الاثنين، 27 يوليو، 2009

فشكوليات

لله يا محسنين .. حسنه قليله تمنع بلاوى كتيره


فى الطبعه الاولى يوم الاحد 26/7/2009 احمد المسلمانى بيقول ان الدكتور عاطف عبيد فاكرينه؟ للى كان رئيس وزراء مصر السابق المهم انهم مسكوه بنك وبياخد مرتب شهرى 000 500 الف جنيه قولوا كدا حسبة نصف مليون جنيه .... خدوا بالكم الكلام دا شهريا مش كل عشر سنين.


وبيقول كمان ان الدكتور محمد على سليمان هو كمان اللى كان وزير الاسكان السابق برضه - والله كانت وزاره كلها هبر فى هبر- واللى بعد ما خلص على ارض مصر بالبيع لاصحابه وحبايبه وباع لهم المتر بجنيه هو كمان مسكوه شركة بترول وبياخد كل شهر 12500000 يعنى مليون وربع المليون جنيه .... فى الشهر يا جدعان فتحوا مخكوا معايا شويه وصحصحوا ... وبطلوا الهباب اللى بتشربوه ده.


الاتنين بقى كانوا دكاتره فى الجامعه وخلصوا على فلوس اولياء امور الطلاب اللى كانوا بيدرسوا لهم فى الجامعه وهروهم من كتر الكتب اللى بيبيعوها لهم ولا كان لها لازمه ولا حتى كان فيها علم ... ما هو ما حدش اخترع عندنا علم جديد ... العلم موجود فى كل الكتب المتخصصه ... نقول وخلاص زى بعضه ... بعد كدا ربنا فتح عليهم وبقوا وزراء ... وما ادراك ما الوزراء ... عارفين انا رئيس جمهورية فشكولستان اللى فوق دى بس مش لاقى حد بيعبرنى ويدينى حتى ربع جنيه مرتب ... رئيس جمهوريه اونطه انا ... جاتنا نيله فى حظنا الهباب... المهم .. هى ناقصه كمان بعد اللى هبروه زمان فى الكليات وفى الوزاره يدوهم كمان فلوس ... آه يا غلبك يا فشكول ... مش عارف ايه الحظ المهبب ده ... والواد مايكل عمال ياعينى يعمل انتر فيوهات وما حدش راضى يشغله عنده خالص ... ح تفرج يا مايكل.


شوفوا بقى لو وزعوا الاثنين مليون الا ربع دول وادوا كل واحد مرتب الف جنيه بحالهم بالتمام والكمال كانوا حلوا مشكلة كام خريج 1750 خريج كانوا اشتغلوا وبايه .. مرتب الف جنيه مش 200 جنيه زى الناس الغلبانه... مش مهم الحزب الوطنى حيشوف لها حل ؟؟؟؟؟


عمرو زكى فى الدورى المصرى


بصراحه يا جماعه باكون مكسوف اخر كسوف وغيران آخر غيره لما بشوف الواد دروجبا ولا الواد ايتوا ولا الواد اديبايور ولا غيرهم وغيرهم واللى اقل من عمرو زكى ولا ميدوا ولا حتى محمد شوقى والانديه الاوربيه بتجرى وراهم وبتدفع فيهم ملايين اليوريهات (من اليوروا يعنى)


يا عمرو يا زكى ... احسن عقاب لك انك تلعب فى الحوارى ... قصدى فى الدورى المصرى .


لله يا محسنين


الاعلانات فى التليفزيون المصرى والفضائيات بالتبرع لمستشفى 57357 بصراحه العيال الله يشفيهم محتاجين تبرعات مادامت حكومتنا اللى بتدى عاطف عبيد ومحمد على سليمان 1750000 جنيه شهريا الله يطول عمرها ويخليها لنا ويقصف عمرنا احنا عشان خاطر هى ما تزعلش ... حكومتنا خلعت من دورها فى الرعايه الصحيه ... واللى يقدر يتبرع ... اجره على الله .


بس اما بشوف الاعلانات دى بحس بايه :

ان واحده غلبانه وعدمانه وشحاته وشايله ابنها على كتفها قدام السيده ومعريه مكان العاهه بتاعته وبتقول لله يا محسنين ... لله يا محسنين



هناك 100 من التعليقات:

نهر الحب يقول...

يارب اكون أول تعليق

لله يامحسنين


ههههههههههههههه

نهر الحب يقول...

السلام عليكم ورحمة الله وبركاته
الموضوع فعلا يستحق الكتابة عنه
والتعليق عليه,تسلم أفكارك

خالص تحياتى

نهر الحب

نهر الحب يقول...

ده أنا فعلا أول تعليق

يارب دايما

ن يقول...

السلام عليكم
الاخوة الكرام
استاذنا الكبير .. فشكول
الدكتور .. ياسر عمر عبد الفتاح
الاستاذ .. الازهرى
الاستاذ .. فارس عبد الفتاح
مدونة .. شاب مصرى
التى شرفتنى بالزيارة والمناقشة المثمرة
أتمنى من سيادتكم فى هذا الموضوع بالذات أن يرقى الى مستوى النقاش البناء للخروج بأفضل نتيجة واعلموا جميعا بأن المدونات هى ملجأ لنا جميعا للتعارف والزيادة فى العلم والثقافة من كافة المستويات .. قد نختلف اخوانى فى الرأى ولكننا لابد لنا من التواصل الدائم .
والتاريخ المصرى المنهوب إخوانى من أكثر القضايا المهملة وبالنسبة لى أرى بأنه لن تقوم لنا كرامة وعزة الا بإعادة تصحيح التاريخ المصرى انها جملة بحثت من خلالها منذ عشرين عاما بعد قرأة متأنية لكتاب الله وكتب التاريخ وسؤالا سأله المؤلف العملاق عباس محمود العقاد فى كتابه* ابراهيم ابو الانبياء * كل الاشارات القرآنية تذكر والتاريخية تذكر سيرة النبى ابراهيم فى مصر فأين اختفت معالم هذه السيرة من بين التاريخ المصرى والجدران التى دونها المصرى القديم وهو حتما لا يمكن ان يتجاهل سيرة عظيمة كهذه كغيرها من سيرة الانبياء ..وكنت أظل ابحث وانا جاهلة بأدوات البحث مشتتة الذهن بسبب كثرة التناقض فى الكتب والمؤلفات ..وعندما عملت بالصحافة الحرة أو المستقلة تجرأت فى إحدى تحقيقاتى بنفس العبارة * يجب إعادة صياغة التاريخ المصرى * وكان لدى بعض الملاحظات فأثار الموضوع جدلا كبيرا بين هيئة التحرير وصلت الى حد المشاجرات ثم تم نشر الموضوع وانا على يقين بأننى سأجد من يلبى نداء اجدادانا
الذين تم قذفهم بالباطل .. وكان اللقاء الاول من خلال نظرية ابن البلد الصعيدى الاصل الدكتور / أسامة السعداوى من خلال نظريته التى شملت تصحيح لأغلب المفاهيم الخاطئة .
ولكنى ليس من عادتى الاعتراض على ما يقدمه الغير الا بعد دراسة متأنية لكل ما يقدمه وانا حتى الان مازلت بعد ما يقرب من عام ونصف أقرأ كل يوم فى صفحات هذه النظرية العبقرية التى قدمت لنا الكثير مما احجم عنه الكثيرين ووفروا جهدهم لسطوة الباحثين الغرباء ليعبثوا كما يشاؤا فى تاؤريخنا الحافل بالعلم والرسالات .
أستاذى الغالى فشكول .
الدكتور / أسامة السعداوى لا تربطنى به اى صلة قرابة لامن قريب ولا من بعيد ورأيك عندى أهم من أى مجاملات حتى ولو كان عنى أنا وهذا هو دورنا عبر المدونات وما يربطنى بالدكتور / أسامة السعداوى عن حق هو صلة أكبر من القرابة هومصريتى وأجدادى وقضيتهم التى لن تموت بداخلى مادمت حية .. إحساسى العميق بهم وبما حاط بهم من ظلم واتهامات باطلة بالوثنية وصيغة التخلف التى تختفى وراء الترجمات الباطلة .. المصرى القديم هو نحن جميعا هم آجدادنا من حقنا ان نخرج على العالم بعلم أجدادنا وايمانهم وشرف حملهم للرسالات .
لكم منى كل التقدير والاحترام وارجو مزيدا من المشاركة مع هذا الملف الهام .
مع خالص تحياتى

ن يقول...

السلام عليكم
أستاذى الغالى .. فشكول
سأعود مرة أخرى لقرأة البوست الجديد
بس تعالى معى من فضلك لمدونتى فيه مداخلة جديدة من مدونة * شاب مصرى *
انا عارفة انى بتعبك معايا بس حضرتك من أساسيات مدونتى .
مع خالص تحياتى

مصري جدا يقول...

دول غلابة
بس انتا مش واخد بالك
بقولك اية ما تيجي نلم لهم مساعدات علشان يعدوا الازمة اللي هما فيها

خدبالك
يدبر لك مؤامرة في الخفاء

الشباب يوم 8/8 متوقعين عسل وفطير وجبنة قديمة وارد برج المنوفية
لذلك
خد بالك
وقول لهم أتنشلت
ونلم لك بالمرة
بس بالنص لاني صاحب براءة الاستنخراع

طـــائر الليــــل الحـــــزين يقول...

يااااااااااااااه
والله زمان يا عم الفشاكيل
بجد جمورية فشكولستان كانت واحشانى جداااا
بس استنى كده اصلى بعد ما قريت المبالغ دى فقدت الوعى
افوق واكتب تعليق
الله يخرب بيت اللى سرقوا البلد
لاء هما نهبوها

saragebaly يقول...

ناس تنهب البلد وتقبض بالملايين

وناس تجمع تبرعات

سبحان الله

لكـِ الله يا مصر !!!


تحياااتي وتقديري

سارة

د. ياسر عمر عبد الفتاح يقول...

يا زعيم متوجعش بطننا بقي الله يخليك
إيه الفلوس الكثير دي كلها
امال الناس مش لاقية تاكل ليه...؟؟

mohamed ghalia يقول...

فشكول باشا
معلش عديها بقى احنا معديين هبر كتيررررررررررررررررررررررررررررررررررررررررررررررررررررررر
يلا يلا عقبال الى جاى ههههههههههه

عاشقة الأحزان يقول...

وحشتنى ياقمر قوى

انا اجى اسلم الاقى بوست والناس دى جت امته

عااااااااااااااااااااااااا

كانوو بيتين هنا ولا ايه

عااااااااااااااااااااااااا

mimi يقول...

لله ... يا محسنين لله

عاااااااااااااااااااا

ايه الأرقام اللي مش خدناها في الجامعة دي .... عيني وجعتني من كتر الأصفار

ده مش حسد ياعم فشكول لا سمح الله

ده أسمه نأ

اللؤلؤة يقول...

أستاذنا الكريم
السلام عليكم
إنت بتقر عليهم آهـ منك إنت آ هـ
زمان دلوقتى جاتلهم الزغطة من كتر قرك
وإنت قرك دكر يا راجل سبهم فى حالهم هما زعلوك فى حاجة لمسوا طرف هدومك
ناس شفطوا البلد فى كروشهم
بتهيألى دا ميزعلكش فى حاجة
دمت فى خير

كلمات من نور يقول...

إلى رئيس جمهورية فشكولستان

ابن خالتي سيادتك مطحون في كلية الطب شوف انت كام سنة واهو مستني التعيين ويارب ياخدوه معيد ولا ياخدوا ابن فلان وعلان ...تعرف أول مرتب له كام؟260 جنيه ...........شفت ازاي؟؟

ومن يومين واحده كانت عايزه شغاله قالولها موجوده وتاخد 1000 جنيه....شفت ازاي

ولا تعليق

الازهرى يقول...

احم
بصراحة يا جماعة انا برىء من الكام بتاع سى فشكول ده
أنا أساسا ولا أعرفه
وكمان ولا سمعت عنه
نعم ؟
كلامه صح ؟
كلامه صح مين ياعم
تحيا الرياسة ويحيا العدل
ولتستمر المساواة فى ظل القيادة الرشيدة

رشيدة بتاعت بكار فاكرينها ؟

ليس فقيرا من يحب يقول...

السلام عليكم

يا سيدى الفاضل حضرتك مستكتر على الراجل انه ياخد مليون وربع
لازم حضرتك تعذره الراجل مصاريفه
كتيره كتيره جدا دا حضرتك لو عرفت المطلوب منه من فسح وعربيات وكوافير
ووووو الخ يعنى هيصعب عليك بجد
لا يا استاذ فاشكول مش عيزاك تظلم حد
الراجل مش زينا برده احنا ياعم نتنيل ونتهبب نعيش باى حاجه لكن هو
وزير وزير يا راجل او كان وزير يعنى
المهم من غير ما اطول على حضرتك
انا حاليا موافقه انى اشتغل ببلاش
بدون مقابل يعنى بس ان شاء الله هتفرج يا مايكل

تقبل تحياتى

ضحكات الحياة يقول...

السلام عليكم

موضوع جميل و جامد زى ما عودتنا دايما يا أستاذ فشكوووول

أنا كنت شفت الحلقة دى بتاعة أحمد المسلمانى و كانت فعلا حلقة جامدة جدااااا و فعلا كنت متغاظ لما سمعت ارقام الناس دى دى حجة اخر اوانطة و انت رئيس جمهورية اونطة شفلنا حل يا رئيس الأونطة

أما بالنسبة لسلوك عمرو زكى فأنا بعتبر أن اى سلوك غير لائق لأى لاعب و خصوصا لو كان فى نادى كبير لازم يكون ليه عقابه و احسن حاجة لعمرو زكى انه فعلا يلعب فى الحوارى

أما اخر نقطة فأنا لا أقول انى لا اتفق معك و لكن عندى وجهة نظر مختلفة ان فعلا الناس دى فى حالة ان هى بتضطر لكده

و الحمد لله الذى عافيتنا مما ابتليت به غيرنا

و تحياتى لك و دومت مبدعا

ستيته حسب الله الحمش يقول...

والله العظيم مهما بلغ خيالي المريض في تخيل مبلغ من حرامي لحرامي ما اتخيل انها وصلت لمليون شهري

يارب ع الفجر تسمعنا عنهم سمع خير

انا اتعصبت والبوست ده حرام ع الفجر وانا صابحة صايمة

اما عن اللقاء فلو حضرتك قرأت ردي على ردك بوستين تلاتة لورا ها تلاقيني في كل مرة بقول عمنا فشكول قبل كل القيادات
لأ في اللقاء مش في أمن الدولة
متفهمنيش صح

والله مستنينك وها ننبسط ايما انبساط لو شرفتنا وأكرمتنا وسيبك من هاني احنا قلنا فطير بس لا قلنا عسل ولا مش ولا حاجة تانية

يوم السبت 8 اغسطس الأزهر بارك الساعة عشرة ونص صباحا ان شاء الله

ها تجيب الحاجة معاك؟
عاوزاها أنا في كلمتين على جنب خص نص على رأي الشوام

قلم رصاص يقول...

هههههههههه

جرى ياعم رئيس جمهورية فشكولستان
حضرتك ليه نازل أرررر على الناس الغلابة دول

بدل ماتحاول تدي الوزرا بتوعك زيهم

بطلوا أحقاد على الناس الطيبة اللي بتحب مصر من كرشها هههههههه قصدي قلبها دي

ههههههههه

ليه بس كده ياعمو فشكول تخلي الناس الطيبين دول يزعلوا منك .. دول يادوب الفلوس اللي بياخدوها دي يادووووووووووب تكفي مصاريف الأولاد واشتراكات النادي وشوية لعب للبت توتو
هههههههههههههههههه

حسبنا الله ونعم الوكيل ياعمو صلاح

متدقش .. هتتعب حضرتك كتير والله في البلد دي

اصبر شوية لما الاوضاع تتغير ساعتها يمكن كلامنا يبقى له فايدة

دمت في ابداع وتميز يا استاذي

في حفظ الله

smilyrose يقول...

السلام عليكم

اخبارك يا عم فشكوول


طب ليه كدا بس يا عمو

انت عاوز تقول ان الحكومة بتاعتنا

ايه يعنى شوية حرامية ونصابين


لالالالالالالالالالالالالالالالالالالالالالالالالالا


مش كدا خالص

دول

رؤساء


؟؟؟؟؟؟؟؟؟؟؟؟؟؟؟

والحدق يفهم

يلا ما علينا

شكلنا كلنا هنقول لله يا محسنين

هههههههههههههه

على عبدالله يقول...

السلام عليكم

عشر سنين مين يا عم !
قصدك مائة سنة
:)
مابلاش الحقد دا على الناس
دى ناس شقيانة وتعبانة مستكترين عليهم شوية ملايين ! حياله شوية ملايين

عمرو زكر اخره دورى المظاليم !
بحس ان الواد دا جواه اسود عشان كدا ربنا مش بيكرمه

اصل اللاعب عندينا اول مايلعب برة مصر ويجيبله كام هدف بيشوف نفسه شويتين تلاتة
يعنى ممكن يحس نفسه مرادونا مثلا
:)

سيبك انت
اللهم اغننا بحلالك عن حرامك
انا لسة بكلم واحد صاحبى بيقولى الواحد قرف من البلد وحاسس ان مافيهاش أمل ولا عمر

تحياتى

Me7'o يقول...

مليون وسبعماية وخمسين ألف جنيه
أعمل بيهم إيه ولا إيه ولا إيه

أما بقى مصر ولله يا محسنين
ف هى دى مصر

http://mylifeflavor.blogspot.com/2009/07/blog-post_05.html

ابو صهيب ( الجمعاوي الاصيل)سابقاً يقول...

هي دي مصر ياعم فكشول

وبعدين كفاية بقى حقد وغيرة وحسد



شيلوا بقى البولك الاسود اللي جوه ده


حرام عليكوا

ان سرقت زيهم خربت البلد زيهم

عاوز فلوس ليه بقى

دمتم بخير

جارة القمر يقول...

مبالغ خرافية وكمان رواتب شهرية

انا مش قادرة اصدق الارقام بس عادي بتحصل في احسن العائلات

الفوس زي الرز بس مافيش نفس تصرف

والشحاتين دول غلابة غلب

تلاقي الواحد منهم الفلوس عنده رزم رزم وعمارات والخ الخ

وبيشحت دي شغلانته يعمل ايه في النهار شحات وبالليل وزير

والدي الطيب اشتقت لك كثير

دمت معطاءً لنا

احترامي

عمرو يقول...

السلام عليكم يا أستاذنا الفاضل ..
ده الأتنين دول بالذات اللى حضرتك ذكرتهم أغلب من الغلب و يعتبروا فقراء بالنسبه للى بيدخل جيوبهم هذه المبالغ مش فى شهر كامل لكن فى مجرد يوم واحد !!
أيوه
المبالغ دى بتدخل لناس فى يوم واحد فقط ..
لا نملك غير الدعاء على اللى كان السبب فى هذه المهزله الشحاتيه اللى وصلنا لها ..
تقبل تحياتى و تقديرى ..

Me7'o يقول...

عمى الغالى

أنا من ساعة ما علقت أول تعليق وأنا دمى محروق ومش عارف أركز
قلت لأه بقى أنا لازم أخش أفضفض معاك شوية

مش الواحد لما يسيب شغله ويقعد فى البيت وبعدين يجيله أى شغل تانى بيقبله وخلاص مهما كان الشغل ده لإنه كبر وعمر الشغل الجديد ما هايديله الفلوس اللى كان بياخدها قبل ما يطلع على المعاش

السؤال هنا بقى:
كل واحد فيهم كان بياخد كام وهو فى الخدمة؟؟؟؟؟؟

بالذمة مش حاجة تحرق الدم لما ناس بتاخد الفلوس دى كلها

عارف يا أستاذى الفاضل
أنا قريت مقال لصلاح منتصر فى مجلة الشباب من حوالى تمن سنين كده بيقول فيه

إن الفقر فى مصر وصل لمستوى غير مسبوق لدرجة إن الناس الغلابة بتروح تشترى ضوافر الفراخ (آه والله العظيم قال كده ضوافر الفراخ مش الرجول لأ الضوافر) وبتحطها فى الطبيخ وتقول لعيالها إنها لحمة مفرومة..... تخيل؟؟؟

ضوافر الفراخ

حسبنا الله وهو نعم الوكيل

تحياتى
الإمضاء
أبو دم محروق قوى

ঔღঔ نـــوارة ঔღঔ يقول...

ههههههههههههههههههه

هم بيبكي وهم يضحك

يخرب بيتهم دول ناهبين البلد وهما فوق الكرسي وتحت الكررررسي

حاجة تفرس وربي

ربنا يصبررررررركم

تحياتي

احلام جوليا يقول...

تعرف يا استاذ فشكوول انا كنت بفكر في ايه قبل ما اقرا البوست ده كنت بفكر اقعد في البيت واربي ولادي واستغنى عن شغلي واتحمل فرق الفلوس باي وسيلة وارجع نهائي من الخليج واعيش بهم في مصر لكنك مشكور بعد البوست عرفت اني عالقة فيما انا فيه ولا استطيع العودة مهما تمنيتها

ادم المصرى يقول...

كان الله فى عونا يا عم فشكول

ربنا معانا بجد والى جى انيل واطين

Ramy Wasel يقول...

موضوع تعيين الوزراء ده
المفروض طبقا للقانون
باطل
بس تقول لمين
لان هناك شروط لكى يعمل الوزير بعد الخلع
يعنى بعد الاستقاله
وموضوع اباهيم سليمان
انا كنت عامل موضوع عن كل سرقاته وكوارثه قبل كده
http://7elwablady.blogspot.com/2009/07/blog-post_06.html
بس حنقول لمين

*البت المشمشية *حلوة بس شقية * يقول...

فيه فكرة هنعملها بكرة
تفاصيلها فى البوست عندى
ياريت تشارك معانا
لو فيه استفسار كلمنى

العصفورة يقول...

أستاذى الكريم
السلام عليكم
أشكر لحضرتك جهدك الطيب بالموضوع
ما شاء الله موضوع أكثر من رائع
إختيار موفق
خالص تقديرى

mosooz يقول...

مش عارف يعنى الحكومة تعمل اية

بتشحت علشان تاكل جاتوة

ربنا يصبرنا يارب

micheal يقول...

هههههههههههههه..ايه الحكاية ده تاني بوست في خلال 48 ساعة ألاقي سيرتي في الانترفيوهات جت فيه
احم احم
عمروزكي بني ادم غبي مقدرش يصون النعمة عشان كده الدوري المصري عقاب له
مين ده بقي اللي بيأخد مليون وربع في الشهر..بذمتك ده خبر تنشره..يا ابني راعيني حتي.عندي الضغط
:(
مستشفي سرطان الاطفال بيشحتوا عليها من وأنا في إعدادي ومتهيألي هما استحلوا الحكاية
كفاية كده
:)
تحياتي

وردة يقول...

ازيك يا عم فشكول
تعرف انهم غلابة ومعندهمش اي حاجة
واي واحد في الدنيا ديه عنده حاجات اكتر منهم
تفتكر عندهم وقت يقعدو مع ولادهم يحلو مشاكلهم الصغيرة التافهة واللي بتقرب اي اب من ابنه
ولا حتي يلعبو معاها في يوم الاجازة
تفتكر عندهم حاجة صغيرة اوووي اسمها راحة البال ربنا مش بيديها لاي حد لازم يكون يستحقها
تفتكر عندهم وقت يعملو لاخرتهم زي ما هم مموتين نفسهم علي الدنيا
حد فينا يقدر يستحمل انو يظلم حد وان حد يدعي عليه
الدنيا كلها تهون ولا حد يدعي علي حد دعوة وحشة ولاء كمان دعوة مظلوم
تفتكر هما كده اغنيا ولا فقرا
بالعكس دول اغلب من الغلب
ولا ملايين الدنيا تساوي راحة البال
ولا حد يقلك روح ربنا يكرمك ويفك كرب وهمك
عم فشكول انت اغني بكتييييييييييير اوووي منهم
هما ربنا يعنهم علي التقمة اللي هما فيها
سلام

شبه إنسانه .....( سهوره ) يقول...

حسنة قليله يا بيه

يكفيك شر طريقك

وشر ولاد الحرام

وينجح لك ولاد

ولو حماتك تعباك ربنا يكرمها

والنبى يا بيه

دى الحسنة القليلة تمنع بلاوى كتيره

ايه بقى رأيك يا عمو فشكول أنفع شحاته

والله احنا غلابه

واحد بياخد مليون والتانى مليون وشويه

ولسه فى ناس بتتخانق قدام فرن العيش

ياااه يارب خد لنا حقنا بقى

الحمد لله على كل حال

تحياتى

سهوره

شبه إنسانه .....( سهوره ) يقول...

آآآآآآآآآه نسيت

تقولى منوره يا سهوره

وانا كالعادة

هقولك دا نورى والله شكرا

assafo anaroze يقول...

سلام لاغلى الحبايب رئيس الجمهورية اللي بيشتغل رئيس و بلاش
هو ده فشكول اللي بحب مدونته و اداوم على مطالعتها فشكول اللي بعري الحقيقة و يكتشفها و يفضح باسلوبه الساخر
سيدي ما هو لو وزعوا بشكل عادل الفلوس ديه و انتفت الفوارق اللي هما اصلا اللي عملوها كل الشعب حايعيش في نغنغة و ده مش عايزينه مين بقا اللي ممكن ياخد دور الكومبارس في مسرحية الحياة اذا لم يأخذه الفقير الكحيان
مودتي

assafo anaroze يقول...

فشكولي الحبيب
لا انا طبيت من زمان بس دلوقتي عفا الله علينا من متاعبه و بيني و بينك و الله احب اني اطب ثاني بس المرة ديه تكون ثابتة ان شاء الله
اتمنى ان اتعرف على الكحيان اشوفوا لو هو زي الشعب الكحيان اللي موجود عندنا
مودتي اتمنى تفتح الايميل لو انت عالنت

شبه إنسانه .....( سهوره ) يقول...

طبعا طبعا منور غصب عن الكل

على فكره والله

إبتسامتك فى الصورة دى بتفرحنى

وليه مش عارفه

تحيااااااااااتى

سهوره المنوره دايما هههههه

الكحيان يقول...
أزال المؤلف هذا التعليق.
الكحيان يقول...

ولا أعتذر بشدة عن التأخير والتواصل بسبب أعمال الكنترول وبسبب حركات الجهاز القرعة التي لا تحلو له إلا في الأيام المهمة المحرقة ... ليه تقلب المواجع علينا ياعم فشكول ده شيء طبيعي ومعروف من زمان مش الوزراء لوحدهم يعني يوسف عبد الرحمن نائب يوسف والي كان بياخد 450000رسمي غير الزوائد والرشاوى الضخمة وأحد مديري الأمن كان مثله وكذلك حسن شحاته بتاع الكورة وهناك كثير من لاعبي الكرة بياخدوا مليون يزيد أو ينقص قليلا في الموسم من جيوبنا طبعا. وإحدى بنات المسؤلين في الاتصالات بعد تخرجها مباشرة تم تعيينها بمرتب 15000جنيه وهي عيلة صغيرة يعني ما يعادل مرتبات 16 معيد تقريبا. الآن حملة وزير الثقافة من أجل اليونسكو كلفت ما يطعم الشعب المصري لمدة عامين من خير الطعام. قبة جامعة القاهرة تم تلميعها من أجل حسين أبو أوبامابمادة ثمنها 55000 جنيه فقط لا غير من فلوس الجامعة. أتخن وزير المفترض أن يصل راتبه رسميا بعد الحوافز والبدلات وما إليه إلى 7000 شفت الفرق . عايز تاني ولا كفاية كده .ياريت تعذر أساتذة الجامعة الكتاب يعني لو افترضنا إن كل الأساتذة كده هيجيب كام ؟ ومن يتم تعينهم وزراء أو عمداء أو حتى وكلاء كلية لا يتم تعينهم إلا إذا كان مرضيا عنهم وتؤكد التقارير إياها أنهم قدموا الكثير وأنهم غير أنقياء الثياب ولا الضمير فليتك لا تعمم فالشرفاء كثيرون لكنها السلبية هي التي قضت علينا جميعا. أما عن أسافو أناروز فأنا سعيد به وأوكد له أني أرتدي مرقوع الشرابات ولا أملك سوى غيارين وعن ملابسي الداخلية حدث ولا حرج واعلم أن الشعب المصري لو اكتسى بعد عري وشبع بعد جوع فسيظل الكحيان كحيانا جوعان عريان مادام الركب تقوده عرج الحمير . شكرا لك على هذا البوست اللاذع الواجع الماتع

آيوشة يقول...

اااااااه ياولاد المحظوظة حار ونار فى جتتهم كل دااااا وبعدين يقولوا البلد بتفقر
اقول ايه كفاية كدا احسن انا لسه مكتئبة وربنا يكرمك يااستاذ فشكول يااااااااارب وتبقى رئيس ااااااااد الدنيا باذن الله وتاخد حتى 5 تلاف جنيه فى الشهر مش وحشين بردو رضا :)

كلمات من نور يقول...

فشكوول باشا

يعني إيه من أصحاب الحيثية؟ لا إحنا معانا ربنا لا بتوع الباشا ولا المعلم ولا البيه الكبير

وهو الله يعينه في بلادنا الجميلة .ابنك اتظلم وبرضه عندنا في مصر داه عادي..و بالنسبة لابن أختك برضه أقول الله يعينه ويعين أهله أصل الكوسة دي على رأي من قال؟:

يا بلدنا يا جميلة فيكي حاجة محيراني نزرع القمح في سنين نحصد الكوسة في ثواني

لا داعي للصويت ما حضرتك مهما صوت وقلت آه يا نيييي محدش بيسمع

تحياتي

بنجاواتى يقول...

هو فى مرتبات بالشكل اللى بتقول عليه ده ولا ايه النظام؟؟؟؟

بس بصراحة عمو عاطف وعمو محمد يستاهلوا بصراحة الفلوس دى واكتر كمان ..كفاية انهم نقلوا مصر من عنق الزجاجة الى قاع الزجاة ...كفاية كفاية ...كفاية يا ناس ..وده طبعا لانهم غرقوا الدنيا بعلمهم وفكرهم المستنير...كفاية يا عالم الدنيا غرقت

عمروا زكى عمل فى نفسه كده...على ما يبدو لى من خلال تصريحات مدربه فى انجلترا عن عدم التزامه

المستشفى بقى تمثل المحنة اللى لازم نتكاتف علشان نساعدهم وننسى خلافاتنا ..للاسف البلوة اكبر من اننا نقول دى مش مسئوليتنا او نقول ان الحكومة عندها استعداد تخلصها فى يومين

تحياتى

م/ الحسيني لزومي يقول...

اولا فينك ياعمي فشكول وحشتنا وللا هيه الزياره بزياره.
ثانيا:- بخصوص موضوع الوزراء الله يعزك ارجع واقول العيب مش عيب الدوله ...ليه لان المال السايب يعلم السرقه والمال اللي ما يحرصوش اصحابه محدش تاني يحرصه والشعب باع القضيه وبيسرق في بعضه طالما مش لاقي حاجه يسرقها.
تفتكر الشاعر ابو القاسم الشابي لو اطلع علي احوالنا كان قال.
اذا الشعب يوما اراد الحياة
فلابد ان يستجيب القدر
تحياتي

شبه إنسانه .....( سهوره ) يقول...

أيووووووووووه جاااااااااى

اه على فكره انا بروح الحسين كتير

بس انته عارف زملايى الشحاتين من الصعب التعرف عليهم

زى الشعب المصرى كده من الفقر بيقينا شبه بعض

منور يا ريس

تحياتى

مواطنة من مواطنين دولة الفشكوليات

akeed يقول...

السلام عليكم ورحمة الله و بركاته ا جد كلام غير ان اقول حسبى الله ونعم الوكيل و لن يترك الله هؤلاء الاناس الا وسيحاسبون عن كل قرش فى هذه المبالغ الطائلة سوف نتشفى فيهم يوم القيامة اذا استمروا على ذلك ولم يتوبو


تحياتى

مصعب صلاح يقول...

السلام عليكم
هيه دنيا
ومن قدم شيء بيداه التقاه وهنيالك يا فاعل الخير والثواب

Me7'o يقول...

عمى الغالى فشكول

تحياتى لأستاذى
وأشكر لك اهتمامك بمدونتى وحرصك على زيارتها وده شرف كبير ليا

أنا فتحت التعليقات تانى على بوست الأصدقاء

تحياتى أستاذى

على عبدالله يقول...

السلام عليكم

استاذ فشكول
كيف حالك مرة اخرى ؟

الصورة اللى فى البوست دى جبتها منين ؟!
صعبة قوى
:)
ومين الأمور ولا الأمورة اللى حاططها فوق المدونة دى
أجانب ؟!
ربنا يبارك

ماما أمولة يقول...

منهم لله وعمالين يعملوا لنا امتحانات للكادر علشان 277 جنيه منهم لله

حسبنا الله ونعم الوكيل

سلامي يا فشكوووول باشا

يارب تكون في احسن حال وصحة يارب

م/ الحسيني لزومي يقول...

الاخ/ فشكول
الاخ /علي عبد الله
يقول الامام البنا" كم منا وليس فينا وكم فينا وليس منا"
من الممكن ان يكون هناك من هو خارج الاخوان ويقدم خدمات جليلة للاسلام وهناك من هو داخل الاخوان وربما يسئ اليهم
لكن فكرة العمل داخل جماعة حتي خارج العمل الاسلامي محببه ومطلوبة ومنجزة
كما ان جماعة الاخوان تقدم اجتهادا بشريا لتطبيق المشروع الاسلامي ولم يقل احد منذ حسن البنا حتي الان انه الاجتهاد الاوحد او الاصوب او ان ما عداه من اجتهاد مرفوض فلو اننا نعيش في مجتمع ديمقراطي لكانت هناك اكثر من رؤية لتطبيق المشروع الاسلامي .

م/ الحسيني لزومي يقول...

اخي العزيز/ فشكول
اولا لازم اخلص الديون اللي عليا فجيت تاني .
ثانيا:- يقول المثل السوداني"اللي ما يريدك ما يعاتبك "

ن يقول...

السلام عليكم
ايه الغلب ده ياربى .
من حملوا أعظم الرسالات وأدوا الامانات عاشوا وماتوا لم يورثوا درهما ولا ديناراً .
قال موسى عليه السلام * ربى انى لما أنزلت الى من خير فقير * وكان ذلك بعدما عاش اياما من الجوع والمعناة
وكان عيسى عليه السلام على رأس الزاهدين وكان يحى عليه السلام يخشى ان يأكل ويشبع وكان يوسف عليه السلام زاهدا الا من عبادة الله وهو أمين على خزائن الارض وكان يوسف يراعى دقة الميزان وكان عليه السلام بمثابة رئيس الوزراء وكان الملك فى يد داود ومع ذلك كان من الاوابين الصائمين الزاهدين ..
مش عارفة أقولك بعد كدة ايه والوزراء السابقين دول .
إنا لله وإنا الية راجعون
مع خالص تحياتى

dr.lecter يقول...

اه يابلد تييييييييييييييييييت

رزق الهبل علي المجانين

تامر علي يقول...

يا استاذ فشكول ...انت لسه ماقريتش الفوله ؟؟؟
خلاص يا استاذ فشكول الفساد بقى صريح ... بدون لف ودوان ... بدون توريه عيني عينك واللي يقدر يتكلم هانوديه في داهيه ....
الناس اللي طلعت دول غلابه وعلى قد حالهم ....عز بيه واخد شركة الدخيلة اكبر شركة حديد تسليح في الشرق الاوسط هدية "كومبوليمو" يعني علشان جنتلته في الانتخابات ...

سلامات يا حكومه :)

تحياتي

عاشقة الأحزان يقول...

عاااااااااااااااااااااا

عاااااااااااااااااااااا

ماشى بتروح تحسدنى فى المدونات التانيه ماشى ماشى برحتك

انا هى دى الحاجه الوحيده اللى بعرف اخد حقى فيها فى التعليقات اعمل ايه بس اصلى عبيطه شويه

هههههههههههههههههههههههه

عاشقة الأحزان يقول...

بقولك بجد انا زعلانه منك كتير لانى بعت ليك اكتر من تاج وانت ولا عبرتنى وبجد اخدت على خاطرى وهبعت ده كمان ومش هترد عليه عامة انا مش اقدر على زعل حبيبى خالص مالص

واسمك مكتووووووب

الف مليون مبروك

لولولولولولولولولولى

بس اوعدنى بجد انك هترد

تحياتى ليك يا راجل ياطيب

موووووووووووووواه

عاشقة الأحزان يقول...

المهم بجد انت وحشتنى كتير خالص مالص

منتظراك تطمنى عليك

تحياتى

شوكولاتة يقول...

أستاذنا الفاضل فشكول
بالرغم من أن انا بحب مدونتك جدا بس صعبان عليا منك قوي. كده تظلم الناس الغلابة دول وتقول إن مرتباتهم بالملايين أحب أصححلك المعلومة وأقولك إن دي حوافز وأوفر تايم.
هههههههههه :(
والله شر البليه مايضحك تصدق أن أنا كل يوم وأنا رايحة الشغل بشوف واحدة ست عجوزة جدا بتمشي تفتح في أكياس الزبالة عشان تلاقي لقمة واحدة تفطر بيها. وسعادة الوزير لما جه مع عمرو الليثي يقوله أنا الدولة قدرتني عشان عارفة أنا بشتغل إزاي لأني بشتغل في صمت.
وربنا يعينا على مابلانا

الخبز قبل الحب أحياناً يقول...

لنا الله
هنعمل ايه بس
ناس ليها حظ وناس ليها ترتر
اللهم لا اعتراض
الحمد لله على كل حال
بوست ينغص بس جميل
اتمنى الزيارة

لنحيا فى اجواء الحب يقول...

امسك حرامى بص ياحاج فشكول انا بقالى سنة بمحط وانا فى الشغل والحمد لله جمعت مايقارب اتنين جنيه وربع لا عالية دى قصدى جنيه ونص وكل ده عشان الكلية اللى مطفحانى ياعم الحاج اذا كان الريس بيحضر للتوريث عشان الهبر يستمر يبقى ماتعيبشى على الشيخ عاطف واللا الاخ التانى ده وبعدين دى فلوس شكلية بستهيالى فى لسه تحت الترابيظة حسبة خماشر تمناشر جنيه واللا حاجة ياراجل داحنا غلابة اوى منى سلام مصرى دائما

حلم بيعافر يقول...

لله يامحسنين
انا باخد مرتب جامد برضه بس محدش يحسدنى بقى
اذا كان عاطف عبيد كان بياخد 50000خ جنيه فانا مش اقل منه وباخد 600 جنيه هع
هو احنا شوية؟
اصحوا بقى

محمد الجرايحى يقول...

أستاذنا الفاضل
مجموع رواتب رؤوساء الوزراء السابقين ، والوزراء السابقين ..والمستشارين الذين يملأون الوزارات يمكن أن يقضى نهائياً على مشكلة البطالة تماماً ..يكفى أن تعلم أن السيد وزير المالية لديه أربعين مستشاراً ليس لهم أى عمل غير طابور السكرترية وماخفى كان أعظم....
أصلها وسية

الازهرى يقول...

فشكولنا الغالى

لا يا عمنا الموضوع كبير كبير كبير

أنا استعملت ذكائى
وققلت أحط الواد لحليوة فى الواجهة
وطبعا كتير يتقدموا
ياخد اللى هو عايزه والباقى للغلبان للى هو انا

وألا إيه ؟

********************************
وكمان العمدة كان طويل

لكن السر
إن طقم الشر كله فوق
والخير كله تحت


وكل لبيب بالإشارة يفهم

assafo anaroze يقول...




استجابة لدعوة مجموعة من المدونين الى جعل يوم الجمعة 31 يوليوز




يوم التدوين العالمي لدعم المقاومة الفلسطينية قررت مدونة احزان لا تنتهي




ان تشارك هي الاخرى في تلك المبادرة و هذه دعوة عامة لكل المدونين الذين يرتادون




مدونتي لنجعل من هذا اليوم يوما للفضح و يوما لدعم المقاومة و يوما من اجل نصرة اخواننا




بغزة و بكل بقاع فلسطين الحبيبة.




الى كل الضمائر الحية بالوطن الكبير و بالعالم




فلنتضامن مع اخواننا ولو بالكلمة الصادقة.

المهاجر يقول...

فشكول

المرتبات بتاع الساده الوزراء السابقين قليله مفروض يعملهم كادر دول فقراء يا عم يعنى هو بيفرش الأرض فلوس وينام عليها والصبح يرميها يجيب فلوس منين يعنى ولا يعنى علشان مرتبهم يعادلربع ميزانية وزارة هنحسدهم وهما فقرا مفروض يبقى قلبنا أبيض زى البن
طبيعى انت عارف لون البن بس علشان حبيبنا ميزعلوش بينى وبينك يعنى

كاتب مصري يقول...

السلام عليكم
تحية طيبة
الزيارة دي مش خاصة قوي متأسف لو مش بتحب الإعلان جوة التعليقات بس ده أمر مهم وخاص جدا
دي دعوة لمتابعة الإقتتاح الجديد لمجلة رؤية مصرية يوم السبت 1/8/2009
roaua.com
هتنور المجلة بوجودك
محتاج رأيك ومشاركتك معانا ولو عاوز تنضملنا تعالى يلا معانا
مستنيك
خالص تحياتي

معتز شاهين - باحث تربوي يقول...

حسبنا الله ونعم الوكيل
أن اتفرجت على حلقة واحد من الناس بتاع عمرو الليثي أمبارح وكان الجزء الثاني من حواره مع محمد سليمان وبصراحة الرجل بلطجي ومينفعش يشتغل غير بواب مش وزير
ده اعترف بتخصيص أراضي لأبنه وبناته وعنده 3 قصور و4 فيلل في مارينا

ويبقى التواصل

rovy يقول...

السلام عليكم
ازيك يا استاذنا ..
يارب تكون فى احسن الاحوال دايما

بجد ربنا يرحمنا مش لاقيه كلام يتقال
قادر ربنا يرحمنا و يغير الاحوال

خالص تحياتى

نفرتارى يقول...

بابايه الجميل ،،
وحشتنى جدااااااااااا .. موضوعك بجد رائع .. وكل اللى اقدر اقوله حسبى الله ونعم الوكيل .

تحياتى ،،

ابنتك نفرتارى

جارة القمر يقول...

اشتقت اليك فجئت

والدي

كن بخير

جارة القمر يقول...

اشتقت اليك فجئت

والدي

كن بخير

جارة القمر يقول...

اشتقت اليك فجئت

والدي

كن بخير

mimi يقول...

انا بس جيت أسلم واقول وحشتنا

اسماء واحلام فى وجدانى يقول...

اجمل حاجة فيا انى مش باحب السياسة

ودمتم

ن يقول...

السلام عليكم
أستاذى الغالى فشكول
أولا بشكرك جدا على دوام المناقشة والتفاعل فى موضوع التاريخ
ثانيا .. عاوزة أعرف حاجة فى التعليقات من عند حضرتك دايما بيوصل التعليق مرتين اى مكرر .
مع خالص تحياتى

اسماء واحلام فى وجدانى يقول...

وبالمناسبة لله يا محسنين

ما الاقيش معاكى ربع جنيه بس يكون ورق

وارقامه تكون باينة

وابو الهول باين عليه

ويكون حديث الولادة

قصدى ابن السنة دى يعنى

اسماء واحلام فى وجدانى يقول...

فشكولى الحبيب

اسف على كل التاخير ده وانا طبعا مش اقدر ازعل منك لسبب بسيط جدا ان مفيش ابن يقدر يزعل من ابوه وطبعا مفيش اب يزعل من ابنه

انا جايلك النهاردة بعد غيبة على كل العيال اخواتى جايلك ومعايا جملة محيرانى اوى شوفتها كذا مرة على كذا مركب كنت انا وواحد صاحبى واحد مذكر طبعا سالنا راجل كبير اوى رفع عينه علينا وضحك بس الامانة ضحكته كانت بريئة وكانه طفل صغنن المهم نفسى اعرف معنى الجملة دى ايه



فتح عينك العين عليك
هتعيش فى الشيرتون
وهتموت فى القلعة

المعلم محمد صاحب المطعم - طعمية سخنة يقول...

سلامو عليكم
ازيك يا عمنا
مع اني مش بحب الكلام عن الناس :D
بس راعي مؤهلات دكتور عاطف عبيد
كفاية ان اخد القرار التاريخي بتعويم الجنيه !!!! أبرز انجازاته طبعاااااااااااا

لازم يكافأوه و ياخد وضعه ! و كذلك عم الوزير محمد علي


ما علينا بص يا ريس
انت تعيني وزير للمالية في جمهوريتك
و سيبلي الشعب و انا هظبطك بنفحة شهريا

ايه رايك

رئيس التحرير يقول...

بسم الله الرحمن الرحيم
السلام عليكم ورحمه الله وبركاته
سيدي الفاضل ...
لك جزيل الشكر علي سؤالك عني و تكرار زيارتكم وكم كنت سعيدا اليوم بقراءه موضوعك وتصفحت بعض موضوعاتك السابقه ولولا المشاكل والمشاغل لقرأت كل الموضوعات وعلقت عليها ...
وكنت سعيد جدا بعوده الكحيان ...
أعمل له زياره الي ان نلتقي ..
سلام.

أم مالك يقول...

آآآآآآآآآآآآآآه يااستاذ فشكول
ولسة احنا شوفنا حاجة
انا فاير دمى من ساعة
ماشوفت الوزير فى البيت بيتك
وكان الفساد دلوقت على عينك ياتاجر
اه يابلد
تحياتى

فارس عبدالفتاح يقول...

انا مش لاقي كلام ارد او اعلق بيه

جارة القمر يقول...

الغيبة طولت


:(

ن يقول...

السلام عليكم
أستاذى الغالى فشكول
بعيدا عن المجاملات .
حضرتك اتخذت افضل أسلوب للبحث وراء الحقيقة واثبات صحة ما قد نقتنع به من عدمه وهو الفهم والدراسة والمقارنة قبل اطلاق الرأى ودائما فى كل حوراتى واى بوست اكتبه عن موضوع يدور حوله اى اختلاف .. أقول اريد أن أفهم فلا يخلو عقلى من جهل قد يعلمه الاخرون وان كنت أظن اننى أعلم الكثير فأنا أجهل الناس بهذا الاعتراف ودائما أحاول كسر قاعدة اننا أصحاب حق على طول الطريق وأضف على هذا الامر اننا نأخذ طرق الحوار بعصبية وأحيانا همجية قبل الوصول الى فهم صحيح بالامور وهذا ما يحزن .
عموما ليستمر الحوار وما زلت معك أدقق فى الحروف والكلمات فهذا حقنا للوصول الى أفضل نتيجة قد تكون نعم أو لا ولكن بإقتناع
مع خالص تحياتى لشخصك الكريم

gogo!sf يقول...

انا بشرب شاى وربنا اصل النسكافيه خلص والله

يا استاذ فشكول لما هما يشغلو الخريجين ويدوهم 1000 ج فى الشهر هيجيبو منين ناس تقعد على القهاوى وناس تعاكس البنات اللى فى الشارع وناس تسرق ويشتغلو عليهم ويملو دفاترهم فى اقسام البوليس


لازم يعملو كده واكتر
هما مش فاضين لنا نهائى
وبعدين لما يشغلو ولادنا واخواتنا ويخلوهم يحتلو الوظائف والمناصب هيودو ولادهم هما فين هيقعدوهم على القهاوى لالالالا ميصحش بردو

دول حتى بيخافو موت على مصلحتنا وعلى المصالح العامه اللى تهم الشعب

ربنا ينتقم منى بفترى على الناس

موضوع فعلا يستحق الكتابه

تسلم يا فشكول ويسلملى قلمك

جوجو المفتريه

Appy يقول...

ما دى ناس وزنها تقيل الصراحه ولازمن ولابد وحتمنا يعنى كده ياخدوا على قد وزنهم
الفلوس دى لو اتعمل بيهاموازنه واتصرف بيها على شباب يتعدوا ناس فى اماكن كبيره اعداد قاده يعنى هيكون اوفر لينا

اسماء واحلام فى وجدانى يقول...

على فكرة انا والله بتكلم جد فى الجملة اللى انا ذكرتها ومش اقصد اى شىء خالص
وبالمناسبة حضرتك بدل ما تنورنى توهتنى اكتر من الاول

فشكولى الحبيب انا مش اقصد حضرتك وبصراحة انا مش عارف حضرتك كنت بتتكلم جد ولا بتهزر مع ابنك

الجملة فعلا محيرانى

mimi يقول...

اونكل فشكولي ...

ايه اللي جاب القلعة جنب البحر؟

ايه اللي جاب الشيراتون في القلعة؟

وبعدين مين اللي راح القلعة؟

طيب حد ضاع منه حاجة في الشيراتون

أنا إيه اللي جابني هنا!!

انا فين؟؟

أنت مين ؟

والمدونة دي بكام ؟

لنحيا فى اجواء الحب يقول...

نورتنا يااستاذ بجد وشكرا على المرور الجميل
مصرى دائما

وفاء بركات يقول...

كده برضه ياأ. فشكووووووووووول
تلاقي مكان لجمهورية فشكولستان ومتقوليش
وتلاقي حضرتك إخطرت الوزاره وسيبني زى عبده المشتاق مستنيه تليفون كده برضيكي
تعمل في أصحابك كده .. كان نفسي أعمل سبوبه حلوه ولما أطلع أمسك حته سمينه كده .
الا قولي هما 17500000يطلعلو كام ربع جنيه
خير اللهم إجعله خير ...
سلام بقه علشان انا مفروسه ومتغاظه من حضرتك
سلم لي علي الحاجه والأولاد والأحفاد بس هه هه

لاسع افندى يقول...

لو حطينا الصوره اللى فوق بالمرتبات الخياليه على الصوره اللى تحت فى طلب التبرعات باحس بايه
ان واحده لابسه فستان سواريه غالى وحاطه برفان شيك ورابطه عينها وشايله ولده هدومه مقطعه واقفه تشحت بيه وتمد ايديها


تحياتى اللاسعه

نهــــــــــار يقول...

السلام عليكم ورحمة الله وبركاته..
إزيك يا عم فشكول أن شاء الله بخير ...
التبرع أو الصدقه أجرها عند الله ...
والله يشفي الجميع ...
...
دمت بخير

micheal يقول...

رحت فيييييين

آه وكفى يقول...

اتشليت اتشليت اتشليت
بمناسبة الكتب ياعمو فشكول انا جبت في 11 ماده جيد و جيد جدا و اتنين امتياز وصلحوا أووووووم اااااااااايه بغباوتي مجبتش كتاب الروماني اللي نزل قبل الامتحانات بشهر عشان الدكتور بسلامته كان موقوف عشان قليل الادب ونتايجه زفت على طول فانا بئى استحمرت ومجبتش الكتاب وذاكرت من المحاضرات وجبت 3 من عشرين ,, زغرط والنبي تزغرط

و عارف فكرتني بايه بالحتة اللي في مسرحية الزعيم لما عادل امام بيقول لمصطفى متولي الله يخرب بيتنا احنا ياشيخ

طيب ميعدمونا ويريحونا انا شايفة ده افضل

اه يابلد

المهم سيبك من العالم النص كوم دي وقولي اخبار حضرتك ايه والله انا اسفه عارفة اني مقصرة بس انا ظروفي مهببه هشحت كمان شوية انا راخره

وابن حضرتك اللي كان بيمتحن وطردك برا الوضه -سوري يعني انا بس جايه النفوس- عمل ايه في النتيجة؟

سلاماتي

Dr Ibrahim يقول...

ربنا يحنن علينا وعليك يا عم فشكول:)

واحد من العمال يقول...

للأسف مصر عيانه
وربنا يشفى

الفقيرة إلى الله أم البنات يقول...

لا تعليق..فلم يعد هناك حروف تستطيع ان تكتب معنى ما يحدث معنا

shoshooo يقول...

السلام عليكم
وحياة ربنا الناس هتفضل طول عمرها تشحت طول ما البلد فيها الناس دى والراجل اياه
يخرببيت ابوه هو واولاده الاتنين
قولوا آآآآآمين