الاثنين، ٢٧ أبريل ٢٠٠٩

يوم ميلاد المدونه

بعد الفاصل
فاصل اليوم من سلسلة موضوع قوم لوط واحكى لكم حكاية فشكول
النهارده يوم 27 ابريل يوم ميلاد مدونة فشكول اصل من سنه كنت قاعد انا والبت سومه المجنونه صاحبة مدونة مجنونه فى بلد عاقل طبعا انتم عارفين ان سومه بنت اختى ... هى كدا بنت هبله ومجنونه ولما بتقعد فى البيت بتبقى ناكشه شعرها زى الجنيه ومبهدله هدومها وهى كمان رسامه وطالبه فى كلية الفنون الجميله والجماعه الرسامين والفنانين دول بيبقى مخهم لاحس شويه ومهابيل وقعدت تفرجنى على مدونتها وبعدين قلت لها يا بت يا سومه اعملى لى واحده وقعدنا بقى نعمل فيها وطبعا انا مش فاهم حاجه خالص والبت يا خويا عماله تكتب فى حاجات وتسألنى عن حاجات وانا ولا انا هنا .. واتفقنا على اننا نسميها فشكول وبعدين كتبت لى العنوان بتاعى وكلمة السر وقعدت تحفظهم لى وانا احفظ ولما جيت البيت وحاولت افتح مش راضيه ولا عارف حاجه وقعدت اعمل تباديل وتوافيق لحد ما فتحتها وكنا طبعا عملنا افتتاح المدونه بكلمتين خايبين كدا , المهم سبت المدونه وما اشتغلتش فيها خالص الا فى شهر اغسطس واول بوست كتبته كان حوار مع الزعيم مصطفى كامل وحاجيبه ليكم فى ميعاده ان شاء الله بس بعد ما اعرفكم ايه حكاية فشكول دى.
زمان زمان ايام ما كنت باشتغل فى السعوديه كنت دائما اشترى جريدة الوفد وكانت العصفوره ايامها عماله تصوصو على اخرها وكان الله يرحمه مصطفى شردى رئيس التحرير. وكان السعوديين ياخدوا منى الوفد عشان يقروها .. طبعا كانت بتبقى فاكهه وعجبه عندهم عشان فيها هجوم على الحكومه ونقد للوزراء وهما ما عندهمش حاجه زى كده وآخر النهار يجيبوا لى الجرنال بتاع الوفد متفشكل خااااااالص وانا احاول اظبطه ما يظبطش ويفضل متفشكل .. ويوم بعد يوم سميته فشكول.
وانا فى السعوديه عملت لنفسى خطه وما رضيتش اقعد هناك اكتر من 3 سنين عشان الغربه ما تاخدنيش زى كل الناس اللى بتقعد كتير وظبطت الخطه وعلى اساس ظروفنا هنا وكان بقى من ضمن الخطه ان احط فلوسى فى شركة السعد للاستثمار والتنميه عند عمنا ابو دقن كبيره قوى اشرف السعد.. (من فضلكوا ما حدش يقول على عبيط) كان التليفزيون والجرايد وكل الدنيا بتقول ( الريان) و (السعد) وانا طبعا صدقت الجرايد لانها قوميه يعنى بتاعة الحكومه يعنى مش ممكن تكذب ولا تقول كلام فاضى يعنى او تتكلم عن نصابين.
قوم ايه ؟ اتفشكلت الشكركات دى واتفشكلت فلوسى واتفشكلت معاها الخطه اللى انا كنت حاططها لنفسى وكمان اتفشكلت السفريه بتاعتى ماهو انا كنت بقى جيت وخلاص واكتشفت ان بلدنا ما ينفعش الواحد يخطط فيها لآى حاجه خالص وان احسن خطه تتعمل هو ان الواحد يسيبها على الله لآن ما فيش ثوابت ولا اصول لآى حاجه .
قوم ايه ؟؟ ظبطت نفسى على مشروع تجارى بالقرشين اللى كانوا حيلتى وفشل المشروع اصل دى مش بلد تعمل فيها مشاريع بفلوس صغيره ... اى مشروع مش ينفع الا لو كان بملايين مش بالآلاف وانا بقى طالعه فى دماغى والناس بيقولوا لى يا حاج ولابس الجلبيه البيضه والطاقيه المخططه بتاعة اخويا شلبى وخدت البمبه التالته واتفشكل المشروع والقرشانات الباقيين ورجعت يا مولاى ما خلقتنى ما حيلتيش ولا مليم الا الدخل الشهرى بقى بتاع الوظيفه اللى ييجوا كدا 200 جنيه ... جيت مسمى نفسى فشكول .. من الفشكله ... اصل كل حاجه بعملها بتتفشكل وكأنى انا اللى بفشكل اى حاجه ومن يومها وانا بين زمايلى واصحابى يقولوا لى يا فشكول من الفشكله اللى حصلت لى فى حياتى.
ولما لقيت نفسى مش فاعل فى المجتمع وما ليش اى لازمه ... ولما لقيت انى بلدى مش عايزانى ومش محتاجانى ولا بتعمل لى حساب ... ولما لقيت صوتى فى الانتخابات زى قلته ... ولما لقيت مش عارف ادخل اولادى اى كليه عسكريه بالرغم من انى احد جنود اكتوبر ... ولما لقيت ناس تانيه غير بتوع اكتوبر هما اللى قاعدين على كرسى الفرح واحنا حتى مش بنتفرج ... يعنى من الأخر انا بقيت صعلوك ما ليش لازمه .. يعنى انا وانت والمعازيم ... يعنى الفرح وصحاب الفرح ... يعنى العريس ... يعنى ابو العريس ... يعنى انا وانت ...يعنى من الآخر انا اونطه وطز ولا كأنى موجود قمت عملت مدونة صعلوك اللى الواد محمود ابنى خطفها منى واشتغل فيها وحتى ما بقيتش طايل صعلوك هو يا دوب فشكول وخلاص.
نفسى بقى حد يسألنى يقول لى يا واد يا فشكول ... نفسك فى ايه وما عملتوووووش
مين اللى سأل؟
انت ؟ طب ياسيدى
نفسى ابقى رئيس جمهوريه ... أى جمهوريه وخلاص ... آهم يقولوا على فخامة الرئيس وخلاص وامشى قدام حرس شرف كدا والناس كلها تخاف منى زى ما تخاف من امنا الغوله وحاعمل فى شعبى عمايل مهببه بهباب.
اولها : مش خاخليه يشوف النوم,,,, وثانيها : مش حاخليه يدوقوا اللحمه خالص عشان انا حاكل اللحمه لوحدى ,,, وثالثا : حادخلهم كله السجون ,,, يعنى حاخلى عيشة شعبى منيله بستين نيله ... اشمعنى أنى يعنى هو انا كخه ... مش كل الريسه بيعملوا كده وانا كمان زيهم.
وعلى فكره ... بما انى رئيس بقى ورئيس مهبب بهباب ما فيش لا تورته ولا جاتوه ولا كاكولا وحتيجوا تعيدوا على وتقولوا لى كل سنه وانت طيب يا فشكول وعقبال 163.5 من عمر مدونة فشكول وتمشوا على طول وحتى مش تشربوا كاكولا ولا حاجه ولا حتى كباية شاى ... مش انا بقى الرئيس ... انا بقى الزعيم ...
اظن بوست خفيف وجميل ومريح

هناك ١٠٧ تعليقات:

ن يقول...

السلام عليكم
أستاذى الفاضل .. فشكول
أتمنى أن أكون حجزت أول تعليق

هانى زينهم يقول...

كل سنة وانت طيب يا عمنا وما نتحرمش من وجودك فى وسطينا ابدا .

ن يقول...

يا سلام اتحققت الامنية بسرعة الحمد لله كنت أول المعلقين فى هذا البوست ..
بالمناسبة الان دخلت لجنة الامتحان ووضعت أول إجابة فين الرقابة إذهب الى اللجنةمن فضلك قبل التفتيش .
أما بالنسبة للأخ فارس عبد الفتاح فأهلا به وليست المرة الاولى التى التقى فيها بالمثقفين فأيامى حافلةبهم وأضف عليهم العلماء والفقهاء وأصحاب الرأى فى مختلف النواحى الاجتماعيةوالعلمية وعموماً المادة التحليلة خبرتى الاساسية وكانت هى الباب الاول للدخول الى مهنة الصحافةوالعمل بها .
الان أقرأ البوست
مع خالص تحياتى سيدى

م/ الحسيني لزومي يقول...

كل سنه وانت طيب ياعمنا
والسنه الجاية تكون فشاكيلك ماليه البلد ومش بعيد تكون صاحب فشكول كومبني ولا اقول ما تيجي نوظف اموال طالما اني فيه ناس طيبين في مصر زيك وبعد ما ضاعت فلوسك ياعمي فشكول بيوظفوا اموالهم...من شهرين وحده ست نصبت علي بلدياتنا الاسايطه ولمت 34 مليون وهي الان في السجن وهما في المستشفي مش احنا شعب عجيب وللا ليك راي تاني شوف رغم الضجه اللي عملتها شركات توظيف الاموال الناس لسه بتحط فلوس .... تجار المخدرات بيقولوا ان مكسبها 50% وبتوع التوظيف بيدوا 150% ...فعلا المصريين اهما حيويه وعزم وقوة.
خلاصة الكلام انا ليا تار بايت عند بنت اختك لانها لم تشرح لك طريقة وضع بنر الحملة الشعبية للقيد بالجداول الانتخابية وبذلك فقدت انا منبر اعلامي مهم وانا صعيدي وما بسبش تاري الا اذا نزلت البنر في شهر نوفمبر القادم لما يفتحوا باب القيد.
ربنا يديك الصحة وطولت العمر .

صبرني يارب يقول...

طيب كل سنه وانت طيب الاول


وبعدين حد فى الدنيا يوم عيد ميلاد مدونته

يعمل فينا العمايل دي برضه ؟؟

ماشي ياعم انا كمان نفسي ابقى رئيس جمهوريه على فكره

بس ساعتها هاعور الشعب ده كله

تحياتي يا فندم

yoyo يقول...

صبحك كسر يا احلى واجمل فشكول فى الدنيا د كلها

كل سنة وانت بالف خير وصحة يارب
ربنا مش يحرمنا من وجودك ابدا ابدا يا عمو صلاح ويارب من نجاح لنجاح كدا

اما موضوع الرياسة دا بقى د الموضوع كبير كبير بقى ههههههههه هى ناقصة هباب و نيلة يا استاذ دا احنا حتى هنكون شعبك الامين يعنىيكون لنا اى استثناءت كدا ولا حاجة

كمان من غير تورتة خلاص خلى التورتة و الساقع مد عندى انا هو انا هاجيب لاغلى واعز منك

كل سنة وانت طيب و مدونتك منور اسرة التدوين كله
وعقبال 1000000000000000000 مليون سنة

تحياتى
يويو

رحلتنا في الحياة يقول...

كل سنة وحضرتك طيب
ولا يهم حضرتك على الفشكله دى كلها
ويعنى هنلاقى رئيس جمهورية احسن من حضرتك فين

♥نبع الغرام♥♪≈ يقول...

السلام عليكم ورحمة الله وبركاته
حبيبى الغالى عمى وتاج راسى العزيز
وحشتنى قوووى والله العظيم
وبجد يارب دايمآ فى تألق كده على طول وعقبال مين سنه يارب
كل ثانية وانت بالف خيرررررررررررر
ياارب السنة الجاية تكوون حققت كل الاماانى الجميلة (k) (k) (k)

دوول تلاته كيك علشاان يكفوا الاعضاااء
كل سنة وانت طيب
هههههههههههههه
تقبل تحياتى
أنوس

ن يقول...

هههههههههه
بوست خفيف الدم بحق وحقيقى
كل سنة وانت طيب يا رجل يا طيب
ولا يهمك انت عندنا أغلى من مال الدنيا ربنا يبارك لك فى ذريتك
أنا عاوزة اتابع مدونة سومة الفنانة لأنى غاوية فن ومن ضمن المواقع التى أعتز بها عندى هو موقع الفنان الدكتور /سعيد بدر المتخصص فى النحت على الاحجار وخصوصاً حجر الجرانيت والبازلت ولأن فنه يعود بنا الى أجدادنا فى الكتابة على الاحجار .
ياريت لومدونتها فنية تكتب لى الرابط
مع خالص تحياتى

♥نبع الغرام♥♪≈ يقول...

وعلى فكره ... بما انى رئيس بقى ورئيس مهبب بهباب ما فيش لا تورته ولا جاتوه ولا كاكولا وحتيجوا تعيدوا على وتقولوا لى كل سنه وانت طيب يا فشكول وعقبال 163.5 من عمر مدونة فشكول وتمشوا على طول وحتى مش تشربوا كاكولا ولا حاجه ولا حتى كباية شاى ... مش انا بقى الرئيس ... انا بقى الزعيم ... اظن بوست خفيف وجميل ومريح
هههههههههههههههه
خلاص الكيك عليا
انا وزعت على المدونين كلهم
وانا اخدت حته صغنونه
هههههههههه
يارب يسعد أيامك يارب
أنوس

د. ياسر عمر عبد الفتاح يقول...

ليه المآسي دي كلها
ليك حقي يا عمنا تبقي فشكول

يا أستاذنا الفشكلة دي سمة أساسية من سمات المجتمع والناس
وإحنا كبروليتاريا ملناش أي حق في أي حتة .. يعني كلنا صعاليك كمان

المهم قبل ما الموضوع يكبر وندخل في سين وسين

ربنا يجعل كل كتاباتك في ميزان حسناتك

عمرو جويلى يقول...

العم فشكول
السلام عليكم
أولاً عمرو بيقول لك كل سنة وأنت طيب ودايماً تعيش وتفشكل بس بلاش والنبى حكاية الرئيس أحسن صاحبك يصدق ويسجنك والتهمة جاهزة قلب نظام الحكم ودى فيها يا عمنا قطع رقبة وإحنا رقبتك غالية عندنا
وكل سنة وأنت بألف خير

احساس نفس هادئه يقول...

كل سنه وانت طيب يا احلى عم فشكوووول
عقبال ماتتصلح وتتظبط كل الفشكله
تقبل مروري وتحيه عطره مني اليك

اسماء واحلام فى وجدانى يقول...

التعليق ده فقط

الحمد لله انى انكتبلى اكون من متابعينك

فى العام الاول

كل سنة ومدونتك بخير وصحة وسلامة

وحضرتك طبعا قبلها

لانها من غيرك ولا حاجة

اسماء واحلام فى وجدانى يقول...

انت كده اجمل واجمل واجمل واجمل واجمل



ايه رايك لو تقوم بانشاء

جمهورية للمدونين وتكون انت رئيسها

اطيب واجمل رئيس جمهورية المدونين

بس انا صاحب الفكرة ليا شرط صغير

وهو انى اكون كاتبك الوحيد

يعنى حضرتك تملينى اوامرك للشعب

وانا اللى ادونها

اهو منها اكون جنبك على طول

ومنها احس بالامان

ومنها ينوبنى حتة لحمة

وادوق النوم لامة حضرتك تنام

نلتقى بعد الفاصل

عاشقة حبيبتى يقول...

الى رئيس جمهورية مصر القادم

خدت بالك من القادم دى كل واحد ونيتة طبعا انت عارف نيتى بس المهم اى حد يسالنى غيرك هقول حبيب الملايين

كل سنة وانت طيب يا استاذى عموما انا اليومين دول مش باكل حلويات احسن كنت جيت وكلت التورتا فى البيت


تقبل تحياتى وهابى بيرث داى

غير معرف يقول...

السلام عليكم و رحمة الله و بركاته

كل سنه و حضرتك و المدونه بخير و بالف صحه وسلامة ..

---

انا جدا مبسوط لانى عرفت قصه فشكول من قبل ما يكون فشكول لكن صدقنى يا عمو ان الحياة ليست سوداويه جدااا و لا بامنبى برضه لكن هى اقرب كده من الحديقه اللى بسور عالي فهما اتمتعت فيها فهيفضل السور دا حاجز عنك شئ بتتطلع له ..


ف الاول و الاخير بيبقى الايمان بالله و التوكل عليه خير من الدينا و ما فيها


كنت اتمنى اكون اول واحد يرد عليك و يهنيك لمدونتك و عامها الاول

اطال الله ف عمرك و بارك فيك

dr.lecter يقول...

انا من حسن حظي اني اتعرفت علي مدونتك ياستاذ صلاح بجد ومعتز بالمعرفه دي وان شالله دايما كده تمتعنا ببوستاتك الرائعه

ahmed_k يقول...

بس بس حاضر يا فخامة الرئيس
كل سنه وأنت طيب
ومدونتك متألقه ومن نجاح لنجاح
وعقبال 2643سنه
ومتزعلش يا أستاذ فشكول
الفشاكيل والحمد لله في البلد كتير أوي
يعني ممكن يطلعلك حد يقولك أنا متفشكل من قبلك
وجايز يطالب بحقوقه في العلامه التجاريه الفشكوليه

خالص تحياتي

اسماء واحلام فى وجدانى يقول...

عم فشكول اشكرك جدا لتواصلك معى

بجد ربنا يخليك لينا كلنا

اللهم امين

يا رب العالمين

marmar يقول...

عمي الجميل
كل سنه وانت طيب والبلوج الجميل ده طيب يارب
وانا لو طلعلي عفريت هقوله خلي عمي فشكول رئيس مصر بكره
عشان تغير حال البلد المنيل ده

”*°•.˜”*°•..سونه..•°*”˜.•°*”˜ يقول...

السلام عليكم .
فعلا رغم طول البوست بش خفيف ومخدش وقت منى وكنت سعبده وانا بقرء بجد

تحياتى ليك ياريس
العلاوه ياريس عيد العمال هههههههههههههه
((سونه)) .
صباحك سكر يا اجمل استاذ شفته فى عالم التدوين .

Soul.o0o.Whisper يقول...

عمو فشكووووووووووووووووول

كل سنة و أنت طيب
و مدونتك طيبة

و ربنا ما يحرمنا منك يارب



و بهذه المناسبة العظيمة

و طبعا لأنك عارف انك عزيز عليا

فأنا طبعا بأقترح كنوع من التجديد
اشمعنا يعنى غيرت فى الالوان
نغير فى الاسم كمان


ايه رأيك نخلى اسم المدونة
جمهورية فشكولستان الاتحادية الاشتراكية الراسمالية ..؟؟؟؟
و طبعا سعادة فخامة رئيس الجمهورية هيكون سعادتك

و طبعااااااااااااااااااااااااااا
أنا هأكون رئيس الوزرا و ولى العرش
صعلوك يروح يشوفله وظيفة تانية
ماااااااااااااااااااشىىىىىىىىىى

و اللحمة ؟؟؟
اممممممممممممممممممممم
خلاص خلاص مش هنختلف
فيفتى فيفتى
خلاص والله مانت راجع فى كلامك

خلاص هاقبل الفيفتى
هههههههههههههههههههههه




بوست روعة روعة روعة
و هاستنى الاسم الجديد
و اعلان ولى العرش
ههههههههههههههههههههه




دمت بكل ود

Unknown يقول...

كل سنة ومدونتك بألف خير وسلامه ودائماً عامرة بالمعلومات القيمة والمفيدة وعلى فكرة عيد ميلاد مدونتي الشهر الجاي وبفكر اعزم كل المدونات اصدقائها يحتفلوا معاها ... وهدية منى ليك هغنلها اغنية عيد الميلاد بالإيطالية

Tanti auguri a te
Tanti auguri a te
Tanti auguri facecool
tanti auguri a te
تحياتي والى الامام

gogo!sf يقول...

سعادة الرئيس فشكول

كل سنه وانت طيب ومدونتك طيبه وعقبال مليون سنه وربع مانت رئيس بقى اومال ايه....

اولا لو انتخبت نفسك لرئاسه الجمهوريه اول وحده مش هنتخبك ايه رأيك بقى عشان احنا مش نقصين بهدله اكتر من كده احب على يدك يا بوى بلاش...!!!


السعد وعد يا عم فشكول
تحياتى وكل سنه وانت طيب


ملحوظه:
اى حد ليه علاقه بيك هضيفه فى مفضلتى

أم البنــــات يقول...

كل سنه وحضرتك طيب وكل الفشاكيل بخير
بس صدقنى من كلامك اكتشفت ان كلنا فاشكيل
وربنا يسترها على عباده

متابعه مع حضرتك موضوع قوم لوط واعتذر عن غيابى عن الجزء الثالث
عندى فشاكيل كتيره برضه لبخانى
ربنا ييسر لنا

استاذ فشكول
فى آيه فى سورة الأعرف كل ما اسمعها ابقى عاوزة اعيط من جمال يقين سيدنا موسى

مش هاكتبها لحضرتك هاقولك على رقمها
اقرأها وياريت كلنا نقرأها
الآيه رقم128
استاذ فشكول

ربنا يسترها معنا من المصايب اللى عماله تهل من الغرب
وعالم التدوين نور بحضرتك والناس اللى
بنتعلم منهم بجد
واحسبك على خير ولا ازكيك على الله

محمد عبدالرحمن شحاته يقول...

كل سنه ولنت طيب يا فشكول
وعقبال 163,5 سنه
يعني اسم فشكول ده له تجارب واصول علميه
يعني حب القراءه والجريده تتفشكل
والمشروعات تتفشكل
والقرشينات تتفشكل
علشان كده قلت فشكول
طيب وانت ما حاولتش تسافر تاني ليه
بس ما تبقاش تقرأ الوفد هناك
لا بس انت المفرود تسترد مدونة صعلوك
كده ابنك مش هيعتمد على نفسه
لازم هو يعمله مدونه
انا كنت زيك ف الاول ما كنتش عارف حاجه ف المدونات والحمد لله برضه لحد الوقتي مش عارف حاجه
بس ليه انت بتقول ان كل الفنانيين ملا حيس ؟؟؟
هم ممكن يكونوا مختلفين شويه لانهم يروا الواقع من وجهة نظر مختلفه
مش اكتر
وكل سنه وانت طيب مره تانيه
وأدام الله عزك يا فشكول
تقبل مروري

momken يقول...

كل سنه وحضرتك طي والمدونه فى منتهى التالق

وكل عام تزداد رونق
وحضرتك تزداد حسنات
نتيجه لما تنقله من علم ومعلومات وفكر للغير

كل عام وحضرتك والمدونه فى منتهى المسئوليه عن الكلمه والفكره

كل عام وانت بخير


تحياتى

اسماء واحلام فى وجدانى يقول...

عدنا

كان فاصل كبير جدا

جيت علشان اقولك صباح الخير

والخير ان شاء الله

كتير كتير

فى جمهوريتك الجديدة

فارس عبدالفتاح يقول...

الاستاذ الفاضل / فشكول المحترم

اود ان اشكرك على هذا الاطرأ الذي ذكرته في مدونة الاستاتذة ( ن )

والثانية :

انا مش قادر امسك نفسي من صورة ابو كرش ده انت جبت الصورة دي منين يروح يستأصل جزء من الامعاء وهو كرشه يخف شوية وبعد كده يعملولو عمليه شد بطن عشان ميدلدلش


اههااههههههههههههههههاها

فارس عبدالفتاح يقول...

عفواً

الميول الليبرالية كما كنت تقول بأنت بانك كنت تشتري جريدة الوفد وانت في السعودية

لكن ابشرك الوفد وغير الوفد كلهم مش متفشكلين بس

دوله مدحولين على الاخر حالتهم بالبلا

لا تعلق آمال عريضه على الاعلام المصري او العربي

واستثني من هذه القاعدة قناة الجزيرة التي اعتقد انها قدر ساقه الله للامة العربية والاسلامية للتصدي للآلة الدعاية الغربية التى بدأ بالتصدي لها الزعيم في اذاعة صوت العرب سابقاً

مع خالص التحية والتقدير

محمد الجرايحى يقول...

أستاذنا وعمنا الجميل : فشكووول
السلام عليكم ورحمة الله وبركاته
قرأت عنوان فى إحدى المدونات عن البوست الجديد وعرفت منه أنك تحتفل بعيد ميلاد مدونتك جئت مهنئاً ولكن وجدتك فشكلت الاحتفال ......
أخى قرأت كلماتك ..صحيح هى تثير البسمة ولكن إذا تعمقت فى الكلام وجدته يثير الشفقة والحسرة ..

فى وسط الكلام .. تحليل لما آلت إليه الأحوال قرأته وحزنت .. خسارة يامصر.

وبعدين أنت عايز تمسك رئيس جمهورية هى البلد ناقصة فشكلة ..........!!!!!!@

♥نبع الغرام♥♪≈ يقول...

عمى وحبيبى الغالى
معلهش مين فينا مش بيمر بظروف صعبه بحياته
هو أكيد الفرح جميل وأنا الحمد لله حاليآ بعيش حالة حب جامده قوووى
من إنسان جميل وبيحبنى وإن شاء الله قريب قوووى
دعواتك لنا حبيبى الغالى
بس أنا أتشهرت وتعرفت بمدونة الأحزان والكل حبنى عن طريقه
معلهش مش هقدر أغيرها
بس وعد منى إن الوستات تبقا كده وكده
لان الحزن موجود دايمآ ولاذم زى ما نتكلم عن الفرح نتكلم عن الحزن
مش معقوله ياحبيبى نفرح وناس كتيره قوووى محرومه من الفرحه دى
لاذم ما نكنش انانين
وده مش طبعى لاذم أحس بالغير
لاذم أعبر عن هموم الأخرين
أكيد أنت فهمتنى محتاجه رد عندى
لكلامى ده صح ولا غلط
منتظراك ياعمو
أنوس

kochia يقول...

ايوة هو بوست خفيف ومريح
كل سنة وانت طيب ان شاء الله
والمدونة كمان بخير

تحياتي

mohamed ghalia يقول...

كل سنة ومدونتك بخير ياعم فشكول
وبالتوفيق دايما

اسماء واحلام فى وجدانى يقول...

ساعات القلب لامة بيكون فرحان

مش بيقدر يعبر عن اللى جواه ولو استطاع ان يعبر يظن بعض الناس انه كلام ليس اكثر
وفرحتى الان لوجودك عندى بثلاثة تعليقات مرة واحدة ولكن سعادتى اكثر واكثر بالتعليق الاول حضرتك متعرفش اد ايه انا فرحان لتلبية رغبة تمنيتها من كل من ياتى عندى ومهما تقدمت لك بكلمات الشكر والامتنان والله لن تصل كلماتى الى ما اشعر به الان

اسماء واحلام فى وجدانى يقول...

اما بخصوص التعليق الثانى

كل راعى مسئول عن رعيته فنحن يا سيدى الفاضل لا نملك الا اللجوء الى الله
سبحانه وتعالى فهو من خلقنا وهو احن علينا من عباده

اسماء واحلام فى وجدانى يقول...

اما بخصوص التعليق الثالث

فالسمع والطاعة لك يا مولاى ويا سيدى الرئيس
رئيس جمهورية المدونين

ولكن حضرتك لم تذكر لى ما هى فروض الطاعة حتى اقدمها لك وما هو السبت الذى تقصده حتى اجد الاحد
فانا مواطن يقدم لك قلمه ومشاعره واحساسه وكل جوارحه من اجل الوطن الجديد

ومن اجلك ايضا فانتى من الان

الراعى المسئول عن كل الموجودين هنا

وان كنت اطمع فى طلب وهو ضم


عاشقة الاحزان


اختى وابنتك الحبيبة الى ديوانك

ستيتة يقول...

كل سنه وانت طيب يا فشكول يا طيب
ومعلش بومبة السعد على بوبمة المشروع على بومبة انك تبقى ريس
مع انك والنعمة ها تبقى ريس كويس

بس كفاية المدونة تفضفض فيها من غير ذنوب
بدل الكراسي اللي تخلي القلب يدوب
والواحد يدخل جهنم يا دوب

تحياتي

اسماء واحلام فى وجدانى يقول...

انا لسة فرحان بالتعليق الاول

قلت افرحك معايا

بجد انا عايز اشكرك تانى

اسماء واحلام فى وجدانى يقول...

وتالت

اسماء واحلام فى وجدانى يقول...

ورابع

اسماء واحلام فى وجدانى يقول...

وخامس

اسماء واحلام فى وجدانى يقول...

وسادس

على عبدالله يقول...

السلام عليكم

استاذ فشكول
حياك الله
اش لونك
شو علومك
شو بتسوى

فخامة رئيس الجمهورية
كل سنة وانت فشكول على طول
وعقبال 1000000 سنة

ودا تكليف مش تشريف ولا فخفخة او ملك وجاه
حمل تقيل وهموم جيل جى واجيال جيا وراه
وعشان كدا احنا كرهنا
وكرهنا وكرهنا
من غير ليه او لا وأاااااااه
:)))))
هههههههههههههه

كل سنة وانت مدون يا استاذ ابوزيد !
على فكرة ابوزيد ، قصدى الاسم يعنى مرتبط عندى بالمحاسبين على طول
كنا بنروح نتمرن محاسبة عند احمد ابوزيد " محاسب قانونى "
واشتغلت فى شركة رئيس حساباتها اسمه احمد ابو زيد
والاستاذ فشكول المحاسب اسمه احمد ابوزيد
مش كدا ولا ايه ؟!
صدف صدف عجيبة !!!

وبعدين يا استاذنا انا اعرف ان المنايفة بتوع واجب زى الصعايدة " كرما يعنى "
مفيش حتى كباية شاى ، ولو حتة من غير سكر

يلا ما علينا


انت عارف يا استاذ فشكول انا لاحظت حاجة مهمة قوى
فى دول الخليج والدول العربية عامة مافيهاش حرية شتيمة " نقد " فى الحاكم غير فى مصر .. ودى ميزة ممكن تحسبلك كرئيس جمهورية :)
اى نعم انت مالى السجون بالابرياء واصحاب اللحى ،عشان بس اصحاب لحى
وسايب ولاد ستين ال... مليين البلد ،ينهبوا فى ميتين اهالينا وياخدوا فلوسنا ويروحوا يصرفوها على اصحاب الرايات الحمر !! ويصرفوا فى حفلة مثلا 55000000 جنيه
لكن مش مشكلة
اى نعم انت مخلينا عايشين بدراعنا فى الخارج لانك مش عاملنا قيمة زى مخاليق ربنا
لكن مش مشكلة
اى نعم انت خليت البغايا سيدات معظمات
لكن مش مشكلة
........... وعجبى


تحياتنا
وتقديراتنا
كل سنة وانت طيب

وحي القلم يقول...

كل سنة والمدونة بخير
ان شاء تشوف ولادها
وعقبال 100000000000000000000000000 سنة
تحياتي

assafo anaroze يقول...

فشكول حبيبي قلبي
ايه انا الايام ديه بتأخر عن حبيايبي بس مش بخاطري
اتمنى انك ما تزعلش
ايه بقا المناصب اتفرقت و انا في دار غفلون امال نصيبي حيبقى ايه
انا لو قريب منك يعني و انت بتصدق في حبك لي مش حتنازل ابدا عن اني اكون نائب رئيس الجمهورية
انا لن اتنازل ابدا بقولك من دلوقتي
اوكي ههههههههههه
***********
الف مبروك يا عم صلاح على مرور سنة تدوينية من عمر المدونة بافراحها و اتراحها و يا رب يطول لنا في عمرك و يسعدك يا رب
مودتي

dr_samarmar يقول...

ألف كل سنة و فشكول طيب و بكل خير
و عقبال 1298.89 سنة :D

كل سنة و حضرتك طيب يا أستاذنا

و يارب مايحصلش فشكلات تانية ف حياتك :)

Unknown يقول...

كل سنة والمدونة طيبة وبخير و ما تفشكلش زي مشاريعك المتفشكلة ياعم فشكوووووووول

dodo يقول...

السلام عليكم
كل سنه وانت طيب ياعم فشكول
قصدى ياسيادة الريس
يعنى لما تبقى ريس ونقول هايبقى فى تغير يبقى دى النيه ربنا يسترهههههههههههههه

ن يقول...

السلام عليكم
الاستاذ.. الفاضل فشكول
أشكرك على هذه المتابعة والحمد لله اننى عديت درجة النجاح أدعيلى بالاجتهاد يدوب بس 9,50 من 10 بلاش أكون طماعة
من حق الاستاذ فارس عبد الفتاح كمدون تلاقى معى فى الحوار أن يتجول معى فى المنهج الذى أسلكه وأنا أقود وجهة نظرى بالمدونة وأدافع عنها وإن كنت واثقة من وجهات نظرى فهذا لا يجعلنى متعنتة بالرأى من حقه مادمت قبلت الحوار معه وقلت له أننى أحاول أن أفكر بعقل مستقل وأحلل الامور بوجهات نظرى بعدما أقوم بدراسة سابقة لنظريات ووجهات نظر الاخرين ومتابعة للجديد .ومادمت قد تحملت مسؤلية طرح وجهات النظر هذه فكان على أن أكون على قدر المسؤلية وأنا معه ومعكم الى النهاية .
قد تكون أسئلة الاخ فارس عبد الفتاح بها كثير من المصطلحات التى لا يستخدمها الا غالبية المثقفين ولكنى سأوضح معنى كل مصطلح ليسهل التعامل معه وفهمه فلسنا كأسرة تدوين نقل ثقافة عمن يتعاملون مع هذه المصطلحات وبالتالى سيدى يمكنك أن تشرح للمدونين بعض هذه المصطلحات بأسلوبك الذى يدل على أنك مع كل من حولك بمختلف أفكارهم وثقافتهم ولكى نخدم أهداف التدوين فنحن دائماً نلتقى بالمعرفة لا بالتعارف فقط .
سيدى ..
هى ليست المرة الاولى التى أتعرض فيها لمثل هذه الحوارات وتأكد بأن خبرتى مصقولة بالصبر والتأنى وهى ايضا ليست المرة الاولى التى يتشابك فيها السيفان أمام وجهى بحجة اتهامات كثيرة يطويها الغموض ولكنى عبر هذه المدونة حاولت أن أبسط ما طرحه الاخرون من نظريات وجعلوها فى اطار مصطلحات صعب على الناس فهمها والتعامل معها فقام دون وعى الى التحلى بها لأنها فى نظرهم قد ترقى بهم ولم يدركوا بأن هذه الثورات الفكرية قامت وبها حس خفى لزعزعة العقيدة وذلك عن اختلاط المفاهيم فلا يستطيع الناس التفرقة ما بين الحقيقى من الامور والغير حقيقى ولوكان الاستاذ فارس عبد الفتاح قرأ مدونة نون من بدايتها ربما اكتشف ذلك ولكن لا بأس ما طرحه من الاسئلة هام وهام جداً ويستحق المتابعة من أجلنا جميعاً.
مع خالص تحياتى

عالم حبيب يقول...

كل فشكول وحضرتك طيب

حضرتك نورت عالم التدوين

التدوينة دي بالرغم من انها المفروض احتفال بعام على المدونة الجميلة دي .. لكن بجد أثرت فيا جدا

يعني انت لخصت الملخص اللي كان محتاج يتلخص .. وربنا يصلح بلدنا

ادعيلي كمان الغربة ما تاخدنييييييش

dodda يقول...

مش حقولك حاجه
وزعلانه منك ومخصماك
وكمان مش حنتخيك رئيس
:0(

Unknown يقول...

السلام عليكم
بصراحة غلط حضرتك انك رجعت
انا غالبا ان شاء الله مستني موضوع كده
و ههج من البلد دي و ابقي .... لو رجعتلها
و مليون مبروك علي عيد ميلاد المدونة
حضرتك المفروض كنت توجه نداء
اييييييه شعبي الحبيب الصبور المهاود
حضرتك تتفرج علي تخاريف و الزعيم
و اتعلم منهم :D
و متنسانيش في كرسي وزارة محترم كده

صفــــاء يقول...

يعنى مبقاش ليك سنه وحدة فى التدوين وقوام سرقت الرئاسه وقوام عملت علينا دكتاتور
وقطعت عنا الجاتوة والكولا
ويعنى عشان ملقتش حظك فى البلد كل السنين دى جاى علينا احنا يا غلابه وعاوز تعذبنا وتقطع عننا اللحمه
انت شايف يعنى من كتر اللحمه

كل سنه وانت طيب وكل سنه وفشكول طيبه

Soul.o0o.Whisper يقول...

إيه دا؟؟؟ ايه دا؟؟؟ ايه دا؟؟؟

فين الحقوق الفكرية
و الفشكولستانية
الديموقراطية
الديكتاتورية
الرأسمالية
الاشتراكية
الاتحادية
البلوجرية
...ـية
....ـية



لالالالالالا
لالالالالالالا



و فين اعلان ولى العرش



لالالالالالا
لالالالالا



ماكنش العشم ابداااااااااااا

عاااااااااااااااااااااااااا

*البت المشمشية *حلوة بس شقية * يقول...

انا جاية بس اقول وكل سنة ومدونة حضرتك بخير ويارب مايحرمنا من بوستاتك الجامدة دى
سلام بقه عشان المذاكرة ادعيلى

نادية العسري يقول...

عزيزي فشكوول
كل سنة وانت ومدونتك بألف خير
أسعدتني زيارتك كثيرا
جميلة النهاية التي اخترتها ولكن ماانتبهت ان الصياد عندو عيال يمكن يتم هذا الزواج اذا كان هذا الصياد أرمل أو مطلق أو يبحث عن زوجة ثانية ولاأظن يفكر في زوجة ثانية لان وضعو لا يسمح
تحياتي ومودتي

MaNoOoSh يقول...

كل سنة وانت والمدونة طيبين وتنزلنا فيها مواضيع مفيدة دايما
ومعلش مفيش حد فى البلد دى مخدش بمب
كلنا خدنا والله ولسة ياما هناخد

Unknown يقول...

السلام عليكم ورحمه الله وبركاته
بقي لك زمان ماشرفتنيش...
أتاريك بقيت رئيس جمهوريه!!!
أيه رأيك ...
عندنا فكره عن جمهوريه أفلاطون ..
ما تكتب لنا شويه عن .....
( جمهوريه فشكول )

تامر علي يقول...

ياه ... دا مش أنا بس اللي بحول الذهب تراب :) في ناس تانية كده :)

عموماً يا استاذنا أنا اكتشفت في نهاية المطاف إن الرضا وعدم التكالب على الدنيا كفاية ... وكمان نقد الفساد وفضحه وعدم السكوت عليه وعدم تفويت فرصة الا كشف فساده ...كفايه برضه :)

تحياتي

اقصوصه يقول...

هههههههههههههههه

والله يابابا فشكول

طلع سجلك حافل بالمغامرات

الحياه دايما تحمل لنا مفاجات

مرات حلوه ومرات مره

المهم انك قدرت الحمدلله

تربي عيالك وتكبرهم

وتوصلهم الى بر الامان :)

كل سنه وانت ومدونتك بالف خير

بلاش فضايح يقول...

كل سنة والمدونة وحضرتك بكل الخير يارب

وفاء بركات يقول...

السلام عليكم أ.فشكووووووول
كل سنه والمدونه وصاحب المدونه وحبايب صاحب المدونه وأقارب صاحب المدونه وجيران صاحب المدونه وزمايل صاحب المدونه بخير... وجر ناعم علشان حيبقي رئيس جمهوريه وحيستولي علي اللحمه وحيعكش شعبه طب والنبي مسكني وزارة التموين وحندفنه سواقصدى العضم المتبقي من الهبر .
وبعدين ماهو أني بردك عملت مشروع
وفشل وخاد القرشنات اللي طلعولي من المعاش واللي محوشاهم والدهب بتاعي وفشل من غير لاسعد ولا ريان
يعني برضه فشكلت الفشاكيل ويجعله عامر ..
حطه امل جامد أوى علي توليك رياشة
الجمهوريه أهوالواحد ياخد رياشه يشويها علي الفحم ومتنساش السلطات
السلطه التشريعيه والسلطه التنفذيه
والسلطه القضائيه والسلطه الرابعه
بس هي جمهوريتك حتبقي قبلي ولا بحرى باين عليك حتغرقنا
كفايه كده تصبح علي خير

قلم رصاص يقول...

كل سنة وحضرتك والمدونة بخير يا أستاذنا الجمييييييييييل

ربنا ميحرمناش من أمثالك والله يا عمو صلاح


اتمنى لك التوفيق من كل قلبي

وعقبال مليون سنة للمدونة

لأنها ستظل تنتقل بين الاجيال ، فمدونتك أصبحت ملكا للشعب ههههههههه

في حفظ الله

Soul.o0o.Whisper يقول...

عمو فشكووول

يا هلا برئيس جمهورية فشكولستان العظمى
اللى انا وليه العهد فيها و رئيسة وزرائها
هههههههههههههههه


اسمعى يا بت يا دكتوره انت*
نحم يا سيادة اللئيس
هههههههههههه

انت عايزه حتة لحمه وكمان عايزه تبقى رئيس وزاره*
لا انا حضرتك سعادتك باقولك فيفتى فيفتى
هههههههههههههههههه


ما عنديش مانع *
يااااااااه
كنت عارفة ان حضرتك سعادتك فخامتك مش هترضى تكسفنى


يعنى كدا حقنتين فيتامين فى العضل وكمان شوية بلابيع يخلى صحة الواحد
زى الجمل ماذا والا ما فيش لا رئيس وزارى ولا حتى وكيل وزاره *

أكيد أكيد طبعا
مدام هأبقى رئيس الوزرا وولى العهد

خلاص هاجيب لسعادتك المصنع كله عندك
و لا يهمك


ازيك يا سوول
وحشتينى*

أنت كمان يا عمو فشكول
طولت الغيبة علينا

مش تغيب تانى بئا




دمت بكل ود

احلام جوليا يقول...

الاستاذ فشكول بجد مدونتك رائعة والبوست ده دمه خفيف قوي وكل سنة وحضرتك طيب وعقبال مليون سنة يارب ولو اني مظنش ان الفشكلة حتتغير في بلادنا ولو بعد مليون سنة .
ويا استاذي رجاء بس انا عارفة انك انشغلت عننا بعيد الميلاد والاحتفالات بس ياريت تشرح لي الي مفهمتوش في استفساري عن قوم لوط وكيف دمرت القرية ومتكنش زعلت من عدم فهمي واسألتي وتجاوبني لما تلاقي نفسك فاضي وعندك وقت ومبروك عليك الشكل الجديد ولو انه صعب الكتابة على الاخضر وكل عام والفشكلة دايمة وياريت تصرف نظر عن حكاية رئيس الجمهورية دي وكفاية خسرت حاجات كتير في الدنيا بقي متفشكلش الاخرة كمان وكل عام وانت طيب.

همس الاحباب يقول...

كل سنة وحضرتك طيب
وعقبال مليون سنة تدوين
ودايما منورنا كده
وبلاش الفشكلة يا عم فشكول
واطلع بالتورتة والكاكولا

ههههههه
تحياتى

اوراق قديمة يقول...

كل سنة وانت طيب يا استاذنا
قصدى يا رئيس جمهورية البلوجات
بس الغريب ان شعبك اللى هو احنا بنحبك ومش بيخاف منك
وكمان متوقعين تاكلنا لحمة وفراخ بس مش من الجمعية
استاذنا رغم كل الفشكلة اللى حصلتلك اكيد عملت حاجة جميلة من غير فشكلة انك ربيت ولادك كويس وحبيتهم اوى ودى احسن من حاجات كتير
اتمنى اشوف محمد ابنى زى صعلوك
ام محمد

سمكه واحده يقول...

اولا اذيك يا عم فشكول اخبارك ايه
ثانيا بقي
الفرح واصحاب الفرح والعريس والعروسه وابو العريس وانا وانت ورقصني ياجدع

ثالثا بقي انت نسيت حاجه تانانيه انك تمنعهم من دخول الحمام ده بقي منتهي العذاب للشعب اللي يستاهل كل اللي يجراله
انا كمان بقول لصحابي لما ابقي مش رئيسه جمهوريه ولا حاجه
رزيره الماليه شوفت انا متوضعه ازاي مش زي حضرتك
بس متقلقش حسبلك اللحمه
وايه رايك بقي في عم الاستاذ المحترم الراجل اوي جوز الاموره هايفه
لو سالتك انت مصري هتقولي ايه؟
هتقولي مصري ابن مصري الله يخربيت ابو اللي جابه
اسكت اصلي مفقوعه
لا المصري معروف بقوته وجبروته بس خساره محمد هنيدي مقلش معروف بنخوته وغيرته علي اهل بيته
سلام بقي يا عم فشكول وكل سنه ومدونتك اللي زي العسل موجوده وبينا وانت كمان زي الفل
انا وزيره وانت رئيس وهتبقي هيصه

جنّي يقول...

السلام عليكم

سنة حلوة يا جمييييل ..

ماشي يا عم فشكول وربنا يلم فشكلتك وما تبقاش مفشكل ولا فشكولاية واحدة ..
ويارب اشوفك زعيم قد الدنيا واسلفك اسمي سعيد ونشوفلك حد اسمه ظاظا يسلفك ظاظا وتبقي سعيد ظاظا الرئيس المفشكل ..

بس اسماء المدونات اللي عندك في المفشكلة قصدي المفضلة لا تحوي جني ومش عارف ليه ؟ ها اشتكيك لسومة .. وبعدين رجلك خفت قوي من عندي مش عارف ليه .. طيب انا كنت مريض ولا سألتش وبعدين روحت المدينة وبزورك ومش مقاطعك .. ليه تقاطعيني وانت نور عيني ييييه قصدى تلاوعيني ييييه قصدي تقاطعني .. يييه فشكلتنا يا عم فشكول ..

انا ها اشرب شاي علشان مقاطع الكاكولا .. الله يقطع اصحابها ..

بالنسبة لدقن اشرف السعد الكبيرة قوي ..

فقد كان للنبي صلى الله عليه وسلم لحية طويلة أيضا .. وكان لأبو جهل دقن طويلة أيضا .. ولكن لحية في الجنة .. ودقن في النار ..
العيب ليس في اللحية ولكنه في سلوك الحكومة الغير رشيدة وسلوك السعد والريان وان كنت ارى الوزر الاكبر للحكومة ..

اظن تعليق خفيف وجميل ومريح..

سلام

عمرو جويلى يقول...

العم فشكوووول
السلام عليكم
إيه أخبار الرئاسة معاك
لو تعبت منها أمسك أنا بدلا منك وساعتها
هقبض على شلة الحرامية وأودعهم فى أسفل سافلين وأعين 300 وزير و5000 محافظ وألغى الدعم عشان الناس الغلابة اللى زى حلتنا كفاية عليهم يشربوا وبلاش يكلوا وهذا هو برنامجى الإنتخابى
وكل سنة والمدونة وصاحب المدونة بألف خير

ghorBty يقول...

السلام عليكم

سيدي الرئيس .. كل سنه والمدونه بخير وعطاء وتقدم ان شاء الله

:

مجداوية يقول...

السلام عليكم استاذنا

لا وكمان ننشتم ولا ننظق
:)
:)
الله يسامحك أستاذنا مكنش العشم

والجماعه الرسامين والفنانين دول بيبقى مخهم لاحس شويه ومهابيل


كده برضه

:)

وبعدين معلش بقى سومة دي أعقل مجنونة شفتها كلامها يتوزن بميزان الدهب بس اظاهر أزمة الثقة دي متفشية عندكم

حضرتك الدنيا مش مقياس لكن المقياس الفكر وطريقة اختيار الآخرة

لو حضرتك عامل خطة مستقبلية ناجحة انك تكون بعد عمر طويل في الجنة تبقى فشكلة الدنيا ولا بها أى تأثير سلبي بالعكس الفشكلة دي بتبقى اختبار لمدى ايمانك والواضح ان ايمانك بالله كبير لكن الثقة في النفس محتاجة ظبط زوايا

:)

كل عام وانت بخير ولو عرفت قيمة الفشكلة دي في حياتك كنت تشكر ربنا عليها لأنك متعرفش الفلوس الكتيرة كانت غيرت فيك ايه
وكل أمر المسلم خير

وعقبال 199,3 سنة وانت طيب

رغم ان الواحد اتهزأ واتشتم

مهابيل !!!!

الله يسامحك

:)
:)

عاشقه الرومانسيه يقول...

كل لحظه وانت بخير يافشكولى العزيز

بس قولى ايه الانتقام ده؟
طيب خليك انت احسن من غيرك وروش شعبك
حتى الناس تدعى لك على الاقل
واشمعنى بقى 163.5؟؟؟؟؟؟؟؟؟

اسماء واحلام فى وجدانى يقول...

انا جيت اطمن مفيش فرمان جديد

ااقوم بكتابته

طب اى حاجة على الماشى

شكوة ،،،،،، عريضة

استفسار ،،،،،، تظلم

اى حاجة

طيب على العموم انا فى البيت

لو احتاجتنى غمض عينك

على طول هتسود الدنيا فى عينى

اعرف انك عايزنى

لان عيونك اصبح هى رؤيتى للحياة

بشكلها الجديد

كاتبك الامين

احمد

محمد عبدالرحمن شحاته يقول...

استاذ فشكول
لتاني مره كل سنه وانت طيب
ده مش عيد مدونتك بس
عيد مدونتك هو عيد كل المدونات والمدونيين

فشكووول يقول...

الحمد لله رب العالمين تم الرد على جميع من علقوا وكدا افضى بقى واروح اتجول جولات حره
وتحياتى لكل من علق هنا

عمرو جويلى يقول...

العم فشكول
السلام عليكم
أشكرك على تعيينى نائبا للرئيس أما عن الرشوة قسأضعها لك فى حسابك بسويسرا
وأرجو منك أن ترسل لى رقم الحساب ولما أمسك نائب رئيس
هخلعك من الحكم وأدبر لم مؤامرة إغتيال لكى أكون أنا الرئيس

ياسر شمس الدين يقول...

اول زياره ليا ولقيت كوكاكولا وتورته وعيد ميلاد كل سنه وانت طيب

اوراق قديمة يقول...

استاذى فشكول
خالص شكرى وتحياتى لزيارتك مدونتى المتواضعة
ولكن حبيت اوضحلك نقطة بسيطة
ان انا اسمى ام محمد لان محمد فعلا هو اكبر ابنائى ولذلك ماعدتش بحب اسمى الحقيقى قد اسم ام محمد وهو صبى جميل وباعتبرة صديقى واتمنى اشوفة شاب جميل زى صعلوك
تقبل احترامى ومودتى
ام محمد

Unknown يقول...

السلام عليكم ورحمة
الله تعالى وبركاته
هااااااااابى برث
دايى تو يور بلوج
مستر فاشكوووووووول
دا احنا نشكر سومة
فى بلد مجنونة اللى عرفتك
المدونات وبالتالى عرفناك
بقى انت يا معلمى عايز تعمل
فيها رجل اعمال :)قلتلى بقى:)
عليه العوض ومنه العوض
انت كنت جبت الجرشنات
شيلتهم لك عندى :)
فى الحفظ والصون
والعفاف كمان
لكن اهى
قسم ونصيب
المهم :رضى ربك .
كل كل كل كل كل (كفاية كلكلو كده)
سنة وانت بالف خير وصحة وعواافىىىى.

(صندوق الدنيا) يقول...

السلام عليكم ورحمة الله وبركاته
مبارك مرور عام على التدوين
وجميل أن عرفنا كيف بدأت المدونة

♥نبع الغرام♥♪≈ يقول...

السلام عليكم
انا جايا اطمن عليك
ياريت متتأخرش علينا كتير ماشى ياحبيبى
منتظراك ان شاء الله معآ
تحياتى
إيناس

Tamer Nabil Moussa يقول...

السلام عليكم

كل سنة وانت طيب وبخير ياعم فشكول

والمدونة منورة بوجودك ديما


وبعدين ولايهمك كلنا فشكلة بس تختلف الاحداث حسب الظروف وهى ماشية والحمد الله

تحياتى

اسماء واحلام فى وجدانى يقول...

انا جاى النهاردة وزعلان منك

سمعت ان حضرتك رشحت اللؤلؤة

لمنصب النائب

شكلك وزعت المناصب وسبتنى نايم فى الدرة

مش عايز مناصب

خلينى جنبك

على فكرة دى اسم اغنية لعمر و دياب

بس انا النهاردة مش جاى اغنى

انا جاى اطالب بمنصب اقدر اساعد

بيه حبايبى المدونين

واطلب فى نهاية التعليق

اغنية

نفسى

aidy يقول...

هو فعلا بوست جميل اووووووى ودمه خفيف

كل سنة والمدونة طيبة وحضرتك طيب كمان

وان شاء الله تقعد ميتين سنة مش 165.5 بس

لأنها فعلا من اجمل المدونات اللى بدخلها

الازهرى يقول...

فشكووووووووووول
وانت كمان واحشنى من بعد ما سيبتك باربع دقايق
صدقنى
ولك عندى مفاجأة

الازهرى يقول...

ومبروك على المناسبة الجميلة دى
لكن مش كنت تقول وانا معاك كنت عزمتك على كوبايتين ميه بالمناسبة الحلوة دى

وعموما يا سيدى الف الف الف مبرك وعقبال كده 1268 سنة يا رب

فاكر انت 1268 دى

kalamfady يقول...

انا انصحك بجمهوريه تانيه غير مصر عشان احنا اتعمل فينا اللى انت كنت عاوز تعمله

وفاء بركات يقول...

انا مصحصحه لحضرتك قوى أصل لما بدخل مدونتك بدبها هوبر ومخمخ بوكوباية شاى في الففتين . فين التعليقات اللي رديت عليها دى احنا هنزوزغ ولا آيه
لأ مش علشان حتولي منصب وزيرة التموين في جمهورية سعادتكم حسكت أبداااااالامموكن
أن أتنازل عن حقي .

اسماء واحلام فى وجدانى يقول...

عمى العزيز

فشكووووووووووووووووووووول

ايه رايك فى المقدمة

انا النهاردة حجزت لحضرتك فى قلبى قصر كبير من قصور الفور سيزون وعلى رايى الاسكندرانيا قصر على القمة ومش قمة واحدة ده واخد اربع قمم
تبوص شمال تشوف اسرارى

تبوص جنوب تشوف احلامى

تبوص شرق تشوف وجدانى

تبوص غرب تشوف شريانى

اللى حضرتك بتجرى جواها 24 ساعة

وعلى فكرة القصر ده تميلك وهيكون حقيقة باذن الله فى الاخرة لانى بحبك فى الله

المهم القصر ده عربون محبة يعنى مالهوش دعوة لا بسبت ولا بحد

انا سالت اللؤلؤة وهو راسانى على
الدور كله

ودى البداية حضرتك ايه رايك بقى

micheal يقول...

كل سنة أنت ومدونتك طيبيين
تحياتي

حماده زيدان يقول...

عمنا فشكول
كل سنةوانت طيب وعقبال ما اشوفك يارب رئيس جمهورية المدّونات إيه رأى حضرتك في كدة بس بليز خليلي حتة لحمة

ـــــــــــــــــــــــــــــــــ

جروب جريدة الصباح العربي أول جريدة عربية تهتم بكل ما يخص المدونات والمدونين
http://www.facebook.com/group.php?gid=78080770039

اسماء واحلام فى وجدانى يقول...

البذرة لا تسكن الا الارض

الطير لا يشعر بنفسه الا فى السماء

السمك موطنه فى المياه

والقطط لا تسكن الا مدونتى

وخد بالك انا هابعتلك قططتين للحراسة

بودى جارد يعنى عايز تروح هنا تروح

هنا المكان يكون متامن كويس

المهم يعنى خلاصة الكلام ده كله

*******

انا جاى علشان اقولك حاجة بسيطة جدا

ان الكلام عندما يخرج من القلب

لن يستقر الا داخل قلب

وهذا ما جعلتنى اشعر به اثناء

وجودك الطيب بمدونتى المتواضعة لقدرك

عند الشعب الموجود ده كله

كاتبك الامين

احمد

ريمان يقول...

السلاااااااااااام عليكم

ازيك يا جميل
يا احلى فشكول فى مصر


لا لا احلى فشكول فى قاره افريقيا واوربا واسيا كمان

انا جيت اهو ورجعت لمدونتى

وبجد شكرا جدا على سؤالك عنى

ربنا ما يحرمنى منكم ابدا ابدا

وكل سنه ومدونتك اللى زى العسل دى بخيييييييييير وطيبه ومتفشكله

ههههههههههههههه


ويا رب تفضل معانا على طول على طول

وما نتحرم ابدا من حضرتك يا رب

صدى الصمت - عاشقة الورد - يقول...

كل سنة وحضرتك طيب وبخير وصحة وسلام
تشرفت بزيارة مدونتك
تقبل مرورى وتحياتى


عاشقة الورد

assafo anaroze يقول...

صلاح
سامحني
كنت فاتح الايميل بس مكنتش جالس على الكمبيوتر
اتمنى متزعلش
مودتي

Darsh Basha يقول...

كل سنة زانت طيب يافشكووووووووول
وعقبال ما يبقى عند المدونة 1000000000 سنة مع انها كدة هتعجز بس

يارب تبقى موجودة على طول

mahasen saber يقول...

ايه ده هو انا لسه مهنتش نفسى بعيد ميلاد مدونة عمى الغالى
يعنى مدونتى

كل سنه تدوينييه والمدونه واحنا وحضرتك بالف خير
وبقول احنا لانننا المستمتعيين والمستفيدين بوجود المدونه وصاحبها الوقور الغالى ما بينا

ربنا يبارك فى عمر حضرتك وتملاها مواضيع راقيه وجميله ومفيده زى مخ صاحبها الغالى علينا كلنا

انا بحبك يا عمى الغالى فى الله وحسيت انى نفسى ااقول لحضرتك كده لانها خارجه من قلبى بجد

اعشق فى الليل ضوء القمر يقول...

كل عام وانت فى طاعة و عقبال 200 سنة قادمة مع مدونتك ودمت انت و فشكلاتك التى تنير لنا العقول
انا اسف على التأخير
لكن مبارك

وعلى فكرة يصاب المرء بقدر إيمانه
سبحان الله
نفس ظروفك ظروف أبى
لكنكم ربحتم وجودنا انا العاشق و صعلوك
وكلانا ابنائكم
تقبل تحياتى

فارس عبدالفتاح يقول...

استأذنا وأخي الفاضل / فشكول

لك كل التقدير والاحترام على المتابعة والتشجيع لي وللأخت الفاضلة ( ن ) وهذا أمر جميل نحترمه ونثمنه عالياً

لكن أود أن أشير إلى نقطة في حديثي مع الأخت نون وتطرقت إليها في كلامك وهو ( مصطلح العلوم المادية ) أخي الكريم فشكول لا يوجد مصطلح ( العلوم المادية ) في جميع العلوم .. هذا المصطلح شاع بين ( العامة ) لربطه بالمادة لأنها محسوسة وهو مصطلح لم يتفق عليه العلماء أو واضعو المصطلحات العلمية وقد أشرت في حديثي مع الأخت نون إلى هذا الأمر ( ولم أرد أن اضغط عليها أو أحرجها وأقول لها أأتي لي بتعريف هذا المصطلح من معجم المصطلحات العلمية سواء كانت نظرية أو تطبيقية وهذه أمور أساسية لابد وان يعرفها كل إنسان عادي مفهوم – العلوم المادية ) .


المهم العلوم تنقسم إلى قسمين وهذا التعريف متفق عليه من العلماء والمثقفين وابحث بنفسك عن هذا الأمر حتى تتحقق من صحة هذا الكلام أو عدمه

وقد شرحت ذلك للأخت الفاضلة نون لكن لم يكن هذا الكلام نقطة انتباه لها لأنها كانت تريد أن توضح ما تعتقد فيه فقط دون أن تفهم ما يقوله المحاور الذي أمامها وهو أنا العبد الفقير وهذا خطأ لابد وان اعرف ماذا يقول الذي أمامي أو في ماذا يفكر وماذا يعتقد حتى استطيع أن افهمه واستطيع أن أفكر جيداً في كيفية الرد عليه وعلى ادعاءاته وعلى مزاعمه وعلى أفكاره وان أحاول أن ادعم وجهت نظري من خلال الخلل الذي يوجد في أفكاره وهذه أمور معتمده لدى المفكرين والعلماء والمثقفين والمتعلمين أيضاً .

المهم

أولا :

العلوم العلمية ( الموضوعية – التطبيقية ) مثل الهندسة الكيمياء الرياضيات الطب الفلك والفيزياء .. الخ من هذه العلوم وهو العلوم التي تمارس ممارسة عملية من خلال العمل سواء في المعامل مثل الفيزياء والكيمياء أو في المستشفيات مثل الطب أو في المواقع مثل الهندسة المهم أن تكون عملية أي تنفذ بالعمل ولها مرادفات مثل ( الموضوعية والتطبيقية ) .

وثانياً :

والعلوم ، الفكرية ( النظرية ) : مثل الفلسفة علم النفس علم الاجتماع والأدب وعلم الكلام قديماً وهو فرع من فرع الفلسفة قديماً وقد برع فيه المعتزلة وبعض علماء السنة قديما رداً ادعاءات المعتزلة والتاريخ زاخر بهذه المناظرات وخصوصاً في العصر العباسي الثاني .

وهي العلوم التي تعتمد على الملاحظة والتفكير .. أكثر من أي شيء وهي علوم نظرية ولكنها مهمة لمعرفة حركة التاريخ البشري وأحواله ووضع النظريات الفكرية لتستخدم لخدمة البشرية ورفاهية البشر





حتى عن مفهوم مصطلح الإزاحة في تعريفها له كان مشهوه فقد قالت بالحرف ولك أن ترجع إلى التعليقات في مدونة الأخت نون أن مفهوم الإزاحة هو المسار .. المستقيم .. الذي يقطعه الجسم في حركته من نقطة معينة إلى النقطة الجديدة.

وعندما طلبت منها أن تقول لي من أين أتت بهذا الاصطلاح ولأي علم ينتمي لم تجاوبني وأخذت تكرر ما تقوله في موضوع قداسة العلم وسموه وجعله أداة لمعرفة الله سبحانه وتعالى وهذا أمر لا يختلف عليه

فجلست ابحث عن معنى الإزاحة فوجدتها في علم الرياضيات والهندسة وهو مصطلح يطلق على قياس الزاوية ومدى انحراف الأجسام من مكانها إلى مكان أخر بقياس تحركا وانحرافها وكان التعريف من المعجم الذي يستخدمه الطلبة في المدرسة حتى استطيع أن اعرف هذا المصطلح .

هو :

الإزاحة – الزاوية ) : ( في علم الرياضة ) : البعد الزاوي للمتحرك في أية نقطة كانت ، ( مج ) .

وهناك تعريف سياسي : لهذا المصطلح وهو تنحية أو إبعاد أو إزالة المعارضين والعوائق في العمل السياسي .

وأظن انه اقرب لمفهوم الإزاحة الذي تتحدث عنه الأخت نون ولكن بشكل يختلف بحيث أنها تريد إزالة الشوائب التي تعتبر مسلم بها في العلوم والأفكار من عقول العامة وهكذا .. وهذا أمر جميل لكن لابد وان يكون بطريق علمية صحيحة حتى تستطيع أن تكون لديك مصداقية في الحديث ولا يكون لديك نقاط خلل أو ضعف أو منفذ يستطيع أن يتسلل إليه عارف أو صاحب حيله ليفسد عليك هدفك ويشوش عليك فكر وان يشهر بك وان تكون موضوع تندر وسخرية



فضلاً

عن أني لم أرد أن ادخل في نقاش طويل عن العولمة فقد أشارة ونوهت الأخت الفاضلة نون إلى أنه لا تقدم للمجتمعات العربية والإسلامية إلا من خلل مفهوم العولمة وهذا أمر خطير بالنسبة لي كعربي وكمسلم


فجلس أقول لنفسي هل أثير هذا الموضوع معها واطلب منها أن تعطيني تعريف لمصطلح العولمة الذي تعتقد فيها أو بها .. حتى افهم مع هو مفهوم العولمة من موجهة نظرها .. وكيف فهمته ومن أي مكان استقت هذا التعريف

وقلت لنفسي أيضا يجوز أن يكون لديه تعريف مغلوط أو غير دقيق عن العولمة وهذا ما جعلها تعتقد بأن العولمة هي الطور الحضاري المنشود بالنسبة للأمة العربية والإسلامية


فانا بحثت أكثر من ثلاثة سنوات حتى استطعت أن افهم ماذا تعني كلمة عولمة وما الهدف من وراء هذا المصطلح فوجدت أن العولمة هي أمركة الحياة البشرية على الكرة الأرضية


بمعنى أن كل المجتمعات البشرية على الكرة الأرضية سواء بشكل دول أو إمارات أو ممالك أو قبائل أو عشائر أو عائلات أو أسرة أو أفراد

عليها أن تنتهج الفكر الأميركي في كل مناحي الحياة اليومية لدى الفرد أو الأسرة أو القبيلة أو العشيرة أو العائلة أو الإمارات أو الممالك أو الدول

عليك أن تلبس بالأمريكاني وتأكل بالأمريكاني وتشرب بالأمريكاني وتفكر بالأمريكاني وتعتقد في ما يعتقد به الفكر الأمريكاني وان تعبد ما يعبده الأمريكان بحيث تكون أن تعبد ولا تبعد في نفس الوقت وان تكون الحياة الاجتماعية والسياسية والاقتصادية وعلى الطريقة الأمريكية


هذه هي العولمة وقد جلس المنظرون للعولمة يقولن أنها ( أي العولمة ) هو التطور الطبيعي للحياة البشرية على هذا الكوكب ما دامت أمريكا هي الحضارة المتقدمة الوحيدة على الأرض فهذا هو النموذج الذي لابد وان يحذوا حذوه كل المجتمعات البشرية في هذا العصر .. مثلما كان الماركسيون الشيوعيون يقولن ذلك وهو أن الشيوعية الناتج الحتمي لتطور الحياة البشرية بعد خروجها من الحالة الاشتراكية التي كان يسبقها الاحتكار وسيطرة رأس المال وعبر فلسفة المادية التاريخ من فلسفة الديلتيك تتطور المجتمعات عبر صراع الطبقات لتصل في الأخير إلى المرحلة الشيوعية التي يمتلك فيه كل الأفراد في المجتمعات البشرية موارده وتكون مشاع بين الشعوب والمجتمعات الصغيرة وهذا هو التطور الحضاري المنشود .

وهذا جانب من سؤالي للأخت نون عن فلسفة التاريخ من جانبها الإسلامي وقد يكون هذا مساعدة لها في فهم هذا المصطلح عن هيجل ولكنه بسيط جداً

أخيراً

أنا أسف على الإطالة وعلى هذا الشرح الممل لكن هذا أمر كان لابد منه بحيث تنجلي الصورة بطريقة صحيحة بيني وبين الأخت نون أمام حضرتكم لتكون سند فيما هو آت من حوارات إنشاء الله سوف تكون طريق لنصل به وعليه ومنه إلى النهاية الصحيحة وهي نقطة الاتقاء على فكر موحد ورؤيا لا يكتنفها التشويه أو الوهم والتخيلات والتصورات الشخصية الغير دقيقة

مع خالص احترامي وتقدير

فارس عبد الفتاح ... قومي عربي

فارس عبدالفتاح يقول...

عفواً

تصحيح املائي

المادية التاريخية

مع الشكر

اسماء واحلام فى وجدانى يقول...

اسماء واحلام فى وجدانى

صدفة جميلة يقول...

بسم الله الرحمن الرحيم
اولا كل سنه وانت طيب
ثانيا يمكن دى اول زيارة ليه لحضرتك بصراحه انا زهقان وقولت محتاج حد كبير عنى يساعدنى مافيش حد غير حضرتك كبير سنا ومقاما
بس لقيت عندك كتير من المشاكل الحمد لله
كمان انت رئيس جمهورية بالفعل جمهوريه فشكول بيتك انت زعيمه ياريت تعلم شعبك الكويس وانت بكدة تكون نجحت احسن من اى رئيس ياريت تعدل بين اولادك وتحترم الاراء وانت كدة رائيس ياريت تقدر زوجتك وتحترمها انت كدة رايس وزعيم متندمش على حاجه عملتها لان دا واجب عليك تدافع عن بلدك مهما كان فيها من الازمات وحيتان الكليات العسكريه مش نهايه المطاف المهم البركه وزى محضرتك تفضلت بقول ان مرتبك بسيط لكن تخيل لو ربنا طرح فيه البركه هايكون اه ربنا يبركلك فى ولادك حياتك انا عارف ان الحياة بقت الحمد لله منقدرش نقول غير كدة سيدى الفاضل انا باة كنت باخد اد مرتب سياتك اضعاف الاضعاف بس كان بيجى وعارف طريقهحتى لو فيه زيادة كنت بخاف ياترى هاتروح فين الحمد لله طولت معلش ربنا يكرمك ويساعدنا كلنا على حماية انفسنا واهلنا واولادنا وحياتنا من كل شر وبكدة نكون رئساء بجد مش كلام واوامر وحبر على ورق ياريت تزور مدونتى ياريت علشان اعرف انك قبلتنى صديق اقصد ولا بلاش المهم يارب يوصلك تعليقى

غير معرف يقول...

Thank you, I have just been searching for info about this subject for a long time and yours is the greatest
I have found out so far. But, what in regards to the bottom line?

Are you positive in regards to the supply?

Check out my site ... logedit ()

غير معرف يقول...

What's up, for all time i used to check blog posts here in the early hours in the daylight, because i love to learn more and more.

Here is my web blog ... barbells