيا أو غير عربي ,

إنما هو مسلم و غير مسلم ,
على الحق أم على الباطل ,
من (( المتقين )) أم من غيرهم ,

و كلامي عن الشرع و عن اليهود لا أعني به شرعية وجودهم الآن ,
إنما أعني به أن اعتبار الأض لنا أو لغيرنا فهو بحكم الشرع , و ليس بحكم العرق أو الماضي أو الملكية أو أي شيء آخر ..

و بالنسبة للنقطتين الأخريين اللتين ردَدتَ فيهما عن حجج اليهود في وود اليهود الأحباش و اليهود الترك , فأتفق معك طبعا ,

إنما هاتان النقطتان - الثانية و الثالثة - ليستا بحجة لنا إن تكلمنا بمنطق القومية و العروبة في مقابل اليهودي اليافثي لأنه سيقول : إذاً أنا الأقدم هنا , و أنا دخلتها بأمر الرب ,

و إنما النقطة الأولى هي التي ترد عليه حجته في أن أمر الله كان للمسلمين , و من على دين الحق ..

أعتذر عن الإطالة مرة أخرى ,
لكننا متفقين و الحمد لله :)

و إن شاء الله متابع مع حضرتك باقي السلسلة .

M.a.r.y.o.o.o.m يقول...

تحياتي ليك
اول زيارة لمدونة حضرتك وإن شاء الله مش الأخيرة
في حاجات هنا كنت أول مرة أعرفها خالص وإن شاء الله استفاد من مدونة حضرتك كتير جدا

غير معرف يقول...

Hey there! This is kind of off topic but I need some guidance from an established blog.
Is it hard to set up your own blog? I'm not very techincal but I can figure things out pretty quick. I'm thinking about creating my own but
I'm not sure where to start. Do you have any points or suggestions? Appreciate it

my web blog; debutante