الرجاله ... العشره بقرش

فرحان بايه .. جاتك خيبه

السلام عليكم

عيد سعيد وعمر مديد وكل عام وانت جميعا بخيرويعيده الله عليكم بالخير واليمن

والبركات

اليومين دول انا عندى فى البيت مرستان .. عربخانه .. مولد وصاحبه غايب

بنتى جات من السعوديه فى اول رمضان ومعاها حبيبة قلب جدها ملك وحبيب قلب جده محمود اللى وديته المطار من حوالى سنه ونصف وعمره 30 يوم .. ورجع بسم الله ما شاء الله. ربنا يخليهم ويبارك فيهم عندى بقى فى البيت احمد ابن اسامه .. ربنا يحرصهم ويخليهم ويبارك فيه هو كمان .. بس هو موجود عندى تقريبا طول ايام الاسبوع وقاعد يلعب مع جده لوحده وواد مؤدب خالص والله .. قوم ايـــــــه .. لما جاء له ملك ومحمود ولاد عمته واتحدوا الثلاث عيال مع بعض .. عينكم ما تشوف الا النور .. لا كرسى مطرحه .. ولا كبايه ولا شلت الانتريه مطرحها والبيت من اوله لآخره زباله .. اكياس شبسى .. واكياس مش عارف اسمها ايه .. ومكعبات .. وبقيايا اكل فى كل حته .. والبيت يضرب يقلب .. بس حلو ربنا يديمها ضربان قلبان ..

قوم ايـــــــه .. الواد محمود الكبير بقى عامل فيها راجل وكل يوم يشخت فى العيال ويمكن اديه تطول عليهم .. اقوم انا ارد له الصاع صاعين .. انت يا خويا عامل فيها راجل وما حدش قادر عليك .. انت يا بنى ما قريتش فى العلوم شويه وعرفت ان حكاية انك راجل دى ما بقتش عجبه ولا بقت لها لزوم خالص .. يا بنى دول حيخلصوا على جنس الرجاله قريب .. ازاى يا بابا .. قلت له .. اقول لك ازاى .

يا ابنى ربنا خلق آدم من تراب .. وعشان استمرار النوع خلق له حواء من ضلعه واستمر الخلق من يومها لحد النهارده بالطريقه دى وربنا وازن الكون ووازن البشر بالطريقه دى كل راجل يلاقى له من خلق الله حواء وكل حواء تلاقى لها راجل .. قوم ايه .. الخلق بقى الظالمين لانفسهم ومن يوم خلق آدم لحد النهارده الرجاله عامله فيها قمع ومنفوخ وعاوج رقبته كأنه الزناتى خليفه ولا ابوزيد الهلالى .. ويا ارض انهدى ما عليكى قدى ..

قوم ايييييه .. العلماء جابوا دبوس وفرقعوا بيها البلونه دى وقالو للراجل .. يا عم مش عايزين رجاله خلاص ما لكوش لزوم ولا لكم اى قيمه فى الدنيا دى .. ونانوييين يسلموا الرجاله كلها اللى فى العالم للستات ويجمعوهم فى ميدان عام وبالرشاش .. تك تك تك تك بوم ..لحد ما يخلصوا عليهم ويخلصوا بقى من النفخه الكدابه دى واللى عايزه راجل بعد كدا لأغراض البحث .. خدتوا بالكم لاغراض البحث .. دى الحجه اللى حيجيبوا بيها رجاله .. لاغراض البحث .. هما اللى بيقولوا .. اللى عايز يروح يجيب من الجبانه اى حتة عضم ولا شعرة راس لاى راجل ويجيب بويضه من اى واحده ويعملوا استنساخ وطبعا حيكون فيه علماء يحللوا ويحرموا ازاى .. ما تقلقوش موضوع التحريم والتحليل ده حيكون له حل .. المهم حيلقحوها فى بويضه ويجيبوا راجل لاغراض البحث برضه وكفى الله المؤمنين القتال .. ويجيبوا رجاله على قد ما هما عايزين ولا الحوجه لكل الرجاله الكتار اللى فى العالم دول .. اما يا ابنى النساء فمفيش غنى عنهم لانهم هما اللى عندهم البويضه وممكن نستغنى عن الراجل بس البويضه ما لهاش حل الا من النساء عشان كدا ح يبيدوا الرجال بالكامل الا لأغراض البحث يعنى ممكن نجيب حتة الـ DNA من اى عضمه من الجبانه وخلاص ما فيش مشكله ويزرعوا البويضه فى رحم الام وما فيش بربلوم خالص والتفاصيل بقى ابقوا اسألوا عليها الدكتوره ستيته الحمش ..

ومش عايزينكم يا رجاله يا مغرورين . وفى الآخر مش حنلاقى رجاله الا فى اقفاص جنينه الحيوانات والاطفال البنات بقى بيتفرجوا عليهم وبيقولوا لهم خد الموزه دى واعمل عجين الفلاحه والراجل جوه القفص يفرح بالموز ويعمل عجين الفلاحه والبندريه وعجين اهل الصحراء وكل العجائن من اجل صباع موز وياخد صباع الموز ببلاهه ويفشخ بقه ويضحك ضحكه هبله زيه وياكل صباع الموز.. حيوان .. وتختل الموازين وتتغير فطرة الحياه وتبوظ التعادليه اللى ربنا حافظ لنا عليها واحنا من هبلنا وغرورنا حنبوظها.

طب ما فيش رجاله .. والبنات يا عينى عايزين يتجوزا .. فطرة الحياه .. ودى سلعه ناقصه خالص ونادره بالمره ولا يوجد رجال الا لاغراض البحث وفى جنينه الحيوان .. تعالوا بنا نشوف ايه اللى ممكن يحصل؟ قوم ايييه ... زعيمة النساء فى العالم ورئيسة العالم حتعمل ايه ؟ حتروح بقى حديقة الحيوان .. قصدى حديقة النسانيس وتاخد نسناس .. قصدى راجل .. وتاخده القصر معاها .. لاغراض البحث.. وقبل الفجر يكون رجع للقفص بتاعه تانى ..

ومره واتنين وتلاته والعمليه تشيع بين الناس وياخد بيها خبر كل النساء فى العالم والثوار من النساء يروجوا بان موازين العداله اختلت فى العالم ولا توجد عدالة توزيع للثروه وان الزعماء والقواد الصغيرين يستأثرون لنفسهم بالنسانيس وبانه لا يوجد عداله وعشان الواحد ياخد حقه لابد ان يكون من الزعماء او الكبار للنسوان وتقوم ثوره عالميه ضد زعماء النساء .. وتتجه جموع النساء الى حديقة النسانيس .. قصدى الرجاله .. اللى هما تلاته ولا اربع رجاله او يمكن خمسه فى خمسة اقفاص ومن كتر الزحمه اللى تاخد شوية شعر واللى تاخد دراع واللى تاخد ركبه وكل واحده ونصيبها بقى ..

باختصار حيقطعوا الرجاله اللى فى الاقفاص حته حته وتقوم حروب لحد ما ينتهى صنف البشر على الارض عشان احنا اخلينا بفطرة الله على الارض .. ربنا عمل تعادليه فى الحياه .. ربنا بيخلق لكل راجل ست ولكل ست راجل والدنيا تمشى

.. نداء لكل الرجاله

خدوا بالكم من نفسكم واحرصوا على نفسكم قوى .. اصل ما عادش لكم لزوم ولا فايده .. ممكن يعملوا رجاله زى ما هم عايزين وبراحتهم .. حتى حفظ النوع اللى انتم بتتفشخروا بيه .. مابقاش له لازمه ..

مين هناااااااااااااااااااااااااااااك ... البندق يا جدعان ..

الحقوووووووووووووووووووووووونى