الأربعاء، ٢٢ أكتوبر ٢٠٠٨



فشكول والجامعه

قرات اليوم مقالة الكحيان - المعيد - لابد ان نحفظ له حقه وثمرة كفاحه .. مش عشان هو كحيان يعنى ما نديهش حقه .. لالالا انه مكافح نابغة واصبح معيدا .. مقالته بعنوان ( من اين تأتى اموال الجامعات ) ( او من اين تذهب اموال الجامعات) سأقول لك شويه لكن دعونى قبل ان اتحدث اقول أاااااااااه .. كدا انا استريحت .. جائنى ابنى اليوم يقول بابا أنا عايز آخد درس في مادتين .. كدا من الباب للطق .. .. مع انه فى كليه نظريه .. الكليه وحتى اليوم لم تنتظم فى الدراسه .. المحاضرات .. لسه .. السكاشن .. لسه .. مع انه زى ما قلت فى كليه نظريه .. يا ابنى دروس ايه .. يعنى هو الكلام اللى مكتوب عايز دروس .. دا كلام كله نظرى .. هو فيه نظريه عايزه تطبيق وانت مش عارف تطبقها - مسألة رياضه يعنى .. او دروس فى علم الفسيولوجى - او نظريه هندسيه .. يا ابنى دى كليه نظريه .. كلام وخلاص والكلام مكتوب بالعربى وشارح نفسه بنفسه .. طب انت ابتديت فى الدراسه وحاولت وما قدرتش تفهم وعشان كدا عايز تلحق نفسك وتاخد درس .. ابدا بالرغم من ان الدراسه بدأت قبل العيد بــ 10 أيام الا انه للأن لم تبدأ عمليا .. اصل الموضوع ايـــه ... أقول لكم ايـــه : شوية ناس احترفوا اعطاء الدروس لطلاب الجامعات ومن اول السنه ينظموا مجموعات دراسيه ولازم بقى الطلبه تلحق تحجز فىالمجموعات دى .. ما علينا - دى فلوس من طلاب الجامعات مش قلوس او اموال للجامعات - نيجى بقى للكتاب الجامعى . الكتاب هو هو نفس كتاب السنه اللى فاتت واللى قبل قبل قبل قبل اللى فاتت - هو العلم حيتغير العلم هو هو .. سواء فى جامعة القاهره او فى الاسكندريه او حتى فى اسيوط او فى اوكسفورد .. العلم واحد ولا ايه ولا احنا حنخترع علم لينا لوحدينا .. ما كانش دا حالنا .. كل الموضوع ان كل كام سنه يمكن تطلع نظريه جديده وممكن يتعمل بيها مذكره وخلاص .. لكن الكتاب الجامعى .. والحكايه اللى عاملينها انهم عاملين بحث فى اخر الكتاب بحبر مختلف عشان يتعرف اللى ما اشتراش الكتاب او على الاقل يخوفوا العيال بيهم ... والكتاب ورق جرنال ردئ من اردأ انواع الورق والملزمه مش عارف بكام يعنى الكتاب كله ما يكلفش .. قول حوالى 10 جنيه ويبيعوه ب40 و50 جنيه ويقول لك ايه الدكتور ( اصل انا مش ببيع الكتاب - انا ببيع خلاصة علمى وفكرى .. مع ان العلم والفكر ده هو هو عند كل الدكاتره فى كل الجامعات وكمان هو باعه مره واتنين وثلاثه يعنى الموضوع بقى ما بقاش حكايه كل يوم حتبيع علمك اللى انت بعته زمان .. المهم شوف بقى الدفعه كام والكليه فيها كام دفعه وطبعا الكل عارف الكليات النظريه اعدادها قد ايه فلوس كتيره متلتله .. وبعدين ما دام العلم واحد ما يطبعوا كتاب واحد

ويفرقوه على كل الجامعات واذا حد عارض الكلام ده ييجى يشكل لجنه من اساتذة العلم الواحد ويعملوا كتاب واحد ويريحونا من الكتاب الجامعى اللى واجعين بيه قلبنا وجيوبنا .. هو كل واحد مش عارف ياخد حقه ييجى علينا احنا .. احنا حنستحمل ايه والا ايه ... لا الكتاب الجامعى وما دام الكتاب الجامعى يبقى الجامعيين بخير والعلم بخير وكل حاجه بخير وبعدين يا اخى لما تشوف اضرابات اساتذة الجامعات عشان تحسين دخل الاستاذ الجامعى تفكر انهم قاعدين بيشحتوا قدام الجوامع .. يعنى هما لما يحسنوا دخل الاستاذ الجامعى حيرحمونا من تابوه الكتاب الجامعى

.. ما علينا

تعالوا بقى نشوف فلوس الجامعات بتيجى منين :

اولا من مصاريف كانت زمان معقوله دى الوقت بلغت 150 و180 جنيه

ثانيا تعالوا بقى نشوف النكته دى : عند ظهور النتيجه قال ايه لازم الطالب يروح يشترى كارت فيه رقم سرى عشان يعرف بيه نتيجة الامتحان من الانترنت .. تعرفوا الكارت طلع فيه ايه .. فــيــل .. طلع فيه رقم الكارنيه - طب ما احنا معانا الكارنيه .

بالاضافه الى ما ذكره الكحيان من اموال بتوع النفط .. يا كحيان يا معيد انا عارف واحد فى السعوديه عملوا له رسالة الماجستيى وبعتوا له صوره عشان يذاكرها - وبعدين جه عشان يناقش اللى هو ذاكره وخد الماجستير وبالسلامه وعارف الثمن كان كام ... هذا بالاضافه الى ساعه كانت فى وقتها سنة 84 ب ثلاثد ألاف جنيه .. هل .. ترم .. طع .. مح .. فرنجل .. يا نهار اسود

انا هنجت

هناك ٤ تعليقات:

محمد فاروق الشاذلى يقول...

الجميع يحاول الاغتراف من بئر المال ولايهتم بأحد آخر، فهكذا أساتذة الجامعات والمحامون والأطباء والمهندسون والمدرسون وحتى السائقون ومن لا مهنة لهم.

والكل يحاول أن ينهل القدر الأكبر من هذا البئر حتى الحكومة بالرسوم والضرائب وخلافه.

Miss. Sosa يقول...

الحمد لله اني مش في كلية نظرية

انا عارفة ان منظومة التعليم خربانه وتفشي الدروس والمتاجرة بالكتاب الجامعي واستغلال الطلبة ماديا منتشر

لكن الحمد لله انا كليتي مش بنشتري ملازم ولا مجبرين نشتري الكتاب لانه مرجع علمي اجنبي هو اينعم تمنه بتاع 60 او 50 جنيه بس ده كتاب 600 صفحة وتمنه علي الامازون 150 دولار يعني احنا في نعيم

وقصة الدروس عندنا ديه شبه منعدمة مش بيستغل الطلبة غير دكاترة الكليات الخارجية ( المنتدبين) لكن دكاترة الكلية عمرها ماحصلت ان حد منهم ادي درس

اما عن المستوي العلمي فده اللي بينهار مع الدكاترة الكبار ولكن الامل فى الدماء الجديدة من الدكاترة حدديثي الحصول علي الدكتوراة

وصدق اللي قال اللي يشوف بلاوي غيره تهون عليه بلوته :))

mahasen saber يقول...

اولا شرفنى واسعدنى زيارة حضرتك لمدونتى جدا
.........
وسعدت اكتر بمدونة حضرتك الغير فشكولهدى القيمه جدا
وهرجع تانى للتعليق على البوست

مـــالك يقول...

السلام عليكم
ازي حضرتك
جميلة المدونة واسمها لذيذ بس هي موش اسم على مسمى هي مش فشكووووله خالص هي بالعكس جميلة جدا
بالنسبة بقى لموضوع الكتاب الجامعي فدي بتختلف من دكتور للتاني في دكاترة بترفض تنزل كتب أصلا وبتصر انها تنزل ورق عشان ميبقاش فيه حرج......وفيه تانيين ربنا يسامحهم بينزلو كتب والله ما بتتفتح أصلا من منظرها
القصه وما فيها ان الدكاترة زي أي هيئة معليهاش رقابه هتعتمد على الضمير واحنا منتوصاش في موضوع الضمير ده.......
عموما انا بقول في الاخر هنكمل لحد ما ربنا يكرمنا ونبقى ناس محترمين في المجتمع وساعتها يارب منعملش زي الباقيين ..
تحياتي ودمت بألف خير