الجمعة، ٢٠ فبراير ٢٠٠٩

خبر ما يساويش نكله..

كنت زمان من قراء الاهرام .. ايام هيكل وسلامه ... والفطاحل اللى كانوا فى الاهرام .. وكانت الاهرام فعلا هرم خوفو وخفرع ومنكاروع كمان .. دالوقت الاهرام رزمة ورق بتتفرش على طرابيزه السفره احيانا للقراءه .. واحيانا اخرى للقراءه برضه .. احسن يرفعوا على قضيه وتبقى حوسه.
اولا ما بقيتش اقرأ الاهرام بالمره .. وحتى لو قريت اقرأ الرياضه وخلاص واتفرج على الصور وما بقيتش اقرأ المقالات الاسبوعيه اللى بتتصدر الجرنال .. اصل بقى الواحد زهق وطق خلاص من المقالات دى .. كمان جميع المقالات اللى بتتصدر الجرائد اللى بيقولوا عليها قوميه ما بقيتش اقراهم .. بلا هم ووجع دماغ .. زى الواحد عمال يسمع طبل وزمر وتصفيق حاد وحاجه كدا زى ما يكونوا بيقولوا لنا ياهبل يا عبط احنا بنعرف احسن منكم .. هو انتم بتفهموا حاجه زينا .. احنا اللى بنفهم بس .. ويقوموا يدونا ضهرهم ويطلعوا لنا لسانهم .. اقروا بقى معايا الخبر ده :


وطبعا مش حتعرفوا تقروه من الكمبيوتر .. لكن هو منشور فى زيل الصفحه الاولى يوم الجمعه 20 فبراير 2009 العدد 44636 وبيقول ايه باختصار:
( فى بحث للباحث علاء عوض الله يقول فيه ان المصريين بيصرفوا كل طلعة صبح 62 مليون جنيه فى ايه بقىىىىى: .. شوفوا 12 مليون جنيه تدخين .. هو عنده حق فى دى وكمان 40 مليون جنيه تليفونات ارضى و محمول .. كمان قال المصريين بيحرقوا كل سنه 19 مليار سيجاره .. وبتقول الاهرام - فى سباق هذا الانفاق المجنون حذر الباحث ان ذلك سيكون خطر علىمصر مستقبلا فى ظل الازمه العالميه القادمه - والاهرام عايزه تقول اننا شعب سفيه وما بيعرف يصرف فلوسه كويس وياريت اولياء الامور يحجروا علينا ويدونا مصروفنا يوم بيوم على قد شقه وطعميايه .. وخساره فينا الفول والعدس )
طب يا اهرام .. ماشى يا اهرام .. قال يعنى احنا الشعب الوحيد اللى فى العالم سفيه وكل الشعوب دى كلها هى اللى حلوه وما بتشربش سجاير ولا بتتكلم فى التليفونات ارضى ومحمول .. هم بس المصريين اللى سفهاء.. ماشى يا اهرام - ما احنا السبب فى الغم اللى احنا فيه وان احنا السبب فى الاعاصير اللى بتهاجم امريكا والحرائق اللى شغاله فى استراليا وناقص كمان تقول لينا مش احنا قولنا لكم حسانين ومحمدين وانظر حولك والحاجه اللى زى القمر كريمه مختار.
يعنى يا اهرام سايبه كل البلاوى وجايه تحاسبينا احنا ... طبعا يا اهرام ما هو احنا الحيطه المايله .. يعنى يا اهرام سايبه اللى بيجرى ورا مغنيه فى لندن ودبى وصرف عليها كذا مليون والاخر ما اما نفضت ليه يروح مخلص عليها وقادرى علينا احنا يعنى....
يعنى يا اهرام سايبه تقارير الجهاز المركزى اللى فضحت الدنيا وجه عمنا وتاج راسنا صاحب القرشانات واللى بيصرف علينا كلنا ومعيشنا فى نغنغه بامارة انه عايز يمد ايديه فى جيبنا عشان ياخد اللى فيها ضرايب ومكوس ورسوم - يعنى حاجه كدا فاضل ياخد مننا ضريبة ان احنا مصريين - جاتنا نيله فى حظنا الهباب قوم ايه ؟ ... هو عمنا دهـ بهدل الراجل المحترم رئيس الجهاز المركزى ... واليومين دول خدوا بالكم فيه جوله تانيه من الكر والفر بين عمنا وبين الجهاز المركزى وما تنسوش تبقوا تشوفوها فى الموقر.
طب يا اهرام .. فى تقرير الجهاز المركزى من فتره بيقول ان فيه عجز 12 مليار جنيه .. خدوا بالكم 12 مليار مش 12 مليون .. مالهم بقى؟
الـ 12 مليار دول ضاعوا تحت بند السهو والخطأ ... يا لهوىىىىىى .. عايز اصوت وعايز اعيط وعايز برضه اضحك.
اقول كمان يا اهرام .. كام واحد هرب ومعاه مليارات بعلم وسمع وهس ناس كتيره قوى .. يا دى الغلب اللى احنا فيه شاطره علينا يا اهرام وعماله تبكتينا وتلومينا احنا اللى ما فيش فى ايدنا غير نطلع الهم فى التليفونات والسجاير.كنت باسبك يا اهرام حتقولى احنا شعب بيصرف 5 او 6 مليار فى السياحه فى الخارج.
ولا تقولى احنا بنصرف على اللحمه اكتر من ما بنصرف على الفول المدمس.
ولا تقولى بناكل تفاح وشيكولاته بـ كذا مليار.
ولا بنستورد عربيات لكل 3 افراد من الشعب عربيه زى خلق الله فى السعوديه ودول الخليج ولاحتى فى ليبيا.
دا احنا بنقف فى طوابير العيش ونطفح الكوته عشان نجيب عيش مدعوم بشلن.
الاهرام مش شايفه اللى احنا شايفينه .. هما فى برج العرب واحنا فى برج الحمام.
بحق ... ايمن نور طلع من السجن؟ واللــــــــــــــــــــــــــــــــه !!!!!!!!!!!!!!

يا شيخ ...يا رااااااجل ....ما كنتش اعرف .. اصل ما بقيتش اقرى جرايد وخصوصا القوميه

هناك ٨٠ تعليقًا:

صفــــاء يقول...

.
الاهرام
كنت بحب اقرأ سلامه احمد سلامه وأنيس منصور . فهمى هويدى وعبد الوهاب مطاوع
بعد كدة مبقتش جيب الاهرابم غير عشان أحل الكلمات المتقاطعه والسودكو كل خميس
واوقات صفحه الوفيات ومعرفش ليه بس تحسها فى الاهرام مختلفه تماما ومتكلفه

بس بعد كدة بقيت استكتر عليها الفلوس وبقيت اجيب عدد يوم الجمعه بس عشان افرشه فى النمليه
.

ريمان يقول...

امكا تقرأ خبر زى ده

يبقى انت اكيد

اكيد فى مصررررررررررررر

ما حضرتك عارف ان شعب مصر شعب بتاع مزااااااااااج


يحب يعمل دماغ عاليه ع الصبح

لا حول ولا قوه الا بالله

بجد بجد خبر يصد النفس

الله المستعان

ربنا يصلح حال شعب مصر

غير معرف يقول...

طب مهو لو يرخصوا دقيقة المحمول وينزلوا الدعم ع السجاير مش هايتصرف كل الفلوس دي هههههههههههه

عموما أنا لو قريت جرنان يبقي المصري اليوم لاهو كده ولا كده

باحس انه وسطده بوجه عام

لكن بخصوص الخبر اللى حضرتك ذكرته فهو ينضم لقائمة المليارات اللى بتتصرف ع الجيل ( وخلي بالك مش أي علبه خضره تبقي هيركوود ) يا اما على المزاج العالي يا اما يا اما

والأبواب مفتوحة كتير

بس فعلا احنا محتاجين نقتصد ونمسك على نفسنا شوية ف الفترة اللى جايه

لأن كله هاييجي فوق دمغتنا احنا في الآخر

ربنا يستر

صحيح باشكرك ع المدونة الجميلة دي كانت تايهه عني فين بس !!!

يللا سلام

مذكرات مشاغب يقول...

واللهي معاك حق يا استاذنا
انا عن نفسي ما زلت بقرا الاهرام
بس بقرا كمان الدستور والجمهوريه والمصري اليوم واخبار اليوم
يعني من باب التعود من فتره مش قصيره
ده غير ان تقريبا معظم الجرايد مبقاش فيها مقالات وكتاب الواحد بيهتم بالقراءه ليهم بشكل خاص

اما بالنسبه لموضوع السجاير والكلام
فعلا معاك حق مش احنا الشعب الوحيد اللي بيشرب سجاير ولا بيتكلم في التليفونات
وانا كنا اكتر شعب بيحب يرغي في الفاضيه والمليانه
وشعار موبايل لكا مواطن شغال من زمان
لكن برده مش ده الحل للازمه الاقتصاديه
على الرغم من الارقام الكبيره اللي اتقالت

تحياتي

*البت المشمشية *حلوة بس شقية * يقول...

نكلة
ايه النكلة دى يادى النيلة هو انا نمت كام سنة ولا النكلة دى شلن ولا ايه الحوار
بلنسبة للبوست
احنا اساسا شعب بيحب الفشخرة
لازم السباك وبتاع البطيخ يبقا ماسك موبيل احدث حاجة وشغال رغى فى الموبيلات
وكانو وصل للقمر
احنا شعب غريب اوى بلذات المصريين
يعنى الواحد ممكن يموت نفسو من الجوع
عشان يجيب موبيل ويشحن ويشرب سجاير
موضوع جوة جون اوعا تكون اهلاوى

mohamed ghalia يقول...

أنا بقى مقدرش ابطل قراءة للناس دى
عشان لازم اشوف بيفكروا غزاى
بعدين إحنا أحسن شعب فى الدنيا يصرف على الحاجات التافهه
دمت بكل الود ياعمنا

أنا - الريس يقول...

هو الكلام بفلوس .. والركع علي اللي بيقرا مش اللي يكتب دمت بخير

المحارب الأخير يقول...

السلام عليكم

ولى رأى ولكننى سأوجله لحين التفرغ

عامة

أحببت القاء السلام

ضيف جديد عليكم

تحيتى

الازهرى يقول...

فشكولنا الغالى
اولا انا بطلت اقرأ جرايد من زمااااااااان
لان انت عارف ان المرارة مش مستحملة والحالة الصحية بقت على القد
المهم
البحث فى حد ذاته كويس وبينبه لسلبيات موجودة فى مجتمعنا احنا فعلا محتاجين نتخلص منها
وخاصة ان الازمة فعلا بدأت تكشر عن انيابها
ولازم الكل يشد الحزام
لان الايام السودة لسة ما بدأتش

تحياتى دوما

dr_samarmar يقول...

بوست يبكى و يضحك فى نفس الوقت و الله

أنا مش لاقية كلام أقوله و لا أعلق بيه أفضل من كلام حضرتك الساخر و الرائع يا عمو صلاح

لحد قريب أوى كنت بقول مصر.. و نضحى عشان مصر.. و نقف ضد للى ماسكينها لحد ماتنضف بقا

دلوقتى بقول يارب ألاقى فرصة أهج بيها م البلد و أعيش فى بلد الناس اللى فيها محترمين و بيتعاملو زى البنى أدمين

مصر مابقاش يتقعد فيها خلاص :(

و أخيرا.. متشكرين يا أهرام

هانى زينهم يقول...

والله يا عمنا كل الجرايد بقت زى الاهرام ما لهاش لازمة . عموما الاخبار بقيت اقراها من النت وبطلت اشترى جرايد من مدة مش قصيرة اللهم الا اذا اتزنقت فى فرش نيش او مكتب غير كدة ما لهاش لازمة . احنا بقينا فى بلد مفشكلة يا استاذ فشكول . يعنى عاجبك كدة تعدى البلد الله يسامحك !!

dodda يقول...

اتمنى ان الكلمتين دول يعزوك ويطيبوا بخاطرك

انا وزوجى توغفنا عن شراء الجرايد من اكتر من سنه...

وماما بتديب الاهرام فقط واتكى اوى على فقط عشان صفحة الوفيات...


بس بصراحه..السجاير مضره جدا بالصحه

وردشان smilyrose يقول...

السلام عليكم

هى دى مصر ودا شعبنا الجميل

بس فعلا دكتور ايمن نور خرج

ولا دى اشاعة


مش عارفة اصلى بطلت قراية جرايد من

سنين حتى مش بتفرج على النشرة ولا حتى

بشوفها على النت

اصلى اتخنقت من كل اللى بيقولوه

smilyrose

روح الحب الصادق

EMMY BABY يقول...

والله بجد زى مانت قلت بدل ما يوظفوا طاقاتهم فى حل المشاكل بيعملوا احصائيات

انا اعرف اللى يعمل حاجة لازم يكون وراه هدف يافرحة قلبى بعد ماعملوا الاحصائيات واكتشفوا اللى احنا فيه

هاااااااااا ايه الحل بقى ؟؟؟؟؟؟؟

مفيش حل كالعادة مش فالحين غير فى الكلام

بجد فعلا ربنا يتولانا برحمته

على فكرة انا سنة تاااااااالتة طلعت اكبر مما تخيلت صح ههههههههه

اصل انا قلت اقتصد فى السنين واجرى بعمرى بسرعة

تحياتى الرائعة لك يا استاذذ فشكووول

ايمى

طـائر الليــل الحـزين يقول...

عم فشكول
واحشتنى جدااااااااااااا
وعارفة غبت كتير بس اعمل ايه المذكرة بقى والامتحانات على ما خلصت
ما انت فاهم احنا منهاجنا فشلة جداااا
بيدمروا بيها عقولنا مش بينموها
بالنسبة للبوست جاااااااااامد زى العادة قوووووووى
وخصوصا فى رأيك فى جريدة الاهرام او الجرائد القومية عموما
بجد الواحد مبقاش بيستفيد منها الا لما يفرشها على السفرة او عشان يعمل عليها اى حاجة
تحياااااااااتى
انا رجعت من تانى يا عم المدونيين

rovy يقول...

السلام عليكم
استاذى الفاضل ..
واضح انهم مصممين يفرسونا علشان كده لازم نبطل نشترى جرايد ما دامت كل اخبارها بفيت تجيب الضغط ..
ده ما يمنعش ان البحث مهم و ان السجائر مضره بالصحه و لو انى لا اعتقدان صحتنا تهم اى حد !!
اما حكاية ال12 مليار فحسبنا الله و نعم الوكيل ..

تقديرى و تحياتى

اقصوصه يقول...

الحمدلله انا مش من المدخنين

تدري بابا فشكول

انا زرت مصر بس للاسف

ما كلت فول من اللي نفسك فيه

الدليل السياحي اللي اعتمدت عليه

طلع مش قد المسؤليه

اما من ناحية التليفونات

فالحق يقال..حدث ولا حرج :)

الحرامي يقول...

لالالالالالالالالالالالالالا

لا اهرام ولا اخبار انا محبش الارقام لانها بتجيب احباااط
وكمان انا وكل الناس مش بنثق في ارقام الحكومه لان اللي معاهم واللي ضدهم بيبالغو فيها بشكل غير عادي
اسمع ارقامهم عن البطاله تحس اننا اقل شعب عنده بطاله ف العالم
ولا عن اي حاجه ف البلد


وعموما انا بحب الارقام التانيه
بتاعة مسروقاتي

تامر علي يقول...

آخر الرجال المحترمين اللي كنت أقرأ لهم في الأهرام فهمي هويدي ...من ساعة ما ساب الأهرام وأنا بفرش جرايد تانيه على السفره :)

أما عن الإنفاق فحضرتك مش واخد بالك ان اللي بيصرف الملايين دي مين ...هم نفسهم اللي بيصرفوا باقي الملايين مش حد تاني (هم نفسهم بتوع السهو والخطأ)

maha zein يقول...

اممممممممممم طب يعنبي يا عمو فشكول المبلغ ده بردو مش يخض؟
يعني لما نكون بنصرف ده كله علي السجاير وكروت الشحن يبقه كويس
؟
ولا انت عشان بتشرب سجاير ؟؟؟؟؟ انهار واعترف يا عمو فشكول
عموما اي حاجة بقت بفلوس
ولو عملوا احصائية علي اللى بنصرفه يوميا علي الفول والطعمية هيعمل بتاع كذا مليار
عموما طالما المية في الكوز والعيش مخبوز يبقه سيبها علي ربنا احنا هنعد نبص لبعض في اللى بنصرفه
ربنا يسترها بقه

حسام غانم يقول...

مش الأهرام بس

كل الصحف القومية متتقراش دلوقتي

غير معرف يقول...

ايه يا عم صلاح مالك بتزعق و تصوت ايه ما بتخافش الاهرام ترفع عليك قضية سب و قدف لمجلة محترمة حاملة هم الشعب و خايفة على فلوسو تمشي ع الفاضي
ومالك بتحاسب المسؤولين الكبار اللي بيقضوا يومين في لبنان و لا حتى جزر هواي علشان يستريحوا من المسؤوليات تدبير الشان العام ما هم يا كبدي طول النهار بيشتغلوا من اجل الشعب
يل عم صلاح ما كلنا عارفين ان الجرائد دي بتشتغل عشان تنشر ايديولوجية الدولة و مهمتها تعطي جرعات الاستيلاب للشعب و تنيموا عشان ما يثورش ضد الظلم اللي عايش فيه وتبين لو ان العام احلى و زين في ظل عهد مبارك الزاهر
عم صلاح تصبح على خير و خلي ها الطبق مستور
مودتي يا احلى عم صلاح

غير معرف يقول...

وهذا جزاء من يقرأ الأهرام ....
أخى أنت فى العنوان قلت خبر ما يساويش نكله ... بالله عليك فى حد من قرائك يعرف النكله....؟؟؟

قل خبر مايساويش عشرة جنيه ماهى برضة مثل النكلة زمان.

أخى : هذه الجرائد أصبحت طابع مطيع وأمين للحكومة .. ومبررة لأخطائها.

وبعدين الحكومة لاتخطئ إحنا السبب فى كل البلاوى وياعينى الحكومة غلبت معانا وناويه تستقيل وتهرب قبل غرق السفينة

أقصد البلد....

اعشق فى الليل ضوء القمر يقول...

لو مكنتش بتقرأالأهرام عرفت الحاجات الكثيره ديه إذاى يعنى هههههه
انا بجيب الجرنال لحجتين لعدد الورق الكثير بينفع فى مسح الزجاج الجلوس عليه يوضع تحت الأكل وبينفع أحيانا فى حالة إنقطاع المياه أيضا

لكن شوية معلومات تحفه
أصلك مش عارف إننا كشعب مبنعرفش نعمل حاجه
مثلا مشكله سرطنه البطيخ من فتره كانت المشكله إنا مبنعرفش ناكل البطيخ لازم نغسل البطيخه من بره الأول ونغسل إدينا كويس و السكينه إلى قشرنا بيها البطيخه منقطعش بيها وذلك رد أحد المسلين فى وقتها
لو إتكلمنا عن الحاجات الثانيه إحنا شعب مبينفعش معاه غير هو صحيح فى حد سامعنا؟ الحكومه شايلانا من على الأرض شيل بتعمل كل حاجه من أجل محدود الدخل متأكد إن مفيش حد شايفنا بتوسع فى البنيه التحتيه و العلويه وكبرى الأزهر متأكد إننا فى التمام يا راجل ده إحنا شعب عايز يتولع فيه أكيد مش مترقبين يا راجل ديه (ـــــ)تم الحزف فى المونتاج

مسدس صغير يقول...

بصراحة هما مسمينها جرايد قومية
بس انا بقى مسميها جرايد حكومية
واعتقد بتوافقنى الرأى يا استاذ فشكول بيه.

فعلا ارقام محزنة بالنسبة للتدخين والكلام فى التليفونات باختلاف انواعها.

ربنا يستر

اشكرك على البوست الهايل

وسلامى

نفرتارى يقول...

استاذى القدير

فؤاد المهندس الله يرحمه قال كلمتين وبس ..
بس ان هقول جملتين وبس :
الاولى : حاميها حراميها .
الثانية : حسبى الله ونعم الوكيل .

تحياتى استاذى العزيز ،،

نفرتارى

Hanan Said يقول...

ازي حضرتك يا ستاذ فشكول
عارف حضرتك انا اول ما قرئت الخبر ده قلت بس القرار الجاي هو فرض ضرائب على دقائق المكالمات و كل سجاره يدخنها واحد
اهو بردو ما احنا شعب مفتري
يبقى الحكومه الغلبانه تستفيد بقى من فلوسنا

..........
انابردو وانا معديه كده قدام التلفزيون امبارح سمعت كلام شبه كده
على اننا لازم لازم نقتصد في المكلمات
ماشي على عيني وراسي يعني
بس دي حاجه تخصني انا وبس يوم ما احس اني عايزه اوفر هوفر
مش مستنيه كلام من الحكومه وامر اني اوفر
....
طبعا جرنال وتلفزيون يبقى خلاص
فرمان جاي بعد يومين بضرائب على الي تعدي 10 دقائق في الشهر كله مثلا

ربنا يرحمنا

فتــافيت (رحاب الخضري) يقول...

ههههههههههههههههههه

عمنا فشكلول.. عايز يجيلك حمة قلعية.. اقرا الجرايد القومية

وماله اصلا لما نصرف على التليفونات والسجاير.. ياسلام يا سلام .. هو احنا لاقينا غيرها نصرف فيها

بلا خيبة وحرقة دم ووكسة.. خلاص كل البلاوي الاهرام مش شيفاها وشافت السجاير والتليفونات.. يعني التنفيس عن الشعب

يلا .. وماله.. بس اهو درس علشان نستافد منه يا حلوين

علشان تكبر ومامي وبابي يحبوكوا وابو رجل مسلوخة ما يعضكوش.. اوعى يا جمال تقرا الاهرام تاني

منعا للضغط والسكر والجلطة

سلااااموز

Sweet Violet يقول...

انا الصراحه مبحبش الجرائد القومية اصلا

بس بردو ده مايمنعش انهم معاهم حق ان دى من السلبيات ولازم يتلكموا عنها

بس المهم فى الخبر .. قالوا الحل ايه ؟؟

ايمن نور طلع .. و طبعا سبب الافراج غريب ووقته اغرب

بس ده العادى و بكره اكيد مش هتستغرب لما يبان السبب الصح

kalamfady يقول...

شكلك بتشرب سجاير...بطلها احسن..

Soul.o0o.Whisper يقول...

حقيقى ... حقيقى حقيقى

حضرتك عندك حق بكل اللى قلته
يعنى صحيح هى حاجة وحشة اننا نصرف كل دا فى السجاير و التليفونات

بس شوف عددنا كام و اللى بيتصرف كام
و يبئا كل واحد بيصرف اد ايه


و تعالى شوف واحد بس من اصحابنا
بيصرف اد ايه

والله هم يبكى و هم يضحك

و ماعنتدش تغيب علينا ببوستاتك كدا يا عمو فشكول






خالص ودى

أحــوال الهـوي يقول...

حبيبي الاستاذ فشكول
الموضوع الاول الجرايد
ابدا العناوين ثم اقلب الجريدة من الاخر و اتصفح الي الصفحه اولي و في الطريق كلمات متقاطعه و سودوكو زي صفاء
و الرياضه و الحوادث اللي بتعرفك حال البلد من نوعية الجرايم فمثلا القتل من اجل المال و الاكل تردي اقتصادي القتل بسبب الجنس تردي اخلاقي القتل م التمثيل بالجثث شعب بلا دين و لا اخلاق و لا بربري و حشي

و هكذا
و احب جريدة الاهرام لانها تعطيك عدد اوراق اكثر من اي جريده فتنفع في الاستعمالات المختلفة

تقرير السجاير و الكلام قراته و دعيت للمدخنين بالهدايا و الرغايين ربنا يرحمنا من صداعهم ما عدا الحبيبه اللي كلامهم الفارغ مليان

تخياتي

همس الاحباب يقول...

مع الاسف مع انى مقاطع الجرائد
لكن حظى السيىء يوم الخميس بالليل
مسكت الاهرام عدد الجمعة 20-2 وقريت الخبر ده
بس االخبر اللى رفع عندى الضغط
مقال الاستاذ فاروق جويدة الخاص بتقرير الجهاز المركزى للمحاسبات وعنهجية الحكومة
ده خبر محتاج بوستات مش تعليق بصراحة
تحياتى وتقديرى

عمرو جويلى يقول...

السلام عليكم
أستاذى فشكووول
لقد تعوت منذ صغر ى أن أقرأ الجرائد وعلى كل لون قومية ومعارضة أما الآن فقد وضعت الجرائد على قائمة المقاطعة لأن ى عرفت من فترة كبيرة أن لكل جريدة توجه خاص بعا فهناك أنواع :
منهم من يجعل الدنيا وردى ومنهم من يجعلها حالكة السواد
تحياتى

عاشقه وغلبانه يقول...

الاهرام باصه للناس في شويه الرغي اللي بيرغوهم في التليفونات يفوكوا بيهم عن روحهم
ولا السيجارتين اللي بيولعوهم احسن مايولعوا في روحهم
ههههههههههههههههههههههه

انا من زمان بقول ان المجتمع مرضان واحنا سايبين المرض وماسكين في العرض ماحدش معبرني


ناس هايفه يابابا فشكول والله

كلنا مقاومة يقول...

السلام عليكم

طيب هي لما نشرت ده بعتت حد يلم منكم السجاير ولا تمنها ولا الموبايلات

ومين قال لحضرتك انهم زعلانين ,,, دي بس معايرة يعني لا تحاسبني ولا احاسبك الهم طايلني وطايلك

بس كلمة في اذن استاذنا الفاضل السجاير حرام بفتوى من الأزهر

عمرو جويلى يقول...

السلام عليكم فشكولى العزيز عمال تقلب من فلسطين وجبال الصبر إلى كادر العجلة إلى الجرايد أخرتك إيه يا عم فشكول معانا
تحياتى

maxbeta3zaman يقول...

والله ان عندك حق هذه جريدة اصبحت للتطبيل والتهليل وطردت الأساتذة الكبار وآخرهم فهمى هويدى من كثرة "الموالاه" للحكومة..هى جريدة الوفيات ...بعد أن كنت تقرأ فيها لنجيب محفوظ والحكيم وهيكل والملاخ وجاهين والمستكاوى الأب وعبد الوهاب المسيرى ...الآن كما قلتم نفرشه عند أكل السمك لنلم فيه الزفر

صبرني يارب يقول...

لا انا ما باجيبش جرايد خلاص خساره فيها الفلوس

بس ساعات باقرا الجرنال عند بابا

وباحب اقرا بريد الجمعه من ايام عبد الوهاب مطاوع هو اتغير بس هو لسه كويس فى نظري

اما عن كلام حضرتك

فطبعا احنا الى شعب بن ستين فى سبعين ومسرفين وهبل

بس انت نسيت حاجه

بنصرف مش عارف كام مليون على الحج والعمره
مسخررررررره وقلة ادب

انما الغلابه الى بيروحوا يصيفوا فى اوربا وما الى ذلك ما بيصرفوش ملايين طبعا
بيصرفوا مليارات تفررررررررررررق

تحياتي لحضرتك يا فندم

Ahmed Hishmat يقول...

هما عايشين في دور
واحنا واقعين من الدور
.........
ومين يا ترى اللي عليه الدور
بعد أيمن نور

Empress appy يقول...

عارف عارف بالمناسبه يعنى لو عملوا مسابقه فى الشيشه فى مصر والعالم هنكسب والله ومش هنتكسف علشان مجبناش ولا ميداليه ورق فى الاولمبكيات
لو عملتوا مسابقه الشيشه حد يقولى
ايمن نور لا تعليق انا بكرهه السبانخ والحدق يفهم

هــو..مش ..نـو يقول...

أهرام...أخبار...جمهورييه
هوهوتي ...أحسن من الأشكال ديييه
قاطعها زي النتجات الاسرائيلييه
والامريكييه...والحكومييه.
أهرام... اخبار... جمهورييه...
هو فيه حد يقدر يتكلم ...لكن انا اقدر اهوهو.
الله يساعدك عمنا فشكول...
===هو هو ===

Unknown يقول...

الاهرام....يعنى اسامة سرايا....يعنى العالم الهبلة....يعنى السرقة العلنى....وسمعنى سلام لو مكونتش انت تستعبطنى مين يستعبطنى....ياااااااااااااااااااااااااااااعمو صلاح فكك من الجرائد القومية عشان صحتك وعشان احنا محتاجينك

أميرة الجنة يقول...

ازيك يا والدى وحشتنى قوى
انا اسفة ع التاخير
الله يرحمنا بقى احنا اللى غلطانين الحكومة عايزانا نوفر وبتخاف علينا نقوم نعمل كده
الاهرام اتهدت خلاص انت معرفتش ده انا حتى مش بفرشها ع السفرة انا برميها طوااااااااااااااااااالى فى ........
انا مقولتش حاجة
تحياتى لك والدى

daktara يقول...

الجرائد القومية كلها بقت ارخص من حبر علي ورق
كلها نفاق وقرف من اول ممتاز الكلب او القط مش فارقه كتير
الي كرش الكروش مخمد علي ابراهيم استغفرالله الي اسامه سرايا سفراء
كله ركش يا استاذ
حلو موضوع انظر حولك ده

شكلها باظت
انظر حولك
د. خالد عزب

عمرو جويلى يقول...

السلام عليكم
مؤرخنا العظيم الأستاذ صلاح
أنت زعلان منى
لقد جلس على كرسى مجلس إدارة الأهرام لفتر ة طويلة إبراهيم نافع فدمرها ماديا وإعلاميا بعد أن أصبحت عامل طرد للكفاءات الصحفية
تحياتى يا أستاذ صلاح وأتمنى أن أحصل على إيميلك لوسمحت

د. ياسر عمر عبد الفتاح يقول...

لما بقرأ الأهرام ولا بقية الصحف اللى بتسمى بالقومية ولا حتى على نشرة أخبار القنوات المحلية بحس إنهم بيتكلموا عن بلد تانى غير مصر اللى انا عايش فيها

وفيه دايماً إحساس بيحبوا يدوهولنا إننا إحنا السبب الرئيسى فى كل مشاكلنا وإنهم تعبانين معانا جداً ومش عارفين يعملوا ايه؟؟

محمد فارس يقول...

الاخ العزيز فشكووووووول انت
ليه ماتبقاش كشكووووول او كشف حساب
هو مش الدكتور توكل طلب من حضرتك تغير اسم المدونه
بس انا عايز اعرف حاجه هو فيه حاجه اسمها الاهرام غير اللي في الجيزه
لك تحياتي

إيمان قنديل يقول...

خلاص انتهي جيل العظماء نحن الآن نعيش جيل السفهاء

د/عرفه يقول...

انا معتزل الصحف القوميه دى من زمان
ومش بعدى عليها خالص
اتعقدت منها

بس شكلك بتشرب سجاير كتير
ههههههههههههههههههههه

بس خلاص ... يقول...

عمنا فشكول
انا اختلف معاك الجرايد دى ليها قيمة كبيرة جدا اقولك ازاى
ساعات بنجيب سمك مشوى او فسيخ وبندوخ على ورقة واحدة مش بنلقاها لان الناس بطلت تجيبها خااااااالص
عرفت بقا
لو مكالناش سمك وفسيخ على الجرايد طيب ناكل على ايه تعرف تقولى ؟ اتفضل يالله قول

إيمان يقول...

هههههههههههههههه
منها لله الأهرام ...
عايزين نرفع قضيه على الأهرام
بتهمة تكدير الشعب
وقل مزاجه .. وبتهمة القر كمان
دول بيعدوا علينا السجاير سجاره سجاره
وعايزين نقدم مشروع لمجلس الشعب نطالب فيه بتقسيم السهو الخطأ على الشعب
تحياتى للمقاله الرائعه
أ / فشكول

الفقيرة إلى الله أم البنات يقول...

طيب ما المصريين اغنياء وممكن يسلفوا امريكا والاتحاد الدولى كمان..ونصدر سجاير كمان

مهو طالما بنستهلك كده يبقى دخلنا إيه

يادى الفشاكيل يا استاذ فشكول


هو مين أيمن نور ..؟
ده اللى قتل بنات الشيخ زايد..
ولا سفاح المعادى
ولا جوز جميله اسماعيل
ضع صح امام العبارة الخطأ

استاذ فشكول ..مبيقتش مستاهله قراءة

doctor mohamad يقول...

‏"السيف أصدق أنباءا من الكتب"خصوصا الحكومية منها .أهرام،أخبار،جمهورية.."فى حده الحد بين الجد"تلاقيه ف مقالات الناس المحترمة فهمى هويدى و و.."و اللعب" المكشوف اللى بيلعبوه ع صفحات جرايدهم .. "بيض الصفائح لا سود الصحائف" .. مافى أسود منهم و من أقلامهم .." فى متونهن جلاء الشك و الريب" والتطبيل و التهليل و التهييص .. تسلم ع تذكيرك لنا بالنكلة .. أيام كان للقرش شننة و رنة .. هو القرش 5 نكلة .. صح؟

رئيس التحرير يقول...

بسم الله الرحمن الرحيم
استاذي العزيز/ فشكوووووول
السلام عليكم ورحمه الله وبركاته..
آسف جدا كنت في مهمه شبه رسميه، وحشتني جدا...بالله عليك كفايه فشكله وبهدله فينا...يا سيدي الفاضل فيه حد اليومين دول يقرأ...اسمهم ايه دول؟
وبعد كده تقولي ايمن نور طلع ...طلع منين؟هو كان نزل علشان يطلع؟
دمت عزيزي...ولك كل الود والتقدير.

رئيس التحرير يقول...

لأ...ولأ...هأ
ما ينفعش...
والي بتقوله ...ما يشفعش
دا ..ليبرالي
هو يعني ايه ليبرالي؟

إشراقة أون لاين يقول...

سلام عليكم يا فشكول ...طبعاً أنا أول مرة أدخل مدونتك بس بصراحة عجبانى فى واقعية موضوعاتها ولمسها لواقع الحياة ..والخبر اللى فى الأهرام انا شفته وأظن ده بسبب اللى خربوا فيها أخيراً لكن هيه رغم كده مؤسسة عظيمة من بداية تاريخها

marmar يقول...

عمي فيشو الطيب
اتأخرت على حضرتك بسبب ظروف الجامعه والدراسه والهم ده كلو
المهم يا عمي
مصر واقعها بقى صعب جدا
بس الحل الوحيد
قرار الازاله
طبعا كلنا عارفين ازاله مين
وبكده مش هيكون في لا عيش مضروب ولا ميا ملوثه ولا كل ده
ياريت عهد جمال عبد الناصر كان يكون لسه موجود بجد يااااااااه
والدي طيار حربي وحارب في تلاته وسبعين وكان بيحكيلي وما زال عن جمال عبد الناصر
نفسي بجد يرجع ايامه واهتمامه بالشعب
تفتكر ممكن يحصل ده يا عمي ؟

Unknown يقول...

استاذى الفاضل ..فشكول
بعد التهنئة الكبيرة ، اهنئك من قلبى على هذه المدونة المصرية الخالصة ، لاقيت فيها جميع معانى الاب الروحى ، والصداقة للأبناء ، اينعم انا مدون قديم بس مش قديم اوى يعنى ، بس مدونتك بجد عجبتنى واسلوبك فى التعبيير يستحق ان نقول عليك هذا الكلام .

ثانياً بقى يا استاى الفاضل ولله انا حذرتهم اكتر من مرة ، وقولتلهم يا جماعة مينفعش اللى بيحصل دا ، الموبايل خرب بيوتنا وخلانا ننسى احنا عايشين ليه (طبعاً مش هتكلم عن السجائر لأن انا مدخن للأسف) الناس يا استاذ فشكول بقت نايمة ومش حاسة بأى حاجة للأسف الشديد
وانا عمال بصحى فيهم ...يمكن اغير من المعنويات
تقبل مرورى

د.آيه يقول...

انت شكلك شايل من الاهرام قوىىىى
ههههههههههه
بصراحة فعلا الجرايد القوميه كلها مبقتش تتقرأ.. بس بالنسبة للموضوع ده مش مستغرب أصلا و علي رأي المثل مقدرش ع الحمار يتشطر ع البردعه..
انت متخيل هم هيبهدلو مين يعنى .. دي حاجه غريبه !!!
معقول مش عارف ان المواطن المطحون هو سبب كل البلاوى اللى بتحصل .. طبعا الشعب هو سبب البلاوى و بياكلو كتير مش مخليين حتى الظلط بياكلو و بيعيشو كتير الطب اتحسن فين وأد البنات الجميل بتاع زمااااان..
خخخخخخخخخخ
معلش اصل انا اتغظت انا كمان و اتحمست..
سوري عالرغي الكتير ده

bastokka طهقانة يقول...

جرنال بكام جنيه ليه؟ ما كل الاخبار في النشرة و النت و حاجة ببلاش كده

===
النونوهات اللي في السايد يجننوا ما شاء الله
ربنا يخلي و يبارك

اوروفوار

!!! عارفة ... مش عارف ليه يقول...

الله ينور عليك والله



ايوة شدوا الحزام لحد ما لحزام يقطم وسطكم

والله أنت عارف عايز افك الحزام
وأدي الناس اللي بيصرفوا فلوسهم على التليفونات والسجاير
وبالحته اللي فيها الحديدة :)))))))))

قال شدوا الحزام قااااااال


ودمتم
وليد

على عبدالله يقول...

السلام عليكم

استاذ فشكول
انت شايل من الاهرام ليه بس
حرام عليكم ... كفاية
يعنى يقطعوا هدومهم عشانكم :))

Dr.Ahmed يقول...

فعلاً يا استاذ فشكول عندك حق في كل ماقيل ..للاسف الجرائد القومية اصبحت مضيعة للوقت, مليئة بالاخبار الساذجة والاعلانات التافهة وطبعاً ماشاء الله عليها في المدح والمديح للسياسة الرشيدة والنظيفة المتبعة في العصر المباركي الكبير!!
يااااه اتصور انا بقالي كتير قوي ما اشترتش لا اهرام ولا اخبار ولا جمهورية
مش عارف ممكن افكر بعد 10سنوات ولا حاجة ..يمكن الاقي خبر وفاة النظام !!
دمت بود يا رائع ومعذرة لتأخري

نبض الحياة يقول...

يسعدنى ان تكون هذه اول زيارة لمدونتك واحييك على هذه المدونة .
ربنا يرحمنا ويرؤف بحالنا ماهو مافيش غير المصريين دلوقتى اللى بقوا لبانة فى فم كل واحد ، واى واحد عاوز يخبط فى حد يخبط فى المصريين بس احنا اللى جبناه لنفسنا عشان احنا اللى ساكتين .
تقبل مرورى
تحياتى

رئيس التحرير يقول...

بسم الله الرحمن الرحيم
العزيز...فشكول...السلام عليكم ورحمه الله وبركاته.
حضرتك مصر علي دخول العزبه وبس .ومخاصم رئيس التحرير...طيب هو زعلان منك خالص!!!
دا حتي في العزبه ملفيش حاجه تتاكل ولا تنشرب..
حضرتك مش عايز تدخل السجن (ربنا يبعدك عنه )بس انت دخلت حته أمر من السجن يا حبيبي...عايز تعرفها...
ههههها ...بعديييين أقولك
سلام يا ريسنا

zainab يقول...

أستاذى العزيز فشكول

أنا جايه أخد الربع جنيه اللى عليك ليا هههههههههه

عارف يا أستاذى أكتر حاجه شدتنى ايه رغيف العيش اللى بيطلع روح الواحد على ما ياخده ده احنا عندنا ضرب و مصايب قدام الأكشاك يا خرااااااااااااااااابى

ربنا يرحمنا برحمته الواسعه

فين الربع جنيه

تحياتى

M.a.r.y.o.o.o.m يقول...

وياريت اولياء الامور يحجروا علينا ويدونا مصروفنا يوم بيوم على قد شقه وطعميايه .. وخساره فينا الفول والعدس


والله يا عمو ضحكتني وانا قلبي جواه نار بتغلي وعاوزة اصرخ

ادعيلي ربنا يوفقني في النتيجة
وكمان في حد دلوقتي بيقري صحف قومية يا عمو خلاص راحت عليها

المستنصر بالله يقول...

والله مصر مليان خير كتير بس مش لينا
خيرها للى ماسكينها احنا مجرد واجهه علشان يلاقوا حد يحكموه ويكون لهم شرعيه ماهو مافيش حكومه من غير شعب

تحياتى لحضرتك

PrInCeSS BeRy يقول...

هاااااااااااى ازيك يا استاذ يا كبير ميرسى اوى لزيارتك ليا حضرتك وصديقى واخى العزيز على راسى بجد وتنورونى يارب تيجى تانى مدونتى بس لوحدك مش بتوصية هههههه تسلموا يارب

على عبدالله يقول...

استاذ فشكول

امسك نفسك شوية امال
مش كده
اعصابك يعنى
..
على فكرة انا صلحت المدونة
تقدر تعلق براحتك

dr.lecter يقول...

منك لله ياابراهيم نافع انت واسامه سرايا

هــو..مش ..نـو يقول...

كل ما اروح اهوهو في مدونه يقولولي ممنوع الهوهوه هنا طبيعي جدا ابطل هوهوه...شفت صورتك عند فركشاوي ...بصراحه خفت اروح عنده
يقفل المدونه عليا ويحبسني فيها
شكرا عم فشكول
شكرا جزيلا ...ربنا يحميك
===هوهو===

مهرة سالم يقول...

السلام عليكم يا عمي...
شوف الجرايد عموما بقت تستخف بالقارئ وتحط قدامه حاجات تجيب أجله ..
بس بجد هم مستخفين بينا ولا عاوزين يبرمجونا زي ما هما حابين ..
مش عارفه ..
كان الله بالعون..
..
دمت بخير

Unknown يقول...

استاذى العزيز فشكول اشككرك على مرورك الكريم بمدونتى ولله فرحت كتييييييييير اوى اوى ، وياريت تشرفنا علشان بوست اللى عاملةمن العيار التقيل شوية

Unknown يقول...

اسمحلى احط المدونة فى البلوج ليست كى اتابع

gogo!sf يقول...

هو بجد لو احنا بطلنا نتكلم كل يوم
فى المحمول والتليفون الارضى

والاتصال المستمر على 0900 اللى هما بيشدو الناس بجوايزة

يبقى هيجيبو منين المليارات اللى بيهربو بيها

ما احنا الحيطة المايلة

خيرنا لغيرنا

تقبل مرورى

Beram ElMasry يقول...

الاخ العزيز kashkool
السلام عليكم ورحمة الله وبركاته
حبيبى وصديقى صاحب مدونة كشكول ونافذة على التاريخ وهذا المسمى بك اليق وعليك اصدق ، هم كما شرحت واستدللت ، ويزعمون انهم شعب الله المختار وفى نظرى انهم اتباع الشيطان والشعب المحتار
شكرا لصديقى على مقالة الممتع كالعادة ، وتلخيص مقال السيد علاء يعوض الله لانني لا اشتري الصحف لضعف بصرى وغلو الثمن ويعوض الله
(نور طلع من السجن ) ،،،، ولا يسجن نور الا فى مصر لانه الثانى في الترتيب مزور
لك تحياتى والسلام عليكم ، ولا سلام مع اليهود

غير معرف يقول...

السلام عليكم و رحمة الله


طبعاً لان مجبر ع قراءة الاهرام كل جمعه عادة ورثها من الوالد الله يرحمة و لو حبيت ابطلها فهم سيد بتاع الجرايد مش هيبطل يجيلى كل جمعه علشان اخد منه الجرنال و ينادى باعلى صوته -يا احمد فندى يا عمررررررررررررررر- :S


المهم بئه و بعيداً عن عم سيد *_^

كنت قرأت الخبر ف جرنال الاهرام الاسبوعى .. و قراءته قراءه عابره لان اخبارك كتلك لم تعد اعطيها اهتمامى لاننا جميعاً اعتدنا عليها ..

اتذكر عم فشكول كم دفع المصريين ليفوز محمد عطيه:( ف فساد اكاديمى؟!!!
(23 مليون رسالة هاتفية )و اكثر حسب الاحصائيات


فلا بعيد أخى و ف ظل هذه الحرب الضروس القائمه بين شركات الاتصالات الان ..


عم فشكول المقهور ادعلينا ربنا يهدينا:(

غير معرف يقول...

السلام عليكم و رحمة الله


طبعاً لان مجبر ع قراءة الاهرام كل جمعه عادة ورثها من الوالد الله يرحمة و لو حبيت ابطلها فهم سيد بتاع الجرايد مش هيبطل يجيلى كل جمعه علشان اخد منه الجرنال و ينادى باعلى صوته -يا احمد فندى يا عمررررررررررررررر- :S


المهم بئه و بعيداً عن عم سيد *_^

كنت قرأت الخبر ف جرنال الاهرام الاسبوعى .. و قراءته قراءه عابره لان اخبارك كتلك لم تعد اعطيها اهتمامى لاننا جميعاً اعتدنا عليها ..

اتذكر عم فشكول كم دفع المصريين ليفوز محمد عطيه:( ف فساد اكاديمى؟!!!
(23 مليون رسالة هاتفية )و اكثر حسب الاحصائيات


فلا بعيد أخى و ف ظل هذه الحرب الضروس القائمه بين شركات الاتصالات الان ..


عم فشكول المقهور ادعلينا ربنا يهدينا:(